GALASI

GALASI

¹ A mãa Pol na ɩ nɩ-tona a, ɛ a bɛ ɩ nɩsaalbɛ nɛ bɛ so, bɩɩ nɩsaal zie n’a a yi a, ɛ ɩ a Yeezu Kɩrɩta zie nɩ a Naaŋmɩn Sãà, na ɩ a Yeezu Kɩrɩta ʋ lɛb yi a kũuni pʋɔ a zie n’a a, ² mãa nɩ a yɛbr za na be a ɩ̃ zie ka a, tɩmɛ nɛ bɛ sɛbr a sɛbɛ ŋa kʋ̀rɛ a Galasi tẽw Lãw-yie: ³ a Naaŋmɩn tɩ Sãà nɩ a Sore Yeezu Kɩrɩta, bɛ kʋ̀ nyɩ maalʋ nɩ ƴã-ɓaarʋ. ⁴ A Kɩrɩta de nɩ ʋ tʋɔra tɩr, a tɩ yel-bebe ƴãw, k’ʋʋ tʋ̃ɔ faa tɩ a dɩ̃a zie ŋa na bɛ vɩɛl a pʋɔ, mɛ̃ a lɛ a Naaŋmɩn tɩ Sãà na bɔbr a. ⁵ A Naaŋmɩn so yúor-vɩɛlʋ-danʋ yome yome za. Amɛn. ⁶ Nʋɔr ɓãa mɛ̃ na, nyɩ na gùr pùor fɔ̃w lɛ kʋ̀ a Naaŋmɩn na bʋɔlɩ nyɩ a Kɩrɩta maalʋ zũú a, ɛ tu Yel-nʋ̃ɔ̀ yũo pùor a. ⁷ A bɛ kaar mɛ̃ Yel-nʋ̃ɔ̀ kãw lɛb a be be ɩ, nɩbɛ bɛ mɩnɛ kãw nɛ bɛ be be damnɛ nyɩ, ɛ bɔbr kɛ bɛ lɩɛbɩ a Kɩrɩta Yel-nʋ̃ɔ̀. ⁸ Ɛ cɛ nɩr wa ɩ mɛ̃ ʋ manɛ nɩ Yel-nʋ̃ɔ̀ kʋ̀rɛ nyɩ, na bɛ ɩ a ʋl tɩ na manɩ kʋ̀ nyɩ a, tɩmɛ saa nɛ bɛ bɩɩ malkɩ na yi salom zu a saa n’ʋ a, a Naaŋmɩn ŋmɛ-ƴãw a tuur ʋ! ⁹ Tɩ tɩ dãw na yel kʋ̀ nyɩ, ɛ ɩ̃ lɛb yere kʋ̀rɛ nyɩ a ƴɛrɛ ŋa: nɩr wa manɛ Yel-nʋ̃ɔ̀ kʋ̀rɛ nyɩ na bɛ ɩ a ʋl nyɩ na wõ a, a Naaŋmɩn ŋmɛ-ƴãw a tuur ʋ! ¹⁰ A ƴɛrɛ ŋa a, nɩsaalbɛ nɛ bɛ ɩ̃ bɔbr kɛ́ bɛ kpɛ m bɩɩ Naaŋmɩn n’ʋ? Nɩsaalbɛ nɛ bɛ ɩ̃ bɔbr k’ɩ̃ɩ ɩrɛ nʋ̃ɔ̀ kpɩɛr bɩɩ? Mãa tɩ cãa ɩ mɛ̃ ɩ̃ bɔbr a k’ɩ̃ɩ ɩrɛ nʋ̃ɔ̀ kpɩɛr a nɩsaalbɛ a, ɩ̃ kʋ̃ʋ ɩ a Kɩrɩta tõ-tõne ɩ. ¹¹ Yɛbr ɩ, ɩ̃ yere na kʋ̀rɛ nyɩ, a Yel-nʋ̃ɔ̀ ɩ̃ na manɩ kʋ̀ nyɩ a bɛ yi nɩsaal zie ɩ. ¹² Ɩ̃ mɩ̀ bɛ páw ʋ nɩsaal zie ɩ, ɛ́ nɩsaal mɩ̀ bɛ n’ʋ zànɩ nɩ mɛ̃ ɩ̃ bãw ʋ ɛ, a Yeezu Kɩrɩta mɩŋa n’ʋ wul mɛ̃. ¹³ Nyɩ wõ na bɛ na manɩ a ɩ̃ ɩb, a lɛn daar ɩ̃ na tɩ cãa be a Zifʋ mɩnɛ puoru pʋɔ a: a lɛ ɩ̃ na tɩ dɔwrɛ a Naaŋmɩn Lãw-yir bɛ dɩ vuo a, ɛ ƴãw fãw ɩrɛ k’ʋʋ lo a. ¹⁴ Ɩ̃ tɩ gãw nɩ a ɩ̃ yɛbr yaga zie na ɩ a ɩ̃ lãw-dɔw-taabɛ a, a Zifʋ mɩnɛ puoru yele pʋɔ. Ɩ̃ tɩ tʋlɛ na gãw bɛ a tɩ sãakʋ̃-kore yele pʋɔ. ¹⁵ Ɛ cɛ, a Naaŋmɩn na kaa ir mɛ̃ bʋɔlɩ mɛ̃ a ʋ maalʋ zũú a ʋ tome ƴãw a, ɩ̃ɩ cãa a ɩ̃ mã pùorí a, ʋ na tɩ nyɛ̃ a sɛw ¹⁶ k’ʋʋ wul mɛ̃ a ʋ Bie, ɩ̃ tʋ̃ɔ manɛ ʋ kʋ̀rɛ a nɩ-bʋʋr-yoru a, ɩ̃ bɛ tɩ sowri bom nɩsaal kãw za ɩ; ¹⁷ ɩ̃ mɩ̀ bɛ tɩ do a Zeruzalɛm a bɛl na tɩ de niwn ɩ nɩ-toni a ɩ̃ ƴãw a zie ɩ; ɛ cɛ ɩ̃ tɩ ìr ɩ daadaa lɛ cen a Arabi, a pùorí ɩ̃ lɛb wa a Damasɩ. ¹⁸ Yome ata pùorí n’a, ɩ̃ tɩ do a Zeruzalɛm k’ɩ̃ɩ tɩ bãw a Pɩɛr, ɛ ɩ̃ tɩ maal ɩ bibie pie nɩ anũu a ʋ zie. ¹⁹ Ɩ̃ bɛ tɩ nyɛ̃ nɩ-tona kãw za ƴãw pʋɔ, ʋ bɛ ɩ a Sore yɛb Zakɩ ɛ. ²⁰ A a ŋa ɩ̃ na sɛbr nyɩ a ɩ n sɩza, Naaŋmɩn niŋé n’a ɩ̃ yere, ɩ̃ bɛ ŋmarɛ ziri ɛ. ²¹ Al pùorí, ɩ̃ cen a Siiri nɩ a Silisi ten voru pʋɔ. ²² Ɛ cɛ a Zude tẽw Kɩrɩta Lãw-yie nɩbɛ bɛ tɩ caarɩ bãw mɛ̃ ɩ. ²³ Wob tɛwr a bɛ tɩ wõ bɛ yere kɛ: «A sob nɛ na tɩ dãw dɔwrɛ tɩ a, a ƴɛrɛ ŋa a, ʋ manɛ nɩ a Naaŋmɩn-saw-deb ʋ na tɩ ɩrɛ k’ʋʋ lo a.» ²⁴ Ɛ́ bɛ tɩ danɛ nɩ a Naaŋmɩn a ɩ̃ ƴãw.

