1 TESALONIKI

1 TESALONIKI

¹ A mãa Pol, nɩ Sɩlvɛ̃, de nɩ a Timote, tɩ tɩrɛ nɩ a sɛbɛ ŋa kʋ̀rɛ a nyɩɩm Tesaloniki tẽw Lãw-yir, a Naaŋmɩn Sãà nɩ a Sore Yeezu Kɩrɩta na so a. A maalʋ nɩ a ƴã-ɓaarʋ, a be a nyɩ zie. ² Tɩ mɩ́ puore nɩ Naaŋmɩn yaanɩ kʋra lɛ a nyɩ za ƴãw, ɛ tɩɛrɛ a nyɩ yele kʋra lɛ a tɩ puoru pʋɔ. ³ Bʋ̃ʋ n’ʋ vɛ̃, a Naaŋmɩn tɩ Sãà niŋé a, tɩ mɩ́ lɛb a bãwnɩ a nyɩ Naaŋmɩn-saw-deb tome, a nyɩ nɔ̃wfʋ na nyɛrɛ balʋ a, nɩ a tɩɛrʋ nyɩ na ƴãw kpɛ̃w za a tɩ Sore Yeezu Kɩrɩta ƴãw a. ⁴ Tɩ bãwnɩ a na, yɛbr ɩ, a Naaŋmɩn na nɔ̃w nyɩ ɛ kaa ir nyɩ a. ⁵ Bʋ̃ʋ n’ʋ vɛ̃, a Yel-nʋ̃ɔ̀ tɩ na wa manɩ kʋ̀ nyɩ a, bɛ tɩ ɩ ƴɛrʋ tɛwr tɩ ƴɛr ɛ, a tɩ lãw nɩ nɩ kpɛnʋ nɩ sõwfʋ na yi a Vʋʋrʋ Sõw zie a, bʋnʋ mɩ̀ bɛ tɩ ka be ɩ. Ɛ nyɩ bãw nɩ a lɛ tɩ na ɩ a nyɩ sɔgɔ a nyɩ vla ƴãw a. ⁶ Ɛ a nyɩɩm a, nyɩ cɔwrɩ tɩ na, tɩɩm nɩ a Sore, nyɩ tɩ be n kpɩɛrʋ na bɛ dɩ vuo a pʋɔ, ɛ saw de a Naaŋmɩn ƴɛrʋ, nɩ nʋ̃ɔ̀ na yi a Vʋʋrʋ Sõw zie a. ⁷ Lɛ n’a nyɩ lɩɛbɩ nɩbɛ a Masedʋan nɩ a Akayi ten Naaŋmɩn saw-dierbɛ za na cɔwrɛ a. ⁸ Bʋ̃ʋ n’ʋ vɛ̃, a Masedʋan nɩ a Akayi ten tɛwr bɛ n’a a Sore ƴɛrʋ yi a nyɩ zie ɛ hieri tɩ tɔ ɩ, a nyɩ Naaŋmɩn saw-deb yele ta n a ziir za, a dɛ bɛ lɛ tɛr tɩ na ƴɛrɛ a ƴɛrʋ ɛ. ⁹ A nɩbɛ za na ƴɛrɛ a tɩ ƴɛrʋ a, mɩ́ manɛ nɩ a lɛ nyɩ na de tɩ a sãanʋ a lɛn daar tɩ na tɩ wa a nyɩ zie a, nɩ a lɛ nyɩ na tɩ zawrɩ a tɩbɛ bɛr ɛ tu a Naaŋmɩn, kɛ́ nyɩ tone ʋ, ʋl na ɩ Naaŋmɩn-vʋʋra nɩ Naaŋmɩn-sɩza a. ¹⁰ Nyɩ gùre nɩ a Yeezu, a ʋ Bie na na yi a tẽ-vla pʋɔ lɛb wa a, ʋl ʋ na ɩ k’ʋ lɛb yi a kũuni pʋɔ a, ʋl na faarɛ tɩ a Naaŋmɩn ƴɛrʋ maalʋ bibir na pɩɛl a ƴãw a.

¹ Yɛbr ɩ, nyɩɩm mɩŋa za bãwnɩ a na: tɩ bɛ wa a nyɩ zie zawla lɛ ɩ. ² Nyɩ mɩ̀ bãwnɩ a na, a daar yɩ̃ɛ ŋa bɛ na tʋ tɩ ɛ dɔwrɩ tɩ a Filib tẽw a. Ɛ cɛ Naaŋmɩn tɩ kʋ̀ tɩ nɩ fãw tɩ manɩ a ʋ Yel-nʋ̃ɔ̀ kʋ̀ nyɩ, a na saa tɩ ɩ mɔb yaga a. ³ A kpaalʋ tɩ na kpaalɛ a nɩbɛ za a, a bɛ ɩ ziri ɛ, bɛ yi tɩɛr-faar pʋɔ ɩ, ɛ́ tɩ mɩ̀ bɛ bɛ̀lɛ nɩr za ɩ. ⁴ Tɩ nɩ̃ɛ na mɩ́ ƴɛrɛ kʋra lɛ mɛ̃ a lɛ a Naaŋmɩn na bɔbr a, bʋ̃ʋ n’ʋ vɛ̃, ʋ ɩ tɩ na kaa ɛ de a Yel-nʋ̃ɔ̀ kʋ̀ tɩ. Nɩsaalbɛ bɛ nɛ bɛ tɩ bɔbr kɛ tɩ ɩrɛ nʋ̃ɔ̀ kpɩɛr ɛ, Naaŋmɩn n’ʋ tɩ bɔbr kɛ tɩ ɩrɛ nʋ̃ɔ̀ kpɩɛr, ʋlɛ na n’ʋ mɩ́ ɩ a tɩ socie kaa bãw a ŋmɛ̃a. ⁵ Nyɩ mɔ̃ mɩ̀ bãwnɩ a na, tɩ bɛ dãw ƴɛr nɔ-kãa a nyɩ zie ɩ, Naaŋmɩn dɩ n a tɩ dãsɩɛ. ⁶ Tɩ na ɩ a Kɩrɩta nɩ-toni a ƴãw, tɩ nãá tʋ̃ɔ na dɩ nɩ-kpɛ̃ɛnʋ a nyɩ zu. Ɛ cɛ tɩ bɛ dãw bɔ yúor nɩr za zie ɩ, a nyɩɩm zie bɩɩ nɩ-yoru zie ɩ. Tɩ nɩ̃ɛ na tɛr su-baalʋ yaga a nyɩ sɔgɔ, mɛ̃ mã na kaarɛ a ʋ bibiir zie nɩ nɔ̃wfʋ a. ⁸ Tɩ na tɩ nɔnɛ nyɩ yaga za a n’a so, tɩ bɛ tɩ bɔbr kɛ́ tɩ manɩ a Naaŋmɩn Yel-nʋ̃ɔ̀ tɛwr kʋ̀ nyɩ ɛ, tɩ mɩ̀ tɩ bɔbr a kɛ́ tɩ nãá lãw de nɩ tɩ tʋɔra za kʋ̀ nyɩ, nyɩ na lɩɛbɩ tɩ nɩ-nɔnɩ za a ƴãw. ⁹ Yɛbr ɩ, nyɩ lɛ tɩɛrɩ a tɩ kpɩɛrʋ nɩ a tɩ balʋ: tɩ tɩ tone nɩ mʋ̃tɔ̃w nɩ tɩ̃ɩsɔw za, ɛ cãa hiere a Yel-nʋ̃ɔ̀ kʋ̀rɛ nyɩ, kɛ́ nyɩ kãw za ta balɛ ʋ tʋɔra a tɩ ƴãw ɛ. ¹⁰ Nyɩ dɩ n a tɩ dãsɩɛ, Naaŋmɩn mɩ̀ dɩ a dãsɩɛ k’aa tɩ ɩb a nyɩɩm Naaŋmɩn saw-dierbɛ zie tɩ tu n sonu, mɩnʋ, ɛ bɛ tɛr sãwna bɛ yere ɩ. ¹¹ Ɛ́ nyɩ bãw na kɛ tɩ ɩ n a nyɩ been been zie mɛ̃ lɛ sãà na mɩ́ ɩrɛ a ʋ bibiir zie a. ¹² Tɩ kpaalɩ nyɩ na, tɩ yel a kɛ́ nyɩ ƴãw fãw, tɩ zɛlɩ nyɩ nɩ yãayãa k’aa nyɩ cenu sɛw taa nɩ a Naaŋmɩn na bʋɔlɛ nyɩ kɛ́ nyɩ wa pʋɔ a ʋ naalʋ pʋɔ nɩ a ʋ yúor-vɩɛlʋ-danʋ pʋɔ a. ¹³ Lɛ so tɩ mɩ́ puore a Naaŋmɩn yaanɩ kʋra lɛ. Nyɩ na tɩ wõ a Naaŋmɩn ƴɛrʋ a tɩ nʋ̀ɔrɩ́ ɛ saw de a, nyɩ bɛ saw de ʋ mɛ̃ nɩsaalbɛ ƴɛrʋ a ɩ, nyɩ saw na de ʋ mɛ̃ a lɛ tɔr za ʋ na ɩ a, Naaŋmɩn ƴɛrʋ na tone a nyɩɩm na saw de a zie a. ¹⁴ Sɩza, yɛbr ɩ, nyɩ cɔwr ɩ a Naaŋmɩn Lãw-yie na be a Zude tẽw ɛ saw de a Kɩrɩta Yeezu a. Bʋ̃ʋ n’ʋ vɛ̃, a dɔwrʋ a na nyɛ̃ a Zifʋ mɩnɛ zie a, nyɩ mɩ̀ nyɛ̃ a nɩ a nyɩ tẽ-bi-taabɛ tɛɛ za zie. ¹⁵ A Zifʋ mɩnɛ nɛ bɛ kʋ́ a Sore Yeezu nɩ a Naaŋmɩn ƴɛr-manbɛ, ɛ mɩ̀ dɔwrɩ tɩ, bɛ bɛ ɩrɛ a pɛlɛ a Naaŋmɩn pʋɔ ɩ, ɛ ɩ a nɩsaalbɛ za dɔ̃ dem. ¹⁶ Bɛ bɛ sawr tɩ na ƴɛrɛ a Naaŋmɩn ƴɛrʋ kʋ̀rɛ a nɩ-bʋʋr-yoru bɛ nyɛ̃ a faafʋ ɛ, a ŋa n’a bɛ ɩ a yel-bebe bɛ na maalɛ kʋra lɛ a, a nʋɔr paalɩ. Ɛ cɛ a Naaŋmɩn suur wa lo n a bɛ zu a baarʋ daar. ¹⁷ Tɩɩm ƴãw a, yɛbr ɩ, tɩɩm nɩ nyɩɩm bʋ́r ɩ taa blã lɛ ƴãw, a ƴãgamɛ zãá taa ɛ a tɩɛrʋ bɛ zãá taa ɩ. A nyɩ nyɛ́b vʋla tɩ kpɩɛr tɩ na bɛ dɩ vuo ɩ, so tɩ lɛb tɩ bãw ƴãw fãw ɩrɛ kɛ́ tɩ tʋ̃ɔ nyɛ̃ nyɩ. ¹⁸ Al ƴãw n’a tɩ tɩ bɔbr kɛ tɩ wa a nyɩ zie, ɛ a mãa Pol a, ɩ̃ ɩ na kaa gb’a ŋmɩn za, ɛ cɛ a Sɩtaana tɩ piw tɩ nɩ a sɔr. ¹⁹ Bʋ̃ʋ n’ʋ vɛ̃, a nyɩɩm a, nyɩmɛ nɛ bɛ ɩ a tɩ tɩɛrʋ, a tɩ nʋ̃ɔ̀, nɩ a tɩ zɛb-tʋ̃ɔfʋ bãwfʋ, na na ɩ a tɩ pɔ̀lʋ bom a tɩ Sore Yeezu Kɩrɩta niŋé a ʋ lɛ-waa daar a. Nyɩmɛ nɛ bɛ, nɩ-yũo kãw za bɛ n’ʋ ɛ. ²⁰ Sɩza n’a, nyɩmɛ nɛ bɛ zɛwr a tɩ yúor, ɛ ɩ a tɩ nʋ̃ɔ̀.

¹ Lɛ so, tɩ wa vʋʋrɩ gu, ɛ nyɛ̃ a sa kɛ́ tɩ be a Atɛn a tɩ yõ, ² ɛ tõ a tɩ yɛb Timote a nyɩ zie, k’ʋʋ wa ɩ nyɩ kpɛmɛ ɛ ƴãw fãw a nyɩ Naaŋmɩn saw-deb ƴãw, ʋl na ɩ Naaŋmɩn lãw-tõ-tɔ a Kɩrɩta Yel-nʋ̃ɔ̀ hieru tome pʋɔ a, ³ k’aa kpɩɛrʋ tɩ na nyɛrɛ a ƴɛrɛ ŋa a, taa wa damnɛ nyɩ kãw za ɩ. Bʋ̃ʋ n’ʋ vɛ̃, nyɩɩm mɩŋa za bãwnɩ a na tɩ na be a kpɩɛrʋ a ŋa ƴãw a. ⁴ A lɛn daar tɩ na tɩ cãa be a nyɩ zie a, tɩ tɩ de niwn yel kʋ̀ nyɩ k’aa na fɛr a tɩ nyɛ̃ kpɩɛrʋ, alɛ n’ɩ a a ŋa na ta a, nyɩ bãwnɩ a na. ⁵ Al ƴãw n’a, ɩ̃ tɩ vʋʋrɩ gu ɛ tõ kɛ́ bɛ wa nyɛ̃ a lɛ a nyɩ Naaŋmɩn saw-deb na ɩ a, k’aa Bɛl-bɛlɛ taa wa mab bɛlɩ nyɔw nyɩ, ɛ́ tɩ hanɩ zawla lɛ ɩ. ⁶ Ƴɛrɛ ŋa a, a Timote yi n a nyɩ zie be lɛb wa ta a tɩ zie ka, ɛ yel a nyɩ Naaŋmɩn-saw-deb nɩ a nyɩ nɔ̃wfʋ na vɩɛl a yele kʋ̀ tɩ. Ʋ yel a kʋ̀ tɩ kɛ́ nyɩ cãa na tɩɛrɛ a tɩ yele vla, ɛ bɔbr kɛ nyɩ lɛb nyɛ̃ tɩ, mɛ̃ a lɛ tɩ mɩ̀ na bɔbr kɛ́ tɩ lɛb nyɛ̃ nyɩ a. ⁷ A ŋa n’a, a tɩ kpɩɛrʋ nɩ a tɩ wʋʋr za pʋɔ, tɩ nyɛ̃ mɔwlʋ a nyɩ ƴãw, yɛbr ɩ, a nyɩ Naaŋmɩn saw-deb zũú. ⁸ Ɛ́ ƴɛrɛ ŋa a, tɩ lɛb a vʋʋrɛ, nyɩ na ƴãw fãw lãw nɩ a Sore a ƴãw. ⁹ Ŋmɩŋmɩn n’a tɩ na tʋ̃ɔ pùori a Naaŋmɩn yaanɩ a nyɩ ƴãw k’a sɛw, a nʋ̃ɔ̀ al za nyɩ na ɩrɛ tɩ nyɛrɛ a ʋ niŋé a ƴãw? ¹⁰ Mʋ̃tɔ̃w nɩ tɩ̃ɩsɔw za, tɩ mɩ́ zɛlɛ nɩ a Naaŋmɩn kpɛ̃w kpɛ̃w za, k’ʋʋ saw tɩ lɛb nyɛ̃ nyɩ tʋ̃ɔ kʋ̀ nyɩ a alɩ bome nɛ za na cãa cɛ a nyɩ Naaŋmɩn-saw-deb ƴãw a. ¹¹ A tɩ Sãà Naaŋmɩn mɩŋa, nɩ a tɩ Sore Yeezu, bɛ bɩɛlɩ a tɩ gbɛɛ wa ta n a nyɩ zie. ¹² A Sore, ʋ ɩ a nɔ̃wfʋ nyɩ na nɔnɛ taa ɛ mɩ̀ nɔnɛ a nɩbɛ za a, ʋ ɩ ʋ kɛrɛ dɔwlɛ mɛ̃ a nɔ̃wfʋ tɩ na nɔnɛ nyɩ a. ¹³ A Sore, ʋ ɩ a nyɩ socie kpɛmɛ, nyɩ tʋ̃ɔ ɩ nɩ-son nɩ nɩbɛ na bɛ tɛr sãwna bɛ yere a Naaŋmɩn tɩ Sãà niŋé a, a lɛn daar a tɩ Sore Yeezu nãa wa lɛb wa nɩ a ʋ nɩ-son za a ɩ.

