1 TIMOTE
11 A mãa Pol, a Naaŋmɩn tɩ Faarɛ nɩ a tɩ tɩɛrʋ-nɩr Kɩrɩta Yeezu, na ƴãw ɩ̃ ɩ a Kɩrɩta Yeezu nɩ-tona a, 2 mãa n’ʋ sɛbr a fʋ̃ʋ Timote, na sɩrɩ ɩ a ɩ̃ bie a Naaŋmɩn-saw-deb pʋɔ a. A Naaŋmɩn tɩ Sãà nɩ a Kɩrɩta Yeezu tɩ Sore, bɛ kʋ̀ b maalʋ nɩ su-ɓaarʋ nɩ ƴã-ɓaarʋ. 3 Mɛ̃ a lɛ ɩ̃ na tɩ yel kʋ̀ b ɛ cere a Masedʋan a, kpɩɛr a Efɛɛzɩ tẽw be, tʋ̃ɔ mɩ́ yel kʋ̀ a bɛ mɩnɛ kãw, kɛ́ bɛ ta wule wul-yoru a nɩbɛ ɩ, 4 kɛ́ bɛ bɛr a suolu a ŋa nɩ a sãakʋm mɩnɛ dɔw-tu-taa na bɛ tɛr tɛwfʋ zie a manʋ; a waar ɩ nɩ nɔkpɛn tɛwr, ɛ́ bɛ sõwne a Naaŋmɩn pʋ-tɩɛrʋ bãwfʋ na mɩ́ tu a ʋ tub a saw-deb pʋɔ a ɩ. 5 Yel a a ŋa, k’aa nɩbɛ tʋ̃ɔ tɛr nɔ̃wfʋ na yi soci-pla parpar pʋɔ a, nɩ tɩɛr-vla nɩ Naaŋmɩn-saw-deb na tori dẽdẽ a pʋɔ. 6 Bɛ mɩnɛ na bɛr a sɔr ŋa a, a bɛ ƴɛr-foli bɔr ɩ bɛ na. 7 Bɛ mɩ́ yel a kɛ a Naaŋmɩn Wulu-bãw-bãw-karɩ nɛ bɛ, zɩ̃ kɛ bɛ bɛ bãw bom nɛ bɛ na yere a ɩ, nɩ bom nɛ ƴɛrʋ bɛ na ƴɛrɛ mɩrɛ nɩ zu a ɩ. 8 Tɩ bãwnɩ a na, a Naaŋmɩn-Wulu vɩɛl a, tɩmɛ wa de ʋ ɩrɛ nɩ mɛ̃ a lɛ ʋ na wul a. 9 Tɩ bãw a yel ŋa pɛr vla: nɩ-mɩŋa ƴãw bɛ n’a a Naaŋmɩn-Wulu be ɩ; bɛ-wonbɛ nɩ nɩ-gaarɩ ƴãw n’a, nɩbɛ na bɛ zɔrɛ Naaŋmɩn a, nɩ yel-bier maalbɛ, bɛlɩ dem na bɛ ƴãwnɛ Naaŋmɩn nɩ a bʋ̃-son a ƴãw n’a, sãà-kʋ́rbɛ nɩ mã-kʋ́rbɛ, nɩ-kʋ́rbɛ, 10 pɩ̃ɔ yel-maalbɛ, dɛb-bɛrɛ na gánɛ nɩ dɛbli a, nɩbɛ na kʋɔrɛ gbãgbaar a, zir-ŋmarbɛ ƴãw n’a, nɩbɛ na mɩ́ pɔ ɛ bɛ ír a bɛ pɔɛ a ƴãw n’a, nɩ bom za na bɛ tu a wul-vla a. 11 A wulu ŋa be n a Yel-nʋ̃ɔ̀ bɛ na kʋ̀ m a pʋɔ; a Yel-nʋ̃ɔ̀ ŋa yi n a yúor-vɩɛlʋ-danʋ Naaŋmɩn zie, ʋl na ɩ a nʋ̃ɔ̀ yib zie a. 12 Barka yaga za n’a ɩ̃ puore a sob ŋa na kʋ̀ m a fãw a, a tɩ Sore Kɩrɩta Yeezu: ʋ bɛr ɩ tɩɛrʋ a ɩ̃ ƴãw, ɛ de m ɩ̃ tone a ʋ tome, 13 a mãa na tɩ dãw sãwnɛ a ʋ yúor, dɔwrɛ ʋ ɛ tʋʋr ʋ a. Bɛ-bãwfʋ n’a tɩ so a a ŋa za ɩ̃ na tɩ ɩrɛ a, a Naaŋmɩn-saw-deb bɛ tɩ be a ɩ̃ zie ɩ. Ɛ cɛ, a Naaŋmɩn zɔ n ɩ̃ nɩbaalʋ. 