’Sëëdhɛ ‑blɛɛzë
’ö Pɔlö ‑ya bɔ
‑Zlan ‑bha mɛ ‑nu ’wo
Kolɛntö
plöö ‑an ‑dhë bhë ’ö ꞊nɛ
11’Sëëdhɛ ’ö ꞊nɛ, ma Pɔlö ’ö ‑Zlan ‑zo ’kun ‑wun ’ka, ’yö n sü kö ’aan‑ kë Yesu Klito ‑bha bɔmɛ ’ka bhë ꞊nɛ ’ö yië‑ kwa dheglu ’nëgɔɔnzë Sɔtɛnë 2’yi‑ bɔ ‑Zlan ‑bha mɛ ‑nu ’ka Kolɛntö, dhegluzë ‑nu ’saadhö ’ö ‑Zlan ‑bha ꞊dhɔɔ ‑yö yö ka ‑bha kö ’kaan‑ kë ‑a ‑bha ’ka ’ö ’ka‑ ‑bha ’ka, kaa‑ Yesu Klito ‑nu ka ‑bha ‑kë do ‑sü ’gü bhë ‑a ‑wun ’gü, waa‑ mɛ ‑nu ’saadhö ’ö ‑dhɛ ’töüdhö ’gü ’ö ’ka ꞊bhɛa’ Dëmɛ Yesu Klito, ka Dëmɛ ’ö yi Dëmɛ ’ka ’pö bhë ‑a ’tɔ ’gü bhë ka ‑dhë. 3Kö kwa Dë ‑Zlan, waa‑ kwa Dëmɛ Yesu Klito ‑wo ’dhuë‑ ’kpɔ ka ‑bha, ‑wo ka gbaa ꞊zuöyagluu ’ka.
‑Zlan zuö pö ‑wo ’ö ‑kë ’wun ‑së ‑nu ‑wun ’gü
4A ma ‑Zlan zuö ‑pö ‑kplawo ka ‑wun ’gü ’wun ‑së ‑nu ’ö‑ ‑kë ka ‑dhë ꞊bɔa’ Yesu Klito ’gü ‑sü ’ka bhë ‑a ‑wun ’gü. 5’Ö tɔɔ kaa‑ Yesu Klito ‑nu ka ‑bha ‑kë do ‑sü ’gü, ’ka kë ꞊bhɔɔzë gbaɔ ‑nu ‑wun ’gü; ’kɛɛ gbaɔ ‑nu mɛ ’wo ‑gban ‑a ‑wo ꞊blɛɛ’ ‑wo waa‑ ’wundɔdhe ‑an ‑bha bhë wo ‑mü. 6‑Tɔmɔdhɛ ’ö ‑kë Klito ‑bha bhë, ‑a ‑wun bhë ‑gban ’ö‑ wo kpinngdhö ka ’gü bhë, 7yö ꞊ga ’ö mɛ ‑nu ’ö ’ka ‑ya kwa Dëmɛ Yesu Klito ‑bha nu ‑yi ‑gɔ bhë ’ö ‑Zlan ‑bha gbaɔ ‑nu bhë ’ö‑ gbɛ yaa ’kun ka ’ka bhë. 8Yö ꞊nɛ ’ö dho ‑a kë kö ’kaan‑ dɔ gɛnngdhö kö ‑yö ’dho ‑yö yöë ‑a ’dhiötodhɛ ‑bha; ‑yö kë ’pö kö ꞊kun ’ö mɛ gbɛ dho ’wun yö ka ‑bha, kwa Dëmɛ Yesu Klito nu ‑yi ’ka. 9‑Zlan ’yö ka ꞊dhɔɔ ‑kë kö kaa‑ ‑a Gbö Yesu Klito, kwa Dëmɛ ’kaan‑ kë do bhë, ‑yö ‑Zlan ’ö to ö ‑wo ‑ta ö ‑bha ’tɔ ’go ‑pë ‑nu ’gü ‑a ’ka.
’Gügludhe ’ö ‑da ‑Zlan ‑bha mɛ ‑nu ziën Kolɛntö
10N dhegluzë ‑nu, a‑ ‑dhɛ ka ‑gɔ kwa Dëmɛ Yesu Klito ’tɔ ’ka, kö ‑kë do ‑sü ‑yö kë ka ‑gɔ; kö ꞊kun ’ö ’gügludhe ‑yö ‑da ka ziën. ‑Kë do ‑sü ‑yö kë ka ‑gɔ ’fɛfɛdhö, kö ka ‑zo ‑ta ‑a ’gü ‑wun waa‑ ka ‑bha ’wun ’dho ’gbloo ‑waan kë do. 11’Wun ’a‑ ꞊blɛɛ ’dhö bhë, n dhegluzë ‑nu, ’ö tɔɔ mɛ ‑nu ’wo go Kloe ‑gɔ kɔɔ ꞊nɛ ’wo nu ’ö ’wun ‑nu ’wo ‑gban ’dhinaa ’ö ‑kë ’ma bhë ‑a ‑bha ’wo‑ ꞊blɛɛ n ‑dhë. 12’Ö tɔɔ mɛ ꞊ya ꞊luu’ ‑de ’ö‑ pö: «A ‑bɔ Pɔlö ’ka»; ‑a mɛ ’bhaa ꞊ya ꞊luu’ ’nö ’ö‑ pö: «A ‑bɔ Apolɔsö ’ka»; ’ö‑ mɛ ’bhaa ‑yö bɔ ‑de ’ö‑ pö: «A ‑bɔ Piɛɛ ’ka»; ’ö mɛ gbɛ ’bhaa ‑yö bɔ ‑de ꞊zian’ ’zü ’ö‑ pö: «A ‑bɔ Klito ’ka.» 13Kö kë‑ wo ka ‑gɔ bhë, Klito ‑yö ‑glu ‑sü ’ka ’pian ꞊plëëzë ’ka e? ’Iin ma Pɔlö ꞊nɛ ’pö ’a ga ‑gaatalü ‑bha ka ꞊wuën’ ꞊e? ’Iin ‑wo ka ‑bɔ yiö n ’tɔ ’ka e?
14A ‑Zlan zuö ‑pö, mɛ gbɛ bɔ ’ö n ’ka‑ wo yiö Yesu ’tɔ ’ka ka ziën ‑a ’ke yaa kë Klipusö waa‑ Gayusö ‑an ’ka bhë ‑a ‑wun ’gü. 15Bhii ꞊ya kë ’pö mɛ gbɛ yaa ’dho ‑a pö ma ꞊nɛ ’wo ka bɔ yiö n ’tɔ ’ka. 16Mɛ mɛ ’ö n ‑zlö ’dhoë‑ trö ‑a ’ka bhë ’ö tɔɔ Sefanasö waa‑ ö ‑bha ’kɔɔmɛ ‑nu. ’Kɛɛ ꞊ya ’kan ‑a ‑bha n ’ka mɛ ’waa gbɛ bɔ yiö. 17Kë‑ wo ’dhö bhë, Klito yaa n bɔ kö ’aan‑ mɛ bɔ yiö; ‑yö n ‑bɔ ꞊zian’ kö ’aan‑ ’wuntaɔsë ꞊blɛɛ’‑; ’iin kö ꞊kun ’a‑ ‑gban mɛbheedhe ‑bha ’kpaakpadhɛ ‑ta, ‑yö kë ’pö kö ꞊kun ’ö Klito ‑bha ‑ga ‑gaatalü ‑bha ‑sü ’ö bhë ’ö‑ ‑wun dho to ’kpaan.
Yesu Klito ‑bha ‑kë ‑Zlan ‑bha ’piigbeedhɛ waa‑ ‑a ‑bha ’kpaakpadhɛ ’ka ‑sü
18’Wun ꞊blɛɛ’ ‑wo ’ö ‑gban Klito ‑bha ‑ga ‑gaatalü ‑bha ‑sü ‑bha bhë, mɛ ‑nu ’ö ’wo ’gü ꞊siö’ ‑zian ‑ta bhë, ‑yö ‑an ‑dhë ’blɔɔn‑ ‑wun ’ka. ’Kɛɛ mɛ ‑nu ’ö ’kwa dha ‑zian ‑ta bhë, ‑yö kwa ‑dhë ‑Zlan ‑bha ’piigbeedhɛ ’ka. 19Bhii pë ’ö ꞊bɛɛn’ ‑sü ’ka ‑Zlan ‑bha ’sëëdhɛ ’gü ‑ya ‑pö: A ‑dho mɛ ‑nu ’wo ’kpaakpa ‑an ‑bha ’kpaakpadhɛ ’gü ꞊siö’‑, ’a ’wundɔmɛ ‑nu ‑bha ’wunbhokoudɔdhe ‑zuö ‑kɔ ꞊taa. 20꞊Ya kë ’pö ‑më ’kpaan ’ö mɛ ’ö ’kpaakpa ’ö dho ‑a pö ’zü i? ‑Më ’kpaan ’ö ’wundɔmɛ ‑nu dho ‑a pö ’pö e? ’Iin ’ö zaɔdhekëmɛ ’ö ’kpongtaa zö ’ö dho ‑a pö ꞊e? Bhii ’ö tɔɔ ’kpaakpadhɛ ’ö ’kpongtaa zö bhë, ‑Zlan ꞊ya ‑dhɛ ’po ‑a ‑ta ‑a ‑zɔn ‑sü ’ka ꞊nɛ ‑yö ’blɔɔn‑ ‑wun ’ka.
21’Ö tɔɔ ’kpongtaamɛ ‑nu ‑bha ’kpaakpadhɛ ‑kɔ yaa ‑mɔ ‑a ‑bha kö ‑ya pö ‑Zlan ‑bha ’kpaakpadhɛ ’ö ꞊nɛ, kö ‑dhɛ ’ö ‑Zlan ’dhoë‑ ‑bha, ‑yaan ‑zɔn mɛ ‑nu ‑dhë. ‑A ‑wun ’gü ’ö ‑Zlan ‑ya ‑kë ’ö‑ ‑bha ’kpaakpadhɛ ’ö mɛ ‑nu ‑wa ‑dhɛ ’blɔɔn‑ ‑wun bhë ’ö ’kwa‑ ‑wun ꞊blɛɛ’ ‑na kö mɛ ‑nu ‑waan dha ‑a ‑wun ‑dhɛ ’wun gia‑ ‑sü ’ka bhë. 22’Ö bhii pë ’ö Zuifö ‑nu ’dhoë‑ ’piö ’ö tɔɔ ‑dhidhaapë, kö ’wo ‑gban ‑a ‑ta; yö ꞊nɛ ’ö Glɛkö ‑nu ‑bha ‑yö ‑kë ’kpaakpadhɛ ’ka ’pö. 23’Kɛɛ ꞊ya kë kwa ‑bha ’ka, Klito ’ö dɔ ‑gaatalü ‑bha bhë ꞊nɛ ’ö ’kwa‑ ‑wun ꞊blɛɛ’‑. ’Wun bhë ‑yö ‑yö yaan ‑sü ’ka Zuifö ‑nu ‑dhë ’ö ’blɔɔn‑ ‑wun ’ka mɛ ‑nu ’waa Zuifö ’ka ‑an ‑bha ’ka. 24‑Yö ’dhö, ’kɛɛ mɛ ‑nu ’ö ‑Zlan ‑yö ‑an ꞊dhɔɔ ‑kë, ‑wo Zuifö ’ka ’iin ’waa Zuifö ’ka, Klito ’ö bhë, ‑yö ‑an ‑dhë ‑Zlan ‑bha ’piigbeedhɛ waa‑ ‑a ‑bha ’kpaakpadhɛ ’ka. 25Bhii ‑Zlan ‑bha ’wun ’ö mɛ ‑nu ‑dhë ’blɔɔn‑ ‑wun ’ka bhë, ‑yö ’kpaakpa ‑wun ’ka ’ö ꞊zië’ mɛ ‑nu ‑bha ‑ta; ’ö‑ ‑bha pë ’ö ’tëëtë mɛ ‑nu wö ’dhiö bhë, ’ö ꞊faanzë ’ö ꞊zië’ mɛ ‑nu ꞊faan’ ‑ta.
26Ka gia‑, ‑ka ‑dhɛ ‑ga bhë ’dhɛ, n dhegluzë ‑nu; mɛ ‑nu ’ö ‑Zlan ‑yö ka ꞊dhɔɔ ‑kë ’ö ka kpö ’dhö do bhë, ‑ka ‑an ‑ga mɛ mɛdhɛ ‑bha bhë ’dhɛ! Ka ziën ’wundɔmɛ ‑nu, mɛ ‑nu ’ö ‑wogbiindhɛ ’dhö ‑an ‑gɔ ’iin mɛ ‑nu ’wo go ’gunng ‑gɔ ꞊vava ‑nu ’gü ’waa ꞊va. 27’Kɛɛ kë‑ wo ’dhö bhë, pë ’ö ’kpongtaamɛ ‑nu ‑wa ‑dhɛ ’blɔɔn‑ ‑pë bhë ‑Zlan ‑ya ‑sü ’ö lë‑ kpɔa mɛ ‑nu ’wo ’kpaakpa zö bhë ‑an ‑ta, ’ö pë ’ö ꞊faan’ ’yaa‑ ’gü ’kpongtaamɛ ‑nu ‑dhë bhë, ’ö‑ sü ’yö lë‑ kpɔa ’gü ’gbee‑ ‑mɛ ‑nu ‑ta. 28Pë ’ö ’kpongtaamɛ ‑nu ‑dhë pë ’ö‑ ‑wun ’yaa ’gbee‑, ’ö ’wo ‑mɔa ‑waan ‑zuö wo ‑kɔ ꞊taa ’ö ’yaa ‑an ‑dhë pë gbɛ ’ka bhë, ‑Zlan ‑ya ‑sü ’ö pë ’ö‑ ‑wun ’dhö ’gbee‑ ‑a wö ’dhiö ’ö‑ ’gü ꞊siö ‑a ’ka. 29꞊Ya kë ’dhö kö mɛ gbɛ yaa ’dhö ‑mɔa kö ‑yö ö ‑de ’sü ꞊va ‑Zlan wö ’dhiö. 30’Kɛɛ ‑Zlan ꞊ya ka kpa Yesu Klito ‑bha, ꞊ya ka kë do; ’go mü ’ö ꞊yaa‑ kë kwa ‑bha ’kpaakpadhɛ ‑go ‑a ’gü ‑mɛ ’ka; kwa ‑bɔ Klito ‑ta ’ö kwa ‑kë kpengdhö ‑Zlan wö ’dhiö, ’ö kwa ‑kɔ ‑mɔ ‑a ‑bha kö ’kwa ‑tosiadhe kë ‑Zlan ‑bha ’ka; ’go mü ’yö kwa bho këpëyaamɛ ‑gɔ ’gan ’gü. 31‑A ‑wun ’gü pë ’ö ꞊bɛɛn’ ‑sü ’ka ꞊ya pö: Mɛ ’ö‑ ’piö kö ’yö ö ‑de kë ’gɔugɔ, kö ‑yö ‑dho ö ‑de kë ’gɔugɔ pë ’ö kwa Dëmɛ ‑ya ‑kë ‑a ‑wun ’ka.
2’Wun ’ö ‑gban Klito ’ö dɔ ‑gaatalü ‑bha ‑a ‑bha
1N dhegluzë ‑nu, nu ’a‑ wo ka ꞊plöö ’ma bhë, ’wun ’ö ‑gban ‑Zlan ‑bha ’wun giagia ’ö ‑bin ‑sü ’ka bhë, ‑a ꞊blɛɛ’‑ ’a‑ wo bhë, n ’ka‑ kë ’wun ꞊blɛɛ’ ‑wo ’ö‑ ’gü ma ‑sü ’dhö ’gbee‑ ’iin ’wun ‑yö ’ko ’dhiö ‑kɔ ꞊suu’‑ ’bhaa gbɛ ’ka; 2’ö tɔɔ ’töng ’a ꞊kaa’ ka ’piö ’ma bhë, n ‑zo yaa kë ’wun gbɛ ’waa ’piö ‑a ’ke yaa kë Yesu Klito ‑wun ’ka. ’Ma‑ pö ’dhö kö a‑ ‑pö Yesu Klito ’wo‑ dɔ ‑gaatalü ‑bha bhë. 3‑A ‑wun ’gü ꞊nɛ ’ö nu ’a‑ wo ’ma bhë ’a n ‑de ‑kë ’tee ’iin ’ö ’suö ꞊va ‑yö ‑kë n ‑ma. 4Yö ꞊ga ’ö ma mɛ ꞊daan’ ‑wo ‑nu waa‑ n ‑ma ‑Zlan ‑wo ꞊blɛɛ’ ‑wo ‑nu ’wo bhë ’ö waa ‑gban mɛ ’bhee‑ ‑bha ’kpaakpadhɛ ‑ta, ’kɛɛ ’wo ‑gban ‑Zuu ’slööslö ‑bha ’wun ‑ga mɛ ’gü ‑sü ’ö ‑kë ‑dhidhaapë ‑nu ’ö ‑kë ’ö mɛ ’plɛ ’yan ‑yö ‑da ‑a ’gü ’ö‑ ‑gɛn go ‑Zlan ’piö bhë ‑a ‑ta. 5‑Yö kë ’dhö kö ꞊kun ’ö ’ka dho ka ‑bha ‑zo ‑yö ‑Zlan ‑bha ‑sü ‑gban mɛ ’bhee‑ ‑bha ’kpaakpadhɛ ‑ta ’kɛɛ kö ‑yaan ‑gban ‑Zlan ‑bha ’piigbeedhɛ ‑ta ꞊zian’.
‑Zlan ‑bha ’kpaakpadhɛ
6Kë ’ö‑ wo ’dhö bhë, yi ’kpaakpadhɛ ‑wun ‑blɛɛ mɛ ‑nu ’ö ꞊wa kë mɛ ‑dee ‑nu ’ka ‑Zlan ‑bha ’wun ‑nu ’gü bhë ‑an ‑dhë. ’Kɛɛ yaa kë ꞊nɛ ’kpaakpadhɛ ’ö go ’kpongtaa ’iin ’piigbeedhɛ ‑nu ’ö ’wo ‑ya ‑sü ’ka ’kpongtaamɛ ‑nu ‑gɔ ’dhiö ’ö ’wo ‑ya ‑sü ’ka kö ‑an ’gü ‑yö ꞊siö’‑ bhë ꞊nɛ ’yi ‑an ‑bha ’kpaakpadhɛ ‑wun ꞊blɛɛ. 7‑Abi’; ‑a mɛ ’yi‑ ꞊blɛɛ ’ö tɔɔ ‑Zlan ‑bha ’kpaakpadhɛ ’ö ‑bin ‑sü ’ka mɛ ’bhee‑ ‑nu ‑gɔ bhë; ‑Zlan ‑ya ‑ya ’dhö ’dhiö kö ’kpongtaadhɛ yaa kë ꞊kun kö ‑yaan kë kwa ‑bha ’tɔbhɔdhe ’ka yi ’ö ’kwa dho ‑da ‑a ’ka ꞊toëpö ‑kë ‑a ’gü ‑sü bhë ‑a ’gü bhë ‑a ’ka. 8Yö ꞊ga ’ö ’piigbeedhɛ ‑nu ’wo ’kpongtaa zö bhë ’ö ‑an gbɛ yaa‑ dɔ bhë; ’ö bhii ꞊ya kë ꞊nɛ ‑wa ‑dɔ ‑bezë, kö waa ’dho kwa Dëmɛ ’tɔbhɔsüzë bhë, ‑a dɔ ‑gaatalü ‑bha. 9‑A ‑wun ’gü, pë ’ö ꞊bɛɛn’ ‑sü ’ka ‑Zlan ‑bha ’sëëdhɛ ’gü ‑ya ‑pö: Pë ’ö mɛ gbɛ ’yan yaa ‑da ‑a ’gü do, ’ö yaa‑ ‑taɔ ma do, pë ’ö mɛ gbɛ ‑zo yaa ‑lo ‑a ‑ta ’gbɛɛdhö bhë, ‑Zlan ꞊yaa‑ ‑wun yö ’ko ’dhiö ö ‑bha mɛ ‑nu ’wo‑ ‑dhɔ ‑kë ‑a ’ka bhë ‑an ‑dhë. 10Pë ’ö ’dhö bhë, ‑Zlan ‑yö bɔ ‑Zuu ’slööslö ’gü ’ö ’dhɛ bho ‑a ‑ta kwa ‑dhë; ka gia‑ ka‑ ꞊tɛi’ ‑dɔ ꞊nɛ ‑Zuu ’slööslö ’ö bhë ‑yö ‑dhɛ ‑yö ’wun ‑nu ’saadhö ’gü; ‑kɔ do bhë ’ö ‑dhɛ yöë ‑Zlan ‑bha ’wun ‑nu ’ö‑ yö ’ko ’dhiö ’ö ’wo ‑bin ‑sü ’ka ’fɛfɛdhö ‑an ’gü. 11’Ö ꞊ya kë ꞊nɛ ’kwa mɛ ‑nu ’sü do do ’ka, mɛ ’ö ‑dhö, ’wun ’ö‑ ꞊zuö’ ’gü bhë, mɛ ’kpaan gbɛ yaa ‑mɔ ‑a ‑bha ‑yaan dɔ, ’ö yaa kë yö ‑de gia‑ ‑a ’ka, ‑kɔ do bhë ’ö‑ ’ka ‑Zlan ‑bha ’ka ’pö; ‑Zuu ’slööslö ’ö go ‑a ’piö bhë ꞊nɛ ’ö ’wun ‑nu ’wo ‑gban ‑a ‑bha bhë ’ö ‑an dɔ. 12Yö ꞊ga ’ö kwa ’kwa bhë, ‑Zuu kwa ‑gɔ bhë, ’yaa ’kpongtaa ‑zuu ’ka. ‑Yö ‑Zuu ’ö go ‑Zlan ’piö ‑a ’ka ‑yö kë ’pö kö pë ’saadhö ’ö ‑Zlan ‑ya nu kwa ‑dhë bhë ’kwaan‑ dɔ. 13’Ö ’yi mɛ ‑nu ꞊daan’ ‑na ‑an ‑wun ’ka bhë; ’kɛɛ kë‑ wo ’dhö bhë mɛ ‑nu ꞊daan’ ’yi‑ wo ‑na bhë ’yiëë‑ kë mɛ ’bhee‑ ‑bha ’wundɔdhe ’gbloo ’piö; ‑yö ‑kë ꞊zian’ ’wun ‑nu ’ö ‑Zuu ’ö go ‑Zlan ’piö bhë ’ö‑ dɔ ‑na yi ’dhii bhë ‑a ’ka. ‑Kɔ bhë ꞊nɛ ’ö ꞊ya kë ’ö ’yi ’wun giagia ‑nu ’wo ‑gban ‑Zlan ‑bha bhë ’ö ’yi ‑an ’zü pöë mɛ ‑nu ’ö ‑Zuu bhë ’ö ‑an ’gü bhë ‑an ‑dhë.
14‑Zuu ’ö go ‑Zlan ’piö bhë, mɛ ’ö ’yaa‑ ’gü, yaa ‑mɔa kö ’wun giagia ‑nu ’wo go ‑Zuu bhë ‑a ’gü ‑yö ‑an ‑gɛn ma, ’ö tɔɔ ‑a ‑bha ’ka ’wun ‑nu ’wo bhë ‑wo ’blɔɔn‑ ‑wun ‑nu ’ka; yaa ’dho ‑mɔ ‑a ‑bha kö ‑ya ‑gɛn ma, bhii ‑wo ’wun ‑nu ‑bho ’kou ‑kë ‑Zuu ’ö bhë ‑a ꞊kwaa’. 15Mɛ ’ö ‑Zuu ’ö go ‑Zlan ’piö bhë ’ö‑ ’gü, ‑yö ‑mɔ ‑a ‑bha kö ‑yaan ’wun ‑nu ’saadhö ‑bho ’kou kë, ’kɛɛ mɛ gbɛ yaa ’dho ‑a ‑bha ’wun ‑dan ’kuë ‑kɔ ‑ga. 16Bhii pë ’ö ꞊bɛɛn’ ‑sü ’ka ‑Zlan ‑bha ’sëëdhɛ ’gü ‑ya ‑pö: Mɛ ’ö dhö kwa Dëmɛ ‑bha ‑zotadhe dɔ kö ‑yaan pë ‑zɔn ‑a ‑dhë ’yaa ’dhö. ‑Yö ’dhö, ’kɛɛ ’ö kwa ’kwa bhë, Klito ‑bha ‑zotadhe ‑yö kwa ’gü; ka‑ ‑yö bhë ꞊a?
3’Wun ’ö ‑gban ‑Zlan ‑bha yuökëmɛ ‑nu ‑bha
1N dhegluzë ‑nu, ’wun gia‑ ’ka, ’wun ‑nu ’a‑ ꞊blɛɛ ka ‑dhë bhë, n ’ka‑ ꞊blɛɛ’ ꞊nɛ mɛ ’wun ꞊blɛɛ mɛ ‑nu ’ö ‑Zuu ’ö go ‑Zlan ’piö ’ö ‑an ’gü bhë ‑an ‑dhë; ’a‑ ‑blɛɛ ka ’ka ꞊nɛ ‑dhɛ ’wo‑ pö ‑a ‑bha ’kpa mɛ ‑nu ’ö ’waa ‑Zlan dɔ wo ‑mü ’iin ’në ’sɛɛn‑ ‑nu ‑mü ‑zo ‑yö ‑Zlan ‑bha ‑sü ’gü ‑a ’dhö. 2‑A ꞊tɛi’ ‑yö ‑kë ꞊nɛ ‑kɔ ’wo ’në ‑nu ’dhi gba ‑na ‑a ’ka bhë ‑a ’dhö. ’Nɔnɔ ꞊nɛ ’a‑ nu ka ‑dhë; n ’ka ‑bhöpë giagia nu ka ‑dhë, bhii ka ‑kɔ yaa ‑mɔ ‑a ‑bhö ‑sü ‑bha; ’ö dɔ ‑de ’kwa‑ wo ꞊nɛ ’ö ka ‑kɔ yaa ‑mɔ ‑a ‑bha ꞊kun. 3‑A ‑gɛn tɔɔ ka ꞊tun ’ta sü ꞊nɛ mɛ ’ö ’waa ‑Zlan dɔ ‑an ’dhö. Pë ‑kë ’a‑ pö ’dhö bhë ’ö tɔɔ ꞊druɛi ‑kë ’kuë‑ ‑sü waa‑ ‑dɔn ‑bho ’kuë ‑sü ‑wo ꞊tun ka ziën. Pë ‑nu ’wo bhë, ‑wa ‑zɔn ꞊nɛ mɛ ‑nu ’ö ’waa ‑Zlan dɔ ‑an ’ta ’sü ‑kɔ ’ö ’ka‑ ‑ta bhë; ’ö‑ ‑de ’dhö ’dhö bhii mɛ ’bhee‑ wɔ ‑kɔ yaa ꞊nɛ ’ö bhë. 4Ka ziën mɛ ꞊ya bɔ ‑de ꞊yaa‑ pö: «A ‑bɔ Pɔlö ’ka», ’iin ‑a mɛ do ’bhaa ꞊ya bɔ ‑de ꞊yaa‑ pö: «A ‑bɔ Apolɔsö ’ka» kö ka ’wun kë ‑kɔ ’yaa ꞊tun ꞊nɛ mɛ ’bhee‑ kë ‑kɔ ’dhö a?
