2 KORƐ̃TƖ

2 KORƐ̃TƖ

¹ A mãa Pol, Naaŋmɩn na nɔ̃w yã ƴãw ɩ̃ ɩ a Kɩrɩta Yeezu nɩ-tona a, nɩ a tɩ yɛb Timote, tɩmɛ nɛ bɛ kʋ̀rɛ a sɛbɛ ŋa a Naaŋmɩn Lãw-yir na be a Korɛ̃tɩ tẽw a, lãw nɩ a Kɩrɩta-nɩbɛ za na be a Akayi a. ² A Naaŋmɩn tɩ Sãà nɩ a Sore Yeezu Kɩrɩta maalʋ nɩ ƴã-ɓaarʋ, a be a nyɩ zie. ³ A Naaŋmɩn, tɩ Sore Yeezu Kɩrɩta Sãà, su-ɓaarʋ Sãà nɩ mɔwlʋ za Naaŋmɩn tɛr ɩ puoru. ⁴ Ʋ mɩ́ mɔwlɛ tɩ nɩ a tɩ kpɩɛrʋ za pʋɔ, kɛ́ tɩ mɩ̀ tʋ̃ɔ mɔwlɛ a bɛlɩ dem za na be kpɩɛrʋ pʋɔ a, a mɔwlʋ a tɩɩm mɩŋa na páwr a Naaŋmɩn zie a ƴãw. ⁵ Mɛ̃ a lɛ tɩ na pʋɔ a Kɩrɩta tuo pʋɔ yaga za a, lɛ mɩ̀ n’a tɩ mɩ́ páw mɔwlʋ yaga za a Kɩrɩta ƴãw. ⁶ Tɩ be n kpɩɛrʋ pʋɔ bɩɩ? A nyɩ mɔwlʋ nɩ a nyɩ faafʋ ƴãw n’a. Tɩ nyɛ̃ nɩ mɔwlʋ bɩɩ? A nyɩ mɔwlʋ n’a, kɛ́ nyɩ tʋ̃ɔ saw de a tuo al tɛɛ za tɩ mɩ̀ na wone a. ⁷ Ɛ a tɩɛrʋ tɩ na tɛr a nyɩ ƴãw a bɩ na; tɩ bãwnɩ a na: nyɩ na lãw nɩ tɩ a tuo pʋɔ a, nyɩ mɩ̀ lãw nɩ tɩ nɩ a mɔwlʋ pʋɔ. ⁸ Bʋ̃ʋ n’ʋ vɛ̃, yɛbr ɩ, tɩ bɛ bɔbr kɛ́ nyɩ ɩ zɔn a kpɩɛrʋ na ta tɩ a Azi a ƴãw ɛ: a kpɛ tɩ na tɩ gãw a tɩ fãw, ɛ̀ tɩ bɛ tɩ tɩɛrɛ kɛ tɩ na cãa na vʋʋrɛ ɩ. ⁹ Tɩɩm tɛɛ za ƴãw a, tɩ tɩ yel a kɛ tɩ kpi na baarɩ, lɛ so tɩ bɛ tɩ cãa ƴãw a tɩ tɩɛrʋ a tɩɩm mɩŋa ƴãw ɛ, tɩ tɩ de nɩ a tɩ tɩɛrʋ ƴãw a Naaŋmɩn ƴãw, ʋl na mɩ́ ɩ a kũuni bɛ lɛb yi a. ¹⁰ Ʋlɛ n’ʋ faa tɩ a kũu ŋa tɔ ƴãw, ɛ na cãa faa tɩ; ʋl ƴãw n’a tɩ ƴãw a tɩ tɩɛrʋ, ʋ na cãa na faa tɩ. ¹¹ Ɛ a nyɩɩm tɛɛ za mɩ̀ sõwne tɩ na nɩ a nyɩ puoru, k’aa maalʋ tɩ na na páw a nɩ-yaga puoru zũú a, ɩ nɩ-yaga puore a Naaŋmɩn yaanɩ a tɩ ƴãw. ¹² A dãsɩɛ ŋa a tɩ tɩɛrʋ na dɩ a tɩ ƴãw a n’ɩ a tɩ dɛpaal-bom: a tɩ ɩb a tẽw zu a, baa zuo a za a nyɩ zie a, bɛ tɩ tɛr a mɩnɛ kãw ɛ, ɛ ɩ vɩɛlʋ tɛwr, ɛ a za yi a Naaŋmɩn zie; nɩsaal yã-bãwfʋ bɛ n’a tɩ tɩ ɩrɛ nɩ ɛ, Naaŋmɩn maalʋ n’a. ¹³ Tɩ bɛ sɛbr nyɩ bʋ̃-yoru kãw za, a bɛ ɩ a al tɔr za nyɩ na kanɛ ɛ wone a ɩ. Ɛ ɩ̃ tɩɛrɛ na kɛ́ nyɩ na tʋ̃ɔ na bãw a yel ŋa pɛr za, ¹⁴ ʋl nyɩ na bãw cɛ ŋmãa a ƴɛrɛ ŋa a: a tɩ Sore Yeezu waa bibir a, tɩ na ɩ n a nyɩ dɛpaal-bom, mɛ̃ a lɛ nyɩ na ɩ a tɩ dɛpaal-bom a. ¹⁵ A tɩɛrʋ ŋa na bɛ bʋnɛ a zũú n’a, ɩ̃ tɩ de niwn yel k’ɩ̃ɩ na wa n a nyɩ zie wa ɩ nyɩ páw maalʋ gb’aa ayi dɔwlɩ, ¹⁶ ɛ ɩ̃ yi a nyɩ zie cen Masedʋan, ɛ pãa tɩ yi a Masedʋan lɛb wa a nyɩ zie, nyɩ wa sõw mɛ̃ ɩ̃ cen a Zude. ¹⁷ A a ŋa ɩ̃ na tɩ tɩɛr k’ɩ̃ɩ ɩ a, ɩ̃ bɛ tɩ tɩɛrɩ tɔ bɩɩ? Bɩɩ a lɛ ɩ̃ na tɩɛrɩ k’ɩ̃ɩ maalɩ a, ɩ n nɩsaalbɛ pʋ-tɩɛrʋ tɛwr? A ɩ lɛ ɩ̃ mɩ́ lãw yel a «ʋ̃ʋ» nɩ a «ʋ̃ʋ’hʋ̃» ʋ? ¹⁸ A Naaŋmɩn dɩ n a ɩ̃ dãsɩɛ k’aa tɩ ƴɛrʋ a nyɩ zie bɛ tɩ ɩ «ʋ̃ʋ» nɩ «ʋ̃ʋ’hʋ̃» ɛ. ¹⁹ Bʋ̃ʋ n’ʋ vɛ̃, a Naaŋmɩn Bie Yeezu Kɩrɩta tɩ na hieri yel kʋ̀ nyɩ a, mãa nɩ a Sɩlvɛ̃ nɩ a Timote a, ʋ bɛ tɩ ɩ «ʋ̃ʋ» nɩ «ʋ̃ʋ’hʋ̃» ɛ, ʋ tɩ ɩ n «ʋ̃ʋ» tɛwr kʋra lɛ. ²⁰ A maalʋ al za a Naaŋmɩn na yel k’ʋʋ na tɩr a a, a ʋ pʋɔ n’a a za «ʋ̃ʋ» be. A na ɩ lɛ a, a Yeezu Kɩrɩta n’ʋ so tɩ mɩ́ sɔw «Amɛn», a Naaŋmɩn yúor-vɩɛlʋ-danʋ ƴãw. ²¹ A sob nɛ na mɩ́ ɩ tɩ kpɛmɛ lãw nɩ nyɩ ɛ lãw nɩ a Kɩrɩta a, ɛ ʋ zɛ tɩ a kãa sõw a, a Naaŋmɩn n’ʋ, ²² ʋl na ŋmãa a ʋ bãwfʋ ƴãw tɩ, ɛ ƴãw a Vʋʋrʋ Sõw a tɩ socie pʋɔ, ʋ ɩ a maalʋ tɩ nãa páw a bãwfʋ a. ²³ Mãa a, Naaŋmɩn n’ɩ a ɩ̃ dãsɩɛ sob, ʋ ɩ ɩ̃ kpi mãa wa ŋmarɛ ziri a: a nyɩ vla ƴãw n’a ɩ̃ bɛ lɛb wa a Korɛ̃tɩ ɛ. ²⁴ Tɩ bɛ bɔbr kɛ tɩ fɛrɛ nyɩ a nyɩ Naaŋmɩn saw-deb pʋɔ ɩ, bʋ̃ʋ n’ʋ vɛ̃, nyɩ kpɛmɛ nɩ a saw-deb pʋɔ; ɛ cɛ tɩ bɔbr a kɛ tɩ lãw nɩ nyɩ tone kɛ̀ nyɩ wone nʋ̃ɔ̀.

¹ A na ɩ a ŋa a, ɩ̃ yel a k’ɩ̃ɩ bɛ lɛbr waar a nyɩ zie ɩ, ɩ̃ na bɛ bɔbr kɛ́ nyɩ lɛb tɛr pʋ-sãwna a ƴãw. ² Bʋ̃ʋ n’ʋ vɛ̃, mãa wa ɩ nyɩ tɛr pʋ-sãwna a, ãa n’ʋ na lɛb ɩ nʋ̃ɔ̀ kpɛ m, a bɛ ɩ a sob nɛ ɩ̃ na ɩ ʋ tɛr pʋ-sãwna a? ³ Alɛ so ɩ̃ sɛb nyɩ a a ŋa, k’aa bɛlɩ dem nãá tɩ ƴãw mɛ̃ nʋ̃ɔ̀ a, bɛ ta ɩ pʋ-sãwna tɛr mɛ̃ a lɛn daar ɩ̃ nãa ta a nyɩ zie a ɩ. A nyɩɩm ƴãw a, ɩ̃ bɛ bʋnɛ ɩ, a ɩ̃ nʋ̃ɔ̀ mɩ̀ na ɩ n a nyɩ za dem. ⁴ Sɩza n’a, kpɩɛrʋ nɩ pʋ-sãwna yaga tɛr mɛ̃ na, ɩ̃ sɛbr nyɩ kone nɩ marmar ƴãw pʋɔ, ɛ cɛ a bɛ ɩ k’ɩ̃ɩ ɩ nyɩ tɛr pʋ-sãwna ɩ, ɛ ɩ k’ɩ̃ɩ ɩ nyɩ bãw ɩ̃ na nɔnɛ nyɩ bɛ tɛr manʋ a. ⁵ Nɩr wa n’ʋ so pʋ-sãwna be be a, mãa bɛ n’ʋ ʋ ƴãw a pʋ-sãwna ɩ, a nyɩ za nɛ bɛ, bɩɩ, tɩ ta dɔwlɩ kʋ̃ɔ ɛ, a nyɩ mɩnɛ nɛ bɛ. ⁶ A nyɩ yaga zie wa yel k’aa nɩr ŋa tɔ sãw na a, a man ʋ na. ⁷ Ɛ cɛ nyɩ nɩ̃ɛ dɩ suur kʋ̀ ʋ ɛ mɔwl ʋ, k’ʋ taa wa mab tɛr pʋ-sãwna zuo ɛ. ⁸ Alɛ so ɩ̃ zɛlɛ nyɩ, kɛ́ nyɩ wul nɔ̃wfʋ ɩb a ʋ zie. ⁹ Bom ŋa ƴãw n’a ɩ̃ tɩ sɛb nyɩ: ɩ̃ tɩ bɔbr a k’ɩ̃ɩ ɩ nyɩ kaa nyɛ̃, nyɩ cãa na sawr a ɩ̃ nʋɔr kʋra lɛ bɩɩ. ¹⁰ Sob nɛ sãwna nyɩ na mɩ́ de bɛr a baarɩ a, ɩ̃ mɩ̀ mɩ́ de na bɛr a baarɩ, sãwna wa sɩrɩ be be a fɛr k’ɩ̃ɩ de bɛr a baar a. Ɛ mãa a, mãa wa de nɩr sãwna bɛr a baarɩ a, a nyɩ ƴãw n’a ɩ̃ ɩ a lɛ a Kɩrɩta niŋé, ¹¹ k’aa Sɩtaana ta bɛ̀lɩ tɩ nyɔw ɛ; bʋ̃ʋ n’ʋ vɛ̃, tɩ bɛ ɩ zɔn a ʋ pʋ-tɩɛrʋ ƴãw ɛ. ¹² Ɩ̃ na tɩ ta a Tʋrʋwasɩ a Yeezu Kɩrɩta Yel-nʋ̃ɔ̀ hieru ƴãw a, a Sore na saa tɩ saw ɩ̃ na tʋ̃ɔ tone vla vla za a, ¹³ a ɩ̃ tɩɛrʋ bɛ tɩ gã zi-been ɛ, ɩ̃ na bɛ tɩ nyɛ̃ a ɩ̃ yɛb Títɩ̀ a zũú. Lɛ so ɩ̃ tɩ bɛr a Tʋrʋwasɩ tẽw dem ɛ cen a Masedʋan. ¹⁴ Naaŋmɩn so yaanɩ! A Kɩrɩta ƴãw a, ʋ mɩ́ ƴãw na tɩ pʋɔ a ʋ zɛb-tʋ̃ɔfʋ nɩbɛ pʋɔ kʋra lɛ, ɛ a tɩɩm zũú, ʋ ɩ bɛ bãw a Kɩrɩta ziir za mɛ̃ tʋrali a nyũu na yi pàw a ziir za a. ¹⁵ Sɩza n’a a Naaŋmɩn zie a, tɩ ɩ na mɛ̃ tʋrali na nyuur vla a Kɩrɩta de kʋ̀rɛ a Naaŋmɩn a. Tɩ ɩ n a lɛ a bɛlɩ dem na be a faafʋ sɔr zu a ƴãw, nɩ a bɛlɩ dem na bɔrɛ a ƴãw. ¹⁶ Bɛ ŋa zie a, kũu nyũu na waar ɩ kũu a n’a, ɛ bɛ ŋa zie a ɩ nyɔ-vʋʋrʋ nyũu na waar ɩ nyɔ-vʋʋrʋ a. Ɛ ãa n’ʋ sɛw taa nɩ a ton ŋa tɔ? ¹⁷ Tɩɩm bɛ ŋmɛ̃ mɛ̃ a nɩbɛ yaga zie na de a Naaŋmɩn ƴɛrʋ ʋ ɩ yɛ̀rʋ́ bom a ɩ. Tɩɩm a, a Naaŋmɩn n’ʋ tõ tɩ, tɩ ƴɛrɛ a ʋ ƴɛrʋ nɩ yel-mɩŋa a ʋ niŋé, lãw nɩ a Kɩrɩta.

¹ Tɩ lɛb a maal tĩ wule a tɩɩm mɩŋa tɩ na ɩ nɩ-vɩɛlɩ a bɩɩ? Bɩɩ a fɛr a kɛ tɩ mɩ̀ mɩ́ tɛr bãwfʋ sɛb-tʋɔlɩ wa n a nyɩ zie bɩɩ? Bɩɩ kɛ́ nyɩ mɩ́ kʋ̀ tɩ bãwfʋ sɛb-tʋɔlɩ mɛ̃ a nɩbɛ bɛ mɩnɛ a bɩɩ? ² Nyɩmɛ nɛ bɛ ɩ a tɩ sɛb-tʋɔla, sɛb-tʋɔla bɛ na sɛb ƴãw a tɩ socie pʋɔ a, sɛbɛ nɩsaalbɛ za na na tʋ̃ɔ bãw ɛ kanɩ a. ³ Sɩza n’a, a sãá nɩ cãàmɩ lɛ kɛ́ nyɩ ɩ n a sɛb-tʋɔla a Kɩrɩta na sɛb ɛ̀ tɩ de lʋɔrɩ tɩr a. Sɛb-kʋ̃ɔ bɛ n’a bɛ sɛb ɩ ɛ, a Naaŋmɩn na vʋʋrɛ a, Vʋʋrʋ Sõw n’ʋ; kʋsɛ-pamɛ zu bɛ n’a bɛ sɛb ɛ, a nɩsaalbɛ socie pʋɔ n’a. ⁴ A ŋa n’a tɩ mɩ́ bɛr tɩɛrʋ a Naaŋmɩn niŋé a Kɩrɩta zũú. ⁵ A bɛ kaar mɛ̃ tɩ na tʋ̃ɔ na tõ a ton ŋa tɔ nɩ a tɩɩm mɩŋa fãw, a ɩ mɛ̃ tɩɩm zie n’a a yi ɛ; tɩmɛ wa tɛr fãw a, a tɩ fãw yi n Naaŋmɩn zie. ⁶ Ʋlɛ n’ʋ ɩ tɩ tʋ̃ɔ lɩɛbɩ Wõ-ta-paala tõ-tõ-biir. Sɛbrʋ Wõ-ta-paala bɛ n’ʋ ɛ, Vʋʋrʋ Wõ-ta-paala n’ʋ, bʋ̃ʋ n’ʋ vɛ̃, a sɛbrʋ kʋ́rɛ na ɛ a Vʋʋrʋ tɩrɛ nyɔ-vʋʋrʋ. ⁷ Bɛ tɩ sɛb ɩ a Naaŋmɩn-Wulu ƴɛr-bie kʋsɛ-pamɛ zu, ɛ́ a Naaŋmɩn yúor-vɩɛlʋ-danʋ tɩ sãá nyɩwrɛ a lɛn daar. A Mõyiir niwn tɩ nyɩwrɛ na k’a Ɩsɩrayɛl biir bɛ tʋɔr jɩrɛ a ʋ niwn nɩ mimie ɩ, ɛ cɛ a vɩɛlʋ ŋa tɩ ɩ n bʋ̃-tɔla. A Naaŋmɩn-Wulu a tõ-nʋɔr na tɩ n’ɩ k’ʋʋ kʋ́rɛ a, a Wulu ŋa wa sãá nɩ yúor-vɩɛlʋ-danʋ sɛw a ŋa a, ⁸ ŋmɩŋmɩn za n’a a tõ-nʋɔr, a Vʋʋrʋ Sõw na tone a, kʋ̃ tɛr yúor-vɩɛlʋ-danʋ zuo lɛ? ⁹ A tõ-nʋɔr na waar ɩ kũu a nɩsaalbɛ zie a tɩ tɛr ɩ yúor-vɩɛlʋ-danʋ; ŋmɩŋmɩn za n’a a tõ-nʋɔr, na so a nɩsaalbɛ mɩ́ ɩ nɩ-mɩn a Naaŋmɩn niŋé a, kʋ̃ tɛr yúor-vɩɛlʋ-danʋ zuo lɛ? ¹⁰ Mɔ̃ mɩ̀, a dãwdãw yúor-vɩɛlʋ-danʋ bɔr ɩ a ƴɛrɛ ŋa yúor-vɩɛlʋ-danʋ niŋé, ʋ na zuo ʋ polpol lɛ a ƴãw. ¹¹ Bʋ̃ʋ n’ʋ vɛ̃, a bom ʋl na tɔlɛ a, wa tɩ dãw tɛr yúor-vɩɛlʋ-danʋ a, ŋmɩŋmɩn za n’a a bom nɛ na bere kʋra lɛ a kʋ̃ tɛr yúor-vɩɛlʋ-danʋ zuo lɛ? ¹² A yel ŋa ƴãw tɩ na ƴãw a tɩ tɩɛrʋ a n’a so, tɩ ɓãa ƴãw bɛr dɛ̃bɩ̃ɛ. ¹³ Tɩ bɛ ɩrɛ mɛ̃ a Mõyiir na mɩ́ tɩ de pɛn pàw a niwn k’aa Ɩsɩrayɛl biir ta nyɛ̃ a yúor-vɩɛlʋ-danʋ ŋa, na ɩ bʋ̃-tɔla a, baarʋ ɛ. ¹⁴ Ɛ cɛ a bɛ tɩɛrʋ tɩ kpawl a, ɛ wa tɩ tɔ dɩ̃a a, bɛlɛ mɩ́ wa kanɛ a Wõ-ta-kʋra sɛbr a, a pɛn-been nɛ n’ʋ mɩ̀ cãa pàw a bɛ tɩɛrʋ. Bʋ̃ʋ n’ʋ vɛ̃, a Kɩrɩta cãa n’ʋ íre a pɛn ŋa bɛrɛ. ¹⁵ Cãa wa tɩ tɔ a dɩ̃a mɩ̀ a, a lɛn daar za bɛ na mɩ́ wa kanɛ a Mõyiir sɛbr a, pɛn mɩ́ pàw nɩ a bɛ tɩɛrʋ. ¹⁶ A fʋ na lɩɛbɩ a fʋ ɩb tu a Sore a pʋɔ n’a bɛ mɩ́ ír a pɛn ŋa bɛr. ¹⁷ Bʋ̃ʋ n’ʋ vɛ̃, a Sore n’ɩ a Vʋʋrʋ Sõw, ɛ be a Sore Vʋʋrʋ na be a, be n’a a tʋɔra-sob be. ¹⁸ Tɩɩm za bɛ na ír a pɛn bɛr tɩ a niwn ƴãw a, tɩ ɩrɛ nɩ a Sore yúor-vɩɛlʋ-danʋ sãanɛ mɛ̃ caala pʋɔ a, tɩ lɩɛb a ŋmɛ̃ taa nɩ a Sore, ʋl na ɩ a Vʋʋrʋ a, ʋlɛ n’ʋ mɩ́ ɩ tɩ yi yúor-vɩɛlʋ-danʋ pʋɔ kpɛ yúor-vɩɛlʋ-danʋ na vɩɛl zuo a pʋɔ.