¹ Yome pie nɩ anaar pùorí, ɩ̃ tɩ lɛb a cen a Zeruzalɛm, mãa nɩ Banabasɩ. Ɩ̃ mɩ̀ tɩ tɛr ɩ Títɩ̀ ƴãw pʋɔ. ² Yel-wula Naaŋmɩn na ɩ ɩ̃ bãw a n’a so ɩ̃ tɩ do. Ɩ̃ tɩ man nɩ a Yel-nʋ̃ɔ̀ ɩ̃ na hiere a nɩ-bʋʋr-yoru sɔgɔ a kʋ̀ a Kɩrɩta-nɩbɛ, al pùorí, ɩ̃ man ʋ kʋ̀ a nɩ-bɛrɛ bɛ tɛwr zie. Ɩ̃ bɛ tɩ bɔbr k’aa tome ɩ̃ na tõ, ɛ cãa tone a, ɩ zawla ɩ. ³ Ɛ cɛ a Títɩ̀ na bɩɛlɛ mɛ̃, ɛ ɩ Gɩrɛkɩ a, bɛ bɛ tɩ fɛr ʋ k’ʋʋ ɩ bɛ ŋmãa a ʋ yʋɔr ɛ, ⁴ yɛb-bɛlɛ-bɛlɛ bɛ mɩnɛ kãw na saa tɩ kpɛ jɛr a tɩ pʋɔ, ɛ́ bɔbr kɛ bɛ ŋmãa ʋ a yʋɔr a. A nɩbɛ bɛ ŋa tɩ sɔwl a kpɛ a tɩ pʋɔ, kɛ́ bɛ piwre a so-tɩ-tʋɔra tɩ na páw a Yeezu Kɩrɩta zie a, ɛ lɛ tɛr tɩ tɩ ƴãw a Naaŋmɩn-Wulu sawfʋ gbãgbaalʋ pʋɔ. ⁵ Tɩ bɛ tɩ saw kʋ̀ a nɩbɛ bɛ ŋa ɛ a ɩ zaa pʋrɩ lɛ ɩ, k’aa Yel-nʋ̃ɔ̀ yel-mɩŋa cãa be be a nyɩ ƴãw. ⁶ Ɛ cɛ a nɩ-bɛrɛ ƴãw a, - bɛlɩ nɩbɛ nɛ bʋʋrɛ bɛ na tɩ ɩ a lɛn daar a, ɩ̃ bɛ cɛlɛ a ɩ, bʋ̃ʋ n’ʋ vɛ̃, Naaŋmɩn bɛ jɩrɛ nɩr niwn ɛ - a nɩ-bɛrɛ bɛ ŋa bɛ tɩ ƴãw mɛ̃ fɛrʋ kãw dɔwlɩ ɛ. ⁷ Bɛ nɩ̃ɛ na tɩ nyɛ̃ k’aa Naaŋmɩn kʋ̀ m ɩ a Yel-nʋ̃ɔ̀ hieru bon a bɛl na bɛ ɩ Zifʋ a ƴãw, mɛ̃ a lɛn tɔr za ʋ na tɩ kʋ̀ a Yel-nʋ̃ɔ̀ hieru ton a Pɩɛr a Zifʋ mɩnɛ ƴãw a. ⁸ Bʋ̃ʋ n’ʋ vɛ̃, a Naaŋmɩn na ƴãw a Pɩɛr ʋ ɩ a nɩ-tona a Zifʋ mɩnɛ zie a, lɛ mɩ̀ n’a ʋ ƴãw ɩ̃ ɩ a nɩ-tona a nɩ-bʋʋr-yoru zie. ⁹ A Zakɩ, Pɩɛr, nɩ Zã, bɛl a nɩbɛ na tɩ nyɛ̃ bɛ ɩ mɛ̃ a Lãw-yir kpule a, tɩ nyɔw tɩ nɩ nũú pùori, mãa nɩ a Banabasɩ, a wul kɛ tɩɩm nɩ bɛl lãw nɩ taa. A ŋa n’a tɩ za lãw wõ taa, kɛ́ tɩɩm na cen nɩ a nɩ-bʋʋr-yoru zie, ɛ bɛl cen a Zifʋ mɩnɛ zie. ¹⁰ A bɛ zɛlʋ tɛwr tɩ n’ɩ kɛ tɩ tɛr a Zeruzalɛm Lãw-yir nan dem tɩɛrʋ, ɛ́ lɛn tɔr za n’a ɩ̃ ƴãw fãw ɩ. ¹¹ Ɛ cɛ, a Pɩɛr na tɩ wa a Ãtɩɔsɩ a, ɩ̃ tɩ zɛb ɩ ʋ nɩ cãàmɩ́ lɛ, ʋ na tɩ sãw a ƴãw. ¹² Bʋ̃ʋ n’ʋ vɛ̃, a nɩbɛ a Zakɩ na tɩ tõ a, na bɛ tɩ ta sɛr a, a Pɩɛr mɩ́ tɩ lãw na dɩrɛ nɩ a Kɩrɩta-nɩbɛ bɛl na bɛ ɩ a Zifʋ mɩnɛ a; ɛ cɛ bɛ na wa ta baar a, ʋ taw na yi pùor bɛ cãa lãwnɛ nɩ bɛ ɩ; a bɛl na tu a yʋɔr-ŋmãafʋ pùor a dɛ̃bɩ̃ɛ n’a ʋ tɩ zɔrɛ. ¹³ A Zifʋ ŋmãa bɛl na cɛ a, mɩ̀ na tɩ ɩrɛ a lɛ a Pɩɛr na ɩ a, a Banabasɩ tɔr za mɩ̀ tɩ bɛr ɩ a bɛ nɩsaal-libelibe ɩb a ŋa bɛlɩ nyɔw ʋ, ʋ mɩ̀ ɩrɛ mɛ̃ a bɛl a. ¹⁴ Ɛ cɛ ɩ̃ na wa nyɛ̃ k’aa bɛ ɩb bɛ tori tu a Yel-nʋ̃ɔ̀ yel-mɩŋa a, ɩ̃ yel ɩ a Pɩɛr a nɩbɛ za niŋé: «Fʋ̃ʋ na ɩ Zifʋ a, fʋ bɛ ɩrɛ mɛ̃ Zifʋ a ɩ, ɛ ɩrɛ mɛ̃ nɩ-bʋʋr-yoru nɩr a, ŋmɩŋmɩn za n’a, fʋ na tʋ̃ɔ fɛr nɩ-bʋʋr-yoru nɩbɛ ƴãw bɛ ɩrɛ mɛ̃ Zifʋ mɩnɛ a?» ¹⁵ A tɩɩm a, tɩ dɔw na ɩ Zifʋ mɩnɛ, tɩ bɛ yi nɩ-bʋʋr-yoru pʋɔ ɩ, bɛl na bɛ bãw a Naaŋmɩn-Wulu a. ¹⁶ Ɛ cɛ, tɩ bãwnɩ a na a nɩsaal na bɛ mɩ́ ɩ nɩ-mɩŋa a Naaŋmɩn niŋé a Mõyiir-Wulu sawfʋ ɩ-ɩrɩ zũú a, a Yeezu Kɩrɩta saw-deb tɛwr zũú mɩ́ n’a. A tɩɩm a, tɩ saw na de a Yeezu Kɩrɩta kɛ́ tɩ tʋ̃ɔ páw a mɩnʋ a Kɩrɩta saw-deb zũú, ɛ a ta ɩ Wulu sawfʋ ɩ-ɩrɩ ƴãw n’a ɩ. Bʋ̃ʋ n’ʋ vɛ̃, nɩr za bɛ be na ɩ nɩ-mɩŋa a Wulu sawfʋ ɩ-ɩrɩ zũú ɛ. ¹⁷ Ɛ cɛ tɩɩm na bɔbr kɛ́ tɩ ɩ nɩ-mɩn a Kɩrɩta ƴãw a, tɩmɛ wa sãá ɩ yel-bebe dem mɩ̀ a, a wul a k’aa Kɩrɩta tone nɩ yel-bier tome bɩɩ? Lɛ bɛ n’a towtow ɛ! ¹⁸ Bʋ̃ʋ n’ʋ vɛ̃, mãa wa lɛb de a Wulu ɩ̃ na zawrɩ bɛr a, mãa mɩŋa n’ʋ wul k’ɩ̃ɩ ɩ n nɔ-zawrɛ. ¹⁹ Bʋ̃ʋ n’ʋ vɛ̃, alɛ wa ɩ a Naaŋmɩn-Wulu ƴãw a, ɩ̃ kpi na, ɛ a ɩ̃ kũu yi a Naaŋmɩn-Wulu zie, k’ɩ̃ɩ tʋ̃ɔ vʋʋrɛ a Naaŋmɩn ƴãw. Bɛ kpa m ɩ a da-gara zu lãwnɩ a Kɩrɩta. ²⁰ Ɩ̃ vʋʋrɛ na, ɛ cɛ mãa bɛ cãa n’ʋ vʋʋrɛ ɩ, Kɩrɩta n’ʋ vʋʋrɛ a ɩ̃ pʋɔ. Bʋ̃ʋ n’ʋ so, a ɩ̃ nɩsaal nyɔ-vʋʋrʋ a ƴɛrɛ ŋa a, ɩ̃ vʋʋrɛ ʋ na a Naaŋmɩn Bie saw-deb pʋɔ, ʋl na nɔ̃w mɛ̃ ɛ de ʋ tʋɔra tɩr a ɩ̃ ƴãw a. ²¹ Ɩ̃ bɛ zawrɛ a Naaŋmɩn maalʋ bɛrɛ ɩ; bʋ̃ʋ n’ʋ vɛ̃, alɛ wa ɩ a Wulu sawfʋ zũú n’a a nɩsaal mɩ́ páw a mɩnʋ a Naaŋmɩn niŋé a, a Kɩrɩta kpi n zawla lɛ.

¹ ’Woi Galasi tẽw dãbole bɛ ŋan ɩ! Ãa n’ʋ ɩ a ʋ sɔ-ɩb nyɔw nɩ nyɩ? Nyɩɩm na wõ a Yeezu Kɩrɩta yele vla, a ɩ mɛ̃ a nyɩ mímié n’a bɛ kpa ʋ a da-gara zu a? ² Nyɩ caalɩ mɛ̃ niwn a yel ŋa tɛwr ƴãw: a Naaŋmɩn-Wulu sawfʋ zũú n’a nyɩ páw a Vʋʋrʋ Sõw bɩɩ nyɩ na bɛr wõ ɛ saw de a Yel-nʋ̃ɔ̀ a ƴãw n’a? ³ A ŋa n’a nyɩ bol sɛw ɩ? A yel nyɩ na tĩ nɩ a Naaŋmɩn Vʋʋrʋ a, ƴɛrɛ ŋa nyɩ bɔbr a kɛ́ nyɩ baar ʋ nɩ nyɩ mɩŋa fãw ʋ? ⁴ Zawla lɛ ƴãw n’a nyɩ bãw a yele sɛw a ŋa bɩɩ? A kʋ̃ tʋ̃ɔ ɩ zawla lɛ ɩ. ⁵ A Naaŋmɩn na kʋ̀rɛ nyɩ a ʋ Vʋʋrʋ ɛ maalɛ a nɔ-ɓãa-yele a nyɩ sɔgɔ a, a Wulu sawfʋ zũú n’a bɩɩ nyɩ na bɛr wõ ɛ saw de a Yel-nʋ̃ɔ̀ a n’a so? ⁶ A ŋa n’a a tɩ ŋmɛ̃ a Abraham zie. Bʋ̃ʋ n’ʋ vɛ̃, a Sɛb-sõw yel a: «A Abraham tɩ saw na de a Naaŋmɩn, a Naaŋmɩn saw k’ʋʋ ɩ n nɩ-mɩŋa, a ʋ Naaŋmɩn-saw-deb zũú.» ⁷ A na ɩ a ŋa a, nyɩ bãw vla: a bɛlɩ dem na saw de a Naaŋmɩn a, bɛlɛ nɛ bɛ sɩrɩ ɩ a Abraham bibiir. ⁸ A Sɛb-sõw na tɩ bãw kɛ Naaŋmɩn na ɩ n a nɩ-bʋʋr-yoru bɛ ɩ nɩ-mɩn a bɛ Naaŋmɩn-saw-deb zũú a, ʋ tɩ de nɩ niwn yel a yel-vla ŋa kʋ̀ a Abraham: «A nɩ-bʋʋrɛ za na páw nɩ maalʋ a fʋ ƴãw.» ⁹ A Abraham tɩ saw na de ɛ́ páw a maalʋ, lɛ mɩ̀ n’a a bɛlɩ dem na saw de a, mɩ́ páw a maalʋ mɛ̃ a Abraham. ¹⁰ Ɛ cɛ a bɛlɩ dem na ɩrɛ ƴãwn a Naaŋmɩn-Wulu sawfʋ ƴãw tɛwr a, ŋmɛ-ƴãw tuur bɛ na; mɛ̃ a Sɛb-sõw taa yel a ŋa: «Sob nɛ za na bɛ tuur a al za na sɛb a Wulu sɛbɛ pʋɔ kʋra lɛ a, ŋmɛ-ƴãw a páw ʋ.» ¹¹ A mɔ̃ mɩ̀ ɩ n cãa kɛ́ nɩr kʋ̃ tʋ̃ɔ ɩ nɩ-mɩŋa a Naaŋmɩn-Wulu sawfʋ tɛwr zũú ɛ. Bʋ̃ʋ n’ʋ vɛ̃, bɛ sɛb ɩ a ŋa: «Sob nɛ na ɩ nɩ-mɩŋa a, a saw-deb zũú a, na vʋʋrɛ na.» ¹² Ɛ cɛ a Naaŋmɩn-Wulu bɛ yi a Naaŋmɩn-saw-deb pʋɔ ɩ, bɛ nɩ̃ɛ na mɩ̀ cãa sɛb: «Sob nɛ na tuur a Wulu nɛ-ƴãwnɩ a, a na ɩ na ʋ vʋʋrɛ.» ¹³ A Kɩrɩta ya na ír tɩ bɛr a Naaŋmɩn-Wulu ŋmɛ-ƴãw pʋɔ, ʋl mɩŋa na lɩɛbɩ nɩ-ŋmɛ-ƴãwna a tɩ ƴãw a. Bʋ̃ʋ n’ʋ vɛ̃, a Sɛb-sõw yel ɩ a ŋa: «Nɩr za na yawlɩ daa zu a ɩ n nɩ-ŋmɛ-ƴãwna.» ¹⁴ A ŋa n’a a ɩ, k’aa maalʋ a Naaŋmɩn na yel k’ʋʋ na kʋ̀ n a Abraham a, mɩ̀ ta a nɩ-bʋʋr-yoru a Yeezu Kɩrɩta ƴãw, ɛ́ a saw-deb zũú, tɩ za páw a Vʋʋrʋ a Naaŋmɩn na yel k’ʋʋ na tɩr a a. ¹⁵ Yɛbr ɩ, ɩ̃ na de nɩ manʋ a nɩsaalbɛ ɩ-ɩrɩ pʋɔ: nɩr na maalɩ a ʋ kũu daar pʋ-tɩɛrʋ sɛbɛ mɛ̃ a lɛ a na tu sɔr a, nɩr kʋ̃ tʋ̃ɔ sãw a sɛbɛ ŋa bɛr bɩɩ ƴãw bom dɔwlɩ ɛ. ¹⁶ Ɛ cɛ, a Abraham nɩ a ʋ bʋ̃-dɔwra nɛ bɛ a Naaŋmɩn tɩ ƴãw a ʋ maalʋ nɛɛ kʋ̀. A Sɛb-sõw bɛ yel kɛ nɩ a ʋ bʋ̃-dɔwrɩ ɛ, mɛ̃ nɩ-yaga nɛ bɛ bɛ yere a ɩ, ʋ yel a kɛ: «Nɩ a fʋ bʋ̃-dɔwra», a wul kɛ nɩ-been yõ n’ʋ bɛ yere, a Kɩrɩta. ¹⁷ A ŋa n’a ɩ̃ bɔbr k’ɩ̃ɩ yel: Naaŋmɩn tɩ de nɩ niwn maalɩ Wõ-taa ɛ yel k’ʋʋ na maal a tɛr ʋ. A Naaŋmɩn-Wulu na wa wa yome kɔbr anaar dɔwlɩ lɩzɛr nɩ pie pùorí a, kʋ̃ tʋ̃ɔ sãw a wõ-taa bɛr ɛ ír a maalʋ nʋɔr a Naaŋmɩn na ƴãw a bɛr ɛ. ¹⁸ Ɛ cɛ, a gbã-dɩ-bom pawfʋ wa yi Naaŋmɩn-Wulu sawfʋ zie a, a bɛ cãa ɩ nʋɔr Naaŋmɩn na ƴãw a zũú n’a ɩ; ɛ cɛ nʋɔr Naaŋmɩn na ƴãw a zũú n’a ʋ kʋ̀ a ʋ maalʋ a Abraham. ¹⁹ A na ɩ a ŋa a, a Naaŋmɩn-Wulu yel-ɩra tɩ n’ɩ bo? Bɛ ƴãw ʋ na dɔwlɩ k’ʋʋ tʋ̃ɔ mɩ́ wul a nʋɔr-zawrʋ ɩ-ɩrɩ a sãá, gùre nɩ a Abraham bʋ̃-dɔwra ʋl bɛ na ƴãw a maalʋ nʋɔr kʋ̀ a. Malkɩ mɩnɛ nɛ bɛ tu lɔ̃lʋɔrɛ ƴãw a Wulu ŋa. ²⁰ Ɛ cɛ lɔ̃lʋɔrɛ bɛ dãw lɔ̃ nɩ-been yele ɩ. Ɛ a yele caar ɩ Naaŋmɩn yõ. ²¹ A pãa ɩ lɛ a Wulu diwr a maalʋ nɛɛ a Naaŋmɩn na ƴãw a bɛrɛ bɩɩ? Lɛ bɛ n’a towtow ɛ! Alɛ tɩ ɩ mɛ̃ bɛ tɩr ɩ wulu kãw na na kʋ̀ a nɩsaalbɛ a nyɔ-vʋʋrʋ a, wulu sawfʋ pʋɔ sɩrɩ n’a a nɩsaal nãa mɩ́ ɩ nɩ-mɩŋa a Naaŋmɩn niŋé. ²² Ɛ cɛ a Sɛb-sõw yel a k’aa