5꞊Ya kë ꞊nɛ ’kwa ‑dhɛ ‑ga ‑a ’gü ‑së ’ka, dö ‑mü Apolɔsö ’ka ’iin dö ‑mü Pɔlö ’ka ’pö e? ‑Zlan ‑bha yuökëmɛ ‑nu ’kpaan, ’ka bɔ ‑an ‑ta ’ka Yesu ‑wun ‑dhɛ ’wun gia‑ wo ‑mü. Mɛ ’ö ‑dhö pë ’ö dɔ ‑a ꞊tian’ ’ö kwa Dëmɛ ‑ya nu ‑a ‑dhë kö ‑yaan kë ꞊nɛ ’ö‑ ‑kë. 6‑Kwaa ‑zɔn pë ta ‑sü ’ka, ’kwa ‑dhɛ ‑ga ‑a ’piö ’dhɛ! N ‑ma tɔɔ ’lü ’në ta ‑sü. Apolɔsö ꞊nɛ ’ö ’yi ‑lo ‑a ‑ta; ’kɛɛ kë‑ wo ’dhö bhë ‑Zlan ꞊nɛ ’yö‑ ‑kë ’ö ’lü ’në ‑nu ’wo bhë, ’wo ꞊kpɛa. 7꞊Ya kë ’dhö kö mɛ ’ö pë ta waa‑ mɛ ’ö ’yi ‑lo pë ‑ta ‑an ‑bha ‑dɔ ‑dhɛ gbɛ ’yaa‑ ’gü. Bhii ‑Zlan do ꞊nɛ ’ö‑ ’plɛ ‑gɛn ‑yö go ‑a ’gü, ’ö tɔɔ yö ꞊nɛ ’ö‑ ‑kë ’ö ’lü ’në ‑nu ’wo bhë ’wo ꞊kpɛa. 8Kö mɛ ’ö pë ta waa‑ mɛ ’ö ’yi ‑lo pë ‑ta waa kë mɛ do ’ka e? Bhii mɛ gbɛ yaa ziö ö ’bha ‑ta. Mɛ ’ö ‑dhö ‑Zlan ‑dho ‑a ’kian nu ‑a yuö kë ‑kɔ ‑bha. 9Yi ’pö, yi ‑nu ’ko ‑dhë ‑mɛ ‑nu ’ka ‑Zlan ‑bha yuö kë ‑sü ’gü, ’ö ka ‑zë, ’ka ‑Zlan ‑bha ꞊bhlöödhɛ ’ka; ’ö ’ka‑ ‑bha ’kɔ ’ka ’pö. 10Kë‑ wo ’dhö bhë ’ö tɔɔ ‑Zlan ‑yö ö ‑bha yuö ‑sü ’ö‑ dɔ n kwɛɛ ’ö yuö bhë ’a‑ ‑kë ꞊nɛ ’kɔdɔmɛ ꞊kwɛɛ’ ‑së ‑zë ’dhö, ’ö ’kɔ bhë ’a‑ ꞊gban ’lü ‑nu ‑gban. ꞊Dhɛ ꞊ya kë ’pö, ’ö mɛ gbɛ ‑yö nu ’ö ’kɔ bhë ’ö‑ dɔ. ’Kɛɛ kë‑ wo ’dhö bhë mɛ ’ö ‑dhö, ‑yö ö ‑zo ‑kë ö ‑de ’piö ’kɔ ꞊luu’ ‑kɔ ‑wun ’gü. 11Bhii mɛ ’ö ’kɔ ‑gban ’lü ‑nu ’dhö ‑gban ‑sü ’ka ‑a ’gü ’ö tɔɔ Yesu Klito. ꞊Ya kë ’dhö kö mɛ gbɛ yaa ’dho ꞊gban ’lü ‑nu gbɛ ‑gban gbɔ ’kɔ bhë ‑a dɔ ‑sü ’gü. 12Mɛ ’bhaa ‑nu ‑wo ‑dho ’sënng ‑nu, ’wëü‑ ‑nu waa‑ ‑guö ’yanbhɔsüzë ‑nu sü kö ‑waan dɔ ’kɔ ‑gban ’lü ‑nu bhë ‑an ‑ta, ’ö mɛ ’bhaa ‑nu ‑wo ’lü ‑nu waa‑ ‑mlü ‑gbo ‑nu sü ’wo ’kɔ dɔa. 13’Kɛɛ mɛ ’ö ‑dhö, ‑a ‑bha yuö ꞊kaa’ ‑pë ‑nu ‑wo ‑dho yö ‑dhɛgbɛadhɛ ’gü ‑Zlan ‑bha zakanyi ’ka; ’ö tɔɔ ‑an ’plɛ ‑dho bɔ siöö yi bhë ‑a ’ka ’ö mɛ ’ö ‑dhö ’ö‑ ‑bha yuö pin ‑yö yö ‑dhɛgbɛadhɛ ’gü. 14’Ö tɔɔ mɛ ’ö ’kɔ dɔ ’kɔ ‑gban ’lü ‑nu bhë ‑an ‑ta, ’ö ꞊ya bɔ siöö, ’ö‑ ’gü yaa ꞊siö’, kö ‑a ’kian ‑dho nu. 15’Kɛɛ mɛ ’ö‑ ‑bha ’kɔ dɔ pë ‑nu bhë ’ö ‑an ’gü ꞊ya ꞊siö’‑ ’siö ꞊kwaa’ kö ‑a ’kian ’yaa ’dhö; ’kɛɛ kë‑ wo ’dhö bhë, yö gia‑ ‑yö ‑dho dha; ’kɛɛ ‑a ꞊tɛi’ ‑yö ‑dho kë ꞊nɛ ꞊dhɛ ’ö dha ‑a ‑bha ’siö ‑gɔ ‑a ’dhö.
16‑Yö ka ’yaan ’ka ꞊nɛ ‑Zlan ‑bha ’kɔ ‑mü ka ’ka; ’ö ‑Zlan ‑bha ‑Zuu ’dhö ‑ya ‑sü ’ka ka ’gü. 17Kö ‑kaa dɔa ꞊nɛ mɛ ꞊ya ‑Zlan ‑bha ’kɔ bhë ‑a ’wü, ‑Zlan ‑dho mɛ ’ö ’dhö bhë ‑a ’gü ꞊siö’ ’pö bhii ‑Zlan ‑bha ’kɔ ‑yö ’slööslö, ’ö ’ka‑ ‑bha ’kɔ ’ö ’dhö bhë ‑a ’ka.
18꞊Kun ‑kë ’ö mɛ gbɛ ‑yö ö ‑de ‑püö ‑a pö ‑sü ’ka ö ‑de ꞊zuö’ ’gü ꞊nɛ ö ’kpaakpa. ꞊Yö ‑së ꞊zian’ kö ‑yö ö ‑de kë ꞊nɛ mɛ ’ö ’yaa ’kpaakpa ‑a ’dhö ’kpongtaamɛ ‑nu wö ’dhiö kö ’kpaakpadhɛ ’ö go ‑Zlan ’piö bhë ‑yaan kë ‑a ‑gɔ. 19Bhii ’kpaakpadhɛ ’ö ’kpongtaa zö bhë ‑yö ’blɔɔn‑ ‑pë ’ka ‑Zlan wö ’dhiö. ‑A ‑wun ’gü pë ’ö ꞊bɛɛn’ ‑sü ’ka ‑Zlan ‑bha ’sëëdhɛ ’gü ‑ya ‑pö: ‑Zlan ‑yö ’kpaakpamɛ ‑nu ‑kun ’sɔ ’gü wo ‑de ‑gɔ ’kplaakpladhɛ ‑ta. 20’Ö‑ pö ’zü: Kwa Dëmɛ ‑ya ꞊dɔa’ ꞊nɛ ’kpaakpamɛ ‑nu ‑bha ‑zotadhe ‑yö ‑a ‑bha ‑pë gbɛ ’yaa ’dhö. 21‑A ‑wun ’gü, kö ꞊kun ’ö mɛ gbɛ ‑yö ö ‑bha ‑kë ’gɔugɔ ‑sü ‑gɛn ‑gban mɛ ’bhee‑ ’gü; bhii pë ’saadhö ‑yö ‑dɔ ka ‑bha ’ka. 22‑Yö Pɔlö ’piö oo, ‑yö Apolɔsö ’piö oo, ‑yö Piɛɛ ’piö oo, ‑yö ’kpongtaadhɛ, ‑këdhösü, ꞊dɛɛ ‑pë waa‑ ꞊dhia’ ’piö ‑pë, waa‑ ga ‑nu ‑an ’plɛ ‑wo ka ‑bha ’ka. 23’Kɛɛ ka ‑zë, ka Klito ‑bha ’ka, ’ö Klito ‑de ’pö ’ö ‑Zlan ‑bha ’ka.
4’Wun ’ö ‑gban Klito ‑bha bɔmɛ ‑nu ‑bha
1꞊Ya kë ’dhö kö ka ꞊dua’ ‑mü ’kaan‑ yi ‑ga ꞊nɛ Klito ‑bha yuökëmɛ ‑nu ’ö ’wun giagia ‑nu ’wo ‑gban ‑Zlan ‑bha ’ö ’wo ‑bin ‑sü ’ka ’wo dɔ ‑sü ’ka yi kwɛɛ kö ’yiën‑ ‑an ‑wun ꞊blɛɛ’‑ ‑an ’dhö. 2Pë ꞊ya kë ’wo‑ ‑dhɛ mɛ ’ö ’wun ’dho ‑lo ‑sü ’ka ‑a kwɛɛ ‑a ‑gɔ ’ö tɔɔ ‑yö kë ‑zo ‑yö ‑a ‑bha ‑mɛ ’ka. 3꞊Ya kë n ‑ma ’ka, za ‑dɔ mɛ ‑bha ‑sü ’ö go ka ’piö ’iin ’ö go zadɔmɛ ‑nu ’piö bhë yaa ’dho n ꞊zuö’ ’to zlöö. Kë ’ö‑ wo ’pö bhë yaa kë ꞊nɛ za ’ö n ‑ma bhë ma ‑de ꞊nɛ ’a‑ ‑kan. 4‑Yö ’wun gia‑ ’ka ’pö ꞊nɛ n ꞊zuö’ yaa za dɔ n ‑ma ’kɛɛ kë‑ wo ’dhö bhë yaa kë ꞊nɛ pë ’wo‑ pö kö ꞊ya kë ’dhö kö ’wun ’yaa n ‑ma yö ‑mü ‑a ’dhö. Kwa Dëmɛ ꞊nɛ ’ö tɔɔ mɛ ’ö‑ ’yan ’dhö n ‑ma. 5‑A ‑wun ’gü kö ꞊kun ’ö ’ka za ’kan ‑sü yi to ’dhiö ’ö ’ka za ‑lo mɛ tuö; ‑ka kwa Dëmɛ ’dhiö ’gan kö ‑yö nu; ’ö tɔɔ yi bhë ‑a ’ka pë ’ö ‑bin ‑sü ’ka ‑dhɛtiidhɛ ’gü, ‑yö ‑dho ‑a yö ‑dhɛpuudhɛ ’gü, ’ö mɛ ’bhee‑ ‑nu ꞊zuö’ ’gü ‑wun ‑nu ’wo ‑bin ‑sü ’ka, ’ö ‑an yö ‑dhɛgbɛadhɛ ’gü. Yi bhë ‑a ’ka, mɛ ’ö ‑dhö ‑a ‑bha ’tɔbhɔdhe ’ö ‑Zlan ’piö, ‑yö ‑dho ‑a yö.
6N dhegluzë ‑nu, ’wun ‑nu ’a go ‑na ‑a ꞊blɛɛ’ ꞊dhia ꞊nɛ, a‑ ‑gban yië‑ Apolɔsö yi ‑bha ’ö ’a‑ ꞊blɛɛ ’dhö kö ‑yaan kë ka ‑bha ’wun kë ‑kɔ ꞊zuan’ ’ka. Kë‑ wo ’dhö bhë ’ö tɔɔ a‑ ’piö kö ’wun ꞊zuan’ ’ö bhë ’ka bɔ ‑a ‑ta kö ka ’ta ’sü ‑kɔ ‑yö kë ‑Zlan ‑bha ’sëëdhɛ ꞊bɛɛn’ ‑wo ‑naa ’gü. Kö ꞊kun ’ö mɛ gbɛ ‑bha ‑de ‑sü ꞊va ‑bɔa ’ka ‑mɛ ‑yö ‑kë ‑dhö, ’ö ’ka mɛ ’bhaa bho yunng (‑an dan ’ka‑ wo ’kuë ‑an ‑bha mɛ ꞊daan’ ‑wo ‑bha bhë ‑a ‑wun ’gü). 7Kë ‑dewo poo bhë, ü ‑kë ꞊bhlëzë mɛ ‑nu ’wo to ‑an ‑ta ꞊dhë ꞊ɛ? ‑Më ’ö ü ‑gɔ ’ö ‑Zlan yaa ü gbaa ꞊ɛ? ꞊Dhɛ ‑kë ’dhö ꞊nɛ ‑më ‑kë ’ü ü ‑de sü ꞊va pë ‑nu ’wo ü ‑gɔ ‑a ‑wun ’gü ꞊nɛ pë ’wo‑ pö gbaɔ ’yaa ‑mü ‑a ’dhö e?
8꞊Ao, ’ma‑ ma. Pë ’ö ’ka ‑ya ‑a ꞊wuën’, ꞊ya kë ka ‑gɔ ’saadhö! ’Ka kë ꞊bhɔɔzë ’saadhö! ’Ka kë ‑gludë ‑nu ’ka, ’kɛɛ kö yi ‑zë ’yiëë‑ ’ka. ꞊Ɛɛ, ꞊ao’! ‑Gludëdhɛ ’ö bhë ‑kaa ‑a ‑de kë kö ’yiën‑ kpa ka ‑bha ’kwaan‑ kë kwa ’ko ꞊bhaa. 9Bhii ‑yö ‑kë n ’gü ꞊nɛ, mɛ ’yi Yesu ‑bha bɔmɛ ‑nu ’ka ꞊nɛ ‑Zlan ‑yö yi ‑ya ‑dɔdhɛ ‑kaanta ‑bha. Yi ꞊tɛi’ ‑yö ‑kë ꞊nɛ mɛ ‑nu ’ö ga ‑sü ‑za ꞊ya ‑lo ‑an tuö mɛ ’kpɛkpɛ wö ’dhiö ‑an ’dhö. ’Yië kë ’kpongtaamɛ ‑nu ’plɛ waa‑ ‑Zlan ‑bha bɔmɛ ‑nu ’plɛ ‑an ‑bha ‑ga ‑pë ’ka. 10Yi ’blɔɔnmɛ ’ka Klito ‑wun ’gü; ’kɛɛ ka ‑zë, ka ’kpaakpa Klito ’gü ꞊zian’; yi ’pö ꞊faan’ ’yaa yi ‑gɔ, ’kɛɛ ka ‑zë ka ’gü ꞊ya kë ’gbee‑; yi ’pö, ‑wo ’yan ꞊ziö’ ‑kë yi ’ka, ’kɛɛ ka ‑zë ‑wo ka ꞊bhlë ‑ya. 11Dɔ ’kwa‑ wo ꞊dɛɛ ‑yi ꞊nɛ ‑a ’gü yi ’klo ꞊tun bhɔ din waa‑ ’yi mü ‑dhɔ ‑an ‑wun ’gü; ‑kë ‑bha ‑sɔ ’yaa yi ‑gɔ; yi ‑ma ꞊nɛ ’wo ꞊tun ‑a wo; ꞊ziö’ ’ziö ꞊nɛ ’yi‑ wo ꞊nëdhö, ’ö tɔɔ yi ‑ya ‑dhɛ kpinngdhö ’yaa ’dhö. 12꞊Sëëbhodhe ꞊nɛ ’yi‑ sü yuö kë ‑sü ’ka kö ’yiën‑ yi ‑bha ‑tosiadhe ‑kë ‑a ‑ta ‑pë yö ‑a ’gü. ꞊Wa ’si bho yi ‑gɔ, ’dhuë‑ ꞊nɛ ’yi‑ kpɔ ‑an ‑bha; ꞊wa ’klobhɔdhe wɔ yi ‑ta, yi‑ ‑bun; 13꞊wa ’wun yaa ꞊blɛɛ’‑ yi ’ka, ‑a ‑daa kë ꞊nɛ ’yi‑ wo ‑an ‑gɔ ’bha ‑dhɛ ’gü. ‑Wo ꞊tun yi ‑ga ꞊nɛ mɛ ꞊suu’‑ yaazë ’wo ’kpongtaa ’ö ‑an ꞊bhlë gbɛ ’yaa ‑an ‑bha ‑an ’dhö.
14N ’ka ’sëëdhɛ ꞊nɛ ‑a bɔ kö lë‑ ‑yaan ’kpɔ ka ‑ta, ’kɛɛ kö ’aan‑ ka ’paan bho ꞊nɛ ma ’në ‑nu ’ö ‑an ‑dhɔ ‑yö n ‑kë ‑an ’dhö. 15Bhii ’kö ‑kë ꞊nɛ ’dhiö ‑sü ka ’ka ‑mɛ ‑wo ‑vuu ’gɔɔ‑ do Klito ’gü, ‑yö kë ka ’yaan ’püë‑ wo ꞊nɛ ka dë ‑yö do; ’ö tɔɔ ’wun ’ö ‑gban ka ‑bha ‑këdhösü ’ö Yesu Klito ’gü ‑a ‑bha bhë, ma ꞊nɛ ’a tɔɔ ka dë ’ö ’wuntaɔsë bhë ’ö bɔ n ‑ta ’ö ’ka‑ ma. 16꞊Dhɛ ’ö ’pö, pë ’a‑ ‑dhɛ ka ‑gɔ ’ö tɔɔ ’ka n ’sü ka ‑bha ’wun ꞊zuan’ ’ka ka wɔ ‑kɔ ’gü. 17Pë ’ö ‑kë ’ö n gbö ‑dhɔkësüzë Timote ’ö ‑klu ‑sü ’ka Dëmɛ ‑bha bhë ’ö ’a‑ bɔ ‑na ka ‑dhë ’ma ’ö bhë, ‑yö kë ’dhö kö ‑yö ka ‑zo ‑büö ma ’wun ’zü ‑gbandhɛ ‑nu ’wo ’dhiö ’sü ‑na n ’ka Yesu Klito ’gü bhë ‑an ’ka ꞊nɛ ‑kɔ ’a ‑Zlan ‑bha mɛ ‑nu ’saadhö ꞊daan’ ‑na ‑a ’ka ‑dhɛ ’saadhö ’gü ‑Zlan ‑bha mɛ ‑nu ziën bhë ‑a ’dhö.
18Mɛ ’bhaa ‑nu ’wo ka ziën ‑wo wo ‑de ’sü ‑na ꞊va ꞊nɛ n ’ka ’dho nu ka ’piö ’ma. 19’Kɛɛ a nu ‑na ’ma ‑dëüwo, kö kwa Dëmɛ ꞊ya ’we ‑a ‑bha, ‑yö kë ’dhö kö ‑desüvamɛ ‑nu ’ö ’a ‑an ‑wo ma ‑na bhë kö ’aan‑ ‑an dɔ; ’aan‑ ‑an ‑bha ‑kɔ ‑mɔ ’wuën‑ ‑sü dɔ ’pö, 20’ö tɔɔ ‑Zlan ‑bha ‑gludëdhɛ ‑wun ’plɛ kun tɔɔ ’wun ꞊blɛɛ’ ‑wo ‑nu ’kpaan, ‑ya këpë ‑nu ’ka ’pö. 21꞊Ɛɛ, ’kwa‑ ma. ꞊Dhɛɛ’ ‑yö n ‑gɔ ’aan‑ ’kpɔ. Ka‑ ’piö kö ’a nu ka ’piö ’ma ‑klaaga ’ka ’iin ’a nu n ‑kɔ ’kpaan ’ka ‑dhɔ waa‑ ‑kë ’lëëlë ‑sü ‑an ’ka e? (‑A ‑mlë ’ka‑ ’piö e?)
5’Wun ‑go zian‑ ‑sü ‑zë ‑bha ‑da ‑Zlan ‑gɔ kɔɔ ‑sü
1’Wun ’a‑ ma ‑na ‑dhɛ ’saadhö ’gü ꞊nɛ, ‑yö ’wun ’ö ꞊sɔɔn yaa ‑go zian ‑sü ‑zë ’ö mɛ ‑nu ‑de ’waa ‑Zlan ‑bha mɛ ‑nu ’ka ’ö waa ’dho ‑a ka bhë ‑a ’ka ka ziën. ’Ö tɔɔ mɛ do ‑yö ka ziën ’ö waa‑ ö dë bɔɔ ’wo wo ’ko ’piö. 2’Ö ’wun ꞊suu’‑ bhë, ’ka‑ ꞊gaa’ ’dhö ’ö ’ka ka ‑de sü ꞊va. Pë ’ka dho ‑a kë ‑bezë ꞊zian’ ’ö tɔɔ ’më ’ö dhoë‑ wo ka ’ka ’ö ꞊ya kë ’dhö mɛ bhë ’ka‑ bho ka ziën. 3-4꞊Ya ’to n ‑ma, ’kö ‑kë ꞊nɛ a ka ’ka ꞊gbiin n mɛdhɛ ’gü, n ꞊zuö’ ‑yö ka ’piö ’ma. ’Kɛɛ mɛ ’ö pë ‑nu ‑kë ’dhö bhë, ‑a ‑wun bhë ’ma‑ ’kan ’saadhö kwa Dëmɛ Yesu ’tɔ ’gü ꞊nɛ ꞊dhɛ ’wo‑ pö ‑a ‑bha giagia ’ka ꞊nɛ a ka ’piö ’ma ‑a ’dhö; ’kɛɛ kë‑ wo ’dhö bhë ꞊ya kë ꞊nɛ ’ka ’dho ka ’ko ꞊bhaa ’ö ma ‑de ’pö ’ma kë ka ’piö ’ma n ꞊zuö’ ’gü, ’piigbeedhɛ ’ö go kwa Dëmɛ Yesu ’piö bhë ‑yö ‑dho kë kwa ziën. 5Kwa ‑wo ‑yö kë do kö mɛ bhë ’kwaan‑ dɔ Satan kwɛɛ kö ‑yaan ’klo bhɔ ‑a bun ’gü, ‑yö kë ’dhö kö ‑a nii ‑yaan dha kwa Dëmɛ Yesu ‑bha zakanyi ’ka.
6’Wun ’ö ’ka‑ kë ‑na ka ‑bha ‑de ‑sü ꞊va ‑wun ’ka bhë ’yaa ‑së. Kë‑ wo bhë ‑a ꞊tɛi’ ’pö kaa‑ dɔ ꞊nɛ ꞊bluubhɛɛpë ’teete ‑yö ’bluu‑ ‑bhla bhë ꞊ee? 7‑Ka ꞊bluubhɛɛpë zii ’ö ꞊sɔɔn yaa ’ka bhë ‑a bho ka ‑bha kö ’kaan‑ kë ’slööslö! ꞊Ya kë ’pö ka ‑dho kë ꞊nɛ ’bluu‑ ’yi ‑dëü ’ö‑ ꞊bhɛɛpë ’yaa‑ ’piö bhë ‑a ’dhö. ’Kɛɛ kë‑ wo ’dhö bhë, ma ’pö a‑ ꞊dɔa’ ꞊nɛ ka‑ ‑mɛ ‑nu ’ka. Bhii ’ö tɔɔ kwa ‑bha Paakö ’wlaan‑ kë ‑sü zü ꞊ya dɔ ’saadhö; yö ꞊ga ’ö Klito ꞊ya kë sla‑ bhë ‑a ꞊bhoë’ ’bhlanë ’ö ‑ziö kwa ‑bha ꞊sɔɔn yaa ‑ta bhë ‑a ’ka bhë. 8Kö ‑kwa ꞊zuögludhi kë; ’kɛɛ ꞊kun ‑kë ’kwa‑ ‑kë ꞊bluu’‑ ’ö‑ ꞊bhɛɛpë zii ’ö ‑kë ꞊sɔɔn yaa waa‑ ’wun ‑go zian‑ ‑sü ‑zë ’ka bhë ’ö‑ ’piö bhë ‑a ’ka. ‑Kwa kë ꞊zian’ ꞊nɛ ꞊bluu’‑ ’ö‑ ꞊bhɛɛpë ’yaa‑ ’gü ’ö ‑kë ꞊bluu’‑ ’ö ‑de ‑ta, ’ö ’wun giagia ’ka bhë ‑a ’ka.
9’Sëëdhɛ ’a‑ bɔ ka ‑dhë bhë, pë ’a ‑ya ‑a ’gü yö kun tɔɔ kö ꞊kun ’ka ’bhadhɛ kun mɛ ‑nu ’wo ‑tosiadhe kë ‑na ’wun ‑go zian‑ ‑sü ‑zë kë ‑sü ’gü bhë ‑an ’ka a? 10N ‑ma ‑zotadhe kun tɔɔ mɛ ‑nu ’wo ’kpongtaa, ’wo ’wun ‑gɔ ‑bho zian‑ ‑mɛ ‑nu, ‑ya pë ‑dhɔ ’ka ‑mɛ ‑nu, ꞊kwaanmɛ ‑nu, waa‑ gbapë gbamɛ ‑nu ‑an ’ka bhë, ’ka ziö ka ’ko ‑nu ‑ta, ’ka ’san giagia ’ka ka ’ko ‑nu ’ka. N ‑ma ‑zotadhe yaa ’dho ’dhö. ’Ö ꞊ya kë ꞊nɛ ‑yö ’dhö ‑bezë kö ka ‑dho go ’kpongtaa. 11’Kɛɛ pë ’a‑ ’piö ’ö tɔɔ mɛ ‑nu ’wo wo ‑de ‑dhɛ ‑na Klito ‑bha mɛ ‑nu ’ö ’wo ’wun ‑nu ‑gɔ ‑bho zian‑ ‑mɛ ‑nu, ‑ya pë ‑dhɔ ’ka ‑mɛ ‑nu, gbapë gbamɛ ‑nu, ’si ‑bho mɛ ‑gɔ ‑mɛ ‑nu, yɔmümɛ ‑nu waa‑ ꞊kwaanmɛ ‑nu ‑an ’ka bhë, ’ka ’kan ‑an ‑bha ꞊zian’! Kö ꞊kun ’ö ka ‑nu ’ka pë ‑nu ‑bhö ka ’ko ꞊bhaa ‑dewo poo.
12-13Ma ‑më ‑de ’ö mɛ ‑nu ’waa Klito ‑bha mɛ ’ka ’ö ‑an ‑bha kö ’aan‑ za dɔ ‑an ‑bha; ‑Zlan ꞊nɛ ’ö dho ‑an ‑bha za kan. Mɛ ‑nu ’ö ’ka dho ‑dhɛ ‑ga ‑an këwun ‑nu ’piö ’wo tɔɔ ka kpö ’gü ‑mɛ ‑nu ꞊zian’; bhii pë ’ö ꞊bɛɛn’ ‑sü ’ka ‑Zlan ‑bha ’sëëdhɛ ’gü ‑ya ‑pö: ‑Ka mɛ ’gluyaazë kë ‑yö ’go ka ziën.
