Sonono za Jeremia

Chitabu cha sonono za

JEREMIA

Tanga mbere

Hichi chitabu chidide cha sonono ni mkusanyiko wa mashairi vifungu vitsano ambapho muandishi ana sonono kuhusu kuochwa kpwa Jerusalemu mwaka wa magana matsano mirongo minane na sita kabila ya Jesu kuvyalwa. Atu kala achimnungʼunikira Mlungu kuhusu hendo riro ela atu a Iziraeli na vilongozi aho ndio haswa ariohendesa Jerusalemu ichibanangbwa na ndio alaumiwao. Kahi ya sonono zizo, atu anatiywa moyo na kuhewa tumaini kukala Mlungu andaaterya siku zedzazo.

Vifungu vivi vya mashairi kala vichihumirwa wakati wa ibada za chila mwaka ambapho atambukira kubomolwa kpwa nyumba ya kuvoya Mlungu ya kpwandza ko Jerusalemu.

Vifungu vine vya kpwandza katika luga ya Chieburania vyaandikpwa kpwa kulunga mtindo wa alifabeti 22 za Chieburania. Kulengana na mtindo uho, sura 1, 2 na ya 4 zina vifungu 22, na sura ya 3 ina vifungu 66.

Maelezo muhimu kpwa chifupi

Sonono ya Jerusalemu 1:1–22

Kutiywa adabu kpwa Jerusalemu 2:1–22

Kuluphiro richerepho 3:1–66

Jerusalemu ikakala gandzo 4:1–22

Ayahudi anavoya aonerwe mbazi 5:1–22

Jerusalemu ikakala gandzo

¹Lola, vyo mudzi urivyo wekee

mudzi uriokala ukaodzala atu!

Vivi ukakala dza mchetu gungu,

yekala mkpwulu kahi ya mataifa!

Mchetu yekala Malikia kahi ya midzi

vivi akahendwa kukala mtumwa.

²Iye nkurira sana wakati wa usiku,

matsozi gakajera mwakpwe mafundani.

Kahi ya azembee osi

taphana wa kumphoza marenda,

asenae osi amsalata,

aho akakala maaduige.

³Atu a Juda akalazimishwa kuphiya kure na kpwao

kpwa sababu ya mateso na kuhendeswa kazi ngumu.

Vivi anasagala kahi za mataifa,

nao taaphaha phatu pha kuoya,

osi anaomzoresa akamgbwira

na kana phatu pha kuchimbirira.

⁴Njira ziphiyazo Sayuni ni tuphu

mana takuna aphiyaye sikukuuni.

Maryangoge gakakala gandzo,

alavyadzie-sadaka anaula,

asichanae anasononeka,

na ye mwenye ana utsungu sana.

⁵Avihae akamturya,

nago maaduige gana ongokerwa,

Mana Mwenyezi Mlungu akamuhenda ateseke

kpwa sababu ya dambize nyinji,

anae akahalwa mateka,

ni mviha.

⁶Ngumaye yosi ikamuukira

iye mwana mchetu wa Sayuni.

Vilongozie akakala dza kulungu

asiokala na marisa.

Anachimbira ela taana mkpwotse

mbere ya iye aazoresaye.

⁷Jerusalemu inatambukira

siku za mateso na sonono

na vitu vyosi vya samani

vyokala vyakpwe hangu kare.

Atue ariphoshindwa ni avihae,

napho taphayakala na wa kumkanira,

avihae amlola

na kumtseka wakati wa kushindwakpwe.

⁸Jerusalemu akahenda dambi sana,

kpwa hivyo akakala najisi

osi ariokala anamuishimu anamʼbera

mana akaona chitsahache.

Ye mwenye anaula

na kufyula usowe kpwa waibu.

⁹Ukolowe kala u wazi;

kayaririkana sikuze za mbereni,

kpwa hivyo chavuche ni cha kuangalaza,

kana mutu wa kumsononekera.

“Lola, kugaya kpwangu ee Mwenyezi Mlungu,

mana ye adui akaniturya!”

¹⁰Adui akagolosa mikonoye

ahale vitu vyosi vya samani vya Jerusalemu.