yel-bier fãw so nɩ a tẽ-daa za, k’aa maalʋ a Naaŋmɩn na yel k’ʋʋ na tɩr a a, tʋ̃ɔ ta a bɛlɩ dem na saw de a, bɛ na saw de a Yeezu Kɩrɩta a zũú. ²³ A Naaŋmɩn-saw-deb na bɛ tɩ wa sɛr a, a Naaŋmɩn-Wulu tɩ tɛr tɩ nɩ a ʋ gaso pʋɔ gùre nɩ a Naaŋmɩn-saw-deb bɛ nãa wa wul ʋ sãá a. ²⁴ A na ɩ a ŋa a, a Naaŋmɩn-Wulu n’ʋ tɩ piwre tɩ, tɩ ta n a Kɩrɩta waa daar, kɛ́ tɩ ɩ nɩ-mɩn a Naaŋmɩn niŋé, a Naaŋmɩn-saw-deb ƴãw. ²⁵ Ɛ cɛ a Naaŋmɩn-saw-deb na wa wa baar a, a sob nɛ na tɩ piwre tɩ a bɛ cãa so tɩ ɛ. ²⁶ Bʋ̃ʋ n’ʋ vɛ̃, nyɩ za ɩ n Naaŋmɩn bibiir, a Naaŋmɩn-saw-deb na ɩ nyɩ lãw nɩ a Yeezu Kɩrɩta a ƴãw. ²⁷ Nyɩ za na sɩrɩ lãw nɩ a Kɩrɩta a suob deb pʋɔ a, nyɩ su n a Kɩrɩta. ²⁸ Nyɩ za lãw nɩ nɩ a Kɩrɩta ɩ nɩ-been, a na ɩ lɛ a, Zifʋ nɩ nɩ-bʋʋr-yoru yele bɛ cãa be ɩ, gbãgbaa nɩ nɩr na so ʋ tʋɔra a yele bɛ cãa be ɩ, dɛb nɩ pɔw yele bɛ cãa be ɩ. ²⁹ Ɛ a Kɩrɩta wa so nyɩ a, nyɩ ɩ n a Abraham bʋ̃-dɔwrɩ, ɛ́ nyɩ na páw nɩ a gbã-dɩ-bom a Naaŋmɩn na yel k’ʋʋ na tɩr a a.

¹ A na ɩ a ŋa a, a ɩ̃ tɩɛrʋ n’ɩ ŋa: lɛn daar za a gbã-dɩrɛ na cãa ɩ bibile a, ʋlɛ nɩ a gbãgbaa za ɩ n been, ʋ na saa so bom za a. ² Ɛ cɛ nɩbɛ na kaarɛ a ʋ zie ɛ kaarɛ a ʋ bome zie a, mɩ́ so ʋ tɩ ta n a daar ʋl a ʋ sãà na ƴãw a. ³ Lɛ n’a a mɩ̀ ŋmɛ̃ a tɩ zie, a lɛn daar tɩ na tɩ cãa ɩ mɛ̃ bibiir a, tɩ tɩ ɩ n a tẽ-daa bʋ̃-balɛ gbãgbaar. ⁴ Ɛ cɛ a daar ʋl, a Naaŋmɩn na ƴãw a, na wa ta a, ʋ to n a ʋ Bie, pɔw dɔw ʋ, ɛ a Naaŋmɩn-Wulu sawfʋ fɛrɛ ʋ, ⁵ k’ʋʋ tʋ̃ɔ ya de a bɛlɩ dem na be a Naaŋmɩn-Wulu fɛrʋ pʋɔ a, ɩ tɩ lɩɛbɩ Naaŋmɩn bibiir. ⁶ A Naaŋmɩn na bɔbr k’ʋʋ wul kɛ́ nyɩ sɩrɩ na ɩ a ʋ bibiir a, ʋ to n a ʋ Bie Vʋʋrʋ a tɩ socie pʋɔ, ʋ mɩ́ cɩɩrɛ yere: «Aba, ɩ̃ Sãà a!» ⁷ A na ɩ a ŋa a, fʋ bɛ cãa ɩ gbãgbaa ɩ, bie nɛ b; ɛ fʋ na ɩ a ʋ bie a, Naaŋmɩn na kʋ̀ b ɩ a gbã-dɩ-bom ʋ na bin a ʋ bibiir ƴãw a. ⁸ A dãwdãw nyɩ na bɛ tɩ bãw a Naaŋmɩn a, nyɩ tɩ ɩ n naaŋmɩmɛ na bɛ ɩ naaŋmɩmɛ a gbãgbaar. ⁹ Ɛ cɛ ƴɛrɛ ŋa nyɩ na bãw a Naaŋmɩn a, bɩɩ a Naaŋmɩn na nɩ̃ɛ n’ʋ bãw nyɩ a, ŋmɩŋmɩn za n’a nyɩ lɛb cere a bome a ŋa na bɛ tɛr fãw, bɛ tɛr bom za a zie, bɔbr kɛ́ nyɩ ɩ a gbãgbaar? ¹⁰ Nyɩ bɛ ƴãwnɛ dere a bibie a mɩnɛ, a cuwr a mɩnɛ, a voru a mɩnɛ, nɩ a yome a mɩnɛ ƴãw ɛ. ¹¹ Nyɩ ɩ na ɩ̃ zɔrɛ dɛ̃bɩ̃ɛ ɩ̃ nãa wa bal ɩ̃ tʋɔra a nyɩ ƴãw zawla lɛ a. ¹² Yɛbr ɩ, ɩ̃ zɛlɛ nyɩ na, nyɩ lɩɛbɩ ŋmɛ̃ taa nɩ mɛ̃, mɛ̃ a lɛ ɩ̃ na saw ŋmɛ̃ taa nɩ nyɩ a. Nyɩ bɛ sãw mɛ̃ yel kãw za ƴãw ɛ. ¹³ Nyɩ bãwnɩ a na, bàalʋ n’a tɩ so ɩ̃ hieri a Yel-nʋ̃ɔ̀ kʋ̀ nyɩ a dãw-niwn sob daar. ¹⁴ A ɩ̃ ƴãgan-baal nyɛ́b tɩ ɩ n kpɩɛrʋ a nyɩ zie, ɛ cɛ nyɩ bɛ jewri mɛ̃ ɩ, bɛ pĩ m ɛ; nyɩ nɩ̃ɛ na de m mɛ̃ Naaŋmɩn malkɩ bɩɩ a Kɩrɩta Yeezu tɔr za a. ¹⁵ A nʋ̃ɔ̀ na tɩ dãw ɩrɛ nyɩ a, nyɩnɛ n’a ʋ cen mɔ̃? Bʋ̃ʋ n’ʋ vɛ̃, ɩ̃ dɩrɛ nɩ a dãsɩɛ ŋa a nyɩ ƴãw: nyɩmɛ tɩ tʋ̃ɔ a, nyɩ nãa lowr ɩ a nyɩ mimie ƴãw mɛ̃. ¹⁶ Ƴɛrɛ ŋa ɩ̃ na yel a yel-mɩŋa kʋ̀ nyɩ a, ɩ̃ lɩɛb ɩ a nyɩ dɔ̃ sob bɩɩ? ¹⁷ Bɛ mɩnɛ kãw miine nɩ a nyɩ ƴãw, ɛ cɛ a bɛ tɩɛrʋ bɛ vɩɛl ɛ. Bom nɛ bɛ na bɔbr a n’ɩ kɛ bɛ bʋ́r mãa nɩ a nyɩɩm, nyɩ tʋ̃ɔ miine a bɛ ƴãw. ¹⁸ Fʋ na miine a vla ƴãw a, bʋ̃-vla n’ʋ, ɛ cɛ a mɩ́ ɩ kʋra lɛ, ɛ ta ɩ ɩ̃ na mɩ́ wa be a nyɩ sɔgɔ a tɛwr ɛ. ¹⁹ Ɩ̃ bibiir i, ɩ̃ lɛb a wone tuo a nyɩ ƴãw mɛ̃ pɔw na dɔwr a, ɛ gu a wa tɩ ɩ cãa k’aa Kɩrɩta be n a nyɩ sɔgɔ. ²⁰ Bʋ̃ʋ pãa ɩ ɩ̃ bɛ be a nyɩ zie a ƴɛrɛ ŋa a! Ɩ̃ nãa ƴɛr a gaalɩ a kɔkɔr. Bʋ̃ʋ n’ʋ vɛ̃, ɩ̃ bɛ mɩ́ bãw a lɛ ɩ̃ na na ɩ a nyɩ zie a ɩ. ²¹ Nyɩɩm na bɔbr k’aa Wulu so nyɩ a, nyɩ bɛ wone a lɛ a Wulu ŋa na yere a ɩ? ²² Bɛ sɛb a k’aa Abraham tɩ tɛr ɩ bibiir ayi, kãw ɩ a pɔw-gbãgbaa Agaar bie, ɛ kãw ɩ a pɔw na bɛ ɩ gbãgbaa a, a Saara bie. ²³ Ɛ cɛ a pɔw-gbãgbaa tɩ dɔw nɩ a ʋ bie nɩsaal dɔwfʋ, ɛ a pɔw na bɛ ɩ gbãgbaa a dɔw a ʋ bie a tu a lɛ a Naaŋmɩn na yel a. ²⁴ Zʋkpar ɩ a ŋa bɛ na lɔb a: a pɔwbɛ bɛ ŋa ayi ɩ n wõ-taar ayi: a kãw, a Agaar na wule a, ɩ n a Sinayi tãw zu wõ-taa; gbãgbaar a ʋ dɔwr. ²⁵ A Agaar ɩ a Sinayi tãw na be Arabi a, ʋ ŋmɛ̃ na taa nɩ a ƴɛrɛ ŋa Zeruzalɛm na ɩ gbãgbaa, ʋlɛ nɩ a ʋ bibiir za a. ²⁶ Ɛ cɛ a Zeruzalɛm na be a saa zu a bɛ ɩ gbãgbaa ɩ, ɛ ʋlɛ n’ɩ a tɩ mã. ²⁷ Bʋ̃ʋ n’ʋ vɛ̃, bɛ sɛb a yel: «Pɔw-ãan ɩ, cɩlɛ, fʋ̃ʋ na bɛ tɩ dɔw a, ŋmɩɛr nʋ̃ɔ̀ cɛlsɩ, fʋ̃ʋ na bɛ wõ a dɔwfʋ ’wɔbrʋ a ; a pɔw-zaw-bɛra bibiir na yãwmɛ̃ na zuo a pɔw na tɛr sɩr a bibiir.» ²⁸ Nyɩɩm, yɛbr ɩ, nyɩ dɔw na mɛ̃ Ɩzaakɩ a, a tu a nʋɔr Naaŋmɩn na ƴãw a. ²⁹ Ɛ cɛ mɛ̃ a lɛ a koro za, a bie ʋl na tɩ dɔw a dɔwfʋ tu nɩsaal dɔwfʋ a, na tɩ dɔwrɛ a bie ʋl na dɔw a tu Vʋʋrʋ Sõw a, lɛ n’a a mɩ̀ cãa ŋmɛ̃ a ƴɛrɛ ŋa. ³⁰ Ɛ cɛ a Sɛb-sõw yel a kɛ bo? Ɛ «Fʋ diw a pɔw-gbãgbaa nɩ a ʋ bie bɛr; bʋ̃ʋ n’ʋ vɛ̃, a bɛ tɛr sɔr k’aa pɔw-gbãgbaa bie nɩ a pɔw na bɛ ɩ gbãgbaa a bie lãw a gbã-dɩ-bom ɛ.» ³¹ Yɛbr ɩ, a na ɩ a ŋa a, tɩ bɛ ɩ pɔw gbãgbaa bibiir ɛ, tɩ ɩ n pɔw na bɛ ɩ gbãgbaa a bibiir.

