FILIB

FILIB

¹ Pol nɩ Timote, na ɩ a Yeezu Kɩrɩta tõ-tõ-biir a, nɛ bɛ kʋ̀rɛ a sɛbɛ ŋa a Filib tẽw nɩbɛ bɛl za a Yeezu Kɩrɩta na ɩ bɛ pʋɔ a Naaŋmɩn nɩ-bʋʋrɛ pʋɔ a, bɛlɛ nɩ a bɛ kaarbɛ nɩ a bɛ dɩakɩr mɩnɛ. ² A Naaŋmɩn tɩ Sãà nɩ a Sore Yeezu Kɩrɩta maalʋ nɩ ƴã-ɓaarʋ, a be a nyɩ zie. ³ Mãa mɩ́ wa lɛ tɩɛrɛ a nyɩ yele a, ɩ̃ mɩ́ puore nɩ a ɩ̃ Naaŋmɩn yaanɩ. ⁴ Kʋra lɛ mãa wa puore kʋ̀rɛ nyɩ a, ɩ̃ mɩ́ puore nɩ nɩ nʋ̃ɔ̀, ⁵ nyɩ na lãw nɩ mɛ̃ a Yel-nʋ̃ɔ̀ hieru ƴãw a zũú, a pɛr tib daar za wa tɩ tɔ a dɩ̃a a. ⁶ Ɩ̃ bɛ bʋnɛ nɩ a yel ŋa ɩ: a Naaŋmɩn na tĩ a tõ-vla ʋl a nyɩ zie a, na cãa na cow ʋ tɩ baarɩ a Yeezu Kɩrɩta lɛ-waa bibir. ⁷ A sɛw na k’ɩ̃ɩ tɛr a tɩɛrʋ a ŋa taabɛ a nyɩ za ƴãw. Ɩ̃ tɛr ɩ a nyɩ za tɩɛrʋ a ɩ̃ socir pʋɔ; bʋ̃ʋ n’ʋ vɛ̃, nyɩ za pʋɔ nɩ a maalʋ a Naaŋmɩn na kʋ̀ m a pʋɔ, a ƴɛrɛ ŋa ɩ̃ na be a gaso pʋɔ a, nɩ a lɛn daar ɩ̃ na mɩ́ zɛbr a Yel-nʋ̃ɔ̀ yel-mɩŋa zɛbr a. ⁸ Naaŋmɩn dɩ n a ɩ̃ dãsɩɛ, k’ɩ̃ɩ nɔnɛ nyɩ na nɩ a Yeezu Kɩrɩta nɔ̃wfʋ tɔr za. ⁹ Ɛ a ɩ̃ puoru n’ɩ ŋa: kɛ́ a nyɩ nɔ̃wfʋ kɛrɛ dɔwlɛ nɩ bãwfʋ mɩŋa nɩ nyɛrʋ na vɩɛl ʋ za a, ¹⁰ nyɩ tʋ̃ɔ mɩ́ bãw bom nɛ na vɩɛl a. Lɛ n’a nyɩ na vɩɛl nyɩ za, ɛ́ bɛ tɛr sãwna a Kɩrɩta waa bibir ɛ. ¹¹ A yel-mɩnʋ yel-vɩɛlɩ a Yeezu Kɩrɩta na maalɩ a nyɩ zie a, na ɩ na nyɩ kpɛ naalʋ, a Naaŋmɩn yúor zɛwfʋ nɩ a ʋ danʋ ƴãw. ¹² Yɛbr ɩ, ɩ̃ bɔbr a kɛ́ nyɩ bãwnɩ a: a yele za na ta m a, nɩ̃ɛ na ɩ a Yel-nʋ̃ɔ̀ hieri tɔl nĩdaa. ¹³ A Ʋrɔm tẽw na-kpɛ̃ɛ lɩɛrɛ yir za pʋɔ nɩ a ziir za a, nɩr za bãwnɩ a nɩ ƴɛrɛ ŋa, kɛ́ a Kɩrɩta ƴãw n’a ɩ̃ be a gaso pʋɔ. ¹⁴ A ɩ̃ gaso pʋɔ pawfʋ ɩ na yɛbr yaga zie ɓãa ƴãw bɛr tɩɛrʋ a Sore ƴãw, bɛ lɛb bãw ƴãw fãw bɛr dɛ̃bɩ̃ɛ za ɛ hiere a Naaŋmɩn ƴɛrʋ. ¹⁵ Sɩza n’a, nyuur a bɛ mɩnɛ ɩrɛ nɩ mɛ̃ hiere a