KƆLƆSƖ
11 A mãa Pol, Naaŋmɩn na nɔ̃w yã ƴãw ɩ̃ ɩ Yeezu Kɩrɩta nɩ-tona a, nɩ a tɩ yɛb Timote, 2 tɩmɛ nɛ bɛ kʋ̀rɛ a sɛbɛ ŋa, a nyɩɩm, Kɔlɔsɩ tẽw Kɩrɩta-biir na ɩ a tɩ yɛbr na lãw nɩ a Kɩrɩta bɛ lɛbr pùor a. A Naaŋmɩn tɩ Sãà, ʋ kʋ̀ nyɩ maalʋ nɩ ƴã-ɓaarʋ. 3 A puoru tɩ na mɩ́ puore kʋ̀rɛ nyɩ a kʋra lɛ a, tɩ mɩ́ pùor ɩ a Naaŋmɩn, a tɩ Sore Yeezu Kɩrɩta Sãà, yaanɩ. 4 Tɩ wõ n a lɛ nyɩ na saw de a Yeezu Kɩrɩta a, nɩ a nɔ̃wfʋ nyɩ na tɛr a Kɩrɩta-biir za ƴãw a, 5 ɛ a ɩ nyɩ na tɩɛrɛ a ʋlɩ bom nɛ na gùre nyɩ a tẽ-vla pʋɔ a ƴãw n’a a. A Yel-nʋ̃ɔ̀ na ɩ yel-mɩŋa ƴɛrʋ a, ʋl na lʋɔrɩ wa ta nyɩ a, ʋl pʋɔ n’a nyɩ páw a tɩɛrʋ ŋa. 6 A Yel-nʋ̃ɔ̀ manɛ na yaarɛ ɛ́ wɔnɛ wɔmɛ̃ a tẽ-daa za zu, mɛ̃ a lɛ ʋ na tɩ ɩ a nyɩ sɔgɔ a ʋlɩ bibir nɛ za nyɩ na wõ bɛ ƴɛr a Naaŋmɩn maalʋ ƴɛrʋ, ɛ́ nyɩ nyɛ̃ lɛ ʋ na sɩrɩ ŋmɛ̃ a. 7 A tɩ ba Epafarasɩ, na ɩ a tɩ lãw-tõ-tɔ a, ʋlɛ n’ʋ wul nyɩ a a ŋa. Ʋ lɩɛrɩ tɩ na tone a nyɩ ƴãw, mɛ̃ Kɩrɩta tõ-tone na bɛ lɛbr pùor towtow a. 8 Ʋlɛ n’ʋ manɩ kʋ̀ tɩ a nɔ̃wfʋ a Vʋʋrʋ Sõw na ɩ nyɩ tɛr a. 9 A lɛ n’a so a ʋlɩ bibir za tɩ na wõ a nyɩ yele wa tɩ tɔ a dɩ̃a a, tɩ mɩ̀ bɛ bɛr a nyɩ puor-kʋ̀b ɛ. Tɩ zɛlɛ na kɛ a Naaŋmɩn ɩ nyɩ bãw a ʋ pʋ-tɩɛrʋ za. Al ƴãw n’a a Vʋʋrʋ Sõw kʋ̀rɛ nyɩ a yã-bãwfʋ nɩ a yã. 10 A ŋa n’a nyɩ na maalɛ a Naaŋmɩn yã-nɔn za, ɛ vʋʋrɛ nyɔ-vʋʋrʋ na sɛw taa nɩ ʋ a. Nyɩ na maalɛ nɩ ɩ-vɩɛlɩ bʋʋrɛ bʋʋrɛ za, ɛ lɛ bãwnɛ a Naaŋmɩn dɔwlɛ. 