1 ZÃ

1 ZÃ

¹ Bom nɛ na tɩ be a Yele za pɛr tib daar a, bom nɛ tɩ na wõ a, bom nɛ tɩ na nyɛ̃ nɩ mimir a, bom nɛ tɩ na jɩr gbẽgbẽ a, ɛ tɔ n a tɩ nuru a, ʋ caar ɩ a ƴɛrʋ na tɩrɛ nyɔ-vʋʋrʋ a. ² Bʋ̃ʋ n’ʋ vɛ̃, a nyɔ-vʋʋrʋ ŋa sãá na, tɩ nyɛ̃ ʋ na, tɩ dɩrɛ nɩ a ʋ dãsɩɛ, tɩ manɛ nɩ a nyɔ-vʋʋrʋ na be kʋra lɛ a yele kʋ̀rɛ nyɩ, a nyɔ-vʋʋrʋ ŋa na tɩ be a Sãà zie ɛ wa sãá tɩ nyɛ̃ a. ³ Bom nɛ tɩ na nyɛ̃ ɛ wõ a, tɩ yere ʋ na kʋ̀rɛ a nyɩɩm mɩ̀, kɛ́ nyɩ mɩ̀ tʋ̃ɔ lãw nɩ tɩ, ɛ a tɩ lãw-taa ɩ n lãw-taa na be tɩɩm nɩ a Sãà cara pʋɔ, ɛ be tɩɩm nɩ a ʋ Bie Yeezu Kɩrɩta cara pʋɔ a. ⁴ Tɩ sɛbr nyɩ nɩ a a ŋa kɛ a nʋ̃ɔ̀ na kpɩɛr tɩ a, tʋ̃ɔ kpɛ tɩ tɩ tɔ. ⁵ Nyɩ nyɛ̃ a ƴɛrʋ tɩ na wõ a Yeezu Kɩrɩta zie ɛ yere kʋ̀rɛ nyɩ a: Naaŋmɩn ɩ n cãa, ɛ lige kãw za bɛ be a ʋ zie ɩ. ⁶ Tɩmɛ wa yel kɛ tɩ lãw nɩ ʋ na ɛ cãa cere lige pʋɔ a, tɩ ŋmarɛ nɩ ziri, ɛ a tɩ ɩb bɛ tu yel-mɩŋa ɩ. ⁷ Ɛ tɩmɛ wa cere a cãa pʋɔ mɛ̃ a Naaŋmɩn mɩŋa na be a cãa pʋɔ a, tɩ lãw nɩ taa ɛ a ʋ Bie Yeezu Kɩrɩta zɩ̃ɩ pɛwr ɩ yel-bier za dɛwr bɛrɛ tɩ. ⁸ Tɩɩm wa yel kɛ tɩ bɛ tɛr yel-bier a, tɩ tule nɩ tɩ tʋɔra, ɛ a yel-mɩŋa bɛ be a tɩ zie ɩ. ⁹ Ɛ cɛ tɩmɛ wa yere a tɩ yel-bebe kʋ̀rɛ a Naaŋmɩn a, ʋ ŋmɛ̃ n ʋ ŋmɛ̃a, ɛ ɩ nɩ-mɩŋa, ʋ na dɩ n a tɩ yel-bebe suur kʋ̀ tɩ ɛ pɛw a tɩ yel-faar za dɛwr bɛr. ¹⁰ Tɩɩm wa yel kɛ tɩ bɛ ɩ yel-bebe dem a, Naaŋmɩn n’ʋ tɩ bʋɔlɛ zir-ŋmarɛ, ɛ a ʋ ƴɛrʋ bɛ be a tɩ zie ɩ.