14 Sɩza, a tɩ Sore maalʋ siw nɩ a ɩ̃ zu yaga za, lãw nɩ a Naaŋmɩn-saw-deb nɩ a nɔ̃wfʋ na be a Kɩrɩta Yeezu pʋɔ a. 15 A ƴɛrʋ na bɛ tɛr bʋnʋ towtow, ɛ sɛw kɛ́ nɩbɛ za saw de daadaa a n’ɩ ŋa: a Kɩrɩta Yeezu wa n a tẽ-daa zu k’ʋʋ wa faa a yel-bebe dem, ɛ mãa n’ʋ kpɛ faa zuo bɛ za. 16 Ɛ cɛ, Naaŋmɩn zɔ n a ɩ̃ nɩ-baalʋ, k’aa Kɩrɩta Yeezu tʋ̃ɔ de niwn tĩ a ɩ̃ zie, mãa na kpɛ faa zuo a nɩbɛ za a, wul a ʋ su-bɛ-páwra ɩb za, a sãá ɩ bãwfʋ a bɛlɩ dem za nãá wa saw de a Naaŋmɩn, kɛ́ bɛ tʋ̃ɔ páw a nyɔ-vʋʋrʋ na be kʋra lɛ a. 17 A yome za Nãa, a Naaŋmɩn been yõ tẽtẽ na bɛ tɛr kũu daar, ɛ́ nɩr kʋ̃ tʋ̃ɔ nyɛ̃ nɩ mimir a, ʋlɛ so ƴãwfʋ nɩ yúor-vɩɛlʋ-danʋ, a yome yome za. Amɛn. 18 Ɩ̃ bie Timote e, a wulu n’ɩ ŋa ɩ̃ na kʋ̀rɛ fʋ tu n a Naaŋmɩn-ƴɛr-manbɛ ƴɛr-bie bɛ na tɩ dãw ƴɛr a fʋ ƴãw a. A ƴɛr-bie a ŋa a, a ɩ fʋ kpɛmɛ tʋ̃ɔ zɛb a zɛb-vla, 19 nɩ Naaŋmɩn-saw-deb nɩ tɩɛr-vla. Bɛ mɩnɛ zawr ɩ a bɛ tɩɛr-vla ŋa tub, a bɛ Naaŋmɩn-saw-deb tu kʋ̃ɔ. 20 Imene nɩ Alɛsãdɩr pʋɔ nɩ a nɩbɛ bɛ ŋa pʋɔ; ɩ̃ de bɛ na ƴãw Sɩtaana nuru pʋɔ kɛ́ bɛ zànɩ yã, taa lɛb tʋʋr Naaŋmɩn zʋm ɛ.
21 A yele za pʋɔ a, ɩ̃ zɛlɛ na kɛ́ bɛ mɩ́ de niwn tɛr zɛlʋ puoru, yãayãa zɛlʋ nɩ barka puoru a nɩsaalbɛ za ƴãw, 2 a na-mɩnɛ nɩ a bɛlɩ dem za na dɩ nɩ-kpɛ̃ɛnʋ a ƴãw: kɛ̀ tɩ taa nyɛrɛ damnʋ ɛ, ɛ tɛr ƴã-ɓaarʋ a tɩ nyɔ-vʋʋrʋ pʋɔ, ƴãwnɛ a Naaŋmɩn ɛ tɛr ɩb na sɛw taa nɩ a. 3 A ŋa n’a vɩɛl ɛ pɛlɩ a Naaŋmɩn tɩ Faarɛ pʋɔ, 4 ʋl na bɔbr kɛ a nɩsaalbɛ za tʋ̃ɔ nyɛ̃ a faafʋ, ɛ páw a yel-mɩŋa bãw a. 5 Bʋ̃ʋ n’ʋ vɛ̃, Naaŋmɩn been yõ n’ʋ be, lɔ̃lʋɔrɛ been yõ n’ʋ mɩ̀ be, a Naaŋmɩn nɩ a nɩsaalbɛ cará: ʋlɛ n’ɩ a Kɩrɩta Yeezu na ɩ nɩsaal a, 6 ʋlɛ n’ʋ de ʋ tʋɔra tɩr k’ʋʋ ya de a nɩsaalbɛ za. A daar na wa ta a, ʋ dɩ n a dãsɩɛ ŋa 7 bɛ na ír mɛ̃ k’ɩ̃ɩ hiere yere, ɛ ɩ a nɩ-tona a, ɛ ɩ a nɩ-bʋʋr-yoru wul-wule, kɛ́ bɛ tʋ̃ɔ saw de a Naaŋmɩn ɛ bãw a yel-mɩŋa a. Yel-mɩŋa n’a ɩ̃ yere, ziri bɛ n’a ɩ. 8 Lɛ so, ɩ̃ bɔbr kɛ a ziir za, a dɛbr mɩ́ zɛw nũ-vɩɛlɩ cɔw a salom ɛ puore, ɛ bɛr a suur nɩ a taw-taa. 9 Ɩ̃ mɩ̀ bɔbr a k’aa pɔwbɛ mɩ́ su suuru na sɛw taa nɩ a, ɛ ƴãw a pɩɛmɛ a man: ta ’lẽ zu tɩ ƴãw bʋ̃-ƴãwnɩ ɛ, ta ƴãw salmɛ̃ tokpamɛ bɩɩ lɛw-vɩɛlɩ ɛ, ta su dɛpaal-kpar-vɩɛlɩ vɩɛlɩ ɛ. 10 Ɛ cɛ a bɛ ɩ-vɩɛlɩ, a nɩ̃ɛ mɩ́ ɩ a bɛ pɩɛmɛ, mɛ̃ a lɛ a na sɛw taa nɩ pɔwbɛ na yel kɛ bɛ ƴãwnɛ nɩ Naaŋmɩn a. 11 A fɛr a kɛ a pɔw mɩ́ saw bom za ɛ zɩ̃ gbili a wulu daar. 12 Ɩ̃ bɛ sawr kɛ pɔw wule nɩbɛ ɩ, bɩɩ ʋ dɩrɛ nɩ-kpɛ̃ɛnʋ a dɛb zu ɛ. A na ɩ a ŋa a, a pɔw, ʋ mɩ́ zɩ̃ gbili. 13 Bʋ̃ʋ n’ʋ vɛ̃, Adama n’ʋ bɛ de niwn ír, ɛ wa ír a Awa a pùorí. 14 Ɛ Adama bɛ n’ʋ bɛ bɛlɩ nyɔw ɛ, a pɔw n’ʋ bɛ bɛlɩ nyɔw ʋ zawrɩ a Naaŋmɩn nʋɔr. 15 Ɛ cɛ ʋlɛ wa dɔw bibiir a, ʋ na nyɛ̃ nɩ faafʋ, ʋlɛ wa sɩrɩ saw be a Naaŋmɩn-saw-deb pʋɔ, a nɔ̃wfʋ nɩ a sonu pʋɔ nɩ tʋɔra siwru a.
31 A ƴɛrʋ ŋa ɩ n sɩza: nɩr wa bɔbr k’ʋʋ tone a Lãw-yir kaafʋ tome a, ton vla n’ʋ ʋ bɔbr. 2 A lɛ ƴãw, a fɛr a kɛ a Lãw-yir-kaarɛ ta tɛr sãwna bɛ yere ɩ, ʋ kul pɔw been yõ, ɛ́ mɩ́ nyɔw ʋ tʋɔra a dɩb nɩ a nyub ƴãw, ʋ bãw yã, ɛ bãw ʋ tʋɔra maal-tɛrʋ, ʋ nɔnɛ a sãanbɛ tɛrʋ, ɛ́ ɩ nɩr na na tʋ̃ɔ wule a nɩbɛ a; 3 ʋ ta ɩ dã-nyuure ɩ, ɛ ta ɩ nɔ-haa-bɔbrɛ ɩ. Ʋ ɩ nɩsaal baalʋ, ʋ ta ɩ zɛb-ŋmarɛ nɩ libi-nɔ̃wnɛ ɩ. 4 Ʋ bãw a ʋ mɩŋa yir kaafʋ, ɛ ɩ a ʋ bibiir bɛ ɩ nɔ-sawrbɛ na ƴãwnɛ ʋ yaga za a. 5 Bʋ̃ʋ n’ʋ vɛ̃, nɩr na bɛ bãw a ʋ mɩŋa yir kaafʋ a, ŋmɩŋmɩn za n’a ʋ na tʋ̃ɔ kaa Naaŋmɩn Lãw-yir zie? 6 Ʋ ta ɩ nɩr na saw de Naaŋmɩn paalʋ a ɩ, alɛ bɛ ɩ lɛ, ʋ nãa ɩrɛ nɩ pɔ̀lʋ tɩ nyɛ̃ nɩ dɔwrʋ mɛ̃ a Gɛgɛra a. 7 Ɛ lɛ waar mɩ̀, a fɛr a kɛ a yẽw dem dɩrɛ dãsɩ-vla a ʋ ƴãw, lɛ n’a a nɩbɛ kʋ̃ ɩrɛ ʋ laar ɛ, ɛ ʋ kʋ̃ kpɛ a Gɛgɛra bɛrɩ pʋɔ ɩ. 8 A dɩakɩr mɩnɛ mɩ̀ a, a sɛw na kɛ́ bɛ ɩ nɩbɛ na ƴãwnɛ bɛ tʋɔra a, bɛ ta tɛr ƴɛr- nɛɛ ayi ɛ, ta nɔnɛ dãa ɩ, ɛ ta tu tɛra na waar ɩ vĩ a pùor ɛ; 9 Bɛ maal tɛr a Naaŋmɩn-saw-deb yel-sɔwla tɩɛr-vla pʋɔ. 10 A fɛr a kɛ́ bɛ mɩ́ de niwn ɩ bɛ kaa, bɛlɛ bɛ wa