¹ Su-ɓaarʋ zũú na n’a Naaŋmɩn kʋ̀ tɩ a tõ-nʋɔr ŋa a, alɛ so tɩ bɛ be na bal bɛr ɛ. ² Tɩ zawr ɩ ɩb za bɛ na mɩ́ sɔwlɩ ɩrɛ a, nɩ bom za na ɩrɛ vĩ a. Tɩ bɛ tɛr yã-ɩb bɛlɛ nɩ nɩbɛ ɩ, tɩ bɛ tɛwr a Naaŋmɩn ƴɛrʋ tule nɩ a nɩbɛ ɩ, tɩ nɩ̃ɛ na ɩrɛ k’aa yel-mɩŋa sãá, bɔbr ɩ k’aa nɩbɛ za nyɛ̃ kɛ́ tɩ ɩ n nɩ-mɩn a Naaŋmɩn niŋé. ³ Ɛ cɛ a Yel-nʋ̃ɔ̀ tɩ na manɛ a, wa cãa ɩ mɛ̃ ʋ sɔwl a a, a bɛlɩ dem na bɔrɛ a zie n’a ʋ sɔwlɩ, ⁴ a Naaŋmɩn bɛ-saw-dierbɛ, bɛl a tẽ-daa ŋa naaŋmɩn na zɔ̃w a bɛ tɩɛrʋ, kɛ́ bɛ ta nyɛ̃ a Kɩrɩta Yel-nʋ̃ɔ̀ yúor-vɩɛlʋ-danʋ cãa a, a Kɩrɩta ŋa na ɩ a Naaŋmɩn ŋmɛ̃-ta-tɔ tɔr za a. ⁵ Tɩɩm mɩŋa bɛ nɛ bɛ tɩ hiere yere kʋ̀rɛ a nɩbɛ ɩ, Sore Yeezu Kɩrɩta n’ʋ. Tɩɩm a, tɩ yere na kɛ tɩ ɩ n a nyɩ tõ-tõ-biir a Yeezu zũú. ⁶ Bʋ̃ʋ n’ʋ vɛ̃, a Naaŋmɩn ʋl na yel kɛ: «A cãa, ʋ caalɩ a lige sɔgɔ a», ʋl mɩŋa n’ʋ caalɩ a tɩ socie pʋɔ, k’ʋʋ ɩ tɩ bãw a ʋ yúor-vɩɛlʋ-danʋ cãa na caalɛ a Kɩrɩta niwn ƴãw a. ⁷ Ɛ cɛ tɩ tɛr ɩ a na-bʋ̃-sɩza ŋa mɛ̃ yawra duwli pʋɔ n’a tɩ ƴãw a, k’aa kpɛnʋ ŋa na bɛ tɛr tɔ a, ta yi tɩɩm zie ɩ, ʋ yi Naaŋmɩn zie. ⁸ Kpɩɛrʋ bʋʋrɛ za ta tɩ na, ɛ́ a bɛ dĩ tɩ kʋ́ ɛ; a mɩ́ ɩ na mɛ̃ tɩ na tɔl a gu a, ɛ́ tɩ tʋ̃ɔ tɔl; ⁹ bɛ diw tɩ na gʋɔr ɩ, ɛ́ bɛ páw tɩ ɛ; bɛ lɔb tɩ nɩ tẽw, ɛ cɛ bɛ kʋ́ tɩ ɛ. ¹⁰ Kʋra lɛ n’a a Kɩrɩta kũu be a tɩ ƴãganɩ́, k’aa ʋ nyɔ-vʋʋrʋ mɩ̀ tʋ̃ɔ sãá a tɩ ƴãganɩ́. ¹¹ Tɩ na saa cãa vʋʋrɛ a, ɛ cɛ a kũu jɩɛrɛ tɩ nɩ kʋra lɛ a Yeezu yúor ƴãw, k’aa ʋ nyɔ-vʋʋrʋ mɩ̀ tʋ̃ɔ sãá a tɩ ƴãgan na ɩ bʋ̃-kpiira a pʋɔ. ¹² A na ŋmɛ̃ a ŋa a, a kũu tone nɩ a tɩ zie, ɛ a nyɔ-vʋʋrʋ tone a nyɩ zie. ¹³ A Sɛb-sõw yel a: «Ɩ̃ saw na de, alɛ so ɩ̃ ƴɛr.» A tɩɩm mɩ̀, a saw-deb-been ŋa tɩɛrʋ tɩ na tɛr a n’a so tɩ mɩ̀ saw de, ɛ alɛ n’a so tɩ ƴɛrɛ. ¹⁴ Bʋ̃ʋ n’ʋ vɛ̃, tɩ bãwnɩ a na, a sob nɛ na ɩ a Sore Yeezu ʋ lɛb yi a kũu pʋɔ a, mɩ̀ na ɩ na tɩ lãw nɩ a Yeezu lɛb yi a kũu pʋɔ, ɛ ʋ na de tɩ na lãw nɩ nyɩ a ʋ zie. ¹⁵ A nyɩɩm ƴãw n’a tɩ sawr tuo za, k’aa Naaŋmɩn maalʋ tarɛ nɩ-yaga dɔwlɛ, lɛ n’a nɩ-yaga na puore a Naaŋmɩn yaanɩ a ʋ yúor-vɩɛlʋ-danʋ ƴãw. ¹⁶ Alɛ so tɩ bɛ be za nãa bal bɛr ɛ. A tɩ nɩsaal ʋl na sãá a, saa sãwnɛ cere a, a tɩ nɩsaal ʋl na be a pʋ̃ɔmɩ́ a, lɩɛbɛ nɩ paala bibir za. ¹⁷ A kpɩɛrʋ tɩ na páwr a ƴɛrɛ ŋa a, bɛ zɛ̃ bom a yúor-vɩɛlʋ-danʋ na bɛ dɩ vuo ɛ be kʋra lɛ a ƴãw ɛ. A yúor-vɩɛlʋ-danʋ ŋa ƴãw n’a a kpɩɛrʋ a ŋa cɔbrɛ tɩ. ¹⁸ Bom nɛ tɩ na bɔbr kɛ́ tɩ páw a, ʋ bɛ ɩ bom bɛ na mɩ́ nyɛ̃ a ɩ, bom bɛ na bɛ mɩ́ nyɛ̃ a n’ʋ. Bom bɛ na mɩ́ nyɛ̃ a be n be sɛr, ɛ cɛ a bom bɛ na bɛ mɩ́ nyɛ̃ a, be kʋra lɛ.

¹ Tɩ bãwnɩ a na, a pɛn yir ʋl pʋɔ tɩ na be kpɩɛr a (a pɛr lɛ k’aa tɩ tẽw zu ka ƴãgan) ʋlɛ wa sãw a, Naaŋmɩn cɔbrɛ nɩ kpɛb-zie bɛrɛ tɩ a tẽ-vla pʋɔ, kpɛb-zie na bɛ ɩ nɩsaal nuru bʋ̃-maala a, ɛ be kʋra lɛ a. ² Ɛ tɩ kone na bɔbr ɩ tuotuo kɛ tɩ ta a tẽ-vla pʋɔ kpɛb-zie, a ɩ mɛ̃ kparʋ tɩ na su dɔwlɩ a tẽw zu ka kpɛb-zie zu a. ³ Bʋ̃ʋ n’ʋ vɛ̃, tɩ na su n bom, tɩ kʋ̃ ɩ ƴãgã-zawla ɩ. ⁴ Sɩza n’a, a tɩɩm na be a pɛn yir ŋa pʋɔ a, tɩ kone na mɛ̃ nɩbɛ na tuo tuor ìre nɩ guur a. Tɩ bɛ bɔbr kɛ tɩ yaa a tẽw zu ka kpɛb-zie bɛr ɛ, tɩ bɔbr a kɛ tɩ su a tẽ-vla pʋɔ dem dɔwlɩ, k’aa nyɔ-vʋʋrʋ vɔl a ʋlɩ bom nɛ na ɩ bʋ̃-kpiira. ⁵ A sob nɛ na cɔbrɩ tɩ a a ŋa ƴãw a, ʋlɛ n’ɩ a Naaŋmɩn, na kʋ̀ tɩ a Vʋʋrʋ Sõw, ʋ ɩ a maalʋ tɩ nãa páw a bãwfʋ a. ⁶ A na ɩ a ŋa a, bʋnʋ kãw za bɛ ka a tɩ zie towtow ɛ, tɩ bãwnɩ a na, lɛn daar za tɩ na kpɩɛr a ƴãgan ŋa pʋɔ a, tɩ yi na zaa a tɩ kpɛb-zie zãá nɩ a Sore. ⁷ Bʋ̃ʋ n’ʋ vɛ̃, Naaŋmɩn saw-deb a so tɩ cere, nyɛb bɛ n’a so ɩ. ⁸ Bʋnʋ kãw za bɛ ka a tɩ zie ɩ, ɛ́ tɩ nyɛ̃ a sa kɛ tɩ yi ɛ bɛr a ƴãgan ŋa, ɛ cen tɩ be a Sore zie. ⁹ Ɛ cɛ bom nɛ tɩ na bɔbr zuo a za a, n’ɩ kɛ tɩ pɛlɩ a ʋ pʋɔ, tɩmɛ saa na be a ƴãgan ŋa pʋɔ bɩɩ yi kɛ bɛr ʋ a. ¹⁰ Bʋ̃ʋ n’ʋ vɛ̃, a fɛr a kɛ́ tɩ za cen a Kɩrɩta ƴɛrʋ-maalʋ zie ʋ tɩ maal ɩ tɩ a ƴɛrʋ. Lɛn daar a ŋa za na páw bom nɛ na sɛw taa nɩ ʋ a, a vla bɩɩ a faa, a tu a lɛ ʋ na vʋʋrɩ a tẽw zu a. ¹¹ A na ɩ a ŋa tɩ bãw ʋlɩ bom nɛ na n’ɩ a zɔrɛ-a-Sore a, tɩ bɔbr a kɛ tɩ ɩ a nɩsaalbɛ za saw kɛ sɩza n’a. Naaŋmɩn bãw tɩ na tɩ tɔ, ɛ ɩ̃ tɩɛr kɛ nyɩ mɩ̀ bãw mɛ̃ na nɩ a nyɩ pʋɔ tɩ tɔ. ¹² Tɩ bɛ lɛb maal tĩ wule nyɩ tɩ na ɩ nɩ-vɩɛlɩ a ɩ, tɩ bɔbr a kɛ́ tɩ ɩ nyɩ nyʋʋr a tɩ ƴãw, kɛ́ nyɩ tʋ̃ɔ mɩ́ tɛr sɔwfʋ sɔw kʋ̀ a bɛlɩ dem na nyʋʋr ɩ-ɩrɩ na sãá a ƴãw, ɛ bɛ nyʋʋr a socir pʋɔ ɩ-ɩrɩ ƴãw a ɩ. ¹³ Tɩmɛ wa ɩ dãbol-ɩb a, Naaŋmɩn ƴãw n’a tɩ ɩ a dãbol-ɩb; tɩmɛ wa ɩ yã-bãw-ɩb a, nyɩɩm ƴãw n’a. ¹⁴ Bʋ̃ʋ n’ʋ vɛ̃, a Kɩrɩta nɔ̃wfʋ fɩɩrɩ tɩ na tɛr, tɩɩm na bãw kɛ nɩ-been yõ kpi n a nɩbɛ za ƴãw a, ɛ k’aa na ɩ lɛ a, bɛ za lãw nɩ ʋ na kpi a. ¹⁵ Ɛ ʋ kpi n a bɛ za ƴãw, k’aa nɩ-vʋʋrɩ ta cãa vʋʋrɛ bɛl mɩŋa ƴãw ɛ, ɛ vʋʋrɛ a ʋlɩ sob nɛ ƴãw na kpi ɛ lɛb yi a bɛ ƴãw a. ¹⁶ Lɛ n’a so tɩ bɛ cãa bãw nɩr za nɩsaalʋ bãwfʋ tɛwr ɛ. Tɩmɛ saa tɩ dãw bãw a Kɩrɩta nɩsaalʋ bãwfʋ a, ƴɛrɛ ŋa a, tɩ bɛ cãa bãw ʋ a lɛ ɩ. ¹⁷ Lɛ so nɩr wa lãw nɩ a Kɩrɩta a, ʋ lɩɛb ɩ nɩ-paala. Bʋ̃-kʋra tɔl a ɛ bʋ̃-paala n’ʋ be be. ¹⁸ Naaŋmɩn zie n’a a za yi, ʋl na ɩ tɩɩm nɩ ʋl lɛ kpɛ taa a Kɩrɩta ƴãw, ɛ ʋ de ʋlɛ nɩ a nɩbɛ lɛ-kpɛ-taa tõ-nʋɔr kʋ̀ tɩ a. ¹⁹ Bʋ̃ʋ n’ʋ vɛ̃, a Kɩrɩta zũú, a Naaŋmɩn n’ʋ tone kɛ́ ʋlɛ nɩ a nɩsaalbɛ za lɛ kpɛ taa, lɛ so ʋ mɩ́ tɩ de a bɛ sãwna bɛr a baarɩ, ɛ ƴãw a lɛ-kpɛ-taa ƴɛr-bie a tɩ nʋɔrɩ́. ²⁰ A na ɩ a ŋa a, a Kɩrɩta n’ʋ tõ n tɩ a tõ-nʋɔr ŋa a nyɩ zie, ɛ a ɩ mɛ̃ a Naaŋmɩn mɩŋa n’ʋ yere kʋ̀rɛ nyɩ nɩ a tɩ nʋɔr a: tɩ zɛlɛ nyɩ nɩ yãayãa, a Kɩrɩta yúor ƴãw, nyɩ saw kɛ̀ nyɩɩm nɩ a Naaŋmɩn lɛ kpɛ taa. ²¹ A Kɩrɩta bɛ tɩ tɛr yel-bier ɛ, ɛ a Naaŋmɩn tuo ʋ a tɩ yel-bier, kɛ́ tɩ tʋ̃ɔ lãw nɩ ʋ lɩɛbɩ nɩ-mɩn a Naaŋmɩn niŋé.

