Nahumu

Chitabu cha

NAHUMU

Tanga mbere

Chitabu cha Nahumu ni cha mashairi ga kusherekeya kuangamizwa kpwa Ninawi, mudzi mkpwulu wa Ashuru, adui mkpwulu wa Iziraeli. Kugbwa kpwa Ninawi phephi na mwisho wa karine ya sabaa kabila ya Jesu kuvyalwa, kunaonekana kukala ni uamuli wa Mlungu chinyume cha taifa ambaro tariyakala na mbazi.

Maelezo muhimu kpwa chifupi

Uamuli wa Ninawi 1:1–15

Kugbwa kpwa Ninawi 2:1—3:19

¹1:1—3:19 Isaya 10:5–34; 14:24–27; Zefania 2:13–15Hichi ni chitabu cha ruwiya za Nahumu kula chidzidzi cha Elikoshi. Ni maono kuhusu mudzi wa Ninawi.

Tsukizi za Mlungu chinyume cha Ninawi

²Mwenyezi Mlungu ni mwenye wivu naye nkuriphizira chisasi;

iye nkuriphiza chisasi naye ana tsukizi nyinji.

Iye nkuriphiza chisasi maaduige

na kuendeleza tsukizize kpwa achiommena.

³Mwenyezi Mlungu katsukirwa upesi na ana nguvu nyinji,

wala kandasita bii kumtiya adabu mutu mwenye makosa.

Pho anyendekapho nkukala na chikulukulu na phuto,

na maingu ni vumbi ra nyayoze.

⁴Iye nkuamuru bahari na kuiumisa,

na kuumisa myuho yosi.

Nyasi za Bashani, mihi ya mwango Karimeli

na maruwa ga Lebanoni gosi gandanyala.

⁵Myango nkukakama mbereze

na vidzango vikasumba.

Mwenyezi Mlungu achidzionyesa, dunia nkusumba,

na osi asagalao mumo nkukakamwa ni miri.

⁶Ni ani awezaye kushindana na tsukizize?

Ni ani awezaye kuvumirira usiruwe?

Nkumwaga tsukizize kali dza moho,

na nkuhenda myamba ikaahuka vipande-vipande.

⁷Mwenyezi Mlungu ni mnono,

naye ni chimbiriro rangu wakati wa kugaya.

Iye nkurinda osi amukuluphirao,

⁸iye ndaangamiza maaduige

na mafuriko makulu,

naye nkuzoresa maaduige na kuaolaga.

⁹Takuna njama muwezayo kupanga chinyume cha Mwenyezi Mlungu,

iye andakuangamizani,

takuna adui ndiyeunuka kano ya phiri.

¹⁰Dza miya ichiyolingana-lingana na mibuwa mifu,

mwimwi alevi mundaochwa.

¹¹Kula kuko Ninawi kukatuluka mutu,

mshauri apangaye mipango mii,

iye anapanga mai chinyume cha Mwenyezi Mlungu.

Habari nono kuhusu Juda

¹²Mwenyezi Mlungu anaamba hivi,

“Dzagbwe Aashuru ana nguvu na ni anji,

andaangamizwa tsetsetse.

Dzagbwe nákuhendani mgaye,

sindakugayisani tsona.

¹³Na vivi ndavundza gogolo mrigofungirwa,

na kudosa mikanda ya ngozi mriyofungirwa.”

¹⁴Mwenyezi Mlungu akalavya amuri chinyumecho uwe Ninawi kuamba,

“Kundakala na chivyazi cha kuendeleza dzinaro,

ndausa vizuka vyosi kula mo nyumba ya milunguyo,

vizuka vya kutsonga na vya kuyayusha.

Ndakutsimbira mbira, mana kuna mana.”

¹⁵1:15 Isaya 52:7Mwi atu a Juda, lolani

ko myangoni kuredza mutu mwenye habari nono.

Iye anatangaza habari nono ya amani.

Sherekeyani sikukuu zenu

na kuusa naziri zenu.

Atu ayi taandakuuyirani tsona

mana andauswa kamare.

Ninawi inabanangbwa

¹Adui ndiyekutsamula aredza chinyumecho uwe Ninawi.

Rinda ngomezo

na uchunguze njirazo.

Tayarisha jeshiro kpwa ajili ya viha.

²Mwenyezi Mlungu andauyiza nguma ya Jakobo

dza urivyo nguma ya Iziraeli,

dzagbwe abanangi akaihenda ikale gandzo

na kubananga mihi yao ya mizabibu.

³Masujaae akavwala nguwo za kundu

na ngao zao zi dododo.

Vyuma kpwenye magari ga kuvwehwa ni farasi vinameka-meka

yo siku gariphoikpwa tayari kushambuliya Ninawi

kuno anajeshie anatukusa mafumo gao.

⁴Magari ga kuvwehwa ni farasi ganaphiya mairo hiku na hiku

mo njirani na mihalani.

Ganameka dza vimwindi vya moho

nago ganaphiya mairo dza limeme.

⁵Mkpwulu wa jeshi ra Ninawi analavya amuri kpwa anajeshie,

nao anadzikpwala wakati anamlunga.

Maadui gao anahenda wangbwi kuphiya kpwenye ukuta wa mudzi

na kudzengera paa ra kudzichingira mawe gatsuphiwago

kula ukuta wa mudzi.

⁶Maryango ga muho gakavugulwa,

na atu a nyumba ya chifalume akagbwirwa nchiwewe.

⁷Ninawi ikatiywa waibu, atue akatsamizwa kpwa lazima,

atumishie a chichetu anarira dza njiya na kudzipiga-piga vifuwa.

⁸Ninawi ni dza mtsara uchiovundza

na madzige ganajera bila kusika.

