प्रेरितों के काम

Acts

प्रेरितों के काम

¹ हे थियुफिलुस, मैं पैली किताब उन सारीं गल्लें दे बारे च लिखी जेड़ी यीशु आरम्भ कोलां करदा ते सिखांदा रेया, ² ओस दिन तकर जिस ले तकर ओह उन्हें प्रेरितें गी जिन्हें गी ओस चुने दा हा पवित्र आत्मा दे द्वारा आज्ञा देइयै उप्पर उठाया नेई गया। ³ ओस ने दुःख उठाने दे बाद मते सारे पक्के कम्में दे द्वारा ओस ने अपने गी जिंदा दसया, ते चाली दिन तक ओह उन्हें लबदा रेया, ते परमातमा दे राज दियां गल्लां करदा रेया। ⁴ ते उंदे कन्ने मिलियै उन्हें आज्ञा दिती, “यरूशलेम गी नेई शुड़ो, लेकन पिता दी ओस प्रतिज्ञा दे पूरा होने दा इंतज़ार करदे रवो, जिस दी चर्चा तुस मेरे कोलां सुनी चुकेदे हो। ⁵ की वे यूहन्ना ने ते पानी कन्ने बपतिस्मा दिता ऐ लेकन थ्होड़े दिनां दे बाद तुस पवित्र आत्मा कन्ने बपतिस्मा पागे।”

⁶ इस आस्ते उन्हैं किट्ठे होइयै उस कन्ने पूछ्या, “हे प्रभु, के तू इसे समें इस्राएल गी राज फेरी देगा ?” ⁷ ओस ने उंदे कन्ने आखया, “उन्हें समें जां कालें गी जानना, जिन्हें पिता ने अपने अधिकार बीच रखा ऐ, तुंदा कम्म नेईयैं। ⁸ लेकन जिस लै पवित्र आत्मा तुंदे उप्पर आग उस बेले तुस शक्ति पागे; ते यरूशलेम ते सारे यहूदिया ते सामरिया च, ते धरती दी छोर तकर मेरे गवाह ओगे।” ⁹ ए आखियै ओह उंदे दिखदे दिखदे उप्पर चुकी लेता गया, ते बदल नै उसी उंदी अखियां कोलां शपाली लेता। ¹⁰ ओस दे जांदे समें जिस ले ओह आकाश गी तका दे हे, ते दिखो, दो मनुख सफ़ेद कपड़े लादे उंदे कोल आई खड़ोते, ¹¹ ते उंदे कन्ने आखया, “हे गलीली इन्सानो, तुस की खड़ोते दे आकाश दी बखी दिखा करदे हो ?इय्ये यीशु, जेड़ा तुंदे कोला सुर्ग गी उठाया गया ऐ जिस रिती कन्ने तुसैं उसी सुर्ग गी जांदे दिखया ऐ इस्से रिती ओह फिरी आग।”

¹² उस बेले ओह जैतुन नां दी पहाड़ी कोलां जेड़ी यरूशलेम दे कोल इक सब्त दे दिन दी दूर ऐ, यरूशलेम गी बापस गए। ¹³ जिस ले ओह उत्थें पुज्जे ते ओस अटारी उप्पर गए, जित्थें पतरस ते यूहन्ना ते याकूब ते अन्द्रियास ते फिलिप्पुस ते थोमा ते बरतुल्मै ते मत्ती ते हलफई दा पुत्तर याकुब ते शमौन जेलोतेस ते याकूब दा पुत्तर यहूदा रैंदे हे। ¹⁴ ए सारीयां कई जनानियां ते यीशु दी मां मरियम ते ओस दे प्रा कन्ने इक चित्त होइये प्रार्थना च लगे रे। ¹⁵ उन्हें दिनें च पतरस भ्रां दे बीच जेड़े इक सो बी मनुख दे लगभग हे, खोड़ेइयै आखना लगया, ¹⁶ “हे प्रा ओ, जरूरी हा की पवित्र शास्त्र दा ओह लेख पूरा होए जेड़ा पवित्र आत्मा ने दाऊद दे मूंहां यहूदा दे बारे च, जेड़ा यीशु दे पकड़ने आलें दा अगुवा हा, पैलें दा आखे दा हा। ¹⁷ की वे ओह ते साड़े बीच गीनया गया, ते एस सेवकाई बीच शामील ओया। ¹⁸ (ओस ने अधर्म दी कमाई कोलां इक खेत मुलें लेता, ते सिरे दे बल किरया ते ओस दा पेट फट्टी गया ते ओस दी सारियां नसां निकली आइयां। ¹⁹ इसी गल्ले गी यरूशलेम दे सारे रहने आले जानी गए, इत्थें तकर की ओस खेत दा नां उंदी भाषा च ’हकलदमा’ मतलब ’लहू दा खेत’ पेई गया )।

²⁰ भजन संहिता च लिखे दा ए, ’ओस दा घर उजड़ी जा, ते ओस च कोई नेई बसे,’ ते ’ओस दा पद कोई दुआ लेई लै।’

²¹ इसे आस्ते जिने दिन तकर प्रभु यीशु साड़े कन्ने आंदे जांदे रेया - मतलब यूहन्ना दे बपतिस्मा कोलां लेइये साड़े कोला उठाए जाने तकर - जेड़े लोग बराबर साड़े कन्ने रे, ²² उचित ऐ की उंदे बीचा इक मनुख साड़े कन्ने ओस दे जिंदे होने दा गवाह बनी जा।” ²³ उस बेले उन्हैं दों गी खड़ा किता, इक युसूफ गी जेड़ा बरसबा आखा जांदा ऐ, जिस दा उप नां यूसतुस ऐ, दुआ मत्तियाह गी, ²⁴ ते ऐ प्रार्थना किती, “हे प्रभु, जेड़ा सबनी दे मनें गी जानना ऐ, ऐ प्रगट कर की इंदे दों बीचा तो कुसी चुने दा ऐ, ²⁵ की ओह एस सेवकाई ते प्रेरताई दा पद ले, जिसी यहूदा शुड़ीये अपनी जगह गी चली गया।” ²⁶ उस बेले उन्हैं उंदे बारे च चिठीयां पाइयां, ते चिठ्ठी मत्तियाह दे नां उप्पर निकली। इसे आस्ते ओह गयारां प्रेरितें दे कन्ने गिना गया।

¹ जिस ले पिन्तेकुस्त दा दिन आया, ते ओह सारे इक जगह किट्ठे हे। ² इकाइक अंबरा कोलां बड़ी आंधी दे जेइ सनसनाहट दा शब्द ओया, ते ओस कन्ने सारा घर जित्त्थें ओह बैठे दे हे, गूंजी गया। ³ ते उन्हें अग्गी जेइयां जिभां फटदीं लबीयां ते उंदे बीचा हर इक उप्पर आ ठहरीं। ⁴ ओह सारे पवित्र आत्मा कन्ने भरोई गए, ते जिस चाल्ली आत्मा ने उन्हें बोलने दी शक्ति दिती, ओह बखरी बखरी भाषा बोलना लगे।

⁵ अंबर दे थले दी हर इक जाति कोलां भक्त यहूदी यरूशलेम च रवा करदे हे। ⁶ जिस ले ऐ शब्द ओया ते भीड़ लगी गयी ते लोग घबराई गए, की वे हर इक गी इय्ये सुनाई दिंदा हा की ऐ मेरी गै भाषा च बोला करदे ने। ⁷ ओह सारे हरान ते अचम्भित होइये आखना लगे, “दिखो, ऐ जो बोला करदे न के ऐ सारे गलीली नेईयैं ? ⁸ ते फिरी की साड़े बीचा हर इक अपनी अपनी जन्म भूमि दी भाषा सुनदा ऐ ? ⁹ आस जेड़े पार्थी ते मेदी ते एलामी ते मेसोपोटामिया ते यहूदिया ते कप्पदू किया ते पुन्तुस ते आसिया, ¹⁰ ते फ्रूगिया ते पंफुलिया ते मिस्त्र ते लीबिया देश जेड़ा कुरेन दे आसे पासे है, इनां सारां देशें दे रहने आले ते रोमी प्रवासी, ¹¹ मतलब यहूदी ते यहूदी मत धारण करने आले, क्रेती ते अरबी भी हैंन, लेकन अपनी अपनी भाषा च उंदे कोलां परमात्मा दे बड़े बड़े कम्में दी चर्चा सुनदे न।” ¹² ते ओह सब हरान होए ते कबराइयै इक दुए कन्ने आखना लगे, “ऐ के होआ करदा ऐ ?” ¹³ लेकन दुऐं ठठा करियै आखया, “ओह ते नमें मदिरे दे नशे च चूर न।”

¹⁴ उस बेले पतरस उन ग्यारां कन्ने खड़ोता अते उच्चे शब्द कन्ने आखना लगा, “हे यहूदियो ते यरूशलेम दे सारे रहन आलो, ऐ जानी लो, ते कन लाईयै मेरी गल्लें गी सुनो। ¹⁵ जिय्यां तुस समझा करदे हो, ऐ लोग नशे बीच नेईयैं न, की वे अय्यें ते पहर गै दिन चढ़या ए। ¹⁶ लेकन ऐ ओह गल ऐ, जेड़ी योएल भविष्यवक्ता दे द्वारा आखी गयी ही:

¹⁷ परमातमा आखदा ए, के अंत दे दिनें च एसा होग के मैं अपना आत्मा सारे इन्सानें दे उप्पर उंडेलगा, ते तुंदे जागत ते तुंदीयां कुड़ियां भविष्यवाणी करघंन, ते तुंदे जवान दर्शन दिखघंन, ते तुंदे बुजुर्ग सूखने दिखघंन।

¹⁸ बरन मैं अपने दासें ते अपनी दासियें उप्पर भी उन्हैं दिनें च अपनी आत्मा कोलां उंडेलगा, ते ओह भविष्यवाणी करघंन।

¹⁹ ते मैं उप्पर अंबर दे अद्भुत कम्म ते थले धरती उप्पर चिन्न, मतलब खून ते अग्ग ते धुंए दा बदल दसगा।

²⁰ प्रभु दे महान ते तेजस्वी दिन दे आने कोलां पैले सूरज न्हेरा ते चन्न खूने आला होई जाग।

²¹ ते जेड़ा कोई प्रभु दा नां लेग ओह उद्धार पाग।’

²² “हे इस्राएलियो, ऐ गल्लां सुनो: यीशु नासरी इक मनुख हा जिस दा परमात्मा दी बखी कोलां होने दा प्रमाण उन सामर्थ दे कम्में ते आश्चर्य दे कम्में ते चिन्नें कोलां प्रगट ऐ, जेड़े परमातमा नै तुंदे बीच ओस दे द्वारा करी दसे जिन्हें गी तुस आप गै जानदे ओ। ²³ उसी यीशु गी, जेड़ा परमातमा दी ठहराई दी योजना ते पूर्व ज्ञान दे मताबक पड़काया गया, तुसैं अधर्मीयें दे हत्थें क्रूस उप्पर चढ़ाईयै मारी दिता। ²⁴ लेकन उसी गै परमातमा ने मोती दे बंधना बीचा शुड़ाईयै जिंदा किता; की वे ऐ अनहोना हा के ओह ओदे कब्जे च रोंदा। ²⁵ की वे दाऊद ओस दे बारे च आखदा ऐ, ’ मैं प्रभु गी सर्वदा अपने सामने दिखदा रेया की वे ओह मेरी सज्जी बखी ऐ, तां करियै के मैं डिगी नी जां।

²⁶ इसे कारण मेरा मन आनंदित ओया, ते मेरी जीभ मगन होई; बरना मेरा शरीर भी आशा च बना रौग।

²⁷ की वे तू मेरे प्राणें गी अधोलोक बीच नेई शुड़गा; ते ना अपने पवित्र जन गी सड़ने गै देगा।

²⁸ तू मीगी जीवन दा रस्ता दसया; तू मीगी अपने दर्शन दे दे द्वारा आनंद कन्ने भारी देगा। ²⁹ “हे प्रा ओ, मैं कुलपति दाऊद दे बारे च मैं तुंदे कन्ने साहस कन्ने आखी सकना के ओह ते मरी गया ते गाड़या भी गया ते ओस दी कबर अज्ज तकर साड़े इत्थें बिघमान ऐ। ³⁰ ओह भविष्यवक्ता हा, ओह जानदा हा के परमातमाने मेरे कन्ने कसम खादी ऐ के मैं तेरे वंश बीचा इक मनुख गी तेरे सिंहासन उप्पर बैठागा; ³¹ ओस ने होने आली गल्ल गी पैलें गै दिखिये मसीह दे जिंदे होने दे बारे च भविष्यवाणी किती के ना ओस दा प्राण अधोलोक बीच शुड़या गया ते ना ओस दी देह सड़ी सकी। ³² इसे यीशु गी परमातमा ने जिंदा किता, जिस दे आस सारे गवाह न। ³³ इस चाल्ली परमातमा ने सज्जे हत्थे बीचा सर्वोच्च पद पाइयै, ते पिता कोलां ओह पवित्र आत्मा पाइयै जिस दी प्रतिज्ञा किती गई ही, ओस ने उंडेल दिता जेड़ा तुस दिखदे ते सुनदे हो।

³⁴ की वे दाऊद ते सुर्ग उप्पर नेई चढ़या; लेकन ओह आप गै आखदा ऐ ’प्रभु ने मेरे प्रभु कन्ने आखया, मेरे सज्जे बैठ,

³⁵ जिस ले तकर के मैं तेरे बैरियें गी तेरे पैरें दे तले दी चोकी नेई करी दियां।’

³⁶ इसे आस्ते हूंन इस्राएल दा सारा घराना निश्चित रूप कन्ने जानी लै की परमातमा ने उसी यीशु गी जिसी तुसैं क्रूस उप्पर चढ़ाया, प्रभु भी ठहराया ते मसीह भी।”

³⁷ उस बेले सुनने आलें दे दिल छिदी गए, ते ओह पतरस ते बाकी प्रेरितें गी पूछना लगे, “हे प्रा ओ, आस के करचे ?” ³⁸ पतरस ने उन्हें गी आखया, “मने गी फेरो, ते तुंदा बीचा हर इक अपने अपने पापें दी माफ़ी आस्ते मसीह यीशु दे नां कन्ने बपतिस्मा ले; ते तुस पवित्र आत्मा दा दान पागे। ³⁹ की वे ए प्रतिज्ञा तुस, ते तुंदी संतानें, ते ओह सारे दूर दूर दे लोकें आस्ते भी ऐ जिन्हें गी प्रभु साड़ा परमातमा अपने कोल बलाग।” ⁴⁰ ओस ने मतीं होर गल्लें कन्ने भी गुआई देई देईये समझाया के अपने आप गी टेड़ी जाति कोलां बचाओ। ⁴¹ इस आस्ते जिन्हैं ओस दा बचन ग्रहन किता उन्हैं बपतिस्मा लेता; ते उसे दिन तीन हजार इनसानें दे लगभग उंदे कन्ने मिली गए। ⁴² ते ओह प्रेरीतां कोलां शिक्षा पाने, ते संगती रखने, ते रुट्टी तोड़ने, ते प्रार्थना करने गी लोलीन रे।

⁴³ ते सारें लोकें उप्पर डर छाई गया, ते मते सारे अद्भुत कम्म ते चिन्न प्रेरितें दे द्वारा प्रगट होंदे हे। ⁴⁴ ते सारे विश्वासकरने आले किट्ठे रोंदे हे, ते उंदी सारियां चीजां सांझे च थियां। ⁴⁵ ओह अपनी अपनी सम्पति ते समान बेची बेची जे भी जिस दी भी जरूरत होंदी ही बंडी दिंदे हे। ⁴⁶ ओह हर रोज इक मन होइयै मंदिर च किट्ठा होंदे हे, ते घर घर रुट्टी तोड़दै होई आनंद ते मने दी सिधाई कन्ने भोजन करदे हे, ⁴⁷ ते परमातमा दी स्तुति करदे हे, ते सारे लोग उंदे कन्ने खुश हे: ते जेड़े उद्धार पांदे हे, उन्हें गी प्रभु हर रोज उंदे बीच मिलाई दिंदा हा।

¹ पतरस ते यूहन्ना तीसरे पहर प्रार्थना दे समें मंदिर च जा करदे हे। ² ते लोग इक जन्म दे लंगड़े गी लेई आ करदे हे, जिसी ओह हर रोज मंदिर दे ओस द्वार उप्पर जेड़ा ’शैल’ आखा जांदा ऐ, बैठाई दिंदे हे की ओह मंदिर च जाने आलें कोलां भीख मंगे। ³ जेस ले ओस पतरस ते यूहन्ना गी जांदे दिखया, ते उंदे कोलां भीख मंगी। ⁴ पतरस ने यूहन्ना दे कन्ने ओस दी होर ध्यान कन्ने दिखिये आखया, “साड़ी बखी दिख !” ⁵ इसे आस्ते ओह उंदे कोलां किश पाने दी आशा रखदे होई उंदी बखी तकना लगया।

⁶ उस बेले पतरस ने आखया, “चांदी ते सुन्ना ते मेरे कोल नेईयैं, लेकन जे मेरे कोल है ओह तुगी दिना ऐ; यीशु मसीह नासरी दे नां कन्ने चल फिर।” ⁷ ते ओस ने ओदा सज्जा हत्थ पकड़ीये उसी ठुआलया; ते फोरन ओदे पैरें ते गोडें च जोर आई गया। ⁸ ओह उछलीयै खड़ा होई गया ते चलना फिरना लगया; ते चलदा, ते कूददा, ते परमातमा दी सतुति करदा ओस दे कन्ने मंदिर च गया। ⁹ सारैं लोकैं उसी चलदे फिरदे ते परमातमा दी स्तुति करदे दिखियै, ¹⁰ उसी पनछानी लेता की ए उए ऐ जेड़ा मंदिर दे ’शैल’ रस्ते उप्पर बैठीयै भीख मंगा करदा हा; ते ओस घटना कोलां जेड़ी ओस कन्ने होई ही ओह मते अचंम्भित ते हरान होए।

¹¹ जिस लै ओह पतरस ते यूहन्ना गी पकड़े दा हा, ते सारे लोग बड़ा आश्चर्य करदे होई ओस ओसारे च जेड़ा सुलेमान दा आखा जांदा हा, उंदे कोल दोड़ी आए। ¹² ए दिखिये पतरस ने लोकें गी आखया, “हे इस्राइलियो, तुस इस मनुख उप्पर की आश्चर्य करदे हो, ते साड़ी बखी की इस चाल्ली दिखा करदे हो के मनो असैं गै अपनी अपनी शक्ति जां भक्ति कन्ने इसी चलने फिरने जोग बनाई दिता। ¹³ अब्राहम ते इसहाक ते याकूब दे परमात्मा, साड़े बब्ब दादें दे परमातमा ने अपने सेवक यीशु दी महिमा किती, जिसी तुसैं पकड़ाई दिता, ते जेस लै पिलातुस ने उसी शुड़ने दा बिचार किता, उस बेले तुसैं ओदा इन्कार किता। ¹⁴ तुसैं ओस पवित्र ते धर्मी दा इन्कार किता, ते बिनती किती की इक हत्यारे गी तुंदे आस्ते शुड़ी दिता जा; ¹⁵ ते तुसैं जीवन दे कर्ता गी मारी दिता, जिसी परमातमा मरें बीचा ज़िंदा किता; ते इस गल्ल दे आस गवाह न। ¹⁶ ते उसे दे नां ने, ओस विश्वासदे द्वारा जेड़ा ओस इ नां उप्पर ऐ, इस मनुख गी जिसी तुस दिखदे हो ते जानदे भी हो शक्ति दिती ऐ। उसै विश्वासनै जेड़ा ओस दे द्वारा है, इसी तुंदे सामने भला चंगा करी दिता ऐ।

¹⁷ “हूंन ए प्रा ओ, मैं जानना ऐं के ए कम्म तुसैं अज्ञानता च किता, ते उयां गे तुंदे सरदारैं भी किता। ¹⁸ लेकन जिन्हें गल्लें गी परमातमा ने सारें भविष्यवक्तां दे मुंहां बीचा पैलें गै सनाई दिता हा, के ओस दा मसीह दुःख उठाग, उन्हें ओस इस रीती कन्ने पूरा किता। ¹⁹ इसे आस्ते, मन गी फराओ ते मुड़ी आओ के तुंदे पाप मिटाई दिते जांन, जिस कन्ने प्रभु दे नेड़े कोलां द्वारैं फिरी शांति दे दिन आन, ²⁰ ते ओह यीशु गु भेजे जेड़ा तुंदे आस्ते पै लें दा गै मसीह ठहराए दा गेदा ऐ। ²¹ जरूरी ऐ के ओह सुर्ग बीच ओस समें तकर रवे जिस ले तकर की सारियां गल्लां दा सुधार ना करी लै जिस दी चर्चा प्राचीन काल कोलां परमातमा ने अपने पवित्र भविष्यवकतां दे मुंहां बीचा किती ऐ। ²² जिय्यां की मुसा ने आखया, ’प्रभु परमातमा तुंदे भ्रां बीचा तुंदे आस्ते इक भविष्यवक्ता खड़ेरग, जे किश ओह तुंदे कन्ने आखग ओस दी सुनयो। ²³ लेकन हर इक मनुख जेड़ा ओस भविष्यवक्ता दी नेई सुने, लोकें बीचा नाश किता जाग। ’ ²⁴ ते शमूएल कोलां लेइयै ओस दे बाद आलें तकर जिने भी भविष्यवक्ता बोले उन्हैं सारैं इनां दिनां दा संदेश दिता ऐ। ²⁵ तुस भविष्यवक्तां दी संतान ते ओस वाचा दे भागी हो, जेड़ी परमातमा ने तुंदे बब्ब दादें कन्ने बनी, जिस ले ओस ने अब्राहम कन्ने आखया, ’ तेरे वंश दे द्वारा धरती दे सारे घराने आशीष पाघंन।’ ²⁶ परमातमा ने अपने सेवक गी ठुआलीये पैलें ओस दे कोल भेजया, की तुंदे बीचा हर इक गी ओस दी बुराईयां कोलां फेरियै आशीष दियै।”

¹ जेस ले ओह लोकें कन्ने ए आखा करदे हे, ते याजक ते मंदिर दे सरदार ते सदुकी उंदे उप्पर चढ़ी आए। ² की वे ओह मते रोएं होए की ओह लोकें गी सिखांदे हे ते यीशु दा उदाहरण देई देईये मरें होएं दा जिंदे होने दा प्रचार करदे हे ³ उन्हैं उन्हें गी पकड़ीयै दुए दिन तकर हवालात च रखया की वे शाम होई गेदी ही। ⁴ लेकन बचन दे सुनने आलें बीचा बतेरैं विश्वासकिता, ते उंदी गिनती पंज्ज हजार पुरुषें दे लगभग होई गई।

⁵ दुए दिन एसा ओया की उंदे सरदार ते पुरनिये ते शास्त्री ⁶ ते माहायाजक हन्ना ते कैफा ते यूहन्ना ते सिकंन्दर ते जिने भी महायाजक दे घराने दे हे, सारे यरूशलेम च किट्ठे होए। ⁷ ओह उन्हें गी बीच खड़ेरियै पूछना लगे की तुसैं ए कम्म किस शक्ति कन्ने ते किस नां कन्ने किता ऐ। ⁸ उस बेले पतरस ने पवित्र कन्ने परिपूर्ण होइयै ओस कन्ने आखया, ⁹ हे लोकें दे सरदारो ते पुरनियो, एस दुर्बल मनुख दे कन्ने जेड़ी भलाई किती गई ऐ, जे अज्ज साड़े कोला ओस दे बारे च पूछ ताछ की जांदी ऐ, की ओह किय्यां अच्छा ओया। ¹⁰ ते तुस सब ते सारे इस्राएली लोग जानी लेंन की यीशु मसीह नासरी दे नां कन्ने जिसी तुसैं क्रूस उप्पर चढ़ाया, ते परमातमा ने मरें दे बीचा जिंदा कीता, ऐ मनुख तुंदे सामने भला चंगा खडोते दा ऐ। ¹¹ ऐ उए पत्थर ए जिसी तुसैं राजमिस्त्रियैं नै तुच्छ जानया ते ओह कोने दे सिरे दा पत्थर होई गया। ¹² किसे दुए दे द्वारा उद्धार नेईयैं; की वे सुर्ग दे थले इन्सानें च होर कोई दुआ नां नेई दिता गया, जिस दे द्वारा आस उद्धार पाई सकचे।”

¹³ जिस लै उन्हैं पतरस ते यूहन्ना दा साहस दिखया, ते ऐ जानया के ऐ अनपढ़ ते साधारण मनुख न, ते आश्चर्य किता; फिरी उन्हें पनछानया के ए यीशु दे कन्ने रेदे न। ¹⁴ ओस मनुख गी जेड़ा अच्छा ओया हा उंदे कन्ने खड़ोते ते दिखिये ओह बिरोध च किश नी आखी सके। ¹⁵ लेकन उन्हें सभा दे बार जाने दी आज्ञा देइयै ओह अप्पूं बीचें बचार करना लगे, ¹⁶ “आस इनें इनसानें कन्ने की करचे ? की वे ए यरूशलेम दे सारे रोनें आलें उप्पर प्रगट न, की इदें द्वारा इक प्रसिद्ध चिन्न दसेया गया ऐ; ते आस उस दा मना नेई करी सकनयां। ¹⁷ लेकन इसे आस्ते के ए गल लोकें च होर मती नेई फैली जा, आस उन्हें तमकाचे, की ए इस नां कन्ने फिरी किसे मनुख कन्ने गल्लां नेई करन।” ¹⁸ उस बेले उन्हें बलाया ते चेतावनी देइयै ए आखया, “यीशु दे नां कन्ने किश भी नेई बोलयो ते नेई सिखायो।” ¹⁹ लेकन पतरस ते यूहन्ना नै उसी उत्तर दिता, “तुस गै न्याय करो; के ए परमातमा दे कोल भला ऐ की आस परमातमा दी गल्ल कोलां बद तुंदी गल्ल मनचे। ²⁰ की वे ए ते साड़े कोलां होई नेई सकदा की जे असें दिखया ते सुनया ऐ, ओह नेई आखचे।” ²¹ उस बेले उन्हैं होर तमकाईयै शुड़ी दिता, की वे लोकें दे कारण उन्हें दंड देने दा कोई बहाना नेई मिलया, इसे आस्ते के जेड़ी घटना होई ही उस दे कारण सब लोग परमातमा दी बड़ाई करदे हे। ²² ओह मनुख, जिस दे उप्पर ऐ चंगा करने दा चिन्न दसया गया हा, चाली साल कोलां बद उमर दा हा।

²³ ओह शुड़कियै अपने साथियें दे कोल आए, ते जे किश प्रधान याजकैं ते पुरनियैं उंदे कन्ने आखया हा, उन्हें गी सुनाई दिता। ²⁴ ए सुनिये उन्हैं इक मन होइयै उचे शब्द कन्ने परमातमा कन्ने आखया, “हे स्वामी, तू उए हैं जिस ने सुर्ग ते धरती ते समुंद्र ते जे किश ओस च ऐ बनाया।

²⁵ तो पवित्र आत्मा दे द्वारा अपने सेवक हमारे पिता दाऊद दे मुंहे बीचा आखया, ’अन्य जातियैं हुल्लड़ की मचाया ? ते देश देश दे लोकैं की बेकार गल्लां सोचीयां ?

²⁶ प्रभु ते ओस दे मसीह दे बिरोध च धरती दे राजा खड़ोते, ते हाकिम इक साथ किट्ठे होए।’

²⁷ की वे सच मुच तेरे सेवक यीशु दे बिरोध च, जिस दा तो अभिषेक किता, हेरोदेस ते पुन्तियुस पिलातुस भी अन्य जातियें ते इस्राएलियें दे कन्ने किट्ठे होए, ²⁸ की जे किश पैलें कोलां तेरी शक्ति ते मति कोलां ठहरा हा उए करै। ²⁹ हूंन ए प्रभु, उंदी तमकीयें गी दिख; ते अपने दासें गी ए बरदान दे के तेरा बचन बड़े हियाव कन्ने सुनाँन। ³⁰ चंगा करने आस्ते तू अपना हत्थ बदा की चिन्न ते अद्भुत कम्म तेरे पवित्र सेवक यीशु दे नां कन्ने किते जांन।” ³¹ जिस ले ओह प्रार्थना करी चुके, ते ओह जगह जित्त्थें ओह किट्ठे हे हिली गए, ते ओह सब पवित्र आत्मा कन्ने परिपूर्ण होई गए ते परमातमा दा बचन हियाव कन्ने सुनांदे रे।

³² विश्वास करने आलें दी मंडली इक चित्त ते इक मने दी ही, इत्थें तकर के कोई भी अपनी सम्पति अपनी नेई आखदा हा, लेकन सब किश सांझे च हा। ³³ प्रेरित बड़ी शक्ति कन्ने प्रभु यीशु दे जिंदे होने दी गुआइ दिंदे रे ते उंदे सारें उप्पर मता अनुग्रह हा। ³⁴ उंदें च कोई भी दरिद्र नेई हा; की वे जिंदे कोल जमीन जां घर हे ओह उन्हें बेची बेचीयै, बिकी दी चीजें दा मूल लांदे, ते उसी प्रेरितें दे पैरें च रखदे हे; ³⁵ ते जिय्यां जिसी जरूरत होंदी ही, उस दे अनुसार हर इक गी बंडदे हे।

³⁶ युसूफ नां साइप्रस दा इक लेवी हा जिस दा नां प्रेरितैं बरनबास ( मतलब शांति दा पुत्तर ) रखया हा। ³⁷ ओस दी किश जमीन ही, जेस गी ओस ने बेचया, ते दाम दे पैसे लाईयै प्रेरितें दे प्रेरितें दे पैरें च रखी दिते।

¹ हनन्याह नां दा इक मनुख ते ओस दी घरेआली, सफिरा ने किश जमीन बेची ² ते ओस दे दाम बीचा किश रखी दिता; ते ए गल्ल ओस दी घरेआली भी जानदी ही, ते ओस दा इक भाग लेइयै प्रेरितें दे अगें रखी दिता। ³ पतरस ने आखया, “ए हनन्याह ! शैतान ने तेरे मने च एह गल्ल की पाई के तू पवित्र आत्मा कन्ने झूठ बोले, ते जमीन दे दाम बीचा किश रखी लैं? ⁴ जेस ले तकर ओह तेरे कोल रेई, के तेरी नेई ही ? ते जिस ले बिकी गई ते के तेरे वश च नेई ही ? तू ए गल्ल अपने मने च की बचारी ? तू मनुख कन्ने नेई लेकन परमातमा कन्ने झूठ बोलया ए।” ⁵ ऐ गल्लां सुनदे गै हनन्याह किरी गया ते प्राण शुड़ी दिते, ते सारें सुनने आलें उप्पर बड़ा डर शाई गया। ⁶ फिरी जवानैं उठियै ओस डी अर्थी बनाई ते बार लेइयै दबी दिता।

⁷ लगभग तीन घंटे बाद ओस दी घरेआली, जे किश ओया हा नेई जानियै, कोल आई। ⁸ उस बेले पतरस ने उसी आखया, “मीगी सुना के तू ओह जमीन इने वः गे बेची ?” ओस ने आखया, “ हाँ, इने च गे।” ⁹ पतरस ने ओस कन्ने आखया, “ए के गल्ल ऐ की तुसैं दोनीं प्रभु दे आत्मा दी परीक्षा आस्ते एक किता ? दिख, तेरे घरेआले दे दबने आले दरवाजे उप्पर गै खड़ोते न, ते तुगी भी बार लेई जांघंन।” ¹⁰ उस बेले ओह फोरन ओह ओदे पैरें बीच पेई गई, ते प्राण शुड़ी दिते; ते जवानैं कोल आईयै उसी मरे दा दिखया, ते बार लेईयै ओस दे घरेआले दे कोल दबी दिता। ¹¹ सारी कलीसिया उप्पर ते इनें गल्लें दे सुनने आलें उप्पर ,मता डर शाई गया।

¹² प्रेरितें दे हत्थे बीचा मते चिन्न ते अद्भुत कम्म लोकें दे बीच दसे जांदे हे, ते ओह सब इक चित्त होइयै सुलेमान दे ओसारे वः खड़ोंदे हे। ¹³ लेकन बाकियां बीचा कुसे गी भी ए हियाब नेई होंदा हा की उंदे बिच जाई मिले; तां भी लोग उंदी बड़ाई करदे हे। ¹⁴ विश्वास करने आले मते सारे पुरुष ते स्त्रियां प्रभु दी कलीसिया च बड़ी गिनती च मिलदे रे। ¹⁵ इत्थें तकर के लोग बीमारें गी सिड़कें उप्पर लाई लाईयै, खटें ते खटोलें उप्पर लेटाई दिंदे हे की जेस ले पतरस आए, ते ओस दी छाया गै किसे उप्पर पेई जा। ¹⁶ यरूशलेम दे आसे पासे दे नगरें च भी मते लोग बमारें ते अशुद्ध आत्मां दे सताएं देलाई लाईयै किटठा होंदे हे, ते सब अच्छे करी दिते जांदे हे।

¹⁷ उस बेले महायाजक ते ओस दे सारे साथी जेड़े सदुकियें दे पंथ दे हे, डाह कन्ने भरोई गे ¹⁸ ते प्रेरितें गी पकड़ीयै बंदीगृह च बंद करी दिता। ¹⁹ लेकन रातीं गी प्रभु दे इक सुर्ग दूत ने बंदीगृह दे द्वार खोलियै उन्हें बार लाइयै आखया, ²⁰ “जाओ, मंदिर च खड़ोइयै एस जीवन दी सब गल्लां लोकें गी सनाओ।”

²¹ ओह ए भोर होंदे गै मंदिर च जाइये उपदेश देने लगे। उस बेले महायाजक ते ते ओस दे साथियें आइयै महासभा गी ते इस्राएलियें दे सब पुरनियें गी किटठा किता, ते बंदी गृह चसनेया भेजया के उन्हें लेई ओंन। ²² लेकन प्यादैं उत्त्थें पुजियै उन्हें बंदीगृह च नेई दिखया, ते मुड़ियै संदेश दिता, ²³ “असैं बंदीगृह गी बड़ी चोकसी कन्ने बंद किते दा, ते पहरेवालें गी बार द्वारें उप्पर खड़ोते दे पाया; लेकन जेस लै खोलया, ते कोल कोई नी मिलया।” ²⁴ जेस लै मंदिर दे सरदार ते प्रधान याजकैं ए गल्लां सुनींयां, ते उंदे बारे च भारी चिंता च पेई गे के उंदा के ओया ²⁵ इने च किसे नै आइयै उन्हें गी बताया, “दिखो, जिन्हें गी तुसैं बंदीगृह च रखा हा, ओह मनुख मंदिर च खड़ोइयै लोकें गी उपदेश दिया करदे न।” ²⁶ उस बेले सरदार, पयादें दे कन्ने जाइयै, उन्हें लेई आया, लेकन जबरदस्ती नेई, की वे ओह लोकें कोलां डरदे हे की साड़े उप्पर पथराव नेई करन।

²⁷ उन्हैं उन्हें गी लाइयै महासभा दे सामने खड़ा करी दिता; उस बेले महायाजक ने उन्हें गी पुछ्या, ²⁸ “के असैं तुसें चिताईयै आज्ञा नेई दिती ही के तुस एस नां कन्ने उपदेश नेई देयो ? तां भी दिखो, तुसैं सारे यरूशलेम गी अपने उपदेश कन्ने भरी दिते दा ए ते ओस मनुख दा खून साड़ी मुंडी उप्पर लाना चांदे हो।” ²⁹ उस बेले पतरस ते अन्य प्रेरितैं उत्तर दिता, “मनुख दी आज्ञा कोलां बद परमातमा दी आज्ञा दा पालन करना गै साड़ा फर्ज ऐ। ³⁰ साड़े बबदादें दे परमातमा ने यीशु गी जिंदा किता, जिसी तुसैं क्रूस उप्पर लटकाइयै मारी दिता हा। ³¹ उसी गै परमातमा ने प्रभु ते उद्धार करता ठहराइयै, अपने सज्जे हथे उप्पर उच्च करी दिता, की ओह इस्राएलियें गी मन फिराव दी शक्ति ते पापें दी माफ़ी प्रदान करै। ³² आस इन गल्लें दे गुआह न ते उय्यां गै पवित्र आत्मा भी, जिसी परमातमा ने उन्हें दिता दा ऐ जेड़े ओस दी आज्ञा मनदे न।”

³³ ए सुनियै ओह जली गे, ते उन्हें मारना चाया। ³⁴ लेकन गमलीएल नां दा इक फरीसी ने जेड़ा व्यवस्थापक ते सब लोकें च माननीय हा, न्यायालय च खड़ोइयै प्रेरितें गी थोड़े समें आस्ते बार कर देने दी आज्ञा दिती। ³⁵ उस बेले ओस ने आखया, “हे इस्राएलियो, तुस जे किश इन इन्सानां कन्ने करना चांदे हो, सोची समझीये करयो। ³⁶ की वे इनें दिनें कोलां पैलैं थियूदास ए आखदे होई उठया, कि मैं भी किश एं; ते किश चार सो मनुख ओस दे कन्ने होई गे, लेकन ओह मारा गया ते जिने लोग उसी मनदे हे, सारे तितर बितर होए ते मिटी गे। ³⁷ इस दे बाद नां लिखाई दे दिनें च यहूदा गलीली उठया, ते किश लोग अपनी बखी करी लेते; ओह भी नाश होई गया ते जिने लोग उसी मनदे हे, सारे तितर बितर होई गे। ³⁸ इसे आस्ते मैं तुंदे कन्ने आखना ए, इनां इनसानां कोलां दूर गे रवो ते इंदे कन्ने किश कम्म नी रखो; की वे जे ए धर्म यां कम्म मनुख कोलां होंघन इस करी मिटी जाग; ³⁹ लेकन जे परमातमा कोलां ऐ, ते तुस उन्हें गी कदें भी नेई मिटाई सकगे। कुते एसा नेई होए के तुस परमातमा कन्ने भी लड़ने आले ठहरो।”

⁴⁰ उस बेले उन्हैं ओस दी गल्ल मनी लेती; ते प्रेरितें गी बलाइयै मार चड़ाई; ते ए आदेश देइयै शुड़ी दिता के यीशु दे नां कन्ने फिरी कोई गल्ल नेई करयो। ⁴¹ ओह इस गल्ल कन्ने आनंदित होइयै महासभा दे सामने कोलां चली गए, के आस ओस दे नां आस्ते अपमानित होने दे जोग ते ठहरे। ⁴² ओह हर रोज मंदिर च ते घर घर च उपदेश करने, ते इस गल्ल दा सुसमाचार सुनाने आस्ते के यीशु मसीह गै प्रभु ऐ नेई रुके।

¹ उनैं दिनें च जेस लै चेलें दी गिनती मती बदना लगी, उस बेलै यूनानी भाषा बोलने आले इब्रानी भाषा बोलने आलें उप्पर कुड़कुड़ाने लगे, के हर रोज दी सेवकाई च साड़ी विधवां दी सुधी नेई लेती जांदी। ² उस बेलै उन्हैं बारै चेलें दी मंडली गी अपने कोल सदियै आखया, “ए ठीक नेईयैं के आस परमातमा दा बचन शुड़ीयै खिलाने पिलाने दी सेवा च रोचे। ³ इसे आस्ते, हे प्रा ओ, अपने बीचा सत सुनाम पुरषें गी जेड़े पवित्र आत्मा ते बुधि कन्ने परिपूर्ण होंन, चुनी लेओ, के आस उन्हें इस कम्म उप्पर ठहराई देचे। ⁴ लेकन आस ते प्रार्थना च ते बचन दी सेवा च लगे रोना।” ⁵ ए गल्ल सारी मंडली गी अच्छी लगी, ते उन्हैं स्तिफनुस नां दे मनुख गी जेड़ा विश्वास ते पवित्र आत्मा कन्ने परिपूर्ण हा, ते फिलिप्पुस ते प्रुखुरुस, ते नीकानोर, ते तीमोन, ते परमिनास, ते अन्ताकियावासी नीकुलाउस गी जेड़ा यहूदी मत च आई गेदा हा, चुनी लेता। ⁶ इन्हें प्रेरितें दे सामने खड़ा किता, ते उन्हैं प्रार्थना करियै उंदे उप्पर हत्त्थ रखे।

⁷ परमातमा दा बचन फै लदा गया ते यरूशलेम च चेलें दी गिनती मती बददी गई; ते याजकें दा इक बड़ा समाज इस मत गी मनने आला होई गया।

⁸ स्तिफनुस अनुग्रह ते शक्ति कन्ने परिपूर्ण होइयै लोकें च बड़े अद्भुत कम्म ते चिन्न दसया करदा हा। ⁹ उस बेलै ओस अराधनालय बीचा जेड़े लिबिरतीनों दी आखी जांदी ही, ते कुरेनी ते सिकन्दरिया ते किलकिया ते एशिया दे लोकें बीचा इक उठियै स्तिफनुस कन्ने वाद विवाद करना लगया। ¹⁰ लेकन ओस ज्ञान ते ओस आत्मा दा जेस दे कन्ने ओह गल्लां करदा हा, ओह सामना नेई करी सके। ¹¹ एस उप्पर उन्हैं कई लोकें गी उभारया जेड़े आखना लगे, “असैं इसी मूसा ते परमातमा दे बिरोध च निंदा दियां गल्लां करदे सुना ऐ।” ¹² ते लोकें ते प्राचिनें ते शास्त्रियें गी पड़काइयै महासभा च लेई आए। ¹³ ते झूठे गवाह खड़े किते, जिन्हैं आखया, “ए मनुख इस पवित्र जगह ते एस व्यवस्था दे बिरोध च बोलना नेई शुड़दा। ¹⁴ की वे असैं उसी ऐ आखदे सुनया ए के उए यीशु नासरी इस जगह गी ढाई देग, ते उन रितियें गी बदली देग जेड़ीयां मुसे ने असें गी सोंपियां न।” ¹⁵ उस बेलै सारैं लोकैं जेड़े सभा च बैठे दे हे, ओस उप्पर दृष्टि किती ते ओस दा मुंह सुर्गदूत आला दिखया।

¹ उस बेलै महायाजक ने आखया, “के ऐ गल्लां सच न ?”

² स्तिफनुस ने आखया, “हे प्रा ओ, ते पितरो सुनो। साड़ा पिता अब्राहम हरान च बसना कोलां पैलें जेस ले मेसोपोटामिया च हा; ते तेजोमय परमातमा ने उसी दर्शन दिता, ³ ते ओस कन्ने आखया, ’तू अपने देश ते अपने कुटुम्ब कोलां निकलियै ओस देश च जा, जेड़ा मैं तुगी दसगा।’ ⁴ उस बेलै ओह कसदियें दे देशा चा निकलियै हारान च जाई बसया। ओस दे पिता दी मोत कोलां बाद परमातमा ने उसी उत्थुंआं एस देश च लाइयै बसाया जेस दे बीच हूंन तुस बसदे हो, ⁵ ते उसी किश मीरास बरना पैर रखने भर दी भी ओस च जगह नेई दिती, लेकन प्रतिज्ञा किती के मैं ऐ देश तेरे ते तेरे कोलां बाद तेरे वंश दे हत्थ करी देगा; यघपि ओस समें ओदे कोई पुत्तर भी नेई हा। ⁶ ते परमातमा ने इय्यां आखया, ’तेरी संतान दे लोग पराये देश च परदेशी होंघन, ते ओह उन्हें दास बनाघंन ते चार सो साल तकर दुःख देघंन। ⁷ फिरी परमातमा ने आखया, ’ जेस जाति दे ओह दास होंघन, उन्हें मैं दंड देगा, ते इस दे बाद ओह निकलियै इसे जगह मेरी सेवा करघंन।’ ⁸ ते ओस ने ओढे कन्ने खतना दी वाचा बनी; ते इसे दशा च इसहाक ओस कोलां पैदा ओया ते अठवें दिन ओस दा खतना किता गया, ते इसहाक कोलां याकूब ते याकूब कोलां बारां कुलपति पैदा होए। ⁹ “कुलपतियैं युसूफ कन्ने डाह करियै उसी मिस्त्र देश जाने आलें दे हत्थ बेचया। लेकन परमातमा ओस दे कन्ने हा, ¹⁰ ते उसी ओस दे सारे कलेशें कोलां शुड़ाईयै मिस्त्र दे राजा फिरोन दी दृष्टि च अनुग्रह ते बुद्धि प्रदान किती, ते ओस ने उसी मिस्त्र उप्पर ते अपने सारे घरे उप्पर हाकिम नियुक्त किता। ¹¹ उस बेलै मिस्त्र ते कनान दे सारे देश च अकाल पेय; जिस कन्ने भारी क्लेश ओया, ते साड़े बब्ब दादें गी अनाज नेई मिलदा हा। ¹² लेकन याकूब ने ए सुनीयै के मिस्त्र च अनाज ऐ, साड़े बब्ब दादें गी पैली बार भेजया ¹³ दुई बार युसूफ ने अपने आप गी भ्रां उप्पर प्रगट किता ते युसूफ दी जाति फिरोन गी मालुम होई गई। ¹⁴ उस बेलै युसूफ ने अपने पिता याकूब ते अपने सारे कुटुम्ब गी, जेड़े पचतर मनुख हे, सनेया भेजया। ¹⁵ उस बेलै याकूब मिस्त्र च गया; ते उत्थें ओह ते साड़े बब्ब दादे मरी गए। ¹⁶ उंदियां लाशां शकेम च पजाईयै ओस कब्र च रखियां, जिसी अब्राहम ने चांदी देइयै शकेम च हमोर दी संतान कोलां खरीदी लेता हा।

¹⁷ “लेकन जेस ले ओस प्रतिज्ञा दा पुरे होने दा समां कोल आया जेड़ी परमातमा ने अब्राहम कन्ने किती ही, ते मिस्त्र च ओह लोग बदी गए ते मते होई गए। ¹⁸ जेसले मिस्त्र च दुआ राजा ओया जेड़ा युसूफ गी नी जानदा हा। ¹⁹ ओस ने साड़ी जाति कन्ने चलाकी करियै साड़े बब्ब दादें कन्ने इत्थें तकर बुरा वयवहार किता, के उन्हैं अपने बच्चें गी सुटना पेया के ओह जिंदे नेई रोंन। ²⁰ ओस बेले मूसा पैदा ओया। ओह परमातमा दी दृष्टि च मता सोना हा। ओह तीन मिने तकर अपने पिता दे घर च पालया गया। ²¹ जेस ले सुटी दिता गया ते फिरोन दी कुड़ियै उसी चुकी लेता, ते अपना पुत्तर करियै पालया। ²² मुसा गी मिस्त्र दी सारी बिघा पढ़ाई गई, ते ओह बचन ते कर्म दोनीं च सामर्थी हा।

²³ “जेस लै ओह चालीं सालें दा ओया, ते ओस दे मने च आया के मैं अपने इस्राएली भ्रां कन्ने भेंट करां। ²⁴ ओस ने इक मनुख उप्पर अन्याय होंदे दिखियै ओस गी बचाया, ते मिस्त्री गी मारियै सताए दा पलटा लेता। ²⁵ ओस ने सोचया के ओस दे प्रा समझघंन के परमातमा ओस दे हत्त्थें उंदा उद्धार करग, लेकन उन्हैं नेई समझेया। ²⁶ दुए दिन जेस ले ओह अप्पुं बीचे लड़ा करदे हे, ते ओह उत्थें आई निकलया; ते ऐ आखियै उन्हें मेल करने गी समझाया, ’हे पुरुषो, तुस ते प्रा -प्रा हो, इक दुए उप्पर की करदे हो ?’ ²⁷ लेकन जेड़ा अपने पड़ोसी उप्पर न्याय करा दा हा, ओस ने उसी ए आखिये हटाई दिता, ’तुगी किस ने साड़े उप्पर हाकिम ते न्यायी ठहराया ? ²⁸ के जेस रिती कन्ने कल तू कल मिस्त्री गी मारी दिता मिगी भी मारना चाना ए ?’ ²⁹ ए गल्ल सुनीयै मूसा नसया ते मिघान देश च परदेशी होइयै रोन लगया, ते उत्थें ओदे दो पुत्तर पैदा होये।

³⁰ “जेस ले पूरे चाली साल बीती गए, ते इक सुर्गदूत ने सिनै प्हाड़ दे जंगल बीचा उसी जलदी झाड़ी दी अग्गी बीचा दर्शन दिता। ³¹ मूसा गी ए दर्शन दिखियै हरान लगया, जेस ले दिखने आस्ते कोल गया, ते प्रभु दा ए शब्द ओया, ³² मैं तेरे बब्ब दादें, अब्राहम, इसहाक ते याकूब दा परमातमा एं,’ उस बेलै मूसा कंबी उठया, इत्थें तकर के उसी दिखने दा हियाब नेई रेया। ³³ उस बेलै प्रभु ने उसी आखया, ’अपनें पैरें कोलां जूती तुआरी लै, की वे जिस जगह तू खड़ोते दा ए, ओह पवित्र जगह ऐ। ³⁴ मैं सचें गै अपनें लोकें दी जेड़े मिस्त्र बीच न, दुर्दशा गी दिखया ए; ते उंदी आह ते उंदा रोना सुनया ऐ; इसे आस्ते उन्हें छुड़ाने आस्ते उतरया ऐं। हूंन आ, मैं तुगी मिस्त्र च भेजगा।’

³⁵ “जिस मूसा गी उन्हैं ए आखियै नकारेया हा, ’तुगी कुस ने साड़े उप्पर हाकिम ते न्यायी ठहराया ए ?’ उसे गी परमातमा ने हाकिम ते छुड़ाने आला ठहराकर, ओस सुर्ग दूत दे द्वारा जिसी ओस झाड़ी बीच दर्शन दिता हा, भेजया। ³⁶ इय्ये मनुख मिस्त्र ते लाल समुंद्र ते जंगल बीच चाली साल तकर अद्भुत कम्म ते चिन्न दसी दसीये उन्हें कडी लेई आया। ³⁷ ए उए मुसा ऐ, जेस नै इस्राएलियें कन्ने आखया, ’परमातमा तुंदे भ्रां बीचा तुंदे आस्ते इक मेरे जे भविष्यवक्ता गी खड़ेरग।’ ³⁸ ए उए ऐ, जेस ने जंगल च कलीसिया दे बीच ओस सुर्ग दूत दे कन्ने सिनै प्हाड़ उप्पर ओस कन्ने गल्लां कितियां ते साड़े बब्ब दादें दे कन्ने हा, उसी गे जीवित बचन मिले के साड़ेतकर पजाए। ³⁹ लेकन साड़े बब्ब दादें ओस दी मनना नेई चाई, बरना उसी हटाइयै अपने मन मिस्त्र दी बखी फेरे, ⁴⁰ ते हारून कन्ने आखया, ’साड़े आस्ते एसा देवता बना, जेड़ा साड़े अगें अगें चले, की वे ए मूसा जेड़ा असें मिस्त्र देश बीचा लेई आया, आस नेई जाननयां की उसी के ओया ?’ ⁴¹ उन्हें दिनें च उन्हैं इक बछड़ा बनाईयै ओस दी मूर्ति दे अगें बलि चड़ाई, ते अपने हत्थें दे कम्में बीच मगन होना लगे।

⁴² इसे आस्ते परमातमा ने मूंह मोड़िये उन्हें गी शुड़ी दिता, के आकाश गन गी पुजन, जिय्यां भविष्यवक्तांन दी कताब च लिखे दा ए, ’हे इस्राएल दा घराने, के तुस जंगल च चालीसाल तकर पशु बलि ते अन्न बलि मिगी गे चढ़ांदे रे ?

⁴³ तुस मोलेक दे तम्बू ते रिफान देवता दे तारे गी लेई फिरदे हे, मतलब उन मूरतें गी जिन्हें गी तुसें दंडवत करने आस्ते बनाया हा। इसे आस्ते मैं तुसें गी बेबीलोन दे परे लेई जाईयै बसागा।’

⁴⁴ “साक्षी दा तम्बू जंगल च साड़े बब्ब दादें दे बीच हा, जिय्यां ओस ठहराया जेस ने मूसा कन्ने आखया, ’जेड़ा आकार तो दिखया ए, ओस दे अनुसार इसी बना।’ ⁴⁵ उसे तम्बू गी साड़े बब्ब दादे पूर्व काल कोलां पाइयै यहोशू दे कन्ने इत्त्थें लेई आए; जेस समें की उन्हैं अन्य जातियें उप्पर अधिकार पाया, जिन्हें परमातमा ने साड़े बब्ब दादें दे सामने कोलां कडी दिता हा, ते ओह तम्बू दाऊद दे समें तकर रेया। ⁴⁶ ओस उप्पर परमातमा ने अनुग्रह किता; इसे आस्ते ओस ने विनती किती के ओस याकूब दे परमातमा आस्ते निवास जगह बनाए। ⁴⁷ लेकन सुलेमान ने ओदे आस्ते भवन बनाया। ⁴⁸ लेकन परमप्रधान हत्थें दे बनाए घरें च नेई रोंदा, जिय्यां के भविष्यवक्ता ने आखया,

⁴⁹ ’प्रभु आखदा ए, सुर्ग मेरा सिहांसन ते धरती मेरी पैरें दे तलें दी पीढ़ी ए, मेरे आस्ते तुस किस चाल्ली दा घर बनागे ?स ते मेरे विश्राम दी केड़ी जगह होग ?

⁵⁰ के ए चीजां मेरे हत्थे दी बनाई दी नेई ?

