EBIRE

EBIRE

¹ A dãwdãw a, Naaŋmɩn tɩ ƴãw na a ʋ ƴɛr-manbɛ ƴɛr ƴɛr-pɛ-bʋʋrɛ za, gb’aa ŋmɩn za, a tɩ sãà mɩnɛ zie, ² ɛ cɛ ƴɛrɛ ŋa a, a yele baarʋ vuo ŋa pʋɔ a, a ʋ Bie n’ʋ ʋ ƴãw ʋ ƴɛr a tɩ zie. Ʋlɛ n’ʋ a Naaŋmɩn ƴãw k’ʋ ír bom za ɛ so bom za. ³ A Bie ŋa n’ɩ a Naaŋmɩn yúor-vɩɛlʋ-danʋ na nyɩwrɛ a, nɩ a lɛ tɔr za a Naaŋmɩn na ŋmɛ̃ a, ɛ ʋlɛ n’ʋ nyɔw a tẽ-daa tɛr nɩ a ʋ ƴɛrʋ fãw. Ʋ na wa pɛw a nɩsaalbɛ yel-bebe dɛwr bɛr baar a, ʋ zɩ̃ n a Naaŋmɩn na ɩ kpɛ̃ɛ kpɛ̃ɛ za a, dʋrʋ lowr a saa zu. ⁴ A Bie wa ɩ n kpɛ̃ɛ zuo a malkɩ mɩnɛ, a Naaŋmɩn kʋ̀ ʋ yúor na zuo a bɛ dem a. ⁵ Bʋ̃ʋ n’ʋ vɛ̃, a malkɩ buor ʋ a Naaŋmɩn dãw yel: «Ɩ̃ bie nɛ b, ɩ̃ dɔw fʋ nɩ a dɩ̃a?» Lɛ nɩ kɛ: «Ɩ̃ na ɩ n sãà a ʋ zie, ɛ ʋ ɩ bie a ɩ̃ zie?» ⁶ Ɛ cɛ a lɛn daar a Naaŋmɩn na tɩ ƴãw a ʋ Bi-dãw-dɔwra ʋ waar a tẽ-daa zu a, ʋ tɩ yere na: «A Naaŋmɩn malkɩ mɩnɛ za, bɛ gbine dume a ʋ nĩŋé.» ⁷ A malkɩ mɩnɛ ƴãw a, ʋ yel ɩ a ŋa: «A Naaŋmɩn mɩ́ ɩ na a ʋ malkɩ mɩnɛ ɩ sɛsɛb, ɛ a ʋ tõ-tõ-biir ɩ vũu-zɛlɛ.» ⁸ Ɛ cɛ a ʋ Bie ƴãw a, a ŋa n’a ʋ yel: «Naaŋmɩn ɩ, dɩ̃a nɩ bio a, a fʋ naalʋ da-kɔw ba na, fʋ kaarɛ nɩ a fʋ naalʋ tẽw zie nɩ mɩnʋ. ⁹ Fʋ nɔnɛ nɩ a mɩnʋ ɛ hɩ̃ɛn a faalʋ, alɛ so a Naaŋmɩn, a fʋ Naaŋmɩn, cir a cɩlʋ kãá ƴãw a fʋ zũú, kaa ir ɩ fʋ a ʋ ƴãw, ɛ bɛr a fʋ taabɛ.» ¹⁰ Ʋ mɩ̀ cãa na lɛ yel: «Sore e, fʋ̃ʋ n’ʋ ír a tẽw a pɛr tib daar, ɛ a salom ɩ a fʋ nuru bʋ̃-maala. ¹¹ Al na wɛ na, ɛ cɛ fʋ̃ʋ be na. A za na kor a mɛ̃ kparʋ a, ¹² fʋ na pili pili a na mɛ̃ kpar-kpɛ̃ɛ a, fʋ na lɩɛr a na mɛ̃ kparʋ a, ɛ cɛ fʋ̃ʋ ŋmɛ̃ n fʋ ŋmɛ̃a, ɛ a fʋ yome bɛ tɛr baarʋ daar ɛ.» ¹³ Ɛ a malkɩ buor sob ʋ a Naaŋmɩn dãw yel: «Zɩ̃ a ɩ̃ dʋrʋ lowr, ɛ gu ɩ̃ wa tɩ fɛr a fʋ dɔ̃ dem ƴãw bɛ lɩɛbɩ a fʋ gbɛɛ dɔwlʋ zie?» ¹⁴ A malkɩ mɩnɛ za bɛ ɩ bʋ̃-vʋbɛ na tɛr tõ-nɛɛ, Naaŋmɩn mɩ́ tõ kɛ́ bɛ tɩ sõw a bɛlɩ dem na na nyɛ̃ a faafʋ a ɩ?

¹ A lɛ n’a so, a fɛr kɛ tɩ cɛlɛ a yele tɩ na wõ a zie vla, kɛ̀ tɩ taa wa bɔrɛ ɩ. ² A ƴɛrʋ a malkɩ mɩnɛ na tɩ dãw ƴɛr a, wa sãá na ɩ ƴɛr-sɩza, ɛ sob nɛ za na tɩ gãw a ƴɛrʋ ŋa bɛr bɩɩ bɛ saw de ʋ a, tɩ páw nɩ dɔwrʋ mɛ̃ a lɛ a na sɛw a. ³ Ɛ ŋmɩŋmɩn n’a a tɩɩm na ɩ cɩ̃ɛ, tɩmɛ bɛ wa cɛlɛ a faafʋ kpɛ̃ɛ ŋa tɔ zie a? A Sore mɩŋa n’ʋ de niwn ƴɛr a faafʋ ŋa ƴɛrʋ; al pùorí, a bɛlɩ dem na wõ a Sore ƴɛrʋ a, mɩ̀ yel kʋ̀ tɩ kɛ sɩza n’a. ⁴ A Naaŋmɩn mɩ̀ tu n a bɛ dãsɩɛ pùor maalɩ yele na ɩ bãwfʋ sãá a, nɩ yel-bãw-guuri nɩ nɔ-ɓãa-yel-bʋʋrɛ za, ɛ mɩ̀ cãa lɛ tu a pùor nɩ a Vʋʋrʋ Sõw maalʋ ʋ na põ mɛ̃ a lɛ ʋ na bɔbr a. ⁵ A nɩdaar tẽw ƴɛrʋ tɩ na ƴɛrɛ a, malkɩ mɩnɛ bɛ nɛ bɛ a Naaŋmɩn ƴãw bɛ dɩ naalʋ a ʋ zu ɛ. ⁶ Kãw sob nɩ̃ɛ na yel a ŋa a Sɛb-sõw pʋɔ zie kãw: «Naaŋmɩn ɩ, bʋ̃ʋ n’ɩ a nɩsaal, fʋ tɩɛrɛ a ʋ yele? Bɩɩ, bʋ̃ʋ n’ɩ a nɩsaal-bie, fʋ kaarɛ a ʋ zie? ⁷ Fʋ siwr ʋ nɩ blã lɛ ƴãw, ʋ bɛ ta a malkɩ mɩnɛ ɩ, fʋ ɩ na ʋ tɛr yúor ɛ nyɛrɛ ƴãwfʋ, ⁸ fʋ dĩ nɩ bom za bin a ʋ pile.» A Naaŋmɩn wa ƴãw a nɩsaal dɩ naalʋ bom za zu a, ʋ bɛ cɛ bom bɛr a nɩsaal na bɛ dɩ naalʋ a ʋ zu a ɩ. Ɛ cɛ a ƴɛrɛ ŋa a, tɩ bɛ nyɛ̃ k’aa nɩsaal dɩ n naalʋ bom za zu sɛr ɛ. ⁹ Yel ŋa n’ʋ tɩ nyɛ̃: bɛ siwr ɩ a Yeezu blã lɛ ƴãw, ʋ bɛ ta a malkɩ mɩnɛ ɩ, k’aa Naaŋmɩn maalʋ zũú, ʋ́ kpi a nɩsaal za ƴãw; ɛ́ tɩ nyɛ̃ ʋ nɩ ƴɛrɛ ŋa ʋ tɛr yúor ɛ nyɛrɛ ƴãwfʋ, a kũu kpɩɛrʋ ʋ na nyɛ̃ a ƴãw. ¹⁰ A Naaŋmɩn ƴãw bom za na be, ʋʋ so bom za be a, ʋ na tɩ bɔbr k’ʋʋ tɛr bibiir yaga bɛ tɩ pʋɔ a ʋ yúor-vɩɛlʋ-danʋ pʋɔ a, a tɩ sɩrɩ na sɛw, k’aa Yeezu na na ɩ a bɛ faafʋ sɔr niwn-diere a, ʋ ɩ ʋ k’ʋ wõ tuo vɩɛl ʋ za. ¹¹ Bʋ̃ʋ n’ʋ vɛ̃, a Yeezu na tɩrɛ a sonu a, nɩ a bɛlɩ dem na páwr a sonu a, bɛ za lãw nɩ Sãà, alɛ so vĩ bɛ ɩrɛ ʋ, ʋ na na bʋɔlɛ bɛ a ʋ yɛbr a ɩ. ¹² Ʋ yel ɩ a ŋa: «Naaŋmɩn ɩ, ɩ̃ na ƴɛr ɩ a fʋ ƴɛrʋ a ɩ̃ yɛbr zie, ɩ̃ na danɩ fʋ nɩ a lãw nɩbɛ sɔgɔ.» ¹³ Ʋ mɩ̀ cãa na yel: «Ɩ̃ na ƴãw nɩ a ɩ̃ tɩɛrʋ a fʋ ƴãw.» Nɩ kɛ: «Mãa n’ɩ ŋan, mãa nɩ a ɩ̃ bibiir a Naaŋmɩn na kʋ̀ m a.» ¹⁴ A na ɩ a ŋa, a bibiir bɛ ŋa ɩ nɩsaalbɛ a, a Yeezu mɩ̀ ɩ na mɛ̃ a bɛl a, ʋ pʋɔ nɩ a bɛ nɩsaalʋ pʋɔ, k’aa ʋ kũu zũú, ʋ tʋ̃ɔ a sob nɛ na tɛr a kũu fãw a, a pɛr lɛ k’aa Gɛgɛra, ¹⁵ ɛ faa a bɛlɩ dem na mɩ́ tɩ ɩ gbãgbaar a bɛ nyɔ-vʋʋrʋ daar za, a kũu dɛ̃bɩ̃ɛ zũú a. ¹⁶ Malkɩ mɩnɛ sõwfʋ ƴãw sɩrɩ bɛ n’a ʋ waar ɛ, Abraham bʋʋrɛ sõwfʋ ƴãw n’a. ¹⁷ Lɛ so a tɩ fɛr k’ʋʋ ŋmɛ̃ taa nɩ a ʋ yɛbr a yele za pʋɔ, ɩ bawr-maal-kara na tɛr su-ɓaarʋ ɛ bɛ lɛbr pùor a Naaŋmɩn tome tob pʋɔ a, tʋ̃ɔ mɩ́ ír a nɩbɛ yel-bebe bɛr. ¹⁸ Ʋ na wõ tuo ɛ nyɛ̃ bɛlʋ a, ʋ na tʋ̃ɔ na mɩ́ sõw a bɛlɩ dem na nyɛrɛ a bɛlʋ a.

¹ Yɛbr Kɩrɩta-nɩbɛ ɛ, a Naaŋmɩn so nyɩ, ʋl na bʋɔlɩ nyɩ a. A na ɩ lɛ a, nyɩ jɩrɛ a Yeezu, a Naaŋmɩn-saw-deb tɩ na hiere a nɩ-tona nɩ bawr-maal-kara. ² Sɩza n’a, a Naaŋmɩn na kʋ̀ ʋ a tõ-nʋɔr ŋa a, de nɩ a ʋ yele, mɛ̃ a lɛ tɔr za ʋ na tɩ de a Mõyiir yele a ʋ yir za pʋɔ a. ³ A yir-mɩɛrɛ mɩ́ nyɛrɛ nɩ ƴãwfʋ zuo a yir tɔr za. Lɛ n’a a Yeezu mɩ̀ sɛw k’ʋʋ tɛr yúor-vɩɛlʋ-danʋ na gãw a Mõyiir dem a. ⁴ Yir za mɩ́ sɩrɩ na tɛr a ʋ mɩɛrɛ, ɛ Naaŋmɩn n’ɩ bom za mɩɛrɛ. ⁵ A Mõyiir a, a Naaŋmɩn tɩ de nɩ a ʋ yele a ʋ yir za pʋɔ mɛ̃ tõ-tõ-bie na na dɩ a ƴɛrʋ dãsɩɛ, a Naaŋmɩn na na ƴɛr a. ⁶ Ɛ cɛ a Kɩrɩta ʋl a, Naaŋmɩn de nɩ a ʋ yele mɛ̃ Bie na ɩ a Naaŋmɩn yir sob a. Ɛ tɩmɛ n’ɩ a yir dem, tɩmɛ wa ɓãa ƴãw bɛr tɩɛrʋ, ɛ a tɩ nyʋ̀ʋ́r ɩ a tɩɛrʋ tɩ na ƴãw a Naaŋmɩn ƴãw a. ⁷ Lɛ so, mɛ̃ a lɛ a Vʋʋrʋ Sõw na yel a: «A dɩ̃a bibir a, nyɩmɛ wa wõ a Naaŋmɩn kɔkɔr a, ⁸ nyɩ ta kpãa tobr mɛ̃ a lɛn daar nyɩ na tɩ zɛbr ɩ ʋ a ɩ, a ʋlɩ bibir nyɩ na tɩ ɩ ʋ kaa a wɛja-kpalɛ pʋɔ a ɩ. ⁹ A be a, a nyɩ sãakʋm mɩnɛ tɩ jɩ̃ mɛ̃ na kɛ́ bɛ ɩ m kaa, ɛ́ bɛ tɩ nyɛ̃ nɩ a ɩ̃ tome ¹⁰ yome lɩz’a ayi. A lɛ n’a so ɩ̃ nyɛ̃ nɩ a nɩbɛ bɛ ŋa suur ɛ yel: ‹Kʋra lɛ n’a a bɛ tɩɛrʋ bɔrɛ, bɛ bɛ bãw a ɩ̃ sɛɛ ɩ.› ¹¹ Lɛ n’a ɩ̃ nyɛ̃ suur pɔ a ŋa: bɛ bɛ be za na ta a ɩ̃ pɩɛnʋ zie ɩ!» ¹² Yɛbr ɩ, nyɩ gu vla k’aa nyɩ kãw za taa wa tɛr soci-faa na bɛ saw de a, ʋ wa bʋ́r ʋlɛ nɩ a Naaŋmɩn na vʋʋrɛ a ɩ. ¹³ A na ɩ lɛ a, a «Dɩ̃a bibir» ŋa yúor na cãa pore a, nyɩ kpaalɛ taa bibir za, k’aa yel-bier taa wa bɛlɩ a nyɩ been kãw za ʋ kpãa tobr ɛ. ¹⁴ Bʋ̃ʋ n’ʋ vɛ̃, tɩ lɩɛb ɩ a Kɩrɩta taabɛ, tɩmɛ wa tɛr a tɩ tɩɛrʋ kpɛ̃w za tɩ ta n a baarʋ daar a. ¹⁵ Bɛ yel ɩ a ŋa: «A dɩ̃a bibir nyɩmɛ wa wõ a Naaŋmɩn kɔkɔr a, nyɩ ta kpãa tobr mɛ̃ a lɛn daar nyɩ na tɩ zɛbr ɩ ʋ a ɩ.» ¹⁶ Ɛ cɛ ã-mɩnɛ nɛ bɛ tɩ wõ a Naaŋmɩn kɔkɔr ɛ zɛb ɩ ʋ? A bɛlɩ dem za a Mõyiir na tɩ tɛr yi n a Eziptɩ tẽw a bɛ nɛ bɛ ɩ? ¹⁷ Ɛ ã-mɩnɛ nɛ bɛ a Naaŋmɩn tɩ nyɛ̃ nɩ suur yome lɩz’a ayi? A bɛlɩ dem na tɩ maalɩ a yel-bier ɛ lo kpi a wɛja-kpalɛ pʋɔ a bɛ nɛ bɛ ɩ? ¹⁸ Ɛ ã-mɩnɛ zie n’a a Naaŋmɩn tɩ pɔ kɛ́ bɛ kʋ̃ ta a ʋ pɩɛnʋ zie, a bɛ ɩ a bɛ-wonbɛ bɛ ŋa zie n’a? ¹⁹ Ɛ tɩ sɩrɩ na nyɛ̃ kɛ́ bɛ bɛ tʋ̃ɔ ta a pɩɛnʋ ŋa zie ɩ, a bɛ na bɛ saw de a zũú.

¹ A Naaŋmɩn nʋɔr na cãa ƴãw gã, kɛ́ tɩ na tʋ̃ɔ na ta a ʋ pɩɛnʋ zie a, nyɩ ɩ tɩ gu vla bɛ taa wa nyɛ̃ k’aa nyɩ kãw bɛ tʋ̃ɔ ta ɩ. ² Bʋ̃ʋ n’ʋ vɛ̃, a Yel-nʋ̃ɔ̀ ƴɛrʋ ta tɩ na, mɛ̃ a lɛn tɔr za ʋ na tɩ ta a nɩbɛ bɛl na tɩ be a wɛja-kpalɛ pʋɔ a. Ɛ cɛ a ƴɛrʋ bɛ na tɩ wõ a, bɛ tɩ maalɩ bɛ towtow za ɩ, bɛ na tɩ wõ ɛ bɛ saw de a ƴãw. ³ Tɩɩm na saw de a, tɩ na ta n a pɩɛnʋ ŋa zie, ʋl ƴãw a Naaŋmɩn na yel: «Ɩ̃ nyɛ̃ nɩ suur pɔ: bɛ bɛ be za na ta a ɩ̃ pɩɛnʋ zie ɩ!» Ɛ cɛ a ʋ tome tɩ tõ na baarɩ a tẽ-daa iru daar, ɛ ʋ yel a a ŋa. ⁴ A Sɛb-sõw pʋɔ zie kãw a, bɛ sɩrɩ na yel a ŋa a bibie ayopõi sob ƴãw: «Naaŋmɩn zɩ̃ na pɩɛnɩ a bibie ayopõi sob, a ʋ tome za na tɩ tõ baarɩ a ƴãw.» ⁵ Ɛ cãa lɛ yel a be mɩ̀: «Bɛ bɛ be za na ta a ɩ̃ pɩɛnʋ zie ɩ.» ⁶ A bɛlɩ dem na tɩ de niwn wõ a Yel-nʋ̃ɔ̀ a, bɛ tɩ ta a pɩɛnʋ zie ɩ, a bɛ bɛ-wonu zũú. A na ɩ a ŋa a, nɩbɛ bɛ mɩnɛ na tʋ̃ɔ na cãa ta a pɩɛnʋ zie. ⁷ A lɛ n’a so a Naaŋmɩn lɛb ƴãwnɛ bibir na dɩ kɛ «Dɩ̃a bibir» a. Ʋ wa ƴãw na Daviir ƴɛr a ƴɛrʋ pùorí pùorí za, a Sɛbɛ zie ʋl tɩ na dãw yel kɛ: «A dɩ̃a bibir nyɩmɛ wa wõ a Naaŋmɩn kɔkɔr a, nyɩ ta kpãa tobr ɛ.» ⁸ A Zozue tɩ sɩrɩ ɩ mɛ̃ ʋ tɛr bɛ na ta n a pɩɛnʋ zie a, a Naaŋmɩn kʋ̃ʋ lɛ ƴɛrɛ bibi-yũo ƴɛrʋ a pùorí ɛ. ⁹ A na ɩ lɛ a, pɩɛnʋ bibir pɩɛnʋ cãa nɩ be gùre a Naaŋmɩn nɩ-bʋʋrɛ. ¹⁰ Bʋ̃ʋ n’ʋ vɛ̃, sob nɛ na ta a Naaŋmɩn pɩɛnʋ zie a, mɩ́ baar ɩ a ʋ tome ɛ pɩɛnɩ, mɛ̃ a lɛ a Naaŋmɩn na baarɩ a ʋ dem ɛ pɩɛnɩ a. ¹¹ A na ɩ a ŋa a, nyɩ ɩ tɩ ƴãw fãw ta a pɩɛnʋ ŋa zie, a tɩ sãakʋm mɩnɛ bɛ-wonu taa ɩrɛ tɩ kãw za ʋ lore ɩ. ¹² Bʋ̃ʋ n’ʋ so, a Naaŋmɩn ƴɛrʋ ɩ n bʋ̃-vʋʋra na tone a, ɛ dɩrɛ gãw sɔ-kpɛ̃ɛ za na dɩrɛ a loge a za ayi a. Ʋ mɩ́ cɔr a kpɛ tɩ põ a sɩ́ɛ nɩ a tɩɛrʋ, a kɔbɛ tuor-taa ziir nɩ a kɔbɛ buge. Ʋ mɩ́ jɛl ɩ a nɩsaal socir bʋ̃-bɔbrɩ nɩ a nɩsaal socir tɩɛrʋ. ¹³ Bʋ̃-ira kãw bɛ be be sɔwlɩ a ʋ zie ɩ. Bom za mɩ́ sãá nɩ nyɩraa lɛ a ʋ niŋé, ʋ na sowri tɩ nɩ bom. ¹⁴ A na ɩ lɛ tɩ tɛr Naaŋmɩn bawr-maal-kara ʋ tɔl gãw a salom tɩ ta a Naaŋmɩn zie a, a Yeezu, Naaŋmɩn Bie, nyɩ ɩ tɩ tɛr a saw-deb tɩ na hiere a kpɛ̃w za. ¹⁵ Bawr-maal-kara na kʋ̃ tʋ̃ɔ lãw nɩ tɩ gu a tɩ bãbaalʋ pʋɔ a bɛ n’ʋ tɩ tɛr ɛ; bɛ nɩ̃ɛ na ɩ ʋ kaa a za pʋɔ mɛ̃ a tɩɩm a, ɛ ʋ bɛ maalɩ yel-bier ɛ. ¹⁶ A na ɩ lɛ a, nyɩ ɩ tɩ bɛr tɩɛrʋ ɛ taw ta a Naaŋmɩn naalʋ da-kɔw pɛr maalʋ na ʋr a. Tɩ na páw nɩ su-ɓaarʋ ɛ nyɛ̃ maalʋ a be, k’aa daar wa ta a, tɩɩm nyɛ̃ sõwfʋ.

¹ Naaŋmɩn baw-maal kara za a, a nɩsaalbɛ pʋɔ n’a bɛ mɩ́ kaa ir ʋ a nɩsaalbɛ ƴãw, a bɛ Naaŋmɩn yele kaafʋ pʋɔ, k’ʋʋ mɩ́ tɩr a de-kʋb bome ɛ maalɩ bawr a yel-bebe suur pawfʋ ƴãw. ² Ʋ na tʋ̃ɔ na mɩ́ bãw a pɛr kʋ̀ a bɛlɩ dem na ɩ zɔn a, nɩ a bɛlɩ dem na mɩ́ tule a, ʋl mɩŋa a bãbaalʋ na fɛrɛ a ƴãw. ³ Ɛ a ʋl mɩŋa na ɩ bãbaal a ƴãw n’a, a fɛr k’ʋʋ mɩ́ maalɩ a bawr a ʋl mɩŋa yel-bebe ƴãw, mɛ̃ a lɛ ʋ na mɩ́ maalɩ a nɩbɛ dem ƴãw a. ⁴ Nɩr bɛ n’ʋ mɩ́ kʋ̀ ʋ tʋɔra a bawr-maal-kara ƴãwfʋ ɛ, Naaŋmɩn n’ʋ mɩ́ bʋɔlɩ a sob ƴãw ʋ, mɛ̃ a lɛ a na tɩ ɩ a Aarɔ̃ zie a. ⁵ A ŋa n’a a Kɩrɩta mɩ̀ bɛ kʋ̀ ʋ tʋɔra a bawr-maal-kara ƴãwfʋ ɛ. A Naaŋmɩn na ƴɛr a a ŋa a ʋ zie a, ʋlɛ n’ʋ kʋ̀ ʋ: «Ɩ̃ bie nɛ b, ɩ̃ dɔw fʋ nɩ a dɩ̃a.» ⁶ Ʋ mɩ̀ lɛ yel ɩ a Sɛb-sõw pʋɔ zie kãw: «Fʋ ɩ n Naaŋmɩn bawr-maalɛ na be kʋra lɛ a Mɛlkɩsedɛkɩ pal pʋɔ a.» ⁷ A ʋ tẽw zu ka nyɔ-vʋʋrʋ daar a, a Kɩrɩta tɩ ŋmɛ n cɛlsɩ cir ɩ mʋtã-kʋ̃ɔ, ɛ pùori lɔb ɩ nuru zɛlɩ nɩ a Naaŋmɩn yãayãa, ʋl na na tʋ̃ɔ faa ʋ a kũu pʋɔ a. A Naaŋmɩn tɩ saw na de a ʋ puoru, a Kɩrɩta na ƴãwnɛ ʋ a zũú. ⁸ Nɩ a Naaŋmɩn Bie za ʋ na ɩ a, ʋ zànɩ nɩ a nʋɔr sawfʋ, a tuo ʋ na wõ a pʋɔ. ⁹ Ɛ ʋ na wa tɩ páw a ʋ vɩɛlʋ za baar a, ʋ lɩɛb ɩ a faafʋ na be kʋra lɛ a yib zie, a bɛlɩ dem za na sawr a ʋ nʋɔr a ƴãw. ¹⁰ Bʋ̃ʋ n’ʋ vɛ̃, a Naaŋmɩn yel a k’ʋʋ ɩ n bawr-maal-kara a Mɛlkɩsedɛkɩ pal pʋɔ. ¹¹ A yel ŋa ƴãw a, tɩ tɛr ɩ yel-yaga na yel, ɛ a pɛɛ-iru kpɛmɛ, a nyɩ na kpɛ vanana a wob ƴãw a zũú. ¹² A lɛn daar za wa tɔ ka a, a tɩ sɛw na kɛ́ nyɩ ɩ wul-wulbɛ, ɛ cɛ nyɩ cãa na bɔbr kɛ nɩr wule nyɩ a Naaŋmɩn ƴɛrʋ yele al bɛ na mɩ́ zànɩ a pɛr tib daar a. Nyɩ ɩ n lɛɛɛ wa tɩ cãa bɔbr bʋrʋ, ɛ bɛ bɔbr saab ɛ. ¹³ Sob nɛ za na cãa bɔbr bʋrʋ a, bɩ-pɩɩla n’ʋ, ʋ bɛ bãw a mɩnʋ ƴɛrʋ yele ɩ. ¹⁴ A nɩ-bɛrɛ bɛl a, saab ɩ a bɛ bʋ̃-dɩra, bɛl na mili nɩ a bɛ tɩɛrʋ a vla nɩ a faa owru a.

