2 TESALONIKI

¹ A mãa Pol, nɩ Sɩlvɛ̃ de nɩ Timote, tɩmɛ nɛ bɛ tɩrɛ a sɛbɛ ŋa kʋ̀rɛ a nyɩɩm Tesaloniki Lãw-yir, a Naaŋmɩn tɩ Sãà nɩ a tɩ Sore Yeezu Kɩrɩta na so a. ² A Naaŋmɩn tɩ Sãà nɩ a Sore Yeezu Kɩrɩta, bɛ kʋ̀ nyɩ a maalʋ nɩ a ƴã-ɓaarʋ. ³ Yɛbr ɩ, a fɛr a kɛ́ tɩ mɩ́ puore a Naaŋmɩn yaanɩ kʋra lɛ a nyɩ ƴãw. Ɛ a mɩ̀ sɛw na kɛ́ tɩ ɩrɛ a lɛ, bʋ̃ʋ n’ʋ vɛ̃, a nyɩ Naaŋmɩn-saw-deb kɛrɛ na dɔwlɛ bɛ dɩ vuo ɩ, ɛ a nɔ̃wfʋ nyɩ na nɔnɛ taa a, kɛrɛ dɔwlɛ a nyɩ za been been zie. ⁴ Lɛ so, tɩ mɩ́ nyʋ̀ʋr a nyɩ ƴãw a Naaŋmɩn Lãw-yie sɔgɔ, nyɩ na mɩ́ dɩ kanyir ɛ tɛr a Naaŋmɩn-saw-deb, a nyɩ dɔwrʋ za, nɩ a nyɩ kpɩɛrʋ za nyɩ na nyɛrɛ a ƴãw a. ⁵ Naaŋmɩn ƴɛrʋ maalʋ na tu yel-mɩŋa a bãwfʋ n’ɩ a ŋa, bʋ̃ʋ n’ʋ vɛ̃, a kanyir nyɩ na mɩ́ dɩ a, na ɩ na nyɩ sɛw taa nɩ a Naaŋmɩn Naalʋ, a Naalʋ ŋa ƴãw nyɩ na wone a tuo a. ⁶ A sɛw na kɛ́ Naaŋmɩn mɩ́ ɩ kpɩɛrʋ páw a bɛlɩ dem na ɩrɛ a kpɩɛr nyɩ a, yaa a san, ⁷ ɛ́ kʋ̀ pɩɛnʋ a nyɩɩm na wone a tuo lãw nɩ a tɩɩm, a lɛn daar ʋ na na sãá a salom zu nɩ a ʋ kpɛnʋ malkɩ mɩnɛ a; ⁸ ʋ na wa n vũu zɛlɛ pʋɔ, k’ʋʋ wa dɔwrɩ a bɛlɩ dem na bɛ bãw a Naaŋmɩn a, ɛ́ bɛ tuur a tɩ Sore Yeezu Yel-nʋ̃ɔ̀ a. ⁹ A bɛ dɔwrʋ na ɩ n wɛb bɛ wɛ kʋra lɛ, zãá nɩ a Sore niwn nɩ a ʋ kpɛnʋ yúor-vɩɛlʋ-danʋ, ¹⁰ a lɛn daar ʋ na na lɛb wa wa nyɛ̃ yúor-vɩɛlʋ-danʋ a ʋ nɩ-son zie, ɛ bɛlɩ dem za na saw de ʋ a, uore a ʋ niwn vɩɛlʋ a ʋlɩ bibir nɛ a; ɛ a nyɩɩm a, nyɩ saw na de a dãsɩɛ tɩ na dɩ a. ¹¹ Alɛ so tɩ puore kʋ̀rɛ nyɩ kʋra lɛ, k’aa tɩ Naaŋmɩn ɩ nyɩ sɛw taa nɩ a nyɔ-vʋʋrʋ ʋl ƴãw ʋ na bʋɔlɩ nyɩ a, k’ʋʋ sõwne nyɩ nɩ a ʋ fãw, nyɩ mɩ́ maalɩ a vla za nyɩ na bɔbr a, ʋʋ ɩ a nyɩ saw-deb tone vla vla za. ¹² A ŋa n’a nyɩ na íre a tɩ Sore Yeezu yúor, ɛ mɩ̀ nyɛrɛ yúor a ʋ zie, a tu a tɩ Naaŋmɩn nɩ a tɩ Sore Yeezu Kɩrɩta maalʋ.