⁵¹ “हे हठीले, ते मन ते कन दे खतना रहित लोको, तुस हमेशा पवित्र आत्मा दा बिरोध करदे हो। जिय्यां तुंदे बब्ब दादे करदे हे, उय्यां गे तुस भी करदे हो। ⁵² भविष्यवकतां बीचा कुस गी तुंदे बब्ब दादें नेई सताया ? उन्हैं ओस धर्मी दे आगमन दा पूर्व काल कोलां संदेश देने आलें गी मारी दिता; ते हूंन तुस भी पकड़ने आले ते मारी देने आले होए। ⁵³ तुसैं सुर्गदुतें दे द्वारा ठहराई दी वयवस्था ते पाई, लेकन ओस दा पालन नेई किता।”

⁵⁴ ए गल्लां सुनीयै ओह जली गए ते ओस उप्पर दंद पीह्ना लगे। ⁵⁵ लेकन ओस ने पवित्र आत्मा कोलां परिपूर्ण होइयै सुर्ग आली बखी दिखया ते परमातमा दी महिमा गी ते यीशु गी परमातमा दे सज्जे दिखिये ⁵⁶ आखया, “दिखो, मैं सुर्ग गी खुले दा, ते मनुख दे पुत्तर गी परमात्मा दे सज्जे बखी खड़ोते दे दिखना ऐ। ⁵⁷ उस बेले उन्हैं बडे शब्द कन्ने कर्लाइये कन बंद करी दिते, ते इके बारी ओस उप्पर झपटे; ⁵⁸ ते उसी नगर दे बार कडिये ओस उप्पर पथराव करना लगे। गुवाहें ने अपने कपड़े शाऊल नां दे पैरें कोल उतारिये रखी दिते। ⁵⁹ ओह स्तिफनुस उप्पर पथराव करदे रे, ते ओह ए आखदे प्रार्थना करदा रेया, “हे प्रभु यीशु, मेरी आत्मा गी ग्रहण कर।” ⁶⁰ फिरी घुटने टेकियै उच्चे शब्द कन्ने पुकारया, “हे प्रभु, ए पाप उंदें उप्पर मत ला।” ते ए आखियै ओह सेई गया।शाऊल ओस दी हत्या च शामिल हा।

¹ उसे दिन यरूशलेम दी कलीसिया दे उप्पर मता उपद्रव शुरू ओया ते प्रेरितें गी शुड़ी सारे दे सारे यहूदिया ते सामरी देशें च तितर बितर होई गए। ² किश भक्तैं स्तिफनुस गी कब्र च रखेया ते ओस आस्ते मता विलाप किता। ³ शाऊल कलीसिया गी उजाड़ा करदा हा; ते घर घर घुसियै पुरुषें ते जनानियें गी घसीटी घसीटी जेले च पांदा हा।

⁴ जेड़े तितर बितर होए हे, ओह सुसमाचार सुनांदे होई फिरे; ⁵ ते फिलिप्पुस सामरिया नगर बीच जाइये लोकें च मसीह दा प्रचार करना लगया। ⁶ जेड़ीयां गल्लां फिलिप्पुस ने बोलियां उन्हें लोकैं सुनियै ते जेड़े चिन्न ओह दसदा हा उन्हें गी दिखिये, इक चित्त होइयै मन लाया। ⁷ की वे मतें बीचा अशुद्ध आत्माएं बडे शब्द कन्ने करलांदी निकली गईं, ते मते लकवे दे रोगी ते लंगड़े भी अछे किते गए; ⁸ ते ओस नगर बीच मता आनंद छाई गया।

⁹ इस कोलां पै लें इस नगर च शमोन नां दा इक मनुख हा, जेड़ा जादू टोना करियै सामरियें दे लोकें गी हरान करदा ते अपने आप गी इक बडा पुरुष बतांदा हा। ¹⁰ छोटे कोलां बडे तकर सारे ओस दा सामान करियै आखदे हे, “ए मनुख परमातमा दी ओह शक्ति ऐ, जेड़ी महान आखी जांदी ऐ।” ¹¹ ओस ने बड़े दिनें कोलां उन्हें गी अपने जादू कोलां हरान करियै रखे दा हा, इसे आस्ते ओह ओस दी बड़ी मनदे हे। ¹² लेकन उन्हैं जेस लै फिलिप्पुस दा विशवास किता जेड़ा परमातमा दे राज अते यीशु दे नां दा सुसमाचार सुनांदा हा ते लोग के पुरुष, के घरेआली यां, बपतिस्मा लेना लगे। ¹³ उस बेले शमोन ने अप्पुं भी विशवास किता ते बपतिस्मा लेइये फिलिप्पुस कन्ने रोना लगया। ओह चिन्न ते बड़े बड़े सामर्थ दे कम्म होंदे दिखिये मता हरान होंदा हा।

¹⁴ जेस ले प्रेरितैं जेड़े यरूशलेम च हे, के सामरियैं परमातमा दा वचन मनी लेता ऐ ते पतरस ते युहन्ना गी उंदे कोल भेजया। ¹⁵ उन्हैं जाईये उंदे आस्ते प्रार्थना किती के ओह पवित्र आत्मा पांन। ¹⁶ की वे ओह अय्यें तकर उंदे बीचा कुसे दे उप्पर भी नेई उतरा हा; उन्हैं सिर्फ प्रभु यीशु दे नां दा बपतिस्मा लेता हा। ¹⁷ उस बेले उन्हैं उंदे उप्पर हत्थ रखे ते उन्हैं पवित्र आत्मा पाया। ¹⁸ जेस ले शमोन दिखया के प्रेरितें दे हत्थ रखने कन्ने पवित्र आत्मा दिया जांदा ए, ते उंदे कोल पैसे आनीयै बोलया, ¹⁹ “ए अधिकार मिगी भी देओ, के जेस दे उप्पर भी हत्थ रखां ओह पवित्र आत्मा पा।” ²⁰ पतरस ने ओस कन्ने आखया, “तेरे पैसे तेरे कन्ने नाश होंन, की वे तो परमातमा दा दान पैसें कन्ने खरीदने दा बिचार किता। ²¹ एस गल्ल बीच ना तेरा हिस्सा ऐ, ना भाग; की वे तेरा मन परमातमा दे अगें सीधा नेईयैं। ²² इसे आस्ते एस बुराई कोलां मन फेरिये प्रभु अगें प्रार्थना कर, सम्भव ऐ के तेरा मन दा बिचार माफ़ किता जाग। ²³ की वे मैं दिखना ए के तू पित्त जेई कड़वाहट ते अधर्म दे बंदन च पेदा ऐ।” ²⁴ शमोन ने उत्तर दिता, “तुस मेरे आस्ते प्रभु अगें प्रार्थना करो के जेड़ियां गल्लां तुसैं बोलियां, उंदे बीचा कोई भी मेरे उप्पर नेई आ पवे।”

²⁵ इसे आस्ते ओह गुआइ देइयै ते प्रभु दा बचन सुनाईयै यरूशलेम गी बापस गए, ते सामरियें दे मते ग्रां च सुसमाचार सनांदे गए।

²⁶ फिरी प्रभु दे इक सुर्गदूत ने फिलिप्पुस गी आखया, “उठ ते दक्खिन दी बखी ओस रस्ते उप्पर जा, जेड़ा यरूशलेम दा गाजा गी जांदा ऐ।” ए रेगिस्तानी रस्ता ऐ। ²⁷ ओह उठिए चली गया, ते दिखो, कूश देश दा इक मनुख आ करदा हा जेड़ा खोजा ते कूशियें दी रानी कन्दाके दा मंत्री ते खंजाची हा। ओह अराधना करने गी यरूशलेम आया हा। ²⁸ ओह अपने रथ उप्पर बैठा हा, ते यशायाह भविष्यवक्ता दी कताब पढ़दे होई बापस जा करदा हा। ²⁹ उस बेले आत्मा ने फिलिप्पुस गी आखया, “कोल जाइये एस रथ दे कन्ने होई जा।” ³⁰ फिलिप्पुस ओस दी बखी दोड़या ते उसी यशायाह भविष्यवक्ता दी कताब गी पढ़दै सुनया, ते पूछ्या, “तू जे पढ़ा करना ऐ के उसी समझना भी ऐ ?” ³¹ ओस ने आखया, जेस ले तकर कोई मिगी नेई समझाए ते मैं किय्यां समझां ?” ते ओस ने फिलिप्पुस अगे विनती किती के ओह चढ़ीयै ओस दे कोल बैठे।

³² पवित्रशास्त्र दा जेड़ा अध्याय ओह पढ़ा करदा हा, ओह ए हा: “ओह भिड्डे दे समान वध होने आस्ते पजाया गया, ते जिय्यां मेम्ना अपने ऊन कतरने आलें दे सामने चुपचाप रोंदा ए, उय्यां गे ओस ने अपना मूंह नेई खोलया।

³³ ओस दी दीनता च ओस दा न्याय नेई होई सकया। ओस दे समें दे लोकें दा बर्णन कुन्न करग ? की वे धरती कोलां ओस दा प्राण चुकया जांदा ऐ।”

³⁴ एस उप्पर खोजे ने फिलिप्पुस गी पूछ्या, “मैन्तेरे अगें विनती करना ऐ, ए सना के भविष्यवक्ता ए किस दे बारे च आखदा ऐ, अपने यां किसे दुए दे बारे च ?” ³⁵ उस बेले फिलिप्पुस ने अपना मूंह खोलया, ते इसे शास्त्र दी शुरुआत कोलां उसी यीशु दा सुसमाचार सनाया। ³⁶ रस्ते च चलदे चलदे ओह किसे पानी आली जगह पुजे। उस बेले खोजे ने आखया, “दिख इत्थें पानी ऐ, हूंन मीगी बपतिस्मा लेने आस्ते के रोक ऐ।” ³⁷ फिलिप्पुस ने आखया, “जे तू सारे मने कन्ने विश्वास करना ऐ ते लेई सकना ए।” ओस ने उत्तर दिता, “मैं विशवास करना ऐ के यीशु मसीह परमातमा दा पुत्तर ऐ।” ³⁸ उस बेले ओस ने रथ गी खड़ेरने दी आज्ञा दिती, ते फिलिप्पुस ते खोजा दोनों पानी बीच उतरी गए, ते ओस ने खोजा गी बपतिस्मा दिता। ³⁹ जेस ले ओह पानी बीचा निकलिये उप्पर आए, ते प्रभु दा आत्मा फिलिप्पुस गी चुकी लेई गया, ते खोजै उसी फिरी नेई दिखया, ते ओह आनंद करदे अपने रस्ते चली गया। ⁴⁰ फिलिप्पुस अशदोद च आई निकलिया, ते जेस ले तकर कैसरिया च नेई पुजया, उस बेले तकर नगर नगर सुसमाचार सनांदा गया।

¹ शाऊल जेड़ा प्रभु दे चेलें गी तमकाने ते घात करने दी धुन च हा, महायाजक दे कोल गया ² ते ओस कोलां दमिश्क दे अराधनालें दे नां उप्पर एस अभिप्राय दीयां चिट्ठियाँ मंगियां के चाहे पुरुष चाहे घरेआली, जिन्हें गी ओह एस पंथ उप्पर पा उन्हें गी बनिये ओह यरूशलेम गी लेई आए। ³ लेकन चलदे चलदे जेस ले ओह दमिश्क दे कोल पुजया, ते इकाइक अंबरा ओस दे चोनीं बखी लो चमकी, ⁴ ते ओह धरती उप्पर किरी गया ते ए शब्द सुनया, “ए शाऊल, ए शाऊल, तू मीगी की सताना ऐ ?” ⁵ ओस ने पुछया, “ए प्रभु तू कुन्न ऐ ?” ओस ने आखया, “मैं यीशु ऐं, जिसी तू सता करना ए। ⁶ लेकन हूंन उठिये नगर च जा, ते जे तुगी करना ऐ ओह तेरे कन्ने आखा जाग।” ⁷ जेड़े मनुख ओस दे कन्ने हे, हरान रेई गए; की वे शब्द ते सुनदे हे लेकन कुसे गी दिखदे नेई हे। ⁸ उस बेले शाऊल धरती उपरा उठया, लेकन जेस ले अखां खोलियां ते उसी किश भी नेई लबया, ते ओह ओस दा हत्थ पकड़िये दमिश्क च लेई गए। ⁹ ओह तीन दिन तकर नेई दिखी सकया, ते ना खादा ते ना पीता।

¹⁰ दमिश्क च हनन्याह नां दा इक चेला हा, ओस कन्ने प्रभु ने दर्शन च आखया, “ए हनन्याह !” ओस ने आखया, “हां, प्रभु।” ¹¹ उस बेले प्रभु ने उसी आखया, “उठिये ओस गली च जा जेड़ी ’सीधी’ आखी जांदी ऐ, ते यहूदा दे घर च शाऊल नां दा इक तरसुसवासी गी पूछ; की वे दिख, ओह प्रार्थना करादा ए, ¹² ते ओस ने हनन्याह नां दे इक मनुख गी कोल आंदे ते अपने उप्पर हत्थ रखदे दिखया ऐ; तां जे फिरी दृष्टि पाई सके।” ¹³ हनन्याह ने उत्तर दिता, “हे प्रभु, मैं एस मनुख दे बारे च मतें कोलां सुनेदा ऐ के एस यरूशलेम च तेरे पवित्र लोकें कन्ने बड़ी बड़ीयां बराइयां कितीयां न; ¹⁴ ते इत्थें भी इसी प्रधान याजकें दी तरफ दा अधिकार मिलया ए के जेड़े लोग तेरा नां लेंदे न, उन सबनीं गी बनी लै।” ¹⁵ लेकन प्रभु ने ओस कन्ने आखया, “तू चली जा; की वे ओह ते अन्यजाती ते राजा ते इस्राएलीयें दे सामने मेरा चुने दा पांडा ऐ। ¹⁶ ते मैं उसी सनागा के मेरे नां आस्ते उसी कैसा दुःख चुकना पोग।” ¹⁷ उस बेले हनन्याह उठियै ओस घर गया, ते ओस उप्पर अपना हत्थ रखिये आखया, “ हे प्रा शाऊल, प्रभु, मतलब यीशु, जेड़ा ओस रस्ते च, जेस च तू आया तुगी लबया हा, उसै मीगी भेजया ए के तू फिरी दिखी सकां ते पवित्र आत्मा कन्ने परिपूर्ण होई जाए।” ¹⁸ ते फोरन ओस दी अखीं बीचा छिलके जे कीरे ते ओह दिखना लगया, ते उठिये बपतिस्मा लेता;

¹⁹ फिरी रुट्टी खाईयै जोर पाया। ओह कई दिन उन्हें चेलें कन्ने रेया जेड़े दमिश्क च हे। ²⁰ ते ओह फोरन अराधनालें च यीशु दा प्रचार करना लगया के ओह परमातमा दा पुत्तर ऐ। ²¹ सारे सुनने आले हरान होइयै आखना लगे, “के ए उए मनुख नेईयैं जेड़ा यरूशलेम च उन्हें जेड़े एस नां गी लेंदे हे, नाश करदा हा; ते इत्थें भी एस आस्ते गे आया हा के उन्हें बनियै प्रधान याजकें दे कोल लेई जाए ?” ²² लेकन शाऊल होर भी सामर्थी होंदा गया, ते एस गल्ल दा सबूत देई देईये के मसीह इय्ये ऐ, दमिश्क च रोने आले यहूदियें दा मूंह बंद करदा रेया।

²³ जेस ले मते दिन बिती गए, ते यहूदियें मिलियै उसी मारी देने दी सलाह बनाइ। ²⁴ लेकन उंदी सलाह शाऊल गी पता चली गई। ओह ते उसी मारने आस्ते रात दिन रस्तें उप्पर घात करने आस्ते लगे रेंदे हे। ²⁵ लेकन रातीं ओस दे चेलैं उसी टोकरे उप्पर बैठाया, ते शहरपनाह उपरा लटकाईये तुआरी दिता।

²⁶ यरूशलेम च पुजियै ओस ने चेलें दे कन्ने मिलने दा प्रयत्न किता; लेकन सारे ओस कोलां डरदे हे, की वे उन्हें विशवास नेई होंदा हा, के ओह भी चेला ऐ। ²⁷ लेकन बरनबास ने उसी अपने कन्ने प्रेरितें दे कोल लेई जाइयै सनाया के एस ने किस रीती कन्ने रस्ते च प्रभु गी दिखया, ते ओस ने एस कन्ने गल्लां कितियां; फिरी दमिश्क च एस ने किय्यां हियाब कन्ने यीशु दे नां कन्ने प्रचार किता। ²⁸ ओह उंदे कन्ने यरूशलेम च ओंदा जांदा रेया ²⁹ ते बेडरा होइयै प्रभु दे नां कन्ने प्रचार करदा हा; ते यूनानी भाषा बोलने आले यहूदियें कन्ने गल्ल बात ते वाद विवाद करदा हा; लेकन ओह उसी मारने दा प्रयत्न करने लगे। ³⁰ ए जानियै उसी प्रा कैसरियै लेई आए, ते तरसुस गी भेजी देता।

³¹ एस चाल्ली सारे यहूदिया, ते गलील, ते सामरिया च कलीसिया गी चैन मिलया, ते ओस दी उन्नति होंदी गई; ते ओह प्रभु दे डर ते पवित्र आत्मा दी शान्ति च चलदी ते बददी गई।

³² फिरी एसा ओया के पतरस हर जगह फिरदे होई, उन पवित्र लोकें दे कोल पुजया जेड़े लुद्दा च रोंदे हे। ³³ उत्थें उसी एनियास नां दे लकवे दा रोगी इक मनुख मिलया, जेड़ा आठ सालें कोलां खटे उप्पर पेदा हा। ³⁴ पतरस ने उसी आखया, “हे एनियास ! यीशु मसीह तुगी चंगा करदा ऐ। उठ, अपना बिछोना बिछा।” उस बेले फोरन ओह उठी खड़ा ओया। ³⁵ उस बेले लुद्दा ते शरोन दे सारे रोने आले उसी दिखिये सारे प्रभु दी बखी फिरे।

³⁶ याफा च तबीता मतलब दोकरास नां दी इक बिश्वासनी रोंदी ही। ओह बड़े भले भले कम्म ते दान करदी ही। ³⁷ उन्हें दिनें च ओह बीमार होइयै ओह मरी गई; ते उन्हैं नहलाइयै अटारी उप्पर रखी दिता। ³⁸ इए आस्ते के लुद्दा याफा दे कोल हा, चेलैं ए सुनीयै के पतरस उत्थें ऐ, दो मनुख भेजियै उस कन्ने विनती किती, “साड़े कोल आने गी देर ना कर।” ³⁹ उस बेले पतरस उठीयै, उंदे कन्ने होई गया, ते जेस ले ओह पुजया ते ओह उसी ओस अटारी उप्पर लेई गए। सारियां बिधवां रोंदींयां होई ओस दे कोल आई खड़ोतीयां, ते जेड़े कुरते ते कपड़े दोरकास ने उंदे कन्ने रोंदे होई बनाए हे, दसना लगियां। ⁴⁰ उस बेले पतरस ने सारें गी बार करी दिता, ते घुटने टेकियै प्रार्थना किती ते लाश दी बखी दिखिये आखया, “हे तबीता, उठ।” उस बेले ओस ने अपनियां अखां खोली दितियां; ते पतरस गी दिखिये उठी बेई। ⁴¹ ओस ने हत्थ देइये उसी ठुआलया, ते ते पवित्र लोकें ते बिधवाएं गी बलाइयै उसी ज़िंदा दसी दिता। ⁴² ए गल्ल सारे याफा च फैली गई; ते बथेरैं प्रभु उप्पर बिश्वास किता। ⁴³ ते पतरस याफा च शमोन नां दे किसे चमड़े दा कारोबार करने आले दे इत्थें मते दिन रेया।

¹ कैसरिया च कुरनेलियुस नां दा इक मनुख हा, जेड़ा इतालियानी नां दी पलटन दा सूबेदार हा। ² ओह भक्त हा, ते अपने सारे घराने सने परमातमा कोलां डरदा हा, ते यहूदी लोकें गी मता दान दिंदा, ते बराबर परमातमा कन्ने प्रार्थना करदा हा। ³ ओस ने दिन ते त्रिये पहर दे कोल दर्शन च साफ़ रूप कन्ने दिखया के परमातमा दा इक सुर्गदूत ओस दे कोल नेड़े आइयै आखदा ऐ, “हे कुरनेलियुस !” ⁴ ओस ने उसी ध्यान कन्ने दिखया ते डरिये आखया, “हे प्रभु, के ऐ ?” ओस ने ओस कन्ने आखया, “तेरी प्रार्थना ते तेरे दान स्मरण करने आस्ते परमातमा दे सामनै पुजे न; ⁵ ते हूंन याफा च मनुख भेजीयै शमोन गी, जेड़ा पतरस आखा जांदा ए, बलाई लै। ⁶ ओह शमोन, चमड़े दे धंन्धा करने आले दे इत्थें मेहमान ऐ, जेस दा घर समुंद्र दे कंडे ऐ।” ⁷ जेस ले ओह सुर्गदूत जेस ने ओस कन्ने गल्लां कितियां हियां चली गया, ते ओस ने दो सेवक, ते जेड़े ओस दे कोल उपस्थित रेया करदे हे उंदे बीचा इक भक्त सिपाही गी बलाया, ⁸ ते उन्हें सारियां गल्लां सनाइयै याफा गी भेजया।

⁹ दुए दिन जेस ले ओह चलदे चलदे नगर दे कोल पुजे, ते दोपैरीं दे कोल पतरस छते उप्पर प्रार्थना करने चढ़या। ¹⁰ उसी भूख लगी ते किश खाना चांदा हा, लेकन जेस ले ओह तेयारी करा दे हे ते ओह बेसुध होई गया; ¹¹ ते ओस ने दिखया, के आकाश खुली गया; ते इक पात्र बडी चादर जेई चोनीं कोनें कोलां लटकदा, धरती आली बखी उतरा करदा ऐ। ¹² जेस दे बीच धरती दे सारे किसम दे चोपाए ते रिंगने आले जंतु ते आकाश दे पक्षी हे। ¹³ उसी इक एसा शब्द सुनाई दिता, “ए पतरस उठ, मार ते खा।” ¹⁴ लेकन पतरस ने आखया, “नेई प्रभु, कदें भी नेई; की वे मैं कदें कोई अपवित्र चीज नेई खादी ऐ।” ¹⁵ फिरी दुई बार उसी शब्द सुनाई दिता, “जे किश परमातमा ने शुद्ध ठहराया ऐ, उसी तू अशुद्ध मत बोल।” ¹⁶ तिन बारी एसा गे ओया; उस बेले फोरन ओह पात्र आकाश उप्पर चुकी लेता गया।

¹⁷ जेस ले पतरस अपने मन च दुविधा च हा, के ए दर्शन जेड़ा मैं दिखया ओह के होई सकदा ऐ, ते दिखो, ओह मनुख जिन्हें कुरनेलियुस ने भेजया हा, शमोन दे घरे दा पता लाइयै दरवाजे उप्पर आई खड़ोते, ¹⁸ ते पुकारीयै पूछना लगे, “के शमोन जेड़ा पतरस आखा जांदा ए, इत्थें गै मेहमान ऐ ?” ¹⁹ पतरस ते ओस दर्शन उप्पर सोचा गे करदा हा, के आत्मा ने उसी आखया, “दिख, तीन मनुख तेरी खोज च न। ²⁰ इसे आस्ते उठियै थले जा, ते बे धड़क उंदे कन्ने होई जा; की वे मैं गे उन्हें भेजया ऐ।” ²¹ उस बेले पतरस ने उतरियै उन्हें इन्सानें कन्ने आखया, “दिखो, जेस दी खोज तुस करा करदे हो, ओह मैं गैं।तुंदे आने दा के कारण ऐ ?” ²² उन्हैं आखया, “कुरनेलियुस सुबेदार जेड़ा धर्मी ते परमातमा कोलां डरने आला ते सारी यहूदी जाति च सुनाम मनुख ए, ओस ने इक पवित्र सुर्ग दूत कोलां ए निर्देश पाया ऐ के तुगी अपने घर बलाइयै तेरे कोलां वचन सुने।”

²³ उस बेले ओस ने उन्हें कोल उंदी परोहनचारी किती। दुए दिन ओह उंदे कन्ने गया, ते याफा ते भ्रां बीचा किश ओस दे कन्ने होई गए। ²⁴ दुए दिन ओह कैसरिया पुजे, ते कुरनेलियुस अपने कुटम्बियें गी ते प्यारे मित्रें गी किटठा करियै उंदा इंतज़ार करादा हा। ²⁵ जेस ले पतरस कोल आ करदा हा, ते कुरनेलियुस ने ओस कन्ने भेंट किती, ते ओस दे पैरें च किरियै उसी प्रणाम किता; ²⁶ लेकन पतरस ने उसी ठुआलीये आखया, “खड़ा हो, मैं भी ते मनुख गै।” ²⁷ ते ओस कन्ने गल्ल बात करदा कोल गया, ते मतें लोकें गी किटठा दिखीयै ²⁸ उंदे कन्ने आखया, “तुस जानदे हो के अन्यजाति दी संगती नेई करयो जां ओस दे उत्थें जाना यहूदी आस्ते अधर्म ऐ, लेकन परमातमा ने मीगी बताया ऐ के किसे भी इंसान गी अपवित्र जां अशुद्ध नेई बोलां। ²⁹ इसे आस्ते जेस ले मैं बुलाया गया ते बगैर किश अखे दे चली आया। हूंन मैं पूछना ऐ के मीगी किस कम्म आस्ते बुलाया गया ?”

³⁰ कुरनेलियुस ने आखया, “इसे घड़ी, पुरे चार दिन होए, मैं अपने घर च त्रिये पहर प्रार्थना करादा हा; ते दिखो, इक पुरुष चमकने आला कपड़ा लाए दै, मेरे सामने आई खड़ोता ³¹ ते आखना लगया, ’हे कुरनेलियुस, तेरी प्रार्थना सुनी लेती गई ऐ ते तेरे दान परमातमा दे सामने स्मरण किते गए न। ³² इसे आस्ते किसे गी याफा भेजियै शमोन गी जेड़ा पतरस आखा जांदा ऐ, बला। ओह समुंद्र दे कंडे शमोन, चमड़े दे धंन्धा करने आले दे घर च मेहमान ऐ।’ ³³ उस बेले फोरन मैं तेरे कोल लोग भेजे, ते तो भला किता जेड़ा आई गया। हूंन आस सारे इत्थें परमातमा दे सामने न, तां जे जे किश परमातमा ने तेरे कन्ने आखया ऐ उसी सुनचे।”

³⁴ उस बेले पतरस ने आखया, “हूंन मीगी पका होई गया के परमातमा किसे दा भी पक्ष नेई करदा, ³⁵ बरना हर जाति च जेड़ा ओस कोलां डरदा ऐ, ओह उसी भांदा ऐ। ³⁶ जेड़ा वचन ओस ने इस्राएलियें दे कोल भेजया, जेस ले ओस ने यीशु मसीह दे द्वारा (जेड़ा सारां दा प्रभु ऐ) शान्ति दा सुसमाचार सनाया, ³⁷ ओह वचन तुस जानदे हो, जेड़ा यूहन्ना दे बपतिस्मा दे प्रचार दे बाद गलील कोलां शुरू होइयै सारे यहूदिया ह फैली गया: ³⁸ परमातमा ने किस रिती कन्ने यीशु नासरी गी पवित्र आत्मा ते सामर्थ कन्ने अभिषेक किता; ओह भलाई करदा ते सारें गी जेड़े शैतान दे सताए दे हे, अच्छा करदा फिरया, की वे परमातमा ओदे कन्ने हा। ³⁹ आस सारे उन कम्में दे गुआह न; जेड़ा ओस ने यहूदिया दे देश ते यरूशलेम च भी किते, ते उन्हैं उसी काठे उप्पर लटकाइयै मारी दिता। ⁴⁰ उसी परमातमा ने त्रिये दिन ज़िंदा किता, ते प्रगट भी करी दिता ऐ; ⁴¹ सारें लोकें उप्पर नेई मगर उन गवाएं उप्पर जिन्हें गी परमातमा ने पैलें दा चुनी लेता हा, मतलब साड़े उप्पर जिन्हैं ओस दे मरें होएं बीचा जिंदे होने कोलां बाद ओस कन्ने खादा पीता; ⁴² ते ओस ने असें आज्ञा दिती के लोकें ह प्रचार करो ते गुआई देओ, के ए उए ऐ के जिसी परमातमा ने जिंदे ते मरें दा न्यायी ठहराया ऐ। ⁴³ ओस दी सारे भविष्यवक्ता गुआइ दिंदे न के जेड़ा कोई ओस उप्पर बिश्वास करग, ओस गी ओस दे नां द्वारा पापें दी माफ़ी मिलग।”

⁴⁴ पतरस ए गल्लां आखा गे करदा हा के पवित्र आत्मा वचन दे सब सुनने आलें उप्पर उतरी आया। ⁴⁵ ते जिन्ने खतना किते दे विश्वासी पतरस दे कन्ने आए दे हे, ओह सारे हरान होए के अन्यजातियें उप्पर भी पवित्र आत्मा दा दान उंडेला गया ऐ। ⁴⁶ की वे उन्हैं उन्हें भांति भांति दी भाषा बोलदे अते परमातमा दी बड़ाई करदे सुनया। एस उप्पर पतरस ने आखया, ⁴⁷ “के कोई पानी दी रोक करी सकदा ए के ए बपतिस्मा नेई पांन, जिन्हैं साड़े जेया पवित्र आत्मा पाया ऐ ?” ⁴⁸ ते ओस ने आज्ञा दिती के उन्हें यीशु मसीह दे नां कन्ने बपतिस्मा दिता जा। उस बेलै उन्हैं ओस कन्ने विनती किती के किश दिन होर उंदे कन्ने रवै।