¹ Lɛ waar mɩ̀, yɛbr ɩ, tɩ zie n’a nyɩ wõ a lɛ a na fɛr kɛ́ nyɩ ɩrɛ pɛlɩ a Naaŋmɩn pʋɔ a, ɛ lɛ n’a nyɩ ɩrɛ. Ɛ cɛ a ƴɛrɛ ŋa a, tɩ zɛlɛ nyɩ na ɛ kpaalɛ nyɩ a Sore Yeezu yúor ƴãw: nyɩ cãa ɩrɛ vla dɔwlɛ. ² Bʋ̃ʋ n’ʋ vɛ̃, nyɩ bãw nɩ a wulu al a Sore Yeezu na ƴãw tɩ wul nyɩ a. ³ A Naaŋmɩn pʋ-tɩɛrʋ n’ɩ kɛ́ nyɩ ɩ nɩ-son, kɛ́ nyɩ bɛr a pɩ̃ɔ yele. ⁴ Kɛ́ ŋa za a nyɩ pʋɔ mɩ́ bãw a pɔw deb, mɩ́ de nɩ sonu nɩ ƴãwfʋ, ⁵ ɛ ta saw a tɩɛr-faar so ʋ mɛ̃ a nɩ-bʋʋr-yoru na bɛ bãw a Naaŋmɩn a ɩ. ⁶ A yel ŋa ƴãw a, nɩr za taa wa sãwnɛ a ʋ yɛb, bɩɩ nɛbr ʋ ɛ; bʋ̃ʋ n’ʋ vɛ̃, mɛ̃ a lɛ tɩ na yel kʋ̀ nyɩ ɛ kpãa nyɩ a, a Sore na dɔwr ɩ a bɛlɩ dem na ɩrɛ a ɩ-faar a ŋa taabɛ a. ⁷ Naaŋmɩn bɛ bʋɔlɩ tɩ faalʋ ƴãw ɛ, sonu ƴãw n’a ʋ bʋɔlɩ tɩ. ⁸ Lɛ so, sob nɛ na zawrɛ a wulu a ŋa bɛrɛ a, nɩsaal bɛ n’ʋ ʋ zawrɛ bɛrɛ ɩ, a Naaŋmɩn na kʋ̀rɛ nyɩ a Vʋʋrʋ Sõw a n’ʋ. ⁹ A yɛbr nɔ̃wfʋ ƴãw a, a bɛ tɛr kɛ́ bɛ sɛbr nyɩ ɛ, bʋ̃ʋ n’ʋ vɛ̃, nyɩɩm mɩŋa zànɩ nɩ a Naaŋmɩn zie a lɛ nyɩ na na nɔnɛ taa a, ¹⁰ ɛ lɛ n’a nyɩ ɩrɛ a yɛbr za zie a Masedʋan tɛ̃w za pʋɔ; yɛbr ɩ, tɩ kpaalɛ nyɩ na, kɛ́ nyɩ cãa ɩrɛ a vɩɛl dɔwlɛ. ¹¹ Nyɩ ƴãw fãw be ƴã-ɓaarʋ pʋɔ, nyɩ kaarɛ a nyɩ mɩŋa yele zie, ɛ tone nɩ a nyɩ nuru mɛ̃ a lɛ tɩ na yel kʋ̀ nyɩ a. ¹² Lɛ n’a, a nyɩ cenu na mɩ́ ɩ a yẽw dem ƴãwnɛ nyɩ, ɛ́ nyɩ kʋ̃ ɩ nɩr za hanɛ a nyɩ ƴãw ɛ. ¹³ Yɛbr ɩ, tɩ bɔbr a kɛ́ nyɩ bãw a yel-mɩŋa na caarɩ a bɛlɩ dem na mɩ́ kpi a, kɛ̀ nyɩ ta tɛr pʋ-sãwna mɛ̃ a bɛlɩ dem na bɛ ƴãw a bɛ tɩɛrʋ a Naaŋmɩn ƴãw a ɩ. ¹⁴ Tɩ saw na de k’aa Yeezu kpi na ɛ lɛb yi a kũu pʋɔ; lɛ n’a tɩ mɩ̀ saw k’aa bɛlɩ dem na lãw nɩ a Yeezu a bɛ kũu pʋɔ a, Naaŋmɩn