¹ A na ɩ lɛ a, nyɩ ɩ tɩ bɛr a Kɩrɩta yele al bɛ na mɩ́ tĩ zànɩ a, ɛ tu wulu na sɛwnɩ nɩ-bɛrɛ a pùor, tɩ bɛ lɛb dier a wulu pɛr-sʋ̃ɔfʋ yele ɩ: a lɩɛbɩ-a-ɩb bɛr a ɩ-faar na waar ɩ kũu a, nɩ a Naaŋmɩn-saw-deb, ² a wulu na caarɩ a suob a, nɩ a nuru ir-dɔwlʋ yele, a kũuni-pʋɔ-lɛ-yib nɩ a ƴɛr-pɛ-baara maalʋ. ³ A a ŋa n’a tɩ na ɩ, Naaŋmɩn wa saw a. ⁴ Nɩbɛ na dãw páw a cãa a, na lɛm a saa zu maalʋ kaa a, na páw a Vʋʋrʋ Sõw a, ⁵ na nyɛ̃ a lɛ a Naaŋmɩn ƴɛrʋ na nʋmɛ a, na bãw a lɛ a nɩdaar zie kpɛnʋ na ŋmɛ̃ a, ⁶ ɛ́ lɛb de a bɛ nyɔ-vʋʋr-kʋra a, a bɛ tɛr bɛ na lɛb lɩɛbɩ a bɛ ɩb a gb’a ayi sob ƴãw ɛ, bɛl tɛɛ za n’a mɩ́ lɛ kparɛ a Naaŋmɩn Bie a da-gara zu, ɛ yi n ʋ yẽw ƴãw bɛ tʋʋr a. ⁷ Tẽsɔw, saa na waar ƴãwn kʋra lɛ, ɛ ʋ búlé bʋ̃-buli na tɛr yel-ɩra a bɛlɩ dem na ƴãw bɛ kʋɔr ʋ a zie a, Naaŋmɩn mɩ́ maalɛ ʋ na. ⁸ Ɛ cɛ ʋlɛ wa búlé gʋʋr nɩ karnyã a, ʋ bɛ tɛr pɛr ɛ, Naaŋmɩn kʋ̃ yaa kɛ ŋmɛ ƴãw ʋ ɛ, ɛ nyɩwfʋ n’a bɛ nãà baa nyɩw ʋ bɛr. ⁹ Nyɩɩm ƴãw a, ɩ̃ ba mɩnɛ ɛ, tɩ na saa ƴɛrɛ a a ŋa a, tɩ bãwnɩ a n’a nyɩ na lo a sɔr-vla a, a faafʋ sɔr. ¹⁰ Naaŋmɩn ɩ n nɩ-mɩŋa, ʋ kʋ̃ yiiri a nyɩ tome bɛr ɛ, nɩ a ʋ nɔ̃wfʋ nyɩ na wul ʋ sãá, nyɩ na tɩ dãw kaa Kɩrɩta-nɩbɛ zie ɛ cãa kaarɛ a bɛ zie a ƴɛrɛ ŋa a. ¹¹ Ɛ cɛ tɩ bɔbr a kɛ́ nyɩ za been been mɩ́ cãa tʋlɛ a lɛ tɩ ta n a baarʋ daar, kɛ́ a tɩɛrʋ nyɩ na ƴãw a Naaŋmɩn ƴãw a, tʋ̃ɔ maalɩ ʋ za vla. ¹² A na ɩ lɛ a, nyɩ taa kpɩɛr ʋ̃nʋnʋ ɛ, ɛ cɛ nyɩ cɔwrɛ a bɛlɩ dem na mɩ́ dɩ kanyir saw de, ɛ mɩ́ páw a ʋlɩ bom nɛ a Naaŋmɩn na ƴãw nʋɔr k’ʋʋ na tɩr a a. ¹³ A lɛn daar a Naaŋmɩn na tɩ ƴãw a ʋ nʋɔr kʋ̀ a Abraham a, a ʋl mɩŋa n’ʋ ʋ tɩ pɔ n, ʋ na bɛ tɩ nyɛ̃ nɩr ʋ ɩ kpɛ̃ɛ zuo ʋ, ʋ na pɔ n a. ¹⁴ Ʋ tɩ yel a: «Yel-mɩŋa za, ɩ̃ na maalɩ fʋ na, ɛ ɩ a fʋ bʋʋrɛ bɛ yãwmɛ yaga za.» ¹⁵ A Abraham na tɩ dɩ kanyir ɛ gu a, ʋ nyɛ̃ nɩ a Naaŋmɩn nʋɔr ʋ tu. ¹⁶ Nɩr na ɩ kpɛ̃ɛ zuo bɛ a n’ʋ a nɩsaalbɛ mɩ́ pɔ n, ɛ a pɔb a bɛ mɩ́ pɔ, ɩ nɔkpɛn za baarɩ a bɛ cara pʋɔ. ¹⁷ A lɛ n’a so a Naaŋmɩn tɩ ƴãw a nʋɔr pɔ n, ʋ na tɩ bɔbr k’ʋʋ wul a bɛlɩ dem na na páw a nʋɔr ʋ na ƴãw a maalʋ, a nɩ̃ɛ lɛ bãw ɩ cãa a, k’aa lɛ ʋ na yel a bɛ tɛr lɩɛbʋ a. ¹⁸ A na ɩ a ŋa a, yele ayi na bɛ tɛr lɩɛbʋ a pʋɔ, Naaŋmɩn na kʋ̃ tʋ̃ɔ ŋmãa ziri a, alɛ n’a kʋ̀rɛ tɩ sõwfʋ kpɛ̃ɛ a tɩɩm na zɔ sɔwlɩ a ʋ zie a. Lɛ n’a tɩ na tʋ̃ɔ nyɔw a tɩɛrʋ tɩ na ƴãw a Naaŋmɩn ƴãw a kpɛ̃w za, a tɩɛrʋ ŋa bɛ na kʋ̀rɛ tɩ a. ¹⁹ A tɩɛrʋ ŋa a Naaŋmɩn ƴãw a, ʋ ɩ na mɛ̃ a tɩ nyɔ-vʋʋrʋ gbor kpawbir a, bʋnʋ bɛ ka a ʋ ƴãw ɛ, ʋʋ kpɛmɛ, ɛ mɩ́ tɔl kpɛ a zi-sõw pʋ̃ɔmɩ́ za, a pɛn na yawlɩ a pùorí, ²⁰ be a Yeezu na de tɩ niwn tɩ kpɛ a tɩɩm ƴãw a, ʋl na lɩɛbɩ bawr-maal-kara na be kʋra lɛ a Mɛlkɩsedɛkɩ pal pʋɔ a.

¹ A Mɛlkɩsedɛkɩ ŋa, na tɩ ɩ Salɛm tẽw nãà ɛ ɩ a Naaŋmɩn-na-do-saa-bɛ-pɩɛl-a bawr-maalɛ a, tɩ tuor ɩ a Abraham ɛ maalɩ ʋ, a lɛn daar a Abraham na tɩ zɛb tʋ̃ɔ a na-mɩnɛ ɛ lɛb waar a. ² A Abraham tɩ kʋ̀ ʋ nɩ a bome ʋ na zɛb de a ziir pie sob. A dãw-niwn sob a, a Mɛlkɩsedɛkɩ yúor pɛr ɩ: «Mɩnʋ nãà», ɛ lɛb waar, ʋ ɩ Salɛm nãà, a pɛr lɛ kɛ: «Ƴã-ɓaarʋ nãà». ³ Ʋ bɛ tɛr sãà ɩ, bɛ tɛr mã ɩ, bɛ tɛr sãakʋ̃-kʋra kãw za ɩ; bɛ mɩ̀ bɛ por a ʋ dɔwfʋ nɩ a ʋ kũu yúor zie za ɩ. Ʋ ŋmɛ̃ na taa nɩ a Naaŋmɩn Bie: ʋ ɩ n bawr-maalɛ kʋra lɛ. ⁴ Nyɩ nyɛ̃ ʋ na ɩ kpɛ̃ɛ sɛw a! Ʋl a sãakʋ̃-kʋra Abraham na kʋ̀ a bome ʋ na zɛb de a, a bʋ̃-vɩɛlɩ zie ziir pie sob a! ⁵ A Levi bibiir bɛl na ɩ a bawr-maalbɛ a, bɛ ƴãw nɩ nʋɔr kʋ̀ bɛ, kɛ́ bɛ mɩ́ de a bʋ̃-tɛrɩ ziir pie sob, mɛ̃ a lɛ a Naaŋmɩn-Wulu na yel a, a Ɩsɩrayɛl nɩbɛ zie, a pɛr lɛ k’aa bɛ yɛbr zie, mɩ̀ na saa mɩ̀ ɩ a Abraham bʋʋrɛ a. ⁶ A Mɛlkɩsedɛkɩ nɩ a bɛl bɛ tɩ lãw sãakʋm ɛ, ɛ cɛ ʋ tɩ de a Abraham bome ziir pie sob, ɛ maalɩ a sob nɛ a Naaŋmɩn na tɩ ƴãw a nɛɛ kʋ̀ a. ⁷ Ɛ cɛ nɔkpɛn dɛ bɛ ka be ɩ, a kpɛ̃ɛ n’ʋ mɩ́ maalɩ a bile. ⁸ A Levi bibiir, na dier a bʋ̃-tɛrɩ ziir pie sob a, ɩ n nɩsaalbɛ na ɩ bʋ̃-kpiiri a; ɛ cɛ a Mɛlkɩsedɛkɩ lowr a, nɩr na bɛ kpiir a n’ʋ de, mɛ̃ a lɛ a Sɛb-sõw na dɩ a dãsɩɛ a. ⁹ Mɔ̃ mɩ̀, tɩ na tʋ̃ɔ na yel k’aa Abraham na tɩr a bʋ̃-tɛrɩ ziir pie sob a, a Levi na dier a bʋ̃-tɛrɩ ziir pie sob a, mɩ̀ tɩr ɩ a bʋ̃-tɛrɩ ziir pie sob. ¹⁰ Bʋ̃ʋ n’ʋ vɛ̃, a Levi bɛ tɩ dɔw sɛr ɛ, ɛ ɩ mɛ̃ ʋ cãa na be a ʋ sãakʋ̃-kʋra pʋɔ, a lɛn daar a Mɛlkɩsedɛkɩ na tɩ tuori a Abraham a. ¹¹ A bawr-maalɛ ɩb a Levi pal pʋɔ n’ʋ tɩ so a nʋɔr bɛ na kʋ̀ a Ɩsɩrayɛl nɩbɛ a. Ɛ cɛ a Levi pal pʋɔ bawr-maalbɛ tɩ tõ ton na vɩɛl ʋ za a, a kʋ̃ʋ lɛ fɛrɛ kɛ́ baw-maal-yũo yi ɩ mɛ̃ a Mɛlkɩsedɛkɩ na tɩ ɩ a bawr-maalɛ a ɩ, ɛ bɛ ɩ mɛ̃ a lɛ a Aarɔ̃ na tɩ ɩ a bawr-maalɛ a ɩ. ¹² Bʋ̃ʋ n’ʋ vɛ̃, a lɛ bɛ na mɩ́ ɩ a bawr-maalɛ a, wa lɩɛbɩ a, a fɛr a k’aa Naaŋmɩn-Wulu mɩ̀ lɩɛbɩ. ¹³ Ɛ a tɩ Sore, a ƴɛr-bie a ŋa na caarɩ a, pʋɔ nɩ dɔwl-yũo pʋɔ, a nɩr kãw za na bɛ dãw tõ a bawr-maal-kuur tome a. ¹⁴ Nɩbɛ za bãwnɩ a na ʋ na ɩ Zuda dɔwlʋ nɩr a, a dɔwlʋ ŋa ƴãw Mõyiir na bɛ yel yel za, a lɛ ʋ na tɩ ƴɛrɛ a bawr-maalbɛ ƴɛrʋ a. ¹⁵ A yele nɩ̃ɛ na lɛ bãw ɩ cãa, a baw-maal-yũo na yi ŋmɛ̃ taa nɩ a Mɛlkɩsedɛkɩ a, ¹⁶ ʋ bɛ lɩɛbɩ a bawr-maalɛ a tu nʋɔr na tu nɩsaalbɛ dɔwfʋ a ɩ, ɛ lɩɛbɩ a bawr-maalɛ nyɔ-vʋʋrʋ na bɛ tɛr sãwfʋ a fãw zũú. ¹⁷ Bʋ̃ʋ n’ʋ vɛ̃, a Sɛb-sõw dɩ n a ʋ dãsɩɛ a ŋa: «Fʋ ɩ n bawr-maalɛ kʋra lɛ a Mɛlkɩsedɛkɩ pal pʋɔ.» ¹⁸ A na ɩ a ŋa a, bɛ ír ɩ a koro za tub na bɛ tɩ tɛr fãw na ɩ bom a bɛr, ɛ́ bɛ tɛr yel-ɩra a. ¹⁹ Bʋ̃ʋ n’ʋ vɛ̃, a Naaŋmɩn-Wulu bɛ ɩ bom za ʋ páw a ʋ vɩɛlʋ za ɩ. Ɛ cɛ tɩɛrʋ na vɩɛl zuo, tɩ ƴãw a Naaŋmɩn ƴãw a, wa na, ɛ a ʋl zũú n’a tɩ mɩ́ tawr pɩɛlɛ a Naaŋmɩn. ²⁰ Lɛ waar mɩ̀, a Naaŋmɩn pɔb be n be. A bɛ ŋa lɩɛb ɩ bawr-maalbɛ, ɛ a pɔb ŋa bʋʋrɛ bɛ pɔ ɩ. ²¹ Ɛ cɛ a Yeezu a, pɔb a Naaŋmɩn pɔ ʋ lɩɛbɩ bawr-maalɛ, a lɛ a Naaŋmɩn na tɩ yel ʋ a: «A Sore pɔ na, ɛ kʋ̃ lɩɛbɩ bɛr ɛ: fʋ ɩ n Naaŋmɩn bawr-maalɛ kʋra lɛ.» ²² A na ɩ a ŋa a, a Yeezu ƴãw n’a tɩ bɛ bʋnɛ nɩ kɛ Wõ-taa, na vɩɛl zuo a, be n be ɩ. ²³ Bom ŋa n’ʋ mɩ̀ lɛ be be, a bawr-maalbɛ bɛl tɩ yãwmɛ n’a, a kũu na bɛ tɩ sawr bɛ na cɛlɩ a ƴãw. ²⁴ Ɛ cɛ a Yeezu ʋl na be be kʋra lɛ a, a ʋ bawr-maalɛ tome be n kʋra lɛ. ²⁵ A lɛ n’a so, a bɛlɩ dem na tawr pɩɛlɛ a Naaŋmɩn a ʋ ƴãw a, ʋ na tʋ̃ɔ mɩ́ faa bɛ a nʋɔr kʋ̀. Bʋ̃ʋ n’ʋ vɛ̃, ʋ vʋʋrɛ nɩ kʋra lɛ k’ʋʋ tʋ̃ɔ puore a Naaŋmɩn kʋ̀rɛ bɛ. ²⁶ A bawr-maal-kara tɔr za n’ɩ a ŋa a na tɩ fɛr kɛ tɩ tɛr a: ʋ ɩ n sõw, ʋ bɛ tɛr sãwna ɩ, ʋ vɩɛl ɩ ʋ za; bɛ bʋ́r ʋ na ʋ bɛ pʋɔ a yel-bebe dem pʋɔ ɩ, ɛ zɛw ʋ k’ʋ do gãw a salom. ²⁷ A bɛ fɛrɛ ʋ mɛ̃ a baw-maal-karɩ a, kɛ́ bibir za, ʋ mɩ́ de niwn maalɩ bawr a ʋl mɩŋa yel-bebe ƴãw, ɛ a pùorí ʋ maalɩ a nɩbɛ dem ƴãw ɛ. Daƴẽn daadaa n’a ʋ maalɩ a bawr, a lɛ ʋ na de ʋ tʋɔra tɩr a. ²⁸ A Naaŋmɩn-Wulu mɩ́ ƴãw nɩ nɩbɛ na tɛr bãbaalʋ a, bɛ ɩ a baw-maal-karɩ; ɛ cɛ a pɔb a Naaŋmɩn na ƴɛr pɔ n, a Wulu pùorí a, ɩ na a ʋ Bie na páw vɩɛlʋ za a nʋɔr kʋ̀ a, ʋ ɩ bawr-maal-kara na be kʋra lɛ a.

¹ A ƴɛrʋ tɩ na ƴɛrɛ a ƴɛr-zu-kpɛ̃ɛ sɩrɩ n’ɩ a ŋa: a bawr-maal-kara ŋa tɔ n’ʋ tɩ tɛr, ʋl na zɩ̃ a Naaŋmɩn na ɩ kpɛ̃ɛ kpɛ̃ɛ za a naalʋ da-kɔw dʋrʋ lowr a saa zu a. ² Ʋ tone nɩ a ʋ tome a zi-sõw pʋɔ, a pɛn-yi-sɩza pʋɔ a Sore na maalɩ, ɛ a bɛ ɩ nɩsaal ʋ maalɩ a. ³ Bawr-maal-kara za a, de-kʋb bome tɩrʋ nɩ bawr maalʋ ƴãw n’a bɛ mɩ́ ka nũu ƴãw ʋ: lɛ n’a a fɛr k’aa tɩ bawr-maal-kara ŋa mɩ̀ mɩ́ tɛr bom na de tɩr. ⁴ A Kɩrɩta tɩ be a tẽw zu ka a, ʋ kʋ̃ʋ ɩ bawr-maalɛ mɩ̀ ɛ, nɩbɛ na faa be be dier a de-kʋb bome tɩrɛ mɛ̃ a lɛ a Naaŋmɩn-Wulu na ƴãw a. ⁵ Ɛ cɛ a bɛ baw-maal-ton ɩ n a saa zu yele ŋmɛ̃-taalʋ, a saa zu yele dasule, mɛ̃ a lɛ a Mõyiir na tɩ bɔbr a pɛn-sɛw maalʋ a Naaŋmɩn yel kʋ̀ ʋ a; ʋ tɩ yel ʋ na: «Nyɛ̃, fʋ na maal ɩ a yele za a ŋmɛ̃ taa nɩ a al ɩ̃ na wul fʋ a tãw zu a.» ⁶ Ɛ cɛ ƴɛrɛ ŋa a, baw-maal-ton na ɩ kpɛ̃ɛ zuo a n’ʋ bɛ kʋ̀ a Yeezu; bʋ̃ʋ n’ʋ vɛ̃, ʋ ɩ n wõ-taa na vɩɛl zuo a lɔ̃lʋɔrɛ, wõ-taa na maalɩ tu n nɛɛ bɛ na ƴãw a vɩɛl zuo a dãwdãw dem a. ⁷ A Wõ-ta-dãw-niwn sob tɩ sɩrɩ vɩɛl bɛ cɛ a, bɛ kʋ̃ʋ lɛ bɔbr kɛ bɛ lɩɛr ʋ nɩ wõ-taa ayi sob ɛ. ⁸ Ɛ cɛ a ʋ nɩbɛ sãwna n’a a Naaŋmɩn tɩ yere a a ŋa: «Bibie waar a, a Sore n’ʋ yere, ɩ̃ na maal ɩ a Ɩsɩrayɛl nɩbɛ nɩ a Zuda nɩbɛ Wõ-ta-paala. ⁹ Ʋ kʋ̃ ɩ mɛ̃ a ʋl ɩ̃ na tɩ maal ɩ a bɛ sãakʋm mɩnɛ a ʋlɩ bibir ɩ̃ na tɩ nyɔw bɛ nũú, tɛr yi n a Eziptɩ tẽw pʋɔ a ɩ. Bɛ bɛ tɩ tɛr a ɩ̃ wõ-taa ŋa ɩ, lɛ so ɩ̃ mɩ̀ tɩɛ bɛ bɛr, a Sore n’ʋ yere. ¹⁰ A Sore yere na, a Wõ-taa n’ɩ ŋa ɩ̃ na na maal ɩ a Ɩsɩrayɛl nɩbɛ, a bibie al pùorí a: Ɩ̃ na ƴãw nɩ a ɩ̃ Wulu a bɛ tɩɛrʋ pʋɔ, ɩ̃ na sɛb ʋ na ƴãw a bɛ socie pʋɔ. Ɩ̃ na ɩ n a bɛ Naaŋmɩn, ɛ bɛ ɩ a ɩ̃ nɩbɛ. ¹¹ Kãw kʋ̃ mɩ́ lɛ wule a ʋ tẽ-bi-tɔ bɩɩ a ʋ yɛb, yere kʋ̀rɛ ʋ: ‹Bãw a Sore ɩ›. Bʋ̃ʋ n’ʋ vɛ̃, bɛ za na bãw mɛ̃ na, a bile za zie tɩ ta n a kpɛ̃ɛ za, ¹² ɩ̃ na na dɩ a bɛ sãwna suur kʋ̀ bɛ, ɛ mɩ̀ bɛ cãa tɛr a bɛ yel-bebe tɩɛrʋ a ƴãw.» ¹³ A Naaŋmɩn na ƴɛrɛ Wõ-ta-paala ƴɛrʋ a, ʋ ɩ na a wõ-ta-dãw-niwn sob ʋ ɩ bʋ̃-kʋra, ɛ cɛ bom na lɩɛbɩ bʋ̃-kʋra ɛ kore a, ʋ ta n baarʋ.

¹ A wõ-ta-dãw-niwn sob tɩ tɛr ɩ a Naaŋmɩn puoru pɔlɛ nɩ Ŋmɩn-yir na ɩ tẽw zu ka dem a. ² Bʋ̃ʋ n’ʋ vɛ̃, bɛ tɩ maal ɩ pɛn-sɛw na tɛr diru ayi a. A di-dãw-niwn sob pʋɔ, bɛ na bʋɔlɛ kɛ zi-sõw a, a fɩ̃tɩlɛ dɔwlʋ zie tɩ be n be, nɩ a tabal ʋl zu bɛ na mɩ́ dɔwlɩ a dipɛ̃ bɛ na de kʋ̀ a Naaŋmɩn a. ³ A diru ayi sob, bɛ na bʋɔlɛ kɛ zi-sõw-za-zi-sõw a, be n a pɛnɛ ayi sob bɛ na ’le yawlɩ a pùorí; ⁴ a ʋ pʋɔ n’a a salmɛ̃ baw-maal-kúur be, a ʋl zu bɛ na mɩ́ nyɩw a tɩ-suur zɔ̃ na nyuur vla a; a ʋ pʋɔ mɩ̀ n’a a Wõ-taa daga, bɛ na nyɩl salmɛ̃ pàw ʋ za a, mɩ̀ be; ɛ a daga pʋɔ a, a salmɛ̃ duwle na ƴãw a mãan a, nɩ a Aarɔ̃ dabɔl na tɩ pu a, nɩ a kʋsɛ-pamɛ zu a Wõ-taa nɛ-ƴãwnɩ na tɩ sɛb ƴãw a, tɩ be n be. Wõ-taa daga (9.4). ⁵ A Wõ-taa daga zu a, malkɩ mɩnɛ bɛ na bʋɔlɛ Serubɛ̃ a, tɩ be n be wule a Naaŋmɩn yúor-vɩɛlʋ-danʋ; a tɩ dɔl ɩ a pɩgɛ ɓaarʋ pàw a zie ʋl bɛ na mɩ́ mɩr a zɩ̃ɩ a yel-bebe suur pawfʋ ƴãw a. Ɛ cɛ ka bɛ n’a tɩ na ƴɛr a a ŋa za ƴɛrʋ wɛwrɩ ɛ. ⁶ A yele za na cɔbrɩ bin a a ŋa a, a bawr-maalbɛ mɩ́ kpɩɛr ɩ kʋra lɛ a di-dãw-niwn sob pʋɔ a bɛ tome tob ƴãw. ⁷ Ɛ cɛ a ayi sob pʋɔ a, a bawr-maal-kara yõ n’ʋ mɩ́ kpɛ, gb’a been a yuon za; ɛ ʋ bɛ kpɩɛr a be ɛ́ bɛ tɛr dʋ̃w zɩ̃ɩ kpɛ n tɩ de kʋ̀ a Naaŋmɩn ɛ, a ʋl mɩŋa sãwna ʋ na bɛ bãwnɩ kɛ sãw a ƴãw, nɩ a nɩbɛ dem ƴãw ɛ. ⁸ A ŋa n’a a Vʋʋrʋ Sõw wul, kɛ́ lɛn daar za a di-dãw-niwn sob na cãa be a, a zi-sõw-za-zi-sõw sɔr cãa bɛ yuo sɛr ɛ. ⁹ Zʋkpar ʋ a dɩ̃a zie ŋa ƴãw: a pɛr lɛ kɛ de-kʋb bome tɩrɛ na, bagɛ maalɛ kʋ̀rɛ a Naaŋmɩn, ɛ a kʋ̃ tʋ̃ɔ ɩ a sob nɛ na ƴãwnɛ a Naaŋmɩn a a ŋa a, a ʋ pʋɔ vɩɛl ɛ. ¹⁰ Nɩsaalbɛ tub tɛwr a, na caarɩ bʋ̃-dɩrɩ, bʋ̃-nyuuri nɩ dɛwr so-bɛrʋ bʋʋrɛ a, alɛ n’a be be na tɩ ta a lɛn a Naaŋmɩn na na lɛb maalɩ a yele