TITUS

TITUS

¹ Pɔl, Naaŋmen gbaŋgbaa ane Yesu Kristo potuuro, a seŋ a sagdeu na a nobɔ Naaŋmen naŋ iri naŋ taa ane a yelmeŋɛ bɔmmo naŋ seŋ a Naaŋmen sobiri tuubu, ² naŋ be a nyɔvore naŋ kon bɔŋ baare kyelloo poɔ, Naaŋmen naŋ kon bɔŋ ŋmaa zirii naŋ da polle kyɛ ka a saŋ bɔŋ piili; ³ kyɛ a saŋ naŋ da seŋ, O da e la ka O yelbiri sãã a yi a kannoo na Naaŋmen te Faara naŋ da eŋ n nuuri poɔ a seŋ a noɔre O naŋ da tere, ⁴ A ko Titus, a n bie meŋɛ a sagdeu na te zaa naŋ taa poɔ: Nɔndeteroo, nyonono, ne `maaroŋ be fo zie a yi a Saa Naaŋmen ane a Daŋna Yesu Kristo te Faara zie. ⁵ A ŋaa zuiŋ la ka N bare fo Kerete poɔ, ka fo da naa maale boma na zaa naŋ ba are vela ka a tori kyɛ iri nembɛrɛ biŋ tenne zaa poɔ a seŋ lɛ N naŋ tere noɔre ko fo. ⁶ Iri kaŋ zaa naŋ ba taa saŋnaa zaa kyɛ e pɔg bonyena serɛ, kyɛ ka o biiri sage de, ka neɛ zaa kon nyare ba zuri a nɔkonde bee yelbadere yɛlɛ poɔ. ⁷ A ferɛ la ka a puoru kaara ta taa saŋnaa zaa, a seŋ a kakaara naŋ tonɔ korɔ Naaŋmen. O kon maŋ boɔrɔ omeŋɛ boɔbo bee vɛŋ ka o suuri iri wiẽũ. O kon maŋ boɔrɔ dãã nyuubu, bee nɔnɔ zɔɔre, bee miine ne libikɛkɛ. ⁸ Kyɛ see ka o maŋ tuori saama velaa kyɛ maŋ boɔrɔ a bon na naŋ veɛlɛ. See ka o maŋ taa omeŋɛ velaa a waa yeltori ne kyerete sobɔ naŋ maŋ tõɔ̃ nyɔge omeŋɛ velaa. ⁹ A ferɛ la ka o maŋ nyɔge kpẽã a yelbie naŋ taa dɛlloo, a seŋ lɛ ba naŋ da wuli o, ka o na tõɔ̃ mɔgle ba mine ne yelmeŋɛ wuluu kyɛ nyare balaŋ naŋ maŋ ŋmeɛrɛ nɔkpeɛne zu. ¹⁰ Bonso, nɔkonde deme ne yelyel zagla ane bɛlbɛllɛ yaga be la be, a gaŋ a zaa, balaŋ naŋ be a yɔ-ŋmaabo poɔ. ¹¹ See ka neɛ kaŋ pɔge ba nɔe, bonso bana la maŋ saŋ la yigbulo deme a wullo ba wuluu naŋ ba tu, a libikɛkɛ zuiŋ. ¹² Bamenne kaŋkanna kaŋ da yeli la, “Kerete deme maŋ waa la ziri-ŋmaaraba, wɛdon faare, ane entuo digbogbo deme.” ¹³ A danseɛ ŋa e la yelmeŋɛ. A lɛ poɔ, nyare ba zuri daadaa, ka ba na tõɔ̃ waa soŋ a sagdeu poɔ ¹⁴ kyɛ ta kyɛllɛ a Gyu deme senselloŋ ane a nɔe na a nensaala naŋ leɛ yi a yelmeŋɛ zie naŋ maŋ terɛ. ¹⁵ A nensonne zie, boma zaa waa la bonsoŋ, kyɛ a nendɛgɛ zie ane a basagde deme zie, bonsoŋ zaa kyebe. Ne lɛ meŋ zaa, ba teɛroŋ ane ba poteɛroŋ zaa waa la dɛgre. ¹⁶ Ba maŋ sage ne la ba nɔe ka ba bɔŋ la Naaŋmen, kyɛ a ba tomɔ poɔ, ba zagre O la. Ba waa la nobɔ na te naŋ kon tõɔ̃ boɔrɔ, ne nɔkonde deme, ane nenweere tonveɛle zaa poɔ.

