2 PƖƐR

¹ A mãa Sɩmʋ̃ Pɩɛr, na ɩ a Yeezu Kɩrɩta tõ-tone nɩ a ʋ nɩ-tona a, mãa n’ʋ sɛbr a bɛlɩ dem na páw a Naaŋmɩn-sawfʋ ʋ vɩɛl man a tɩ dem a. A tɩ Naaŋmɩn nɩ a tɩ Faarɛ Yeezu Kɩrɩta mɩnʋ zũú n’a bɛ páw a Naaŋmɩn-sawfʋ ŋa. ² A Naaŋmɩn maalʋ nɩ a ƴã-ɓaarʋ a ta nyɩ yaga za, a Naaŋmɩn nɩ a Yeezu tɩ Sore bãwfʋ zũú. ³ A ʋ naaŋmɩnʋ fãw zũú, a Sore kʋ̀ tɩ nɩ bom za a na sɛw kɛ́ tɩ tɛr tʋ̃ɔ vʋʋrɛ nyɔ-vʋʋr-vla ɛ ƴãwnɛ a Naaŋmɩn a. Ʋ ɩ na tɩ bãw a Sob nɛ na ƴãw tɩ pʋɔ a ʋl mɩŋa yúor-vɩɛlʋ-danʋ pʋɔ, ɛ tɛr a ʋ fãw ʋ na tone nɩ ton-vɩɛlɩ a. ⁴ A ʋ yúor-vɩɛlʋ-danʋ nɩ a ʋ fãw ƴãw, tɩ páw nɩ a bome na vɩɛl bɛ tɛr tɔ, ʋ na dãw ƴãw nʋɔr kɛ́ tɩ na páw na a. Ɛ a bʋ̃-vɩɛlɩ a ŋa ɩ na nyɩ pʋɔ a naaŋmɩnʋ pʋɔ ɛ yi zaa a faalʋ pʋɔ, a faalʋ a tɛ̀rá vʋla na guole a tẽ-daa zu a. ⁵ Alɛ n’a mɩ̀ cãa lɛ so, nyɩ ƴãw a nyɩ fãw za tɛr ɩ vɩɛlʋ ƴãw pʋɔ a nyɩ Naaŋmɩn-saw-deb ƴãw, ɛ tɛr Naaŋmɩn bãwfʋ sɩza ƴãw pʋɔ a vɩɛlʋ ƴãw; ⁶ nyɩ tɛr tʋɔra-nyɔwfʋ ƴãw pʋɔ a Naaŋmɩn bãwfʋ ƴãw, nyɩ tɛr a kanyir ƴãw pʋɔ a tʋɔra-nyɔwfʋ ƴãw, ɛ ƴãwnɛ a Naaŋmɩn ƴãw pʋɔ a kanyir ƴãw; ⁷ nyɩ nɔnɛ taa mɛ̃ yɛbr a, ƴãw pʋɔ a Naaŋmɩn ƴãwfʋ ƴãw, ɛ pãa baa tɛr a nɔ̃wfʋ ƴãw pʋɔ a yɛbr nɔw-taa ƴãw. ⁸ Nyɩmɛ wa tɛr a ɩ-vɩɛlɩ a ŋa za a, a na ɩ na nyɩ tʋlɛ ɛ bãwnɛ a tɩ Sore Yeezu Kɩrɩta dɔwlɛ. ⁹ Sob nɛ za na bɛ tɛr a a, ɩ n zɔ̃w na bɔblɛ a: ʋ yiir a kɛ́ bɛ pɛw nɩ a ʋ dãwdãw yel-bebe dɛwr bɛr. ¹⁰ Alɛ n’a so yɛbr ɩ, nyɩ lɛ bãw ƴãw fãw ɩ a bʋɔlʋ a Naaŋmɩn na bʋɔlɩ nyɩ, ɛ kaa ir nyɩ a, ʋ kpɛmɛ dɔwlɩ, lɛ n’a nyɩ bɛ be za nãà faa lo