¹ Ɩ̃ bibiir i, ɩ̃ sɛbr nyɩ nɩ a a ŋa kɛ́ nyɩ taa maalɛ yel-bier ɛ, ɛ cɛ nɩr wa ɩ mɛ̃ ʋ maal ɩ yel-bier a, tɩ tɛr ɩ nɩr a Sãà zie ʋ mɩ́ ƴɛr faa tɩ, ʋlɛ n’ɩ a Yeezu Kɩrɩta na ɩ nɩ-mɩŋa a. ² Bʋ̃ʋ n’ʋ vɛ̃, ʋ de nɩ ʋ tʋɔra maal ɩ bawr, kɛ́ Naaŋmɩn tʋ̃ɔ dɩ a tɩ yel-bebe suur kʋ̀ tɩ. Ɛ cɛ tɩɩm yõ yel-bebe bɛ n’a ɩ, a nɩsaalbɛ za dem mɩ̀ n’a. ³ Ɛ a ŋa n’a tɩ nyɛ̃ kɛ́ tɩ bãw nɩ a Naaŋmɩn: tɩmɛ wa sawr a ʋ nɛ-ƴãwnɩ a. ⁴ Sob nɛ na yere: «Ɩ̃ bãw ʋ na», ɛ bɛ sawr a ʋ nɛ-ƴãwnɩ a, ʋ ɩ n zir-ŋmarɛ, ɛ a yel-mɩŋa bɛ be a ʋ zie ɩ. ⁵ Ɛ cɛ sob nɛ na sawr dier a Naaŋmɩn ƴɛrʋ a, a Naaŋmɩn nɔ̃wfʋ mɩ́ sɩrɩ na vɩɛl ʋ za a ʋ sob zie. A ŋa n’a tɩ na tʋ̃ɔ mɩ́ bãw kɛ tɩ lãw nɩ nɩ a Naaŋmɩn. ⁶ Sob nɛ na yel k’ʋʋ lãw nɩ nɩ a Naaŋmɩn a, a fɛr a k’ʋʋ vʋʋrɛ mɛ̃ a lɛ a Yeezu na dãw vʋʋrɩ a. ⁷ Ɩ̃ ba mɩnɛ ɛ, Naaŋmɩn nɔ-ƴãwna na ɩ paala a bɛ n’ʋ ɩ̃ sɛbr kʋ̀rɛ nyɩ ɛ, a nɔ-kʋra ʋl nyɩ na tɛr a pɛr tib daar a n’ʋ, a nɔ-kʋra ŋa ɩ n a ƴɛrʋ nyɩ na tɩ wõ a. ⁸ Ɛ cɛ Naaŋmɩn nɔ-ƴãwna na ɩ paala n’ʋ ɩ̃ sɛbr kʋ̀rɛ nyɩ, ɛ a ʋ yel-mɩŋa sãá nɩ a Kɩrɩta zie nɩ a nyɩ zie mɩ̀. Bʋ̃ʋ n’ʋ vɛ̃, a lige tɔlɛ na, ɛ a cãa tɔr za caalɛ baarɩ. ⁹ Ʋlɩ sob na yere k’ʋʋ be n cãa pʋɔ ɛ hɩ̃ɛn a ʋ yɛb a, cãa na be a lige pʋɔ. ¹⁰ Sob nɛ na nɔnɛ a ʋ yɛb a, be n cãa pʋɔ ɛ bom za bɛ be a ʋ zie na ɩ k’ʋ lo ɩ. ¹¹ Ɛ cɛ sob nɛ na hɩ̃ɛn a ʋ yɛb a, be n lige pʋɔ; ʋ cere nɩ lige pʋɔ ɛ bɛ bãw be ʋ na cere a ɩ, a lige na ɩ ʋ zɔ̃w a ƴãw. ¹² Ɩ̃ bibiir i, ɩ̃ sɛbr nyɩ na kɛ́ Naaŋmɩn dɩ n a nyɩ yel-bebe suur kʋ̀ nyɩ a Yeezu yúor ƴãw. ¹³ Sãà mɩnɛ ɛ, ɩ̃ sɛbr nyɩ na kɛ́ nyɩ bãw nɩ a sob nɛ na be a pɛr tib daar za a. Pɔl-bili i, ɩ̃ sɛbr nyɩ na kɛ́ nyɩ zɛb a tʋ̃ɔ a Faalʋ-sob. ¹⁴ Ɩ̃ bibiir i, ɩ̃ sɛb nyɩ na kɛ́ nyɩ bãw nɩ a Sãà. Sãà mɩnɛ ɛ, ɩ̃ sɛb nyɩ na kɛ́ nyɩ bãw nɩ a sob nɛ na be a pɛr tib daar za a. Pɔl-bili i, ɩ̃ sɛb nyɩ na kɛ́ nyɩ kpɛmɛ na ɛ a Naaŋmɩn ƴɛrʋ be a nyɩ zie, nyɩ zɛb a tʋ̃ɔ a Faalʋ-sob. ¹⁵ Nyɩ ta nɔnɛ a tẽ-daa nɩ a tẽ-daa zu bome ɩ, nɩr wa nɔnɛ a tẽ-daa a, ʋ bɛ mɩ́ tɛr a Naaŋmɩn Sãà nɔ̃wfʋ ɛ. ¹⁶ Bʋ̃ʋ n’ʋ vɛ̃, bom za a tẽ-daa