6Mɛ ‑nu ’ö ’waa ‑Zlan dɔ ‑an ‑bha mɛ ‑nu ’wo ‑Zlan ‑bha ’ka ‑an ‑bha za ’kan ‑sü
1‑Më ‑kë ’ö mɛ ꞊ya kë ka ziën, ’ö‑ ‑bha ’wun ꞊ya kë ö dheglumɛ ‑bha, ’ö ’yaa dhoë ‑Zlan ‑bha mɛ ‑nu ’piö, ’ö dhoë ꞊zian’ zakanmɛ ‑nu ’ö ’waa ‑Zlan dɔ ‑an ’piö e? 2‑Yö kë ka ’yaan ꞊nɛ ‑Zlan ‑bha mɛ ‑nu ‑wo ‑dho za dɔ ’kpongtaamɛ ‑nu ‑bha za kan. Ka ’ö ’ka dho ’kpongtaamɛ ‑nu ‑bha za ’kan bhë, ‑yö ‑kë ꞊dhë ’sa ’ö ’wun pë ’toutou ‑nu bhë ’wo ‑kë ka ziën ’ö ’kaa ‑mɔ ‑a ‑bha ’ka ‑an ’kan ꞊nɛɛ? 3‑Yö kë ka ’yaan ꞊nɛ kwa ‑dho ‑Zlan ‑bha bɔmɛ ‑nu ‑bha za kan; ’yö mɛ ’ö ’kwa bhë, ‑më ‑kë ’ö kwaa ’dho ‑mɔ ’wun ‑nu ’wo ’kpongtaa zö ‑an ꞊blɛɛ’ ‑sü ‑bha ‑ɛ? 4’Kɛɛ kö ’wun ‑nu ꞊wa ‑da ka ziën ’sa, ’ö zakanmɛ ‑nu ’ö ‑an ‑bha pë gbɛ ’yaa ‑Zlan ‑bha mɛ ‑nu ‑bha ’piö bhë ’ka ‑an ꞊dhɔɔ ‑kë! 5A‑ ‑blɛɛ ’dhö! ’Wun bhë ‑yö ka ‑bha lë‑ ‑wun ’ka. A‑ ꞊dɔa’ ꞊nɛ mɛ ’ö ’kpaakpa ’ö ‑mɔ ‑a ‑bha kö ‑yö ’wun ‑nu bho dhegluzë ‑nu ziën ‑yö ‑mɔ ‑a ‑bha kö ‑yö kë ka ziën ’ma. 6꞊Ya kë ꞊nɛ ‑kɔ bhë ‑a ’dhö, kö ‑yö ‑dhɛ ‑ma ‑kun zlöö kö ’wun ꞊ya ‑da dhegluzë ‑nu ziën, kö ‑wo ’dho wo ’ko ‑nu ’ka zakanmɛ ‑nu ’ö ’waa ‑Zlan dɔ ‑an ’dhiö a?
7Ɛɛ, ’ö ka‑ ‑yö bhë ꞊a! ‑A ‑de pë ‑nu ’kwa ’we ‑na ‑an ’ka bhë ‑an ‑bha ‑da ka ziën ‑sü bhë ‑ya ‑zɔn ꞊nɛ ka ‑kɔ ꞊ya ’kun ’wun kë ‑sü ’ka. ’Ö bhii ‑më ‑kë ’ö ’wun ’toutou ‑nu ’wo bhë ’kaa ‑an ’to ka ziën ’iin ’ö ’kaa ka ꞊kwaa’ ka ‑de ‑zü ’waa ka ꞊kwaan ꞊ɛn? 8’Ö ka ‑zë ’ö ’wun ’yaa kpengdhö ’ka ‑an ‑kë; ’ö ’ka ꞊kwaan ‑nu wo ka dhegluzë ‑nu ‑gɔ ꞊zian’ ’zü a! 9’Kɛɛ kë‑ wo ’dhö bhë, ‑yö kë ka ’yaan ꞊nɛ pë yaakëmɛ ‑nu waa ’dho ‑da ‑Zlan ‑bha ‑gludëdhɛ ‑pö ’gü. A‑ ‑blɛɛ ka ‑dhë ’dhö ‑wa! ’Wun ‑gɔ ‑bho zian‑ ‑mɛ ‑nu, kwiga gbamɛ ‑nu, ‑dadhepiömɛ ‑nu, mɛ ‑nu ‑bha gɔɔn‑ ꞊mɛɛ’ ‑dhe ‑nu, 10gɔɔn‑ ‑nu ‑bha ‑wɔ ’kuë ‑sü kë ‑mɛ ‑nu, ꞊kwaanmɛ ‑nu, ‑ya pë ‑dhɔ ’ka ‑mɛ ‑nu, yɔmümɛ ‑nu, ’sibhomɛ ‑nu, mɛzëmɛ ‑nu ’wo bhë ’töüdhö, ‑a mɛ gbɛ yaa ’dho ‑da ‑Zlan ‑bha ‑gludëdhɛ ‑pö ’gü. 11Mɛ ’bhaa ‑nu ‑wo ka ziën ’ö ‑an wɔ ‑kɔ ‑yö ‑kë ꞊nɛ ‑kɔ ꞊suu’‑ bhë ‑a ’dhö kö waa Yesu ‑wun ‑dhɛ ’wun gia‑ ꞊kun. ’Kɛɛ ’ka kë ’slööslö ꞊sɔɔn yaa ‑gɔ; ’ka kë ‑ya ‑de ‑ta ‑mɛ ’ka ‑Zlan ‑bha ’ka; ’ka bɔ kwa Dëmɛ Yesu Klito ’tɔ waa‑ ‑Zuu ’ö go kwaa‑ ‑Zlan ’piö bhë ‑an ‑ta, ’ka kë kpengdhö ‑Zlan ‑bha ’ka.
’Wun ’ö ‑gban ‑zo ‑kë ‑de bun ’piö ‑sü ‑bha ‑Zlan ‑bha ’ka
12Mɛ ꞊plëëzë ‑wo ka ziën ’ö ꞊ya kë ’wo‑ pö ꞊ya kë ꞊nɛ ꞊wa Yesu ‑wun ‑dhɛ ’wun gia‑, pë ’ö ‑dhi mɛ ‑dhë, ‑wo ‑mɔ ‑a ‑bha ‑wa kë. ‑Yö ’dhö, ’kɛɛ pë ’saadhö ’plɛ kë ‑sü ’yaa ‑së. A ‑mɔa kö ’a‑ pö ’dhö ’püë‑ wo; ’kɛɛ n ’ka ’dho n ‑de kë pë gbɛ ‑bha ꞊nua ’ka. 13’Wun ꞊zuan’ do ’bhaa ’ö tɔɔ ’wun ’ö ‑gban ‑bhöpë ‑bha bhë; ’ö ꞊ya kë ka‑ ‑pö: «‑Bhöpë ’dhodhɛ tɔɔ kwa ’guu; kö ’gu ‑bha tɔɔ ‑bhöpë.» ‑Yö ’dhö, ’kɛɛ kwaa ’dho pë ‑bhö ’kwaan‑ ‑a ziö ꞊gɔü’; ’ö tɔɔ ‑bhöpë ’ö bhë pë ’ö‑ ‑wun ’dho ’gbee‑ ’ö ‑ziö ‑a ’ka pë ’plɛ ‑ta yö kun; bhii pë ꞊plɛ ’wo bhë ‑Zlan ‑dho ‑an ’gü ꞊siö’‑ do do ’ka. Mɛ ’bhee‑ bun ’ö bhë ’pö yaa ‑da kö ‑yaan kë ’wun ‑nu ‑gɔ ‑bho zian ‑sü ‑zë ‑nu ꞊kaa’ ‑pë ’ka. ‑Yö ‑dɔ kwa Dëmɛ ‑bha dɔ ’ka ’ö Dëmɛ ‑de ’pö ’ö bun ꞊kɔɔnmɛ ’ka. 14꞊Ya kë ’dhö bun ’ö ‑Zlan ‑yö kwa Dëmɛ ‑bha bho ga ’gü bhë, ‑yö ‑dho kwa ‑bha bho ga ’gü ’pö ’ö ‑këdhösü nu ‑a ‑dhë ö ‑bha ’piigbeedhɛ ꞊kwaa’.
15‑Yö kë ka ’yaan ꞊nɛ ka bun ‑nu ’wo tɔɔ Klito dɔ ‑nu. ꞊Ya kë ’pö kö a ‑dho Klito bun dɔ ‑nu do sü ’aan‑ kë ꞊sɔɔn yaa ꞊kaa’ ‑pë ’ka a? 16‑Abi’ ’gbɛɛdhö! ’Ö tɔɔ gɔɔn‑ ’ö waa‑ ꞊sɔɔnkëdhe ꞊wa wɔ wo ’ko ’piö kö ꞊wa kë mɛ ‑lü do ’ka ꞊nɛ bhë bhii pë ’ö ꞊bɛɛn’ ‑sü ’ka ‑Zlan ‑bha ’sëëdhɛ ’gü ‑ya ‑pö: Mɛ ꞊plɛ ’wo bhë ‑wo ‑dho kë mɛ ‑lü do ’ka. 17Yö ꞊ga ’ö mɛ ’ö ꞊ya kpa kwa Dëmɛ ‑bha ’ö wo ‑nu ’wo ‑kë ‑Zuu do ’ka.
18‑A ‑wun ’gü ꞊nɛ ’ö ’ka dho ꞊duë ’wun ‑yö yaan ‑sü kë ‑sü ‑dhë ’ö tɔɔ ꞊sɔɔn yaa mɛ ’ö pin dho to mɛ ‑lü ‑bha ‑yaan ziö ‑a mɛ ’ö ꞊nɛ ‑a ‑ta ’yaa ’dhö; bhii mɛ ꞊ya ꞊sɔɔn kë kö ꞊ya ꞊sɔɔn yaa kë ö ‑de bun ’ka. 19‑Yö kë ka ’yaan ꞊nɛ ka bun ’ö tɔɔ ‑Zuu ’slööslö ‑bha ’kɔ. ‑Zuu bhë ꞊nɛ ’ö ‑Zlan ‑ya nu ka ‑dhë ’ö ‑ya ‑sü ’ka ka ’gü; ꞊ya kë ’dhö kö ’kaa ka ‑de ‑bha ’ka gbɔ. 20Bhii ‑Zlan ꞊ya ka ’dhɔ ꞊sɔnng’ ꞊va ’ka, kö ‑ka ka bun ‑nu kë ‑Zlan ’tɔ ‑bhɔ ‑a ’ka ‑pë ‑nu ’ka.
7’Wun ’ö ‑gban gɔɔn‑ waa‑ dhe ‑an ‑bha wo ’ko ’sü ‑sü ‑bha
1’Kwa yö ’wun ’ö ka‑ ’gü ꞊dhɛɛ’ kpɔ n ‑gɔ ’sëëdhɛ ’ka‑ bɔ n ‑dhë ‑a ’gü bhë ‑a ‑bha; ’wun mɛ ’ö ‑gban dhe ’sü ‑sü ‑bha bhë, ꞊yö ‑së kö gɔɔn‑ ’ö ‑dhö ‑yö ’to ’kwɛa ’ka. 2’Kɛɛ ꞊sɔɔn kë ‑sü ’ö ꞊ya ‑pɛn ꞊duö bhë ‑a ‑wun ’gü, ꞊yö ‑së kö gɔɔn‑ ’ö ‑dhö, ‑a bɔɔ ‑yö kë ‑dhö, kö dhebɔ ’ö ‑dhö, ‑a ꞊gɔn ‑yö kë ‑dhö. 3Dhe ꞊gɔn ‑yö ‑dho pë ’ö dho ‑a kë ö bɔɔ ‑dhë ‑a kë; ‑kɔ do bhë ꞊nɛ ’ö dhebɔ ‑de ’pö ’yö dho pë ’ö‑ ꞊dua’ ’ka ö ꞊gɔn buëndhö ‑a kaa ‑a ‑dhë. 4Dhebɔ yaa ’dho ö ‑dhi ‑a ‑dhë ‑wun kë ö bun ’ka, ’ö tɔɔ ‑yö ‑ya ‑a ꞊gɔn ‑bha ’ka; ‑kɔ do bhë ’ö‑ ’ka ’pö gɔɔn‑ ’piö ꞊zian’ bhii ‑a bun ‑ya bɔɔ ‑bha ’ka. 5‑A ’ke yaa kë ꞊nɛ ‑mɔ ’ka‑ wo ‑a ’gü ’ö ’ka ’töng sü ’ö ’ka ꞊bhɛa ‑a ’ka ‑Zlan ‑dhë, kö ꞊kun ’ö ’ka ‑kan ’kuë‑ ’ö mɛ ’ö ‑dhö ’ö ‑wɔ ‑dhɛ gbɛ ’gü. ꞊Ya kë ꞊nɛ ’töng bhë ꞊ya ziö, ka ‑bha ꞊sɛɛ’ ‑yö kë do ’zü ‑dëüwo; ‑yö kë ’dhö kö ꞊kun ’ö kaa ka ꞊zuökuënnudhɛ gbɛ yö gbɔ, ’ö Satan ‑yö ka ‑püö.
6‑A pö ’a‑ wo ’dhö bhë, yaa kë ꞊nɛ ka ’gbee‑ ‑ta ’a‑ wo ꞊nɛ ‑kaa kë ꞊nëdhö ’iin ‑a mɛ mɛ ꞊nɛ ‑kaa kë ‑kɔ ’bhaa mɛ ꞊nɛ ‑a ’gü. ‑Yö ka ’paanbhowo ’ka. 7‑Yö n ‑zo ’piö ‑be kö mɛ ‑nu ’saadhö ‑wo kë ꞊nɛ n ’dhö; ’kɛɛ kë‑ wo ’dhö bhë, ‑Zlan ‑yö gbaɔ ‑kë kwa ‑dhë do do ’ka. Mɛ ’ö ‑dhö pë ’ö‑ ꞊tian’ ꞊nɛ ’ö‑ yö.
8Mɛ ’wo ꞊tun ’kwɛa ’ka waa‑ dhoo ‑nu ’ö ’wo ꞊gɛandhoo ‑nu ’ka bhë, ‑yö ‑dho kë ‑së kö ‑wo ’to ’dhö ꞊nɛ n ’dhö. 9’Kɛɛ ’ö ꞊ya kë ꞊nɛ waa ‑mɔ wo ꞊zuö’ kuënnu ‑sü ‑bha, kö ‑wo wo ’kosüdhe waa‑ ꞊gɔɔn ‑an ’ka; ’ö tɔɔ ’yaa ‑së kö ’ka ’to ’kwɛa ’ka ’iin ꞊gɛan ’ka ’kɛɛ kö dhe ‑wun ’iin gɔɔn‑ ꞊ya ‑da ka ꞊zuö’ ’gü.
10Dhoo ‑nu kaa‑ ka ꞊gɔn ‑nu, ‑ka ka ’to kë ‑së ’ka ‑dhiodɔwo ’ö ꞊nɛ ‑a ‑bha; n ‑wo ’yaa ‑mü. Kwa Dëmɛ ‑ya ‑pö kö ꞊kun ’ö dhebɔ ’ö gwaan ’ö ‑kan ö ꞊gɔn ‑bha! 11’Ö ꞊ya kë ꞊nɛ ‑an ‑bha gwaan ꞊ya ’kan, kö ꞊kun ’ö ꞊gɔn gbɛ sü gbɔ; ’yaa ’pö kö ‑yö ’yɛ ö ’zü ‑yö nu ö ꞊gɔn ’piö. ‑Kɔ do bhë ’ö‑ ’ka ꞊gɔn ’piö ’pö. Yö ’ka ’dho ö bɔɔ bho ’blü!
12Mɛ ’ka to, a‑ ‑pö ka ‑dhë n ‑de ꞊woë’ ꞊nɛ: Mɛ ’ö Yesu Klito ‑wun ‑dhɛ ’wun gia‑ ‑mɛ ’ka, ’ö‑ bɔɔ ’yaa Klito ‑bha mɛ ’ka ’kɛɛ kö ‑a bɔɔ bhë ‑ya ’piö kö ‑wo ’to wo ’ko ’piö bhë, kö ꞊kun ’ö‑ bho ’blüü! 13‑Kɔ do bhë ’ö‑ ’ka dhebɔ ’ö Yesu Klito ‑wun ‑dhɛ ’wun gia‑ ‑dhe ’ka ’ö‑ ꞊gɔn ’yaa‑ Klito ‑bha mɛ ’ka bhë ‑a ’piö ’pö. Yaa ’dho go ö ꞊gɔn ’piö ’kɛɛ kö yö ‑zë ‑ya ’piö kö ’wo ’to wo ’ko ’piö. 14Bhii ‑Zlan ’yan ‑yö gɔɔn‑ ’yaa Yesu Klito ‑wun ‑dhɛ ’wun gia‑ ‑mɛ ’ka bhë ‑a ‑bha, ‑a ‑bha ‑to ö bɔɔ ’piö ‑sü ’gü ‑an ‑bha ‑kë dhe waa‑ ꞊gɔn ‑an ’ka ‑sü ‑wun ’gü; ‑kɔ do bhë ’ö‑ ’ka dhe ’ö ’yaa Yesu Klito ‑wun ‑dhɛ ’wun gia‑ bhë ‑a ‑bha ’ka ’pö, ’ö bhii ’yaa ’pö ‑be kö ‑an ‑bha ’në ‑nu ’wo bhë ‑wo ‑dho kë mɛ ‑nu ’ö ’waa ‑Zlan ‑bha ’ka ‑an ’ka. ’Kɛɛ kö ’kwa ‑dhɛ ‑ga ‑a ’piö ‑së ’ka, ‑Zlan ‑kɔ ‑së ‑yö ‑an ’piö. 15’Ö ꞊ya kë ’zü ꞊nɛ ’pian ꞊plɛ ’wo bhë ‑an ’piö, mɛ mɛ ’ö ’yaa Yesu Klito ‑wun ‑dhɛ ’wun gia‑ bhë ꞊nɛ ’ö‑ ’piö kö ’ö ’kan ö ’bha ‑bha, kö ‑ya kë ’pö; ’kɛɛ Yesu Klito ‑wun ‑dhɛ ’wun gia‑ ‑mɛ ’ö bhë ’yaa ꞊nëng ‑sü ’ka ’wun ‑dhɛ mɛ bhë ‑a ’gü; ’ö tɔɔ ‑Zlan ‑yö kwa ꞊dhɔɔ ‑kë kö ’kwaan‑ kë ꞊zuöyagluu ’gü. 16Bhii ’ö tɔɔ bhi ’ü dhebɔ ’ka bhë, ü ‑dho ‑a ꞊tɛi’ dɔ ‑më ‑bha ꞊nɛ ü ‑dho ‑a kë kö ü ꞊gɔn ‑yaan dha ꞊ɛ, ’iin bhi ’ü gɔɔn‑ ’ka bhë, ‑më ’ü dho ‑a dɔ ‑a ‑bha ꞊nɛ ü bɔɔ ‑dho dha ꞊ɛɛ?
’Ta ‑sü ‑kɔ ’ö ‑Zlan ‑zo ’kun ‑wun ’gü
17꞊Ya ’kan ’wun mɛ bhë ‑a ‑bha, mɛ ’ö ‑dhö, ‑a wɔ ‑kɔ ‑yö kë ꞊nɛ ‑kɔ ’ö kwa Dëmɛ ‑ya ꞊yaa’ ‑a ꞊zuö’ ‑bha kö ꞊yaa‑ ꞊dhɔɔ kë ‑yaan kë Yesu ‑wun ‑dhɛ ’wun gia‑ ‑mɛ ’ka bhë ‑a ’dhö. ‑Dhiodɔwo ’a‑ dɔ ‑na Yesu ‑wun ‑dhɛ ’wun gia‑ ‑mɛ ‑nu ‑dho ’kuë‑ ‑sü ‑nu ’gü ‑dhɛ ’saadhö ‑bha ’ö bhë. 18Mɛ ’ö go ’bɔng kö yaa kë Yesu ‑wun ‑dhɛ ’wun gia‑ ‑mɛ ’ka ꞊kun, ’ö ꞊ya kaa zlöö bhë kö ꞊kun ’ö ö ‑de ‑kë ꞊zuö’ ‑to zlöö ‑mɛ ’ka Zuifö ‑nu ‑bha wɔ ‑kɔ ’ö ‑kë ‑dho ’bɔng ‑sü ’ka bhë ‑a ‑wun ’gü. ’Iin mɛ ’ö ‑Zlan ‑ya ꞊dhɔɔ ‑kë kö yaa ’dho ’bɔng ꞊kun bhë, kö ꞊kun ’ö ö ‑de ‑kë ‑dho ’bɔng ‑mɛ ’ka. 19Bhii ü ‑dho ’bɔng oo, ü ’ka ’dho ’bɔng oo, ‑Zlan ’to ’yaa‑ gbɛ ‑bha. Pë mɛ ’ö‑ ‑wun ’dhö ’gbee‑ ’ö tɔɔ ‑a ‑bha tɔng ‑nu ’kun ‑sü. 20Mɛ ’ö ‑dhö ‑yö ’to ꞊nɛ ‑kɔ ’ö ꞊kaa’ kö ‑Zlan ꞊yaa‑ ꞊dhɔɔ kë bhë ‑a ’dhö. 21꞊Ya kë ꞊nɛ ü ‑kë ꞊nua ’ka ‑Zlan ‑yaan ꞊tun ü ꞊dhɔɔ kë ‑na, kö ꞊kun ’ö ü ꞊zuö’ ‑yö to zlöö. ’Kɛɛ ꞊ya kë ꞊nɛ ü ‑bɔ ‑a ‑ta ‑pë ꞊ya kë ‑dhö kë ’üën‑ ’go ’gan ’gü, kö ‑bhö ‑a ’kun ’gbee‑ kö ‑potaasü ‑yaan kë ü ‑gɔ! 22Kë‑ wo ’dhö bhë ’ö tɔɔ mɛ ’ö to ꞊nua ’ka ’ö kwa Dëmɛ ‑ya ꞊dhɔɔ ‑kë kö ‑potaasü ‑ya ‑gɔ, ’go mü ’ö‑ ‑bha ’wun ’plɛ ‑yö ‑gban kwa Dëmɛ ‑bha. ‑Kɔ do bhë ’ö‑ ’ka mɛ ’ö ‑potaasü ‑yö ‑kë ‑a ‑gɔ ’ö Klito ‑ya ꞊dhɔɔ ‑kë bhë ‑a ‑bha ’ka ’pö, bhii kö ꞊ya kë ‑a ‑bha ꞊nua ’ka. 23‑Zlan ꞊ya ka ’dhɔ ꞊sɔnng’ ꞊vaazë ’ka ’saadhö (Klito fɛi ’ka); ꞊kun ‑kë ’ka ‑kë mɛ ’bhee‑ ‑gɔ ꞊nuadhɛ ’gü! 24N dhegluzë ‑nu, a‑ ‑pö ka ‑dhë: Mɛ ’ö ‑dhö ‑yö to ꞊nɛ ‑kɔ ’ö ꞊kaa’ kö ‑Zlan ‑yaan ꞊tun ‑a ꞊dhɔɔ kë ‑na bhë ‑a ’dhö.
’Wun ’ö ‑gban mɛ ‑nu ’wo ’kwɛa ’ka ‑an ‑bha
25’Wun mɛ ’ö ‑gban mɛ ‑nu ’ö ’waa gwaan ’iin ’ö waa dhe ’sü ‑an ‑bha bhë, tɔng yaa ’go kwa Dëmɛ ’piö ‑a ꞊wuën’; ’kɛɛ a ‑mɔa ’aan‑ ‑wun ꞊blɛɛ’ ’ö tɔɔ kwa Dëmɛ ‑bha ’glusë ’gü ꞊yaa‑ kë ’ma kë mɛ ’ö mɛ ‑nu ‑wo wo ‑zo tën n ‑dhë ‑a ’ka.
26꞊Dhɛ ’ö ‑kë ꞊nɛ ’töng ’ö ’kwa‑ ’gü ꞊nɛ ‑yö ’wun ’gbee‑ ‑nu ‑bha ’töng ’ka bhë, n ‑ma ‑zotadhe ’ö tɔɔ ꞊yö ‑së gɔɔn‑ ‑bha ’ka kö ‑yö ö bha ’to ꞊nɛ ‑kɔ ’yö‑ ’ka bhë ‑a ’dhö. 27꞊Ya kë ꞊nɛ dhe ‑yö ü ‑gɔ, kö ꞊kun ’ü‑ bho ü ’piö; ’ö ꞊ya kë ’zü ꞊nɛ dhe ’yaa ü ‑gɔ, kö ꞊kun ’ü ü ‑de ‑kë dhe ’sü ‑dhɔ ’ka! 28’Kɛɛ kë‑ wo ’dhö bhë, yaa kë ꞊nɛ kö mɛ ’ö ꞊ya dhe ’sü ’iin ’nëdhezë ’ö ꞊ya ’dho gwaan kö ꞊ya ꞊sɔɔn yaa kë ’yaa ‑mü. ‑A pö ’a‑ wo ’dhö bhë ’ö tɔɔ ’në gɔɔn‑ waa‑ ’nëdhezë ’wo wo ’ko ’sü ‑na dhe waa‑ ꞊gɔn ‑an ’ka bhë, ‑an ’yënng ‑dho bhɔ ꞊va ‑an ‑bha ‑kë ’ko ’piö ‑sü bhë ‑a ’gü. Pë ’ö ‑kë ’a‑ ’piö kö ‑yö ’san ka ’ka bhë ’ö bhë.
29‑A pö ’a‑ wo ’dhö bhë, n dhegluzë ‑nu, ’ö tɔɔ ‑tosiadhe ’ö ’kpongtaa zö bhë, ‑a ’dhiötoyi ’yaa ꞊gbiin gbɔ bhë. ‑A ‑wun ’gü ’go ꞊dɛɛ ‑bha, mɛ ’ö dhe ’dhö ‑a ‑gɔ, ‑yö kë ꞊nɛ mɛ ’ö ’yaa‑ ‑gɔ ‑a ’dhö, ’wun ’ö ‑gban ‑Zlan ‑bha ‑a ’gü (’ö tɔɔ ꞊kun ‑kë ö ‑gɔ kɔɔ ‑wun ‑yö ‑kë ‑a ‑bha ‑zo ‑ta ‑a ’gü ‑wun do ’ka). 30Kö mɛ ‑nu ’wo ’gbo bɔ ‑na, ‑wo kë ꞊nɛ mɛ ‑nu ’ö ’waa ’gbo bɔ ‑na ‑an ’dhö; kö mɛ ‑nu ’wo ’yee ’to ‑na, ‑wo kë ꞊nɛ mɛ ‑nu ’ö ‑kpɛ ’yaa ‑an ‑bha ‑an ’dhö; kö mɛ ‑nu ’ö ’wo pë ’dhɔ ‑na ‑wo kë ꞊nɛ mɛ ’ö pë ’wo‑ dhɔ bhë ’ö ’yaa ‑an ‑gɔ ‑an ’dhö; 31kö mɛ ‑nu ’ö ’kpongtaapë ‑sɛɛbɔ ’dhö ‑an ‑gɔ, ‑wo kë ꞊nɛ mɛ ‑nu ’ö ’yaa ‑an ‑gɔ ‑an ’dhö; bhii ’kpongtaadhɛ ’ö ’ka‑ ‑ga ‑na bhë, yaa ’dhö ꞊glɔɔ ꞊duö gbɔ.