Jerusalemu waona atu a mataifa ganjina

achiinjira phatuphe phatakatifu,

aratu ambao Mwenyezi Mlungu waakahaza

kuinjira kpwenye mkpwutanowe.

¹¹Atue osi anaula

kuno anaendza utu wa kurya,

anakakana vitu vyao vya samani na chakurya

ili auyize mikotse yao.

“Nilola, Mwenyezi Mlungu,

mana ninaberwa.”

¹²“Kale tamuona kusononeka kpwangu mwi mosi mtsupao?

Lolani na muone

ichikala kuna mwenye sonono dza sonono yangu

ambayo Mwenyezi Mlungu wanirehera,

ariphonigayisa

yo siku ya tsukizize nyinji.

¹³Iye wahuma mwangu mifuphani moho kula dzulu, nao unaniocha.

Wahandika nyavu anigbwire magulu,

aniuyize nyuma.

Waniricha machiyangu,

mnyonje siku yosi.

¹⁴Dambi zangu zafungbwa kpwenye gogolo,

kpwa mikonoye wazifunga phamwenga,

nazo achinivwika mwangu singoni.

Akanihenda nisirirwe ni mkpwotse.

Mwenyezi Mlungu wanilavya mikononi

mwa nyo ambao siaturya.

¹⁵Mwenyezi Mlungu waarema masujaa osi

ariokala kahi yangu,

waiha mkpwutano chinyume changu

ili aapige ahana angu.

Mwenyezi Mlungu akamvyoga-vyoga ye mwanamwali, mwana mchetu wa Juda,

dza zabibu zivyogbwavyo.

¹⁶Ndiyo mana ninarira,

namwagikpwa ni matsozi

mana wa kuniphoza marenda a kure nami,

takuna wa kunitiya moyo.

Anangu akarichwa a weche,

mana adui akaniturya.”

¹⁷Sayuni anagolosa mikonoye,

ela taphana wa kumterya.

Mwenyezi Mlungu akalavya amuri chinyume cha Jakobo

ili majiranige akale avihae,

Jerusalemu ikakala

najisi kahi yao.

¹⁸“Mwenyezi Mlungu ni wa haki,

mana nkakala wa kuasi nenore,

ela phundzani mwimwi mataifa,

lolani kugaya kpwangu.

Ahana angu na asichana angu

akahalwa mateka.

¹⁹Náiha azembe angu

ela anichenga,

alavyadzi-sadaka na atumia angu

afwa mo mudzini,

ariphokala anaendza chakurya

ili auyize mikotse yao.

²⁰Lola, ee Mwenyezi Mlungu, mana nagaya,

roho yangu ikachafuka,

nao moyo wangu ukayugika

kpwa sababu nkakala muasi sana.

Ko kondze upanga unaolaga atu,

na mo nyumbani namo munafwewa.

²¹Aho akasikira vyo niulavyo,

taphana wa kuniphoza marenda

maadui gangu gosi gakasikira kuhusu mashaka gangu,

aho akahamirwa ni kukala ukanihenda hivyo.

Rehe yo siku uriyotangaza,

uahende dza vyo urivyonihenda.

²²Uyi wao wosi nawedze mberezo

atiye adabu

dza urivyonitiya adabu

kpwa sababu ya dambi zangu

mana kuula kpwangu ni kunji

nami nikafwa moyo.”

Mwenyezi Mlungu andatiya adabu Jerusalemu

¹Mwenyezi Mlungu, akabwiningiza

Sayuni na ingu ra tsukizize!

Nyo unono wa Iziraeli

akautsupha kula mlunguni hadi duniani

naye kakatambukira chihiche cha kuikira magulu

siku ya tsukizize.2:1 Chihiche cha kuikira magulu inaweza kukala ni Jerusalemu au yo nyumba ya kuvoya Mlungu.

²Mwenyezi Mlungu akabomola-bomola bila mbazi

makalo gosi ga Jakobo.

Kpwa tsukizize akabomola

ngome za mwana wa chichetu wa Juda.2:2 mwana wa chichetu wa Juda ni Jerusalemu.

Akatsereza hadi photsi

utawalawe na vilongozie.

³Iye akaangamiza masujaa gosi ga Iziraeli

kpwa tsukizize nyinji.