ɩ. ¹¹ Ɛ lɛ n’a nyɩ na kpɛ a tɩ Sore nɩ a tɩ Faarɛ Yeezu Kɩrɩta naalʋ na be kʋra lɛ a pʋɔ, mɔlɛ mɔlɛ lɛ. ¹² Alɛ n’a so ɩ̃ bɔbr k’ɩ̃ɩ lɛ sɩ̃wnɛ a nyɩ tɩɛrʋ a yele a ŋa ƴãw kʋra lɛ, nyɩ na saa bãw a, ɛ tɛr a yel-mɩŋa bɛ na yel kʋ̀ nyɩ a kpɛ̃w za a. ¹³ Ɩ̃ na dɛ cãa a tẽw ŋa zu a, ɩ̃ tɩɛrɛ na k’aa sɛw na k’ɩ̃ɩ cãa kpaalɛ nyɩ a yele a ŋa ƴãw, kɛ̀ nyɩ cɩ a ƴãw. ¹⁴ Ɩ̃ bãwnɩ a na, a ɩ̃ kulu pɩɛl a, mɛ̃ a lɛ a tɩ Sore Yeezu Kɩrɩta na ɩ ɩ̃ bãw a. ¹⁵ Ɛ cɛ ɩ̃ na ƴãw nɩ fãw kɛ̀ mãa bɛ wa ka be a, nyɩɩm tʋ̃ɔ tɛr a ɩ̃ wulu a ŋa kʋra lɛ nɩ ziir za, taa wa yiire a bɛrɛ ɩ. ¹⁶ A tɩ Sore Yeezu Kɩrɩta kpɛnʋ nɩ a ʋ lɛb-waa tɩ na ɩ nyɩ bãw a, suolu bɛ n’a tɩ suoli vla za kʋ̀ nyɩ ɛ. Tɩ nyɛ̃ nɩ a ʋ yúor-vɩɛlʋ-danʋ za nɩ mimir sɩza. ¹⁷ Ʋ tɩ sɩrɩ na nyɛ̃ ƴãwfʋ nɩ yúor-vɩɛlʋ-danʋ a Naaŋmɩn Sãà zie, a lɛn daar kɔkɔr na tɩ yi a Naaŋmɩn vɩɛlʋ za zie yere a: «A ɩ̃ bi-nɔna n’ɩ a ŋa, ɩ̃ pʋɔ za pɛlɩ nɩ a ʋ ƴãw.» ¹⁸ A kɔkɔr ŋa na tɩ ƴɛrɛ yire a salom zu a, tɩɩm mɩŋa wõ ʋ nɩ a lɛn daar tɩmɛ nɩ a ʋl na tɩ be a tãw sõw zu a. ¹⁹ Ɛ lɛ waar, tɩ nyɛ̃ na k’aa Naaŋmɩn-ƴɛr-manbɛ ƴɛrʋ sɩrɩ na tɛr fãw, ɛ́ nyɩ tɛr ɩ yel-mɩŋa nyɩ na saw cɛlɛ a ƴɛrʋ a ŋa zie a. Nyɩ de a, a ɩ mɛ̃ fɩ̃tɩlɛ na caalɛ lige pʋɔ a, ɛ gu a zi-vɩɛ-ŋmar-bir nãà wa pur a nyɩ socie pʋɔ a. ²⁰ Nyɩ páw bãwnɩ a vla za: nɩsaal za kʋ̃ tʋ̃ɔ bãw ír a Naaŋmɩn-ƴɛr-manbɛ ƴɛrʋ pɛr na be a Sɛb-sõw pʋɔ a, ʋ yõ ɩ. ²¹ Bʋ̃ʋ n’ʋ vɛ̃, Naaŋmɩn-ƴɛr-manɛ ƴɛrʋ kãw za bɛ dãw yi nɩsaal yõ na bɔbr a zie ɩ, Vʋʋrʋ Sõw n’ʋ tɩ ƴãw nɩbɛ ƴɛr a Naaŋmɩn yúor ƴãw.

