2 TIMOTE

¹ A mãa Pol, Naaŋmɩn na nɔ̃w yã ƴãw ɩ̃ ɩ a Kɩrɩta Yeezu nɩ-tona a, a tu a lɛ ʋ na yel k’ʋʋ na kʋ̀ tɩ nɩ a nyɔ-vʋʋrʋ a Kɩrɩta Yeezu ƴãw a, ² mãa n’ʋ sɛbr a fʋ̃ʋ ɩ̃ bi-nɔna Timote. A Naaŋmɩn Sãà nɩ a tɩ Sore Kɩrɩta Yeezu, bɛ kʋ̀ b maalʋ, su-ɓaarʋ nɩ ƴã-ɓaarʋ. ³ Ɩ̃ na mɩ́ wa pore a fʋ yúor a ɩ̃ puoru pʋɔ, mʋ̃tɔ̃w nɩ tɩ̃ɩsɔw za a, ɩ̃ mɩ́ puore nɩ a Naaŋmɩn barka yaga za, a Naaŋmɩn ɩ̃ na tone nɩ tɩɛr-vla mɛ̃ a ɩ̃ sãakʋ̃-kore a. ⁴ Mãa wa lɛ tɩɛrɛ a fʋ mʋ̃ta-kʋ̃ɔ a, ɩ̃ mɩ́ bɔbr a nɩ ɩ̃ pʋɔ za k’ɩ̃ɩ nãá lɛb nyɛ̃ b kɛ̀ nʋ̃ɔ̀ kpɛ m. ⁵ Ɩ̃ lɛb a bãwnɩ a Naaŋmɩn saw-deb mɩŋa fʋ na tɛr a. A fʋ mãkʋm Loyisɩ nɩ a fʋ mã Enisɩ nɛ bɛ de niwn tɛr a Naaŋmɩn saw-deb ŋa, ɩ̃ na bãwnɩ fʋ mɩ̀ tɛr a. ⁶ Alɛ n’a so ɩ̃ kpaalɛ fʋ, kɛ́ fʋ lɛb sɩ̃w a maalʋ a Naaŋmɩn na kʋ̀ b, a lɛn daar ɩ̃ na ír a nuru dɔwlɩ a fʋ zu a. ⁷ Bʋ̃ʋ n’ʋ vɛ̃, dɛ̃bɩ̃ɛ vʋʋrʋ bɛ n’ʋ a Naaŋmɩn kʋ̀ tɩ ɛ, fãw nɩ nɔ̃wfʋ nɩ tʋɔra-nyɔwfʋ vʋʋrʋ n’ʋ. ⁸ Lɛ so, ta zɔrɛ vĩ a tɩ Sore dãsɩɛ dɩb ƴãw ɛ; a mãa mɩ̀ na be a gaso pʋɔ a ʋ yúor ƴãw a, a ta ɩrɛ fʋ vĩ ɛ. Nɩ̃ɛ vɛ̃ kɛ saw lãw nɩ mɛ̃ wone a tuo, nɩ Naaŋmɩn fãw, a Yel-nʋ̃ɔ̀ ƴãw. ⁹ A Naaŋmɩn faa tɩ na, ɛ bʋɔlɩ tɩ nɩ bʋɔl-sõw. Ɛ cɛ a bɛ kaar mɛ̃ a tɩ ɩ-vɩɛlɩ n’a so ɩ, a ʋ pʋ-tɩɛrʋ nɩ a ʋ maalʋ na tu a lɛ a n’a. A maalʋ ŋa a, a Kɩrɩta Yeezu n’ʋ ʋ kʋ̀ n tɩ, ɛ a dɩta-pɛ-yome za wa bãw be. ¹⁰ Ƴɛrɛ ŋa a, a maalʋ ŋa pãa sãá na, a tɩ Faarɛ Kɩrɩta Yeezu na wul ʋ tʋɔra a zũú. Ʋlɛ n’ʋ ɩ a kũu kpɛnʋ baarɩ, ɛ ɩ a nyɔ-vʋʋrʋ na bɛ tɛr kũu a, ʋ sãá a Yel-nʋ̃ɔ̀ manʋ pʋɔ. ¹¹ A Yel-nʋ̃ɔ̀ ŋa n’ʋ Naaŋmɩn ƴãw k’ɩ̃ɩ hiere, ɩ̃ na ɩ nɩ-tona nɩ wul-wule a. ¹² Alɛ n’a so ɩ̃ wone a tuo a ŋa. Ɛ cɛ vĩ bɛ ɩrɛ mɛ̃ ɩ, ɩ̃ bãw nɩ sob nɛ ƴãw ɩ̃ na ƴãw a ɩ̃ tɩɛrʋ a, ɛ ɩ̃ bɛ bʋnɛ ɩ, ɩ̃ bãwnɩ a na k’ʋʋ tɛr ɩ fãw na tɛr a bom ʋ na kʋ̀ m k’ɩ̃ɩ tɛlɛ a, tɩ ta a n ƴɛrʋ-maalʋ bibir. ¹³ Tuur a yel-mɩŋa ƴɛr-bie al ɩ̃ na ƴɛr kʋ̀ b a Kɩrɩta Yeezu saw-deb nɩ a ʋ nɔ̃wfʋ pʋɔ a. ¹⁴ Maal tɛr a bʋ̃-vla ŋa bɛ na kʋ̀ b a, nɩ a Vʋʋrʋ Sõw fãw, ʋl na kpɩɛr a tɩ pʋɔ a. ¹⁵ Fʋ bãwnɩ a na, a Azi tẽw dem za zawrɩ mɛ̃ na bɛr, Fɩzɛl nɩ Ɛrmozɛn mɩ̀ pʋɔ nɩ a bɛ pʋɔ. ¹⁶ A Sore, ʋ tɛr su-ɓaarʋ ɩb yaga za a Onezifɔɔr yir dem ƴãw. Gb’a a yaga za, a Onezifɔɔr ɓaal ɩ a ɩ̃ tɩɛrʋ, ɛ bɛ zɔ a ɩ̃ gaso bamɛ vĩ ɛ. ¹⁷ Ɛ cɛ ʋ na wa tarɛ a Ʋrɔm tẽw wa baarɛ a, ʋ ƴãw nɩ fãw bɔ tɩ nyɛ̃ m. ¹⁸ A Sore, ʋ ɩ ʋ páw su-ɓaarʋ a Naaŋmɩn zie a ƴɛrʋ-maalʋ bibir. Ɛ a tome al za, ʋ na tõ kʋ̀ m a Efɛɛzɩ tẽw a, fʋ bãw a nɩ vla zuo nɩr za.