na so a: a nɩsaal pʋ-tɩɛrʋ bʋ̃-bɔbrɩ na bɛ vɩɛl a, bom fʋ na mɩ́ nyɛ̃ a mimir zaalɛ a, a pɔl-ɩb a tɛ̀rá pʋɔ, a a ŋa za bɛ yire a Naaŋmɩn Sãà zie ɩ, a tẽ-daa zie n’a a yire. ¹⁷ A tẽ-daa tɔlɛ na, ʋlɛ nɩ a ʋ bome a nɩsaalbɛ na mɩ́ bɔbr a, ɛ cɛ sob nɛ na maalɛ a Naaŋmɩn pʋ-tɩɛrʋ a, mɩ́ be n be kʋra lɛ. ¹⁸ Ɩ̃ bibiir i, a yele za baarʋ pɩɛl a. Nyɩ wõ na bɛ yel kɛ Kɩrɩta dɔ̃ sob waar a. Ɛ cɛ ƴɛrɛ ŋa a, Kɩrɩta dɔ̃-dem yaga be n ka. A ŋa n’a tɩ bãw k’aa yele za baarʋ daar ta na. ¹⁹ A nɩbɛ bɛ ŋa yi n a tɩ zie, ɛ cɛ bɛ bɛ tɩ ɩ a tɩ nɩbɛ ɩ. Bɛlɛ tɩ sɩrɩ ɩ a tɩ nɩbɛ a, bɛ nãa tɩ cãa na be a tɩ zie. Ɛ cɛ bɛ yi na zaa a tɩ pʋɔ, k’aa ɩ cãa kɛ́ bɛ been kãw za bɛ tɩ ɩ a tɩ nɩr ɛ. ²⁰ A nyɩɩm a, nyɩ páw nɩ a Vʋʋrʋ Sõw a Kɩrɩta na kʋ̀ nyɩ a, lɛ n’a nyɩ za bãw a yel-mɩŋa. ²¹ Ɩ̃ bɛ sɛb nyɩ kɛ́ nyɩ bɛ bãw a yel-mɩŋa ɩ, ɩ̃ sɛb nyɩ na kɛ́ nyɩ bãw ʋ na, nɩ kɛ bom za na ɩ ziri a, bɛ yire yel-mɩŋa pʋɔ ɩ. ²² Ãa n’ɩ a zir-ŋmarɛ, ʋ bɛ ɩ a sob nɛ na yere k’aa Yeezu bɛ ɩ a Kɩrɩta a? A Kɩrɩta dɔ̃ sob ɩ a ŋa: ʋ na zawrɛ a Sãà nɩ a Bie za a. ²³ Sob nɛ za na zawrɛ a Bie a, mɩ̀ bɛ tɛr a Sãà ɩ. Ɛ sob nɛ za na saw a Bie a, mɩ̀ tɛr ɩ a Sãà. ²⁴ A na ɩ a ŋa a, nyɩ maal tɛr a ƴɛrʋ nyɩ na wõ a pɛr tib daar za a. A ʋlɩ bom nɛ nyɩ na wõ a pɛr tib daar za wa be a nyɩ zie a, a nyɩɩm mɩ̀, nyɩ na lãwnɩ nɩ a Bie nɩ a Sãà. ²⁵ Ɛ a ʋlɩ bom nɛ a Kɩrɩta na yel k’ʋʋ na kʋ̀ tɩ na a, n’ɩ a nyɔ-vʋʋrʋ na be kʋra lɛ a. ²⁶ A a ŋa n’a ɩ̃ yel k’ɩ̃ɩ sɛb kʋ̀ nyɩ caar ɩ a bɛlɩ dem na mɩ́ bɔbr kɛ bɛ tuli nyɩ a. ²⁷ A nyɩɩm a, a Vʋʋrʋ Sõw nyɩ na páw a Kɩrɩta zie a, ʋ be n a nyɩ zie, ɛ́ nyɩ bɛ gu kɛ nɩr kãw za wule nyɩ ɛ. Bʋ̃ʋ n’ʋ vɛ̃, a Vʋʋrʋ wule nyɩ nɩ bom za: ʋ wule nyɩ nɩ a yel-mɩŋa, ziri bɛ n’a ʋ wule nyɩ ɛ, lɛ so nyɩ ɩrɛ a lɛ ʋ na wul nyɩ a: nyɩ lãw nɩ a Kɩrɩta. ²⁸ Ɩ̃ bibiir i, a ƴɛrɛ ŋa a, nyɩ lãwnɩ nɩ a Kɩrɩta, kɛ ʋlɛ wa sãá a, tɩɩm ɓãa ƴãw bɛr tɩɛrʋ, ɛ ta nyɛ̃ vĩ ar zãá nɩ ʋ, a ʋ waa daar ɛ. ²⁹ Nyɩ na bãwnɩ a k’aa Kɩrɩta ɩ n nɩ-mɩŋa a, nyɩ saw kɛ sob nɛ za mɩ̀ na tuur a mɩnʋ sɔr a, ɩ n Naaŋmɩn bʋ̃-dɔwra.