¹ Naaŋmɩn-ƴɛr-man-bɛlɛ bɛlɛ mɩnɛ mɩ̀ tɩ be n a Naaŋmɩn nɩ-bʋʋrɛ pʋɔ. Lɛ n’a wul-wul-bɛlɛ-bɛlɛ mɩnɛ mɩ̀ na be a nyɩ pʋɔ. Bɛ na wa n nɩ wulu na bɛ tu sɔr ɛ bɔrɛ a nɩbɛ a, mɔ̃ mɩ̀, bɛ na zawr ɩ a Wul-wul-kara na ya de bɛ a bɛr. A ŋa n’a bɛ na ɩ ƴãw bɛ tʋɔra kũu na kʋ̃ yaa kɛ ta a pʋɔ. ² Ɛ cɛ nɩ-yaga na tu bɛ nɩ a bɛ faalʋ a ŋa pʋɔ. A bɛl ƴãw, a yel-mɩŋa sɔr na lɩɛb ɩ zʋmɛ bom. ³ Ɛ́ bɛ na nɔnɛ kɛ bɛ tɛr a a, bɛ na tɛr ɩ nɔ-kãa nɛbr ɩ nyɩ. Ɛ cɛ bɛ maal ɩ bɛ nɩ a ƴɛrʋ baarɩ koro za, ɛ a bɛ loba ɩ n yɩ̃ɛ lɛ. ⁴ Bʋ̃ʋ n’ʋ vɛ̃, a malkɩ mɩnɛ bɛl na sãw a, Naaŋmɩn bɛ bɛr bɛ ɩ, ʋ lɔb bɛ na ƴãw a tẽ-faa lige pʋɔ cɛlɛ nɩ a ƴɛrʋ-maalʋ. ⁵ Ʋ mɩ̀ bɛ bɛr a dãwdãw tẽ-daa a ɩ, ʋ ƴãw na kʋ̃ɔ paalɩ pàw a nɩ-faar tẽw ŋa; ɛ cɛ ʋ tɩ piw nɩ a Nowe na tɩ hiere a yel-mɩnʋ a tɛr, lãw nɩ nɩbɛ ayopõi kãw. ⁶ A pùorí, ʋ ƴãw nɩ dɔwrʋ a Sodɔm nɩ a Gomɔɔr ten. Ʋ ƴãw nɩ vũu dɩ a kʋ̃mkʋ̃m, k’aa wul k’aa ŋa n’a a nãá ŋmɛ̃ a nɩ-faar za zie. ⁷ Ɛ cɛ ʋ tɩ faa nɩ a nɩ-mɩŋa Lɔtɩ, a nɩ-faar bɛ ŋa nyɔ-vʋʋr-faa na tɩ ɩrɛ a kpɩɛr yaga za a. ⁸ Bʋ̃ʋ n’ʋ vɛ̃, a nɩ-mɩŋa ŋa tɩ kpɩɛr ɩ a bɛ sɔgɔ, nyɛ̀rɛ ɛ wone a bɛ ɩ-faar bibie za. A bɛ ɩ-ɩrɩ na bɛ tu sɔr a, tɩ ɩ ʋ nɩ kpɩɛrʋ bɛ dɩ vuo ɩ. ⁹ A wul a k’aa Sore na tʋ̃ɔ na faa a bɛlɩ dem na ƴãwnɛ ʋ a bɛr a tuo pʋɔ, ɛ tɛr a nɩ-faar gùre nɩ a ƴɛrʋ-maalʋ bibir, k’ʋʋ ƴãw bɛ dɔwrʋ. ¹⁰ Ɛ baa zuo a za, ʋ na ƴãw nɩ dɔwrʋ a bɛlɩ dem na mɩ́ zɔrɛ tuur a ƴãgan nʋ̃ɔ̀, a bɛ pɩ̃ɔ yele tɩɛr-faa zũú, ɛ́ bɛ mãko bɛ ka be a Sore nɩ-kpɛ̃ɛnʋ ƴãw a. Bɛ kpɛ n pʋra, ɛ ɩ pɔ̀lʋ dem, bɛ bɛ zɔrɛ dɛ̃bɩ̃ɛ a salom zu dem na tɛr yúor-vɩɛlʋ-danʋ a tʋb ƴãw ɛ. ¹¹ Ɛ cɛ malkɩ mɩnɛ na tɛr fãw zuo a nɩbɛ bɛ ŋa, ɛ lɛ kpɛmɛ zuo bɛ a, bɛ sawr tʋʋr a salom zu dem bɛ ŋa a Sore niŋé ɩ. ¹² Ɛ cɛ, mɛ̃ dʋn na bɛ bãw yã ɛ be bɛrɩ nyɔwfʋ ƴãw, ɛ na kpi wɛ a, a nɩbɛ bɛ ŋa tʋʋr ɩ bom bɛ na bɛ bãw a, bɛ na kpi na wɛ mɛ̃ a dʋn a. ¹³ A ŋa n’a bɛ na páw a bɛ ɩb na bɛ tu yel-mɩŋa a sã-ya. Cãàmɩ́ lɛ n’a bɛ nɔnɛ a pɩ̃ɔ yele maalʋ. Bɛlɛ wa lãw nɩ nyɩ dɩrɛ a lɛn daar a, ɛ a bɛ nʋ̃ɔ̀ ɩ a bɛ ziri a, bɛ mɩ́ ɩ n nɩ-dɛgɛ nɩ nɩ-ɩlaarɩ. ¹⁴ Pɔw-gaa-yele jɩrʋ n’a a bɛ mimie nɔnɛ yaga za, ɛ́ bɛ bɛ dãw sɛw a yel-bier maalʋ ɛ. Lɛ n’a bɛ ɩrɛ bɛlɛ nyɔwr a bɛlɩ dem na bɛ tɛr fãw a, nɩr bɛ nɔ̃w a tɛ̀rá man bɛ ɩ, nɩ-ŋmɛ-ƴãwnɩ nɛ bɛ. ¹⁵ Bɛ bɛr ɩ a sɔr dẽdẽ, ɛ bɔr tu a Bosɔɔr bi-dɛb Balaam pùor, ʋl na tɩ bɛr ɩ-faar sã-ya bɛlɩ nyɔw ʋ a. ¹⁶ Ɛ cɛ, ʋ tɩ nyɛ̃ nɩ kpãafʋ a ʋ sãwna ƴãw: bõw na bɛ ƴɛrɛ a, tɩ ƴɛrɛ na mɛ̃ nɩsaal a, ɩ a Naaŋmɩn-ƴɛr-manɛ dãbolu baarɩ. ¹⁷ A nɩbɛ bɛ ŋa ɩ na mɛ̃ buli na ko kpar a, ɛ ŋmɛ̃ mɛ̃ zũzuwe saa sɛsɛb na darɛ cere nɩ a. Liw lige n’a gã cɛlɛ bɛ. ¹⁸ Bɛ mɩ́ ƴɛrɛ nɩ ƴɛr-bɛrɛ ƴɛr-zawlɛ, a pɩ̃ɔ yele ƴãgan nʋ̃ɔ̀-faar tɩɛrʋ na ɩrɛ vĩ a, n’a bɛ mɩ́ bɛlɩ nyɔw nɩ a bɛlɩ dem na bʋ́r yi paalʋ a nɩbɛ bɛl pʋɔ na vʋʋrɛ a tulu pʋɔ a. ¹⁹ Bɛ mɩ́ yel a kɛ bɛ na ɩ na bɛ so bɛ tʋɔra, zɩ̃ kɛ bɛl tɛɛ za ɩ n a ɩ-faar bɛ na mili nɩ a gbãgbaar. Bʋ̃ʋ n’ʋ vɛ̃, bom na tʋ̃ɔ a nɩsaal a, a nɩsaal ɩ n a bom ʋl gbãgbaa. ²⁰ Yel-mɩŋa n’a, a bɛlɩ dem na faa bɛ tuɔra a tẽ-daa dɛwr ƴãw, a tɩ Sore nɩ a tɩ Faarɛ Yeezu Kɩrɩta bãwfʋ zũú a, bɛlɛ wa lɛ bɛr a dɛwr a ŋa lɛ páw bɛ ɛ tʋ̃ɔ bɛ a, bɛ nɩ̃ɛ na mɩ́ lɛ kpɛ faa zuo a dãwdãw. ²¹ Bʋ̃ʋ n’ʋ vɛ̃, bɛlɛ nɩ̃ɛ bɛ tɩ dãw bãw a mɩnʋ sɔr a, alɛ sa bɛ na bãw ʋ baarɩ ɛ lɛ zawrɩ a Naaŋmɩn nɔ-ƴãwna sõw bɛr, bɛ na tɩ lʋɔrɩ kʋ̀ bɛ a. ²² A ŋmɛ̃ na mɛ̃ a lɛ a zʋkpar na yel a: «A baa lɛb a dɩrɛ a ʋ tiiru!» Nɩ kɛ: «A dobaa so na kʋ̃ɔ wa baarɛ ɛ lɛ miili a mɛ̃mɛrɛ.»