¹ A na ɩ a ŋa a, fʋ̃ʋ ɩ̃ bie e, ƴãw fãw kpɛmɛ a maalʋ na yi a Kɩrɩta Yeezu zie a pʋɔ. ² A bom nɛ fʋ na wõ a ɩ̃ zie, dãsɩɛ dem yaga niŋé a, man ʋ kʋ̀ nɩbɛ bɛl ƴãw fʋ na bɛr tɩɛrʋ a, ɛ́ bɛ mɩ̀ na na tʋ̃ɔ wul ʋ nɩ-yoru a. ³ Lãw nɩ mɛ̃ wone a tuo mɛ̃ Kɩrɩta Yeezu soja-vla a. ⁴ Nɩr za na kpɛ sojarɩ tome pʋɔ a, mɩ́ bɛr ɩ a nɩ-zawlɛ nyɔ-vʋʋrʋ yele, ʋlɛ wa bɔbr k’ʋʋ pɛlɩ a ʋ nɩ-kpɛ̃ɛ pʋɔ a. ⁵ Ɛ lɛ mɩ̀ n’a a dɩɛnʋ mɔb pʋɔ. A sob nɛ na mʋɔr a, mɩ́ páw nɩ a mɔ̃-tʋ̃ɔfʋ bom, ʋlɛ wa mɔ̃ mɛ̃ a lɛ a nɛɛ na bin a. ⁶ A ka-kʋɔra na tõ hanɩ nɩ a, ʋlɛ n’ʋ a sɛw k’ʋʋ mɩ́ de niwn de a ʋ bʋ̃-dieri. ⁷ Bãw a a ŋa ɩ̃ na ƴɛrɛ a pɛr. Mɔ̃ mɩ̀, a Sore na ɩ na fʋ bãw a za pɛr. ⁸ Lɛb tɩɛrɩ a Yeezu Kɩrɩta yele, ʋl na ɩ Daviir bʋʋrɛ nɩr a: ʋ lɛb a yi a kũuni pʋɔ mɛ̃ a lɛ a ɩ̃ Yel-nʋ̃ɔ̀ na yere a. ⁹ A Yel-nʋ̃ɔ̀ ŋa ƴãw n’a ɩ̃ wone a tuo, bɛ tɩ nyɔw mɛ̃ ’lẽ nɩ bamɛ mɛ̃ yel-fa-maalɛ a. Ɛ cɛ bɛ bɛ ’lẽ a Naaŋmɩn ƴɛrʋ ɛ! ¹⁰ Alɛ n’a so ɩ̃ saw de a tuo za, a bɛlɩ dem a Naaŋmɩn na kaa ir a ƴãw, kɛ́ a bɛl mɩ̀, bɛ tʋ̃ɔ páw a faafʋ a Kɩrɩta Yeezu ƴãw, lãw nɩ a yúor-vɩɛlʋ-danʋ na be kʋra lɛ a. ¹¹ A ƴɛrʋ ŋa ɩ n sɩza: «Tɩmɛ wa lãw nɩ ʋ kpi a, tɩ mɩ̀ na lãw nɩ ʋ na vʋʋrɛ; ¹² tɩmɛ wa dɩ kanyir a, tɩ mɩ̀ na lãw nɩ ʋ na dɩ naalʋ; tɩmɛ wa zawr ʋ bɛr a, ʋ mɩ̀ na zawrɩ tɩ na bɛr; ¹³ tɩmɛ wa tɩɛ ʋ bɛr a, ʋl ŋmɛ̃ n ʋ ŋmɛ̃a, ʋ na kʋ̃ tʋ̃ɔ zawrɩ ʋ tʋɔra bɛr a ƴãw.» ¹⁴ Lɛb sɩ̃w bɛ za tɩɛrʋ a yele a ŋa ƴãw, ɛ́ zɛlɩ bɛ yãayãa Naaŋmɩn niŋé, kɛ́ bɛ ta zɛbr taa ƴɛr-bie ƴãw ɛ, a zɛbr a ŋa taabɛ bɛ tɛr yel-ɩra za ƴãw pʋɔ a bɔrʋ a ƴɛr-bie a ŋa na mɩ́ bɔr ɩ a nɩbɛ na bɛrɛ wone a ɩ. ¹⁵ Ɩ fãw ar a Naaŋmɩn niŋé mɛ̃ nɩr bɛ na ɩ kaa a, mɛ̃ tõ-tõ-bie na bɛ zɔrɛ a ʋ tome vĩ a ɩ, ɩ mɛ̃ tõ-tõ-bie na manɛ a yel-mɩŋa ƴɛrʋ vla vla za a. ¹⁶ Ɛ a ƴɛr-zawlɛ na bɛ tu Naaŋmɩn-saw-deb a, nɩɩrɛ a bɛrɛ. Bɛlɩ dem na ƴɛrɛ a ƴɛr-zawlɛ a ŋa a, Naaŋmɩn-bɛ-ƴãwfʋ ɩb a bɛ na ɩrɛ dɔwlɛ cere nɩ. ¹⁷ A bɛ ƴɛrʋ ɩ na mɛ̃ gbõtor na luwr cere a. A ŋa n’a a Ɩmene nɩ a Filetɔsɩ ŋmɛ̃. ¹⁸ Bɛ bɔr a zãá nɩ a yel-mɩŋa, bɛ na yere kɛ tɩ lɛb a yi a kũu pʋɔ baarɩ a, a ŋa n’a bɛ ɩrɛ sãwnɛ nɩ-yaga Naaŋmɩn-saw-deb. ¹⁹ Ɛ cɛ yir pɛr na kpɛmɛ ɛ Naaŋmɩn bin a, cãa nɩ be. Ƴɛr-bie a ŋa n’a bɛ wi ƴãw a ʋ zu: «A Sore bãw nɩ a ʋ nɩbɛ», lɛ nɩ: «Sob nɛ za na bʋɔlɛ a Sore yúor a, ʋ taw zãá nɩ a ɩ-faar.» ²⁰ Yi-kpɛ̃ɛ pʋɔ a, a pɔw-bome bɛ mɩ́ ɩ salm-pɛlɛ nɩ salm-zɩɩr tɛwr ɛ, daar dem nɩ yawra dem mɩ̀ mɩ́ be n be. A mɩnɛ a bibi-bɛrɛ ƴãw, ɛ a mɩnɛ a bibie za ƴãw. ²¹ Sob nɛ na sò a faalʋ a ŋa dɛwr bɛr a, na ɩ na mɛ̃ a bibi-bɛrɛ pɔw-bome a, ʋ vɩɛlɩ ʋ za, a Sore tɛr ʋ yel-ɩra, ɛ́ ʋ cɔbrɩ gu yel-vla za maalʋ. ²² Dɛrɛ a fʋ pɔ̀lʋ daar bʋ̃-nɔnɩ; ɛ lãw nɩ a bɛlɩ dem na bʋɔlɛ a Sore nɩ soci-pla parpar a, tu a mɩnʋ pùor, a Naaŋmɩn-saw-deb, a nɔ̃wfʋ nɩ a ƴã-ɓaarʋ pùor. ²³ Ɛ cɛ, bɛr a nɔkpɛn zawlɛ na bɛ tɛr pɛr a ŋmɛb. Fʋ bãwnɩ a na kɛ́ alɛ n’a waar ɩ a zɛbr. ²⁴ Ɛ cɛ Sore tõ-tõ-bie bɛ sɛw kɛ ʋlɛ nɩ nɩr zɛbr taa ɩ. A sɛw na k’ʋʋ tɛr nɔ̃wfʋ a nɩbɛ za ƴãw, k’ʋʋ tʋ̃ɔ wule a nɩbɛ, ɛ sawr dier a nɩbɛ poto-yele. ²⁵ Baalʋ baalʋ lɛ n’a a sɛw k’ʋʋ mɩ́ wule a bɛlɩ dem na mɩ́ ŋmɛ a ʋ ƴɛrʋ lɔb a. Ãa bãw, Naaŋmɩn nãà ɩ na bɛ lɩɛbɩ a bɛ ɩb, bãw a yel-mɩŋa, ²⁶ ɛ lɛb bãw yã yi zaa a Gɛgɛra bɛrɩ pʋɔ, ʋl na tɩ nyɔw bɛ ƴãw bɛ maalɛ a ʋ pʋ-tɩɛrʋ a.