¹ Kyɛ fõõ zie, yeli yɛlɛ naŋ seŋ yelmeŋɛ wuluu. ² Yeli ko a dɔɔnyanne ka ba nyɔge bamenne, ka ba taa yelmeŋɛ, ka ba taa bamenne velaa, kyɛ ka ba waa soŋ a sagdeu, nɔmmo ane kannyiri poɔ. ³ A lɛ meŋ wuli a pɔɔnyanne ka ba kyene a yelkyerete sobiri poɔ. Yeli ko ba ka ba ta maŋ ŋmaa zirii eŋ nobɔ, ka ba ta maŋ boɔrɔ dãã yaga, kyɛ ka ba maŋ wuli bon na naŋ veɛle. ⁴ Lɛ la ba na tõɔ̃ wuli pɔɔsare ka ba nɔŋ ba serbɛ ane ba bibiiri, ⁵ ka ba taa bamenne velaa, a waa pɔɔsonne, ka ba kaara ba yiri velaa, a waa nenveɛle, kyɛ de bamenne serbɛ noɔre, ka neɛ zaa kon tõɔ̃ yeli yelfaare kyaare ne a Naaŋmen yelbiri. ⁶ A lɛ meŋ, dɔre eŋ a pɔlɔ ka ba taa bamenne velaa. ⁷ Yɛlɛ zaa poɔ, wuli fomeŋɛ ka fo waa tonveɛle mannewuluu ko ba. A fo wuluu poɔ, wuli fomeŋɛ ka fo ba taa saŋnaa zaa, kyɛ taa yelmeŋɛ ne poteɛro soŋ, ⁸ a yeli yelbisonne naŋ kon taa zu nyaroo zaa. Lɛ la ka a neɛ na naŋ are kyaare ne fo na kpɛ la vi poɔ, bonzuiŋ o kon nyɛ yelfaa zaa o naŋ na yeli kyaare ne fo. ⁹ Dɔre eŋ gbaŋgbaare ka ba maŋ de bamenne daŋneba noɔre, ka ba pɛle ba daŋneba poore yaga yɛlɛ zaa poɔ kyɛ ta ŋmeɛrɛ ne ba nɔkpeɛne. ¹⁰ Yeli ko ba ka ba ta sɔgle zu ba daŋneba boma, kyɛ ka ba waa nobɔ naŋ taa yelmeŋɛ yɛlɛ zaa poɔ. Lɛ la ka yɛlɛ zaa poɔ, ba na maale a te Faara Naaŋmen wuluu ka a waa bonveɛle. ¹¹ Bonso a Naaŋmen nɔndeteroo naŋ wa ne faabo da sãã la nensaala zaa zie. ¹² A nɔndeteroo ŋa wuli te la ka te zagre boma naŋ ba seŋ Naaŋmen ane a teŋɛ zu boɔbo faare. A wuli te la ka te kyene a te nyɔvore sobiri ne temenne kaabo, ne yeltoruŋ, ane boma naŋ seŋ Naaŋmen a saŋa ŋa poɔ, ¹³ te naŋ kyɛllɛ gu a kyelloo naŋ taa maaloo zaa, ane a Naaŋmen kpoŋ ane te Faara Yesu Kristo nyaabo naŋ taa gandaaloŋ, ¹⁴ Onɔ naŋ de omeŋɛ ko te, ka O na tõɔ̃ leɛ yɔɔ de te a yi a nɔkondeu yɛlɛ zaa poɔ kyɛ tõɔ̃ pɛge te dɛgre zaa bare, ka te waa omeŋɛ soobo, naŋ taa nimizeɛ tonveɛle zaa poɔ. ¹⁵ Yeli a yɛlɛ ama ko ba. Dɔre eŋ ba kyɛ nyare ba zu ne faŋa zaa. Ta vɛŋ ka neɛ zaa de fo gyagɔlɔ lɛ.

