1 PƖƐR

1 PƖƐR

¹ A mãa Pɩɛr, na ɩ a Yeezu Kɩrɩta nɩ-tona a, mãa n’ʋ sɛbr a Naaŋmɩn nɩ-kaa-iri na yaarɩ be a Pɔ̃w, a Galasi, a Kapadɔsɩ, a Azi nɩ a Bitini ten pʋɔ mɛ̃ nɩ-sãanbɛ a. ² A Naaŋmɩn Sãà n’ʋ kaa ir nyɩ a tu a lɛ ʋ na tɩ dãw tɩɛrɩ a yele bin a koro za a; ʋlɛ n’ʋ ƴãw a Vʋʋrʋ Sõw maalɩ nyɩ, nyɩ ɩ son kɛ nyɩ wa sawr a Yeezu Kɩrɩta nʋɔr ɛ páw a vɩɛlʋ a ʋ zɩ̃ɩ ƴãw. A Naaŋmɩn, ʋ kʋ̀ nyɩ a maalʋ nɩ ƴã-ɓaarʋ yaga za. ³ A Naaŋmɩn, tɩ Sore Yeezu Kɩrɩta Sãà, tɛr ɩ puoru. A ʋ su-ɓaarʋ na ɩ kpɛ̃ɛ a ƴãw n’a, ʋ ɩ tɩ lɛb dɔw ɛ ƴãw a tɩ tɩɛrʋ a nyɔ-vʋʋrʋ tɩ na páw a ƴãw, a Yeezu Kɩrɩta kũu-pʋɔ-lɛ-yib zũú. ⁴ Ʋ ɩ na tɩ lɛb dɔw na páw a gbã-dɩ-bom ʋl na kʋ̃ pʋ̃ɔ a, na bɛ tɛr dɛwr ɛ a vɩɛlʋ mɩ̀ bɛ tɛr nãà siwri a. A gbã-dɩ-bom ŋa gùre nyɩ nɩ a tẽ-vla pʋɔ, ⁵ nyɩɩm a Naaŋmɩn na piw tɛr nɩ a ʋ fãw gùre nɩ a baarʋ daar a faafʋ na cɔbrɩ gã nãà wa sãá a, nyɩ na saw de ʋ a ƴãw. ⁶ Nyɩ̀ cɩlɛ nɩ nyɩ za a al ƴãw, yel-kpɩɛrɩ bʋʋrɛ za saa na ɩ nyɩ tɛr pʋ-sãwna blã a ƴɛrɛ ŋa a. ⁷ A kpɩɛrʋ a ŋa na ɩ na kɛ̀ bɛ bãw a lɛ a nyɩ Naaŋmɩn-sawfʋ vɩɛlʋ na ŋmɛ̃ a, a nyɩ Naaŋmɩn-sawfʋ ŋa na zuo a salmɛ̃ na mɩ́ wɛ a, ɛ́ bɛ mɩ́ ƴãw vũùmí ɩ kaa bãw a vɩɛlʋ a. A nyɩ Naaŋmɩn-sawfʋ bɛ na ɩ kaa nyɛ̃ ʋ vɩɛl a, na ɩ na nyɩ nyɛ̃ danʋ, nɩ yúor-vɩɛlʋ-danʋ nɩ ƴãwfʋ, a lɛn daar a Yeezu Kɩrɩta nãà wa lɛb wa wul ʋ tʋɔra a, ⁸ a Yeezu Kɩrɩta nyɩ na nɔnɛ ɛ bɛ nyɛ̃ a, a ʋl nyɩ mɩ̀ na saw de ɛ bɛ nyɛ̃ sɛr a. Ɛ́ nyɩ na saw de a, nyɩ cɩlɛ nɩ nʋ̃ɔ̀ cɩlʋ na bɛ tɛr manʋ a, ɛ ɩ a nyɩ yúor-vɩɛlʋ-danʋ cɩlʋ a, ⁹ nyɩ na bãwnɩ a kɛ́ nyɩ na páw nɩ a Naaŋmɩn-sawfʋ bom na ɩ a nyɩ sɩ́ɩr faafʋ a. ¹⁰ A faafʋ ŋa yele n’a a Naaŋmɩn-ƴɛr-manbɛ tɩ dãw jɛl bɔ, ɛ́ ƴɛr Naaŋmɩn-ƴɛr-manbɛ ƴɛrʋ yel a maalʋ a Naaŋmɩn na tɩ bãwnɩ nyɩ a. ¹¹ Bɛ tɩ ƴãw nɩ fãw jɛlɛ kɛ́ bɛ bãw debor daar a, nɩ yele abobe n’a, a Kɩrɩta Vʋʋrʋ na be a bɛ pʋɔ a, tɩ bɔbr k’ʋʋ yel, a lɛn daar ʋ na tɩ de niwn yel a tuo na gùre a Kɩrɩta a yele, nɩ a yúor-vɩɛlʋ-danʋ ʋ na na páw a tuo wob pùorí a. ¹² A Naaŋmɩn tɩ wul bɛ na kɛ a yel ŋa bɛ na tɩ yere a, a bɛ ɩ bɛl mɩŋa ƴãw ɛ, a nyɩɩm ƴãw n’a. Ɛ a ƴɛrɛ ŋa a, a Vʋʋrʋ Sõw bɛ na tõ ʋ yi a tẽ-vla pʋɔ wa a, ʋ ɩ na a Yel-nʋ̃ɔ̀ hierbɛ manɩ a yel ŋa kʋ̀ nyɩ, a yel ŋa a malkɩ mɩnɛ na vuole bɔbr ɩ a bãwfʋ a. ¹³ Lɛ so, nyɩ cɔbrɩ gu a tome, nyɩ mɩ́ nyɔw nyɩ tʋɔra a dɩb nɩ a nyub ƴãw, ɛ de a nyɩ tɩɛrʋ za ƴãw a maalʋ ʋl ƴãw bɛ na na kʋ̀ nyɩ, a lɛn daar a Yeezu Kɩrɩta nãà wa lɛb wul ʋ tʋɔra a. ¹⁴ Mɛ̃ bibiir na sawr nʋɔr a, nyɩ ta tu a dãwdãw tɛ̀rá vʋla pùor ɛ, a lɛn daar nyɩ na tɩ cãa ɩ zɔn a ɩ. ¹⁵ Ɛ cɛ, mɛ̃ a lɛ a Naaŋmɩn na bʋɔlɩ nyɩ a, na ɩ sõw a, nyɩ mɩ̀ lɩɛbɩ nɩ-son a nyɩ cenu za pʋɔ. ¹⁶ Bʋ̃ʋ n’ʋ vɛ̃, bɛ sɛb ɩ a Sɛb-sõw pʋɔ: «Nyɩ ɩ nɩ-son, ɩ̃ na ɩ sõw a ƴãw.» ¹⁷ Nyɩmɛ wa bʋɔlɛ a Naaŋmɩn kɛ Sãà a, ʋl na bɛ owre a ƴɛrʋ-maalʋ pʋɔ, ʋ na mɩ́ maal ɩ ŋa za tu n a ʋ ɩ-ɩrɩ a, nyɩɩm zɔrɛ ʋ ɛ ƴãwnɛ ʋ a nyɩ nɩ-tɔlɩ tẽw ŋa zu. ¹⁸ Nyɩ bãwnɩ a vla, bom na ɩ bʋ̃-wɛra mɛ̃ a salm-pɛlɛ nɩ a salm-zɩɩr a, alɛ bɛ n’a bɛ ya ír ɩ nyɩ bɛr a ɩ-ɩrɩ na bɛ tɛr tɔnɛ a pʋɔ, a nyɩ sãà mɩnɛ na lʋɔrɩ kʋ̀ nyɩ a ɩ. ¹⁹ Ɛ cɛ zɩ̃ɩ na ɩ zɩ̃ɩ a n’a faa nyɩ, a Kɩrɩta zɩ̃ɩ, ʋl na ɩ a Péle na bɛ tɛr faalʋ nɩ dɛwr a. ²⁰ Ʋlɛ n’ʋ a Naaŋmɩn tɩ dãw bãwnɩ, ʋ na bɛ tɩ ír a tẽ-daa sɛr a, ɛ pãa wa wul ʋ sãá a nyɩɩm ƴãw, a vuo ŋa pʋɔ na ɩ a vo-pɛ-baar a. ²¹ A ʋl ƴãw n’a nyɩ saw de a Naaŋmɩn, na ɩ k’ʋ lɛb yi a kũuni pʋɔ ɛ kʋ̀ ʋ a yúor-vɩɛlʋ-danʋ a. A ŋa n’a nyɩ saw de a Naaŋmɩn ɛ ƴãw a nyɩ tɩɛrʋ za a ʋ ƴãw. ²² Nyɩ na tu a yel-mɩŋa a, nyɩ so n a nyɩ dɛwr bɛr kɛ́ nyɩ sɩrɩ nɔnɛ taa yaga za mɛ̃ yɛbr a. A na ɩ lɛ a, nyɩ sɩrɩ nɔnɛ taa nɩ socir-pla parpar. ²³ Nɩsaal na na wɛ a, ʋlɛ bɛ n’ʋ ɩ nyɩ lɛb dɔw ɛ, a Naaŋmɩn ƴɛrʋ na vʋʋrɛ ɛ be kʋra lɛ a, ʋlɛ n’ʋ ɩ nyɩ lɛb dɔw. ²⁴ Bʋ̃ʋ n’ʋ vɛ̃, bɛ sɛb a: «Nɩsaal za ŋmɛ̃ na mɛ̃ mʋ̃ɔ a, ɛ a ʋ yúor na yi a, ŋmɛ̃ mɛ̃ mɔ̃-puuru a: a mʋ̃ɔ mɩ́ ko na, ɛ a puuru kpa lo, ²⁵ ɛ cɛ a Sore ƴɛrʋ be n kʋra lɛ.» Ɛ a ƴɛrʋ ŋa n’ɩ a Yel-nʋ̃ɔ̀ bɛ na hieri kʋ̀ nyɩ a.

