ƲRƆM
11 A mãa Pol, Yeezu Kɩrɩta tõ-tõ-bie, a Naaŋmɩn bʋɔlɩ mɛ̃ na k’ɩ̃ɩ wa ɩ nɩ-tona, ʋ kaa na ir mɛ̃ a ʋ Yel-nʋ̃ɔ̀ hieru ƴãw. 2 A Yel-nʋ̃ɔ̀ ŋa a, a Naaŋmɩn tɩ dãw na yel a ʋ ƴɛr-manbɛ zie, a Sɛb-son pʋɔ, k’ʋʋ na yel a. 3 Ʋ caar ɩ a ʋ Bie, a tɩ Sore Yeezu Kɩrɩta: Daviir bʋʋrɛ nɩr tɩ n’ʋ a ʋ nɩsaalɛ dɔwlʋ pʋɔ; 4 ɛ cɛ a Vʋʋrʋ Sõw lowr a, bɛ tɩ wul a nɩ kpɛnʋ a sãá ʋ na ɩ Naaŋmɩn Bie a, a ʋ kũuni-pʋɔ-lɛ-yib zũú. 5 A ʋl ƴãw n’a ɩ̃ páw a maalʋ lɩɛbɩ nɩ-tona, k’ɩ̃ɩ tɛr a nɩ-bʋʋ-yoru nɩbɛ za wa n bɛ wa saw de ʋ, ɛ sawr a ʋ nʋɔr, a ʋ yúor zɛwfʋ ƴãw. 6 Nyɩ mɩ̀ pʋɔ nɩ a bɛ pʋɔ, nyɩɩm a Yeezu Kɩrɩta na bʋɔlɩ a. 7 Mãa n’ʋ sɛbr nyɩ, nyɩɩm na be a Ʋrɔm a, nyɩɩm za a Naaŋmɩn na nɔnɛ ɛ bʋɔlɩ kɛ́ nyɩ wa ɩ a ʋ nɩ-sori a. A Naaŋmɩn tɩ Sãà nɩ a tɩ Sore Yeezu Kɩrɩta kʋ̀ nyɩ a maalʋ nɩ a ƴã-ɓaarʋ. 8 A Yeezu Kɩrɩta ƴãw n’a ɩ̃ de niwn puore a ɩ̃ Naaŋmɩn yaanɩ a nyɩ za ƴãw, bɛ na ƴɛrɛ a nyɩ saw-deb ƴɛrʋ a tẽ-daa za zu a ƴãw. 9 Naaŋmɩn n’ɩ a ɩ̃ yel-mɩŋa sob, ʋl ɩ̃ na puore nɩ ɩ̃ pʋɔ za ɛ hiere a ʋ Bie Yel-nʋ̃ɔ̀ a. Ɩ̃ mɩ́ tɛr ɩ a nyɩ tɩɛrʋ kʋra lɛ, 10 zɛlɛ nɩ a ɩ̃ puoru pʋɔ kʋra lɛ, k’ɩ̃ɩ wa nanɩ nyɛ̃ vuo wa a nyɩ zie, ʋlɛ wa bɔbr a. 11 A nyɩ nyɛb vʋla sɩrɩ na tɛr mɛ̃ yaga, k’ɩ̃ɩ wa tʋ̃ɔ kʋ̀ nyɩ Vʋʋrʋ Sõw maalʋ kãw, na na ɩ nyɩ tɛr fãw a, 12 nyɩnɛ n’a mɔ̃, k’ɩ̃ɩ wa tʋ̃ɔ nyɛ̃ mɔwlʋ lãw nɩ nyɩ a nyɩ zie be, a Naaŋmɩn-saw-deb tɩ na lãw a zũú, mãa nɩ a nyɩɩm za a. 13 Yɛbr ɩ, ɩ̃ bɔbr a kɛ́ nyɩ bãwnɩ a, kʋra lɛ n’a ɩ̃ tɩɛrɛ a nyɩ zie waa, k’ɩ̃ɩ wa páw a ɩ̃ tome tɔnɛ a nyɩ zie, mɛ̃ a lɛ ɩ̃ na páw a a nɩ-bʋʋ-yoru bɛ mɩnɛ zie a, ɛ cɛ ɩ̃ cãa bɛ nyɛ̃ vuo wa tɔ dɩ̃a ɩ. 14 Ɩ̃ dɩ n a sɛb-bãwnbɛ nɩ a sɛb-bɛ-bãwnbɛ san, a yã-bãwnbɛ nɩ a dãbole san. 15 Lɛ so tɩɛrʋ ŋa na be a ɩ̃ zie, k’ɩ̃ɩ hieri a Yel-nʋ̃ɔ̀ kʋ̀ a nyɩɩm mɩ̀ na kpɩɛr a Ʋrɔm a. 16 Ɩ̃ bɛ zɔrɛ vĩ a Yel-nʋ̃ɔ̀ hieru ƴãw ɛ: bʋ̃ʋ n’ʋ vɛ̃, ʋ ɩ n Naaŋmɩn kpɛnʋ na faarɛ nɩr za na saw de a, a Zifʋ mɩnɛ n’ɩ a dãw-niwn dem, al pùorí a bɛl na bɛ ɩ Zifʋ mɩnɛ a. 17 A Yel-nʋ̃ɔ̀ mɩ́ sɩrɩ na wule a lɛ a Naaŋmɩn na mɩ́ ɩ a nɩsaalbɛ ɩ nɩ-mɩn a ʋ niŋé a: a saw-deb yõ zũú n’a, a tib daar tɩ ta n a baarʋ daar, mɛ̃ a lɛ a Sɛb-sõw na yel a: «Sob nɛ na ɩ nɩ-mɩŋa, a saw-deb zũú a, na vʋʋrɛ na.» 18 A Naaŋmɩn suur sɩrɩ na ìre a salom zu sãá, a nɩsaalbɛ Naaŋmɩn-bɛ-ƴãwfʋ ɩb za ƴãw, nɩ a bɛ ɩb za na bɛ tu sɔr a ƴãw, bɛl na mɩ́ piwr a yel-mɩŋa tɛrɛ nɩ ɩ-ɩrɩ na bɛ tu yel-mɩŋa a. 19 A Naaŋmɩn bɛ na na tʋ̃ɔ bãw a, a sãá nɩ a bɛ zie: a Naaŋmɩn mɩŋa wul bɛ na a sãá. 20 Bʋ̃ʋ n’ʋ vɛ̃, a tẽ-daa iru daar za a, a Naaŋmɩn mɩŋa vɩɛlʋ na sɔwlɩ a, a pɛr lɛ k’aa ʋ kpɛnʋ na be kʋra lɛ a, nɩ a ʋ naaŋmɩnʋ, a sãá nɩ a ʋ tome pʋɔ a nɩsaal yã na tʋ̃ɔ bãw. A na ɩ lɛ a, bɛ kʋ̃ tʋ̃ɔ yel kɛ bɛ bɛ bãw kɛ lɛ n’a ɩ. 21 Bʋ̃ʋ n’ʋ vɛ̃, bɛ bãw nɩ a Naaŋmɩn ɛ́ bɛ zɛw a ʋ yúor-vɩɛlʋ-danʋ ɛ, bɛ pùor ʋ yaanɩ na sɛw taa nɩ ʋ a ɩ. A bɛ tɩɛrʋ nɩ̃ɛ na lɩɛbɩ tɩɛr-zawlɛ, ɛ́ a bɛ gẽgẽ-yã be lige pʋɔ ʋ za. 22 Bɛ na de bɛ tʋɔra bʋɔlɛ yã-bãwnbɛ a, bɛ lɩɛb ɩ dãbole; 23 bɛ de nɩ a Naaŋmɩn na bɛ tɛr kũu daar a yúor-vɩɛlʋ-danʋ tɛw nɩ nɩsaal na ɩ bʋ̃-kpiira a dasule, tɛw nɩ bʋ̃-pɩgɛ nɩ dʋ̃-gbɛɛ-anaɩ nɩ bʋ̃-vuri dasuli. 24 Alɛ so a Naaŋmɩn bɛr bɛ kʋ̀ a bɛ socie vʋla, bɛ tɛr a pɩ̃ɔ ɩ-ɩrɩ ɩrɛ nɩ vĩ yele a bɛ cara pʋɔ. 25 Bɛ de nɩ a yel-mɩŋa na caarɩ a Naaŋmɩn a, tɛw nɩ a ziri; bɛ ƴãw na ɛ maalɩ a bʋ̃-ira, ɛ́ bɛr a Íre, ʋl na sɛwnɩ puoru yome yome za a! Amɛn. 26 Alɛ so a Naaŋmɩn bɛr bɛ kʋ̀ a bɛ socie vʋla na ɩrɛ vĩ a, a so bɛ. A bɛ pɔwbɛ de nɩ a dɛb nɩ pɔw lãw-taa na tu sɔr a tɛw nɩ a lãw-taa na bɛ tu sɔr a. 27 Lɛ n’a a dɛbr mɩ̀ bɛr a dɛb nɩ a pɔw lãw-taa na tu sɔr a, ɛ bɔbr taa dɛb nɩ dɛb, ɩrɛ nɩ vĩ yele dɛb nɩ dɛb zie, ɛ́ páwr a bɛ tulu dɔwrʋ ʋl na sɛw taa nɩ bɛ a, a bɛl mɩŋa zie. 28 Bɛ na zawrɩ na bãw a Naaŋmɩn a, ʋ bɛr bɛ na kʋ̀ a bɛ dãbolu, a ŋa n’a bɛ ɩrɛ a lɛ a na bɛ tɩ sɛw kɛ bɛ ɩrɛ a. 29 Ɩ-bʋʋrɛ za na bɛ tu sɔr a, nɩ faalʋ, nɩ tɛra vʋla, nɩ po-tuolu nɩbɛ nɛ bɛ; bɛ ɩ n nyuur tɛwr, nɩ nɩ-kʋ́rbɛ, nɩ nɔhaarʋ, nɩ nyãnyu-yã, nɩ nɩ-fa-ɩb tɛwr. Bɛ mɩ́ sãwnɛ nɩ a bɛ taabɛ yee, 30 ɛ́ manɛ a bɛ taabɛ yele; Naaŋmɩn dɔ̃ dem nɛ bɛ, zɛbr-ŋmaarbɛ, pɔ̀lʋ dem, nɩbɛ na mɩ́ pɔrɛ zaa lɛ a, nɩbɛ na tɛr yã a yel-faar maalʋ ƴãw a, na bɛ sawr a bɛ dɔwrbɛ nʋɔr a. 31 Nɩbɛ na bɛ tɛr yã a nɛ bɛ, nɩbɛ na mɩ́ ƴɛr ɛ bɛ tu a, nɩbɛ na bɛ tɛr nɔ̃wfʋ a, na bɛ zɔrɛ nɩ-baalʋ a. 32 Bɛ na saa bãw a lɛ a Naaŋmɩn na ƴɛr bin, kɛ́ bɛlɩ dem na maalɛ a yel-faar a ŋa taabɛ a, sɛwnɩ nɩ kũu a, bɛ maalɛ na, ɛ cãa mɩ́ lɛ kpɛ a bɛlɩ dem na ɩrɛ a a ŋa a.
21 A na ɩ a ŋa a, fʋ̃ʋ saa ɩ nɩ-ŋmɩŋmɩn a, fʋ kʋ̃ tʋ̃ɔ yel kɛ fʋ bɛ bãw kɛ lɛ ɩ, fʋ̃ʋ na bãwnɛ a fʋ tɔ yele a. Fʋ na bãwnɛ a fʋ tɔ yele a, a fʋ mɩŋa sãwna n’a fʋ wule, fʋ̃ʋ mɩ̀ na mɩ́ ɩrɛ a lɛ tɔr za a. 2 Ɛ cɛ, tɩ bãwnɩ a na, a bɛlɩ dem na mɩ́ tɛr a ɩ-ɩrɩ a ŋa taabɛ a, Naaŋmɩn mɩ́ maal ɩ bɛ nɩ a ƴɛrʋ a tu yel-mɩŋa. 3 Fʋ̃ʋ na bãwnɛ a fʋ taabɛ yel-faar ɛ́ mɩ̀ tɛr a alɩ yel-faar nɛ a, fʋ tɩɛrɛ kɛ fʋ na tʋ̃ɔ na nɩɩrɩ a Naaŋmɩn dɔwrʋ bɛr bɩɩ? 4 Bɩɩ fʋ bɛ ŋmɛlɛ kaar a Naaŋmɩn ɩ-vɩɛlɩ na bɛ dɩ vuo a, nɩ a ʋ su-bɛ-páwra nɩ a ʋ su-nyɔwra ʋ na tɛr a fʋ zie a ɩ? Fʋ bɛ bãwnɩ a k’aa Naaŋmɩn ɩ-vɩɛlɩ a ŋa fɛrɛ fʋ na kɛ fʋ lɩɛbɩ a fʋ ɩb ɛ? 5 A fʋ zu-kpɛnʋ ƴãw, nɩ fʋ na yel kɛ fʋ kʋ̃ lɩɛbɩ a fʋ ɩb a, fʋ cɔbrɛ nɩ dɔwrʋ na ta dɔwrʋ a a fʋ mɩŋa ƴãw, gùre nɩ a Naaŋmɩn suur bibir nɩ a ʋ ƴɛrʋ maalʋ na tu yel-mɩŋa a bibir nãa wa vɩɛ a, 6 a bibir ʋl ʋ na na kʋ̀ ŋa za man nɩ a ʋ ɩb a. 7 A bɛlɩ dem na su zu ɩrɛ vla bɔbr ɩ a yúor-vɩɛlʋ-danʋ nɩ a ƴãwfʋ, nɩ a nyɔ-vʋʋrʋ na be kʋra lɛ a, bɛlɛ so a nyɔ-vʋʋrʋ na be kʋra lɛ a. 8 Ɛ cɛ, a bɛlɩ dem na ɩ a nɩsaal-gaarɩ, bɛ sawr a yel-mɩŋa ɛ tuur a ɩ-faar a, Naaŋmɩn suur, su-tʋlʋ, na ìr ɩ a bɛ zu. 9 Nɩsaal za na maalɛ faa a, ʋlɛ so kpɩɛrʋ nɩ pʋl-vʋ̃ɔn, a Zifʋ n’ɩ a dãw-niwn sob, al pùorí, a sob nɛ na bɛ ɩ Zifʋ a. 10 Ɛ cɛ, sob nɛ za na ɩrɛ vla a, ʋlɛ so yúor-vɩɛlʋ-danʋ, ƴãwfʋ nɩ ƴã-ɓaarʋ, a dãw-niwn sob n’ɩ a Zifʋ, al pùorí sob nɛ na bɛ ɩ Zifʋ a. 11 Naaŋmɩn sɩrɩ bɛ mɩ́ kpɛ ŋa ɛ bɛr ŋa ɩ. 12 Bɛlɩ dem za na bɛ tɩ bãw a Mõyiir-Wulu ɛ maalɩ yel-bier a, bɛ na kpi n a Wulu bɛ-bãwfʋ kũu. Ɛ cɛ bɛlɩ dem za na tɩ bãw a Wulu ɛ maalɩ yel-bier a, a Wulu ŋa n’ʋ bɛ na maal ɩ bɛ a ƴɛrʋ. 13 Bɛlɩ dem na mɩ́ bɛrɛ wone a Wulu bɛr-wob tɛwr a, bɛlɛ bɛ nɛ bɛ mɩ́ páw a mɩnʋ a Naaŋmɩn zie ɩ, bɛlɩ dem na mɩ́ dier a Wulu a, bɛlɛ nɛ bɛ na páw a mɩnʋ. 14 A lɛn daar nɩ-bʋʋr-yoru, na bɛ bãw a Naaŋmɩn-Wulu a, na mɩ́ wa nyɛ̃ bɛ tʋɔra ɩrɛ mɛ̃ a lɛ a Wulu na ƴãw a nʋɔr a, bɛl mɩŋa mɩ́ bãw nɩ a lɛ a na sɛw kɛ bɛ ɩrɛ a, bɛl na saa bɛ bãw a Naaŋmɩn-Wulu a. 15 Bɛ mɩ́ wul a, k’aa lɛ a Wulu na bɔbr kɛ nɩr za ɩrɛ a, sɛb ɩ a bɛ pʋ̃ɔmɩ́. A bɛ pʋɔ mɩ́ mɩ̀ dɩ n a yel ŋa dãsɩɛ, lãw nɩ a bɛ tɩɛrʋ na mɩ́ yel a mɩnɛ kãw kɛ́ bɛ sãw na a, ɛ a mɩnɛ kãw ʋ yel kɛ bɛ bɛ sãw a. 16 A yele a ŋa n’a na sãá a bibir ʋl, a Naaŋmɩn na na ƴãw a Yeezu Kɩrɩta maal ɩ a nɩsaalbɛ ƴɛrʋ a bɛ yel-sɔwlɩ ƴãw a, mɛ̃ a lɛ a Yel-nʋ̃ɔ̀ ɩ̃ na hiere a na yel a. 17 Ɛ cɛ fʋ̃ʋ a, fʋ̃ʋ na dɩ kɛ Zifʋ a, fʋ ɩrɛ na ƴãwn a Naaŋmɩn-Wulu ƴãw ɛ nyʋʋr a fʋ Naaŋmɩn ƴãw; 18 fʋ bãw nɩ a lɛ ʋ na bɔbr a, ɛ a ʋ Wulu wul fʋ, fʋ bãw a vla kaa-iru; 19 fʋ̃ʋ zie a, bʋnʋ bɛ ka be ɩ, fʋ ɩ n a zɔn tãwrɛ, a bɛlɩ dem na be a lige pʋɔ a cãà, 20 a bɛlɩ dem na bɛ bãw bom za a wul-wule, a bɛlɩ dem na bɛ bãw bom sɛr a wul-wule, fʋ na bãw k’aa Naaŋmɩn-Wulu ɩ n a bãwfʋ nɩ a yel-mɩŋa ŋmɛ̃a tɔr za a ƴãw. 21 A na ɩ a ŋa a, fʋ̃ʋ na wule a fʋ tɔ a, bʋ̃ʋ n’ʋ so fʋ bɛ wule fʋ tʋɔra? Fʋ̃ʋ na kanɛ kɛ́ bɛ ta zure a, bʋ̃ʋ n’ʋ so fʋ zure? 22 Fʋ̃ʋ na yere kɛ́ bɛ ta maalɛ pɔw-gaa-yel-bier a, bʋ̃ʋ n’ʋ so fʋ maalɛ a pɔw-gaa-yel-bier? Fʋ̃ʋ na hɩ̃ɛn a tɩbɛ a, bʋ̃ʋ n’ʋ so fʋ wòbr a tɩbɛ diru pʋɔ bome? 23 Fʋ̃ʋ na ɩrɛ pɔ̀lʋ nɩ a Naaŋmɩn-Wulu a, bʋ̃ʋ n’ʋ so fʋ zawrɛ a Wulu, sãwnɛ nɩ a Naaŋmɩn yúor? 24 Bʋ̃ʋ n’ʋ vɛ̃, a Sɛb-sõw yel a: «Nyɩmɛ nɛ bɛ so a nɩ-bʋʋr-yoru ɩrɛ a Naaŋmɩn laar.» 25 Fʋ̃ʋ wa dier a Naaŋmɩn-Wulu a, a yʋɔr-ŋmãafʋ tɛr ɩ yel-ɩra a fʋ zie; ɛ cɛ fʋ̃ʋ wa zawrɛ a Naaŋmɩn-Wulu a, fʋ̃ʋ nɩ a fʋ yʋɔr-ŋmãafʋ za, fʋ ɩ na mɛ̃ nɩr na bɛ ŋmãa a. 26 A nɩr na bɛ ŋmãa a, ʋlɛ wa sawr a nɛɛ a Naaŋmɩn-Wulu na ƴãw a, Naaŋmɩn kʋ̃ saw kʋ̀ ʋ k’aa yʋɔr-bɛ-ŋmãafʋ ɩ n ŋmãafʋ bɩɩ? 27 Ɛ a nɩr ʋl na bɛ ŋmãa a ƴãgan ŋmãafʋ a, ɛ́ mɩ́ tu a Naaŋmɩn-Wulu tɩ ɓɩɩlɩ a, ʋ na wul ɩ a fʋ sãwna, fʋ̃ʋ na bãw a Naaŋmɩn-Wulu na sɛb, ɛ ŋmãa a yʋɔr, ɛ zawrɛ a Wulu a. 28 Sɩza n’a, a Zifʋ tɔr za bɛ n’ɩ a sob nɛ na sãá Zifʋ a ɩ, ɛ́ bom na sãá a ƴãganɩ́ a, bɛ n’ɩ a yʋɔr-ŋmãafʋ ɛ. 29 Ɛ cɛ a Zifʋ tɔr za n’ɩ a sob nɛ na ɩ ʋ nɩ ʋ pʋɔ a, ɛ a ŋmãafʋ ɩ socir pʋɔ ŋmãafʋ a, ŋmãafʋ na yi Naaŋmɩn Vʋʋrʋ zie ɛ bɛ yi Wulu na sɛb a pʋɔ a. A Zifʋ tɔr za ŋa bɛ nyɛrɛ a ʋ danʋ nɩsaalbɛ zie ɩ, Naaŋmɩn zie n’a ʋ nyɛrɛ a ʋ danʋ.
