Hosea

Chitabu cha

HOSEA

Tanga mbere

Nabii Hosea watabiri kpwenye utawala wa vurini wa Iziraeli, bada ya nabii Amosi, wakati wa misukosuko na kugbwa kpwa mudzi mkpwulu uihwao Samariya mwaka wa magana sabaa mirongo miiri na mmwenga kabila ya Jesu kuvyalwa. Iye wasononeswa ni nyo atu a Iziraeli na Juda kpwa arivyokala anaabudu vizuka badala ya kukala aaminifu kpwa Mlungu. Hosea walenganisha hiku kukosa kpwao uaminifu na halize bada ya kulóla malaya. Dza vira Gomeri arivyoenderera na umalaya, ndivyo atu a Mlungu arivyoenderera kuabudu vizuka. Kpwa sababu ihi, atu a Iziraeli kala ni aamulwe. Ela pho mwisho mendzwa ya Mlungu isiyosika kpwa atue indauya, naye andauyiza uhusiano nao. Mendzwa ihi inaelezwa ni maneno higa: “Nkale ndaweza kukurichani mwi atu a Efuraimu? Ndawezadze kukulavyani mwi atu a Iziraeli? Vino nindaweza kukuhenda dza mudzi wa Adima? Ndawezadze kukuhenda dza mudzi wa Seboimu. Nkagalukpwa ni moyo, nkedzerwa ni mbazi.” (11:8)

Maelezo muhimu kpwa chifupi

Hosea, mchewe na anae 1:1—3:5

Ujumbe chinyume cha Iziraeli 4:1—13:16

Mlungu analaga kuswamehe Aiziraeli ndiphotubu 14:1–9

¹1:1 2 Afalume 15:1–7; 15:32–38; 16:1–20; 18:1—20:21; 14:23–29; 2 Nyakati 26:1–23; 27:1–8; 28:1–27; 29:1—32:33Hosea mwana wa Beeri waphaha ujumbe kula kpwa Mwenyezi Mlungu wakati wa utawala wa Uziya, Jothamu, Ahazi na Hezekiya hiko tsi ya Juda; nao kala ni wakati wa utawala wa Jeroboamu mwana wa Joashi afalume a Iziraeli.

Mkpwaza Hosea na anae

²Mwenyezi Mlungu ariphoandza kugomba kutsupira Hosea wamuamba, “Phiya ukalóle mchetu amendzaye kuzinga, na uvyale ana kpwa kuzinga mana nyo atu a tsi ihi anazinga zaidi kpwa kuniricha mimi Mwenyezi Mlungu.” ³Kpwa hivyo Hosea wamlóla Gomeri mwana wa Dibulaimu. Gomeri wagbwira mimba na achivyala mwana mlume.

⁴1:4 2 Afalume 10:11Mwenyezi Mlungu achimuamba Hosea, “Iye mwana dzinare undamuiha Jeziriili, mana si kure na kutiya adabu chivyazi cha Jehu kpwa vira arivyoolaga atu anji hiko Jeziriili. Mimi ndaumarigiza tse nyo ufalume wa Iziraeli. ⁵Siku iyo ndaangamiza silaha za viha za Iziraeli ko Dete ra Jeziriili.”

⁶Gomeri achigbwira mimba tsona na achidzivugula mwana mchetu. Ndipho Mwenyezi Mlungu achigomba na Hosea achimuamba, “Hiyu dzinare muihe Loruhama,1:6 Loruhama manaye ni sindamuonera mbazi. mana sindaaonera tsona mbazi atu a Iziraeli, wala kuaswamehe. ⁷Ela nindaaonera mbazi atu a Juda, nami nindaativya bila ya viha. Sindahumira maha, panga, farasi, wala anajeshi akuhumira farasi, ela kpwa nguvu zangu mimi Mwenyezi Mlungu, Mlungu wao.

⁸“Gomeri ariphomrikisa Loruhama, wagbwira mimba yanjina, achivyala mwana mlume wa phiri. ⁹Phahi Mwenyezi Mlungu wagomba na Hosea achimuamba, ‘Hiyu muihe Loami,1:9 Loami manaye ni Mwimwi simwi atu angu. kpwa mana mwimwi simwi atu angu, nami simi Mlungu wenu.’ ”

Iziraeli indaongokerwa tsona

¹⁰1:10 Arumi 9:26“Ela yo isabu ya ana a Iziraeli indakala dza ya mtsanga wa pwani ambao taphana awezaye kuupima wala kuutala. Na badala ya kuambwa, ‘Simwi atu angu,’ aho andakpwedza aihwe, ‘Ana a Mlungu ariye moyo.’ ¹¹Atu a Juda na a Iziraeli andaungana atsambule chilongozi mmwenga; nao andaenjerezeka na kuongokerwa kahi ya tsi yao kpwa kukala yo siku ya Jeziriili indakala siku kulu.”

¹Namwi mundaiha ndugu zenu alume “atu a Mlungu,” na enenu achetu “arioonerwa mbazi ni Mwenyezi Mlungu.”

Aiziraeli ni dza Gomeri, sio aaminifu

²Anangu, bishani na mayo yenu,

(mana iye siye mkpwazangu

nami simi mlumewe tsona).

Muambireni ariche kuzinga

na umalayawe,

³nisedze nikamvula nguwo

akakala chitsaha dza arivyovyalwa.

Chisha nimuhende akale dza jangbwa,

dza tsi ya chitsapi,

na nimuolage na chiru.

⁴Hata nyo anae sindaaonera mbazi,

kpwa kukala ni ana a kuzinga.

⁵Kpwa mana nine yao wahenda umalaya,

iye wagbwira mimba katika waibu.

Mana iye wáamba, “Nindaalunga azembe angu,

mana aho ndio aniphao chakurya na madzi,

nyoya2:5 Atu a Iziraeli kala nkuhumira nyoya na katani kufuma nguwo. za mangʼondzi na katani, mafuha na uchi wangu.”

