SÃÃBO

¹ A Yesu Kristo sããbo, Naaŋmen naŋ ko O ka O wuli O gbaŋgbaare a yɛlɛ naŋ kon kɔɔre kyɛ wa. O da toŋ la O malke ka o manne a sããbo yɛlɛ ko O gbaŋgbaa Gyɔn, ² onɔ naŋ di a Naaŋmen yelbiri danseɛ ane a Yesu Kristo danseɛ ane yɛlɛ na zaa o naŋ da nyɛ. ³ Maaloo be la a onɔ sobɔ naŋ maŋ kanne ane balaŋ naŋ maŋ woŋ a daŋnyaabo ŋa yelbie kyɛ maŋ gu a yɛlɛ na zaa ba naŋ da ŋmaa biŋ a poɔ, bonso, a saŋ tara la. ⁴ Gyɔn, A ko a puoru deme naŋ be ziiri ayopõĩ a Asia poɔ: Nɔndeteroo ne `maaroŋ be yɛ zie, a yi a Onɔ sobɔ naŋ bebe, ane a Onɔ sobɔ naŋ da bebe, ane a Onɔ sobɔ naŋ na wa, ane a seere ayopõĩ naŋ be O naaloŋ dakogo niŋe soɔ, ⁵ a yi a Yesu Kristo, a Neɛ na naŋ e a danseɛ sobɔ naŋ taa dɛlloo, ne a dandɔgra Sobɔ naŋ yi a kũũ zie, ne a tendaa namine zaa Kaakaara. A Neɛ na naŋ nɔnɔ te, a pɛge te yelbebe bare ne Omeŋɛ zẽẽ, ⁶ a maale te ka te waa namine ane puoru neŋkponni ko O Naaŋmen ne a O Saa, Onɔ zie la ka eŋno ne faŋ be tegteglɛ! Amen. ⁷ Kyɛllɛ, O waara la ne zanzuuri, ka nimiri zaa na nyɛ O, meŋ gba, balaŋ naŋ da kyɔge O; ka a tendaa bale zaa na kono ne kpɛlle a O zuiŋ. Lɛ la ka a na waa! Amen. ⁸ “Maa la a Alfa ne a Omega,” a Daŋna la yeli, “a Onɔ sobɔ naŋ bebe, ane a Onɔ sobɔ naŋ da bebe, ane a Onɔ sobɔ naŋ na wa, a Faŋ Zaa Daŋna.” ⁹ Maa Gyɔn, naŋ e yɛ yɔɔ ane yɛ tutaa tasobɔ a Yesu Kristo yelferaa, naaloŋ, ane kannyiri poɔ, da be la teŋ kaŋ a mane naŋ gyilli o zaa, ba naŋ boɔlɔ ka Patmos, a Naaŋmen yelbiri ne a Yesu Kristo danse-diu zuiŋ. ¹⁰ N da poɔ la a Seɛ poɔ a Daŋna bebiri na daare, a da woŋ kɔkɔkpoŋ kaŋ n puoriŋ naŋ koŋ a na eelɛ konni, ¹¹ naŋ yeli: “Lɛ fo naŋ nyɛ, ŋmaa eŋ gane poɔ a toɔle ko a puoru deme naŋ be ziiri ayopõĩ a Asia poɔ: a ko Ɛfɛsos, Semorna, Pɛrgamɔs, Toatera, Sardes, Feladɛlfea, ane Laodesea.” ¹² Lɛ la ka N leɛ kaa a zie na a kɔkɔre naŋ da yeli yɛlɛ ne ma naŋ be, kyɛ N naŋ leɛ ka N nyɛ salema daare ayopõĩ naŋ e kaneane dɔgloo ziiri. ¹³ Ka Neɛ kaŋ da be a kaneane dɔgloo ziiri kpakyaga, a waa na nensaala bidɔɔ. O da su la bonsuuri ka a sigi vuuro O gbɛɛ puliŋ, kyɛ villi O nyaa ne salema kpagre. ¹⁴ Ka O zu ne a zukɔɔloŋ zaa da waa pelaa na pekɔɔloŋ, a pɛle te seŋ saakubo; kyɛ ka O nimie waa a na vũũ zeɛlɛ. ¹⁵ Ka O gbɛɛ meŋ da waa na kurzeɛ ba naŋ maale eŋ vũũ poɔ, ka O kɔkɔre meŋ da yire seŋ a gɔmɔ naŋ yi a kõɔ̃ naŋ vuuro yaga zie. ¹⁶ O nudoroŋ eŋɛ, ŋmarbie ayopõĩ da be la be, ka zɔɔre soɔ naŋ da dire o lobo ayi meŋ da yi O noɔre poɔ; kyɛ ka O niŋe meŋ da nyegrɛ a na a ŋmenaa naŋ puri ne o faŋa zaa. ¹⁷ N naŋ da nyɛ O, ka N le O gbɛɛ puliŋ a na neɛ naŋ kpi. Kyɛ O da de la O nudoroŋ dɔgle ma, a yeli: “Ta zoro dambẽɛ̃. Maa la a Danwẽɛ̃ Sobɔ ne a Baara Sobɔ. ¹⁸ Maa la a Neɛ naŋ voorɔ, kyɛ da kpi; kyɛ kyɛllɛ, N na voorɔ la tegteglɛ. Amen. Kyɛ N taa la a kũũ ne a kuuni zie saafebie. ¹⁹ “Ŋmaa a yɛlɛ na zaa fo naŋ nyɛ, ane ana zaa naŋ bebe, ane ana zaa naŋ na wa e a ama puoriŋ. ²⁰ A yelsɔglaa fo naŋ nyɛ a ŋmarbie ayopõĩ poɔ naŋ da be N nu poɔ ane a kaneane salema dɔgloo ziiri ayopõĩ poɔ la aŋa: A ŋmarbie ayopõĩ e la a puoru deme malkere, a puoru deme naŋ be ziiri ayopõĩ, ka a kaneane dɔgloo ziiri ayopõĩ meŋ e a puoru deme naŋ be ziiri ayopõĩ.

¹ “Ŋmaa ko a Ɛfɛsos puoru deme malke: A yɛlɛ ama ka a Neɛ na sobɔ naŋ nyɔge a ŋmarbie ayopõĩ taa O nudoroŋ poɔ la yeli, a neɛ na naŋ kyene a salema daare ayopõĩ naŋ e a kaneane dɔgloo ziiri kpakyaga: ² N nyɛ la fo tomɔ, ne a fo moɔbo, ne fo kannyiri, ne lɛ fo naŋ kon tõɔ̃ sage de balaŋ naŋ erɛ efaare. N nyɛ la lɛ fo naŋ da gyenne balaŋ naŋ yeli ka ba waa la potuuribo kyɛ ba waa, kyɛ ka fo nyɛ ka ba waa ziri-ŋmaaraba. ³ N nyɛ la lɛ fo naŋ are kpẽã a taa kannyiri a N yuori zuiŋ kyɛ ba bale. ⁴ Ne a lɛ zaa, N taa la yɛlɛ kaŋ ne fo: Fo bare la a fo nɔmmo danwẽɛ̃ sobɔ. ⁵ A lɛ zuiŋ, teɛre velaa ne a be na fo naŋ da yi le. Leɛ fo teɛroŋ kyɛ erɛ a fo danwẽɛ̃ eroŋ. Ka lɛ naane, N na wa la fo zie wiẽũ lɛ, a wa wuo a fo kanea dɔgloo zie a yi o aroo zie, ka fõõ ba leɛ fo teɛroŋ. ⁶ Kyɛ ŋaa la ka fo taa: Fo kyiire la a Nekolaeton deme eroŋ, a na N meŋ naŋ kyiire ba. ⁷ A neɛ na naŋ taa toori, vɛŋ ka o woŋ a bon na a Seɛ naŋ yele korɔ a puoru deme. A neɛ na naŋ maŋ toɔna a zaa, N na de la a nyɔvore tewɔmɔ ko o ka o di, a teɛ naŋ be a Naaŋmen tennoɔ kpakyaga. ⁸ “Ŋmaa ko a Semorna puoru deme malke: A yɛlɛ ama ka a Danwẽɛ̃ Sobɔ ne a Baara Sobɔ naŋ da kpi kyɛ leɛ voorɔ la yeli: ⁹ N nyɛ la fo tomɔ, ne fo yelfere, ane fo naŋ zaa, (kyɛ fo e la bondaŋna). N meŋ nyɛ la balaŋ naŋ yeli yelbifaare, balaŋ naŋ yeli ka ba e la Gyudeme, kyɛ ba e Gyudeme, kyɛ e a Setaana senagɔg. ¹⁰ Ta zoro dambẽɛ̃ a woore na zaa fo naŋ na nyɛ poɔ. Kyɛllɛ, a na sereŋ wa la ka a dɛvel na lɔɔ yɛ mine eŋ pigu die poɔ ka ba na tõɔ̃ gyenne yɛ, ka yɛ na nyɛ dɔgroŋ bebie pie. Taa sagdeu te ta a fo kũũ daare, kyɛ N na ko fo la a nyɔvore wedere zupile. ¹¹ A neɛ na naŋ taa toori, vɛŋ ka o woŋ a bon na a Seɛ naŋ yele korɔ a puoru deme. A neɛ na naŋ maŋ toɔna a zaa kon nyɛ baaloŋ zaa a yi a kũũ boyi puoriŋ. ¹² “Ŋmaa ko a Pɛrgamɔs puoru deme malke: A yɛlɛ ama ka a Neɛ naŋ taa a zɔɔre soɔ naŋ dire o lobo ayi la yeli: ¹³ N nyɛ la fo tomɔ ne a zie na fo naŋ kpeɛrɛ, a be la Setaana naaloŋ dakogo maŋ be. N nyɛ la lɛ fo naŋ nyɔge N yuori ne kpẽã zaa kyɛ ba kyiire fo sagdeu N zie a bebie na poɔ ba naŋ da ko Antipas, a N yelmeŋɛ danse-diu sobɔ naŋ da be a yɛ poɔ—a zie na Setaana naŋ kpeɛrɛ. ¹⁴ Kyɛ N taa la yɛlɛ belaŋ kyaare ne fo: Fo taa la nobɔ a yɛ poɔ naŋ nyɔge Balaam wuluu, onɔ naŋ da wuli Balak ka o eŋ bɛraa a Israel bibiiri sori poɔ ka ba ŋmɛ gbɛɛ le kyɛ di bɔɔre bondirii ba naŋ da de ko tebɛ, kyɛ leɛ toŋ pẽɛ̃pẽɛ̃ tomɔ. ¹⁵ A lɛ meŋ poɔ, fo taa la nobɔ mine a yɛ poɔ naŋ nyɔge a Nekolaeton deme wuluu. ¹⁶ Leɛ fo teɛroŋ. Ka lɛ naane, N na wa la fo zie wiẽũ lɛ, a zɔɔ kyaare ne ba ne a N noɔre zɔɔre soɔ. ¹⁷ A neɛ na naŋ taa toori, vɛŋ ka o woŋ a bon na a Seɛ naŋ yele korɔ a puoru deme. A neɛ na naŋ maŋ toɔna, N na de la manna sɔgle mine ko o ka o ɔɔ. N meŋ na ko o la kusipela. A kusipela ŋa zu, ba na ŋmaa la yopaala kaŋ na neɛ zaa naŋ ba bɔŋ, ka onɔ naŋ na wa de o naane. ¹⁸ “Ŋmaa ko a Toatera puoru deme malke: A yɛlɛ ama ka a Naaŋmen Bidɔɔ la yeli, Onɔ naŋ taa nimie a na vũũ zeɛlɛ, ane gbɛɛ naŋ waa na kurzeɛ velaa: ¹⁹ N nyɛ la fo tomɔ, ne nɔmmo, ne sagdeu, ne sommo, ane fo kannyiri. Kyɛ a fo tomɔ yɛlɛ poɔ, N nyɛ la ka a baaro deme gaŋ a piilu deme. ²⁰ Ne a lɛ zaa, N taa la yɛlɛ mine kyaare ne fo: Fo da vɛŋ la ka a pɔgɔ na, Gyɛzabɛl, naŋ boɔle omeŋɛ Ŋmen-noɔr sobɔ, ka o wa wuli kyɛ bɛlle N gbaŋgbaare ka ba toŋ pẽɛ̃pẽɛ̃ tomɔ kyɛ di bɔɔre bondirii ba naŋ da de ko tebɛ. ²¹ N da ko o la saŋ ka o tõɔ̃ leɛ o teɛroŋ kyaare ne o pẽɛ̃pẽɛ̃ tomɔ, kyɛ o ba boɔrɔ ka o leɛ o teɛroŋ. ²² Kyɛllɛ, N na de o la lɔɔ dɔgle gado zu, laŋ ne balaŋ naŋ toŋ pẽɛ̃pẽɛ̃ tomɔ ne o ka ba nyɛ dɔgroŋ yaga, ka bana ba wa leɛ ba eroŋ teɛroŋ. ²³ N na ko la o bibiiri ne kũũ, ka a puoru deme zaa na bɔŋ ka Maa la a neɛ naŋ peɛrɛ a poteɛroŋ ne sukyie. N na ko la yɛ kaŋ zaa a bon na naŋ seŋ a yɛ tomɔ. ²⁴ Kyɛ N yeli ko yɛ la a laŋ ne a kyɛlle naŋ be Toatera poɔ, yɛnee naŋ ba nyɔge a wuluu ŋa, naŋ ba bɔŋ a bon na ba naŋ boɔle Setaana yeltegroŋ (N kon leɛ eŋ tuo zaa yɛ zu): ²⁵ Yɛ nyɔg taa a bon na yɛ naŋ taa kyɛ gu ka N wa. ²⁶ A neɛ na naŋ maŋ toɔna, a tonɔ N tomɔ te ta a baaroo saŋ, N na de la faŋ ko o ka a gaŋ a tendaa deme zaa— ²⁷ ‘O na kyeenɛ ba la ne kuri dagolo; o na ŋmɛre ba la boore boore na yɔmeɛrɛ yoe’— a seŋ lɛ N naŋ da nyɛ N Saa zie. ²⁸ N meŋ na ko o la a beguo ŋmarbiri. ²⁹ A neɛ na naŋ taa toori, vɛŋ ka o woŋ a bon na a Seɛ naŋ yele korɔ a puoru deme.