¹ Bãw a yel ŋa vla vla: a bibi-pɛ-baarɩ daar, a zie na kpɛmɛ na. ² Bʋ̃ʋ n’ʋ vɛ̃, a nɩbɛ na tɩɛrɛ nɩ bɛl tɛwr yele, ɛ ɩ libi-nɔ̃wnbɛ; bɛ na pɔrɛ nɩ zaa lɛ ɛ ɩrɛ pɔ̀lʋ, bɛ na tʋʋr ɩ Naaŋmɩn zʋmɛ, ɛ bɛ sawr a bɛ dɔwrbɛ nʋɔr ɛ; fʋ na mɩ́ maalɩ bɛ na, ɛ́ bɛ bɛ ŋmɛlɩ kaa fʋ ɛ, bɛ na sãwnɛ nɩ a bʋ̃-son bɛrɛ. ³ Bɛ kʋ̃ tɛr nɔ̃wfʋ ɛ, ɛ bɛ tɛr nɩ-baal-zɔba ɩ. Bɛ na ɩ n gɛgɛrɩ, ɛ kʋ̃ tuur nʋɔr kãw za ɩ, poto-faar nɩbɛ na ciir yel vla a. ⁴ Bɛ na mɩlɛ nɩ taa, ɛ ɩ suur tɛwr, pɔ̀lʋ tɛwr nɩbɛ, ɛ́ nɔnɛ a ƴãgan nʋ̃ɔ̀ ɛ nɩ̃ɛ bɛr a Naaŋmɩn. ⁵ Bɛ na sãá nɩ nɩbɛ na ƴãwnɛ Naaŋmɩn a, ɛ cɛ bɛ na zawr ɩ a Naaŋmɩn ƴãwfʋ fãw bɛr. Ŋmɛlɩ kpaar cɔw a nɩbɛ bɛ ŋa mɩ̀! ⁶ A bɛ nɩbɛ n’ɩ a bɛl na mɩ́ kpɛ a yie pʋɔ bɛlɩ nyɔw pɔwbɛ na bɛ tɛr fãw, na tuo yel-bebe ɛ tu a bɛ pʋ-tɩɛr-bʋʋrɛ za pùor a; ⁷ a pɔwbɛ bɛ ŋa taabɛ be n a zanʋ zu kʋra lɛ, ɛ bɛ be za na tʋ̃ɔ bãw a yel-mɩŋa ɩ. ⁸ Mɛ̃ a lɛ a Zanɛsɩ nɩ a Zãbɩrɛsɩ na bɛ tɩ saw de a Mõyiir ƴɛrʋ a, lɛ n’a a nɩbɛ bɛ ŋa mɩ̀ bɛ saw de a yel-mɩŋa ɩ. Yã-faar nɩbɛ nɛ bɛ, a bɛ Naaŋmɩn-saw-deb bɛ tɛr bir ɛ. ⁹ Ɛ cɛ bɛ kʋ̃ tɔl yɩ̃ɛ ɩ, a bɛ dãbolu na sãá na nɩbɛ za nyɛ̃, mɛ̃ a lɛ a nɩbɛ ayi bɛ ŋa dem na tɩ sãá a. ¹⁰ Ɛ cɛ a fʋ̃ʋ a, fʋ tu mɛ̃ nɩ vla a ɩ̃ wulu pʋɔ, nɩ a ɩ̃ cenu pʋɔ, a lɛ ɩ̃ na mɩ́ tɩɛr k’ɩ̃ɩ ɩ a, nɩ a ɩ̃ Naaŋmɩn-saw-deb pʋɔ, a ɩ̃ tʋɔra-nyɔwfʋ pʋɔ nɩ a nɔ̃wfʋ pʋɔ, a kanyir pʋɔ, ¹¹ a dɔwrʋ pʋɔ nɩ a kpɩɛrʋ pʋɔ ɩ̃ na páw a Ãtɩɔsɩ a, a Ɩkonɩɔm nɩ a Lɩsɩtɩr tẽw a. Bʋ̃ʋ dɔwrʋ n’a ɩ̃ bɛ nyɛ̃! Ɛ a Sore faa mɛ̃ a za pʋɔ! ¹² Mɔ̃ mɩ̀, a bɛlɩ dem za na bɔbr kɛ́ bɛ vʋʋrɛ nɩ Naaŋmɩn ƴãwfʋ lãw nɩ a Kɩrɩta Yeezu a, bɛ na nyɛ̃ nɩ dɔwrʋ. ¹³ Ɛ a nɩ-faar nɩ a nɩ-bɛlbɛ a, ɩ-faar a bɛ na ɩrɛ dɔwlɛ cere nɩ, tule nɩ a bɛ taabɛ ɛ tule a bɛl tɛɛ za. ¹⁴ Ɛ cɛ a fʋ̃ʋ a, a yele al fʋ na zànɩ ɛ nyɛ̃ a ɩ sɩza a, maal tɛr a kpɛ̃w za. Fʋ bãw nɩ a bɛlɩ dem zie fʋ na zànɩ a yele a ŋa a. ¹⁵ A fʋ bibile daarɩ za n’a fʋ bãw a Sɛb-son. A tɛr ɩ fãw na kʋ̀ b a yã-bãwfʋ na na ɩ fʋ páw a faafʋ a Kɩrɩta Yeezu saw-deb pʋɔ a. ¹⁶ Sɛb-sõw za a, Naaŋmɩn Vʋʋrʋ n’ʋ mɩ́ ƴãw bɛ sɛb, ʋ tɛr yel-ɩra a wulu ƴãw, a ziri gɔb ƴãw, a yele lɛ dɛnʋ ƴãw, a mɩnʋ sɔr wulu ƴãw, ¹⁷ k’aa Naaŋmɩn nɩr mɩ́ cɔbrɩ ʋ za yel-vla za maalʋ ƴãw.

¹ Ɩ̃ zɛlɛ na kpaalɛ nɩ fʋ, a Naaŋmɩn niŋé nɩ a Kɩrɩta Yeezu niŋé, ʋl na na lɛb wa, wa maal ɩ a nɩ-vʋʋrɩ nɩ a nɩ-kũuni ƴɛrʋ a, a ʋ lɛb-waa nɩ a ʋ naalʋ zũú, ² hiere yere a Naaŋmɩn ƴɛrʋ, alɛ saa ŋmɛ̃ ŋmɩŋmɩn a, manɛ ʋ, mɩ́ man ʋ wul a bɛlɩ dem na yel kɛ ziri n’a a, ƴãwnɛ bɛ dɛ̃bɩ̃ɛ, mɩ́ nyɔw fʋ tʋɔra kpaalɛ bɛ, tɛr ɩ a wulu tɩɛrʋ kʋra lɛ. ³ Daar kãw sɩrɩ na waar na ta, bɛ mɩnɛ kʋ̃ cãa sawr a wul-vla ɩ, ɛ cɛ mɛ̃ a lɛ bɛ na bɔbr a, bɛ na tɛr ɩ wul-wulbɛ yaga yaga bɛ manɛ yele na nʋmɛ a bɛ tobe wob ƴãw a. ⁴ Bɛ na fur ɩ a bɛ tobe a yel-mɩŋa ƴãw, ɛ tu suolu pùor. ⁵ Ɛ cɛ a fʋ̃ʋ a, nyɔw fʋ tʋɔra a yele za pʋɔ, saw de a tuo, tone a Yel-nʋ̃ɔ̀ hieru tome, tone a fʋ Naaŋmɩn tõ-tõ-bie tome za vla. ⁶ Mãa a, bɛ maal ɩ mɛ̃ nɩ a bawr baarɩ, a ɩ̃ kulu daar ta na. ⁷ Ɩ̃ zɛb ɩ a zɛb-vla, ɩ̃ zɔ na ta a dãw-taa zɔ-tab zie, ɩ̃ maal a tɛr a Naaŋmɩn saw-deb. ⁸ Ƴɛrɛ ŋa a, a mɩnʋ sã-ya gùre