FELEPE
11 Pɔl ane Temote, naŋ e Yesu Kristo gbaŋgbaare, A ko a Ŋmendeme a Kristo Yesu poɔ naŋ be Felepe poɔ, ane a puoru kaakaareba ne tontoneba: 2 Nɔndeteroo ane `maaroŋ be yɛ zie ka a yi te Saa Naaŋmen ane a Daŋna Yesu Kristo zie. 3 N maŋ puori la n Naaŋmen bareka saŋ na zaa N naŋ teɛre yɛ yɛlɛ. 4 N puoruu na zaa N naŋ puoro korɔ yɛ zaa, N maŋ puoro la ne popeɛloŋ 5 bonzuiŋ, yɛ laŋ la taa a yelnoore poɔ, a yi a piilu daare a te ta pampana. 6 N sereŋ bɔŋ la a ŋaa: ka Onɔ naŋ piili tonvelaa a yɛ poɔ, na toŋ la lɛ te ta o baaro kyɛ gu a Yesu Kristo daare. 7 A tu la sori ka N teɛre lɛ ko yɛ zaa, bonzuiŋ, N taa yɛ la a n sukyiri poɔ. Ka N be la banzɔlɔ poɔ bee a yelnoore mannoo ne biŋnu poɔ, yɛ zaa e la n pontaaba a nɔndeteroo poɔ. 8 Bonso, n danseɛ sobɔ la Naaŋmen, lɛ N naŋ sereŋ boɔrɔ ka N nyɛ yɛ zaa, a Yesu Kristo nyonono poɔ. 9 Kyɛ N puori la a ŋaa: ka yɛ nɔmmo yaare yaga lɛ a bɔmmo ane iruu yɛŋ zaa poɔ, 10 ka yɛ na tõɔ̃ gyɛle iri bɔŋ a bon na naŋ taa tɔnɔ yaga, ka yɛ na tõɔ̃ waa nenkyerete naŋ ba taa gbɛrŋmeɛbo zaa a te ta a Kristo daare, 11 kyɛ paale ne a yeltoruŋ wɔmɔ naŋ yi Yesu Kristo zie—ka a wa ne eŋno ne pugibu ko Naaŋmen. 12 Kyɛ, yɔɔmine, N boɔrɔ la ka yɛ bɔŋ ka a bon na naŋ e ma, da e la ka a yelnoore kannoo yɛlle. 13 A lɛ poɔ, a da sãã la ko balaŋ zaa naŋ be a naa yiri poɔ ane balaŋ zaa naŋ be a yeŋ, ka N be la banzɔlɔ eŋɛ a Kristo zuiŋ. 14 Yɔɔmine yaga naŋ be a Daŋna poɔ, leɛ are la kpẽã a n banzɔlɔ zuiŋ, a yeli a yelbiri kperaa lɛ kyɛ ba zoro dambẽɛ̃. 15 A e la yelmeŋɛ ka ba mine kanna la Kristo ne nyuuri ne wɛloo, kyɛ ba mine meŋ kanna la ne popeɛloŋ. 16 Kaŋ kanna la Kristo ne wɛloo, ka a ba e yelkyerete. O teɛre ka o na dɔgle la yeltuo maa zu a n banzɔlɔ poɔ. 17 Kyɛ kaŋ kanna la Kristo ne nɔmmo o naŋ bɔŋ ka ba iri ma la biŋ ka N manne a yelnoore yɛlɛ. 18 Boŋ pãã la? Ne lɛ zaa, sobiri zaa poɔ, ka a naŋ e a bamenne wuluu poɔ bee yelmeŋɛ poɔ, ba kanne la Kristo. A ŋaa zuiŋ la ka n poɔ pɛle yaga. Kyɛ yelmeŋɛ, N na kyãã taa la popeɛloŋ, 19 bonso, N bɔŋ ka a ŋaa na wa ne la faabo ko ma, a yɛ sɔroo ane Yesu Kristo Seɛ sommo zuiŋ. 20 A seŋ lɛ N naŋ kyɔgre gu ne nimizeɛ ane kyelloo, vi kon kpɛ ma yɛlɛ zaa poɔ, kyɛ N na taa la pera pampana, a na N naŋ maŋ taa, ka Kristo na nyɛ dannoo a n eŋgan eŋɛ, a n vooroŋ poɔ bee n kũũ poɔ. 21 Bonso, Maa zie, N voorɔ la a ko Kristo, kyɛ n kũũ meŋ na taa