⁶Kpwa hivyo ndampigira lichigo ra miya mo mwakpwe njirani

ndamdzengera ukuta ili asione njira.

⁷Iye andaalunga azembee

ela kandaaphaha

andaaendza

ela kandaaona.

Ndipho andaamba,

“Nindauya kpwa mlume wangu,

mana hiko nakala vinono kuriko vi nirivyo sambi.”

⁸Iye kamanyire kukala,

mimi mwenye ndimi nriyemupha

nyo mtsere, uchi na mafuha.

Chisha kamanyire kukala yo feza na zahabu,

ariyoihumira kumuabudu Baali,2:8 Baali ni dzina ra mlungu wa Chikanani ambaro manaye yanjina hipha ni “Bwana.”

ndimi nriyemupha.

⁹“Kpwa hivyo wakati wa mavuno,

sindamupha mtsere wangu wala uchi wangu.

Chisha nindauyira nyoya zangu za mangʼondzi na katani yangu,

ambazo kala nkamupha abwiningize chitsahache.

¹⁰Nindamvula nguwo nimriche chitsaha

mbere za azembee

na takuna ndiyemuusa kula mwangu mikononi.

¹¹Nindakomesa sikukuuze zosi.

Sikukuu za mwaka hadi mwaka, sikukuu za kulumbwa kpwa mwezi,

sikukuu zosi za Siku za Kuoya,

na sikukuu zirizoikpwa.

¹²Iyo mizabibuye na mitiniye,

ambayo mwenye waamba,

‘Ihi ni maripho gangu

nrigoriphiwa ni azembe angu,’ ndaibananga.

Nindaihenda ikale tsaka,

na matundage gariwe ni nyama a tsakani.

¹³Nindamtiya adabu

kpwa sababu siku hizo iye waniyala achifukizira uvumba Mabaali,

achidzipamba pehe na mapambo ganjina,

na achilunga azembee,” Mwenyezi Mlungu anaamba.

Mendzwa ya Mwenyezi Mlungu kpwa Aiziraeli

¹⁴Kpwa hivyo nalonda nimchenge-chenge

nimphirike hadi weruni nikabishe naye

maneno ga kumuhuriza moyo.

¹⁵2:15 Joshuwa 7:24–26Na kuko ndiko ndikomuuyizira

mindaye ya mizabibu,

na kurihenda ro Dete ra tabu

rikale mryango wa kumrehera kuluphiro.

Nchimuiha andaihika

dza wakati ariphokala msichana,

dza siku ariphotuluka kula Misiri.

¹⁶Mwenyezi Mlungu achienderera kuamba, “Siku iyo

kundaniiha tsona ‘Baali wangu’

undaniiha ‘Mlume wangu.’

¹⁷Sindamruhusu kuhadza madzina ga mabaali,

naye kandagatambukira tsona.

¹⁸Siku iyo nindaika chilagane

na nyama a tsakani, nyama a mapha

na nyama a kuambala.

Nindavundza maha na panga,

na kukomesa viha kahi ya yo tsi,

nao andakala salama.

¹⁹Nami nindakuposa uwe Iziraeli ukale wangu hata kare na kare.

Nindakala muaminifu kpwako na wa haki

nindakuonyesa mendzwa isiyosika na mbazi.

²⁰Nindakala muaminifu kpwako nikuhende ukale wangu,

nawe undammanya Mwenyezi Mlungu.”

²¹Mwenyezi Mlungu anaamba, “Siku iyo mlunguni kundajibu

kpwa kuipha maingu ga mvula,

nako mlunguni kundaijibu tsi

kpwa kuirehera mvula.

²²Na yo tsi indajibu

kpwa kumeza mimea ya mtsere, uchi muphya wa zabibu na mafuha.

Iyo nayo indajibu

kpwa kulavya mavuno manono, yani Jeziriili.2:22 Tsi nono yenye rutuba nkuihwa Jeziriili.

²³2:23 Arumi 9:25; 1 Petero 2:10Nami nindaaimarisha kahi ya yo tsi

kpwa ajili yangu mwenye.

Nindaaonera mbazi hinyo nrioamba taaonereka mbazi.

Na hara nrioamba kukala si atu angu,

nindaambira, ‘Mwimwi ndimwi atu angu,’ nao andaamba, ‘Uwe u Mlungu wehu.’ ”

Hosea anakombola mchewe

¹Mwenyezi Mlungu wagomba nami achiniamba, “Phiya ukamuonyese tsona mendzwa mcheo dzagbwe ni mzindzi na phapho aripho ana mlume wanjina. Mmendze dza viratu Mwenyezi Mlungu aamendzavyo Aiziraeli, dzagbwe analunga milungu yanjina, kpwa kumendza kulavya magande ga zabibu za kuuma kpwa vizuka.” ²Phahi náphiya nchendamriphira vipande kumi na vitsano vya feza na kilo gana mwenga na mirongo mitsano za shayiri tu. ³Nami nchimuamba, “Vivi ni usagale phapha na mimi siku nyinji bila kuzinga, bila kulala na mlume wanjina wala mimi.”

⁴Mana nyo Aiziraeli andakala siku nyinji bila kukala na mfalume au chilongozi, bila sadaka, bila nguzo ya kuvoywa, bila chisibao wala chizuka. ⁵Badaye Aiziraeli andauya na kumuendza Mwenyezi Mlungu, Mlungu wao na mfalume wao wa chivyazi cha Daudi. Andakpwedza kpwa Mwenyezi Mlungu kpwa kuogopha na kulunga unonowe hipho siku za mwisho.

Makosa ga Aiziraeli

¹Mwi Aiziraeli phundzani neno ra Mwenyezi Mlungu.

Mwenyezi Mlungu ana malau na mwi msagalao tsi ihi

mana tamuna uaminifu wala mbazi

chisha tamummanya Mlungu.