¹ “Ŋmaa ko a Sardes puoru deme malke: A yɛlɛ ama ka a Neɛ na naŋ taa a Naaŋmen Seere ayopõĩ ane a ŋmarbie ayopõĩ la yeli: N nyɛ la fo tomɔ, ka fo taa la yuori ane fo naŋ voorɔ, kyɛ fo kpi la. ² Kaara velaa, kyɛ gu a boma naŋ kyɛre kyɛ boɔra ka a kpi, bonso, N ba nyɛ fo tomɔ ka a naŋ ta a tao zie N Naaŋmen niŋe soɔ. ³ Teɛre velaa, a lɛ poɔ, lɛ fo naŋ da de kyɛ woŋ. Nyɔge o taa kyɛ leɛ fo teɛroŋ. Lɛ poɔ, ka fõõ ba kaara velaa, N na wa la a na nannyige kyɛ fo kon bɔŋ a gogo na poɔ N naŋ na wa fo zie. ⁴ Kyɛ __________fo taa la yoe mine Sardes poɔ naŋ ba dɛge ba bonsuuri. Ba na laŋ la kyeŋ ne Ma, a su bompeɛle, bonso, ba seŋ la ne a lɛ. ⁵ A neɛ na naŋ maŋ toɔna, onɔ la na su a bompeɛle. N kon bɔŋ molle iri o yuori bare a nyɔvore gan poɔ, kyɛ N na maŋ sage de la o yuori a N Saa ane O malkere niŋe soɔ. ⁶ A neɛ na naŋ taa toori, vɛŋ ka o woŋ a bon na a Seɛ naŋ yele korɔ a puoru deme. ⁷ “Ŋmaa ko a Feladɛlfea puoru deme malke: A yɛlɛ ama ka a Neɛ na naŋ taa kyereteluŋ, a Neɛ na naŋ taa yelmeŋɛ, a Neɛ na naŋ taa a David saafebir, a Neɛ na naŋ yuo ka neɛ zaa kon pɔge, a Neɛ na naŋ pɔge ka neɛ zaa kon yuo, la yeli: ⁸ N nyɛ la fo tomɔ. Kyɛllɛ, N yuo la dendɔre a fo niŋe soɔ, neɛ zaa naŋ kon bɔŋ pɔge, bonso, fo taa la faŋ belaŋ lɛ, a kyɛ taa N yelbiri velaa, kyɛ da ba zagre N yuori. ⁹ Kyɛllɛ, N na e la a balaŋ naŋ be a Setaana senagɔg poɔ, naŋ yeli ka ba e la Gyudeme kyɛ ba e, kyɛ maŋ ŋmaara zirii—kyɛllɛ, N na e la ka ba wa puori fo gbɛɛ puliŋ, kyɛ e ka ba bɔŋ ka N nɔŋ fo la. ¹⁰ Fo naŋ da taa N kannyiri yelbiri velaa, N meŋ na taa fo la velaa ka fo ta kpɛ a gyenno gogo na poɔ naŋ na wa a tendaa zaa poɔ, naŋ na gyenne balaŋ zaa naŋ be a teŋɛ zu. ¹¹ N waara la wiẽũ lɛ. Nyɔg taa a bon na fo naŋ taa ka neɛ zaa ta wa de fo wedere zupile. ¹² A neɛ na naŋ maŋ toɔna, N na e la ka o waa luuri kaŋ a N Naaŋmen die poɔ, kyɛ o kon bɔŋ leɛ yi zaa. N na ŋmaa la N Naaŋmen yuori o eŋɛ, ane N Naaŋmen teŋɛ yuori, ka Gyɛrosalɛm paala, naŋ yire Naaŋmen zie ne a tenvelaa a sigre waara; N meŋ na ŋmaa la N yopaala o eŋɛ. ¹³ A neɛ na naŋ taa toori, vɛŋ ka o woŋ a bon na a Seɛ naŋ yele korɔ a puoru deme. ¹⁴ “Ŋmaa ko a Laodesea puoru deme malke: A yɛlɛ ama ka a Amen, a danseɛ sobɔ naŋ taa dɛlloo ne yelmeŋɛ, a Naaŋmen bommaale piilu sobɔ, la yeli: ¹⁵ N nyɛ la fo tomɔ, ka fo ba e `maaroŋ bee toloŋ. N sereŋ boɔrɔ la ka fo e `maaroŋ bee toloŋ. ¹⁶ Lɛ pãã, a fo naŋ faa waa a ŋaa, a ba waa `maaroŋ bee toloŋ, N na poore fo la bare N noɔre poɔ. ¹⁷ Fo maŋ yeli la, ‘N waa la bondaŋna kyɛ taa boma yaga, a ba la boɔrɔ bon zaa.’ Kyɛ fo ba bɔŋ ka fo be la yeltuo poɔ, a zage fo zaa, kyɛ leɛ waa naŋ sobɔ, zɔŋ, ane eŋkpoli sobɔ. ¹⁸ A lɛ zuiŋ, N yeli fo la ka a na waa la velaa ka fo da salema ba naŋ da eŋ vũũ poɔ N zie, ka fo na tõɔ̃ waa bondaŋna kyɛ taa bompeɛle fo naŋ na tõɔ̃ su pɔge a fomeŋɛ ka fo eŋkpoli vi ta sãã; kyɛ de kãã sɔ ne fo nimie ka fo tõɔ̃ nyɛrɛ. ¹⁹ Balaŋ zaa N naŋ nɔŋ, N nyare la ba zu kyɛ wuli ba ne dɔgroŋ. A lɛ zuiŋ, taa nimizeɛ a leɛ fo teɛroŋ. ²⁰ Kyɛllɛ, N are la a dendɔre eŋɛ kyɛ ŋmeɛrɛ. Neɛ na zaa naŋ woŋ N kɔkɔre kyɛ yuo a dendɔre, N na wa kpɛ la kyɛ di ne o, ka o meŋ di ne Ma. ²¹ A neɛ na naŋ maŋ toɔna, N na e la ka o laŋ zeŋ ne Ma a N naaloŋ dakogo zu, a na lɛ N naŋ da tõɔ̃ a da zeŋ ne N Saa a O naaloŋ dakogo zu. ²² A neɛ na naŋ taa toori, vɛŋ ka o woŋ a bon na a Seɛ naŋ yele korɔ a puoru deme.”

¹ Kyɛllɛ ama puoriŋ la, ka N nyɛ dendɔre kaŋ naŋ yuo a tenvelaa poɔ. Ka a kɔkɔre danwẽɛ̃ sobɔ N naŋ woŋ da yeli ko ma la, a na eelɛ kaŋ, a yele, “Do wa kyɛ ka N wa wuli fo a bon na naŋ da naa e ama puoriŋ.” ² A pare na poɔ, N da be la a Seɛ eŋɛ, ka N da nyɛ naaloŋ dakogo kaŋ ba naŋ da biŋ a tenvelaa poɔ, ka neɛ kaŋ da zeŋ o zu. ³ Kyɛ a neɛ na naŋ da zeŋ da sãã la a na gyaspɛr ane sardeɛn kusibie, ka sagongonaa da gyilli villi pɔge a naaloŋ dakogo zie zaa, a waa na ɛmɛraldɛ kuuri. ⁴ Gyilli goɔre a naaloŋ dakogo zie, ka napare dakogri lezɛre ane anaare bebe, kyɛ N da nyɛ la nembɛrɛ lezɛre ane anaare ka ba zeŋ a dakogri ama zu. Ba da su la bonsupeɛle a vɔgle salema wederebe zupilii ba zuri eŋɛ. ⁵ Ka nyegroo ne tannoo ne kɔkɔe da yire a naaloŋ dakogo zie, ka kaneane ayopõĩ meŋ da nyege vũũ dire a naaloŋ dakogo niŋe soɔ. Ana la a Naaŋmen seere ayopõĩ. ⁶ Ka mane kaŋ naŋ e kyaane kyɛ waa na kõɔ̃ kpɔgɔ meŋ da be a naaloŋ dakogo niŋe soɔ. A zie na naŋ gyilli villi a naaloŋ dakogo kpakyaga poɔ la, ka donvobɔ anaare da bebe naŋ da pɔge ne nimie a niŋe ane a puori zaa. ⁷ A dandaŋ donvoora da waa la a na gbeŋ, ka a ayi sobɔ waa na naadalee, ka a ata sobɔ niŋe waa a na nensaala niŋe, kyɛ ka a anaare sobɔ da waa a na selagra. ⁸ Ka a donvobɔ anaare ama kaŋ zaa da taa pegrɛ ayoɔbo, ka a zaa meŋ da taa nimie gyilli a lobo zaa. Ka a da ba pɛnnɛ ŋmenaa ane tensɔɔre zaa a maŋ yele: “Kyerete, kyerete, kyerete la a Faŋ Zaa Daŋna Naaŋmen, Onɔ naŋ da bebe, Onɔ naŋ bebe kyɛ na kyãã wa.” ⁹ A saŋ na zaa a donvobɔ ana naŋ maŋ tere eŋno ne gyermɛ ne bareka puoruu ko a Onɔ sobɔ naŋ zeŋ a naaloŋ dakogo zu, Onɔ naŋ voorɔ tegteglɛ, ¹⁰ ka a nembɛrɛ lezɛre ne anaare le a Onɔ naŋ zeŋ a naaloŋ dakogo zu niŋe soɔ a puoro Onɔ naŋ voorɔ tegteglɛ, a de ba wederebe zupilii lɔɔ a naaloŋ dakogo zie, a yele: ¹¹ “Fõõ la seŋ, te Daŋna Naaŋmen, ka Fo nyɛ eŋno, gyermɛ, ne faŋa, bonso, Fõõ la iri boma zaa, ka a yi Fo boɔbo la ka a bebe la kyɛ ka Fo iri a meŋ.”

¹ Kyɛ ka a Onɔ naŋ zeŋ a naaloŋ dakogo zu, O nudoroŋ poɔ la ka N da nyɛ ganvaare kaŋ, ba naŋ da ŋmaa o poɔ ne o puoriŋ zaa, ka a pɔge ne maroo ziiri ayopõĩ. ² Ka N nyɛ malkekpẽã kaŋ ka o da soore ne kɔkɔkpoŋ: “Aŋ la seŋ ka o yuo a ganvaare ŋa kyɛ `lage o maroo ziiri?” ³ Kyɛ neɛ kyebe a tenvelaa poɔ, bee a teŋɛ zu, bee a teŋɛ pare, naŋ na tõɔ̃ yuo a ganvaare bee pigri kaa o poɔ. ⁴ Ka N da koŋ yaga, bonso, ba da ba nyɛ neɛ zaa naŋ seŋ ka o yuo a ganvaare bee tõɔ̃ pigri kaa o poɔ. ⁵ Ka a nembɛrɛ kaŋ yeli ko ma, “Ta kono. Kyɛllɛ, a Gyuda bale Gbeŋ, a David Nyagre, tõɔ̃ la. Onɔ la na tõɔ̃ yuo a ganvaare a `lage o maroo ziiri ayopõĩ.” ⁶ Ka N da nyɛ Pelee naŋ waa na kaŋ ba naŋ da ko, ka O are a zie naŋ gyilli a naaloŋ dakogo ne a donvobɔ anaare ne a nembɛrɛ kpakyaga. O da taa la eelɛ ayopõĩ ane nimie ayopõĩ. Ana la e a Naaŋmen seere ayopõĩ na O naŋ toŋ ko a teŋɛ zu zaa. ⁷ Ka O da wa de a ganvaare a yi a Onɔ sobɔ naŋ da zeŋ a naaloŋ dakogo nudoroŋ eŋɛ. ⁸ A saŋ na O naŋ da wa de a ganvaare, a donvobɔ anaare a laŋ ne a nembɛrɛ lezɛre ne anaare da le la a Pelee niŋe soɔ. Ba kaŋ zaa da taa la korengyo ne salema lalii naŋ paale ne bonnyuuri, naŋ e a Ŋmendeme puoruu. ⁹ Kyɛ ba da yiele la yieluŋ paala a yele: “Fõõ seŋ ka Fo de a ganvaare a `lage o maroo ziiri, bonso, ba da ko Fo la, kyɛ ka Fo da ba la ne Fo zẽẽ ko Naaŋmen a yi bale, kɔkɔre, nobɔ, ne tendaa deme zaa poɔ. ¹⁰ Kyɛ Fo da e la ka ba waa namine ne puoru neŋkponni ko te Naaŋmen, kyɛ ba na di la naaloŋ a teŋɛ zu.” ¹¹ Kyɛ N da kaa la kyɛ woŋ malkere yaga naŋ gyilli a naaloŋ dakogo, a be na a donvobɔ ne a nembɛrɛ meŋ naŋ be, kɔkɔre. Ba zaa laŋ taa da ta la turi pie ziiri turi pie, ne turtur yaga. ¹² Ka ba da yeli ne kɔkɔkpoŋ a yele: “A Pelee ba naŋ da ko seŋ la ka O nyɛ faŋa ne bonveɛle ne yɛŋ ne kpẽã ne gyermɛ ne eŋno ane pugibu!” ¹³ Ka N da woŋ bon-iri zaa naŋ be a tenvelaa poɔ ne a teŋɛ zu ne a teŋɛ pare, ane a mane zu laŋ ne ama zaa naŋ be o poɔ, ka ba yele: “Pugibu, ne gyermɛ, ne eŋno, ne kpẽã zaa be a Onɔ naŋ zeŋ a naaloŋ dakogo zu ane a Pelee zie tegteglɛ! Amen.” ¹⁴ Ka a donvobɔ anaare da yeli, “Amen,” ka a nembɛrɛ meŋ da le vɔgle a puori O.

¹ Ka N da nyɛ ka a Pelee da wa yuo a maro ayopõĩ na kaŋ, ka N meŋ woŋ a donvobɔ anaare na kaŋ ka o yeli ne kɔkɔkpoŋ naŋ seŋ saatannoo, “Wa nyɛ!” ² Kyɛllɛ, N nyɛ la wirpela kaŋ, ka a neɛ na naŋ zɔm o, ka O taa tamo. Ba meŋ da ko o la wedere zupile, ka o da yi gaa a na neɛ naŋ tõɔ̃ zɔɔ di nobɔ zaa a te nyɛ toɔmo. ³ O naŋ da wa yuo a maro ayi sobɔ, N da woŋ la a donvobɔ ayi sobɔ ka o yeli, “Wa nyɛ!” ⁴ Ka a wiri kaŋ naŋ waa zeɛ da wa yi, ka ba ko a neɛ na naŋ zɔm o faŋ ka o tõɔ̃ de `maaroŋ a yi a teŋɛ zu kyɛ ka a teŋɛ zu deme da naa ko taaba; ba meŋ da ko o la zɔɔre soɔ kpoŋ kaŋ. ⁵ O naŋ da wa yuo a maro ata sobɔ, N da woŋ la a donvobɔ ata sobɔ ka o yeli, “Wa nyɛ!” Kyɛllɛ, N nyɛ la wirsɔgla kaŋ, ka a neɛ na naŋ zɔm o, ka o taa bontegroŋ bommanna kaŋ naŋ taa lobo ayi o nu poɔ. ⁶ Ka N da woŋ kɔkɔre kaŋ a donvobɔ anaare na poɔ naŋ yeli, “Denari yeni na tõɔ̃ da la mɔbie laa yeni, ka denari yeni na tõɔ̃ da la barle laar ata meŋ, kyɛ ta saŋ a kãã ne a tewɔmɔ dãã!” ⁷ O naŋ da wa yuo a maro anaare sobɔ, N da woŋ la a donvobɔ anaare sobɔ ka o yeli, “Wa nyɛ!” ⁸ Kyɛllɛ, N nyɛ la wiri kaŋ naŋ sɔɔ a na mɔ`maar, ka a neɛ na naŋ zɔm o, ka o yuori di Kũũ, kyɛ ka a Kuuni Zie deme meŋ da tuuro o. Ba da ko ba la faŋ, a teŋɛ zu ziiri anaare zie, ka ba ko a nobɔ ne zɔɔre soɔ, ne kɔŋ, ne kũũ, laŋ ne a teŋɛ zu wɛdonne. ⁹ O naŋ da yuo a maro anuu sobɔ, ka N da nyɛ a altar puliŋ balaŋ ba naŋ da ko, a Naaŋmen yelbiri ane a danseɛloŋ ba naŋ da di zuiŋ, seere. ¹⁰ Ka ba da ŋmɛ kpɛlle ne kɔkɔkpoŋ a yeli, “A na kɔɔre la seŋ wolɔ, oo Daŋna, a kyerete ne yelmeŋɛ sobɔ, ka Fo na de a balaŋ naŋ kpeɛrɛ a teŋɛ zu ka ba saŋ la kyɛ leɛ tere a faaloŋ yɔɔre ko ba a te zẽẽ zuiŋ?” ¹¹ Ka ba da de kparpeɛl wogri ko ba kaŋ zaa, kyɛ pãã da yeli ko ba ka ba pɛnne fẽẽ kyɛ gu ka ba gbaŋgbaa taaba ane ba yɔɔmine ba naŋ na ko, ka ba noɔre do ta. ¹² O naŋ da yuo a maro ayoɔbo sobɔ, N nyɛ la daadaa, ka a teŋɛ da ŋmɛre ne la dɔɔne yaga, ka a ŋmenaa meŋ da sɔɔ a na bokɔɔloŋ boɔra, kyɛ ka a kyũũ waa zeɛ a na zẽẽ. ¹³ Ka a sazu ŋmarbie le a teŋɛ zu, a na kaŋkaŋ teɛ naŋ maŋ suori o wɔmɔ o naŋ wa daara sɛseɛ kpoŋ naŋ fu zuiŋ. ¹⁴ Ka a sazu da yi gaa a na ganvaare ba naŋ da billi, ka a tanne ane a tenne na zaa a mane naŋ gyilli, meŋ da sɛre yi a aroo ziiri. ¹⁵ Kyɛ ka a teŋɛ zu namine, ne a neŋkponni, ne a bondaŋneba, ne a sogyare turtur kaareba, ne a neŋkpeɛne, ne a gbaŋgbaare zaa, ne a nenweere zaa da sɔgle bamenne a tanne bogri ne pie puliŋ. ¹⁶ Ka ba yeli ko a tanne ne a pie, “Le pɔge te, a Onɔ naŋ zeŋ a naa dakogo zu niŋe soɔ ane a Pelee suuri zie ! ¹⁷ Bonso, O suuri bebikpoŋ ta la, kyɛ ka aŋ la na tõɔ̃ are?”

¹ A yi a ama zaa puoriŋ la ka N da nyɛ malkere anaare ka ba are a teŋɛ zu koŋkobo ziiri anaare. Ba da nyɔge la a teŋɛ zu sɛsere anaare taa ka a kon tõɔ̃ fuuro a teŋɛ zu, bee a mane, bee a teere zaa zie. ² Ka N nyɛ malke yuo kaŋ ka o yire a sapare duoro a taa a Naaŋmen voora `lego. Ka o da ŋmɛ kpɛlle ne kɔkɔkpoŋ ko a malkere anaare na ba naŋ da de a faŋ ko, ka ba wa dɔgre a teŋɛ ne a mane, ³ a yeli, “Ta dɔgre a teŋɛ, a mane, bee a teere, kyɛ gu ka te wa eŋ a te Naaŋmen gbaŋgbaare `legro a ba gberi eŋne.” ⁴ Kyɛ ka N woŋ ka a balaŋ na zaa ba naŋ da eŋ `lego, ka ba noɔre waa turi kɔɔ ne lezaayi ne banaare, a yi a Israel bibiiri balbale zaa poɔ. ⁵ A yi a Gyuda bale poɔ la ka nobɔ turi pie ne bayi da taa a `lego, ka a Ruben bale poɔ ka nobɔ turi pie ne bayi, ka a Gad bale poɔ ka nobɔ turi pie ne bayi, ⁶ ka a Aser bale poɔ ka nobɔ turi pie ne bayi, ka a Naftale bale poɔ ka nobɔ turi pie ne bayi, ka a Manasa bale poɔ ka nobɔ turi pie ne bayi, ⁷ ka a Simeon bale poɔ ka nobɔ turi pie ne bayi, ka a Lɛve bale poɔ ka nobɔ turi pie ne bayi, ka a Esakar bale poɔ ka nobɔ turi pie ne bayi, ⁸ ka a Zɛbolon bale poɔ ka nobɔ turi pie ne bayi, ka a Gyosɛf bale poɔ ka nobɔ turi pie ne bayi, ka a Bɛn-gyamen bale poɔ ka nobɔ turi pie ne bayi. ⁹ A ŋaa puoriŋ la ka N nyɛ ka nobɔ yaga are, neɛ zaa naŋ kon bɔŋ sɔre, a yi tendaare, balbale, nobɔ, ne kɔkɔe zaa poɔ, ka ba are a naaloŋ dakogo ne a Pelee niŋe soɔ. Ba da su la kparpeɛl wogri kyɛ taa kpaakpaa vaare ba nuuri poɔ. ¹⁰ Ka ba da ŋmeɛre kpɛlle ne kɔkɔkpoŋ a yeli: “Te Naaŋmen so la a faabo, Onɔ naŋ zeŋ a naaloŋ dakogo zu, kyɛ a Pelee meŋ so.” ¹¹ Ka a malkere zaa da ŋmaa gyilli a naaloŋ dakogo, ne a nembɛrɛ, ne a donvobɔ anaare zie. Ba da vɔgle la muru a naaloŋ dakogo niŋe soɔ a puori Naaŋmen, ¹² kyɛ yeli: “Amen! Pugibu ane eŋno ane yɛŋ ane bareka puoruu ane gyermɛ ane faŋa ane kpẽã zaa be te Naaŋmen zie tegteglɛ. Amen!” ¹³ Ka nembɛrɛ kaŋ da soore ma, “Aŋ la a bama naŋ su a kparpeɛl wogri. Yeŋ ka ba yi?” ¹⁴ Ka N leɛ yeli ko o, “Neŋkpoŋ, fõõ la bɔŋ.” Ka o yeli ko ma, “Bama la yi a dɔgroŋ kpoŋ poɔ, ka ba pɛge ba kpare wogri ka a yi furu tutu a Pelee zẽẽ poɔ. ¹⁵ A lɛ poɔ, “ba be la a Naaŋmen naaloŋ dakogo niŋe soɔ a tonɔ korɔ O ŋmenaa ne tensoɔ zaa O puoru die poɔ; kyɛ Onɔ naŋ zeŋ a naaloŋ dakogo zu meŋ na kpeɛrɛ la ba zie. ¹⁶ Ba kon leɛ taa kɔŋ zaa; ba meŋ kon leɛ taa kõɔ̃ nyuuri zaa. A ŋmenaa kon puri eŋ ba, bee toloŋ zaa nyege ba. ¹⁷ Bonso, a Pelee naŋ be a naaloŋ dakogo kpakyaga na guoli ba la; O meŋ na taa ba la gaa ne a bulivobɔ kõɔ̃ zie. Kyɛ Naaŋmen na meele la ŋmenaa kõɔ̃ zaa naŋ be ba nimie poore bare.”

¹ O naŋ da wa yuo a maro ayopõĩ sobɔ, a tenvelaa da gaŋ la o zaa kyĩĩ gogo kyɛlle poɔ. ² Ka N da nyɛ malkere ayopõĩ ka ba are Naaŋmen niŋe soɔ, ka ba da ko ba eelɛ ayopõĩ. ³ Ka malke kaŋ naŋ taa salema lale kaŋ da wa are a altar zie, ka ba da ko o bonnyuu yaga ka o de tere a laŋ ne a Ŋmendeme zaa puoruu a salema altar zu a naaloŋ dakogo niŋe soɔ. ⁴ Ka a bonnyuuri zoore laŋ ne a Ŋmendeme puoruu da yi a malke nu poɔ do Naaŋmen niŋe soɔ. ⁵ Ka a malke da de a lalee a paale o zaa ne a altar vũũ a de lɔɔ waare a teŋɛ zu. Ka kɔkɔe, ne saatannoo, ne saanyegroo ne teŋ-ŋmɛre pãã da be be. ⁶ Ka a malkere bayopõĩ na naŋ da taa a eelɛ ayopõĩ da piili nara na peɛle a eelɛ. ⁷ Ka a malke danwẽɛ̃ sobɔ da peɛle o deni, ka sakubo ne vũũ naŋ meele taa ne zẽẽ pãã da wa, ka ba de a lɔɔ eŋ a teŋɛ zu. Ka a teŋɛ zu ziiri ata ziyenaa da di vũũ, ka a teere ziiri ata ziyenaa meŋ da di vũũ, ka a mɔ`maara zaa meŋ di. ⁸ Ka a malke ayi sobɔ meŋ da peɛle o deni, ka ba da de bon kaŋ naŋ waa a na taŋ naŋ dire vũũ a lɔɔ eŋ a mane poɔ. Ka a mane ziiri ata ziyenaa da leɛ zẽẽ, ⁹ ka a bon-iri vobɔ zaa naŋ be a mane poɔ ziiri ata ziyenaa da kpi, ka a gboe zaa ziiri ata ziyenaa da saŋ. ¹⁰ Ka a malke ata sobɔ meŋ da peɛle o eele, ka ŋmarbir kpoŋ yi a tenvelaa wa le a dire vũũ te seŋ kanea vũũ, ka o le a bare ziiri ata ziyenaa ane a kõɔ̃bulimo zu— ¹¹ ka a ŋmarbir yuori di ka Tetuo. Ka a kõɔ̃ ziiri ata ziyenaa da leɛ waa tuo, ka nobɔ yaga da kpi a kõɔ̃ ŋa zuiŋ, a kõɔ̃ naŋ da waa tuo lɛ. ¹² Ka a malke anaare sobɔ meŋ da peɛle o eele, ka a ŋmenaa ziiri ata ziyenaa da ŋmɛre, laŋ ne a kyũũ ne a ŋmarbie ziiri ata ziyenaa, ka ana zaa ziiri ata ziyenaa da ligi. Ka a da ba puri a ŋmenaa ziiri ata ziyenaa saŋ, ka a da waa lɛ a tensoɔ saŋ meŋ. ¹³ Ka N da nyɛ kyɛ woŋ selaa kaŋ naŋ age kpeɛre a tenvelaa senselensoɔ, ka o yeli ne kɔkɔkpoŋ: “Yɛlɛ, yɛlɛ, yɛlɛ nyɔge la balaŋ naŋ kpeɛrɛ a teŋɛ zu, a malkere ata naŋ kyɛre eelɛ peɛloo zuiŋ!”