la tɔnɔ. 22 Ka Maa voorɔ a eŋganoŋ poɔ, ŋaa la a n tomɔ tɔnɔ. Kyɛ N ba bɔŋ a bon na N naŋ na iri. 23 N be la yelfere ayi kpakyaga, N naŋ boɔrɔ ka N yi te gaa Kristo zie, naŋ na soŋ ma gaŋ; 24 kyɛ, a waa la bonsoŋ ko yɛ ka N be a eŋganoŋ poɔ. 25 N sereŋ bɔŋ la a ŋaa: N na kyãã be la yɛ zaa zie a yɛ niŋe kyenoo ne yɛ popeɛloŋ a sagdeu poɔ zuiŋ, 26 ka Maa leɛ wa yɛ zie, yɛ pugibu na tõɔ̃ do la yaga Yesu Kristo poɔ a n zuiŋ. 27 Kyɛ yɛ vɛŋ ka yɛ kyenoo seŋ a Kristo yelnoore. Ka N wa te nyɛ yɛ bee N naŋ ba kyebe, N na tõɔ̃ woŋ a yɛ yɛlɛ, ka yɛ are gbeŋgbeŋ seɛ yenaa poɔ, ka yɛ taa teɛroŋ bonyenaa kyɛ laŋ moɔrɔ a yelnoore sagdeu eŋɛ, 28 kyɛ ka yɛ ta zoro yɛ dɔndɔnne dambẽɛ̃ togtogi. A ŋaa wuli ba la ka ba na nyɛ la saŋnaa yaga, kyɛ yɛ zie, a wuli ka yɛ taa la faabo naŋ yi Naaŋmen zie. 29 O ko yɛ la sori a Kristo zuiŋ ka yɛ ta sage de O yoŋ, kyɛ ka yɛ meŋ na nyɛ la woore a O zuiŋ, 30 yɛ naŋ taa a zɔɔre na tɔ yɛ naŋ da nyɛ n zie kyɛ pampana yɛ woŋ ka a be n zie.
21 A lɛ poɔ, ka sukyidiibu zaa wa be Kristo eŋɛ, ka sukyi`maaroŋ zaa wa be O nɔmmo poɔ, ka lantaaloŋ zaa wa be a Seɛ zie, ka nimi`maaroŋ ne nyonono wa bebe, 2 yɛ vɛŋ ka n popeɛloŋ paale kyɛ taa teɛroŋ bonyena ne nɔmmo bonyena, a be seɛ yena ne poteɛroŋ bonyena eŋɛ. 3 Ta erɛ bonzaa a yɛ pɔloŋ bee yɛ eŋno naŋ ba taa tɔnɔ zuiŋ, kyɛ a yɛmenne sigruŋ poɔ, yɛ de ka a yɛ taaba gaŋ yɛmenne. 4 Ta vɛŋ ka neɛ kaŋ zaa kaara omeŋɛ yɛlɛ yoŋ, kyɛ vɛŋ ka neɛ zaa meŋ kaara o taaba yɛlɛ. 5 Vɛŋ ka a teɛroŋ ŋa be yɛ zie, lɛ a naŋ da be Kristo Yesu zie: 6 Onɔ naŋ be Naaŋmen meŋɛ waaloŋ poɔ, da ba teɛrɛ ka a e la bon kaŋ o naŋ faa ka O seŋ ne la Naaŋmen, 7 kyɛ O sigri la Omeŋɛ ka O ba la e bon zaa, a de gbaŋgbaa waaloŋ, a maale Omeŋɛ a seŋ nensaala. 8 Kyɛ O naŋ waa na nensaala, O sigri la Omeŋɛ, a tu a noɔre a te ta kũũ— a dagara zu kũũ gba! 9 A lɛ zuiŋ, Naaŋmen iri O la ka O do ba peɛle, a ko O yuori naŋ zuo yoe zaa, 10 ka ba wa pore Yesu yuori, dumo zaa na gbi, a sazu, ne a teŋɛ zu, ne a teŋɛ puli zaa poɔ, 11 kyɛ ka nɔe zaa na sage yeli ka Yesu Kristo la a Daŋna, ka a Saa Naaŋmen na nyɛ eŋno. 12 N banɔnnee, lɛ poɔ, a seŋ yɛ naŋ maŋ eŋnɛ noɔre—ka a ba e ka N be la be yoŋ kyɛ ka a zuo la pampana ŋa N naŋ da kyebe—yɛ baare yɛmenne faabo ne dambẽɛ̃ ne miinuu, 13 bonso, Naaŋmen la Onɔ naŋ toŋ yɛ poɔ ka yɛ boɔrɔ kyɛ erɛ O popeɛloŋ boɔbo. 