²Kazi yenu ni kulani, kuchenga, kuolaga,

kuiya na kuzinga.

Atu ahendao mambo chimabavu,

hipha na hipha anaolaga ayawao.

³Kpwa sababu hiyo, yo tsi indauma

na osi asagalao mumo anaonda.

Nyama a tsakani,

nyama a mapha

hadi ngʼonda a baharini anafwa.

⁴Ela msilaumiane

au kushitakiana

mana mimi nina malau na nyo alavyadzi-sadaka.

⁵Mundakpwala mutsi na usiku,

mwimwi phamwenga na manabii genu.

Na yo tsi ya Iziraeli ambayo ndiyo mayo yenu, ndaiangamiza.

⁶Atu angu anaangamika kpwa kukosa marifwa.

Kpwa kukala mwakahala marifwa,

mimi nami nkakukahalani mkale alavyadzi-sadaka angu.

Kpwa sababu mwayala shariya za Mlungu wenu,

nami piya nindayala ana enu.

⁷Alavyadzi-sadaka arivyokala anaenjerezeka,

ndivyo arivyoenderera kunihendera dambi.

Nami ndabadilisha ishima yao nono na waibu.

⁸Aho nkurya sadaka za dambi za atu angu,

kpwa hivyo analonda nyo atu aenderere kuhenda dambi

ili nao aenderere kurya.

⁹Vyo ndivyotiya adabu nyo atu, ndivyo ndivyotiya adabu nyo alavyadzi-sadaka,

osi ndaatiya adabu.

Nindaariphiza kpwa ajili ya mahendo gao mai.

¹⁰Andarya mtalo wao wa sadaka ela taandamvuna,

andahenda umalaya, ela taandavyalana

kpwa kukala akamricha Mwenyezi Mlungu,

¹¹na akadzitiya umalaya, uchi mufu na uchi muitsi

ambao nkuusa ufahamu.

¹²Atu angu anapiga mburuga kula kpwa vizuka vya mihi

nao nkumanyiswa maneno ni fwimbo.

Roho ya umalaya ikaangamiza

nao akamricha Mlungu wao.

¹³Aho analavya sadaka dzulu ya virere vya myango,

na kulavya sadaka za kuochwa vidzangoni,

tsini ya mihi mikulu dza mialoni, milibuwa na miela,

kpwa kukala ina pepho nono.

Kpwa hivyo ana enu achetu anahenda umalaya,

na akaza ana enu anazinga.

¹⁴Sindaatiya adabu ana enu achetu ahendao umalaya,

wala akaza ana azingao,

mana nyo alume enye anazinga na malaya,

na kulavya sadaka na malaya a nyumba za kuabudu milungu.

Phahi mwimwi atu msiokala na ufahamu

mundabanangbwa-banangbwa.

Atu a Juda anakahazwa kuiga Aiziraeli

¹⁵Mwi atu a Iziraeli, dzagbwe munazinga,

msihende atu a Juda akakala na makosa.

Musiphiye mudzi wa Giligali4:15 Giligali na Bethi-Aveni kala ni midzi iriyokala Juda.

wala msiambuke kuphiya Bethi-Aveni,

na msiape mukaamba, “Dza Mwenyezi Mlungu arivyo moyo.”

¹⁶Atu a Iziraeli ana likakado

dza ndama mwenye likakado.

Vino ye Mwenyezi Mlungu anawezadze kuarisa

dza mwana ngʼondzi kahi ya mjina mnono?

¹⁷Richanani na atu a Efuraimu,4:17 Efuraimu ni dzina sawa na Aiziraeli.

mana aho akagbwirana na vizuka.

¹⁸Nkunwa uchi na achilewa nkuhenda umalaya,

aho anamendza waibu kuriko ishima yao.

¹⁹Andaphepheruswa ni chikulukulu,

nao andaphaha waibu kpwa kulavira sadaka vizuka.

Makosa ga vilongozi a Iziraeli

¹Mwi alavyadzi-sadaka phundzani!

Hegani masikiro, mwi Aiziraeli!

Phundzani mwi atu a nyumba ya mfalume!

Mana hukumu ihi ni yenu;

Mana mukakala muhego ko Mizipa,

na nyavu chizohegbwa ko Tabori.

²Aasi akaenjereza kuolaga kpwao,

ela osi nindaarekebisha.

³Atu a Efuraimu naamanya

na atu a Iziraeli kpwangu taaweza kudzifwitsa.

Aefuraimu anahenda umalaya,

Aiziraeli akadzinajisi.

⁴Mahendo gao gakaagbwira ngi

hadi taaweza kumuuyira Mlungu wao.

Mana yo roho ya umalaya i mwao mioyoni,

nao taammanya Mwenyezi Mlungu.

⁵Kudzikarya kpwa Aiziraeli ni ushaidi kukala ana makosa,

Aiziraeli na Aefuraimu andakpwala dambi zao,

na atu a Juda andakpwala phamwenga nao.

⁶Andamuendza Mwenyezi Mlungu kpwa kumlavira sadaka za mifugo yao

ya mangʼondzi na ngʼombe,

ela taandamuona

mana iye akaaricha.

⁷Taakarire aaminifu kpwa Mwenyezi Mlungu,

mana avyala ana wa vuweni.

Andaangamiza phamwenga na minda yao

wakati wa sikukuu za kulumbwa kpwa mwezi.

Viha vya Iziraeli na Juda

⁸Pigani gunda ko Gibeya,

na mpige tarumbeta ko Rama.

Pigani kululu za viha ko Bethi-Aveni

hulongozeni kuphiya vihani mwi atu a Benjamini.

⁹Siku ya kutiywa adabu,

Efuraimu indakala gandzo.

Ndatangazira mbari za Iziraeli

go ndigokala kpweli.

¹⁰Vilongozi a tsi ya Juda

akakala dza atu asengezao miphaka.