¹ Nyɩ nyɛ̃ a Naaŋmɩn Sãà na nɔ̃w tɩ sɛw, tɩ ƴãw bɛ bʋɔlɛ tɩ Naaŋmɩn bibiir a. Ɛ tɩ ɩ ʋ na. A lɛ n’a so a tẽ-daa bɛ bãw tɩ ɛ, ʋ na bɛ bãw a Naaŋmɩn a ƴãw. ² Ɩ̃ ba mɩnɛ ɛ, a ƴɛrɛ ŋa tɩ ɩ n Naaŋmɩn bibiir, ɛ cɛ a lɛ tɩ nãà ŋmɛ̃ a n’a bɛ sãá sɛr ɛ. Tɩ bãwnɩ a n’a k’aa Kɩrɩta wa sãá a lɛn daar a, tɩ na ŋmɛ̃ na taa nɩ ʋ, tɩ na na nyɛ̃ ʋ mɛ̃ a lɛ ʋ na ŋmɛ̃ a ƴãw. ³ Ɛ nɩsaal za na ƴãw a tɩɛrʋ ŋa tɔ a ʋ ƴãw a, mɩ́ ƴãw nɩ fãw vɩɛl mɛ̃ a Kɩrɩta na vɩɛl a. ⁴ Nɩr za na maalɛ yel-bier a, mɩ́ zawr ɩ Naaŋmɩn nʋɔr, bʋ̃ʋ n’ʋ vɛ̃, a yel-bier ɩ n Naaŋmɩn nʋɔr zawrʋ. ⁵ Ɛ cɛ nyɩ bãwnɩ a na, a Kɩrɩta sãá na k’ʋʋ wa ír a yel-bebe bɛr, ɛ cɛ ʋl bɛ maalɩ yel-bier ɛ. ⁶ Nɩsaal za na maalɛ yel-bier a bɛ nyɛ̃ ʋ ɛ, ɛ bɛ bãw ʋ ɛ. ⁷ Ɩ̃ bibiir i, nyɩ ta saw nɩr za tuli nyɩ ɛ. Sob nɛ na tuur a yel-mɩŋa a, ɩ n nɩ-mɩŋa mɛ̃ a Kɩrɩta na ɩ nɩ-mɩŋa a. ⁸ Sob nɛ na maalɛ a yel-bier a, Gɛgɛra so ʋ. A Gɛgɛra na ɩ yel-bier-maalɛ a pɛr tib daar za a ƴãw. Yel ŋa ƴãw n’a a Naaŋmɩn Bie sãá: k’ʋʋ wa sãw a Gɛgɛra tome bɛr. ⁹ Nɩsaal za na ɩ Naaŋmɩn bʋ̃-dɔwra a, ʋ bɛ cãa maalɛ yel-bier ɛ, a nyɔ-vʋʋrʋ fãw na yi a Naaŋmɩn zie a na be a ʋ pʋɔ a ƴãw; ɛ a Naaŋmɩn na n’ʋ dɔw ʋ a, ʋ kʋ̃ tʋ̃ɔ cãa maalɛ yel-bier ɛ. ¹⁰ A ŋa n’a bɛ mɩ́ bãw a Naaŋmɩn bibiir nɩ a Gɛgɛra bibiir: sob nɛ za na bɛ tuur a yel-mɩŋa a, ɛ mɩ̀ bɛ lɛ nɔnɛ a ʋ yɛb a, bɛ ɩ Naaŋmɩn bie ɩ. ¹¹ Yel ŋa n’ʋ nyɩ wõ a pɛr tib daar za: kɛ́ tɩ nɔnɛ taa. ¹² A bɛ sɛw kɛ tɩ ŋmɛ̃ mɛ̃ a Kayɛ̃ a ɩ: ʋ na tɩ ɩ a Faalʋ-sob nɩr a n’a so ʋ kʋ́ a ʋ yɛb. Ɛ bʋ̃ʋ ƴãw n’a ʋ tɩ kʋ́ ʋ? A ʋ ɩ-ɩrɩ bɛ tɩ vɩɛl ɛ, ɛ a ʋ yɛb dem tu a yel-mɩnʋ. ¹³ Yɛbr ɩ, a tẽ-daa ŋa nɩbɛ wa hɩ̃ɛn nyɩ a, a ta ɩ mɛ̃ a ur nyɩ na ɩ. ¹⁴ Tɩɩm a, tɩ bãw na kɛ tɩ yi n a kũu pʋɔ kpɛ nyɔ-vʋʋrʋ pʋɔ, tɩ na nɔnɛ a tɩ yɛbr a ƴãw. Sob nɛ na bɛ tɛr a nɔ̃wfʋ a, cãa na be a kũu pʋɔ. ¹⁵ Nɩr za na hɩ̃ɛn a ʋ yɛb a, nɩ-kʋ́rɛ n’ʋ, ɛ́ nyɩ bãwnɩ a na nɩ-kʋ́rɛ kãw za na bɛ mɩ́ tɛr a nyɔ-vʋʋrʋ na be kʋra lɛ a. ¹⁶ Yel ŋa pʋɔ n’a tɩ bãw ʋlɩ bom nɛ na n’ɩ a nɔ̃wfʋ a: a Yeezu de nɩ a ʋ nyɔ-vʋʋrʋ tɩr a tɩ ƴãw. A na ɩ lɛ a, a tɩɩm mɩ̀, a fɛr a kɛ tɩ mɩ́ mɩ̀ de a tɩ nyɔ-vʋʋrʋ tɩr a tɩ yɛbr ƴãw. ¹⁷ Nɩr wa tɛr a a tẽw zu, ɛ nyɛ̃ a fɛrɛ a ʋ yɛb, ʋʋ bɛ zɔ ʋ nɩ-baalʋ a, ŋmɩŋmɩn n’a ʋ na tʋ̃ɔ yel k’ʋʋ nɔnɛ nɩ a Naaŋmɩn? ¹⁸ Ɩ̃ bibiir i, nyɩ ta ɩ tɩ nɔnɛ nɩ nʋɔr nɩ ƴɛr-vɩɛlɩ tɛwr ɛ, nyɩ ɩ a tɩ nɔ̃wfʋ sãá a tɩ ɩ-ɩrɩ pʋɔ ɛ tu a yel-mɩŋa. ¹⁹ A ŋa n’a tɩ na bãw kɛ́ tɩ ɩ n yel-mɩŋa nɩbɛ, ɛ́ mɩ́ ɓãa ƴãw bɛr tɩɛrʋ a Naaŋmɩn niŋé. ²⁰ Bʋ̃ʋ n’ʋ vɛ̃, a tɩ tɩɛrʋ wa yel kɛ tɩ sãw na a, Naaŋmɩn ɩ n kpɛ̃ɛ zuo a tɩ tɩɛrʋ, ɛ ʋ bãw nɩ bom za. ²¹ Ɩ̃ ba mɩnɛ ɛ, a tɩ tɩɛrʋ bɛ wa yel kɛ tɩ sãw na a, tɩ mɩ́ bɛr ɩ dɛ̃bɩ̃ɛ a Naaŋmɩn niŋé. ²² Ɛ bom za tɩ na zɛlɛ a, tɩ mɩ́ páw ʋ nɩ a ʋ zie, tɩ na sawr a ʋ nɛ-ƴãwnɩ ɛ ɩrɛ a lɛ na pɛlɩ a ʋ pʋɔ a ƴãw. ²³ Ɛ a nʋɔr ʋ na ƴãw kʋ̀ tɩ a n’ɩ ŋa: kɛ́ tɩ saw de a ʋ Bie Yeezu Kɩrɩta, ɛ nɔnɛ taa mɛ̃ a lɛ a Kɩrɩta na ƴãw a nʋɔr kʋ̀ tɩ a. ²⁴ Sob nɛ na sawr a Naaŋmɩn nɛ-ƴãwnɩ a, ʋ lãwnɩ nɩ a Naaŋmɩn ɛ a Naaŋmɩn mɩ̀ lãw nɩ ʋ. A ŋa n’a tɩ bãw k’aa Naaŋmɩn lãw nɩ tɩ na, a Vʋʋrʋ Sõw ʋ na kʋ̀ tɩ a.