31 A na ɩ a ŋa a, a Zifʋ ɩb tɛr ɩ tɔnɛ kãw bɩɩ? A yʋɔr-ŋmãafʋ tɛr ɩ yel-ɩra bɩɩ? 2 A tɔnɛ bɛ dɩ vuo ɩ, a za lɛ pʋɔ. A dãw-niwn sob a, Zifʋ mɩnɛ nɛ bɛ a Naaŋmɩn ƴɛr a ʋ ƴɛrʋ kʋ̀ kɛ́ bɛ maal tɛr. 3 Ɛ bʋnʋ? Bɛ mɩnɛ kãw wa lɛb pùor a bɛ Naaŋmɩn-saw-deb pʋɔ a, a bɛ pùor-lɛbrʋ na ɩ na a Naaŋmɩn mɩ̀ lɛb pùor bɩɩ? 4 Lɛ bɛ n’a towtow ɛ! A fɛr a kɛ Naaŋmɩn mɩ́ sãá ɩ yel-mɩŋa sob, nɩsaal za saa ɩ zi-ŋmarɛ a, mɛ̃ a ŋa a Sɛb-sõw na yel a Naaŋmɩn ƴãw a: «A fɛr a kɛ bɛ mɩ́ nyɛ̃ b fʋ tɛr yel-mɩŋa a fʋ ƴɛrʋ pʋɔ, fʋ mɩ́ tʋ̃ɔ ƴɛr yi, bɛlɛ wa maalɛ nɩ fʋ ƴɛrʋ a.» 5 Ɛ cɛ a tɩ yel-mɩŋa bɛ-tɛrʋ mɩ́ wa ɩ a Naaŋmɩn yel-mɩŋa sãá a, tɩ lɛ yel kɛ bo? A wul a kɛ a Naaŋmɩn bɛ tɛr yel-mɩŋa ʋ na mɩ́ nyɛ̃ nɩ tɩ suur a bɩɩ? (Ɩ̃ ƴɛrɛ na mɛ̃ nɩsaalbɛ a.) 6 Lɛ bɛ n’a towtow ɛ! Alɛ bɛ ɩ lɛ, ŋmɩŋmɩn n’a a Naaŋmɩn na tʋ̃ɔ maal ɩ a tẽ-daa a ƴɛrʋ? 7 Ɛ cɛ, a ɩ̃ ziri mɩ́ wa ɩ a Naaŋmɩn yel-mɩŋa ʋ sãá cãàmɩ́, a ʋ yúor-vɩɛlʋ-danʋ ƴãw a, bʋnʋ ƴãw n’a bɛ cãa dɔwrɛ mɛ̃, mɛ̃ yel-bier sob a? 8 Alɛ wa ɩ a ŋa a, bʋnʋ ƴãw n’a tɩ kʋ̃ maalɛ a faa k’aa vla wa tʋ̃ɔ yi a be, mɛ̃ a lɛ bɛ mɩnɛ kãw na ŋmarɛ ziri ƴãwn tɩ kɛ́ lɛ n’a tɩ yere a? A nɩbɛ bɛ ŋa sɛwnɩ nɩ a dɔwrʋ bɛ na na páw a. 9 Ɛ́ bʋnʋ? A tɩɩm Zifʋ mɩnɛ, tɩ zuo nɩ a nɩbɛ bɩɩ? Lɛ bɛ n’a ɩ! Ɩ̃ dãw na manɩ wul k’aa nɩbɛ za, a Zifʋ mɩnɛ nɩ a bɛl na bɛ ɩ Zifʋ a, k’aa yel-bier dɩ n naalʋ a bɛ za zu, 10 mɛ̃ a lɛ tɔr za a Sɛb-sõw na yel a: «Nɩ-mɩŋa bɛ ka be a ŋan ʋʋ ɩ been ɛ, 11 ƴã-bãwnɛ bɛ ka be ɩ, nɩr kãw za bɛ su zu bɔbr a Naaŋmɩn ɛ. 12 Bɛ za bɛr ɩ a sɔr vla, bɛ lãw na lɩɛbɩ nɩbɛ na bɛ tɛr bir a. Kãw za bɛ ɩrɛ vla ɩ, fʋ kʋ̃ nyɛ̃ ʋ, ʋʋ ɩ been ɛ. 13 A bɛ kɔkɔrpʋɔ ɩ na mɛ̃ yaa bɔw-kpol a, bɛlʋ nʋɔr ʋ bɛ ƴãw, dɔpan lɔw n’a yire a bɛ nʋɔrɩ́, 14 a bɛ nʋɔr ƴɛrɛ nɩ ŋmɛ-ƴãw ƴɛrʋ nɩ nɔ-tuo tɛwr. 15 A bɛ gbɛɛ tʋ̃ɔ nɩ zɔba a nɩr kʋ́b ƴãw, 16 be n za bɛ na tuur tɔlɛ a, yel-sãwnɩ nɩ kpɩɛrʋ mɩ́ gã na, 17 bɛ bɛ bãw a ƴã-ɓaarʋ sɔr ɛ. 18 Bɛ bɛ zɔrɛ a Naaŋmɩn towtow ɛ.» 19 Tɩ bãw na k’aa alɩ bome nɛ za a Naaŋmɩn-Wulu na yere a, ʋ yere na kʋ̀rɛ a Zifʋ mɩnɛ a Wulu ŋa na fɛrɛ a, kɛ́ nɩr za ta tʋ̃ɔ haa nʋɔr manɩ a ʋ yel-mɩŋa ɩ, ɛ́ bɛ nyɛ̃ a tẽ-daa za na tɛr sãwna a Naaŋmɩn niŋé a. 20 A lɛ n’a so nɩr za kʋ̃ tʋ̃ɔ lɛ ɩ nɩ-mɩŋa a Naaŋmɩn niŋé, a Wulu ʋ na na ƴãw fãw sawr a ƴãw ɛ; bʋ̃ʋ n’ʋ vɛ̃, a yel-bier tɛwr ʋ a Naaŋmɩn-Wulu mɩ́ ɩ bɛ bãw. 21 Ɛ cɛ ƴɛrɛ ŋa a, a Naaŋmɩn wul tɩ nɩ a lɛ ʋ na mɩ́ ɩ tɩ ɩ nɩ-mɩn a ʋ niŋé, ɛ a bɛ yi a Wulu zie a. A Naaŋmɩn-Wulu nɩ a Naaŋmɩn-ƴɛr-manbɛ sɛbr tɩ dãw na dɩ a yel ŋa dãsɩɛ a ŋa: 22 Naaŋmɩn mɩ́ ɩ na a nɩsaalbɛ ɩ nɩ-mɩn a ʋ niŋé, a Yeezu Kɩrɩta bɛ na mɩ́ saw de a zũú. A bɛlɩ dem za na saw de a Kɩrɩta a ƴãw n’a ʋ mɩ́ ɩ a lɛ, bʋ̃ʋ n’ʋ vɛ̃, ʋ bɛ owre ɩ: 23 bɛ za nɛ bɛ maalɩ a yel-bier, bɛ za nɛ bɛ bɛ páw a Naaŋmɩn yúor-vɩɛlʋ-danʋ ɛ. 24 Ɛ cɛ, a ʋ nɔ̃wfʋ zũú a, Naaŋmɩn ɩ na bɛ ɩ nɩ-mɩn a ʋ niŋé zawla lɛ, a faafʋ bɛ na páw a Yeezu Kɩrɩta ƴãw a zũú. 25 A Naaŋmɩn maal ɩ ʋ nɩ bawr, k’aa Kɩrɩta zɩ̃ɩ ƴãw, ʋ páw a yel-bebe suur kʋ̀ a bɛlɩ dem na saw de ʋ a. A ŋa n’a a Naaŋmɩn wul k’ʋʋ ɩ n nɩ-mɩŋa kʋra lɛ: ʋ tɩ ɩ ʋ nɩ a koro za, a lɛn daar ʋ na tɩ nyɔw ʋ tʋɔra bɛ dɔwrɩ a nɩsaalbɛ a bɛ yel-bebe ƴãw a; ʋ ɩ ʋ nɩ a dɩ̃a zie ŋa pʋɔ, ʋ na ɩ nɩ-mɩŋa, ɛ mɩ̀ ɩ a bɛlɩ dem za na saw de a Yeezu a bɛ ɩ nɩ-mɩn a. 27 Nyɩn lowr a tɩ na lɛ cãa ɩrɛ pɔ̀lʋ? A yi na zaa! Bʋnʋ zũú? A Wulu ɩ-ɩrɩ zũú bɩɩ? Towtow! Ɛ cɛ a Kɩrɩta saw-deb zũú n’a. 28 Bʋ̃ʋ n’ʋ vɛ̃, tɩ tɩɛrɛ na k’aa Naaŋmɩn mɩ́ ɩ na a nɩsaal ɩ nɩ-mɩŋa a ʋ niŋé ʋ na saw de a zũú, ɛ a bɛ ɩ a Wulu ʋ na sawr a ƴãw n’a ɩ. 29 Bɩɩ a Naaŋmɩn taa ɩrɛ wa ɩ Zifʋ mɩnɛ tɛwr Naaŋmɩn ʋ? A nɩ-bʋʋr-yoru Naaŋmɩn mɩ̀ bɛ tʋ̃ɔ n’ʋ ɛ? Bʋnʋ ɩ! A nɩ-bʋʋr-yoru Naaŋmɩn mɩ̀ n’ʋ, 30 bʋ̃ʋ n’ʋ vɛ̃, Naaŋmɩn been yõ n’ʋ be. A saw-deb a ʋ na ɩ n a Zifʋ mɩnɛ ɩ nɩ-mɩn a ʋ niŋé, a saw-deb cãa n’a ʋ na ɩ n a bɛlɩ dem na bɛ ɩ Zifʋ mɩnɛ a, bɛ ɩ nɩ-mɩn a ʋ niŋé. 31 A pãa ɩ lɛ, a saw-deb zũú, tɩ yel k’aa Wulu bɛ cãa tɛr pɛr towtow ʋ? Lɛ bɛ n’a ɩ, tɩ nɩ̃ɛ na ɩ a Wulu pɛr sɩza ʋ sãá.
41 A na ɩ a ŋa a, bʋ̃ʋ n’ʋ tɩ na yel a tɩ sãakʋm Abraham ƴãw? Bʋ̃ʋ n’ʋ ʋ páw, ʋ na ɩ nɩsaal a? 2 Bɛlɛ wa yel k’aa Abraham ɩ n nɩ-mɩŋa a ʋ ɩ-ɩrɩ zũú a, ʋ na tʋ̃ɔ na pɔrɛ a al ƴãw, ɛ cɛ Naaŋmɩn niŋé bɛ n’a ʋ na pɔrɛ ɩ. 3 A Sɛb-sõw yere na kɛ bo? «K’aa Abraham tɩ saw na de a Naaŋmɩn, a Naaŋmɩn saw kʋ̀ ʋ a al ƴãw k’ʋʋ ɩ n nɩ-mɩŋa.» 4 Nɩr na tone a, bɛ bɛ mɩ́ nyɛ̃ a ʋ sã-ya ʋ ɩ bʋ̃-mɔlɛ bɛ kʋ̀ ʋ ɛ, ʋ mɩ́ ɩ n bom a na fɛr kɛ bɛ kʋ̀ ʋ a. 5 Ɛ cɛ, nɩr na bɛ ɩrɛ ƴãwn a ʋ tome ƴãw a, ɛ saw de a Naaŋmɩn na mɩ́ ɩ a nɩr na bɛ ƴãwnɛ ʋ, ʋ lɩɛbɩ nɩ-mɩŋa a, a Naaŋmɩn mɩ́ nyɛ̃ nɩ a ʋ saw-deb, ɛ saw kʋ̀ ʋ k’ʋʋ ɩ n nɩ-mɩŋa. 6 A nɩr ʋl a Naaŋmɩn na mɩ́ saw kʋ̀ k’ʋʋ ɩ n nɩ-mɩŋa, ɛ a bɛ ɩ a ʋ ɩ-ɩrɩ zũú n’a a, a ŋa n’a a Daviir ƴɛrɛ a sob nɛ zu-nʋ̃ɔ̀ ƴɛrʋ: 7 «Zu-nʋ̃ɔ̀ dem ɩ a bɛlɩ dem a Naaŋmɩn na dɩ a bɛ sãwna suur kʋ̀, ɛ ír a bɛ yel-bebe bɛr a. 8 Zu-nʋ̃ɔ̀ sob ɩ a nɩr ʋl a Sore na bɛ de a ʋ yel-bier bin gùre nɩ ʋ a.» 9 A na ɩ a ŋa a, a zu-nʋ̃ɔ̀ ŋa a, a bɛlɩ dem yɛɛ na ŋma a tɛwr ƴãw n’a ʋ be, bɩɩ a bɛlɩ dem na bɛ ŋma a ƴãw mɩ̀ n’a? Tɩ yel ɩ a ƴɛrɛ ŋa k’aa «Naaŋmɩn tɩ nyɛ̃ nɩ a Abraham saw-deb, ɛ saw kʋ̀ ʋ a al ƴãw k’ʋʋ ɩ n nɩ-mɩŋa.» 10 Ɛ cɛ debor daar a Naaŋmɩn tɩ saw kʋ̀ ʋ a lɛ? A Abraham na tɩ ŋmãa a yʋɔr baar a n’a bɩɩ, ʋ na bɛ tɩ ŋmãa sɛr a n’a? Ʋ na tɩ ŋmãa baar a bɛ n’a ɩ, ʋ na bɛ tɩ ŋmãa sɛr a n’a. 11 Pùorí n’a ʋ tɩ páw a yʋɔr-ŋmãafʋ ʋ ɩ bãwfʋ na wule k’aa Naaŋmɩn tɩ saw na kʋ̀ ʋ k’ʋʋ ɩ n nɩ-mɩŋa a saw-deb zũú, ʋ na saa bɛ tɩ ŋmãa a yʋɔr sɛr a. A ŋa n’a a Abraham lɩɛbɩ a bɛlɩ dem za na saw de, ɛ́ bɛ ŋma a yɛɛ a sãà, k’aa Naaŋmɩn tʋ̃ɔ saw kʋ̀ bɛ kɛ́ bɛ mɩ́ ɩ n nɩ-mɩn. 12 Ʋ mɩ̀ ɩ n a bɛlɩ dem yɛɛ na ŋma a sãà, a pɛr lɛ kɛ a bɛlɩ dem na bɛ jɩrɛ a bɛ yɛɛ ŋmab tɛwr a, ɛ cɔwrɛ a tɩ sãà Abraham saw-deb ʋ na tɩ tɛr ɛ́ bɛ ŋmãa a yʋɔr sɛr a. 13 Naaŋmɩn yel ɩ a Abraham nɩ a ʋ bʋʋrɛ kɛ́ bɛ na so nɩ a tẽ-daa. A Wulu a Abraham na tɩ saw a ƴãw bɛ n’a a Naaŋmɩn tɩ yel a a ŋa kʋ̀ ʋ ɛ, a Naaŋmɩn na tɩ saw kʋ̀ ʋ k’ʋʋ ɩ n nɩ-mɩŋa a ʋ saw-deb zũú a, al ƴãw n’a. 14 A bɛlɩ dem na sawr a Wulu a tɛwr wa nɛ bɛ páwr a bome a Naaŋmɩn na yel k’ʋʋ na tɩr a a, a saw-deb bɛ cãa tɛr pɛr ɛ, ɛ a lɛ a Naaŋmɩn na yel a bɛ cãa pʋɔ ɩ. 15 Bʋ̃ʋ n’ʋ vɛ̃, a Wulu-bɛ-sawfʋ n’ʋ mɩ́ so a Naaŋmɩn suur nyɛb; ɛ cɛ be wulu na bɛ wul a, wulu zawrʋ mɩ̀ bɛ ka be ɩ. 16 A na ɩ a ŋa a, a ʋlɩ bom nɛ a Naaŋmɩn na yel k’ʋʋ na tɩr a a, a saw-deb zũú n’a, k’ʋʋ tʋ̃ɔ ɩ maalʋ ʋ na tɩrɛ zawla a, ɛ a mɩ̀ ɩ a Abraham bʋʋrɛ za ƴãw a, a bɛlɩ dem na sawr a Wulu a, nɩ a bɛlɩ dem na saw de, mɛ̃ a lɛ a Abraham na tɩ saw de a, ʋl na ɩ a tɩ za sãà a. 17 Bʋ̃ʋ n’ʋ vɛ̃, a Sɛb-sõw yel ɩ a ŋa: «Ɩ̃ ɩ na fʋ ɩ nɩ-bʋʋr-yaga yaga sãà.» Ʋ ɩ n a tɩ sãà a Naaŋmɩn ʋ na saw de a niŋé, a Naaŋmɩn ʋl na mɩ́ ɩ a kũuni bɛ vʋʋrɛ a, ɛ ɩ a bome na bɛ tɩ be, a be a. 18 A Abraham tɩ saw na de ɛ tɩɛrɛ, a na saa tɩ ɩ mɛ̃ zaa lɛ n’a ʋ tɩɛrɛ a. A ŋa n’a ʋ tɩ lɩɛbɩ «nɩ-bʋʋr-yaga sãà», a tu a ƴɛrʋ ŋa a Naaŋmɩn na tɩ ƴɛr kʋ̀ ʋ a: «A ŋa n’a a fʋ bʋʋrɛ nãà yãwmɛ sɛw.» 19 A Abraham tɩ tɛr a ta yome kʋba, ɛ cɛ a ʋ saw-deb bɛ tɩ bal ɛ, a lɛn daar ʋ na tɩ nyɛ̃ a ʋ ƴãgan ʋ kpi ʋ za baarɩ a, nɩ a ʋ pɔw Saara ʋ ɩ pɔw-ãan a. 20 Ʋ bɛ tɩ bʋnɩ nɩ a lɛ a Naaŋmɩn na yel a ɩ; a ʋ saw-deb nɩ̃ɛ na lɛ tɩ ɩ ʋ kpɛmɛ ɛ danɩ a Naaŋmɩn. 21 Ʋ tɩ bãwnɩ a na k’aa Naaŋmɩn tɛr ɩ fãw na maalɩ a lɛ ʋ na yel a. 22 A lɛ n’a so bɛ yel caar ɩ a Abraham, k’aa ʋ saw-deb zũú, «Naaŋmɩn saw na kʋ̀ ʋ k’ʋʋ ɩ n nɩ-mɩŋa.» 23 Ɛ cɛ ʋl yõ ƴãw bɛ n’a a ƴɛr-bie a ŋa sɛb k’aa «Naaŋmɩn saw na kʋ̀ ʋ k’ʋʋ ɩ n nɩ-mɩŋa ɩ.» 24 A tɩɩm ƴãw mɩ̀ n’a a sɛb, tɩɩm a na fɛr kɛ́ bɛ nyɛ̃ tɩ ɩ nɩ-mɩn a, tɩɩm na saw de a Naaŋmɩn na ɩ a tɩ Sore Yeezu ʋ lɛb yi a kũuni pʋɔ a. 25 A Naaŋmɩn de ʋ na tɩr a tɩ yel-bebe ƴãw, bɛ kʋ́ ʋ, ɛ ʋ ɩ ʋ lɛb yi a kũu pʋɔ kɛ́ tɩ tʋ̃ɔ páw a mɩnʋ.