¹ Ka a malke anuu sobɔ peɛle o eele, ka N nyɛ ŋmarbir kaŋ ka o yi a tenvelaa a wa le a teŋɛ zu. Ba da de la a bog-zuluŋ saafebir ko o. ² Lɛ la ka o da yuo a bogi naŋ ba taa pare, ka zoore da ŋmeɛle a na a naŋ maŋ waa a vũũ kpoŋ zie. Ka a ŋmenaa ane a samaluon da ligi a zoore naŋ yi a bogi zuiŋ. ³ Ka sansobo da yi a zoore poɔ a wa a teŋɛ zu, ka ba meŋ da ko a faŋ, a na nanne naŋ taa faŋ a teŋɛ zu. ⁴ Ka ba da ko a noɔre ka a ta wa saŋ a moɔ naŋ be a teŋɛ zu, bee vasɔglaa zaa, bee teɛ kaŋ zaa, kyɛ a nobɔ na yoŋ naŋ ba taa a Naaŋmen `lego a ba gberi eŋne la. ⁵ Kyɛ ba da ba ko ba sori ka ba ko ba kyɛ ka a dɔgre ba yaga kyuuri anuu, kyɛ a dɔgroŋ da seŋ la nanne naŋ maŋ teɛ neɛ dɔgroŋ. ⁶ A beri na poɔ, nobɔ na maŋ boɔrɔ la kũũ kyɛ kon nyɛ lɛ zaa. Ba na sereŋ boɔrɔ la ka ba kpi, kyɛ kũũ na maŋ zo yi la ba zie. ⁷ Ka a sansobo waaloŋ meŋ da waa a na wie ba naŋ kyɔgre ka a gaa a zɔɔre zie. Kyɛ a zuri da waa la a na a naŋ vɔgle salema wederebe zupilii, ka a niŋe meŋ waa a na nensaaleba niŋni. ⁸ A da taa la zukɔɔloŋ a na pɔgɔbɔ zukɔɔloŋ, kyɛ ka a nyemɛ meŋ waa a na gbeŋni nyemɛ. ⁹ Ka a da taa nyaa woore naŋ waa a na zɔɔre kpartegre, ka a pegrɛ meŋ da pɔgrɔ gɔmɔ a na wie yaga ane a torokori a naŋ maŋ tagra a zoro kpeɛrɛ a zɔɔre poɔ. ¹⁰ A da taa la zoe a na nanne, ka tɛbo meŋ da be a zoe eŋne, kyɛ a zoe poɔ la ka a da taa faŋ ka a dɔgre nobɔ kyuuri anuu. ¹¹ Ka a da taa naa naŋ zuo a, naŋ da e a bogi naŋ ba taa pare malke, o yuori pare a Hibiru kɔkɔre poɔ da la Abbadon, kyɛ ka a Grik kɔkɔre poɔ, o yuori da la Apolluon. ¹² A yelwonnuŋ dandaŋ sobɔ tɔlɛ la; kyɛ kyɛllɛ, yelwonnuŋ ayi meŋ na wa la a ama puoriŋ. ¹³ Ka a malke ayoɔbo sobɔ da peɛle o deni, ka N da woŋ kɔkɔre kaŋ ka o yi a salema altar goŋgoni zuri anaare zie naŋ be Naaŋmen niŋe soɔ, ¹⁴ ka o yele korɔ a malke ayoɔbo sobɔ naŋ taa a eele, “`Lori a malkere anaare na ba naŋ `leŋ biŋ a Eoferates mane zie.” ¹⁵ Lɛ la ka ba `lori a malkere anaare naŋ kyɔgre gu gogo yenaa, ne bebiri yenaa, ne kyuu yenaa, ne yuoni yenaa, ka ba ko nensaala zibonyenaa ziiri ata poɔ. ¹⁶ A sogyare na naŋ da zɔme a wie da waa la turtur kɔɔre ayi, kyɛ N meŋ woŋ la a ba semmo. ¹⁷ A lɛ poɔ, N da nyɛ la a wie, n gyennoo poɔ, ne balaŋ naŋ da zɔme a, ka ba da taa zɔɔre kpartegre ka a waa zeɛ a na vũũ, ne uulu a na a samaluon, ne doɔr a na gyermore. Ka a wie zuri da waa a na gbeŋni zuri; ka vũũ, zoore, ane gyermore zaa meŋ yire a nɔe poore. ¹⁸ A yi a yeltuori ama ata faŋa poɔ la ka ba ko nensaala ziyenaa ziiri ata poɔ: vũũ, ne zoore, ne gyermore naŋ yi a nɔe poore. ¹⁹ Bonso, a wie faŋ zaa da be la a nɔe ne a zoe poore. Bonso, a zoe da waa la a na weere naŋ taa zuri, zuri na a naŋ maŋ eŋ ne baaloŋ. ²⁰ Kyɛ a nobɔ kyɛlle na naŋ da ba kpi a yeltuori ama poɔ, da ba leɛ ba teɛroŋ a kyaare ne a ba nuuri tomɔ. Ba da ba sage ka ba bare a kɔntɔmɔ ane tebɛ puoruu, tebɛ na ba naŋ da maale ne salema, selva, kurzeɛ, kuuri ane daare, naŋ kon tõɔ̃ nyɛ, bee woŋ, bee kyene. ²¹ Kyɛ ba meŋ da ba leɛ ba teɛroŋ a bare ba neŋko eroŋ, bee a ba soɔloŋ, bee ba pẽɛ̃pẽɛ̃ tomɔ, bee a ba nannyigruŋ.

¹ Ka N leɛ nyɛ malkekpẽã kaŋ ka o yi a tenvelaa sigre waara, a su zanzugo pɔge omeŋɛ zaa, ka sagon-gonaa meŋ da be o zu soɔ; o niŋe da waa la a na a ŋmenaa, ka o gbɛɛ da waa a na lugo naŋ dire vũũ. ² Ka o da taa ganvaare bile kaŋ naŋ yuo eŋ o nu poɔ, kyɛ de o doroŋ gbɛre dɔgle a mane zu a meŋ de o gɔba gbɛre dɔgle a teŋɛ zu, ³ kyɛ ŋmɛ kpɛlle ne kɔkɔkpoŋ a na gbeŋ naŋ maŋ tanne. Ka o naŋ da wa ŋmɛ kpɛlle, saatanne kɔkɔe ayopõĩ da maŋ yeli la yɛlɛ. ⁴ A saŋ na a saa kɔkɔe ayopõĩ tannoo naŋ da yeli, N da piili la ka N ŋmaa. Kyɛ N meŋ da woŋ la kɔkɔre kaŋ naŋ yi a tenvelaa naŋ yele korɔ ma, “Mare pɔge a yɛlɛ na a saatannoo naŋ yeli kyɛ ta ŋmaa a biŋ.” ⁵ A malke na N naŋ da nyɛ ka o are a mane ne a teŋɛ zu, da de la o nu tẽɛ̃ kyaare a tenvelaa. ⁶ O da pɔ la ne a Neɛ naŋ voorɔ tegteglɛ, a Neɛ naŋ da iri a tenvelaa ane boma zaa naŋ be o poɔ, ne a teŋɛ ane a boma zaa naŋ be o poɔ, ne a mane ane boma zaa naŋ be o poɔ, a yeli, “Saŋ ba la kyebe togtogi! ⁷ Kyɛ a bebie na poɔ a malke ayopõĩ sobɔ naŋ na peɛle o eele, a Naaŋmen yelsɔglaa na e la baare, a seŋ lɛ O naŋ manne ko O gbaŋgbaare, a Ŋmen-noɔr deme.” ⁸ Ka a kɔkɔre na N naŋ da woŋ a yi a tenvelaa, da leɛ yeli ko ma: “Gaa de a ganvaare bile naŋ yuo kyɛ be a malke naŋ are a mane ne teŋɛ zu nu poɔ.” ⁹ Lɛ la ka N gaa a malke zie a te yeli ko o, “Ko ma a ganvaare bile.” Ka o leɛ yeli ko ma, “De di. O na e la ka fo poɔ waa tuo, kyɛ o na nomɔ la seŋ seere a fo noɔre poɔ.” ¹⁰ Lɛ la ka N de a ganvaare bile a malke nu poɔ a di. Ka o da nomɔ seŋ seere n noɔre poɔ, kyɛ N naŋ di wa baare la, ka n poɔ zaa da waa tuo lɛ. ¹¹ Ka o pãã da yeli ko ma, “A ferɛ la ka fo leɛ kanne daŋ-nyaabo kannoo ko nobɔ, tendaare, kɔkɔe, ne namine yaga.”

¹ O da ko ma la muri kaŋ naŋ waa a na daa, kyɛ yeli, “Iri, a de manne a Naaŋmen die ne a altar, kyɛ sɔre balaŋ na zaa naŋ puoro a be. ² Kyɛ bare a yeŋ poɔ davoro. Ta wa manna a be, bonso, ba de la a be ko a Tendaa deme. Ba na nɛbre la a tenkyerete ne gbɛɛ kyuuri lezaayi ne ayi. ³ Kyɛ N na ko la n danseɛ deme bayi, naŋ na su boɔre pɛmɛ, faŋ ka ba tõɔ̃ kanne daŋ-nyaabo kannoo bebie turi, ne kɔɔre ayi ne lezaata.” ⁴ Bama la a Ɔleve teere ayi ane a kanea daare ayi naŋ are a teŋɛ zu Daŋna niŋe soɔ. ⁵ Ka neɛ zaa wa boɔrɔ ka o eŋ ba baaloŋ, vũũ na yi la ba noɔre poɔ a di a ba dɔndɔnne. Ka neɛ zaa wa boɔrɔ ka o eŋ ba baaloŋ, a fere ka ba ko o ne a koobo ŋa tɔ. ⁶ A bama bayi na taa la faŋ a na tõɔ̃ pɔge a sazu ka saa ta mi a bebie na poɔ ba naŋ kanna. Ba meŋ na taa la faŋ kõɔ̃ eŋɛ a tõɔ̃ vɛŋ ka a leɛ zẽẽ, kyɛ la tõɔ̃ ŋmɛ a teŋɛ zu ne yeltuori zaa a seŋ lɛ ba naŋ boɔrɔ. ⁷ Ba naŋ wa baare ba dansediu, a dombeɛ na naŋ wa yi a bogi naŋ ba taa pare, na ŋmaa la zɔɔre kyaare ne ba, a tõɔ̃ ba, a ko ba. ⁸ Ka a ba eŋgama na gaŋ a teŋkpoŋ foɔle poɔ, a teŋkpoŋ na ba naŋ maŋ boɔle a seɛloŋ poɔ ka Sodom ne Egyept, a be meŋ la ka ba kpa a ba Daŋna a dagara zu. ⁹ Ka balaŋ naŋ yi a nobɔ, balbale, kɔkɔe, ne tendaare zaa poɔ na kaara a kuuni beri ata ne kyɛlle kyɛ kon sage ka ba ũũ ba. ¹⁰ Kyɛ a balaŋ naŋ kpeɛrɛ a teŋɛ zu poore na pɛle la a ba zuiŋ, a taa kyelloo yaga, a de kyɔgtaare ko taaba, bonzuiŋ a Ŋmen-noɔr deme bayi bama da maŋ ko la balaŋ naŋ kpeɛrɛ a teŋɛ zu dɔgroŋ. ¹¹ Kyɛ a beri ata ne kyɛlle naŋ wa baare, vooroŋ naŋ yi a Naaŋmen zie da kpɛ ba la, ka ba iri are ba gbɛɛ zu, ka dambẽɛ̃ yaga da kpɛ balaŋ zaa naŋ da nyɛ ba. ¹² Ka ba da woŋ kɔkɔkpoŋ naŋ yi a tenvelaa ka a yele korɔ ba, “Yɛ do wa kyɛ.” Lɛ la ka ba do a tenvelaa zanzugo poɔ, ka ba dɔndɔnne da nyɛ ba. ¹³ A bebir na poɔ, a teŋɛ da ŋmɛre la ne dɔɔne yaga ka a teŋkpoŋ ziiri pie ziyenaa da le. Nobɔ turi ayopõĩ da kpi la a teŋ-ŋmɛroo poɔ, kyɛ ka balaŋ naŋ kyɛre da zoro la dambẽɛ, a pãã de eŋno ko a tenvelaa Naaŋmen. ¹⁴ A yelwonnuŋ ayi sobɔ tɔlɛ la, kyɛ kyɛllɛ, a yelwonnuŋ ata sobɔ waara la wiẽũ lɛ. ¹⁵ Ka a malkere ayopõĩ sobɔ peɛle o eele, ka kɔkɔkponni naŋ be a tenvelaa poɔ da yeli: “A donɛɛ naaloŋ leɛ la a te Daŋna ane O Kristo naaloŋ, kyɛ O na di la a naaloŋ tegteglɛ.” ¹⁶ Ka a nembɛrɛ lezɛre ne anaare na naŋ zeŋ a Naaŋmen niŋe soɔ a napare dakogri zu, da vɔgle muru a puori Naaŋmen, ¹⁷ a yeli: “Te puori Fo la bareka, a Faŋ Zaa Daŋna Naaŋmen, naŋ bebe kyɛ daŋ bebe, bonso, Fo de la a Fo faŋ kpoŋ a dire ne naaloŋ. ¹⁸ A tendaa deme da nyɛ la suuri; ka Fo suuri meŋ wa. A kuuni sɛrɛɛ diu saŋ ta la, ne a saŋ na Fo naŋ na tere yɔɔre ko a Fo gbaŋgbaare a Ŋmen-noɔr deme, ne a Ŋmendeme, ne balaŋ naŋ zoro a Fo yuori, a bile a laŋ ne a kponni, ne a saŋ na Fo naŋ na saŋ balaŋ zaa naŋ saŋ a teŋɛ zu bare.” ¹⁹ Ka a Naaŋmen die da yuo a tenvelaa poɔ, ka O nɔlaŋ daga meŋ da sãã a die na poɔ. Ka saanyegroo, kɔkɔe, saatannoo, teŋ-ŋmɛroo ane sakubɛrɛ leebu pãã da be be.

¹ Ka beeloŋ kpoŋ kaŋ da sãã a tenvelaa poɔ: pɔgɔ kaŋ naŋ su a ŋmenaa, ka a kyũũ be o gbɛɛ puliŋ, kyɛ ka nazupile naŋ taa ŋmarbie pie ne ayi vɔgle o zu eŋɛ. ² O da taa la poɔ kyɛ ŋmeɛrɛ kpɛlle, o naŋ boɔrɔ ka o dɔge zuiŋ. ³ Ka beeloŋ kaŋ leɛ sãã a tenvelaa poɔ: deraagon zeɛ kaŋ naŋ taa zuri ayopõĩ ane eelɛ pie, a vɔgle nazupilii ayopõĩ o zuri eŋne. ⁴ Ka o zoore wuo ŋmarbie ziiri ata ziyenaa a sazu poɔ a lɔɔ a bare ka a sigi wa le a teŋɛ zu. Ka a deraagon pãã are a pɔgɔ naŋ boɔrɔ ka o dɔge niŋe soɔ, a boɔrɔ ka o de a pɔgɔ bie vɔle a pare na poɔ o naŋ na dɔge. ⁵ Ka o da dɔge dɔɔlee, onɔ naŋ na kyeenɛ a tendaa deme zaa ane kuri dagolo. Ka ba da faa o bie ka o do Naaŋmen zie ane O naaloŋ dakogo zie. ⁶ Kyɛ a pɔgɔ pãã da zo kpɛ la wɛgyaŋ poɔ, zie kaŋ Naaŋmen naŋ da maale ko o, be la ka ba na tõɔ̃ kaa o bebie turi ne kɔɔre ayi ane lezaata. ⁷ Kyɛ ka zɔɔre meŋ da be a tenvelaa poɔ. Mekael ne o malkere da zɔɔ ne la a deraagon. Ka a deraagon ne o malkere meŋ leɛ zɔɔ. ⁸ Kyɛ ba da ba taa faŋ ka ba tõɔ̃ ba, ka ba da ba leɛ taa zie a tenvelaa poɔ. ⁹ Ba da lɔɔ la a deraagon kpoŋ bare—a waabo kora na ba naŋ maŋ boɔle ka a dɛvel bee Setaana, onɔ naŋ da maŋ e ka a donɛɛ deme zaa bɔre yi a sori. Ba da lɔɔ la a onɔ ane o malkere bare ka ba sigi wa le a teŋɛ zu. ¹⁰ Ka N da woŋ kɔkɔkpoŋ kaŋ a tenvelaa poɔ naŋ yeli: “Pampana ŋa te Naaŋmen faabo ane O faŋ ane O naaloŋ pãã wa la, laŋ ne a O Kristo faŋ. Bonso, ba da lɔɔ la a onɔ naŋ da maŋ nyare te yɔɔmine zu bare, onɔ naŋ da maŋ nyare ba zu Naaŋmen niŋe soɔ tensoɔ ne ŋmenaa zaa. ¹¹ Ba tõɔ̃ o la ane a Pelee zẽẽ ane a ba danseɛ yelbie; ba da ba nɔnɔ a ba nyɔvoe bee zoro kũũ dambẽɛ̃. ¹² A lɛ poɔ, vɛŋ ka a tenveɛle deme dire noɔ, ane yɛnee naŋ be a poɔ! Kyɛ yɛlɛ nyɔge la a teŋɛ ne a mane zaa, bonso, a dɛvel sigi wa la yɛ zie! O taa la sutoloŋ yaga, bonso, o bɔŋ la ka o saŋ waa la ŋmaa lɛ.” ¹³ A deraagon naŋ da nyɛ ka ba lɔɔ o bare a teŋɛ zu la, ka o da digre a pɔgɔ na naŋ da dɔge a dɔɔlee. ¹⁴ Ba da ko la a pɔgɔ selkpoŋ pegrɛ ayi ka o na tõɔ̃ age gaa o zie a wɛgyaŋ poɔ, be la ka ba na guoli o te ta saŋ kaŋ, saŋ mine ane saŋ kyɛlle, ka o ta be a waabo niŋe soɔ. ¹⁵ Ka a waabo kyiri kõɔ̃ a yi o noɔre poɔ ka a seŋ baa kõɔ̃, ka o na tõɔ̃ e ka a kõɔ̃ tuo a pɔgɔ gaa ne. ¹⁶ Kyɛ a teŋɛ da soŋ la a pɔgɔ a yuo o noɔre a vɔle a baa kõɔ̃ a deraagon naŋ da kyiri a yi a o noɔre poɔ. ¹⁷ Ka a deraagon da nyɛ suuri a pɔgɔ zu kyɛ pãã da gaa ka o te ŋmaa zɔɔre kyaare ne o bibiiri naŋ kyɛre, balaŋ naŋ eŋnɛ Naaŋmen nɔe kyɛ taa a Yesu Kristo danseɛ.

