1 यूहन्ना

1 John

1 यूहन्ना

¹ उस जीवन दे वचन दे बारे च जेड़ा आदि कन्ने ही, जिसी आहे सुनेया, और जिसी अपनी अख्खे कन्ने दिखेया, मतलब जिसी आहे ध्यान कन्ने दिखेया और हथ्थे कन्ने छुयेआ – ² ए जीवन प्रगट होया, और सानु उन दिखेया, और उदी गवाही दिंदे हां, और तोहे गी उस अनन्त जीवन दा सुसमाचार दिंदे हां जो पिता दे कन्ने ही और साड़े उप्पर प्रगट होया – ³ जेड़ा कुछ आहे दिखेया और सुनेया ऐ उदा समाचार तोहे गी भी दिंदे हां, इसलेई कि तोहे भी साड़े कन्ने सहभागी हो, और साड़ी ए सहभागिता पिता दे कन्ने और उदे पुत्तर यीशु मसीह दे कन्ने ही। ⁴ और ए गल्ला आहे इसलेई लिखदे हां कि साड़ा आनन्द पूरा होई जाए।

⁵ जेड़ा समाचार आहे उदे कोला सुनेया और तोहे गी सुनादे हां, ओह ए कि परमात्मा ज्योति ऐ और उदे च कुछ भी नेरा नेईं। ⁶ अगर आहे बोलिए कि उदे कन्ने साड़ी सहभागिता ऐ और फेर नेरे च चलिए, ते आहे चुठे ही और सच्चाई उप्पर नेईं चलदे; ⁷ लेकन अगर जिन्ना ओह ज्योति च ऐ, इन्ना ही आहे भी ज्योति च चलिए, ते इक दुए कन्ने सहभागिता रखदे ही, और उदे पुत्तर यीशु दा लहू सानु सारे पापे कन्ने शुध्द करदा ऐ। ⁸ अगर आहे बोलिए कि साड़े च कुछ भी पाप नेईं, ते अपने आप गी तोखा दिंदे हां, और आहे सच्चाई नेईं। ⁹ अगर आहे अपने पापे गी मनी ले, ते ओह साड़े पापे गी माफ करने और सानु सारे अधर्म कन्ने शुध्द करने च विश्वासयोग्य और धर्मी ही। ¹⁰ अगर आहे बोलिए कि आहे पाप नेईं किता, ते उसी चूठा ठहरानदे ही, और उदा वचन आहे नेईं ऐ।

¹ हे मेरे बच्चो, में ए गल्ला तोहे गी इसलेई लिखदा हां कि तोहे पाप ना करो; और अगर कोई पाप करे, ते पिता दे कोल साड़ा इक सहायक ऐ, मतलब धर्मी यीशु मसीह; ² और ओही साड़े पापे दा प्रायश्चित्त ऐ, और केलव साड़े ही नेईं मतलब सारे जगत दे पापे दा भी। ³ अगर आहे उदी आज्ञाओं गी मनगे, ते इदे कन्ने आहे जानी लेगे कि आहे उसी जानी गए ऐ। ⁴ जेड़ा कोई ए बोल्दा ऐ, “ में उसी जानी गेया हां, ” और उदी आज्ञाओं गी नेईं मनदा, ओह चूठा ऐ और उदे च सच्चाई नेईं; ⁵ लेकन जेड़ा कोई उदे वचन उप्पर चले, उदे च सचमुच परमात्मा दा प्रेम सिध्द होया ऐ। इसी दे कन्ने आहे जानदे हां कि आहे उदे च ही: ⁶ जेड़ा कोई ए बोल्दा ऐ कि में उदे बनेया रेना हां, उसी चाही दा ऐ कि आपे भी इन्ना ही चलिए जिन्ना ओह चलदा हां।

⁷ हे प्रियो, में तोहे गी कोई नई आज्ञा नेईं लिखदा, लेकन ओही पुरानी आज्ञा जेड़ी खुरू च तोहे गी मिली ऐ; ए पुरानी आज्ञा ओह वचन ऐ जिसी तोहे सुनेया ऐ। ⁸ फेर भी में तोहे गी नई आज्ञा लिखदा हां, और ए उदे च और तुन्दे च सच्ची ठहरदी ऐ; क्योंकि नेरा मिटदा जान्दा ऐ और सच्चाई दी ज्योति हुन चमकने लग्गी ऐ। ⁹ जेड़ा कोई ए बोल्दा ऐ कि में ज्योति च हां और अपने परा कन्ने बैर रखदा ऐ, ओह हुन तकर नेरे ही च ऐ। ¹⁰ जेड़ा कोई अपने परा कन्ने प्रेम रखदा ऐ ओह ज्योति च रेंदा ऐ, और ठोकर नेईं खाई सकदा। ¹¹ लेकन जेड़ा कोई अपने परा कन्ने बैर रखदा ऐ ओह नेरे च ऐ और नेरे च चलदा ऐ, और नेईं जान्दा कि कित्थे जान्दा ऐ, क्योंकि नेरे ने उदी अख्खा अन्नी कर दिती ऐ।