¹ A Kɩrɩta ír tɩ na bɛr a gbãgbaalʋ pʋɔ, kɛ́ tɩ sɩrɩ so tɩ tʋɔra. A na ɩ a ŋa a, nyɩ ƴãw fãw ta lɛb de a gbãgba-mie ɩ. ² Nyɩ nyɛ̃, a mãa Pol, ɩ̃ yere na kʋ̀rɛ nyɩ: nyɩmɛ wa ƴãw bɛ ŋma nyɩ a yɛɛ a, a Kɩrɩta kʋ̃ cãa tɛr yel-ɩra kãw za a nyɩ zie ɩ. ³ Ɛ ɩ̃ lɛb a maal yere kʋ̀rɛ nɩsaal za na ƴãw bɛ ŋmãa ʋ a yʋɔr a, k’aa fɛr a ʋ sawr a Wulu ʋ za. ⁴ Nyɩɩm na bɔbr k’aa Wulu ɩ nyɩ ɩ nɩ-mɩn a, a baar a nyɩɩm nɩ a Kɩrɩta cara pʋɔ, ɛ́ nyɩ mɩ̀ kʋ̃ lɛ páw a Naaŋmɩn maalʋ ɛ. ⁵ Ɛ cɛ a tɩɩm a, tɩ ƴãw nɩ a tɩ tɩɛrʋ a Naaŋmɩn ƴãw, ʋl na na ɩ tɩ ɩ nɩ-mɩn a ʋ niŋé a; a yel ŋa n’ʋ tɩ gùre nɩ a Vʋʋrʋ Sõw fãw, ʋl na tone a tɩ Naaŋmɩn-saw-deb pʋɔ a. ⁶ Bʋ̃ʋ n’ʋ vɛ̃, sob nɛ na lãw nɩ a Yeezu Kɩrɩta a, a yʋɔr-ŋmãafʋ bɩɩ a bɛ-ŋmãafʋ bɛ ɩ bom za ɩ, a bom n’ɩ a Naaŋmɩn-saw-deb na tɛr nɔ̃wfʋ ɩ-ɩrɩ a. ⁷ Nyɩ tɩ tĩ na zɔrɛ vla za! Ãa n’ʋ wa piw nyɩ a sɔr, bɛ bɔbr kɛ nyɩ tuur a yel-mɩŋa? ⁸ A a ŋa bɛ na ƴɛr nyɩ saw a, a bɛ yi a Naaŋmɩn na bʋɔlɛ nyɩ a zie ɩ. ⁹ Mɛ̃ a lɛ bɛ na mɩ́ yel a: «Dãbɩl blã mɩ́ ɩ n a zɔ̃-bura za ír.» ¹⁰ Mãa a, a Sore ɩ na ɩ̃ bɛr tɩɛrʋ a nyɩ ƴãw: ɩ̃ bãwnɩ a na nyɩ na kʋ̃ tɩɛrɛ bʋ̃-yoru a. Ɛ cɛ sob nɛ na ƴãwnɛ a damnʋ a nyɩ pʋɔ a na páw nɩ dɔwrʋ, ʋlɛ saa ŋmɛ̃ ŋmɩŋmɩn a. ¹¹ Mãa ƴãw a, yɛbr ɩ, mãa tɩ ɩ mɛ̃ ɩ̃ cãa na kanɛ k’aa fɛr a kɛ bɛ mɩ́ ŋmãa a yʋɔr a, bʋ̃ʋ ƴãw n’a bɛ nãá cãa dɔwrɛ mɛ̃? A lɛ pʋɔ a, a Kɩrɩta da-gara zu kũu ƴɛrʋ kʋ̃ʋ damnɛ nɩr za ɩ. ¹² A bɛlɩ dem na ƴãwnɛ a damnʋ a nyɩ pʋɔ a, bɛ nãa mɩ́ tɛr lɛɛɛ tɩ ír a bɛ lamɛ mɩ̀. ¹³ Yɛbr ɩ, a nyɩɩm a, a tʋɔra-sob ƴãw n’a bɛ bʋɔlɩ nyɩ. Ɛ cɛ nyɩ taa wa yel kɛ a tʋɔra-sob ŋa ƴãw ɛ́ tuur a nyɩ nɩsaal yel-bɔbrɩ na bɛ vɩɛl a ɩ. Nyɩ nɩ̃ɛ mɩ́ kaarɛ taa zie a nɔ̃wfʋ zũú. ¹⁴ Bʋ̃ʋ n’ʋ vɛ̃, a Naaŋmɩn-Wulu za zu n’ɩ: «Fʋ na nɔnɛ nɩ a fʋ tɔ sob mɛ̃ a fʋ mɩŋa a.» ¹⁵ Ɛ cɛ, nyɩmɛ wa dʋnɛ taa ɛ vɔlɛ taa mɛ̃ wɛ-dʋn-faar a, nyɩ gu vla, nyɩ na baarɩ taa. ¹⁶ A na ɩ a ŋa a, yel ŋa n’ʋ ɩ̃ bɔbr k’ɩ̃ɩ yel kʋ̀ nyɩ: nyɩ bɛr a nyɩ nyɔ-vʋʋrʋ kʋ̀ a Vʋʋrʋ Sõw ɛ nyɩ kʋ̃ ɩrɛ a lɛ a nyɩ nɩsaalʋ na bɔbr a ɩ. ¹⁷ Bʋ̃ʋ n’ʋ vɛ̃, a tɩ nɩsaalʋ yel-bɔbrɩ nɩ a Vʋʋrʋ Sõw dem bɛ lãw taa ɩ, ɛ a Vʋʋrʋ Sõw yel-bɔbrɩ nɩ a tɩ nɩsaalʋ dem mɩ̀ bɛ lãw taa ɩ, mɔb a be a za ayi cara pʋɔ. Alɛ n’a so, nyɩ bɛ tʋɔr ɩrɛ a lɛ nyɩ na bɔbr a ɩ. ¹⁸ A Vʋʋrʋ Sõw wa n’ʋ wule nyɩ a, a Mõyiir-Wulu bɛ cãa fɛrɛ nyɩ ɛ. ¹⁹ A nɩsaalʋ tõ-toni sãá nɩ nyɩraa lɛ, alɛ n’ɩ a ŋa: pɩ̃ɔ yele, dɛwr, faalʋ, ²⁰ tɩbɛ maalʋ, sʋɔlʋ, dɔ̃, zɛb-taa, nyúur, suur, cier-taa, bɛ-wõ-taa, bʋ́r-taa, ²¹ nyɛ̃ a fʋ tɔ bom bɔbr, dãa kuolu, dɩ tɩ gã nɩ taa, nɩ a yele a ŋa taabɛ. Nyɩ páw bãwnɩ a, mɛ̃ a lɛ ɩ̃ na tɩ dãw yel kʋ̀ nyɩ a, a bɛlɩ dem na tɛr a ɩ-ɩrɩ a ŋa taabɛ a, kʋ̃ nyɛ̃ zie a Naaŋmɩn-Naalʋ pʋɔ ɩ. ²² Ɛ cɛ a Vʋʋrʋ Sõw bom ɩ: nɔ̃wfʋ, nʋ̃ɔ̀, ƴã-ɓaarʋ, su-nyɔwra, vɩɛlʋ, nɩ-vla-ɩb, Naaŋmɩn-saw-deb, ²³ nɩsaal baalʋ-ɩb, tʋɔra-nyɔwfʋ; a Mõyiir-Wulu bɛ diwr a yele a ŋa taabɛ bɛrɛ ɩ. ²⁴ A bɛlɩ dem a Kɩrɩta na so a, bɛ kpa n a nɩsaalʋ a da-gara zu lãw nɩ a ʋ vʋla bʋʋrɛ na mɩ́ be a ʋ zie a, nɩ a ʋ yel-bɔbrɩ. ²⁵ A Vʋʋrʋ na n’ʋ so tɩ vʋʋrɛ a, tɩ mɩ̀ bɛr tɩ tʋɔra kʋ̀ ʋ. ²⁶ Tɩ ta mɩ́ pɔrɛ ɩ, a nɔ-haarʋ nɩ a nyu-ɩb, a ta be a tɩ cara pʋɔ ɩ.