Kɩrɩta, tɛr ɩ cier-taa tɩɛrʋ a ɩ̃ zie; ɛ cɛ bɛ mɩnɛ hiere a Kɩrɩta nɩ tɩɛrʋ na vɩɛl a. ¹⁶ A bɛ ŋa tone na nɩ nɔ̃wfʋ, bɛ bãw na k’ɩ̃ɩ be n a ka k’ɩ̃ɩ zɛb faa a Yel-nʋ̃ɔ̀. ¹⁷ Ɛ a bɛl a, cier-taa yã n’a bɛ hiere nɩ a Kɩrɩta. A bɛ tɩɛrʋ bɛ vɩɛl ɛ, bɛ tɩɛr kɛ lɛ n’a bɛ na ɩ a ɩ̃ gaso pʋɔ pawfʋ lɛ bãw wone mɛ̃. ¹⁸ Ɛ cɛ, a na ɩ m ɩ ŋmɩn? Alɛ saa ŋmɛ̃ ŋmɩŋmɩn za a, tɩɛr-faar a bɛ tɛr, bɩɩ yel-mɩŋa pʋɔ n’a bɛ be a, bɛ hier ɩ a Kɩrɩta, ɛ nʋ̃ɔ̀ kpɩɛr mɛ̃ a al ƴãw; mɔ̃ mɩ̀, ɩ̃ na cãa na cɩlɛ a al ƴãw. ¹⁹ Bʋ̃ʋ n’ʋ vɛ̃, ɩ̃ bãw kɛ a na wa n nɩ faafʋ a ɩ̃ ƴãw a nyɩ puoru zũú, nɩ a Yeezu Kɩrɩta Vʋʋrʋ na sõwne mɛ̃ a zũú. ²⁰ Mɛ̃ a lɛ ɩ̃ na tɩɛrɛ kpɛ̃w za gùre nɩ a, ɩ̃ kʋ̃ nyɛ̃ vĩ towtow ɛ; ɩ̃ bãwnɩ a na, bɛ bʋnɛ zaa pʋrɩ mɩ̀ ɛ, a ƴɛrɛ ŋa nɩ kʋra lɛ, a Kɩrɩta na nyɛ̃ nɩ danʋ a ɩ̃ nɩr ɩb za pʋɔ, alɛ saa ɩ a ɩ̃ cãafʋ pʋɔ n’a, bɩɩ a ɩ̃ kũu pʋɔ n’a a. ²¹ Bʋ̃ʋ n’ʋ vɛ̃, mãa ƴãw a, a nyɔ-vʋʋrʋ n’ɩ a Kɩrɩta, ɛ a kũu bɛ ɩ loba a ɩ̃ zie ɩ. ²² Ɛ cɛ, mãa na na cãa tɛr yel-ɩra kãw a ɩ̃ cãafʋ pʋɔ a, a ka n’a ɩ̃ pãa bɛ bãw bʋ̃ʋ n’ʋ ɩ̃ na kaa ir ɛ. ²³ Ziir a ayi n’a ɩ̃ ar ɩ dɛ bɛ bãw ɛ: ɩ̃ bɔbr a k’ɩ̃ɩ nãá kpi cen tɩ lãw nɩ a Kɩrɩta, lɛ n’a nãá vɩɛl tɩ zuo; ²⁴ ɛ cɛ a nyɩɩm ƴãw a, a cãa vʋʋrɛ a tẽw zu ka n’a fɛrɛ zuo. ²⁵ Ɩ̃ mɩŋa za bãwnɩ a na, ɩ̃ bãw na k’ɩ̃ɩ na be n be, ɩ̃ na be n be pɩɛlɩ nyɩ za, cãa sõwne nyɩ, nyɩ kɛrɛ dɔwlɛ ɛ tɛr nʋ̃ɔ̀ a nyɩ Naaŋmɩn sawfʋ pʋɔ. ²⁶ Lɛ n’a mãa wa lɛb wa be a nyɩ zie a, a danʋ nyɩ na tɛr lãw nɩ a Kɩrɩta a, na kɛrɛ a mãa ƴãw. ²⁷ Alɛ saa ŋmɛ̃ ŋmɩŋmɩn a, nyɩ ɩ a nyɩ nyɔ-vʋʋrʋ tuur a Kɩrɩta Yel-nʋ̃ɔ̀, kɛ̀ mãa wa wa a nyɩ nyɛb bɩɩ mãa bɛ wa ka be a, mãa wone kɛ́ nyɩ lãw nɩ taa tɛr tɩɛr-been kpɛ̃w za, kɛ́ nyɩ lãw nɩ soci-been zɛbr a Naaŋmɩn sawfʋ na yi a Yel-nʋ̃ɔ̀ pʋɔ a zɛbr, ²⁸ ɛ́ bɛ saw a nyɩ dɔ̃ dem vʋ̃ɔ nyɩ pʋ̀lá zaa pʋrɩ ɛ, lɛ n’a a na wul bɛ kɛ́ bɛ bɔrɛ na, ɛ cɛ a nyɩɩm be a faafʋ sɔr zu, ɛ a za yi Naaŋmɩn zie. ²⁹ Bʋ̃ʋ n’ʋ vɛ̃, ʋ kʋ̀ nyɩ nɩ a maalʋ ŋa kɛ́ nyɩ tone a Kɩrɩta tome, na bɛ ɩ a ʋ saw-deb tɛwr a, ɛ́ mɩ̀ cãa ɩ a tuo nyɩ na wone a ʋ ƴãw a, ³⁰ zɛbr ɩ a zɛb-been nɛ nyɩ na nyɛ̃ ɩ̃ zɛb, ɛ́ nyɩ bãwnɩ ɩ̃ cãa zɛbr a.

¹ A na ɩ a ŋa a, nyɩmɛ wa sɩrɩ mɔwlɛ taa, nyɩmɛ nɩ a Kɩrɩta na lãw taa a zũú a, nyɩmɛ wa kpaalɛ taa a nɔ̃wfʋ pʋɔ a, lãw-taa wa be be a Vʋʋrʋ Sõw pʋɔ a, nɔ̃wfʋ nɩ nɩ-baal-zɔba wa be be a, ² nyɩɩm ɩ a ɩ̃ nʋ̃ɔ̀ paalɩ tɩ tɔ. Nyɩ ɩ a nyɩ socie lãw taa, a nyɩ nɔ̃wfʋ nɩ a nyɩ tɩɛrʋ a ɩ been. Nyɩ bɔbr kɛ́ nyɩ lãw taa ɩ been. ³ Nyɩ ta ɩrɛ bom nɩ cier-taa yã, bɔbr ɩ yúor ɛ. Ɛ cɛ, nyɩ ɩrɛ nɩ tʋɔra-siwru, ɛ́ mɩ́ saw kɛ a nyɩ taabɛ zuo nyɩ na. ⁴ Ŋa za ta mɩ́ tɩɛrɛ ʋl yõ yele ɩ, ʋ mɩ̀ mɩ́ tɩɛrɛ a ʋ taabɛ yele. ⁵ Nyɩ ɩrɛ a a ŋa a nyɩ cara pʋɔ, mɛ̃ a lɛ bɛ na mɩ́ ɩrɛ bɛlɛ wa lãw nɩ a Yeezu Kɩrɩta a. ⁶ Ʋl na tɛr a naaŋmɩnʋ a pɛr tib daar za a, ʋ bɛ tɩ fɩɩrɩ ʋlɛ nɩ a Naaŋmɩn sɛw-taa ŋa tɛr bɛ sawr ɩ ɛ. ⁷ Ʋ nɩ̃ɛ na tɩ yàalɩ ʋ tʋɔra, ɛ de tõ-tõ-bie ŋmɛ̃a, ŋmɛ̃ mɛ̃ nɩsaal a, ɛ a tɩ sãá a ʋ ŋmɛ̃a pʋɔ k’ʋʋ ɩ n nɩsaal. ⁸ Ʋ siwr ɩ ʋ tʋɔra lɩɛbɩ nɔ-sawrɛ tɩ kpi n, tɩ kpi n a da-gara zu kũu. ⁹ Al zũú n’a Naaŋmɩn zɛw ʋ yaga za, ɛ por ʋ yúor na yi zuo a yée za a, ¹⁰ kɛ a Yeezu yúor ƴãwfʋ ƴãw, bʋ̃-vʋʋrɩ za gbine dume a salom zu, a tẽw zu nɩ a tẽw pile, ¹¹ ɛ́ bɛ za saw yere kɛ a Yeezu Kɩrɩta n’ɩ a Sore, a Naaŋmɩn sãà yúor-vɩɛlʋ-danʋ ƴãw. ¹² A na ɩ a ŋa a, ɩ̃ nɩ-nɔnɩ ɩ, nyɩɩm na sawr a ɩ̃ nʋɔr kʋra lɛ a, nyɩ cãa ɩrɛ a lɛ, ɩ̃ na mɩ́ wa be a nyɩ sɔgɔ a, ɛ mɩ̀ ɩrɛ gãw lɛ a ƴɛrɛ ŋa ɩ̃ na bɛ ka be a. Nyɩ tɛr zɔba nɩ mawfʋ, tone nɩ a nyɩ faafʋ tome. ¹³ Bʋ̃ʋ n’ʋ vɛ̃, Naaŋmɩn be n a nyɩ sɔgɔ tone, ʋlɛ n’ʋ mɩ́ ƴãw nyɩ bɔbr ɛ maalɛ bom nɛ na tu a ʋ pʋ-tɩɛrʋ a. ¹⁴ Bom nɛ za nyɩ na ɩrɛ a, nyɩ ta ɩrɛ zɛbr ɩ bɩɩ ŋmɩɛr ɩ nɔkpɛn ɛ; ¹⁵ lɛ n’a nyɩ kʋ̃ tɛr sãwna bɛ yere ɩ, ɛ vɩɛl, ɩ Naaŋmɩn bibiir na bɛ tɛr faalʋ a, vʋʋrɛ nɩ a tẽ-daa zu nɩbɛ sɔgɔ, na fa ɛ sãw bɛ za a, nyɩwrɛ a bɛ sɔgɔ mɛ̃ ŋmar-bie salom zu a, ¹⁶ nyɩɩm na tɛr a nyɔ-vʋʋrʋ ƴɛrʋ a: a ŋa n’a nyɩ na zɛw a ɩ̃ yúor a Kɩrɩta waa bibir, bʋ̃ʋ n’ʋ vɛ̃, a ɩ̃ tome nɩ a ɩ̃ hanʋ kʋ̃ ɩ zawla ɩ. ¹⁷ Ɛ́ alɛ mɩ̀ saa na fɛr a ɩ̃ zɩ̃ɩ cir mɛ̃ dekʋb-bom, ƴãw pʋɔ a bawr ƴãw a nyɩ Naaŋmɩn-saw-deb na maalɛ kʋ̀rɛ a Naaŋmɩn a, ɩ̃ cɩlɛ na, ɛ́ cɩlɛ lãw nɩ a nyɩ za. ¹⁸ Lɛ mɩ̀ n’a, a nyɩɩm, nyɩ cɩlɛ, ɛ́ lãw nɩ mɛ̃ cɩlɛ. ¹⁹ A Sore Yeezu wa saw a, ɩ̃ tɩɛrɛ na kɛ ka nɩ blã blã a, ɩ̃ na tõ n a Timote a nyɩ zie, kɛ́ ʋlɛ wa lɛb wa n a nyɩ yele wa manɩ kʋ̀ m a, mãa mɩ̀ tʋ̃ɔ nyɛ̃ mɔwlʋ a pʋɔ. ²⁰ Alɛ bɛ ɩ a ʋl yõ a, ɩ̃ bɛ nyɛ̃ nɩr na tɩɛrɛ a nyɩ yele mɛ̃ a mãa a ɩ: ²¹ bɛ za tɩɛrɛ nɩ a bɛl tɛwr yele, ɛ bɛr a Yeezu Kɩrɩta dem. ²² Ɛ cɛ, nyɩɩm tɛɛ za bãw nɩ lɛ a Timote na ŋmɛ̃ a: ʋ lãw nɩ mɛ̃ na tone a Yel-nʋ̃ɔ̀ hieru tome mɛ̃ bie na be ʋ sãà zie a. ²³ Ʋlɛ n’ʋ ɩ̃ tɩɛrɛ k’ɩ̃ɩ tõ a nyɩ zie, mãa dɛ wa nyɛ̃ a ɩ̃ yele tɛr niwn a. ²⁴ Mɔ̃ mɩ̀, ɩ̃ bãwnɩ a na, a Sore wa saw a, ka nɩ blã a, ɩ̃ mɩŋa na wa n a nyɩ zie. ²⁵ Ɛ cɛ, ɩ̃ nyɛ̃ na a sɛw k’ɩ̃ɩ lɛb bɛr a tɩ yɛb Epafoditɩ kʋ̀ nyɩ, ʋ ɩ n a ɩ̃ lãw-tõ-tɔ, ɛ lãw nɩ mɛ̃ a zɛbr pʋɔ, ʋl nyɩ na tɩ tɩr kʋ̀ m k’ʋʋ sõwne mɛ̃, a lɛn daar ɩ̃ na tɩ bɔbr ʋ a. ²⁶ Ʋ tɩ bɔbr ɩ yaga za k’ʋʋ lɛ nyɛ̃ nyɩ za; ʋ zɩ̃nɛ na guur, nyɩ na wõ a ʋ bàalʋ a ƴãw. ²⁷ Sɩza n’a, ʋ tɩ ɩ n baal cɛ blã na kpi. Ɛ cɛ Naaŋmɩn zɔ n a ʋ nɩ-baalʋ, ɛ a bɛ ɩ ʋl yõ n’ʋ ɛ, ʋ mɩ̀ zɔ n a ɩ̃ nɩ-baalʋ, k’ɩ̃ɩ ta páw pʋ-sãwna dɔwlɩ pʋ-sãwna zu ɛ. ²⁸ Alɛ n’a so ɩ̃ páw lɛ bɛrɛ ʋ kʋrɛ nyɩ, kɛ́ nyɩ tʋ̃ɔ nyɛ̃ ʋ cɩlɛ a ʋ ƴãw, ɛ a ɩ̃ pʋ-sãwna siwri blã. ²⁹ A na ɩ a ŋa a, nyɩ tuori nyɔw ʋ nɩ nʋ̃ɔ̀ a Sore ƴãw, ɛ nɔnɛ a nɩbɛ bɛ ŋa taabɛ, ³⁰ ʋ na tɩ cɛ blã na kpi a Kɩrɩta tome ƴãw a; ʋ saw nɩ a kũu, k’ʋʋ lɩɛrɩ nyɩ tõ a tome nyɩɩm mɩŋa nãá kʋ̃ʋ tʋ̃ɔ tõ a ɩ̃ ƴãw a.

¹ Ƴɛrɛ ŋa a, yɛbr ɩ, nyɩ cɩlɛ nyɩ na lãw nɩ a Sore a. A bɛ kpɩɛr mɛ̃ ɩ̃ na sɛbr a alɩ bʋ̃-been nɛ kʋ̀rɛ nyɩ a ɩ, a na ɩ na nyɩ lɛ kpɛmɛ. ² Nyɩ gùre nyɩ tʋɔra a nɩsaal-baar ƴãw! Nyɩ gùre nyɩ tʋɔra a Yel-nʋ̃ɔ̀ tõ-tõ-bi-faar ƴãw! Nyɩ gùre nyɩ tʋɔra a bɛlɩ dem na bɛlɩ ŋma a yɛɛ a ƴãw! ³ Tɩmɛ nɛ bɛ sɩrɩ ŋma a yɛɛ, tɩɩm a Vʋʋrʋ sõw na ƴãw tɩ puore a Naaŋmɩn a, tɩɩm na zɛwr tɩ tʋɔra tɩ na lãw nɩ a Yeezu Kɩrɩta a, ɛ́ bɛ de a tɩ tɩɛrʋ ƴãw a tɩɩm tɛɛ za ƴãw a. ⁴ Ɛ cɛ ɩ̃ mɩ̀ na tʋ̃ɔ na ƴãw a ɩ̃ tɩɛrʋ a mãa mɩŋa ƴãw. Nɩ-yũo wa tɩɛrɛ k’ʋʋ na tʋ̃ɔ na ƴãw a ʋ tɩɛrʋ ʋl mɩŋa ƴãw a, ɩ̃ na tʋ̃ɔ na ɩ a lɛ zuo. ⁵ Ɩ̃ dɔw na maalɩ bibie anĩ, ɛ́ bɛ ŋmãa a ɩ̃ yʋɔr; Ɩsɩrayɛl bʋʋrɛ nɩr nɛ m, Bɛ̃zamɛ yir dɔwlʋ pʋɔ n’a ɩ̃ yi, Ebire, a ɩ̃ sãà nɩ ɩ̃ mã ɩ Ebire; a Naaŋmɩn-Wulu tub ƴãw ɩ̃ ɩ Farizɩ̃ɛ, ⁶ tʋlɛ a Naaŋmɩn yele ƴãw tɩ dɔwrɛ nɩ a Lãw-yir; ɛ a mɩnʋ a Naaŋmɩn-Wulu na wule a ƴãw, ɩ̃ bɛ tɛr sãwna bɛ yere ɩ. ⁷ Ɛ cɛ, a tɔnɛ a ŋa za ɩ̃ na tɩ ɩ mɛ̃ ɩ̃ páw na a, ɩ̃ nyɛ̃ a na a ɩ loba a Kɩrɩta zũú. ⁸ Sɩza n’a, ɩ̃ nyɛ̃ a na a ɩ loba, a yel-vla ŋa na zuo bom za a ƴãw: a ɩ̃ Sore Yeezu Kɩrɩta bãwfʋ. A ʋl ƴãw n’a ɩ̃ bɛ lɛ cãa tɛr bom za ɩ, ɛ bom za ɩ mɛ̃ sagɛ a, a ɩ̃ zie, k’ɩ̃ɩ tʋ̃ɔ páw a Kɩrɩta; ⁹ a ʋl ɩ̃ na lãw nɩ a ƴãw n’a a Naaŋmɩn na nyɛ̃ m