Akausa mkpwonowe wa kulume kula kpwakpwe,

wakati adui ariphomvamia.

Iye akaocha Jakobo dza moho uakao,

na kuocha chila chitu chimzungulukacho.

⁴Iye akatonyola uha dza adui,

na mkpwonowe wa kulume u tayari kulatsa.

Dza adui, akaolaga atu osi anono-anono ahamirao matso,

akamwaga tsukizize nyinji dza moho

ndani ya nyumba ya kuvoya Mlungu ko Sayuni.

⁵Mwenyezi Mlungu akakala dza adui,

iye akabomola-bomola Iziraeli.

Akabomola-bomola madzumbage gosi,

akahenda ngomeze zosi zikale gandzo,

chisha akamuenjerezera Juda

chiriro na sonono.

⁶Nyumbaye ya kuvoya akaibomola dza chibanda cha mundani,

pho phatuphe pha kuusira sikukuuze zirizoikpwa akaphahenda gandzo.

Mwenyezi Mlungu akahenda Sayuni iyale

sikukuuze na Sikuze za Kuoya,

na kpwa tsukizize kali akamrema

mfalume na mlavyadzi-sadaka.

⁷Mwenyezi Mlungu akarema pho phatuphe pha kulavira sadaka,

akalozera kogo pho phatu phatakatifu.

Akazitiya mikononi mwa adui

zo kuta za madzumbage.

Go maadui gapiga kululu mo nyumbani mwa Mwenyezi Mlungu,

dza hurivyohenda wakati wa sikukuu.

⁸Mwenyezi Mlungu wakata shauri kubomola

ukuta wa mwana mchetu wa Sayuni.

Iye wahumira mkpwowa wa kupimira

naye kayausa mkpwonowe wakati anabomola.

Wahenda nyo ukuta wa kondze na wa ndani usononeke,

zosi mbiri zabomolwa phamwenga.

⁹Maryangoge gakadodomea mtsangani,

akabananga na kubomola magbwamage ga kufungira,

mfalumewe na akulue anasagala kahi ya mataifa.

Alavyadzi-sadaka taafundza tsona shariya,

na manabiige tagaona ruwiya tsona

kula kpwa Mwenyezi Mlungu.

¹⁰Atumia a ye mwana mchetu wa Sayuni

asegere photsi kuno akanyamala zii

akadzitiya mtsanga mwao vitswani,

na akavwala nguwo za magunia.

Asichana a Jerusalemu

akazamisa vitswa vyao hadi photsi.

¹¹Matso gangu gakaremwa kpwa kurira,

roho yangu ikachafuka.

Moyo wangu unafwa purungire kpwa sonono

kpwa sababu ya kubanangbwa kpwa mwana mchetu wa atu angu,

kpwa kukala anache na ana atsanga

anahirika mo njira-njira za nyo mudzi.

¹²Anaririra nine zao achiamba,

“Ukuphi mkpwahe na uchi?”

Kuno anahirika dza atu achiolumizwa

mo njira-njira za nyo mudzi

wakati anafwa

magoni mwa nine zao.

¹³Nigombeni kukuhusu? Nikulinganishe na chitu chani,

uwe mwana mchetu wa Jerusalemu?

Nikulinganishe na utu wani, ili niweze kukuphoza marenda,

we mwanamwali, mwana mchetu wa Sayuni?

Mana chirondacho china chivwa dza cha bahari.

Ni ani awezaye kukuphoza?

¹⁴Manabiigo gakakuonera

ruwiya ya handzo na ya kuchenga,

aho taayafwenula uyio

ili akurekebishe,

ela akakuonera ruwiya

ya handzo na ya kuangamiza.

¹⁵Osi atsupao na njira

anapiga makofi kpwa kukubera,2:15 kupiga makofi phapha ni kpwa kubera. Nyo apigi a makofi kala anahenda vivyo kpwa kuonyesa raha ariyo nayo kpwa go mai garigophaha Jerusalemu.

anapigira mishoni ye mwana mchetu wa Jerusalemu

na kusukasuka vitswa vyao.

“Dze, uno ndio mudzi kala uchiihwa

ukamilifu wa unono

fwahiro ra dunia?”