za ƴãw a. ¹¹ Ɛ cɛ a Kɩrɩta wa na mɛ̃ a yel-vɩɛlɩ na waar a bawr-maal-kara. Pɛn-yir na ɩ kpɛ̃ɛ ɛ vɩɛl zuo a pʋɔ n’a ʋ kpɛ, pɛn-sɛw na bɛ ɩ nɩsaalbɛ nuru bʋ̃-maala a, a pɛr lɛ kɛ na bɛ ɩ tẽw zu ka bʋ̃-ira a. ¹² Bʋrɩ nɩ nali zɩ̃ɩ bɛ n’a a Kɩrɩta kpɛ n a zi-sõw-za-zi-zõw pʋɔ gb’a been daadaa ɩ, a ʋl mɩŋa zɩ̃ɩ n’a ʋ kpɛ n, ya de nɩ tɩ a baarɩ. ¹³ A bʋrɩ nɩ a na-dɛɛ zɩ̃ɩ nɩ a na-nyãw tãpɛlʋ, bɛ na mɩ́ mɩr a bɛlɩ dem na tɛr dɛwr a, alɛ mɩ́ wa ɩ bɛ lɛb vɩɛl a zi-kue a, ¹⁴ a Kɩrɩta zɩ̃ɩ na ɩ n ŋmɩn bɛ ɩ gãw lɛ? Ʋl a Vʋʋrʋ na be kʋra lɛ a na ƴãw ʋ de ʋ tʋɔra kʋ̀ a Naaŋmɩn mɛ̃ bawr-maal-bom na bɛ tɛr dɛwr a, a ʋ zɩ̃ɩ na pɛw nɩ a tɩ pʋɔ dɛwr bɛr, a ɩ-ɩrɩ na waar ɩ kũu a na ƴãw tɩ a, kɛ́ tɩ tʋ̃ɔ tone a Naaŋmɩn na vʋʋrɛ a tome. ¹⁵ A ŋa n’a a Kɩrɩta ɩ Wõ-ta-paala lɔ̃lʋɔrɛ; ʋ na kpi k’ʋʋ ír a wõ-ta-dãw-niwn sob daar nʋɔr zawrʋ sãwna bɛr a, a bɛlɩ dem a Naaŋmɩn na bʋɔlɩ a, na tʋ̃ɔ na mɩ́ páw a yel-vɩɛlɩ na be kʋra lɛ a Naaŋmɩn na yel k’ʋʋ na kʋ̀ n a ʋ nɩbɛ a. ¹⁶ Be kũu daar pʋ-tɩɛrʋ sɛbɛ na be a, a fɛr a kɛ́ bɛ wul k’aa sɛb-maalɛ kpi na. ¹⁷ Kũu wa kpi baar a n’a kũu daar pʋ-tɩɛrʋ sɛbɛ mɩ́ tu. A sɛb-maalɛ wa cãa vʋʋrɛ a, a sɛbɛ kʋ̃ tʋ̃ɔ tu ɛ. ¹⁸ A ŋa n’a a wõ-ta-dãw-niwn sob tɔr za bɛ maalɩ ɛ zɩ̃ɩ bɛ cir ɛ. ¹⁹ A Mõyiir tɩ de nɩ niwn manɩ a Naaŋmɩn nɛ-ƴãwnɩ za, mɛ̃ a lɛ a Naaŋmɩn-Wulu na ƴãw a, kʋ̀ a nɩbɛ za. Al pùorí, ʋ de a nali nɩ bʋrɩ zɩ̃ɩ lãw nɩ kʋ̃ɔ, ɛ de pi-kɔbl-zɩɩr nɩ tɩɛ kãw bɛ na bʋɔlɛ ɩzɔpɩ a vaar mɩr ɩ a sɛbɛ tɔr za nɩ a nɩbɛ za, ²⁰ ɛ yel: «A wõ-taa zɩ̃ɩ n’ɩ a a ŋa, a wõ-taa a Naaŋmɩn na yel kɛ́ nyɩ tuur a.» ²¹ Ʋ mɩ̀ tɩ mɩr ɩ a pɛn-sɛw nɩ a baw-maalʋ tõ-tõ-bome za nɩ a zɩ̃ɩ. ²² A Naaŋmɩn-Wulu zie a, zɩ̃ɩ n’a mɩ́ cɛ blã na ɩ bom za ʋ lɛb vɩɛl, ɛ́ zɩ̃ɩ bɛ wa cir a, yel-bebe suur-dɩ-kʋ̀b mɩ̀ bɛ ka be ɩ. ²³ A tɩ fɛr a kɛ bɛ mɩ́ tu a a ŋa, a saa zu yele dasuli a ŋa lɛ vɩɛl; ɛ cɛ a saa zu yele tɛɛ za bɔbr ɩ bawr na vɩɛl zuo a. ²⁴ Bʋ̃ʋ n’ʋ vɛ̃, a Kɩrɩta bɛ kpɛ zi-sõw pʋɔ nɩsaalbɛ na ŋmãa ɩ, zi-sõw nãá ɩ a zi-sõw mɩŋa ŋmɛ̃-ta-tɔ tɛwr a ɩ. A tẽ-vla tɔr za pʋɔ n’a ʋ kpɛ, k’ʋʋ tɩ be a Naaŋmɩn niŋé a ƴɛrɛ ŋa a tɩɩm ƴãw. ²⁵ Ɛ cɛ ʋ bɛ kpɛ k’ʋʋ tɩ de ʋ tʋɔra tɩr gb’aa yaga, mɛ̃ a lɛ a bawr-maal-kara na mɩ́ kpɛ yuon za a zi-sõw pʋɔ nɩ dʋ̃w zɩ̃ɩ a ɩ. ²⁶ Alɛ bɛ ɩ lɛ, a nãá fɛr a ʋ wõ tuo gb’aa yaga, a lɛn daar a tẽ-daa na tĩ kɛ be a. Ɛ cɛ, gb’a been daadaa n’a, a daar na wa ta a, ʋ sãá a ƴɛrɛ ŋa, k’ʋʋ de ʋ mɩŋa maal ɩ bawr ír a yel-bier bɛr. ²⁷ Mɛ̃ a lɛ a na tuur k’aa nɩsaalbɛ mɩ́ kpi gb’a been yõ, ɛ a pùorí Naaŋmɩn maal ɩ bɛ a ƴɛrʋ a, ²⁸ lɛ n’a a Kɩrɩta, mɩ̀ na de ʋ tʋɔra maal ɩ bawr gb’a been daadaa k’ʋʋ ír nɩ-yaga yaga yel-bebe bɛr a, nãá wa sãá a gb’a ayi sob ƴãw, ɛ a kʋ̃ ɩ yel-bier ir-bɛrʋ ƴãw ɛ, ɛ ɩ a bɛlɩ dem na gùre ʋ a faafʋ ƴãw.

¹ A Naaŋmɩn-Wulu bɛ wule a lɛn tɔr za a yele na ŋmɛ̃ a ɩ; a yel-vɩɛlɩ na waar a dasule tɛwr ʋ ʋ wule. Ʋ bɛ be za na tʋ̃ɔ ɩ, a bɛlɩ dem na tawr pɩɛlɛ a Naaŋmɩn a, bɛ vɩɛl bɛ cɛ ɩ, a bawr-been nɛ na saa maalɛ kʋra lɛ, yuon za, bɛ tɛr bɛrʋ daar a. ² A bɛlɩ dem, na puore a Naaŋmɩn a a ŋa a, tɩ ɩ mɛ̃ bɛ páw nɩ a vɩɛlʋ gb’a been daadaa a, bɛ kʋ̃ʋ cãa nyɛ̃ bɛ tɛr sãwna za ɩ, ɛ́ bɛ nãá bɛr ɩ bawr za maalʋ. ³ Ɛ cɛ a bagɛ a ŋa pʋɔ a, a yel-bebe tɩɛrʋ n’a bɛ nɩ̃ɛ mɩ́ lɛb sɩ̃w a nɩbɛ zie yuon za. ⁴ Bʋ̃ʋ n’ʋ vɛ̃, na-dɛɛ nɩ bʋrɩ zɩ̃ɩ kʋ̃ tʋ̃ɔ ír yel-bebe bɛr towtow ɛ. ⁵ A lɛ n’a so, a Kɩrɩta na wa waar a tẽ-daa zu a lɛn daar a, ʋ yel a Naaŋmɩn: «Fʋ bɛ saw de bawr nɩ de-kʋb bom ɛ, ɛ cɛ fʋ cɔbr ɩ ƴãgan kʋ̀ m. ⁶ Nɛn-nyɩw bawr nɩ yel-bebe suur-dɩ-kʋ̀b bawr bɛ pɛlɩ a fʋ pʋɔ ɩ. ⁷ Lɛ n’a ɩ̃ yel: ‹Mãa n’ɩ ŋan waar, Naaŋmɩn ɩ, k’ɩ̃ɩ wa maalɩ a fʋ pʋ-tɩɛrʋ mɛ̃ a lɛ bɛ na sɛb a ɩ̃ ƴãw a Wulu sɛbɛ pʋɔ a.› » ⁸ Ʋ de nɩ niwn yel a ŋa: «Bagɛ, de-kʋb bome, nɛn-nyɩw bawr, nɩ yel-bebe suur dɩ-kʋ̀b bawr, fʋ bɛ saw de a ɩ, a bɛ pɛlɩ a fʋ pʋɔ ɩ.» Ɛ cɛ a bagɛ a ŋa a, a lɛ a Naaŋmɩn-Wulu na yel a n’a bɛ mɩ́ maalɩ a. ⁹ Al pùorí, ʋ yel ƴãw pʋɔ: «Mãa n’ɩ ŋan waar k’ɩ̃ɩ wa maalɩ a fʋ pʋ-tɩɛrʋ.» A ŋa n’a ʋ ír a koro za bagɛ bɛr, ɛ lɩɛr a nɩ a ʋ bawr. ¹⁰ A Naaŋmɩn pʋ-tɩɛrʋ ŋa na maalɩ a ƴãw n’a tɩ páw a sonu, a Yeezu Kɩrɩta na de a ʋ ƴãgan maal ɩ bawr gb’a been daadaa a zũú. ¹¹ Baw-maalɛ za mɩ́ ar ɩ bibir za tone a ʋ baw-maal-ton; ʋ mɩ́ maalɛ nɩ a alɩ bawr been nɛ kʋra lɛ, na kʋ̃ tʋ̃ɔ ír a yel-bebe bɛr towtow a. ¹² A Kɩrɩta ʋl a, ʋ maal ɩ bawr been yõ a yel-bebe ir-bɛrʋ ƴãw, al pùorí ʋ zĩ a Naaŋmɩn dʋrʋ lowr a baarɩ, ¹³ ɛ ʋ pãa gu k’aa Naaŋmɩn wa fɛr a ʋ dɔ̃ dem ƴãw bɛ lɩɛbɩ a ʋ gbɛɛ dɔwlʋ zie. ¹⁴ A na ɩ a ŋa a, bawr been n’ʋ ʋ ɩ n, a bɛlɩ dem ʋ na kʋ̀rɛ a sonu a, bɛ vɩɛl kʋra lɛ bɛ cɛ ɩ. ¹⁵ A Vʋʋrʋ Sõw mɩ̀ dɩrɛ nɩ a dãsɩɛ a tɩ zie. Bʋ̃ʋ n’ʋ vɛ̃, ʋ de nɩ niwn yel a ŋa: ¹⁶ «A Sore yere na: a Wõ-taa n’ɩ ŋa ɩ̃ na na maal ɩ bɛ, a bibie al pùorí a: ɩ̃ na sɛb ɩ a ɩ̃ Wulu ƴãw a bɛ socie pʋɔ, ɩ̃ na wi ʋ na ƴãw a bɛ tɩɛrʋ pʋɔ. » ¹⁷ Al pùorí ʋ yel ƴãw pʋɔ: «Ɩ̃ kʋ̃ cãa tɛr a bɛ yel-bebe nɩ a bɛ bɛ-wonu tɩɛrʋ ɛ.» ¹⁸ Ɛ cɛ be bɛ na dɩ suur tɩr baarɩ a, de-kʋb bom bɛ lɛb tɩrɛ a yel-bier ƴãw ɛ. ¹⁹ A na ɩ a ŋa a, yɛbr ɩ, tɩ mɩ́ ɓãa nɩ ƴãw kpɛ a zi-sõw-za-zi-sõw pʋɔ a Yeezu zɩ̃ɩ zũú. ²⁰ Sɔr-paala nɩ sɔr-mimir ɩ a ŋa ʋ na puo kʋ̀ tɩ tɔl ɩ a Ŋmɩn-yi-kpɛ̃ɛ pɛn-yawla pʋɔ a, a pɛr lɛ k’aa ʋl mɩŋa ƴãgan a. ²¹ Tɩ tɛr ɩ bawr-maal-kara