¹ Ka N are a mannoɔre zu a nyɛ ka a dombeɛ kaŋ yire a mane poɔ. O da taa la zuri ayopõĩ, ne eelɛ pie, ane nazupilii pie a o eelɛ eŋne, ka o zu zaa meŋ da taa faaloŋ yuori. ² A dombeɛ na N naŋ da nyɛ waa la seŋ wɛnyuo, ka o gbɛɛ waa seŋ bɛɛr gbɛɛ, kyɛ ka o noɔre meŋ waa na gbeŋ noɔre. Ka a deraagon da ko o, o faŋ, ne o naaloŋ dakogo, ane o faŋ kpoŋ. ³ N da nyɛ la o zu kaŋ ka o sãã na o taa la kũũ natere, kyɛ ka o natere ŋa da `maa la. A donɛɛ zaa noɔre da `maa la a dombeɛ yɛlɛ zuiŋ kyɛ tu o. ⁴ Ka ba da puori a deraagon naŋ da de faŋ ko a dombeɛ, kyɛ ka ba meŋ da puoro a dombeɛ a yele, “Aŋ la waa a na a dombeɛ? Aŋ la na tõɔ̃ zɔɔ ne o?” ⁵ Ba da ko la a dombeɛ noɔre ka o yeli yelkpeɛne ane yelfaare. Ba meŋ da ko o la sori ka o wuli o faŋ kyuuri lezaayi ne ayi. ⁶ Ka o da yuo o noɔre a yeli yelbifaare kyaare ne Naaŋmen, ne a O yuori, ne a O puoru sɛge, ne a balaŋ naŋ kpeɛre a tenvelaa poɔ. ⁷ Ba da ko o la sori ka o zɔɔ ne a Ŋmendeme a tõɔ̃ ba. Ba meŋ da ko o la faŋ ka a gaŋ bale zaa, ne nobɔ zaa, ne kɔkɔe zaa, ane a tendaa deme zaa. ⁸ Balaŋ zaa naŋ kpeɛrɛ a teŋɛ zu na puori o la— balaŋ zaa naŋ taa yoe ba naŋ ba ŋmaa eŋ a Pelee na ba naŋ da ko a donɛɛ pare biŋnu saŋ, nyɔvore gane poɔ. ⁹ Ka neɛ zaa wa taa toori, vɛŋ ka o woŋ. ¹⁰ Ka neɛ zaa wa tagra nempigri gɛrɛ ne, o meŋ na waa la nempigraa. Ka neɛ zaa na ko neɛ ne zɔɔre soɔ, a fere la ka ba meŋ ko o ne soɔ. Ŋaa la a Ŋmendeme kannyiri ne sagdeu. ¹¹ Ka N leɛ nyɛ dombeɛ kaŋ, ka o yire a teŋɛ poɔ a taa eelɛ ayi a na pelee naŋ taa, kyɛ yele yɛlɛ a na deraagon naŋ maŋ yeli. ¹² A dombeɛ danwẽɛ̃ sobɔ zuiŋ la ka o meŋ da erɛ a faŋ eroŋ na a danwẽɛ̃ sobɔ naŋ da erɛ, kyɛ erɛ ka a teŋɛ zu ane balaŋ zaa naŋ kpeɛrɛ a be, ka ba puoro a danwẽɛ̃ sobɔ naŋ da taa a kũũ natere naŋ baare. ¹³ O tonɔ la tonseɛle a wullo mannoo kponni, kyɛ erɛ ka vũũ meŋ yi a sazu a sigi wa gba, ka nensaala zaa nyɛ. ¹⁴ A da yi a tonseɛle na o naŋ da toŋ ne o faŋ zie la ka o bɛllɛ balaŋ naŋ kpeɛrɛ a teŋɛ zu. O da tonɔ la ama zaa a dombeɛ zuiŋ a yele korɔ a balaŋ naŋ kpeɛrɛ a teŋɛ zu ka ba da naa maale teo a dombeɛ waaloŋ eŋɛ, onɔ naŋ da taa a zɔɔre soɔ natere kyɛ kyãã da voorɔ. ¹⁵ Ba da ko o la sori ka o ko a dombeɛ teo vooroŋ, ka a dombeɛ teo na tõɔ̃ yeli yɛlɛ a meŋ e ka ba ko balaŋ naŋ ba sagra ka ba puori a teo. ¹⁶ O meŋ da fere la neɛ zaa, ka o waa bile bee kpoŋ, bondaŋna bee naŋ sobɔ, ka o waa la weɛlɛ bee gbaŋgbaa, ka o nyɛ `lego a o nudoroŋ eŋɛ bee o gbie eŋɛ, ¹⁷ ka neɛ zaa kon tõɔ̃ da bee koɔre ka o ba taa a `lego ŋa—a dombeɛ yuori bee a o yuori namba. ¹⁸ Yɛŋ be la kyɛ. Vɛŋ ka a neɛ na naŋ taa nyaan ka o sɔre bɔŋ a dombeɛ namba, bonso a e la nensaala namba. O namba waa la kɔɔre ayoɔbo ne lezaata ne ayoɔbo.

¹ Ka N leɛ kaa a nyɛ a Pelee ka O are a Zion taŋa zu, laŋ ne a nobɔ turi kɔɔ ne lezaayi ane anaare naŋ taa O yuori ne O saa yuori ka ba ŋmaa ba gberi eŋne. ² Ka N woŋ kɔkɔre kaŋ ka a yi a tenvelaa, ka a kɔkɔre da waa na kõɔ̃ naŋ vuuro yaga, kyɛ leɛ waa a na saatanne kpoŋ kaŋ. Ka N meŋ da woŋ gɔmɔ kaŋ naŋ da waa a na nobɔ naŋ ŋmeɛrɛ korengyori. ³ Ka ba da yiele yieluŋ paala kaŋ a naaloŋ dakogo ane a donvobɔ anaare ane a nembɛrɛ niŋe soɔ. Neɛ zaa da kon tõɔ̃ zanne a yieluŋ ka a nobɔ turi kɔɔ ne lezaayi ne anaare na ba naŋ da leɛ yɔɔ de a yi a teŋɛ zu deme naane. ⁴ Bana la balaŋ naŋ da ba dɛge bamenne ne pɔgɔbɔ, bonso ba taa la bamenne soŋ zaa. Bana la balaŋ naŋ da maŋ tu a Pelee gaa zie na zaa O naŋ gaa. Bana la balaŋ Yesu naŋ da leɛ yɔɔ de a yi nensaaleba poɔ, naŋ waa a na wɔmɔ danwẽɛ̃ deme a ko Naaŋmen ane O Pelee. ⁵ Ba da ba taa zirii zaa ba nɔe poɔ, bonso ba da ba taa saŋnaa zaa. ⁶ Ka N leɛ nyɛ malke kaŋ ka o age a sazu poɔ, kyɛ ka o taa a yelnoore naŋ kon bɔŋ baare ka o te kanne ko a balaŋ naŋ kpeɛrɛ a teŋɛ zu—a ko tendaa, bale, kɔkɔre, ane nobɔ zaa. ⁷ Ka o da yeli ne kɔkɔkpoŋ, “Yɛ zoro Naaŋmen kyɛ eŋnɛ O, bonzuiŋ O sɛrɛɛ diu gogo ta la. Yɛ puori a Onɔ naŋ maale a tenvelaa, ne a teŋɛ zu, ne a mane, ane a kõɔ̃bulimo zaa.” ⁸ Ka a malke ayi sobɔ tu wa, a wa yeli, “Babelon le la! O le la, a teŋkpoŋ na naŋ maŋ e ka tendaare zaa nyuuro a sutoloŋ dãã naŋ yi a o peɛmo yɛlɛ.” ⁹ Ka a malke ata sobɔ tu a ba puoriŋ a wa yeli ne kɔkɔkpoŋ: “Ka neɛ zaa wa puoro a dombeɛ ane o teo a de o `lego eŋ o gbie bee o nuuri eŋɛ, ¹⁰ a neɛ na sobɔ meŋ na nyu la Naaŋmen sutoloŋ dãã kpẽã O naŋ pore eŋ a O suuri kɔp poɔ. Balaŋ taaba na nyɛ la dɔgroŋ yaga ne vũũ ne gyermore naŋ dire, a malkere naŋ e kyerete ne a Pelee niŋe soɔ. ¹¹ Ba dɔgroŋ zoore duoro la tegteglɛ. Ba kon nyɛ pɛnnoo ŋmenaa bee tensoɔ zaa, balaŋ naŋ puoro a dombeɛ ane o teo, bee neɛ na zaa naŋ taa a o yuori `lego.” ¹² Ŋaa la a Ŋmendeme kannyiri, balaŋ naŋ eŋnɛ Naaŋmen nɔe kyɛ taa a Yesu sagdeu velaa. ¹³ Ka N leɛ woŋ kɔkɔre kaŋ naŋ yi a tenvelaa poɔ, ka o yele korɔ ma, “Ŋmaa aŋa: Maaloo be la a kuuni naŋ kpi a Daŋna zuiŋ zie, a yi pampana ŋa kyɛ gɛrɛ.” Ka a Seɛ leɛ yeli, “Oo, ka ba na pɛnne la a ba toŋkpeɛne poɔ, kyɛ ka ba tomɔ zaa tu ba la.” ¹⁴ Ka N leɛ kaa, kyɛ kyɛllɛ, ka zanzug-pela la bebe ka neɛ zeŋ a be naŋ waa a na “nensaala bidɔɔ” naŋ vɔgle salema wedere zupile o zu eŋɛ kyɛ taa gɔŋ naŋ dire o nu poɔ. ¹⁵ Ka malke kaŋ wa yi a Ŋmendie poɔ a ŋmeɛrɛ kpɛlle ne kɔkɔkpoŋ korɔ a sobɔ na naŋ zeŋ a zanzugo zu, “De a fo gɔŋ a kyeɛrɛ ne, bonzuiŋ a kyeɛbo ta la, kyɛ a teŋɛ zu kyeɛbo meŋ be la!” ¹⁶ Lɛ la ka a neɛ naŋ da zeŋ a zanzugo zu viiri o gɔŋ a teŋɛ zu kyɛ a teŋɛ zu da kyɛ. ¹⁷ Ka malke kaŋ leɛ yi a tenvelaa Ŋmendie poɔ meŋ naŋ da taa gɔŋ naŋ dire. ¹⁸ Ka malke kaŋ naŋ maŋ kaara a vũũ, meŋ da yi a altar zie a wa boɔle ne kpɛlkpoŋ ŋmeɛbo a sobɔ na naŋ taa a gɔŋ naŋ dire, kyɛ yeli, “Viiri eŋ fo gɔŋ naŋ dire a teŋɛ zu a wuo a teŋɛ zu oora garepi wɔmɔ, bonzuiŋ o garepi wɔmɔ be la!” ¹⁹ Ka a malke viiri eŋ o gɔŋ a teŋɛ zu, a wuo a teŋɛ zu oora tewɔmɔ, a de a lɔɔ eŋ a Naaŋmen sutoloŋ wɔndãã maaloo gborkpoŋ poɔ. ²⁰ Ba da nɛbe la a wɔmɔ a wɔndãã maaloo gbori poɔ a teŋ yeŋ poɔ, ka zẽẽ yire a wɔndãã maaloo gbori poɔ a duoro a te ta a wie nɔbɔmɔ, ka a meŋ ta mɛlɛ kɔɔ ne lezaanaare ne anuu sori.