¹⁶Maaduigo gosi

gananahula kanwa zao chinyumecho,

ana kubera na kusaga meno

na kuamba, “Hukamuolaga!

Hino ndiyo siku ambayo kala hunaigodzera

vino hukaiona!”

¹⁷Mwenyezi Mlungu akahenda ariropanga,

akatimiza nenore

dza arivyorigomba pho kare,

akakubwaga bila mbazi

akamuhenda aduio ahererwe,

na kuapha nguma masujaa a avihao.

¹⁸Mioyo ya atu

inamririra Mwenyezi Mlungu.

Uwe ukuta wa mwana mchetu wa Sayuni,

richa matsozigo gajere usiku na mutsi

dza muho.

Usioye tse,

matsogo nagasiriche kulavya matsozi.

¹⁹Usiku wosi unuka mara kpwa mara,

umririre Mwenyezi Mlungu!

Mwaga moyoo dza madzi

mbere za Mwenyezi Mlungu!

Muunurire mikonoyo

kpwa ajili ya uzima wa anao,

ambao anahirika na ndzala

kpwenye maganiko ga chila barabara.

²⁰Lola, ee Mwenyezi Mlungu na uone!

Ni ani uriyemuhendera dza rino?

Dze, ano mayo arye ana ao,

ana arioarera?

Dze, mlavyadzi-sadaka na nabii aolagbwe

pho phatu phatakatifu pha Mwenyezi Mlungu?

²¹Miri ya avyere kpwa adide

irere photsi barabarani;

ahana angu na asichana angu

akagbwa kpwa upanga.

Uwe waaolaga wakati wa tsukizizo,

waatsindza bila mbazi.

²²Uwe waiha maadui gangu dza ualikaye atu siku ya sikukuu

nao akanizunguluka chila uphande,

Na siku ya tsukizi za Mwenyezi Mlungu

takuna ariyechimbira au ariyetiya

osi nrioaereka na kuarera

akaolagbwa ni adui wangu.

Kuluphiroro ni kulu

¹Mimi ni ye mutu nchiyetsupira mateso

kpwa fwimbo ya tsukizize.

²Iye akanizola na kunireha

jizani phatu phasipho mwanga.

³Kpwa kpweli akagaluza mkpwonowe chinyume changu

kano nyinji, mutsi wosi.

⁴Akatsakaza mwiri wangu na chingo yangu

na kuvundza mifupha yangu.

⁵Akanigbwira na kunizunguluka

kpwa utsungu na tabu.

⁶Akanihenda nisagale jizani

dza atu ariofwa kare.

⁷Akanizungulusira ukuta hata siweza kuchimbira

akanifunga na silisili ndziho.

⁸Dzagbwe naiha na kuririra kuterywa,

ela ye nkupuza mavoyo gangu.

⁹Akaziba njira yangu na mawe ga kutsonga,

akahenda njira yangu ikale fyuko.

¹⁰Kpwangu mimi iye ni dza dubu aoteaye,

dza simba chiyedzifwitsa.

¹¹Iye wanivwamukira ko njirani na achinimwamula vipande-vipande

na achiniricha bila msada.

¹²Iye watonyola uhawe,

achinilenga na nyo muvwiwe.

¹³Walatsa moyo wangu

na mivi ya mwakpwe ryakani.

¹⁴Nikakala wa kutsekpwa kahi ya atu angu osi

anasinda dii kunitunga mawira.

¹⁵Iye akaniodzaza na utsungu,

na kunilazimisha kumiza subiri.

¹⁶Wanihenda nigogode mawe,

na kunivyoga-vyoga ivuni.

¹⁷Moyo wangu ukafutwa amani,

nikayala kufwahirwa ni utu wani.

¹⁸Kpwa vivyo naamba, “Nikakata tamaa tse,

na sitarajiya utu wowosi tsona kula kpwa Mwenyezi Mlungu.”

¹⁹Kutambukira mateso na kudengereka kpwangu,

kunanitiya utsungu dza subiri na chihumbo utsungu!

²⁰Chila nchigatambukira,

nkukata tamaa.

²¹Ela nchere na tumaini

ninaphotambukira neno hiri:

²²Huchere moyo kpwa sababu ya mendzwa ya Mwenyezi Mlungu isiyosika,

mbazize tazina mwisho,

²³ni nyiphya chila ligundzu,

na uaminifuwe ni mkpwulu.