11 A Naaŋmɩn na ɩ n a ʋ yúor-vɩɛlʋ-danʋ fãw nyuwli nyɩ a yele za ƴãw, nyɩ mɩ́ dɩ kanyir saw de bom za. 12 Nyɩ puore a Naaŋmɩn Sãà yaanɩ nɩ nʋ̃ɔ̀, ʋl na ɩ nyɩ na tʋ̃ɔ páw a na-bʋ̃-vɩɛlɩ ʋ na cɔbrɩ bin a tẽ-vla cãa pʋɔ cɛlɛ nɩ a ʋ nɩ-sori a. 13 Ʋ faa tɩ nɩ a lige kpɛnʋ pʋɔ, tɩ ƴãw a ʋ Bi-nɔna naalʋ pʋɔ. 14 Ʋl zũú n’a a Naaŋmɩn faa tɩ ɛ dɩ a tɩ yel-bebe suur kʋ̀ tɩ. 15 A Kɩrɩta n’ɩ a Naaŋmɩn tɩ na bɛ nyɛrɛ a, ŋmɛ̃-ta-tɔ, ɛ lɛ ɩ a Naaŋmɩn bi-dãw-dɔwra na de niwn a ʋ bʋ̃-iri za pʋɔ a. 16 Bʋ̃ʋ n’ʋ vɛ̃, ʋlɛ n’ʋ Naaŋmɩn ƴãw k’ʋ ír a bome za, a sa-zu nɩ a tẽw zu, a bʋ̃-nyɛrɩ nɩ a bʋ̃-bɛ-nyɛrɩ, a al na zɩnɛ naalʋ da-kɔwr zuru a, nɩ a al na so a ziir a, a na-dɩrbɛ nɩ fãw bʋʋrɛ za. Ʋlɛ n’ʋ Naaŋmɩn ƴãw ʋ ír a za a ʋl mɩŋa ƴãw. 17 Ʋ de nɩ niwn be bom za ƴãw, ɛ ʋlɛ n’ʋ ɩ a bome za a ar. 18 Ʋlɛ n’ʋ ɩ a ʋ Lãw-yir ƴãgan zu, ʋlɛ n’ɩ a bome za pɛr-tib zie, a bi-dãw-dɔwra na de niwn lɛb yi a kũuni pʋɔ a, k’ʋʋ tʋ̃ɔ ɩ a niwn-diere a yele za pʋɔ a. 19 Bʋ̃ʋ n’ʋ vɛ̃, a Naaŋmɩn nɔ̃w na paalɩ ʋ nɩ a naaŋmɩnʋ za, 20 k’aa ʋl zũú, Naaŋmɩn ɩ ʋlɛ nɩ bom za lɛ kpɛ taa, a tẽw zu nɩ a sa-zu. A ʋ Bie zɩ̃ɩ na cir a da-gara zu a ƴãw n’a, a Naaŋmɩn ɩ a ƴã-ɓaarʋ be. 21 Ɛ nyɩɩm na tɩ dãw zãá nɩ a Naaŋmɩn a, nyɩɩm na tɩ dãw ɩ a ʋ dɔ̃ nɩbɛ a nyɩ ɩ-faar zũú a, 22 ƴɛrɛ ŋa a, a kũu a ʋ Bie nɩsaal ƴãgan na kpi a zũú n’a, Naaŋmɩn ɩ nyɩɩm nɩ ʋl lɛ kpɛ taa, k’ʋʋ tʋ̃ɔ ɩ nyɩ ar a ʋ niŋé ɩ nɩ-son na bɛ tɛr dɛwr kãw za, ɛ́ bɛ tɛr sãwna nɩr yere a. 23 Ɛ cɛ a fɛr a kɛ a nyɩ Naaŋmɩn sawfʋ ɩ nyɩ kpɛmɛ, bà gbɛr ar, ta saw bom za taw nyɩ zãá nɩ a nyɩ tɩɛrʋ ʋl nyɩ na tɛr a ɩ, a lɛn daar za nyɩ na tɩ wõ a Yel-nʋ̃ɔ̀ a. A Yel-nʋ̃ɔ̀ ŋa hier a ta bʋ̃-ira za a tẽw zu, ɛ a mãa Pol, ɩ̃ lɩɛb ɩ a Yel-nʋ̃ɔ̀ ŋa tõ-tone. 24 A ƴɛrɛ ŋa a, ɩ̃ cɩlɛ na ɩ̃ na be a tuo pʋɔ a nyɩɩm ƴãw a. A Kɩrɩta tuo al na cɛ a, ɩ̃ nyɛrɛ a na a mãa mɩŋa ƴãgan pʋɔ, a Kɩrɩta ƴãgan ƴãw na ɩ a Lãw-yir a. 25 Ɩ̃ lɩɛb ɩ a Lãw-yir tõ-tõ-bie, a tõ-nʋɔr a Naaŋmɩn na kʋ̀ m a nyɩ ƴãw a zũú. Ɛ a tõ-nʋɔr ŋa n’ɩ k’ɩ̃ɩ hieri a Naaŋmɩn ƴɛrʋ ʋ za kʋ̀ nyɩ, 26 a pɛr lɛ kɛ a yel na sɔwlɩ a dɩta-pɛ-yome za a nɩbɛ na dɔwr tuur taa zie a, ɛ a ƴɛrɛ ŋa a Naaŋmɩn wul ʋ sãá a ʋ nɩ-sori zie a. 27 Naaŋmɩn saw na ɩ bɛ bãw, a tɩbɛ dem sɔgɔ, a naalʋ nɩ a yúor-vɩɛlʋ-danʋ na bɛ tɛr tɔ, a yel ŋa na waar ɩ a: a Kɩrɩta be n a nyɩ sɔgɔ, ʋl na só nyɩ tɩɛrɛ a yúor-vɩɛlʋ-danʋ a. 28 A Kɩrɩta ŋa yele n’a tɩ manɛ, kpaalɛ nɩ nɩr za, wule nɩ nɩr za nɩ yã-bãwfʋ, kɛ́ tɩ tʋ̃ɔ ɩ nɩr za vɩɛl ʋ za lãw nɩ a Kɩrɩta. 29 A a ŋa ƴãw n’a ɩ̃ tone ɛ mʋɔr, nɩ a fãw ɩ̃ na páw a Yeezu Kɩrɩta zie a, ɛ a fãw ŋa tone a ɩ̃ pʋɔ kpɛ̃w kpɛ̃w za a.
21 Sɩza n’a, ɩ̃ bɔbr a kɛ́ nyɩ bãwnɩ a, k’ɩ̃ɩ mʋɔr ɩ mɔb na ɩ mɔb a, a nyɩ ƴãw, a Lawdise tẽw dem ƴãw, nɩ a ŋmaarɛ yaga bɛl za na bɛ dãw nyɛ̃ m towtow a ƴãw. 2 Ɩ̃ bɔbr a k’ɩ̃ɩ ɩ a ŋa bɛ kpɛ socir yaga za, bɛ lãw taa nɔnɛ taa, tʋ̃ɔ páw a yã za naalʋ kpɛ, tʋ̃ɔ bãw a Naaŋmɩn yel-sɔwla na ɩ a Kɩrɩta a. 3 Ʋl zie n’a a yã-bãwfʋ na-bome nɩ a yele bãwfʋ na-bome sɔwlɩ gã. 4 Ɩ̃ yere nɩ a ŋa kɛ́ nɩr za ta tʋ̃ɔ bɛlɩ nyɩ nɩ nɔ-kãa ƴɛrʋ ɛ. 5 Mãa saa bɛ be a nyɩ sɔgɔ a, a ɩ̃ tɩɛrʋ za be n a nyɩ zie, ɛ nʋ̃ɔ̀ kpɩɛr mɛ̃ na, ɩ̃ na nyɛ̃ nyɩ bɛ lɛb pùor ɛ cãa kpɛmɛ a nyɩ Kɩrɩta saw-deb pʋɔ a. 6 A na ɩ a ŋa nyɩ saw de kɛ a Yeezu Kɩrɩta n’ɩ a Sore a, nyɩ lãw nɩ ʋ vʋʋrɛ. 7 Nyɩ tɛ nyɩgɛ a ʋ pʋɔ, ɛ ƴãw a nyɩ nyɔ-vʋʋrʋ yele za tɩɛrʋ a ʋ ƴãw, lɛ n’a nyɩ na kpɛmɛ a Naaŋmɩn sawfʋ pʋɔ, mɛ̃ a lɛ bɛ na wul nyɩ a, ɛ puore Naaŋmɩn yaanɩ bɛ dɩ vuo ɩ. 8 Nyɩ gu vla nɩr za taa bɛlɛ nyɩ nyɔwr nɩ a nɩsaalbɛ yã-bãwfʋ nɩ a bɛ bãw-voru na mɩ́ tu sãakʋ̃-kore yele nɩ a tẽ-daa bʋ̃-balɛ, ɛ bɛ tu a Kɩrɩta a ɩ. 9 Bʋ̃ʋ n’ʋ vɛ̃, a Kɩrɩta ƴãgan pʋɔ a, naaŋmɩnʋ za be n be, 10 ɛ a ʋ pʋɔ n’a nyɩ páw bom za, ʋl na ɩ na-dɩrbɛ za nɩ fãw bʋʋrɛ za yib zie a. 11 Nyɩ na lãw nɩ ʋ a, bɛ ŋmãa nyɩ nɩ a yʋɔr, ŋmãafʋ kãw bʋʋrɛ nɩsaal nũu na bɛ pʋɔ a, ɛ a ŋmãafʋ ŋa ɩ nyɩ bɛ cãa ɩ yel-bier nɩbɛ a. A ŋa n’a a ŋmãafʋ na yi a Kɩrɩta zie a ŋmɛ̃. 12 Nyɩ na de a suob a, bɛ ũù nyɩ na lãw nɩ a Kɩrɩta a bɔw pʋɔ. Bɛ mɩ̀ ɩ na nyɩ lãw nɩ ʋ lɛb yi, a nyɩ na saw kɛ a Naaŋmɩn tɛr ɩ fãw a zũú, a fãw ŋa na ɩ a Kɩrɩta ʋ lɛb yi a kũuni pʋɔ a. 13 Ɛ a nyɩɩm na tɩ dãw ɩ kũuni a nyɩ yel-bebe zũú, nɩ bɛ na bɛ tɩ ŋma a nyɩ yɛɛ a, a Naaŋmɩn kʋ̀ nyɩ nɩ nyɔ-vʋʋrʋ lãw nɩ a Kɩrɩta: ʋ dɩ n a tɩ yel-bebe za suur kʋ̀ tɩ. 14 A sãn-sɛbɛ ʋl na tɩ fɛrɛ tɩ, a lɛ a nɛ-ƴãwnɩ na tɩ dĩ tɩ a, a Naaŋmɩn sãw nɩ a ʋlɩ sãn-sɛbɛ bɛr: ʋ ɩ na ʋ bɔr, ʋ kpa ʋ nɩ a da-gara zu. 15 Ʋ zɛb a tʋ̃ɔ a na-dɩrbɛ bʋʋrɛ za nɩ a fãw za, ʋ ɩ na a lɩɛbɩ bʋ̃-ɩ-làarɩ́ a nɩbɛ niŋé, a ɩ a gbãgbaar a ʋ Bie na zɛb tʋ̃ɔ, bɛ cɔrɩ tuur ʋ a. 16 A na ɩ a ŋa a, nyɩ ta saw nɩr za tɛrɛ nɩ nyɩ ƴɛrʋ bʋ̃-dɩra bɩɩ bʋ-nyuura kãw ƴãw ɛ, cuw kãw ƴãw, cuw-paala ƴãw bɩɩ pɩɛnʋ bibir ƴãw ɛ. 17 A a ŋa za ɩ n a nɩdaar yele dasule, ɛ cɛ a lɛ a yele na sɩrɩ ŋmɛ̃ a, Kɩrɩta zie n’a