Habakuki

Chitabu cha

HABAKUKI

Tanga mbere

Hichi ni chitabu cha unabii choandikpwa ni Habakuki. Habakuki manage ni “Kugandamira chilaga.” Habakuki mwenye waishi wakati atu a Juda kala akahenda mai miaka ya mwisho-mwisho ya karine ya sabaa kabila ya Jesu kuvyalwa. Manabii Jeremia na Zefania piya aishi wakati uho.

Habakuki watabiri kukala Mlungu andahumira atu a Babeli kutiya adabu atu a Juda kpwa mahendo gao mai. Nabii hiyu wayugika na vira ambavyo Mlungu anaweza kuhumira atu asiomanya Mlungu kuhenda alondavyo. Piya waona vira Mlungu adzionyesavyo wazi kukala ana nguvu.

Atu amuogophao Mlungu naasiogophe hali anazotsupira ela ni amkuluphire mana ndiye muamuli wa haki.

Maelezo muhimu kpwa chifupi

Habakuki analalama na Mwenyezi Mlungu anamjibu 1:1—2:20

Mavoyo ga Habakuki 3:1–19

¹Huno ndio ujumbe ambao Mwenyezi Mlungu wamfwenurira nabii Habakuki.

Habakuki analalama

²Vino we Mwenyezi Mlungu, nikuririre hadi rini

ndipho unisikire?

Ninakota kululu uhutivye na fujo,

ela kuhutivya.

³Kpwa utu wani unihende nione uyi na nigaye?

Atu a kubananga na a fujo a mbere zangu,

kuna kuheha na kukosana vivyo kpwa vivyo.

⁴Kpwa sababu iyo shariya taina nguvu tsona

na haki tailungbwa.

Ayi akaaturya ario na haki,

kpwa hivyo haki taihendeka.

Mwenyezi Mlungu anamjibu Habakuki

⁵1:5 Mahendo 13:41Hebu tsuphani matso mlole go mataifa.

Mundamaka na muangalale,

mana ndahenda dzambo siku zizi zenu,

ambaro hata mchiambirwa tamundamuamini.

⁶1:6 2 Afalume 24:2Mana lolani, nahenda taifa ra Akalidayo rikale na nguvu,

taifa siru na renye more.

Hiro rindatsupa kahi-kahi za tsi yosi

rivamie na kuhala makalo gasigokala gao.

⁷Ni atu a kutisha na kuogofya

aho nkuuamula kuhenda alondavyo kpwa kudzikarya kpwao.

⁸Farasi aho ana mairo kuriko tsui,

tsona ni asiru kuriko mabawa.

Dzagbwe anajeshi aho akuhumira farasi ala kure,

nkuphiya mairo dza nderi aonapho nyama wa kurya.

⁹Osi aredza na lengo ra kuhenda fujo.

Akadina kuphiya mbere dza phuto ra mlairo wa dzuwa.

Andahala mateka anji dza mitsanga.

¹⁰Aho nkuafyorera afalume

na kunyetera vilongozi ao.

Midzi yosi yenye ngome nkuitseka,

na akaidzengera tsulu za mitsanga akaiteka.

¹¹Hinyo nkutsupa mairo dza phepho,

ela akahenda dambi mana mkpwotse wao ukakala avi ndio mlungu wao.

Habakuki analalamika kano ya phiri

¹²Ela uwe Mwenyezi Mlungu,

Mtakatifu wangu, u Mlungu wa kare na kare.

Kundafwa bii.

Uwe Mwenyezi Mlungu waatsambula ili ahuamule,

uwe uriye ngome waahuma, uchiatiya mkpwotse ili ahutiye adabu.

¹³Matsogo uwe Mwenyezi Mlungu ni matakatifu sana hata kuweza kulola uyi,

wala kuvumirira makosa.

Kpwa utu wani phahi unalola na kuvumirira wakati atu ayi

anaangamiza atu a haki kuriko aho?

¹⁴Ukaahenda atu akale dza ngʼonda ko baharini,

au viumbe vihambalavyo ambavyo tavina chilongozi.

¹⁵Atu osi akakala dza ngʼonda kpwa atu a Babeli.

Anaavuwa na chiloo na chimia

kuaphirika kpwao kuno akahererwa.

¹⁶Kpwa hivyo aho nkulavira sadaka

na kufukizira uvumba vimiya vyao,

kpwa kukala anaamba hivyo ndivyo vichivyoahenda matajiri

na kukala na vitu vinji vinono.

¹⁷Vino andaenderera kuodzaza vimiya vyao na kpwendakupula kpwao siku zosi?

Dze, andaenderera kuolaga atu a mataifa ganjina bila mbazi hadi rini?

¹Nindapanda dzulu ya uringo

nirinde wakati wa zuma rangu

nigodzere Mwenyezi Mlungu ndivyoniambira,

na nikale tayari kumjibu kuhusu malalamiko gangu.

Mwenyezi Mlungu anajibu kano ya phiri

²Mwenyezi Mlungu achinijibu achiniamba,

“Hizi ruwiya ziandike chingʼangʼa dzulu ya myalawe

ili chila ndiyetangazira atu akale andagasoma kpwa urahisi.

³2:3 Aeburania 10:37Ruwiya hizi zindatimiya kpwa wakatiwe,

tsona gandahendeka upesi mana sigo ga handzo.

Hata gachioneka kala ganachelewa, gagodzere

mana ni gatimiye, tagandachelewa.

⁴2:4 Arumi 1:17; Agalatia 3:11; Aeburania 10:38Lola, mutu anayedzikarya kasawa bii mwakpwe rohoni,

ela mutu mwenye haki andaishi kpwa kukuluphirakpwe.

⁵Uchi unamchenga,

kpwa kudzikaryakpwe kandaoya bii.

Kpwa kukala ni mtoni, katosheka dza kuzimu na chifo,

anaakusanyira mataifa ganjina gosi

na anateka atu osi akale akpwe.”

⁶Ela kuredza wakati ambao osi arioahala mateka andatunga mawira na misemo ya kumfyorera na kumnyetera aambe,

“Shauriye hiye ariyedzikusanyira vitu visivyokala vyakpwe!

Iye ambaye wadzitajirisha kpwa kuhumira nguvu!

Waona gandaenderera hadi rini?”

⁷Gafula adenio andakuunukira

akuhende ukakame kpwa wuoga.

Nao andakuhala kpwa nguvu phamwenga na vituvyo.

⁸Kpwa kukala wahala mateka mataifa manji,

hinyo atu ariosala andakuhala kpwa nguvu phamwenga na vituvyo.

Kpwa kukala waolaga atu

kpwa kusababisha fujo kahi za tsi, mo midzini na osi asagalao mumo.

⁹Shauriye! Iye adzengaye nyumba

kpwa utajiri ariouphaha kpwa njira mbii.

Kuno anaona kukala utajiri hinyo undamrinda,

na kumtivya iye na atue asiphahwe ni mai.

¹⁰Kpwa sababu ya kuolaga atu anji

wairehera nyumbayo waibu

na uchidzirehera mwenye maangamizi.

¹¹Mana hata higo mawe ga kuta gandatangaza kukala u mkosa

na maphalu nago gandakubaliana nago.

¹²Shauriye hiye adzengaye mudzi na pesa arizophaha kpwa kuolaga atu

na kuwiimarisha kpwa kuhenda fujo na uyi.

¹³Avi Mwenyezi Mlungu, Mlungu wa majeshi wapanga kukala

atu anjina andahenda kazi na kudziremweza bure,

mana juhudi zao zindasirira mohoni.

¹⁴2:14 Isaya 11:9Dza madzi gaodzazavyo bahari,

ndivyo ambavyo dunia indaodzala atu

amanyao uwezo na ukulu wa Mwenyezi Mlungu.

¹⁵Shauriye hiye amuhendaye myawe alewe

kpwa kumkota uchi

ili aphahe kumuona chitsaha.

¹⁶Undaphaha waibu badala ya nguma.

Ni zumaro kunwa cho chikombe na uonyese chitsahacho.

Chikombe chiricho mkpwono wa kulume wa Mwenyezi Mlungu chikakufikira

nawe undaphaha waibu badala ya nguma.

¹⁷Fujo urirohenda Lebanoni rindakuuyira mwenye.

Waolaga nyama a tsakani nawe undaolagbwa.

Kpwa sababu ya fujo na kuolaga

ukabananga tsi, midzi na osi ario mumo.

¹⁸Chizuka china mana yani, chitu chihendacho tengezwa ni mwanadamu?

Nacho ni mfwano unaochenga atu.

Ye mutu achitengezaye nkukuluphira kazi ya mikonoye.

Mana ni chizuka sichoweza kugomba.

¹⁹Shauriye hiye achiambaye chizuka cha muhi “Unuka,”

au chizuka cha dziwe “Lamuka”

Vino chizuka chinaweza kulavya malagizo?

Tachiphuma dzagbwe chikafwinikpwa na zahabu na feza.

²⁰Ela, Mwenyezi Mlungu ye, a kpwenye Nyumbaye takatifu ya kuvoya Mlungu,

tsi yosi nainyamale mbereze.

Mavoyo ga Habakuki

¹Higa ni mavoyo ga nabii Habakuki.

²Mwenyezi Mlungu nkasikira ngumayo,

nami naogopha mahendogo.

Gahende luphya uhu wakati wehu

na gamanyikane siku zehu,

usiyale kuhuonera mbazi hata ichikala ukahutsukirirwa.

³Mlungu wakpwedza kula Temani,

iye mtakatifu wakpwedza kula mwango wa Parani.

Ngumaye yagota mlunguni

na kutogolwakpwe kuchiodzaza tsi yosi.

⁴Kungʼalwakpwe kala avi ni dzuwa.

Panga mbiri za limeme zameka kula mwakpwe mkpwononi,

ambamo ndimo arimofwitsa uwezowe.

⁵Makongo gamtanguliya mbereze

na nyumaze achiricha mashaka.

⁶Aimapho, dunia nkusumba,

alolapho, mataifa ganjina nkukakama.

Myango ya kare na kare nkumomonyoka

na vidzango vya kare na kare nkudodomea.

Hivyo ndivyo Mwenyezi Mlungu arivyo hata kare na kare.

⁷Naona mahema ga atu a Kushani gakagbwa

na paziya za mahema ga atu a Midiani zinaphepheruswa.

⁸Vino we Mwenyezi Mlungu,

phara uriphopanda farasio

na magarigo ga ushindi ga kuvwehwa ni farasi,

kala ukatsukirirwa myuho na vidzuho, au bahari?

⁹Uwe watuluza uhao

na ryakaro uchiriodzaza mivi.

Waahula tsi na myuho.

¹⁰Myango yakuona, ichisumba;

kuchikala na mafuriko,

vivwa vichivuma,

na maimbi gachiunuka.

¹¹Dzuwa na mwezi viriphoona mngʼalo wa miviyo iriphokala inatsapa

na kumeka-meka kpwa fumoro,

vyaima ti hipho vikalapho.

¹²Wanyendeka dzulu ya tsi kpwa tsukizi

na uchivyoga-vyoga mataifa.

¹³Watuluka kpwendativya atuo

yani uchendaaokola urioatsambula.

Uchimpiga chilongozi wa atu ayi,

uchimvula nguwo kula chitswani hadi lwayoni.

¹⁴Wamdunga chitswache na fumore mwenye.

Majeshige gariphokpwedza dza phuto ili gahutsamule,

gahufyorera mana gaona avi gandahupiga kpwa urahisi

dza achiya asioweza chitu.

¹⁵Wavyoga-vyoga bahari na farasio

nayo ichitibuka.

¹⁶Niriphosikira, naahukpwa ni roho,

madomo gangu gachikakama kpwa hinyo msindo.

Mwiri wangu uchirejera,

magulu gangu gachigbwirwa ni mchecheta.

Ela nindahurira nigodze kpwa kuvumirira iyo siku ya mashaka

ambayo indaedzera hara anaohuvamia.

¹⁷Dzagbwe mitini taitsephula,

na mizabibu taina matunda,

dzagbwe mizaituni taivyarire

na minda taina mavuno,

dzagbwe vyaa tavina mangʼondzi

wala tavina ngʼombe.

¹⁸Bado nindahamirwa ni Mwenyezi Mlungu,

kpwa kukala Mlungu ni muokoli wangu.

¹⁹3:19 2 Samueli 22:34; Zaburi 18:33Mwenyezi Mlungu ndiye nguvu yangu,

iye nkuhenda magulu gangu gakale dza ga kulungu,

tsona nkunihenda ninyendeke myangoni.