Mika

Chitabu cha

MIKA

Tanga mbere

Hichi ni chitabu chimwengachapho cha vitabu vya manabii adide a Iziraeli. Chieburania Mika manage ni: “Ni ani ariye dza Mwenyezi Mlungu.” Nabii Mika wala mudzi mdide urioihwa Moreshethi urio kahi za mwakani na mtswerero wa dzuwa wa Jerusalemu. Mika waishi wakati mmwenga na nabii Isaya na nabii Hosea naye wahubiri ujumbe wa tumaini na hukumu. Iye watabiri kukala Mlungu andaamula Samariya, mudzi mkpwulu wa ufalume wa vurini yani Iziraeli na Jerusalemu, mudzi mkpwulu wa ufalume wa mwakani yani Juda kpwa kukosa kukala mfwano mnono kpwa atu. Atawala ni ayi, manabii ana handzo, alavyadzi-sadaka ni ayi, ahendadzi-bishara si aaminifu na aamuli anaphokera hongo.

Fundzo kulu ni kukala Mlungu ni wa haki na analonda atu asagale vinono. Mika piya watabiri kuhusu matumaini ga siku zedzazo, kukala kundavyalwa muokoli na kundakala na ufalume urio na amani.

Maelezo Muhimu Kpwa Chifupi

Uamuli wa Iziraeli na Juda 1:1—3:12

Ujumbe wa kuluphiro kpwa atu a Mlungu 4:1—5:15

Ujumbe wa kukanya na tumaini 6:1—7:20

¹1:1 2 Afalume 15:32–38; 2 Nyakati 27:1–7; 2 Afalume 16.1–20; 2 Nyakati 28:1–27; 2 Afalume 18.1–20.21; 2 Nyakati 29:1—32:33Higa ni maneno ambago Mwenyezi Mlungu wagomba kumuambira Mika. Mika kala achisagala kpwahali koihwa Moreshethi. Mwenyezi Mlungu wagomba na Mika wakati Jothamu, Ahazi na Hezekiya ariphokala afalume a Juda. Mika waonyeswa ruwiya kuhusu Samariya na Jerusalemu.

²Mwimwi mosi phundzani,

Dunia na vyosi virivyo ndani naviphundze

ili Mwenyezi Mlungu alavye ushaidi dzulu yenu,

hiye Bwana agombe kula nyumbaye takatifu ya kuvoya Mlungu.

Uamuli wa Samariya na Jerusalemu

³Lola! Mwenyezi Mlungu aredza kula phakpwe makaloni;

andatserera na kuvyoga virere vya myango ya dunia!

⁴Myango indamomonyoka tsinize,

na madete ganaganyika pande mbiri

dza mshumaa utsatsamukavyo ukalapho phephi na moho

dza madzi gajeravyo upesi mteremukoni.

⁵Gosi higa ni kpwa sababu ya Jakobo kukosera,

kpwa sababu ya dambi za chivyazi cha Iziraeli.

Kosa ra Jakobo ni riphi? Dze, si Samariya?

Dze, phatu pha dzulu pha Juda pha kuabudu milungu yao ni phaphi?

Dze, si Jerusalemu?

⁶“Kpwa hivyo Samariya ndaihenda dzala

phatu pha kumeza mitse ya mizabibu.

Mawege ndagamwaga deteni

na misingiye niiriche wazi.

⁷Vizukavye vyosi vya kutsongbwa vindavundzwa vipande-vipande,

zawadize zosi za nyumba ya kuvoya Mlungu zindatiywa moho.

Nindabananga vizukavye vyosi.

Mana wakusanya zawadize zosi kula kpwa maripho ga umalaya,

nazo zindahumika tsona kuripha maripho ga umalaya.”

Chiriro na sonono

⁸Chisha Mika achiamba, “Kpwa sababu hino ndasononeka na nrire,

nindanyendeka chitsaha tsona bila virahu.

Nindapheka dza bawa,

na kurira dza chimburu.

⁹Mana chirondache ni cha chirema,

chikaambukiza Juda.

Chikafika hadi ryango ra Jerusalemu,

phephi na ko atu angu asagalako.