32A‑ ’piö kö ’ka ka bo ‑dɔ pë ‑nu ꞊zɔnng’ ‑ta ‑sü ’ka. ’Ö tɔɔ mɛ ’ö dhe ’yaa‑ ‑gɔ, pë ’ö‑ ‑wun ’dho ‑a ‑bha ’ö tɔɔ kwa Dëmɛ ‑bha yuö. Pë ’ö‑ ‑zo ’dhö ‑a ‑dhë ’ö tɔɔ kö ö ’yi ‑yö ’kan ‑a ’dhii. 33’Kɛɛ kö mɛ ’ö dhe ’dhö ‑a ‑gɔ bhë ‑yö ’kpongtaapë ‑nu ’piö bhii ’ö tɔɔ ‑ya ’piö kö ö ‑wun ’yi ‑yö ’kan ö bɔɔ ‑dhë. 34‑A ‑dɔ ’wun ꞊plɛ ꞊zɔnng’ ‑ta ‑gɛn ꞊ga ’ö bhë; ‑kɔ do bhë ’ö‑ ’ka ’ö dhe ’ö ’yaa gwaan ’iin ’nëdhezë ’ö yaa ’dho gwaan ’ö ö ‑zo ꞊kaa’ kwa Dëmɛ ‑bha ’wun ‑nu ’piö ‑a ’ka; bhii ‑ya ’piö kö ’ö kë kwa Dëmɛ ‑bha ’ka ö ꞊zuö’ ’gü ‑wun ‑nu waa‑ ö kë ‑kɔ ‑nu ‑an ’plɛ ’gü. ’Kɛɛ kö dhe ’ö gwaan ‑yö dɔ ö ‑de ꞊zɔnng’ ‑ta ’kpongtaapë ‑nu ‑wun ’ka; ’ö‑ ’piö kö ö ’yi ‑yö ’kan ö ꞊gɔn ’dhi.
35A‑ ‑blɛɛ ka ‑bha ’wunsë ’ka; n ’ka ka ’gbee‑ ‑ta bho; ’ö tɔɔ a‑ ’piö kö ’ka kë ꞊nɛ ‑kɔ ’ö ka ‑ma kun ‑a ’ka ‑së ’ka bhë ‑a ’dhö, ’kɛɛ kö ’ka ’to ‑klu ‑sü ’ka ’fɛfɛdhö kwa Dëmɛ ‑bha yuö kë ‑sü ‑bha.
36’Kwa yö ’wun mɛ ’ö ‑gban ‑zo ‑tën ’ko ‑dhë ‑mɛ ’ö ’wo dho wo ’ko sü ‑be ’kɛɛ ’wo‑ pö zlöö wo ’ka ’dho wo ’ko sü bhë ‑a ‑bha; n ‑ma ‑zotadhe ’ö ꞊nɛ: ꞊Ya kë ꞊nɛ ’në gɔɔn‑ ꞊ya ‑dhɛ ‑ga ’wun bhë ‑a ’gü ‑së ’ka ’ö ꞊yaa‑ yö ꞊nɛ ’ya‑ kë ’dhö kö ’ya pë yaa kë ö ’bha ’ka ’iin ’ö ꞊yaa‑ yö ’zü ꞊nɛ ö ‑kɔ yaa ‑mɔ ‑to ’dhö ‑sü ‑bha, ’ö‑ ’piö ’zü kö ’wo wo ’ko ’sü, kö ’yaa ’wun yaa ’ka; ‑wo wo ’ko ’sü ꞊nɛ ‑kɔ ’ö‑ ’ka ‑an ‑dhë ‑së bhë ‑a ’dhö. 37’Iin ꞊ya kë ꞊nɛ ‑kɔ do bhë ‑a ’dhö ’ö‑ ‑ya ö ‑de ꞊zuö’ ’gü ’gbönggböng ꞊nɛ wo ’ka ’dho wo ’ko sü, ’ö ꞊ya ‑dhɛ ‑ga ‑a ’gü ’ö dho ‑mɔ ‑a ‑bha, ‑a mɛ bhë kö ꞊yö ‑së. 38Kö ’kwa ‑dhɛ ‑ga ‑a ’piö ‑së ’ka mɛ ’ö waa‑ ö ꞊dhɔɔbhaadhe ’wo wo ’ko sü bhë, ‑ya ‑kë ‑së. ’Kɛɛ mɛ ’ö dho zlöö ’ö waa‑ dhe ’ö waa wo ’ko ’sü gbɔ bhë, ‑ya ‑kë ‑së ’zü (’ö ꞊zië’ ‑a mɛ ‑blɛɛzë ‑ta).
39Dhe ’ö gwaan, ‑a ‑klu ‑sü ‑mü ö ꞊gɔn ‑bha ’töng ’ö ꞊tun ‑a ’ka ’bhee‑ ’gü bhë ‑a ’ka; ’kɛɛ ꞊ya kë ꞊nɛ ’yaa ‑dhö gbɔ kö ‑potaasü ‑yö dhe ’ö ꞊ya ’to ꞊gɛan ’ka bhë ‑a ‑gɔ kö ‑yaan gwaan ’kpɔ mɛ ’waa gbɛ ‑gɔ ’zü; ’kɛɛ kö ‑yö kë Klito ‑wun ‑dhɛ ’wun gia‑ ‑mɛ ‑nu ’ka ꞊zian’. 40‑Yö ’dhö ’kɛɛ ‑yö ‑dho kë ‑a ‑gɔ ꞊zuögludhi ‑wun ’ka kö ‑yö ’to ’dhö zlöö. ‑Wo ‑kaanta ’ö bhë, ‑yö n ‑de ꞊zuö’ ’gü ‑wun ’ka ’kɛɛ kë‑ wo ’dhö bhë, ‑Zuu ’ö go ‑Zlan ’piö ‑yö n ’gü ’püë‑ wo!
8’Wun ’ö ‑gban ‑köpë ’wo sla‑ bho ‑a ’ka ‑a ‑bha
1’Wun mɛ ’ö ‑gban ‑köpë ’wo sla‑ bhoë gbapë ‑nu ‑dhë ‑an ‑bha bhë, ’kwa yö ‑a ‑bha. ‑A pö ’ka‑ wo: ’Wundɔdhe ‑yö kwa ’saadhö kwa ‑gɔ bhë, ‑yö ’wun gia‑ ’ka. ’Kɛɛ ’wundɔdhe ’ka‑ ‑ga ‑na bhë ‑yö mɛ ‑kë ‑desüvamɛ ’ka; ’ö ‑dhɔ ‑zë ’yö‑ ‑kë ꞊zian’ ’ö kwa ‑bha ‑zo ‑yö ‑Zlan ‑bha ‑sü ‑yö ‑da ’dhiö. 2‑Yö kë ka ’yaan ꞊nɛ mɛ ’ö‑ pö ‑na ö ‑de ‑dhë ꞊nɛ ’wundɔdhe ‑yö ö ‑gɔ bhë kö ’wundɔdhe ’yaa‑ ‑gɔ ꞊nɛ ‑kɔ ’ö dho ‑a dɔa bhë ‑a ’dhö. 3’Kɛɛ mɛ ’ö ‑Zlan ‑dhɔ ’dho ‑a ‑bha bhë, ‑Zlan ‑ya ‑mɛ ‑ga ꞊nɛ mɛ ’ö‑ ‑bha ’ka ‑a ’dhö.
4꞊Dhɛɛ’ bhë ’ö tɔɔ: ‑Köpë ’wo sla‑ bhoë bhë, ‑wo ‑mɔa ’wo‑ ‑bhö ‑a? ’Kɛɛ kë‑ wo ’dhö bhë kwa‑ ꞊dɔa’ ꞊nɛ pë ’ö dho kë gbapë ‑yö ‑a ‑bha ‑pë ’ka ’kpongtaa zö ’yaa ’dhö; ’ö ’kwa‑ dɔa ’pö ꞊nɛ ‑Zlan ‑yö ’dhö do. 5’Kö ‑kë ꞊nɛ mɛ ‑nu ‑wa ‑pö ‑zlan ‑nu ‑wo ‑dhö ꞊va ’kpongtaa waa‑ dhang‑ ’gü ‑dhɛ ‑nu ‑an ‑bha, ’wun ’ö ‑dee ’dhö ’wun gia‑ ’ka, ’ö ‑an dëmɛ ‑nu ’dhö ‑dhö ’pö, 6kwa ‑bha ’kwa‑ dɔ ’ö tɔɔ ‑Zlan ‑yö do kwa Dë ’ka. Yö ꞊nɛ ’ö pë ’saadhö ’plɛ ‑da; ’ö ’kwa ‑tosiadhe ‑kë ‑a ‑bha kë ’ka. Kwa ‑bha ’ka ’pö, kwa Dëmɛ ‑yö do Yesu Klito ’ka. Yö ꞊nɛ ’ö‑ ‑kë ’ö pë ’saadhö ’wo ‑kë ‑dhö ’ö kwa ‑de ’pö ’kwa ‑tosiadhe ‑kë.
7’Kɛɛ kë‑ wo ’dhö bhë ’wun bhë ‑a ‑bha ‑kë ’wun gia‑ ’ka ‑sü bhë, mɛ ’plɛ ’waa‑ dɔ; yö ꞊ga mɛ ’bhaa ‑nu ’wo ‑dhö ’ö gbapë ‑bha ‑kë mɛ ‑gɔ ‑sü ꞊ya ’to ‑an kë ‑kɔ ’ka bhë ’ö ‑köpë ’wo sla‑ bho ‑na ‑a ’ka bhë ’wo‑ ‑bhö ‑na zlöö ꞊nɛ pë ’wo‑ pö ’kpa ‑an ‑mɔ ‑a ’gü ‑sü ‑mü bhë ‑a ’dhö bhë. Bhii ꞊ya kë ’dhö ’ö ‑an ꞊zuö’ ‑yö to zlöö. 8Yö ꞊ga ’pö ’sa, ’ö ’yaa ‑bhöpë ’ö dho kwa ꞊yɔɔn ‑Zlan ‑bha ‑a ’ka bhë, bhii ꞊ya kë ꞊nɛ ’kwaa ‑a ‑bhö, ‑a ‑bha ’pë ’yaa kwa ‑bha; ’iin ’kwa‑ ‑bhö ’pö, ’kwaa pë gbɛ yö ‑a ’gbloo ’piö.
9Kö ‑ka ka ‑zo kë ka ’wun kë ‑kɔ ‑nu ’piö ‑potaasü ’ö ka ‑gɔ bhë ‑a ’ka, ꞊kun ‑kë ’ö mɛ ‑nu ‑wo to ka ’piö ’ö ’wo ‑da wɔ ‑kɔ yaa kë ‑sü ’gü ‑an ‑bha ‑zo ‑yö ‑Zlan ‑bha ‑sü ‑bha ‑kë ’tee ‑sü ‑wun ’gü. 10Mɛ ’ö‑ ‑bha ‑zo ‑yö ‑Zlan ‑bha ‑sü ’dhö ’tee, ꞊ya ‑kpën bhi ’ö ’wundɔdhe ’dhö ü ‑gɔ bhë ü ‑bha kwiga ‑gba ‑a ’gü ‑kɔ ’gü, ‑a ꞊faan’ ’ka ’dho më kö ‑yö ‑köpë ‑nu ’wo sla‑ bho ‑na ‑a ’ka bhë ‑yaan ‑a ‑bhö ‑a? 11꞊Ya kë ’pö, dheglu ‑mɛ ’ö‑ ‑bha ‑zo ‑yö ‑Zlan ‑bha ‑sü ’dhö ’tee ’ö Klito ‑yö ga ‑a ‑wun ’gü bhë kö ü ’ka‑ ‑püö ü ‑bha ’wundɔdhe ꞊kwaa’ ꞊a? 12꞊Ya kë ꞊nɛ dhegluzë ’ö‑ ‑bha ‑zo ‑yö ‑Zlan ‑bha ‑sü ’dho ’tee bhë, ’bha‑ kë ’dhö kö ’bha pë yaa kë ‑a ’ka ‑a ꞊zuö’ ’gü kö ’bha ꞊sɔɔn yaa kë Klito gia‑ ’ka. 13꞊Ya kë ’dhö, ’kö ‑kë ꞊nɛ n ‑ma pë ’ö ’wo sla‑ bho ‑a ’ka bhë ‑a ‑bhö ‑sü ‑yö n dheglu ‑püö ‑gɛn ’ka, kö n ’ka dho ‑a ‑bhö gbɔ.
9Pë ’ö dɔ Yesu ‑bha bɔmɛ ‑nu ꞊tian’ ’ö Pɔlö yaa‑ sü waa‑ pë ‑nu ’ö ‑an ꞊dua’ ’dhö ‑mü kö ‑waan kë
1Ma ’ka n ‑ga ‑na ꞊nɛ Yesu ‑bha bɔmɛ ‑mü n ’ka; kö ‑potaasü ‑yö n ‑gɔ. A ‑kpën kwa Dëmɛ Yesu ‑bha; yuö ’a‑ ‑kë kwa Dëmɛ ‑dhë bhë, ka ꞊nɛ ’ka tɔɔ ‑a ‑yö ‑a ‑bha ‑pë. 2’Kö ‑kë ꞊nɛ mɛ ’bhaa ‑nu ’waa n ’sü ꞊nɛ Yesu ‑bha bɔmɛ ’dhö, ka ‑zë, ‑yö n ’gü ꞊nɛ ka ‑dho n dɔa. ‑A ‑de ka ‑bha ‑kë Dëmɛ ’gü ‑sü bhë ‑ya ‑zɔn ꞊nɛ a‑ ‑bha bɔmɛ ’ka.
3‑Ka ‑dhɛ ‑ga ’dhɛ! ‑A ’bhaa ‑nu ꞊ya kë, ‑kɔ ’a n ‑de ‑ta ꞊kɔɔ’ ‑na ‑a ’ka ‑nu wo, n ꞊tɔɔkëmɛ ‑nu ‑gɔ bhë ’ö ꞊nɛ: 4Yuö ’a‑ kë ‑na ꞊nɛ bhë pë ’ö n ꞊dua’ ’ka, ‑bhöpë ‑nu waa‑ müpë ‑nu ’ka ’yaa ’dhö a? 5N ꞊dua’ ’yaa ‑mü kö ’a dhe ’sü kwa dhegluzë ‑nu ziën ’a‑ kë n bɔɔ ’ka, ’iin kö ’a‑ kpa n ‑ma ’ta ’bhaa ‑nu ’gü ꞊nɛ ‑kɔ ’ö Yesu ‑bha bɔmɛ mɛ ’wo to ‑a ’dhö ꞊nɛ, kwa Dëmɛ dhegluzë ‑nu waa‑ Piɛɛ ‑nu ’wo‑ kë ‑na ‑a ’ka bhë ‑a ’dhö a? 6’Iin kë‑ wo ’dhö bhë ꞊nɛ yië‑ Baanabasö yi ‑de ’sloo ꞊nɛ ’yi dho yuö kë kö ’yiën‑ yi ‑bha ‑tosiadhe ‑kë ‑a ‑ta ‑pë yö ‑a ’gü kö mɛ gbɛ ‑yaan ’kun ‑nu yi ‑dhë ‑sü ’ka a? 7’Ka‑ ma do ꞊nɛ ’dhasi ‑yö ‑dho ö ‑bha ’sɛ ‑glu gɔn ꞊dhia ö ‑de ‑gɔ ꞊naɔ ’ka a? ’Iin dö ’ö dho ’ö ’lü ta ’ö ’yaa‑ bhɛ ‑bhö ‑ee? ’Iin dö ’ö ‑tuë ‑to ’ö ’yaa‑ ’yɔn ’yi dan ꞊ɛn?
8Kö ꞊kun ’ö ‑kë ka ‑zo ’piö ꞊nɛ mɛbheedhe ’ta ’sü ‑kɔ ’ö ’a‑ ’bhaa ‑nu sü ’wun ꞊zuan’ ’ka yö ‑mü; ’ö tɔɔ Moizö ‑bha tɔng ‑ya ‑blɛɛ ꞊nɛ ‑kɔ bhë ‑a ’dhö ’pö. 9Tɔng ’sëëdhɛ bhë ‑yö ꞊bɛɛn’ ‑sü ’ka ‑a ’gü ꞊nɛ: Kö ꞊kun ’ü ‑piö ’klang yö ‑du ’ö ’blee‑ ga zɔn ‑na bhë ‑a ’dhi ‑bha! Kë ’ö‑ wo ’dhö bhë dɔ ’pö ’ö ‑Zlan ’dhoë‑ woë‑ ‑du ‑nu ꞊zɔnng’ ‑ta bhë ꞊ee? 10‑Abi’! Kwa ‑wun ꞊nɛ ’ö ’wun bhë ’ö‑ ꞊blɛɛ ‑a ‑wun ’gü ꞊zian’. ’Kɛɛ ‑yö ’wun gia‑ ’ka; bhii ’ö tɔɔ mɛ ’ö ‑dhɛ ‑ya ‑na ‑yö ‑dho ‑a ‑pë kan, ’ö mɛ ’ö ꞊bluu’‑ ‑kpa ‑ma ‑na ’ö dho ö ‑bha ga yö ’pö. 11’Wun ’ö ‑gban ‑Zlan ‑bha, ‑a ta kun ’yi‑ wo ka ’gü bhë ꞊a? ꞊Ya kë ’pö kö ka ‑gɔ ‑pë ‑nu ’wo bhë yi ‑dhë sü ’gbee‑ ‑ta ’ka a? 12Mɛ mɛ ‑nu ’ö ’wo to, kë ’ö‑ wo ‑na ‑an ꞊dua’ ’ka ’ö ’ka‑ kë ‑na ‑an ‑dhë bhë, kö yi ’dhe, yi ’më ’ö yi ‑bha ’yaa ziö ‑an ‑bha ‑ta bhë ɛɛ?
’Kɛɛ kö kë‑ wo ’dhö bhë, pë ’ö yi ꞊dua’ ’ka bhë, yië ‑a gbɛ ‑dhɛ; pë ’yi‑ ‑kë ꞊zian’ ’ö tɔɔ ’to ’yi‑ wo ’dhö ‑yö kë ’dhö kö ’wuntaɔsë ’ö ‑gban Klito ‑bha bhë, ꞊kun ‑kë ’ö‑ kuënnupë dho kë ‑dhö (‑yaan ’to zlöö). 13‑Yö kë ka ’yaan ꞊nɛ mɛ ‑nu ’wo yuö kë ‑na ‑Zlan ‑gɔ kɔɔ bhë, ‑bhöpë ’ö mü bhë ꞊nɛ ’wo‑ nu ‑an ‑dhë, ’iin mɛ ‑nu ’wo sla‑ bho ‑na bhë sla‑ ‑bho ‑a ’ka ‑pë bhë ‑an ‑bha ‑yö ‑kë ‑dhö. 14‑Kɔ do bhë ‑a ’ka kwa Dëmɛ ‑ya ‑blɛɛ ’ö‑ pö mɛ ‑nu ’wo ’wuntaɔsë ꞊blɛɛ’ ‑na bhë, kö ‑wo ‑tosiadhe kë ‑a ’gü ‑pë ‑ta.
15’Kɛɛ yö ꞊ga ’ö pë ‑nu bhë, ’ö n ’ka‑ gbɛ ‑dhɛ; ’iin yaa kë ’pö ꞊nɛ ’sëëdhɛ ’a‑ bɔ ‑na ꞊nɛ, a‑ ‑bɔ kö ’kaan‑ ‑a ’gü ‑pë kë ’dhö yö kun; ’kö ‑kë ꞊nɛ a ‑dho ga, kö ga ’a dho ‑a wo n ‑ma ’wuntaɔsë ꞊blɛɛ’ ‑sü ’gü, ’kɛɛ n ’ka dho pë gbɛ ‑dhɛ. N ‑ma ‑kë ’gɔugɔ ‑sü ’ö bhë, mɛ gbɛ ’ka dho ‑a bho n ‑ma. 16’Ö kë‑ wo ’dhö bhë, n ‑ma ’wuntaɔsë ꞊blɛɛ’ ‑sü bhë n ’ka ’dho n ‑de sü ꞊va ‑a ‑wun ’gü. Pë ’ö n ꞊dua’ ’ka, ’a dho ‑a kë yö ‑mü. ‑A ’ke n ’ka‑ ꞊blɛɛ’, ’wun ’gbee‑ ‑yö ‑dho kë n ’ka. 17꞊Ya kë ‑be ꞊nɛ ma gia‑ ’a‑ pö a ‑dho kë ’wuntaɔsë ꞊blɛɛ’ ‑mɛ ’ka, kö a ‑dho ‑ya n ꞊saan’ ꞊wuën’. ’Kɛɛ yaa kë ’dhö gbɔ ’sa. Yö ꞊ga ’ö ‑kë n ꞊dua’ ’ka bhë; kö pë ’ö n ꞊dua’ ’ka kö ’aan‑ kë bhë ꞊nɛ ’a‑ kë ‑na ’kpaan ’ka bhë. 18꞊Ya kë ’dhö n ꞊saan’ ‑yö ‑dho kë ‑më ’ka ɛ? ’Ö tɔɔ ‑kpɛ ’ö n ‑ta ’ö ’a ’wuntaɔsë ‑wun ꞊blɛɛ’ ‑na ‑a ’ka ’kpaan ’ka ’ö pë ’ö n ꞊dua’ ’ka ’ö ’maa‑ ‑dhɛ bhë.
19Ka‑ ‑yö bhë ꞊a, ‑potaasü ‑yö n ‑gɔ, bhii mɛ gbɛ ‑bha ’pë ’yaa n ‑ma. ’Kɛɛ a n ‑de kë mɛ ’plɛ ‑bha ꞊nua ’ka, mɛ ‑nu ‑waan nu ꞊va n ’piö ’wuntaɔsë ’gbloo ’piö. 20꞊Ya kë ꞊nɛ a yuö kë ‑na Zuifö ‑nu ziën, n wɔ ‑kɔ ‑yö ‑kë ꞊nɛ ‑an ‑bha ’dhö, ’kɛɛ kö kë‑ wo ’dhö bhë ‑wo mɛ ‑nu ’wo wo ‑gɔ dho sia‑ Moizö ‑bha tɔng ‑dhë bhë, ’ö ’maa ‑an ‑mɛ ’ka, ’kɛɛ a‑ ‑kë ’dhö kö ‑waan ’we ’wuntaɔsë ‑wun ‑bha ꞊va ’ka. 21‑Kɔ do bhë ’a‑ ꞊kaa’ ’pö mɛ ‑nu ’ö ’waa Moizö ‑bha tɔng dɔ bhë ‑an ziën; a‑ ’slë ‑mɛɛ kö ’yi yi ’ko ‑wo ’gü ’ma. ’Kɛɛ kë‑ wo ’dhö bhë, ‑naa ‑yö ‑dhö ‑a mɛ ’ö ‑gban tɔng ‑bha bhë ‑a ‑bha, bhii a ‑klu ‑sü ’ka Klito ‑bha tɔng ‑bha; ‑yö kë ’dhö kö ‑waan ’we ’wuntaɔsë ‑wun ‑bha. Yaa kë ꞊nɛ pë ’wo‑ pö ’maa ‑Zlan ‑bha tɔng ꞊bhlë ‑ya n ‑ma ‑gɔ ‑dho sia‑ Klito ‑bha tɔng ‑dhë ‑sü ‑wun ’gü bhë yö ‑mü. 22Mɛ ‑nu ’wo ’tëëtë ‑zo ‑yö Yesu ‑bha ‑sü ’gü bhë ’ma kë ‑an ziën, a pë ‑nu ‑kë ‑an ‑bha ‑naa ‑bha kö ‑waan ’we ’wuntaɔsë ‑wun ‑bha. ‑Kɔ bhë ꞊nɛ ’a n ‑de ꞊kaa’ ‑dhɛ ’saadhö ’gü, kö ‑kɔ ’wo‑ ‑bha, ’ma n ‑de kë ꞊nɛ ‑an ’dhö kö ‑an mɛ ’bhaa ‑nu ‑waan ’we ’wuntaɔsë ‑wun ‑bha. 23’Wun ‑nu ’wo bhë a‑ ’plɛ ‑kë ’wuntaɔsë ‑wun ’gü, ‑yö kë ’pö kö ‑a ’gü ‑pë ‑së ‑nu ’wo ‑dhö bhë n ‑ma ‑yö kë ‑dhö.
24(‑A ꞊tɛi’ ‑yö ‑kë ꞊nɛ ’wun ’ö ‑gban ‑bla ’sü ‑sü ‑bha bhë ‑a ’dhö.) ‑Yö ka ’yaan ꞊nɛ ‑blasümɛ ‑nu ’saadhö ‑an ’plɛ ‑wo ‑lo ‑bla ‑bha ’töüdhö wo ’kuë; ’kɛɛ ꞊ya kë ’dhö ’ö mɛ do ‑yö ‑kë ‑an ‑gɔtaamɛ ’ka ’ö ’wo‑ ’kian nu. Kö ‑bla bhë ‑a ’sü ‑kɔ ’ka dho ‑a süë kö ‑waan ka ‑bha ‑to ‑a ’gbee‑ ’ka ‑sü ’kian nuë bhë ‑a kaa. 25Mɛ ‑nu ’wo bhɔmɛ ‑nu ’ka bhë ꞊wa ’dho bhɔ ‑sü ’ö ’dhö ‑a ꞊daan’ ꞊dhia, mɛ ’ö ‑dhö ‑yö ‑dhio ‑dɔ ö ‑de ‑ta ’ö ö ‑de ’gbee‑ ‑ta bho ‑yö kë ’dhö kö ‑yö ‑to ‑a ’gbee‑ ’ka ’gɔ ꞊gblaa’ yö; ’kɛɛ kö pë ’ö ’dhö bhë ’sa ’gɔ ꞊gblaa’ ’ö bhë ꞊glɔɔpë ’yaa ‑mü. Kwa ‑zë, kwa kwa ‑bha ‑kë, ‑yö kë ’dhö kö ’gɔ ꞊gblaa’ ’ö ꞊glɔɔsü bhë ‑yaan kë kwa ‑gɔ. 26‑A ‑wun ’gü, ma ‑bla ’sü ‑sü ’gü, n ’yan ‑yö ’wun ‑gɔ ’dhodhɛ ‑bha. N kë ‑kɔ ‑yö ‑kë ꞊nɛ ‑kɔ kpö ‑zuö ‑mɛ ’ö ’yaa ‑kɔ kpö ‑zuö piöng ’piö ’kpaan ‑a ’dhö. 27Kë‑ wo ’dhö bhë, a n ‑de bun ’gbee‑ ‑ta ‑bho, ’ö ’a n ꞊zuö’ ‑we ‑a ‑bha ‑wun ‑nu ‑kë; ‑yö kë ’dhö kö ma ’ö ’a ’wuntaɔsë ꞊blɛɛ mɛ ‑nu ‑dhë bhë, ꞊kun ’a dho kë bo ‑mɛ ’ka ‑an ziën.
10’Wun ’ö ‑gban gbapë ‑nu ‑bha ‑kë ya ‑sü ‑bha
1N dhegluzë ‑nu, a‑ ’piö kö kwa ’bhɛma ‑nu ’ö waa‑ Moizö ‑nu ’wo ’ta sü wo ’kuë ’kpa bhë, pë ’ö ‑kë ‑an ’ka bhë, ’a ka ‑zo ‑yö ‑büö ‑a ’ka. ꞊Dhɛ ’wo‑ ‑bha ’töüdhö, ’dhuu kpö ‑yö ‑an ‑ta ‑kpa, ’ö ‑an ’plɛ ‑wo ’yoo nuɛazë ‑kan. 2‑An ‑bha ‑kpa Moizö ‑bha ‑sü ’gü, ’ö ’wo ’yoo ‑kan bhë ‑yö ‑më yiö ‑sü ’ka ’ö ’wo‑ wo ’dhuu kpö waa‑ ’yoo ‑an ’gü ꞊nɛ ‑wo ‑mɔ ‑a ’gü do ꞊nɛ Moizö ꞊nɛ ’wo dho to ‑a ’piö. 3-4‑Bhöpë ’ö ‑Zlan ‑ya bɔ ‑an ‑dhë bhë wo ’plɛ ‑wa ‑bhö, ’ö ’yi ’ö‑ nu ‑an ‑dhë bhë ’ö wo ’plɛ ’wo‑ mü. ’Yi bhë ‑yö ‑go ‑guö gbɔng ’gü. ‑Guö gbɔng ’ö ’dhö bhë ’ö tɔɔ Klito ’ö ‑kë ‑an ’piö. 5‑Wo ꞊kaa’ ’dhö ’kɛɛ ‑an ’plɛ ‑wun ’yi yaa ’kan ‑Zlan ’dhi. Pë ‑de ’ö ‑kë ’ö ‑an ‑dhɛ ꞊va ‑dhɛ ‑wo ga ’yënng ꞊taa ’ö bhë.
6Ka‑ ‑yö bhë ꞊a! ’Wun ‑nu ’wo ’dhö bhë, ‑wo ‑kë ’dhö kwa ‑bha ’wun ꞊zuan’ ‑nu ’ka, ‑yö kë ’pö ꞊kun ‑kë kwa ‑dho ’wun yaa ‑nu kuënnu kwa ꞊zuö’ ’piö ’kwaan‑ kaa ꞊nɛ ‑an ’dhö. 7Kö ꞊kun ’ka ka ‑de nu gbapë ‑nu gba ‑sü ‑dhë ꞊nɛ ‑kɔ ’ö ‑an mɛ ’bhaa ‑nu ‑wa ꞊kaa’ ‑an ziën bhë ‑a ’dhö; yö ꞊ga ’ö‑ ‑wun ’gü ’ö pë ’ö ꞊bɛɛn’ ‑sü ’ka ‑Zlan ‑bha ’sëëdhɛ ’gü ’ö‑ pö: ’Sɛgümɛ ‑nu ‑wo ꞊yaannu, ’wo pë ‑bhö ’ö ’wo müpë ‑nu mü. ꞊Dhɛ ’wo yën, ’wo ꞊luu ’wo ‑ya ’tan kë ‑sü ‑bha. 8Kwa ’ka ’dho kwa ‑de nu mɛ ‑gɔ ‑bho zian‑ ‑pë kë ‑sü ’ö dhe waa‑ gɔɔn‑ ‑an ‑bha ꞊sɔɔn kë ‑sü ’ka bhë ‑a ‑dhë ꞊nɛ ‑kɔ ’ö ‑an mɛ ’bhaa ‑nu ‑wa ꞊kaa’ bhë ‑a ’dhö. Yö ꞊ga ’ö ‑an mɛ ‑lü ‑vuu ’gɔɔ‑ ꞊plɛ ö ga ‑yaaga ’wo ga ‑dhɛkpaɔyi do ’ka bhë. 9Kwa ’ka ’dho kwa Dëmɛ ’gü dan ꞊nɛ ‑kɔ ’ö ‑an mɛ ’bhaa ‑nu ‑wa ꞊kaa’ ’ö ’wo ga ꞊mɛɛ ‑bha ‑an ’kun ’ö‑ wo bhë ‑a ꞊kwaa’ bhë ‑a ’dhö. 10꞊Kun ‑kë ’ka ‑Zlan ‑wun yaa ꞊blɛɛ ꞊nɛ ‑kɔ ’ö ‑an mɛ ’bhaa ‑nu ‑wa ꞊kaa’ ’ö ‑Zlan ‑bha bɔmɛ ‑yö ‑an ’gü ꞊siö ‑a ’ka bhë ‑a ’dhö.
11’Wun ‑nu ’wo bhë ‑wo ‑kë ‑an ’ka ’dhö ’ö ‑ya ‑Zlan ‑bha ’sëëdhɛ ’gü ’dhö kö ‑yaan kë kwa ‑bha ’wun ꞊zuan’ ’ka. Bhii ’kpongtaadhɛ ’dhiötoyi ꞊ya yö ꞊klöö’. 12‑A ‑wun ’gü, mɛ ’ö dɔ ‑sü ’ka ö ‑gɛn ‑ta, ‑yö ö ‑zo kë ö ‑de ’piö kö ꞊kun ’ö dho ‑püö. 13’Güdandhe ‑nu ’ka bɔ ‑an ’gü bhë ‑an ’plɛ ‑wo mɛ ’bhee‑ ꞊tian’; ’ö tɔɔ ‑Zlan ’ö ‑to ‑wo ‑ta ‑mɛ ’ka ö ‑bha pë ‑nu ’ö ‑an ’tɔ go bhë ‑a ‑ta bhë, yaa ’dho ö ꞊kwaa’ ’güdandhe ’ö ‑ziö kwa ꞊faan’ ‑ta ‑a ‑zü kö ‑yö nu kwa ‑ta. Yi ’ö ’güdandhe dho nu ‑a ’ka bhë, ‑yö ‑dho ꞊faan’ nu kwa ‑dhë kö ’kwaan‑ ‑a bun, ’kwaan‑ to ‑a ‑ta ’gbee‑ ’ka.
14‑A ‑wun ’gü, n ’bhamɛ ‑nu, ‑ka ka ‑zo kë ka ‑de ’piö ’wun ’ö ‑gban gbapë ‑nu ‑bha ‑an ’gü; ‑ka ’kan ‑a ‑bha! 15‑Yö n ’gü ꞊nɛ ka ꞊zuö’ ‑yö ‑bɔ ’wun ’gü, ’ö ’ka dho ‑mɔ ‑a ‑bha kö ’wun ‑nu ’wo bhë ’ka ‑dhɛ ‑ga ‑a ’piö ’dengdhö, ’ka‑ ‑yö ’ko ’dhiö kë. 16’Dhuë‑ ‑drɔɔn ‑kɔɔ ’ö ‑ya kë ’kwa ‑Zlan zuö pö ‑na ‑a ‑wun ’gü bhë ka gia‑ ‑kaa ‑ga bhë ’dhɛ! ꞊Ya kë ꞊nɛ kwa‑ mü ‑na, pë ’kwa‑ pö ’ö tɔɔ ’kwa ‑kë do Klito fɛi ’ö ‑lo kwa ‑wun ’gü bhë ‑a ’gü, ’iin ꞊bluu’‑ ’kwa‑ ‑glu ‑na kwa ’kuë ’kwa‑ ‑bhö ‑na bhë ’ö tɔɔ kwa ‑dho ’kuë‑ ‑sü ‑mü do Klito bun ’gü. 17’Kö ‑kë ꞊nɛ kwa ꞊plëëzë, ꞊bluu’‑ bhë ‑yö do; kwa ‑dho kwa ’kou bun do ’gü bhii kwa ‑dho kwa ’kuë‑ ’ö ꞊bluu’‑ bhɛ do bhë ’kwa‑ ‑bhö.
18Ka gia‑, ‑ka Izlaɛlö ’në ‑nu ‑ga bhë! Pë ꞊ya kë ’wo sla‑ bhoë bhë, mɛ ’wo‑ ‑bhö ‑na bhë, ‑an ‑dho ’kuë‑ ‑sü ‑mü do ‑Zlan ‑bha ’ka. 19Kö ꞊kun ’ö ‑kë ka ꞊zuö’ ’piö ꞊nɛ pë ’a‑ pö bhë ’ö tɔɔ kö gbapë ‑nu ’iin pë ‑nu ’ö mɛ ‑nu ’waa ‑Zlan ‑bha ’ka, ’wo sla‑ bho ‑na ‑a ’ka bhë kö ‑an ꞊bhlë ‑yö ‑dhö. 20’Yaa ‑mü. Pë ’a‑ pö ꞊zian’ ’ö tɔɔ pë ’ö mɛ ‑nu ’waa ‑Zlan dɔ, ’wo sla‑ bho ‑na ’ka bhë, ‑zuu yaa ‑nu ꞊nɛ ’wo‑ ‑kë ‑an ‑dhë, waa‑ kë ‑Zlan ‑dhë; ’kɛɛ kö ’maa‑ ’piö ’sa kö ’ka kë ’kou do ‑zuu yaa ‑nu gba ‑sü ’gü. 21Yaa ’dhö kë ‑së kö ’ka kwa Dëmɛ ‑bha ‑drɔɔn mü kö ’ka ’go mü ’ka ’dho ‑zuu yaa ‑nu ‑bha mü ꞊dhia ’pö; ’iin ’yaa ‑së kö kaa‑ kwa Dëmɛ ‑nu ’ka pë ‑bhö ka ’kuë‑ kö ’ka ’go mü, kaa‑ ‑zuu yaa ‑nu ’ka ‑ya ‑bhöpë do ꞊taa ’zü. 22Kö ꞊kun ’ka kwa Dëmɛ ꞊woo’ ꞊mɛɛ ’ö ‑da ꞊druɛi ’gü. ‑A ‑ga ’ka‑ wo bhë ka ’gü ‑yö ’gbee‑ ’ö ‑ziö ‑a ’ka ‑a ‑ta ‑a?
’Wun ’ö ‑gban ‑Zlan ’tɔ bhɔ ‑sü ’ö ’wun ’saadhö ’gü
23꞊Ya kë ‑wa ‑pö: «Kwa ‑mɔ pë ’saadhö ’plɛ kë ‑sü ‑bha.» ‑Yö ’dhö ’püë‑ wo ’kɛɛ pë ’plɛ kë ‑sü ’yaa ‑së. Kwa ‑mɔ ‑a ‑bha ’kwa pë ’saadhö ’plɛ ‑kë ’kɛɛ ‑a ’plɛ kë ‑sü ’yaa ‑së kwa ‑bha ‑zo ‑yö ‑Zlan ‑bha ‑sü ’gbloo ’piö. 24꞊Kun ‑kë ’ö mɛ gbɛ ‑yö ö ‑de ꞊truën ꞊mɛɛ; ’kɛɛ ‑yö kë mɛ gbɛ ‑bha ’ka, ‑ya ꞊mɛɛ’‑.
25‑Potaasü ‑yö ka ‑gɔ kö ‑köpë ‑nu ’wo‑ ’dhɔɔ dɔ ‑na ’dhɔɔkuëdhö bhë ’ka‑ ’dhɔ ’ka‑ ‑bhö; ꞊kun ‑kë ’ka‑ ’godhɛ ‑nu, ‑a zë ‑kɔ ‑nu, ‑an gbɛ ꞊mɛɛ ka ꞊zuö’ ’gü, kö ’kaan‑ ꞊tun ‑a ‑bhö ‑na. 26Bhii pë ’ö ꞊bɛɛn’ ‑sü ’ka ‑Zlan ‑bha ’sëëdhɛ ’gü ‑ya ‑pö: ’Kpongtaadhɛ waa‑ ö ‑ta ‑pë ’plɛ ‑wo kwa Dëmɛ ‑bha ’ka.
27꞊Ya kë ꞊nɛ mɛ ’ö ’yaa Klito ‑wun ‑dhɛ ’wun gia‑ ꞊ya ka ‑dhɛ ‑bhöpë ’ka, ’ö ’ka ’we ‑a ‑bha, pë ’saadhö ’ö‑ nu ka ‑dhë ‑bhöpë ’ka, ‑kaa ‑bhö; kö ꞊kun ’ka ꞊dhɛɛ’ gbɛ kpɔ ka ꞊zuö’ ‑to zlöö ‑wun ’ka. 28’Kɛɛ ꞊ya kë ꞊nɛ ꞊yaa‑ pö ka ‑dhë: «Wü ’ö ꞊nɛ ‑yö pë ’wo sla‑ bho ‑a ’ka ‑a ’ka», kö ‑a mɛ bhë kö ꞊kun ’ka‑ ‑bhö mɛ ’ö ’wun ꞊blɛɛ bhë ‑a ‑wun ’gü, kö ꞊kun ’ö‑ ꞊zuö’ dho to zlöö. 29N ’kaa‑ pö ka ‑bha ꞊zuö’ ‑to zlöö ‑wun ‑bha, ’kɛɛ mɛ ’ö bhë ‑a ‑bha. ꞊Dhɛɛkpɔdhe ‑dho kë ‑mü ꞊nɛ: ‑Më ‑kë ’ö n ‑ma ‑po ꞊taa’ ‑wun ’ö ’a dho ‑a kë ’ö sü mɛ gbɛ ‑bha ꞊zuö’ ‑to zlöö ‑wun ‑bha ‑ɛɛ? 30’Ö ꞊ya kë ’zü ꞊nɛ pë ’a dho ‑a ‑bhö, ’ma ‑Zlan zuö pö ‑a ‑ta, mɛ ’kpaan gbɛ ‑dho dɔ ꞊dhë kö ‑yaan n ‑wun yaa ꞊blɛɛ’ ‑a ‑wun ’gü ii?
31Pë dho kë ’ö tɔɔ ka pë ‑bhö oo, ka müpë ‑mü oo, pë ’oo pë ’ka dho ‑a kë, ‑a ’plɛ ‑yö kë ‑Zlan ’tɔ ‑bhɔ ‑a ’gü ‑pë ’ka. 32꞊Kun ‑kë ka ‑bha ‑tosiadhe kë ‑kɔ ‑yö ‑kë mɛ ’wo Zuifö ’ka, ‑a mɛ ‑nu ’waa Zuifö ’ka waa‑ mɛ ’wo Yesu ‑wun ‑dhɛ ’wun gia‑ ‑mɛ ’ka ’wo bhë ’ö ‑kë ‑an ‑gɔ ꞊nɛ ’lü ꞊kpëü ’ö ‑ziö ‑an ‑gɔ zian‑ ‑a ’dhö ’ö ’wo ‑kpën ‑a ‑bha. 33‑Kaa kë ꞊nɛ n ’dhö bhii a n ‑de ’gbee‑ ‑ta ‑bho kö n këpë ‑yö kë mɛ ‑nu ’saadhö ‑an ‑dhë ‑së. ’Maa n ‑de ‑bha pë ꞊mɛɛ’‑; ’kɛɛ mɛ ’plɛ ‑bha pë, ‑yö kë ’dhö kö ‑an ’plɛ ‑wo dha.
111‑Ka ziö n ’wun kë ‑kɔ ’piö ꞊nɛ ‑kɔ ma ‑de gia‑ ’a‑ ’ka Klito ’piö bhë ‑a ’dhö.
Wɔ ‑kɔ ‑së ’ö mɛ ‑nu ‑nu dhoë‑ wo ‑bhɔ ’kuë‑ këdhɛ ‑nu ’gü
2N ꞊zuögludhi ‑sü ‑mü ’ö tɔɔ ka ‑zlö ’yaa trö n ’ka ’wun ’saadhö waa‑ ’ta ‑sü ‑Zlan ‑bha zian ‑ta ‑kɔ ’a ka ꞊daan ‑a ’ka ’ö ’ka‑ wo ‑na bhë ‑a ‑wun ’gü giagiawo. 3’Kɛɛ kë‑ wo ’dhö bhë ’wun do ’bhaa ‑yö ‑dhö ’ö ’a‑ ’piö kö ‑yö kë ka ’yaan; ’ö tɔɔ: Klito ‑yö gɔɔn‑ ’ö ‑dhö ‑a ꞊kɔɔnmɛ ’ka; gɔɔn‑ ’ö ‑dhö, ’ö ö bɔɔ ꞊kɔɔnmɛ ’ka; ’ö ‑Zlan ‑yö ‑kë Klito ꞊kɔɔnmɛ ’ka. 4꞊Ya kë ꞊nɛ ‑bhɔ ’kuë‑ kë ‑sü ’gü, gɔɔn‑ ꞊ya ‑kpla ’to ö tuö ꞊ya ‑Zlan ’dhi ‑wo pö ‑a ’ka ’iin ꞊ya ꞊bhɛa’ ‑a ’ka, kö ꞊ya Klito ꞊bhlë ‑siö. 5‑Kɔ do bhë ꞊nɛ dhebɔ ‑gɔ ‑ta ’yaa ‑kpa ‑sü ’ka, kö ‑a ‑gɔ ‑yö ’to ’pö ‑yö ‑Zlan ’dhi ‑wo pö ’iin kö yö ꞊bhɛa’‑ ‑a ’ka ‑Zlan ‑bha ‑bhɔkuëkɔ ’gü, kö ꞊ya ö ꞊gɔn ꞊bhlë ‑siö. Bhii kö ꞊ya kë ꞊nɛ dhebɔ ’wo‑ ‑gɔ bho ‑a ’dhö. 6’Ö dhebɔ mɛ ’ö ’yaa‑ ’piö kö ‑yö ö ‑gɔ ‑ta ‑kpa, kö ꞊yö ‑së kö ‑wa ‑bha wun bho. ’Kɛɛ kö kë‑ wo ’dhö ’pö bhë ’sa, lë‑ ‑wun ‑mü dhebɔ ‑bha ’ka kö ‑wa ‑bha wun bho ’iin kö ‑a ‑gɔ ‑yö ‑lo. Kö ꞊dhɛ ’ö ’pö, ‑yö ö ‑gɔ ‑ta ‑kpa. 7‑A pö ’a‑ wo ’dhö bhë ’ö tɔɔ gɔɔn‑ ꞊nɛ ’ö ‑Zlan ’bin ’ka; yö ꞊nɛ ’ö‑ ‑bha ’tɔbhɔdhe ’bhü ’dhö ‑a ’gü. ’Yö dhebɔ ‑zë, ’yö gɔɔn‑ ‑bha ’tɔbhɔdhe ‑yö ‑kë ‑a ’gü. 8’Ö tɔɔ dhebɔ ꞊nɛ ’ö go gɔɔn‑ ’gü; gɔɔn‑ kun ’ö go dhebɔ ’gü. 9Yö do bhë ’zü, gɔɔn‑ yaa ‑da dhebɔ ‑dhë; dhebɔ ‑zë ꞊nɛ ’ö ‑da gɔɔn‑ ‑dhë. 10‑A ‑wun ’gü ꞊nɛ ’ö ‑Zlan ‑bha bɔmɛ ‑nu wö ’dhiö, ’ö dhebɔ dho ö ‑gɔ ‑ta kpa kö ‑yaan ‑zɔn ꞊nɛ ‑yö ö ‑gɔ ‑dho sia‑ ö ꞊gɔn ‑dhë. 11’Kɛɛ kë‑ wo ’dhö bhë, ꞊ya kë kwa Dëmɛ Yesu Klito ‑bha zian ‑ta dhebɔ ’yaa ’dhö kö gɔɔn‑ ’yaa ’dhö ‑de ‑ta ’iin gɔɔn‑ ‑de ’pö ’yaa ’dhö kö dhebɔ ’yaa ’dhö ‑de ‑ta. 12’Ö tɔɔ ‑kɔ do ’ö ‑Zlan ‑yö dhebɔ sü ‑a ’ka gɔɔn‑ ’gü ’ö‑ ꞊kaa’ bhë, ’yö dhebɔ ‑de ’pö ’ö gɔɔn‑ kpɔ ‑a ’ka. Ka‑ ‑yö bhë ꞊a! ’Wun bhë ‑a ’plɛ ‑go ‑Zlan ’gü.
13Ka gia‑, ka ‑dhɛ ‑ga ’wun bhë ‑a ’gü ‑së ’ka ’dhɛ! ‑A ‑ga ’ka‑ wo bhë, ꞊yö ‑së kö dhebɔ ‑yö ö ‑gɔ ’to ’kpaan ‑bhɔ ’kuë‑ ‑nu ’gü kö ‑yö ꞊bhɛa’‑ ‑a? 14’Kö ‑kë ꞊nɛ ‑dewo poo ’kpongtaa wɔ ’gü, ‑yö lë‑ ‑wun ’ka kö gɔɔn‑ ‑bha wun ‑yö ’to ꞊gbiin, 15’kɛɛ kö ‑yö dhebɔ ‑zë ‑bha ꞊bhlë ‑wun ’ka; ’ö tɔɔ ‑Zlan ‑yö dhebɔ ‑bha wun ‑kë ꞊gbiin ’ka ’dhö kö ‑yaan kë ‑a ‑gɔ ‑ta kpa ‑pë ’ka. 16꞊Ɛɛ, kö ’wun bhë ‑a ‑bho ’piö ‑mɛ ꞊ya kë ‑dhö, kö ‑ya bho ’piö; ’kɛɛ pë ’a mɛ ‑nu ꞊daan’ ‑na ‑a ’ka ’ö bhë; ’ö‑ ’ka ’dhö ’pö ‑Zlan ‑bha mɛ ‑nu mɛ ’wo ‑ya ‑sü ’ka ‑de ‑ta bhë ‑an ziën.
’Wun ’ö ‑gban ‑kɔ ‑da ’ko ’piö ‑bhöpë waa‑ ‑a mɛ ’ö ‑gban kwa Dëmɛ ‑bha ‑bhöpë ’slööslö ‑an ‑bha
(Matiö 26.26-29; Maakö 14.22-25; Lukö 22.15-20)
17’Wun mɛ ’a yö ‑a ‑bha zlöö ꞊nɛ, ka zuö pö ‑dhɛ gbɛ ’yaa‑ ‑bha, bhii ’ö tɔɔ ka ‑bha ‑dho ’ko ꞊bhaa ‑sü bhë, ’yaa ka ’dho ’dhiö; ka ’to ꞊nɛ ’ö‑ wo zlöö ꞊zian’. 18‑Blɛɛzë ’ka, ꞊waa‑ pö n ‑dhë ’saadhö ꞊nɛ ’ka ’dho ka ’ko ꞊bhaa, ’gügludhe ‑yö ‑da ka ziën. ‑A mɛ ’kö bhë a‑ ꞊tɛi’ ‑dɔ ꞊nɛ ‑yö ‑mɔ ‑a ‑bha ‑yö kë ’dhö. 19’Ma ‑dhɛ ‑ga ‑a ’gü ‑së ’ka, ’gügludhe ‑yö ‑da ka ziën ‑yö kë ’dhö kö mɛ ‑nu ’ö ‑an kë ‑kɔ ‑nu ’dhö ‑së giagiawo bhë kö ’kwaan‑ ‑an dɔ. 20꞊Ya kë ꞊nɛ ’ka bhɔ ka ’ko ꞊bhaa kö ’kaan‑ pë ‑bhö, pë ’ka‑ kë ‑na bhë, ’yaa kwa Dëmɛ ‑bha ‑bhöpë ’sü ‑sü ’ka; 21’Ö tɔɔ ‑bhöpë ꞊ya bhɔ, mɛ ’ö ‑dhö ’siö ’ö kpa ‑a ‑ta ö ‑de ‑kpapë ‑bhö ‑wun ’gü. ꞊Ya kë ’dhö zlöö kö mɛ ‑nu ’ö pë ’yaa ‑an ‑gɔ bhë kö ꞊wa ’to din ’ka, ’kɛɛ kö mɛ ‑nu ’wo ’dhiö bhë ‑wo ‑bhöpë ‑nu ‑bhö ‑na ‑ziögɔüsüzë ’ka. 22‑Yö ‑dho kë ’dhö ‑bezë kö mɛ ’ö ‑dhö ‑yö ‑dho to ö ‑de ‑gɔ kɔɔ ‑yaan pë ‑bhö, ‑yaan müpë mü. Kë‑ wo bhë ‑Zlan ‑bha mɛ ‑nu ‑san ’pö ka ‑bha bhë ꞊ee ’iin ka‑ kë kö lë‑ ‑yaan ’kpɔ mɛ ‑nu ’ö pë gbɛ ’yaa ‑an ‑gɔ bhë ‑an ‑ta ‑ee? ‑Më ’pö ’ka‑ ’piö kö ’a‑ pö bhë ꞊ɛ? ‑Yö ‑kë ka ‑zo ’piö ‑be ꞊nɛ a ‑dho ka zuö pö ꞊a! ‑Abi’, n ’ka ’dho ka zuö gbɛ pö.
23Bhii ’ö tɔɔ kwa Dëmɛ ‑yö mɛ ꞊daan’ ‑wo dɔ n kwɛɛ kö ’aan‑ ka ꞊daan’‑ ‑a ’ka ꞊nɛɛ: Gbeng ‑yi ’wo kwa Dëmɛ Yesu kun ‑a ’ka bhë, ‑yö ꞊bluu’‑ ‑sü; 24’ö ꞊dhɛ ’ö ꞊ya ‑Zlan zuö pö ‑a ‑ta, ’ö‑ ’klu ‑kan ’ö‑ pö: «Pë ꞊nɛ ’ö tɔɔ n bun; ‑yö ka ‑bha ’ka. ‑Kaa kë ꞊nɛ ‑kɔ bhë ‑a ’dhö, ‑zo ‑büö n ’ka ‑pë ’ka.» 25‑Kɔ do bhë ’ö ‑drɔɔn ‑kɔɔ do ‑sü ‑a ’ka kö ꞊wa yën pë ‑bhö ‑sü ‑bha, ’ö‑ pö: «‑Drɔɔn ‑kɔɔ ’ö ꞊nɛ ’ö tɔɔ n fɛi ’ö ‑Zlan ‑bha dhidhe ‑wun ‑dëü ’ka ka ‑nu ka ziën. ꞊Ya kë ꞊nɛ ka‑ mü ‑na, ka ‑zo ‑büö n ‑wun ’ka!» 26’Ö tɔɔ kö ‑yö ’dho ‑yö yöë kwa Dëmɛ ‑bha nu ‑yi ‑bha, ka ꞊bluu’‑ ‑bhö ‑na, ’iin ka ‑drɔɔn mü ‑na ꞊nɛ ‑kɔ bhë ‑a ’dhö, ‑a ‑bha ga ‑sü bhë, kö ka ‑a ‑wun ꞊blɛɛ’ ‑na.
27‑A ‑wun ’gü, mɛ ꞊ya kwa Dëmɛ ‑bha ꞊bluu’‑ waa‑ ‑a ‑bha ‑drɔɔn bhë ꞊yaa‑ ’sü ‑kɔ ’bhaa ’gü, kö ꞊ya ꞊sɔɔn yaa ‑wun ‑za ‑lo ö ‑de tuö kwa Dëmɛ bun waa‑ ‑a fɛi buëndhö. 28Kö mɛ ’ö ‑dhö ’ö dho ꞊bluu’‑ waa‑ ‑drɔɔn bhë ‑an sü, ‑yö ö ‑de ‑ga ‑së ’ka! 29Bhii mɛ ꞊ya ꞊bluu’‑ waa‑ ‑drɔɔn bhë ‑a ’sü ’kɛɛ kö ‑a ‑zɔn kwa Dëmɛ bun ’ka ‑sü ’ö bhë yaa‑ ꞊bhlë ‑ya, kö ꞊ya za ‑lo ö ‑de tuö. 30‑A ‑wun ’gü ꞊nɛ ’ö ka ziën ’ö ’yua ꞊ya mɛ ꞊plëëzë ‑nu kë ’tëëtë, ’ö mɛ ’bhaa ‑nu ꞊wa ga bhë. 31’Kɛɛ kë‑ wo bhë, kwa kwa ‑de ’piö ‑ga ‑bezë, kwa ‑dho dha ‑Zlan ‑bha za ‑bha ‑lo kwa tuö ‑sü ‑gɔ. 32’Kɛɛ kë‑ wo ’dhö bhë kwa Dëmɛ ’yan ‑yö kwa kë ‑kɔ ‑nu ‑bha ’ö ꞊ya kë ’ö kwa ’klo bhɔ ‑yö kë ’dhö kö ꞊kun ’ö kwaa‑ ’kpongtaamɛ ‑nu ’ö za dho ‑lo kwa tuö.