¹ Ɩ̃ ba mɩnɛ ɛ, gb’a ayi za n’ɩ a a ŋa ɩ̃ na sɛb a sɛbɛ kʋrɛ nyɩ a. A yele al za ɩ̃ na lɛ manɛ kʋ̀rɛ nyɩ a sɛbr a ŋa pʋɔ a, ɩ̃ bɔbr a k’ɩ̃ɩ lɛb sɩ̃w nyɩ tɩɛrʋ, nyɩ tɛr tɩɛr-vɩɛlɩ. ² Nyɩ lɛ tɩɛrɩ a ƴɛrʋ al a Naaŋmɩn-ƴɛr-man- son na tɩ dãw ƴɛr a, nɩ a Sore nɩ a Faarɛ nɔ-ƴãwna a nyɩ nɩ-toni na lʋɔrɩ kʋ̀ nyɩ a. ³ Nyɩ páw bãwnɩ a, a bibi-pɛ-baarɩ pʋɔ a, nɩbɛ na ɩrɛ bɛ taabɛ laar a, na yi na, vʋʋrɛ mɛ̃ a lɛ bɛl mɩŋa na bɔbr a, ⁴ ɛ yere: «Ʋ bɛ yel k’ʋʋ na wa na ɩ? Ʋ wa? A tɩ sãà mɩnɛ na kpi wa tɔ dɩ̃a a, bom za cãa na ŋmɛ̃ a lɛ ʋ na tɩ ŋmɛ̃ a tẽw iru tib daar a.» ⁵ Bɛ bãw na kɛ yiiri kɛ a koro za a, Naaŋmɩn ƴɛrʋ tɩ ɩ na salom nɩ tẽw yi kʋ̃ɔ̀mɩ́ be, ɛ kʋ̃ɔ ɩ a nyɔw taa. ⁶ A kʋ̃ɔ-paalʋ kpɛ̃ɛ daar, kʋ̃ɔ n’a mɩ̀ sãw a dãwdãw tẽ-daa. ⁷ Ɛ a dɩ̃a tẽw nɩ a dɩ̃a salom a ŋa a, a Naaŋmɩn ƴɛr-been ŋa cãa na tɛr a cɛlɛ nɩ a vũu a na na dɩ a, ʋ tɛr a na gùre nɩ a ƴɛrʋ-maalʋ bibir nɩ a yel-bier-maalbɛ loba bibir. ⁸ Ɩ̃ ba mɩnɛ ɛ, bʋ̃-been ŋa n’ʋ a fɛr kɛ́ nyɩ taa yiire ɩ: a Sore zie a, bibir been yõ mɩ́ ɩ na mɛ̃ yome tur a, ɛ yome tur ɩ mɛ̃ bibir been a. ⁹ A Sore bɛ cɛlɛ a ʋ nʋɔr ʋ na ƴãw a tub ɛ, mɛ̃ bɛ mɩnɛ kãw na yel k’ʋʋ cɛlɛ na a ɩ. Ɛ cɛ, a nyɩɩm ƴãw n’a ʋ nyɔw ʋ tʋɔra bɛ páwr ɛ, ɛ́ bɔbr kɛ nɩr kãw za taa wa bɔrɛ ɩ, ɛ cɛ, kɛ nɩbɛ za lɩɛbɩ a bɛ ɩb. ¹⁰ A Sore waa bibir na vɩɛ na mɛ̃ nyãnyuge a, a ʋlɩ bibir nɛ a, a salom na dam a ɩ gɔmɛ̃ tɛwr ɛ bɔr, a salom zu bʋ̃-iri na nyɔw nɩ vũu dɩ nyɩl, a tẽw nɩ a bome al za na be a ʋ zu a kʋ̃ cãa ɩ. ¹¹ A bome a ŋa na na sãw a ŋa a, nyɩ bãw lɛ a na fɛr kɛ nyɩ ɩrɛ a. A fɛr a kɛ a nyɩ cenu vɩɛl, ɛ nyɩ tu a Naaŋmɩn pùor, ¹² nyɩɩm na gùre ɛ ƴãw fãw ɩrɛ kɛ a Naaŋmɩn bibir ta fɔ̃w a. A bibir ʋl a salom na na dɩ wɛ a, ɛ a salom zu bʋ̃-iri nyɔw vũu dɩ nyɩl a. ¹³ Mɛ̃ a lɛ a Naaŋmɩn na ƴãw nʋɔr a, salom paala nɩ tẽsɔw paala pʋɔ mɩnʋ na be a, alɛ n’a tɩ gùre. ¹⁴ Alɛ so, ɩ̃ ba mɩnɛ ɛ, nyɩ ƴãw fãw vɩɛl ɛ ta tɛr dɛwr a Naaŋmɩn zie ɩ, gùre nɩ a bibir ŋa, ɛ ƴã-ɓaarʋ be nyɩɩm nɩ a Naaŋmɩn cara pʋɔ. ¹⁵ Nyɩ bãwnɩ a, a Sore wa nyɔw ʋ tʋɔra kɔwrɩ a, a nyɩ faafʋ n’a, mɛ̃ a lɛ a tɩ yɛb nɩ a tɩ bá Pol na sɛb kʋ̀ nyɩ nɩ a yã-bãwfʋ a Naaŋmɩn na kʋ̀ ʋ a. ¹⁶ Lɛ n’a ʋ mɩ̀ cãa lɛ yere, a sɛbr al za pʋɔ ʋ na ƴɛr a yel ŋa ƴɛrʋ a. Ƴɛr-bie be n a sɛbr a ŋa pʋɔ a pɛr bãwfʋ kpɛmɛ; nɩbɛ na bɛ bãw bom za ɛ a tɩɛrʋ bɛ mɩ́ yaa kɛ lɩɛbɩ a, mɩ́ nyɔw nɩ a ƴɛr-bie a ŋa pɛɛ lɩɛbɩ, ɛ lɛ n’a bɛ mɩ̀ ɩrɛ a Sɛb-sõw sɛbr ŋmãa al na cɛ a ƴãw. Bɛl mɩŋa loba ƴãw n’a bɛ mɩ́ ɩrɛ a lɛ. ¹⁷ Nyɩɩm ɩ̃ ba mɩnɛ ɛ, nyɩ bãwnɩ a na baarɩ: nyɩ gu nyɩ tʋɔra ɛ ta saw a nɩ-faar bɛ ŋa tulu wa bɔr ɩ nyɩ ɛ; nyɩ na dãw kpɛ̃mɛ ar a, nyɩ ta saw bɛ dam nyɩ ɛ. ¹⁸ Ɛ cɛ nyɩ kɛrɛ a tɩ Sore nɩ a tɩ Faarɛ Yeezu Kɩrɩta maalʋ nɩ a ʋ bãwfʋ pʋɔ. Ʋlɛ so yúor-vɩɛlʋ-danʋ ƴɛrɛ ŋa nɩ kʋra lɛ. Amɛn.