¹⁰Gaga msigaseme Gathi,

msirire bii

galagalani kpwenye vumbi

hiko Bethi-Ofura.1:10 Bethi-Ofura kpwa Chieburania manaye ni nyumba ya vumbi.

¹¹Mwimwi msagalao Shafiri

tsapani chitsaha

na enye kuodzala waibu.

Hinyo asagalao Zaanani

taandatuluka kondze ya mudzi

Bethi-Eseli inasononeka,

urindziwe ukauswa ko kpwenu.

¹²Mana hinyo asagalao Marothi anasononeka

anagodza kpwa hamu ausirwe sonono.

Mana mai gakatserezwa kula kpwa Mwenyezi Mlungu

hadi phenye ryango ra Jerusalemu.

¹³Mwi enyezi a Lakishi,

fungani farasi kpwenye magari ga viha.

Mwimwi ndimwi chandzo cha mwana mchetu wa Sayuni kuhenda dambi,

mana makosa ga Iziraeli gaphahikana kpwako.

¹⁴Kpwa hivyo undaapha enyezi a Moreshethi Gathi

zawadi za kulagana.

Atu a mudzi wa Akizibu andakala chitu chisichookola

kpwa afalume a Iziraeli.

¹⁵Mwimwi enyezi a Maresha

ndakureherani mutu ndiyekuturyani.

Iye ariye utukufu wa Iziraeli

andakpwedza hadi Adulamu.

¹⁶Nyolani nyere zenu kpwa sababu ya sonono

kpwa ajili ya ana enu anaokuhendani mkale na raha,

dzihendereni chiphala dza tai

mana ana enu andauswa aphirikpwe tsi ya ujenini.”

Shaka hiro kpwa aonerao ayawao

¹Shaka hiro kpwa apangao kuhenda mai,

anaopanga uyi mwao vitandani,

ligundzu kunaphocha anagahenda

kpwa sababu ana uwezo.

²Nkuaza minda na akaihala,

akaaza nyumba na akazihala.

Nkumuonera mutu na atu a nyumbaye,

na nkufuta mutu urisiwe.

³Kpwa hivyo Mwenyezi Mlungu anaamba hivi,

“Lola, ninapanga kureha shaka kpwa atu aha,

namwi tamundaweza kudzikombola enye,

tamundanyendeka tsona na shobo

mana undakala wakati mui.

⁴Siku iyo atu andakutungirani wira wa sonono wa kukunyeterani

nao andaamba,

‘Hukaangamizwa tsetsetse,

Mwenyezi Mlungu akaganya vitu vya atu angu.

Iye akanifuta mtalo hinyo,

na minda yehu akaipha atu ario uhala mateka.’ ”

⁵Kpwa hivyo takundakala na mutu ndiyekupima na kukuganyani minda, kpwa kupiga kura,

kahi ya kusanyiko ra atu a Mwenyezi Mlungu.

Manabii a handzo

⁶Manabii aho nkuamba, “Usihubiri, usihubiri mambo higo,

swiswi tahundagbwirwa ni waibu.”

⁷Mwi atu a Jakobo, gano mgombago ni sawa? Mnaphouza,

“Kpwani Roho wa Mwenyezi Mlungu kavumirira?

Vino iye nkuhenda mambo dza higa?”

Mwenyezi Mlungu anaamba, “Dze maneno gangu tagamuhendera manono

mutu ahendaye irivyo sawa?”

⁸Ela siku hizi mukaaunukira atu angu

dza maadui,

munaavula vwazi ra chitajiri

atu atsupao kpwa amani

ambao taatarajiya viha.

⁹Munaazola achetu a atu angu

kula kpwenye nyumba zao nono,

munaausira ana ao

baraka zangu hata kare na kare.

¹⁰Unukani mphiye vyenu!

Hipha sipho phatu pha kuoya,

kpwa sababu ya phakanajisika,

phakabanangika kutsupa chiasi.

¹¹Ichikala mutu wa handzo amendzaye kuchenga atu andakpwedza aambe,

“Ndakutabiriani kukala kundakala na uchi munji na vinwadzi vya kulevya,”

Muhubiri iye andamendzwa ni atu hinya!

