Zefania

Chitabu cha

ZEFANIA

Tanga mbere

Zefania kala ni wa chivyazi cha mfalume Hezekiya naye wasemurira ujumbewe mwisho-mwisho wa karine ya sabaa kabila ya Jesu kuvyalwa, wakati ambao Josiya kala ni mfalume wa Juda. Mana ya dzina Zefania ni “Mwenyezi Mlungu akafwitsa.”

Wakati hinyo, atu a Juda na a Jerusalemu kala anaamini kukala Mwenyezi Mlungu andatiya adabu mataifa ganjina ela si aho. Ela Zefania wasisitiza kukala Mwenyezi Mlungu andaatiya adabu aho kpwandza kpwa kosa ra kuabudu milungu yanjina, ndipho atiye adabu mataifa ganjina. Njira macheye ya kuongokerwa na kuphaha usalama ni kugbwa maguluni mbere za Mwenyezi Mlungu na kumuabudu iye macheye dza irivyoandikpwa kpwenye 2:3. (Hendani haki na mnyenyekee, nkuhenda mkaepuka kutiywa adabu siku iyo ya tsukizi za Mwenyezi Mlungu.)

Maelezo muhimu kpwa chifupi

Siku ya uamuli wa Mwenyezi Mlungu 1:1—2:3

Mashaka ndigofika mataifa garigo jirani na Juda 2:4–15

Mashaka ndigofika Jerusalemu na kutivywakpwe 3:1–20

¹1:1 2 Afalume 22:1—23:30; 2 Nyakati 34:1—35:27Hiri ni neno ra Mwenyezi Mlungu ambaro wamuambira Zefania, wakati wa utawala wa Josiya mwana wa Amoni mfalume wa Juda. Zefania kala ni mwana wa Kushi, Kushi kala ni mwana wa Gedalia, Gedalia kala ni mwana wa Amariya, Amariya naye kala ni mwana wa Hezekiya.

Siku ya uamuli wa Mwenyezi Mlungu

²Mwenyezi Mlungu anaamba,

“Ndaangamiza tsetsetse chila chitu chiricho duniani:

³anadamu, nyama, nyama a mapha na ngʼonda.

Chila chimuhendacho mwanadamu kuhenda dambi,

ndachiangamiza phamwenga na atu ayi.

Nindaphyera anadamu osi duniani,

mimi Mwenyezi Mlungu nkaamba.

⁴Ndagolosa mkpwono wangu kupiga atu a Juda

na osi asagalao Jerusalemu.

Nindausa tsetsetse chila chitu cha Baali kpwenye tsi hino,

na takuna ndiyetambukira tsona alavyadzi-sadaka a Baali

wala alavyadzi-sadaka a atu angu ariomuhumikira Baali.

⁵Nindaangamiza hinyo ambao nkusujudu dzulu ya paa za nyumba

kuabudu dzuwa, mwezi na nyenyezi.

Nindaangamiza hara anao niabudu na kuapa kpwa dzina ra Mwenyezi Mlungu,

ela piya anaapa kpwa dzina ra mlungu aihwaye Milikomu.

⁶Nindaangamiza osi arioniricha mimi Mwenyezi Mlungu

ambao taanami ngbweni wala taaniuza ushauri.”

⁷Nyamalani mbere za Mwenyezi Mlungu,

kpwa kukala siku ya Mwenyezi Mlungu i phephi.

Mwenyezi Mlungu akatayarisha sadaka

na arioaalika akaatakasa.

⁸Mwenyezi Mlungu anaamba, “Siku iyo ambayo nindalavya sadaka,

ndaatiya adabu akulu a atu

na piya ana a mfalume

phamwenga na osi alungao mila za chijeni.

⁹Siku iyo ndaatiya adabu

osi aabuduo dza makafiri,

na hara aodzazao nyumba ya mlungu wao

vitu arivyoviphaha kpwa fujo na handzo.”