ɩ̃ ɩ nɩ-mɩŋa. A mɩnʋ ŋa bɛ yi mãa zie ɩ, ʋ bɛ yi Naaŋmɩn-Wulu sawfʋ pʋɔ ɩ, ʋ yi n a Kɩrɩta ɩ̃ na saw de a zie; mɩnʋ na yi Naaŋmɩn zie a n’ʋ, ɛ a ʋ pɛr sʋ̃ɔ́ a Naaŋmɩn sawfʋ pʋɔ. ¹⁰ A Kɩrɩta n’ʋ ɩ̃ bɔbr k’ɩ̃ɩ bãw, k’ɩ̃ɩ nyɛ̃ a lɛ a ʋ kũu-pʋɔ-lɛ-yib kpɛnʋ na sɛw a, k’ɩ̃ɩ lãw nɩ a tuo ʋ na wõ a pʋɔ, k’ɩ̃ɩ ŋmɛ̃ taa nɩ a ʋ kũu-pʋɔ, ¹¹ kɛ̀ alɛ wa tʋ̃ɔ a, mãa mɩ̀ lɛb yi a kũu pʋɔ. ¹² Ɩ̃ bɛ ta a tab zie sɛr ɛ, ɛ mɩ̀ bɛ lɛ vɩɛl baarɩ sɛr ɛ; ɛ cɛ, ɩ̃ cãa na ƴãw fãw zɔrɛ k’ɩ̃ɩ tɩ páw a ɩ̃ zɔba bom nyɔw, bʋ̃ʋ n’ʋ vɛ̃, a Yeezu Kɩrɩta tɔr za n’ʋ nyɔw a mãa mɩŋa. ¹³ Yɛbr ɩ, ɩ̃ bɛ tɩɛrɛ k’ɩ̃ɩ nyɔw ʋ na baarɩ sɛr ɛ. Bʋ̃-been yõ n’ʋ ɩ̃ bɔbr: k’ɩ̃ɩ yiiri a pùorí yele bɛr, ɛ tori niwn a nidaa dem ƴãw; ¹⁴ ɩ̃ zɔrɛ na wɩɛr a tab zie, k’ɩ̃ɩ tɩ tʋ̃ɔ páw a sã-ya ʋl a Naaŋmɩn na bʋɔlɛ tɩ kɛ tɩ wa páw a Kɩrɩta ƴãw a sa-zu a. ¹⁵ A na ɩ a ŋa a, tɩɩm za na bɩ nɩbɛ baarɩ a Kɩrɩta sɔr pʋɔ a, tɩ ɩrɛ a a ŋa; ɛ́ yel kãw ƴãw nyɩmɛ bɛ wa ɩrɛ a a ŋa a, Naaŋmɩn na cãa na caalɩ a nyɩ yã a al ƴãw. ¹⁶ Alɛ saa ŋmɛ̃ ŋmɩŋmɩn a, nyɩ ɩ tɩ cãa lo a ʋlɩ sɔr-been nɛ. ¹⁷ Yɛbr ɩ, nyɩ za nyɩ cɔwrɛ mɛ̃, ɛ tori niwn jɩrɛ a bɛlɩ dem na ɩrɛ mɛ̃ a lɛ tɩ na ɩ wul nyɩ a. ¹⁸ Ɩ̃ tɩ yel a kʋ̀ nyɩ gb’aa ŋmɩn za, ɛ lɛ yere kʋ̀rɛ nyɩ a dɩ̃a kone nɩ, nɩbɛ yaga be n be ɩrɛ mɛ̃ a Kɩrɩta da-gara dɔ̃ dem a. ¹⁹ A bɛ kũu na ɩ n wɛb bɛ wɛ; a bɛ nyagɛ n’a ɩ a bɛ Naaŋmɩn, ɛ a yele na sɛw k’aa mɩ́ ɩrɛ bɛ vĩ a, alɛ n’a ɩ a bɛ yúor bom, tẽw zu ka yele tɛwr ƴãw n’a bɛ ƴãw a bɛ tɩɛrʋ. ²⁰ Ɛ a tɩɩm a, a tɩ tẽ-kpɩɛra n’ɩ a tẽ-vla, be n’a tɩ gùre k’aa Sore Yeezu Kɩrɩta yi wa mɛ̃ a faarɛ a, ²¹ ʋl na na lɩɛbɩ a tɩ bãbaalʋ ƴãgamɛ a ŋmɛ̃ taa nɩ a ʋ yúor-vɩɛlʋ-danʋ ƴãgan a, nɩ a fãw ʋ na tɛr na mɩ́ tʋ̃ɔ dɩ naalʋ bom za zu a.