¹ Ɛ tɩ na lãw nɩ a Naaŋmɩn tone a, tɩ zɛlɛ nyɩ na kɛ́ nyɩ ta bɛr a ʋ maalʋ nyɩ na páw a lo tẽw wɛ ɩ. ² Bʋ̃ʋ n’ʋ vɛ̃, Naaŋmɩn yere na: «A daar na wa ta a, ɩ̃ saw nɩ a fʋ zɛlʋ, ɛ a faafʋ bibir na wa vɩɛ a, ɩ̃ sõw fʋ na.» Ɛ cɛ a daar ɩ a ŋa na ta a, a faafʋ bibir ɩ a ŋa na vɩɛ a. ³ Tɩ bɛ bɔbr k’aa tɩ tõ-nʋɔr tɛr sãwna bɛ yere ɩ, alɛ so tɩ tone kɛ́ tɩ ta ɩ nɩr kãw za maalɩ yel-bier ɛ. ⁴ Tɩ nɩ̃ɛ na bɔbr kɛ tɩ sɩrɩ sãá ɩ Naaŋmɩn tõ-tõ-biir a yele za pʋɔ: tɩ dɩrɛ nɩ kanyir yaga ɛ tɛr tʋɔra-nyɔwfʋ a kpɩɛrʋ pʋɔ, a fɛrʋ pʋɔ nɩ a pʋl-vʋ̃ɔ daar. ⁵ Bɛ pɔb tɩ na, ɛ nyɔw tɩ ƴãw gaso pʋɔ. Bɛ dam ɩ a zu-sɛbla ƴãw ʋ ìr a tɩ ƴãw, tɩ tõ na tɩ bal, tɩ bɛ ũù mimir ɛ, tɩ bɛ dɩ bom ɛ. ⁶ Tɩ bɔbr a k’aa tɩ vɩɛlʋ nɩ a tɩ bãwfʋ, a tʋɔra-nyɔwfʋ nɩ a ɩ-vɩɛlɩ, a Vʋʋrʋ Sõw tome nɩ a nɔ̃wfʋ sɩza tɩ na nɔnɛ a nɩbɛ a, tɩ bɔbr a k’aa wul a sãá kɛ tɩ ɩ n Naaŋmɩn tõ-tõ-biir; ⁷ a yel-mɩŋa tɩ na kanɛ kʋ̀rɛ a nɩbɛ a pʋɔ n’a, nɩ a Naaŋmɩn fãw zũú n’a tɩ bɔbr kɛ́ tɩ wul kɛ tɩ ɩ n Naaŋmɩn tõ-tõ-biir. A mɩnʋ ɩ-ɩrɩ a Naaŋmɩn niŋé n’ɩ a zɛbr bome tɩ na tɛr zɛbr ɩ, ɛ gùre nɩ tɩ tʋɔra a. ⁸ Bɛ mɩ́ ƴãwnɛ tɩ na bɩɩ jewre tɩ, bɛ mɩ́ pore nɩ a tɩ yúor yo-vla bɩɩ pore a tɩ yúor yo-faa. Zir-ŋmarbɛ n’ɩ tɩ a nɩbɛ zie, zɩ̃ kɛ yel-mɩŋa n’a tɩ yere; ⁹ tɩ sãá na mɛ̃ nɩbɛ bɛ na bɛ bãw a, ɛ́ tɩ ɩ nɩbɛ bɛ na bãw vla a; bɛ de tɩ na bʋɔlɛ na-kpi-bio mɩnɛ, ɛ́ tɩɩm n’ɩ bɛ ŋan vʋʋrɛ. Bɛ dɔwrɩ tɩ na, ɛ́ bɛ kʋ́ tɩ ɛ; ¹⁰ bɛ ƴãwnɛ tɩ nɩ pʋ-sãwna, ɛ́ nʋ̃ɔ̀ kpɩɛr tɩ bibie za; tɩ ɩ n nan dem, ɛ́ ɩrɛ nɩ-yaga lɩɛbɛ na-mɩnɛ; tɩɩm na tɛr bom za a, a sãá na mɛ̃ tɩ bɛ tɛr bom a. ¹¹ Korɛ̃tɩ tẽw dem ɩ, tɩ dɔl ɩ nʋɔr ƴɛr a nyɩ zie nɩ tɩ pʋɔ za. ¹² Tɩ nɔ̃w nyɩ na nɩ a tɩ pʋɔ za, ɛ cɛ nyɩmɛ nɛ bɛ bɛ nɔ̃w tɩ nɩ a nyɩ pʋɔ za ɩ. ¹³ Lɛ so ɩ̃ ƴɛrɛ a nyɩ zie mɛ̃ a ɩ̃ bibiir zie a: «Nyɩ mɩ̀ nɔ̃w tɩ nɩ nyɩ pʋɔ za.» ¹⁴ Nyɩ ta ɩ nyɩɩm nɩ a Naaŋmɩn bɛ-saw-dierbɛ lãw taa mɛ̃ nĩ-kʋɔrɩ bɛ na caw taa nɩ da-been a nyuru zu a ɩ. Ŋmɩŋmɩn za n’a a mɩnʋ nɩ a faalʋ na tʋ̃ɔ lãw taa? Ŋmɩŋmɩn za n’a cãa nɩ lige na tʋ̃ɔ lãw taa? ¹⁵ Bʋ̃ʋ wõ-taa n’a na tʋ̃ɔ be a Kɩrɩta nɩ a Belɩyaar cara pʋɔ? Bʋ̃ʋ n’a Naaŋmɩn saw-diere nɩ Naaŋmɩn bɛ-saw-diere na tʋ̃ɔ lãw? ¹⁶ Bʋ̃ʋ wõ-taa n’a na tʋ̃ɔ be a Naaŋmɩn yir nɩ a tɩbɛ cara pʋɔ? Bʋ̃ʋ n’ʋ vɛ̃, tɩmɛ nɛ bɛ ɩ a Naaŋmɩn na vʋʋrɛ a yir, mɛ̃ a lɛ a Naaŋmɩn tɔr za na yel a: «Ɩ̃ na kpɩɛr ɩ a bɛ pʋɔ, ɛ́ cere a bɛ sɔgɔ, ɩ̃ na ɩ n a bɛ Naaŋmɩn, ɛ́ bɛ ɩ a ɩ̃ nɩ-bʋʋrɛ.» ¹⁷ Alɛ so a Sore yere: «Nyɩ yi zaa a nɩbɛ bɛ ŋa pʋɔ, nyɩ taw zãá nɩ bɛ. Nyɩ taa tʋɔr bom za na tɛr dɛwr a ɩ, ɛ ɩ̃ na de nyɩ na. ¹⁸ Ɩ̃ na ɩ n sãà a nyɩ zie, ɛ́ nyɩ ɩ bi-dɛbr nɩ pɔwyaar a ɩ̃ zie, a Sore kpɛnʋ-za-sob ʋ yere.»

¹ Ɩ̃ nɩ-nɔnɩ ɩ, a a ŋa za a Naaŋmɩn na yel k’ʋʋ na ɩ na kʋ̀ tɩ a zũú, nyɩ ɩ a tɩɩm tɛɛ za so a dɛwr za na dɛwr a ƴãgan nɩ a sɩ́ɛ a, tɩ so a za bɛr, ɛ ƴãw fãw ɩ nɩ-son ƴãwnɛ a Naaŋmɩn. ² Nyɩ tɛr a tɩ tɩɛrʋ a nyɩ socie pʋɔ. Tɩ bɛ sãw nɩr kãw za ɩ, bɛ dɩ nɩr kãw za lɔb ɛ, bɛ nɛb nɩr za ɩ. ³ Ɩ̃ bɛ yere a a ŋa k’ɩ̃ɩ yel kɛ́ nyɩ sãw na ɩ. Bʋ̃ʋ n’ʋ vɛ̃, mɛ̃ a lɛ ɩ̃ na dãw yel a, tɩ nɔnɛ nyɩ na bɛ dɩ vuo ɩ, lãw baa bɩɩ lãw kpi n’a. ⁴ Ɩ̃ bɛr ɩ tɩɛrʋ yaga za a nyɩ ƴãw, ɛ nyʋʋr yaga za a nyɩ ƴãw. A tɩ kpɩɛrʋ za pʋɔ a, ɩ̃ nyɛ̃ nɩ mɔwlʋ yaga ɛ nʋ̃ɔ̀ kpɛ m bɛ dɩ vuo ɩ. ⁵ Tɩ na tɩ ta a Masedʋan a, tɩ bɛ nyɛ̃ pɩɛnʋ towtow ɛ, kpɩɛrʋ bʋʋrɛ za n’a tɩ nɩ̃ɛ nyɛ̃ a ziir za: zɛbr tɩ n’a a yẽw, ɛ a tɩ pʋ̃ɔmɩ́ a ɩ dɛ̃bɩ̃ɛ. ⁶ Ɛ cɛ Naaŋmɩn na mɔwlɛ a bɛlɩ dem na mɩ́ siwre bɛ tʋɔra a, mɔwlɩ tɩ nɩ a Títɩ̀ waa pʋɔ. ⁷ Ɛ cɛ a ʋ waa pʋɔ tɛwr bɛ n’a tɩ nyɛ̃ a mɔwlʋ ɛ, tɩ mɩ̀ nyɛ̃ nɩ mɔwlʋ, a mɔwlʋ ʋl mɩŋa na páw a nyɩ zie a pʋɔ. Ʋ manɩ na kʋ̀ m kɛ́ nyɩ bɔbr ɩ tuotuo kɛ́ nyɩ nãa lɛ nyɛ̃ m, ɛ manɩ a nyɩ pʋ-sãwna lãw nɩ a lɛ nyɩ na tʋlɛ a ɩ̃ ƴãw a. Alɛ n’a so nʋ̃ɔ̀ lɛb bãw kpɩɛr mɛ̃ yaga za. ⁸ A sɛb-tʋɔla ɩ̃ na sɛb nyɩ a wa ƴãw nyɩ pʋ-sãwna a, ɩ̃ bɛ yere k’ɩ̃ɩ nãá bãw kɛ lɛ ɩ. Ɩ̃ na wa nyɛ̃ ʋ ƴãw nyɩ pʋ-sãwna blã lɛ tɛwr ƴãw a, ɩ̃ yel a kɛ mãa tɩ bãw kɛ lɛ. ⁹ Ɛ cɛ ƴɛrɛ ŋa a, ɩ̃ cɩlɛ na, ɛ a bɛ kaar mɛ̃ a nyɩ pʋ-sãwna ƴãw n’a ɩ̃ cɩlɛ ɩ, ɩ̃ cɩlɛ na a pʋ-sãwna ŋa na ɩ nyɩ lɩɛbɩ a nyɩ ɩb a ƴãw. Bʋ̃ʋ n’ʋ vɛ̃, a pʋ-sãwna ŋa tu n a lɛ a Naaŋmɩn na bɔbr a. Lɛ so, tɩ bɛ sãw nyɩ bom za ƴãw ɛ. ¹⁰ A pʋ-sãwna na tu a Naaŋmɩn pʋ-tɩɛrʋ a waar ɩ nɩ ɩb-lɩɛbʋ na tɩrɛ faafʋ a, ɛ nãa-bãw-kɛ-lɛ kãw za bɛ ka ʋ pʋɔ ɩ. A pʋ-sãwna na tu a tẽ-daa ŋa a waar ɩ nɩ kũu. ¹¹ Nyɩ nyɛ̃ bom nɛ a pʋ-sãwna na tu Naaŋmɩn a na ƴãw nyɩ ɩ a: ʋ ƴãw na nyɩ tʋlɛ, ɛ zɛlɛ a nyɩ sãwna suur; bʋ̃ʋ suur nɩ bʋ̃ʋ dɛ̃bɩ̃ɛ n’a ʋ bɛ ƴãw nyɩ! Ʋ ƴãw na nyɩ bɔbr kɛ nyɩ nãa lɛ nyɛ̃ m, nyɩ tʋlɛ a yel-fa-maalɛ kpãafʋ ƴãw. Nyɩ ɩ n bom za wul kɛ́ nyɩ bɛ tɛr sãwna a yel ŋa pʋɔ ɩ. ¹² A na ɩ a ŋa a, a sɛb-tʋɔla ɩ̃ na sɛb nyɩ a, bɛ ɩ a yel-fa-maalɛ ƴãw ɛ, bɛ lɛ ɩ a ʋlɩ sob nɛ ʋ na sãw a ƴãw ɛ. Ɩ̃ tɩ bɔbr a, a Naaŋmɩn niŋé, kɛ́ nyɩ nyɛ̃ a lɛ nyɩ na sɩrɩ tʋlɛ a tɩ ƴãw a. ¹³ Alɛ n’a so tɩ na nyɛ̃ a mɔwlʋ a. Mɔwlʋ tɛwr bɛ n’a tɩ nyɛ̃ ɩ. A Títɩ̀ nʋ̃ɔ̀ ɩ na nʋ̃ɔ̀ kpɛ tɩ tɩ dɔwlɩ. Sɩza n’a, a nyɩ za ɩb ɩ na ʋ bɛr tɩɛrʋ. ¹⁴ Bʋ̃ʋ n’ʋ vɛ̃, vĩ bɛ ɩrɛ mɛ̃ ɩ̃ na nyʋʋr a nyɩ ƴãw a ʋ zie a ɩ. Ɛ cɛ mɛ̃ a lɛ tɩ na mɩ́ yel a yel-mɩŋa kʋra lɛ a, lɛ n’a a nyʋʋr, tɩ na nyʋʋr a nyɩ ƴãw a Títɩ̀ zie a, wa ɩ sɩza. ¹⁵ A nɔ̃wfʋ ʋ na nɔ̃w nyɩ a mɩ́ lɛb a ɩ kpɛ̃ɛ dɔwlɩ, ʋ na mɩ́ lɛ tɩɛrɩ a lɛ nyɩ za na saw a ʋ nʋɔr nɩ a lɛ nyɩ na tuori nyɔw ʋ nɩ ƴãwfʋ lãw nɩ zɔba a. ¹⁶ Ɩ̃ cɩlɛ na ɩ̃ na na tʋ̃ɔ bɛr tɩɛrʋ a nyɩ ƴãw a yele za pʋɔ a.