na de bɛ na lãw nɩ ʋ. ¹⁵ A Sore wulu zũú n’a tɩ yere a ŋa kʋ̀rɛ nyɩ: a tɩɩm nɩ-vʋʋrɩ na na cãa be tɩ ta a Sore waa daar a, tɩ bɛ be za na de a bɛlɩ dem na kpi a niwn ɛ. ¹⁶ Bʋ̃ʋ n’ʋ vɛ̃, a cɛl wa ŋmɛ a, a malkɩ kpɛ̃ɛ kɔkɔr wa yi a, a Naaŋmɩn wɩɛ wa pɛblɩ a, a Sore mɩŋa na yi n a salom zu siw; lɛ n’a a kũuni bɛl na lãw nɩ a Kɩrɩta a, na de niwn lɛb yi a kũu pʋɔ. ¹⁷ Al pùorí, a tɩɩm na na cãa vʋʋrɛ a lɛn daar a, bɛ na ɓaw tɩ na lãw nɩ bɛ a zũzuge pʋɔ, tɩ tuori a Sore a salom zu, ɛ lɛ n’a tɩ na tɩ be a Sore zie kʋra lɛ. ¹⁸ A na ɩ a ŋa a, nyɩ mɔwlɛ taa nɩ a ƴɛr-bie a ŋa.

¹ A daar ʋl tɔr za, nɩ a vuo ʋl pʋɔ a yele a ŋa za na na ɩ a, yɛbr ɩ, a bɛ tɛr kɛ́ bɛ sɛbr nyɩ a al ƴãw ɛ. ² Bʋ̃ʋ n’ʋ vɛ̃, nyɩ mɩŋa za bãwnɩ a nɩ vla vla a Sore bibir na na vɩɛ mɛ̃ nyãnyuge na mɩ́ wa tɩ̃ɩsɔw a. ³ A lɛn daar a nɩbɛ nãà wa yere: «Ƴã-ɓaarʋ bɔkɔɔ! Damnʋ za yee!» Lɛn daar a a yele na ur sãw a bɛ zie mɛ̃ ’wɔbrʋ na nyɔw pɔw-pʋɔ a, ɛ́ bɛ kʋ̃ tʋ̃ɔ zɔ cɩ̃ɛ ɩ. ⁴ Ɛ cɛ nyɩɩm a, yɛbr ɩ, nyɩ bɛ be lige pʋɔ ɩ, a bibir ŋa nãà wa ur nyɩ mɛ̃ nyãnyuge a ɩ. ⁵ Bʋ̃ʋ n’ʋ vɛ̃, nyɩ za ɩ n cãa bibiir nɩ mʋ̃tɔ̃w daarɩ bibiir, tɩ̃ɩsɔw nɩ lige bɛ so tɩ ɛ. ⁶ A na ɩ a ŋa a, tɩ ta gúre mɛ̃ a bɛl na cɛ a ɩ, tɩ bɛr gʋ̃ɔ ɛ tɛr maal-ɩrɛ a dɩb nɩ a nyub ƴãw. ⁷ A gʋ̃ɔ-gurbɛ a, tɩ̃ɩsɔw n’a bɛ mɩ́ gúre, ɛ a dã-kuolbɛ a, tɩ̃ɩsɔw n’a bɛ mɩ́ kuoli a dãa. ⁸ Ɛ cɛ tɩɩm na ɩ mʋ̃tɔ̃w daarɩ nɩbɛ a, nyɩ ɩ tɩ mɩ́ nyɔw tɩ tʋɔra a dɩb nɩ a nyub ƴãw. Tɩ de a Naaŋmɩn-saw-deb nɩ a nɔ̃wfʋ a ɩ mɛ̃ a zɛbr-kparʋ na mɩ́ pàw a nyãá tɩ tɔ a sɩɛ a, ɛ de a faafʋ tɩɛrʋ mɛ̃ zɛbr kpawɔ-kpow a. ⁹ Bʋ̃ʋ n’ʋ vɛ̃, a Naaŋmɩn