Mwenyezi Mlungu andakombola atue

¹²Kpwa kpweli ndakukusanyani phamwenga mwimwi atu a Jakobo.

Ndaakusanya phamwenga atu a Iziraeli achiosala.

Ndaareha phamwenga dza mangʼondzi kpwenye chaa,

dza mifugo phao marisani,

napho phandakala na atu anji.

¹³Hiye awezaye kuvugula njira andaatanguliya,

nao andavundza ryango ra mudzi na kutuluka kondze.

Mfalume wao andaatanguliya,

Mwenyezi Mlungu andakala chilongozi wao.

Vilongozi na manabii anademurirwa

¹Alafu nchiamba,

“Phundzani mwi vilongozi a Jakobo,

mwimwi atawala a nyumba ya Iziraeli.

Dze, simwi mlondwao kumanya haki?

²Mwimwi muriozira manono na kumendza mai,

mwimwi munaoyula ngozi atu angu

na kuusa nyama mwao mifuphani.

³Mwimwi mryao nyama za atu angu,

na kuyula ngozi zao.

Na kuvundza mifupha yao vipande-vipande

na kuakata dza nyama ndizojitwa,

dza nyama ndizotiywa nyunguni.”

⁴Siku zedzazo andamririra Mwenyezi Mlungu,

ela ye kandaajibu.

Wakati hinyo andaafwitsa usowe

kpwa sababu ya mahendo gao mai.

⁵Hivi ndivyo Mwenyezi Mlungu aambavyo,

“Kuhusu manabii anaalongoza atu angu chimakosa,

mutu achiapha chakurya, anatangaza, ‘Amani’

ela mutu asiphoapha anadzipanga kupigana nao.

⁶Kpwa hivyo mundakala na usiku usio na ruwiya

mwedzerwe na jiza msiweze kutabiri.

Dzuwa rindakutswererani nyo manabii

na mutsi undakala jiza kpwao.

⁷Aonadzi andagbwirwa ni haya,

na apigi a mburuga agbwirwe ni haya,

osi andafunga kanwa zao

mana taphana jibu kula kpwa Mwenyezi Mlungu.”

⁸Ela mino nkaodzazwa nguvu,

nkaodzazwa Roho wa Mwenyezi Mlungu,

nkaodzala haki na uwezo,

ili nimtangazire Jakobo makosage,

na Iziraeli dambiye.

⁹Phundzani higa mwino vilongozi a nyumba ya Jakobo

mwimwi atawala a nyumba ya Iziraeli

mwimwi munaomena haki

na kugaluza chochosi cha haki,

¹⁰mdzengao mudzi wa Sayuni kpwa kumwaga milatso

na Jerusalemu kpwa kuhenda mai.

¹¹Vilongozie anaamula kpwa kuphokera hongo,

alavyadzi-sadaka anafundza kpwa maripho,

manabiie anatabiri kpwa kuphokera pesa.

Chisha achere mtegemea Mwenyezi Mlungu kpwa kuamba,

“Si Mwenyezi Mlungu a phamwenga naswi,

taphana mashaka ndigohuphaha.

¹²3:12 Jeremia 26:18Sambi phahi, kpwa sababu yenu,

mudzi wa Sayuni undarimwa dza munda

Jerusalemu indakala gandzo,

na chidzango cha nyumba ya kuvoya Mlungu chindakala tsaka.”

Ufalume wa Amani

¹Siku za mwisho

mwango wa nyumba ya Mwenyezi Mlungu undaimarishwa

ukale mwango mkpwulu kahi za myango yosi,

mure kuriko vidzango vyosi,

na atu andaphiya hiko kpwa unji.

²Atu a mataifa ganjina manji andakpwedza aambe,

“Ndzoni, huambuke mwango wa Mwenyezi Mlungu,

huphiye nyumba ya Mlungu wa Jakobo.

Ili ahufundze njiraze,

naswi huhende gara alondago.”

Mana shariya indala Sayuni,

na neno ra Mwenyezi Mlungu rindala Jerusalemu.