¹ Yɛbr ɩ, tɩ bɔbr a kɛ tɩ ɩ nyɩ bãw a maalʋ a Naaŋmɩn na kʋ̀ a Masedʋan Lãw-yie a. ² Kpɩɛrʋ ta n a be Kɩrɩta-nɩbɛ yaga za, ɛ cɛ bɛ tɩ cãa cɩlɛ yaga za ɛ́ tɩr a bɛ bʋ̃-tɛrɩ yaga yaga zawla lɛ, bɛ na saa bɛ tɩ tɛr a a. ³ Ɩ̃ dɩ n a bɛ dãsɩɛ, bɛ tɩr a mɛ̃ a lɛ bɛ na tʋ̃ɔ a, ɛ́ tɩr gãw lɛ mɔ̃ mɩ̀, ɛ́ nyɛ̃ bɛ tʋɔra tɩr. ⁴ Bɛ lɔb ɩ nuru zɛlɩ nɩ tɩ yãayãa, kɛ́ tɩ saw bɛ pʋɔ sõw kɛ̀ bɛ tɩr bom kʋ̀ a Zude tẽw Kɩrɩta-nɩbɛ. ⁵ Bɛ ɩ na gãw a lɛ tɩ na tɩ tɩɛrɛ a: bɛ de nɩ niwn de bɛ tʋɔra kʋ̀ a Naaŋmɩn, al pùorí, Naaŋmɩn saw bɛ mɩ́ de bɛ tʋɔra za kʋ̀ tɩ. ⁶ Alɛ n’a so tɩ zɛlɩ a Títɩ̀ k’ʋʋ sõw a nɔ̃wfʋ ton ŋa tʋ̃ɔ tõ vla a nyɩ zie, mɛ̃ a lɛ ʋ na tɩ tĩ ʋ a. ⁷ Ɛ́ bom za na ʋr a nyɩ zie a: a Naaŋmɩn saw-deb, a ƴɛrʋ bãwfʋ, a yele-bãwfʋ, yele ƴãw nyɩ na tʋlɛ bɛ tɛr bɛrʋ, lãw nɩ a nɔ̃wfʋ tɩ na wul nyɩ a, a a ŋa za na ʋr a nyɩ zie a, nyɩ mɩ̀ saw tɩr yaga za a yel ŋa ƴãw. ⁸ Ɩ̃ bɛ ƴãwnɛ nʋɔr kʋ̀rɛ nyɩ a ka ɩ, ɛ cɛ ɩ̃ manɛ nɩ lɛ ŋmaarɛ bɛ mɩnɛ na tʋlɛ a, k’ɩ̃ɩ zaw a nyɩ tɩɛrʋ nyɩ mɩ̀ tʋ̃ɔ wul k’aa nyɩ nɔ̃wfʋ ɩ n sɩza. ⁹ Nyɩ bãw nɩ a lɛ a tɩ Sore Yeezu Kɩrɩta na maalɩ tɩ a, ʋl na tɩ kpɛ bom za naalʋ a, ʋ lɩɛb ɩ nãw sob a nyɩɩm ƴãw, k’ʋʋ ɩ nyɩ kpɛ naalʋ nɩ a ʋ nãw. ¹⁰ Mãa na nyɛ̃ lɛ a n’a ɩ̃ yere kʋ̀rɛ nyɩ a yel ŋa ƴãw: a ŋa n’a sɛwnɩ nyɩ, nyɩmɛ na nɛ bɛ dɩyã de niwn tone a ton ŋa, ɛ́ mɩ̀ tɩ de niwn yel kɛ nyɩ na tõ ʋ na a. ¹¹ A na ɩ a ŋa a, ƴɛrɛ ŋa a, nyɩ tõ ʋ tɩ ɓɩɩlɩ, lɛ n’a a nyɩ tɩɛr-vɩɛlɩ na man taa nɩ a ɩ-ɩrɩ nyɩ na ɩ mɛ̃ a lɛ nyɩ na tʋ̃ɔ a. ¹² Bʋ̃ʋ n’ʋ vɛ̃, a fʋ tɩɛrʋ wa sɩrɩ vɩɛl a, Naaŋmɩn mɩ́ saw na de a bʋ̃-kʋra ɛ́ bɛ sowre bom fʋ na bɛ tɛr a ɩ, a lɛ fʋ na tɛr a n’a ʋ mɩ́ jɩrɛ. ¹³ Bɛ bɛ yel kɛ nyɩ wɩɛ a nyɩ taabɛ ɛ ƴãw nyɩ tʋɔra fɛrʋ pʋɔ ɩ, ɛ cɛ ɩ k’a sɛw taa yele n’a. ¹⁴ A ƴɛrɛ ŋa a, a nyɩ tɛra dɔwlɛ na sõw nɩ a bɛ bom-bɛ-tɛrʋ; lɛ n’a bibir kãw, a bɛ tɛra dɔwlɛ mɩ̀ na sõw a nyɩ bom-bɛ-tɛrʋ, lɛ n’a a tɛra na sɛw taa, ¹⁵ a tu a a ŋa a Sɛb-sõw na tɩ yel a: «Ʋlɩ sob na tɩ wob yaga a, bɛ tɩ tɛr a dɔwlɩ ɛ, ɛ́ sob nɛ na wob pʋrɩ a, bɛ tɩ bɔ bom gu ɛ.» ¹⁶ Naaŋmɩn tɛr ɩ puoru, ʋl na ƴãw a Títɩ̀ ʋ mɩ̀ tʋlɛ a nyɩ ƴãw a. ¹⁷ Ʋ saw nɩ a tɩ zɛlʋ, ɛ tʋlɛ a tome ƴãw tɩ zuo, lɛ so ʋ nyɛ̃ ʋ tʋɔra wa a nyɩ zie. ¹⁸ Tɩ tõ ʋ na, ʋlɛ nɩ a yɛb ʋl a Lãw-yie za na mʋʋrɛ a Yel-nʋ̃ɔ̀ tome ʋ na tone a zũú. ¹⁹ Ɛ lɛ waar, a Lãw-yie kaa na ir ʋ, k’ʋʋ lãw nɩ tɩ yi lo a sɔr a nɔ̃wfʋ ton ŋa pʋɔ, a ton ŋa tɩ na tone a Sore tɔr za yúor-vɩɛlʋ-danʋ ƴãw a, nɩ kɛ́ tɩ wul a tɩ pʋ-tɩɛr-vɩɛlɩ a. ²⁰ Tɩ bɛ bɔbr kɛ́ nɩr kãw za wa yere tɩ, kɛ́ tɩ bɛ maal tɛr a libi-yaga a ŋa bɛ na kʋ̀ tɩ a ɩ. ²¹ Tɩ bɛ bɔbr a vla maalʋ Sore yõ zie ɩ, tɩ mɩ̀ bɔbr ɩ a lɛ a nɩsaalbɛ zie. ²² Tɩ tone nɩ a tɩ yɛb lãw nɩ bɛ; gb’a a ŋmɩn za, tɩ ɩ ʋ na kaa, ɛ ʋ wul ʋ na tʋlɛ a tome ƴãw a. Ƴɛrɛ ŋa a, ʋ tʋlɛ nɩ a tome ƴãw zuo lɛ, ʋ na de a nyɩ yele yaga za a ƴãw. ²³ A Títɩ̀ ʋl a, ʋ ɩ n a ɩ̃ tu-ta-tɔ nɩ a ɩ̃ lãw-tõ-tɔ na be a nyɩ zie a; ɛ a yɛbr bɛl na bɩɛlɩ ʋ a, a Lãw-yie n’a tõ bɛ, ɛ́ bɛ tone k’aa Kɩrɩta páw yúor-vɩɛlʋ-danʋ. ²⁴ A na ɩ a ŋa a, nyɩ wul bɛ kɛ́ nyɩ nɔnɛ bɛ nɩ yel-mɩŋa, nɩ kɛ́ nyɩmɛ nɛ bɛ ɩ a tɩ nyʋʋr-bom a bɛ zie a Lãw-yie niŋé.

¹ A sõwfʋ nyɩ na tɛr a Zude tẽw Kɩrɩta-nɩbɛ ƴãw a, a bɛ tɛr k’ɩ̃ɩ sɛb nyɩ ɛ. ² Ɩ̃ bãw nɩ a nyɩ tɩɛr-vɩɛlɩ a yel ŋa ƴãw, ɛ́ nyʋʋr a nyɩ ƴãw a Masedʋan tẽw dem zie yere nɩ: «A Akayi Kɩrɩta-nɩbɛ cɔbr ɩ a sõwfʋ baarɩ dɩyã za.» Ɛ a tʋlʋ nyɩ na tʋlɛ a tome ƴãw a, a zaw nɩ a Lãw-yie yaga zie tɩɛrʋ a mɩ̀ ƴãw fãw. ³ Ɩ̃ tone nɩ yɛbr a nyɩ zie, k’aa nyʋʋr ɩ̃ na nyʋʋr a nyɩ ƴãw a yel ŋa ƴãw a, ta ɩ zawla ɩ, ɛ́ nyɩ sɩrɩ cɔbrɩ baarɩ gu, mɛ̃ a lɛ ɩ̃ na dãw yel a. ⁴ Alɛ bɛ ɩ lɛ, Masedʋan tẽw nɩbɛ wa páw mɛ̃ wa, wa nyɛ̃ nyɩ bɛ cɔbrɩ baarɩ a, a tɩɛrʋ tɩ na ƴãw a nyɩ ƴãw bɛ bʋnɛ a, nãa ɩ tɩ nɩ vĩ bɛ dɩ vuo ɩ, ɛ ɩ̃ bɛ saw yere k’aa tɩ vĩ ŋa na ɩ n a nyɩ vĩ ɛ. ⁵ Alɛ so ɩ̃ nyɛ̃ k’aa fɛr a, k’ɩ̃ɩ zɛlɩ yɛbr bɛ de tɩ niwn a nyɩ zie wa cɔbrɩ a nyɩ sõwfʋ bʋ̃-tɩrɩ, nyɩ na yel kɛ nyɩ na tɩr a a. Mãa wa ta a, a na cɔbr a baarɩ, lɛ n’a a na wul kɛ́ nyɩ tɩrɛ na nɩ pʋ-pla, kɛ nyɩ bɛ kpɛ mimir a tɩrʋ ƴãw ɛ. ⁶ Nyɩ lɛ tɩɛrɩ a yel ŋa: Sob nɛ na bʋ̀r zaa pʋrɩ a, zaa pʋrɩ lɛ n’a ʋ na cɛ; ɛ sob nɛ na bʋ̀r yaga a, yaga n’a ʋ na cɛ. ⁷ A na ɩ a ŋa a, ŋa za mɩ́ tɩr mɛ̃ a lɛ ʋ na tɩɛr k’ʋʋ na tɩr a a, ʋ ta tɩrɛ nɩ pʋ-sãwna ɩ, ɛ́ a mɩ̀ ta ɩ fɛrʋ ɛ, bʋ̃ʋ n’ʋ vɛ̃, Naaŋmɩn nɔnɛ nɩ a sob nɛ na mɩ́ tɩr a bom nɩ pʋ-pla a. ⁸ Naaŋmɩn tɛr ɩ fãw na tʋ̃ɔ paalɩ nyɩ nɩ maalʋ bʋʋrɛ bʋʋrɛ za, nyɩ mɩ́ tɛr bom za na sɛw a kʋra lɛ, ɛ tɛr a dɔwlɩ yel-vla za maalʋ ƴãw. ⁹ Mɛ̃ a lɛ a Sɛb-sõw na yel a: «Ʋ põ nɩ a ʋ bome, ʋ de a na kʋ̀ nan dem a ʋ mɩnʋ be n kʋra lɛ.» ¹⁰ A Naaŋmɩn na kʋ̀rɛ a bʋ̃-bʋʋrɛ a bʋ̀r-bʋ̀rɛ a, ɛ kʋ̀rɛ ʋ a bʋ̃-dɩrɩ na guole ʋ a, mɩ̀ na kʋ̀ nyɩ nɩ a bʋ̃-bʋʋrɛ, ʋ na ɩ na a yɛ̀r, ɛ ɩ a nyɩ yel-mɩnʋ ɩ-vɩɛlɩ wɔmɛ yãwmɛ̃. ¹¹ Ʋ na ɩ na nyɩ kpɛ naalʋ a man kʋra lɛ, kɛ̀ nyɩ tʋ̃ɔ tɩrɛ taa bɛrɛ ɩ, lɛ n’a nɩ-yaga na puore a Naaŋmɩn yaanɩ a bome tɩ na tɩr kʋ̀ bɛ a nyɩ yúor ƴãw a. ¹² Bʋ̃ʋ n’ʋ vɛ̃, a cɩɛrʋ ton ŋa a, a Kɩrɩta-nɩbɛ yel-fɛrɩ tɛwr sõwfʋ ƴãw bɛ n’a ɩ, a fɛr a k’aa ɩ nɩ-yaga puore a Naaŋmɩn barka. ¹³ Nɩ-yaga na na nyɛ̃ a nyɩ ton ŋa vɩɛl sɛw a ŋa a, bɛ na íre nɩ a Naaŋmɩn yúor-vɩɛlʋ-danʋ, nyɩ na saw a nʋɔr a ƴãw. A nyɩ nʋɔr-sawfʋ ŋa wul a kɛ́ nyɩ de nɩ a Kɩrɩta Yel-nʋ̃ɔ̀. Bɛ mɩ̀ na íre nɩ a Naaŋmɩn yúor-vɩɛlʋ-danʋ, nyɩ na saw de a nyɩ bʋ̃-tɛrɩ tɩr bɛ põ kʋ̀ bɛ, lãw nɩ a ŋmaarɛ bɛl za na cɛ a. ¹⁴ Bɛ na ɩ na a sãá, a puoru bɛ na puore kʋ̀rɛ nyɩ a pʋɔ, kɛ́ bɛ nɔnɛ nyɩ na, a maalʋ na bɛ dɩ vuo a Naaŋmɩn na kʋ̀ nyɩ a zũú. ¹⁵ Naaŋmɩn so puoru, a maalʋ na bɛ tɛr manʋ ʋ na tɩrɛ a ƴãw.