51 A na ɩ a ŋa tɩ lɩɛbɩ nɩ-mɩn a tɩ saw-deb ƴãw a, ƴã-ɓaarʋ be n tɩɩm nɩ a Naaŋmɩn cara pʋɔ, a tɩ Sore Yeezu Kɩrɩta zũú. 2 Ʋlɛ n’ʋ puo a Naaŋmɩn maalʋ sɔr kʋ̀ tɩ, a saw-deb zũú, ɛ́ tɩ be a maalʋ ŋa pʋɔ. Ɛ bom nɛ na ɩrɛ tɩ nʋ̃ɔ̀ a, a ɩ n tɩ na tɩɛrɛ kɛ tɩ nãà páw nɩ a Naaŋmɩn yúor-vɩɛlʋ-danʋ a. 3 Ɛ a za cãa bɛ n’a ɩ, nʋ̃ɔ̀ ɩrɛ tɩ nɩ a tɩ kpɩɛrʋ tɛɛ za ƴãw, tɩ na bãw k’aa kpɩɛrʋ waar ɩ nɩ a kanyir a, 4 a kanyir waar ɩ bɛ na ɩ b kaa fʋ bɛ dam a, ɛ́ bɛ na ɩ b kaa fʋ bɛ dam a, waar ɩ tɩɛrʋ fʋ na ƴãw a Naaŋmɩn ƴãw a. 5 A tɩɛrʋ ŋa bɛ bɛ̀lɛ ɩ; bʋ̃ʋ n’ʋ vɛ̃, Naaŋmɩn ƴãw nɩ a ʋ nɔ̃wfʋ a tɩ socie pʋɔ, a Vʋʋrʋ Sõw ʋ na kʋ̀ tɩ a zũú. 6 Tɩ na bɛ tɩ tɛr fãw na ɩ bom za a, lɛ n’a, a Naaŋmɩn daar na wa ta a, a Kɩrɩta kpi yel-bebe dem ƴãw. 7 Fʋ na na saw kpi nɩ-mɩŋa ƴãw a, mɛ̃ a mɩ́ kpɛmɛ na; kãpaw fʋ na saw na kpi nɩ-vla ƴãw. 8 Ɛ cɛ, a ʋlɩ bom nɛ na wul k’aa Naaŋmɩn nɔnɛ tɩ nɩ yaga za a, ʋlɛ n’ɩ a Kɩrɩta na kpi a tɩ ƴãw, a lɛn daar tɩ na cãa ɩ yel-bebe dem a. 9 Ɛ a ʋ zɩ̃ɩ na ɩ tɩ lɩɛbɩ nɩ-mɩn a Naaŋmɩn zie ƴɛrɛ ŋa a, bʋnʋ bɛ ka be ɩ, ʋ na faa tɩ na zuo lɛ a Naaŋmɩn suur nãà wa ìr a ƴãw. 10 Tɩ tɩ ɩ n a Naaŋmɩn dɔ̃ dem, ʋʋ ɩ tɩɩm nɩ ʋl lɛb kpɛ taa a ʋ Bie kũu zũú. Ƴɛrɛ ŋa tɩɩm nɩ ʋl na lɛb kpɛ taa baarɩ a, bʋnʋ bɛ ka be ɩ, ʋ na faa tɩ nɩ zaa lɛ a ʋ Bie nyɔ-vʋʋrʋ ƴãw. 11 Ɛ a za cãa bɛ n’a ɩ, a Naaŋmɩn ƴãw n’a nʋ̃ɔ̀ ɩrɛ tɩ a tɩ Sore Yeezu Kɩrɩta zũú, ʋl na n’ʋ so tɩɩm nɩ a Naaŋmɩn lɛb kpɛ taa ƴɛrɛ ŋa a. 12 Nɩ-been yõ, a Adama, ʋlɛ n’ʋ so a yel-bier wa a tẽ-daa zu, ɛ a yel-bier ʋ wa n a kũu. Ɛ a a ŋa n’a a kũu lʋ̃ɔ a nɩsaalbɛ za, bɛ za na maalɩ a yel-bier a ƴãw. 13 A Naaŋmɩn na bɛ tɩ kʋ̀ a ʋ Wulu a Mõyiir sɛr a, a yel-bier tɩ de nɩ niwn be a tẽ-daa zu; ɛ cɛ a Wulu na bɛ tɩ be be sɛr a, nɩr bɛ mɩ́ tɩ dɩ yel-bier san ɛ. 14 Ɛ cɛ a Adama daar tɩ ta n a Mõyiir daar a, a kũu dɩ n naalʋ a nɩbɛ za zu, tɩ lãw nɩ a bɛlɩ dem na bɛ maalɩ a nʋɔr zawrʋ yel-bier mɛ̃ a Adama a. A Adama tɩ n’ɩ a sob nɛ na na wa a pùorí a ŋmɛ̃-ta-tɔ. 15 Ɛ cɛ a maalʋ a Naaŋmɩn na tɩrɛ zawla a, nɩ a Adama sãwna a, a bɛ zɛ̃ taa ɩ. Yel-mɩŋa n’a, nɩ-yaga kpi n nɩ-been yõ sãwna zũú; ɛ cɛ a Naaŋmɩn maalʋ, a maalʋ ʋ na tu nɩ-been yõ, a Yeezu Kɩrɩta, kʋ̀rɛ nɩ-yaga zawla a, ʋ ɩ n kpɛ̃ɛ tɩ zuo. 16 A yele a Naaŋmɩn maalʋ na wa n a, nɩ a yele nɩ-been yõ yel-bier na wa n a, mɩ̀ bɛ zɛ̃ taa ɩ: bʋ̃ʋ n’ʋ vɛ̃, nɩ-been yõ yel-bier ƴãw a, a ƴɛrʋ maal a, a tɩ yi dɔwrʋ, ɛ sãwna yaga yaga ƴãw, a Naaŋmɩn maalʋ ʋ na tɩrɛ zawla a, mɩ́ ɩ na bɛ ɩ nɩ-mɩn. 17 Nɩ-been yõ ƴãw sɩrɩ n’a, nɩ-been yõ sãwna n’a so a kũu dɩ naalʋ, ɛ cɛ a Yeezu Kɩrɩta, ʋ yõ ƴãw a, a bɛlɩ dem na páwr a Naaŋmɩn maalʋ yaga za a, nɩ a maalʋ na ɩ kɛ bɛ lɩɛbɩ nɩ-mɩn a, na vʋʋrɛ na ɛ dɩrɛ naalʋ zuo lɛ. 18 A na ɩ a ŋa a, mɛ̃ a lɛ a dɔwrʋ na lo a nɩsaalbɛ za zu, nɩ-been yõ sãwna ƴãw a, lɛ mɩ̀ n’a nɩ-been yõ mɩnʋ ɩ a nɩsaalbɛ za ɩ nɩ-mɩn ɛ tɛr a nyɔ-vʋʋrʋ. 19 Mɛ̃ a lɛ nɩ-yaga yaga na lɩɛbɩ yel-bebe dem nɩ-been yõ na zawrɩ a nʋɔr a ƴãw a, lɛ mɩ̀ n’a nɩ-yaga yaga na lɩɛbɩ nɩ-mɩn nɩ-been yõ na saw a nʋɔr a ƴãw. 20 A Naaŋmɩn-Wulu wa na k’aa sãwna tʋ̃ɔ bʋ́wlɩ pàw a ziir za; ɛ cɛ a be a yel-bier na tɩ bʋ́wlɩ a, a Naaŋmɩn maalʋ mɩ̀ tɩ ʋr a tɩ zuo. 21 A na ɩ a ŋa a, mɛ̃ a lɛ a yel-bier na tɩ wul a kũu fãw ʋ na tɛr a, lɛ mɩ̀ n’a a Naaŋmɩn maalʋ wule faafʋ fãw, k’ʋʋ tʋ̃ɔ tɛr tɩ cen nɩ a nyɔ-vʋʋrʋ na be kʋra lɛ a pʋɔ, a Yeezu Kɩrɩta tɩ Sore ƴãw.
61 A na ɩ a ŋa a, tɩ na yel a kɛ bo? Kɛ́ tɩ cãa be a yel-bier pʋɔ a Naaŋmɩn maalʋ tʋ̃ɔ ʋr bɩɩ? 2 Lɛ bɛ n’a towtow ɛ! Tɩ kpi na, bɛ cãa pʋɔ yel-bier pʋɔ ɩ: ŋmɩŋmɩn n’a tɩ na tʋ̃ɔ cãa be a yel-bier pʋɔ? 3 Bɩɩ nyɩ bɛ bãw k’aa tɩɩm za na de a suob kɛ́ tɩ lãw nɩ a Yeezu Kɩrɩta a, tɩ de nɩ a suob lãw nɩ ʋ kpi ʋ? 4 A na ɩ a ŋa a, a suob tɩ na de a zũú, tɩ lãw nɩ nɩ a Kɩrɩta kpi, bɛ ũù tɩ lãw nɩ ʋ, kɛ mɛ̃ a lɛ a Kɩrɩta na lɛb yi a kũuni pʋɔ nɩ a ʋ Sãà yúor-vɩɛlʋ-danʋ fãw a, a tɩɩm mɩ̀, tɩ vʋʋrɛ nɩ nyɔ-vʋʋr-paala. 5 Bʋ̃ʋ n’ʋ vɛ̃, tɩmɛ wa lãw nɩ ʋ kpi kũu na ŋmɛ̃ taa nɩ a ʋ dem a, tɩ mɩ̀ na lãw nɩ ʋ na kũu-pʋɔ-lɛ-yib pʋɔ na ŋmɛ̃ taa nɩ a ʋ dem a. 6 Tɩ bãwnɩ a yel ŋa vla: a nɩsaal ʋl tɩ na tɩ ɩ a koro za a, bɛ kpa ʋ nɩ a da-gara zu lãw nɩ a Kɩrɩta, k’aa yel-bier nɩr ʋl tɩ na ɩ a, ta cãa ɩ, ɛ́ tɩ mɩ̀ ta cãa ɩ a yel-bier gbãgbaar ɛ. 7 Bʋ̃ʋ n’ʋ vɛ̃, sob nɛ na kpi a, ʋ bɛ cãa dɩ a yel-bier san a Naaŋmɩn-Wulu zie ɩ. 8 Ɛ́ tɩ na lãw nɩ a Kɩrɩta kpi a, tɩ bãwnɩ a na kɛ tɩ mɩ̀ na lãw nɩ ʋ na vʋʋrɛ. 9 Bʋ̃ʋ n’ʋ vɛ̃, tɩ bãw na k’aa Kɩrɩta na lɛb yi a kũu pʋɔ a, ʋ bɛ lɛ kpiir ɛ, a kũu bɛ cãa dɩ naalʋ a ʋ zu ɛ. 10 Ʋ kpi n gb’a been daadaa k’ʋʋ tʋ̃ɔ a yel-bier; ɛ ʋ na vʋʋrɛ a, Naaŋmɩn ƴãw n’a ʋ vʋʋrɛ. 11 A nyɩɩm mɩ̀ a, nyɩ bãw kɛ nyɩ kpi na bɛ cãa pʋɔ a yel-bier pʋɔ ɩ, ɛ vʋʋrɛ a Naaŋmɩn ƴãw lãw nɩ a Yeezu Kɩrɩta. 12 A na ɩ a ŋa a, a yel-bier bɛ tɛr sɔr k’ʋʋ cãa dɩrɛ naalʋ a nyɩ ƴãgan na ɩ bʋ̃-kpiira a zu, ƴãw kɛ nyɩ tuur a ƴãgan ŋa yel-bɔbrɩ ɛ. 13 Nyɩ ta cãa dier a nyɩ ƴãgan ɓɛrmɛ̃ a lɩɛbɩ yel-bier tõ-tõ-bome, nyɩ ɩrɛ nɩ a lɛ na bɛ tu sɔr a ɩ. Nyɩ nɩ̃ɛ vɛ̃ kɛ de nyɩ mɩŋa kʋ̀ a Naaŋmɩn, mɛ̃ nɩbɛ na tɩ kpi ɛ lɛb wa vʋʋrɛ a, ɛ́ nyɩ tone a ʋ tome, ɩ mɛ̃ tõ-tõ-bome a yel-vla maalʋ ƴãw a. 14 Bʋ̃ʋ n’ʋ vɛ̃, a yel-bier kʋ̃ cãa dɩrɛ naalʋ a nyɩ zu ɛ, a Naaŋmɩn-Wulu na bɛ cãa so nyɩ, ɛ́ Naaŋmɩn maalʋ so nyɩ a ƴãw. 15 Ɛ bʋnʋ? Tɩ na maalɛ nɩ a yel-bier, a Naaŋmɩn-Wulu na bɛ cãa so tɩ ɛ Naaŋmɩn maalʋ so tɩ a bɩɩ? Lɛ bɛ n’a towtow ɛ! 16 Nyɩ bɛ bãwnɩ a kɛ nyɩmɛ wa de nyɩ tʋɔra kʋ̀ nɩr, kɛ́ nyɩ ɩ gbãgbaar sawr a ʋ nʋɔr a, nyɩ lɩɛb ɩ a sob nɛ nʋɔr nyɩ na sawr a gbãgbaar ɛ? A yel-bier wa n’ʋ a, nyɩ bɛ bãwnɩ a k’ʋʋ wɩɛr ɩ nyɩ nɩ kũu pʋɔ ɩ? A nʋɔr sawfʋ wa n’ʋ a, k’ʋʋ wɩɛr ɩ nyɩ nɩ a mɩnʋ pʋɔ ɩ? 17 Ɛ cɛ Naaŋmɩn so puoru: nyɩ tɩ dãw na ɩ a yel-bier gbãgbaar, ƴɛrɛ ŋa a, a wulu bɛ na wul nyɩ a sɛw kɛ nɩbɛ za tuur a, nyɩ saw na de ʋ nɩ nyɩ pʋɔ za. 18 Bɛ faa nyɩ nɩ a yel-bier nuru pʋɔ, nyɩ lɩɛbɩ a mɩnʋ gbãgbaar. 19 Nɩsaalʋ n’a ɩ̃ ƴɛrɛ, a nyɩ bãbaalʋ zũú. Mɛ̃ a lɛ nyɩ na tɩ de nyɩ mɩŋa za tu n a faalʋ nɩ a Wulu zawrʋ pùor, ɩ mɛ̃ gbãgbaar a, ɛ a ɩ nyɩ ɩ nɩ-gaarɩ a Naaŋmɩn zie a, a ƴɛrɛ ŋa a, nyɩ mɩ̀ de nyɩ mɩŋa za tu n a mɩnʋ ɩ mɛ̃ gbãgbaar a, kɛ́ nyɩ tʋ̃ɔ vʋʋrɛ nyɔ-vʋʋrʋ na ɩ sõw a. 20 A lɛn daar nyɩ na tɩ ɩ a yel-bier gbãgbaar a, nyɩ bɛ tɩ ŋmɛlɛ kaar a mɩnʋ ɛ. 21 A ɩ-ɩrɩ a ŋa na ɩrɛ vĩ a dɩ̃a a, bʋnʋ tɔnɛ n’a nyɩ tɩ nyɛ̃ a pʋɔ, a lɛn daar nyɩ na tɩ tɛr a ɩ-ɩrɩ a ŋa a? Kũu n’a a waar ɩ. 22 Ɛ cɛ ƴɛrɛ ŋa a, bɛ faa nyɩ nɩ a yel-bier nuru pʋɔ, nyɩ lɩɛbɩ Naaŋmɩn gbãgbaar tɛr ɩ-ɩrɩ na tɩrɛ sonu a, ɛ a baarʋ daar a waar ɩ nyɔ-vʋʋrʋ na be kʋra lɛ a. 23 Bʋ̃ʋ n’ʋ vɛ̃, a yel-bier sã-ya n’ɩ a kũu; ɛ cɛ a maalʋ a Naaŋmɩn na tɩrɛ zawla a, ʋlɛ n’ɩ a nyɔ-vʋʋrʋ na be kʋra lɛ fʋ na mɩ́ tɛr lãw nɩ a Yeezu Kɩrɩta tɩ Sore a.