Nami ndaatsukirirwa

na tsukizi zangu zindakala dza mafuriko kpwao.

¹¹Aefuraimu akaonerwa,

hukumu ikaalumiza sana.

Mana akala na chadi

cha kulunga mambo gasigo na mana.

¹²Nindabananga nyo Aefuraimu dza vingʼonyo vibanangavyo matsere

nindabananga atu a Juda dza lutswa ribanangavyo nyumba.

¹³Aefuraimu ariphoona ukongo wao,

na atu a Juda ariphoona vironda vyao,

Aefuraimu aphiya tsi ya Ashuru,

achendavoya msada kula kpwa mfalume mkpwulu.

Ela iye kaweza kukulagulani,

wala kukuphozani vironda vyenu.

¹⁴Mana nindakala dza simba kpwa atu a Efuraimu

na dza mwana simba kpwa atu a Juda.

Ndaamwamula-mwamula vipande-vipande mimi mwenye, chisha niuke,

nindaaguruta niphiye nao na taphana ndiyeweza kuativya.

¹⁵Chisha nindauya kpwangu makaloni

hadi ndiphogaya kpwa ajili ya dambi zao na kukubali makosa gao.

Nao andaniendza,

kahi ya kugaya kpwao, andaniendza kpwa chadi.

Aiziraeli anarema kutubu

¹“Hebu ndzoni humuuyireni Mwenyezi Mlungu,

mana wahumwamula-mwamula

ela andahuphoza.

Akahupiga hata akahutiya vironda,

ela andahufunga mademu.

²Bada ya siku mbiri andahuuyiza hurivyokala

siku ya hahu andahuunula,

ili husagale mbereze.

³Nahummanyeni Mwenyezi Mlungu,

nahuhendeni chadi cha kummanya iye;

naye kpwa kpweli andahusengerera bila kukosa

dza vira ligundzu redzavyo bila kukosa.

Iye andahuedzera dza mvula ya mwaka,

andahuedzera dza mvula ya vuri, itiyayo chinemi tsi.”

⁴Ela Mwenyezi Mlungu anaamba,

“Nikuhendeni utu wani mwi atu a Efuraimu?

Nikuhendeni utu wani mwi atu a Juda?

Mendzwa yenu ni dza guro,

nkuuma dza manena ga ligundzu.

⁵Ndiyo mana nkahuma manabii angu

na ujumbe wa uamuli na kubananga.

Kpwa kukala uamuli wangu uredza

dza mwanga.

⁶6:6 Mathayo 9:13; 12:7Mana naaza mkale na mendzwa isiyosika,

si kunilavira sadaka.

Nalonda mmanye Mlungu,

kuriko kunilavira sadaka za kuochwa.

⁷Aho avundza chilagane dza arivyohenda Adamu,

nao taayakala aaminifu kpwangu.

⁸Giliadi ni mudzi wa atu ayi

na aolagadzi.

⁹Dza viratu anyangʼanyi aoteavyo atu,

ndivyo ahendavyo nyo alavyadzi-sadaka.

Nyo alavyadzi-sadaka anaolaga atu ko njira ya kuphihira mudzi wa Shekemu.6:9 Shekemu kala ni mudzi ambao atu kala achiphiya kpwendaabudu Mlungu.

Aho anahenda uyi usiowezekana.

¹⁰Nikaona utu uyi sana

kahi ya atu a Iziraeli.

Atu a Efuraimu anahenda umalaya,

Aiziraeli akadzitiya najisi.

¹¹Ela mwimwi atu a Juda

mwapangirwa wakati wenu wa kuhukumiwa dza uratu wa kuvuna.

Wakati ndiphouyizira kuongokerwa atu angu.”

Aiziraeli anamendza kuhenda mai

¹Chila nilondapho kuphoza Aiziraeli,

naona dambi za Aefuraimu

mahendo mai ga Samariya ganaikpwa wazi.

Kpwa mana anamendza kugomba handzo,

aivi anavundza nyumba za atu na kuiya,

akora anafuta atu vitu mo njira-njira.

²Ela taaririkana mwao mioyoni,

kukala mahendo gao mai gosi mino nagamanya.

Vivi mahendo gao mai gakaazunguluka,

nami nagaona.

³Anamuhenda mfalume wao ahamirwe ni uyi wao

na kuhamira akulu kpwa handzo rao.

⁴Atu aho osi ni azindzi,

ni dza dziko ra kuochera mikahe,

ambaro ye mjiti wa mikahe kana haja ya kuukusanyira

hangu kukanda unga hadi unga uumuke.

⁵Siku ya sikukuu ya mfalume wehu

vilongozi nkunwa uchi wa zabibu hata akakala akalewa,

mfalume achinwa phamwenga na atu enye matani.

⁶Mioyo yao inaaka dza moho wa kujitira mikahe,

nao anapanga kuchenga atu,

tsukizi zao nkuokoha usiku wosi,

na ligundzu zikaonekana dza moho mkali.

⁷Atu osi a moho dza dziko ra kuochera mikahe,

nao anaangamiza vilongozi ao.

Akaolaga afalume aho osi,

na taphana hata mmwenga anivoyaye nimterye.

⁸Efuraimu akadzitsanganya na atu a mataifa ganjina,

Efuraimu akakala dza mkpwahe uchioivwa uphande mmwenga.

⁹Ajeni akahumira mkpwotsewe,

naye mwenye kamanya.

Akaandza kutsakala,

ela ye mwenye kana amanyaro.

¹⁰Na kudzikarya kpwa Aiziraeli ni ushaidi chinyume chao,

ela phamwenga na gago,

taamuuyira Mwenyezi Mlungu, Mlungu wao,

wala kumuendza.

¹¹Atu a Efuraimu akakala azuzu dza njiya

asiokala na dzuphi.

Mara anaendza msada kula Misiri,

kano kula Ashuru.

¹²Wakati anaphiya, nindaahegera nyavu,

niagbwire dza nyama a mapha.