¹ Teɛre a nobɔ ka ba sigri bamenne a zikaareba ne a faŋ zaa zie kyɛ maŋ de ba noɔre, kyɛ ka ba meŋ e sere ka ba toŋ tonveɛle kaŋ zaa. ² Yeli ba ka ba ta yeli yelfaare kyaare ne neɛ zaa bee nɔnɔ zɔɔre, kyɛ ka ba taa nimibaaloŋ ne sebaaloŋ neɛ zaa zie. ³ Bonso, saŋ kaŋ, tenee temenne da waa la dambolo ne basagde deme naŋ da kpɛ bɛlloo poɔ a toŋ gbaŋgbaa tomɔ ko te eŋgan boɔbo ne bonnoore kaŋ zaa. Te da kyene la a nyɔvore sobiri poɔ ne faaloŋ, ne nyuuri, ne ba-nɔŋ eroŋ, a kyiire taaba. ⁴ Kyɛ a saŋ na a te Faara Naaŋmen nimibaaloŋ ne nɔmmo naŋ da sãã a nensaala zie, ⁵ O da faa te la, kyɛ a da ba e a yeltoruŋ tomɔ te naŋ da toŋ zuiŋ, kyɛ O nyonono zuiŋ la. O faa te la a yi a leɛ-dɔgebo pɛgebo ane a leɛ-maaloo naŋ yi a Sekyerete zie, ⁶ a Sekyerete O naŋ da de kyiri eŋ te ka a zuo, a yi te Faara Yesu Kristo zie. ⁷ O maale te la ka te waa yeltori deme, a yi O nɔndeteroo zie, ka te tõɔ̃ waa gbandirebe a seŋ a kyello teɛroŋ naŋ be a nyɔvore naŋ kon bɔŋ baare poɔ. ⁸ A yelbie ama waa la yeldɛlle. Kyɛ N boɔrɔ la ka fo maŋ kpaale a yɛlɛ ama, ka balaŋ naŋ sage ne Naaŋmen na tõɔ̃ maŋ taa a tonveɛle teɛroŋ. A yɛlɛ ama waa la velaa a taa tɔnɔ a nensaala zie. ⁹ Kyɛ bare dambol soorbie, ne a saakom yiiluŋ yɛlɛ, ne zɔɔre, ne nɔkpeɛne naŋ kyaare a nɔbinnaa, bonso ama zaa ba taa tɔnɔ kyɛ waa yelzagla. ¹⁰ Kpãã a neɛ naŋ maŋ wa ne wɛloo dayena, kyɛ pãã leɛ kpãã o a boyi saŋ. A lɛ puoriŋ, ta leɛ taa bon zaa fo naŋ e ne o. ¹¹ Bɔŋ velaa ka a neɛ ŋa tɔ e la yelgoɔloŋ sobɔ naŋ maale yelbieri, kyɛ onɔ omeŋɛ sage de la ka o saŋ la. ¹² A saŋ na N naŋ na toŋ Artɛmas bee Tokekɔs fo zie, e aneɛ kyɛ wa n zie Nekopoles poɔ, bonso N teɛre ka N na di la a uoni a be. ¹³ E aneɛ kyɛ toŋ Zenas a nɔbɔŋnɔ ne Apɔllos, a eŋ ba ba sori poɔ ka ba bomboɔre zaa be be. ¹⁴ Vɛŋ ka te nobɔ zanne lɛ ba naŋ na maŋ taa a tonveɛle teɛroŋ ba bonfere yɛlɛ zaa poɔ, ka ba ta waa na nobɔ naŋ ba wɔŋ wɔmɔ zaa. ¹⁵ Neɛ zaa naŋ be n zie toɔle la ba puoruu ko fo. Puori balaŋ naŋ nɔŋ te a sagdeu poɔ. Ka nɔndeteroo be yɛ zaa zie. Amen.