³4:3 Isaya 2:4; Joeli 3:10Andaamula malau ga atu anji

na andaamula mataifa manji genye mkpwotse ga phephi na ga kure.

Nao andabanda panga zao zikale majembe

na mafumo gao gakale marumu ga kutsatsurira.

Takuna taifa ndiropigana na ranjina

wala taandadzifundza viha tsona.

⁴4:4 Zakariya 3:10Ela chila mmwenga andasagala tsini ya mzabibuwe

na muhiwe wa mtini,

na takuna ndiyeaogofyera,

mana Mwenyezi Mlungu, Mlungu wa majeshi akagomba.

⁵Atu a mataifa andalunga milungu yao

ela swiswi hundalunga Mwenyezi Mlungu,

Mlungu wehu, ta kare na kare.

Mwenyezi Mlungu andativya Sayuni

⁶Mwenyezi Mlungu anaamba, “Siku iyo

nindakusanya virema osi,

na niarehe hara ariokala akatsamizwa kpwa lazima

phamwenga na hinyo nrioagayisa.

⁷Aho ni dza viswere ario kure na kpwao,

ela ndakala na mwandzo muphya na nyo ariosala, nao andakala taifa kulu.

Mwenyezi Mlungu andaatawala kula mwango Sayuni

hangu wakati uho hata kare na kare.

⁸Na hiko Jerusalemu ambako Mwenyezi Mlungu anarinda atue,

dza mrisa arindavyo mifugoye kula mnara wa urindzi,

kundakala tsona mudzi mkpwulu wa ufalume wa Iziraeli.

Mwango wa mwana mchetu wa Sayuni,

undauyizirwa utawalao wa kare,

yani ufalume wa mwana mchetu wa Jerusalemu.”

⁹Sambi kpwa utu wani unarira na raka ra dzulu?

Kpwani kuna mfalume?

Dze, mshaurio akafwa,

ndipho ukale na utsungu dza mchetu ariye na utsungu wa kudzivugula?

¹⁰Galagala na uule kpwa utsungu uwe mwana mchetu wa Sayuni

dza mchetu ariye na utsungu wa kudzivugula.

Mana vivi undatuluka kondze ya mudzi

ukasagale kpwereru,

undaphiya Babeli

hiko undativywa,

na kuko Mwenyezi Mlungu andakukombola

kula mikononi mwa maaduigo.

¹¹Vivi mataifa ganjina manji

gakakusanyika chinyume na uwe.

Ganaamba, “Mriche atiywe najisi,

matso gehu nagafwaidi kuona Sayuni ichibanangbwa!”

¹²Ela taamanya

maazo ga Mwenyezi Mlungu

taaelewa mipangoye,

kukala akaakusanya dza masuche hipho muhala wa kuwagira.

¹³“Unuka uwage, uwe mwana mchetu wa Sayuni

mana pembeyo ndaihenda chuma;

kpwatsazo ndazihenda shaba,

undavundza-vundza mataifa manji.”4:13 hipha Jerusalemu inalinganishwa na ndzau yenye mkpwotse ambayo nkuhumira kpwatsaze kusaga mtsere kahi ya phatu pha kuwagira.

Mapato gao haramu undagatenga kpwa ajili ya Mwenyezi Mlungu,

hinyo utajiri wao undamupha Mlungu wa dunia yosi.

Mtawala yelagbwa kukala andala Bethilehemu

¹Vivi kusanya majeshigo uwe mudzi uriye na majeshi manji,

mana hukazangirwa.

Aho andampiga fwimbo ya ndzeya mtawala wa Iziraeli.

²5:2 Mathayo 2:6; Johana 7:42“Ela uwe Bethilehemu wa Efuratha,

dzagbwe u mudzi mdide kahi ya miryango ya Juda,

kuko kpwako ndavyarirwa mutu

ndiyekpwedza kala mtawala wa Iziraeli.

Mutu ambaye wakalako hangu mwandzo.”

³Kpwa hivyo Mwenyezi Mlungu andaaricha Aiziraeli mikononi mwa maadui gao

hadi ndiphodzivugula5:3 kudzivugula ni hipho Jerusalemu ichiphaha kuoya na higo mateso. hiye mchetu ariye na utsungu.