²⁴Nchidziamba, “Mwenyezi Mlungu ndiye mtalo wangu

kpwa hivyo ndamkuluphira iye.”

²⁵Mwenyezi Mlungu ni mnono kpwa nyo amgodzerao,

na nyo amuendzao.

²⁶Ni vinono mutu kuhurira wakati anagodzera

nyo wokofu wa Mwenyezi Mlungu.

²⁷Piya ni vinono mutu atsukule gogolo,

wakati achere barobaro.

²⁸Naasagale macheye na ahurire,

maziho kula kpwa Mwenyezi Mlungu ganaphomphaha.

²⁹Indamʼbidi adzitsereze,

nkuhenda kukakala kuchere na kuluphiro.

³⁰Na alavye ndzeyaye kpwa ye mpigi,

na akale tayari kulaphizwa.

³¹Mana Mwenyezi Mlungu kandahuricha

hata kare na kare.

³²Dzagbwe nkureha sonono, ela nkuonyesa mbazi,

kulengana na mendzwaye nyinji isiyosika.

³³Mana kahamirwa ni kugayisa,

au kusononesa anadamu.

³⁴Afungbwa osi a tsi

anaphovyogbwa-vyogbwa,

³⁵kulafiwa haki zao

mbere za iye Ariye Dzulu Kuriko Vyosi,

³⁶na kufungbwa wakati taana makosa,

ikale Mwenyezi Mlungu kaona gosi higo?

³⁷Ni ani awezaye kugomba na vikakala,

ichikala Mwenyezi Mlungu kalagizire?

³⁸Manono na mai nkuhendeka tu

kpwa amuri ya ye Ariye Dzulu Kuriko Vyosi.

³⁹Kpwa utu wani mutu ariye moyo alalamike,

wakati anaphotiywa adabu kpwa dambize?

⁴⁰Nahupime na kuchunguza njira zehu,

na humuuyire Mwenyezi Mlungu!

⁴¹Nahuunule mioyo yehu na mikono yehu

kpwa Mlungu ariye mlunguni na huambe,

⁴²“Hukakosera na kukuasi,

nawe kukahuswamehe.

⁴³Ukaodzala tsukizi na kuhuzoresa,

nawe ukahuolaga bila mbazi.

⁴⁴Ukadzifwinika ingu

ili mavoyo gehu gasiweze kutsupa.

⁴⁵Ukahuhenda hukale taka-taka na uchafu

kahi za mataifa.

⁴⁶Maadui gehu gosi

ganagomba maneno ga kuhunyetera.

⁴⁷Hukaphahwa ni wasiwasi na wuoga,

uweche na kubanangbwa.”

⁴⁸Matso gangu ganaparariza myuho ya matsozi

kpwa sababu ya kubanangbwa kpwa atu angu.

⁴⁹Matso gangu gandaparariza matsozi

bila kusira,

⁵⁰hadi ye Mwenyezi Mlungu alole

kula mlunguni na aone.

⁵¹Nasononeka kpwa kuona

kuteseka kpwa achetu a mudzi wangu.

⁵²Nikaindzwa dza nyama wa mapha

ni hinyo achionimena bila ya chisa.

⁵³Anizika mzima dibwani

na achichibwiningiza na dziwe.

⁵⁴Madzi gachinitsupa chitswani,

nami nchiamba, “Nikaangamika.”

⁵⁵Nahadza dzinaro, uwe Mwenyezi Mlungu,

kula mo dibwani.

⁵⁶Uchisikira kulalama kpwangu, nriphokuvoya nchiamba, “Usizibe masikirogo

niriphokuririra kulonda kuterywa!”

⁵⁷Wakpwedza phephi niriphokuiha,

nawe uchiamba, “Usiogophe!”

⁵⁸Ee Mwenyezi Mlungu, uwe wahehera lau rangu,

uwe wativya maisha gangu.

⁵⁹Ukaona uyi niriohenderwa, ee Mwenyezi Mlungu

kala muamuli wangu na uniuyizire haki yangu.

⁶⁰Ukaona maadui gangu ganavyonimena,

na kunipangira mai.

⁶¹Ee Mwenyezi Mlungu, ukasikira kulaphiza kpwao,

na mipango yao yosi mii chinyume changu.

⁶²Maadui gangu ganagomba pokopoko wakati ananipangira mai

chinyume changu mutsi wosi.

⁶³Lola, asagalapho na aunukapho

ananifyorera kpwa mawira gao.

⁶⁴Ariphe vyo inavyofwaha, ee Mwenyezi Mlungu,

kulengana na kazi za mikono yao.

⁶⁵Aphe mioyo mifu,

na lanayo ikale dzulu yao.

⁶⁶Azorese na tsukizi na uabanange-banange

ahende asionekane tsona duniani, ee Mwenyezi Mlungu.

Jerusalemu bada ya kubanangbwa

¹Zahabu ikaricha kungʼala,

hata yo zahabu swafi taingʼala tsona!

Go mawe matakatifu gakatsamukana

maganikoni mwa chila njira.

²Nyo ana a Sayuni ariokala na nguma,

ariokala a samani sawa na zahabu swafi,

vivi anaaharira dza nyungu za ulongo zisizo na samani

kazi ya mfinyangi.

³Hata makala nkulavya nyaho

kuamwisa ana ao,

ela atu angu akakala majaili,

dza mbuni ko jangbwani.

⁴Lilimi ra mwana aamwaye

rikagbwirana na lilakalaka kpwa chiru.

Anache anavoya chakurya

ela taphana aaphaye.

⁵Nyo ariorya vyakurya vya hali ya dzulu

anafwa mo njirani,

na ariorerwa na nguwo za zambarau

vivi analala ivuni.

⁶4:6 Mwandzo 19:24Atu angu akatiywa adabu kulu

kuriko adabu iriyophaha atu a Sodoma,

mudzi ambao wapendulwa gafula,

taphayakala na mutu wa kuaterya.

⁷Vilongozie akala ereru dza barafu

na ereru kutsupa maziya,

miri yao yakala na afya na nguvu,

na madzeni ga miri yao gakala dza dziwe ra samani riihwaro yakuti samawi.

⁸Vivi nyuso zao ni nyiru kushinda misizi,

nao taaweza kumanyikana mo njirani.

Ngozi zao zikahenda nyambwi,

na zikaumalala dza mbao.

⁹Baha nyo arioolagbwa na upanga

kuriko nyo ahirikao,

ambao anafwa pore-pore

kpwa kukosa chakurya kula mindani.

¹⁰4:10 Kumbukumbu 28:57; Ezekieli 5:10Mikono ya achetu enye mbazi

ikajita ana aho enye,

akala chakurya chao

wakati wa kubanangbwa kpwa atu angu. 4:10 Atu angu inamanisha Jerusalemu.

¹¹Mwenyezi Mlungu wadigirika,

bada ya kumwaga tsukizize kali.

Iye waasa moho mo Sayuni,

urioocha yo misingiye.

¹²Afalume a dunia,

phamwenga na atu osi taayaamini,

kukala maadui na aviha anaweza kuinjira

maryango ga Jerusalemu.

¹³Vyakala vivi chisa ni dambi za manabiige

na mai ga alavyadzie-sadaka,

ariotiya mudzi najisi

kpwa kuolaga enye haki asagalao kahi zao.

¹⁴Aphaphasa mo njirani dza vipofu,

aho akadzinajisi na ukolo wa milatso

hata taphana awezaye kuguta

nguwo zao.

¹⁵Atu aaririra achiambira, “Phaukeni mwi akolo;

ukani! Ukani! Msihugute!”

Kpwa hivyo achikala achimbizi na a kudengereka;

atu a mataifa achiamba,

“Taandaishi phamwenga naswi tsona.”

¹⁶Mwenyezi Mlungu mwenye akaatsamula,

naye kandaajali tsona,

alavyadzi-sadaka taandahewa tsona ishima,

na atumia taandaonerwa mbazi tsona.

¹⁷Matso gehu gakaremwa kuphelephesa,

kpwa kulorera msada ambao tahuuphahire;

kula mwehu minarani hwarorera,

taifa risiroweza kuhuokola.