¹ Yɛbr ɩ, a tɩ Sore Yeezu Kɩrɩta waa, nɩ tɩ na na ɓã taa a ʋ zie a ƴãw a, tɩ zɛlɛ nyɩ na: ² nɩr wa yel k’aa Sore bibir ta na a, nyɩ ta saw a nyɩ tɩɛrʋ dam nyɩ fɔ̃w lɛ ɩ, ɛ́ nyɩ ta zɔrɛ dɛ̃bɩ̃ɛ ɩ; bɛlɛ saa yel kɛ tɩmɛ nɛ bɛ ƴɛr Naaŋmɩn-ƴɛr-manɛ ƴɛrʋ bɩɩ ƴɛr ƴɛrʋ kãw bɩɩ tɩr sɛbɛ a, nyɩ taa sawr ɛ. ³ Nyɩ ta saw nɩr kãw za bɛlɩ nyɔw nyɩ nɩ bɛl-bʋʋrɛ kãw za ɩ. Bʋ̃ʋ n’ʋ vɛ̃, a fɛr a kɛ́ a Naaŋmɩn jɛ-bɛrʋ ta baarɩ, kɛ́ a Faalʋ nɩr, na ɩ nɩ-wɛra a, sãá baarɩ, ɛ a bibir ŋa bãw ta. ⁴ Bom nɛ za a nɩsaalbɛ na bʋɔlɛ kɛ ŋmɩn a, ɛ puore ʋ a, a Faalʋ nɩr na ìr ɩ nɩ pɔ̀lʋ ɩ a ʋ dɔ̃ sob, ɛ ʋ na tɛr ɩ lɛɛɛ tɩ kpɛ zɩ̃ a Naaŋmɩn yi-kpɛ̃ɛ pʋɔ, ɛ yel k’ʋʋ ɩ n Naaŋmɩn. ⁵ Nyɩ yiir a ɩ̃ na tɩ yel a yel ŋa kʋ̀ nyɩ, a lɛn daar ɩ̃ na tɩ be a nyɩ zie a bɩɩ? ⁶ Ɛ ƴɛrɛ ŋa a, nyɩ bãwnɩ bom nɛ na n’ʋ nyɔw a Faalʋ nɩr tɛr sɛr, ɛ gu k’ʋʋ wa sãá a ʋ daar a. ⁷ Bʋ̃ʋ n’ʋ vɛ̃, a faalʋ kpɛnʋ na sɔwl a tĩ na tone baarɩ; ɛ cɛ a sob nɛ na nyɔw ʋ tɛr a, wa bɛr ʋ vuo a, ʋ na yi n cãàmɩ́ ʋ za. ⁸ Lɛ n’a a Faalʋ nɩr na sãá, a Sore Yeezu pɛbl ʋ kʋ́, ɛ ɩ ʋ bɔr nɩ a ʋ waa cãa. ⁹ A Faalʋ nɩr na wa n nɩ a Sɩtaana kpɛnʋ za, wa maalɛ nɩ nɔ-ɓãa-yel-bʋʋrɛ za nɩ yel-bãw-guuri na tule nɩbɛ a; ¹⁰ a ɩ-fa-pɛ-bʋʋrɛ za n’a ʋ na bɛlɛ nɩ a bɛlɩ dem na bɔrɛ a, bɛ na bɛ saw de ɛ bɛ nɔnɛ a yel-mɩŋa a ƴãw, ɛ cɛ a yel-mɩŋa n’ʋ nãá tʋ̃ɔ faa bɛ. ¹¹ Lɛ so Naaŋmɩn kʋ̀rɛ bɛ bɔrʋ fãw, na mɩ́ ɩ bɛ saw de a ziri