Nindaatiya adabu

kpwa mahendo gao mai.

¹³Ni shaka rao, mana akanichimbira.

Andaangamizwa,

mana aniasi.

Ningeakombola,

ela anagomba handzo kunihusu.

¹⁴Taaniririra kula mwao mioyoni,

ela anamwagikpwa ni matsozi mwao vitandani,

anadzikata-kata wakati anavoya milungu ya chijeni

ili aphahe mtsere na uchi muphya

nao akanilozera kogo.

¹⁵Dzagbwe náafundza na nchiatiya nguvu

ela vivi ananipangira njama mbii.

¹⁶Aho nkugaluka kuendza msada ela si kpwa iye Ariye Dzulu Kuriko Vyosi

nao taana mana dza uha uchiovundzika.

Akulu aho andaolagbwa na upanga

kpwa maneno gao ga kudzikarya,

gaga gandaahenda atsekpwe,

kahi ya tsi ya Misiri.

Mwenyezi Mlungu anahukumu Aiziraeli kpwa kuabudu vizuka

¹Piga gunda! Umanyise atu kukala

adui aredza chinyume cha atu a nyumba ya Mwenyezi Mlungu dza kozi

mana akavundza chilagane changu

na akaasi shariya zangu.

²Aiziraeli ananiririra na kuamba,

“Swiswi hunamanya kukala uwe u Mlungu wehu.”

³Ela Aiziraeli andazoreswa ni maadui,

kpwa sababu akakahala kuhenda manono.

⁴Anatawaza afalume bila ya kunivoya ruhusa,

achitsambula vilongozi bila ya kunimanyisa.

Ahumira feza na zahabu zao kutengeza vizuka

utu undioahenda aangamizwe.

⁵Chizuka chenu cha ndama nkachimena, mwimwi atu a mudzi wa Samariya,

nami nkakutsukirirwani.

Mundaenderera kukala akolo hadi rini?

⁶Chizuka chichi chatengezwa Iziraeli,

chatengezwa ni fundi wenu,

nacho si Mlungu.

Chizuka cha mwana ndzau cha Samariya,

chindavundzwa vipande-vipande.

⁷Kpwa kukala aphanda phepho,

andavuna chikulukulu.

Mimea yao taindavyala bii

kpwa vivyo taindaavyarira chakurya.

Na hata ichivyala,

chisha indariwa ni ajeni.

⁸Atu a Iziraeli andamizwa ni mataifa ganjina,

aho ni chitu sicho mana dza chidzaya.

⁹Aho akakala dza foro atangaye-tangaye macheye,

mana akota kuphiya Ashuru.

Aefuraimu akadziguza kpwa azembe.

¹⁰Dzagbwe adziguza kpwa mataifa ganjina ili aphahe msada

vivi nindaakusanya phamwenga.

Nao andaandza kuphunguka

kpwa kuonerwa ni mfalume mkpwulu.

¹¹Aefuraimu adzenga mwatu munji mwa kulavira sadaka za kuusira dambi,

mwatu mumo mwa kulavira sadaka mukakala mwatu mwa kuhendera dambi.

¹²Dzagbwe naandikira mambo manji kuhusu shariya zangu,

aho anaziona avi taziahusu.

¹³Ananilavira sadaka

na kurya zo nyama za sadaka

ela mimi tazinihamira.

Mwenyezi Mlungu andatambukira makosa gao,

na aatiye adabu kpwa ajili ya dambi zao,

nao andauya Misiri.

¹⁴Aiziraeli akayala muumba wao

na kudzenga madzumba ga chifalume.

Atu a Juda adzenga midzi minji yenye ngome.

Ela yo midzi yao ndaitiya moho,

nao undaocha ngome zao tsetsetse.

Hosea anatangaza kutiywa adabu kpwa Aiziraeli

¹Mwi Aiziraeli musihererwe,

musitine-tine kpwa raha dza atu a mataifa ganjina asiomanya Mlungu.

Mwimwi simwi aaminifu kpwa Mlungu wenu,

munamendza maripho ga umalaya

kahi za mwatu mwa kuwagira.

²Mwatu mwa kuwagira na mwatu mwa kuminyira zabibu tamundarisa atu bii.

Uchi muitsi wa zabibu taundatosha tsetsetse.

³Taandakala tsona kahi ya yo tsi ya Mwenyezi Mlungu.

Aefuraimu andauya Misiri,

andarya chakurya chiricho najisi hiko tsi ya Ashuru.

⁴Taandamlavira Mwenyezi Mlungu sadaka ya uchi,

taandamuhamira kpwa sadaka zao.

Sadaka zao zindakala dza chakurya cha hangani,

chila achiryaye andakala najisi.

Chakurya hichi chindakala cha kuamvunisa enye,

tachindatiywa nyumbani mwa Mwenyezi Mlungu.

⁵Mundahendadze siku ya sikukuu zirizopangbwa?

Mundahendadze yo siku ya sikukuu iriyopangbwa ni Mwenyezi Mlungu?

⁶Hata akatiya, asibanangbwe ni Aashuru,

chisha andakusanywa ni Amisiri,

na andazikpwa ko Memufisi.

Vitu vyao vya feza vindalingbwa-lingbwa ni miya,

miya indamera na kubwiningiza mahema gao.

⁷9:7 Luka 21:22Siku za kutiywa adabu zikatimu,

siku za kuvuna urichophanda ikafika.

Aiziraeli naagamanye gago.

Nabii munamuona ni mzuzu,

na mutu alongozwaye ni roho munamuamba ana koma.

Kpwa sababu ya dambi zenu nyinji

mkummena sana.

⁸Iye nabii phamwenga na Mlungu wangu,

ndiye mrindzi wa atu a Efuraimu.

Ela akahegbwa dza nyama wa mapha chila njira atsupirayo,

akamenwa hata kahi ya nyumba ya Mlunguwe.