14 Yɛ erɛ a zaa ka boolɔ yɛlɛ bee nɔkpeɛne ta kyebe, 15 ka yɛ na tõɔ̃ waa nobɔ naŋ ba taa saŋnaa bee dɛgre zaa, Naaŋmen biiri naŋ ba taa yosaŋnaa a yelgoɔloŋ ne a yelbatori boorɔ deme poɔ, a be yɛ naŋ kyaane na ŋmarbie a donɛɛ poɔ, 16 a yɛ naŋ taa a nyɔvore yelbir velaa— ka N na tõɔ̃ fuuro a Kristo bebiri poɔ, ka N da ba zo weɛlɛ bee toŋ tomɔ naŋ ba taa tɔnɔ. 17 Kyɛ ka Naaŋmen sãã wa kyiri ma bare a na kõɔ̃ a yɛmenne zagroo ane yɛ tomɔ naŋ yi a yɛ sagdeu zuiŋ, n poɔ deɛ pɛle la kyɛ ka N taa popeɛloŋ laŋ ne yɛ. 18 A ŋaa zuiŋ la ka yɛ poore meŋ pɛle kyɛ ka yɛ meŋ taa popeɛloŋ laŋ ne ma. 19 N teɛre la a Daŋna Yesu eŋɛ, ka N na toŋ la Temote yɛ zie wiẽũ lɛ, ka N meŋ na tõɔ̃ taa kyelloo a saŋ na N naŋ woŋ yɛ yɛlɛ. 20 N ba taa neɛ zaa naŋ taa o teɛroŋ ŋa tɔ, naŋ sereŋ taa yɛ teɛroŋ a yɛ yɛlɛ zaa poɔ. 21 Bonso, nobɔ zaa maŋ kaara la bamenne yɛlɛ, kyɛ bara a yɛlɛ naŋ e Yesu Kristo soobo. 22 Kyɛ yɛ bɔŋ ka yɛ na tõɔ̃ dɛlle o la, bonso, a na bidɔɔ ne o saa, o toŋ la a yelnoore tomɔ ne ma. 23 A lɛ poɔ, N teɛre la ne kyelloo ka N na toŋ o la wiẽũ lɛ, ka Maa wa nyɛ lɛ n yɛlɛ naŋ gɛrɛ. 24 Kyɛ N bɔŋ la velaa a Daŋna eŋɛ, ka N meŋ na wa la wiẽũ lɛ. 25 Kyɛ N da teɛre ka a seŋ la ka N toŋ Epaferɔdetos yɛ zie, onɔ naŋ e n yɔɔ, ne tonton tɔ, ne sogya tɔ. Kyɛ yɛ zie, o e la onɔ yɛ naŋ toŋ ka o na tõɔ̃ soŋ ma ne n boɔbo zaa. 26 O sereŋ boɔrɔ la yɛ nyaabo, kyɛ o poɔ meŋ da ba pɛle yɛ naŋ da woŋ ka o da beɛrɛ la. 27 Yelmeŋɛ, o da beɛrɛ la a peɛle kũũ, kyɛ Naaŋmen da taa la nyonono o zie, ka a ba e o zie yoŋ kyɛ maa zie meŋ, ka N ta taa posaŋnaa naŋ dɔgle posaŋnaa. 28 A lɛ poɔ, N ŋmore toŋ o la, ka yɛnee wa leɛ nyɛ o, ka yɛ na tõɔ̃ taa popeɛloŋ kyɛ ka N na tõɔ̃ bare posaŋnaa teɛroŋ. 29 Lɛ poɔ, yɛ tuori o velaa a Daŋna poɔ ne popeɛloŋ zaa, a maŋ de a neɛ ŋa tɔ ka o taa tɔnɔ yaga. 30 Bonzuiŋ, o da peɛle la kũũ a Kristo tomɔ zuiŋ. O da ba teɛre o nyɔvore yɛlɛ ka o na tõɔ̃ soŋ ma ne a sommo na yɛ naŋ da kon tõɔ̃ tere ko ma.
31 A baaraa, n yɔɔmine, yɛ taa popeɛloŋ a Daŋna poɔ. A ba e tuo ko ma ka N leɛ ŋmaa a yɛlɛ ama ko yɛ, kyɛ yɛ zie, a e la a bon na naŋ na e ka yɛ are velaa. 2 Yɛ gu a baare. Yɛ gu a efaare tontoneba. Yɛ gu a ŋmaabare deme. 3 Bonso, tenee la a yɔ-ŋmaara deme naŋ puoro a Naaŋmen Seɛ eŋɛ, a fuuro a Kristo Yesu poɔ, kyɛ ba dɛlle a eŋganoŋ yɛlɛ— 4 ne lɛ zaa Maa meŋɛ dɛlle la a eŋganoŋ yɛlɛ. Ka neɛ kaŋ zaa teɛre ka o na tõɔ̃ dɛlle la o eŋganoŋ yɛlