फिलेमोन

Philemon

फिलेमोन

¹ पोलुस कोलां जेड़ा मसीह यीशु दा कैदी ऐ, ते प्रा तीमुथियुस कोलां साड़े प्यारे सहकर्मी फिलेमोन, ² ते बहन अफफिया, ते साड़े साथी योद्धा अरखिप्पुस ते फिलेमोन दे घर दी कलीसिया दे नां:

³ साड़े पिता परमातमा ते प्रभु यीशु मसीह कोलां अनुग्रह ते शान्ति तुसें मिलदी रवे।

⁴ मैं म्हेशां परमातमा दा धन्यवाद करना ऐ, ते अपनी प्रार्थना बीच तुगी याद करना ऐ, ⁵ की वे मैं तेरे ओस प्रेम ते बिश्वास दी चर्चा सुनना ऐ, जेड़ी सारें पवित्र लोकें कन्ने ते प्रभु यीशु उप्पर ऐ। ⁶ मैं प्रार्थना करना ऐ के बिश्वास च तेरा सहभागी ओना, तुंदी सारी भलाई दी पनछान बीच, मसीह आस्ते प्रभावशाली ओए। ⁷ की वे ए प्रा, मीगी तेरे प्रेम कन्ने मता आनंद ते शान्ति मिली ऐ, इसे आस्ते के तेरे द्वारा पवित्र लोकें दे मन अरे भरे ओई गेदे न।

⁸ इसे आस्ते अगरचे मीगी मसीह च मती हिम्मत ऐ के जेड़ी गल्ल ठीक ऐ, ओस दी आज्ञा तुगी दियां। ⁹ तां भी मीगी बुड्डे पोलुस गी जेड़ा हूंन मसीह यीशु आस्ते कैदी ऐ, ए और भी पला जानया के प्रेम कन्ने बिनती करां। ¹⁰ मैं अपने बच्चे उनेसिमुस आस्ते, जेड़ा मेरे आस्ते मेरी कैद च जम्मा ऐ, तेरे कन्ने बिनती करना ऐ। ¹¹ ओह ते पैलैं तेरे किश कम्म दा नेई हा, लेकन हूंन तेरे ते मेरे दोनीं दे बड़े कम्म दा ऐ। ¹² उसे गी मतलब जेड़ा मेरे दिल दा टुकड़ा ऐ, मैं तेरे कोल बापस करी दीता ऐ। ¹³ उसी मैं अपने गै कोल रखना चांदा हा के ओह तेरी और कोलां एस कैद च जेड़ी सुसमाचार दे कारण ऐ, मेरी सेवा करै। ¹⁴ लेकन मैं तेरी इच्छा बगैर किश भी करना नेई चाया, के तेरी ए कृपा दबाब कन्ने नेई लेकन आनद कन्ने ओए।

¹⁵ की वे के जाने ओह तेरे कोलां किश दिन आस्ते इसे कारण अलग ओया के म्हेशां तेरे कोल रवे। ¹⁶ लेकन हूंन कोलां दास जेया नेई बरना दास कोलां भी उत्तम, मतलब प्रा दे समान रवे, जेड़ा मेरा ते ख़ास प्यारा ते ऐ गै, लेकन हूंन शरीर च भी ते प्रभु च भी, तेरा भी ख़ास प्यारा ओए। ¹⁷ इस आस्ते जे तू मीगी अपना सहभागी समझना ऐ, ते उसी एस चाल्ली ग्रहण कर जिय्यां मीगी। ¹⁸ जे ओस ने तेरा किश नुक्सान किता ऐ, जां ओस उप्पर तेरा किश आंदा ऐ, ते मेरे नां उप्पर लिखी लै। ¹⁹ मैं पोलुस अपने हत्थें दा लिखना ऐ के मैं अप्पुं परी देगा; ते एस दे आखने दी कोई जरूरत नेइ के मेरा कर्जा जेड़ा तेरे उप्पर ऐ ओह तू गै ऐं। ²⁰ ए प्रा, ए आनंद मिगी प्रभु च तेरे कोलां मिले। मसीह च मेरे जी गी अरा भरा करी दे।

²¹ मैं तेरे आज्ञा कारी दा परोसा राखियै तुगी लिखना ऐ, ते ए जानना ऐं के हो किश मैं आखना ऐं, तू ओस कोलां कई बद करंगा। ²² ते ए भी के मेरे आस्ते ठहरने दी जगह तेयार रख। मीगी आस ऐ के तेरी प्रार्थना दे द्वारा मैं तुसें देई दीता जाह्गा।

²³ इपफ्रास, जेड़ा मसीह यीशु च मेरे कन्ने कैदी ऐ, ²⁴ ते मरकुस ते अरिस्तर्खुस ते देमास ते लुका जेड़े मेरे सहकर्मी न, इंदा तुसीं नमस्कार।

²⁵ साड़े प्रभु यीशु मसीह दा अनुग्रह तुंदी आत्मा उप्पर ओंदा रवे। आमीन।