¹ Ɩ̃ ba mɩnɛ ɛ, nyɩ ta mɩ́saw de a bɛlɩ dem za na mɩ́ yel kɛ bɛ tɛr ɩ Naaŋmɩn Vʋʋrʋ a ɩ. Ɛ cɛ, nyɩ mɩ́ ɩ bɛ kaa nyɛ̃ a vʋʋrʋ bɛ na tɛr a, wa sɩrɩ yi a Naaŋmɩn zie a. Bʋ̃ʋ n’ʋ vɛ̃, Naaŋmɩn-ƴɛr-man-bɛl-bɛlbɛ yɛ́r a pàw a tẽ-daa. ² A ŋa n’a nyɩ na mɩ́ bãw Naaŋmɩn Vʋʋrʋ wa n’ʋ a: sob nɛ za na yere kɛ a Yeezu Kɩrɩta sɩrɩ na lɩɛbɩ nɩsaal a, tɛr ɩ a Vʋʋrʋ na yi a Naaŋmɩn zie a. ³ Ɛ cɛ sob nɛ za na bɛ saw de a Yeezu Kɩrɩta a a ŋa a, ʋ bɛ tɛr a Vʋʋrʋ na yi a Naaŋmɩn zie a ɩ, a Kɩrɩta dɔ̃ sob nyɩ na wõ bɛ yel k’ʋʋ waar a, a ʋ vʋʋrʋ n’ʋ ʋ tɛr. Ɛ cɛ a ƴɛrɛ ŋa a, a Kɩrɩta dɔ̃ sob be n a tẽ-daa zu baarɩ. ⁴ Ɩ̃ bibiir i, a nyɩɩm a, Naaŋmɩn so nyɩ, ɛ́ nyɩ zɛb a tʋ̃ɔ a Naaŋmɩn-ƴɛr-man-bɛl-bɛlbɛ bɛ ŋa; bʋ̃ʋ n’ʋ vɛ̃, a sob nɛ na be a nyɩ sɔgɔ a, ɩ n kpɛ̃ɛ zuo a sob nɛ na be a tẽ-daa zu a. ⁵ A nɩbɛ bɛ ŋa ɩ n a tẽ-daa nɩbɛ, alɛ so bɛ mɩ́ ƴɛrɛ mɛ̃ a lɛ a tẽ-daa na mɩ́ ƴɛrɛ a, ɛ a tẽ-daa bɛrɛ wone a bɛ ƴɛrʋ. ⁶ Ɛ cɛ a tɩɩm a, Naaŋmɩn so tɩ. Sob nɛ na bãw a Naaŋmɩn a, mɩ́ bɛrɛ na wone a tɩ ƴɛrʋ. Ɛ sob nɛ a Naaŋmɩn na bɛ so a, bɛ mɩ́ bɛrɛ wone a tɩ ƴɛrʋ ɛ. A ŋa n’a tɩ mɩ́ bãw a yel-mɩŋa Vʋʋrʋ nɩ a tulu vʋʋrʋ. ⁷ Ɩ̃ ba mɩnɛ ɛ, nyɩ ɩ tɩ nɔnɛ taa, bʋ̃ʋ n’ʋ vɛ̃, a nɔ̃wfʋ yi n a Naaŋmɩn zie. Nɩr za na tɛr a nɔ̃wfʋ a ɩ n Naaŋmɩn bie, ɛ bãw a Naaŋmɩn. ⁸ Sob nɛ na bɛ tɛr nɔ̃wfʋ a, bɛ bãw a Naaŋmɩn ɛ, a Naaŋmɩn na ɩ nɔ̃wfʋ a ƴãw. ⁹ A ŋa n’a a Naaŋmɩn wul a ʋ nɔ̃wfʋ ʋ sãá a tɩ zie: ʋ tõ n a ʋ Bi-been a tẽ-daa zu k’ʋʋ wa ɩ tɩ vʋʋrɛ. ¹⁰ A ŋa n’a a nɔ̃wfʋ ŋmɛ̃: tɩmɛ bɛ nɛ bɛ nɔ̃w a Naaŋmɩn ɛ, ʋlɛ n’ʋ nɔ̃w tɩ, ɛ tõ a ʋ Bie k’ʋʋ wa de ʋ tʋɔra maal ɩ bawr a tɩ yel-bebe suur dɩ-kʋ̀b ƴãw. ¹¹ Ɩ̃ ba mɩnɛ ɛ, a Naaŋmɩn wa nɔ̃w tɩ a ŋa a, a fɛr a k’aa tɩɩm mɩ̀, tɩ mɩ̀ nɔnɛ taa. ¹² Nɩr za bɛ dãw nyɛ̃ a Naaŋmɩn ɛ. Tɩmɛ wa nɔnɛ taa a, Naaŋmɩn lãwnɩ tɩ na, ɛ a ʋ nɔ̃wfʋ a tɩ zie