a yi. 18 Nyɩ ta saw a bɛlɩ dem na nɔnɛ tʋɔra-siwru ɩ-ɩrɩ a nɩbɛ niŋé a, bɩɩ na tɛr a malkɩ mɩnɛ ƴãwfʋ a, ɛ́ mɩ́ nyɛ̃ a bɛ yel-nyɛrɩ a ɩ bʋ̃-sɩza zuo a, nyɩ ta saw bɛ wa yel kɛ nyɩ sãw na ɩ. A nɩbɛ bɛ ŋa taabɛ mɩ́ ɩrɛ nɩ pɔl-ɩb zawla, bɛ na mɩ́ tɩɛrɛ a yele mɛ̃ nɩsaal tɛwr a ƴãw. 19 Bɛ bɛ lãw nɩ a Kɩrɩta na ɩ a ƴãgan zu a ɩ. Ɛ cɛ a Kɩrɩta zũú n’a a ƴãgan za páwr a dɩb, ɛ a kɔbɛ tuor-taa ziir nɩ a jiile ɩ ʋ nyɔw taa, ɛ kɛrɛ mɛ̃ a lɛ a Naaŋmɩn na bɔbr a. 20 A na ɩ lɛ nyɩ lãw nɩ a kɩrɩta kpi yi zaa a tẽ-daa bʋ̃-balɛ pʋɔ a, bʋ̃ʋ ƴãw n’a nyɩ fɛrɛ nyɩ tʋɔra tuur a nɛɛ a ŋa taabɛ, mɛ̃ a tẽ-daa n’ʋ cãa so a nyɩ nyɔ-vʋʋrʋ a: 21 ta de bom ŋa ɩ, ta lɛm bom ŋa ka a ɩ, ta tɔ bom ŋa ɩ? 22 Ɛ a a ŋa za caar ɩ bome na kʋ̃ cãa be, bɛlɛ wa tone nɩ a a. Nɩsaalbɛ nɛ-ƴãwnɩ nɩ a bɛ wulu sɩrɩ n’ɩ a a ŋa. 23 Sɩza n’a, a mɩ́ sãá na mɛ̃ yã-bãwfʋ be n a nɛɛ a ŋa pʋɔ a, bʋ̃ʋ n’ʋ vɛ̃, a mɩ́ ƴɛrɛ nɩ ŋa za nɩ ʋ puoru ƴɛrʋ, tʋɔra-siwru ƴɛrʋ, ƴãgan dɔwrʋ ƴɛrʋ, ɛ cɛ a bɛ tɛr tɔnɛ kãw za ɩ, nɩsaal ƴãgan yã-nɔn tɛwr a a maalɛ.
31 Nyɩ na lãw nɩ a Kɩrɩta lɛb yi a kũu pʋɔ a, nyɩ bɔbr a sa-zu bome, be a Kɩrɩta na be zɩ̃ a Naaŋmɩn dʋrʋ lowr a. 2 Nyɩ bɔbr a sa-zu bome, nyɩ ta bɔbr tẽw zu ka dem ɛ. 3 Nyɩ sɩrɩ na lãw nɩ a Kɩrɩta kpi, ɛ a nyɩ nyɔ-vʋʋrʋ lãw nɩ ʋ sɔwlɩ be a Naaŋmɩn zie. 4 A Kɩrɩta na ɩ a nyɩ nyɔ-vʋʋrʋ a, ʋlɛ wa sãá a lɛn daar a, nyɩ mɩ̀ na lãw nɩ ʋ na sãá a yúor-vɩɛlʋ-danʋ pʋɔ. 5 A na ɩ a ŋa a, nyɩ kʋ́ bom nɛ za na ɩ tẽw zu yele a, a nyɩ pʋɔmɩ́: a pɩ̃ɔ yele, a faalʋ, a ƴãgan nʋ̃ɔ̀-faar, a yel-faar vʋla, nɩ a mimir na ɩ tɩbɛ ƴãwfʋ a. 6 A yel-faar a ŋa taabɛ n’a mɩ́ ɩ a Naaŋmɩn suur ìr. 7 A ŋa n’a nyɩ tɩ dãw ɩrɛ, a ŋa n’a nyɩ tɩ dãw vʋʋrɛ. 