bɛ ír tɩ ƴãw a ʋ suur ƴãw ɛ, ʋ ír tɩ na ƴãw kɛ́ tɩ wa páw a faafʋ a tɩ Sore Yeezu Kɩrɩta ƴãw. ¹⁰ A Kɩrɩta kpi n a tɩ ƴãw k’ʋʋ ɩ tɩ lãw nɩ ʋ vʋʋrɛ, tɩmɛ saa kpi bɩɩ cãa vʋʋrɛ a. ¹¹ Lɛ so nyɩ mɔwlɛ taa a saw-deb pʋɔ, mɛ̃ a lɛ nyɩ na ɩrɛ baar a. ¹² Yɛbr ɩ, tɩ zɛlɛ nyɩ na, nyɩ ƴãwnɛ a bɛlɩ dem na hanɛ a nyɩ sɔgɔ, ɛ a Sore mɩ́ ƴãw bɛ kaarɛ a nyɩ zie ɛ kpãanɛ nyɩ a. ¹³ Nyɩ de a bɛ yele vla, ɛ nɔnɛ bɛ a bɛ tõ-nʋɔr zũú. Nyɩ tɛr ƴã-ɓaarʋ a nyɩ cara pʋɔ. ¹⁴ Yɛbr ɩ, tɩ kpaalɛ nyɩ na: nyɩ kpãanɛ a ƴã-to-dem, nyɩ mɩ́ yel a bɛlɩ dem na zɔrɛ dɛ̃bɩ̃ɛ a, kɛ́ bɛ ƴãw fãw bɛr a dɛ̃bɩ̃ɛ, nyɩ sõwne a bãbaalbɛ, nyɩ tɛr su-nyɔwra a nɩbɛ za zie. ¹⁵ Nyɩ gu vla, nɩr za taa mɩ́ wa maalɛ faa ƴaarɛ nɩ a faa san ɛ. Ɛ cɛ nyɩ nɩ̃ɛ mɩ́ ƴãw fãw maalɛ a vla kʋra lɛ, a nyɩ cara pʋɔ nɩ a nɩbɛ za zie. ¹⁶ Nyɩ cɩlɛ kʋra lɛ, ¹⁷ nyɩ puore kʋra lɛ, ¹⁸ nyɩ puore Naaŋmɩn yaanɩ bom za ƴãw; a Naaŋmɩn pʋ-tɩɛrʋ n’ɩ a ŋa a nyɩ zie, nyɩ na lãw nɩ a Yeezu Kɩrɩta a. ¹⁹ Nyɩ ta piwr a Vʋʋrʋ Sõw tome ɩ; ²⁰ nyɩ ta dier a Naaŋmɩn ƴɛr-manbɛ ƴɛrʋ a ɩ bʋ̃-zawlɛ ɩ. ²¹ Ɛ cɛ, nyɩ mɩ́ jɛl bom za kaa ɛ kaa ir a ʋl na vɩɛl a tɛr, ²² ɛ gùre nyɩ tʋɔra vla yel-faa-bʋʋrɛ kãw za ƴãw. ²³ A ƴã-ɓaarʋ Naaŋmɩn tɔr za, ʋ ɩ nyɩ ɩ son nyɩ za, ʋ gu a nyɩ nɩɩlʋ za, a tɩɛrʋ, a sɩ́ɛ nɩ a ƴãgan, ʋ taa wa tɛr sãwna bɛ yere a tɩ Sore Yeezu Kɩrɩta waa daar ɛ. ²⁴ A sob nɛ na bʋɔlɛ nyɩ a, ŋmɛ̃ n ʋ ŋmɛ̃a, ʋ na maal ɩ a a ŋa za. ²⁵ Yɛbr ɩ, nyɩ mɩ̀ puore kʋ̀rɛ tɩ. ²⁶ Nyɩ weri a yɛbr za pùori bɛ. ²⁷ Ɩ̃ zɛlɛ nyɩ nɩ yãayãa a Sore yúor ƴãw, nyɩ kanɩ a sɛbɛ ŋa kʋ̀ a yɛbr za. ²⁸ A tɩ Sore Yeezu Kɩrɩta maalʋ, ʋ be a nyɩ zie.