¹ फिरी प्रेरितैं ते भ्रांएं नै जेड़े यहूदिया च हे सुनया के अन्यजातियैं भी परमातमा दा वचन मनी लेता ए। ² इस आस्ते पतरस यरूशलेम च आया, ते खतना किते दे लोग ओस कन्ने वाद विवाद करना लगे, ³ “तो खतना रहित लोकें दे उत्थें जाइयै उंदे कन्ने खादा।” ⁴ उस बेले पतरस ने उन्हें शुरू कोलां क्रमानुसार आखी सनाया: ⁵ “मैं याफा नगर च प्रार्थना करादा हा, ते बेसुध होइयै इक दर्शन दिखया के इक पात्र, बड्डी चादर दे समान चोनीं कोनें कोलां लटकाएदा दा, आकाश कोलां उतरियै मेरे कोल आया। ⁶ जेस ले मैं ओस उप्पर ध्यान किता, ते ओस च धरती दे चोपाए ते वनपशु ते रिंगने आले जंतु ते आकाश दे पक्षी दिखे; ⁷ ते ए शब्द भी सुनया, ’हे पतरस उठ, मार ते खा।’ ⁸ मैं आखया, ’नेई प्रभु, नेई; की वे कोई अपवित्र जां अशुद्ध चीज मेरे मूंह च कदें भी नेई गई।’ ⁹ एस दे उत्तर लेई आकाश बीचा दुई बार ए शब्द ओया, ’जे किश परमातमा ने शुद्ध ठहराया उसी अशुद्ध मत बोल।’ ¹⁰ तीन बार एसा गे ओया; उस बेले सब किश फिरी आकाश उप्पर चुकी लेता गया। ¹¹ ते दिखो, फोरन तीन मनुख जेड़े कैसरिया च मेरे कोल भेजे हे, ओस घर उप्पर जेस च आस हे, आई खड़ोते। ¹² उस बेले आत्मा ने मीगी उंदे कन्ने बे धड़क होने गी आखया, ते ए छे प्रा भी मेरे कन्ने मेरे कन्ने होई गे; ते आस ओस मनुख दे घर गे। ¹³ ओस ने असें बताया, के ओस ने इक सुर्गदुत गी अपने घर च खड़ोते दे दिखया, जेस ने उसी आखया, ’याफा च मनुख भेजीयै शमोन गी जेड़ा पतरस आखा जांदा ऐ, बलाई लै। ¹⁴ ओह तुंदे कन्ने एसी गल्लां आखग, जेस दे द्वारा तू ते तेरा सारा घराना उध्दार पाग।’ ¹⁵ जेस लै मैं गल्लां करना लगया, ते पवित्र आत्मा उंदे उप्पर उसे रिती कन्ने उतरया जिस रिती कन्ने शुरू च साड़े उप्पर उतरया हा। ¹⁶ उस बेले मीगी प्रभु दा ए वचन स्मरण आया; जेड़ा ओस ने आखया हा, ’यूहन्ना ने ते पानी कन्ने बपतिस्मा दिता, लेकन तुस पवित्र आत्मा कन्ने बपतिस्मा पागे।’ ¹⁷ इसे आस्ते परमातमा ने उन्हें भी इय्ये दान दिता, जेड़ा असें प्रभु यीशु मसीह उप्पर विशवास करने दे द्वारा मिलया हा; ते मैं कुन्न हा जेड़ा परमातमा गी रोकी सकदा ?” ¹⁸ ए सुनिये ओह चुप रे, ते परमातमा दी बड़ाई करियै आखना लगे, “इस करी ते परमातमा ने अन्यजातियें गी भी जीवन आस्ते मन फेरने दा दान दिता ऐ।”

¹⁹ जेड़े लोग ओस क्लेश दे मारे जेड़ा स्तिफनुस दे कारण पेया हा, तितर -बितर होई गे हे, ओह फिरदे फिरदे फीनीके ते साइप्रस ते अन्ताकिया च पुजे; लेकन यहूदियें गी शुड़ी किसे होर गी वचन नेई सुनांदे हे। ²⁰ लेकन उंदे बीचा किश साइप्रसवासी ते कुरेनी हे, जेड़े अन्ताकिया च आइयै यूनानीयें गी भी प्रभु यीशु दे सुसमाचार दियां गल्लां सुनाना लगे। ²¹ प्रभु दा हत्थ उंदे उप्पर हा, ते मते लोग विशवास करियै प्रभु दी बखी फिरे। ²² जेस ले उंदी चर्चा यरूशलेम दी कलीसिया दे सुनने च आई, ते उन्हैं बरनबास गी अन्ताकिया भेजया। ²³ ओह उत्थें पुजियै ते परमातमा दे अनुग्रह गी दिखियै आनंदित ओया, ते सबनीं गी ए उपदेश दिता के तन मन लाईयै प्रभु कन्ने लिपटे रवो। ²⁴ ओह इक भला मनुख हा, ते पवित्र आत्मा ते विशवास कन्ने परिपूर्ण हा; ते बाकी मते लोक प्रभु च आई मिले। ²⁵ उस बेले ओह शाऊल गी तुपने आस्ते तरसुस गी चली गया। ²⁶ जेस ले ओह ओस कन्ने मिलया ते उसी अन्ताकिया लेई आया; ते एसा ओया के ओह इक साल तकर कलीसिया दे कन्ने मिलदे ते ते मतें लोकें गी उपदेश दिंदे रे; ते चेले सबनी कोलां पैलें अन्ताकिया वः गे मसीह आखे गए।

²⁷ उन्हें दिनें च गे कई भविष्यवक्ता यरूशलेम बीचा अन्ताकिया आए। ²⁸ उंदे बीचा अगबुस नां दे इक नै खड़ोइयै आत्मा दी प्रेरणा च ए बताया के सारे संसार च बड़ा काल पोग -ओह काल क्लौदियुस दे समें च पेया। ²⁹ उस बेले चेलैं निर्णय किता के हर इक अपनी अपनी पूंजी दे मताबक यहूदिया च रहने आले प्रां दी मदद आस्ते किश भेजै। ³⁰ उन्हैं एसा गे किता; ते बरनबास ते शाऊल दे हत्थै प्राचीनें दे कोल किश भेजी दिता

¹ ओस समें हेरोदेस राजा ने कलीसिया दे कई इन्सानें गी सताने आस्ते उंदे उप्पर हत्थ पाए। ² ओस ने यूहन्ना दे प्रा याकूब गी तलवार कन्ने मराई दिता। ³ जेस ले ओस नै दिखया के यहूदी लोग एस कन्ने आनंदित होंदे न, ते ओस ने पतरस गी भी पकड़ी लेता ओह दिन अखमीरी रुट्टी दे दिन हे। ⁴ ओस ने उसी पकड़ियै जेले च पाया, ते चार चार सपाइयें दे चार पहरें च रखया; एस बचार कन्ने के फसह दे बाद उसी लोकें दे सामने लाए। ⁵ जेले च पतरस बंद हा; लेकन कलीसिया ओदे आस्ते लो लाइयै प्रार्थना करा करदी ही।

⁶ जेस ले हेरोदेस उसी लोकें दे सामने लाने च हा, उसे राती पतरस दो जंजीरें कन्ने बने दा दो सपाइयें बीच सो करदा हा; ते चोकीदार दरवाजे उप्पर जेले दी रखवाली करादे हे। ⁷ ते दिखो, प्रभु दा इक सुर्गदूत आई खड़ोता ते ओस कोठरी च लो चमकी, ते ओस ने पतरस दी पसली उप्पर हत्थ मारीयै उसी जगाया ते आख्या, “उठ, जल्दी कर। ते ओस दे हत्थें बीचा जंजीरां खुलियै किरी गईयां। ⁸ उस बेले सुर्गदूत ने उसी आखया, “कमर बन, ते अपने जूते लाई लै।”ओस ने उय्यां गे किता। फिरी ओस ने उसी आखया, “अपना कपड़ा लाइयै मेरे पीछें होई जा।” ⁹ ओह निकलियै ओस दे पीछें होई गया; लेकन ए नेई जानदा हा के जे किश सुर्गदूत करादा ऐ ओह सच ए, बरना ए समझया के मैं दर्शन दिखा करना ए। ¹⁰ उस बेले ओह पैले ते दुए पहर कोलां निकलियै ओस लोहे दे फाटक उप्पर पुजे, जेड़ा नगर आली बखी ऐ। ओह उंदे आस्ते आप कोलां आप गे खुली गया, ते ओह निकलियै इक गे गली होइयै गे, ते फोरन गै सुर्गदूत उसी शुड़ीयै चली गया। ¹¹ उस बेले पतरस नै सुचेत होइयै आखया, “हूंन मैं सच जानी लेता ए के प्रभु ने अपना सुर्गदूत भेजियै मीगी हेरोदेस दे हत्थे बीचा शुड़ाई लेता, ते यहूदियें दी सारी आशा तोड़ी दिती ऐ।”

¹² ए जानियै ओह ओस यूहन्ना दी मां मरियम दे घर आया, जेड़ा मरकुस आखा जांदा ऐ। ¹³ जेस ले ओस फाटक दी खिड़की खड़काइ, ते रुद्दे नां दी इक दासी दिखने आई। ¹⁴ पतरस दा शब्द पनछानियै ओस ने आनंद दे मारे फाटक नेई खोलया, लेकन दोड़ीयै कोल गई ते सनाया के पतरस दरवाजे उप्पर खड़ोते दा ए। ¹⁵ उन्हैं उसी आखया, “तू पागल ए।”लेकन ओह दृढ़ता कन्ने बोली के एसा गे ऐ। उस बेले उन्हैं आखया, “ओस दा सुर्गदूत होना।” ¹⁶ लेकन पतरस खड़कांदा गे रेया: इस आस्ते उन्हैं खिड़की खोली, ते उसी दिखियै हरान रेई गे। ¹⁷ उस बेले ओस नै उन्हें गी हत्थे कन्ने संकेत किता के चुप रोंन; ते उन्हें सनाया के प्रभु किस रिती कन्ने उसी जेले बीचा कडी लेई आया ऐ। फिरी आखया, “याकूब ते भ्रां गी ऐ गाल सनाई देयो।”उस बेले निकलियै दुई जगह चली गया।

¹⁸ भोर गी सपाईयें च मती हलचली मची गई के पतरस दा के ओया। ¹⁹ जेस ले हेरोदेस ने ओस दी खोज किती ते नेई पाया, ते चोकीदारें दी जाच करीये आज्ञा दिती के ओह मारी दिते जांन: ते ओह यहूदिया गी शुड़ीयै कैसरिया च जाइयै रोना लगया।

²⁰ हेरोदेस सूर ते सैदा दे लोकें कोलां मता अप्रसन्न हा। इसे आस्ते ओह इक चित होइयै ओस दे कोल आए, ते बलास्तुस गी जेड़ा राजा दा इक कर्मचारी हा, मनाईये मेल करना चाया; की वे राजा दे देश चा उंदे देश दा पालन पोषण होंदा हा। ²¹ ठहराए दे दिन हेरोदेस राजवस्त्र पाइयै सिंहासन उप्पर बैठा, ते उन्हें व्याख्यान देना लगया। ²² उस बेले लोग पुकारी उठे, “ए ते मनुख दा नेई परमातमा दा शब्द ऐ।” ²³ उसे बेले प्रभु दे इक सुर्गदूत ने फोरन उसी मारया, की वे ओस परमातमा गी महिमा नेई दिती; ते उसी कीड़े पे ते मरी गया।

²⁴ लेकन परमातमा दा वचन बददा ते फैलदा गया।

²⁵ जेस ले बरनबास ते शाऊल अपनी सेवा पूरी करी चुके ते यूहन्ना गी जेड़ा मरकुस आखा जांदा ए, कन्ने लेइयै यरूशलेम दा बापस आए।

¹ अन्ताकिया दी कलीसिया च कई भविष्यवक्ता ते उपदेशक हे; जिय्यां: बरनबास ते शमोन जेड़ा नीगर आखा जांदा ऐ; ते लूकियुस कुरेनी, ते चोथाई देश दा राजा हेरोदेस दा दूधप्रा मनाहेम, ते शाऊल। ² जेस ले ओह उपवास कन्ने प्रभु दी भक्ति करा करदे हे, ते पवित्र आत्मा ने आखया, “मेरे आस्ते बरनबास ते शाऊल गी ओस कम्म आस्ते अलग करो जेस आस्ते मैं उन्हें बलाया ऐ।” ³ उस बेले उन्हैं उपवास ते प्रार्थना करियै ते उंदे उप्पर हत्थ राखियै उन्हें विदा किता।

⁴ इस आस्ते ओह पवित्र आत्मा ते भेजे गेदे सिलूकिया गी गे; ते उत्थां जाज उप्पर चढ़ीयै साइप्रस गी चली गे; ⁵ ते सलमीस च पुजियै, परमातमा दा वचन यहूदियें दी अराधनालें च सनाया। यूहन्ना उंदा सेवक हा। ⁶ ओस ओस सारे टापू च होंदे होई पाफुस तकर पुजे। उत्थें उन्हें बार -यीशु नां दा इक यहूदी टोना ते झूठा भविष्यवक्ता मिलया। ⁷ ओह हाकिम सिरगियुस पोलुस दे कन्ने हा, जेड़ा बुद्धिमान मनुख हा। ओस ने बरनबास ते शाऊल गी अपने कोल बलाइयै परमातमा दा वचन सुनना चाया। ⁸ लेकन इलीमास टोने ने, की वे इय्ये ओस दे नां दा मतलब ए, उंदा बरोध करियै हाकिम गी बिश्वास करने कोलां रोकना चाया। ⁹ उस बेले शाऊल ने जेस दा नां पोलुस भी ऐ, पवित्र आत्मा कन्ने परिपूर्ण होइयै ओस दी बखी टकटकी लाइये दिखया ते आखया, ¹⁰ “ए सारे कपट ते चतुराई कन्ने भरोए दे शैतान दी संतान, सकल धर्म दे बैरी, के तू प्रभु दे सीधें रस्तें गी डिंगा करना नेई शडगा ? ¹¹ हूंन दिख, प्रभु दा हत्थ तेरे उप्पर लगया ए ;ते तू किश समें तकर अन्ना रोगा ते सूरज गी नेई दिखगा।”उस बेले फोरन धुंधलापन ते न्हेरा ओस उप्पर छाई गया, ते ओह इधर उधर टटोलने लगया तां जे कोई ओस दा हत्थ पकड़ीयै लेई चले। ¹² उस बेले हाकिम ने जेड़ा ओया हा उसी दिखियै ते प्रभु दे उपदेश कोलां हरान होइयै विश्वास किता।

¹³ पोलुस ते ओस दे साथी पाफुस कोलां जाज खोलियै पंफूलिया दे पिरगा च आए; ते यूहन्ना उन्हें शुड़ीयै यरूशलेम गी बापस आया। ¹⁴ पिरगा कोलां अगें निकलियै ओह पिसिदिया दे अन्ताकिया च पुजे; ते सब्त दे दिन अराधनालें च बैठी गए। ¹⁵ व्यवस्था ते भविष्यवक्तां दी कताब पढ़ने कोलां बाद अराधनालय दे सरदारैं उंदे कोल कहला भेजया, “ए प्रा ओ, जे लोकें दे उपदेश आस्ते तुंदे मने च कोई गल्ल ऐ ते बोलो।” ¹⁶ उस बेले पोलुस ने खड़ोइयै ते हत्थे कन्ने संकेत करियै आखया, “ए इस्राएलियो, ते परमातमा कोलां डरने आलयो, सुनो: ¹⁷ इन इस्राएली लोकें दे परमातमा ने साड़े बब्ब दादें गी चुनी लेता, ते जेस ले ए लोग मिस्त्र देश च परदेशी होइयै रेंदे हे, ते उंदी तरक्की किती; ते बलवंत भुजा कन्ने कडी लेई आया। ¹⁸ ओह कोई चाली साल तकर जंगल च उंदी सैंदा रेया, ¹⁹ ते कनान देश च सत जातियां दा नाश करियै उंदा देश कोई साड़े चार सो साल बीच इंदी मीरास च करी दिता। ²⁰ एस दे बाद ओस ने शमूएल भविष्यवक्ता तकर उंदे च न्यायी ठहराए। ²¹ ओस दे बाद उन्हैं इक राजा मंगया: उस बेले परमातमा ने चाली साल आस्ते बिन्यामीन दे गोत्र बीचा इक मनुख; मतलब किश दे पुत्तर शाऊल गी उंदे उप्पर राजा ठहराया। ²² फिरी उसी अलग करियै दाऊद गी उंदा राजा बनाया; जेस दे बारे च ओस ने गुआइ दिती, ’मीगी इक मनुख, यिशै दा पुत्तर दाऊद, मेरे मन दे मताबक मिली गया ऐ; उए मेरी सारी इच्छा पूरी करग।’ ²³ इसे दे वंश बीचा परमातमा ने अपनी प्रतिज्ञा दे मताबक इस्राएल दे कोल इक उधारकर्ता, मतलब यीशु गी भेजया। ²⁴ जेस दे आने कोलां पैलैं यूहन्ना ने सारे इस्राएलियें च मन फेरने दे बपतिस्मा दा प्रचार किता। ²⁵ जेस ले यूहन्ना अपनी सेवा पुरी करने उप्पर हा, ते ओस ने आखया, ’तुस मीगी के समझदे हो ? मैं ओह नेई ! बरना दिखो, मेरे कोलां बाद इक आने आला ए, जेस दी पैरें दी जूती भी मैं खोलने दे काबल नेई।’

²⁶ “ए प्रा ओ, तुस जेड़ी अब्राहम दी संतान हो; ते तुस जेड़ा परमातमा कोलां डरदे हो, तुंदे कोल एस उद्धार दा वचन भेजया गेदा ऐ। ²⁷ की वे यरूशलेम दे रहने आलैं ते उंदे सरदारैं, ना उसी पछानया ते ना भविष्यवक्तें दी गल्लां समझियां, जेड़ीयां हर सब्त दे दिन पड़ीयां जांदियां न, इसे आस्ते उसी दोषी ठराइयै उन्हें गल्लें गी पूरा किता। ²⁸ उन्हैं मारने जोगा कोइ दोष ओस च नेई पाया, तां भी पिलातुस अगें विनती किती के ओह मारी दिता जा। ²⁹ जेस ले उन्हैं ओस दे बारे च लिखीं दियां सारियां गल्लां पुरियां कितियां, ते उसी क्रूस उपरा तुआरीयै कब्र च रखया। ³⁰ लेकन परमातमा ने उसी मरें बीचा जिंदा किता, ³¹ ते ओह उन्हें जेड़े ओस दे कन्ने यरूशलेम च आए हे, मते दिनें तकर लबदा रेया; लोकें दे सामने हूंन ओह गै ओस दे गुआह न। ³² आस तुसें ओस प्रतिज्ञा दे बारे च जेड़ी बब्ब दादें कन्ने किती गई ही, ए सुसमाचार सुनानया न,

³³ के परमातमा ने यीशु गी जिंदा करियै, उए प्रतिज्ञा साड़ी संतान आस्ते पूरी किती; जिय्यां दुए भजन च लिखया ऐ, ’तू मेरा पुत्तर ए; अज्ज मैं गै तुगी जन्माया ऐ।’

³⁴ ते ओस दे एस रिती कन्ने मरें दा बीचा जिंदा करने दे बारे च भी के ओह कदें भी नेई सड़े, ओस ने इय्यां आखया, ’मैं दाऊद दे उप्पर दी पवित्र ते अटल कृपा तेरे उप्पर करगा।’

³⁵ इसे आस्ते ओस ने इक होर भजन च भी आखा ऐ, ’तू अपने पवित्र जन गी सड़ने नेई देगा।’

³⁶ की वे दाऊद ते परमातमा दी इच्छा दे अनुसार अपने समें च सेवा करियै सेई गया, ते अपने बब्ब दादें च जाई मिलया, ते सड़ी भी गया। ³⁷ लेकन जिसी परमातमा ने जिंदा किता, ओह सड़ी नेई सकया। ³⁸ इसे आस्ते, ए प्रा ओ, तुस जानी लेओ के इसे दे द्वारा पापें दी माफी समाचार तुसें दिते जांदा ऐ; ³⁹ ते जिन्ने गल्लें च तुस मूसा दी व्यवस्था दे द्वारा निर्दोष नेई ठहर सकदे हे, उन्हीं सबनीं बीचा गे हर इक विशवास करने आला ओस दे द्वारा निर्दोष ठहरा जांदा ऐ। ⁴⁰ इसे आस्ते चोकस रवो, एसा नी होए के जे भविष्यवक्तां दी कताबे च आया ऐ, तुंदे उप्पर भी आई पवे:

⁴¹ ’हे निंदा करने आलो, ’दिखो, ते हरान होई जाओ, ते मिटी जाओ; की वे मैं तुंदे दिनें च इक कम्म करना ए, एसा कम्म के जे कोई तुंदे कन्ने ओस दी चर्चा करे, ते तुस कदें भी विश्वास नेई करगे’। ”

⁴² उंदे बार निकलदे समें लोग उंदे कन्ने विनती करना लगे के अगले सब्त दे दिन असें ऐ गल्लां फिरी सुनाई जांन। ⁴³ जेस ले सभा उठी गई ते यहूदी ते यहूदी मत च आए गेदे भक्तें बीचा मते पोलुस ते बरनबास दे पीछें होई गे;ते उन्हैं उंदे कन्ने गल्लां करियै समझाया के परमातमा दे अनुग्रह च बने रवो।

⁴⁴ अगले सब्त दे दिन नगर दे अकसर सारे लोग परमातमा दा वचन सुनने गी किटठे होई गे। ⁴⁵ लेकन यहूदी भीड़ गी दिखियै डाह कन्ने भरोई गे, ते निन्दा करदे होई पोलुस दी गल्लें दे बरोध च बोलना लगे। ⁴⁶ उस बेले पोलुस ते बरनबास ने निडर होइयै आखया, “जरुरी हा के परमातमा दा वचन तुसें पैलें सनाया जांदा; लेकन जेस ले तुस उसी दूर हटाई जांदे हो, ते अपने आप गी अंनत जीवन दे जोगा नेई ठहरांदे, ते दिखो, आस अन्यजातियें आली बखी फिरी जनयां न।

⁴⁷ की वे प्रभु ने असें ए आज्ञा दिती ऐ, ’मैं तुगी अन्यजातियें आस्ते लो ठहराया ऐ, तां जे तू धरती दे छोर तकर उद्धार दा दरवाजा होए’।”

⁴⁸ ए सुनीये अन्यजाति आनंदित होए, ते परमातमा दे वचन दी बड़ाई करना लगे; ते जिन्ने भी अंनत जीवन आस्ते ठहराए गे हे, उन्हैं विश्वास किता। ⁴⁹ इस करी प्रभु दा वचन ओस सारे देश च फैलना लगया। ⁵⁰ लेकन यहूदियैं भक्त ते कुलीन जनानियें गी ते नगर दे प्रमुख लोकें गी उसकाया, ते पोलुस ते बरनबास दे बरोध उपद्रव कराइयै उन्हें अपनी सीमा कोलां कडी दिता। ⁵¹ उस बेले ओस उंदे सामने अपने पैरें दी धुल झाड़ीयै इकुनियुम गी चली गे। ⁵² ते चेले आनंद कन्ने ते पवित्र आत्मा कन्ने परिपूर्ण होंदे गे।

¹ इकुनियुम च एसा ओया के ओह यहूदियें दे अराधनालें च कन्ने कन्ने गे ते एस चाल्ली गल्लां कितियां के यहुदियैं ते युनानियैं दोनीं बीचा मतैं विश्वास किता। ² लेकन विश्वास नेई करना आले यहूदीयैं अन्यजातियें दे मन भ्रां दे बरोध च उसकाए ते बैर (कटुता) पैदा किती। ³ ओस मते दिन तकर उत्थें रे, ते प्रभु दे भरोसे उप्पर हियाब कन्ने गल्लां करदे हे; ते ओस उंदे हत्तथें बीचा चिन्न ते अद्भुत कम्म करवाइयै अपने अनुग्रह दे वचन उप्पर गुआइ दिंदा रेया। ⁴ लेकन नगर दे लोकें च फूट पेई गई ही, एस कन्ने किन्ने ते यहूदीयें दी बखी ते किन्ने प्रीरितें दी बखी होई गे। ⁵ लेकन जेस ले अन्य जाति ते यहूदी उंदा अपमान ते उंदे उप्पर पथराव करने आस्ते अपने सरदारें दे सने उंदे उप्पर दोड़े, ⁶ ते ओह एस गल्ले गी जानी गे, ते लुकाउनिया दे लुस्त्रा ते दिरबे नगरें च, ते आसे पासे दे प्रदेशें च नसी गे ⁷ ते उत्थें सुसमाचार सनाना लगे।

⁸ लुस्त्रा च इक मनुख बैठा हा, जेड़ा पैरां दा मता निर्बल हा। ओह जन्म कोलां गे लंगडा हा ते कदें भी नेई चला हा। ⁹ ओह पोलुस गी गल्लां करदे सुना दा हा। पोलुस ने ओस दी बखी टकटकी लाइयै दिखया के उसी चंगा होई जाने दा विश्वास ऐ, ¹⁰ ते उचे शब्द कन्ने आखया, “अपने पैरें दे पार सीधा खड़ा हो।”उस बेले ओह उछलियै चलने फिरने लगया। ¹¹ लोकैं पोलुस दा ए कम्म दिखियै लुकाउनिया दी भाषा च उचे शब्द कन्ने आखया, “देवता मनुख दे रूप च होइयै साड़े कोल उतर आए न।” ¹² उन्हैं बरनबास गी ज्यूस, ते पोलुस गी हिरमेस आखया की वे ओह गल्लां करने च ख़ास हा। ¹³ ज्यूस दे ओस मंदिर दा पुजारी जेड़ा उंदे नगर दे सामने हा, बैल ते फूलें दे हांर रस्ते उप्पर लाइयै लोकें कन्ने बलिदान करना चांदा हा। ¹⁴ लेकन बरनबास ते पोलुस प्रेरितैं ए सुनया, ते अपने कपड़े फाटे ते भीड़ च लपकी गे, ते पुकारिये आखना लगे, ¹⁵ “ए लोको, तुस के करदे हो ? आस भी तुंदे समान दुःख सुख भोगने आले मनुख न, ते तुसें सुसमाचार सनानेयां न के तुस इनां बेकार चीजां कोलां अलग होइयै जिंदे परमातमा दी बखी फिरो, जेस ने सुर्ग ते धरती ते समुंद्र ते जे किश उंदे च ऐ बनाया। ¹⁶ ओस ने बीते दे समें च सब जातियें गी अपने अपने रस्ते च चलना दिता। ¹⁷ तां भी ओस ने अपने आप गी बे - गुआह नेई शुड़या; की वे ओह भलाई करदा रेया, ते आकाश कोलां बरखा ते फलवंत ऋतु देइयै तुंदे मने गी रुट्टी ते आनंद कन्ने भरदा रेया।” ¹⁸ ए आखियै भी उन्हैं लोकें गी बड़ी कठिनाई कोलां रोकया के उंदे आस्ते बलिदान नेई करन।

¹⁹ लेकन किश यहूदीयैं अन्ताकिया ते इकुनियुम कोलां आईयै लोकें गी अपनी बखी करी लेता, ते पोलुस उप्पर पथराव किता, ते मर समझियै उसी नगर कोलां बार घसीटी लेई गे। ²⁰ लेकन जेस लै चेले ओस दे चोनीं बखी खड़ोते, ते ओह उठियै नगर च गया ते दुए दिन बरनबास दे कन्ने दिरबे गी चली गया।