¹⁰Mwenyezi Mlungu anaamba, “Siku hiyo,

kundasikirwa chiriro kula Ryango ra Ngʼonda,

chiriro chindasikirwa kula Lalo ra Phiri,1:10 Lalo ra phiri ni seemu nyiphya ya mudzi iriyo mtswerero wa dzuwa wa ryango ra ngʼonda.

na msindo mkpwulu undasikirwa kula mryangoni.

¹¹Rirani mwimwi mkalao lalo ra Makiteshi

mana achuuzi enu osi taako tsona,

apimadzi osi a feza akaolagbwa.

¹²Wakati uho nindamwirika Jerusalemu na taa na niipeleleze.

Nindaatiya adabu atoshekao na hali yao,

hinyo aambao mwao mioyoni,

‘Mwenyezi Mlungu kandahenda rorosi nono wala iyi.’

¹³Utajiri wao undahalwa zewe

na nyumba zao zindabomolwa-bomolwa.

Andadzenga nyumba ela taandazisagala,

andaphanda mizabibu ela taandanwa uchi wa mizabibu hiyo.”

Siku kulu ya Mwenyezi Mlungu

¹⁴Siku kulu ya Mwenyezi Mlungu i phephi,

na iredza wangbwi sana.

Indakala siku ya utsungu munji

hata masujaa enye, andarira.

¹⁵Siku iyo indakala siku ya tsukizi,

siku ya nduni na mashaka

siku ya kubananga na kuangamiza

siku ya jiza na vurungu-vurungu

siku ya maingu na chilungulungu cha jiza.

¹⁶Siku ya kupiga magunda na kukota kululu za viha

chinyume cha midzi yenye ngome

na chinyume cha minara mire iriyo kpwenye pembe za ngome.

¹⁷“Nindaarehera mashaka atu aha

chiasi cha kuahenda anyendeke kuno anaphaphasa dza vipofu,

kpwa kukala anikosera mimi Mwenyezi Mlungu.

Milatso yao indamwagbwa dza madzi

na nyufu zao zindarichwa ziole.”

¹⁸Siku iyo ya tsukizi za Mwenyezi Mlungu,

feza na zahabu zao tazindaweza kuaokola.

Tsi yosi indaochwa

na moho wa wivuwe.

Osi asagalao mumo

andaangamizwa gafula.

Atu a Juda anaonywa

¹Mwimwi atu a taifa risiro na haya,

kusanyikani phamwenga

²kabila tamdzangbwephepheruswa dza wiswa,

kabila Mwenyezi Mlungu kadzangbwekuhenderani mai kulengana na tsukizize nyinji,

kabila siku ya Mwenyezi Mlungu kuonyesa tsukizize kufika.

³Muendzeni Mwenyezi Mlungu mwi atu anyenyekevu murio kpwenye tsi, mlungao amurize.

Hendani haki na mnyenyekee

nkuhenda mkaepuka kutiywa adabu

siku iyo ya tsukizi za Mwenyezi Mlungu.

Mataifa ndigotiywa adabu

⁴2:4 Isaya 14:29–31; Jeremia 47:1–7; Ezekieli 25:15–17; Joeli 3:4–8; Amosi 1:6–8; Zakariya 9:5–7Mudzi wa Gaza undarichwa,

wa Ashikeloni undakala gandzo.

Atu a Ashidodi nao andazolwa mutsi wenye,

na atu a Ekironi andauswa kpwenye mudzi wao.

⁵Shaka hiro mwi atu kula Kerethi msagalao pwani kulunga-lunga bahari.

Neno ra Mwenyezi Mlungu ri chinyumecho

uwe Kanani, yani tsi ya Afilisti.

Ndakuangamiza na taphana hata mutu ndiyesala kpwenye tsiiyo.

⁶Tsi yenu ya pwani indahendwa weru wa kurisa

na kudzengbwa vibanda vya arisa na vyaa vya mangʼondzi na mbuzi.