¹ A mãa Pol, bɛ na yel k’ɩ̃ɩ mɩ́ siwre nɩ ɩ̃ tʋɔra yaga za mãa wa be a nyɩ sɔgɔ a, ɛ́ kpɛ pʋra a lɛn daar ɩ̃ na mɩ́ wa zãá a, mãa tɔr za n’ʋ kpaalɛ nyɩ a Kɩrɩta su-baalʋ nɩ a ʋ vɩɛlʋ zũú: ² ɩ̃ zɛlɛ nyɩ na, nyɩ ta saw ɩ̃ wa wul nyɩ k’ɩ̃ɩ kpɛ n pʋra mãa wa wa a nyɩ zie a ɩ. Bʋ̃ʋ n’ʋ vɛ̃, ɩ̃ bɛ tɩɛr k’ɩ̃ɩ na bɛr ɩ a bɛlɩ dem na yere k’aa tɩ ɩ-ɩrɩ tu n nɩsaalʋ tɛwr a ɩ. ³ Tɩ na saa ɩ nɩsaalbɛ a, tɩ bɛ zɛbr a zɛbr mɛ̃ a lɛ tɛwr nɩsaalbɛ na mɩ́ zɛbr a ɩ. ⁴ A tɩ zɛbr bome bɛ yi nɩsaalbɛ zie ɩ, Naaŋmɩn zie n’a a tɩ zɛbr bome fãw yi, k’aa tʋ̃ɔ mɩ́ ŋmɛ a yi-kpɛn lɔb. Tɩ mɩ́ ŋmɛ n a tɩɛrʋ na bɛ tu yel-mɩŋa a lɔb, ⁵ tɩ mɩ́ tʋ̃ɔ nɩ fãw za na zɛwr ʋ tʋɔra bɛ sawr kɛ́ bɛ bãw a Naaŋmɩn a ɩ. Tɩ mɩ́ tʋ̃ɔ nɩ nɩsaal tɩɛrʋ za, a ɩ mɛ̃ gaso pʋɔ n’a tɩ nyɔw ʋ ƴãw a, kɛ́ tɩ ɩ ʋ sawr a Kɩrɩta nʋɔr. ⁶ Ɛ nyɩmɛ dɛ wa sawr nʋɔr tɩ ɓɩɩlɩ a, tɩ cɔbr a baarɩ gu kɛ́ tɩ dɔwrɩ nʋɔr-zawrʋ za. ⁷ Nyɩ jɩrɛ a lɛ a yele na sɩrɩ ŋmɛ̃ a: nɩr wa bãw k’aa Kɩrɩta so ʋ a, ʋ páw bãwnɩ a: a Kɩrɩta wa so ʋ a, a Kɩrɩta mɩ̀ so tɩ. ⁸ Bʋ̃ʋ n’ʋ vɛ̃, vĩ bɛ ɩrɛ mɛ̃ mãa saa pɔrɛ nɩ a fãw a Sore na kʋ̀ tɩ a ɩ, ʋ kʋ̀ tɩ nɩ a fãw ŋa a nyɩ vla ƴãw, a nyɩ loba ƴãw bɛ n’a ɩ. ⁹ Ɩ̃ bɛ bɔbr k’ɩ̃ɩ ɩ mɛ̃ ɩ̃ ƴãwnɛ nyɩ nɩ dɛ̃bɩ̃ɛ nɩ a ɩ̃ sɛbr ɛ. ¹⁰ Bʋ̃ʋ n’ʋ vɛ̃, bɛ yere na: «A Pol sɛbr ƴɛr-bie mɩ́ tɩbrɛ na ɛ kpɛmɛ, ɛ cɛ a ʋl tɔr za wa be a tɩ sɔgɔ a, ʋ bɛ mɩ́ tɛr fãw ɛ, a ʋ ƴɛrʋ bɛ mɩ́ tɛr pɛr ɛ.» ¹¹ A sob nɛ na yere a a ŋa a, ʋ páw bãwnɩ a: a lɛ tɩ na ƴɛrɛ a tɩ sɛbr pʋɔ tɩ na zãá a, lɛ tɔr za n’a tɩ na ŋmɛ̃ a tɩ ɩ-ɩrɩ pʋɔ, tɩmɛ wa be a nyɩ sɔgɔ a. ¹² Tɩ kʋ̃ kpɛ pʋra yel kɛ tɩɩm nɩ a nɩbɛ bɛ mɩnɛ kãw, na mɩ́ manɛ a bɛ tʋɔra ɩ-vɩɛlɩ a, sɛw nɩ taa a ɩ, bɩɩ tɩ kʋ̃ de tɩ tʋɔra manɛ nɩ bɛ ɩ. Dãbole nɛ bɛ, bɛ na de bɛ tʋɔra bɛ lɩɛbɩ bʋ̃-mána bɛ manɛ nɩ bɛ tʋɔra a ƴãw. ¹³ Tɩɩm a, tɩ kʋ̃ pɔrɛ tɩ col ɩ ɛ. Tɩ na mɩ́ pɔ na tɩ ta n a be a Naaŋmɩn na ƴãw a tɩ tome zie tɩ tɩɛ a, ʋ na saw tɩ wa ta a nyɩ zie a ƴãw. ¹⁴ Bʋ̃ʋ n’ʋ vɛ̃, tɩ bɛ zuore a tɩ tʋr-bɔw bɛrɛ ɩ, mɛ̃ a lɛ nãa tɩ n’a, tɩmɛ bɛ tɩ wa a nyɩ zie a. Tɩmɛ nɛ bɛ sɩrɩ de niwn ta a nyɩ zie kʋ̀ nyɩ a Kɩrɩta Yel-nʋ̃ɔ̀. ¹⁵ Tɩ bɛ de tome nɩ-yoru na tõ a, pɔrɛ nɩ yaga za zuo ɛ. Ɛ cɛ, tɩ nɩ̃ɛ na tɩɛrɛ k’aa nyɩ Naaŋmɩn sawfʋ na kɛrɛ na dɔwlɛ, nɩ kɛ tɩ na tʋ̃ɔ na tõ tõ-kpɛ̃ɛ zuo lɛ a nyɩ sɔgɔ, ɛ cɛ a cãa ɩ a tɩ tome tʋr-bɔw pʋɔ. ¹⁶ Al pùorí, tɩ na tʋ̃ɔ na hieri yel a Yel-nʋ̃ɔ̀ ten na be a nyɩ tẽw nidaa pʋɔ, ɛ kʋ̃ pɔrɛ nɩ tome nɩ-yoru na tõ a bɛl mɩŋa tome puo pʋɔ a ɩ. ¹⁷ Mɛ̃ a lɛ a Sɛb-sõw na yel a: «Ʋlɩ sob wa zɛwr ʋ tʋɔra a, ʋ zɛwr ʋ tʋɔra a Sore ƴãw.» ¹⁸ A sob nɛ na nyɛ̃ ʋ tʋɔra ʋ ɩ nɩ-vla a, ʋ yele bɛ n’a bɛ mɩ́ de ɩ, sob nɛ a Sore na yel k’ʋʋ ɩ n nɩ-vla a n’ʋ.