²¹ ओह ओस नगर दे लोकें गी सुसमाचार सनाईयै, ते मते चेले बनाइयै, लुस्त्र ते इकुनियुम ते अन्ताकिया गी बापस आए, ²² ते चेलें दे मनें गी स्थिर करदे रे ते ए उपदेश दिंदे हे के विश्वास च बने रवो; ते ए आखदे हे, “असें मते क्लेश चुकियै परमातमा दे राज च परवेश करना होग।” ²³ ते उन्हैं हर इक कलीसिया च उंदे आस्ते प्राचीन ठहराए, ते उपवास कन्ने प्रार्थना करियै उन्हें गी प्रभु दे हत्थ सोंपया जेस उप्पर उन्हैं विश्वास किता हा।

²⁴ उस बेले पिसिदिया दा होंदे होई ओह पंफूलिया पुजे; ²⁵ फिरी पिरगा च वचन सनाईयै अत्तलिया च आए, ²⁶ ते उत्थां ओह जाज उप्पर अन्ताकिया गए, जित्त्थें ओह ओस कम्म आस्ते जेड़ा उन्हैं पूरा किता हा परमातमा दे अनुग्रह च सोंपे गए हे। ²⁷ उत्थें पुजिये उन्हैं कलीसिया किटठी किती ते सनाया के परमातमा ने उंदे कन्ने कैसे बडे बडे कम्म किते, ते अन्यजातियें आस्ते विश्वास दा दरवाजा खोली दिता। ²⁸ ते ओह चेलें दे कन्ने मते दिन तकर रे।

¹ फिरी किश लोग यहूदिया दा आइयै भ्रां गी सखाना लगे: “जे मूसा दी रिती दे मताबक तुंदा खतना नेई होए ते तुस उद्धार नेई पा सकदे।” ² जेस ले पोलुस ते बरनबास दा उंदे कन्ने मता झगड़ा ते वाद विवाद ओया ते ए ठहराया गया के पोलुस ते बरनबास ते इंदे बीचा किश एस गल्ल दे बारे च प्रेरितें ते प्राचीनें कोल यरूशलेम गी जांन। ³ इस आस्ते कलीसिया ने उन्हें किश दूर पजाया; ते ओह फीनीके ते सामरिया कोलां होंदे होई अन्यजातियें दे मन फराने दा समाचार सनांदे गे, ते सारे प्रा मते आनंदित होए। ⁴ जेस ले ओह यरूशलेम पुजे, ते कलीसिया ते प्रेरित ते प्राचीन उंदे कन्ने आनंद कन्ने मिले, ते उन्हैं सनाया के परमातमा ने उंदे कन्ने होइयै कैसे कैसे कम्म किते हे। ⁵ लेकन फरिसियें दे पंथ बीचा जिन्हैं विश्वास किता हा, उंदे बीचा कइयैं उठियै आखया, “उन्हें खतना कराने ते मूसा दी व्यवस्था गी मनने दी आज्ञा देनी चाहीदी।”

⁶ उस बेले प्रेरित ते प्राचीन एस गल्ल दे बारे च बचार करने आस्ते किटठे होए। ⁷ उस बेले पतरस ने मता वाद विवाद होई जाने दे बाद खड़ोइयै उंदे कन्ने आखया, “ए प्रा ओ, तुस जानदे हो के मते दिन होए परमातमा ने तुंदे बीचा मीगी चुनी लेता के मेरे मूंह कोलां अन्यजाति सुसमाचार दा वचन सुनीयै विश्वास करन। ⁸ मन दे जाचने आले परमातमा नै उन्हें भी साड़े समान पवित्र आत्मा देइयै उंदी गुआइ दिती; ⁹ ते विश्वास दे द्वारा उंदे मन शुद्ध करियै साड़े बीच ते उंदे बीच किश भेद नेई रखया। ¹⁰ ते हूंन तुस की परमातमा दी परीक्षा करदे हो के चेलें दी मुंडी उप्पर एसा जुआ रखो, जिसी ना साड़े बब्ब दादे चुकी सके हे ते ना आस चुकी सकनयां ? ¹¹ हाँ, साड़ा ए पक्का ऐ के जेस रिती कन्ने ओह प्रभु यीशु दे अनुग्रह कन्ने उद्धार पाघंन; उसे रिती कन्ने असैं भी पाना।”

¹² इस करी सारी सभा चुप चाप बरनबास ते पोलुस दी सुनना लगी, के परमातमा ने उंदे द्वारा अन्यजातियें च कैसे बड़े - बड़े चिन्न, ते अद्भुत कम्म दसे। ¹³ जेस ले ओह चुप होए ते याकूब आखना लगया, “ए प्रा ओ, मेरी सुनो। ¹⁴ शमोन ने सनाया के परमातमा ने पैलें पहल अन्यजातियें उप्पर कैसी कृपादृष्टि किती के उंदे बीचा अपने नां आस्ते इक लोग बनाई लेंन। ¹⁵ एस कन्ने भविष्यवक्तें दीं गल्लां भी मिलदियाँ न, जिय्यां के लिखे दा ऐ,

¹⁶ ’एस कोलां बाद मैं फिरी आइयै दाऊद दा कीरे दा डेरा उठागा, ते ओस दे खंडहरें गी फिरी बनागा, ते उसी खड़ा करगा,

¹⁷ इस आस्ते के बाकी मनुख, मतलब सारे अन्यजातिय जेड़े मेरे नां दे आखे जांदे न, प्रभु गी ढूंढन,

¹⁸ ए उए प्रभु आखदा ऐ जेड़ा संसार दी उत्पति कोलां इन गल्लां दा समाचार दिंदा आया ऐ।’

¹⁹ इसे आस्ते मेरा बचार ए ऐ के अन्यजातियें बीचा जेड़े लोग परमातमा दी बखी फिरदे न, आस उन्हें दुःख नेई देचे; ²⁰ लेकन उन्हें लिखी भेजचे के ओह मूरतें दी अशुद्तां ते व्यभिचार ते गला कोटे दे मांसे कोलां ते खून कोलां दूर रोंन। ²¹ की वे प्राचीन काल कोलां नगर नगर मूसा दी व्यवस्था दा प्रचार करने आले होंदे चले आए न, ते ओह हर सब्त दे दिन अराधनालें च पढ़ी जांदी ऐ।”

²² उस बेले सारी कलीसिया समेत प्रेरितें ते प्राचीनें गी अच्छा लगया के अपने बीचा किश इन्सानें गी चुनन, मतलब यहूदा जेड़ा बरसब्बा आखा जांदा ऐ, ते सिलास गी जेड़े भ्रां च ख़ास हे; ते उन्हें पोलुस ते बरनबास दे कन्ने अन्ताकिया भेजन। ²³ उन्हैं उंदे हत्थ ए लिखी भेजया: “अन्ताकिया ते सीरिया ते किलिकिया दे रोने आले भ्रां गी जेड़े अन्यजातियें बीचा न, प्रेरितां ते प्राचीन भ्रां दा नमस्कार। ²⁴ असैं सुनया ए के साड़े बीचा कईयैं उत्थें जाइयै, तुसें अपनी गल्लें कन्ने घबरा दिता; ते तुंदे मन उल्ट दिते न लेकन असैं उन्हें आज्ञा नेई दिती ही। ²⁵ इसे आस्ते असैं इक चित्त होइयै ठीक समझया के चुने दे इन्सानें गी अपने प्यारे बरनबास ते पोलुस दे कन्ने तुंदे कोल भेजचे। ²⁶ ए ऐसे मनुख न जिन्हैं अपने प्राण साड़े प्रभु यीशु मसीह दे नां आस्ते जोखीम च पादे न। ²⁷ इसे आस्ते असैं यहूदा ते सिलास गी भेजया ऐ, जेड़े अपने मूंह कोलां भी ए गल्लां आखी देंघंन। ²⁸ पवित्र आत्मा गी ते असें ठीक जानी पेया के इन्हें ठीक जरूरी गल्लें गी शुड़ीयै, तुंदे उप्पर होए बोझ ना पान; ²⁹ के तुस मूरतें उपरा बलि किते कोलां ते खून कोलां, ते घला कोटे दे मांसे कोलां, ते व्यभिचार कोलां दूर रवो। इंदे कोलां दूर रवो ते तुंदा भला होग। अग्गें ठीक।”

³⁰ फिरी ओह विदा होइयै अन्ताकिया पुजे, ते सभा गी किट्ठी करियै ओह पत्री उन्हें देई दिती। ³¹ ओह पत्री पढ़ीयै ओस उपदेश दी गल्ल कोलां मते आनंदित होए। ³² यहूदा ते सिलास नै जेड़े अप्पुं भी भविष्वक्ता हे, मती गल्लें कन्ने भ्रां गी उपदेश देइयै स्थिर किता। ³³ ओह किश दिन रेइयै, भ्रां कुला शान्ति कन्ने विदा होए के अपने भेजने आलें दे कोल जांन। ³⁴ (लेकन सिलास गी उत्थें रोना अच्छा लगया।) ³⁵ लेकन पोलुस ते बरनबास अन्ताकिया च रेई गे: ते बाकी मते लोकें कन्ने प्रभु दे वचन दा उपदेश करदे ते सुसमाचार सनांदे रे।

³⁶ किश दिनां बाद पोलुस ने बरनबास कन्ने आखया, “जिन्ने जिन्नें नगरें च असैं प्रभु दा वचन सनाया हा, आओ, फिरी उत्थें जाईयै अपनें भ्रां गी दिखचे की ओह कैसे न।” ³⁷ उस बेले बरनबास ने यूहन्ना गी जेड़ा मरकुस आखा जांदा ए, कन्ने लेने दा बचार किता। ³⁸ लेकन पोलुस ने उसी जेड़ा पंफूलिया च उंदे कोलां अलग होई गया हा, ते कम्म उप्पर उंदे कन्ने नेई गया, कन्ने लेई जाना अच्छा नेई समझया। ³⁹ इस आस्ते एसा विवाद उठया के ओह इक दुए कोलां अलग होई गे; ते बरनबास, मरकुस गी लेइयै जाजे उप्पर साइप्रस चली गया। ⁴⁰ लेकन पोलुस ने सीलास गी चुनी लेता, ते भ्रां कोलां परमातमा दे अनुग्रह च सोंपियै उत्थुं दा चली गया; ⁴¹ ते ओह कलीसिया गी स्थिर करदे होई सीरिया ते किलिकिया कोलां होंदे होई निकलया।

¹ फिरी ओह दिरबे ते लुस्त्रा च भी गया। उत्थें तीमुथियुस नां दा इक चेला हा, जेड़ा किसे विश्वासी यहूदिनी दा पुत्तर हा, लेकन ओस दा पिता यूनानी हा। ² ओह लुस्त्रा ते इकुनियुम ते भ्रां च सुनाम हा। ³ पोलुस दी इच्छा ही के ओह ओस दे कन्ने चले; ते जेड़े यहूदी लोग उन जगांह च हे उंदे कारण ओस ने ओस दा खतना किता, की वे ओह सब जानदे हे, के ओस दा पिता यूनानी हा। ⁴ ते नगर नगर जांदे होई ओह उन विधियें गी जेड़ीयां यरूशलेम दे प्रेरितें ते प्राचिनैं ठहराइयां हियां, मनने आस्ते उन्हें पजाई जांदे हे। ⁵ इस चाल्ली कलिसियां विश्वास च स्थिर होंदियां गइयां ते गिनत्री बीच हर दिन बददीयां गइयां।

⁶ ओह फ्रूगीया ते गलातिया प्रदेशें बीचा होंदे गे, की वे पवित्र आत्मा ने उन्हें एशिया च वचन सनाने आस्ते मना किता। ⁷ उन्हैं मूसिया दे कोल पुजियै, बितूनिया च जाना चाया; लेकन यीशु दी आत्मा ने उन्हें जाना नेई दिता। ⁸ इस आस्ते ओह मूसिया कोलां होइयै त्रोआस च आए। ⁹ उत्थें पोलुस ने रातीं इक दर्शन दिखया के इक मकिदुनी मनुख खड़ोते दे ओस कन्ने विनती करदै आखा करदा ऐ, “पार उतरियै मकिदुनिया च आ, ते साड़ी मदद कर।” ¹⁰ ओस दे ए दर्शन दिखदे गै असैं फोरन मकिदुनिया जाना चाया, ए समझिये के परमातमा ने असें उन्हें सुसमाचार सनाने आस्ते बलाया ऐ।

¹¹ इसे आस्ते त्रोआस कोलां जाज खोलीयै आस सीधे सुमात्राके ते दुए दिन नियापुलिस च आए। ¹² उत्थुं दा अस फिलिप्पी पुजे, जेड़ा मकिदुनिया प्रान्त दा ख़ास नगर ते रोमियें दी बस्ती ऐ; ते आस ओस नगर च किश दिन तकर रे। ¹³ सब्त दे दिन आस नगर दे फाटक दे बार नदि दे कंडे ए समझिये गे के उत्थें प्रार्थना करने दी जगह होनी, ते बैठीये उन जनानियें कन्ने जेड़ीयां किट्ठीयां होई दियां हियां, गल्लां करना लगे। ¹⁴ लुदिया नां थुआथीरा नगर दी बैंजनी कपड़े बेचने आली इक भक्त घरेआली सुना करदी ही। प्रभु ने ओस दा मन खोलया के ओह पोलुस दी गल्लें उप्पर चित्त लाए। ¹⁵ जेस ले ओस अपने घराने सने बपतिस्मा लेता, ते ओस ने साड़े कन्ने विनती किती, “जे तुस मीगी प्रभु दी विश्वासिनी समझदे हो, ते चलियै मेरे घर रवो, ” ते ओह असें मनाइये लेई गई।

¹⁶ जेस ले आस प्रार्थना करने दी जगह जा करदे हे, ते असें इक दासी मिली जेस च भावी आखने दी आत्मा ही; ते भावी आखने कन्ने अपने स्वामियें आस्ते मता किश कमाइये लेई आंदी ही। ¹⁷ ओह पोलुस दे ते साड़े पीछें आइयै करलाना लगी, “ए मनुख परम प्रधान परमातमा दे दास न, जेड़े असें उद्धार दे रस्ते दी कथा सनांदे न।” ¹⁸ ओह मते दिन तकर एसा गै करदी रेई; लेकन पोलुस दुखी ओया, ते मुड़ीयै ओस आत्मा गी आखया, “मैं तुगी यीशु मसीह दे नां कन्ने आज्ञा दीना ऐं के ओस बीचा निकली जा।” ते ओह उसे घड़ी निकली गई।

¹⁹ जेस ले ओस दे स्वामियैं दिखया के साड़ी कमाई दी आशा जांदी रेई, ते पोलुस ते सीलास गी पकड़ीयै चोक च प्रधानें दे कोल खिची लेई गे; ²⁰ ते उन्हें फोजदारी दे दे हाकिमें दे कोल लेई गे ते आखया, “इ लोग जेड़े यहूदी न, साड़े नगर च मती हलचल मचा करदे न; ²¹ ते एसियां रितीयां सना करदे न, जिन्हें ग्रहण करना जां मनना साड़े रोमियें आस्ते ठीक नेईयैं।’ ²² उस बेले भीड़ दे लोग उंदे बरोध च किट्ठे होइयै उंदे उप्पर चढ़ी गे, ते हाकिमैं उंदे कपड़े फाटीयै तुआरी दिते, ते उन्हें बैंत मारने दी आज्ञा दिती। ²³ मते बैंत मराइयै उन्हैं उन्हें गी जेले च पाई दिता ते दारोगा गी आज्ञा दिती के उन्हें चोकसी कन्ने रखे। ²⁴ ओस ने एसी आज्ञा पाइयै उन्हें भीतर दी कोठरी च रखया ते उंदे पैर काठे च ठोकी दिते।

²⁵ अधी रातीं दे लगभग पोलुस ते सीलास प्रार्थना करदे होई परमातमा दे भजन गा करदे हे, ते कैदी उंदी सुना करदे हे। ²⁶ इन्ने च इकाइक भुंचाल आया, इत्थें तकर के जेले दी नींव हिली गई, ते फोरन सारे द्वार खुली गे; ते सारे दे बंधन खुली गे। ²⁷ दारोगा जागी गया, ते जेले दे दरवाजे खुले दिखियै समझया के कैदी नस्सी गे न, इस आस्ते ओस ने तलवार खिचीयै अपने आप गी मारना चाया। ²⁸ लेकन पोलुस ने उचे शब्द कन्ने पुकारियै उसी आखया,”अपने आप गी किश हानि नेई पजा, की वे आस सारे इत्थें न।” ²⁹ उस बेले ओह दिया मंगाइयै कोल आया, ते कंबदा ओया पोलुस ते सीलास दे अगें किरया; ³⁰ ते उन्हें बार आनियै आखया, “ए सज्जनों, उद्धार पाने आस्ते मैं के करां ?” ³¹ उन्हैं आखया, “प्रभु यीशु मसीह उप्पर विश्वास कर ते तू ते तेरा सारा घराना उद्धार पाग।” ³² ते उन्हैं उसी ते ओस दे सारे घरे दे लोकें गी प्रभु दा वचन सनाया। ³³ रातीं उसे घड़ी ओस नै उन्हें लेई जाईयै उंदे जख्म धोते, ते ओस ने अपने सारें लोकें समेत बपतिस्मा लेता। ³⁴ उस बेले ओस उन्हें अपने घर च लेइयै उंदे अगें रुट्टी रखी, ते सारे घराने समेत परमातमा उप्पर विश्वास करियै आनंद किता।

³⁵ जेस ले दिन ओया उस बेले हाकिमैं सपाइयें दे हत्थे च स्नेहा भेजया के उन इन्सानें गी शुड़ी देओ। ³⁶ दारोगा ने ए गल्लां पोलुस कन्ने आखीयां, “हाकिमैं तुसें शुड़ने दी आज्ञा दीती ऐ। इसे आस्ते हूंन निकलियै कुशल कन्ने चली जाओ।” ³⁷ लेकन पोलुस ने ओस कन्ने आखया, “उन्हैं असें गी जेड़े रोमी मनुख न दोषी ठहराए दे बगैर लोकें दे सामने मारया ते जेले च पाया। हूंन के असें चोरीयै कडा करदे न ? ऐसा नेई; लेकन ओह अप्पुं आइयै असें बार कडन।” ³⁸ सपाइयैं ए गल्लां हाकिमें कन्ने आखीयां, ते ओह ए सुनियै के ओह रोमी न, डरी गे, ³⁹ ते आइयै उन्हें मनाया, ते बार लेइयै विनती किती के नगर बीचा चली जांन। ⁴⁰ ओह जेले बीचा निकलीयै लुदिया दे उत्थें गे, ते भ्रां कन्ने भेंट करियै उन्हें शान्ति दिती, ते चली गे।

¹ फिरी ओह अम्फिपुलिस ते अप्पुलोनिया होइयै थिस्सलुनीके आए, जित्थें यहूदियें दा इक अराधनालय हा। ² पोलुस अपनी रिती दे मताबक उंदे कोल गया, ते तीन सब्त दे दिन पवित्र शास्त्रां बीचा उंदे कन्ने वाद विवाद किता; ³ ते उंदा मतलब खोली खोलीयै समझांदा हा के मसीह गी दुःख चुकना, ते मरें बीचा ज़िंदा होना, जरुरी हा; ते "इय्ये यीशु जेस दी मैं तुसें कथा सनाना ऐ, मसीह ऐ।” ⁴ उंदे बीचा किन्नैं, ते भक्त युनानियें बीचा मतैं, ते मतीं कुलीन जनानियैं मनी लेता, ते पोलुस ते सीलास कन्ने मिली गे। ⁵ लेकन यहूदियैं लोकैं डाह कन्ने भरोइयै बजारें दे लोकें कन्ने किश दुष्ट इन्सानें गी अपने कन्ने लेता, ते भीड़ किट्ठी करियै नगर च रोला पाना लगे, ते यासोन दे घर उप्पर चढ़ाई करियै उन्हें लोकें दे सामने लाना चाया। ⁶ उन्हें उत्थें नेई पाइयै ओह ए करलांदे होइ यासोन ते किश भ्रां गी नगर दे हाकिमें सामनै खिची लेई आए, “ए लोग न जिन्हैं संसार गी उलट पुलट करी दिता ऐ, इत्थें भी आई गे न। ⁷ यासोन ने उन्हें गी अपने इत्थें उतारा ऐ। ए सब दे सब ए आखदे न के यीशु राजा ऐ, ते कैसर दी आज्ञां दा बरोध करदे न।” ⁸ उन्हैं लोकें ते नगर दे हाकिमें गी ए सनाईयै घबराई दिता। ⁹ इसे आस्ते उन्हैं यासोन ते बाकी लोकें कोलां मचलका लेइयै उन्हें शुड़ी दिता।

¹⁰ भ्रां नै फोरन रात गे रात पोलुस ते सीलास गी बिरीया भेजी दिता; ते ओह उत्थें पुजियै यहूदीयें दे अराधनालें च गए। ¹¹ ए लोग ते थिस्सलुनिके दे यहूदियें कोलां भले हे, ते उन्हैं बड़ी लालसा कन्ने वचन गी ग्रहण किता, ते हर रोज पवित्र शास्त्रां बीचा तुपदे रे के ए गल्लां इय्यां गे न जां नेई। ¹² इसे आस्ते उंदे बीचा मतैं, ते यूनानी कुलीन जनानियें बीचा ते मर्दें बीचा मतैं विश्वास किता। ¹³ लेकन जेस ले थिस्सलुनिके दे यहूदी जानी गे के पोलुस बिरीया च भी परमातमा दा वचन सनांदा ए, ते उत्थें भी आईयै लोकें गी उसकाने ते हलचल मचाना लगे। ¹⁴ उस बेले भ्रां नै फोरन पोलुस गी विदा किता के समुंद्र दे कंडे चली जा; लेकन सीलास ते तीमुथियुस उत्थें गे रेई गे। ¹⁵ पोलुस गी पजाने आले उसी एथेंस तकर लेई गे; ते सीलास ते तीमुथियुस आस्ते ए आज्ञा पाइयै विदा होए के ओह ओस दे कोल जल्दी कोलां जल्दी आंन।

¹⁶ जेस ले पोलुस एथेंस च उंदी बाट जोआ करदा हा, ते नगर गी मूरतें कन्ने भरोते दा दिखियै ओस दा जी जली गया। ¹⁷ इस आस्ते ओह अराधनालें च यहूदीयें ते भक्तें कन्ने, ते चोक च जेड़े लोग ओस कन्ने मिलदे हे उंदे कन्ने हर दिन वाद विवाद करदा हा। ¹⁸ उस बेले इपिकूरी ते स्तोईकी दार्शनिकों बीचा किश ओदे कन्ने सवाल करना लगे, ते कईयैं आखया, “ए बकवादी के आखना चांदा ए ?” लेकन दुएं आखया, “ओह अन्य देवतां दा प्रचारक लगदा ऐ" - की वे ओह यीशु दा ते ज़िंदा होने दा सुसमाचार सनांदा हा। ¹⁹ इस करी ओह उसी अपने कन्ने अरियुपगुस उप्पर लेई गे ते पूछ्या, “के आस जानी सकदे हां के ए नमा मत जेड़ा तू सनाना ए, के ऐ ? ²⁰ की वे तू अनोखी गल्लां असें सनाना ए, इसे आस्ते आस जानना चानेयां के इंदा मतलब के है।” ²¹ ( इसे आस्ते के सारे एथेंसवासी ते परदेशी जेड़े उत्थें रोंदे न, नमीं नमीं गल्लां सुनने दे सिवाय होर किसे कम्म च समें नेई बितांदे हे। )

²² उस बेले पोलुस ने अरियुगपुस दे बीच खड़ोइयै आखया, “ए एथेंस दे लोको, मैं दिखाना के तुस हर गल्ल च देवतां दे बड़े मनने आले न। ²³ की वे मैं फिरदे होई जेस ले तुंदी पुजने दी चीजें गी दिखा करदा हा, ते इक ऐसी वेदी भी लबी, जेस उप्पर लिखा हा, ’अनजाने इश्वर दे आस्ते।’ इसे आस्ते जिसी तुस बगैर जाने दे पूजदे हो, मैं तुसें ओस दा समाचार सनाना। ²⁴ जेस परमातमा ने धरती ते ते ओस दी सारियें चीजें गी बनाया, ओह सुर्ग ते धरती दा स्वामी होंदे होई हत्थें दे मंदिरें च नेई रोंदा; ²⁵ ना किसे चीज दी जरूरत दे कारण मनुख दे हत्थे दी सेवा लेंदा ऐ, की वे ओह अप्पुं गे सबनीं गी जीवन ते श्वास ते सब किश दिंदा ऐ। ²⁶ ओस ने इक गे मूल कन्ने मनुख दियां सब जातियां सारी धरती उप्पर रैने आस्ते बनाई दियांन; ते उंदे ठहराए दे समें ते निवास दी सीमाएं गी इस आस्ते बने दा ऐ, ²⁷ के ओह परमातमा गी तुपन, कदें उसी टटोलीयै पांन, तां जे ओह साड़े कोलां कुसे कुला भी दूर नेईयैं। ²⁸ की वे आस ओदे बीच गै रैने, चलने फिरने, ते स्थिर रैनेयां न; जिय्यां तुंदे किन्ने कवियैं भी आखया ऐ, ’आस ते ओह दे गै वंश न।’ ²⁹ इस आस्ते परमातमा दा वंश होंदे होई असें ए समझना उचित नेईयैं के ईश्वरत्व सुन्ने जां रुपे जां पत्थर दे समान ऐ, जेड़ी मनुख दी कारीगरी ते कल्पना कन्ने कड़े दे होंन। ³⁰ इसे आस्ते परमातमा ने अज्ञानता दे समें च ध्यान नेई दिता, लेकन हूंन सब जगह सब इन्सानें गी मन फिराने दी आज्ञा दिंदा ऐ। ³¹ की वे ओस ने इक दिन ठहराए दा ऐ, जेस च ओह ओस मनुख दे द्वारा धर्म कन्ने संसार दा न्याय करग, जिसी ओस ठहराए दा ऐ, ते उसी मरें दे बीचा जिंदा करीये ए गल्ल सारें उप्पर प्रमाणित करी दिती ऐ।”

³² मरें दा ज़िंदा होने दी गल्ल सुनीयै किश ते ठठा करना लगे, ते कईयैं आखया, “ए गल्ल तुंदे कोलां फिरी कदें सुनगे।” ³³ एस उप्पर पोलुस उंदे बीचा निकली गया। ³⁴ लेकन किश मनुख ओदे कन्ने मिली गे, ते विश्वास किता; जींदे च दियुनुसियुस जेड़ा अरियुपगुस दा सदस्य हा, ते दमरिस नां दी इक घरेआली ही, ते उंदे कन्ने होर भी लोग हे।

¹ एस कोलां बाद पोलुस एथेंस गी शुड़ीयै कुरिन्थुस च आया। ² उत्थें उसी अक्विला नां दा इक यहूदी मिलया, जेस दा जन्म पुन्तुस च ओया हा। ओह अपनी घरेआली प्रिसकिल्ला दे कन्ने इटली दा हाल च गै आए दा हा, की वे क्लौदियुस ने सब यहूदियें गी रोम दा निकलने दी आज्ञा दिती ही। इसे आस्ते ओह उंदे उत्थें गया। ³ ओस दा ते उंदा इक गै उघम हा, इसे आस्ते ओह उंदे कन्ने रेया ते ओह कम्म करना लगे; ते उंदा उघम तम्बू बनाने दा हा। ⁴ ओह हर इक सब्त दे दिन अराधनालें च वाद विवाद करियै यहुदियें ते युनानियें गी भी समझांदा हा।