¹ A na ŋmɛ̃ a ŋa a, ɩ̃ yɛb-nɔnɩ ɩ̃ na bɔbr k’ɩ̃ɩ lɛb nyɛ̃ tuo tuo a, nyɩɩm na ɩ a ɩ̃ nʋ̃ɔ̀ nɩ a ɩ̃ dɛpaal-bom a, nyɩ ƴãw fãw tɛr nyɩ tʋɔra vla a a ŋa lãw nɩ a Sore, ɩ̃ nɩ-nɔnɩ ɩ. ² Ɩ̃ zɛlɛ nɩ a Evodi nɩ a Sɛ̃tɩsi yãayãa, kɛ́ bɛ tɛr wõ-taa lãw nɩ a Sore. ³ Ɛ a fʋ̃ʋ, na ɩ a ɩ̃ lãw-tõ-tɔ mɩŋa a, ɩ̃ zɛlɛ fʋ na: sõw bɛ, bʋ̃ʋ n’ʋ vɛ̃, bɛ lãw nɩ mɛ̃ na tɩ zɛb a Yel-nʋ̃ɔ̀ ƴãw, lãw nɩ a Kilimã nɩ a ɩ̃ lãw-tõ-taabɛ bɛl za na cɛ a. A bɛ yée sɛb a ƴãw a nyɔ-vʋʋrʋ sɛbɛ pʋɔ. ⁴ Nyɩ cɩlɛ kʋra lɛ nyɩ na lãw nɩ a Sore a, ɩ̃ lɛb a yere: nyɩ cɩlɛ. ⁵ Nyɩ ɩ a nyɩ nɔ̃wfʋ ɩb sãá nɩbɛ za nyɛ̃. A Sore pɩɛl a. ⁶ Nyɩ ɓãa ƴãw bɛr tɩɛrʋ, ɛ a yele za pʋɔ a, nyɩ mɩ́ puore zɛlɛ nɩ a Naaŋmɩn yãayãa ɛ lãw nɩ barka puoru, ʋ tʋ̃ɔ mɩ́ bãw a nyɩ bʋ̃-bɔbra. ⁷ Lɛ n’a a Naaŋmɩn ƴã-ɓaarʋ, na zuo a nɩsaal yã a, na gu a nyɩ socie nɩ a nyɩ tɩɛrʋ, a lãw nɩ a Yeezu Kɩrɩta. ⁸ Alɛ saa ŋmɛ̃ ŋmɩŋmɩn za a, yɛbr ɩ, bom za na ɩ sɩza ɛ sɛw taa nɩ a, bom za na tu yel-mɩŋa ɛ bɛ tɛr dɛwr a, bom za na sɛw nɩ nɔ̃wfʋ nɩ ƴãwfʋ a, bom nɛ za bɛ na bʋɔlɛ ɩ-vɩɛlɩ-ɩb ɛ ʋ maal ɩ danʋ a, nyɩ tɛr a al za tɩɛrʋ. ⁹ Bom nɛ nyɩ na zànɩ ɛ páw a ɩ̃ zie a, bom nɛ nyɩ na nyɛ̃ a ɩ̃ zie ɛ wõ a, nyɩ tɛr a ɩrɛ, ɛ a ƴã-ɓaarʋ Naaŋmɩn na be n a nyɩ zie. ¹⁰ A ɩ m ɩ nʋ̃ɔ̀ yaga za ɩ̃ na lãw nɩ a Sore a, nyɩ na ɩ a ɩ̃ tɩɛrʋ nyɩ na tɛr a, ʋ pãa lɛb sãá a ƴãw. Sɩza, nyɩ tɛr ɩ a ɩ̃ tɩɛrʋ, ɛ cɛ vuo n’ʋ nyɩ bɛ tɩ nyɛ̃ na ɩ ʋ sãá ɩ. ¹¹ A bɛ kaar mɛ̃ fɛrʋ n’a ƴãw