Alafu ndugu za ye mwana, ariosala kpwenye tsi ya maadui gao

andauya adziunge na Aiziraeli ayawao.

⁴Andalongoza na kumanyirira atue kpwa nguvu za Mwenyezi Mlungu,

na kpwa ukulu wa dzina ra Mwenyezi Mlungu, Mlunguwe

dza mrisa amanyiriravyo mifugoye.

Nao andaishi salama mana wakati hinyo

iye andakala ndiye mkpwulu dunia yosi.

⁵Naye andakala amani yao.

Aashuru ndiphokpwedza vamia tsi yehu,

na kuinjira kpwenye ngome zehu

hundaaimisira vilongozi sabaa

na akulu anane a majeshi apigane nao.

⁶5:6 Mwandzo 10:8–11Andatawala tsi ya Aashuru kuhumira upanga,

iyo tsi ya Nimurodi5:6 Soma Mwandzo sura ya 10:8–12. kula phakpwe maryangoni.

Andahutivya na Aashuru,

hipho Aashuru ndiphokpwedza kpwenye tsi yehu

na kuvuka miphaka yehu.

⁷Hinyo ndiosala kahi za atu a Jakobo,

andasagala kahi za atu a mataifa manji.

Nao andakala dza umande kula kpwa Mwenyezi Mlungu,

dza mawasa ga mvula nyasini

ambago tagachelewa kpwa sababu ya mutu

wala tagagodza anadamu.

⁸Hinyo ndiosala a chivyazi cha Jakobo,

andasagala kahi za mataifa ganjina, kahi za atu anji

andakala dza simba kahi za nyama a tsakani,

dza mwana simba kahi za kundi ra mangʼondzi,

ambaye achitsupa nkuavyoga-vyoga na kuamwamula vipande-vipande,

wala taphana yeyesi wa kuativya.

⁹Mkpwonoo uwe Iziraeli undaunulwa dzulu ya maaduigo

na avihao andaolagbwa tsetsetse.

Mwenyezi Mlungu andatakasa atue

¹⁰Mwenyezi Mlungu anaamba, “Siku iyo nindaolaga farasi enu

na kubananga magari genu ga kuvwehwa ni farasi.

¹¹Nindabananga tsetsetse midzi ya tsiiyo

na kubomola ngomezo zosi.

¹²Nindausa nguvu zosi za utsai kula mwako mikononi

na kundakala tsona na atu a kupiga mburuga.

¹³Nindabananga vizukavyo vya kutsongbwa

na milungu ya handzo ya nguzo iriyo kahizo.

Nawe kusujudira tsona vitu

urivyotengeza na mikonoyo.

¹⁴Nindangʼola vizuka vya Ashera virivyo kahizo

na kubananga midziyo.

¹⁵Ndariphiza mataifa ganjina ambago tagandanisikira

wakati nkareya na kutsukirwa sana.”

Mwenyezi Mlungu analonda haki

¹Sambi phahi phundzani agombavyo Mwenyezi Mlungu. Iye anaamba,

“Ima urehe malaugo mbere za myango

na udzikanire mbere ya vidzango.

²Sikirani malalamishi ga Mwenyezi Mlungu mwimwi myango

na mwimwi misingi ya kudumu ya dunia.

Mana Mwenyezi Mlungu ana malau na atue

na andauzana maswali na Aiziraeli.”

³“Mwi atu angu, nkakuhendani utu wani?

Nikakuremwezani na ni? Hebu nijibuni.

⁴6:4 a Kumbukumbu 12:50-51; b Kumbukumbu 4:10-16; c Kumbukumbu 15:20Nákutuluzani Misiri

nchikukombolani kula tsi ambayo kala mu atumwa.

Námuhuma Musa phamwenga na Aruni na Miriamu,

edze akulongozeni.

⁵6:5 Isabu 22:2—24:25; Joshuwa 3:1—4:19Atu angu tambukirani

vira Balaki6:5 Soma chitabu cha Isabu sura 22—24. mfalume wa Moabu arivyokupangirani mai

na vira Balaamu mwana wa Beori arivyomjibu.