¹² हे बच्चो, में तोहे गी इसलेई लिखदा हां कि उदे नाम कन्ने तुन्दे पाप माफ होए नए। ¹³ हे पितरो, में तोहे गी इसलेई लिखदा हां कि जेड़ा आदि कन्ने ऐ तोहे उसी जानदे हो। हे जवानो, में तोहे गी इसलेई लिखदा हां कि तोहे उस दुष्ट उप्पर जय पाई ऐ। हे मनुखो, में तोहे गी इसलेई लिखेया ऐ कि तोहे पिता गी जानी गए हो। ¹⁴ हे पितरो, में तोहे गी इसलेई लिखेया ऐ कि जेड़ा आदि कन्ने ऐ तोहे उसी जानी गए हो। हे जवानो, में तोहे गी इसलेई लिखेया ऐ कि तोहे बलवन्त हो, और परमात्मा दा वचन तुन्दे च बना रेंदा ऐ, और तोहे उस दुष्ट उप्पर जय पाई ऐ।

¹⁵ तोहे ना ते संसार कन्ने और ना संसार च दी वस्तुओं कन्ने प्रेम रखो। अगर कोई संसार कन्ने प्रेम रखदा ऐ, ते उदे च पिता दा प्रेम नेईं ऐ। ¹⁶ क्योंकि जेड़ा कोई संसार च ऐ, और शरीर दी अभिलाषा और अख्खे दी अभिलाषा और जीविका दा घमण्ड, ओह पिता दी ओर ता नेईं परैन्त संसार ही दी ओर ता ऐ। ¹⁷ संसार और उदी अभिलाषाएँ दोनों मिटदे जान्दे नए, लेकन जेड़ा परमात्मा दी इच्छा उप्पर चलदा ऐ ओह सर्वदा बना रेगा।

¹⁸ हे बालको, ए अन्तिम समय ऐ; और जिन्ना तोहे सुनेया ऐ कि मसीह दा विरोधी आनेआला ऐ, उदे अनुसार हुन भी बड़े गे मसीह – विरोधी उठ खड़े होए नए; इदे कन्ने आहे जान्दे हां कि ए आखिर समय ऐ। ¹⁹ ओह निकले ते साड़े बीचा, लेकन साड़े बीचा ही नेईं; क्योंकि अगर ओह साड़े बीचा हौंदे, ते साड़े कन्ने रेंदे; लेकन निकली इसलेई गए कि ए प्रगट होए कि ओह सारे साड़े बीच नेईं ऐ। ²⁰ लेकन तुन्दा ते उस पवित्र कन्ने अभिषेक होया ऐ, और तोहे सारा कुछ जानदे हो। ²¹ में तोहे गी इसलेई नेईं लिखेया कि तोहे सच्चाई गी नेईं जानदे, लेकन इसलेई कि उसी जानदे हो, और इसलेई कि कोई चूठ, सच्चाई दी ओर ता नेईं। ²² चूठा कौन ऐ ? केवल ओह जेड़ा यीशु दे मसीह होने कोला इन्कार करदा ऐ; और मसीह दा विरोधी ओही ऐ, जेड़ा पिता दा और पुत्तर दा इन्कार करदा ऐ। ²³ जेड़ा कोई पुत्तर दा इन्कार करदा ऐ उदे कोल पिता भी नेईं: जेड़ा पुत्तर गी मनी लेनदा ऐ, उदे कोल पिता भी ऐ। ²⁴ जेड़ा कुछ तोहे शुरू तो सुनेया ऐ ओही तुन्दे च बना रहे; जेड़ा तोहे शुरू ता सुनेया ऐ, अगर ओह तुन्दे बना रहे ते तोहे भी पुत्तर च और पिता च बने रोगे। ²⁵ और जिदी उन साड़े कोला प्रतिज्ञा किती ओह अनन्त जीवन ऐ।

²⁶ में ए गल्ला तोहे गी उन्दे बारे च लिखी ऐ, जेड़े तोहे गी भरमंदे नए; ²⁷ लेकन तुन्दा ओह अभिषेक जो उदी ओर ता किता गेया, तुन्दे च बना रेंदा ऐ; और तोहे गी इदा प्रयोजन नेईं कि तोहे गी सिखाए, और जिन्ना ओह अभिषेक जो उदी ओर च किता गेया तोहे गी सारी गल्ला सिखांदा ऐ, और ए सच्चा ऐ और चूठा नेईं; और जिन्ना उन तोहे गी सिखाया ऐ इन्ना ही तोहे उदे च बने रेंदे हो।

²⁸ आखिर च हे बालको, उदे च बने रवो कि जदू ओह प्रगट होए ते सानु हियाव होए, और आहे उदे आने उप्पर उदे सामने शर्मिदा ना होचे। ²⁹ अगर तोहे जानदे हो कि ओह धर्मी ऐ, ते ए भी जानदे हो कि जो कोई धर्मी दा काम करदा ऐ ओह उदे च सदा जन्मेया ऐ।

¹ दिखो, पिता ने साड़े कन्ने कैसा प्रेम किता ऐ कि आहे परमात्मा दे बच्चे कलाएँ; और आहे भी। इस कारण संसार सानु नेईं जान्दा, क्योंकि उन उसी भ नेईं जानेया। ² हे प्रियो, हुन आहे परमात्मा दे बच्चे हां, और हुन तकर ए प्रगट नेईं होया कि के कुछ होगे। इन्ना जानदे हां कि जदू ओह प्रगट होए गा ते आहे उदे समान होगे, क्योंकि उसी इन्ना ही दिखगे जिन्ना ओह ऐ। ³ और जेड़ा कोई उदे उप्पर ए आशा रखदा ऐ, ओह अपने आप गी इन्ना ही पवित्र करदा ऐ जिन्ना ओह पवित्र ऐ।

⁴ जेड़ा कोई पाप करदा ऐ, ओह व्यवस्था दा विरोध करदा ऐ; और पाप ते व्यवस्था दा विरोध ऐ। ⁵ तोहे जानदे हो कि ओह इसलेई प्रगट होया कि पापे गी हर ले जाए; और उदे स्वभाव च पाप नेईं। ⁶ जेड़ा कोई उदे च बनेया रेंदा ऐ, ओह पाप नेईं करदा: जेड़ा कोई पाप करदा ऐ, उन ना ते उसी दिखेया ऐ और ना उसी जानेया ऐ। ⁷ हे बच्चो, किसे दे बहकावे च ना आयो। जेड़ा धर्म दे काम करदा ऐ, ओही उस दे समान धर्मी ऐ। ⁸ जेड़ा कोई पाप करदा ऐ ओह शैतान दी ओर ता ऐ, क्योंकि शैतान शुरू ही च पाप करदा आया ऐ। परमात्मा दा पुत्तर इसलेई प्रगट होया कि शैतान दे कमे गी खत्म करे। ⁹ जेड़ा कोई परमात्मा च जमेया ऐ ओह पाप नेईं करदा; क्योंकि उदा बीज उदे च बनेया रेंदा ऐ, और ओह पाप करी गे नेईं सकदा क्योंकि परमात्मा च जमेया ऐ। ¹⁰ इदे कन्ने परमात्मा दे बच्चे और शैतान दे बच्चे जाने जान्दे नए; जेड़ा कोई धर्म दे काम नेईं करदा ओह परमात्मा च नेईं, और ना ओह जेड़ा अपने परा कन्ने प्रेम नेईं रखदा।

¹¹ क्योंकि जेड़ा समाचार तोहे शुरू ता सुनेया, ओह ए ही कि आहे इक दुए कन्ने प्रेम रखिये; ¹² और कैन दे समान ना बनेयो जेड़ा उस दुष्ट च हां, और जिन्ने अपने परा गी मारी ओड़ेया। और उसी किस तरह कारण खत्म किता ? इस कारण कि उदे काम बुरे ही, और उदे परा दे काम धर्म दे ही।