33꞊Dhɛ ’ö ’pö, n dhegluzë ‑nu, a‑ ‑pö ka ‑dhë: ꞊Ya kë ꞊nɛ ’ka nu ka ’ko ꞊bhaa kö ’kaan‑ kwa Dëmɛ ‑bha ‑bhöpë ’sü, ‑ka dɔ ka ’ko ‑nu ‑gɔ. 34’Ö ꞊ya kë ꞊nɛ din ꞊ya kë mɛ ’bhaa ‑bha, kö ‑yö pë ‑bhö ö ‑gɔ kɔɔ; ‑yö kë ’dhö ꞊kun ‑kë ’ö ka ‑bha ‑nu ’ko ꞊bhaa ‑sü ’gü, ’ka dho ‑Zlan wö ‑siö ka buëndhö. ’Wun mɛ ‑nu ’wo to bhë, ’ma nu ka ’piö ’ma, kwa ‑dho ‑a yö ’ko ’dhiö.
12’Wun ’ö ‑gban ‑Zuu ’slööslö ‑bha gbaɔ ‑nu ‑bha
1‑Kwa ꞊sië’‑ ’wun ’ö ‑gban ‑Zuu ’slööslö ‑bha gbaɔ ‑nu bhë ‑an ’piö ’sabla. N dhegluzë ‑nu, a‑ ’piö kö ’wun ’ö ‑gban ’wun bhë ‑a ‑bha ‑yö kë ka ’yaan. 2Ka gia‑ ‑yö ka ’yaan ꞊nɛ ꞊dhɛ ’ö ꞊tun ‑be kö ka ꞊tun mɛ ’ö waa Yesu ‑wun ‑dhɛ ’wun gia‑ ‑an ’ka bhë, ‑zuu yaa ‑nu ‑wo kë ka ’gbee‑ ‑ta bho ꞊dhia ’ö gbapë ‑nu ’ö ’waa ’we bhë ’ka ‑an ‑gba; ’kɛɛ kë‑ wo ’dhö bhë, ‑a ’slë gbɛ yaa kë ka ‑gɔ. 3‑A ‑wun ’gü, a‑ ’piö kö ‑yö kë ka ’yaan ꞊nɛ: ‑A mɛ gbɛ ’yaa ‑dhö kö ‑Zuu ’ö go ‑Zlan ’piö bhë ‑yö ’dhiö ’sü ‑a ’ka, ’go mü kö ‑ya pö: «’Dhangga ‑yö ’kpɔ Yesu ’ka!» ’iin mɛ gbɛ ’yaa ‑dhö kö ‑ya pö Yesu tɔɔ ö Dëmɛ, kö ‑Zuu ’slööslö ’yaa‑ ’gü.
4Gbaɔ ‑nu ’wo bhë ‑an ‑gwaa ‑yö ꞊plëëzë. ’Kɛɛ kë‑ wo ’dhö bhë ‑Zuu ’slööslö do bhë ꞊nɛ ’ö ‑an ’plɛ ‑wo go ‑a kwɛɛ. 5Yuö kë ‑kɔ ꞊plëëzë ‑yö ‑dhö, ’kɛɛ kwa Dëmɛ do ꞊nɛ ’wo‑ ‑kë ‑a ‑dhë. 6Yuö ‑kë ‑Zlan ‑dhë ‑sü bhë, ‑a kë ‑kɔ ‑gwaa ‑yö ꞊va. ’Kɛɛ mɛ ’ö ‑an kë ꞊faan’ ‑da mɛ ’plɛ ’gü bhë, ‑yö ’dhö do ‑Zlan ’ka. 7‑Zuu ’slööslö ‑yö mɛ ’ö ‑dhö ‑a ‑bha yuö ’ö dho kë mɛ ’plɛ ‑bha ’wunsë ’ka bhë ‑a ‑nu ‑a ‑dhë. 8’Ö tɔɔ ‑Zuu ‑yö mɛ ’bhaa ‑bha ‑kë ’kpaakpadhɛ ’ka ’ö‑ gbaɔ ‑a ‑gɔ, ’ö mɛ ’bhaa ‑bha ‑yö ‑kë ’wundɔdhe ’ka ’kɛɛ kö ‑Zuu ö bhë ‑yö ’dhö do ’sa. 9‑Zuu do gia‑ bhë ’zü ꞊nɛ ’ö mɛ gbaa ‑zo ‑yö ‑Zlan ‑bha ‑sü (’ö ꞊ya kë mɛ ‑gɔ ’wo ’wun ‑nu kë ‑na ‑a ’ka bhë ‑a) ’ka; ’go mü ’zü ’ö mɛ gbaa ‑kɔ ‑mɔ ’wuën‑ ‑sü ’ka kö ‑yaan ’yua ‑nu bho ‑a ’ka mɛ ‑nu ‑bha. 10‑Zuu ‑yö mɛ ’bhaa ‑nu gbaa ‑na ‑kɔ ‑mɔ ’wuën‑ ‑sü ’ka kö ‑waan ‑dhidhaapë ‑nu kaa kö mɛ ’bhaa ‑nu ‑bha ‑yö kë ‑na ‑Zlan ’dhi ‑wo pö ‑sü ’ka; kö mɛ ’bhaa ‑nu ‑bha ‑yö kë ‑na ‑Zuu ’ö go ‑Zlan ’piö waa‑ ‑zuu yaa ‑an ‑bho ’kou kë ‑sü ’ka. Mɛ ’bhaa ‑nu ‑bha ‑yö kë ‑na ’wun ‑nu ‑blɛɛ ‑wo ’waa gbɛ ’ö ’waa‑ ꞊daan’ ‑a ’gü ‑sü ’ka, kö mɛ ’bhaa ‑nu ‑bha ‑yö kë ‑na ‑wo gbɛ ’ö ’dhö bhë ‑a ’dhiö ‑lo ‑sü ’ka. 11‑Zuu do ’ö ’dhö bhë ꞊nɛ ’ö pë ‑nu ’wo bhë ’ö ‑an ’plɛ ‑kë. Mɛ ’ö ‑dhö gbaɔ ‑de ‑dhë ‑zë ꞊nɛ ’yö‑ nu ‑a ‑dhë ꞊nɛ ‑kɔ ’ö ‑dhi ‑a ’ka ‑a ‑dhë ‑a ’dhö.
12’Wun ‑nu bhë ‑wo ’dhö bhii ‑kɔ do ’ö kwa bun ’dhoë‑ ’ka do ’ö kwa dɔ ‑nu ’dhö kë ‑na ’ka ꞊plëëzë ’ka kwa bun ‑bha bhë ꞊nɛ ’ö Klito ‑bha ’dhoë‑ ’ka. 13Kwa ’saadhö, Zuifö ‑nu, mɛ ’waa Zuifö ’ka, mɛ ’wo ’gan ’gü, mɛ ’waa ’gan ’gü ‑nu, ’kwa pa ‑Zuu ’slööslö bhë ‑a ’ka kö ‑yaan kwa kë bun do ’ka ‑a ꞊kwaa’, ’ö ‑dhɛ ’kwa‑ ‑bha ’töüdhö ’ö ‑Zuu do ’ö bhë ’kwa‑ yö (꞊nɛ ‑kɔ ’ö mɛ ’dhö ’yi mü ‑na ‑a ’ka ’ö‑ ’gu ’dhö dɔ ‑na bhë ‑a ’dhö).
14Kwa bun ’ö ’ka‑ ‑ga ‑na bhë, ‑a dɔ ‑nu ’wo‑ ‑bha ‑wo ꞊plëëzë; yaa kë ꞊nɛ pë ’wo‑ pö ‑yö do yö ‑mü. 15꞊Ya kë ꞊nɛ ‑gɛn ꞊yaa‑ pö ‑be: «‑Kɔ ’dhɛ ’yaa ‑mü n ’ka, kö ’maa bun ‑bha.» Kö pë ’ö dho ‑a kan bun ‑bha yö ’pö bhë ꞊ee? 16’Ö ’tonëga ꞊yaa‑ pö: «’Yan kun n ’ka; ꞊dhɛ ’ö ’pö, kö ’maa bun ‑bha.» Kö pë ’pö bhë ’ö dho ‑a kan bun ‑bha bhë ꞊ee? 17꞊Ya kë ꞊nɛ bun ‑dhɛ ’saadhö ꞊ya kë ’yan ’ka, kö ‑yö ‑dho ’wun ma ö ‑më ’ka ɛɛ? ’Iin ꞊ya kë ’zü ꞊nɛ ‑a ‑dhɛ ’saadhö ꞊ya kë ’tonë ’ka, kö ‑yö ‑dho pë ’tëë ma ‑kɔklë ꞊ɛ? 18’Ö tɔɔ dɔ mɛ ’ö ‑dhö, ‑Zlan ‑ya ‑ya ‑a ‑yadhɛ ‑bha ꞊nɛ ‑kɔ ’ö ‑dhi ‑a ’ka ‑a ‑dhë ‑a ’dhö. 19꞊Ya kë ’zü ꞊nɛ dɔ do ’ö ‑dhö ‑be, kö bun ’ka ’dho kë ‑dhö. 20’Kɛɛ kë‑ wo ’dhö bhë bun ‑yö do ’ö‑ dɔ ‑nu ’wo ꞊plëëzë.
21‑A mɛ gbɛ yaa ziö ö ’bha ‑ta. ‑A ‑wun ’gü ’yan yaa ‑mɔ ‑a ‑bha ꞊ya pö ꞊nɛ ö ‑mawun ’yaa bun ‑bha; ’iin ‑gɔ yaa ‑mɔ ‑a ‑bha kö ‑ya pö ‑gɛn ‑nu ‑dhë ꞊nɛ ö ‑mawun ’yaa ‑gɛn ‑bha. 22꞊Ya ’go mü bun ‑gbaan mɛ ’ö ꞊faan’ ’yaa‑ ‑gɔ bhë, ‑a ‑bha këpë ‑nu ‑wo ‑dhö ’pö. 23Dɔ ‑dhɛ mɛ ‑nu ’ö ‑an ‑to plaan ‑sü ’yaa ‑së bhë ꞊nɛ ’ö ’kwa kwa ‑zo ‑kë ‑an ’piö ‑së ’ka ’ö ꞊zië’ ‑an mɛ ‑nu ’wo to ‑an ‑ta. ‑An mɛ ‑nu ’ö ‑an ‑wun ꞊blɛɛ’ ‑dhɛ ’yaa ‑dhö bhë ꞊nɛ ’ö ’kwa kwa ‑zo ‑kë ‑an ’piö ꞊duö. 24’Kɛɛ kö ‑an mɛ ‑nu ’ö ’waa lë‑ ‑pë ’ka bhë, ’ö ’kwaa sɔ ‑nu kë ‑an ‑bha. Kë‑ wo ’dhö bhë, ‑Zlan ‑yö bun ‑kë, kö ‑a dɔ ‑nu mɛ ’ö ‑an ‑zo ‑kë ‑an ’piö ‑sü ‑yö ‑an ‑ma kun ꞊duö ’kɛɛ kö ‑an ꞊bhlë ’yaa ‑dhö bhë ‑yö kë ‑a ‑bha. 25꞊Ya kë ꞊nɛ ‑kɔ bhë ‑a ’dhö, ’gügludhe yaa ’dho ‑da dɔ ‑nu ziën bun ’gü. Pë ’wo dho ‑a kë ’ö tɔɔ, dɔ ’wo dho ‑a wo wo ’ko ‑nu ‑wun ꞊zɔnng’ ‑ta. 26꞊Ya kë ꞊nɛ bun ‑gbaan do ‑yö bɔ ‑na ’wun ’gbee‑ ’gü, ‑an mɛ ’wo to ‑an ’plɛ ‑wo ‑kpa ‑a ‑bha ’wo bɔ ‑a ’gü. ‑A mɛ do ꞊bhlë ꞊ya ’kpɔ, ‑an mɛ ‑nu ’wo to ‑wo ‑kpa ‑a ‑bha ’wo ’gludhi ‑kë.
27Ka ’saadhö, ka ‑dho ’kuë‑ ‑sü ‑yö Klito bun ’ka, ’ö mɛ ’ö ‑dhö ’ö bun bhë ’ö ‑a ‑gbaan do ’ka. 28‑A ‑wun ’gü ꞊nɛ ’ö ‑Zlan ‑bha mɛ ‑nu ziën, ’ö ‑Zlan ‑yö Yesu ‑bha bɔmɛ ‑nu ‑ya ‑blɛɛzë ’ka; ’yö ö ’dhiwopömɛ ‑nu ‑ya ꞊plɛ ‑naa ’ka, ’ö mɛ ‑nu ’ö ‑an ‑ya ‑yaaga ‑naa ’ka, ’wo ‑kë mɛ ꞊daan’ ‑mɛ ‑nu ’ka. ’Ö ꞊ya ’go mü zlöö, ’ö mɛ ‑nu ’ö ’wo ‑dhidhaakëpë ‑nu gbaɔ yö, ‑a mɛ ’wo mɛ ‑nu ‑dhɛ bo gbaɔ yö, ‑nu mɛ ‑dhë ‑mɛ ‑nu, ’dhiö ‑sü mɛ ’ka ‑mɛ ‑nu waa‑ mɛ ‑nu ’wo ’wun ꞊blɛɛ ‑wo gbɛ ’gü ’wo bhë ’töüdhö ’wo yö mü. 29Mɛ ‑nu ’wo bhë ‑an ’plɛ ’waa Yesu ‑bha bɔmɛ ‑nu ’ka, ’waa ‑Zlan ’dhiwopömɛ ‑nu ’ka ’iin ’waa mɛ ꞊daan’ ‑mɛ ‑nu ’ka. ‑An ’plɛ waa ‑kɔ ‑mɔ ’wuën‑ ‑sü yö kö ‑waan ‑dhidhaapë ‑nu kë, 30’iin kö ‑waan ’yuamɛ ‑nu ‑dhɛ bo, ’iin kö ‑waan ’wun ‑nu ꞊blɛɛ’‑ ‑wo gbɛ ‑nu ’gü, ’iin kö ’wun ’ö ꞊blɛɛ ‑wo gbɛ ’gü bhë kö ‑waan ‑a ’dhiö ‑lo. 31Yuö ‑nu ’wo ‑gban gbaɔ ‑nu ’ö ‑Zuu ’slööslö ‑ya kë bhë ‑a ‑bha bhë, ‑an mɛ ‑nu ’ö ‑an ‑wun ’dhö ’gbee‑, ‑ka ‑ya ‑an ꞊wuën’, ’ka ‑an ꞊mɛɛ’‑!
Gbaɔ ‑nu ’wo bhë ‑wo ‑kë ’dhö ’kɛɛ ‑ka dɔ! A ‑dho pë do ’ö‑ ‑wun ’dhö ’gbee‑ ‑a ‑wun ꞊blɛɛ’ ka ‑dhë.
13’Wun ’ö ‑gban ‑dhɔ ‑bha
1’Kö ‑kë ꞊nɛ ‑Zuu ’slööslö ‑yö gbaɔ ‑kë n ‑dhë kö ’a ’wun ꞊blɛɛ’‑ mɛ ’bhee‑ waa‑ ‑Zlan ‑bha bɔmɛ ‑nu ‑an ‑wo ’gü, kö n ’ka ‑an ꞊daan’, ’ö mɛ ‑nu ’wo to ’ö ‑an ‑dhɔ ’yaa n kë, kö ma ’wun ‑nu ꞊blɛɛ’ ‑sü ‑yö ꞊nɛ ꞊tang’‑ ‑wo ’kpaan ’iin ’zü ꞊nɛ gɔnggɔng ’wo‑ ‑ma ‑na, ‑an ’we ‑wo ’kpaan ’dhö. 2A ‑dho ‑mɔ ‑a ‑bha kö ’a ‑Zlan ’dhi ‑wo pö, kö ’wundɔdhe ’saadhö ‑yö kë n ‑gɔ, kö ’wun ‑nu ’wo ‑bin ‑sü ’ka, ‑an ‑gɛn ma ‑sü ‑yö kë n ‑gɔ. A ‑dho ‑mɔ ‑a ‑bha kö ‑zo ‑yö ‑Zlan ‑bha ‑sü ’ö ꞊ya kë mɛ ‑gɔ ’wo ‑mɔ ‑a ‑bha ‑wa pö ‑tɔn ‑dhë ‑yö ’go ö pin ꞊taa, ’ö ‑tɔn bhë ’ö ‑vin bhë, ‑a ‑zo ‑yö ‑Zlan ‑bha ‑sü ꞊va bhë ‑yö kë n ‑gɔ; ’kɛɛ ꞊ya kë ꞊nɛ mɛ ‑nu ‑dhɔ ’yaa n ’gü, kö a pë ’kpaan ’ka. 3’Kö ‑kë ꞊nɛ pë ‑nu ’wo n ‑gɔ, a‑ ‑glu ’fɛɛmɛ ‑nu ’ka, ’a dho ‑dewo ’a n ‑de dɔ mɛ ‑nu kwɛɛ ’wo n ‑güö, kö mɛ ‑nu ‑dhɔ ’yaa n ’gü, kö n ‑yö ‑a ‑bha ‑pë gbɛ ’yaa ‑dhö.
4Mɛ ’ö ‑dhɔ ’dhö ‑a ’gü, ‑a ꞊zuö’ ‑yö ‑saa; ‑a ’glu ꞊yö ‑së; ’yaa ‑ya mɛ ’kpaan gbɛ ‑bha pë ‑dhɔ ’ka; ’yaa ö ‑de ‑wun ꞊blɛɛ’‑ ’dhi ꞊va ’gü; ’yaa ö ‑de ’sü ꞊va. 5Mɛ ’ö ‑dhɔ ’dhö ‑a ’gü, ’yaa lë‑ ‑pë gbɛ kë; ’yaa pë bɔ ö ’ka; ’yaa ‑naadhe kë, ’yaa mɛ ‑wun ‑da ö ꞊zuö’ ’piö ‑pë kë. 6Mɛ ’kpaan gbɛ ’yaa pë yaa kë ’yaa kë ‑a ‑dhë ‑së; pë ’yö ö ‑së ‑kë ‑a ꞊wuën’ ’ö tɔɔ ’wun ’ö kpengdhö ’ö mɛ ‑ya ‑kë ‑a ’yaan ’ka ꞊zian’. 7‑Dhɔ ꞊ya kë mɛ ’gü, ‑ya ‑kë ’ö mɛ bhë ’ö ö ꞊zuö’ kuënnu ’wun ’saadhö ’gü; ‑ya ‑kë ’ö ‑zo dɔ ‑sü waa‑ ꞊zuösaadhɛ ‑wo kë mɛ ‑gɔ ’ö ꞊ya kë ’wo wo ‑zo yö ‑Zlan ‑bha ’wun ’saadhö ’gü.
8‑Dhɔ bhë ‑yö ‑dho to ’dhö ꞊toëpö ’ka. ’Kɛɛ ‑Zlan ’dhi ‑wo pö ‑sü ’ö bhë ‑a ’töng ‑yö ‑dhö ’ö ꞊ya kë ’dhö ꞊waa‑ ꞊blɛɛ’‑ ’ö‑ ’töng bhë ꞊ya ziö kö ‑a ‑yö ‑a ‑bha ‑pë gbɛ ’yaa ’dhö gbɔ. ’Wun ‑nu ‑blɛɛ ‑wo gbɛ ’gü ‑sü bhë ‑yö ‑dho yën, ’ö ’wundɔdhe ‑yö yën. 9’Ö tɔɔ ’töng ’ö ’kwa‑ ’gü ꞊nɛ, kwa ‑Zlan ’dhi ‑wo pö ‑na, ’kwaa‑ pö ’fɛfɛdhö, ’ö kwa ‑bha pë dɔ ‑sü ’ö bhë ’pö ’ö ’yaa ‑mɔ ‑sü ’ka ’fɛfɛdhö. 10’Kɛɛ pë ’ö ’fɛfɛdhö ꞊ya nu ꞊sia kö ‑a mɛ ’ö ’yaa ‑mɔ ‑sü ’ka ’kuë bhë ‑a ziö ‑sü ‑mü.
11Ka gia‑, ‑ka ‑dhɛ ‑ga bhë! ꞊Dhɛ ’a ꞊tun ’në ’ka, n ’wun ‑nu ꞊blɛɛ’ ‑kɔ ‑nu, n ‑zo ’ta ‑kɔ ‑nu waa‑ n ’wun ‑nu ‑yö ’ko ’dhiö ‑kɔ ‑nu ‑wo ‑kë ꞊nɛ ’në ‑nu ‑bha ’dhö. ’Kɛɛ dɔ ’a‑ wo zlöö ’ö ’ma kë mɛ ‑de ’ka ꞊nɛ, ’ma n ꞊kwaa’ ’në ‑bha ’wun kë ‑kɔ ‑zü. 12’Töng ꞊nɛ ‑a ’gü pë ‑nu ’kwa ‑kpën ‑na ‑an ‑bha bhë ‑wo pë ’bin ’ka ꞊nɛ ‑kɔ ’wo ‑dhɛ ‑ga ‑na ‑a ’ka ’sëë‑ ’yan ’bhluubhluzë ’gü bhë ‑a ’dhö. ’Kɛɛ kë‑ wo ’dhö bhë, ‑a ’töng ꞊ya ‑lo ꞊sia, (kwa ‑dho ꞊dhië’ ‑zü) ’ö kwaa‑ Klito ‑nu ’kwa dɔ kwa ’ko wö ’dhiö ’ö ’kwa‑ yö. Dɔ ’kwa‑ wo ꞊nɛ ’wun ‑nu ’wo ‑gban ‑Zlan ‑bha bhë ‑an dɔ ’a‑ wo bhë ’yaa ’fɛfɛdhö. ’Kɛɛ yi bhë ꞊ya ‑lo ꞊sia, a ‑dho ‑a dɔ ’fɛfɛdhö ꞊nɛ ‑kɔ ’ö ‑Zlan ‑yö n dɔ ‑a ’ka bhë ‑a ’dhö.
13꞊Ya kë ’dhö kö ’wun ‑yaaga ’ö ’wo dho to ’wo tɔɔ: ‑Zo ‑yö ‑Zlan ‑bha ‑sü, ‑zo ‑dɔ ‑Zlan ‑bha ‑sü waa‑ ‑dhɔ. ’Kɛɛ kë‑ wo ’dhö, pë ‑yaaga ’wo bhë, ‑a mɛ ’ö ‑an ‑gɔ ‑ta ’ö‑ ‑wun ’dhö ’gbee‑ ’ö tɔɔ ‑dhɔ.
141Kö ‑dhɔ ‑kë mɛ ’ka ‑sü bhë, ‑ka ‑ya ‑a ꞊wuën’! ’Kɛɛ gbaɔ ‑nu ’ö ‑Zuu ’slööslö ’dhö ‑a nu ‑na mɛ ‑nu ‑dhë bhë, ‑ka ‑an ꞊mɛɛ’ ’pö; ’kɛɛ ‑yö ‑dho kë ‑së kö ‑yö kë ‑a mɛ ’ö ‑kë ‑Zlan ’dhi ‑wo pö ‑sü ’ka bhë ‑a ’ka. 2Mɛ ’ö ’wun ꞊blɛɛ’ ‑na ‑wo gbɛ ’gü bhë, yaa‑ ꞊blɛɛ’‑ mɛ ‑nu ‑dhë, ’kɛɛ ‑ya ‑blɛɛ ‑Zlan ‑dhë, bhii mɛ gbɛ ’yaa‑ ma. ’Wun ‑nu ’wo ‑bin ‑sü ’ka ‑a ꞊blɛɛ’ ’ö‑ wo ‑na bhë, ‑Zuu ’slööslö ꞊nɛ ’ö ‑kë ‑a ‑bha ‑kɔ ‑mɔ ’wun ‑bha ‑sü ꞊kwaa’. 3’Kɛɛ mɛ ’ö ‑Zlan ’dhi ‑wo pö ‑na bhë, ‑ya ꞊blɛɛ mɛ ‑nu ‑dhë kö ‑yö ‑an ꞊faan’ ’më ‑an ‑bha ‑zo ‑yö ‑Zlan ‑bha ‑sü ’gü, ‑yaan ‑an ꞊faan’ ’më ’iin kö ‑yaan ‑an ꞊zuö’ ꞊dhuë’‑. 4Mɛ ’ö ’wun ꞊blɛɛ’ ‑na ‑wo gbɛ ’gü bhë, ö ‑de ’sloo ꞊faan’ ꞊nɛ ’ö‑ më ‑zo yö ‑sü ’gü, ’kɛɛ kö mɛ ’ö ‑Zlan ’dhi ‑wo ꞊blɛɛ’ ‑na bhë, ‑Zlan ‑bha mɛ ‑nu ‑todhösü ꞊nɛ ’ö ‑an ‑bha ‑zo ‑yö ‑Zlan ‑bha ‑sü ꞊faan’ më.
5A‑ ’piö kö ka ’plɛ ’ka ’wun ‑nu ꞊blɛɛ’‑ ‑wo gbɛ ’gü; ’kɛɛ kë‑ wo bhë, ‑Zlan ’dhi ‑wo pö ‑sü ꞊yö ‑së, ’ö tɔɔ mɛ ’ö ‑Zlan ’dhi ‑wo pö ‑na bhë, ‑yö ꞊bhlëzë ’ö ꞊zië’ ’wun ‑blɛɛ ‑wo gbɛ ’gü ‑mɛ ‑nu ‑ta. ’Kɛɛ kë‑ wo ’dhö bhë, mɛ ꞊ya kë ‑an ziën ’ö ꞊ya ‑mɔ ‑a ‑bha kö ’wun ’ö ꞊blɛɛ ‑wo gbɛ ’gü bhë, ‑ya kë kö mɛ ’plɛ ‑wa ma, kö ‑ya ꞊dhië’ ‑kwaa ‑yö kë ’dhö kö ‑yö ‑an ꞊faan’ ’më ‑an ‑bha ‑zo ‑yö ‑Zlan ‑bha ‑sü ’gü. 6N dhegluzë ‑nu, ꞊dhɛɛ’ do ’ö ꞊nɛ: ꞊Ya kë ꞊nɛ n ‑ma ‑nu ka ’piö ‑sü bhë, ’ma ’wun ‑nu ꞊blɛɛ’‑ ka ‑dhë ‑wo gbɛ ’ö ’kaa‑ ma ‑a ’gü, ’ka ‑dhɛ ‑ga ’gü, ‑më ‑së ’ö dho ‑a kë ka ‑dhë ‑ɛɛ? ‑A ‑yö ‑a ‑bha ‑pë gbɛ yaa ’dhö kë ‑dhö ka ‑gɔ, ‑a ’ke yaa kë ’wun ’ö ‑kë ‑bin ‑sü ’ka ’ö ‑Zlan ‑ya ‑zɔn ‑a ꞊blɛɛ’ ‑wo, ’wundɔdhe ꞊blɛɛ’ ‑wo, ‑Zlan ’dhi ‑wo pö ‑sü waa‑ mɛ ꞊daan’ ‑wo ‑an ’ka.