¹ Ka N leɛ nyɛ manseɛle kpoŋ kaŋ a tenvelaa poɔ: ka malkere ayopõĩ da be be naŋ taa a yeltuori ayopõĩ pare baara deme. Bonso, a pare baara deme ama poɔ la ka Naaŋmen sutoloŋ da ta o tao. ² Kyɛ ka N da leɛ nyɛ zie kaŋ naŋ waa na mane kaŋ naŋ e kyaane kyɛ puli ne vũũ, ne balaŋ naŋ da tõɔ̃ a wɛdon ane o teo ane o `lego ne o yuori namba, ka ba are a mane naŋ e kyaane zu a taa a korengyori Naaŋmen naŋ da ko ba. ³ Ka ba da yiele a Naaŋmen gbaŋgbaa Moses yieluŋ, ane a Pelee yieluŋ, a yeli: “Fo tomɔ zaa waa la tombeɛ kponni, Faŋ Zaa Daŋna Naaŋmen. Fo sobiri zaa waa la sotori naŋ taa yelmeŋɛ, Fõõ, naŋ e a tendaare zaa Naa. ⁴ Aŋ la kon zoro Fo, Oo Daŋna, kyɛ ta eŋnɛ Fo yuori? Bonso, Fo yoŋ la waa soŋ. Tendaa deme zaa na wa la a wa puori a Fo niŋe soɔ, bonso, Fo yeltori zaa sãã la.” ⁵ A yi ama puoriŋ la ka N da leɛ kaa a tenvelaa poɔ, kyɛ kyɛllɛ, ka a Ŋmendie naŋ e a danseɛloŋ puoru sɛge da yuo. ⁶ Ka a malkere ayopõĩ naŋ taa a yeltuori ayopõĩ yi a Ŋmendie poɔ. Ba da su la lenon veɛle mine naŋ nyegrɛ kyɛ villi ba nyare ne salema kpagre. ⁷ Ka a donvobɔ anaare kaŋ da de ko a malkere ayopõĩ a salema lalii ayopõĩ naŋ paale ne a Naaŋmen naŋ voorɔ tegteglɛ sutoloŋ. ⁸ Kyɛ ka a Ŋmendie zaa da paale ne zoore naŋ yi a Naaŋmen eŋno ane O faŋa zie. Kyɛ neɛ zaa da kon tõɔ̃ kpɛ a Ŋmendie poɔ kyɛ gu ka a yeltuori ayopõĩ na a malkere ayopõĩ naŋ da wa ne, wa te baare.

¹ Ka N leɛ woŋ kɔkɔkpoŋ kaŋ a Ŋmendie poɔ ka o yele korɔ a malkere ayopõĩ, “Yɛ gaa te kyiri a Naaŋmen sutoloŋ bare a lalii ayopõĩ poɔ a teŋɛ zu. ² Ka a malke danwẽɛ̃ sobɔ gaa te kyiri o lalee poɔ deme a teŋɛ soɔ, ka gbontofaare naŋ buoro da ŋmɛre a nobɔ na naŋ taa a dombeɛ `lego kyɛ puoro a o teo. ³ Ka a malke ayi sobɔ kyiri o lalee poɔ deme eŋ a mane poɔ, ka a mane kõɔ̃ leɛ zẽẽ a na kuuni zẽẽ, ka bonvoora zaa naŋ be a mane poɔ kpi. ⁴ Ka a malke ata sobɔ kyiri o lalee poɔ deme eŋ a bare ne a kõɔ̃bulimo poɔ ka a meŋ leɛ zẽẽ. ⁵ Ka N woŋ a kõɔ̃ zaa malke ka o yeli: “Fo e la yeltori sobɔ, Fõõ, naŋ bebe kyɛ da bebe, naŋ e a Kyerete Sobɔ, bonzuiŋ Fo da di la a yɛlɛ ama sɛrɛɛ; ⁶ bonso ba kyiri la a Fo nobɔ ne Fo noɔr deme zẽẽ, kyɛ ka Fo ko ba zẽẽ lɛ naŋ seŋ ne ba ka ba nyu.” ⁷ Ka N leɛ woŋ a kaŋ a altar zie ka o leɛ yeli: “Oo, a Faŋ Zaa Daŋna Naaŋmen, Fo sɛrɛɛ diu waa la yelmeŋɛ ne yeltori.” ⁸ Ka a malke anaare sobɔ kyiri o lalee poɔ deme eŋ a ŋmenaa zu, ka ba ko o sori ka o di nobɔ ne vũũ. ⁹ Ka a nobɔ da nyege ne a vũũtoloŋ, ka ba yeli yelbifaare kyaare ne Naaŋmen yuori, Onɔ naŋ taa faŋ gaŋ a yeltuori ama. Kyɛ ba meŋ da ba leɛ ba teɛroŋ a de eŋno a ko O. ¹⁰ Ka a malke anuu sobɔ kyiri o laa poɔ deme eŋ a dombeɛ naaloŋ dakogo zu, ka o naaloŋ zaa da lige. Ba da donɔ la ba zelɛ a ɔɔbo zuiŋ, ¹¹ kyɛ da yeli yelbifaare kyaare ne a tenvelaa Naaŋmen a ba ɔɔbo ne a ba gbontori zuiŋ, kyɛ ka ba da ba leɛ ba eroŋ. ¹² Ka a malke ayoɔbo sobɔ kyiri o laa poɔ deme eŋ a Eoferates mane kpoŋ poɔ, ka o kõɔ̃ zaa nyoore a na maale a sobiri ko a namine naŋ yi a sapare. ¹³ Ka N nyɛ sedɛgɛ ata naŋ waa a na pɔnteɛ ka a yi a deraagon noɔre poɔ, ne a dombeɛ noɔre poɔ, ne a Ŋmen-noɔr sobɔ na naŋ maŋ ŋmaara zirii noɔre poɔ. ¹⁴ Ama waa la kɔntɔmɔ seere naŋ maŋ toŋ tonseɛle kyɛ yi gaa a teŋɛ zu namine zaa zie a na laŋ ba zaa taa ka ba gu a Faŋ Zaa Naaŋmen zɔɔre bebikpoŋ na. ¹⁵ “Kyɛllɛ, N waara la a na nannyige. Maaloo be la a neɛ na sobɔ naŋ maŋ guuro kyɛ taa o bonsuuri velaa ka o ta wa kyene ne eŋkpolo ka nobɔ zaa nyɛ o vi.” ¹⁶ Ka ba da laŋ ba taa a zie na ba naŋ maŋ boɔle ka Armagɛddon, a Hibiru kɔkɔre poɔ. ¹⁷ Ka a malke ayopõĩ sobɔ kyiri o laa poɔ deme eŋ a sazu sɛseɛ poɔ, ka kɔkɔkpoŋ kaŋ yi a naaloŋ dakogo zie a tenvelaa Ŋmendie poɔ a yeli, “A e la baare!” ¹⁸ Ka kɔkɔe, saatanno, ne saanyegroo pãã da bebe, kyɛ ka a teŋ meŋ ŋmɛre yaga. A teŋ-ŋmɛroo ŋa da ba taa tɔ a yi a saŋ na nensaala naŋ be teŋɛ zu, kyɛ da waa ŋmɛroo kpoŋ. ¹⁹ A teŋkpoŋ da ŋmɛre la ziiri ata, ka a tendaare tenne meŋ le. Naaŋmen da leɛ teɛre la Babelon Kpoŋ yɛlɛ, ka O da ko o a kɔp naŋ paale ne O sutoloŋ kpẽã dãã. ²⁰ Ka a tenne na zaa a mane naŋ gyilli da zo bɔre, kyɛ ka ba da kon leɛ nyɛ taŋ zaa. ²¹ Ka sakubɛrɛ yi a sazu le a nobɔ zu, ka a sakubo kaŋ zaa seŋ kilogram lezaayi ne anuu. Kyɛ ka ba da yeli yelbifaare kyaare ne Naaŋmen, a sakubo yeltuo zuiŋ, bonso, a yeltuo ŋa da zuo la.

¹ A malkere ayopõĩ kaŋ naŋ taa a lalii ayopõĩ da wa la a wa yeli yɛlɛ ko ma, “Wa, N na wuli fo la a dɔɔpeɛnɛ kpoŋ na naŋ zeŋ a kõɔ̃ yaga zu saŋ-baroo. ² Onɔ ne a teŋɛ zu namine da maale la pẽɛ̃pẽɛ̃ tomɔ, kyɛ a teŋɛ zu deme zaa meŋ da kuoli la ne o pẽɛ̃pẽɛ̃ tomɔ dãã.” ³ Lɛ la ka a malke tuo ma a Seɛ eŋɛ te kpɛ ne wɛgyaŋ poɔ. Be la ka N da nyɛ pɔgɔ kaŋ ka o zeŋ dombezeɛ kaŋ zu naŋ da pɔge o zaa ne yelfaare yoe a taa zuri ayopõĩ ane eelɛ pie. ⁴ A pɔgɔ da su la pɛnzeɛ ne pɛnvaelɔt wagyɛre ba naŋ da sɛ ne salema ne kusonne ne lɛpeɛle. O meŋ da taa la salema kɔp kaŋ a o nu eŋɛ, ka o paale ne o peɛmɛ bompoɔrɔ ne bondɛgɛ. ⁵ Yuori kaŋ da ŋmaa la eŋ a o gbie eŋɛ: YELSƆGLAA BABELON A KPOŊ SOBƆ DƆƆPEƐMƐ MA ANE A TEŊƐ ZU BOMPOƆRƆ MA. ⁶ Ka N nyɛ ka a pɔgɔ da kuoli ne a Ŋmendeme zẽẽ ane a Yesu danseɛ deme zẽẽ. N naŋ da nyɛ o, n noɔre zaa da `maa la. ⁷ Lɛ la ka a malke yeli ko ma: “Boŋ la so ka fo noɔre `maa? N na manne la ko fo a pɔgɔ ane a dombeɛ na o naŋ maŋ zɔme yelsɔglaa, a dombeɛ na naŋ taa zuri ayopõĩ ne eelɛ pie. ⁸ A dombeɛ fo naŋ nyɛ, saŋ kaŋ la ka o da bebe, kyɛ pampana o kyebe. Kyɛ o na wa yi la a bogi naŋ ba taa pare poɔ a gaa o saŋnaa zie. A teŋɛ zu nobɔ, balaŋ yoe ba naŋ ba ŋmaa eŋ a nyɔvore gane poɔ a yi a donɛɛ pare biŋnu saŋ, nɔe na `maa la ka ba naŋ wa nyɛ a wɛdon naŋ da bebe, kyɛ ba la kyebe pampana, kyɛ na leɛ wa. ⁹ “Ŋaa la a teɛroŋ naŋ taa yɛŋ. A zuri ayopõĩ waa la tanne ayopõĩ a pɔgɔ naŋ zeŋ a zu. ¹⁰ Namine bayopõĩ be la be. Namine banuu le la, ka kaŋ bebe, kyɛ kaŋ ba wa sɛre. Ka a kaŋ na naŋ ba wa sɛre wa te wa, a na fere la ka o bebe ka a kɔɔre belaŋ. ¹¹ Kyɛ a dombeɛ na naŋ da bebe, kyɛ ba la bebe, waa la a anii sobɔ naŋ poɔ a bayopõĩ poɔ; kyɛ o gɛrɛ la o saŋnaa zie. ¹² “A eelɛ pie na fo naŋ da nyɛ, e la namine pie naŋ ba nyɛ naaloŋ sɛre, kyɛ ba na nyɛ la naaloŋ diu faŋ gogo yenaa poɔ laŋ ne a dombeɛ. ¹³ Bama taa la teɛroŋ bonyenaa, kyɛ ba meŋ na de la ba faŋ ne ba kpẽã zaa ko a dombeɛ. ¹⁴ Ba na zɔɔ la ne a Pelee, kyɛ a Pelee na tõɔ̃ ba la, bonzuiŋ Onɔ la a daŋneba zaa Daŋna ane a namine zaa Naa. Balaŋ O naŋ da boɔle kyɛ iri, balaŋ O naŋ tõɔ̃ dɛlle, na be la O zie.” ¹⁵ Ka a malke yeli ko ma, “A kõɔ̃ fo naŋ nyɛ, a be a dɔɔpeɛnɛ naŋ zeŋ, e la nobɔ, ne a gyamaa, ne a tendaare deme, ane a kɔkɔe zaa deme. ¹⁶ A dombeɛ ane o eelɛ pie fo naŋ da nyɛ na kyiiri la a dɔɔpeɛnɛ, a e ka o zage o zaa kyɛ bare o eŋgan kpoli; ba meŋ na ɔɔ la o eŋgan kyɛ nyege o ne vũũ. ¹⁷ Bonso, Naaŋmen de la lɛ eŋ ba sukyie poɔ ka ba na toŋ O boɔbo, a taa teɛroŋ bonyenaa a na de ba naaloŋ ko a dombeɛ kyɛ gu ka a Naaŋmen yelbie wa tu. ¹⁸ Kyɛ a pɔgɔ fo naŋ da nyɛ e la a teŋkpoŋ na naŋ dire naaloŋ a teŋɛ zu namine zie.”