¹³ हे पराओ, अगर संसार तुन्दे कन्ने बैर करदा ऐ ते हेरान ना होयो। ¹⁴ आहे जान्दे हां कि आहे मौत बीचा पार होईये जीवन च पूजे हां; क्योंकि आहे पराए कन्ने प्रेम रखदे हां। जेड़ा प्रेम नेईं रखदा ओह मौत दी दशा च रेंदा ऐ। ¹⁵ जेड़ा कोई अपने परा कन्ने बैर रखदा ऐ, ओह हत्यारा ऐ; और तोहे जानदे हो कि किसे हत्यारे च अनन्त जीवन नेईं रेंदा। ¹⁶ आहे ते प्रेम इदे च जानेया कि उन साड़े लेई अपने प्राण दे दिते; और सानु भी पराए दे लेई प्राण देना चाही दा ऐ। ¹⁷ लेकन जिस किसे दे कोल संसार दी तानदोलत होए और ओह अपने परा गी कंगाल दिखिए उदे उप्पर तरस खाई ना सकेया, ते उदे च परमात्मा दा प्रेम किन्ना बनेया रह सकदा ऐ ? ¹⁸ हे बच्चो, आहे वचन और जीभ ही च नेईं, लेकन काम और सच्चाई दे द्वारा भी प्रेम करो।

¹⁹ इदे च गे आहे जानगे कि आहे सच्चाई दे हां; और जिस गल्ल च साड़ा मन सानु दोष देग, उदे बारे च आहे उदे सामने अपने अपने मन गी डाटी दे सकगे; ²⁰ क्योंकि परमात्मा साड़े मन कोला बड्डा ऐ, और सारा कुछ जान्दा ऐ। ²¹ हे प्रियो, अगर साड़ा मन सानु दोष ना दे, ते सानु परमात्मा दे सामने हियाव होंदा ऐ; ²² और जेड़ा कुछ आहे मंगदे हां, ओह सानु उदे कोला मिलदा ऐ, क्योंकि आहे उदी आज्ञाओं गी मनदे हां और जेड़ा उसी भान्दा ऐ ओही करदे ऐ। ²³ उदी आज्ञा ए ही कि आहे उदे पुत्तर यीशु मसीह दे नाम उप्पर विश्वास करिये, और जिन्ना उन सानु आज्ञा दिती ऐ उस दे अनुसार आपस च प्रेम रखिये।

²⁴ जेड़ा उदी आज्ञाओं गी मनदा ऐ, ओह उदे और ओह उन्दे च बना रेदा ऐ: और इदे कन्ने, मतलब उस आत्मा च जेड़ा उन सानु दिता ऐ, आहे जानदे हां कि ओह साड़े च बनेया रेंदा ऐ।

¹ हे प्रियो, हर इक आत्मा दी प्रतीति न करो, लेकन आत्माओं गी परखो कि ओह परमात्मा दी ओर ता ऐ कि नेईं; क्योंकि बड़े गे चूठे नबी जगत च निकले खड़े होए नए। ² परमात्मा दा आत्मा तोहे इस रीति कन्ने पहचानी सकदे हो: जेड़ी आत्मा मनी लेंदी ऐ कि यीशु मसीह शरीर च होईये आया ऐ ओह परमात्मा दी ओर ता ऐ, ³ और जेड़ी आत्मा यीशु गी नेईं मनदी, ओह परमात्मा दी ओर ता नेईं; और ओही ते मसीह दे विरोधी दी आत्मा ऐ, जिस दी चर्चा तोहे सुनी चुके हो कि ओह आने आला ऐ, और अजे भी जगत च ऐ। ⁴ हे बच्चो, तोहे परमात्मा दे हो, और तोहे उदे उप्पर जय पाई ऐ; क्योंकि जेड़ा तुन्दे च ऐ ओह उदे कन्ने जो संसार च ऐ ,बड्डा ऐ। ⁵ ओह संसार दे ऐ, इस कारण ओह संसार दी गल्ला बोलदे नए, और संसार उन्दी सुन्दा ऐ। ⁶ आहे परमात्मा दे हां। जेड़ा परमात्मा गी जान्दा ऐ, ओह साड़ी सुन्दा ऐ; जेड़ा परमात्मा गी नेईं जान्दा ओह साड़ी नेईं सुन्दा। इस तरह आहे सच्चाई दी आत्मा और भ्रम दी आत्मा गी पहचान लेनदे ऐ।