nyɛ̃ yel-faa kãw za a bɛ zie a, bɛ na tʋ̃ɔ na tone a dɩakɩr tome. 11 A bɛl na ɩ a pɔwbɛ a, a mɩ̀ sɛw na kɛ bɛ ƴãwnɛ bɛ tʋɔra; bɛ ta manɛ a nɩbɛ yel-faar ɛ, ɛ mɩ́ nyɔw bɛ tʋɔra a dɩb nɩ a nyub ƴãw, ɛ tu a yele za vla taa lɛbr pùor ɛ. 12 A dɩakɩr mɩnɛ, bɛ kul pɔw be-ƴẽni ɛ kaarɛ a bɛ bibiir nɩ a bɛ yir zie vla. 13 A bɛlɩ dɩakɩrɩ na tone a bɛ tome vla a, bɛ mɩ́ nyɛrɛ nɩ ƴãwfʋ a nɩbɛ za zie, ɛ mɩ́ ɓãa ƴãw ƴɛrɛ a saw-deb na ɩ tɩ lãw nɩ a Kɩrɩta Yeezu a ƴɛrʋ. 14 Ɩ̃ sɛbr ɩ a a ŋa kʋ̀rɛ fʋ, tɩɛrɛ nɩ kɛ ka nɩ blã a, ɩ̃ na wa na wa páw fʋ. 15 Ɛ cɛ, mãa wa ɩ mɛ̃ ɩ̃ kɔwrɛ na a, fʋ na bãwnɩ a lɛ a na sɛw kɛ fʋ ɩrɛ a Naaŋmɩn yir pʋɔ na ɩ a Naaŋmɩn na vʋʋrɛ a Lãw-yir a, a Lãw-yir ŋa na ɩ a yel-mɩŋa kpul ɛ tɩɛ a yel-mɩŋa tɛr a. 16 Yel-mɩŋa sɩza, bʋnʋ bɛ ka be ɩ, a tɩ Naaŋmɩn-saw-deb yel-sɔwla ɩ n kpɛ̃ɛ. A Kɩrɩta wa na mɛ̃ nɩsaal a, Vʋʋrʋ Sõw wul a a sãá k’ʋʋ ɩ n nɩ-mɩŋa, malkɩ mɩnɛ nyɛ̃ ʋ na, bɛ hier a yel a ʋ yele a nɩ-bʋʋr-yoru zie, yaga saw na de a ʋ yele a tẽ-daa zu, bɛ zɛw ʋ na do n a sa-zu yúor-vɩɛlʋ-danʋ pʋɔ.
41 A Vʋʋrʋ yel ɩ a ŋa cãamɩ́ lɛ: a yele za baarʋ vuo pʋɔ a, bɛ mɩnɛ na zawr ɩ a Naaŋmɩn-saw-deb bɛr, ɛ tuur bɛl-bɛlbɛ dier ɩ wulu na yi kɔ̃tɔmɛ zie a. 2 A zir-ŋmarbɛ na mɩ́ sɔwlɛ a bɛ pʋ-tɩɛrʋ a, na taw bɛ na bɔr ɩ, a zir-ŋmarbɛ bɛ ŋa tɩɛrʋ bɛ na cɩr bãwfʋ ƴãw nɩ kure na mʋ̃ɔ vũùmí a. 3 A nɩbɛ bɛ ŋa na diwr ɩ a kul-taa bɛrɛ, ɛ yel kɛ a bʋ̃-dɩrɩ a mɩnɛ ciir a. Ɛ cɛ Naaŋmɩn ír a na, kɛ a bɛlɩ dem na saw de ʋ a, bɛl na bãw a yel-mɩŋa a, bɛ mɩ́ dɩrɛ a puore nɩ ʋ barka. 4 Bʋ̃ʋ n’ʋ vɛ̃, bom za Naaŋmɩn na ír a, ɩ n bʋ̃-vla, ɛ bom za bɛ ɩ bʋ̃-ciira ɩ, bɛlɛ wa dier ʋ puore nɩ Naaŋmɩn barka a. 5 A Naaŋmɩn ƴɛrʋ nɩ a puoru mɩ́ ɩ na ʋ lɩɛbɩ bʋ̃-sõw. 6 Manɩ a a ŋa za kʋ̀ a yɛbr, lɛ n’a fʋ na ɩ a Kɩrɩta Yeezu tõ-tõ-bi-vla, a Naaŋmɩn-saw-deb ƴɛr-bie nɩ a wul-vla na guoli a, a wul-vla ŋa pùor fʋ na tu a. 7 A suolu al na bɛ tu a Naaŋmɩn-saw-deb ɛ ɩ dãbol-ƴɛrʋ a, zawr a bɛr. Nɩ̃ɛ ƴãw fãw ƴãwnɛ a Naaŋmɩn. 8 A ƴãgan bɛ na mɩ́ damnɛ k’ʋʋ kpɛmɛ a, a mɩ́ tɛr ɩ yel-ɩra yel-pʋrɩ ƴãw; ɛ cɛ a Naaŋmɩn fʋ na zɔrɛ a, a tɛr yel-ɩra a yele za ƴãw. A nyɔ-vʋʋrʋ a Naaŋmɩn na ƴãw a nʋɔr k’ʋʋ na tɩr a a, a ƴɛrɛ ŋa nyɔ-vʋʋrʋ nɩ a nɩdaar nyɔ-vʋʋrʋ, Naaŋmɩn fʋ na ƴãwnɛ a pʋɔ n’a a be. 9 A ƴɛrʋ ŋa ɩ n sɩza, ɛ sɛw kɛ nɩr za saw de ʋ sɩza. 10 Bʋ̃ʋ n’ʋ vɛ̃, tɩmɛ wa hanɛ ɛ mʋɔr a, tɩ na ƴãw a tɩ tɩɛrʋ a Naaŋmɩn na vʋʋrɛ a ƴãw a n’a so, ʋl na ɩ a nɩsaalbɛ za faarɛ a, baa zuo a za a bɛl na saw de ʋ a. 11 Kpaalɛ ɛ wule a yele a ŋa za. 12 Nɩr za ta ɩrɛ fʋ laar fʋ na ɩ pɔl-bile a ƴãw ɩ. Nɩ̃ɛ ɩ a bɛlɩ dem na saw de a Naaŋmɩn a cɔwrɛ fʋ, a fʋ ƴɛrʋ pʋɔ, a fʋ cenu pʋɔ, a fʋ nɔ̃wfʋ pʋɔ, a fʋ Naaŋmɩn-saw-deb pʋɔ, a fʋ vɩɛlʋ pʋɔ. 13 Tori niwn kanɛ a Sɛb-sõw kʋ̀rɛ a nɩbɛ, kpaalɛ bɛ, wule bɛ gùre nɩ a ɩ̃ waa daar. 14 Maal tɛr a Vʋʋrʋ Sõw maalʋ fʋ na páw a, Naaŋmɩn-ƴɛr-manbɛ ƴɛr-bie n’a ɩ fʋ páw ʋ, nɩ a nɩ-kore lãw nɩbɛ na tɩ ír nuru dɔwlɩ a fʋ zu a. 15 Kaarɛ a a ŋa za zie nɩ fʋ pʋɔ za, ɛ ƴãw fãw a al ƴãw. Lɛ n’a a nɩbɛ za na nyɛ̃ a fʋ yele na vɩɛl dɔwlɛ a. 16 Gu fʋ tʋɔra vla ɛ mɩ̀ gu a fʋ wulu vla. Su zu a al ƴãw. Fʋ̃ʋ wa sɩrɩ ɩrɛ a a ŋa a, fʋ na faa nɩ fʋ mɩŋa lãw nɩ a bɛlɩ dem na bɛrɛ wone a fʋ wulu a.
51 Dɛb-nyãw wa sãw a, ta yere ʋ tanɛ nɩ ʋ ɛ, ɛ cɛ kpaalɛ ʋ mɛ̃ fʋ sãà n’ʋ a. Ɩrɛ a pɔl-bili zie mɛ̃ yɛbr nɛ bɛ a, 2 a pɔw-bɛrɛ zie mɛ̃ mã mɩnɛ a, a pɔwsɩrali zie mɛ̃ yeepuuli a, nɩ tɩɛr-vɩɛlɩ tɛwr. 3 Ƴãwnɛ a pɔw-kɔbɛ, a bɛl na sɩrɩ bɛ tɛr nɩr a. 4 Pɔw-kʋɔr wa tɛr bibiir bɩɩ yãn a, bɛlɛ nɛ bɛ a fɛrɛ kɛ́ bɛ de niwn tɛr a Naaŋmɩn bɛ na ƴãwnɛ a ɩ-ɩrɩ, a bɛ mɩŋa yir ƴãw, ɛ maalɩ a bɛ dɔwrbɛ yaa a san. A ŋa n’a sɩrɩ vɩɛl a Naaŋmɩn zie. 5 Ɛ a pɔw-kʋɔr ʋl na sɩrɩ ɩ a pɔw-kʋɔr a, a ʋl na cɛ be ʋ yõ tẽtẽ a, ʋ ƴãw nɩ a ʋ tɩɛrʋ za a Naaŋmɩn ƴãw, ɛ ƴãw fãw lɔbr nuru puore mʋ̃tɔ̃w nɩ tɩ̃ɩsɔw za zɛlɛ nɩ a ʋ sõwfʋ. 