vɩɛl ɩ ʋ za. ¹³ A ŋa n’a tɩ mɩ́ bãw kɛ tɩ lãw nɩ nɩ a Naaŋmɩn, ʋʋ lãw nɩ tɩ: ʋ na kʋ̀ tɩ a ʋ Vʋʋrʋ a ƴãw. ¹⁴ Tɩ nyɛ̃ na, ɛ dɩrɛ a dãsɩɛ k’aa Sãà tõ n a ʋ Bie k’ʋʋ wa ɩ a tẽ-daa faarɛ. ¹⁵ Nɩr wa yel k’aa Yeezu ɩ n a Naaŋmɩn Bie a, Naaŋmɩn mɩ́ lãwnɩ nɩ a ʋ sob, ɛ a sob mɩ̀ lãw nɩ a Naaŋmɩn. ¹⁶ A tɩɩm a, tɩ bãw na ɛ saw de a nɔ̃wfʋ a Naaŋmɩn na tɛr a tɩ ƴãw a. Naaŋmɩn ɩ n nɔ̃wfʋ. Sob nɛ na tɛr a nɔ̃wfʋ a, ʋ lãwnɩ nɩ a Naaŋmɩn, ɛ a Naaŋmɩn mɩ̀ lãw nɩ ʋ. ¹⁷ A nɔ̃wfʋ wa vɩɛl ʋ za a tɩ zie a, tɩ na bɛr ɩ tɩɛrʋ a ƴɛrʋ maalʋ bibir, bʋ̃ʋ n’ʋ vɛ̃, a tɩ nyɔ-v ʋʋrʋ a tẽw zu ka ŋmɛ̃ na taa nɩ a Yeezu Kɩrɩta dem. ¹⁸ N ɔ̃wfʋ bɛ bãw dɛ̃bɩ̃ɛ ɩ. Nɔ̃wfʋ na ɩ nɔ̃wfʋ mɩŋa a, mɩ́ diw nɩ a dɛ̃bɩ̃ɛ bɛr. Bʋ̃ʋ n’ʋ vɛ̃, a dɛ̃bɩ̃ɛ mɩ́ wul a kɛ dɔwrʋ na wa na. Ɛ sob nɛ na zɔrɛ dɛ̃bɩ̃ɛ a, a nɔ̃wfʋ bɛ vɩɛl ʋ za a ʋ zie ɩ. ¹⁹ Tɩɩm a, tɩ nɔnɛ na, a Naaŋmɩn na n’ʋ de niwn nɔ̃w tɩ a ƴãw. ²⁰ Nɩr wa yel: «Ɩ̃ nɔnɛ nɩ Naaŋmɩn», ɛ hɩ̃ɛn a ʋ yɛb a, zir-ŋmarɛ n’ʋ. Bʋ̃ʋ n’ʋ vɛ̃, sob nɛ na bɛ nɔnɛ a ʋ yɛb ʋ na mɩ́ nyɛ̃ a, kʋ̃ tʋ̃ɔ nɔnɛ a Naaŋmɩn ʋ na bɛ mɩ́ nyɛ̃ a ɩ. ²¹ A nʋɔr a Kɩrɩta na ƴãw kʋ̀ tɩ a n’ɩ ŋa: sob nɛ na nɔnɛ a Naaŋmɩn a, ʋ mɩ̀ nɔnɛ a ʋ yɛb.

¹ Nɩr za na saw de k’aa Yeezu ɩ n a Kɩrɩta a, ɩ n Naaŋmɩn bʋ̃-dɔwra. Ɛ sob nɛ za na nɔnɛ a dɔwrɛ a, mɩ̀ mɩ́ nɔnɛ nɩ a ʋ bʋ̃-dɔwra. ² A ŋa n’a tɩ mɩ́ bãw kɛ tɩ nɔnɛ nɩ a Naaŋmɩn bibiir: a lɛn daar tɩ na mɩ́ nɔnɛ a Naaŋmɩn ɛ sawr a ʋ nɛ-ƴãwnɩ a. ³ A ŋa n’a a Naaŋmɩn nɔ̃wfʋ sɩrɩ ŋmɛ̃: kɛ́ tɩ sawr a ʋ nɛ-ƴãwnɩ. Ɛ a ʋ nɛ-ƴãwnɩ bɛ kpɛmɛ zuo ɩ, ⁴ bʋ̃ʋ n’ʋ vɛ̃, Naaŋmɩn bʋ̃-dɔwra za tʋ̃ɔ nɩ a tẽ-daa, ɛ a tʋ̃ɔfʋ tɩ na tʋ̃ɔ a tẽ-daa a, n’ɩ a tɩ Naaŋmɩn-saw-deb. ⁵ Ãa n’ʋ tʋ̃ɔ a tẽ-daa, a bɛ ɩ a sob nɛ na saw de k’aa Yeezu ɩ n a Naaŋmɩn Bie a? ⁶ A Yeezu Kɩrɩta n’ʋ wa n a ʋ suob kʋ̃ɔ nɩ a ʋ kũu zɩ̃ɩ. A kʋ̃ɔ tɛwr bɛ n’a ʋ wa n ɛ, ʋ wa