⁷Yo tsi ya pwani indakala ya atu a Juda ndiosala,

na kuko andaphaha marisa.

Dziloni andakpwedza aoye kpwenye nyumba zorichwa hiko Ashikeloni,

mana Mwenyezi Mlungu, Mlungu wao andaamanyirira,

na aauyizire hali nono ariyokala nayo pho mwandzo.

⁸2:8 Amoabu: Isaya 15:1—16:14; 25:10–12; Jeremia 48:1–47; Ezekieli 25:8–11; Amosi 2:1–3Aamoni: Jeremia 49:1–6; Ezekieli 21:28–32; 25:1–7; Amosi 1:13–15“Nkasikira ufyozi wa Amoabu

na Aamoni anyetavyo

vira ambavyo osi afyorera atu angu,

na kudzikarya kukala andahala tsi yao.

⁹2:9 Mwandzo 19:24Kpwa hivyo, mimi Mwenyezi Mlungu, Mlungu wa majeshi naamba,

kpwa kpweli dza niishivyo,

mimi Mlungu wa Iziraeli, naapa kukala

Moabu indakala dza Sodoma

na Amoni indakala dza Gomora.

Tsi hizo zindamera mihi ya miya na madibwa ga munyu,2:9 Madibwa ga munyu kala ni madibwa ambago kala nkutiywa madzi ga Bahari ya Munyu, madzi higo gariphouma, atu kala achizola munyu.

na zindakala tuphu hata kare na kare.

Atu angu ndiosala andaziteka tsi zao,

atu a taifa rangu ndiosala andazihala zikale urisi wao.”

¹⁰Higo gandakala maripho ga ngulu zao

kpwa kukala afyola na achidzikarya

chinyume cha atu a Mwenyezi Mlungu, Mlungu wa majeshi.

¹¹Mwenyezi Mlungu andaaogofyera,

mana andabananga-bananga milungu yosi kpwenye yo tsi,

na atu a pwani zosi

andamsujudiya kuko kpwenye tsi zao.

¹²2:12 Isaya 18:1–7Mwenyezi Mlungu anaamba, “Piya mwimwi atu a Kushi

mundaolagbwa na upanga wangu.”

¹³2:13 Isaya 10:5–34; 14:24–27; Nahumu 1:1—3:19Mwenyezi Mlungu andagolosa mkpwonowe chinyume cha vurini

na kuangamiza tsi ya Ashuru.

Andauhenda mudzi wa Ninawi ukale gandzo

na tsiiye ikale kavu dza jangbwa.

¹⁴Mifugo ya chila aina indakala mumo

na chila aina ya nyama a tsakani.

Vimburu vindalala dzulu ya magandzoge,

vindarira mo madirishani.

Makunguru gandarira vizingitini.

Mapambo ga mierezi gandarichwa phereru.

¹⁵Ninawi iriyodzikarya kukala i salama,

yadziamba,

“Takuna wanjina dza mimi.”

Haya vino lola,

ikakala gandzo na makalo ga nyama a tsakani.

Chila atsupaye phephi na phapho

anaufyorera na kuubera.

Uasi wa Jerusalemu

¹Shaka hiro nyo mudzi wa atu aonerao ayawao,

mudzi unaoasi, tsona uriodzitiya najisi!

²Mudzi usiosikira ra mutu,

usiokubali kukanywa,

usiomkuluphira Mwenyezi Mlungu,

wala kumsengerera.

³Vilongozie ni dza simba angurumao.

Aamulie ni dza mabawa garigo na ndzala garyago dziloni,

gasigosaza chitu hadi ligundzu.

⁴Manabiige ni ajeuri na a handzo.

Alavyadzie-sadaka akatiya najisi pho phatu phatakatifu

na kuvundza shariya za Mlungu.

⁵Ela Mwenyezi Mlungu ariye himo mudzini ni wa haki,

iye kahenda dzambo rorosi iyi.

Chila ligundzu kashindwa kulavya uamuli wa haki,

ela asio a haki taaona waibu hata chidide.