6 Ɛ cɛ a ʋl na tɩɛrɛ a nʋ̃ɔ̀ wob tɛwr a, ʋlɛ saa cãa vʋʋrɛ a, ʋʋ kpi na. 7 A yele a ŋa n’a a fɛr kɛ fʋ kpaalɛ bɛ, bɛ ta tɛr sãwna bɛ yere ɩ. 8 Nɩr bɛ wa kaarɛ a ʋ nɩbɛ zie a, baa zuo a za a bɛl na kpɩɛr a ʋ yir pʋɔ a, ʋ zawr ɩ a Naaŋmɩn-saw-deb bɛr, ʋ kpɛ n faa zuo sob nɛ na bɛ tɛr a Naaŋmɩn-saw-deb a. 9 Pɔw-kʋɔr na bɛ tɛr yome lɩz’a ata nɩ dɔwlɛ, ɛ kul dɛb been a, a bɛ tɛr sɔr kɛ́ bɛ sɛb a ʋ yúor ƴãw a pɔw-kɔbɛ pʋɔ ɩ. 10 A fɛr a kɛ bɛ bãw ʋ, a ʋ ɩ-vɩɛlɩ zũú: ʋ na guoli bibiir a, ʋ na kaa sãanbɛ zie a, ʋ na pɛw a Kɩrɩta-nɩbɛ gbɛɛ a, ʋ na mɔwlɩ a bɛlɩ dem na be kpɩɛrʋ pʋɔ a, ʋ na ƴãw fãw tu ɩ-vɩɛlɩ za pùor a. 11 Ɛ a pɔw-kɔ-pɔ́lɛ́ a, ta ƴãw bɛ a pɔw-kɔbɛ lãw pʋɔ ɩ. Bʋ̃ʋ n’ʋ vɛ̃, a dɛb vʋla na mɩ́ wa taw bɛ zãá nɩ a Kɩrɩta a, bɛ mɩ́ bɔbr ɩ sɩr lɛb-kulu, 12 a ŋa n’a bɛ mɩ́ ɩ ƴãw a ƴɛrʋ-maalʋ lo a bɛ zu, bɛ na sãw a bɛ nɔ-dãw-niwn sob bɛ na ƴãw a bɛr a. 13 Ɛ lɛ waar mɩ̀, bɛ na bɛ tɛr yel-ɩra a, bɛ mɩ́ zɔrɛ na cɔlɛ a nɩbɛ yie. A bɛ kaar mɛ̃ yel-ɩra yõ n’a bɛ bɛ tɛr ɛ, bɛ nɔnɛ nɩ ƴɛrʋ ƴãw pʋɔ, nɩ yele na bɛ jɩrɛ bɛ a, ɛ bʋnɛ ƴɛrɛ sãsara lɛ. 14 A na ɩ a ŋa a, ɩ̃ bɔbr a kɛ a pɔw-kɔ-pɔ́lɛ́ mɩ́ lɛb kul sɩrbɛ dɔw bibiir, kɛ́ bɛ kaarɛ a bɛ yir zie, a tɩ dɔ̃ dem ta tʋ̃ɔ nyɛ̃ yel-faa kãw za yel ɛ. 15 Bʋ̃ʋ n’ʋ vɛ̃, bɛ mɩnɛ be n be tu a Sɩtaana bɔr baarɩ. 16 Pɔw na saw de Naaŋmɩn a, wa tɛr pɔw-kɔbɛ a ʋ nɩbɛ pʋɔ a, ʋ sõwne bɛ, a Lãw-yir ta so a bɛ kaafʋ ɛ, lɛ n’a a Lãw-yir na tʋ̃ɔ sõwne a bɛl na sɩrɩ ɩ a pɔw-kɔbɛ a. 17 A nɩ-kore na tone a nɩ-kpɛ̃ɛnʋ tome vla a, sɛwnɩ nɩ ƴãwfʋ gb’a ayi, baa zuo a za, a bɛl na hanɛ a Naaŋmɩn ƴɛrʋ ƴãw nɩ a wulu ƴãw a. 18 A Sɛb-sõw yel a: «A naab na varɛ a fʋ ci a, fʋ kʋ̃ ’lẽ a ʋ nʋɔr pàw ɛ», nɩ kɛ: «A tõ-tõ-bie sɛwnɩ nɩ a ʋ sã-ya.» A naab na varɛ a ci a (5.18). 19 Nɩbɛ ayi bɩɩ ata bɛ wa dɩ nɩ-kʋra sãwna dãsɩɛ a, fʋ̃ʋ taa sawr dier kɛ́ sɩza n’a ɩ. 20 Mɩ́ yel a sãwna dem sãwna a nɩbɛ za niŋé, kɛ́ a bɛl na cɛ a, tʋ̃ɔ zɔrɛ dɛ̃bɩ̃ɛ. 21 Ɩ̃ zɛlɛ fʋ nɩ yãayãa a Naaŋmɩn nɩ a Kɩrɩta Yeezu niŋé, lãw nɩ a malkɩ mɩnɛ a Naaŋmɩn na kaa ir a niŋé, tuur a nɛɛ a ŋa za ɛ ta owre a tub pʋɔ, maalɛ bɛ mɩnɛ ɛ sãwnɛ bɛ mɩnɛ a fʋ ɩ-ɩrɩ pʋɔ ɩ. 22 Ta zɛ̃zɛ̃ ír nuru dɔwlɩ nɩr kãw za zu kʋ̀ ʋ tõ-nʋɔr kãw a Lãw-yir pʋɔ ɩ, ta pʋɔ fʋ tɔ yel-bebe pʋɔ ɩ. Ɛ a fʋ̃ʋ mɩŋa a, ƴãw fãw tɛr a fʋ vɩɛlʋ. 23 Ta cãa nyuur kʋ̃ɔ tɛwr ɛ. Mɩ́ nyũ divɛ̃ blã, a fʋ pʋ-’wɔbɛ nɩ fʋ na bɛ mɩ́ yaa kɛ lo bàalʋ a ƴãw. 24 Nɩbɛ bɛ mɩnɛ be n be a bɛ yel-bebe mɩ́ sãá cãàmɩ́, ɛ́ bɛ bɛ maal ɩ bɛ a ƴɛrʋ sɛr ɛ; ɛ bɛ mɩnɛ a, a ƴɛrʋ maalʋ pùorí n’a a bɛ yel-bebe mɩ́ sãá cãàmɩ́. 25 Lɛ mɩ̀ n’a, a ɩ-vɩɛlɩ mɩ́ sãá nɩ cãàmɩ́, ɛ a al na saa bɛ mɩ́ sãá sɛr a, kʋ̃ tʋ̃ɔ sɔwlɩ gã ɩ.
61 A bɛlɩ dem za na ɩ gbãgbaar a, a fɛr a kɛ́ bɛ bãwnɩ a, a bɛ nɩ-bɛrɛ na sɛw nɩ ƴãwfʋ yaga za a, a Naaŋmɩn yúor nɩ a wulu ta nyɛ̃ zʋmɛ ɩ. 2 A bɛlɩ gbãgbaar nɛ a nɩ-bɛrɛ na saw de Naaŋmɩn a, bɛ ta yel kɛ bɛ na ɩ yɛbr a zũú, ɛ́ bɛ tɛr ƴãwfʋ a bɛ zie ɩ. Bɛ nɩ̃ɛ ƴãw fãw tone vla kʋ̀rɛ bɛ, bɛ na bãw kɛ nɩbɛ na saw de Naaŋmɩn nɩ yɛb-nɔnɩ nɛ bɛ bɛ tone kʋ̀rɛ a. A a ŋa n’a a fɛr kɛ fʋ wule ɛ kpaalɛ. 3 Nɩr wa wule wul-yũo a, ʋlɛ bɛ wa tu a tɩ Sore Yeezu Kɩrɩta ƴɛr-bi-vɩɛlɩ nɩ a wulu na tu a tɩ Naaŋmɩn ƴãwfʋ a, 4 a ʋ nyʋ̀ʋ́r ɩ na ʋ zɔ̃w. Ʋ bɛ bãw bom za ɩ, nɔkpɛn nɩ ƴɛr-foli bàalʋ nyɔw ʋ na. Alɛ n’a waar ɩ a nyuur, a taw-taa, a zʋmɛ, a tɩɛr-faar a tɔ sob ƴãw, 5 a nɔkpɛn-faa na bɛ tɛr baarʋ daar a yã-faar dem zie, na bɛ bãw a yel-mɩŋa ɛ tɩɛr kɛ a Naaŋmɩn ƴãwfʋ ɩ n tɔnɛ bɔb zie a. 6 Sɩza, a Naaŋmɩn ƴãwfʋ tɛr ɩ tɔnɛ yaga sob nɛ na saw tɛr a bom nɛ tɛwr ʋ na tɛr a zie. 7 Tɩ bɛ wa n bom za a tẽ-daa zu ɛ; lɛ mɩ̀ n’a, tɩ kʋ̃ tʋ̃ɔ de bom a tẽ-daa zu lɛb ɩ ɛ. 8 A na ɩ a ŋa a, tɩmɛ wa tɛr bʋ̃-dɩrɩ nɩ bʋ̃-suuri a, a na sɛw tɩ na. 9 Ɛ cɛ a bɛlɩ dem na bɔbr kɛ́ bɛ kpɛ naalʋ a, bɛ mɩ́ lo n a bɛlʋ pʋɔ, ɛ kpɛ dãbol-yel-bɔbrɩ na bɛ vɩɛl a