¹ Ama zaa puoriŋ, N leɛ nyɛ la malke kaŋ ka o yi a tenvelaa sigre waara, naŋ taa faŋa yaga, ka a teŋɛ zu zaa da kyaane ne o eŋno. ² Ka o ŋmɛ kpɛlle ne kɔkɔkpoŋ, a yeli: “Babelon a Kpoŋ Sobɔ le la! O le la! O leɛ waa la kɔntɔmɔ kpeɛbo zie ane sedɛgre kaŋ zaa pigu die, a zie na ba naŋ pigi nuule dɛgre kaŋ zaa ba naŋ ba nɔŋ. ³ Bonso, a tendaare zaa da nyu la a o pẽɛ̃pẽɛ̃ sutoloŋ dãã. A teŋɛ zu namine toŋ la peɛmo tomɔ ne o, ka a teŋɛ zu naŋkoɔreba nyɛ tɔnɔ yaga a yi o bontaroŋ naŋ zuo zie.” ⁴ Ka N leɛ woŋ kɔkɔre kaŋ naŋ yi a tenvelaa, ka o yeli: “Yɛ wa yi o poɔ, n nobɔ, ka yɛ ta laŋ ne o a o yelbebe poɔ, kyɛ ka yɛ ta wa nyɛ o yeltuo kaŋ zaa; ⁵ bonso, o yelbebe duori la te ta a tenvelaa, ka Naaŋmen pãã leɛ teɛre o yelbatori eroŋ. ⁶ De ko o a seŋ lɛ o naŋ da de ko fo; leɛ yɔɔ o boyi a seŋ ne o tomɔ. A seŋ lɛ o naŋ da de a kɔp pore eŋ fo manne, meŋ leɛ de a mannoo ŋa eŋ o boyi. ⁷ A seŋ na o naŋ da de eŋno ne bonveɛle diu yaga ko omeŋɛ, meŋ leɛ ko o dɔgroŋ ne posaŋnaa yaga lɛ. Bonso, o maŋ yele la o sukyiri poɔ, ‘N zeŋ la pɔɔnaa dakogo zu; N ba waa pɔɔkoɔre, kyɛ N kon bɔŋ posaŋnaa zaa.’ ⁸ A lɛ poɔ, o yeltuori na wa la bebir bonyenaa poɔ: kũũ, konni, ne kɔŋ. Vũũ na di la o zaa, bonso, a Daŋna Naaŋmen naŋ dire o sɛrɛɛ taa la kpẽã. ⁹ “A teŋɛ zu namine naŋ da toŋ peɛmo tomɔ ne o, kyɛ poŋ ne o a o bonveɛle diu, na koŋ la kyɛ taa posaŋnaa o zuiŋ, a saŋ na ba naŋ wa nyɛ a zoore naŋ yi o vũũ diu poɔ. ¹⁰ Ba na are la zitɔɔre, ba naŋ zoro o dɔgroŋ dambẽɛ̃ zuiŋ, kyɛ yeli: “ ‘Yɛlɛ! Yɛlɛ! Babelon teŋkpoŋ zaa, a teŋkpẽã zaa! Gogo bonyenaa poɔ la ka fo sɛrɛɛ diu na ta!’ ¹¹ “A teŋɛ zu naŋkoɔreba na koŋ la kyɛ nyɛ posaŋnaa yaga, bonso neɛ zaa ba la daara ba boma— ¹² salema ne selva, kusonne ne lɛpeɛle bontuori; wagyɛ veɛle ba naŋ da maale ne lenon, pɛnvaelɔt, pɛnzeɛ, ne pɛmbaaloŋ; aŋkaa teere daare kaŋ zaa, ane boma zaa ba naŋ maale ne wɔɔnyemɛ, ne boma ba naŋ maale ne dasonne zaa, kuri, kurzeɛ, ane kunyegraa zaa; ¹³ senamon, ensɛns, kããnyuuri, bonnyuu dalii, tewɔmɔ dãã, ɔleve kãã, zɔnvelaa, ane mɔbie; nii ne peere; wie ane a wiri torokori; ne nensaala eŋgama ne a ba vooroŋ. ¹⁴ “Ba na yeli la, ‘A wɔmɔ na fo vooroŋ naŋ da boɔrɔ yaga lɛ ba la kyebe fo zie. Bonnoore ne bonveɛle zaa ba la kyebe fo zie, kyɛ fo kon leɛ bɔŋ nyɛ a boma ama togtogi.’ ¹⁵ A naŋkoɔreba naŋ koɔre a boma ama, a nyɛ tɔnɔ yaga o zuiŋ, na are la zitɔɔre ane dambẽɛ̃ a o dɔgroŋ zuiŋ, a kono ne ŋmenaa kõɔ̃, ¹⁶ a yeli: “ ‘Yɛlɛ! Yɛlɛ! A teŋkpoŋ na naŋ da su lenon veɛle, pɛnvaelɔt, ane pɛnzeɛ ba naŋ da sɛ ne salema, kusonne ne lɛpeɛle! ¹⁷ A bonveɛle naŋ da zuo da wɛ la gogo bonyenaa poɔ!’ “Ka a gbori daŋna zaa ne balaŋ zaa naŋ maŋ kpɛ gbori gaa zie, ne a gbori tontoneba ne balaŋ zaa naŋ maŋ koɔrɔ boma a mane loori zaa, na are tɔɔre lɛ. ¹⁸ Ba naŋ wa nyɛ a vũũ zoore ka a dire, ba na ŋmɛ la kpɛlle a yeli, ‘Boŋ la seŋ ne a teŋkpoŋ ŋa?’ ¹⁹ Ka ba na ɔŋ uuruŋ lɔɔ eŋ ba zuri eŋɛ, kyɛ koŋ ne ŋmenaa kõɔ̃ a ŋmɛ kpɛlle, a yeli: “ ‘Yɛlɛ! Yɛlɛ! A teŋkpoŋ ŋa, a be na balaŋ naŋ taa gboe a mane zu naŋ da waa bondaŋneba a yi o bontaroŋ zie! O da wɛ la gogo boyenaa poɔ! ²⁰ Woŋ noɔ o zie, tenvelaa deme zaa, laŋ ne a potuuribo kyerete ne a Ŋmen-noɔr deme! Bonso, Naaŋmen di la o sɛrɛɛ a yɛ zuiŋ.’ ” ²¹ Ka malkekpẽã kaŋ da de kuuri ka o tegroŋ seŋ neɛrkpoŋ, a lɔɔ eŋ a mane poɔ kyɛ yeli: “Ba na lɔɔ la a teŋkpoŋ Babelon a teŋɛ soɔ ne a kpẽã ŋa tɔ, ka ba kon leɛ nyɛ o zaa. ²² Ba kon leɛ woŋ a korengyo ŋmeɛbo bee yieluŋ, bee welee, bee eelɛ peɛloo fo poɔ. Bommaaleba zaa kon leɛ toŋ ba tomɔ a fo poɔ, ka neɛ zaa meŋ kon leɛ woŋ zɔŋ neɛrbɛ gɔmɔ. ²³ Ba kon leɛ nyɛ kanea vũũ zaa a fo poɔ, ba meŋ kon leɛ woŋ a serpaala ne o pɔɔpaala kɔkɔre togtogi. A fo naŋkoɔreba da waa la a teŋɛ zu neŋkponni. A yi a fo soɔ tẽẽ maaloo la ka fo da e ka a tendaa zaa da bɔre yi a sori. ²⁴ A o poɔ la ka ba nyɛ a Ŋmen-noɔr deme ne a nensonne ne a balaŋ na zaa ba naŋ da ko zẽẽ.”

¹ Ama puoriŋ la ka N da woŋ tannoo kpoŋ kaŋ naŋ yi a gyamaa zie a tenvelaa poɔ, ka ba yeli: “Haleluya! Faabo ne faŋ ne eŋno be la te Naaŋmen zie, ² bonso, O sɛrɛɛ diu e la yelmeŋɛ ne yeltori. O da di la a dɔɔpeɛne kpoŋ sɛrɛɛ, onɔ naŋ da saŋ a teŋɛ zu ne o pẽɛ̃pẽɛ̃ tomɔ. O da leɛ yɔɔ la a faaloŋ yɔɔre ko o, onɔ naŋ da kyiri O gbaŋgbaare zẽẽ bare.” ³ Kyɛ ka ba la leɛ yeli: “Haleluya! O zoore duoro la tegteglɛ.” ⁴ Ka a nembɛrɛ lezɛre ne banaare ane a donvobɔ anaare vɔgle muru a puori Naaŋmen naŋ zeŋ a naaloŋ dakogo zu, a yeli: “Amen. Haleluya!” ⁵ Lɛ la ka kɔkɔre kaŋ yi a naaloŋ dakogo zie, a yeli: “Pugi a te Naaŋmen, yɛnee O gbaŋgbaare zaa, a laŋ ne yɛ balaŋ naŋ zoro O, yɛnee nembilii ane neŋkponni zaa!” ⁶ N da woŋ la bon kaŋ a na gyamaa kɔkɔe, a na kõɔ̃ naŋ vuuro yaga, a leɛ waa a na saakpẽã tannoo, ka a yeli: “Haleluya! Bonso, a te Daŋna Naaŋmen, a Faŋa Zaa Daŋna, di la O naaloŋ. ⁷ Vɛŋ ka te poore pɛle, ka te dire noɔ yaga a de eŋno ko O! Bonso, a Pelee kultaa tigri bebir ta la, ka O pɔgɔ kyɔgre omeŋɛ. ⁸ Ba da e la ka o su lenon pɛnveɛle naŋ ba taa dɛgre zaa kyɛ nyegrɛ.” (A lenon pɛnveɛle wullo la a Ŋmen-deme yeltori eroŋ.) ⁹ Ka o yeli ko ma, “Ŋmaa aŋa: ‘Maaloo be la balaŋ zaa ba naŋ boɔle ka ba wa a Pelee kultaa tigri zie!’ ” Ka o da leɛ yeli ko ma, “Ama la a Naaŋmen yelbimenne.” ¹⁰ Ka N le o gbɛɛ puliŋ a na puori o, kyɛ ka o yeli ko ma, “Ta e lɛ! N e la a fo gbaŋgbaa tasobɔ naŋ poɔ a fo yɔɔmine naŋ taa a Yesu danseɛ poɔ. Puori Naaŋmen! Bonso, a Yesu danseɛ e la a Ŋmen-noɔr deme daŋ-nyaabo vooroŋ.” ¹¹ Ka N nyɛ a tenvelaa ka o yuo, kyɛ kyɛllɛ, wirpela kaŋ la da bebe. A neɛ naŋ zɔme a wiri yuori di la Yeldɛlloo ne Yelmeŋɛ. Yeltoruŋ poɔ la ka O di sɛrɛɛ kyɛ ŋmaara zɔɔre. ¹² Ka O nimie da waa na vũũ zeɛlɛ, kyɛ ka nazupilii yaga da be O zu eŋɛ. O da taa la yuori kaŋ ba naŋ da ŋmaa eŋ O, ka neɛ zaa da ba bɔŋ a yuori na ka O yoŋ naane. ¹³ Ka O su kparwogri naŋ meele ne zẽẽ, kyɛ ka O yuori di ka Naaŋmen Yelbiri. ¹⁴ Ka a tenvelaa sogyare da tuuro O a zɔme wirpeɛle kyɛ su lenon bonsupeɛle naŋ ba taa dɛgre zaa. ¹⁵ Ka sɔdiraa kaŋ da yire O noɔre, a soɔ na O naŋ na de kyɛ ne a tenne. “O na kyeenɛ ba la ne kuri dagolo.” O neɛrɛ la a wɔmɔ naŋ be Naaŋmen, a Faŋ Zaa Sobɔ sutoloŋ kpoŋ wɔndãã maaloo gbori poɔ. ¹⁶ A O kparwogri poɔ, ne a O gbɛkpoŋ zie la ka ba da ŋmaa a yuori ŋa: NAMINE ZAA NAA NE DAŊNEBA ZAA DAŊNA ¹⁷ N pãã da nyɛ la malke kaŋ ka o are a ŋmenaa poɔ a ŋmeɛrɛ kpɛlle ne kɔkɔkpoŋ a yele korɔ a nuulii naŋ maŋ age a sazu senselensoɔ, “Wa! Yɛ wa laŋ taa a Naaŋmen kpoŋ tigri zie, ¹⁸ ka yɛ na tõɔ̃ ɔɔ a namine eŋgama ane a sogyakaara zudeme eŋgama, ne a neŋkpeɛne eŋgama, ne a wie laŋ ne a zɔɔmɔ eŋgama, ne a nensaaleba zaa eŋgama, nenweɛlɛ ne gbaŋgbaa, bile ne kpoŋ zaa.” ¹⁹ Ka N leɛ nyɛ a dombeɛ ne a teŋɛ zu namine ne a ba sogyare, ka ba laŋ taa a na zɔɔ ne a neɛ naŋ zɔm a wiri ane O sogyare. ²⁰ Ba da nyɔge la a dombeɛ laŋ ne a Ŋmen-noɔr sobɔ na naŋ maŋ ŋmaara zirii, naŋ da toŋ tonseɛle a ko o, a tonseɛle na o naŋ da toŋ a te bɛlle balaŋ naŋ da de a dombeɛ `lego kyɛ puoro a o teo. Ba da de la a bama bayi naŋ voorɔ a lɔɔ eŋ a vũũ mane poɔ naŋ dire ne gyermore. ²¹ Ka a zɔɔre soɔ na naŋ yire a neɛ naŋ zɔm a wiri noɔre poɔ da ko la balaŋ naŋ kyɛre, ka a nuulii zaa di ba eŋgama tege.

¹ Ka N nyɛ malke kaŋ ka o yi a tenvelaa a sigre waara a taa a bogi naŋ ba taa pare saafebiri, kyɛ la taa banzɔlɔ kpoŋ kaŋ a o nu poɔ. ² Ka o nyɔge a deraagon, a waabo kora na ba naŋ maŋ boɔle ka Dɛvel bee Setaana, a `leŋ o biŋ yuomo turi. ³ O da de o la lɔɔ eŋ a bogi naŋ ba taa pare poɔ, kyɛ pɔge o a be a eŋ `lego o zu ka o ta leɛ bɛlle a tendaa deme togtogi kyɛ gu ka a yuomo turi wa baare. Kyɛ a yi a lɛ puoriŋ, a na fere la ka o bare o weɛlɛ belaŋ lɛ. ⁴ N nyɛ la naaloŋ dakogri ane balaŋ naŋ zeŋ a zu, ka ba da ko ba faŋ ka ba e sɛrɛɛ direbe. N meŋ la nyɛ la balaŋ ba naŋ kyɛ ba zuri ŋmaa ba danseɛ a Yesu ne Naaŋmen yelbiri zuiŋ. Ba da ba puoro a wɛdon bee a o teo, kyɛ ba meŋ da ba de o `lego ba gberi bee ba nuuri eŋɛ. Ba da leɛ voorɔ la kyɛ dire naaloŋ ne Kristo yuomo turi. ⁵ Kyɛ a kuuni naŋ kyɛre da ba leɛ voorɔ kyɛ gu a yuomo turi baaro saŋ. Ŋaa la a kũũ leɛiruŋ dandaŋ sobɔ. ⁶ Maaloo ne kyereteluŋ be la a neɛ na naŋ poɔ a kũũ leɛ-iruŋ dandaŋ sobɔ poɔ. A kũũ boyi sobɔ kon tõɔ̃ taa faŋ ba zu, kyɛ ba na e la Naaŋmen ane a Kristo puoru neŋkponni a di naaloŋ ne O yuomo turi. ⁷ Ka a yuomo turi wa baare, ba na iri la Setaana bare a pigu die poɔ. ⁸ Kyɛ o na yi la te bɛllɛ a tenne naŋ be a teŋɛ koŋkobo anaare zaa ziiri—Gog ane Magog—a laŋ ba taa ka ba zɔɔ zɔɔre. Ba da waa la yaga a seŋ biire naŋ be a mannoɔre. ⁹ Ka ba are la fuoli a kyeŋ gaŋ a teŋ-yɛloŋ poɔ a gyilli a zie na a Naaŋmen deme naŋ kpeɛrɛ, ane a teŋ na O naŋ nɔŋ. Ka vũũ da yi a Naaŋmen zie ne a tenvelaa poɔ a wa di ba zaa. ¹⁰ Kyɛ a dɛvel naŋ da bɛlle ba, ba da lɔɔ o la eŋ a gyermore ne vũũ mane poɔ, a zie na ba naŋ da lɔɔ a dombeɛ ane a Ŋmen-noɔr ziri sobɔ eŋ. Be la ka ba na nyɛ dɔgroŋ yaga, ŋmenaa ne tensoɔ zaa, tegteglɛ. ¹¹ Ka N nyɛ naaloŋ dakogo kpoŋ naŋ waa pelaa, ne a neɛ na naŋ da zeŋ o zu. Ka a teŋɛ ne a sazu zaa da age yi o niŋe soɔ, ka zie meŋ kyebe ko ba. ¹² Kyɛ N nyɛ la a kuuni, a kponni ne a bilii zaa, ka ba are a naaloŋ dakogo niŋe soɔ. Kyɛ ka gama da yuo, ka ba da la yuo a gane kaŋ, onɔ da la a Nyɔvore Gane. Ba da di la a kuuni sɛrɛɛ ka a seŋ lɛ kaŋ zaa naŋ da toŋ, ka a be a gama poɔ. ¹³ Ka a mane da tere a kuuni naŋ be o poɔ, ka kũũ ne a kuuni zie meŋ da tere a kuuni naŋ be a zie. Lɛ ka neɛ kaŋ zaa da nyɛ sɛrɛɛ diu a seŋ lɛ o naŋ da toŋ. ¹⁴ Kyɛ ka ba de kũũ ane a kuuni zie a lɔɔ eŋ a vũũ mane poɔ. A vũũ mane la a kũũ boyi sobɔ. ¹⁵ Kyɛ ka neɛ zaa wa nyɛ ka ba da ba ŋmaa o yuori eŋ a Nyɔvore Gane poɔ, ba da maŋ lɔɔ la a sobɔ na eŋ a vũũ mane poɔ.