¹ A na ɩ lɛ a, a potuolu bʋʋrɛ za, nɩ a ziri za, a libelibe bʋʋrɛ za, a nyuur nɩ a tɔ yel-faar manʋ, nyɩ bɛr a za a lo. ² Nyɩ bɔbr a Naaŋmɩn ƴɛrʋ bʋr-kʋ̃ɔ tɛwr mɛ̃ bɩ-pɩɩlɛ a, k’ʋʋ tʋ̃ɔ mɩ́ ɩ nyɩ kɛrɛ tɩ páw a faafʋ. ³ Bʋ̃ʋ n’ʋ vɛ̃, Mɛ̃ a lɛ a Sɛb-sõw na yel a: «Nyɩ lɛm a nyɛ̃ a lɛ a Sore na nʋmɛ̃ a.» ⁴ Nyɩ taw pɩɛlɩ a Sore: ʋlɛ n’ɩ a kʋsɛ-mimir ʋl a nɩsaalbɛ na jɛ bɛr a, ɛ a Naaŋmɩn zie ʋ ɩ kʋsɛ-kaa-ira nɩ kʋsɛ-yúor a. ⁵ A nyɩɩm mɩ̀, nyɩ ɩ mɛ̃ kʋsɛ-mimie bɛ na ŋmaarɛ nɩ yir Vʋʋrʋ Sõw na kpɩɛr a; nyɩ ɩ Naaŋmɩn baw-maal-son maalɛ tɩɛrʋ bawr a Naaŋmɩn na na tʋ̃ɔ saw de a Yeezu Kɩrɩta zũú a. ⁶ Lɛ so bɛ sɛb a Sɛb-sõw pʋɔ kɛ: «Mãa n’ɩ ŋa n ƴãwnɛ dacĩ-goraa kʋsɩɛr a Sɩyɔ̃ tẽw pʋɔ, kʋsɛ-yúor ɩ̃ na kaa ir a, ʋlɩ sob na de a ʋ tɩɛrʋ ƴãw a ʋ ƴãw a, ʋ kʋ̃ nyɛ̃ vĩ ɛ.» ⁷ A na ɩ lɛ a, nyɩɩm na saw de a Naaŋmɩn a, nyɩmɛ so ƴãwfʋ; ɛ cɛ a bɛlɩ dem na bɛ saw de a, «A kʋsɩɛr ʋl a yir-mɩɛrbɛ na ír lɔb bɛr a, lɩɛb ɩ a yir pɛr kʋsɩɛr,» nɩ kɛ: ⁸ «Ɛ ɩ a kʋsɩɛr ʋl ƴãw bɛ na mɩ́ ŋmɩɛr gbɛɛ a, pìir kʋsɩɛr na ɩrɛ bɛ lore a.» A bɛlɩ dem na bɛ saw de a, bɛ ŋmɩɛr ɩ gbɛɛ a ʋ ƴãw, a bɛ na bɛ saw de a Naaŋmɩn ƴɛrʋ a zũú. Ɛ lɛ n’a a tɩ fɛr k’aa ɩ a bɛ zie. ⁹ Ɛ cɛ nyɩɩm a, nyɩ ɩ n «Nɩ-bʋʋrɛ bɛ na kaa ir a, Nãà bawr-maalbɛ, nɩ-son bʋʋrɛ, nɩbɛ Naaŋmɩn na ya de a», kɛ́ nyɩ manɛ a ʋ tõ-vɩɛlɩ, ʋl na bʋɔlɩ nyɩ a lige pʋɔ yi wa n a ʋ cãa na bɛ tɛr tɔ a pʋɔ a. ¹⁰ Nyɩɩm na bɛ tɩ ɩ a ʋ nɩ-bʋʋrɛ a, ƴɛrɛ ŋa nyɩ ɩ n a Naaŋmɩn nɩ-bʋʋrɛ; nyɩɩm na bɛ tɩ páw a ʋ su-ɓaarʋ a, ƴɛrɛ ŋa a, nyɩ páw ʋ na. ¹¹ Ɩ̃ nɩ-nɔnɩ za, na ɩ mɛ̃ nɩ-tɔlɩ nɩ nɩ-sãanbɛ a, ɩ̃ zɛlɛ nyɩ na, nyɩ ciir a ƴãgan nʋ̃ɔ̀-faar vʋla na mɩ́ zɛbr ɩ a sɩ́ɛ a. ¹² Nyɩ cere dẽdẽ a nɩ-bʋʋr-yoru sɔgɔ, lɛ n’a a bom ʋl ƴãw bɛ na yere kɛ́ nyɩ ɩ n nɩ-faar a, a nyɩ ɩ-vɩɛlɩ na caalɩ bɛ, bɛ danɛ a Naaŋmɩn a ʋ waa bibir. ¹³ Nɩsaal za na dɩ nɩ-kpɛ̃ɛnʋ a, nyɩ sawr a ʋ nʋɔr a Sore ƴãw: a Ʋrɔm tẽw na-kpɛ̃ɛ n’ʋ bɩɩ, nyɩ sawr a ʋ nʋɔr, ʋ na so bom za a zũú. ¹⁴ A Ʋrɔm tẽw na-kpɛ̃ɛ lɩɛrbɛ nɛ bɛ bɩɩ, nyɩ sawr a bɛ nʋɔr, a na-kpɛ̃ɛ n’ʋ ír bɛ ƴãw kɛ́ bɛ mɩ́ dɔwrɩ a ɩ-faa maalbɛ ɛ mʋʋrɩ a nɩ-vɩɛlɩ. ¹⁵ A Naaŋmɩn bɔbr a kɛ́ nyɩ ɩrɛ ɩ-vɩɛlɩ, k’aa bɛlɩ nɩbɛ nɛ na bɛ bãw bom, ɛ bɛ bãw yã a, ta mɩ́ nyɛ̃ ƴɛrʋ ƴɛr ɛ. ¹⁶ Nyɩ vʋʋrɛ mɛ̃ nɩbɛ na so bɛ tʋɔra a, ɛ cɛ nyɩ ta de a so-nyɩ-tʋɔra pàw nɩ a nyɩ poto-ɩb ɛ, nyɩ ɩrɛ mɛ̃ Naaŋmɩn tõ-tõ-biir a. ¹⁷ Nyɩ ƴãwnɛ a nɩsaalbɛ za, nyɩ nɔnɛ a nyɩ yɛbr, nyɩ zɔrɛ a Naaŋmɩn, nyɩ ƴãwnɛ a na-kpɛ̃ɛ. ¹⁸ Tõ-tõ-biir i, nyɩ sawr a nyɩ nɩ-bɛrɛ nʋɔr nɩ zɔba yaga za, a bɛl na ɩ nɩ-vɩɛlɩ nɩ nɩsaal-baalʋ a, nɩ a bɛl na kpɛ po-tuo a. ¹⁹ Bʋ̃ʋ n’ʋ vɛ̃, nɩr na saw a Naaŋmɩn nʋɔr de a tuo na bɛ sɛw a, a ɩ n maalʋ. ²⁰ Nyɩmɛ mɩ́ wa saw de a dɔwrʋ nyɩ na sãw a ƴãw a, bʋ̃ʋ yúor ʋ nyɩ na páw a pʋɔ? Ɛ cɛ nyɩmɛ mɩ́ wa ɩ vla baar ɛ cãa saw de a dɔwrʋ a, a ɩ n maalʋ nyɩ páw a Naaŋmɩn zie. ²¹ A a ŋa tɔr za ƴãw n’a bɛ bʋɔlɩ nyɩ. A Kɩrɩta mɩŋa mɩ̀ wõ n tuo a nyɩ ƴãw, a ɩ wulu ʋ kʋ̀ nyɩ kɛ́ nyɩ tuur a ʋ gbɛɛ, ²² ʋl na bɛ maalɩ yel-bier, ɛ ziri mɩ̀ bɛ yi a ʋ nʋ̀ɔrɩ́ a; ²³ ʋl bɛ na mɩ́ tɩ tʋ, ɛ ʋ bɛ tʋ yaa a sãn a; ʋl na mɩ́ tɩ wone tuo ɛ bɛ ŋmɩɛr ƴãwn nɩr za a. Ʋ nɩ̃ɛ na mɩ́ tɩ de ʋ tʋɔra bɛr kʋ̀ a Naaŋmɩn na maalɛ a ƴɛrʋ nɩ mɩnʋ a; ²⁴ ʋl na tuo a tɩ yel-bebe a ʋ ƴãgan pʋɔ a da-gara zu, kɛ́ tɩ kpi ta cãa pʋɔ yel-bier pʋɔ, ɛ vʋʋrɛ vʋʋrʋ na tu yel-mɩnʋ a; a ʋl natɩɛ na sanɩ nyɩ a. ²⁵ Nyɩ tɩ bɔrɛ na gʋɔr mɛ̃ píir a, ɛ cɛ ƴɛrɛ ŋa a, nyɩ lɛb a cen a nyɩ sɩ́ɩr cɩ̃ɩnɛ nɩ a nyɩ sɩ́ɩr kaarɛ zie.

¹ Lɛ mɩ̀ n’a, a nyɩɩm pɔwbɛ, nyɩ sawr a nyɩ sɩrbɛ nʋɔr, kɛ̀ bɛ mɩnɛ saa wa zawrɩ a Naaŋmɩn ƴɛrʋ saw deb a, bɛ̃ɛ saw de ɛ́ nɩr bɛ ƴɛr ƴɛrʋ ɛ, a bɛ pɔwbɛ na ɩrɛ vla a ƴãw, ² a nyɩ cenu na vɩɛl ɛ nyɩ ƴãwnɛ nɩbɛ a, a nyɛb tɛwr na sɛw bɛ na. ³ Nyɩ ta mɩ́ ɩ a nyɩ vɩɛlʋ ɩ ƴãgan vɩɛlʋ ɛ: a zu nyɩ na mɩ́ ’lẽ gãgoli a, a tokpamɛ nɩ a salmɛ̃ pɩɛmɛ, a dɛpaal bʋ̃-suuri. ⁴ A nyɩ vɩɛlʋ, a ɩ a nyɩ nɩsaal ʋl na sɔwlɩ a vɩɛlʋ, su-nʋ̃ɔ̀ tɩɛrʋ nɩ ƴã-ɓaarʋ tɩɛrʋ vɩɛlʋ na bɛ tɛr sãwfʋ a, a vɩɛlʋ ŋa ɩ n bʋ̃-sɩza a Naaŋmɩn zie. ⁵ A dãwdãw pɔw-son na tɩ sawr a bɛ sɩrbɛ nʋɔr ɛ tɩɛrɛ Naaŋmɩn a, a ŋa n’a a bɛ vɩɛlʋ tɩ ŋmɛ̃. ⁶ A ŋa n’a a Saara tɩ ŋmɛ̃: ʋ tɩ sawr ɩ a Abraham nʋɔr, bʋɔlɛ ʋ ʋ sore. Nyɩ lɩɛb ɩ a ʋ pɔwyaar, nyɩ na ɩrɛ vla a, ɛ bɛ saw dɛ̃bɩ̃ɛ kãw za tɛr nyɩ a. ⁷ Lɛ mɩ̀ n’a, a nyɩɩm sɩrbɛ, nyɩ lãw kpɩɛr ɩ a nyɩ pɔwbɛ, ɛ bãwnɩ a bɛ na bɛ tɛr fãw a. Nyɩ ƴãwnɛ bɛ, nyɩɩm nɩ a bɛl nɛ bɛ lãw a gbã-dɩ-bom na ɩ a nyɔ-vʋʋrʋ a Naaŋmɩn na kʋ̀ nyɩ a. Nyɩ ɩrɛ a lɛ kɛ̀ bom za ta piw a nyɩ puoru ɛ. ⁸ Ɩ̃ pãa yere na kʋrɛ nyɩ za, nyɩ lãw taa tɩɛrʋ: nyɩ sõwne taa a kpɩɛrʋ pʋɔ, nyɩ nɔnɛ taa mɛ̃ yɛbr a, nyɩ ɩ su-ɓaarʋ nɩbɛ, nyɩ siwre nyɩ tʋɔra. ⁹ Nyɩ ta mɩ́ yaa a yel-faa san ɛ, bɩɩ yaa a zʋm san ɛ. Nyɩ nɩ̃ɛ mɩ́ ƴɛr nɔ-vla, bʋ̃ʋ n’ʋ vɛ̃, maalʋ n’ʋ a Naaŋmɩn yel k’ʋʋ na kʋ̀ nyɩ na, a lɛn daar ʋ na bʋɔlɩ nyɩ a. ¹⁰ Bɛ sɛb a kɛ: «Nɩr wa bɔbr k’ʋʋ nɔnɛ a nyɔ-vʋʋrʋ a, nɩr wa bɔbr kɛ a ʋ nyɔ-vʋʋrʋ bibie nʋmɛ a, a fɛr a k’ʋʋ maal tɛr a ʋ zɛl a ƴɛr-faa ƴãw, ɛ gu a ʋ nʋɔr a ziri ƴãw; ¹¹ k’ʋʋ gur pùor cɔw a yel-faa ɛ ɩrɛ a vla, k’ʋʋ mɩ́ bɔbr a ƴã-ɓaarʋ ɛ tuur a ʋ pùor.» ¹² Bʋ̃ʋ n’ʋ vɛ̃, «A Sore jɩrɛ nɩ a nɩ-mɩn, ɛ bɛrɛ wone a bɛ puoru; ɛ cɛ a Sore mɩ́ ŋmɛlɩ nɩ kpaar cɔw a yel-fa-maalbɛ.» ¹³ Nyɩmɛ wa tʋlɛ a vla ƴãw a, ãa n’ʋ na ɩ nyɩ faa? ¹⁴ Ɛ cɛ nyɩmɛ saa na nyɛrɛ dɔwrʋ a mɩnʋ zũú a, zu-nʋ̃ɔ̀ dem n’ɩ nyɩ. Nyɩ ta zɔrɛ bɛ towtow ɛ, ɛ ta tɛr dɛ̃bɩ̃ɛ kãw za ɩ. ¹⁵ Ɛ cɛ nyɩ ƴãwnɛ a Kɩrɩta na ɩ Sore a, a nyɩ socie pʋɔ. Ɛ a Naaŋmɩn nyɩ na tɩɛrɛ a, nyɩ cɔbrɩ gu a tɩɛrʋ ŋa manʋ nɩr za nãà wa sowre nyɩ a pɛr a. ¹⁶ Ɛ cɛ nyɩ tɛr su-nʋ̃ɔ̀ nɩ ƴãwfʋ a ʋ manʋ pʋɔ, lãw nɩ tɩɛrʋ na vɩɛl a, k’aa bom ʋl tɔr za ƴãw a nɩbɛ bɛl, na yere kɛ́ nyɩ sãw nɩ a nyɩ Kɩrɩta-nɩr nyɔ-vʋʋrʋ pʋɔ a, bɛ nyɛ̃ vĩ. ¹⁷ Bʋ̃ʋ n’ʋ vɛ̃, fʋ̃ʋ ɩrɛ vla ɛ wone tuo, a Naaŋmɩn pʋ-tɩɛrʋ wa n’ʋ bɔbr a lɛ a, alɛ sa fʋ na na ɩrɛ a faa a. ¹⁸ A Kɩrɩta tɔr za wõ n tuo daƴẽn daadaa a yel-bebe ƴãw, ʋl na ɩ nɩ-mɩŋa a; ʋ wõ n tuo a nɩ-faar ƴãw, k’ʋʋ tɛr nyɩ cen nɩ a Naaŋmɩn zie. Bɛ kʋ́ ʋ na, ʋ kpi a ƴãgan kũu, ɛ a Vʋʋrʋ Sõw ɩ ʋ lɛb vʋʋrɛ. ¹⁹ A Vʋʋrʋ ŋa fãw zũú n’a ʋ tɩ sʋ̃ɔmɩ cen tɩ kanɩ nɩ a kpɩ̃mɛ na be a gaso pʋɔ a, ²⁰ a pɛr lɛ kɛ a bɛlɩ dem na tɩ dãw zawrɩ a Naaŋmɩn ƴɛrʋ sawfʋ a lɛn daar ʋ na tɩ nyɔw a ʋ suur a, a bibie al a Nowe na tɩ maalɛ a gbor-kpɛ̃ɛ a. Nɩbɛ blã le lɛ tɛwr nɛ bɛ, bɛ za tɩ ɩ n nɩbɛ anĩ, bɛlɛ nɛ bɛ tɩ kpɛ a gbor-kpɛ̃ɛ pʋɔ a kʋ̃ɔ fáa bɛ. ²¹ A kʋ̃ɔ a ŋa tɩ ɩ n a suob na faarɛ nyɩ a ƴɛrɛ ŋa a bãwfʋ: ɛ cɛ ƴãgan dɛwr so-bɛrʋ bɛ n’ɩ a suob ɛ, a suob ɩ n socir vɩɛlʋ bɛ mɩ́ zɛlɩ a Naaŋmɩn zie. A suob faarɛ nyɩ nɩ a Yeezu Kɩrɩta kũu-pʋɔ-lɛ-yib zũú, ²² ʋl na do a tẽ-vla pʋɔ tɩ be a Naaŋmɩn dʋrʋ lowr dɩrɛ naalʋ a malkɩ mɩnɛ zu, a kpɛnʋ dem nɩ a fãw dem zu a.

¹ A na ɩ a ŋa, a Kɩrɩta wõ a tuo a ʋ ƴãgan pʋɔ a, a nyɩɩm mɩ̀, nyɩ tɛr a tɩɛrʋ ŋa kpɛ̃w za mɛ̃ zɛbr bom a: nɩr na wõ tuo a ʋ ƴãgan pʋɔ a, ír ɩ nũu a yel-bier pʋɔ; ² k’aa tẽw zu ka nyɔ-vʋʋrʋ na cãa cɛ ʋ a, ʋ tʋ̃ɔ vʋʋrɛ mɛ̃ a lɛ a Naaŋmɩn na bɔbr a, ʋ ta vʋʋrɛ tu n a nɩsaal tɛ̀rá vʋla ɩ. ³ A dãwdãw nyɩ na tɩ tu a pɩ̃ɔ-yele pùor a, a tɛ̀rá vʋla, a dãa-kuolu, a dɩ̀rʋ́, a nyub nɩ a tɩbɛ maalʋ na bɛ pʋɔ a, nyɩ tɩ maal ɩ a sɔ-kʋra pʋɔ dem pʋ-tɩɛrʋ tɩ sɛw. ⁴ Ƴɛrɛ ŋa nyɩ na bɛ cãa lãw nɩ bɛ dãwnɛ taa a pɩ̃ɔ ɩ-ɩrɩ maalʋ ƴãw a, a ur bɛ na ɛ ƴãw bɛ tʋʋr nyɩ. ⁵ Ɛ cɛ a Naaŋmɩn na cɔbrɩ baarɩ na maal ɩ a nɩ-vʋʋrɩ lãw nɩ a nɩ-kũuni a ƴɛrʋ a, ʋl zie n’a bɛ nãà wa manɩ a pɛr. ⁶ Al ƴãw n’a bɛ hieri a Yel-nʋ̃ɔ̀ kʋ̀ a kũuni tɛɛ za, k’aa Naaŋmɩn