a, ¹² k’aa bɛlɩ dem za nãà bɛ wa saw de a yel-mɩŋa ɛ nɔ̃w a faalʋ a, bɛ nyɛ̃ dɔwrʋ. ¹³ Yɛbr ɩ, tɩɩm ƴãw a, a fɛr a kɛ́ tɩ mɩ́ puore a Naaŋmɩn yaanɩ a nyɩ ƴãw kʋra lɛ, nyɩɩm a Sore na nɔnɛ a. Bʋ̃ʋ n’ʋ vɛ̃, Naaŋmɩn kaa na ir nyɩ a pɛr tib daar, k’aa Vʋʋrʋ Sõw na tɩrɛ a sonu a zũú, nɩ a yel-mɩŋa nyɩ na saw de a ƴãw, nyɩ nyɛ̃ a faafʋ. ¹⁴ A yel ŋa ƴãw n’a ʋ bʋɔlɩ nyɩ, a tɩ Yel-nʋ̃ɔ̀ tɩ na manɩ kʋ̀ nyɩ a zũú; ʋ bʋɔlɩ nyɩ na kɛ́ nyɩ wa tɛr a tɩ Sore Yeezu Kɩrɩta yúor-vɩɛlʋ-danʋ. ¹⁵ A na ɩ a ŋa a, yɛbr ɩ, nyɩ ƴãw fãw, ɛ maal tɛr a wulu al tɩ na lʋɔrɩ kʋ̀ nyɩ nɩ a tɩ nʋɔr ƴɛrʋ bɩɩ nɩ a tɩ sɛbɛ a. ¹⁶ A tɩ Sore Yeezu Kɩrɩta mɩŋa nɩ a tɩ Sãà Naaŋmɩn na nɔ̃w tɩ, ɛ a ʋ maalʋ zũú ʋ kʋ̀ tɩ mɔwlʋ na be kʋra lɛ nɩ tɩɛr-vla tɩ na ƴãw a ʋ ƴãw a, ¹⁷ bɛ mɔwlɛ nyɩ ɛ kʋ̀rɛ nyɩ fãw a vla maalʋ ƴãw kʋra lɛ a nyɩ ɩ-ɩrɩ pʋɔ, nɩ a nyɩ nʋɔr ƴɛrʋ pʋɔ.

¹ Lɛ waar mɩ̀, yɛbr ɩ, nyɩ puore kʋ̀rɛ tɩ, k’aa Sore ƴɛrʋ yɛ̀rɛ fɔ̃wfɔ̃w ɛ nyɛrɛ ƴãwfʋ, mɛ̃ a lɛ ʋ na nyɛ̃ ƴãwfʋ a nyɩ zie a. ² Nyɩ mɩ̀ puore k’aa Naaŋmɩn faa tɩ a nɩ-faar nɩ a poto-dem nuru pʋɔ; bʋ̃ʋ n’ʋ vɛ̃, a nɩbɛ za bɛ nɛ bɛ tɛr a Naaŋmɩn-saw-deb ɛ. ³ Ɛ cɛ a Sore ŋmɛ̃ n ʋ ŋmɛ̃a: ʋ na kʋ̀ nyɩ nɩ fãw ɛ piw nyɩ tɛr a Faalʋ-sob ƴãw. ⁴ A nyɩɩm ƴãw a, tɩ ɓãa nɩ ƴãw bɛr tɩɛrʋ a Sore zie: bom nɛ za tɩ na mɩ́ yel kɛ́ nyɩ maalɩ a, nyɩ mɩ́ maal a, ɛ na cãa maalɛ. ⁵ A Sore, ʋ ɩ a nyɩ socie a tɛr a Naaŋmɩn nɔ̃wfʋ nɩ a Kɩrɩta kanyir. ⁶ Yɛbr ɩ, a Sore Yeezu Kɩrɩta yúor ƴãw, tɩ yere na kʋ̀rɛ nyɩ: nyɩ ta pɩɛlɛ yɛb na kpɛ ƴã-tuo, ɛ bɛ tuur a wulu tɩ na lʋɔrɩ kʋ̀ nyɩ a ɩ. ⁷ A nyɩɩm a, nyɩ bãw nɩ a lɛ a na fɛr kɛ́ nyɩ cɔwrɛ tɩ a: bʋ̃ʋ n’ʋ vɛ̃, tɩ bɛ ɩ ƴã-to-ɩb a nyɩ sɔgɔ ɩ. ⁸ Tɩ bɛ ƴãw nɩr kãw za kʋ̀ tɩ bʋ̃-dɩrɩ mɔlɛ ɩ, tɩ nɩ̃ɛ na tɩ saw a hanʋ nɩ a balʋ ɛ tõ mʋ̃tɔ̃w nɩ tɩ̃ɩsɔw, k’aa nyɩ been kãw za taa wa balɛ ʋ tʋɔra a tɩ ƴãw ɛ. ⁹ A bɛ kaar mɛ̃ tɩ bɛ tɛr sɔr a nyɩ sõwfʋ bom ƴãw ɛ, ɛ cɛ tɩ tɩ bɔbr a kɛ́ tɩ ɩ a lɛ wul nyɩ kɛ̀ nyɩ cɔwrɛ tɩ. ¹⁰ Bʋ̃ʋ n’ʋ vɛ̃, a lɛn daar tɩ na tɩ be a nyɩ zie a, tɩ yel ɩ a ŋa kʋ̀ nyɩ: nɩr bɛ wa bɔbr k’ʋʋ tone a, ʋ mɩ̀ ta dɩrɛ ɩ. ¹¹ Ɛ cɛ tɩ wone na bɛ yere kɛ́ nɩbɛ be n a nyɩ pʋɔ ɩrɛ ƴã-to-ɩb, bɛ ɩrɛ bom za ɩ, ɛ bãwnɛ a bɛ taabɛ yele. ¹² Tɩ yere na kʋ̀rɛ a nɩbɛ bɛ ŋa, ɛ kpaalɛ bɛ a Sore Yeezu Kɩrɩta yúor ƴãw, kɛ́ bɛ tone zoom lɛ, ɛ dɩrɛ a bɛ nuru bome. ¹³ Ɛ a nyɩɩm, yɛbr ɩ, nyɩ taa wa balɛ a vla maalʋ ƴãw ɛ. ¹⁴ Nɩr bɛ wa tuur a wulu tɩ na kʋ̀rɛ nyɩ a sɛbɛ ŋa pʋɔ a, nyɩ bãw ʋ bɛr, ɛ ta cãa lãwnɛ nɩ ʋ ɛ, kɛ̀ vĩ kpɛ ʋ. ¹⁵ Ɛ cɛ nyɩ ta ɩrɛ a ʋ zie mɛ̃ nyɩ dɔ̃ sob ʋ a ɩ, nyɩ kpãanɛ ʋ mɛ̃ yɛb a. ¹⁶ A Sore na ɩ a ƴã-ɓaarʋ yib zie a, ʋl mɩŋa, ʋ kʋ̀rɛ nyɩ a ƴã-ɓaarʋ kʋra lɛ, alɛ saa ŋmɛ̃ ŋmɩŋmɩn a. ¹⁷ A mãa Pol, mãa mɩŋa nũu n’ʋ sɛb a puoru ŋa. A ŋa n’a ɩ̃ mɩ́ ƴãw a ɩ̃ bãwfʋ a sɛbɛ za zu: a ɩ̃ sɛbrʋ n’a. ¹⁸ A tɩ Sore Yeezu Kɩrɩta maalʋ, ʋ be a nyɩ za zie.