na kaarɛ a Naaŋmɩn yir zie a. ²² A na ɩ lɛ a, nyɩ ɩ tɩ taw pɩɛlɩ a Naaŋmɩn nɩ soci-dẽdẽ nɩ a tɩ saw-deb za, ɛ tɛr socie na vɩɛl bɛ cãa tɛr sãwna za tɩɛrʋ a, nɩ ƴãgamɛ bɛ na pɛw nɩ kʋ̃ɔ vla walwal a. ²³ Tɩ na yere kɛ́ tɩ ƴãw nɩ a tɩ tɩɛrʋ a Naaŋmɩn ƴãw a, tɩ tɛr ʋ kpɛ̃w za, bʋ̃ʋ n’ʋ vɛ̃, a Naaŋmɩn na ƴãw a nʋɔr a ŋmɛ̃ n ʋ ŋmɛ̃a. ²⁴ Nyɩ ɩ tɩ kaarɛ taa zie, tʋ̃ɔ sɩ̃wnɛ taa tɩɛrʋ a nɔ̃wfʋ ƴãw nɩ a ɩ-vɩɛlɩ maalʋ ƴãw. ²⁵ Tɩ ta mɩ́ zawrɩ a tɩ lãw ziir cenu mɛ̃ a lɛ bɛ mɩnɛ na ɩ mili a ɩ; nyɩ nɩ̃ɛ ɩ tɩ kpaalɛ taa, nyɩ na baa nyɛ̃ a Sore bibir ʋ pɩɛlɛ a. ²⁶ Bʋ̃ʋ n’ʋ vɛ̃, tɩmɛ wa bãw a yel-mɩŋa za baarɩ, ɛ cãa mɩ́ bãw kɛ maalɩ a yel-bier a, bawr bɛ lɛ ka be na tʋ̃ɔ ír a yel-bebe bɛr ɛ. ²⁷ A ƴɛrʋ-maalʋ tɛwr a cɛ tɩ na pi pee gùre nɩ, nɩ a vũu tʋlʋ kpãkpã na na dɩ a zu-kpɛn dem a. ²⁸ Nɩr na zawrɩ a Mõyiir-Wulu a, nɩ-baalʋ zɔba bɛ ka be ɩ, a kũu n’a: yel-mɩn-dem ayi bɩɩ ata wa yel kɛ sɩza n’a ʋ sãw a. ²⁹ Nyɩ tɩɛr bãw kɛ sob nɛ na ɩ a Naaŋmɩn Bie la a, na nyɛ̃ a Wõ-taa zɩ̃ɩ na kʋ̀ ʋ a sonu a bɛ ɩ bom a, ɛ tʋ a Vʋʋrʋ na tɩrɛ a maalʋ a, nyɩ tɩɛr bãw k’aa sob nɛ kʋ̃ sɛwnɩ dɔwrʋ na kpɛ faa zuo lɛ a bɩɩ? ³⁰ Bʋ̃ʋ n’ʋ vɛ̃, tɩ bãw nɩ a sob nɛ na yel a ƴɛr-bie a ŋa a: «Mãa so a san yaafʋ, mãa n’ʋ na yaa a ɩ-faa san», ʋlɛ n’ʋ mɩ̀ cãa lɛ yel: «A Sore na maalɩ nɩ a ʋ nɩbɛ a ƴɛrʋ.» ³¹ A Naaŋmɩn na vʋʋrɛ a, na na ƴãw fʋ nũú a, a ɩrɛ nɩ dɛ̃bɩ̃ɛ bɛ dɩ vuo ɩ! ³² Nyɩ lɛb tɩɛrɩ a lɛ a na tɩ ŋmɛ̃ nyɩ a pɛr tib daar a: nyɩ na tɩ nyɛrɛ a cãa wa baarɛ a, nyɩ wõ n tuo yaga, nyɩ mɔ̃ nɩ mɔb na kpɛmɛ a. ³³ Nyɩ mɩnɛ tɩ nyɛ̃ nɩ zʋmɛ nɩ dɔwrʋ a nɩbɛ za niŋé, ɛ a nyɩ ŋmaarɛ tɩ lãw nɩ a bɛl bɛ na tɩ dɔwrɛ a a ŋa a. ³⁴ Nyɩ tɩ lãw nɩ nɩ a gaso pʋɔ dem a bɛ kpɩɛrʋ pʋɔ, nyɩ tɩ saw na bɛ fa a nyɩ bʋ̃-tɛrɩ ɛ nʋ̃ɔ̀ cãa ɩrɛ nyɩ, nyɩ na tɩ bãwnɩ a kɛ́ nyɩ tɛr ɩ na-bom na vɩɛl zuo ɛ be be kʋra lɛ a. ³⁵ A na ɩ lɛ a, nyɩ cãa ɓãa ƴãw bɛr tɩɛrʋ, a waar ɩ nɩ maalʋ. ³⁶ Kanyir a a fɛr kɛ́ nyɩ dɩrɛ, tʋ̃ɔ maalɩ a Naaŋmɩn pʋ-tɩɛrʋ ɛ páw a ʋlɩ bom nɛ ʋ na ƴãw nʋɔr k’ʋʋ na tɩr a a. ³⁷ Bʋ̃ʋ n’ʋ vɛ̃, bɛ sɛb ɩ a ŋa: «Blã lɛ n’a cãa cɛ, zaa pʋrɩ lɛ, ɛ a sob nɛ na waar a na wa, ʋ kʋ̃ cɛlɩ ɛ. ³⁸ Ɛ cɛ a Naaŋmɩn yere na: Sob nɛ na ɩ nɩ-mɩŋa a ɩ̃ zie a, na vʋʋrɛ nɩ a saw-deb zũú, ɛ cɛ ʋlɛ wa lɛb pùor a, ɩ̃ pʋɔ kʋ̃ cãa pɛlɩ a ʋ ƴãw ɛ. » ³⁹ A tɩɩm a, tɩ bɛ ɩ nɩbɛ na lɛbr pùor a bɛ bɔrʋ ƴãw a ɩ, tɩ ɩ n nɩbɛ na saw de a tɩ sɩ́ɩr faafʋ ƴãw a.

¹ A Naaŋmɩn-saw-deb n’ɩ fʋ na bɛ bʋnɛ kɛ́ fʋ na páw nɩ a bom ʋl fʋ na tɩɛrɛ a, ʋ mɩ́ wul a kɛ a yele fʋ na bɛ mɩ́ nyɛ̃ a be na. ² A bɛ saw-deb zũú n’a Naaŋmɩn dɩ a nɩ-kore dãsɩɛ. ³ A saw-deb zũú n’a tɩ bãw k’aa ʋ ƴɛrʋ n’a Naaŋmɩn cɔbrɩ nɩ a zie. A ɩ a lɛ, a bom fʋ na mɩ́ nyɛ̃ a, yi bom fʋ na bɛ mɩ́ nyɛ̃ a pʋɔ. ⁴ A saw-deb zũú n’a Abɛl tɩ maalɩ bawr na vɩɛl zuo Kayɛ̃ dem a kʋ̀ a Naaŋmɩn. A saw-deb ƴãw n’a a Naaŋmɩn tɩ yel k’ʋʋ ɩ n nɩ-mɩŋa, a Naaŋmɩn mɩŋa na tɩ saw de a bome a Abɛl na kʋ̀ ʋ a ƴãw. A ʋ saw-deb zũú, a Abɛl na saa kpi a cãa na ƴɛrɛ. ⁵ A saw-deb zũú n’a bɛ tɩ ír a Enɔkɩ, k’ʋʋ ta kpi ɛ; bɛ bɛ lɛ tɩ nyɛ̃ ʋ ɛ, a Naaŋmɩn na tɩ ír ʋ cen nɩ a ʋ zie a ƴãw. Bʋ̃ʋ n’ʋ vɛ̃, bɛ na bɛ tɩ ír ʋ sɛr a, a Sɛb-sõw tɩ dɩ n a ʋ dãsɩɛ yel k’ʋʋ pɛlɩ nɩ a Naaŋmɩn pʋɔ. ⁶ Ɛ cɛ a saw-deb bɛ wa ka be a, nɩr kʋ̃ tʋ̃ɔ pɛlɩ a Naaŋmɩn pʋɔ ɩ. Bʋ̃ʋ n’ʋ vɛ̃, sob nɛ na tawr pɩɛlɛ a Naaŋmɩn a, a fɛr a k’ʋʋ saw de k’aa Naaŋmɩn be na, ɛ mɩ́ maalɩ a bɛlɩ dem na bɔbr ʋ a. ⁷ A saw-deb zũú n’a Nowe tɩ bɛr wõ a lɛ Naaŋmɩn na tɩ yel kʋ̀ ʋ a, yele bɛ na bɛ tɩ nyɛ̃ sɛr a ƴãw. Ʋ bɛ tɩ de dɩ̃ɛnʋ ƴãw a lɛ a Naaŋmɩn na tɩ yel a ƴãw ɛ, ɛ́ tɩ maalɩ gbor-kpɛ̃ɛ ʋlɛ nɩ a ʋ yir dem faafʋ ƴãw. A ŋa n’a ʋ tɩ wul a tẽ-daa sãwna, ɛ a Naaŋmɩn nyɛ̃ ʋ ɩ nɩ-mɩŋa, a ʋ saw-deb zũú. ⁸ A saw-deb zũú, a Naaŋmɩn na tɩ bʋɔlɩ a Abraham a, ʋ saw na ɛ yi cen tẽw a Naaŋmɩn na na kʋ̀ ʋ k’ʋ so ʋ a. Ʋ tɩ yi na cere, ɛ bɛ bãw be ʋ na cere a ɩ. ⁹ A saw-deb zũú n’a ʋ tɩ kpɛ a tẽw ʋl mɛ̃ nʋʋra a, a tẽw ʋl a Naaŋmɩn na yel k’ʋʋ na kʋ̀ ʋ na a. Pɛn-yir pʋɔ n’a ʋ tɩ kpɩɛr, ʋlɛ nɩ a Ɩzaakɩ nɩ a Zakɔb, a bɛl a Naaŋmɩn mɩ̀ na tɩ ƴãw a ʋlɩ nɔ-been nɛ kʋ̀ a. ¹⁰ Bʋ̃ʋ n’ʋ vɛ̃, a Abraham tɩ gùre nɩ tẽ-kpɛ̃ɛ bɛ na sʋ̃ɔ a pɛr ʋ kpɛmɛ a, ɛ a Naaŋmɩn ɩ a sob nɛ na tɩɛrɩ a mɩɛrʋ, ɛ lɛ ɩ a mɩɛrɛ a. ¹¹ A saw-deb zũú n’a Saara mɩ̀ tɩ páw a bie dɔwfʋ fãw, ʋ na saa tɩ kor baar a; ʋ na tɩ saw k’aa Naaŋmɩn na ƴãw a nʋɔr a, ŋmɛ̃ n ʋ ŋmɛ̃a. ¹² A a ŋa n’a nɩ-been yõ, na tɩ kpi ʋ za baar a, tɩ dɔw nɩbɛ bɛ yãwmɛ mɛ̃ a salom zu ŋmar-bie a, bɛ bɛ tɛr nʋɔr ɛ, mɛ̃ a kʋ̃ɔ-kpɛ̃ɛ nʋɔr biire a. ¹³ A saw-deb ʋ a nɩbɛ bɛ ŋa za tɩ tɛr kpi n, ɛ́ bɛ páw a bome a Naaŋmɩn na yel k’ʋʋ na kʋ̀ bɛ na ɩ, ɛ cɛ bɛ tɩ cãa na zãá ɛ nyɛ̃ a, ɛ pùor a, ɛ saw kɛ́ bɛ ɩ n nʋʋrɩ nɩ sɔr-tɔlbɛ a tẽw zu. ¹⁴ A bɛlɩ dem na ƴɛrɛ a a ŋa a, bɛ wul ɩ cãàmɩ́ lɛ kɛ sãà-tẽw n’ʋ bɛ bɔbr gʋɔr ɩ. ¹⁵ A tẽw ʋl bɛ na yi kɛ bɛr a tɩ n’ʋ bɛ tɩɛrɛ a, bɛ nãá nyɛ̃ nɩ vuo lɛb cen a ʋ pʋɔ. ¹⁶ Ɛ cɛ alɛ ɩrɛ mɛ̃ bom ʋ a, sãà-tẽw na vɩɛl zuo a n’ʋ bɛ tɩ bɔbr, a pɛr lɛ k’aa tẽ-vla pʋɔ dem. Lɛ so a bɛ ɩrɛ a Naaŋmɩn vĩ bɛ na bʋɔlɛ ʋ a bɛ Naaŋmɩn a ɩ; bʋ̃ʋ n’ʋ vɛ̃, ʋ cɔbr ɩ tẽ-kpɛ̃ɛ a bɛ ƴãw. ¹⁷ A saw-deb zũú n’a a Abraham tɩ maal ɩ a Ɩzaakɩ bawr, a lɛ a Naaŋmɩn na tɩ bãw kɛ ɩ ʋ kaa a. A ʋ bi-been n’ʋ ʋ tɩ maalɛ nɩ a bawr, ʋl Naaŋmɩn na tɩ ƴãw a nʋɔr kʋ̀ a, ¹⁸ ɛ yel a