71 Nyɩ bɛ bãwnɩ a ʋ, yɛbr ɩ? Nɩbɛ na bãw a Naaŋmɩn-Wulu a zie n’a ɩ̃ ƴɛrɛ: a nɩsaal cãafʋ daar yõ n’a, a Naaŋmɩn-Wulu fɛrʋ be a ʋ zu. 2 Mɛ̃ a ŋa a, pɔw na kul sɩr a, a ʋ sɩr na cãa vʋʋrɛ a yõ n’a, a Naaŋmɩn-Wulu ’lẽ ʋlɛ nɩ a ʋ sɩr; ɛ cɛ a sɩr wa ɩ mɛ̃ ʋ kpi na a, a kul-taa nʋɔr na dãw ’lẽ bɛ a, bɛ cãa fɛrɛ ʋ ɛ. 3 A na ɩ a ŋa a, a ʋ sɩr wa cãa vʋʋrɛ, ʋʋ be dɛb yũo zie a, bɛ na bʋɔlɛ ʋ nɩ pɔw-gaa- yel-bier-maalɛ; ɛ cɛ a ʋ sɩr wa kpi a, ʋ so nɩ ʋ tʋɔra a Naaŋmɩn-Wulu niŋé, na tʋ̃ɔ ɩ dɛb yũo pɔw ɛ bɛ maalɩ pɔw-gaa-yel-bier ɛ. 4 Ɩ̃ yɛbr ɩ, lɛ n’a a mɩ̀ ŋmɛ̃ a nyɩ zie. A Naaŋmɩn-Wulu niŋé a, nyɩ ɩ na mɛ̃ nɩ-kũuni a, nyɩ na lãw nɩ a Kɩrɩta a ʋ ƴãgan pʋɔ a. A na ɩ a ŋa a, nɩ-yũo so nyɩ a ƴɛrɛ ŋa, a sob nɛ na lɛb yi a kũuni pʋɔ kɛ́ tɩ tʋ̃ɔ ɩrɛ ɩ-vɩɛlɩ na nʋmɛ a Naaŋmɩn zie a. 5 A lɛn daar tɩ na tɩ cãa tɛr a tɩ nɩsaalɛ ɩb tɛwr a, a Naaŋmɩn-Wulu mɩ́ tɩ ɩ na a pʋ-tɩɛr-faar tone a tome a tɩ nɩɩlʋ za pʋɔ, mɩ́ tɩ ƴãw tɩ tɛr ɩ-ɩrɩ na wɩɛr ɩ tɩ kũu pʋɔ a. 6 Ɛ cɛ ƴɛrɛ ŋa a, bɛ ír tɩ na bɛr a Wulu fɛrʋ pʋɔ; bʋ̃ʋ n’ʋ vɛ̃, a ʋlɩ bom nɛ na tɩ so tɩ ɩ gbãgbaar a, tɩ ɩ na mɛ̃ tɩ kpi na bɛ cãa pʋɔ ʋ pʋɔ a. A na ɩ a ŋa a, tɩ na tʋ̃ɔ na tone a Naaŋmɩn tu n pɔl-paala a Vʋʋrʋ na wule a, ɛ ta cãa tuur ɩ a pɔl-kʋra a Wulu na sɛb a na wule a ɩ. 7 Tɩ na yel a kɛ bo? K’aa Naaŋmɩn-Wulu ɩ n yel-bier bɩɩ? Lɛ bɛ n’a towtow ɛ! Ɛ cɛ a Wulu n’ʋ ɩ ɩ̃ bãw bʋ̃ʋ n’ɩ a yel-bier. Bʋ̃ʋ n’ʋ so, a Wulu bɛ tɩ yel a ƴɛr-bie a ŋa: «Ta nyɛ̃ a fʋ tɔ bom bɔbr ɛ», ɩ̃ kʋ̃ʋ bãw bʋ̃ʋ n’ɩ nyɛ̃ a fʋ tɔ bom bɔbr ɛ. 8 A yel-bier tur a de a nɔ-ƴãwna, ƴãw a tɔ bom bɔb tɩɛrʋ bʋʋrɛ za a ɩ̃ zie. Bʋ̃ʋ n’ʋ vɛ̃, Wulu bɛ wa ka be a, a yel-bier ɩ n bʋ̃-kũu. 9 A koro za a, ɩ̃ na bɛ tɩ bãw kɛ Naaŋmɩn-Wulu be n be a, ɩ̃ tɩ vʋʋrɛ nɩ zoom lɛ; ɛ cɛ a nɔ-ƴãwna na wa wa a, a yel-bier vʋla tĩ na kpɩɛr mɛ̃, 10 lɛ n’a a ɩ mɛ̃ ɩ̃ kpi na a. A nɔ-ƴãwna na tɩ sɛw k’ʋʋ wa n nyɔ-vʋʋrʋ a, bɛ wa bere na mãa zie ʋ wa n kũu. 11 Bʋ̃ʋ n’ʋ vɛ̃, a yel-bier tur a de a nɔ-ƴãwna bɛlɩ nɩ mɛ̃, ɛ kʋ́ m nɩ a nɔ-ƴãwna. 12 A na ɩ a ŋa a, a Naaŋmɩn-Wulu ɩ n sõw ɛ a nɔ-ƴãwna ɩ sõw, tu sɔr ɛ vɩɛl. 13 A pãa ɩ lɛ bʋ̃-vla wa lɩɛbɩ kũu bom mãa zie ʋ? Lɛ bɛ n’a towtow ɛ! A yel-bier zie n’a a yi. A ŋa n’a ʋ ɩ, a ʋ ŋmɛ̃a tɔr za sãá: ʋ de nɩ bom na ɩ bʋ̃-vla a kʋ́ n mɛ̃. Ɛ cɛ a a ŋa n’a, a nɔ-ƴãwna zũú, a yel-bier pãa lɛ bãw kpɛ faa tɩ zuo. 14 Tɩ bãw na k’aa Naaŋmɩn-Wulu bɛ yi nɩsaal zie ɩ; ɛ cɛ mãa ɩ n nɩsaal bɛ na kʋɔrɩ kʋ̀ a yel-bier ɩ̃ ɩ a ʋ gbãgbaa a. 15 Ɩ̃ sɩrɩ bɛ bãw a lɛ ɩ̃ na ɩrɛ a pɛr ɛ: ɩ̃ bɛ ɩrɛ a lɛ ɩ̃ na bɔbr k’ɩ̃ɩ nãa ɩrɛ a ɩ, ɛ nɩ̃ɛ ɩrɛ a ʋlɩ bom nɛ ɩ̃ na bɛ nɔnɛ a. 16 Mãa wa ɩrɛ a ʋlɩ bom nɛ ɩ̃ na bɛ bɔbr a, ɩ̃ saw na k’aa Naaŋmɩn-Wulu vɩɛl a. 17 A na ɩ lɛ a, mãa bɛ n’ʋ ɩrɛ a a ŋa ɩ, a yel-bier na be a ɩ̃ zie a n’ʋ. 18 Bʋ̃ʋ n’ʋ so, ɩ̃ bãwnɩ a na a vla na bɛ be a ɩ̃ zie a, a pɛr lɛ k’aa bãbaal ŋa ɩ̃ na ɩ a. Yel-mɩŋa n’a, a vla maalʋ tɩɛrʋ be n a ɩ̃ zie, ɛ cɛ a maalʋ fãw bɛ ka be ɩ. 19 Bʋ̃ʋ n’ʋ vɛ̃, ɩ̃ bɛ mɩ́ maalɩ a vla ɩ̃ na bɔbr a ɩ, ɛ nɩ̃ɛ mɩ́ maalɩ a faa ɩ̃ na bɛ bɔbr a. 20 Mãa mɩ́ wa ɩ a ʋlɩ bom nɛ ɩ̃ na bɛ bɔbr a, a lɛn daar a, mãa bɛ cãa n’ʋ mɩ́ ɩrɛ ɩ, a yel-bier na be a ɩ̃ zie a n’ʋ. 21 A na ɩ a ŋa a, yel ŋa n’ʋ ɩ̃ nyɛ̃: mãa na mɩ́ bɔbr a vla maalʋ a, faa tɛwr a ɩ̃ mɩ́ tʋ̃ɔ maalɩ. 22 A ɩ̃ pʋ̃ɔmɩ́ nɩr nɔnɛ nɩ a Naaŋmɩn-Wulu yaga za. 23 Ɛ cɛ ɩ̃ nyɛ̃ nɩ wulu kãw a ɩ̃ pʋɔ ʋ mʋɔr ɩ a Wulu ʋl a ɩ̃ yã na saw de a. Ʋ ɩ na k’ɩ̃ ɩ a yel-bier wulu na be a ɩ̃ pʋɔ a gbãgbaa. 24 ’Woi, zu-bio sob i! Ãa n’ʋ na faa mɛ̃ bɛr a ƴãgan ŋa ƴãw, na wɩɛr ɩ mɛ̃ a kũu pʋɔ a? 25 Naaŋmɩn so puoru, a Yeezu Kɩrɩta tɩ Sore ƴãw! A na ɩ a ŋa a, ɩ̃ ɩ n a Naaŋmɩn-Wulu gbãgbaa a ɩ̃ yã pʋɔ, ɛ cɛ a ɩ̃ bãbaalʋ pʋɔ, ɩ̃ ɩ a yel-bier wulu gbãgbaa.
81 A na ɩ a ŋa a, a ƴɛrɛ ŋa a, a bɛlɩ dem na lãw nɩ a Yeezu Kɩrɩta a, sãwna dɔwrʋ kãw za bɛ cãa be a bɛ ƴãw ɛ. 2 Bʋ̃ʋ n’ʋ vɛ̃, a Vʋʋrʋ Sõw Wulu na tɩrɛ a nyɔ-vʋʋrʋ a Yeezu Kɩrɩta ƴãw a, ʋ ír fʋ na bɛr a yel-bier nɩ a kũu wulu pʋɔ, fʋ so fʋ tʋɔra. 3 A ʋlɩ bom nɛ, a Mõyiir-Wulu na tɩ bɛ tʋɔr ɩrɛ a, a nɩsaal bãbaalʋ na tɩ ɩ ʋ bɛ tɛr fãw a ƴãw a, Naaŋmɩn ʋl ɩ ʋ na: a yel-bier ír-bɛrʋ ƴãw a, ʋ dɔwr ɩ a ʋ Bie a nɩsaal yel-bier ƴãw, ʋ na tõ a ʋl mɩŋa Bie ʋ wa ɩ nɩsaal, ŋmɛ̃ taa nɩ a nɩsaal na ɩ yel-bier sob a. 4 A Naaŋmɩn ɩ n a a ŋa, k’aa mɩnʋ a Wulu na bɔbr kɛ tɩ tɛr a, tʋ̃ɔ paalɩ tɩ, tɩɩm na bɛ tuur a tɩ nɩsaalʋ ɛ tuur a Vʋʋrʋ Sõw a. 5 Bʋ̃ʋ n’ʋ vɛ̃, a bɛlɩ dem na tuur a nɩsaalʋ a, a nɩsaalʋ yel-bɔbrɩ tɩɛrʋ n’a mɩ́ be a bɛ zie. 6 A nɩsaalʋ yel-bɔbrɩ pùor-tub a, kũu n’a; ɛ cɛ a Vʋʋrʋ Sõw yel-bɔbrɩ pùor-tub a, nyɔ-vʋʋrʋ nɩ ƴã-ɓaarʋ n’a. 7 Bʋ̃ʋ n’ʋ vɛ̃, bɛlɩ dem na tuur a nɩsaalʋ yel-bɔbrɩ pùor a, bɛ ɩ n Naaŋmɩn dɔ̃ dem, bɛ bɛ sawr dier a Naaŋmɩn-Wulu ɛ, bɛ mɩ̀ kʋ̃ tʋ̃ɔ mɩ̀ ɛ. 8 Bɛlɩ dem na bɛr a nɩsaalʋ tʋ̃ɔ bɛ a, bɛ kʋ̃ tʋ̃ɔ pɛlɩ a Naaŋmɩn pʋɔ ɩ. 9 Nyɩɩm ƴãw a, nyɩ bɛ bɛr a nɩsaalʋ so nyɩ ɛ; a Vʋʋrʋ Sõw n’ʋ so nyɩ, ʋlɛ wa n’ʋ sɩrɩ kpɩɛr a nyɩ pʋɔ a. Nɩr bɛ wa tɛr a Kɩrɩta Vʋʋrʋ a, ʋ bɛ ɩ a ʋ nɩ-sora ɩ. 10 A Kɩrɩta wa be a nyɩ zie a, yel-mɩŋa n’a, a nyɩ ƴãgan be n kũu ƴãw a yel-bier zũú, ɛ cɛ a Vʋʋrʋ ɩ n a nyɩ nyɔ-vʋʋrʋ, a Naaŋmɩn na ɩ nyɩ lɩɛbɩ nɩ-mɩn a ƴãw. 11 A sob nɛ na ɩ a Yeezu ʋ lɛb yi a kũuni pʋɔ a, a ʋ Vʋʋrʋ wa kpɩɛr a nyɩ pʋɔ a, a sob nɛ na ɩ a Kɩrɩta ʋ lɛb yi a kũuni pʋɔ a, mɩ̀ na kʋ̀ n nyɔ-vʋʋrʋ a nyɩ ƴãgamɛ na ɩ bʋ̃-kpiiri a, a ʋ Vʋʋrʋ na kpɩɛr a nyɩ pʋɔ a ƴãw. 12 A na ɩ a ŋa a, yɛbr ɩ, tɩ dɩ n san, ɛ cɛ a bɛ ɩ a tɩ nɩsaalʋ zie n’a ɩ, ɛ̀ tɩ na ɩrɛ mɛ̃ a lɛ ʋ na bɔbr a ɩ. 13 Bʋ̃ʋ n’ʋ vɛ̃, a nyɩ nyɔ-vʋʋrʋ wa tu a nɩsaalʋ a, nyɩ na kpi na. Ɛ cɛ a Vʋʋrʋ Sõw ƴãw, nyɩmɛ wa kʋ́ a nɩsaalʋ ɩ-ɩrɩ a, nyɩ na vʋʋrɛ na. 14 Bɛlɩ dem za na ɩrɛ mɛ̃ a lɛ a Naaŋmɩn Vʋʋrʋ na wule bɛ a, bɛlɛ nɛ bɛ ɩ a Naaŋmɩn bibiir. 15 A Vʋʋrʋ nyɩ na páw a, ʋ bɛ ƴãwnɛ nyɩ gbãgbaar ɩb tɩɛrʋ nyɩ na lɛb maal zɔrɛ dɛ̃bɩ̃ɛ ɩ; Vʋʋrʋ Sõw na mɩ́ ɩ nyɩ lɩɛbɩ Naaŋmɩn bibiir a n’ʋ. Ʋlɛ n’ʋ tɩ mɩ́ lãw nɩ cɩɩrɛ bʋɔlɛ a Naaŋmɩn kɛ: «Aba, ɩ̃ Sãà a!» 16 A Vʋʋrʋ Sõw ŋa tɔr za lãw nɩ nɩ a tɩ tɩɛrʋ dɩrɛ a dãsɩɛ kɛ́ tɩ ɩ n Naaŋmɩn bibiir. 17 Tɩ na ɩ a ʋ bibiir a, tɩ mɩ̀ pʋɔ nɩ a maalʋ pʋɔ a Naaŋmɩn na yel k’ʋʋ na kʋ̀ n a ʋ nɩ-bʋʋrɛ a, tɩ pʋɔ na lãw nɩ a Kɩrɩta; bʋ̃ʋ n’ʋ vɛ̃, tɩmɛ wa ɩ mɛ̃ tɩ lãw nɩ nɩ a Kɩrɩta wone a tuo a, tɩ mɩ̀ nãà lãw nɩ ʋ na a ʋ yúor-vɩɛlʋ-danʋ pʋɔ. 18 Ɩ̃ bãwnɩ a na k’aa tuo tɩ na wone a ƴɛrɛ ŋa a, a bɛ bibli a yúor-vɩɛlʋ-danʋ a Naaŋmɩn nãà wa wul tɩ ʋ sãá a ɩ. 19 A Naaŋmɩn bʋ̃-iri za mĩine na gùre nɩ a daar ʋl a Naaŋmɩn na na wul a ʋ bibiir yúor-vɩɛlʋ-danʋ ʋ sãá a. 20 A Naaŋmɩn bʋ̃-iri lɩɛb ɩ bʋ̃-zawlɛ, ɛ a bɛ ɩ alɛ n’a bɔ ɩ, ɛ ɩ a Naaŋmɩn na n’ʋ bɔbr ɩ a lɩɛbɩ a bʋ̃-zawlɛ a. Ɛ cɛ a mɩ̀ cãa na tɩɛrɛ 21 kɛ bɛ na ír a na bɛr bibir kãw a pʋ̃ɔfʋ a na fɛr k’aa pʋ̃ɔ a pʋɔ, a tʋ̃ɔ pʋɔ a Naaŋmɩn bibiir tʋɔra-sob pʋɔ nɩ a bɛ yúor-vɩɛlʋ-danʋ pʋɔ. 22 Tɩ bãwnɩ a na, wa tɩ tɔ a ƴɛrɛ ŋa a, a Naaŋmɩn bʋ̃-iri za cãa na kone ɛ wone ’wɔbrʋ mɛ̃ pɔw na dɔwr a. 23 Ɛ cɛ al tɛwr bɛ n’a ɩ: a tɩɩm tɛɛ za na páw a Naaŋmɩn maal-dãw na ɩ a Vʋʋrʋ Sõw a, tɩ mɩ̀ waalɛ na kone gùre nɩ k’aa Naaŋmɩn wa de tɩ, tɩ lɩɛbɩ a ʋ bibiir, ʋʋ faa tɩ tɩ ɓɩɩlɩ. 24 Tɩ nyɛ̃ nɩ a faafʋ, ɛ cɛ ʋ cãa na ɩ bom tɩ na tɩɛrɛ a. Fʋ̃ʋ wa nyɛ̃ a ʋlɩ bom fʋ na tɩɛrɛ a, ʋ bɛ cãa ɩ tɩɛrʋ fʋ tɩɛrɛ ɩ: a bom fʋ na nyɛ̃ a, fʋ na ɩ n ŋmɩn cãa tɩɛrɛ ʋ? 25 Ɛ cɛ tɩmɛ wa ƴãw a tɩ tɩɛrʋ bom tɩ na bɛ nyɛrɛ a ƴãw a, tɩ dɩ n kanyir gùre nɩ ʋ. 26 Lɛ mɩ̀ n’a, a Vʋʋrʋ Sõw mɩ́ wa na wa sõw a tɩ bãbaalʋ. Bʋ̃ʋ n’ʋ vɛ̃, tɩ bɛ bãw a puoru vla k’a sɛw ɛ; a Vʋʋrʋ Sõw mɩŋa n’ʋ mɩ́ puore kʋ̀rɛ tɩ nɩ zɛlʋ puoru na bɛ tɛr manʋ a. 27 Ɛ a Naaŋmɩn na mɩ́ nyɛ̃ a lɛ a nɩsaal pʋɔ na ŋmɛ̃ a, ʋ bãw nɩ a Vʋʋrʋ Sõw pʋ-tɩɛrʋ: bʋ̃ʋ n’ʋ vɛ̃, a Vʋʋrʋ Sõw mɩ́ puore na kʋ̀rɛ a Kɩrɩta-nɩbɛ nɩ zɛlʋ na tu a lɛ a ʋl Naaŋmɩn na bɔbr a. 28 Tɩ bãw na k’aa bɛlɩ dem na nɔnɛ a Naaŋmɩn a, a yele za mɩ́ cen na tuori taa a bɛ maalʋ ƴãw, bɛl ʋ na bʋɔlɩ a tu a lɛ ʋ na cɔbrɩ a yele bin a. 29 Bʋ̃ʋ n’ʋ vɛ̃, a bɛlɩ dem a Naaŋmɩn na tɩ dãw de niwn bãw a, ʋ mɩ̀ bãwnɩ bɛ na ƴãw bɛ ɩ a ʋ Bie ŋmɛ̃-ta-taabɛ, k’aa Bie ŋa tʋ̃ɔ ɩ yɛbr na yãwmɛ yaga a kpɛ̃ɛ. 30 A bɛlɩ dem a Naaŋmɩn na tɩ dãw bãwnɩ a, ʋ bʋɔlɩ bɛ na mɩ̀; a bɛlɩ dem ʋ na bʋɔlɩ a, ʋ mɩ̀ ɩ na bɛ lɩɛbɩ nɩ-mɩn; a bɛlɩ dem ʋ na ɩ bɛ lɩɛbɩ nɩ-mɩn a, ʋ mɩ̀ ɩ na kɛ̀ bɛ pʋɔ a ʋ yúor-vɩɛlʋ-danʋ pʋɔ. 31 A na ɩ a ŋa a, tɩ na lɛ yel a kɛ bʋnʋ a yel ŋa ƴãw? A Naaŋmɩn wa kpɛ tɩ a, ãa n’ʋ na dɩ n tɩ ƴɛrʋ? 32 Ʋ bɛ jɩɩrɩ a ʋl mɩŋa Bie bɛr ɛ, ʋ nɩ̃ɛ na de ʋ tɩr bɛ kʋ́ a tɩ za ƴãw: ŋmɩŋmɩn za n’a ʋ kʋ̃ kʋ̀ tɩ bom za zawla lãw nɩ a ʋ Bie? 33 A bɛlɩ dem a Naaŋmɩn na kaa ir a, ãa n’ʋ na yel kɛ bɛ tɛr ɩ sãwna? Nɩr bɛ ka be ɩ. A Naaŋmɩn na n’ʋ wule kɛ́ bɛ bɛ tɛr sãwna a ƴãw. 34 Ãa n’ʋ na maal ɩ bɛ ƴɛrʋ? Nɩr bɛ ka be ɩ. Bʋ̃ʋ n’ʋ vɛ̃, a Yeezu Kɩrɩta kpi na, mɔ̃ mɩ̀ ʋ lɛb a yi a kũu pʋɔ, ʋ be n a Naaŋmɩn dʋrʋ lowr zɛlɛ ʋ a tɩ ƴãw. 35 Ãa n’ʋ na tʋ̃ɔ bʋ́r tɩɩm nɩ a Kɩrɩta a ʋ nɔ̃wfʋ pʋɔ? Kpɩɛrʋ bɩɩ? Pʋl-vʋ̃ɔ bɩɩ? Nɩsaalbɛ dɔwrʋ bɩɩ? Kɔ̃ bɩɩ? Bom-bɛ-tɛrʋ bɩɩ? Bʋ̃-faa bɩɩ? A kũu bɩɩ? 36 Mɛ̃ a lɛ a Sɛb-sõw na yel a: «A fʋ̃ʋ ƴãw n’a, a kũu jɩɛrɛ tɩ kʋra lɛ, bɛ ɩrɛ tɩ mɛ̃ píir bɛ na cere nɩ kʋ́b zie a.» 37 Ɛ cɛ a a ŋa za pʋɔ a, tɩ zɛb a tʋ̃ɔ pẽlẽpẽlẽ, ɛ a ɩ a sob nɛ na nɔ̃w tɩ a zũú n’a. 38 Bʋnʋ bɛ ka be ɩ, ɩ̃ bãwnɩ a na k’aa kũu nɩ a nyɔ-vʋʋrʋ, a malkɩ mɩnɛ nɩ a saa zu kpɛnʋ bʋʋrɛ za, a ƴɛrɛ ŋa nɩ a nɩdaar, a kpɛnʋ bʋʋrɛ za, 39 a saa zu fãw nɩ a pile fãw, bʋ̃-ira kãw za, bom za kʋ̃ tʋ̃ɔ bʋ́r tɩɩm nɩ a Naaŋmɩn a ʋ nɔ̃wfʋ pʋɔ ɩ, a nɔ̃wfʋ ŋa ʋ na wul ʋ sãá a tɩ Sore Yeezu Kɩrɩta zie a.
91 Ɩ̃ na lãw nɩ a Kɩrɩta a, yel-mɩŋa n’a ɩ̃ yere, ɩ̃ bɛ ŋmarɛ ziri ɛ; a Vʋʋrʋ Sõw caal ɩ a ɩ̃ pʋɔ ʋ dɩrɛ a ɩ̃ dãsɩɛ, 2 kɛ́ pʋ-sãwna tɛr mɛ̃ nɩ yaga, ɛ ’wɔbrʋ kãw ’wɔbr mɛ̃ bɛ tɛr bɛrʋ daar ɛ. 3 Yel-mɩŋa, a ɩ na mɛ̃ ɩ̃ nãá ɩ nɩr bɛ na ŋmɛ ƴãw a, ɛ́ mãa nɩ a Kɩrɩta bʋ́r taa ɩ̃ lɩɛrɩ a ɩ̃ yɛbr a, a bɛl na ɩ a ɩ̃ bʋʋrɛ a. 4 Bɛ ɩ n a Ɩsɩrayɛl bʋʋrɛ nɩbɛ: Naaŋmɩn ɩ na bɛ lɩɛbɩ a ʋ bibiir, ʋ kʋ̀ bɛ nɩ a ʋ yúor-vɩɛlʋ-danʋ nɩ a wõ-taar ʋ na maal ɩ bɛ a, a Wulu nɩ a puoru, a nɛɛ ʋ na ƴãw k’ʋʋ na maalɩ bɛ na a. 5 Bɛ ɩ n a sãakʋ̃-kore bʋʋrɛ, ɛ a bɛ bʋʋrɛ pʋɔ n’a a Kɩrɩta yi ɩ nɩsaal, ʋl na zuo bom za, ɩ Naaŋmɩn na tɛr danʋ kʋra lɛ a. Amɛn. 6 Ɛ cɛ, a bɛ wul k’aa lɛ a Naaŋmɩn na yel a bɛ cãa pʋɔ ɩ. Bʋ̃ʋ n’ʋ vɛ̃, a Ɩsɩrayɛl bʋʋrɛ za bɛ nɛ bɛ ɩ a Ɩsɩrayɛl nɩbɛ yel-mɩŋa ɩ. 7 Ɛ a Abraham bʋʋrɛ bɛ ɩ a ʋ bibiir bɛ za ɩ. Bʋ̃ʋ n’ʋ vɛ̃, Naaŋmɩn tɩ yel ɩ a Abraham a ŋa: «A Ɩzaakɩ bʋʋrɛ nɛ bɛ bɛ na bʋɔlɛ a fʋ bʋʋrɛ.» 8 A pɛr lɛ k’aa bibiir bɛ na dɔw a dɔwfʋ tu a nɩsaalʋ dɔwfʋ tɛwr a, bɛlɛ bɛ nɛ bɛ ɩ a Naaŋmɩn bibiir ɛ; a bibiir bɛ na dɔw, a dɔwfʋ tu a lɛ a Naaŋmɩn na yel a, bɛl tɛwr nɛ bɛ ɩ a Abraham bʋʋrɛ tɛɛ za. 9 Bʋ̃ʋ n’ʋ vɛ̃, a ƴɛr-bir ŋa tɩ ɩ n nʋɔr a Naaŋmɩn ƴãw: «A a ŋa tɔ-won ɩ̃ na lɛb a wa, ɛ a Saara na tɛr ɩ bie.» 10 A za cãa bɛ n’a ɩ; Erebeka mɩ̀ n’ɩ ŋa: a ʋ yɩbr ayi tɩ lãw nɩ sãà been, a tɩ sãakʋm Ɩzaakɩ. 11 Ɛ cɛ Naaŋmɩn mɩ́ kaa na ír a nɩbɛ tu n a lɛ ʋ na cɔbrɩ a yele bin a: a ʋ kaa-íru mɩ́ tu n a bʋɔlʋ ʋ na bʋɔlɛ bɛ a, ʋ bɛ mɩ́ tu a bɛ ɩ-ɩrɩ ɛ. A Naaŋmɩn na bɔbr k’ʋʋ wul k’aa lɛ ʋ na cɔbrɩ a yele bin a, a gã nɩ kʋra lɛ a, ʋ tɩ yel ɩ a Erebeka, a lɛn daar a ʋ yɩbr na bɛ tɩ dɔw sɛr, ɛ mɩ̀ bɛ tɩ maalɩ vla bɩɩ faa sɛr a: «A kpɛ̃ɛ na ɩ n a bile tõ-tone.» 13 A tu n a a ŋa a Sɛb-sõw na yel a: «Zakɔb ʋ ɩ̃ nɔ̃w zuo a Ezawu.» 14 Tɩ na yel a kɛ bo? A Naaŋmɩn taa ɩrɛ bɛ wa tuur yel-mɩnʋ ʋ? Lɛ bɛ n’a towtow ɛ! 15 Bʋ̃ʋ n’ʋ vɛ̃, ʋ tɩ yel ɩ a Mõyiir zie a ŋa: «Ɩ̃ na zɔ n sob nɛ nɩ-baalʋ ɩ̃ na bɔbr a, ɛ tɛr su-ɓaarʋ sob nɛ zie ɩ̃ na bɔbr a.» 16 A na ɩ a ŋa a, a bɛ yi nɩsaal na bɔbr a zie, nɩ fãw ʋ na ƴãw a zie ɩ, Naaŋmɩn na zɔrɛ nɩ-baalʋ a zie n’a a yi. 17 A Sɛb-sõw pʋɔ a, Naaŋmɩn yel ɩ a ŋa a Eziptɩ tẽw nãà Faarɔ̃ zie: «Ɩ̃ ɩ na fʋ ɩ a nãà, k’ɩ̃ɩ tʋ̃ɔ wul a ɩ̃ kpɛnʋ a fʋ zie, ɛ a ɩ̃ yúor yi a tẽw zu ziir za.» 18 A ŋa n’a a Naaŋmɩn mɩ́ zɔ sob nɛ ʋ na bɔbr a nɩ-baalʋ, ɛ ɩ zu-kpɛnʋ tɛr sob nɛ ʋ na bɔbr a. 19 Kãpaw fʋ na yel mɛ̃ na: «Bʋnʋ ƴãw n’a a Naaŋmɩn na cãa yere tɩ? Ãa n’ʋ na tʋ̃ɔ yel k’aa ʋ pʋ-tɩɛrʋ ta maalɩ?» 20 Ɛ cɛ ãa nɩ̃ɛ nɛ b, nɩsaal ɩ, na ƴɛrɛ lɩɛrɛ nɩ a Naaŋmɩn? Yawra bʋ̃-mɩɛra na tʋ̃ɔ na yel a ʋ mɩɛrɛ kɛ bʋnʋ ƴãw n’a ʋ mɛ ʋ a a ŋa bɩɩ? 21 A yaw-mɩɛrɛ bɛ tɛr sɔr na ɩrɛ lɛ za ʋ na bɔbr a nɩ a yawra bɩɩ? Ʋ kʋ̃ tʋ̃ɔ mɛ bom na tɛr yúor a, bɩɩ bom na ɩ sãsara lɛ, a nɩ a yaw-been ʋ na naw a bɩɩ? Yaw-mɩɛrɛ nɩ duwle (9.21). 22 Naaŋmɩn tɩ bɔbr a k’ʋʋ wul a ʋ suur, ɛ ɩ kɛ̀ bɛ bãw a ʋ kpɛnʋ. A bɛlɩ dem a na tɩ sɛw k’ʋʋ nyɛ̃ nɩ suur a, ɛ́ bɛ tɩ ta a dɔwrʋ kɛrkɛr lɛ a, ʋ nyɔw nɩ ʋ tʋɔra yaga a bɛ ƴãw. 23 Ɛ ʋ mɩ̀ tɩ bɔbr a wul a lɛ a ʋ yúor-vɩɛlʋ-danʋ na ɩ kpɛ̃ɛ sɛw a bɛl na cɛ a zie a, a bɛl a na tɩ sɛw k’ʋʋ zɔ bɛ nɩbaalʋ a, a bɛl ʋ na dãw de niwn cɔbrɩ kɛ́ bɛ wa pʋɔ a ʋ yúor-vɩɛlʋ-danʋ pʋɔ a. 24 Tɩ mɩ̀ pʋɔ na, tɩɩm ʋ na bʋɔlɩ, a bɛ ɩ a Zifʋ mɩnɛ tɛwr pʋɔ ɛ mɩ̀ ɩ a nɩ-bʋʋr-yoru pʋɔ a. 25 A a ŋa tɔr za n’a ʋ yere a Naaŋmɩn-ƴɛr-manɛ Oze sɛbɛ pʋɔ: «A nɩbɛ bɛl na bɛ tɩ ɩ ɩ̃ nɩbɛ a, ɩ̃ bʋɔlɛ bɛ nɩ ɩ̃ nɩbɛ, ɛ a nɩ-bʋʋrɛ ɩ̃ na bɛ tɩ nɔnɛ a, ɩ̃ na bʋɔlɛ bɛ nɩ ɩ̃ nɩ-nɔnɩ. 26 Ɛ a be tɔr za bɛ na tɩ yel bɛ: ‹Nyɩ bɛ ɩ ɩ̃ nɩbɛ a›, bɛ na bʋɔlɛ bɛ nɩ a be: ‹Naaŋmɩn na vʋʋrɛ a bibiir.› » 27 Naaŋmɩn-ƴɛr-manɛ Ɩzayi n’ɩ ŋan ka lowr mɩ̀ yere kpɛ̃w za a Ɩsɩrayɛl nɩbɛ ƴãw: «A Ɩsɩrayɛl bibiir mɩ̀ saa tɩ yãwmɛ man a kʋ̃ɔ-kpɛ̃ɛ nʋɔr biire a, a bɛ ŋmãa na cɛ a tɛwr a nãá nyɛ̃ a faafʋ; 28 Bʋ̃ʋ n’ʋ vɛ̃, a ʋlɩ bom nɛ a Sore na yel a, ʋ na maal ʋ nɩ ʋ za fɔ̃w lɛ a tẽw zu.» 29 A Ɩzayi n’ʋ mɩ̀ tɩ cãa dãw yel: «A tẽ-daa za Sore bɛ tɩ cɛ bʋʋrɛ blã bɛr tɩ a, tɩ nãá tɩ ɩ na mɛ̃ Sodɔm tẽw a, tɩ nãá ŋmɛ̃ na taa nɩ Gomɔɔr tẽw.» 30 Tɩ na yel a kɛ bo? A ŋa n’a tɩ na yel: nɩ-bʋʋr-yoru nɩbɛ, na bɛ tɩ bɔbr a mɩnʋ a, páw nɩ a mɩnʋ a Naaŋmɩn zie, a mɩnʋ ʋl na yi a saw-deb zie a n’ʋ ɩ̃ yere; 31 ɛ cɛ a Ɩsɩrayɛl nɩbɛ na tɩ bɔbr kɛ bɛ ɩ nɩ-mɩn a Naaŋmɩn zie, Wulu sawfʋ zũú a, bɛ bɛ páw a ʋlɩ bom nɛ a Wulu na bɔbr a ɩ. 32 Bʋ̃ʋ n’ʋ so? Bɛ bɛ tɩ bɔbr kɛ bɛ pɛlɩ a Naaŋmɩn pʋɔ a saw-deb zũú ɛ, ɛ tɩɛrɛ kɛ bɛ pɛlɩ a ʋ pʋɔ a bɛ ɩ-ɩrɩ zũú. Bɛ ŋmɛ n gbɛr a gbɛ-ŋmɛ-kʋsɩɛr ƴãw, 33 a kʋsɩɛr ʋl a Sɛb-sõw na yere a ŋa a: «Mãa n’ɩ ŋan ƴãwnɛ gbɛ-ŋmɛ-kʋsɩɛr a Sɩyɔ̃ tẽw pʋɔ, pìir kʋsɩɛr na ɩrɛ bɛ lore a. Ɛ cɛ sob nɛ na saw de ʋ a, ʋ kʋ̃ nyɛ̃ vĩ ɛ.»