⁹9:9 Aamuli 19:1–30Azidi kuhenda mai

dza akare aho arivyohenda hiko Gibeya.

Mlungu andagatambukira go makosa gao,

naye andaatiya adabu kpwa ajili ya dambi zao.

Maripho ga dambi ya Iziraeli

¹⁰9:10 Isabu 25:1–5Nriphoaona Aiziraeli,

yakala ni dza kuona zabibu ko weruni.

Nriphoaona akare enu,

yakala dza kuona tini za kpwandza dzulu ya mtini.

Ela ariphofika Baali-Peori,

adzitenga kpwa ajili ya Baali, utu wa waibu,

achikala tsukizo dza hicho chizuka arichochimendza.

¹¹Ishima ya Efuraimu indauruka iuke dza nyama wa mapha.

Taphandagbwirwa mimba, wala kutsukulwa mimba, wala kuvyalwa ana!

¹²Hata akarera anache,

chisha mino ndaaolaga osi.

Shaka rao, pho ndiphoaricha.

¹³Nikaona atu a Efuraimu,

atu ariokala phatu phanono dza Tiro.

Ela Aefuraimu andatuluza ana aho

amphirikire muolagadzi.

¹⁴Ee Mwenyezi Mlungu

nikuvoyeni cha kukala uaphe atu hano?

Aphe ndani za kuvoromosa

na nyaho zisizo na maziya.

Uamuli wa Mwenyezi Mlungu kpwa Iziraeli

¹⁵“Kpwa uyi wao wosi ariouhenda hiko Giligali,

nami náandza kuamena kuko.

Kpwa ajili ya mahendo gao mai

nindaatuluza mwangu nyumbani.

Sindaamendza tsona,

vilongozi aho osi ni aasi.

¹⁶Aefuraimu akapigbwa,

mizi yao ikauma,

taandavyala tsona matunda.

Na hata achivyala ana,

chisha nyo ana aho aamendzao nindaaolaga.”

¹⁷Mlungu wangu andaakahala

kpwa kukala taayamphundza.

Andakala atu a kudengereka kahi za mataifa.

Mwenyezi Mlungu ndivyo hukumu Aiziraeli

¹Aiziraeli akala dza mzabibu uriowanda vinono,

uvyalao zabibu kpwa unji.

Dza zabibu zirivyoenjerezeka,

ndivyo arivyoenjereza mwatu mwa kulavira sadaka.

Dza tsi yao irivyoenjerezeka kukala tajiri,

ndivyo arivyozidi kupamba zo nguzo za kuabudira.

²Mioyo yao ikaodzala handzo,

sambi ni agaye kpwa ajili ya dambi zao.

Mwenyezi Mlungu andavundza-vundza mo mwatu mwao mwa kulavira sadaka,

na abanange-banange zo nguzo zao anazoziabudu.

³Chisha andaamba, “Swino tahuna mfalume,

kpwa kukala tahuyamuogopha Mwenyezi Mlungu.

Hata kala hunaye ye mfalume,

angehuhenderani?”

⁴Anadzigombera maneno mahuphu

na kuapa handzo,

na kuika vilagane asivyovitimiza

ndiyo mana malau ganaenjerezeka

dza kpwekpwe ya mwambanyama kpwenye munda.

⁵Atu a Samariya andakakama

kpwa chizuka cha ndzau cha Bethi-Aveni.

Atue andarira,

hata alavyadzi-sadaka ariochiabudu nao andarira,

aho ariochiabudu kpwa yo ngumaye,

andarira mana yo ngumaye yauswa.

⁶Chizuka chicho chindahalwa chiphirikpwe Ashuru

chikakale maripho ga kodi kpwa mfalume mkpwulu.

Atu a Efuraimu10:6 Efuraimu ni dzina ranjina ra Iziraeli. andaphaha waibu

na Aiziraeli andagbwirwa ni haya kpwa cho chizuka chao cha muhi.

⁷Atu a Samariya na mfalume wao

andaunulwa dzulu-dzulu dza chiphungo chikuluzwavyo ni madzi.

⁸10:8 Luka 23:30; Maono 6:16Mo mwatu mwa dzulu mwa kuvoya vizuka ko Aveni mundabanangbwa,

mana kuko ndiko Aiziraeli ahendako dambi.

Miya na vidunga-dunga vindamera na vilingelinge mo mwatu mwa dzulu mwa kulavira sadaka,

ndipho atu andaambira myango, “Hufwinikeni,”

na vidzango, “Hugbwerereni.”

Uamuli wa Mwenyezi Mlungu kpwa Iziraeli

⁹10:9 Aamuli 19:1–30Mwenyezi Mlungu achienderera kugomba achiamba, “Hangu wakati wa Gibeya hadi sambi mwi Aiziraeli munaenderera kuhenda dambi,

Mundaolagbwa vihani ko Gibeya mwi atu ayi.

¹⁰Pho ndiphokata shauri nindakutiyani adabu,

mataifa ganjina gandaungana gakupigeni

nao andakufungani silisili kpwa sababu ya dambi zenu nyinji.

¹¹“Efuraimu ni ndama yofundzwa

na imendzayo kuwaga mtsere,

ela sambi singoye nono

nindaifunga gogolo.

Ndamfunga Efuraimu niuke naye,

Juda ni turi arime,

Jakobo ni lazima arime mwenye.

¹²10:12 Jeremia 4:3Dziphandireni haki,

mvune mendzwa isiyosika

Tengezani mioyo yenu

mana uhu ni wakati wa kumuendza Mwenyezi Mlungu,

hadi edze akumwagireni mvula ya haki.

¹³Ela mwi mwaphanda uyi

muchivuna uyi

mkariphiwa kulengana na handzo renu,

kpwa kukuluphira mkpwotse wenu enye

na asikari enu anji.