⁵ जेस ले सीलास ते तीमुथियुस मकिदुनिया बीचा आए, ते पोलुस वचन सनाने दी धुन च यहुदियें गी गुआइ देने लगया के यीशु गै मसीह ऐ। ⁶ लेकन जेस ले ओह बरोध ते निंदा करना लगे, ते ओस ने अपने कपड़े झाड़ीयै उन्हें आखया, “तुंदा खून तुंदी गर्दन उप्पर गै रवे ! मैं निर्दोष हां। हूंन कोलां मैं अन्यजातियें कोल जाना।” ⁷ उत्थुं दा ओह चलीयै ओह तीतुस यूस्तुस नां दे परमातमा दे इक भक्त दे घर च आया; जेस दा घर अराधनालय कन्ने लगे दा हा। ⁸ उस बेले अराधनालय दे सरदार क्रिसपुस ने अपने सारे घराने समेत प्रभु उप्पर विश्वास किता; ते मते कुरिन्थवासी सुनियै विश्वास लाए ते बपतिस्मा लेता। ⁹ प्रभु ने इक राती दर्शन दे द्वारा पोलुस कन्ने आखया, “मत डर, बरना आखी जा चुप नेई रो; ¹⁰ की वे मैं तेरे कन्ने हां, ते कोई भी तेरे उप्पर चड़ाई करियै तेरी हानी नेई करग; की वे एस नगर च मेरे मते लोग न।” ¹¹ इसे आस्ते ओह उंदे बीच डेढ़ साल तकर परमातमा दा वचन सनांदा रेया।

¹² जेस ले गल्लियो अखाया देश दा हाकिम हा, ते यहूदी लोग एका करियै पोलुस उप्पर चढ़ी आए, ते उसी न्याय आसन दे सामने लाइयै आखना लगे, ¹³ “ए लोकें गी समझांदा ऐ के परमातमा दी उपासना एस रिती कन्ने करो, जेड़ी व्यवस्था दे विपरीत ऐ।” ¹⁴ जेस ले पोलुस बोलने उप्पर गे हा, ते गल्लियो ने यहुदियें गी आखया, “ए यहूदियो, जे ए किश अन्याय जां दुष्टता दी गल्ल होंदी, ते ठीक हा के मैं तुंदी सुनदा। ¹⁵ लेकन जे ए वाद विवाद शब्दों, ते नामों, ते तुंदे इत्थें दी व्यवस्था दे बारे च है, ते तुस गै जानो; की वे मैं इनां गल्लां दा न्यायी नेई बनना चाना।” ¹⁶ ते ओस नै उन्हें न्याय आसन दे सामने कोलां कड़ाई दिता। ¹⁷ उस बेले सब लोकैं अराधनालय दे सरदार सोस्थिनेस गी पकड़ियै न्याय आसन दे सामने मारया। लेकन गल्लियो ने इन गल्लां दी किश भी चिंता नेई किती।

¹⁸ पोलुस मते दिन तकर उत्थें रेया। फिरी भ्रां कोलां विदा होइयै किंख्रिया च इस आस्ते सिर मुंडाया, की वे ओस ने मन्नत मनी ही, ते जाज उप्पर सीरिया गी चली गया ते ओस दे कन्ने प्रिसकिल्ला ते अक्विल्ला हे। ¹⁹ ओस ने इफिसुस पुजियै उन्हें गी उत्थें शुड़या, ते अप्पुं अराधनालें च जाईयै यहुदियें कन्ने विवाद करना लगा। ²⁰ जेस लै उन्हैं ओस कन्ने विनती किती, “साड़े कन्ने होर किश दिन रै।” ते ओस ने स्वीकार नेई किता; ²¹ लेकन ए बोलियै उंदे कोलां विदा ओया, “जे परमातमा ने चाया ते मैं तुंदे कोल फिरी आगा।” उस बेले ओह इफिसुस कोलां जाज खोलीयै चली गया; ²² ते कैसरिया च उतरियै (यरूशलेम गी) गया ते कलीसिया गी नमस्कार करियै अन्ताकिया च आया।

²³ फिरी किश दिन रेइयै ओह उत्थुं दा निकलया, ते इक होर कोलां गलातिया ते फ्रूगिया प्रदेशें च सब चेलें गी स्थिर करदा फिरया।

²⁴ अप्पुलोस नां दा इक यहूदी, जेस दा जन्म सिकन्दरिया च ओया हा, जेड़ा विद्वान मनुख हा ते पवित्र शास्त्र गी अच्छी तरह कन्ने जानदा हा, इफिसुस च आया। ²⁵ ओस ने प्रभु दे रस्ते दी शिक्षा पाई दी ही, ते मन लाइयै यीशु दे बारे च ठीक ठीक सनांदा ते सखांदा हा, लेकन ओह सिर्फ यूहन्ना बपतिस्मा दी गल्ल जानदा हा। ²⁶ ओह अराधनालें च निडर होइयै बोलना लगया, लेकन प्रिसकिल्ला ते अक्विला ओस दी गल्लां सुनियै उसी अपने इत्थें लेई गे ते परमातमा दा रस्ता उसी होर भी ठीक ठीक बताया। ²⁷ जेस ले ओस ने निश्चय किता के पार उतरियै अखाया गी जाए ते भ्रां ने उसी डाढ़स देइयै चेलें गी ए लिखया के ओह ओस कन्ने अच्छी तरह मिलन; ते ओस ने उत्थें पुजियै उन्लोकें दी बड़ी मदद किती जिन्हैं अनुग्रह दे कारण विश्वास किता हा। ²⁸ की वे ओह पवित्र शास्त्र कोलां प्रमाण देई देइये के यीशु गै मसीह ऐ, बड़ी प्रबलता कन्ने यहुदियें गी सबनी दे सामने निरुत्तर करदा रेया।

¹ जेस ले अप्पुलोस कुरिन्थुस च हा, ते पोलुस उप्पर दे सारे प्रदेशे चा होइयै इफिसुस च आया। उत्थें किश चेलें गी दिखियै ² उंदे कन्ने आखया, “के तुसैं विश्वास करदे समें पवित्र आत्मा गी पाया ?” उन्हैं उसी आखया, “असैं ते पवित्र आत्मा दी चर्चा भी नेई सुनी।” ³ ओस ने उंदे कन्ने आखया, “ते फिरी तुसैं किस दा बपतिस्मा लेता ?” उन्हैं आखया, “यूहन्ना दा बपतिस्मा।” ⁴ पोलुस ने आखया, “यूहन्ना ने ए आखिये मने गी फेरने दा बपतिस्मा दिता के जेड़ा मेरे कोलां बाद आने आला ऐ, ओस उप्पर मतलब यीशु उप्पर विश्वास करना।” ⁵ ए सुनियै उन्हैं प्रभु यीशु दे नां दा बपतिस्मा लेता। ⁶ जेस ले पोलुस ने उंदे उप्पर हत्थ रखे, ते पवित्र आत्मा उंदे उप्पर उतरया, ते ओह अलग अलग भाषा बोलना ते भविष्यवाणी करना लगे। ⁷ ए लगभग बारां मनुख हे।

⁸ ओह अराधनालें च जाइयै तीन महीने तकर निडर होइयै बोलदा रेया, ते परमातमा दे राज दे बारे च विवाद करदा ते समझांदा रेया। ⁹ लेकन किश लोकें कठोर होइयै ओस दी नेई मनी बरना लोकें दे सामने लोकैं दे सामने एस रस्ते गी बुरा आखना लगे, ते ओस ने उन्हें गी शुड़ी दिता ते चेलें गी अलग करी दिता, ते हर रोज तुरत्रुस दी पढ़ाई च वाद विवाद करदा हा। ¹⁰ दो साल तकर इय्ये होंदा रेया, इत्थें तकर के आसिया दे रोहने आले के यहूदी के यूनानी सबनी प्रभु दा वचन सुनी लेता।

¹¹ परमातमा पोलुस दे हत्थें शक्ति दे अनोखे कम्म दसदा हा। ¹² इत्थें तकर के रुमाल ते अंगोछे ओस दे शरीर कोलां स्पर्श कराइये बमारें उप्पर सुटदे हे, ते उंदी बमारियां जांदीयां रेंदियां हियां; ते दुष्ट आत्मां उंदे बीचा निकली जांदियां हियां। ¹³ लेकन किश यहूदी जेड़े झाड़ा करदे फिरदे हे, ए करना लगे के जींदे बीच दुष्टात्मा होंन उंदे उप्पर प्रभु यीशु दा नां ए आखियै फुके, “जेस यीशु दा प्रचार पोलुस करदा ऐ, मैं तुगी ओस दी गै कसम दीना ऐं।” ¹⁴ ते स्किक्वा नां दे इक यहूदी प्रधान याजक दे सत पुत्र हे, जेड़े इय्यां गै करदे हे। ¹⁵ लेकन दुष्टात्मा ने उन्हें उत्तर दिता, “यीशु गी मैं जाननी हां, ते पोलुस गी भी पहचाननी हां, लेकन तुस कुन्न हो ?” ¹⁶ ते ओस मनुख ने जेस च दुष्टात्मा ही उंदे उप्पर लपकीयै ते उन्हें वश च लाइयै, उंदे उप्पर एसा उपद्रव किता के ओह नंगे ते घायल होइयै ओस घरा निकली नसे। ¹⁷ ए गल्ल इफिसुस दे रोने आले सब यहूदी ते यूनानी भी जानी गे, ते उंदे सबनी उप्पर डर छाई गया; ते प्रभु यीशु दे नां दी बड़ाई होई। ¹⁸ जिन्हैं विश्वास किता हा, उंदे बीचा बथेरें आइयै अपने अपने कम्में गी मनी लेता ते प्रगट किता। ¹⁹ जादू करने आलें बीचा बथेरैं अपनी अपनी पोथियाँ किट्ठीयां करियै सबनी दे सामने जाली दितियां, ते जेस ले उंदा मूल जोड़या गया, ते पंजाह हजार चांदी दे सिक्के दे बराबर निकलया। ²⁰ एस चाल्ली प्रभु दा वचन फैलदा ते प्रबल होंदा गया।

²¹ जेस ले ए गल्लां होई गइयां ते पोलुस ने आत्मा च ठानया के मकिदुनिया ते अखाया कोलां होइयै यरूशलेम गी जा, ते आखया, “उत्थें जाने दे बाद मीगी रोम गी भी दिखना जरूरी ऐ।” ²² इसे आस्ते अपनी सेवा करने आलें बीचा तीमुथियुस ते इरास्तुस गी मकिदुनिया भेजीयै अप्पुं किश दिन आसिया च रेई गया।

²³ ओस समें ओस पंथ दे बारे च मता हुल्लड़ ओया। ²⁴ की वे देमेत्रियुस नां दा इक सुनार अरतिमिस दे चांदी दे मंदिर बनाइयै कारीगरें गी मते कम्म दिलांदा हा। ²⁵ ओस ने उन्हें ते इय्ये जे चीजें दे कारीगरें गी किटठा करियै आखया, “इ इन्सानो, तुस जानदे हो के एस कम्म कोलां असें किन्ना ग धन मिलदा ऐ। ²⁶ तुस दिखदे ते सुनदे हो के सिर्फ इफिसुस च गे नेई, बरना इसे आस्ते सारे आसिया च ए आखी आखीये एस पोलुस ने मतें लोकें गी समझाया ते भरमाया भी ऐ, के जेड़ी हत्थे दी कारीगरी ऐ, ओह ईश्वर नेईयें। ²⁷ एस कोलां सिर्फ इसे गल्ल दा डर नेईयैं के साड़े एस धंदे दी प्रतिष्ठा जांदी रोग, बरना ए की महान देवी अरतिमिस दा मंदिर तुच्छ समझा जाग, ते जिसी सारा आसिया ते संसार पुजदा ऐ ओस दा महत्व भी जांदा रोना।”

²⁸ ओह ए सुनियै क्रोध कन्ने भरोई गे ते करलाई करलाई आखना लगे, “इफिसियें दी अरतिमिस महान है !” ²⁹ ते सारे नगर च बड़ा कोलाहल मची गया, ते लोकैं मकिदुनियावासी गयुस ते अरिस्तर्खुस गी जेड़े पोलुस दे संगी यात्री हे, पकड़ी लेता, ते इक साथ रंगशाला च दोड़ी गे। ³⁰ जेस लै पोलुस ने लोकें दे कोल जाना चाया ते चेलैं उसी जाना नेई दिता। ³¹ आसिया दे हाकिमें बीचा भी कई मित्रैं ओस दे कोल स्नेहा भेजया, ते विनती किती के रंगशाला च जाईयै जोखिम नेई उठायां। ³² उत्थें कोई किश करलांदा हा ते कोई किश, की वे सभा च बड़ी गड़बड़ी होआ करदी ही, ते मते सारे लोग ए जानदे भी नेई हे के आस किस आस्ते किटठे होए दे न। ³³ उस बेले उन्हैं सिकंदर गी, जिसी यहूदियैं खड़ा किते दा हा, भीड़ बीचा अगें बदाया। सिकंदर हत्थे बीचा संकेत करियै लोकें दे सामने उत्तर देना चांदा हा। ³⁴ लेकन जेस लै उन्हैं जानी लेता के ओह यहूदी ऐ, ते सारे दे सारे इक शब्द कन्ने कोई दो घंटे तकर करलांदे रे, “इफिसियों दी अरतिमिस महान है।” ³⁵ इस करी नगर दे मंत्रीयैं लोकें गी शांत करियै आखया, “ए इफिसुस दे लोको, कुन्न नेई जानदा के इफिसियों दा नगर महान देवी अरतिमिस दे मंदिर, ते ज्यूस दी बखीया किरी दी मूर्ति दा टहलुआ ऐ। ³⁶ इस आस्ते जे इनां गल्लां खंडन गे नेई होई सकदा, ते ठीक ऐ के तुस शांत रहो ते बगैर सोच बचार दे किश नी करो। ³⁷ की वे तुस इन इन्सानें गी लाए हो जेड़े ना मंदिर गी लुटने आले न ते ना साड़ी देवी दे निंन्दक न। ³⁸ जे देमेत्रियुस ते ओस दे साथी कारीगरें गी इसे कन्ने विवाद होए ते कचहरी खुली दी ऐ ते हाकिम भी ऐंन; ओह इक दुए उप्पर नालिश करन। ³⁹ लेकन जे तुस किसे होर गल्ल दे बारे च किश पूछना चांदे हो, ते नियत सभा दे सामने फैसला किता जाग। ⁴⁰ की वे अज्ज दे बलवे दे कारण साड़े उप्पर दोष लाए जाने दा डर ऐ, इसे आस्ते के एस दा कोई कारण नेईयैं, ते आस एस भीड़ दे किटठे होने दा कोई उत्तर ना देई सकगे।” ⁴¹ ए आखियै ओस ने सभा गी विदा किता।

¹ जेस ले हुल्लड़ थमोई गया ते पोलुस ने चेलें गी बलाइयै समझाया, ते उंदे कोलां विदा होइयै मकिदुनिया दी बखी चली गया। ² ओस सारे प्रदेश बीचा होंदे होई ते चेलें गी मता उत्साहित करी ओह यूनान च आया। ³ जेस ले तीन महीने रेइयै ओह उत्थुं दा जाज उप्पर सिरिया दी बखी जाने आला हा, ते यहूदी उसी मारने च लगे, इसे आस्ते ओस ए निश्चय किता के मकिदुनिया होंदे होई बापस जा। ⁴ बिरीया दे पुर्रुस दा पुत्तर सोपत्रुस ते थिस्सलुनिकियें बीचा अरिस्तर्खुस ते सिकुन्दुस, ते दिरबे दा गयुस, ते तीमुथियुस, ते आसिया दा तुखिकुस ते त्रुफिमुस आसिया तकर ओस दे कन्ने होई गे। ⁵ ओह अगें जाईयै त्रोआस च साड़ा इंतजार करदे रे। ⁶ ते आस अखमीरी रुट्टी दे दिनें दे बाद फिलिप्पी दा जाज उप्पर चढ़ीयै पंज दिनें च त्रोआस च ओस दे कोल पुजे, ते सत दिन तकर उत्थें गै रे।

⁷ हफ्ते दे पैले दिन जेस ले आस रुट्टी तोड़ने आस्ते किटठे होए, ते पोलुस जेड़ा दुए दिन चली जाने उप्पर हा, उंदे कन्ने गल्लां कितियां; ते अधी रातीं तकर गल्लां करदा रेया। ⁸ जेस अटारी उप्पर आस किट्ठे होए दे, ओस च मते दिये जला करदे हे। ⁹ ते यूतुखुस नां दा इक जवान खिड़की उप्पर बैठे दा गहरी नींद कन्ने झुका करदा हा। जेस ले पोलुस देर तकर गल्लां करदा रेया ते ओह नींद दे झोंके च त्री अटारी उपरा डिगी गया, ते मरे दा उठाया गया। ¹⁰ लेकन पोलुस उतरिये ओढे कन्ने लिपटी गया, ते गले लाइये आखया, “घबराओ नी; की वे ओस दा प्राण उसे च है।” ¹¹ ते उप्पर जाइये रुट्टी तोड़ी ते खाइयै इनी देर तकर उंदे कन्ने गल्लां करदा रेया के सबेर होई गयी। फिरी ओह चली गया। ¹² ते ओह ओस जवान गी जिंदे लेई आए ते मती शान्ति पाई।

¹³ आस पैलें गे जाज उप्पर चढ़ीयै अस्सुस गी एस बचार कन्ने आई गे के उत्थां दा आस पोलुस गी चढ़ाई लेचे, की वे ओस ने ए इसे आस्ते ठहराए दा हा के अप्पुं गे पैदल जाने आला हा। ¹⁴ जेस ले ओह अस्सुस च असें गी मिलया ते आस उसी चढ़ाईयै मितुलेने गी आए। ¹⁵ उत्थां दा जाज खोलियै आस दुए दिन खियुस दे सामने पुजे, ते अगले दिन सामुस च जाई लगे; फिरी दुए दिन मिलेतुस च आए। ¹⁶ की वे पोलुस ने इफिसुस दे कोल होंदे होई जाने दा निश्चय किता हा के कुते एसा नी होए के के उसी आसीया च देर लगे; की वे ओह जल्दी च हा के जे होई सके ते ओह पिन्तेकुस्त दे दिन यरूशलेम च रे।

¹⁷ ओस ने मिलेतुस कोलां इफिसुस च स्नेहा भेजया, ते कलीसिया दे प्राचीनें गी बलाया। ¹⁸ जेस ले ओह ओस दे कोल आए, ते उंदे कन्ने आखया: “तुस जानदे हो के पैलें दे दिन मगरां जेस ले मैं आसीया च पुजया, मैं हर बेले तुंदे कन्ने किस चाल्ली रेया - ¹⁹ मतलब बड़ी दीनता कन्ने, ते आंसू बहाई बहाइये, ये उन परीक्षां बीच जेड़ीयां यहुदियें दे षडयंत्र कन्ने मेरे उप्पर आई गयीं, मैं प्रभु दी सेवा करदा गे रेया; ²⁰ ते जेड़ीयां जेड़ीयां गल्लां तुंदे फायदे दी हियां, उन्हें सनाने ते लोकैं सामने ते घर घर सखाने आस्ते कदें भी नेई झीझका, ²¹ बरना यहूदी ते यूनानियें दे सामने गुआइ दिंदा रेया के परमातमा दी बखी मने गी फराना ते प्रभु यीशु मसीह उप्पर विश्वास करना चाहीदा। ²² हूंन दिखो, मैं आत्मा च बनोए दा यरूशलेम गी जना ए, ते नेई जानना के उत्थें मेरे उप्पर के के बितग; ²³ सिर्फ ए के पवित्र आत्मा हर नगर च गुआइ देई देइयै मेरे कन्ने आखदा ए के बंधन ते क्लेश तेरे आस्ते तेयार न। ²⁴ लेकन मैं अपने प्राण गी किश नी समझना के उसी प्रिय जानां, बरना ए के मैं अपनी दोड़ गी ते ओस सेवा गी पूरा करां, जेड़ी मैं परमातमा दे अनुग्रह दे सुसमाचार उप्पर गुआइ देने आस्ते प्रभु यीशु कोलां पाई है। ²⁵ हूंन दिखो, मैं जानना ऐं के तुस सब जींदे बीच मैं परमातमा दे राज दा समाचार करदा फिरया, मेरा मुंह फिरी नेई दिखगे। ²⁶ इसे आस्ते मैं अज्ज दे दिन तुंदे कन्ने गुआइ देइये आखना ऐ, के मैं सबनीं दे खूना कोलां निर्दोष ऐं। ²⁷ की वे मैं परमातमा दे सारे अभिप्राय गी तुसें पूरी रिती कन्ने सनाने आस्ते नेई झिझका। ²⁸ इसे आस्ते अपनी बखी पूरे झुंड दी चोकसी करो जेस च पवित्र आत्मा ने तुसें अध्यक्ष ठहराए दा ए, के तुस परमातमा दी कलीसिया दी रखवाली करो, जिसी ओने अपने खून कन्ने खरीदी लेता दा ए। ²⁹ मैं जानना ऐं के मेरे जाने कोलां बाद फाड़ने आले भेड़िए तुंदे बीच आघंन जेड़े झुंड गी नेई छडघंन। ³⁰ तुंदे गे बीचा भी ऐसे ऐसे मनुख उठघन, जेड़े चेलें गी अपने पीछें खीचने आस्ते टेड़ी मेढ़ी गल्लां आखघन। ³¹ इसे आस्ते जागदे रवो, ते स्मरण करो के मैं तीन साल तकर रातीं दिनें आंसू बहाई बहाईये हर इक गी चतोनी देना नेई शुड़या। ³² ते हूंन मैं तुसें परमातमा गी, ते ओस दे अनुग्रह दे वचन गी सोंपी दिना; जेड़ा तुंदी तरक्की करी सकदा ऐ ते सब पवित्र किते दे लोकें च साझी करियै मीरास देई सकदा ऐ। ³³ मैं किसे दे चांदी, सुन्ने जां कपड़े दा लालच नेई किता। ³⁴ युस अप्पुं गे जानदे हो के इन्हैं हत्त्थैं गे मेरी ते मेरे साथियें दी जरूरतें गी पूरा किता। ³⁵ मैं तुसें सब किश पूरा करियै दसया के एस रिती कन्ने मेहनत करदे होई कमजोरें गी संभालना ते प्रभु यीशु दे वचन याद रखना जरूरी है, जेड़ा ओने अप्पुं गे आखे दाऐ: ’लेने कोलां देना धन्य ऐ’।”

³⁶ ए आखियै ओस ने घुटने टेके ते उंदे सारें कन्ने प्रार्थना किती। ³⁷ उस बेले ओह सारे मते रोए ते पोलुस दे गले लिपटीयै उसी चूमना लगे। ³⁸ ओह ख़ास कर एस गल्ले आस्ते शोकित हे जेड़ी ओस ने आखी ही के तुस मेरा मुंह फिरी नेई दिखगे। उस बेले उन्हैं उसी जाज तकर पजाया।

¹ जेस ले असैं ओस कोलां अलग होइयै जाज खोलया, ते सीधे रस्ते कोलां कोस च आए, ते दुए दिन रुदुस च ते उत्थुंआ पतरा च। ² उत्थें इक जाज फीनीके गी जांदा मिलया, ते आसैं ओस उप्पर चढ़ीयै उसी खोली दिता। ³ जेस ले साइप्रस लबया, ते असैं उसी खबे हत्थ शुड़या, ते सीरीया गी चलीयै सूर च उतरे; की वे उत्थें जाज दा माल तुआरना हा। ⁴ चेलें गी पाइये उत्थें आस सत दिन तकर रे। उन्हैं आत्मा दे सखाए पोलुस गी आखया के यरूशलेम बीच पैर नेई रखयां। ⁵ जेस ले दिन पूरे होई गे, ते आस उत्थुं दा चली गे; ते सबनी जानानियें ते बच्चें समेत असें नगर दे बार तकर पजाया; ते असैं कंडे उप्पर घुटने टेकिये प्रार्थना किती, ⁶ इस करी ओह इक दुए कोलां विदा होइयै, आस ते जाज उप्पर चढ़े ते ओह अपने अपने घर बापस गे।

⁷ उस बेले आस सूर कोलां जल यात्रा पूरी करियै पतुलिमयिस च पुजे, ते भ्रां गी नमस्कार करियै उंदे कन्ने इक दिन होर रे। ⁸ दुए दिन आस उत्थुंआ चलियै कैसरिया च आए, ते फिलिप्पुस सुसमाचार दे घर च जेड़ा सतां बीचा इक हा; जाइये ओस दे उत्थें रे। ⁹ ओस दी चार कंवारींयां कुड़ीयां हियां, जेड़ीयां भविष्यवाणी करदी हियां। ¹⁰ जेस ले आस उत्थें मते दिन रेई चुके, ते अगबुस नां दा भविष्यवक्ता यहूदिया दा आया। ¹¹ ओस ने साड़े कोल आइयै पोलुस दा कटिबंध लेता, ते अपने हत्थ पैर बनियै आखया, “पवित्र आत्मा ए आखदा ऐ के जेस मनुख दा ए कटिबंध ऐ, उसी यरूशलेम च यहूदी एस रिती कन्ने बनी देंघन, ते अन्यजातियें दे हत्थे च सोंपी देंघन।” ¹² जेस ले असैं ए गल्लां सुनियां, ते आस ते उत्थुंआं दे लोकें ओस कन्ने विनती किती के यरूशलेम गी नेई जाए। ¹³ लेकन पोलुस ने उत्तर दिता, “तुस के करदे हो के रोई – रोइये मेरे दिल तोड़ा करदे हो ? मैं ते प्रभु यीशु दे नां आस्ते यरूशलेम सिर्फ बनोने आस्ते गै बरना मरने आस्ते भी तेयार ऐं।” ¹⁴ जेस ले ओस नेई मनया ते ते आस ए आखियै चुप होई गे, “प्रभु दी मर्जी पूरी होए।”

¹⁵ इनें दिनें दे बाद असैं तेयारी किती ते यरूशलेम गी चली गे। ¹⁶ कैसरिया बीचा भी किश चेले साड़े कन्ने होई गे, ते असें मनासोन नां साइप्रस दे इक पराने चेले दे इत्थें लेई आए, के आस ओस दे उत्थें टिकचे।

¹⁷ जेस ले आस यरूशलेम च पुजे, ते प्रा मते आनंद कन्ने साड़े कन्ने मिले। ¹⁸ दुए दिन पोलुस असें लेइयै याकूब दे कोल गया, जित्थें सब प्राचीन किटठे हे। ¹⁹ स बेले ओस उन्हें नमस्कार करियै, जेड़े जेड़े कम्म परमातमा ने ओस दी सेवा दे द्वारा अन्यजातियें च किते हे, इक इक करियै सारे सनाए। ²⁰ उन्हैं ए सुनीयै परमातमा दी महिमा किती, फिरी ओस कन्ने आखया, “ए प्रा, तू दिखना ऐ के यहुदियें बीचा कई हजारें विश्वास किता ऐ; ते सारे व्यवस्था आस्ते धुन लाए दे न। ²¹ उन्हें तेरे बारे च सिखाया गेदा ऐ के तू अन्यजातियें च रेने आले यहुदियें गी मूसा कोलां फिरी जाने गी सिखाना ऐ, ते आखना ऐ, ते ना अपने बच्चें दा खतना कराओ ते ना रितीयें उप्पर चलो। ²² ते फिरी के किता जा ? लोग जरूर सुनघंन के तू आए दा ऐ। ²³ इसे आस्ते आस जे तेरे कन्ने आखनेया, ओह कर। साड़े इत्थें चार मनुख न जिन्हैं मन्नत मनी दी ऐ। ²⁴ उन्हें लेइयै उंदे कन्ने अपने आप गी शुद्ध कर; ते उंदे आस्ते खर्चा दे के ओह सर मुड़ान। उस बेले सारे जानीं लेंघंन के जेड़ीयां गल्लां तेरे बारे च उन्हें सनाए गईयां न, उंदे बीच किश सच्चाई नेईयैं लेकन तू अप्पुं भी व्यवस्था गी मनीयै ओस दे मताबक चलना ऐ। ²⁵ लेकन उन अन्यजातियें दे बारे च जिन्हैं विश्वास किता ऐ, असैं ए निर्णय करियै लिखी भेजया ऐ के ओह मूर्तियें दे सामने बलि किते दे मांस कोलां ते व्यभिचार कोलां बचे रोंन।” ²⁶ उस बेले पोलुस उन इन्सानें गी लेइयै, ते दुए दिन उंदे कन्ने शुद्ध होइयै मंदिर च गया, ते उत्थें सनाई दिता के शुद्ध होने दे दिन, मतलब उंदे बीचा हर इक आस्ते चढ़ावा चढ़ाए जाने दे दिन कदुं पूरे होंघन।

²⁷ जेस ले ओह सत दिन पुरे होने उप्पर हे, ते आसीया दे यहुदियैं पोलुस गी मंदिर च दिखियै सरे लोकें गी उसकाया, ते इय्यां करलाईये उसी पकड़ी लेता, ²⁸ “ए इस्राएलियो, मदद करो; ए उए मनुख न, जेड़े लोकें दे, ते व्यवस्था दे, ते एस जगह दे बरोध च हर जगह लोकें गी सिखांदा ऐ, इत्थें तकर के यूनानियें गी भी मंदिर च लाईयै ओस ने एस पवित्र स्थान गी अपवित्र किता ए।” ²⁹ उन्हैं एस कोलां पैलैं इफिसुसवासी त्रुफिमुस गी ओस दे कन्ने नगर च दिखया हा, ते समझे हे के पोलुस उसी मंदिर च लेई आया ऐ। ³⁰ इस करी सारे नगर बीच कोलाहल मची गया, ते लोग दोड़ीयै किट्ठे होए ते पोलुस गी पकड़ियै मंदिर दे बार घसीटी लेई आए, ते फोरन द्वार बंद किते गे। ³¹ जेस ले ओह उसी मरी देना चांदे हे, ते पलटन दे सरदार गी संदेश पुजया के सारे यरूशलेम च कोलाहल मचा करदा ऐ। ³² उस बेले ओह फोरन सैनिकें ते सुबेदारें गी लेइयै उंदे कोल थले दोड़ी आया; ते उन्हैं पलटन दे सरदार गी ते बाकी सैनिकें दिखियै पोलुस गी मारना पीटना शुड़ी दिता। ³³ उस बेले पलटन दे सरदार ने कोल आइयै उसी पकड़ी लेता; ते दो जंजीरें कन्ने बनने दी आज्ञा देइयै पूछना लगे, “ए कुन्न ऐ ते एस ने के किता ऐ ?” ³⁴ लेकन भीड़ बीचा कोई किश ते कोई किश करलांदा रेया। जेस ले हुल्लड़ दे मारे ओह ठीक सच्चाई नेई जानी सकया, ते उसी गडे च लेई जाने दी आज्ञा दिती। ³⁵ जेस ले ओह सिढ़ीयैं उप्पर पुजया, ते ऐसा ओया के भीड़ दे दबाब दे मारे सैनिकें गी उसी चूकिये लेई जाना पेया। ³⁶ की वे लोकें दी भीड़ ए करलांदी होई ओस दे पीछें पेदी ही, “ओस दा अंत करी दो।”

³⁷ जेस ले ओह पोलुस गी गड़ बीच लेई जाने आले हे, ते ओस ने पलटन दे सरदार कन्ने आखया, “के मीगी आज्ञा ऐ के मैं तेरे कन्ने किश आखी सकां ?” ओस ने आखया, “के तू यूनानी जानना ऐ ? ³⁸ के तू ओह मिस्त्री नेईयै, जेड़ा इनें दिनें कोलां पैलैं विद्रोही बनाइयै, चार हजार कटारबंध लोकें गी जंगल च लेई गया ?” ³⁹ पोलुस ने आखया, “मैं ते तरसुस दा यहूदी इंसान ऐं ! मैं तेरे अगें विनती करना ऐं के मीगी लोकें कन्ने गल्लां करना दे।” ⁴⁰ जेस ले ओस ने आज्ञा दिती, ते पोलुस ने सीढ़ी उप्पर खड़ोइयै लोकें गी हत्थे कन्ने शारा किता। जेस ले ओह चुप होई गे ते ओह इब्रानी भाषा च बोलना लगया:

¹ “ए प्रा ओ ते पितरो, मेरा प्रत्युत्तर सुनो, जेड़ा मैं हूंन तुंदे सामने पेश करना ऐ।”

² ओह ए सुनीयै के ओह साड़े कन्ने इब्रानी भाषा च बोलदा ए, होर भी चुप होई गे। उस बेले ओस ने आखया:

³ “मैं ते यहूदी मनुख ऐ, जेड़ा किलिकिया दे तरतुस च जमया; लेकन एस नगर च गमलीएल दे पैरें दे कोल बैठाईयै पढ़ाया गया, ते बब्ब दादें दी व्यवस्था दी ठीक रिती उप्पर सिखाया गया; ते परमातमा दे आस्ते ऐसी धुन लाए दा हा, जिय्यां तुस अज्ज लाए दे हो। ⁴ मैं मर्द ते जानानी दोनीं गी बनी बनियै ते जेले च पाई पाईयै, एस पंथ गी गी इत्थें तकर सताया के उन्हें मराई भी दिता। ⁵ एस गल्ल आस्ते महायाजक ते सब पुरनिये गुआह न, के उंदे कोलां मैं भ्रां दे नां उप्पर चिट्ठीयां लेइयै दमिश्क गी चला जा करदा हा, के जेड़े उत्थें होंन उन्हें भी दंड दिलाने आस्ते बनीयै यरूशलेम लेई आं।

⁶ “जेस ले मैं चलदे चलदे दमिश्क दे कोल पुजया, ते ऐसा ओया के दो पहर दे लगभग इकाइक बड़ी लो आकाश कोलां मेरे चोनीं बखी चमकी। ⁷ ते मैं धरती उप्पर किरी गया ते ए शब्द सुनया, ’ए शाऊल, ए शाऊल, तू मीगी कैं सताना ऐ ?’ ⁸ मैं उत्तर दिता, ’ए प्रभु, तू कुन्न ऐ ?’ ओस ने मीगी आखया, ’मैं यीशु नासरी ऐं, जिसी तू सताना ऐ।’ ⁹ मेरे साथियैं लो ते दिखी, पर जेड़ा मेरे कन्ने बोलदा हा ओस दा शब्द नेई सुनया। ¹⁰ उस बेले मैं आखया, ’ए प्रभु, मैं के करां ?’ प्रभु ने मेरे कन्ने आखया, ’उठियै दमिश्क च जा, ते जे किश तेरे करने आस्ते ठहराए दा ऐ उत्थें सब किश तुगी सनाई दिता जाग।’ ¹¹ जेस ले ओस लो दे तेज दे मारे मीगी किश दिखाई नेई दिता, ते मैं अपने साथियैं दे हत्थ पकड़ियै दमिश्क च आया।

¹² “उस बेले हनन्याह नां व्यवस्था दे मताबक इक भक्त मनुख, जेड़ा उत्थें रोने आले सारे यहुदियें च सुनाम हा, मेरे कोल आया, ¹³ ते खड़ोइयै मेरे कन्ने आखया, ’ए प्रा शाऊल, फिरी दिखना लग।’ उसे घड़ी मेरे नेत्र खुली गे ते मैं उसी दिखया। ¹⁴ उस बेले ओस ने आखया, ’साड़े बब्ब दादें दे परमातमा ने तुगी इस आस्ते ठहराया ऐ के तू ओस दी मर्जी गी जानै, ते ओस धेर्मी गी दिखे ते ओस दे मुंह कोलां गल्लां सुने। ¹⁵ की वे तू ओस कोलां सारे इन्सानें दे सामने उन गल्लां दा गुआह होगा जेड़ीयां तुसैं दिखियां ते सुनियां न। ¹⁶ हूंन की देर करा करना ? उठ, बपतिस्मा ले, ते ओस दा नां लेइयै अपने सारें पापें गी धोई दे।’

¹⁷ “जेस ले मैं फिरी यरूशलेम च आइयै मंदिर च प्रार्थना करादा हा, ते बेसुध होई गया, ¹⁸ ते ओस गी दिखया के ओह मेरे कन्ने आखदा ए, ’जल्दी करियै यरूशलेम बीचा झट निकली जा; की वे ओह मेरे बारे च तेरी गुआइ नेई मनन गे।’ ¹⁹ मैं आखया, ’ए प्रभु, ओह ते अप्पुं जानदे न के तेरे उप्पर विश्वास करने आलें गी जेले च पांदा ते जगह जगह अराधनालें च मार चढ़ांदा हा। ²⁰ जेस ले तेरे गुआह स्तिफनुस दा खून बहाया जा करदा हा उस बेले मैं भी खड़ोते दा हा ते एस गल्ल च सहमत हा, ते ओस दे घातकें दे कपड़े दी राखी करदा हा।’ ²¹ ते ओस ने मेरे कन्ने आखया, ’चली जा: की वे मैं तुगी अन्यजातियें दे कोल दूर दूर भेजगा’।”

²² ओह एस गल्ल तकर ओदी सुनदे रे, उस बेले उचे शब्द कन्ने करलाए, “ऐसे मनुख दा अंत करो, ओस दा जिंदा रेना ठीक नेईयैं !” ²³ जेस ले ओह करलांदे ते कपड़े सूटदे ते आकाश च धूल उड़ांदे हे; ²⁴ ते पलटन दे सरदार ने आखया, “इसी गड़ च लेई जाओ, ते कोड़े मारियै जाचो, के मैं जानां के लोग केस कारण ओस दे बरोध च इय्यां करलादे न।” ²⁵ जेस लै उन्हैं उसी तसमें कन्ने बनया ते पोलुस ने ओस सूबेदार कन्ने जेड़ा कोल खड़ोते दा हा, आखया, “के ए ठीक है के तुस इक रोमी मनुख गी, ते ओह भी बगैर दोषी ठहराए दे, कोड़े मारो ?” ²⁶ सूबेदार ने ए सुनीयै पलटन दे सरदार कोल जाईयै आखया, “तू के करना ऐ ? ए ते रोमी मनुख ऐ।” ²⁷ इस करी पलटन दे सरदार ने ओस दे कोल आईयै आखया, “मीगी सना, के तू रोमी ऐ ?” ओस ने आखया, “हाँ।” ²⁸ ए सुनीयै पलटन दे सरदार ने आखया, “मैं रोमी होने दा पद मते पैसे देइये पाए दा ऐ।” पोलुस ने आखया, “मैं ते जन्म कोलां गे रोमी ऐ।” ²⁹ उस बेले जेड़े लोग उसी जाचने उप्पर हे, ओह फोरन ओदे कोला हटी गे; ते पलटन दा सरदार भी ए जानियै के ए रोमी न ते मैं उसी बने दा ऐ, डरी गया।

³⁰ दुए दिन ओस ने ठीक ठीक जानने दी इच्छा कन्ने के यहूदी ओस उप्पर की दोष लांदे न, ओस दे बंधन खोली दिते; ते प्रधान याजकें ते सारी महासभा गी किटठा होने दी आज्ञा दिती, ये पोलुस गी थले लेईयै उंदे सामने खड़ा करी दिता।

¹ पोलुस ने महासभा दी बखी टकटकी लाइयै दिखया ते आखया, “ए प्रा ओ, मैं अज्ज तकर परमातमा आस्ते बिलकुल सचे विवेक कन्ने जीवन बिताया ऐ।” ² एस उप्पर हनन्याह महायाजक ने उन्हें जेड़े ओदे कोल खड़ोते दे हे, ओस दे मुंह उप्पर चपेट मारने दी आज्ञा दिती। ³ उस बेले पोलुस ने उसी आखया, “ए चूना फिरे दे टुकड़े, परमातमा तुगी मारग। तू व्यवस्था दे मताबक मेरा न्याय करने गी बैठे दा ए, ते फिरी के व्यवस्था दे खिलाफ मीगी मारने दी आज्ञा दीना ऐ ?” ⁴ जेड़े कोल खड़ोते दे हे उन्हैं आखया, “के तू परमातमा दे महायाजक बुरा भला आखना ए ?” ⁵ पोलुस ने आखया, “ए प्रा ओ, मैं नेई जानदा हा के ऐ महायाजक न; की वे लिखे दा ऐ:’अपने लोकें दे प्रधान गी बुरा ना बोल’।”

⁶ उस बेले पोलुस ने ए जानियै के इक दल सदूकियों ते दुआ फरिसियें दा ऐ, सभा च पुकारियै आखया, “ए प्रा ओ, मैं फरीसी ते फरीसियें दे वंश बीचा ऐ, मरें दी आस ते ज़िंदा होने दे बारे च मेरा झगड़ा होआ करदा ऐ।” ⁷ जेस ले ओस ए गल्ल बोली ते फरिसियां ते सदूकियें दा झगड़ा होना लगया; ते सभा च फूट पेई गई। ⁸ की वे सदूकी ते ए आखदे न, के ना ज़िंदा होना ए, ना सुर्गदूत ते ना आत्मा ऐ; लेकन फरीसी इन सबनीं गी मनदे न। ⁹ उस बेले मता हल्ला मचया ते किश शास्त्री जेड़े फरिसीयें दे दल दे हे, उठी खड़े होए ते ए आखियै झगड़ना लगे, “आस एस मनुख च कोई बराई नेई पानेयां, ते जे कोई आत्मा जां सुर्गदूत ओस कन्ने बोले दा ए ते फिरी के ?” ¹⁰ जेस ले मता झगड़ा ओया, ते पलटन दे सरदार ने एस डर कन्ने के ओह पोलुस दे टुकड़े टुकड़े ना करी देंन, पलटन गी आज्ञा दिती के उतरियै उसी उंदे बीचा जबरदस्ती कडन, ते गड़ च लेई जांन।

¹¹ उसे राती प्रभु ने ओस दे कोल खड़ोइयै आखया, “ए पोलुस, ढ़ाढ़स बन्न; की वे जिय्यां तू यरूशलेम च मेरी गुआइ दिती, उय्यां गए तुगी रोम बीच भी मेरी गुआइ देनी होग।”

¹² जेस ले दिन ओया ते यहूदीयैं षड्यंत्र रचया ते कसम खादी के जेस ले तकर आस पोलुस गी मारी नेई देचे, उस बेले तकर खाचे जां पीचे तां साड़े उप्पर धिक्कार। ¹³ जिन्हैं अप्पुं बीचे ए कसम खादी ही, ओह चालीं जनां कोलां बद हे। ¹⁴ उन्हैं प्रधान याजकें ते पुरनियें कोल जाईयै आखया, “असैं ए ठानी लेता दा ऐ के जेस ले तकर आस पोलुस गी मारी नेई देचे, उस बेले तकर किश चखगे भी ते साड़े उप्पर धिक्कार ऐ। ¹⁵ इसे आस्ते हूंन महासभा समेत पलटन दे सरदार गी समझाओ के उसी तुंदे कोल लेई आए, मन्नो के तुस ओस दे बारे च होर भी ठीक कन्ने जाच करना चांदे हो; ते आस ओस दे पुजने कोलां पैलें गै उसी मारने आस्ते तेयार रोगे।”

¹⁶ पोलुस दे भांजे ने सुनया के ओह ओस दी घात च न, ते गड़ च जाइयै पोलुस गी संदेश दिता। ¹⁷ पोलुस ने सूबेदारें बीचा इक गी अपने कोल बलाइयै आखया, “एस जवान गी पलटन दे सरदार दे कोल लेई जाओ, ए ओस कन्ने किश आखना चांदा ऐ।” ¹⁸ इसे आस्ते ओस ने उसी पलटन दे सरदार दे कोल ले जाइये आखया, “बंदी पोलुस ने मीगी बलाइयै विनती किती के ए जवान पलटन दे सरदार कन्ने किश आखना चांदा ऐ; इसी ओस दे कोल लेई जा।” ¹⁹ पलटन दे सरदार ने ओस दा हत्थ पकड़िये ते अलग लेई जाइयै पूछ्या, “तू मेरे कन्ने के आखना चाना ऐ ?” ²⁰ ओस ने आखया, “यहूदीयैं षड्यंत्र रचे दा ऐ के तेरे कन्ने विनती करन के कल पोलुस गी महासभा च लेई ओंन, मन्नो ओह ते ठीक तरह ओस दी जाच करना चांदे न। ²¹ लेकन उंदी मत मनेयां, की वे उंदे बीच चालियें कोलां उप्पर मनुख उसी मारने च न, जिन्हैं ए ठानी लेता दा ऐ के जेस ले तकर ओह पोलुस गी नेई मारी देंन, उस बेले तकर ना खांघन ते ना पिघंन।स ते ओह तेयार न ते तेरे वचन दी प्रतीक्षा करादे न।” ²² उस बेले पलटन दे सरदार ने जवान गी ए आज्ञा देइयै विदा किता, “किसे कन्ने नेई आखयां के तो मीगी ए गल्लां सनाइयां न।”

²³ उस बेले ओस ने दो सूबेदारें गी बलाइयै आखया, “दो सो सैनिक, सत्तर सवार, ते दो सो भालैत्त, फर रात बितदे कैसरिया गी जाने आस्ते तेयार रखो। ²⁴ ते पोलुस दी सवारी आस्ते घोड़े तेयार रखो, के उसी फेलिक्स हाकिम दे कोल कुशल कन्ने पजाई देंन।” ²⁵ ओस ने एस चाल्ली दी चिट्ठी भी लिखी:

²⁶ “महामहिम फेलिक्स हाकिम गी क्लौदियुस लुसियास दा नमस्कार। ²⁷ एस मनुख गी यहूदीयैं मारना चाया, लेकन जेस ले मैं जानेया के ए रोमी ऐ, ते पलटन लेइयै शुड़ाइ दिता। ²⁸ मैं जानना चांदा हा के ओह एस उप्पर किस कारण दोष लाना चांदे न, इसे आस्ते उसी उंदी महासभा च लेई गया। ²⁹ उस बेले मैं जानी लेता के ओह अपनी व्यवस्था दे विवादें दे बारे च ओस उप्पर दोष लांदे न, लेकन मारने जोग जां बन्नी जाने दे जोग ओस च कोई दोष नेईयैं। ³⁰ जेस ले मीगी सनाया गया के ओह एस मनुख दी घात च लगे दे न ते मैं फोरन उसी तेरे कोल भेजी दिता; ते मुदइयें गी भी आज्ञा दिती के तेरे सामने ओस उप्पर नालिश करन।”

³¹ इस आस्ते जिय्यां सैनिकें गी आज्ञा दिती दी ही, उय्यां गे पोलुस गी लेइयै रातो रात अन्तिपत्रिस च आए। ³² दुए दिन ओह सवारें गी ओस दे कन्ने जाने आस्ते शुड़ीयै अप्पुं गड़ गी बापस गे। ³³ उन्हैं कैसरिया पुजियै हाकिम गी चिट्ठी दिती; ते पोलुस गी भी ओस दे सामने खड़ा किता। ³⁴ ओस ने चिट्ठी पढ़ीयै पूछ्या, “ए किस प्रांत दा ऐ ? ³⁵ ते जेस ले जानी लेता के किलिकिया दा ऐ ते उसी आखया, “जेस ले तेरे मुदइ भी आंघन, ते मैं तेरा मुकदमा करगा।” ते ओस ने उसी हेरोदेस दे किले च पहरे च रखने दी आज्ञा दिती।

¹ पंज्ज दिनें दे बाद हनन्याह महायाजक कई पुरनियें ते तिरतुल्लुस नां दे किसे वकील गी कन्ने लेइयै आया। उन्हैं हाकिम दे सामने पोलुस उप्पर नालिश किती।

² जेस ले ओह बलाया गया ते तिरतुल्लुस ओस उप्पर दोष लाईयै आखना लगया: “ए महामहिम फेलिक्स, तेरे द्वारा साड़े च मता कुशल होंदा ऐ; ते तेरे प्रबंध कन्ने एस जाति आस्तेअनेक बराइयां सुधरदी जांदीयां न। ³ इसी आस हर जगह ते हर प्रकार कन्ने धन्यावाद कन्ने मनने हां। ⁴ लेकन इस आस्ते के तुगी आस होर दुःख नेई देना चानेयां, मैं तेरे कन्ने विनती करना ऐ के कृपा करीयै साड़िया दो इक गल्लां सुनी लै। ⁵ की वे असैं इस मनुख गी उपद्रवी ते संसार दे सारे यहुदियें च बलवा कराने आला, ते नासरियें दे कुपंथ दा मुखिया पाया ऐ। ⁶ ओस ने मंदिर गी अशुद्ध करना चाया, लेकन असैं उसी पकड़ी लेता।[असैं उसी अपनी व्यवस्था दे मताबक दंड दिता होंदा; ⁷ लेकन पलटन दे सरदार लूसियास नै उसी जबरदस्ती साड़े हत्थे बीचा शुड़काई लेता, ⁸ ते मुदईयें गी तेरे सामने आने दी आज्ञा दिती।] इन सब गल्लें गी जींदे बारे च आस ओदे उप्पर दोष ला करनेयां न, तू अप्पुं गे उसी जाच करियै जानी लेगा।” ⁹ यहूदीयैं भी ओस दा साथ देइयै आखया, ए गल्लां इसे चाल्ली दियां न।

¹⁰ जेस ले हाकिम ने पोलुस गी बोलने दा संकेत किता, ते ओस ने उत्तर दिता: “मैं ए जानियै के बड़े सालें दा एस जाति दा न्याय करा करना ऐ, आनंद कन्ने अपना प्रत्युत्तर दीना ऐ। ¹¹ तू अप्पुं जानी सकना ऐ के जेस ले दा मैं यरूशलेम गी अराधना करने गी आए दा, मीगी बारां दिनां कोलां उप्पर नेई होए। ¹² उन्हैं मीगी ना मंदिर च ना अराधनालें च, ना नगर च कुसे कन्ने विवाद करदे जां भीड़ लांदे पाया; ¹³ ते ना ते ओह उन गल्लें गी, जिन्दा हूंन ओह मेरे उप्पर दोष लांदे न, तेरे सामने सच प्रमानित करी सकदे न। ¹⁴ लेकन मैं तेरे सामने ए मनी लेना के जेस पंथ गी ओह कुपन्थ आखदे न, उसे दी रिती उप्पर मैं अपने बब्ब दादें दे परमातमा दी सेवा करना ऐ; ते जेड़ीया गल्लां व्यवस्था ते भविष्यवक्तें दी कताबें च लिखी दीयां न, उन सबनी उप्पर मैं विश्वास करना ऐ। ¹⁵ ते परमातमा कन्ने आस रखना ऐ जेड़े ओह अप्पुं भी रखदे न, के धर्मी ते अधर्मी दोनीं दा जिंदा होना होग। ¹⁶ एस कन्ने मैं अप्पुं भी कोशिश करना ऐ के परमातमा दी, ते इन्सानें आली बखी मेरा विवेक म्हेशां निर्दोष रवे। ¹⁷ मते सालें बाद मैं अपने लोकें गी दान पजाने, ते भेंट चढ़ाने आया हा। ¹⁸ उन्हैं मीगी मंदिर च, शुद्ध दशा च, बगैर भीड़ दे कन्ने, ते बगैर दंगा करदे होई भेंट चाढ़दे पाया - हाँ, आसिया दे कई यहूदी ऐहे - उन्हें ठीक हा ¹⁹ के जे मेरे बरोध च उंदे कोल कोई गल्ल होए ते इत्थें तेरे सामने आईयै मेरे उप्पर दोष लांदे। ²⁰ जां ए अप्पुं गै सनान के जेस ले मैं महासभा दे सामने खड़ोते दा हा, ते उन्हैं मेरे बीच केड़ा अपराध पाया ? ²¹ इसी इक गल्ल गी शुड़ी जेड़ी मैं उंदे बीच खड़ोइयै पुकारीयै आखी ही: ’मरें दे जिंदा होने दे बारे च अज्ज मेरा तुंदे सामने मुकदमा होआ करदा ऐ’।”

²² फेलिक्स ने, जेड़ा एस पंथ दियां गल्लां ठीक ठीक जानदा हा, उन्हें ए आखियै टाली दिता, “जेस ले पलटन दा सरदार लूसियास आग, ते तुंदी गल्ल दा फैसला करगा।” ²³ ते सूबेदार गी आज्ञा दिती के पोलुस गी किश छुट बीच रखवाली करना, ते ओस दे मित्रें बीचा किसे गी भी ओस दी सेवा करने आस्ते नेई रोकयो।

²⁴ किश दिनें दे बाद फेलिक्स अपनी घरेआली द्रुसिल्ला गी, जेड़ी यहुदीनी ही, कन्ने लेइयै आया ते पोलुस गी बलाईयै ओस विश्वास दे बारे च जेड़ा मसीह यीशु उप्पर ऐ, ओस कोलां सुनया। ²⁵ जेस ले ओह धर्म, ते संयम, ते आने आले न्याय दी चर्चा करादा हा, ते फेलिक्स ने भयभीत होइयै उत्तर दिता, “हूंन ते जा; समें पाइये मैं तुगी फिरी बुलागा।” ²⁶ उसी पोलुस कोलां किश पैसे मिलने दी भी किश आस ही, इसे आस्ते होर भी बुलाई बुलाइयै ओस कन्ने गल्लां करदा हा। ²⁷ लेकन जेस ले दो साल बीती गे पुरकियुस फेस्तुस, फेलिक्स दी जगह उप्पर आया; ते फेलिक्स यहूदीयें गी खुश करने दी इच्छा कन्ने पोलुस गी बंदी गै शुड़ी दिता।

¹ फेस्तुस ओस प्रांत च पुजने दे तीन दिन बाद कैसरिया कोलां यरूशलेम गी गए। ² उस बेले प्रधान याजकें ते यहुदियें दे प्रमुख लोकें ओस दे सामने पोलुस दी नालिश किती; ³ ते ओस कन्ने विनती करियै ओस दे बिरोध च ए वर चाया के ओह उसी यरूशलेम च बुलाए, की वे ओह उसी रस्ते च गे मारी देने दी घात च लगे दे हे। ⁴ फेस्तुस ने उत्तर दिता, “पोलुस कैसरिया च पहरे च ए, ते मैं अप्पुं उत्थें जल्दी जागा।” ⁵ फिरी आखया, “तुंदे बीच जेड़े अधिकार रखदे न ओह कन्ने चलन, ते जे एस मनुख ने किश अनुचित कम्म किता ए ते ओस उप्पर दोष लाओ।”

⁶ उंदे बीच कोई आठ दस दिन रेइयै ओह कैसरिया चली गया;ते दुए दिन न्याय आसन दे सामने बैठीयै पोलुस गी आनने दी आज्ञा दिती। ⁷ जेस ले ओह आया ते जेड़े यहूदी यरूशलेम बीचा आए दे हे, उन्हैं आसे पासे खड़ोइयै उंदे उप्पर मते गंभीर आरोप लाए, जिंदा प्रमाण ओह नेई देई सकदे हे। ⁸ लेकन पोलुस ने उत्तर दिता, “मैं ना ते यहूदीयें व्यवस्था दे ते ना मंदिर दे, ते ना गै कैसर दे बिरोध कोई गुनाह किता ऐ।” ⁹ उस बेले फेस्तुस ने यहूदीयें गी खुश करने दी इच्छा कन्ने पोलुस गी आखया, “के तू चाना ए के यरूशलेम गी जाए; ते उत्थें मेरे सामने तेरा ए मुकदमा तय किता जा ?” ¹⁰ पोलुस ने आखया, “मैं कैसर दे न्याय आसन दे सामने खड़ोते दा; मेरे मुकदमे दा इत्थें गै फैसला होना चाहीदा। जिय्यां तू अच्छी तरह जानना ऐ, यहुदियें दा मैं किश अपराध नेई किता। ¹¹ जे मैं अपराधी ऐं ते मारने जोग कोई कम्म किता ऐ, ते मरने कोलां नेई मुकरगा; लेकन जिन गल्लां दा ए मेरे उप्पर दोष लांदे न, जे उंदे बीचा कोई भी गल्ल सच नेई ठहरे, ते कोई मीगी उंदे हत्थ नेई सोंपी सकदा। मैं कैसर दी दोहाई दीना ऐ।” ¹² उस बेले फेस्तुस ने मंत्रीयें दी सभा कन्ने गल्लां करियै उत्तर दिता, “तो कैसर दी दोहाई दिती ऐ, तू कैसर दे गे कोल जागा।”

¹³ किश दिन बीतने दे बादअग्रिप्पा राजा ते बिरनीके ने कैसरिया च आइयै फेस्तुस कन्ने भेंट किती। ¹⁴ उंदे मते दिन उत्थें रोने दे बाद फेस्तुस ने पोलुस दे बारे च राजे गी सनाया: “इक मनुख ऐ, जिसी फेलिक्स बंदी शुड़ी दा ऐ। ¹⁵ जेस ले मैं यरूशलेम च हा, ते प्रधान याजक ते यहूदीयेन दे पुरनियैं ओस दी नालिश किती ते चाया के ओस उप्पर दंड दी आज्ञा दिती जा। ¹⁶ लेकन मैं उन्हें उत्तर दिता के रोमियें दी ए रिती नेईयैं के कुसे मनुख गी दंड आस्ते सोंपी देंन, जेस ले तकर मुदाअलैह गी अपने मुदइयें दे सामने खड़ोइयै दोष दे उत्तर देने दा अवसर नेई मिले। ¹⁷ इस आस्ते ओह इत्थें किट्ठे होए, ते मैं किश देर ना किती, लेकन दुए गे दिन न्याय आसन उप्पर बैठीयै ओस मनुख गी आनने दी आज्ञा दिती। ¹⁸ जेस ले ओस दे मुदई खड़े होए, ते उन्हैं ऐसी अनुचित गल्लां दा दोष नेई लाया, जिय्यां मैं समझदा हा। ¹⁹ लेकन ओह अपने मत दे यीशु नां किसे मनुख दे बारे च, जेड़ा मारी गया हा ते पोलुस उसी जिंदा सनांदा हा, विवाद करदे हे। ²⁰ मैं उलझन बीच हा के इन गल्लां दा पता किय्यां लां ? इसे आस्ते मैं ओस कन्ने पूछ्या, ’के तू यरूशलेम जागा के उत्थें इनां गल्लें दा फैसला होए ?’स ²¹ लेकन जेस ले पोलुस ने दोहाई दिती के ओस दे मुकदमे दा फैसला महाराजाधिराज दे इत्थें होए, ते मैं आज्ञा दिती के जेस ले तकर उसी कैसर कोल नेई भेजां, उसी कब्जे च रखया जाए।” ²² उस बेले अग्रिप्पा ने फेस्तुस गी आखया, “मैं भी ओस मनुख दी सुनना चाना ऐ।” ओस ने आखया, “तू कल सुनी लेगा।”

²³ इस आस्ते देय दिन जेस ले अग्रिप्पा ते बिरनीके बड़ी धूमधाम कन्ने आए ते पलटन दे सरदारें ते नगर दे प्रमुख लोकें कन्ने दरवार च पुजे। उस बेले फेस्तुस ने आज्ञा दिती के ओह पोलुस गी लेई आंन। ²⁴ फेस्तुस ने आखया, “ए राजा अग्रिप्पा, ते ए सब इन्सानो जेड़ा इत्थें साड़े कन्ने होए, तुस एस मनुख गी दिखदे हो, जेस दे बारे च सारे यहूदीयैं यरूशलेम च ते इत्थें भी करलाई करलाई मेरे अगें विनती किती के एस दा ज़िंदा रोना ठीक नेईयैं। ²⁵ लेकन मैं जानी लेता के एस ने एसा किश नी किता के मारी दिता जा; ते जेस ले के ओस ने अप्पुं गै महाराजाधिराज दी दोहाई दिती, ये मैं उसी भेजने दा फैसला किता। ²⁶ मैं ओस दे बारे च कोई निश्चित गल्ल नेई पाई के अपने स्वामी दे कोल लिखां। इसे आस्ते मैं उसी तुंदे सामने ते ख़ास करियै ए राजा अग्रिप्पा, तेरे सामने लाया ऐ के जाचने दे बाद मीगी किश लिखने आस्ते मिले। ²⁷ की वे बंदी गी भेजना ते जेड़े दोष ओस उप्पर लाए गे, उन्हें गी नेई सनायां, मिगी व्यर्थ लगा करदा ऐ।”

¹ अग्रिप्पा ने पोलुस कन्ने आखया, “तुगी अपने बारे च बोलने दी आज्ञा ऐ।” उस बेले पोलुस हत्थ बदाइये उत्तर देने लगया,

² “ए राजा अग्रिप्पा, जिन्नी गल्लें दा यहूदी म्रेरे उप्पर दोष लांदे न, अज्ज तेरे सामने उंदा उत्तर देने गी मैं अपने आप गी मैं धन्य समझना ऐ, ³ ख़ास कर इस आस्ते के के तू यहूदीयें सारे व्यवहारें ते विवादें गी जानना ए। इया आस्ते मैं विनती करना ए, धीरज कन्ने मेरी सुन।

⁴ “मेरा चाल चलन शुरू कोलां अपनी जाती दे बीच यरूशलेम च जिय्यां हा ओह सारे यहूदी जानदे न। ⁵ जे ओह गुआइ देना चांदे, ते शुरू कोलां मीगी पनछानदे न के मैं फरीसी होंदे होई अपने धर्म दे सबनी कोलां खरे पंथ उप्पर चलया। ⁶ ते हूंन ओस प्रतिज्ञा दी आस दे कारण जेड़ी परमातमा ने साड़े बब्ब दादें कन्ने किती ही, मेरे उप्पर मुकदमा चली करदा ऐ। ⁷ उसे प्रतिज्ञा दे पुरे होने दी आस लाए दे, साड़े बारां गोत्र अपने सरे मन कन्ने रात दिन परमातमा दी सेवा करदे आए न। ए राजा, इसे आस दे बारे च यहूदी मेरे उप्पर दोष लांदे न। ⁸ जेस बेले परमातमा मरें गी जिंदा करदा ए, ते तुंदे इत्थें ए गल्ल की विश्वास दे जोगी नेई समझी जांदी ?

⁹ “मैं भी समझया हा के यीशु नासरी दे नां दे बिरोध च मीगी मता किश करना चाहीदा। ¹⁰ ते मैं यरूशलेम बीच ऐसा गै किता; ते प्रधान याजकें कोलां अधिकार पाइयै मते पवित्र लोकें गी जेले च पाया, ते जेस ले ओह मारे जांदे हे ते मैं भी उंदे बिरोध च अपना साथ दिदा हा। ¹¹ हर अराधनालय च मैं उन्हें ताड़ना दिलाई दिलाई यीशु दी निंदा करांदा हा, इत्थें तकर के क्रोध दे मारे एसा पागल होई गया के बार दे नगरें च भी जाइयै उन्हें सतांदा हा।

¹² “इसे धुन बीच जेस ले मैं प्रधान याजकें कोलां अधिकार ते आज्ञा पत्र लेइयै दमिश्क गी जा करदा हा; ¹³ ते ए राजा, रस्ते च दोपेरीं दे समें मैं आकाश कोलां सूरज दे तेज कोलां भी बद इक लो, अपने उप्पर ते अपने कन्ने चलने आलें दे चोनीं बखी चमकदी दिखी। ¹⁴ जेस ले आस सारे धरती उप्पर किरी गे, ते मैं इब्रानी भाषा च, मेरे कन्ने आखदे ए शब्द सुनया, ’ए शाऊल, ए शाऊल, तू मीगी की सताना ऐ ? पैने उप्पर लत मारना तेरे आस्ते मुश्किल ऐ।’ ¹⁵ मैं आखया, ’इ प्रभु, तू कुन्न ऐ ?’ प्रभु ने आखया, ’मैं यीशु ऐं, जिसी तु सताना ऐ। ¹⁶ लेकन तू उठ, अपने पैरें उप्पर खड़ो; की वे मैं तुगी इस आस्ते दर्शन दिता ए जके तुगी उन गल्लां दा भी देवक ते गुआह ठहरां, जेड़ीयां तू दिखीयां न, ते उंदा भी जिस दा मैं तुगी दर्शन देगा। ¹⁷ ते मैं तुगी तेरे लोकें कोलां ते अन्यजातियें कोलां बचांदा रोगा, जींदे कोल मैं हूंन तुगी इस आस्ते भेजना ए ¹⁸ के तू उंदीयां अखां खोले के ओह न्हेरे चा लो आली बखी, ते शैतान दे अधिकार कोलां परमातमा दी बखी फिरन; के पापें दी माफ़ी ते उन लोकें दे कन्ने जेड़े मेरे उप्पर विश्वास करने मगरां पवित्र किते गे न, मीरास पांन।’

¹⁹ “इस आस्ते ए राजा अग्रिप्पा, मैं ओस सुर्गीय दर्शन दी गल्ल नेई टाली, ²⁰ लेकन पैलें दमिश्क दे, फिरी यरूशलेम दे, उस बेले यहूदिया दे सारे देश रैने आले गीं, ते अन्यजातियें गी समझादा रेया, के मने गी फराओ ते परमातमा दी बखी फिरीयै मन फिराव दे जोगा कम्म करो। ²¹ इनां गल्लां दे कारण यहूदी मिगी मंदिर च पकड़ियै मारने दी सलाह करदे हे। ²² लेकन परमातमा दी मदद कन्ने मैं अज्ज तकर बने दा ऐ ते नीके बडे सारें दे सामने गुआइ दीना ए, ते उन गल्लें गी शुड़ीयै किश नी आखना जेड़ा भविष्यवक्ता ते मूसा ने भी अखया ए के होने आलीं न, ²³ के मसीह गी दुःख चुकना पोग, ते उए सबनी कोलां पैलें मरें दे बीचा जिंदा होइयै, साड़े लोकें च ते अन्यजातियें च लो दा प्रचार करग।”

²⁴ जेस ले एस रिती कन्ने उत्तर दे करदा हा, ते फेस्तुस ने उचे शब्द कन्ने आखया, “ए पोलुस, तू पागल ऐ। मती पड़ाई ने तुगी पागल करी दिता ऐ।” ²⁵ लेकन पोलुस ने आखया, “ए महामहिम फेस्तुस, मैं पागल नेई, लेकन सचाई ते बुद्धि दियां गल्लां आखना ए। ²⁶ राजा भी जेस दे सामने मैं निडर होइयै बोलाना, ए गल्लां जानदा ऐ; ते मिगी विश्वास ऐ के इनां गल्लां बीचा कोई ओस कोलां छिपी नेई, की वे ए घटना किसे कोने च नेई होई। ²⁷ ए राजा अग्रिप्पा, के तू भविष्यवक्तां दा विश्वास करना ए ? हाँ, मैं जानना ऐ के तू विश्वास करना ऐ।” ²⁸ उस बेले अग्रिप्पा ने पोलुस गी आखया, “तू थोड़ा समझाने कन्ने मीगी मसीह बनाना चाना ऐ ?” ²⁹ पोलुस ने आखया, “परमातमा अगें मेरी प्रार्थान ए के क्या थोड़े च ते के मते च, सिर्फ तू ऐ नेई लेकन जिन्ने लोग अज्ज मेरी सुनादे न, इन्हें बंधनें गी शुड़ी ओह मेरे समान होई जांन।”

³⁰ उस बेले राजा ते हाकिम ते बिरनीके ते उंदे कन्ने बैठने आले उठी खड़ोते: ³¹ ते अलग जाइयै अप्पुं बीचे आखना लगे, “ए मनुख ऐसा ते किश नेई करदा, जेड़ा मोत जां जेले च पाने दे जोग होए।” ³² अग्रिप्पा ने फेस्तुस गी आखया, “जे ए मनुख कैसर दी दोहाई नेई दिंदा, ते शुड़की सकदा हा।”

¹ जे सले ए पक्का होई गया के आस जाजे दे द्वारा इटली जाचे, ते उन्हैं पोलुस ते किश बाकीं बंदियें गी भी यूलियुस नां दे औगुस्तुस दी पलटन दे इक सूबेदार दे हत्थ सोंपी दिता। ² अद्र्मुत्तियुम दे इक जाज उप्पर जेड़ा आसिया दे कंडे दी जगहें जाने गी हा, चढ़ीयै असैं उसी खोली दिता, ते अरिस्तर्खुस नां दा थिस्सलुनिके दा इक मकिदूनी साड़े कन्ने हा। ³ दुए दिन असैं सैदा च लंगर लाया, ते यूलियुस ने पोलुस उप्पर कृपा करियै उसी मित्रें दे इत्थें जाना दिता के ओस दा सत्कार किता जा। ⁴ उत्थुंआं जाज खोलीयै हवा विरुध होने दे कारण आस साइप्रस दी आड़ च होइयै गे; ⁵ ते किलिकिया ते पंफूलिया दे कोल दे समुंद्र च होंदे होई लूसिया दे मूरा च उतरे। ⁶ उत्थें सूबेदार गी सिकंदरिया दा इक जाज इटली जांदा लबया, ते ओस ने असें ओस उप्पर चाढ़ी दिता। ⁷ जे ले आस मते दिन तकर बलें बलें चलियै मुश्किल कन्ने कनिदुस दे सामने पुजे, ते अस आस्ते के हवा असें अगें बदना नेई दिंदी ही, आस सलमोन कोलां होइयै क्रेते दी आड़ च चले; ⁸ ते ओस दे कंडे कंडे मुश्किल कन्ने चलियै ’शुभलंगरबारी’ नां दी इक जगह च पुजे, जित्थां लसया नगर कोल हा।

⁹ जेस ले मते दिन बीती गे ते जल यात्रा च जोखिम एस आस्ते होंदी ही के उपवास दे दिन हूंन बीती गेदे हे। इस आस्ते पोलुस ने उन्हें ए आखीये समझाया, ¹⁰ “ए सज्जनो, मीगी एसा लगदा ऐ के एस यात्रा च विपत्ति ते मती हानी, ना सिर्फ माल ते जाज दी बरना साड़े प्राणें दी भी होने आली ऐ।” ¹¹ लेकन सूबेदार ने पोलुस दी गल्लां कोलां कप्तान ते जाजे दे स्वामी दी गल्लें गी ज्यादा मनया। ¹² ओह बंदरगाह झाड़ा कटने आस्ते अच्छा नेई हा, इसे आस्ते मतें डा बिचार ए ओया के उत्थुंआ खोलियै जे किसे रिती कन्ने होई सके ते फिनिक्स पुजिये झाड़ा कट्चे। ए ते क्रेते दा इक बंदरगाह ऐ जेड़ा दक्षिण पश्चिम ते उत्तर पश्चिम गी खुलदा ऐ।

¹³ जेस ले किश किश दक्षिणी हवा चलना लगी, ते ए समझियै के के साड़ा अभिप्राय पूरा होई गया, लंगर चुकया ते कंडे धरे दे क्रेते दे कोला जाना लगे। ¹⁴ लेकन थोड़ी देर च जमीं दी बखी दा बड़ी आंधी आई, जेड़ी ’यूरकुलिन’ आखी जांदी ऐ। ¹⁵ जेस ले आंधी जाज उप्पर लगी ते ओह ओस दे सामने ठहर नेई सकया, इया आस्ते असैं उसी बहना दिता ते इसे चाल्ली बहते बहते चली गे। ¹⁶ उस बेले कोदा नां दे इक छोटे जे टापू दी आड़ च बैंदे बैंदे आस मुश्किल कन्ने डोंगी गी काबू करी सके। ¹⁷ फिरी मल्लाहें ने उसी चुकियै मते उपाय करियै जाज गी थले दा बनया,ते सुरतिस दे चोरबालू उप्पर टिकने दे डर कन्ने पाल ते समान उतारियै रुड़दे चलिये। ¹⁸ जेस ले असैं आंधी कन्ने मते हिचकोले ते तके खादे, ते दुए दिन ओह जाज दा माल सुटना लगे; ¹⁹ ते त्रिए दिन उन्हैं अपने हत्त्थें कन्ने जाज दा साज समान भी सुटी दिता। ²⁰ जेस ले मतें दिनें तकर ना सूरज, ना तारे लबे ते बड़ी आंधी चलदी रेई, ते लास्ट बीच साड़ी बचने दी साड़ी आस जांदी रेई।

²¹ जेस ले मते दिन तकर भूखे रेई चुके, ते पोलुस ने उंदे बीच खड़ोइयै आखया, “ए लोको, चाहिदा हा के तुस मेरी गल्ल मानियै क्रेते चा ना जाज खोलदे ते ना ए विपति ओंदी ते ना ए हानी चुकदे। ²² लेकन हूंन मैं तुसें गी समझाना ए के ढाढ़स बनो, की वे तुंदे बीचा कुसे दे प्राण दी हानी नेई होग, लेकन सिर्फ जाज दी। ²³ की वे परमातमा जेस दा मैं ए, ते जेस दी सेवा करना ऐ, ओस दे सुर्गदूत ने अज्ज रातीं मेरे कोल आइयै आखया, ²⁴ ए पोलुस, मत डर ! तुगी कैसर दे सामने खड़ोना जरूरी ऐ। दिख, परमातमा ने सबनी गी जेड़े तेरे कन्ने यात्रा करदे न, तुगी दिता ए।’ ²⁵ इस आस्ते, ए सज्जनो, ढाढ़स बन्नो; की वे मैं परमातमा दा विश्वास करना ऐ, के जिय्यां मेरे कन्ने आखया ऐ, उय्यां गे होग। ²⁶ लेकन असें कुसे टापू उप्पर जाई टिकना होग।”

²⁷ जेस ले चोदवीं रात आई, ते आस अद्रिया समुंद्र च भटकदे फिरा करदे हे, ते अधी राती दे कोल मल्लाहैं तजरवे कन्ने जानया के आस किसे देश दे कोल पुजा करनेयां न। ²⁸ थाह लेने उप्पर उन्हैं बी पुरसा गहरा पाया, ते थोड़ा अगें जाईयै फिरी थाह लेती ते पंद्राह पुरसा पाया। ²⁹ जेस ले पथर आली जगह कन्ने टकराने दे डर कन्ने उन्हैं जाजे दी पिछाड़ी चार लंगर पाए, ते सबेरा होने दी कामना करदे रे। ³⁰ लेकन जेस ले मल्लाह जाजे उपरा नसना चांदे हे, ते गलही कन्ने लंगर पाने दे बाने डोंगी समुंद्र च तुआरी दिती; ³¹ ते पोलुस ने सूबेदार ते सैनिकें गी आखया, “जे ए जाजे उप्पर नेई रे, ते तुस भी नेई बची सकदे।” ³² उस बेले सैनिकैं रस्से काटियै डोंगी केरी दिती।

³³ जेस ले सबेर होने पर ही, उस बेले पोलुस ने ए आखियै, सबनी गी रुट्टी खाने आस्ते समझाया, “अज्ज चोदां दिन होए के तुस आस दिखदे दिखदे भूखे रे, ते किश भोजन नेई किता। ³⁴ इसे आस्ते तुसें समझाना ऐ के किश खाई लेओ, जेस कन्ने तुस बची सको; की वे तुंदे बीचा किसे दे सिरे दा इक भी बाल नी किरग।” ³⁵ ए आखियै ओस ने रुट्टी लेइयै सारें दे सामने परमातमा दा धन्यवाद किता ते तोड़ीयै खाना लगया। ³⁶ उस बेले ओह सारे भी ढाढ़स बनीयै भोजन करना लगे। ³⁷ अस सारे मिलीयै जाज उप्पर दो सो छियतर जन हे। ³⁸ जेस ले ओह भोजन करियै तृप्त होए, कनक गी समुंद्र च सुटीयै जाज गी हल्का करना लगे।

³⁹ जेस ले दिन निकलया ते उन्हैं ओस देश गी नेई पनछानया, लेकन इक खाड़ी दिखी जेस दा कंडा चोरस हा, ते बिचार किता के जे होई सके ते इसे उप्पर जाज गी टिकाचे। ⁴⁰ इस करी उन्हैं लंगर गी खोलियै समुंद्र च शुड़ी दिता ते उसे समे पतवारें दे बंधन खोली दिते, ते हवा दे सामने अगला पाल चाढ़ीयै कंडे दी बखी चले। ⁴¹ लेकन दो समुंद्र दे संगम दी जगह पड़ियै उन्हैं जाज गी टिकाया, ते गलही तका खाइयै दबोई गई ते टली नेई सकी; लेकन पिछाड़ी लैरें दे जोर कन्ने टूटना लगी। ⁴² एस करी सैनिकें दा ए बिचार ओया के बंदियें गी मारी देचे, एसा नेई होए के कोई तैरीयै नसे। ⁴³ लेकन सूबेदार ने पोलुस गी बचाने दी इच्छा कन्ने उन्हें एस बिचार कोलां रोकया ते ए आखया, के जेड़े तैरी सकदे न, पैलें कूदीयै कंडे उप्पर निकली जांन; ⁴⁴ ते बाकी कोई पटरें उप्पर, ते कोई जाज दी बाकी चीजें दे सारे निकली जांन। इस रिती कन्ने सब कोई धरती उप्पर बची निकले।

¹ जेस ले आस बची निकले, ते पता चलया के ए दीप माल्टा आखा जांदा ए। ² उत्थुंआ दे रोने आलें ने साड़े उप्पर अनोखी कृपा किती; की वे बरखा होने दे कारण ठंड ही, इसे आस्ते उन्हैं सुलगाईये असें सबनीं गी ठहराया। ³ जेस ले पोलुस ने लकड़ीयें दा गट्ठा बटोरीये अग्गी उप्पर रखया, रते इक साप आंच पाइये निकलया ते ओस दे हत्थे कन्ने लिपटी गया। ⁴ जेस ले उन्हैं निवासियैं सपे गी ओढे हत्थे कन्ने लिपटे दा दिखया, ते अप्पुं बीचे आखया, “सचें गे ए मनुख हत्यारा ऐ के ए समुंद्र कोलां बची गया, तां भी न्याय ने जिंदा नेई रोना दिता।” ⁵ उस बेले ओस ने सपे गी अग्गी बीच झटकी दिता, ते उसी किश हानी नेई पुजी। ⁶ लेकन ओह इंतजार करा करदे हे के ओह सुजीयाना जां इकाइक किरिये ओह मरी जाना, लेकन जेस ले ओह मती देर तकर दिखदे रे के ओस दा किश भी नेई बिगड़या, ते अपना बिचार बदलीये आखया, “ए ते कोई देवता ऐ।”

⁷ ओस जगह दे आसे पासे ओस टापू दे प्रधान पुबलीयुस दी जगह ही। ओस ने असें अपने घर लेईये तीन दिन मित्र भाव कन्ने परोनाचारी किती। ⁸ पुबलीयुस दा पिता ज्वर ते आंव खून कन्ने बमार पेदा हा। इ आस्ते पोलुस ओस दे कोल घर जाइये प्रार्थना किती ते ओस उप्पर हत्थ रखियै उसी चंगा किता। ⁹ जेस ले ऐसा ओया ते ओस दीप दे बाकी बमार आए ते चंगे किते गे। ¹⁰ उन्हैं साड़ा मता आदर किता, ते जेस ले आस चलना लगे ते जे इश साड़े आस्ते जरूरी हा, जाजे उप्पर रखी दिता।

¹¹ तीन महीने दे बाद सिकन्दरिया दे इक जाज उप्पर चली पे, जेड़ा ओस दीप च झाड़े भरा करदा हा, ते जेस दा चिन्न दियुसकूरी हा। ¹² सुरकूसा च आस लंगर लाइयै तीन दिन टिके रे। ¹³ उत्थुंआ आस घूमीयै रेगियुम च आए; ते इक दिन दे बाद दक्षिणी हवा चुली, इस करी आस दुए दिन पुतियुली च आए। ¹⁴ उत्थें असें प्रा मिले, ते उंदे आखने कन्ने उंदे आस सत दिन तक रे; ते एस रिती कन्ने आस रोम गी चले। ¹⁵ उत्थुंआ प्रा साड़ा समाचार सुनियै अप्पियुस दे चोक ते तीन सराए तकर साड़े कन्ने मुलाक़ात करने आस्ते निकली आए, जिन्हें दिखियै पोलुस ने परमातमा दा धन्यावाद किता ते ढाढ़स बनया।

¹⁶ जेस ले आस रोम च पुजे, ते पोलुस गी इक सैनिक कन्ने जेड़ा ओस दी रखवाली करदा हा, इकले रैने दी आज्ञा मिली गई।

¹⁷ तीन दीन दे बाद ओस ने यहूदीयें दे प्रमुख लोकें गी बलाया, ते जेस ले ओह किटठे होए ते ओस ने आखया, “ए प्रा ओ, मैं अपने लोकें दे जां बब्ब दादें दे व्यवहार च किश नी किता, तां भी बंदी बनाईये यरूशलेम बीचा रोमींयें दे हत्थ सोंपया गया। ¹⁸ उन्हैं मीगी जाचियै शुड़ना चाया, की वे म्रेरे च मोती जोगा कोई दोष नेई हा। ¹⁹ लेकन जेस ले यहूदी एस दे बिरोध च बोलना लगे, ते मीगी कैसर दी दोहाई देना पेइ: ए नेई के मीगी अपनें लोकें उप्पर कोई दोष लाना हा। ²⁰ इसे आस्ते मैं तुसें गी बलाया ऐ के तुंदे कन्ने मिलां ते गल्ल बात करां; की वे इस्राएल दी आस आस्ते मैं एस जंजीर कन्ने जकड़े दा ऐ।” ²¹ उन्हैं उसी आखया, “ना असैं तेरे बारे च यहुदियें कोलां चिट्ठीयां पाइयां ते ना भ्रां बीचा किसे ने आइयै तेरे बारे च किश बताया ते ना बुरा आखया। ²² लेकन तेरा बिचार के ऐ ? उए आस तेरे कोलां सुनना चानेयां, की वे आस जाननेयां के के हर जगह एस मत दे बिरोध च लोग गल्लां करदे न।”

²³ इस करी उन्हैं ओस आस्ते इक दिन ठहराया, ते मते सारे लोग ओस दे इत्थें किटठे होए, ते ओह परमातमा दे राज दी गुआइ दिंदा, ते मूसा दी व्यवस्था ते भविष्यवक्तें दी कताबां बीचा यीशु दे बारे च समझाई समझाईयै सबेरे कोलां लेइयै शामी तकर बरण करदा रेया। ²⁴ उस बेले किश नै उन गल्लें गी मनी लेता, ते कईयैं विश्वास नेई किता। ²⁵ जेस ले ओह अप्पुं बीचे इक मत ना होए, ते पोलुस दी इस गल्ल दे आखने उप्पर चली गे: “पवित्र आत्मा ने यशायाह भविष्यवक्ता दे द्वारा तुंदे बब्ब दादें कन्ने ठीक ही आखया,

²⁶ जाइये इनें लोकें कन्ने बोल, के सुनदे ते रोगे, लेकन नेई समझगे, ते दिखदे ते रोगे, लेकन नेई बुझगे;

²⁷ की वे इनां लोकें दा मन मुटा ते उंदे कन भारे होई गे दे न, ते उन्हैं अपनीं अखीं बंद कितियां न, ऐसा ना होए के ओह कदें अखीं कन्ने दिखन ते कनें कन्ने सुनन ते मन कन्ने समझन ते फिरी जांन, ते मैं उन्हें चंगा करां।’

²⁸ इस आस्ते तुस जानो के परमातमा दे एस उद्धार दी कथा अन्यजतियें दे कोल भेजी गई ऐ, ते ओह सुनघंन।” ²⁹ जेस ले ओस ने ए आखया, ते यहूदी अप्पुं बीचे मता विवाद करना लगे ते उत्थुंआ चली गे।

³⁰ ओह पुरे दो साल अपने भाड़े दे घर रेया, ³¹ ते जेड़े ओस दे कोल आंदे हे, उन संबनीं कन्ने मिलदा रेया ते बगैर रोक टोक मता निडर होइयै परमातमा दे राज दा प्रचार करदा ते प्रभु यीशु मसीह दीयां गल्लां सखांदा रेया।