8 A na ɩ a ŋa a, a ƴɛrɛ ŋa a, nyɩ ír a a ŋa za bɛr a nyɩ nyɔ-vʋʋrʋ pʋɔ: a suur, a jɛb, a po-tuolu, a zʋmɛ, nɩ ƴɛr-faa za na yire a nyɩ nʋ̀ɔrɩ́ a. 9 Nyɩ ta cãa ŋmarɛ ziri ƴãwnɛ taa ɩ, bʋ̃ʋ n’ʋ vɛ̃, nyɩ yaa nɩ a nɩsaal-kʋra nɩ a ʋ ɩ-ɩrɩ za bɛr, 10 ɛ su a nɩ-paala ʋl a ʋ Íre na maalɛ kʋra lɛ ʋ ɩrɛ paala, ɛ ŋmɛ̃ taa nɩ ʋ a, k’ʋʋ tʋ̃ɔ bãw ʋ vla za a. 11 A lɛ pʋɔ a, Zifʋ nɩ nɩr na bɛ ɩ Zifʋ a bɛ cãa be ɩ, nɩr na ŋmãa yʋɔr nɩ nɩr na bɛ ŋmãa a, bɛ cãa be ɩ, nasa-zɔ̃w daar nɩr nɩ tẽ-kor daar nɩr bɛ ka be ɩ, gbãgbaa nɩ nɩr na so ʋ tʋɔra a, bɛ cãa be ɩ; Kɩrɩta yõ n’ʋ be, ɩ bom za a bɛ za pʋɔ. 12 Nyɩ na ɩ a Naaŋmɩn nɩ-kaa-iri a zũú, ɛ ʋ ɩ nyɩ ɩ son, ɛ ʋ nɔ̃w nyɩ a, nyɩ ɩ su-ɓaarʋ nɩbɛ, nɩsaal-pɔwlbɛ, nyɩ siwre nyɩ tʋɔra, nyɩ ɩ su-nʋ̃ɔ̀ nɩ su-zãanɩ nɩbɛ. 13 Nyɩ saw dier taa ɩ-ɩrɩ ɛ dɩrɛ suur kʋrɛ taa, kãw wa sãw a ʋ tɔ a: mɛ̃ a lɛ a Sore na dɩ suur kʋ̀ nyɩ a, nyɩ mɩ̀ dɩrɛ suur kʋrɛ taa. 14 Ɛ cɛ baa zuo a za, nyɩ de a nɔ̃w-taa bin a nyɩ sɔgɔ, ʋlɛ n’ʋ mɩ́ kʋ́ a yele za nʋɔr a vɩɛl bɛ cɛ ɩ. 15 A Kɩrɩta ƴã-ɓaarʋ, ʋ dɩ naalʋ a nyɩ socie pʋɔ, a ƴã-ɓaarʋ ŋa pʋɔ n’a ʋ bʋɔlɩ nyɩ kɛ́ nyɩ wa lãw taa mɛ̃ ƴãw-been a. Nyɩ tɛr barka puoru tɩɛrʋ a nyɩ nyɔ-vʋʋrʋ pʋɔ. 16 A Kɩrɩta ƴɛrʋ, ʋ be a nyɩ pʋɔ yaga za. Nyɩ wule taa ɛ kpaalɛ taa nɩ yã-bãwfʋ. Nyɩ yiele puore nɩ a Naaŋmɩn yaanɩ nɩ nyɩ pʋɔ za, nɩ Sɛb-sõw yielu, nɩ danʋ yielu, nɩ yielu Vʋʋrʋ Sõw na waalɩ kʋ̀ nyɩ a. 17 Bom nɛ za nyɩ na ɩrɛ a, a nyɩ nʋɔr ƴɛrʋ pʋɔ n’a bɩɩ a nyɩ ɩ-ɩrɩ pʋɔ n’a a, a mɩ́ ɩ a Sore Yeezu yúor ƴãw n’a, nyɩ ɩrɛ a lɛ puore nɩ a Naaŋmɩn Sãà barka a Sore Yeezu zũú. 18 Pɔwbɛ ɛ, nyɩ sawr a nyɩ sɩrbɛ nʋɔr mɛ̃ a lɛ a na sɛw a Sore zie a. 19 Sɩrbɛ ɛ, nyɩ nɔnɛ a nyɩ pɔwbɛ, nyɩ ta mɩ́ sãwnɛ niwn ƴãwnɛ bɛ ɩ. 20 Bibiir i, nyɩ sawr a nyɩ dɔwrbɛ nʋɔr a yele za pʋɔ, lɛ n’a vɩɛl a Sore zie. 21 Sãà mɩnɛ ɛ, nyɩ ta ɩrɛ a nyɩ bibiir nyɛrɛ suur ɛ, nyɩ nãa mab a ɩ bɛ bal. 22 Gbãgbaar ɩ, nyɩ sawr a nyɩ tẽw zu ka nɩ-bɛrɛ nʋɔr a yele za pʋɔ. Nyɩ ta tone bɛ, bɛ na piwre nyɩ a ƴãw ɛ, a ɩ mɛ̃ nyɩ bɔbr a kɛ nyɩ ɩrɛ a pɛlɩ nɩsaalbɛ pʋɔ a ɩ; nyɩ tone nɩ a nyɩ pʋɔ za, mɛ̃ a lɛ a bɛlɩ dem na zɔrɛ a Sore a na mɩ́ ɩrɛ a. 23 Ton za nyɩ na tone a, nyɩ tone nɩ nyɩ pʋɔ za mɛ̃ a Sore ƴãw n’a a, a ta ɩ a nɩsaalbɛ ƴãw ɛ, 24 ɛ bãwnɩ a kɛ nyɩ na páw nɩ a sã-ya na ɩ a gbã-dɩ-bom a, a Sore zie. A Nɩ-kpɛ̃ɛ za n’ɩ a Kɩrɩta, nyɩɩm be n a ʋ tome ƴãw. 25 Nɩr za na maalɛ faa a, na páw nɩ a faa sã-ya, owru bɛ ka be ɩ.
41 Nɩ-bɛrɛ ɛ, nyɩ kaarɛ a nyɩ gbãgbaar zie nɩ yel-mɩnʋ nɩ lɛ a na sɛw a, ɛ mɩ̀ bãwnɩ a nyɩ na tɛr Nɩ-kpɛ̃ɛ a salom zu a. 2 Nyɩ su zu a puoru ƴãw, a ɩ nyɩ bɛr gʋ̃ɔ ɛ puore a Naaŋmɩn barka. 3 Nyɩ mɩ̀ cãa puore kʋrɛ tɩ: kɛ́ a Naaŋmɩn saw tɩ nyɛ̃ vo-vla hiere a ʋ ƴɛrʋ, k’ɩ̃ɩ manɛ a Kɩrɩta saw-deb yel-sɔwla, a ʋl ƴãw n’a ɩ̃ be a gaso pʋɔ. 4 Nyɩ puore k’ɩ̃ɩ manɛ a yel-sɔwla ŋa pàwr a ziir za mɛ̃ a lɛ a na fɛr k’ɩ̃ɩ ɩrɛ a. 5 Nyɩ ɩrɛ a yẽw dem zie nɩ yã-bãwfʋ, nyɩ taa bɛrɛ vo-vla za ʋ tɔlɛ ɩ. 6 Nyɩ mɩ́ ɩ a nyɩ ƴɛrʋ nʋmɛ kʋra lɛ, mɛ̃ bom bɛ na