ɩ̃ ƴɛrɛ ɩ, ɩ̃ bãw nɩ ɩ̃ tʋɔra tɛrʋ a yele za pʋɔ. ¹² Ɩ̃ bãw nɩ ɩ̃ tʋɔra tɛrʋ a nãw pʋɔ nɩ a tɛra pʋɔ. A yele za pʋɔ nɩ ziir za, ɩ̃ bãw nɩ a tɩwr nɩ a kɔ̃ tɛrʋ, a bʋ̃-dɩrɩ na ʋr a, nɩa na bɛ nyɛrɛ a. ¹³ Ɩ̃ mɩ́ tʋ̃ɔ nɩ bom za, a Kɩrɩta na kʋ̀rɛ mɛ̃ a fãw a zũú. ¹⁴ Ɛ cɛ a mɩ̀ cãa na vɩɛl, nyɩ na lãw nɩ mɛ̃ a ɩ̃ kpɩɛrʋ pʋɔ a. ¹⁵ A nyɩɩm Filib tẽw Kɩrɩta-biir, nyɩ mɩŋa za bãwnɩ a na, a Yel-nʋ̃ɔ̀ hieru tib daar, a lɛn daar ɩ̃ na tɩ bɛr a Masedʋan tẽw a, Lãw-yir kãw za bɛ tɩ sõw a ɩ̃ wʋɔ ʋ kpɛ bɩɩ ʋ bɛ kpɛ ɩ, a bɛ ɩ a nyɩɩm tɛwr ɛ. ¹⁶ A lɛn daar ɩ̃ na tɩ be a Tesaloniki a, gb’a a ŋa za, nyɩ tɩr ɩ a ɩ̃ bʋ̃-bɔbrɩ kʋ̀ m. ¹⁷ A bɛ kaar mɛ̃ ɩ̃ bɔbr a kɛ́ nyɩ kʋ̀rɛ mɛ̃ bome ɩ. Bom nɛ ɩ̃ na bɔbr a n’ɩ kɛ bɛ sɔr a ɩ-vɩɛlɩ wɔmɛ̃ a ŋa ƴãw a nyɩ tɛra pʋɔ. ¹⁸ Mɔ̃ mɩ̀, ɩ̃ tɛr ɩ bom za na sɛw k’ɩ̃ɩ tɛr a, ɛ tɛr dɔwlɩ mɩ̀. Bom bɛ cɛ mɛ̃ ɩ, ɩ̃ na páw a bom ʋl nyɩ na kʋ̀ a Epafoditɩ k’ʋʋ wa kʋ̀ m a. A ɩ na mɛ̃ tʋrali na nyùur vla vla a, ɛ ɩ bawr na nʋmɛ Naaŋmɩn zie ʋ saw de a. ¹⁹ A ɩ̃ Naaŋmɩn na sõw nyɩ nɩ vla za nɩ a ʋ maalʋ na yi a Yeezu Kɩrɩta zie a, nyɩ páw a nyɩ bʋ̃-bɔbrɩ za kpɛ̃lɛ̃kpɛ̃lɛ̃. ²⁰ A Naaŋmɩn tɩ Sãà so yúor-vɩɛlʋ-danʋ a yome yome za, amɛn. ²¹ Nyɩ pùori a Kɩrɩta-nɩbɛ za been been a Yeezu Kɩrɩta yúor ƴãw. A yɛbr na be a ɩ̃ zie a, puore nyɩ na. ²² A Kɩrɩta-nɩbɛ za puore nyɩ na, baa zuo a za a bɛl na tone a Ʋrɔm tẽw na-kpɛ̃ɛ tome a. ²³ A Sore Yeezu Kɩrɩta maalʋ, ʋ be a nyɩ za zie.