Atu anachimbira

nao anaambwa, “Imani! Imani!” Ela taphana mutu alolaye nyuma.

⁹“Halani zewe feza!

Halani zewe zahabu!”

Ninawi una hazina isiyosira,

utajiri wa chila aina ya vitu vya samani.

¹⁰Ninawi ukabanangbwa, ukatsamwa na ukakala gandzo!

Atuo akamaka hata anakakamwa ni mavwindi.

Aho taana mkpwotse

na akaangalala.

¹¹Ga kuphi go makalo ga simba,

phatu pha simba adide,

ambapho simba mlume na simba mchetu nkuphiya,

ambapho ana aho nkukala, bila kuyugbwa ni yeyesi?

¹²Simba waolagira anae nyama

achimmwamula vipande kpwa ajili ya achee na anae;

waodzaza go makalo vipande vya nyama chivyomwamulwa.

¹³Mwenyezi Mlungu, Mlungu wa majeshi anaamba, “Lola, mimi nchinyumecho. Magarigo ga kuvwehwa ni farasi ndagatiya moho. Barobaroo uchioakuluphira kpwa viha andaolagbwa na upanga. Kundahala tsona atu kpwa lazima au vitu kula phapha duniani. Na takundasikirika tsona sauti za ahumwao.”

Uamuli wa Mwenyezi Mlungu chinyume cha Ninawi

¹Shauriyo uwe mudzi uriye na aolagadzi anji,

mudzi urio tele atu a handzo na anyangʼanyi,

na kuhala atu mateka kusikosira.

²Phundzani hinyo mriro wa mijeledi na kuvye-kuvye ya magurudumo,

farasi anavyodzimwirika na magari ga kuvwehwa ni farasi ganavyotina-tina.

³Apandadzi-farasi anashambuliya,

panga na mafumo ganameka-meka.

Anji akalumizwa

nyufu zirere tandala

miri isiyoolangika

hata nyo anajeshi ashambuliyao anazikpwala.

⁴Gaga gosi gandakala

mana uwe Ninawi ukakala malaya.

Ukavutiya atu kpwa utsaio

ukahenda atu a mataifa ganjina kukala atumwa kpwa umalayao na utsaio.

⁵Mwenyezi Mlungu, Mlungu wa majeshi anaamba,

“Mimi ni chinyumecho

ndafwenula na kuunula nguwozo hata zifwinike usoo,

ili atu a mataifa ganjina gosi aone chitsahacho

na falume zione waibuo.

⁶Nami ndakuhendera chibero.

Nindakumwagira uchafu

na nkuhende ukale utu wa kuberwa.

⁷Chisha nyo ndiokuona andadzitenga nawe na kuamba,

‘Ninawi ukabanangbwa tse, ni ani ndiyekusononekera?’

Atu dza hinyo ndaaphahaphi?”

⁸Kpwani Ninawi ina unono wani kuriko Thebesi?3:8 Thebesi kala ni mudzi mkpwulu wa Misiri, piya Chieburania wiihwa No-Amoni.

Mudzi uriodzengbwa kahi-kahi ya mikono ya muho Naili.

Ni mudzi uriozungulukpwa ni madzi

nago kala ndio urindzi wao dza ukuta.

⁹Nguvu za Thebesi kala ni Kushi na Misiri

tsi zoipha nguvu zisizosira.

Msada wa Thebesi kala ula Puti na Libiya.

¹⁰Ela gago tagayaokola chitu.

Thebesi yatekpwa

na atue achitsamizwa kpwa lazima.

Ana aho atsanga abundwa na photsi, phenye mawe hadi achifwa

kpwenye maganiko ga nyo mudzi.

Vilongozi a nyo mudzi afungbwa silisili,

na go maadui gao achiaganya kpwa kuapigira kura.

¹¹Mwimwi atu a Ninawi piya mundadedeleka dza mutu achiyelewa,

mundadzifwitsa

na kuendza ngome za kudzifwitsa ili maadui gasikuoneni.

¹²Ngome zenu zindakala dza mitini

iriyo na matunda ga kpwandza ga kuivwa

ndiphozuguzwa tu

zindagbwa kanwani mwa azuguzaye.

¹³Lolani nyo anajeshi enu

akakala anyonje kahi-kahi yenu.

Maryango ga tsi yenu

ga mwaa kpwa aviha enu

magbwama ga maryango gakasira kuphya na moho.

¹⁴Hekani madzi muike akiba

mana mundazangirwa ni maadui.

Tigani ulongo mtengeze matofali

ili mudzenge ngome zenu zidine.

¹⁵Hata muhendedze mudzi wenu undaochwa

na mwi enye muolagbwe kpwa upanga.

Mwimwi mundaangamizwa dza viratu ndzije aryavyo mimea.

Enjerezekani dza mabandzi,

enjerezekani dza ndzije!

¹⁶Mwaenjereza ahendadzi-bishara

achikala anji kuriko nyenyezi,

ela muna tabiya dza ya ndzije, aho nkurya chila mmea

chisha akauruka kuphiya vyao.

¹⁷Arindzio ni dza mabandzi,

na atumishi a mfalume wenu ni dza maipho ga ndzije

gagbwago kutani siku ya mnyevu

ela dzuwa richiala, aho nkuuruka akaangamika

akakala taandaoneka tsona.

¹⁸We mfalume wa Ashuru,

vilongozio arere na kogo.

Atuo akaenea ko myangoni

na taphana mutu wa kuakusanya phamwenga.

¹⁹Uwe u dza mutu achiyetiywa chironda

chironda ambacho tachina dawa.

Chila mutu asikiraye kugbwako,

anapiga makofi kpwa kuhererwa.

Mana takuna mutu hata mmwenga

ambaye kumuhenderere uyio.