Tambukirani gara garigohendeka hangu mriphola Shitimu6:5 Soma chitabu cha Joshuwa sura ya 3—4. hadi mriphofika Giligali,

ili mmanye mahendo ga haki ga Mwenyezi Mlungu.”

⁶Ndiphokpwedza mbere za Mwenyezi Mlungu kusujudu,

nimrehereni Mlungu ariye dzulu?

Dze, nedze na sadaka za kuochwa

za ana ndzau a mwaka mmwenga-mmwenga?

⁷Dze, Mwenyezi Mlungu andahamirwa ni maelufu ga maturume

au myuho maelufu na maelufu ga mafuha ga zaituni?

Dze, nimulavye mwanangu wa mbere kpwa kuniriphira makosa gangu,

mlatso wangu mwenye kpwa sababu ya dambi yangu?

⁸Hata, uwe mwanadamu Mwenyezi Mlungu akakuonyesa ririro ra sawa.

Ye Mwenyezi Mlungu analonda utu wani?

Iye analonda uhende haki na ukale na mendzwa isiyosika,

ukale mutu wa kugbwa maguluni mbereze.

Hatiya ya Iziraeli na Kutiywakpwe Adabu

⁹Phundzani! Mwenyezi Mlungu anagomba na atu a Jerusalemu!

Kuogopha dzinare ni ikima.

Mwenyezi Mlungu anaamba,

“Sikira we taifa na osi achiokusanyika mo mudzini.

¹⁰Uwe nyumba ya uyi,

siweza kuyala hazinayo uriyoiphaha kpwa handzo

na vipimo vya handzo ambavyo navizira.

¹¹Dze, nimuhesabire mutu ahumiraye mizani ya handzo kukala kana hatiya

hiye ariye na mawe ga kupimira gasigo sawa?

¹²Atue ario matajiri a mudzi wa fujo

na enyezie ana handzo

aho anagomba handzo.

¹³Kpwa hivyo nikaandza kukubanangani,

nami ndakuangamizani kpwa sababu ya dambi zenu.

¹⁴Mundarya ela tamundamvuna,

mundaenderera kukala na ndzala.

Mundaika ela tamundakala na akiba,

kpwa sababu hicho mndichoika akiba chindahalwa zewe wakati wa viha.

¹⁵Mundaphanda ela tamundavuna,

mundaminya zaituni ela tamundadzipaka mafuhage,

mundavyoga zabibu ela tamundanwa uchiwe.

¹⁶6:16 1 Afalume 16:23–34; 21:25–26Mkagbwira malagizo ga mfalume Omuri

na mahendo gosi ga mfalume Ahabu na chivyaziche,

na mkalunga mila zao.

Kpwa hivyo ndakuangamizani

ndahenda atu enu anyeterwe,

mataifa gosi gandakuberani.”

Mahendo mai ga atu a Iziraeli

¹Mimi nahenda ya bure tse! Sindaphaha rorosi.

Ni dza vira bada ya atu kukusanya matunda ga vuri,

bada ya atu kutsembwesa.

Taphana hata tsana ya zabibu

wala tini ya kuivwa ya kurya mimi nriye na ndzala sana.

²Atu aaminifu kpwa Mlungu akauswa kpwenye tsi.

Takuna hata mmwenga achiyesala wa hinyo ahendao garigo sawa.

Atu osi anagodza kpwa hamu aphahe nafwasi ya kuolaga,

chila mmwenga anaindza myawe na nyavu.

³Aho anaujuzi wa kuhenda mai.

Akulu analonda zawadi,

muamuli anavoya hongo

atu ario na uwezo nkuahenda aamuli aahende vira alondavyo

nao osi nkupanga njama phamwenga.

⁴Hiye ariye mnono kahi yao ni dza muhi wa miya,

na ye aambwaye ana chadi cha kuhenda garigo sawa

ni mui kuriko chitsaka cha miya.