¹ Yɛbr ɩ, alɛ wa ɩ mɛ̃ bɛ nyɔw nɩ nɩr sãwna pʋɔ a, a nyɩɩm na tɛr a Naaŋmɩn Vʋʋrʋ a, nyɩ tɛr ʋ lɛb wa ƴãw a sɔr vla pʋɔ; ɛ cɛ nyɩ ɩrɛ bɛl bɛl a ʋ zie. Ɛ a fʋ̃ʋ mɩ̀ a, gurè fʋ tʋɔra vla: fʋ tɩɛr kɛ bɛ mɩ̀ kʋ̃ tʋ̃ɔ bɛlɩ fʋ bɩɩ? ² Nyɩ tuore taa tuor, lɛ n’a nyɩ na saw a Kɩrɩta Wulu. ³ Bʋ̃ʋ n’ʋ vɛ̃, nɩr na tɩɛr k’ʋʋ ɩ n nɩr, ɛ nɩ̃ɛ bɛ ɩ nɩr a, ʋ bɛlɛ nɩ ʋ tʋɔra. ⁴ Ŋa za mɩ́ jɩr a ʋ tome kaa, alɛ wa sɛw k’ʋʋ nyʋʋr a, ʋl ƴãw n’a ʋ na nyʋʋr, a kʋ̃ ɩ ʋ na de ʋ tʋɔra man nɩ nɩr a ƴãw n’a ɩ. ⁵ Bʋ̃ʋ n’ʋ vɛ̃, ŋa za na mɩ́ tuo nɩ a ʋ mɩŋa tuor. ⁶ A sob nɛ bɛ na zanɛ nɩ a Naaŋmɩn ƴɛrʋ a, a fɛr a k’ʋʋ mɩ́ ɩ a ʋ bʋ̃-tɛrɩ kʋ̀ a sob nɛ na zanɛ nɩ ʋ a. ⁷ Nyɩ ta bɛlɛ nyɩ tʋɔra ɩ: Naaŋmɩn bɛ sawr bɛ ɩrɛ ʋ laar ɛ. Ʋlɩ bom nɛ a nɩsaal na bʋ̀r a, ʋlɛ n’ʋ ʋ na cɛ. ⁸ Sob nɛ na bʋ̀rɛ a alɩ bome nɛ a nɩsaalʋ na bɔbr a, na cɛ n a wɔ̃mɛ a nɩsaalʋ na waar ɩ a, a pɛr lɛ k’aa kũu. Ɛ cɛ sob nɛ na bʋ̀rɛ a alɩ bome nɛ a Vʋʋrʋ Sõw na bɔbr a, ʋ na cɛ n a wɔ̃mɛ a Vʋʋrʋ na waar ɩ a, a pɛr lɛ k’aa nyɔ-vʋʋrʋ na be kʋra lɛ a. ⁹ Nyɩ ɩ tɩ taa balɛ a vla maalʋ ƴãw ɛ; bʋ̃ʋ n’ʋ vɛ̃, tɩmɛ bɛ wa bal tɩɛ bɛr a, ɛ a daar wa ta a, tɩ na cɛ na. ¹⁰ A na ɩ a ŋa vuo cãa be a yaa, nyɩ ɩ tɩ ɩrɛ vla a nɩbɛ za zie, ɛ baa zuo a za a bɛl na ɩ a tɩ yɛbr a saw-deb pʋɔ a zie. ¹¹ A kan-bi-bɛrɛ a ŋa nyɩ na nyɛ̃ a, mãa mɩŋa nũu n’ʋ ɩ̃ sɛb ɩ nyɩ. ¹² A bɛlɩ dem na bɔbr kɛ́ bɛ fɛr nyɩ nyɩ ŋma a nyɩ yɛɛ a, bɛ ɩ n nɩbɛ na bɔbr kɛ́ bɛ sãá nɩ-vɩɛlɩ a nɩsaalʋ yele pʋɔ a. A bɛ bʋ̃-bɔbra tɛwr n’ɩ kɛ́ bɛ ta mɩ́ páw dɔwrʋ a Kɩrɩta da-gara ƴãw ɛ. ¹³ Bʋ̃ʋ n’ʋ vɛ̃, a bɛl tɛɛ za na mɩ́ ƴãw bɛ ŋma bɛ a yɛɛ a, bɛ mɩ́ tuur a Naaŋmɩn-Wulu ɛ; bɛ mɩ́ bɔbr a kɛ́ nyɩ ŋma a yɛɛ bɛ tʋ̃ɔ zɛwr bɛ tʋɔra, bɛ na fɛr nyɩ ƴãw nyɩ tɛr a bãwfʋ ŋa a nyɩ ƴãgánɩ́ a. ¹⁴ Mãa ƴãw a, a tɩ Sore Yeezu Kɩrɩta da-gara yõ ƴãw n’a ɩ̃ bɔbr k’ɩ̃ɩ zɛwr ɩ̃ tʋɔra. Ʋlɛ n’ʋ so a tẽ-daa kpi a ɩ̃ zie, ɛ ɩ̃ mɩ̀ kpi a tẽ-daa zie. ¹⁵ Bʋ̃ʋ n’ʋ vɛ̃, fʋ na ŋmãa a yʋɔr bɩɩ fʋ na bɛ ŋmãa a, bɛ ɩ bom ɛ, fʋ na ɩ Naaŋmɩn bʋ̃-ir-paala a, ʋlɛ n’ʋ ɩ bom. ¹⁶ A Naaŋmɩn ƴã-ɓaarʋ nɩ a ʋ nɩ-baal-zɔba, a be a bɛlɩ dem za na tuur a wulu pɔl ŋa a zie, ɛ mɩ̀ be a ʋ nɩ-bʋurɛ za zie. ¹⁷ Dɩ̃a na ta a, nɩr za taa lɛ sɔbr mɛ̃ niwn ɛ; bʋ̃ʋ n’ʋ vɛ̃, a fɩlɛ na be a ɩ̃ ƴãgánɩ́ a wule na k’aa Yeezu so m. ¹⁸ Yɛbr ɩ, a tɩ Sore Yeezu Kɩrɩta maalʋ, ʋ be a nyɩ za zie. Amɛn.