7’Wun ꞊zuan’ do ꞊ga ꞊nɛ; ‑yö ‑sü ꞊troo’ ‑kë ‑a ‑bha ‑pë ‑nu, ’wo ꞊nɛ ‑bhɔng ‑nu, kɔng ‑nu ‑an ’dhö bhë ‑a ‑bha. ꞊Ya kë ꞊nɛ ‑a mɛ ’ö ‑dhö ‑a ‑wobɔatadhe yaa kë ‑dhö, ‑dhɛ ’wo‑ ‑bha do do ’ka bhë, ‑wo ‑dho ‑an ‑wo ‑dho ’ko ’piö dɔ ‑më ‑bha ‑ɛɛ? 8’Ö ꞊ya kë ’pö ꞊nɛ ’truu ’ö ꞊waa‑ ‑piö, ’ö ‑glugɔnmɛ ‑nu ’dho ‑na ’kuëdhö bhë, ‑a ‑piö mɛ ’yaa‑ ‑piö ‑a ‑piö ‑kɔ ’ka, ‑glugɔnmɛ ‑nu ‑wo dho wo ‑de ‑pë kë ‑kɔklë ꞊ɛɛ? 9Ka gia‑, ‑ka ‑dhɛ ‑ga bhë ’dhɛ! ‑Kɔ do bhë ‑a ’ka, ’ka ‑Zlan ’dhi ‑wo pö ‑wo gbɛ ’gü, ‑wo ‑dho ‑a ‑gɛn ma ‑kɔklë ꞊ɛɛ? ꞊Ya kë ’dhö kö pë ’ka‑ ꞊blɛɛ’ ‑na bhë ‑a ‑gɔ ’yaa ‑dhö, ka‑ ‑blɛɛ ’kpaan. 10‑Wo ꞊plëëzë ‑nu ‑wo ‑dhö ’kpongtaa zö, ’kɛɛ ‑a mɛ ’ö dho kë ‑dhö kö ꞊waa‑ ꞊blɛɛ’ ‑waan pö ‑a ‑gɛn ma ‑mɛ ’yaa ’dhö, ’yaa ‑dhö. 11’Kɛɛ kë‑ wo ’dhö bhë, mɛ ꞊ya ’wun ꞊blɛɛ’‑ n ‑dhë ‑wo ’ö ’maa‑ ma ‑a ’gü, kö mɛ bhë, yi ‑nu ’yië kë yi ’ko ‑dhë ‑nia ’ka. 12꞊Dhɛ ’ö ‑kë ꞊nɛ ka ‑ya ‑sü ’ka ‑a ꞊wuën’ giagiawo kö ‑Zuu ’slööslö ‑bha yuö ‑nu ‑wo dɔ ka kwɛɛ bhë, kö ‑wo kë ka ‑gɔ ꞊va ’ka ‑Zlan ‑bha mɛ ‑nu ‑da ’dhiö ‑pë ’ka, ‑zo ‑yö ‑a ‑bha ‑sü ’gü.
13Mɛ ’ö ’wun ꞊blɛɛ ‑wo gbɛ ’gü bhë, ‑a ꞊dua’ ‑mü kö ‑ya ‑dhɛ ‑Zlan ‑gɔ kö (yö gia‑) ‑a ’dhiö ‑lo ‑sü ‑yö bɔ ‑a ‑ta. 14’Ö tɔɔ ꞊ya kë ꞊nɛ a ꞊bhɛa’ ‑na ‑wo gbɛ ’gü, ’kö ‑kë ꞊nɛ n ’nii‑ ‑yö ꞊bhɛa’ ‑sü ’piö, n ’wunbhokoukëdhe gbɛ ’yaa ’dhö. 15꞊Ya kë ’dhö kö pë ’a dho ‑a kë zlöö ’ö tɔɔ ‑kɔ do ’ö n nii ’dhoë‑ ’ka ꞊bhɛa’ ‑sü ’gü bhë, ’ö ’töng gbɛ ’ka ’pö ’ö n ‑ma ’wunbhokoukëdhe dho kaa ’pö ꞊bhɛa’ ‑sü ’gü; ’iin ‑kɔ do ’ö n ‑zo ’plɛ dho kaa ’tan bho ‑sü ’gü bhë ’ö n ‑ma ’wunbhokoukëdhe dhö kaa ’pö ‑a ’piö. 16Bhi gia‑, ꞊dhɛ ’ü‑ ‑ga ‑a ’gü bhë, ꞊ya kë ꞊nɛ ’bha ‑Zlan zuö pö dosɛn ‑wo ’waa gbɛ ’gü, mɛ ’kpaan ‑dho kë ‑dhö ‑bhɔkuëkëdhɛ ’gü mü kö ‑yö amɛn pö ꞊a? ’Ö tɔɔ ü ‑bha ‑Zlan zuö pö ‑sü ’gü, pë ‑nu ’ü‑ ꞊blɛɛ’ bhë ’yaa‑ ma. 17’Kö ‑kë ꞊nɛ ü ‑bha ‑Zlan zuö ‑pö ‑a ’gü ‑wun ꞊yö ’kpëdhö, yaa ’dho mɛ gbɛ ‑bha ‑zo ‑yö ‑Zlan ‑bha ‑sü ꞊faan’ më.
18A ‑Zlan zuö ‑pö ’ö tɔɔ a ’wun ‑blɛɛ ‑wo gbɛ ’gü ꞊va ’ka ’a ꞊zië’ ka ’saadhö ka ‑ta. 19’Kɛɛ kë‑ wo ’dhö bhë, ꞊ya kë ꞊nɛ mɛ ‑nu ꞊wa ’dho wo ’kuë‑, ‑yö ‑kë n ’gü ‑së kö ‑wo kpö ’sɔɔdhu ’wo dho ‑a ‑gɛn ma, ’a‑ pö kö ‑an ‑bha ‑zo ‑yö ‑Zlan ‑bha ‑sü ‑yaan ‑da ’dhiö ’ö ꞊zië’ ‑wo kpö ‑vuu ꞊plëëzë ‑pö ‑wo gbɛ ’gü ‑sü ‑ta.
20N dhegluzë ‑nu, kö ꞊kun ’ö ka ’wun ‑nu ‑yö ’ko ’dhiö ‑kɔ ‑nu ‑wo ‑kë ꞊nɛ ’në ‑nu ‑bha ’dhö; ’wun ’ö ‑gban ’wun ‑nu kë ‑sü ’gbloo ’piö ‑bha bhë, ‑ka kë mɛ ‑dee ‑nu ’ka ‑an ’gü! Pë ’ö ’ka dho kë ‑a ’gü ꞊nɛ ’në ‑nu ’dhö ’ö tɔɔ pë ‑nu ’wo ‑gban ’wun yaa kë ‑sü ‑bha bhë ꞊zian’ ’ö bhii ’kaa pë gbɛ dɔ ‑a ‑bha. 21Pë ’ö ꞊bɛɛn’ ‑sü ’ka ‑Zlan ‑bha ’sëëdhɛ ’gü ‑ya ‑pö: Kwa Dëmɛ ‑ya ‑pö ꞊nɛɛ: A ‑dho ’wun ꞊blɛɛ’‑ ’sɛgɔ ’ö ꞊nɛ ‑a ’gü ‑mɛ ‑nu ‑dhë; ’kɛɛ kë‑ wo ’dhö bhë a ‑dho ‑a ꞊blɛɛ’‑ ꞊bɔa’ ‑wo gbɛ pö ‑mɛ ‑nu ‑ta ‑sü ’ka. 22꞊Ya kë ’dhö, gbaɔ ’ö ‑gban ’wun ‑blɛɛ ‑wo gbɛ ’gü ‑sü ‑bha bhë, ‑yö ’wun ꞊zuan’ ’ka mɛ ‑nu ’ö ’waa ‑Zlan ‑bha ’ka bhë ‑an ‑dhë (‑a ‑zɔn ‑an ‑dhë ‑sü ’ka ꞊nɛ ‑Zlan ꞊ya ö ‑ta yö ‑an ‑bha); ’kɛɛ mɛ ’ö ’wo ‑Zlan ‑bha ’ka ‑an ‑bha ’wun ’yaa yö ’dhö; pë ’ö mɛ ‑nu ’wo ‑Zlan ‑bha ’ka ’ö ‑an ‑dhë ’wun ꞊zuan’ ’ka ’ö tɔɔ gbaɔ mɛ ’ö ‑kë ‑Zlan ’dhi ‑wo pö ‑sü ’ka (‑a ‑zɔn ‑sü ’ka ꞊nɛ ’ö ‑an ziën). ’Kɛɛ kë‑ wo ’dhö ’pö bhë ’yaa ’dhö mɛ ‑nu ’ö ’waa ‑Zlan ‑bha ’ka bhë ‑an ‑bha ’ka.
23Ka gia‑, ‑ka ‑dhɛ ‑ga bhë ’dhɛ! ꞊Ya kë ꞊nɛ ‑Zlan ‑bha mɛ ‑nu ꞊wa ’dho wo ’ko ꞊bhaa, wo ’plɛ ꞊wa yö ’wun ꞊blɛɛ’ ‑sü ‑bha ‑wo gbɛ ’gü, mɛ ‑nu ’waa pë gbɛ dɔ ’wun bhë ‑a ‑bha waa‑ mɛ ‑nu ’ö ’waa Yesu ‑wun ‑dhɛ ’wun gia‑ ‑mɛ ‑nu ’ka, ꞊wa ‑da ka kpö ’gü mü, wo ’ka ’dhoë‑ pö ’blɔɔn‑ ꞊ya ‑da ‑an ’gü a? 24’Kɛɛ ꞊ya kë ꞊nɛ ka ’plɛ ’ka yö ‑Zlan ’dhi ‑wo pö ‑sü ‑bha, mɛ ‑nu ’ö ’waa Yesu ‑wun ‑dhɛ ’wun gia‑ ‑mɛ ‑nu ’ka bhë waa‑ ’to ’to ‑mɛ ’kpaan ꞊wa ‑da ka ziën, ’wun bhë ‑yö ‑dho ‑gban ‑an ‑bha, ’ö yö ‑an ‑bha ꞊sɔɔn yaa ‑bha, ’wun ’ö ’wo‑ ma ‑na bhë ‑a ‑wun ’gü; ’ö ꞊ya kë ’ö ‑an ꞊zuö’ ‑yö za dɔ ‑an ‑bha, 25kö ‑an ꞊zuö’ ’gü ‑wun ‑nu ’wo ‑bin ‑sü ’ka ’fɛfɛdhö bhë ꞊wa yö ‑dhɛpuudhɛ ’gü. ‑Kɔ bhë ꞊nɛ ’ö ꞊ya kaa ’ö mɛ ‑nu ’wo bhë ’wo ‑gblü ‑Zlan ‑wo ’dhiö ‑a ‑dhɔ kë ‑sü ’ka ꞊woë’ ꞊nɛɛ: «’Wun gia‑ ‑mü. ‑Zlan ‑yö ka ziën.»
’Wun ‑mɔ ’kuë ‑kɔ ‑së ’ö ‑Zlan ‑bha mɛ ‑nu ziën
26’Wun mɛ ’a dho kan ‑a ‑ta zlöö, n dhegluzë ‑nu, ö tɔɔ: ꞊Ya kë ꞊nɛ ’ka ’dho ka ’ko ꞊bhaa, mɛ ꞊ya kë ka ziën ’ö ’tan ꞊ya nu ‑a ꞊zuö’ ’piö, kö mɛ gbɛ ‑bha ‑yö kë mɛ ꞊daan’ ‑wo ’ka, kö mɛ ’waa gbɛ ‑bha ‑yö kë pë ’ö ’bin ‑sü ’ka ’ö‑ yö ‑a ’ka, mɛ ‑yö bɔ ‑de ‑a ‑bha ‑yö kë ’wun ‑blɛɛ ‑wo ’waa gbɛ ’gü ‑sü ’ka, ‑a mɛ ’bhaa ‑bha ‑yö kë ‑a ‑dhië ‑kwaa ‑sü ’ka ’ö ’ka dho ‑a kë, ‑a ’plɛ ‑yö kë ka ‑zo ‑gban ‑pë ’ka. 27’Ö ꞊ya kë ꞊nɛ mɛ ‑nu ꞊wa kë ‑dhö kö ‑waan ’wun ꞊blɛɛ’‑ ‑wo gbɛ ’gü, kö ‑wo kë mɛ ꞊plɛ ’iin mɛ ‑yaaga ’ka, ’kɛɛ kö ‑a ‑dhië ‑kwaa ‑sü ‑yö kë ‑dhö; mɛ ’ö ‑dhö, ‑yö yö mü do do ’ka. 28’Ö ꞊ya kë ꞊nɛ mɛ ’yaa ‑dhö kö ‑wo ‑nu bhë ‑yö ‑an ‑gɛn pö, kö mɛ ’ö ‑dhö ‑yö ꞊bhɛa’‑ ‑wo ꞊löö ö ‑de ’sloo ö ‑bha ’ka ‑Zlan ‑dhë; kö ꞊kun ’ö‑ ‑wo ‑yö yö plaan mü. 29Kë ꞊nɛ ꞊ya ’to ‑Zlan ’dhiwopömɛ ‑nu ‑bha, ‑wo kë mɛ ꞊plɛ ’iin mɛ ‑yaaga ’ka kö ‑wo ’wun ꞊blɛɛ’‑ ‑wo ‑ta; kö mɛ ‑nu ’wo to, ‑wo wo ’to ’to ‑a ‑bha ‑wo ‑dhɛ ‑ga ‑a ’piö. 30’Ö mɛ ꞊ya kë mü ’pö ’ö ‑Zuu ’slööslö ꞊ya ’wun bho ‑bin ‑blü ‑a ‑dhë kö ‑yaan ‑a ꞊blɛɛ’‑, kö ‑yö dɔ mɛ ’ö ’dhiö bhë ‑yö yën ö ‑bha ‑bha. 31‑Yö kë ’dhö kö ka ’plɛ ’kaan‑ ‑Zlan ’dhi ‑wo pö, mɛ do ‑yö yö mü; ꞊ya yën ’ö mɛ ’waa gbɛ ‑yö yö mü ’pö kö mɛ ’plɛ ‑waan ‑a ma kö ‑an ꞊faan’ ‑yaan ’më. 32Mɛ ’ö ꞊ya kë ’wo ‑Zlan ’dhi ‑wo pö ‑na bhë, ‑an ꞊dua’ ‑mü kö ‑wo kë ’wun ’ö dɔ ‑an ’dhi bhë mɛ ’ö ’wo‑ ’kun ‑kɔ dɔ ‑an ’ka; 33’ö tɔɔ ‑Zlan yaa kwa ꞊dhɔɔ kë kö ’kwaan‑ pë ‑nu kë ‑kungkuëdhɛ ‑kwaa; ’kɛɛ kö ‑yö kë ꞊zian’ ꞊zuöyagluu ’gü.
‑Ka ‑dhɛ ‑ga ’dhɛ! ꞊Ya kë Yesu ‑wun ‑dhɛ ’wun gia‑ ‑mɛ ‑nu ziën, ‑dhɛ ’saadhö ’gü ‑kɔ ’ö kë ‑na ‑a ’ka 34dhebɔ ‑nu ’piö ꞊zian’ ’ö tɔɔ ‑ya ’wo‑ wo diindhö. ’Yaa ‑së ‑an ‑bha ’ka kö ‑wo ’wun ‑nu ꞊blɛɛ’‑ ‑bhɔkuëdhe ‑nu ’gü; ‑wo kë dhoo ‑nu ’wo wo ‑gɔ dho sia‑ wo ꞊gɔn ‑nu ‑dhë ‑an ’ka ꞊nɛ ‑kɔ ’ö ‑Zlan ‑bha tɔng ‑ya pöë bhë ‑a ’dhö. 35꞊Ya kë ꞊nɛ ꞊dhɛɛkpɔdhe ‑ya kë ‑an ‑gɔ ’wun ’bhaa ‑bha, kö ‑wo wo ꞊gɔn ‑nu ꞊dhɛɛ’ ’kpɔ kɔɔ ꞊zian’. ’Yaa ‑së dhebɔ ‑bha ’ka kö ‑yö ’wun ‑nu ꞊blɛɛ’‑ ‑bhɔ ’kuë‑ ‑nu ’gü.
36’Ö bhii ka gia‑, ‑ka ‑dhɛ ‑ga bhë! Yaa kë ꞊nɛ ‑Zlan ‑wo ’ö bhë ‑dhɛ ’ö ka ꞊plöö ’ma bhë ꞊nɛ ’ö ‑wo ‑a ‑bha ’iin ka ‑de ’sloo ꞊nɛ ’ka‑ yö. 37’Ö ꞊ya kë ꞊nɛ ü ‑Zlan ’dhiwopömɛ ’ka ’iin gbaɔ ’ö go ‑Zlan ’piö ‑yö ü ‑gɔ kö ’wun ‑nu ’a‑ ꞊blɛɛ’ ‑na ’sëëdhɛ ꞊nɛ ‑a ’gü bhë ‑yö kë ü ’yaan ꞊nɛ, ‑yö tɔng ’ö kwa Dëmɛ ‑ya dɔ ‑a ’ka. 38Mɛ ’ö ’yaa‑ ꞊bhlë ‑ya, kö mɛ bhë kö ꞊kun ’ö ’ka‑ ‑ga ka kpö ’gü ‑mɛ ’ka.
39N dhegluzë ‑nu, ꞊ya kë ’dhö kö pë mɛ ’ö ’ka dho ‑ya ‑a ꞊wuën’ ’ö tɔɔ kö ’kaan‑ ‑Zlan ’dhi ‑wo pö. ’Kɛɛ kë‑ wo ’dhö bhë, ꞊kun ‑kë ’ka‑ pö ‑an ‑dhë kö ꞊kun ’wo ’wun ꞊blɛɛ’ ‑wo gbɛ ’gü. 40Pë ’ö ’ka dho ‑a kë, ‑yö kë ‑a kë ‑kɔ ’ka, ‑yö kë ö pin ꞊taa.
15’Wun ’ö ‑gban Klito ‑bha ‑go ga ’sü ‑sü ‑bha
1N dhegluzë ‑nu, a ka ‑zo ‑büö ‑na ’zü ’wuntaɔsë ’a‑ ꞊blɛɛ ka ‑dhë ’ö ’ka‑ ‑wun ‑dhɛ ’wun gia‑ ’ö ka ‑bha ‑zo yö ‑sü ‑yö ‑gban ‑a ‑ta gɛnngdhö bhë ‑a ’ka. 2Yö ꞊nɛ ’ka bɔ ‑a ‑ta ’ka dha, kö ꞊ya kë ꞊nɛ ’ka‑ ’kun ꞊nɛ ‑kɔ ’a‑ ꞊blɛɛ ‑a ’ka ka ‑dhë bhë ‑a ’dhö. ꞊Ya kë ꞊nɛ ’yaa ’dhö kö ka ‑bha ’wun ‑dhɛ ’wun gia‑ ‑sü bhë ‑yö ’flëë.
3Mɛ ꞊daan’ ‑wo ’ö bhë ꞊nɛ ’ö ’a‑ ‑wun ꞊blɛɛ ka ‑dhë kö ’ma‑ yö; yö ꞊nɛ ’ö‑ ‑wun ’dhö ’gbee‑, ’ö tɔɔ Klito ‑yö ‑ga kwa ‑bha ꞊sɔɔn yaa ‑nu ‑wun ’gü ꞊nɛ ‑kɔ ’ö‑ ’ka ꞊bɛɛn’ ‑sü ’ka ‑Zlan ‑bha ’sëëdhɛ ’gü bhë ‑a ’dhö. 4’Wo‑ ‑bin; ’yö go ga ’gü ‑dhɛkpaɔyi kë ‑yaaga ‑naa ’ka ꞊nɛ ‑kɔ do ’ö ꞊bɛɛn’ ‑sü ’ka ‑a ’ka ‑Zlan ‑bha ’sëëdhɛ ’gü bhë ‑a ’dhö; 5’yö ö ‑de ‑zɔn Piɛɛ ‑dhë, ’ö Piɛɛ ‑ya yö; ’go mü ’yö ö ‑de ‑zɔn ꞊guë’ ‑nu ’gɔɔ‑ do ö ga ꞊plɛ ’wo bhë ‑an mɛ ‑nu ’wo to bhë ‑an ‑dhë. 6꞊Dhɛ ꞊ya ’go mü, ’yö ö ‑de ‑zɔn ö ‑wun ‑dhɛ ’wun gia‑ ‑mɛ ‑nu ’wo dho ‑mɔ mɛ ‑lü ꞊këng’ ’sɔɔdhu ‑bha ‑an ‑dhë ‑dhɛ do ’gü. ‑An mɛdhɛvadhɛ ‑wo ꞊tun ‑dhö. 7‑Yö ö ‑de ‑zɔn Zakö waa‑ ö ‑bha bɔmɛ ‑nu ’saadhö ’wo to bhë ‑an ‑dhë.
8꞊Dhɛ ꞊ya ’kan ‑an ‑bha, ‑yö ö ‑de ‑zɔn n ‑dhë ’pö; ’kɛɛ kö ma ’a bhë n ꞊tɛi’ ‑yö ‑kë ꞊nɛ ’në ’ö yaa bhɔ ö bhɔ ’töng ’ka ‑a ’dhö. 9Bhii Yesu ‑bha bɔmɛ ‑nu ’wo bhë ma ꞊nɛ ’a tɔɔ mɛ ‑kaanta, ’ö ’wun gia‑ ’ka, n ‑dhɛ Yesu ‑bha bɔmɛ ‑sü ‑de ’ö bhë yaa n ‑ma ’kun; ’ö tɔɔ mɛ ‑nu ’ö ’wo Yesu ‑wun ‑dhɛ ’wun gia‑ ‑mɛ ’ka bhë, a ‑kë ’wun ’gbee‑ ‑kë ‑an ’ka ‑mɛ ’ka. 10’Kɛɛ ‑Zlan ‑bha ’glusë ’gü, ma ꞊ga ’ö ’ma kë ꞊nɛ ‑kɔ ꞊nɛ ‑a ’dhö bhë; ’ö ’glusë ’ö‑ ‑kë n ’ka bhë, ’ö‑ ’gü ‑pë yaa ’to ’kpaan. ’Ö tɔɔ a yuö ‑kë ’a ‑ziö ‑a ’ka ‑an ’plɛ ‑ta; ’kɛɛ kö kwa ‑dhɛ ‑ga ‑a ’gü ‑së ’ka, ‑Zlan ’glusë ’ö n ‑ta bhë ꞊nɛ ’ö yuö ‑nu bhë ’ö ‑an ‑kë. 11꞊Ya kë ’dhö kö ’wun bhë ‑a ‑bha ‑go n kwɛɛ ‑sü ’iin ‑a ‑bha ‑go Yesu ‑bha bɔmɛ ‑nu mɛ ’wo to ‑an kwɛɛ ‑sü bhë yö kun ’ö‑ ‑wun ’dhö ’gbee‑. Pë mɛ ’ö ‑dhö ’ö tɔɔ ’wun ’yi‑ ꞊blɛɛ’‑ ’ö ’ka‑ ‑wun ‑dhɛ ’wun gia‑ bhë.
’Wun ’ö ‑gban ‑go ga ’gü ‑sü ‑bha
12Pë ’ö yi‑ ꞊blɛɛ’ ‑na ’ö tɔɔ Klito ‑yö ‑go ga ’gü ’kɛɛ kö mɛ ’bhaa ‑nu ‑wo ka ziën ’ö ’wo‑ pö ‑sü ’gü ꞊nɛ ‑go ga ’gü ‑sü ’yaa ‑dhö, ‑yö ‑yö ka ‑gɔ ꞊dhë ꞊ɛ? 13꞊Ya kë ꞊nɛ pë ’wo‑ pö bhë ‑yö ’wun gia‑ ’ka, kö Klito yaa ’go ga ’gü ꞊nɛ bhë ’sa! 14’Ö ꞊ya kë ’pö ꞊nɛ Klito yaa ’go ga ’gü, kö ’yaa yi ‑bha ’yi yi ‑de kë ’wun ꞊blɛɛ’‑ ‑mɛ ’ka; kö ka ‑bha ’wun ‑dhɛ ’wun gia‑ ‑sü bhë ‑yö ’flëë (’ö bhii yi ꞊nɛ ’yi‑ pö ka ‑dhë Klito ‑yö ‑go ga ’gü, ’ö ’ka‑ ‑wun ‑dhɛ ’wun gia‑). 15‑A ‑de ’kö ‑kë ꞊nɛ ‑yö ’dhö, kö pë ’ö ‑Zlan yaa‑ kë bhë, ’yië kë ‑a ‑wun ‑dɔ ‑a ‑bha ‑mɛ ’ka; ’ö tɔɔ yi‑ ‑pö ‑Zlan ꞊ya Klito bho ga ’gü ’kɛɛ kö yaa‑ kë ’dhö, kö ꞊ya kë ꞊nɛ ’kwa ’to ‑a ‑ta ꞊nɛ mɛ ‑nu ’ö ꞊wa ga bhë, ’waa ’go ga ’gü ’gbɛɛdhö. 16’Ö bhii ꞊ya kë ꞊nɛ ‑dhɛ ’kwa‑ ‑ga ‑a ’gü ‑së ’ka bhë, mɛ ‑nu ’ö ꞊wa ga bhë ’waa ’go ga ’gü, kö Klito ‑de ’pö yaa ’go ga ’gü ꞊nɛ bhë ’sa. 17’Ö ꞊ya kë ꞊nɛ Klito yaa ’go ga ’gü, kö ka ‑bha ‑zo ‑yö ‑Zlan ‑bha ‑sü bhë ‑yö ’kpaan, ’iin kö ka ꞊tun ka ‑bha ꞊sɔɔn yaa ’gü ꞊nɛ bhë. 18꞊Ya kë ’dhö, kö mɛ ‑nu ’wo ga ‑zo ‑yö Klito ‑bha ‑sü ’gü bhë kö waa dha ꞊nɛ bhë ’sa! 19Kö kë‑ wo bhë, ꞊ya kë ꞊nɛ kwa ‑bha ‑zo ‑yö Klito ‑bha ‑sü ’ö bhë, pë ’ö‑ ’dhiö dho to ’kpongtaa zö yö ‑mü, kö kwa ’kwa tɔɔ mɛ ‑nu ’wo ’kpongtaa zö ‑an ’yenazë.