mɛ̃ na; a ƴɛrʋ-maalʋ bibir wa vɩɛ a, a Sore na ɩ ƴɛr-maalɛ na tuur yel-mɩŋa a, na de ʋ na kʋ̀ m; ɛ cɛ mãa yõ kʋ̃ n’ʋ ɛ, ʋ mɩ̀ na de ʋ na kʋ̀ a bɛlɩ dem za na gùre nɩ nɔ̃wfʋ a daar ʋl ʋ nãà wa sãá a. ⁹ Ƴãw fãw wa fɔ̃w wa páw mɛ̃. ¹⁰ Bʋ̃ʋ n’ʋ vɛ̃, Demasɩ zawrɩ mɛ̃ na bɛr ɛ tɔl cen Tesaloniki, ʋ na nɔ̃w a tẽw ŋa zu yele a ƴãw. Kɩrɛsãsɩ cen nɩ Galasi, Títɩ̀ cen Dalmasɩ. ¹¹ Luka yõ n’ʋ be a ɩ̃ zie. Tɛr a Markɩ wa n, ʋ na sõw mɛ̃ nɩ a ɩ̃ tome pʋɔ bɛ dɩ vuo ɩ. ¹² Ɩ̃ tõ n Tɩsɩkɩ Efɛɛzɩ tẽw. ¹³ Fʋ̃ʋ wa waar a, fʋ̃ʋ tɛr a kpar-kpɛ̃ɛ ɩ̃ na bɛr a Karpɔsɩ zie a Tʋrʋwasɩ a, waar ɩ, lãw nɩ a sɛbr, baa zuo a za a gamɛ sɛbr. ¹⁴ A sãa-kpɩɛrɛ Alɛsãdɩr ɩ na a kpɛ m yaga. «A Sore na ya ʋ na man nɩ a ʋ ɩ-ɩrɩ.» ¹⁵ A fʋ̃ʋ mɩ̀, gu fʋ tʋɔra a ʋ ƴãw. Ʋ bɛ saw de a tɩ ƴɛrʋ towtow ɛ. ¹⁶ Ɩ̃ na tɩ cen a ƴɛrʋ zie a dãw-niwn sob, k’ɩ̃ɩ tɩ ƴɛr faa ɩ̃ tʋɔra a, nɩr za bɛ tɩ tu a ɩ̃ pùor ɛ, bɛ za tɩ zawrɩ mɛ̃ na bɛr. Naaŋmɩn taa wa sowre bɛ bom ɛ. ¹⁷ A Sore ʋl sõw mɛ̃ na. Ʋ kʋ̀ m ɩ fãw yaga k’ɩ̃ɩ tʋ̃ɔ hieri yel a Yel-nʋ̃ɔ̀, ɛ ɩ a nɩ-bʋʋr-yoru za wõ ʋ. Ʋ faa mɛ̃ nɩ a gbẽw nʋɔrɩ́. ¹⁸ A Sore na cãa na lɛ faa mɛ̃ yel-faa za pʋɔ. Ʋ na faa mɛ̃ na ɛ ƴãw ɩ̃ kpɛ a ʋ tẽ-vla Naalʋ pʋɔ. Ʋlɛ so yúor-vɩɛlʋ-danʋ a yome yome za. Amɛn. ¹⁹ Puori a Pɩrɩsɩl nɩ Akɩlasɩ kʋ̀ m, lãw nɩ a Onezifɔɔr yir dem. ²⁰ Erasɩ cãa na be a Korɛ̃tɩ. Torofim ɩ n baal, ɩ̃ bɛr ʋ a Mɩlɛtɩ. ²¹ Ɩ fãw wa ɛ a ũon-yi-paala wa bãw ta. Ebul nɩ Pidãsɩ nɩ Lɛ̃ puore fʋ na, de nɩ Kulodɩa nɩ a yɛbr za. ²² A Sore ʋ be a fʋ zie. A Naaŋmɩn maalʋ, ʋ be a nyɩ zie.