⁶Mwenyezi Mlungu anaamba, “Nkaangamiza mataifa

na minara yao iriyo kpwenye pembe za ngome ikakala magandzo.

Barabara zao názibananga,

na njira zao tazitsupirwa ni mutu.

Midzi yao ikakala magandzo,

na taisagalwa ni mutu.

⁷Náamba hivi kuhusu atu a nyo mudzi,

‘Kpwa kpweli andaniogopha

na kukubali kukanywa!’

Nao, angehenda vivyo, asingebanangbwa-banangbwa

wala nisingeatiya adabu.

Ela hamu yao kala ni

kpwenderera kuhenda chila aina ya mambo mai.”

Jerusalemu indakombolwa

⁸Kpwa hivyo Mwenyezi Mlungu anaamba,

“Godzani siku iyo ambayo ndaunuka dza shaidi,

mana nkaamula kukusanya atu

a chila taifa na a chila falume,

niatiye adabu kpwa usiru wa tsukizi zangu.

Nindaocha dunia yosi

na moho wa wivu wangu.

⁹Wakati uho nindaapha atu a mataifa luga swafi,

ili akale achimuabudu Mwenyezi Mlungu,

na kumuhumikira kpwa umwenga.

¹⁰Atu angu ariotsamukana,

andanirehera sadaka

hata kula ngʼambo ya myuho ya Kushi.

¹¹Siku iyo ichifika uwe Jerusalemu kundakala na waibu

kpwa vira urivyoniasi.

Mana ndaausa osi ambao anadzikarya na kudziunula,

na taphana ndiyedzikarya

hipho dzulu ya mwango wangu mtakatifu.

¹²Ela ndasaza atu ambao ni anyenyekevu na anaodzitsereza kahiyo.

Dzina ra Mwenyezi Mlungu ndiro ndirokala chimbiriro rao.

¹³3:13 Maono 14:5Nyo Aiziraeli ndiosala

taandahenda mai

na taandagomba handzo,

mana takundakala na mutu wa handzo kahi yao.

Andarisa na kulala salama

na takuna yeyesi ndiyeaogofyera.”

Wira wa sharee

¹⁴Imbani sana, mwi atu mkalao Sayuni!

Kotani kululu, mwi Aiziraeli!

Hererwani na mpige njerejere,

mwi atu a Jerusalemu!

¹⁵Mwenyezi Mlungu akausa hukumu chinyume chenu,

chisha akaatsamula aviha enu.

Mwenyezi Mlungu, mfalume wa Iziraeli, a kahi yenu

msiogophe mai tsona.

¹⁶Siku iyo Jerusalemu indaambwa,

“Usiogophe uwe Sayuni,

mikonoyo isiinjire nyongʼonyo.

¹⁷Mwenyezi Mlungu, Mlunguo a kahiyo,

iye ndiye sujaa ndiyekuhenda uturye maaduigo.

Andafwahirwa sana ni uwe,

kpwa mendzwaye andakujaliya maisha maphya.

Naye andahererwa kpwa ajiliyo na kupiga kululu za furaha,

¹⁸avi ni siku ya sikukuu.”

Mwenyezi Mlungu anaamba,

“Ndakuusira mashaka gosi

na kundaona waibu tsona.

¹⁹Siku hiyo, ndaatiya adabu

osi akuonerao.

Ndativya anyonje na asiodziweza

na kuauyiza osi ariotsamizwa kpwa lazima.

Nami ndagaluza waibu wao ukale nguma nono

na atu duniani kosi andaatogola.

²⁰Mwenyezi Mlungu anaamba, ‘Wakati hinyo ndakukusanyani phamwenga

nkuuyizeni kpwenu kaya.

Kpwa kpweli ndakuhendani mmanyikane na mphahe nguma

kahi za atu a dunia ndzima

wakati ndiphokuuyizirani hali nono mriyokala nayo hipho mwandzo

kuno munalola.’ ”