na maal ɩ bɛ a ƴɛrʋ a bɛ tẽw zu ka nyɔ-vʋʋrʋ ƴãw, mɛ̃ a nɩsaalbɛ za a, bɛ tʋ̃ɔ vʋʋrɛ a Naaŋmɩn nyɔ-vʋʋrʋ a ƴɛrɛ ŋa a Vʋʋrʋ Sõw zũú. ⁷ A yele za baarʋ pɩɛl a, lɛ so nyɩ mɩ́ nyɔw nyɩ tʋɔra a dɩb nɩ a nyub ƴãw, mɩ́ tʋ̃ɔ pùori. ⁸ Ɛ baa zuo a za, nyɩ nɔnɛ taa yaga za, a nɔ̃wfʋ mɩ́ piwli yel-bebe na bɛ tɛr vuo a. ⁹ Nyɩ mɩ́ saw de taa sãanʋ ɛ ta ’hũ’hune ɩ. ¹⁰ A Naaŋmɩn maalʋ a nyɩ been been na mɩ́ páw a, ʋ mɩ́ de ʋ tone nɩ a ʋ taabɛ vla ƴãw. Lɛ n’a nyɩ na ɩ nɩbɛ na kaarɛ a Naaŋmɩn maalʋ zie vla a, a Naaŋmɩn maalʋ na ɩ tɛɛtɛɛ a. ¹¹ Nɩr wa páw maalʋ a ƴɛrʋ ƴãw a, ʋ ƴɛrɛ a Naaŋmɩn ƴɛrʋ kʋrɛ a nɩbɛ. Nɩr wa páw maalʋ a tome ƴãw a, ʋ tone nɩ a Naaŋmɩn fãw, kɛ́ Naaŋmɩn tʋ̃ɔ nyɛ̃ danʋ za a Yeezu Kɩrɩta ƴãw, ʋlɛ so yúor-vɩɛlʋ-danʋ nɩ kpɛnʋ yome yome za. Amɛn. ¹² Ɩ̃ nɩ-nɔnɩ za a, nyɩmɛ wa be a kpɩɛrʋ vũu pʋɔ a, a ta ur nyɩ mɛ̃ yel bõ-bon kãw n’ʋ tarɛ nyɩ ɛ. ¹³ Nyɩ nɩ̃ɛ cɩlɛ nyɩ na pʋɔ a Kɩrɩta tuo pʋɔ a ƴãw, kɛ́ nyɩ mɩ̀ wa tʋ̃ɔ be a nʋ̃ɔ̀ nɩ a cɩlʋ pʋɔ, a lɛn daar a ʋ yúor-vɩɛlʋ-danʋ nãà wa sãá a. ¹⁴ Bɛlɛ wa tʋʋr nyɩ zʋmɛ a Kɩrɩta yúor ƴãw a, zu-nʋ̃ɔ̀ dem n’ɩ nyɩ, a Vʋʋrʋ na tɛr danʋ a, a Naaŋmɩn Vʋʋrʋ be n a nyɩ zu. ¹⁵ Nyɩ been kãw za taa wa nyɛrɛ dɔwrʋ ʋ na ɩ nɩ-kʋrɛ, bɩɩ nyãnyuge, bɩɩ yel-fa-maalɛ a ɩ, bɩɩ ʋ na pʋɔrɛ a ʋ taabɛ yele na bɛ jɩrɛ ʋ a pʋɔ a ɩ. ¹⁶ Ɛ cɛ alɛ wa ɩ ʋ na ɩ Kɩrɩta-nɩr a ƴãw n’a a, a ta ɩrɛ ʋ vĩ ɛ, ʋ nɩ̃ɛ danɛ a Naaŋmɩn, a Kɩrɩta-nɩr yúor ŋa ʋ na tɛr a ƴãw. ¹⁷ Sɩza n’ a, a ƴɛrʋ-maalʋ na tine a daar ta na. Ɛ a Naaŋmɩn nɩ-bʋʋrɛ nɛ bɛ bɛ de niwn maal ɩ a ƴɛrʋ. Ɛ cɛ alɛ wa tine a tɩ zie a, ŋmɩŋmɩn n’a a baarʋ daar, a na ŋmɛ̃ a bɛlɩ dem zie na zawrɩ na saw de a Naaŋmɩn Yel-nʋ̃ɔ̀ a? ¹⁸ Mɛ̃ a lɛ a Sɛb-sõw na yel a: «A nɩ-mɩŋa wa nyɛ̃ a faafʋ hanɩ nɩ a, ŋmɩŋmɩn n’a a na ŋmɛ̃ a nɩr na bɛ bãw kɛ Naaŋmɩn be na a zie, nɩ a yel-bier-maalɛ zie?» ¹⁹ A na ɩ a ŋa a, a bɛlɩ dem na wone tuo mɛ̃ a lɛ a Naaŋmɩn na bɔbr a, bɛ de a bɛ mɩŋa za ƴãw a Bome-za-Ire na ŋmɛ̃ ʋ ŋmɛ̃a a nuru pʋɔ, ɛ cãa ɩrɛ a vla.