20’Kɛɛ kë‑ wo ’dhö bhë, ’wun gia‑ ‑mü ꞊nɛ Klito ‑yö ‑go ga ’gü, ’ö ‑këdhösü ‑yö ‑kë ‑a ‑gɔ ‑a ‑zɔn ‑sü ’ka ꞊nɛ mɛ ‑nu ’wo ga bhë, wo ‑de ’pö ‑wo ‑dho go ga ’gü. 21’Ö tɔɔ ‑kɔ do ’ö ga ‑yö bɔa mɛ do ’gü ’ö ꞊daa’ ’kpongtaa zö bhë ꞊nɛ ’ö gamɛ ‑nu ‑bha ‑go ga ’gü ‑sü ‑yö bɔa mɛ do ’bhaa gbɛ ’gü ’pö. 22‑Kɔ do ’ö mɛ ‑nu ’saadhö ‑an ‑bha ‑kë Adan ꞊suu’‑ ’ka ‑sü ‑wun ’gü, ’ö ’wo ga ‑a ’ka bhë ꞊nɛ ’ö mɛ ‑nu dho go ‑a ’ka ga ’gü ‑an ‑bha ‑klu Klito ‑bha ‑sü ‑wun ’gü. 23’Kɛɛ kö mɛ ’ö ‑dhö, ‑a ‑bha ‑dɔdhɛ ‑yö ‑dhö. Klito ꞊nɛ ’ö mɛ ‑blɛɛzë ’ka mɛ ’plɛ ‑ta; ꞊ya ’go mü, mɛ ‑nu ’wo Klito ‑bha ’ka, ’wo yö mü ‑a nu ‑yi ’ka. 24꞊Ya ’go mü zlöö ’ö yi ‑kaanta ‑yö ‑lo. Yi bhë ‑a ’ka, Klito ‑dho ‑wogbiindhɛ ‑nu, ‑kɔ ‑mɔ ’wuën‑ ‑sü waa‑ ’piigbeedhɛ ‑nu ‑an ’plɛ ’gü ꞊siö’‑. ꞊Ya kë ’dhö, ’ö ‑gludëdhɛ kë ‑sü ‑lo ö Dë ‑Zlan kwɛɛ. 25’Ö tɔɔ ‑gbɔgbɔdhö Klito ‑yö ‑dhö ‑gludëdhɛ kë ’ö dho ’ö yöë ‑Zlan ‑bha ‑a ‑to ‑a yaagümɛ ‑nu ‑ta ’gbee‑ ’ka ‑sü, waa‑ ‑an ‑lo Klito ‑gɛn ꞊löö ‑sü ‑yi ‑bha. 26Yaagümɛ ‑kaanta ’ö Klito dho ‑a ’gü ꞊siö’‑ ’ö tɔɔ ga. 27’Ö tɔɔ pë ’ö ꞊bɛɛn’ ‑sü ’ka ‑Zlan ‑bha ’sëëdhɛ ’gü ‑ya ‑pö: ‑Zlan ꞊ya pë ’plɛ ‑lo ‑a ‑gɛn ꞊löö. ’Kɛɛ kë‑ wo ’dhö bhë yaa kë ꞊nɛ ‑wo kpö ’ö ‑kë «pë ’plɛ ’saadhö» ’ka, ’ö ’kwa‑ pö bhë ’ö tɔɔ ‑Zlan ’ö pë ’plɛ ‑lo Klito ‑gɛn ꞊löö bhë, yö ‑de ’pö ‑yö ‑dho kë Klito ‑gɛn ꞊löö ’pö ’yaa ‑mü. 28꞊Ya kë ꞊nɛ pë ’saadhö ’plɛ ‑gɔ ꞊ya ’dho Klito ‑dhë sia‑ ꞊sia, ’ö Klito gia‑ ‑de ’ö ‑Zlan Gbö ’ka bhë, ’ö ö ‑gɔ dho sia‑ ‑Zlan ’ö pë ’plɛ ‑lo ‑a ‑gɛn ꞊löö bhë ‑a ‑dhë; kö ‑dhɛ ’saadhö ’gü ‑Zlan ‑yö ‑ya pë ’plɛ ‑gɔ ‑ta.
29‑Ka ‑dhɛ ‑ga bhë ’dhɛ! Mɛ ‑nu ’wo ‑an ’më ‑na yiö Yesu ’tɔ ’gü mɛ ‑nu ’ö ꞊waa‑ wo ’ö ꞊wa ga ‑an pin ꞊taa bhë, ‑ka ka ‑zo ’ta ‑an ‑wun ’gü! Pë ‑nu ’wo‑ kë ‑na ’dhö bhë ‑a ‑yö ‑a ‑bha ‑pë ‑dho kë ‑më ’ka ɛɛ? ’Ö ꞊ya kë ꞊nɛ mɛ ’ö ꞊wa ga bhë ’waa go ga ’gü kö ‑më ‑kë ’ö ’wo bɔ yiö ‑an piën ꞊ɛɛn? 30꞊Ɛɛ, ꞊ya kë ’dhö kö ‑më ‑wun ’ö ꞊ya kë ’yi yi ‑de ‑da ‑a ‑dhë ’wun ’gbee‑ ’gü ’töng ’saadhö ’ka ꞊nɛɛ? 31N dhegluzë ‑nu, a‑ ‑pö ka ‑dhë, yi ’saadhö ’ka, ’wun ꞊wa bɔ ‑a ‑ta ’wo ga bhë, a ‑bɔ ‑a ’gü; (‑yö kë ka ’yaan ꞊nɛ,) ‑a pö ’a‑ wo ’dhö bhë ’ö tɔɔ n ‑ma ‑kë ’gɔugɔ ‑sü bhë ‑a ‑gɛn ‑yö ‑gban ka ’gü, ka ‑bha ‑kë kwa Dëmɛ Yesu Klito ‑bha zian ‑ta ‑sü ‑wun ’gü. 32’Ö ꞊ya kë ꞊nɛ mɛ ꞊wa ga, ’waa ’go ga ’gü gbɔ, kö ‑Zlan ‑wo ‑ta ‑ko ’a‑ zë Efɛzö ‑pö ꞊nɛ ‑a ’gü ꞊nɛ mɛ pë zë wü ’dhiö ‑nu ’ka bhë, ‑a ꞊truën ‑dho kë ‑më ’ka ɛɛ? ’Ö ꞊ya kë ꞊nɛ ’ko ꞊suu’‑ bhë, a‑ ‑zë ’kpongtaapë ‑wun ’gü kö ‑a zë ‑gɛn ’yaa ’dhö. ꞊Ya kë ’dhö kö a ‑dho ‑a pö ’pö ’wun ꞊zuan’ ’ka ꞊nɛɛ: «꞊Dhɛ ’ö ‑kë ꞊nɛ kwa ga ‑wun ‑yö ‑dhö ꞊dhia’ bhë, kö ‑kwa pë ‑nu ‑bhö, ’kwa yɔ ‑nu mü ’sa!» (’Ö bhii ‑go ga ’gü ‑sü ’yaa ’dhö kö ’kwaan‑ dɔ kwa ‑de ‑wun ꞊zɔnng’ ‑ta ‑dhɛkpaɔ ꞊dhia’ ‑bha.)
33‑Ka ka ‑zo kë ka ‑de ’piö, ’ö tɔɔ ‑ta ’kuë ‑mɛ yaa ‑yö mɛ ‑gɔ bho zian ‑së ‑ta. 34Kö ‑ka ka ‑zo ’ta giagiawo ’wun ‑nu ’piö kö ’ka pë ‑nu kë ‑a kë ‑kɔ ’ka; ‑ka ka bo ꞊sɔɔn yaa kë ‑sü ’ka ɛ! ‑Ka ‑dhɛ ‑ga bhë ’dhɛ! Mɛ ’bhaa ‑nu ‑wo ka ziën ’ö ’waa ‑Zlan dɔ; ’wun bhë ’yaa ka ‑bha lë‑ ‑wun ’ka a?
Bun ’ö dho kë ‑gɔ ga ’gü ‑mɛ ‑nu ‑gɔ
35꞊Dhɛ ‑kë ’dhö, ’wun bhë ’kwa ’to ‑a ꞊ii ‑ta ꞊nɛ gamɛ ‑nu ‑bha ‑go ga ’gü ‑sü bhë ’wun gia‑ ‑mü, kö ꞊dhɛ ’ö ꞊dhɛɛ’ dho go mü bhë, kö ꞊ya kë n ’yaan ’saadhö. Mɛ ‑dho kë mü ’ö‑ pö: «‑Wo ‑go ga ’gü ‑kɔklë ꞊ɛ? Bun ‑mlë ’wo dho go ‑a ’ka ga ’gü i?» 36Mɛ ’ö ’dhö bhë ’wundɔdhe gbɛ ’yaa‑ ‑gɔ. ’Bha pëga ‑da ’sɛidhö, ‑a ’ke yaa ’bu, ‑a ’plüün ’yaa bhɔ, ’yaa ’dhö a? 37Pëga ’ü‑ ‑da ’sɛidhö bhë, ‑yö ‑dho kë ‑mlüga ’iin pëga gbɛ ’kpaan ’ka, ’ö ꞊ya kë ’ö bhɔ; yaa kë ꞊nɛ ‑a ’në ’ö yaa bhɔ ꞊kun ꞊nɛ ü‑ ‑da ’sɛidhö. 38’Ö ꞊ya kë ’dhö ’ö ‑Zlan ‑yö ‑a mɛ ’ö ‑dhö ‑a kë ‑kɔ ’ö dho kaa ‑a ‑nu ‑a ‑dhë ꞊nɛ ‑kɔ ’ö‑ ’ka ‑a ‑dhë ‑së bhë ‑a ’dhö. Pëga mɛ ’ö ‑dhö, ‑a bun ’ö‑ ‑ma kun ꞊nɛ ’ö‑ nu ‑a ‑dhë.
39’Të ‑pë ‑nu ’kwa ‑an ‑ga ‑na ’saadhö bhë ‑an bun kë ‑kɔ ’yaa do. Mɛ ’bhee‑ bun ‑yö ‑de ‑ta, ’ö wü ‑nu ‑bha ‑yö ‑kë ‑de ‑ta ’pö; ‑ma ‑nu ‑bha ‑yö ‑de ‑ta, ’ö ’yuö‑ ‑nu ’wo yiö ’ö ‑an ‑bha ‑yö ‑kë ‑de ‑ta ’pö.
40Pë ‑nu ‑wo ‑dhö dhang‑ ’gü, ’ö ‑an bun ’dhö ‑dhö, ’ö pë ‑nu ’dhö ‑dhö ’kpongtaa. ’Kɛɛ kë‑ wo ’dhö bhë pë ‑nu ’wo dhang‑ ’gü bhë ‑an bun ‑bha ‑sëdhɛ ‑yö ‑de ‑ta; ’ö ’kpongtaapë ‑nu ‑bha ’dhö ‑de ‑ta. 41Lan‑ ‑bha ‑sëdhɛ ‑yö ‑dhö, ’ö ’dhö ‑de ‑ta ’sü ‑zë ’ka. ’Ö ’susongga ‑bha ’dhö ‑de ‑ta; ‑a ‑de ’susongga ‑nu ’wo bhë, ‑a mɛ ’ö ‑dhö ‑yö ‑de ‑ta.
42‑Kɔ do bhë ’ö dho kaa ‑go ga ’gü ‑yi ’ka. ꞊Wa ’dho mɛ bun ’ka ꞊waa‑ ‑bin, kö mɛ bhë ꞊ya ga; yi ’ö dho go ‑a ’ka ga ’gü bhë ꞊ya ‑lo, kö ꞊ya kë zlöö mɛ ’ö ö ’ka ’dho ga gbɔ ‑a ’ka. 43‑Wa ‑da ’sɛidhö kö ꞊ya kë ya ’iin kö ꞊faan’ ’yaa‑ ‑gɔ gbɔ. ’Kɛɛ ‑a ‑bha ‑go ga ’gü ‑yi ’ka, ‑yö ‑dho kë ‑së ’ö‑ ’gü ‑yö ‑kë ’gbee‑. 44‑Wa ‑da ‑na ’sɛidhö ‑a bun ’ö‑ ‑gɔ bhë ’ö tɔɔ bun ’ö ꞊ya kë ’ö‑ ’gü ‑yö ꞊siö’‑, ’ö ’kpongtaa zö. ’Kɛɛ ꞊ya ’go ga ’gü, ‑yö ‑kë bun ’ö go ‑Zlan ’piö ‑a ’ka. ꞊Ya kë ’dhö kö bun ’ö ’kpongtaa zö, ‑yö ‑dhö, ’ö‑ mɛ ’ö ‑Zlan ’piö ’pö, ’ö ‑dhö. 45Bhii pë ’ö ꞊bɛɛn’ ‑sü ’ka ‑ya ‑pö: Mɛ ‑blɛɛzë ’ö ‑da Adan ’ka bhë, ’të ‑sü ‑yö ‑nu ‑a ‑dhë ’ö ‑kë ’bhee‑. ’Kɛɛ Adan mɛ ’ö nu zlöö bhë, ‑Zuu ’ö ‑këdhösü nu mɛ ‑nu ‑dhë, yö ‑mü ‑a ’ka. 46Mɛ ’ö go ‑Zlan ’piö bhë kun ’ö nu ’dhiö, ’kɛɛ ‑a mɛ ’ö go ’kpongtaa zö bhë yö ꞊nɛ ’ö yö ’dhiö; ꞊ya ’go mü ’ö mɛ ’ö go ‑Zlan ’piö bhë ’ö yö ‑mü. 47Mɛ ‑blɛɛzë ’ö ‑kë bhë ‑yö ‑kë ’sɛ ’ka, ’kɛɛ mɛ kë ꞊plɛ ‑naa bhë ‑yö ‑go dhang‑ ’gü. 48Mɛ ‑nu ’wo ’kpongtaadhɛ ‑bha ’ka bhë ‑wo ‑kë ꞊nɛ mɛ ’ö ‑kë ’sɛ ’ka ‑a ’dhö. ’Ö‑ mɛ ‑nu ’wo dhang‑ ’gü ‑dhɛ ‑bha ’ka bhë, ’wo ‑kë ꞊nɛ mɛ ’ö go dhang‑ ’gü ’pö ‑a ’dhö. 49‑Kɔ do ’ö ’kwa bhɔ ‑a ’ka mɛ ’ö ’kpongtaa ‑a ‑bha bhë, ’ö ’kwa dho bhɔ ‑a ’ka mɛ ’ö go dhang‑ ’gü bhë ‑a ‑bha ’pö.
50N dhegluzë ‑nu, ’wun ’a‑ ’piö kö ’a‑ pö ’ö tɔɔ: Bun ’ö kwa ‑gɔ ’kpongtaa zö ’ö ‑kë ꞊nëng waa‑ fɛi ‑an ’ka bhë, ö ’ka ’dho ‑da ‑Zlan ‑bha ‑gludëdhɛ ‑pö ’gü; ’iin pë ’ö gapë ’ka waa‑ pë ’ö ’yaa gapë ’ka waa ‑mɔ ‑a ‑bha kö ‑wo kë wo ’ko ꞊bhaa.
51‑Ka dɔ, ’a ’dhɛ bho ‑bin ‑wun do ‑ta ka ‑dhë ’dhɛ: Mɛ ’plɛ kwa ’ka ’dho ga; ’kɛɛ pë dho kë ’ö tɔɔ kwa ’saadhö kwa ‑dho ꞊dhië’ ‑kwaa bun gbɛ ’gü. 52‑Yö ‑dho kë ꞊nɛ ‑dhɛ ’wo wo ’yan zë ‑a ‑bha ‑a ’dhö, ’truu ‑kaanta ‑bha ’we ‑sü ’ka. ’Ö tɔɔ ’truu bhë ꞊ya ’we, gamɛ ‑nu ‑dho go ga ’gü, ‑waan ꞊dhië’‑ ‑kwaa bun ’ö ’yaa ga bhë ‑a ’gü; ’kɛɛ kwa ‑zë, vin ’kwa dhoë‑ wo kö ’kwa ꞊dhië’ ‑kwaa ’saadhö. 53Bhii ’ö tɔɔ pë ’ö gapë ’ka bhë, ‑yö ‑dho pë ’ö ’yaa ga bhë ‑a ‑da ö ‑bha ’iin kö pë ’ö dho bu ’sɛ ꞊kwaa’ bhë, ‑yö pë ’ö ö ’ka ’dho bu bhë ‑a ‑da ö ‑bha (꞊nɛ ‑kɔ ’ö sɔ ’dhö kë ‑na ‑a ’ka mɛ bun ‑bha bhë ‑a ’dhö). 54꞊Ya kë ꞊nɛ pë ’ö gapë ’ka bhë ꞊ya pë ’ö ’yaa ga ‑a ‑da ö ‑bha, kö pë ’ö ’bupë ’ka ‑yö pë ’ö ’yaa ’bu ‑a ‑da ö ‑bha, ‑a yi bhë ‑a ’ka ꞊nɛ ’ö pë ’ö ꞊bɛɛn’ ‑sü ’ka ‑Zlan ‑bha ’sëëdhɛ ’gü bhë ’ö‑ ‑de ’dhiö dho ‑mɔ ‑a ’ka ’kuë. Bhii ‑yö ꞊bɛɛn’ ‑sü ’ka mü ꞊nɛ: Ga ’gü ꞊ya ꞊siö’‑; ‑këdhösü ꞊ya ’to ‑a ’gbee‑ ’ka ga ‑ta. 55’Yö, ga, ‑to ‑a ’gbee‑ ’ka ‑sü ’ö ‑kë ü ‑gɔ bhë ꞊ya dho ’më ’ü dɔa bhë ꞊ɛ? Ü ‑bha pë ’ü bɔ ‑na ‑a ‑ta ’ü mɛ ‑nu zë ‑na ‑a ’ka bhë ꞊ya ’to ’më ꞊ɛ? 56Ga ‑bha pë ’ö bɔ ‑na ‑a ‑ta ’ö mɛ ‑nu zë ‑na ‑a ’ka bhë ’ö tɔɔ ꞊sɔɔn yaa. ’Ö ꞊sɔɔn yaa ‑de ’pö, ’ö‑ ‑bha ‑kɔ ‑mɔ ’wun ‑bha ‑sü ‑yö ‑kë ‑dhö tɔng ‑bha ‑këdhösü ‑wun ’gü. 57’Kɛɛ ‑Zlan ’tɔ‑ kë ꞊va, bhii ’ö tɔɔ ‑yö ‑to ‑a ’gbee‑ ’ka ‑sü ‑nu kwa ‑dhë ꞊sɔɔn yaa ‑ta ꞊bɔa’ kwa Dëmɛ Yesu Klito ‑ta ‑sü ’ka.
58꞊Dhɛ ’ö ’pö, n dheglu ‑wungbeezë ‑nu, ‑ka dɔ gɛnngdhö, kö ꞊kun ’ka ’zëzë kun! ‑Ka kë ’siözë, ’ka kwa Dëmɛ ‑bha yuö kë! ’Kɛɛ kë‑ wo ’dhö bhë, ‑yö kë ka ’yaan ꞊nɛ yuö ’ka‑ kë ‑na kaa‑ kwa Dëmɛ ‑nu ka ‑bha ‑klu ’kuë‑ ‑sü ‑wun ’gü bhë, yaa ’dho to ’kpaan.
16‑Zlan ꞊gbaapë ’ö ‑kë dhegluzë ‑nu ’wo Zeluzalɛmë ‑an ‑bha ’ka
1’Wun ’ö ‑gban ‑Zlan ꞊gbaapë ’ka‑ kë ‑na ‑Zlan ‑bha mɛ ‑nu ’wo Zeluzalɛmë ‑an ‑bha ’ka ‑a ‑bha bhë, a ‑dho paa; ’ö tɔɔ ‑kaa kë ꞊nɛ ‑kɔ ’ö ‑Zlan ‑bha mɛ ‑nu ’wo Galatö ‑sɛ ’gü ’a ‑an ꞊daan ‑a ’ka ’ö ’wo‑ kë ‑na ‑a ’ka bhë ‑a ’dhö. 2Kö mɛ ’ö ‑dhö, ꞊glooyi ’ka, ’wëü‑ ’ö dho ‑mɔ ‑a ‑bha kö ‑yaan ‑a nu, ꞊ya ꞊waannu ‑de ‑ta ö ‑gɔ kɔɔ, ‑yö kë ’pö kö ꞊kun ’ö ’ka dho ‑ya ma nu ‑sü ‑gɔ kö ’kaan‑ ꞊tun kɔlɛtö kë ‑süë! 3꞊Ya kë ꞊nɛ ’ma nu, mɛ ‑nu ’ö ka gia‑ ’ka ‑an ‑ya ’ö ’wo dho dho, a ‑dho ’sëëdhɛ kë ’a‑ dɔ ‑an ‑gɔ, ’ö ’wo‑ kpa gbaɔ ‑nu ’ka‑ ‑kë bhë ‑an ‑bha ’ö ’wo dho ‑a ’ka Zeluzalɛmë. 4’Ö ꞊ya kë ꞊nɛ n ‑ma ’dho ‑sü ’ö ’ma bhë, ꞊ya ’to ‑a ‑bha, ‑wo ‑dho kpa n ‑ma ’ö yi ‑nu, ’yi nu.
‑Dhɛ ‑nu ’ö Pɔlö dho bɔ ‑a ‑bha waa‑ pë ‑nu ’ö dho ‑a kë ‑a yö ’ö‑ wo ’ko ’dhiö
5A nu ‑na ka ꞊plöö ’ma. ’Kɛɛ kë‑ wo ’dhö bhë, a ‑dho bɔ Maseduanë ’aan‑ ꞊tun nu ‑na ’ma. 6A ‑dho ’töng kpö ’bhaa kë ka ’piö ’ma; ‑a ‑de ’ö ꞊ya kë ‑to ‑a ‑bha ‑pë ’ka, a ‑dho ꞊kpɔɔ ’töng ’plɛ kë ’ma, ‑yö kë ’dhö kö ‑dhɛ ‑nu ’a dho bɔ ‑a ‑bha bhë, ‑an ‑zian ‑nu, ’yi ’kan ‑kɔ ‑nu ’wo bhë ’kaan‑ ’slë ’bhaa ‑nu ‑yö ’ko ’dhiö kë n ‑dhë. 7’Ö tɔɔ ’maa‑ ’piö kö ’a ziö ka ‑ta ’vüdhö. ‑Yö n ‑zo ’piö kö ’a ’töng kpö ’bhaa kë ka ’piö ’ma ’kɛɛ kö ꞊ya kë kwa Dëmɛ ‑we ‑a ‑bha ‑wun ’ka.
8’Kɛɛ kë‑ wo ’dhö bhë, a‑ ’piö kö ’a ’to Efɛzö zö, kö ‑yö ’dho ‑yö yöë Pantëkɔtö yi ‑bha. 9’Ö tɔɔ ’kö ‑kë ꞊nɛ n yaagümɛ ‑nu ‑wo zö ꞊va, ’töng ‑së ‑yö n ’dhiö kö ’aan‑ kwa Dëmɛ ‑bha yuö ꞊va kë.
10꞊Ya kë ꞊nɛ Timote ꞊ya nu ’ma, ‑kaa ‑nia ’kun ‑së ’ka kö ‑yö kë ka ’piö ꞊nɛ ‑kɔ ’ö dho kaa ö ‑de plöö ‑a ’dhö; ’ö tɔɔ kwa Dëmɛ ‑bha yuö do ’a‑ kë ‑na ꞊nɛ, ’ö‑ ’dhiö ’pö bhë. 11꞊Ya kë ’dhö, ꞊kun ‑kë ’ö mɛ ‑yö ’yan ꞊ziö’ ꞊kaa’! ‑Kaa kë ꞊zian’ kö ‑yö ’to ꞊zuöyagluu ’gü, ‑a ‑së ‑yö nu ‑yö ‑lo n ‑ta ’nö bhii dhegluzë mɛ ‑nu ’ö ’wo ’nö, yi ‑nu ’plɛ yi ’yan ‑ya ‑gɔ zian‑.
12꞊Ya kë kwa dheglu Apolɔsö ‑bha ’ka, a n ‑wo ‑bho ’kuë‑ ‑a ‑dhë kö waa‑ dhegluzë ’bhaa ‑nu ‑waan nu ka ’piö ’ma; ’kɛɛ ‑ya ’piö kö ’ö ö ’bhle dɔ ꞊kun pë ’tee wo. ’Kö ‑kë ꞊nɛ ‑yö ‑kë ’pö ’dhe, ’töng ‑së ꞊ya ‑lo ‑a ‑gɔ ꞊sia, ‑yö ‑dho nu.
‑Wo ‑da ‑wo ‑nu ‑kaanta waa‑ ꞊wekadhe ‑nu
13‑Ka ‑ya ka ’yaan; ‑dɔ gɛnngdhö ‑sü ‑yö kë ka ‑gɔ ka ‑bha ‑zo yö ‑sü ’gü; ‑ka kë ꞊faanzë; ’gü ‑dɔ ’gbee‑ ‑sü ‑yö kë ka ‑gɔ! 14Pë ’saadhö ’ka dho ‑a kë, ‑yö kë ‑dhɔ ’gü.
15Ka gia‑, ka Sefanasö waa‑ ö ‑gɔ ’kɔɔmɛ ‑nu ‑dɔ, ’ö ’ka‑ ꞊tɛi’ dɔ ꞊nɛ wo ꞊nɛ ’wo ‑kë mɛ ‑blɛɛzë ‑nu ’ka Glɛkö ‑sɛ ’gü, ’wo Yesu ‑wun ‑dhɛ ’wun gia‑, ’ö go mü ’wo yö yuö kë ꞊süë’ ‑Zlan ‑bha mɛ ‑nu ziën. ꞊Ɛɛ, ꞊dhɛ ’ö ’dhö, a‑ ‑dhɛ ka ‑gɔ, n dhegluzë ‑nu, 16mɛ ‑nu ꞊suu’‑ ’wo ’dhö bhë waa‑ wo ‑bha mɛ ‑nu ’ö wo ‑nu ’wo ‑Zlan ‑bha yuö kë ‑na wo ꞊zuö’ ’plɛ ’ka bhë, ‑ka ka ꞊kwaa’‑ ‑an ‑zü ‑wo ’dhiö ’sü ka ’ka!
17Sɛfanasö ’dhö, Fɔɔtunatusö ’dhö waa‑ Akaikusö ‑an ‑bha nu ‑sü ’ö bhë ‑yö n ꞊zuö’ ’glu ‑dhi bhii kaa kë n ’piö ’nö bhë, pë ‑nu ’ö ‑an ‑wun ‑yö ‑kë n ‑ma ’nö bhë, ꞊wa ’plɛ kë n ‑dhë; 18kö ꞊ya kë kwa ’plɛ kwa ꞊zuö’ ‑dho sia‑ ‑wun ’ka. Mɛ ꞊suu’‑ ‑nu ’wo bhë ꞊nɛ ’ö ‑an ‑wun ’yi dho kan ka ’dhi.
19‑Zlan ‑bha mɛ ‑nu ’wo Azi ‑sɛ ’gü ꞊wa ’we kaa! Akilasö ’dhö, Plisilö waa‑ ‑Zlan ‑bha mɛ ‑nu ’ö ꞊ya kë ’wo ‑bhɔ ’kuë‑ kë ‑na ‑an ‑gɔ kɔɔ ꞊wa ’we kaa ꞊duö Yesu Klito ’tɔ ’gü. 20Dhegluzë ‑nu ’wo n ’piö ’nö wo ’saadhö ꞊wa ’we kaa! ‑Ka ka ’ko ‑nu ꞊tua bho ka ’ko ‑nu ’sɛnɛ bho ‑sü ’ka dhegluzë ‑dhɛ ’gü.
21꞊Wekadhe ꞊bɛɛn’ ‑yan mɛ ’ö ꞊nɛ ma Pɔlö, ma ‑de gia‑ n ‑kɔ pin ‑mü: ’Ma ’we kaa ꞊duö!
22’Dhangga ‑yö ’kpɔ mɛ ’ö kwa Dëmɛ ‑dhɔ ’yaa‑ ‑bha ‑a ’ka! ‑Kwaa pö: «Malanata!» (꞊Waa‑ pö ’dhö Alamiɛ ‑wo ’gü kö ‑wa ‑pö: «Kö ’go kwa Dëmɛ ‑yö nu!»)
23Kö kwa Dëmɛ Yesu ‑bha ’glusë ‑yö ’to ka ’piö.
24(’Ma ’we ka ’saadhö ka ’ka,) ka ‑dhɔ ’ö n ’gü bhë ‑a ꞊paa’ kwa Dëmɛ Yesu Klito ’gü.