⁷ हे प्रियो, आहे आपस च प्यार रखिये; क्योंकि प्यार परमात्मा ऐ। जेड़ा कोई प्यार करदा ऐ, ओह परमात्मा कोला जमेया ऐ और परमात्मा गी जान्दा ऐ। ⁸ जेड़ा प्रेम नेईं रखदा ओह परमात्मा गी नेईं जान्दा, क्योंकि परमात्मा प्रेम ऐ। ⁹ जेड़ा प्यार परमात्मा साड़े कन्ने करदा ऐ, ओह इदे कन्ने प्रगट होया कि परमात्मा ने अपने इकलौते पुत्तर गी जगत च पेजेया ऐ कि आहे उदे द्वारा जीवन पाईये। ¹⁰ प्रेम इदे च नेईं कि आहे परमात्मा कन्ने प्रेम किता, लेकन इदे च ऐ कि उन साड़े कन्ने प्रेम किता और साड़े पापे दे प्रायश्चित्त दे लेई अपने पुत्तर गी पेजेया। ¹¹ हे प्रियो, जदू परमात्मा ने साड़े कन्ने ऐसा प्रेम किता, ते सानु भी आपस च प्रेम रखना चाही दा ऐ। ¹² परमात्मा गी कदे भी किसे ने नेईं दिखेया; अगर आहे आपस च प्रेम रखिये, ते परमात्मा साड़े च बनेया रेंदा ऐ और उदा प्रेम साड़े च सिध्द होई गेया ऐ।

¹³ इदे कन्ने आहे जानदे हां कि आहे उदे च बने रेंदे हां, और ओह साड़े च; क्योंकि उन अपने आत्मा बीचा सानु दिता ऐ। ¹⁴ आहे ते दिखी भी लेया और गवाही दिंदे हां कि पिता ने पुत्तर गी जगत दा उध्दारकर्त्ता करिये पेजेया ऐ। ¹⁵ जेड़ा कोई ए मनी लेनदा ऐ कि यीशु परमात्मा दा पुत्तर, परमात्मा उदे च बनेया रेंदा ऐ, और ओह परमात्मा च। ¹⁶ जेड़ा प्यार परमात्मा साड़े कन्ने रखदा ऐ, उसी आहे जानी गए और सानु उदा विश्वास ऐ। परमात्मा प्यार ऐ, और जेड़ा प्यार च बनेया रेंदा ऐ ओह परमात्मा च बनेया रेंदा ऐ, और परमात्मा उदे च बनेया रेंदा ऐ। ¹⁷ इदे कन्ने प्यार साड़े कोला सिध्द होया कि सानु न्याय दे दिन हियाव होए; क्योंकि जिन्ना ओह ऐ इन्ना ही संसार च आहे भी हां। ¹⁸ प्यार च डर नेईं होंदा, लेकन सिध्द प्यार डर गी दूर करी दिंदा ऐ; क्योंकि डर दा सम्बन्ध दण्ड कन्ने होंदा ऐ, और जेड़ा डर करदा ऐ ओह प्यार च सिध्द नेईं होया। ¹⁹ आहे इसलेई प्यार करदे हां, कि पैहले उन साड़े कन्ने प्यार किता। ²⁰ अगर कोई बोले, “ में परमात्मा कन्ने प्यार करदा हां, ” और अपने परा कन्ने बैर रखिए ते ओह चूठा ऐ; क्योंकि जेड़ा अपने परा कन्ने जिसी उन दिखेया ऐ प्यार नेईं करदा, ते ओह परमात्मा कन्ने भी जिसी उन नेईं दिखेया प्यार नेईं करी सकदा। ²¹ उदे कन्ने सानु ए आज्ञा मिलदी ऐ, कि जेड़ा कोई परमात्मा कन्ने प्यार करदा ऐ ओह अपने परा कन्ने भी प्यार रखे।

¹ जिस दा ए विश्वास ऐ कि यीशु ही मसीह ऐ, ओह परमात्मा ता पैदा होया ऐ; और जेड़ा कोई पैदा करनेआले कन्ने प्यार करदा ऐ, ओह उदे कन्ने भी प्यार करदा ऐ जेड़ा उदे कोला पैदा होया ऐ। ² जदू ओह परमात्मा कन्ने प्यार करदे नए और उदी आज्ञाओं गी मनदे नए, ते इदे कन्ने आहे जान्दे हां कि आहे परमात्मा दे बच्चे कन्ने प्यार करदे हां। ³ क्योंकि परमात्मा कन्ने प्यार करना ए ही कि आहे उदी आज्ञाओं गी मनचे; और उदी आज्ञा मुश्किल नेईं। ⁴ क्योंकि जेड़ा कुछ परमात्मा च पैदा होया ऐ, ओह संसार उप्पर जय प्राप्त करदा ऐ; और ओह विजय जिदे कन्ने संसार उप्पर जय प्राप्त होंदी ऐ साड़ा विश्वास ऐ। ⁵ संसार उप्पर जय पाने आला कौन ऐ ? केवल ओह जिदा ए विश्वास ऐ कि यीशु, परमात्मा दा पुत्तर ऐ।