n nɩ a kʋ̃ɔ nɩ a zɩ̃ɩ. Ɛ a Vʋʋrʋ sõw n’ʋ dɩrɛ a dãsɩɛ kɛ sɩza n’a, a Vʋʋrʋ Sõw na ɩ a yel-mɩŋa a ƴãw. ⁷ Dãsɩɛ dem ata nɛ bɛ: ⁸ a Vʋʋrʋ Sõw, a kʋ̃ɔ nɩ a zɩ̃ɩ, ɛ bɛ za ata lãw nɩ taa dɩrɛ a dãsɩ-been. ⁹ Tɩ mɩ́ saw nɩ a nɩsaalbɛ dãsɩɛ, a Naaŋmɩn dãsɩɛ ɩ n kpɛ̃ɛ zuo a nɩsaalbɛ dem. Ɛ a dãsɩɛ ŋa n’ʋ ʋ dɩ a ʋ Bie ƴãw. ¹⁰ Sob nɛ na saw de a Naaŋmɩn Bie a, mɩ̀ tɛr ɩ a dãsɩɛ ŋa a ʋ pʋ̀ɔmɩ́. Ɛ cɛ sob nɛ na bɛ mɩ́ saw de a Naaŋmɩn a, mɩ́ de ʋ na bʋɔlɛ zir-ŋmarɛ, ʋ na bɛ saw de a Naaŋmɩn dãsɩɛ ʋ na dɩ a ʋ Bie ƴãw a. ¹¹ A dãsɩɛ ʋl n’ɩ ŋa: Naaŋmɩn kʋ̀ tɩ nɩ a nyɔ-vʋʋrʋ na be kʋra lɛ a, ɛ a nyɔ-vʋʋrʋ ŋa n’ʋ tɩ páw a ʋ Bie zie. ¹² Sob nɛ na tɛr a Bie a, tɛr ɩ a nyɔ-vʋʋrʋ ŋa, ɛ sob nɛ na bɛ tɛr a Naaŋmɩn Bie a, bɛ tɛr a nyɔ-vʋʋrʋ ɛ. ¹³ Ɩ̃ sɛb nyɩ nɩ a a ŋa za kɛ́ nyɩ bãw kɛ nyɩ tɛr ɩ a nyɔ-vʋʋrʋ na be kʋra lɛ a, a nyɩɩm na saw de a Naaŋmɩn Bie a. ¹⁴ Ɛ bom ŋa n’ʋ so tɩ mɩ́ bɛr tɩɛrʋ a Naaŋmɩn niŋé: tɩmɛ wa zɛlɛ bom a tu a ʋ pʋ-tɩɛrʋ a, ʋ mɩ́ bɛr a wõ a tɩ zɛlʋ. ¹⁵ Ɛ tɩ na bãw k’ʋʋ mɩ́ bɛrɛ na wone tɩmɛ wa zɛlɛ bom a ʋ zie a, tɩ bãw na kɛ tɩ páw nɩ a bom nɛ tɩ na zɛlɩ a ʋ zie a. ¹⁶ Nɩr wa nyɛ̃ a ʋ yɛb ʋ maalɛ yel-bier na bɛ kʋ́rɛ a, ʋ puore, ɛ Naaŋmɩn na kʋ̀ n nyɔ-vʋʋrʋ a ʋ yɛb, a yel-bier ʋl wa sɩrɩ bɛ kʋ́rɛ a. Ɛ cɛ, yel-bier kãw be n be kʋ́rɛ. A ʋl ƴãw bɛ n’a ɩ̃ yel kɛ nyɩ puore ɩ. ¹⁷ Ɩ-faa za ɩ n yel-bier, ɛ cɛ yel-bier za bɛ kʋ́rɛ ɩ. ¹⁸ Tɩ bãwnɩ a na kɛ Naaŋmɩn bʋ̃-dɔwra za bɛ maalɛ yel-bier ɛ, a Naaŋmɩn Bie gu ʋ na, ɛ a Faalʋ-sob kʋ̃ tʋ̃ɔ ɩ ʋ bom ɛ. ¹⁹ Tɩ bãw na kɛ Naaŋmɩn so tɩ, ɛ a Faalʋ-sob so a tẽ-daa za. ²⁰ Tɩ bãw na kɛ a Naaŋmɩn Bie wa na, wa kʋ̀ tɩ a yã kɛ́ tɩ bãw a Naaŋmɩn-sɩza. Tɩ lãw nɩ nɩ a Naaŋmɩn-sɩza a ʋ Bie Yeezu Kɩrɩta ƴãw. Ʋlɛ n’ɩ a Naaŋmɩn-sɩza nɩ a nyɔ-vʋʋrʋ na be kʋra lɛ a. ²¹ Ɩ̃ bibiir i, nyɩ gùre nyɩ tʋɔra a tɩbɛ ƴãw.