¹ Bʋ̃ʋ pãa ɩ a! Nyɩ nãa saw kʋ̀ m ɩ̃ tõ yãya-tome blã! Ʋ̃ʋ nyɩ saw kʋ̀ m! ² Nyuur na yi Naaŋmɩn zie a ɩrɛ mɛ̃ nɩ a nyɩ ƴãw. Dɛb-been yõ tẽtẽ n’ʋ ɩ̃ ƴãw nɩ nyɩ a yúor, k’ɩ̃ɩ tʋ̃ɔ de nyɩ kʋ̀ a Kɩrɩta mɛ̃ pɔwsɩrale na bɛ tɛr dɛwr a. ³ Ɛ cɛ, mɛ̃ a lɛ a waab na tɩ bɛlɩ a Awa a, dɛ̃bɩ̃ɛ ɩrɛ mɛ̃ na, a nyɩ tɩɛrʋ nãa wa lɩɛbɛ tɩɛr-faar ɛ tawr nyɩ zãanɛ nɩ a Kɩrɩta puor-tub ʋl na bɛ bãw a mɩnɛ kãw a. ⁴ Bʋ̃ʋ n’ʋ vɛ̃, nyɩ mɩ́ saw na de nɩ-sãsara lɛ na hiere yere Yeezu-yũo na bɛ ɩ a ʋl tɩ na hieri yel kʋ̀ nyɩ a ɩ, ɛ saw de yã-yũo nɩ wul-yũo na bɛ ɩ a Vʋʋrʋ Sõw nɩ a Yel-nʋ̃ɔ̀ nyɩ na páw a tɩ zie a dem a ɩ. ⁵ Ɛ cɛ, ɩ̃ bɛ tɩɛr kɛ a nyɩ nɩ-ton-kazawr bɛ ŋa zuo mɛ̃ nɩ yel kãw za ƴãw ɛ. ⁶ Sɩza n’a, ɩ̃ tɔ̃w bɛ bãw ƴɛrʋ ɛ, ɛ cɛ a yele-bãwfʋ lowr a, a bɛ ɩ a lɛ ɩ: bom za ƴãw, yele za pʋɔ, tɩ wul nyɩ na a sãá. ⁷ Ɩ̃ na siwri ɩ̃ tʋɔra manɩ a Naaŋmɩn Yel-nʋ̃ɔ̀ kʋ̀ nyɩ mɔlɛ lɛ k’ɩ̃ɩ zɛw nyɩ a, sãwna n’a bɩɩ? ⁸ Lãw-yie a mɩnɛ n’a ɩ̃ kpow, ɩ̃ saw na bɛ kaarɛ a ɩ̃ zie k’ɩ̃ɩ tone a nyɩɩm. ⁹ Ɛ ɩ̃ na tɩ be a nyɩ zie, a wa fɛrɛ mɛ̃ a, nɩr kãw za bɛ hanɩ a ɩ̃ ƴãw ɛ, a yɛbr na tɩ yi a Masedʋan wa a tɩ kʋ̀ m ɩ a ɩ̃ bʋ̃-bɔbrɩ; a yele za pʋɔ, ɩ̃ bɛ saw nyɩ hanɩ a ɩ̃ ƴãw ɛ, ɛ́ mɩ̀ bɛ be za na saw ɛ. ¹⁰ A Kɩrɩta yel-mɩŋa na be a ɩ̃ pʋɔ a ƴãw, ɩ̃ yere nɩ a ŋa: nɩr za kʋ̃ tʋ̃ɔ ɩ ɩ̃ bɛ nyʋʋr a yel ŋa ƴãw a Akayi ten pʋɔ ɩ. ¹¹ Ɛ bʋ̃ʋ so ɩ̃ ƴɛr a a ŋa? Ɩ̃ na bɛ nɔnɛ nyɩ a n’a bɩɩ? Naaŋmɩn yõ n’ʋ bãw! ¹² Ɩ̃ na cãa na ɩrɛ a a ŋa ɩ̃ na ɩrɛ a, k’ɩ̃ɩ ɩ a bɛlɩ dem na pɔrɛ kɛ́ bɛ zɛ̃ tɩ na a, ta cãa tɛr pɔb bom ɛ. ¹³ A nɩbɛ bɛ ŋa a, nɩ-ton-bɛlɛ bɛlɛ mɩnɛ nɛ bɛ, tõ-tõ-biir na bɛ tɛr yel-mɩŋa a, ɛ bɛlɩ ɩ Kɩrɩta nɩ-toni a. ¹⁴ A a ŋa za dɛ bɛ ɩ nɔ-ɓãan ɛ: a Sɩtaana tɔr za mɩ́ bɛlɩ na ɩ cãa malkɩ. ¹⁵ Lɛ so a Sɩtaana tõ-tõ-biir mɩ̀ na bɛlɩ ɩ yel-mɩŋa tõ-tõ-biir a, yel-pʋrɩ n’ʋ a bɛ zie. A bɛ baarʋ na tu n a lɛ a bɛ ɩ-ɩrɩ na ŋmɛ̃ a. ¹⁶ Ɩ̃ lɛb a yere a yel ŋa: nɩr kãw za taa wa tɩɛr k’ɩ̃ɩ yarɛ na ɩ. Bɩɩ nɩr wa tɩɛrɛ k’ɩ̃ɩ yarɛ na a, nyɩɩm saw k’ɩ̃ɩ yarɛ na, ɩ̃ mɩ̀ tʋ̃ɔ zɛw ɩ̃ tʋɔra blã. ¹⁷ Sɩza n’a, a yele na wa ƴãw mɛ̃ ɩ̃ na zɛwr ɩ̃ tʋɔra a, ɩ̃ bɛ ƴɛrɛ mɛ̃ a lɛ a Sore nãa tɩ bɔbr k’ɩ̃ɩ ƴɛr a ɩ, ɩ̃ ƴɛrɛ na mɛ̃ yãyaar sob a. ¹⁸ Nɩ-yaga na faa pɔrɛ a bɛ nɩsaalʋ yel-vɩɛlɩ ƴãw a, mãa mɩ̀ na pɔrɛ na. ¹⁹ Nyɩɩm na bãw yã a, nyɩ mɩ́ nɔ̃w na saw de a dãbole. ²⁰ Nyɩ mɩ́ saw na kɛ bɛ ɩrɛ nyɩ mɛ̃ gbãgbaar a, ɛ saw bɛ nɛbr nyɩ, nyɩ mɩ́ saw na bɛ farɛ a nyɩ bome za ɛ pɔrɛ a nyɩ zu, ɓarɛ nɩ nyɩ. ²¹ Vĩ ɩrɛ mɛ̃ nɩ a yelu ƴãw: tɩ wul a kɛ tɩ maal a ɩ bãbaalbɛ tɩ zuo! Ɩ̃ ƴɛrɛ na mɛ̃ yãyaar sob a, a bom nɛ ƴãw a nɩbɛ na zɛwr bɛ tʋɔra a, mãa mɩ̀ na tʋ̃ɔ na zɛw ɩ̃ tʋɔra. ²² Mɛ̃ bɛ taa ɩ Ebire nɩbɛ? A mãa mɩ̀! Bɛ ɩ n Ɩsɩrayɛl bʋʋrɛ yaa? A mãa mɩ̀! Bɛ ɩ n Abraham nɩ-bʋʋrɛ ɛ? A mãa mɩ̀! ²³ Bɛ ɩ n Kɩrɩta tõ-tõ-biir yaa? A ka a, ɩ̃ na ƴɛr ɩ yãya-ƴɛrʋ: ɩ̃ ɩ ʋ na zuo bɛ. A balʋ pʋɔ n’a o, ɩ̃ zuo bɛ na, a gaso pʋɔ kpɛb ƴãw n’a o, ɩ̃ gãw bɛ na, a ŋmɩɛrʋ lowr wa n’a a, bɛ ŋmɛ mɛ̃ na zuo bɛ; gb’a a ŋmɩn za, ɩ̃ tɩ cɛ nɩ blã nãá kpi. ²⁴ Gb’a anũu n’a a Zifʋ mɩnɛ ƴãw mɛ̃ a fʋba nɛɛ lɩz’a ayi for bir, ²⁵ gb’a ata n’a a Ʋrɔm tẽw nɩbɛ fɔb mɛ̃, gb’a-been n’a a nɩbɛ lɔb ɩ mɛ̃ kʋsɛbɛ; gb’a ata n’a a ɩ̃ gbor tu kʋ̃ɔ, ɛ gb’aa been ɩ̃ gã a kʋ̃ɔ-kpɛ̃ɛ pʋɔ bibi-ɓil nɩ tɩ̃ɩsɔw-ɓil. ²⁶ Gb’aa yaga za, gbɛɛ n’a ɩ̃ cen nɩ a ta-ten, a barʋ kʋ̃ɔ-paalʋ nɩ a nyãnyu-nɩ-kʋ́rbɛ ƴãwnɛ mɛ̃ kũu dɛ̃bɩ̃ɛ, lãw nɩ a ɩ̃ yɛbr na ɩ a ɩ̃ bʋʋrɛ nɩbɛ a, nɩ a zawlɛ bɛl na bɛ ɩ a ɩ̃ bʋʋrɛ nɩbɛ a, a tẽw pʋɔ bɩɩ a wɛ-kar pʋɔ, a kʋ̃ɔ-kpɛ̃ɛ zu bɩɩ a yɛb-bɛlɛ bɛlɛ mɩnɛ sɔgɔ. ²⁷ Tõ-kpɛn ƴãw mɛ̃ nɩ balʋ nɩ hanʋ; gb’a a ŋa za, ɩ̃ bɛ ũù mimir ɛ; kɔ̃ nɩ kʋ̃ɔ-nyuur kpɛ m a; gb’a a ŋmɩn za ɩ̃ tɛr ɩ mʋta-tuo; ƴawr kpɛ m a, ɩ̃ bɛ tɩ tɛr bʋ̃-suuri ɛ. ²⁸ Ɩ̃ bɛ ƴɛrɛ a al za na cɛ a ƴɛrʋ ɛ, a yel ʋl na ƴãwnɛ mɛ̃ a tɩɛrʋ bibie za a: a Lãw-yie za kaafʋ tɩɛrʋ. ²⁹ Ãa n’ʋ ɩ bãbaal, ɩ̃ɩ bɛ lãw nɩ ʋ ɩ a bãbaal? Ãa n’ʋ lɛb pùor a saw-deb pʋɔ, ɛ a bɛ dɩrɛ mɛ̃ mɛ̃ vũu a? ³⁰ Alɛ wa fɛr k’ɩ̃ɩ zɛwr ɩ̃ tʋɔra a, a ɩ̃ bãbaalʋ ƴãw n’a ɩ̃ na zɛwr ɩ̃ tʋɔra. ³¹ A Naaŋmɩn tɩ Sore Yeezu Sãà, na tɛr ƴãwfʋ yome yome za a, bãwnɩ a na k’ɩ̃ɩ bɛ ŋmarɛ ziri ɛ. ³² A Damasɩ ɩ̃ na tɩ be a, a na-kpɛ̃ɛ lɩɛrɛ ʋl na lɩɛrɩ a nãà Aretasɩ a, tɩ ƴãw na bɛ gu a tẽw kɛ́ bɛ nyɔw mɛ̃. ³³ Ɛ cɛ zãgba pʋɔ n’a bɛ tɩ ƴãw mɛ̃ tur bɛr tokoro vʋ́ɔrɩ́, ɩ̃ lanɩ a dacin siw zɔ cɩ̃ɛ, ʋ bɛ páw mɛ̃ ɩ. A zãgba pʋɔ bɛ na ƴãw a Pol a (11.33).