⁶ ऐही ऐ ओह जेड़ा पानी और लहू दे द्वारा आया हां, मतलब यीशु मसीह: ओह ना केवल पानी दे द्वारा लेकन पानी और लहू दोनों दे द्वारा आया हां। ⁷ और जेड़ा गवाही दिंदा ऐ, ओह आत्मा ऐ; क्योंकि आत्मा सच्चाई ऐ। ⁸ गवाही देनेआले तीन ऐ, आत्मा, और पानी, और लहू; और तीनों इक ही गल्ल उप्पर सहमत ऐ। ⁹ जदू आहे मनुखे दी गवाही मनी लेनदे हां, ते परमात्मा दी गवाही उदे कोला अच्छी ऐ; और परमात्मा दी गवाही ए ही कि उन अपने पुत्तर दे बारे च गवाही दिती ऐ। ¹⁰ जेड़ा परमात्मा दे पुत्तर उप्पर विश्वास करदा ऐ ओह अपने ही च गवाही रखदा ऐ। जिन्ने परमात्मा उप्पर विश्वास नेईं किता उन उसी चूठा ठहराया, क्योंकि उन उस गवाही उप्पर विश्वास नेईं किता जेड़ा परमात्मा ने अपने पुत्तर दे बारे च दिती ही। ¹¹ और ओह गवाही ए ही कि परमात्मा ने सानु अनन्त जीवन दिता ऐ, और ए जीवन उदे पुत्तर च ऐ। ¹² जिस दे कोल पुत्तर ऐ, उदे कोल जीवन ऐ; और जिस दे कोल परमात्मा दा पुत्तर नेईं, उदे कोल जीवन भी नेईं ऐ।

¹³ में तोहे गी, जेड़ा परमात्मा दे पुत्तर दे नाम उप्पर विश्वास करदे होन, इसलेई लिखेया ऐ कि तोहे जानो कि अनन्त जीवन तुन्दा ऐ। ¹⁴ और सानु उदे सामने जेड़ा हियाव होंदा ऐ, ओह ए ही; कि अगर आहे उदी इच्छा दे अनुसार कुछ मंगने हां, ते ओह साड़ी सुन्दा ऐ। ¹⁵ जदू आहे जानदे हां कि जेड़ा कुछ मंगने हां ओह साड़ी सुन्दा ऐ, ते ए भी जानदे हां कि जेड़ा कुछ आहे उदे कोला मंगेया, ओह पाया ऐ।

¹⁶ अगर कोई अपने परा गी ऐसा पाप करदे दिखे जिदा फल मौत ना होए, ते विनती करिये, और परमात्मा उसी उन्दे लेई, जिन्ने ऐसा पाप किता ऐ जिदा फल मौत ना होए, जीवन देग। पाप ऐसा भी होंदा ऐ जिदा फल मौत ऐ; इदे बारे च में विनती करने दे लेई नेईं बोल्दा। ¹⁷ सारे प्रकार दा अधर्म ते पाप ऐ, लेकन ऐसा पाप भी ऐ जिदा फल मौत नेईं।

¹⁸ आहे जानदे हां, कि जेड़ा कोई परमात्मा च पैदा होया ऐ, ओह पाप नेईं करदा; लेकन जेड़ा परमात्मा च पैदा होया, उसी ओह बचाए रखदा ऐ, और ओह दुष्ट उसी छुई नेईं सकदा।

¹⁹ आहे जानदे ही कि आहे परमात्मा ता ऐ, और सारा संसार उस दुष्ट दे वश च पेरा ऐ।

²⁰ आहे ए भी जानदे हां कि परमात्मा दा पुत्तर आई गेया ऐ और उन सानु समझ दिती ऐ कि आहे उस सच्चे गी पहचानी ऐ; और आहे उदे च जो सच्चा ऐ, मतलब उदे पुत्तर यीशु मसीह च रेंदे हां। सच्चा परमात्मा और अनन्त जीवन ऐही ऐ। ²¹ हे बच्चो, अपने आप गी मूरतों च बचाए रखो।