¹⁸Maadui ahulunga-lunga nyago hadi nyago

hata huchikala tahuweza kunyendeka mwehu njirani.

Mwisho wehu wasengera phephi, siku zehu kala zikaolangbwa,

kpwa kpweli mwisho wehu kala ukafika.

¹⁹Nyo ariohuzoresa kala ni epesi

kuriko makozi ko mlunguni

ahuzoresa ko myangoni,

achihuoteya ko weruni ahugbwire.

²⁰Mfalume wehu, ye mmwagirwa mafuha wa Mwenyezi Mlungu, ariye mrindzi wa taifa rehu,

wagbwirwa ni mihambo yao.

Enye kala hukafikiriya

kukala andahurinda na taifa rorosi phapha duniani.

²¹Mwimwi atu a Edomu na Usi;

hererwa na kupiga njerejere!

Ela manyani kukala cho chikombe chindafika ko kpwenu,

namwi mundalewa hadi mvule nguwo zenu, mkale chitsaha.

²²We mwana mchetu wa Sayuni, kutiywako adabu kukasira

kandakuricha ko urikotsamizwa kpwa lazima kpwa muda mure.

Ela uwe mwana mchetu wa Edomu, dambizo zindafwenulwa,

na utiywe adabu.

Voyo ra kusononesa

¹Ee Mwenyezi Mlungu, tambukira garigohuphaha;

lola na uone waibu wehu.

²Urisi wehu ukahewa ajeni,

nyumba zehu zikalaviwa kpwa ajeni.

³Hukakala anachiya, asio na baba,

mayo zehu ni magungu.

⁴Ni lazima huriphire madzi hunwago,

kuni uhumirazo ni huzigule.

⁵Nyo auzoresao anahukpwala majimbe,

hukaremwa ela tauruhusiwa kuoya.

⁶Hukaagolosera mikono Amisiri na Aashuru

ili huphahe chakurya cha kukola.

⁷Baba zehu ahenda dambi, nao taako tsona

naswi hunagaya kpwa dambi zao.

⁸Atumwa anahutawala,

taphana wa kuhuokola kula mwao mikononi.

⁹Hunaphaha chakurya kpwa kuhatarisha maisha gehu,

kpwa sababu ya upanga ko weruni.5:9 Upanga ko weruni vinamanisha kukala kala kuna atu ko weruni ambao kala a tayari kuaolaga na kuafuta vitu.

¹⁰Miri yehu i moho dza dziko ra kuochera mikahe,

chisa ni ndzala.

¹¹Achetu agbwavukirwa ko Sayuni,

na anamwali kahi ya midzi ya Juda.

¹²Vilongozi afungbwa mikowa mikononi achileweswaleweswa,5:12 Seemu hino yatiywa ili atu aelewe chihendo chohenderwa atu.

atumia taahewa ishima.

¹³Barobaro anashurutishwa kusaga na lala

avulana anadedeleka kpwa mahiha maziho ga kuni.5:13 Kahi ya mila za Chieburania kutsuma kuni na kusaga, kala si kazi ya achetu machiyao ela hata afungbwa na atumwa.

¹⁴Atumia taasagala tsona pho ryango ra mudzi,

avulana akaricha kuimba mawira gao.

¹⁵Tahuna raha tsona,

Kuvwina kpwehu kukagaluzwa kukala chiriro.

¹⁶Tadzi ya chifalume ikagbwa kula chitswani phehu,

ni shauri yehu mana hukahenda dambi.

¹⁷Kpwa sababu iyo, mioyo yehu ni minyonje,

kpwa utu uho matso gehu tagaonato,

¹⁸mana mwango Sayuni, ukarichwa wekee bila mutu,

makala nkunyendeka dzuluye.

¹⁹Ela uwe Mwenyezi Mlungu unatawala hata kare na kare.

Chihicho cha endzi chinadumu chivyazi hadi chivyazi.

²⁰Kpwa utu wani unaenderera kuhuyala?

Mbona ukahuricha kpwa muda mure?

²¹Huuyize kpwako ee Mwenyezi Mlungu, ili naswi hukuuyire!

Henda siku zehu zikale dza zo za kare!

²²Ebu ukahurema tsetsetse?

Dze, ukahutsukirirwa kpweli-kpweli?