¹ A na ɩ a ŋa a, alɛ saa bɛ tɛr pɛr a, ɩ̃ mɩ̀ na zɛw nɩ ɩ̃ tʋɔra. Ƴɛrɛ ŋa a, a bʋ̃-nyɛrɩ a Sore na ƴãw ɩ̃ nyɛ̃ a, nɩ a yel-wuli ʋ na wul mɛ̃ a, al ƴɛrʋ n’a ɩ̃ na ƴɛr. ² Ɩ̃ bãw nɩ Kɩrɩta-nɩr kãw, yome pie nɩ anaar ɩ dɩ̃a, bɛ na ír do n tɩ gãw nɩ a salom a. Ɩ̃ bɛ bãw a ʋ ƴãgan n’ʋ bɛ ír ɩ ʋ do n bɩɩ a ʋ ƴãgan bɛ n’ʋ a, Naaŋmɩn yõ n’ʋ bãw. ³ Ɩ̃ bãwnɩ a na, a nɩr ŋa a, bɛ ír ʋ na do n nɩ a ʋ ƴãgan, bɩɩ bɛ bɛ ír ʋ do n nɩ a ʋ ƴãgan a, Naaŋmɩn yõ n’ʋ bãw, ⁴ bɛ ír ʋ na do n tɩ ta n a Paradi, be n’a ʋ wõ ƴɛr-bie ʋ na kʋ̃ tʋ̃ɔ manɩ a, ɛ́ nɩsaal bɛ tɛr sɔr k’ʋʋ lɛb yel a. ⁵ A nɩr ŋa ƴãw a, ɩ̃ na zɛwr ɩ ɩ̃ tʋɔra. Ɛ cɛ, mãa a, a ɩ̃ bãbaalʋ ƴãw n’a ɩ̃ na zɛwr ɩ̃ tʋɔra. ⁶ Bʋ̃ʋ pãa ɩ? Mãa tɩ bɔbr k’ɩ̃ɩ zɛwr ɩ̃ tʋɔra a, a kʋ̃ʋ ɩ yãyaar a ɩ, a nãá ɩ n yel-mɩŋa tɛwr ɩ̃ yere, ɛ cɛ ɩ̃ bɛ ɩrɛ a lɛ ɩ, ɩ̃ na bɛ bɔbr kɛ́ bɛ tɛr tɩɛrʋ a ɩ̃ ƴãw, ʋ zuo a lɛ bɛ na nyɛ̃ m ɩ̃ ɩrɛ a, bɩɩ ʋ zuo a lɛ bɛ na wone ɩ̃ yere a ɩ. ⁷ Ɛ a yele a ŋa bɛ na wul mɛ̃ ɩ̃ nyɛ̃ a, a na tɩ ɩ nɔ-ɓãa-yele a zũú n’a, bɛ ƴãw ’wɔbrʋ kãw a ɩ̃ ƴãgánɩ́, Sɩtaana malkɩ bɛ na ƴãw k’ʋʋ ŋmɩɛr mɛ̃ k’ɩ̃ɩ taa wa nanɩ zɛwr ɩ̃ tʋɔra a. ⁸ Gb’a ata za n’a ɩ̃ zɛlɩ a Sore k’ʋʋ ír a ’wɔbrʋ ŋa bɛr mɛ̃. ⁹ Ɛ cɛ ʋ tɩ yel mɛ̃ na: «A ɩ̃ maalʋ sɛw fʋ na, a bãbaalʋ pʋɔ n’a a ɩ̃ fãw mɩ́ sãá ʋ za bɛ nyɛ̃.» Lɛ so ɩ̃ na nɩ̃ɛ zɛwr ɩ̃ tʋɔra a ɩ̃ bãbaalʋ ƴãw, k’aa Kɩrɩta fãw tʋ̃ɔ be a ɩ̃ zie. ¹⁰ Lɛ zũú n’a nʋ̃ɔ̀ cãa kpɩɛr mɛ̃ a bãbaalʋ, a zʋmɛ nɩ a yel-fɛrɩ pʋɔ, a dɔwrʋ nɩ a pʋl-vʋ̃ɔ pʋɔ, ɩ̃ na saw de a Kɩrɩta a ƴãw. Bʋ̃ʋ n’ʋ vɛ̃, a lɛn daar ɩ̃ na mɩ́ ɩ bãbaal a, lɛn daar a, ɩ̃ mɩ́ kpɛmɛ. ¹¹ Mãa n’ɩ ŋan ƴɛrɛ yãya-ƴɛrʋ, ɛ cɛ nyɩmɛ nɛ bɛ fɛr mɛ̃ ƴãw. Nyɩmɛ nɛ bɛ a tɩ sɛw kɛ́ nyɩ manɛ a ɩ̃ ɩ-vɩɛlɩ. Bʋ̃ʋ n’ʋ vɛ̃, ɩ̃ na saa bɛ ɩ nɩr a, a nɩ-ton-kazawr bɛ ŋa kãw za bɛ zuo mɛ̃ bom kãw za ƴãw ɛ. ¹² A yele al na wul k’ɩ̃ɩ ɩ n nɩ-tona a, maal ɩ a nyɩ sɔgɔ nɩ tʋɔra nyɔwfʋ na vɩɛl bɛ cɛ a: yele na ɩ bãwfʋ sãá a, yel-bãw-guuri nɩ nɔ-ɓãa-yele. ¹³ Bʋ̃ʋ n’ʋ a Lãw-yie al na cɛ a tɛr zuo nyɩ? Alɛ bɛ ɩ ɩ̃ na bɛ ƴãw nyɩ hanɩ a ɩ̃ ƴãw a? Nyɩ dɩ suur kʋ̀ m a yel ŋa na bɛ tu sɔr a ƴãw. ¹⁴ Mãa n’ɩ ŋan cɔbrɩ a nyɩ zie waa baarɩ, ɩ̃ na na wa a gb’a ata sob a, ɛ cɛ ɩ̃ cãa kʋ̃ ƴãw nyɩ hanɩ a ɩ̃ ƴãw ɛ. Bʋ̃ʋ n’ʋ vɛ̃, a nyɩ bʋ̃-tɛrɩ bɛ n’a ɩ̃ bɔbr ɛ, a nyɩɩm tɛɛ za n’a ɩ̃ bɔbr. Bibiir bɛ nɛ bɛ a fɛrɛ kɛ bɛ bɔbr bine a dɔwrbɛ ƴãw ɛ, dɔwrbɛ nɛ bɛ a fɛr kɛ bɛ ɩrɛ a lɛ a bibiir ƴãw. ¹⁵ Ɛ mãa a, mãa saa na sãw a ɩ̃ bʋ̃-tɛrɩ za bɛr a nyɩ ƴãw a, ɛ de ɩ̃ tʋɔra za tɩr a nyɩ ƴãw a, nʋ̃ɔ̀ na kpɩɛr mɛ̃ na. Mãa wa nɔnɛ nyɩ sɛw a ŋa a, nyɩ na saw na bɛ nɔ̃w mɛ̃ man a lɛ bɩɩ? ¹⁶ A na ɩ lɛ a, nyɩ saw na kɛ́ nyɩ bɛ hanɩ a ɩ̃ ƴãw ɛ. Ɛ cɛ bɛ na yel a k’ɩ̃ɩ na ɩ nɩ-bɛlɛ a, kɛ́ yã n’a ɩ̃ maalɩ nyɔw nɩ nyɩ. ¹⁷ A nɩbɛ bɛl ɩ̃ na tõ a nyɩ zie a, ɩ̃ ƴãw nɩ bɛ kãw nɛb nyɩ a ɩ̃ ƴãw bɩɩ? ¹⁸ Ɩ̃ zɛlɩ nɩ yãayãa k’aa Títɩ̀ wa a nyɩ zie, ɛ ɩ̃ tõ ʋ na ʋlɛ nɩ a yɛb ʋl ƴɛrʋ ɩ̃ na ƴɛr a. A Títɩ̀ nɛb nyɩ na bɩɩ? Yã-been bɛ n’ʋ mãa nɩ a ʋl tɩ tɛr vʋʋr ɩ a nyɩ zie ɩ? Sɔr-been bɛ n’ʋ tɩ tu ɛ? ¹⁹ A mɩnɛ kãw, nyɩ tɩɛrɛ nɩ koro za, kɛ tɩ bɔbr a kɛ tɩ manɩ a tɩ yel-mɩŋa a nyɩ niŋé. Lɛ bɛ n’a ɩ, Naaŋmɩn niŋé n’a tɩ lãw nɩ a Kɩrɩta ƴɛrɛ. Ɛ a a ŋa za a, ɩ̃ nɩ-nɔnɩ ɩ, a nyɩ maalʋ ƴãw n’a. ²⁰ Ɩ̃ zɔrɛ nɩ dɛ̃bɩ̃ɛ ɩ̃ nãà wa ta a nyɩ zie nyɛ̃ nyɩ, nyɩ bɛ ŋmɛ̃ a lɛ ɩ̃ na bɔbr a ɩ, ɛ́ nyɩ mɩ̀ nyɛ̃ m ɩ̃ bɛ ŋmɛ̃ a lɛ nyɩ na bɔbr a ɩ. Ɩ̃ zɔrɛ nɩ dɛ̃bɩ̃ɛ ɩ̃ nãa wa ta a nyɩ zie nyɛ̃ taw-taa nɩ nyuur, suur nɩ cier-taa, tʋ-taa nɩ zu-yel-taa, nyʋʋr nɩ damnʋ a. ²¹ Ɩ̃ zɔrɛ nɩ dɛ̃bɩ̃ɛ ɩ̃ nãa lɛb wa a be, a ɩ̃ Naaŋmɩn wa ɩ ɩ̃ nyɛ̃ vĩ a nyɩ niŋé, ɛ a fɛr k’ɩ̃ɩ kõ a nyɩ yaga ƴãw a, a bɛl na dãw maalɩ a yel-bier ɛ bɛ lɩɛbɩ a bɛ ɩb so a bɛ dɛwr bɛr, ɛ́ bɛ zawrɩ a pɩ̃ɔ yele nɩ a faalʋ bɛr a.

¹ A gb’a ata sob ɩ a ŋa ɩ̃ na waar a nyɩ zie a. Mɛ̃ a lɛ a Sɛb-sõw na yel a: «Dãsɩɛ dem ayi bɩɩ ata ƴɛrʋ zũú n’a yel za na mɩ́ maalɩ.» ² Ɩ̃ tɩ dãw na yel, ɛ lɛ yel a lɛ ɩ̃ na tɩ wa nyɛ̃ nyɩ a gb’a ayi sob a, ɛ a dɩ̃a ɩ̃ na bɛ ka a nyɩ sɔgɔ a, ɩ̃ lɛb a yere kʋ̀rɛ a bɛlɩ dem na tɩ dãw maalɩ a yel-bier a, nɩ a bɛl za na cɛ a: mãa wa lɛb wa a nyɩ zie a, ɩ̃ kʋ̃ ɩrɛ a nyɩ zie nɩ mimi-ɓaar ɛ, ³ mɛ̃ nyɩ taa bɔbr k’ɩ̃ɩ wul k’aa Kɩrɩta ƴɛrɛ nɩ a ɩ̃ zie! A nyɩ ƴãw a, ʋ bɛ ɩ bãbaal ɛ, ʋ mɩ́ wul ɩ a ʋ fãw a sãá a nyɩ sɔgɔ. ⁴ Sɩza n’a, ʋ tɩ ɩ n bãbaal a lɛn daar bɛ na tɩ kpa ʋ a da-gara zu a, ɛ cɛ Naaŋmɩn fãw ɩ na ʋ vʋʋrɛ. Ɛ a tɩɩm na lãw nɩ ʋ a, tɩ mɩ̀ ɩ n bãbaalbɛ, ɛ cɛ tɩ na wul nyɩ na a sãá, a Naaŋmɩn fãw na ɩ na tɩ lãw nɩ ʋ ɩ nɩ-vʋʋrɩ. ⁵ A nyɩɩm tɛɛ za, nyɩ ɩ nyɩ tʋɔra kaa, nyɩ jɛl nyɩ mɩŋa nyɛ̃, nyɩmɛ wa be a Naaŋmɩn saw-deb pʋɔ a. Mɛ̃ nyɩ taa nyɛ̃ bãw kɛ a Yeezu Kɩrɩta be n a nyɩ sɔgɔ? Bɩɩ nyɩ jɛl ɩ a nyɩ tʋɔra kaa nyɛ̃ nyɩ sãw? ⁶ Ɩ̃ tɩɛr a kɛ́ nyɩ na nyɛ̃ na bãw kɛ́ tɩ bɛ guu ɛ. ⁷ Tɩ puore na kɛ́ Naaŋmɩn ta saw nyɩ maalɩ yel-faa kãw za ɩ. Tɩ bɛ bɔbr kɛ tɩ ɩ a lɛ wul tɩ na bɛ guu a ɩ, tɩ bɔbr a kɛ tɩ nyɛ̃ nyɩ, nyɩ ɩrɛ a vla, alɛ saa sãá mɛ̃ tɩ guu na a. ⁸ Bʋ̃ʋ n’ʋ vɛ̃, tɩ kʋ̃ tʋ̃ɔ ɩ bom za sãw a yel-mɩŋa ɩ, ʋl tɛwr ƴãw n’a tɩ na tʋ̃ɔ ɩ bom. ⁹ Tɩ mɩ̀ cɩlɛ na, tɩ na mɩ wa ɩ bãbaalbɛ ɛ cɛ nyɩ tɛr fãw a. Lɛ so tɩ mɩ́ puore kɛ́ nyɩ vɩɛl bɛ cɛ ɩ. ¹⁰ Alɛ n’a so ɩ̃ zãá nɩ nyɩ ɛ sɛbr nyɩ a yel ŋa; ɩ̃ bɛ bɔbr k’ɩ̃ɩ wa ta mʋ̃ɔ mimir ƴãw nyɩ ɛ, mɛ̃ a lɛ a Sore na kʋ̀ m a fãw a ɩ. A nyɩ maalʋ ƴãw n’a ʋ kʋ̀ m a fãw ŋa, a nyɩ loba ƴãw bɛ n’a ɩ. ¹¹ Ƴɛrɛ ŋa a, yɛbr ɩ, nyɩ cɩlɛ, nyɩ ƴãw fãw ɩrɛ kɛ́ nyɩ vɩɛl tɩ tɔ, nyɩ kpaalɛ taa, nyɩ lãw-taa tɩɛrʋ, nyɩ tɛr a ƴã-ɓaarʋ, ɛ a nɔ̃wfʋ nɩ a ƴã-ɓaarʋ Naaŋmɩn na be n a nyɩ zie. ¹² Nyɩ nyɔw taa weri pùori taa mɛ̃ yɛbr a. A Kɩrɩta-biir za puore nyɩ na. ¹³ A Sore Yeezu Kɩrɩta maalʋ, a Naaŋmɩn nɔ̃wfʋ nɩ a lãw-taa na yi a Vʋʋrʋ Sõw zie a, a be a nyɩ za zie.