¹ Mãa mɩ̀ na pʋɔ a nɩ-kore pʋɔ ɛ dɩ a Kɩrɩta tuo-wob dãsɩɛ a, mãa mɩ̀ na na páw a yúor-vɩɛlʋ-danʋ na waar na sãá a, ɩ̃ zɛlɛ nɩ a nɩ-kore na be a nyɩ pʋɔ a: ² nyɩ cɩ̃ɩnɛ a píir a Naaŋmɩn na kʋ̀ nyɩ a. Nyɩ kaarɛ a zie vla, ɛ cɛ a ta ɩ mɛ̃ fɛrʋ n’a ɩ, ɛ ɩ nyɩ na nɔnɛ a, mɛ̃ a lɛ a Naaŋmɩn na bɔbr a; a mɩ̀ ta ɩ sã-ya nɔ̃wfʋ zũú ɛ, ɛ ɩ tome nyɩ na nɔnɛ a zũú. ³ Nyɩ ta dɩrɛ naalʋ a bɛlɩ dem bɛ na kʋ̀ nyɩ kɛ́ nyɩ kaarɛ a zu ɛ, nyɩ nɩ̃ɛ lɩɛbɩ nɩ-vɩɛlɩ a píir na na cɔwrɛ a. ⁴ A Pi-cɩ̃ɩn-kara wa sãá a lɛn daar a, nyɩ na páw nɩ a yúor-vɩɛlʋ-danʋ dɛpaal-kpa-wʋɔ na bɛ tɛr sãwfʋ a. ⁵ Lɛ mɩ̀ n’a, a nyɩɩm pɔ́lɛ́, nyɩ mɩ̀ sawr a bɛlɩ dem na ɩ bɛrɛ a nyɩ ƴãw a nʋɔr. Ɛ a nyɩ za a, nyɩ siwre nyɩ tʋɔra a nyɩ ɩ-ɩrɩ pʋɔ, bʋ̃ʋ n’ʋ vɛ̃, bɛ sɛb a: «A bɛlɩ dem na zɛwr bɛ tʋɔra a, Naaŋmɩn bɛ mɩ́ de a bɛ yele ɩ; ɛ cɛ a bɛl na siwre bɛ tʋɔra a, ʋ mɩ́ kʋ̀ bɛ nɩ a ʋ maalʋ.» ⁶ A na ɩ a ŋa a, nyɩ siwri nyɩ tʋɔra a Naaŋmɩn kpɛnʋ za sob zie, ʋ tʋ̃ɔ zɛw nyɩ a daar ʋl ʋ na ƴãw a, nãa wa ta a. ⁷ A yele al za na ƴãwnɛ nyɩ tɩɛrʋ a, nyɩ de a kʋ̀ ʋ, bʋ̃ʋ n’ʋ vɛ̃ ʋ kaarɛ nɩ nyɩ zie. ⁸ Nyɩ mɩ́ nyɔw nyɩ tʋɔra a dɩb nɩ a nyub ƴãw, nyɩ bɛr gʋ̃ɔ! A nyɩ dɔ̃ sob, a Gɛgɛra, lãnɛ na viire mɛ̃ gbẽw na uore bɔbr ɩ nɩr k’ʋʋ vɔl a. ⁹ Nyɩ ba gbɛɛ a ʋ niŋé ɛ kpɛmɛ a Naaŋmɩn-sawfʋ pʋɔ, ɛ bãwnɩ a tuo a ŋa tɛɛ za mɩ̀ na gùre a nyɩ yɛbr na be a tẽ-daa zu a. ¹⁰ Ɛ nyɩmɛ wa wõ tuo kɔwrɩ blã a, a maalʋ za Naaŋmɩn, na bʋɔlɩ nyɩ a ʋ yúor-vɩɛlʋ-danʋ na be kʋra lɛ a Kɩrɩta pʋɔ a ƴãw a, ʋl tɔr za na lɛ maalɩ nyɩ na ƴãw a pùorí; ʋ na ɩ na nyɩ kpɛmɛ dɔwlɩ, ʋ na kʋ̀ nyɩ nɩ fãw dɔwlɩ, ɛ ɩ nyɩ ta bãw damnʋ ɛ. ¹¹ Ʋlɛ so kpɛnʋ yome yome za! Amɛn. ¹² A Sɩlvɛ̃, na ɩ yɛb na bɛ lɛbr pùor a mãa zie a, ʋlɛ n’ʋ ɩ̃ ƴãw ʋ sɛb a sɛb-ŋmale ŋa kʋ̀ nyɩ, k’ɩ̃ɩ kpaalɩ nyɩ ɛ yel kʋ̀ nyɩ kɛ́ a Naaŋmɩn maalʋ sɩza pùor a nyɩ tu. ¹³ A Naaŋmɩn nɩ-kaa-iri lãw, na be a Babɩlɔn a, puore nyɩ na. A ɩ̃ bie Markɩ mɩ̀ puore nyɩ na. ¹⁴ Nyɩ weri taa pùori taa nɩ nɔ̃wfʋ mɛ̃ yɛbr a. A nyɩɩm na lãw nɩ a Kɩrɩta a, a ƴã-ɓaarʋ, ʋ be a nyɩ za zie.