¹⁴Kpwa hivyo kundagbwa viha kahi ya atuo,

ngome zenu zindabomolwa

dza viratu mfalume Shalimani arivyobananga mudzi wa Bethi-Aribeli wakati wa viha,

ambapho achetu na ana ao abundwa na photsi.

¹⁵Mwimwi atu a Betheli namwi mundahenderwa dza vivyo,

kpwa sababu ya uyi wenu munji.

Siku ya yo hukumu ichifika, mfalume wa Iziraeli andaolagbwa.”

Mendzwa ya Mlungu kpwa Aiziraeli

¹11:1 Kutsama 4:22; Mathayo 2:15Iziraeli ariphokala achere mwanache, náammendza,

námuiha mwanangu kula Misiri.

²Ela nirivyoenderera kumuiha,

ndivyo arivyoenderera kuniricha.

Atu angu aenderera kulavira vizuka vya Baali sadaka

na kufukizira vizuka mavumba.

³Tsona ndimi nriyeafundza Aefuraimu kunyendeka dza mwana,

na nchiagbwira mikono nchialongoza.

Ela taamanyire,

kukala ndimi nriyeaphoza.

⁴Mimi naalongoza na nyugbwe za mbazi za chibinadamu

naafunga na mendzwa

nchiausira magogolo garigokala mwao singoni,

nchizama nchiarisa dza mwana.

⁵Kpwa kukala arema kuniuyira mimi,

andauya Misiri,

nao andatawalwa ni Aashuru.

⁶Kundagbwa viha kpwenye midzi yao,

vindavundza-vundza maryango makulu na magbwamage ga kufungira,

na kubananga mipango yao.

⁷Atu angu anaenderera kuniricha,

dzagbwe ananiiha Ariye Dzulu,

ela kandaakubali.

⁸11:8 Kumbukumbu 29:23Nkale ndaweza kukurichani mwi atu a Efuraimu?

Ndawezadze kukulavyani mwi atu a Iziraeli?

Vino nindaweza kukuhenda dza mudzi wa Adima?

Ndawezadze kukuhenda dza mudzi wa Seboimu.

Nkagalukpwa ni moyo,

nkedzerwa ni mbazi.

⁹Sindahenda kulengana na zo tsukizi zangu nyinji,

wala kuangamiza tsona atu a Efuraimu.

Mana mimi ni Mlungu, si mwanadamu,

mimi Ndimi Mtakatifu kahi yenu,

nami sindakpwedzerani na tsukizi.

¹⁰Andamlunga Mwenyezi Mlungu,

iye andanguruma dza simba,

na angurumapho

anae andakpwedza kula mtswerero wa dzuwa kuno anakakama.

¹¹Andauya kuno anakakama

dza nyama wa mapha kula Misiri,

na dza njiya kula tsi ya Ashuru.

Mimi ndaauyiza mwao midzini

mimi Mwenyezi Mlungu nkaamba.

¹²Atu a Efuraimu akanizunguluka na handzo,

atu a Iziraeli ikanizunguluka na kuchenga,

ela Juda ndiye anyendekaye phamwenga na Mlungu.

Juda ndiye ambaye achere muaminifu kpwa iye Ariye Mtakatifu.

Mwenyezi Mlungu andaatiya adabu atue kpwa dambi zao

¹Atu a Efuraimu ni dza mutu adzirisaye phepho,

ni dza mutu asindaye kuzoresa phepho ra mlairo wa dzuwa.

Akaenjereza handzo na kuhumira mabavu.

Anaika chilagane na Ashuru,

na kuphirika mafuha ga zaituni Misiri.

²Mwenyezi Mlungu ana lau na Juda.

Andamtiya adabu Jakobo kulengana na tabiyaze

na kumripha kulengana na mahendoge.

³12:3 Mwandzo 25:2612:3 Mwandzo 32:24–26Ariphokala ndanini mwa nine wamgbwira mwanáo jimbe

na ariphokala mutu mzima waminyana na Mlungu.

⁴12:4 Mwandzo 28:10–22Waminyana na malaika achimturya.

Achirira na achimvoya ye malaika amʼbariki.

Waonana na Mlungu hiko Betheli,

na kuko Mlungu achigomba naswi.

⁵Iye ni Mwenyezi Mlungu, Mlungu wa majeshi,

Mwenyezi Mlungu ndiro dzinare.

⁶Kpwa hivyo kpwa msada wa Mlungu wenu, muuyireni,

onyesani mendzwa na muhende ga haki.

Mkuluphireni Mlungu chila wakati.

⁷Achuzi anahumira vipimo vya wiivi dza atu a Akanani,

anamendza kuiyira atu.

⁸Atu a Efuraimu anadzikarya kpwa kuamba,

“Mimi ni tajiri, na utajiri uhu nauendza mwenye.

Kahi ya shuuli zangu zosi zophahira utajiri taphana awezaye kuamba nina kosa,

wala awezaye kuniamba nina dambi.”

⁹12:9 Alawi 23:42–43Mimi, Ndimi Mwenyezi Mlungu, Mlunguo

niriyekutuluza kula tsi ya Misiri.

Nindakuhenda usagale mahemani tsona

dza viratu uhendavyo wakati wa sikukuu ya vibanda.

¹⁰Mimi nágomba na manabii

nchiaonyesa ruwiya nyinji,

na kutsupira aho nchikuambirani ndarira.

¹¹Atu a Giliadi ni ayi!

Nao taana mana!

Analavya sadaka za ndzau ko Giligali,

Mwatu mwao mwa kulavira sadaka mundakala dza tsumbi za mawe,

kpwenye munda uchiorimwa.

¹²12:12 Mwandzo 29:1–20Jakobo wachimbirira jimbo ra Aramu,

kuko, ye Iziraeli wahenda kazi ili aphahe mchetu,

waphaha mchetu kpwa kurisa mangʼondzi.

¹³12:13 Kutsama 12:50–51Mwenyezi Mlungu waatuluza Aiziraeli kula Misiri kutsupira kpwa nabii,

na kutsupira nabii achiarinda.