ŋa kʋ̀ ʋ a: «A Ɩzaakɩ n’ʋ na so fʋ páw a bʋʋrɛ ɩ̃ na yel k’ɩ̃ɩ na kʋ̀ b a a.» ¹⁹ Ɛ cɛ a Abraham tɩ tɩɛrɛ na kɛ Naaŋmɩn na tʋ̃ɔ na ɩ a Ɩzaakɩ ʋ lɛb yi a kũuni pʋɔ, lɛ so a Naaŋmɩn tɩ lɛb kʋ̀ ʋ a ʋ bie, ʋ ɩ nɩdaar yel bãwfʋ. ²⁰ A saw-deb zũú mɩ̀ n’a a Ɩzaakɩ tɩ ƴɛr nɔ-vla kʋ̀ a Zakɔb nɩ a Ezawu a nɩdaar ƴãw. ²¹ A saw-deb zũú n’a a Zakɔb, na tɩ waar na kpi a, tɩ ƴɛr nɔ-vla kʋ̀ a Zuzɛb bibiir been been, ɛ nyɔw a ʋ dabɔl nyʋɔr ƴãw ɛ gũu pùori Naaŋmɩn nɩ ʋ tʋɔra siwru. ²² A saw-deb zũú n’a a Zuzɛb, na tɩ ta kũu a, tɩ ƴɛr por a Ɩsɩrayɛl bibiir na na yi a Eziptɩ tẽw pʋɔ a yúor, ɛ yel a lɛ ʋ na bɔbr kɛ bɛ wa ɩ a ʋ kɔbɛ a. ²³ A saw-deb zũú n’a a Mõyiir na tɩ dɔw a, a sãà nɩ a mã tɩ sɔwl ʋ cuwr ata; bɛ tɩ nyɛ̃ ʋ na ʋ ɩ bie na vɩɛl a, ɛ́ bɛ bɛ zɔ dɛ̃bɩ̃ɛ a nãà nʋɔr zawrʋ ƴãw ɛ. ²⁴ A saw-deb zũú n’a a Mõyiir, na wa ɩ kpɛ̃ɛ baar a, bɛ saw bɛ bʋɔlɛ ʋ a Faarɔ̃ pɔwyaa bi-dɛb ɛ. ²⁵ Ʋ tɩ nyɛ̃ na, bɛ na na dɔwrɩ ʋ lãwnɩ a Naaŋmɩn nɩ-bʋʋrɛ a, a sa a yel-bier nʋ̃ɔ̀ ʋ na na wõ blã a. ²⁶ Ʋ mɩ̀ tɩ nyɛ̃ na, bɛ na na ɩ ʋ la mɛ̃ a Kɩrɩta bɛ na ɩ la a, a vɩɛl zuo a Eziptɩ tẽw na-bome; bʋ̃ʋ n’ʋ vɛ̃, a maalʋ na waar a n’a ʋ tɩ tori niwn jɩrɛ. ²⁷ A saw-deb zũú n’a a Mõyiir tɩ yi kɛ bɛr a Eziptɩ tẽw, ɛ́ bɛ tɩ zɔ dɛ̃bɩ̃ɛ a nãà na na nyɛ̃ suur a ƴãw ɛ; ʋ tɩ kpɛmɛ na be be, mɛ̃ ʋ nyɛrɛ nɩ a Naaŋmɩn nɩr na kʋ̃ tʋ̃ɔ nyɛ̃ a. ²⁸ A saw-deb zũú n’a ʋ tɩ maalɩ a Tɔlʋ cuw ɛ ƴãw bɛ ƴãw a zɩ̃ɩ a dɩ̃dɛɛ ƴãw, k’aa kũu malkɩ taa wa tʋɔr a Ɩsɩrayɛl nɩbɛ bi-dɛb-dãw-dɔwrɩ ɛ. ²⁹ A saw-deb zũú n’a bɛ tɩ gãw a Kʋ̃ɔ-kpɛ̃ɛ-zɩɛ mɛ̃ tẽsɔw kõw n’ʋ a, ɛ a Eziptɩ tẽw dem, mɩ̀ na tɩ yel kɛ bɛ ɩ kaa a, tu kʋ̃ɔ. ³⁰ A saw-deb zũú n’a a Ɩsɩrayɛl bibiir tɩ cen viiri koli a Zeriko tẽw dacĩ-kpɛ̃ɛ, bibie ayopõi, ʋ lo. ³¹ A saw-deb zũú n’a a pɔw-yɛm Arahab bɛ tɩ kpi lãw nɩ a bɛlɩ dem na bɛ tɩ de a Naaŋmɩn a ɩ, ʋ na tɩ de a nɩbɛ na wa a tẽw piwru ƴãw vla a. ³² Bʋ̃ʋ n’ʋ ɩ̃ na lɛb yel? Vuo bɛ ka be ɩ̃ na ƴɛr a Zedɩ̃ɔ, Barakɩ, Sãsɔ̃, Zɛfɩte, Daviir, Samɩɛl nɩ a Naaŋmɩn ƴɛr-manbɛ ƴɛrʋ ɛ. ³³ A saw-deb zũú, bɛ tɩ zɛb a tʋ̃ɔ na-mɩnɛ ten, ɛ tɩ tu a mɩnʋ pùor, ɛ páw a alɩ bome nɛ a Naaŋmɩn na yel k’ʋʋ na tɩr a a. Bɛ tɩ pàw nɩ gben nɛɛ, ³⁴ kpiiri vũu-bɛrɛ bɛrɛ bɛr, bɛ bɛ tɩ tʋ̃ɔ kpi a sɔ-kpɛ̃ɛ kũu ɛ. Bɛ tɩ lɛb a nyɛ̃ fãw a bàalʋ pùorí, bɛ tɩ wul ɩ a zɛbr zie kɛ́ bɛ ɩ n gãdaar, ɛ cã a dɔ̃ dem zɛbr nɩbɛ bɛr bɛ lɛb. ³⁵ A saw-deb zũú, pɔwbɛ tɩ lɛb a nyɛ̃ a bɛ nɩbɛ na kpi a, bɛ lɛb yi a kũu pʋɔ. Ɛ cɛ bɛ tɩ dɔwr ɩ bɛ mɩnɛ tɩ kʋ́; bɛ bɛ tɩ saw bɛ na faa bɛ ɩ, kɛ́ bɛ tʋ̃ɔ wa lɛb yi a kũu pʋɔ páw a nyɔ-vʋʋrʋ na vɩɛl zuo a. ³⁶ Bɛ mɩ̀ tɩ ɩ n bɛ mɩnɛ la ɛ fɔb bɛ, ɛ ƴãw bɛ mɩnɛ bamɛ lɔb ƴãw gaso pʋɔ. ³⁷ Bɛ tɩ lɔb ɩ bɛ mɩnɛ nɩ kʋsɛbɛ kʋ́, fɔw bɛ mɩnɛ ŋma ziir ayiri nɩ sɔ-nyɩmɛ, kʋ́ bɛ mɩnɛ nɩ sɔ-kpɛ̃ɛ. Bɩɩ bɛ mɩ́ tɩ cɔlɛ na gʋɔr, su píir bɩɩ bʋʋr gamɛ kparɩ. Bɛ bɛ tɩ tɛr bom ɛ, ɛ́ bɛ ɩrɛ a kpɩɛr bɛ, dɔwrɛ nɩ bɛ. ³⁸ A tẽ-daa bɛ tɩ sɛw taa nɩ a nɩbɛ bɛ ŋa ɩ. Bɛ mɩ́ tɩ bɔrɛ na gʋɔr a wɛja-kpalɩ pʋɔ nɩ a tan pʋɔ, ɛ kpɩɛr a tãw bɔwrɩ pʋɔ nɩ a tẽw bɔwrɩ pʋɔ. ³⁹ A Naaŋmɩn tɩ dɩ n a bɛ za dãsɩɛ a bɛ saw-deb zũú, ɛ cɛ bɛ bɛ tɩ páw a ʋlɩ bom nɛ ʋ na ƴãw nʋɔr k’ʋʋ na tɩr a a ɩ. ⁴⁰ Bʋ̃ʋ n’ʋ vɛ̃, a Naaŋmɩn tɩ de nɩ niwn bãwnɩ tɩ bom na vɩɛl zuo a, kɛ́ bɛ ta ta a vɩɛlʋ zie ɛ bɛr tɩ ɛ.

¹ A na ɩ a ŋa a, a tɩɩm mɩ̀ na tɛr yel-mɩn dem bɛ jil koli tɩ sɛw a ŋa za a, nyɩ ɩ tɩ lɔb tuor za na gbine a tɩ cenu a bɛr, nɩ a yel-bier na bɛ mɩ́ yaa kɛ nyɔw tɩ a, ɛ dɩ kanyir zɔrɛ nɩ a dãw-taa zɔba bɛ na yel kɛ tɩ zɔrɛ a. ² Tɩ tori niwn jɩrɛ a Yeezu na ɩ a tɩ saw-deb tib zie nɩ a nʋɔr kʋb zie a. Ʋ bɛr ɩ a nʋ̃ɔ̀ ʋ na tɩ so a, ɛ bɛ zɔ vĩ ɛ, ɛ saw kpi a da-gara zu. Ƴɛrɛ ŋa a, ʋ zɩ̃ n a Naaŋmɩn naalʋ da-kɔw dʋrʋ lowr. ³ Nyɩ lɛb tɩɛrɩ a ʋ yele, a lɛ a yel-bebe dem na bɛ tɩ de a ʋ yele towtow, ʋʋ dɩ kanyir a. Lɛ n’a nyɩ kʋ̃ saw a balʋ tʋ̃ɔ nyɩ ɛ. ⁴ A zɛbr nyɩ na zɛbr ɩ a yel-bier a, nyɩ cãa bɛ zɛb tɩ kpi n sɛr ɛ, ⁵ ɛ yiiri a kpaalʋ ŋa bɛr a Naaŋmɩn na kpaalɛ nyɩ mɛ̃ a ʋ bibiir a: «Ɩ̃ bie e, ta de a Sore kpãafʋ ʋ ɩ bʋ̃-zaa lɛ ɩ, fʋ̃ʋ wa sãw ʋ yere fʋ a, ta tɛr pʋ-sãwna ɩ. ⁶ Bʋ̃ʋ n’ʋ vɛ̃, a Sore mɩ́ kpãa nɩ a sob nɛ ʋ na nɔnɛ a, ʋ mɩ́ fɔb ɩ sob nɛ ʋ na de ʋ ɩ a ʋ bie a.» ⁷ A tuo nyɩ na wone a, a nyɩ kpãafʋ ƴãw n’a. A Naaŋmɩn ɩrɛ nɩ a nyɩ zie mɛ̃ a ʋ bibiir a. Ɛ cɛ bi-buor sob ʋ a sãà bɛ mɩ́ kpãa? ⁸ A Naaŋmɩn bɛ wa kpãanɛ nyɩ mɛ̃ a lɛ ʋ na kpãanɛ a ʋ bibiir za a, nyɩ ɩ n zɩ̃-yir-bibiir, nyɩ bɛ ɩ a bibiir tɛɛ za ɩ. ⁹ Tɩ tɩ tɛr ɩ a tɩ sãà mɩnɛ a tẽw zu ka, bɛ kpãanɛ tɩ, ɛ́ tɩ ƴãwnɛ bɛ; ɛ́ bɛ nãa yere a tɩ Sãà na be a tẽ-vla pʋɔ a? A fɛr a kɛ tɩ sawr a ʋ nʋɔr, ʋʋ kʋ̀ tɩ a nyɔ-vʋʋrʋ. ¹⁰ A tɩ sãà mɩnɛ mɩ́ tɩ kpãa tɩ nɩ blã lɛ ƴãw, mɛ̃ a lɛ bɛ na mɩ́ tɩ nyɛ̃ a sɛw taa nɩ a. Ɛ cɛ a Naaŋmɩn ʋl a, a tɩ vla ƴãw n’a ʋ mɩ́ kpãanɛ tɩ, kɛ́ tɩ tʋ̃ɔ pʋɔ a ʋ sonu pʋɔ. ¹¹ Kpãafʋ za a ʋlɩ pɛr nɛ pʋɔ bɛ mɩ́ sãá ɩ nʋ̃ɔ̀ yel ɛ, pʋ-sãwna mɩ́ n’a. Ɛ cɛ a pùorí a, a mɩ́ ɩ n ƴã-ɓaarʋ nɩ mɩnʋ a bɛlɩ dem na nyɛ̃ a kpãafʋ a zie. ¹² A na ɩ lɛ a, nyɩ lɛb dɔl a nyɩ nuru na yʋɔrɛ a, nɩ a nyɩ dume na mawr a. ¹³ Nyɩ maalɩ soli-dẽdẽ a nyɩ gbɛ̃ɛ ƴãw, a wʋba gbɛr taa nʋrɛ ɩ, ʋʋ nɩ̃ɛ sanɩ. ¹⁴ Nyɩ ƴãw fãw a ƴã-ɓaarʋ be nyɩmɛ nɩ a nɩbɛ za cara pʋɔ, ɛ nyɩ bɔbr a sonu, bʋ̃ʋ n’ʋ vɛ̃, ʋlɛ bɛ wa ka be a, nɩr za kʋ̃ tʋ̃ɔ nyɛ̃ a Sore ɩ. ¹⁵ Nyɩ gu vla nɩr