¹ Ka N da leɛ nyɛ tenvela paala ane teŋ paala, bonso a tenvelaa piila ane a teŋ piila da tɔlɛ la, ka mane zaa meŋ da ba la kyebe. ² N nyɛ la a Tenkyerete, a Gyɛrosalɛm Paala, ka o sigre waara a yire a tenvelaa ne Naaŋmen zie a maale o zaa a na pɔɔpaala naŋ su bonveɛle a o serɛ zuiŋ. ³ Kyɛ ka N woŋ kɔkɔkpoŋ kaŋ naŋ yi a tenvelaa ka o yeli, “Kyɛllɛ, a Naaŋmen puoru sɛge be la nensaaleba zie. O na kpeɛrɛ ne ba la, kyɛ ka ba meŋ waa O nobɔ. Naaŋmen meŋɛ na be la ba zie a e ba Naaŋmen. ⁴ O na meele la ŋmenaa kõɔ̃ zaa bare ba nimie poɔ. Kũũ kon leɛ kyebe bee posaŋnaa bee konni. Ɔɔbo zaa meŋ kon kyebe, bonso a koroŋ boma tɔlɛ la.” ⁵ Ka a neɛ na naŋ da zeŋ a naaloŋ dakogo zu da yeli, “Kyɛllɛ, N maale la bon zaa paala!” Ka O pãã leɛ yeli, “Ŋmaa ama biŋ, bonso a yelbie ama waa la yeldɛlle ne yelmeŋɛ.” ⁶ Ka O yeli ko ma: “A e la baare. Maa la a Alfa ne a Omega, a piiluu ane a baaraa. N na tere la kõɔ̃ naŋ yi a nyɔvore kõɔ̃bulii weɛlɛ ko neɛ na zaa sobɔ na kõɔ̃ nyuuri naŋ kpɛ. ⁷ A neɛ na zaa naŋ toɔna na di la ama zaa gbannoŋ, kyɛ ka N e o Naaŋmen, kyɛ ka o meŋ e N bidɔɔ. ⁸ Kyɛ a balaŋ naŋ maŋ zoro dambẽɛ̃, ne a basagdeu deme, ne a nempoɔne, ne a neŋkooreba, ne a pẽɛ̃pẽɛ̃ deme, ne a soɔ tẽẽ maaleba, ne a tebɛ deme, ne a ziri-ŋmaareba zaa, ba zie na la a mane naŋ dire ne vũũ ne gyermore. Ŋaa la a kũũ boyi sobɔ.” ⁹ A malkere ayopõĩ kaŋ naŋ taa a lalii ayopõĩ naŋ paale ne a yeltuori ayopõĩ pare baara deme, da wa la n zie a yeli, “Wa ! N na wuli fo la a pɔɔpaala, a Pelee pɔgɔ.” ¹⁰ Ka o tuo ma a Seɛ poɔ te do ne a taŋkpoŋ kaŋ zu naŋ do saa yaga lɛ, a te wuli ma a Tenkyerete, Gyɛrosalɛm, ka o sigre waara a yire a tenvelaa ne Naaŋmen zie. ¹¹ A Tenkyerete da taa la Naaŋmen eŋno, ka o kyãã da waa na kusoŋ naŋ veɛlɛ zuo, a leɛ waa a na gyaspɛr kuuri, a la nyɛrɛ a na kõɔ̃ kpɔgɔ. ¹² O da taa la dankyen ka o do saa yaga lɛ, ane dendɔe pie ne ayi ane malkere pie ne ayi ka ba zeŋ a dendɔe eŋne, ka ba meŋ da ŋmaa a Israel bidɔbɔ bale pie ne ayi yoe a dendɔe eŋne. ¹³ Dendɔe ata da kyaare la a sapare, ka ata kyaare a zu, ka ata kyaare a pare, kyɛ ka ata meŋ kyaare a luo. ¹⁴ A teŋ dankyen da taa la dankyen parɛɛ pie ne ayi, kyɛ ba meŋ da ŋmaa la a Pelee potuuribo pie ne bayi yoe a ama eŋne. ¹⁵ A malke naŋ da yeli yɛlɛ ane ma da taa la muri kaŋ naŋ waa a na daa ba naŋ maale ne salema ka o de manne ne a teŋ, a o dendɔe, ane o dankyeme. ¹⁶ Ka a teŋ da taa koŋkobo anaare, a waa wogi kyɛ leɛ waa yɛloŋ ka a seŋ taa. O da manne la a teŋ ne a muri na, a nyɛ ka o wogruŋ ta mɛlɛ turi ne kɔɔre anaare. O wogruŋ ane o yɛloŋ laŋ ne o duobu zaa da seŋ la taa. ¹⁷ O meŋ da manne la a teŋ dankyen ka o yɛloŋ meŋ waa mitari lezaata ne anuu. Nensaala mannoo la ka a malke da de manne ne. ¹⁸ Gyaspɛr la ka ba da de mɛ ne a dankyen, kyɛ ka ba da de salema welwel maale ne a teŋ naŋ nyɛrɛ a na kyaala. ¹⁹ Ba da maale la a teŋ dankyen pare zaa ne kuveɛle kaŋ zaa. A dankyen pare piilaa, gyaspɛr la ka ba da maale ne, ka ayi sobɔ e safaer, a ata sobɔ e kalsedone, ka anaare sobɔ e ɛmɛraldɛ, ²⁰ anuu sobɔ e sardɔnoks, a ayoɔbo e sardeos, ayopõĩ sobɔ e kerosolait, anii sobɔ e bɛrol, awae sobɔ e topaz, a pie sobɔ e kerosoperase, ka a pie ne yeni sobɔ e gyasent, kyɛ ka a pie ne ayi sobɔ e amɛtost. ²¹ Ka a dendɔe pie ne ayi da la kupeɛle pie ne ayi, ka a dendɔre zaa maale are ne kupela bonyeni. A teŋ foɔle meŋ da maale la ne salema kyɛ nyɛrɛ a na kyaala. ²² N da ba nyɛ Naaŋmen die zaa a teŋɛ na poɔ, bonzuiŋ a Faŋ Zaa Daŋna Naaŋmen ane a Pelee la a o Naaŋmen die. ²³ A teŋɛ da ba boɔrɔ ŋmenaa bee kyũũ ka a puri eŋ o, bonso a Naaŋmen eŋno da kyaane la a o poɔ kyɛ a Pelee meŋ e o kanea. ²⁴ A tenne zaa na kyeŋ la o kyãã poɔ, kyɛ ka a teŋɛ zu namine na taa la ba eŋno ne ba gyermɛ wa ne a o poɔ. ²⁵ Bebiri kaŋ zaa kon kyebe ka o dendɔe na pɔge, bonso, tensoɔ zaa kon kyebe a be. ²⁶ Ba na de la a tenne zaa eŋno ne gyermɛ a wa kpɛ ne o poɔ. ²⁷ Bondɛgre zaa kon kpɛ a poɔ, bee neɛ naŋ wa ne bompoɔrɔ, bee ziri-ŋmaa, ka balaŋ yoŋ O naŋ ŋmaa ba yoe eŋ a Pelee Nyɔvore Gane poɔ naane.

¹ Ka a malke la leɛ wuli ma nyɔvore baa kõɔ̃ kaŋ, ka a nyɛrɛ a na kyaala, ka a zoro yire a Naaŋmen ne a Pelee naaloŋ dakogo puliŋ, ² a sigre a teŋɛ foɔle senselensoɔ. A baa lobo zaa eŋɛ la ka a nyɔvore teɛ are. O maŋ wɔnɔ la wɔmɔ gbɛɛ pie ne ayi, a maŋ tere o wɔmɔ kyuu zaa poɔ. Ka a tevaare meŋ da waa a tenne zaa sammo tẽẽ . ³ Ŋmɛ-eŋ kon leɛ kyebe. A Naaŋmen ne a Pelee naaloŋ dakogo na be la a teŋɛ na poɔ, kyɛ O gbaŋgbaare na toŋ la ko O. ⁴ Ba na nyɛ la O niŋe, kyɛ ka O yuori be ba gberi eŋne. ⁵ Ka tensoɔ kon kyebe, ka ba meŋ kon boɔrɔ kanea vũũ bee ŋmenaa kyãã, bonso, a Daŋna Naaŋmen na ko ba la kyãã. Kyɛ ba na di la naaloŋ tegteglɛ. ⁶ Ka a malke yeli ko ma, “A yelbie ama e la yeldɛlle ne yelmeŋɛ. A Ŋmen-noɔr deme seere Daŋna Naaŋmen toŋ la O malke ka o wa wuli O gbaŋgbaare bon na naŋ kon kɔɔre kyɛ wa.” ⁷ “Kyɛllɛ, N waara la wiẽũ lɛ. Maaloo be la a neɛ na naŋ are gu a daŋ-nyaabo yelbie naŋ be a gane ŋa poɔ.” ⁸ Kyɛ Maa Gyɔn, nyɛ la kyɛ woŋ a ama zaa. Kyɛ N naŋ da woŋ kyɛ nyɛ a zaa, N da le la a malke na naŋ da wullo ma a yɛlɛ ama gbɛɛ puliŋ a na puori. ⁹ Kyɛ ka o da yeli ko ma, “Ta e lɛ! N e la a fo gbaŋgbaa tasobɔ naŋ poɔ a fo yɔɔmine a Ŋmen-noɔr deme, ane a balaŋ naŋ na are gu a gane ŋa yelbie, poɔ. Puori Naaŋmen!” ¹⁰ Ka o leɛ yeli ko ma, “Ta mare pɔge a daŋ-nyaabo yelbie a gane ŋa poɔ, bonso a saŋ tara la. ¹¹ Vɛŋ ka a neɛ na naŋ ba tori, ka o kyãã erɛ o yelbatori eroŋ; vɛŋ ka a neɛ na naŋ toŋ tondɛgɛ, ka o kyãã tonɔ o tondɛgɛ; vɛŋ ka a neɛ na naŋ e yeltori sobɔ, ka o kyãã waa yeltori sobɔ; kyɛ vɛŋ ka a neɛ na naŋ e kyerete sobɔ, ka o kyãã waa kyerete sobɔ.” ¹² “Kyɛllɛ, N waara la wiẽũ lɛ! N yɔɔre be la N zie ka N na tõɔ̃ de ko neɛ kaŋ zaa a seŋ lɛ o naŋ toŋ. ¹³ Maa la a Alfa ane a Omega, a piiluu ne a baaraa, a danwẽɛ̃ ane a pare baara sobɔ. ¹⁴ “Maaloo be la balaŋ naŋ eŋnɛ Naaŋmen nɔe, ka ba taa sori a na di a nyɔvore tewɔmɔ kyɛ na tõɔ̃ tu a dendɔe kpɛ a teŋɛ poɔ. ¹⁵ A yeŋ poɔ la ka a baare be, ne a soɔ tẽẽ maaleba, ne a pẽɛ̃pẽɛ̃ deme, ne a neŋkooreba, ne a tebɛ deme, ane neɛ na zaa naŋ nɔnɔ ziri-ŋmaa. ¹⁶ “Maa, Yesu, toŋ la N malke ka o wa di a yɛlɛ ama danseɛ ko yɛnee naŋ poɔ a puoru deme poɔ. Maa la a David nyagre ne o bidɔgraa, a Zivɛlmɛ Ŋmarbiri Nyegraa.” ¹⁷ A Seɛ ne a pɔɔpaala yele la, “Wa!” A neɛ na naŋ wono, vɛŋ ka o yeli, “Wa!” A neɛ na kõɔ̃ nyuuri naŋ kpɛ, vɛŋ ka o wa; kyɛ a neɛ na zaa naŋ sereŋ boɔrɔ, vɛŋ ka o wa de a nyɔvore kõɔ̃ weɛlɛ. ¹⁸ N dire la danseɛ a ko neɛ na zaa naŋ wono a gane ŋa daŋnyaabo yelbie: Ka neɛ zaa leɛ ŋmaa ŋmaabo zaa poɔ ama poɔ, Naaŋmen na ko o la a yeltuori ba naŋ manne biŋ a gane ŋa poɔ. ¹⁹ Kyɛ ka neɛ meŋ wa iri a yelbiri kaŋ zaa bare a daŋ-nyaabo gan ŋa poɔ, Naaŋmen na iri la o deme bare a nyɔvore tewɔmɔ poɔ ane a tenkyerete poɔ ane a yɛlɛ ama ba naŋ manne biŋ a gane ŋa poɔ. ²⁰ A neɛ naŋ dire a yɛlɛ ama danseɛ yele la, “Yelmeŋɛ, N waara la wiẽũ lɛ.” Amen. Oo, Fõõ wa, Daŋna Yesu. ²¹ Ka a Daŋna Yesu Kristo nɔndeteroo be a Ŋmendeme zaa zie. Amen.