ƴãw nyaarʋ a, ɛ sõwne a nɩbɛ. Nyɩ mɩ́ bãw a sɔwfʋ, sɔw vla kʋ̀ ŋa za. 7 A ɩ̃ yɛb-nɔna Tɩsɩkɩ, na ɩ tõ-tõ-bi-dẽdẽle nɩ ɩ̃ lãw-tõ-tɔ a Sore tome pʋɔ a, na manɩ nɩ a ɩ̃ yele za kʋ̀ nyɩ. 8 Ɩ̃ sʋ̃ɔm a bul tone ʋ a nyɩ zie, k’ʋʋ wa manɩ a tɩ yele kʋ̀ nyɩ ɛ mɔwlɩ nyɩ. 9 A tɩ yɛb tɔr za nɩ tɩ bá Onezim, na ɩ a nyɩ nɩr a, bɩɛlɛ ʋ na. Bɛ na manɩ nɩ bom za na ɩrɛ a ka a kʋ̀ nyɩ. 10 Arɩsɩtakɩ, mãa nɩ ʋl na be a gaso pʋɔ a, puore nyɩ na lãw nɩ a Banabasɩ yɛb Markɩ. Bɛ yel a kʋ̀ nyɩ a lɛ nyɩ na na ɩrɛ a Markɩ ƴãw a: ʋlɛ wa wa a nyɩ zie a, nyɩ de ʋ vla. 11 A Yeezu bɛ na bʋɔlɛ Zitisɩ a, mɩ̀ puore nyɩ na. A Zifʋ mɩnɛ pʋɔ a, bɛl tɛwr nɛ bɛ lãw nɩ mɛ̃ tõ a Naaŋmɩn Naalʋ tome. Bɛ mɔwlɩ mɛ̃ nɩ yaga. 12 A Epafarasɩ na ɩ a nyɩ nɩr a, mɩ̀ puore nyɩ na. A Yeezu Kɩrɩta tõ-tõ-bie ŋa tʋlɛ nɩ a puoru ƴãw, puore kʋrɛ nyɩ kʋra lɛ, kɛ́ nyɩ tʋ̃ɔ tɛ nyɩgɛ ɛ bɩ nɩbɛ baar a Kɩrɩta sɔr pʋɔ, maalɛ a Naaŋmɩn pʋ-tɩɛrʋ za. 13 Ɩ̃ dɩrɛ nɩ a ʋ dãsɩɛ ʋ na wone tuo a nyɩ ƴãw bɛ dɩ vuo a, nɩ a Lawdise dem nɩ a Ierapolisi dem ƴãw a. 14 A tɩ ba Luka na ɩ a dɔwta a, nɩ Demasɩ puore nyɩ na. 15 Nyɩ pùori a yɛbr na be a Lawdise a, nɩ a Nɛ̃fa, lãw nɩ a Lãw-yir na ɓanɛ taa a ʋ yir a. 16 Nyɩmɛ wa kanɩ a ɩ̃ sɛbɛ baar a, nyɩɩm ɩ ʋ ta a Lawdise Lãw-yir pʋɔ bɛ mɩ̀ kanɩ ʋ. Ɛ nyɩ mɩ̀ kanɩ a Lawdise Lãw-yir sɛbɛ bɛ na na tɩr kʋ̀ nyɩ a. 17 Nyɩ yel a ŋa kʋ̀ a Arsɩpʋ: «Kaarɛ a Sore ton fʋ na páw a zie vla, ɛ ƴãw fãw tone ʋ vla.» 18 A mãa Pol nũu, na sɛb a yaanɩ puoru a, n’ɩ ŋa: nyɩ taa yiire ɩ̃ na be a gaso pʋɔ a ɩ. A Naaŋmɩn maalʋ, ʋ be a nyɩ zie.