101 Yɛbr ɩ, a ʋlɩ bom nɛ ɩ̃ na bɔbr ɩ ɩ̃ pʋɔ za, ɛ zɛlɛ a Naaŋmɩn zie a Zifʋ mɩnɛ ƴãw a, ʋlɛ n’ɩ kɛ́ bɛ nyɛ̃ a faafʋ. 2 Sɩza n’a, ɩ̃ na tʋ̃ɔ na dɩ a bɛ dãsɩɛ bɛ na tʋlɛ a Naaŋmɩn yele puor-tub ƴãw a, ɛ cɛ a tʋlʋ ŋa bɛ na tʋlɛ a, bɛ tu Naaŋmɩn bãwfʋ sɩza ɩ. 3 Bʋ̃ʋ n’ʋ vɛ̃, bɛ bɛ tɩ bãw a lɛ a Naaŋmɩn na mɩ́ ɩ a nɩsaalbɛ bɛ lɩɛbɩ nɩ-mɩn a ʋ niŋé a ɩ, ɛ́ tɩ bɔbr kɛ bɛ tɛr bɛ tʋɔra tub a al ƴãw. A ŋa n’a bɛ bɛ tɩ saw de a lɛ a Naaŋmɩn na mɩ́ ɩ a nɩsaalbɛ ɩ nɩ-mɩn a ʋ niŋé a ɩ. 4 Bʋ̃ʋ n’ʋ vɛ̃, a Kɩrɩta maal ɩ a ʋlɩ bom nɛ a Mõyiir-Wulu na tɩ bɔbr k’ʋʋ ɩ a, kɛ́ sob nɛ za na saw de a tʋ̃ɔ lɩɛbɩ nɩ-mɩŋa a Naaŋmɩn niŋé. 5 A ŋa n’a a Mõyiir sɛb caar ɩ a mɩnʋ na na tʋ̃ɔ yi a Wulu pʋɔ a: «Sob nɛ na saw a Wulu nɛ-ƴãwnɩ a, a na ɩ na k’ʋ vʋʋrɛ.» 6 Ɛ cɛ a ŋa n’a a ƴɛrʋ na ƴɛr caar ɩ a mɩnʋ na na tʋ̃ɔ yi a saw-deb pʋɔ a ƴɛr: «Taa tɩɛrɛ fʋ pʋɔ yere: Ãa n’ʋ na do a salom zu?» (A pɛr lɛ k’ʋʋ tɩ ɩ a Kɩrɩta ʋ siw). 7 Bɩɩ: «Ãa n’ʋ na siw a kpɩmɛ tẽw?» (A pɛr lɛ k’ʋʋ tɩ ɩ a Kɩrɩta ʋ yi a kũuni pʋɔ do wa). 8 A na ɩ a ŋa a, a ƴɛrʋ ƴɛr a kɛ bo? Kɛ: «A ƴɛrʋ pɩɛl ɩ fʋ na, ʋ be n a fʋ nʋɔrɩ́ nɩ a fʋ socir pʋɔ.» A ƴɛrʋ ŋa ɩ n a ƴɛrʋ na caarɩ a saw-deb a, a ƴɛrʋ ŋa n’ʋ tɩ hiere. 9 A fʋ nʋɔr wa haa yel k’aa Yeezu n’ɩ a Sore a, ɛ́ fʋ̃ʋ wa saw de nɩ fʋ pʋɔ za k’aa Naaŋmɩn ɩ na k’ʋ lɛb yi a kũuni pʋɔ a, fʋ na nyɛ̃ nɩ a faafʋ. 10 A saw de nɩ a pʋɔ za, alɛ n’a waar ɩ a mɩnʋ, ɛ a nʋɔr na haa yel a pʋɔ n’a a faafʋ yire. 11 Bʋ̃ʋ n’ʋ vɛ̃, a Sɛb-sõw yere nɩ a ŋa: «Sob nɛ za na saw de ʋ a, ʋ kʋ̃ nyɛ̃ vĩ ɛ.» 12 A na ɩ a ŋa a, owru bɛ ka a Naaŋmɩn zie a Zifʋ mɩnɛ nɩ a bɛl na bɛ ɩ Zifʋ mɩnɛ a ƴãw ɛ: bɛ za lãw nɩ a Sore been, na mɩ́ kʋ̀ a ʋ na-bome a bɛlɩ dem za na bʋɔlɛ ʋ a. 13 Bʋ̃ʋ n’ʋ vɛ̃, a Sɛb-sõw yel a kɛ: «Sob nɛ za na bʋɔlɛ a Sore yúor a na nyɛ̃ nɩ a faafʋ.» 14 Ɛ cɛ ŋmɩŋmɩn n’a bɛ na bʋɔlɩ ʋ, ɛ́ bɛ saw de ʋ? Ɛ ŋmɩŋmɩn n’a bɛ na saw de ʋ, ɛ́ bɛ wõ a ʋ yele? Ɛ ŋmɩŋmɩn n’a bɛ na ɩ wõ a ʋ yele, nɩr bɛ wa be be hiere a ʋ yele a? 15 Ɛ ŋmɩŋmɩn n’a bɛ na ɩ hiere a ʋ yele, bɛlɛ bɛ wa tõ nɩbɛ a al ƴãw a? Mɛ̃ a lɛ a Sɛb-sõw na yel a: «Nyɛ̃ a yel-vɩɛlɩ yerbɛ waa na vɩɛl a!» 16 Ɛ cɛ a nɩbɛ za bɛ nɛ bɛ saw de a Yel-nʋ̃ɔ̀ ɩ. Bʋ̃ʋ n’ʋ vɛ̃, Ɩzayi yere nɩ a ŋa: «Sore e, ãa n’ʋ saw de a yel tɩ na hieri a?» 17 A na ɩ a ŋa a, a saw-deb mɩ́ yi n a yel fʋ na wõ a zie, ɛ a yel fʋ na wõ a, ɩ a Kɩrɩta ƴɛrʋ. 18 Lɛ n’a ɩ̃ pãa sowre: a Zifʋ mɩnɛ taa ɩrɛ bɛ wa wõ a yel ŋa ʋ? Bʋnʋ ɩ, bɛ wõ ʋ na! A ŋa n’a a Sɛb-sõw yere: «A bɛ kɔkɔr yi na làarɩ̀ a tẽw za, ɛ a bɛ ƴɛrʋ tɔ a tẽw baarʋ ziir za.» 19 Lɛ n’a ɩ̃ pãa sowre a: a Ɩsɩrayɛl nɩbɛ bɛ bãw a pɛr bɩɩ? Bʋnʋ ɩ, Mõyiir de nɩ niwn yel a ŋa: «A Naaŋmɩn yere na: Ɩ̃ na ɩ na nyɩ nyuur ɩ nɩbɛ na bɛ ɩ nɩ-bʋʋrɛ mɩ̀ a, ɩ̃ na ɩ na a nyɩ suur ír nɩ-bʋʋrɛ na bɛ tɛr yã a ƴãw. » 20 Ɩzayi ʋl sʋɔm a saw yel: «A Naaŋmɩn yere na: A bɛlɩ dem na bɛ tɩ bɔbr mɛ̃ a, bɛ nyɛ̃ m a, a bɛlɩ dem na bɛ tɩ sowre mɛ̃ a, ɩ̃ ɩ na bɛ nyɛ̃ m. » 21 Ɛ cɛ a ŋa n’a ʋ yel caar ɩ a Ɩsɩrayɛl nɩbɛ: «Ɩ̃ tur ɩ nuru bibi-ɓil za cɔw nɩbɛ na bɛ sawr nʋɔr ɛ ɩ nɩ-gaarɩ a.»
111 A na ɩ a ŋa a, sowru n’a ɩ̃ sowre: a Naaŋmɩn ya jɛ n a ʋ nɩ-bʋʋrɛ Ɩsɩrayɛl bɛr a baarɩ bɩɩ? Lɛ bɛ n’a towtow ɛ! Bʋ̃ʋ n’ʋ vɛ̃, a mãa tɔr za ɩ n Ɩsɩrayɛl nɩr, Abraham bʋʋrɛ, Bɛ̃zamɛ dɔwlʋ nɩr. 2 Naaŋmɩn bɛ jɛ a ʋ nɩbɛ ʋ na tɩ dãw kaa ir a bɛr ɛ. Mɛ̃ nyɩ taa bãw a lɛ a Sɛb-sõw na yel a ʋ zie kãw, a lɛ a Naaŋmɩn-ƴɛr-manɛ Eli na tɩ manɛ a Ɩsɩrayɛl nɩbɛ sãwna a Naaŋmɩn zie a? 3 «Sore e, bɛ kʋ́ n a fʋ ƴɛr-manbɛ, ɛ da a fʋ baw-maal-kube lɔb: mãa yõ n’ʋ cɛ, ɛ́ bɛ bɔbr a ɩ̃ kʋ́b.» 4 Ɛ cɛ bʋ̃ʋ n’ʋ a Naaŋmɩn sɔw ʋ? «Ɩ̃ cãa na bɛr nɩbɛ tur ayopõi a ɩ̃ ƴãw, a bɛl na bɛ gbĩ dume a tɩɩb na dɩ Báàl a niŋé a.» Tɩɩb na dɩ Báàl a (11.4). 5 Lɛ mɩ̀ n’a, a ƴɛrɛ ŋa, nɩbɛ ŋmãa blã lɛ, a Naaŋmɩn na kaa ir a ʋ maalʋ zũú a, mɩ̀ cãa be be. 6 Ʋlɛ wa kaa ir bɛ a ʋ maalʋ zũú a, a bɛ ɩ-ɩrɩ zũú bɛ n’a ɩ, alɛ bɛ ɩ lɛ a, a maalʋ bɛ cãa ɩ maalʋ ɛ. 7 Ŋmɩŋmɩn za n’a? A Ɩsɩrayɛl nɩbɛ bɛ páw a ʋlɩ bom nɛ bɛ na tɩ bɔbr a ɩ; ɛ cɛ a bɛlɩ dem a Naaŋmɩn na kaa ir a, bɛl páw ʋ na; a ŋmaarɛ bɛl a, bɛ kpawl ɩ bɛ za, 8 mɛ̃ a Sɛb-sõw na yere a: «Wa tɩ tɔ a dɩ̃a bibir a, Naaŋmɩn ɩ na a bɛ tɩɛrʋ ʋ gbini, ʋ ƴãw bɛ nɩ mimie kɛ́ bɛ ta nyɛrɛ nɩ ɛ, ƴãw bɛ tobe kɛ bɛ ta wone nɩ ɛ.» 9 A nãà Daviir mɩ̀ yere nɩ a ŋa: «A bɛ cuw dɩb, a ɩ bɛrɩ nɩ mɩ̃ɛ a bɛ zie, a ɩ fa-loba zie nɩ dɔwrʋ na sɛwnɩ bɛ a pawfʋ zie. 10 A bɛ mimie, a zɔ̃wnɛ ta tɩ cãa nyɛrɛ ɩ; ɩ bɛ tuo tuór kʋra lɛ gʋr ɩ zɩgɛ.» 11 A na ɩ a ŋa a, sowru n’a ɩ̃ sowre: lo ɛ ta lɛ ìr ƴãw n’a a Zifʋ mɩnɛ ŋmɛ a gbɛr bɩɩ? Lɛ bɛ n’a towtow ɛ! Ɛ cɛ a bɛ sãwna ɩ na a nɩ-bʋʋr-yoru nyɛ̃ a faafʋ, kɛ́ nyuur tʋ̃ɔ ɩrɛ a Zifʋ mɩnɛ. 12 A bɛ sãwna wa ƴãw a tẽ-daa naalʋ a, a bɛ nʋɔr na siwri a wa ƴãw a nɩ-bʋʋr-yoru naalʋ a, ŋmɩŋmɩn n’a a pãa nãa ŋmɛ̃ a lɛn daar bɛ za nãa wa nyɛ̃ a faafʋ a! 13 Ƴɛrɛ ŋa a, a nyɩɩm nɩ-bʋʋr-yoru zie n’a ɩ̃ ƴɛrɛ: mãa n’ɩ a nɩ-bʋʋr-yoru nɩ-tona, ɛ a lɛ pʋɔ a, ɩ̃ íre nɩ a ɩ̃ tõ-nʋɔr ŋa yúor, 14 tɩɛrɛ nɩ k’ɩ̃ɩ ɩ a ɩ̃ bʋʋrɛ nyuur ìr, ɩ̃ tʋ̃ɔ faa bɛ mɩnɛ. 15 A bɛ vɩrɩ-bɛrʋ wa ɩ a Naaŋmɩn nɩ a tẽ-daa lɛ kpɛ taa a, a pãa na ŋmɛ̃ n ŋmɩn a lɛn daar ʋ nãa wa lɛb de bɛ a? A na sɩrɩ na ɩ kũu pʋɔ bɛ na yi kpɛ nyɔ-vʋʋrʋ pʋɔ a! 16 Bɛlɛ wa de a dipɛ̃-dãw kʋ̀ a Naaŋmɩn a, a dipɛ̃ za n’a bɛ mɩ̀ de kʋ̀ ʋ. Bɛlɛ wa de tɩɛ kãw nyɩgɛ kʋ̀ a Naaŋmɩn a, bɛ mɩ̀ de nɩ a wuli kʋ̀ ʋ. 17 A Ɩsɩrayɛl nɩbɛ wa ɩ mɛ̃ olivʋ-tɩ-kʋɔra a Naaŋmɩn na cɛ a wuli a mɩnɛ bɛr a, ɛ a fʋ̃ʋ, na bɛ ɩ Zifʋ ɛ ɩ mɛ̃ mʋ̃ɔ pʋɔ olivʋ-tɩɛ a, a Naaŋmɩn wa de fʋ ɓɛrɩ nɩ a olivʋ-tɩ-kʋɔra, fʋ pʋɔ a ʋ wuli na cɛ a pʋɔ páwr a tɩ-nyɩgɛ kʋ̃ɔ a, 18 ta zɛwr fʋ tʋɔra mɛ̃ fʋ zuo nɩ a wuli bɛ na cɛ bɛr a ɩ; fʋ̃ʋ wa zɛwr fʋ tʋɔra mɛ̃ fʋ zuo a na a, fʋ̃ʋ bãwnɩ a fʋ̃ʋ na bɛ n’ʋ so a tɩ-nyɩgɛ be a, a tɩ-nyɩgɛ n’a so fʋ be. 19 Mɛ̃ fʋ taa na yel mɛ̃: «Bɛ cɛ n a wuli a ŋa ŋma, kɛ́ bɛ tʋ̃ɔ de mɛ̃ ɓɛr ɩ a tɩɛ lɩɛr ɩ a.» 20 Sɩza n’a, bɛ cɛ a na ŋma bɛr, a na bɛ saw de a ƴãw, ɛ fʋ̃ʋ a, a fʋ saw-deb zũú n’a fʋ lɩɛr a. Ɛ cɛ taa wa ɩrɛ pɔl-ɩb ɛ, nɩ̃ɛ vɛ̃ kɛ zɔrɛ a Naaŋmɩn. 21 Bʋ̃ʋ n’ʋ vɛ̃, a Naaŋmɩn bɛ wa jɩɩrɩ a tɩɛ wuli tɛɛ za bɛr a, a pɛr lɛ k’aa Zifʋ mɩnɛ a, ʋ mɩ̀ kʋ̃ jɩɩrɩ fʋ bɛr ɛ. 22 A na ɩ a ŋa a, jɩr nyɛ̃ a lɛ a Naaŋmɩn vɩɛlʋ na ɩ a, nɩ a Naaŋmɩn na bɛ tɛr dɩ̃ɛnʋ a: ʋ bɛ tɛr dɩ̃ɛnʋ a bɛlɩ dem na lo a zie ɩ, ɛ́ tɛr a ʋ vɩɛlʋ ɩb a fʋ zie. Ɛ cɛ a fɛr a fʋ cãa ɩrɛ ƴãwn a vɩɛlʋ ŋa ƴãw, alɛ bɛ ɩ lɛ bɛ mɩ́ na cɛ b a ŋmãa bɛr mɛ̃ wule a. 23 A Zifʋ mɩnɛ ƴãw a, bɛlɛ wa lɛ saw de a, Naaŋmɩn na ɩ na bɛ lɛ ɓɛrɩ a tɩɛ, bʋ̃ʋ n’ʋ vɛ̃, ʋ tɛr ɩ fãw na ɩ bɛ lɛ ɓɛrɩ a tɩɛ. 24 Fʋ̃ʋ a, fʋ ɩ n mʋ̃ɔ pʋɔ olivʋ-tɩɛ wule tɔr za, a Naaŋmɩn na ŋmãa wa ɓɛrɩ nɩ olivʋ-tɩ-kʋɔra a, ɛ cɛ a ŋa bɛ n’a a ɩrɛ ɩ. A Zifʋ mɩnɛ bɛl a, bɛ ɩ n a olivʋ-tɩ-kʋɔra ŋa wuli tɛɛ za: a na ɩ a ŋa a, Naaŋmɩn na pãa nɩ̃ɛ na tʋ̃ɔ ɩ a lɛ ɓɛrɩ a al mɩŋa tɩɛ ƴãw mɔlɛ lɛ. 25 Yɛbr ɩ, ɩ̃ bɔbr a k’ɩ̃ɩ ɩ nyɩ bãw a Naaŋmɩn yel-sɔwla ŋa, kɛ̀ nyɩ taa wa de nyɩ tʋɔra bʋɔlɛ yã-bãwnbɛ ɩ: a Ɩsɩrayɛl nɩbɛ ŋmãa na kpawl a, ɛ gu a nɩ-bʋʋr-yoru za tɩ nyɛ̃ a faafʋ. 26 Ɛ a a ŋa n’a a Ɩsɩrayɛl nɩbɛ za na nyɛ̃ a faafʋ, mɛ̃ a ŋa a Sɛb-sõw na yere a: «Sɩyɔ̃ tẽw n’a a Faarɛ na yi wa, ʋ na ɩ na a Naaŋmɩn bɛ-ƴãwfʋ ɩ-ɩrɩ a baarɩ a Zakɔb bʋʋrɛ zie. 27 Ɛ a Wõ-taa n’ɩ ŋa ɩ̃ na na maal ɩ bɛ a, a lɛn daar ɩ̃ nãá wa ìr a bɛ yel-bebe bɛr a.» 28 A bɛ Yel-nʋ̃ɔ̀ bɛ-saw-deb ƴãw wa n’a a, bɛ ɩ n Naaŋmɩn dɔ̃ dem a nyɩɩm vla ƴãw; ɛ cɛ alɛ wa ɩ a kaa-ìru a Naaŋmɩn na kaa ìr bɛ a ƴãw n’a a, ʋ cãa na nɔnɛ bɛ, a bɛ sãakʋm mɩnɛ zũú. 29 Bʋ̃ʋ n’ʋ vɛ̃, a Naaŋmɩn maalʋ nɩ a ʋ bʋɔlʋ bɛ tɛr lɩɛ-bɛrʋ ɛ. 30 A koro za a, nyɩ tɩ zawr ɩ a Naaŋmɩn nʋɔr, ɛ cɛ ƴɛrɛ ŋa a, ʋ zɔ n a nyɩ nɩ-baalʋ, a Ɩsɩrayɛl nɩbɛ na zawr a nʋɔr a ƴãw; 31 lɛ n’a a bɛl mɩ̀ a ƴɛrɛ ŋa, bɛ zawrɩ a Naaŋmɩn nʋɔr, k’ʋʋ tʋ̃ɔ zɔ a nyɩ nɩ-baalʋ, kɛ́ a bɛl mɩ̀ tʋ̃ɔ páw a nɩ-baalʋ zɔba ŋa tɔr za a ƴɛrɛ ŋa. 32 Bʋ̃ʋ n’ʋ vɛ̃, Naaŋmɩn pàw nɩ a nɩsaalbɛ za a nʋɔr-zawrʋ gaso pʋɔ, k’ʋʋ tʋ̃ɔ wul bɛ za a ʋ su-ɓaarʋ. 33 Nyɛ̃ a Naaŋmɩn naalʋ na bɛ vʋʋr a! Nyɛ̃ a ʋ yã-bãwfʋ nɩ a ʋ yele bãwfʋ na zulme a! Nyɛ̃ a ʋ ƴɛrʋ dɩb na bɛ tɛr bãwfʋ, ɛ a ʋ sɛɛ bɛ tɛr bɩɛrʋ a! 34 Mɛ̃ a ŋa a Sɛb-sõw na yere a: «Ãa n’ʋ bãw a Sore tɩɛrʋ? Bɩɩ ãa n’ʋ dãw wul ʋ yã? 35 Bɩɩ ãa n’ʋ dãw de niwn kʋ̀ ʋ bom, a fɛr k’ʋʋ mɩ̀ kʋ̀ ʋ yaa a san?» 36 Bʋ̃ʋ n’ʋ vɛ̃, ʋl zie n’a bom za yi, ʋlɛ n’ʋ so bom za be, ʋl ƴãw n’a bom za be; ʋlɛ so yúor-vɩɛlʋ-danʋ a yome yome za! Amɛn.