¹⁴Atu a Efuraimu amtsukiza Mwenyezi Mlungu

kpwa sababu iyo Mlungu andaarichira makosa gao ga kumwaga milatso,

chisha aariphe sawa-sawa na chibero chao.

Tsukizi kali za Mwenyezi Mlungu kpwa Aiziraeli

¹Aefuraimu kala achigomba, mbari zanjina zinakakama,

kala achiishimiwa ko Iziraeli,

ela ariphohenda makosa ga kumuabudu Baali, afwa.

²Na vivi anazidi kuhenda dambi.

Anahumira feza zao kudzitengezera vizuka,

anadzitengezera vizuka vya kupambwa vinono sana,

na zosi ni kazi za mafundi mangungu.

Kazi yao ni kuamba,

“Aho nkulavya atu dza sadaka kpwa vizuka,

na kudonera vyo vizuka vya ndama.”

³Kpwa hivyo aho andakala dza kunje ra ligundzu,

andakala dza manena gaumago mara mwenga.

Andakala dza wiswa uphepheruswao ni phepho kula phatu pha kuwagira,

au andakala dza mosi utulukao na dirishani.

⁴Mimi, ndimi Mwenyezi Mlungu, Mlungu wenu

nriyekutuluzani kula tsi ya Misiri.

Msikale na mlungu wanjina isiphokala mimi,

mana taphana muokoli wanjina isiphokala mimi.

⁵13:5 Kumbukumbu 8:11–17Mimi ndimi nriyekutundzani ko weruni,

kahi ya tsi ya dzuwa kali.

⁶Naarisa hadi achimvuna,

ela ariphomvuna tu, aandza kudziunula,

nao achimʼyala.

⁷Phahi nindaashambuliya dza simba,

Nindaaotea njirani dza tsui.

⁸Nindaavamia dza dubu achiyefutwa anae,

nindaahula vifuwa vyao.

Na kuko nindaavwamukira dza simba,

nindaamwamula-mwamula dza nyama wa tsakani.

⁹Uwe Iziraeli ndakuangamiza,

mana u chinyume changu,

mimi niwezaye kukuterya.

¹⁰13:10 1 Samueli 8:5–6A kuphi ye mfalume akutivye?

Na nyo vilongozio kahi ya yo midziyo yosi akuphi akukanire?

Aho murioalonda mchiamba,

“Huphe mfalume na vilongozi.”

¹¹13:11 1 Samueli 10:17–24; 15:26Phahi nakuphani mfalume wakati nkatsukirwa,

na kahi ya tsukizi zangu, ye mfalume nchimuusa.

¹²Uyi wa Efuraimu unatambukirwa

na dambize zikaandikpwa.

¹³Utsungu wa kudzivugula undamgbwira,

ela iye ni dza mwana mzuzu,

ambaye wakati wa kuvyalwa ukafika

ela ye kalonda kutuluka kula ndanini.

¹⁴13:14 1 Akorintho 15:55Sindaakombola na nguvu za kuzimu,

wala kuativya na chifo.

We chifo, utsunguo ukuphi?

We kuzimu, kubanangako kuphaphi?

Sindaaonera tsona mbazi.

¹⁵Dzagbwe ndiye chiyeongokerwa kuriko nduguze,

Mwenyezi Mlungu andahuma phepho kula mlairo wa dzuwa

naro rindapiga kula weruni.

Pulaze za madzi zindauma,

visimavye vindauma.

Nyumbaze za kuikira hazina zindavundzwa

na vituvye vya samani vindahalwa.

¹⁶Atu a Samariya andatiywa adabu kpwa ajili ya makosa gao,

kpwa sababu amuasi Mlungu wao.

Aho andaolagbwa na upanga

ana aho atsanga andakatwa-katwa vipande-vipande

na achetu aho enye mimba andaahulwa.

Hosea anaambira Aiziraeli atubu

¹Mwimwi Aiziraeli, muuyireni Mwenyezi Mlungu, Mlungu wenu,

kpwa kukala dambi zenu ndizo chizokuhendani mugbwe.

²Muuyireni Mwenyezi Mlungu,

ndzoni mumvoye mumuambe,

“Huswamehe dambi zehu zosi.

Na uhuphokere kpwa mbazizo

ili hukulavire sadaka za togo kpwa kanwa zehu.

³Ashuru taandahutivya,

wala farasi ehu a viha taandahuterya.

Vizuka hurivyovitengeza enye kpwa mikono yehu,

tahundaviiha tsona milungu

kpwa kukala uwe ukuonera mbazi anachiya.”

⁴Mwenyezi Mlungu anaamba,

“Nindaaphoza ko kukosa kpwao uaminifu,

nindaamendza bila aho kunihendera utu.

Mana sindaatsukirirwa tsona.

⁵Mimi nindakala dza manena

kpwa Aiziraeli.

Aho andabumula dza maruwa,

mizi yao indagota dza mierezi ya Lebanoni.

⁶Mitse yao indakula

unono wao undakala dza wa mizaituni,

na kungu yao nono dza mierezi ya Lebanoni.

⁷Atu angu andauya asagale tsona salama phangu chivurivurini,

andapwipwita vinono dza tsere.

Andabumula maruwa dza mzabibu,

chisha andamanyikana dza uchi wa zabibu kula Lebanoni.

⁸Mwimwi atu a Efuraimu, msikale na vizuka tsona,

nindajibu mavoyo genu na nkumanyirireni.

Mimi ni dza muhi wenye makodza maitsi,

mimi ndiye ninayekuhendani muvyale matunda.”

⁹Mutu yeyesi ariye na ikima naaelewe,

na hiye awezaye kutambuwa naamanye maneno gaga,

mana njira za Mwenyezi Mlungu ni za haki,

na enye haki andazilunga,

ela aasi andakpwala agbwe mo njirani.