bɛrɩ pʋɔ, a yel-bɔbrɩ a ŋa na lore a nɩsaalbɛ ɛ ɩrɛ bɛ bɔrɛ a. 10 A faalʋ za nyɩwr sɩrɩ n’ɩ a libi-nɔ̃w. Bɛ mɩnɛ na tu a pùor a, bɛ bɔr a zãá nɩ a Naaŋmɩn-saw-deb ɛ ƴãw bɛ tʋɔra kpɩɛrʋ yaga pʋɔ. 11 Fʋ̃ʋ a, Naaŋmɩn nɩr ɩ, zɔrɛ dɛrɛ a yele a ŋa. Tu a mɩnʋ pùor, a Naaŋmɩn ƴãwfʋ, a Naaŋmɩn-saw-deb, a nɔ̃wfʋ, a kanyir nɩ a su-baalʋ pùor. 12 Zɛbr a Naaŋmɩn-saw-deb zɛb-vla; ƴãw fãw páw a nyɔ-vʋʋrʋ na be kʋra lɛ a, a ʋ pawfʋ ƴãw n’a Naaŋmɩn bʋɔlɩ fʋ, a lɛn daar fʋ na hieri a fʋ Naaŋmɩn-saw-deb vla, yel-mɩn dem yaga niŋé a. 13 Ɩ̃ zɛlɛ fʋ nɩ a Naaŋmɩn niŋé, ʋl na kʋ̀rɛ nyɔ-vʋʋrʋ a bome za a, nɩ a Kɩrɩta Yeezu niŋé, ʋl na dɩ a dãsɩ-vla a Pɔ̃sɩ Pɩlatɩ niŋé, a Naaŋmɩn-saw-deb ʋ na hieri a pʋɔ a, ɩ̃ zɛlɛ fʋ na: 14 tɛr a Naaŋmɩn nɔ-ƴãwna vla, ʋ taa sãwnɛ ɩ, a ta lɛ tɛr nɩr ƴɛrʋ ɛ, ɛ gu a lɛn daar a tɩ Sore Yeezu Kɩrɩta na na lɛb wa a. 15 A ʋlɩ sob na na wul a Kɩrɩta a daar nãà wa ta a, ʋlɛ n’ɩ a Na-kpɛ̃ɛ been na ɩ zu-nʋ̃ɔ̀ sob a, a na-mɩnɛ za Nãa nɩ a sorbɛ za Sore, 16 a ʋl yõ na bɛ tɛr kũu daar a, ɛ kpɩɛr cãa na bɛ tɛr tab a pʋɔ a, ʋl nɩsaal kãw za na bɛ nyɛ̃ ɛ kʋ̃ tʋ̃ɔ nyɛ̃ a. Ʋlɛ so ƴãwfʋ nɩ kpɛnʋ kʋra lɛ. Amɛn. 17 Yel kʋ̀ a tẽw ŋa zu tɛra dem, kɛ́ bɛ ta zɛwr bɛ tʋɔra ɩ, kɛ́ bɛ ta ƴãw a bɛ tɩɛrʋ a na-bome a ŋa na na tɔl a ƴãw ɛ, kɛ́ bɛ ƴãw a bɛ tɩɛrʋ Naaŋmɩn ƴãw, ʋl na kʋ̀rɛ tɩ bʋ̃-vɩɛlɩ za bɛ dɩ vuo kɛ́ tɩ wone nɩ nʋ̃ɔ̀ a. 18 Yel kʋ̀ bɛ kɛ́ bɛ maalɛ a vla, ɛ kpɛ ɩ-vɩɛlɩ naalʋ, kɛ́ bɛ saw tɩrɛ yaga ɛ pone a bɛ bome kʋ̀rɛ a bɛ taabɛ. 19 Lɛ n’a bɛ na páw na-bʋ̃-vɩɛlɩ na kʋ̃ sãw a gbõ taa, a bɛl mɩŋa ƴãw a nɩdaar ƴãw, kɛ́ bɛ wa tʋ̃ɔ páw a nyɔ-vʋʋrʋ tɔr za. 20 Fʋ̃ʋ Timote e, maal tɛr a bom bɛ na kʋ̀ b a; gùr pùor cɔw a ƴɛr-zawlɛ na bɛ tu Naaŋmɩn-saw-deb a, mɩ̀ gur pùor cɔw a nɔkpɛn, a bɛlɩ dem na yel kɛ bɛ bãw na a, na mɩ́ ŋmɩɛr a. 21 Bɛ mɩnɛ na tu a bãwfʋ ŋa tɔ pùor a, bɛ bɔr a zãá nɩ a Naaŋmɩn-saw-deb. A Naaŋmɩn maalʋ, ʋ be a nyɩ zie!