Wakati wa kutiywa adabu ukafika,

wakati uriohadzwa ni arindzio, yani manabii,

vivi nyo atu a phephi na kutatizika.

⁵Usimuamini jiranio

wala usimkuluphire msenao wa phephi!

Dzimanyirire sana na maneno ugombago

hata kpwa hiye alalaye phako lavuni.

⁶7:6 Mathayo 10:35–36; Luka 12:53Mana mwana mlume anabera ise,

mwanache wa chichetu anaunuka kumpinga nine,

na mkpwaza-mwana anaheha na nine-vyala,

maadui ga mutu ni atu a nyumbaye mwenye.

⁷Ela mino ninamlola Mwenyezi Mlungu,

ndamgodza Mlungu muokoli wangu,

Mlungu wangu andasikira chiriro changu.

Mwenyezi Mlungu andativya atue

⁸Usihererwe uwe adui wangu!

Dzagbwe nkagbwa ndaunuka tsona,

dzagbwe nsegere jizani,

Mwenyezi Mlungu andakala mwanga wangu.

⁹Ni ndavumirira kutiywa adabu ni Mwenyezi Mlungu

kpwa sababu nkahenda dambi,

hadi ndiphonikanira na kunihendera haki.

Andanireha kuriko na mwanga nami ndaona wokofuwe.

¹⁰Adui wangu ariyeniamba “Akuphi ye Mwenyezi Mlungu, Mlunguo?”

Andaona higa na agbwirwe ni haya.

Ndamuona na matso gangu ndivyogbwa,

na kuvyogbwa-vyogbwa photsi dza tope njirani.

Iziraeli kuuyizwa hali ya mwandzo

¹¹Wakati wa kudzenga kuta zenu u phephi!

Wakati hinyo miphaka yenu indaenjerezwa.

¹²Wakati hinyo atu andakpwedza kpwako uwe Jerusalemu,

kpwa uphande wa mlairo wa dzuwa, andala Ashuru na muho Yufurati,

na uphande wa mwakani, andala Misiri,

na kula bahari hadi bahari, na kula mwango hadi mwango.

¹³Ela tsi indakala Gandzo,

dza kutiywa adabu kpwa sababu ya mai arigohendera atu ariosagala himo.

¹⁴Longoza atuo dza mrisa amanyiriravyo mifugo kuhumira fwimboye,

hinyo ario dza mifugo ya urisio.

Aho asegere tsakani machiyao,

kpwenye tsi ambayo taidzangbwerimwa,

ichiyozungulukpwa ni marisa manono.

Ariche akasagale tsi ya rutuba ya Bashani na Giliadi,

dza arivyohenda hipho mwandzo.

¹⁵Mwenyezi Mlungu anaamba, “Ndakuonyesani vilinje

dza irivyokala wakati hura mriphokala munatuluka Misiri.”

¹⁶Mataifa ganjina gandaona na gagbwirwe ni waibu

kpwa kukala gadziona gana mkpwotse

mbavi mkpwotse wao si chitu kpwa Mlungu.

Gandamaka na gabandike mafumba gao miromoni

na masikiro gao gasisikire.

¹⁷Gandalamba vumbi dza nyoka,

dza mdudu wa kuambala na photsi.

Gandatuluka kula ngomeni mwao kuno ganakakama,

gandagalukira Mwenyezi Mlungu, Mlungu wehu kpwa kumuogopha,

gandakuogopha uwe Mwenyezi Mlungu.

¹⁸Takuna Mlungu ariye dza uwe anayeswamehe dambi

na kusalola makosa ga atu a urisiwe ariosala kutiywa adabu.

Uwe kutsukirwa na ikakala ni bahi hata kare na kare,

ela unaonato kuhuonyesa mendzwa isiyosika.

¹⁹Undahuonera tsona mbazi

dambi zehu undaziturya avi ukazivyoga vyoga photsi

na uyi wehu undautsupha kpwenye vivwa vya bahari.

²⁰Undakala muaminifu kpwa chivyazi cha Jakobo

na kumuonyesa mendzwa isiyosika chivyazi cha Burahimu,

dza urivyoalaga akare ehu hipho kare, kpwa kuhenda apa.