121 A na ɩ a ŋa a, yɛbr ɩ, ɩ̃ zɛlɛ nyɩ na, a Naaŋmɩn su-ɓaarʋ zũú, kɛ́ nyɩ mɩ́ de nyɩ tʋɔra kʋ̀ a Naaŋmɩn mɛ̃ baw-maal-bʋ̃-vʋbɛ na ɩ son ɛ nʋmɛ a ʋ zie a: lɛ n’ɩ a nyɩ Naaŋmɩn puoru na ɩ sɩza a. 2 Nyɩ ta de a nyɩ ɩb tuur ɩ a dɩ̃a zie ŋa ɩb ɛ, ɛ cɛ nyɩ bɛr a Naaŋmɩn ʋ lɩɛbɩ nyɩ ɛ kʋ̀ nyɩ yã-paala. Lɛ n’a nyɩ na mɩ́ tʋ̃ɔ jɛl bãw a Naaŋmɩn pʋ-tɩɛrʋ: ʋlɩ bom nɛ na vɩɛl a, ʋlɩ bom nɛ na pɛlɩ a ʋ pʋɔ a, ʋlɩ bom nɛ na vɩɛl ʋ za bɛ cɛ a. 3 A maalʋ a Naaŋmɩn na kʋ̀ m a zũú, ɩ̃ yere na kʋ̀rɛ nyɩ za: nyɩ ta mɩ́ tɩɛrɛ kɛ́ nyɩ zuo nɩ za ɩ, nyɩ nɩ̃ɛ mɩ́ vɛ̃ kɛ tɛr tʋɔra siwru tɩɛrʋ, mɛ̃ a lɛ a Naaŋmɩn na põ a saw-deb kʋ̀ ŋa za a. 4 Mɛ̃ a lɛ tɩ na tɛr ƴãgã-been yõ, ɛ a ɓɛrmɛ yãwmɛ ɛ bɛ lãw tõ-nʋɔr a, 5 lɛ mɩ̀ n’a, tɩ yãwmɛ ɛ lãw nɩ a Kɩrɩta ɩ ƴãgã-been, ɛ́ tɩ za lãw nɩ taa mɛ̃ ƴãgã-been ɓɛrmɛ a. 6 Tɩ tɛr ɩ maalʋ dẽdeni, mɛ̃ a lɛ a Naaŋmɩn na mɩ́ kʋ̀ ŋa za mɔlɛ a. Alɛ wa ɩ Naaŋmɩn-ƴɛr-manɛ maalʋ n’ʋ tɩ kãw páw a, ʋ manɛ a Naaŋmɩn ƴɛrʋ tuur ɩ a Naaŋmɩn-saw-deb. 7 Ƴẽn sob wa páw maalʋ a tome ƴãw a, ʋ tone. Sob nɛ na páw maalʋ a wulu ƴãw a, ʋ wule. 8 Sob nɛ na páw maalʋ a taabɛ kpaalʋ ƴãw a, ʋ kpaalɛ bɛ. Sob nɛ na pone a ʋ bʋ̃-tɛrɩ a, ʋ ta tɩrɛ zʋmnɛ nɩ ɛ. Sob nɛ na tɛr a niwn-diere tome a, ʋ ƴãw fãw tone. Sob nɛ na sõwne a bãbaalbɛ a, ʋ sõwne nɩ pʋ-pɩɛlʋ. 9 Nyɩ nɔnɛ taa sɩza. Nyɩ hɩɛn a yel-faa ɛ tu a yel-vla pùor. 10 Nyɩ nɔnɛ taa mɛ̃ yɛbr a, nɩ nyɩ pʋɔ za; nyɩ ƴãwnɛ taa ciere taa. 11 Nyɩ tone ɛ ta kpɛ ƴã-tuo ɩ. Nyɩ tʋlɛ a Sore tome tob ƴãw. 12 Nyɩ cɩlɛ, a nyɩ tɩɛrʋ nyɩ na ƴãw a Sore ƴãw a zũú; nyɩ nyɔw nyɩ tʋɔra a kpɩɛrʋ pʋɔ; nyɩ puore kʋra lɛ. 13 Nyɩ sõwne a nyɩ yɛbr a na fɛrɛ a, ɛ páwr a sãanʋ deb ƴãw. 14 Nyɩ mɩ́ ƴɛr nɔ-vla a bɛlɩ dem na dɔwrɛ nyɩ a ƴãw, nyɩ mɩ́ ƴɛr nɔ-vla ɛ ta ŋmɩɛr ƴãwn bɛ ɩ. 15 Nyɩ cɩlɛ lãw nɩ a bɛlɩ dem na cɩlɛ a, ɛ kone lãw nɩ a bɛlɩ dem na kone a. 16 Nyɩ ƴãw fãw wone taa vla. Nyɩ ta bɔbr a yúor ɛ, ɛ cɛ nyɩ tuur a yele al na waar ɩ tʋɔra siwru a pùor. Nyɩ ta mɩ́ de nyɩ tʋɔra bʋɔlɛ yã-bãwnbɛ ɩ. 17 Nyɩ ta yarɛ nɩr kãw za yel-faa san ɛ. Nyɩ ƴãw fãw ɩrɛ a vla a nɩsaalbɛ za niŋé. 18 Alɛ na na tʋ̃ɔ a, nɩ a lɛ a na yi a nyɩ zie mɩ̀ a, nyɩ ɩ ƴã-ɓaarʋ be nyɩɩm nɩ a nɩsaalbɛ za cara pʋɔ. 19 Ɩ̃ nɩ-nɔnɩ ɩ, nyɩ ta mɩ́ lɛ ŋmɛlɩ yaa a ɩ-faa san ɛ, nyɩ bɛr a Naaŋmɩn suur ʋ tone, bʋ̃ʋ n’ʋ vɛ̃, a Sɛb-sõw yere nɩ a ŋa: «Mãa so a san-yaafʋ, mãa n’ʋ na yaa a san», a Sore n’ʋ yere. 20 Lɛ nɩ kɛ: «Kɔ̃ wa kpɩɛr a fʋ dɔ̃ sob a, fʋ̃ʋ kʋ̀ ʋ bʋ̃-dɩrɩ ʋ dɩ; kʋ̃ɔ-nyuur wa kpɩɛr ʋ a, fʋ̃ʋ kʋ̀ ʋ kʋ̃ɔ ʋ nyũ; bʋ̃ʋ n’ʋ vɛ̃, fʋ na ɩrɛ a a ŋa a, a ɩ na mɛ̃ vũu-bie n’a fʋ mʋ̃ɔnɛ dɔwlɛ a ʋ zũú a.» 21 Ta mɩ́ bɛr a yel-faa ʋ tʋ̃ɔ fʋ ɛ, nɩ̃ɛ mɩ́ maalɩ a yel-vla tʋ̃ɔ nɩ a yel-faa.
131 Nɩsaal za n’ʋ a fɛr k’ʋʋ sawr a nɩ-bɛrɛ na dɩrɛ nɩ-kpɛ̃nʋ a nʋɔr. Bʋ̃ʋ n’ʋ so, nɩ-kpɛ̃ɛnʋ za yi n Naaŋmɩn zie; a nɩ-kpɛ̃ɛnʋ na be be a, Naaŋmɩn n’ʋ mɩ́ ƴãw a. 2 A na ɩ a ŋa a, sob nɛ na bɛ sawr a nɩ-kpɛ̃ɛnʋ dɩrɛ a ʋ zu a, ʋ bɛ sawr a lɛ a Naaŋmɩn na bɔbr k’aa yele tuur a ɩ. Ɛ a bɛlɩ dem na bɛ sawr a nɩ-kpɛ̃ɛnʋ a, na bɔ n dɔwrʋ ƴãw bɛ tʋɔra. 3 A ƴɛr-dɩrbɛ bɛ ɩ nɩ-zɔrɩ sob nɛ na ɩrɛ vla a zie ɩ, sob nɛ na ɩrɛ faa a zie n’a bɛ ɩ nɩ-zɔrɩ. Fʋ bɔbr a kɛ fʋ ta zɔrɛ a nɩ-kpɛ̃ɛ ɩ? Ɩrɛ vla, ʋʋ na mʋʋrɛ fʋ na, 4 bʋ̃ʋ n’ʋ vɛ̃, Naaŋmɩn tõ-tone n’ʋ, k’ʋʋ tʋ̃ɔ mɩ́ ƴãw fʋ ɩrɛ vla. Ɛ cɛ fʋ̃ʋ wa ɩrɛ faa a, fʋ̃ʋ zɔrɛ ʋ. Bʋ̃ʋ n’ʋ vɛ̃, zawla lɛ ƴãw bɛ n’a ʋ tɛr a dɔwrʋ fãw ɛ. Ʋlɛ wa dɔwrɛ nɩr a, a Naaŋmɩn tome n’a ʋ tone, k’ʋʋ wul a Naaŋmɩn suur na ìr a yel-fa-maalɛ ƴãw a. 5 Alɛ n’a so a fɛr k’aa nɩ-bɛrɛ nʋɔr sawfʋ be be, ɛ a ta ɩ a Naaŋmɩn suur dɛ̃bɩ̃ɛ tɛwr ƴãw ɛ, ɛ mɩ̀ ɩ a vla a socir na wule a ƴãw. 6 Alɛ cãa n’a so nyɩ yarɛ a zuru-yar; bʋ̃ʋ n’ʋ vɛ̃, a bɛlɩ dem na dier a a, Naaŋmɩn n’ʋ kʋ̀ bɛ a tõ-nʋɔr ŋa kɛ́ bɛ tone vla. 7 Nyɩ mɩ́ kʋ̀ ŋa za a ʋlɩ bom a na fɛr kɛ nyɩ kʋ̀ ʋ a: a zuru-yar, a sob nɛ na dier a zuru-yar a; a bome a mɩnɛ samɛ, a bɛlɩ dem na dier a samɛ a ŋa libie a; a zɔba, a sob nɛ a na fɛr kɛ nyɩ zɔrɛ a; a ƴãwfʋ, a sob nɛ a na fɛr kɛ nyɩ ƴãwnɛ a. 8 Nyɩ ta mɩ́ tɛr san kãw za nɩr za zie ʋ bɛ ɩ a nyɩ nɔ̃w-taa ɩ. Bʋ̃ʋ n’ʋ vɛ̃, sob nɛ na nɔnɛ a ʋ tɔ a, ʋ saw nɩ a Naaŋmɩn-Wulu ʋ za. 9 A Naaŋmɩn nɛ-ƴãwnɩ a ŋa: «Ta maalɩ pɔw-gaa-yel-bier, ta kʋ́ nɩr, ta zu bom, ta tɩɛrɛ kɛ fʋ̃ʋ nãá so a fʋ tɔ bom», nɩ a Naaŋmɩn nɛ-ƴãwnɩ al za na cɛ a, a za tuor ɩ taa be a Naaŋmɩn nɔ-ƴãwna ŋa yõ pʋɔ: «Fʋ na nɔnɛ nɩ a fʋ to-sob mɛ̃ a fʋ mɩŋa a.» 10 Nɔ̃wfʋ bɛ maalɛ faa kãw za tɔ zie ɩ; lɛ so fʋ̃ʋ wa nɔnɛ a fʋ tɔ a, fʋ saw nɩ a Naaŋmɩn-Wulu ʋ za. 11 Nyɩ ta dɩɛnɩ nɩ a yel ŋa ɩ, nyɩ na bãw a daar ʋl pʋɔ tɩ na be a: a tɛm ta na kɛ́ nyɩ bɛr a nyɩ gʋ̃ɔ lɛ, ɛ ìr. Bʋ̃ʋ n’ʋ vɛ̃, a faafʋ pɩɛl tɩ nɩ a ƴɛrɛ ŋa zuo a lɛn daar tɩ na tĩ kɛ saw de a Naaŋmɩn a. 12 A tɩ̃ɩsɔw cen na kpɛ sɔw, a zie vɩɛrɛ na. A na ɩ lɛ a, nyɩ ɩ tɩ lɔb a lige pʋɔ ɩ-ɩrɩ bɛr, ɛ cɔbrɩ a cãa pʋɔ zɛbr ƴãw. 13 Nyɩ ɩ tɩ cere cenu na vɩɛl a, mɛ̃ mʋ̃tɔ̃w daarɩ a, ɛ bɛr a dɩ-gbogbo nɩ a dãa kuolu, a pɩ̃ɔ yele nɩ a nɩ-fa-ɩb, a zɛb-taa nɩ a nyu-yele. 14 Nyɩ su a Sore Yeezu Kɩrɩta, ɛ ta saw a ƴãgan nʋ̃ɔ̀-faar vʋla a so nyɩ ɛ.
141 Nyɩ mɩ́ saw de sob nɛ na bɛ tɛr fãw a ʋ Naaŋmɩn-saw-deb pʋɔ a, ɛ ta bãwnɛ a lɛ ʋ na tɩɛrɛ a ɩ. 2 Mɛ̃ a ŋa a, kãw tɩɛrɛ na k’ʋʋ na tʋ̃ɔ na dɩrɛ bom za, ɛ kãw na bɛ tɛr fãw a ʋ saw-deb pʋɔ a, dɩrɛ zɛ-vaar tɛwr. 3 Sob nɛ na dɩrɛ a za a, ʋ ta jewre a sob nɛ na bɛ dɩrɛ a za a ɩ, ɛ sob nɛ na bɛ dɩrɛ a za a, ʋ ta bãwnɛ a sob nɛ na dɩrɛ a za a yele ɩ; bʋ̃ʋ n’ʋ vɛ̃, a Naaŋmɩn mɩ̀ saw na de ʋ. 4 A fʋ̃ʋ a, ãa nɛ b, na bãwnɛ nɩ-yũo tõ-tõ-bie yele? Ʋ ar ɩ saa-ƴewn bɩɩ ʋ lo na a, a ʋ tõ-tõ-nɩ-kpɛ̃ɛ n’ʋ a jɩrɛ. Ʋ na kpɛmɛ na ar mɩ̀, bʋ̃ʋ n’ʋ so, a Sore tɛr ɩ fãw na tɩɛ ʋ tɛr. 5 Kãw zie a, a bibie bɛ ɩ been ɛ, ɛ kãw zie a bibie za ɩ been. Ŋa za ta mɩ́ bʋnɛ a ʋ tɩɛrʋ ŋa pʋɔ ɩ. 6 Sob nɛ na mɩ́ bãwnɩ bibir kãw a, a Sore ƴãw n’a ʋ mɩ́ ɩ a lɛ; sob nɛ na dɩrɛ a za a, a Sore ƴãw mɩ̀ n’a ʋ ɩrɛ a lɛ, bʋ̃ʋ n’ʋ vɛ̃, ʋ mɩ́ pùor ɩ a Sore yaanɩ. Sob nɛ na bɛ dɩrɛ a za a, ʋ ɩrɛ nɩ a lɛ a Sore ƴãw, ɛ a ʋl mɩ̀ a, ʋ mɩ́ pùor ɩ a Sore yaanɩ. 7 Bʋ̃ʋ n’ʋ vɛ̃, tɩ been kãw za bɛ vʋʋrɛ ʋl mɩŋa ƴãw ɛ, ɛ tɩ been kãw za mɩ̀ bɛ kpiir ʋl mɩŋa ƴãw ɛ. 8 Tɩmɛ wa vʋʋrɛ a, a Sore ƴãw n’a tɩ vʋʋrɛ, ɛ tɩmɛ wa kpiir a, a Sore ƴãw n’a tɩ kpiir: tɩ vʋʋrɛ na o, tɩ kpi na o, a Sore so tɩ. 9 Bʋ̃ʋ n’ʋ vɛ̃, a Kɩrɩta kpi na ɛ lɛb vʋʋrɛ, k’ʋʋ ɩ a nɩ-kũuni nɩ a nɩ-vʋʋrɩ za Sore. 10 Ɛ cɛ fʋ̃ʋ a, bʋnʋ ƴãw n’a fʋ bãwnɛ a fʋ yɛb yele? Ɛ fʋ̃ʋ, bʋnʋ ƴãw n’a fʋ jewre a fʋ yɛb? Tɩ za na cen nɩ a Naaŋmɩn ƴɛrʋ dɩb zie. 11 Bʋ̃ʋ n’ʋ vɛ̃, a Sɛb-sõw yere nɩ a ŋa: «A Sore yere na: Ɩ̃ taa bɛ wa be, a nɩsaalbɛ za na lo na gbĩ dume a ɩ̃ niŋé, bɛ za na haa nɩ nʋɔr danɛ nɩ a Naaŋmɩn.» 12 A na ɩ a ŋa a, a tɩ kãw za n’ʋ na mɩ́ manɩ a ʋ yel-mɩŋa kʋ̀ a Naaŋmɩn. 13 A na ɩ a ŋa a, nyɩ ɩ tɩ ta cãa bãwnɛ taa yele ɩ. Nyɩ nɩ̃ɛ bãwnɩ a a na fɛr kɛ́ nyɩ ta ɩ a nyɩ yɛb ʋ ŋmɛ gbɛr bɩɩ ʋ lo a tulu pʋɔ a ɩ. 14 A Sore Yeezu ƴãw a, ɩ̃ bãwnɩ a nɩ yel-mɩŋa, kɛ́ bom bɛ be be a ŋa ɩ bʋ̃-dɛwr ɛ. Ɛ cɛ nɩr wa tɩɛrɛ kɛ bom ɩ n bʋ̃-dɛwr a, ʋ mɩ́ ɩ n bʋ̃-dɛwr a ʋ zie. 15 Fʋ̃ʋ wa dɩrɛ bom, a waar ɩ pʋ-sãwna a fʋ yɛb zie a, a fʋ ɩb bɛ cãa tuur a nɔ̃wfʋ ɛ. Gu vla taa ɩrɛ, a sob ŋa ƴãw a Kɩrɩta na kpi a, ʋ wa kpiir bʋ̃-dɩra tɛwr ƴãw ɛ. 16 A bom nɛ na ɩ bʋ̃-vla a nyɩ zie a, bɛ mɩnɛ taa wa ƴɛrɛ faa a ʋ ƴãw ɛ. 17 Bʋ̃ʋ n’ʋ vɛ̃, a Naaŋmɩn-Naalʋ bɛ ɩ dɩb nɩ nyub yele ɩ, ʋ ɩ n mɩnʋ, ƴã-ɓaarʋ nɩ nʋ̃ɔ̀ a Vʋʋrʋ Sõw na tɩrɛ a. 18 Ʋlɩ sob na tone a Kɩrɩta a ŋa a, ʋ mɩ́ pɛlɩ nɩ a Naaŋmɩn pʋɔ ɛ a nɩsaalbɛ de a ʋ yele. 19 A na ɩ a ŋa a, nyɩ ɩ tɩ bɔbr a yele al na waar ɩ a ƴã-ɓaarʋ a, nɩ a al na mɩ́ ɩ tɩ lãw kɛrɛ a saw-deb pʋɔ a. 20 Ta sãw a Naaŋmɩn ton bɛr bʋ̃-dɩra ƴãw ɛ. Sɩza n’a, bʋ̃-dɩra za vɩɛl a, ɛ cɛ fʋ̃ʋ wa dɩrɛ bom ƴãw a fʋ yɛb ʋ lo a, a bɛ vɩɛl ɛ. 21 A ʋlɩ bom nɛ na vɩɛl a, ʋlɛ n’ɩ ta ’wɔb nɛn, ta nyũ dãa, ʋlɛ n’ɩ a bɛr bom za na na tʋ̃ɔ ɩ a fʋ yɛb ʋ lo a. 22 A lɛ fʋ na saw de k’aa ɩ n yel-mɩŋa a fʋ zie a, tɛr a lɛ a Naaŋmɩn niŋé. Zu-nʋ̃ɔ̀ sob ɩ a sob nɛ na bɛ nyɛ̃ k’ʋʋ tɛr ɩ sãwna a ʋ kaa-iru pʋɔ a! 23 Ɛ cɛ sob nɛ na tɛr bʋnʋ a ʋ socir pʋɔ bʋ̃-dɩra ƴãw ɛ dɩrɛ a, ʋ sãw na, a ʋ ɩb na bɛ tu saw-deb ʋ na nyɛ̃ bãw kɛ sɩza n’a a ɩ. Ɛ cɛ ɩb za na bɛ tu a saw-deb a, ɩ n yel-bier.