za taa gùre pùor cɔwr a Naaŋmɩn maalʋ ɛ, nɩr za taa wa ɩ mɛ̃ tɩ-nyɩwr-tuo na bule sãwnɛ nɩ-yaga bɛrɛ a ɩ. ¹⁶ Nyɩ gu vla kãw za taa wa ɩ pɩ̃ɔ-yel-maalɛ ɩ, bɩɩ ɩrɛ a bʋ̃-son laar mɛ̃ a Ezawu a ɩ; ʋ tɩ de nɩ a ʋ kpɛ̃ɛnʋ tɛw nɩ bʋ̃-dɩrɩ daƴẽn yõ ƴãw. ¹⁷ Nyɩ bãwnɩ a na, a pùorí ʋ na wa bɔbr k’aa ʋ sãà ƴɛr nɔ-vla kʋ̀ ʋ a, ʋ bɛ saw a lɛ kʋ̀ ʋ ɛ. Ʋ tɩ bɔ n a lɛ ʋ na na ɩ lɩɛbɩ a yele a gu, ʋ na saa tɩ lɔbr nuru zɛlɛ kone nɩ a. ¹⁸ Nyɩ bɛ taw pɩɛlɩ bom bɛ na na tʋ̃ɔ tɔ a ɩ, a Sɩnayi tãw nɩ a ʋ vũu na dɩrɛ a, a lige nɩ a ulu, a sɛsɛb kpɛ̃ɛ, ¹⁹ wɩɛ kɔkɔr nɩ nɩr kɔkɔr ɛ. A Ɩsɩrayɛl bibiir na tɩ wõ a kɔkɔr ŋa a, bɛ tɩ zɛlɛ na kɛ́ ƴɛrʋ ta lɛ ƴɛr dɔwlɩ ɛ. ²⁰ Bʋ̃ʋ n’ʋ vɛ̃, bɛ bɛ tɩ tʋɔr tɛrɛ a nʋɔr ŋa na tɩ ƴãw a ɩ: «Dʋ̃w saa wa n’ʋ tɔ a tãw a, bɛ na lɔb ɩ ʋ nɩ kʋsɛbɛ kʋ́.» ²¹ A yel bɛ na tɩ nyɛ̃ a, tɩ sɩrɩ na ɩrɛ dɛ̃bɩ̃ɛ yaga, a Mõyiir yel: «Dɛ̃bɩ̃ɛ ɩrɛ mɛ̃ na, ɩ̃ mawr.» ²² Sɩyɔ̃ tãw n’ʋ nyɩ taw pɩɛlɩ, nɩ a Naaŋmɩn na vʋʋrɛ a tẽ-kpɛ̃ɛ, a tẽ-vla pʋɔ Zeruzalɛm nɩ a ʋ malkɩ tu-tu-tur. ²³ Nyɩ taw na pɩɛlɩ cuw-dɩrbɛ lãw, a Naaŋmɩn bi-dãw-dɔwrɩ, a yee na sɛb a tẽ-vla pʋɔ a. Nyɩ taw na pɩɛlɩ a Naaŋmɩn, na ɩ a nɩbɛ za ƴɛr-maalɛ a, ɛ taw pɩɛlɩ a nɩ-mɩn bɛl na nyɛ̃ a vɩɛlʋ baarɩ a sɩ́ɩr. ²⁴ Nyɩ taw na pɩɛlɩ a Yeezu na ɩ Wõ-ta-paala lɔ̃lʋɔrɛ a, nɩ a ʋ zɩ̃ɩ na cir a, a zɩ̃ɩ a ŋa na ƴɛrɛ vla zuo a Abɛl dem a. ²⁵ Nyɩ gu vla taa wa zawrɛ a sob nɛ na ƴɛrɛ a nyɩ zie a ƴɛrʋ bɛr-wob ɛ. Bʋ̃ʋ n’ʋ vɛ̃, a bɛlɩ dem, na tɩ zawrɩ a sob nɛ na kpãanɛ bɛ a tẽw zu ka a bɛr a, bɛ bɛ cɩ̃ɛ ɩ, ɛ̀ bɛ nãa yere a tɩɩm ɩ, tɩ mɩ̀ kʋ̃ cɩ̃ɛ ɩ, tɩmɛ wa gur pùor cɔw a sob nɛ na ƴɛrɛ a tɩ zie a tẽ-vla pʋɔ a. ²⁶ A koro za a, a Naaŋmɩn kɔkɔr tɩ dam ɩ a tẽw, ɛ cɛ ƴɛrɛ ŋa a, ʋ yel ɩ a ŋa: «Ɩ̃ na lɛb a báa dam a tẽw lãw nɩ a salom.» ²⁷ A ƴɛr-bie a ŋa: «lɛb a báa» wul a k’aa bʋ̃-iri na dam a ɛ bɔr, k’aa bom ʋl na bɛ tɛr damnʋ a be be. ²⁸ A na ɩ a ŋa tɩ páwr naalʋ tẽw na bɛ tɛr damnʋ a, nyɩ ɩ tɩ tɛr a maalʋ ŋa vla, tʋ̃ɔ puore nɩ a Naaŋmɩn mɛ̃ a lɛ a na nʋmɛ a ʋ zie a, tɛr ɩ a ʋ ƴãwfʋ nɩ a ʋ zɔba. ²⁹ Bʋ̃ʋ n’ʋ so, a tɩ Naaŋmɩn ɩ n vũu na dɩrɛ a.

¹ Nyɩ cãa nɔnɛ taa mɛ̃ yɛbr a. ² Nyɩ taa yiire a sãanʋ deb yele bɛrɛ ɩ. Bʋ̃ʋ n’ʋ vɛ̃, a sãanʋ deb ŋa pʋɔ n’a bɛ mɩnɛ de malkɩ mɩnɛ sãanʋ ɛ bɛ bãwnɩ a ɩ. ³ Nyɩ tɛr a gaso pʋɔ dem tɩɛrʋ mɛ̃ nyɩ lãw nɩ bɛ na be a gaso pʋɔ a; nyɩ tɛr a bɛlɩ dem bɛ na dɔwrɛ a tɩɛrʋ, nyɩ mɩ̀ na tɛr ƴãgamɛ a. ⁴ A nɩbɛ za, bɛ tɛr maal-ɩrɛ a kul-taa ƴãw, a dɛbr nɩ a pɔwbɛ na kul taa a, bɛ be taa bɛl tɛwr ƴãw. Bʋ̃ʋ n’ʋ vɛ̃, Naaŋmɩn na maal ɩ nɩ a pɩ̃ɔ-yel-maalbɛ nɩ a pɔw-gaa-yel-bier-maalbɛ ƴɛrʋ. ⁵ A libi-nɔ̃w ta tʋ̃ɔ nyɩ ɛ; a lɛ nyɩ na tɛr a, a man nyɩ. Bʋ̃ʋ n’ʋ so, a Naaŋmɩn yel a: «Ɩ̃ bɛ be za na bɛr fʋ ɛ, ɩ̃ kʋ̃ jɛ b bɛr towtow ɛ.» ⁶ Lɛ so tɩ na tʋ̃ɔ bɛr tɩɛrʋ ɛ yel: «A Sore n’ɩ a ɩ̃ sõwne, ɩ̃ kʋ̃ zɔrɛ bom za dɛ̃bɩ̃ɛ ɩ. Bʋ̃ʋ n’ʋ nɩsaal na tʋ̃ɔ ɩ m?» ⁷ Nyɩ lɛb tɩɛrɩ a nyɩ niwn-dierbɛ yele, bɛl na tɩ manɩ a Naaŋmɩn ƴɛrʋ kʋ̀ nyɩ a. Nyɩ nyɛ̃ a lɛ bɛ na vʋʋrɩ tɩ kpi n a, nyɩ cɔwrɛ a bɛ Naaŋmɩn-saw-deb. ⁸ A Yeezu Kɩrɩta been n’ʋ, a zãa nɩ a dɩ̃a, nɩ a yome za. ⁹ Nyɩ ta saw wul-pɛ-bʋʋrɛ za nɩ wul-yoru wa bɔr ɩ nyɩ ɛ. Naaŋmɩn maalʋ n’ʋ a maal ɩ k’ʋʋ mɩ́ ɩ a nɩr ʋ kpɛmɛ socir, bʋ̃-dɩrɩ bɛ n’a ɩ; a bɛlɩ dem na tuur a nɛɛ bɛ na ƴãw caarɩ a bʋ̃-dɩrɩ a ŋa a, bɛ bɛ dãw nyɛ̃ tɔnɛ a pʋɔ ɩ. ¹⁰ Tɩ tɛr ɩ bawr-maal-kuur, a pɛn-sɛw pʋɔ bawr-maalbɛ na bɛ tɛr sɔr na dɩ bom na dɔwlɩ a ʋ zu a ɩ. ¹¹ A dʋn al, a bawr-maal-kara na mɩ́ ɩ a zɩ̃ɩ kpɛ n a zi-sõw-za-pʋɔ-zi-sõw pʋɔ, tɩ de tɩr a yel-bebe suur pawfʋ ƴãw a, bɛ mɩ́ yi na zaa nɩ a dʋn a ŋa ƴãgamɛ a kapamɛ pʋɔ tɩ nyɩw bɛr. ¹² A lɛ n’a so a Yeezu mɩ̀ yi zaa a tẽw pʋɔ tɩ kpi, k’aa ʋl mɩŋa zɩ̃ɩ tʋ̃ɔ ɩ a nɩbɛ bɛ ɩ son. ¹³ A na ɩ a ŋa a, nyɩ ɩ tɩ yi a kapamɛ pʋɔ tuor ʋ, ɛ saw de a ʋlɩ vĩ-been nɛ. ¹⁴ Bʋ̃ʋ n’ʋ vɛ̃, a tẽw zu ka a, tɩ bɛ tɛr tẽ-kpɛ̃ɛ ʋ be be kʋra lɛ ɩ. A tẽ-kpɛ̃ɛ ʋl na waar a n’ʋ tɩ bɔbr. ¹⁵ Tɩ tu a Yeezu maalɛ danʋ bawr kʋra lɛ kʋ̀rɛ a Naaŋmɩn, a pɛr lɛ kɛ danʋ na yire nɛɛ na íre a ʋ yúor a pʋɔ. ¹⁶ Nyɩ taa yiire a nɩbɛ maalʋ nɩ a sõw-taa bɛrɛ ɩ, a bawr a ŋa taabɛ n’a mɩ́ nʋmɛ a Naaŋmɩn zie. ¹⁷ Nyɩ sawr a nyɩ niwn-dierbɛ nʋɔr ɛ siwre nyɩ tʋɔra a bɛ zie. Bʋ̃ʋ n’ʋ vɛ̃, bɛ kaarɛ nɩ a nyɩ zie kʋra lɛ, mɛ̃ Naaŋmɩn nãa wa sowri bɛ na a. Nyɩ ɩrɛ bɛ tʋ̃ɔ tone a bɛ tome nɩ nʋ̃ɔ̀, ɛ ta tone zɛbr ɩ ɛ, a kʋ̃ wa n tɔnɛ za a nyɩ zie ɩ. ¹⁸ Nyɩ puore kʋ̀rɛ tɩ. Tɩ bãwnɩ a na a tɩ tɩɛrʋ na vɩɛl a, bʋ̃ʋ n’ʋ vɛ̃, tɩ bɔbr a kɛ tɩ ɩrɛ vla a yele za pʋɔ. ¹⁹ Ɩ̃ zɛlɛ nyɩ na kɛ́ nyɩ puore kpɛ̃w za, a Naaŋmɩn saw ɩ̃ lɛb wa a nyɩ zie fɔ̃w. ²⁰ A ƴã-ɓaarʋ Naaŋmɩn ɩ na a tɩ Sore Yeezu, na lɩɛbɩ a pi-cɩ̃ɩn-kpɛ̃ɛ, a zɩ̃ɩ ʋ na cir bin nɩ Wõ-taa na be kʋra lɛ a ƴãw a, ʋ ɩ na ʋ lɛb yi a kũuni pʋɔ. ²¹ A Naaŋmɩn ŋa a, ʋ ɩ kɛ̀ nyɩ mɩ́ tʋ̃ɔ yel-vla za maalɩ, tʋ̃ɔ maalɛ a ʋ pʋ-tɩɛrʋ; ʋ mɩ́ maalɩ a lɛ na pɛlɩ a ʋ pʋɔ a, a tɩ zie, a Yeezu Kɩrɩta ƴãw, ʋl na so danʋ a yome yome za a. Amɛn. ²² Yɛbr ɩ, ɩ̃ zɛlɛ nyɩ na kɛ́ nyɩ dɩ kanyir bɛr wõ a kpaalʋ ƴɛr-bie a ŋa, ŋmãa ŋmãa lɛ n’a ɩ̃ sɛb nyɩ. ²³ Nyɩ bãwnɩ a kɛ́ bɛ lɛb a bɛr a tɩ yɛb Timote. Ʋlɛ wa wa fɔ̃w a, ɩ̃ na wa na wa nyɛ̃ nyɩ, mãa nɩ a ʋl za. ²⁴ Nyɩ pùori a nyɩ niwn-dierbɛ za nɩ a Kɩrɩta-nɩbɛ za. A bɛl na yi a Ɩtali tẽw a, puore nyɩ na. ²⁵ A Naaŋmɩn maalʋ, ʋ be a nyɩ za zie!