151 A tɩɩm na tɛr fãw a saw-deb pʋɔ a, a fɛr a kɛ tɩ mɩ́ sõw a bãbaalbɛ a bɛ bãbaalʋ pʋɔ, ɛ ta bɔbr kɛ tɩ ɩrɛ lɛ na nʋmɛ a tɩ zie a ɩ. 2 Ŋa za a tɩ pʋɔ, ʋ mɩ́ bɔbr k’ʋʋ ɩrɛ nʋ̃ɔ̀ kpɩɛr a ʋ tɔ-sob a ʋ vla ƴãw, k’ʋʋ tʋ̃ɔ sõwne ʋ ʋ kɛrɛ a ʋ saw-deb pʋɔ. 3 Bʋ̃ʋ n’ʋ vɛ̃, a Kɩrɩta bɛ tɩ bɔbr k’ʋʋ ɩrɛ lɛ na nʋmɛ a ʋ zie a ɩ, ɛ cɛ a nɩ̃ɛ na tɩ ɩ mɛ̃ a ŋa a Sɛb-sõw na yere a: «A fʋ zʋm-tʋʋrbɛ zʋmɛ lo n a ɩ̃ zu.» 4 A yele al za na sɛb a Sɛb-sõw pʋɔ a koro za a, tɩɩm wulu ƴãw n’a a sɛb, k’aa su-nyɔwra nɩ a mɔwlʋ a na kʋ̀rɛ tɩ a zũú, tɩ tʋ̃ɔ tɛr a tɩɛrʋ a Naaŋmɩn ƴãw. 5 A Naaŋmɩn na ɩ su-nyɔwra nɩ mɔwlʋ sob a, ʋ ɩ nyɩ cɔwrɛ a Yeezu Kɩrɩta, wone taa vla a nyɩ cara pʋɔ. 6 Lɛ n’a nyɩ na lãw tɛr tɩɛr-been nɩ nɔ-been danɛ nɩ a Naaŋmɩn, tɩ Sore Yeezu Kɩrɩta Sãà. 7 A na ɩ lɛ a, nyɩ dier taa, mɛ̃ a lɛ a Kɩrɩta na de nyɩ, Naaŋmɩn tʋ̃ɔ nyɛ̃ danʋ a. 8 Bʋ̃ʋ n’ʋ vɛ̃, ɩ̃ yere na kʋ̀rɛ nyɩ, a Naaŋmɩn na ŋmɛ̃ ʋ ŋmɛ̃a a zũú n’a, a Kɩrɩta lɩɛbɩ a Zifʋ mɩnɛ tõ-tone, k’ʋʋ tu a nɛɛ a Naaŋmɩn na ƴãw kʋ̀ a bɛ sãà mɩnɛ a. 9 A bɛl na bɛ ɩ Zifʋ mɩnɛ a, a Naaŋmɩn nɩ-baal-zɔba zũú n’a bɛ danɛ ʋ, a tu mɛ̃ a lɛ a Sɛb-sõw na yel a: «Alɛ n’a so ɩ̃ na danɛ fʋ nɩ-bʋʋr-yoru sɔgɔ, ɩ̃ na yiele na ƴãwnɛ nɩ a fʋ yúor.» 10 A Sɛb-sõw mɩ̀ lɛb a yel: «Nɩ-bʋʋrɛ ɛ, nyɩ cɩlɛ lãw nɩ a Sore nɩbɛ!» 11 Ɛ lɛ maalɛ: «Nɩ-bʋʋrɛ ɛ, nyɩ danɛ a Sore nyɩ za, nyɩɩm, nɩbɛ za, nyɩ íre a ʋ yúor!» 12 Ɩzayi mɩ̀ cãa na yere: «A Zese bʋʋrɛ nɩr na wa na, ʋ na ìr a dɩrɛ naalʋ a nɩ-bʋʋr-yoru zu, ɛ́ bɛ na ƴãw nɩ a bɛ tɩɛrʋ a ʋ ƴãw.» 13 A Naaŋmɩn na n’ʋ tɩ mɩ́ tɩɛrɛ a, ʋ ɩ kɛ nʋ̃ɔ̀ nɩ ƴã-ɓaarʋ paalɩ nyɩ a nyɩ saw-deb pʋɔ, k’aa nyɩ tɩɛrʋ, nyɩ na ƴãw a Naaŋmɩn ƴãw a, ɩ kpɛ̃ɛ yaga za a Vʋʋrʋ Sõw fãw zũú. 14 Ɩ̃ yɛbr ɩ, ɩ̃ mɩŋa za bãwnɩ a na nyɩ na tɛr tɩɛr-vɩɛlɩ yaga ɛ bãw bom za vla, na tʋ̃ɔ wule nɩ taa yã a. 15 Ɛ cɛ ɩ̃ nyɔw nɩ nyãa bʋʋrɛ kãw sɛb ɩ nyɩ a ɩ̃ sɛbɛ ziir a mɩnɛ, k’ɩ̃ɩ tʋ̃ɔ sɩ̃w a nyɩ tɩɛrʋ. Ɛ mãa wa sɛb a lɛ a, a ɩ n a maalʋ a Naaŋmɩn na kʋ̀ m a zũú n’a, 16 k’ɩ̃ɩ ɩ a Yeezu Kɩrɩta tõ-tõ-bie a nɩ-bʋʋr-yoru ƴãw. Tõ-sõw n’ʋ ɩ̃ tone hiere a Naaŋmɩn Yel-nʋ̃ɔ̀, k’aa nɩ-bʋʋr-yoru lɩɛbɩ baw-maal-bom na nʋmɛ a Naaŋmɩn zie a, baw-maal-bom Vʋʋrʋ Sõw na ɩ k’ʋ ɩ sõw a. 17 A na ɩ lɛ a, mãa nɩ a Yeezu Kɩrɩta na lãw taa a, ɩ̃ na tʋ̃ɔ na nyʋʋr a ɩ̃ ton ƴãw, ɩ̃ na tone a Naaŋmɩn ƴãw a. 18 Bʋ̃ʋ n’ʋ vɛ̃, mãa wa sʋ̃ɔmɩ saw ƴɛrɛ bom kãw ƴɛrʋ a, a ɩ n a ʋlɩ bom nɛ a Kɩrɩta na tu a ɩ̃ zie maalɩ, k’ʋʋ ɩ a nɩ-bʋʋr-yoru sawr a Naaŋmɩn nʋɔr a. Ƴɛrʋ nɩ ɩ-ɩrɩ n’a ʋ maal ɩ a yel ʋl, 19 nɩ yele na ɩ bãwfʋ sãá a fãw, nɩ yel bãw-guuri nɩ a Naaŋmɩn Vʋʋrʋ Sõw fãw. A ŋa n’a, ɩ̃ tĩ a Zeruzalɛm ɛ yel a Kɩrɩta Yel-nʋ̃ɔ̀ vla za gʋɔr ɩ tɩ ta n Ɩlɩɩrɩ. 20 Ɛ cɛ ɩ̃ bɛ saw yel a Yel-nʋ̃ɔ̀ be nɩbɛ na wõ a Kɩrɩta yele a ɩ, k’ɩ̃ɩ taa wa mɩɛr a dacine dɔwlɛ yir pɛr zu nɩ-yũo na lɔb a ɩ. 21 A na ɩ ŋa a, ɩ̃ tu na mɛ̃ a lɛ a Sɛb-sõw na yel a: «A bɛlɩ dem bɛ na bɛ tɩ yel a ʋ yel kʋ̀ a, bɛ na nyɛ̃ ʋ na, ɛ a bɛlɩ dem na bɛ tɩ wõ a ʋ yele a, na bãw nɩ a pɛr.» 22 A yel ŋa n’ʋ bɛ sɩrɩ saw ɩ̃ wa a nyɩ zie gb’aa ŋmɩn za ɩ. 23 Ɛ cɛ ƴɛrɛ ŋa a, zie bɛ cɛ ɩ̃ bɛ tɔ a voru a ŋa pʋɔ ɩ. A yome yãwmɛ na ɩ̃ na bɔbr a nyɩ zie waa a, 24 ɛ ɩ̃ bɔbr a kɛ mãa wa cere a Ɛsɩpanyɩ a, mãa tu a be. Bʋ̃ʋ n’ʋ vɛ̃, ɩ̃ tɩɛrɛ na kɛ mãa wa tɔlɛ a, mãa nyɛ̃ nyɩ, ɛ́ nyɩ sõw mɛ̃ ɩ̃ cen a tẽw ŋa; ɛ cɛ ɩ̃ na de nɩ niwn be a nyɩ zie blã lɛ wõ nʋ̃ɔ̀ baarɩ. 25 Ƴɛrɛ ŋa a, Zeruzalɛm a ɩ̃ cere a Kɩrɩta-nɩbɛ tome ƴãw. 26 Bʋ̃ʋ n’ʋ vɛ̃, a Masedʋan nɩ a Akayi Kɩrɩta-nɩbɛ yel a kɛ bɛ na cɩɛr ɩ bome sõw nɩ a Zeruzalɛm Kɩrɩta-nɩbɛ na bɛ tɛr a a. 27 Bɛl mɩŋa nɛ bɛ nyɛ̃ bɛ tʋɔra ɩ a lɛ, ɛ cɛ yel-mɩŋa za, a tɩ fɛr a kɛ bɛ sõw bɛ. Bʋ̃ʋ n’ʋ so, a Zifʋ Kɩrɩta-nɩbɛ ɩ n a Naaŋmɩn maalʋ kʋ̀ a nɩ-bʋʋr-yoru; a na ɩ lɛ a, a fɛr a k’aa nɩ-bʋʋr-yoru mɩ̀ sõw bɛ a bɛ ƴãgamɛ yel-bɔbrɩ pʋɔ. 28 Mãa wa tu a yel ŋa pùor baarɩ, kʋ̀ bɛ a cɩɛrʋ bome a, ɩ̃ na tu n a nyɩ zie cen a Ɛsɩpanyɩ. 29 Ɛ ɩ̃ bãwnɩ a na kɛ mãa wa waar a nyɩ zie a, a Kɩrɩta maalʋ yaga za n’a ɩ̃ na wa n. 30 Ɛ cɛ yɛbr ɩ, bom ŋa n’ʋ ɩ̃ zɛlɛ a nyɩ zie, a tɩ Sore Yeezu Kɩrɩta ƴãw, nɩ a nɔ̃wfʋ a Vʋʋrʋ Sõw na tɩrɛ a ƴãw: nyɩ lãw nɩ mɛ̃ a ɩ̃ mɔb pʋɔ, puore a Naaŋmɩn kʋ̀rɛ mɛ̃. 31 Nyɩ puore k’ɩ̃ taa lore a Zude tẽw nɩbɛ bɛl na bɛ saw de a nuru pʋɔ ɩ, ɛ a sõwfʋ ɩ̃ na cere nɩ a, a Kɩrɩta-nɩbɛ saw de ʋ vla. 32 Lɛ n’a ɩ̃ na tɛr pʋ-pɩɛlʋ wa n a nyɩ zie, Naaŋmɩn wa saw a, wa lãw nɩ nyɩ pɩɛnɩ blã. 33 A Naaŋmɩn na ɩ a ƴã-ɓaarʋ sob a, ʋ be a nyɩ za zie. Amɛn.
161 Ɩ̃ zɛlɛ na kɛ́ nyɩ tɛr maal-ɩrɛ a tɩ yeepuule Febe ƴãw, na kaarɛ a Sãkire Lãw-yir zie a. 2 Nyɩ saw de ʋ vla a Sore yúor ƴãw, mɛ̃ a lɛ a na sɛw taa nɩ Kɩrɩta-nɩbɛ zie a, ɛ́ nyɩ sõw ʋ yel za ƴãw, ʋ nãà wa tɛr a nyɩ yel-ɩra a. Bʋ̃ʋ n’ʋ vɛ̃, ʋ sõw nɩ nɩ-yaga nɩ a mãa mɩŋa. 3 Nyɩ pùori Pɩrɩsɩl nɩ Akɩlasɩ kʋ̀ m, na ɩ a ɩ̃ lãw-tõ-taabɛ a Yeezu Kɩrɩta tome pʋɔ a. 4 Bɛ tɩ cɛ nɩ blã na kpi a ɩ̃ faafʋ ƴãw. Mãa yõ bɛ n’ʋ tɛr a bɛ maalʋ ŋa tɩɛrʋ ɛ, a nɩ-bʋʋr-yoru Lãw-yie za mɩ̀ tɛr ɩ a ʋ tɩɛrʋ. 5 Nyɩ mɩ̀ pùori a Lãw-yir ʋl nɩbɛ na ɓanɛ taa a bɛ yir a. Nyɩ pùori a ɩ̃ ba Epɛnɛtɩ, na ɩ a dãw-niwn sob na saw de a Kɩrɩta a Azi tẽw a. 6 Nyɩ pùori a Marya na hanɩ hanɩ a nyɩ ƴãw a. 7 Nyɩ pùori Ãdoronɩkɩsɩ nɩ Zinɩasɩ na ɩ a ɩ̃ nɩbɛ, ɛ lãw nɩ mɛ̃ kpɛ a gaso a. Nɩ-toni na ɩ nɩ-toni a nɛ bɛ, ɛ́ bɛ mɔ̃ mɩ̀ de nɩ niwn saw de a Kɩrɩta a ɩ̃ ƴãw. 8 Nyɩ pùori Ãpɩlɩyatɩsɩ ɩ̃ na nɔnɛ a Sore pʋɔ a. 9 Nyɩ pùori Irbɛ̃, tɩ lãw-tõ-tɔ a Kɩrɩta tome pʋɔ, nɩ a ɩ̃ ba Sɩtakɩsɩ. 10 Nyɩ pùori Apɛl na wul a sãá ʋ na saw de a Kɩrɩta a. Nyɩ mɩ̀ pùori a Arɩtobul yir dem. 11 Nyɩ pùori a ɩ̃ nɩr Erodɩ̃ɔ, ɛ mɩ̀ lɛ pùori Narsɩsɩ yir dem na saw de a Sore a. 12 Nyɩ pùori Tɩrɩfɛn nɩ Tɩrɩfozi na hanɩ a Sore ƴãw a, ɛ mɩ̀ pùori a ɩ̃ sɛn Pɛrsɩsɩ na hanɩ yaga za a Sore ƴãw a. 13 Nyɩ pùori Irifisɩ, a Sore tõ-tõ-bi-yúor, nɩ a ʋ mã mɩ̀ na ɩ mã a ɩ̃ zie a. 14 Nyɩ pùori Asɛ̃kɩrɩtɩ, nɩ Filegɔ̃, nɩ Ɛrmɛsɩ nɩ Patorobasɩ nɩ Ɛrmasɩ nɩ a yɛbr bɛl na be a bɛ zie a. 15 Nyɩ pùori Fɩlɔlɔgɩ nɩ Zili, Nere nɩ a ʋ yeepuule Olɛ̃pasɩ nɩ a Kɩrɩta-nɩbɛ bɛl za na be a bɛ zie a. 16 Nyɩ weri taa pùori taa nɩ nɔ̃wfʋ na vɩɛl a. A Kɩrɩta Lãw-yie za puore nyɩ na. 17 Yɛbr ɩ, ɩ̃ kpaalɛ nyɩ na, kɛ́ nyɩ gùre nyɩ tʋɔra a bɛlɩ dem na bɛ dier a wulu bɛ na kʋ̀ nyɩ a ƴãw, ɛ́ mɩ́ ƴãwnɛ bʋ́r-taa a Kɩrɩta-nɩbɛ sɔgɔ, ɛ ɩrɛ bɛ bɔrɛ a. Nyɩ taw zãá nɩ bɛ, 18 bʋ̃ʋ n’ʋ vɛ̃, a nɩbɛ bɛ ŋa taabɛ bɛ kaarɛ a Kɩrɩta tɩ Sore yele zie ɩ, bɛl nyagɛ zie n’a bɛ kaarɛ. Ƴɛr-vɩɛlɩ nɩ nɔ-kãa n’a bɛ mɩ́ tɛr bɛlɛ nɩ a nɩbɛ bɛl na bɛ tɛr a mɩnɛ kãw a. 19 A Sore nʋɔr nyɩ na sawr a, a nɩbɛ za wõ n a yele. Lɛ so nʋ̃ɔ̀ ɩrɛ mɛ̃ a nyɩ ƴãw, ɛ cɛ ɩ̃ bɔbr a kɛ́ nyɩ ɩ yã-bãwnbɛ ɩrɛ a vla, ɛ vɩɛl dɛrɛ a faa. 20 A Naaŋmɩn, na ɩ a ƴã-ɓaarʋ sob a, kʋ̃ yaa kɛ ƴɛ́r a Sɩtaana ŋmɛr bin a nyɩ gbɛɛ pile ɩ. A tɩ Sore Yeezu maalʋ, ʋ be a nyɩ zie! 21 A ɩ̃ lãw-tõ-tɔ Timote puore nyɩ na, ʋlɛ nɩ Lisiisɩ nɩ Zazɔ̃ nɩ Sosɩpatɛɛr na ɩ a ɩ̃ nɩbɛ a. 22 Ɛ mãa, Tɛrsiisɩ, na sɛb a sɛbɛ ŋa a, ɩ̃ lãw nɩ nɩ a Sore puore nyɩ. 23 Gayisɩ, na de mãa nɩ a Lãw-yir za a sãanʋ a, puore nyɩ na. Ɛrasɩ na ɩ a tẽw libi-bine a, puore nyɩ na, ʋlɛ nɩ a tɩ yɛb Kartɩsɩ. [ 24 A tɩ Sore Yeezu Kɩrɩta maalʋ, ʋ be a nyɩ za zie. Amɛn.] 25 Naaŋmɩn so danʋ! Ʋ tɛr ɩ fãw na ɩ tɩ kpɛmɛ a saw-deb pʋɔ tu n a Yel-nʋ̃ɔ̀ ɩ̃ na hiere manɛ nɩ a Yeezu Kɩrɩta yele a, ɛ mɩ̀ tu n a Naaŋmɩn pʋ-tɩɛr-sɔwla ʋ na ɩ tɩ bãw a. A pʋ-tɩɛrʋ ŋa tɩ sɔwl ɩ a dɩta-pɛ-yome za, 26 ɛ cɛ ƴɛrɛ ŋa a, a Naaŋmɩn-ƴɛr-manbɛ sɛbr ɩ na k’ʋ yi cãàmɩ́; mɛ̃ a lɛ a Naaŋmɩn na be kʋra lɛ a na ƴãw a nʋɔr a, bɛ ɩ na a nɩ-bʋʋrɛ za bãw a pʋ-tɩɛrʋ ŋa, kɛ́ bɛ tʋ̃ɔ saw de a Naaŋmɩn ɛ sawr a ʋ nʋɔr. 27 A Naaŋmɩn yõ na ɩ yã-bãwnɛ a, ʋlɛ so yúor-vɩɛlʋ-danʋ a Yeezu Kɩrɩta ƴãw, a yome yome za! Amɛn.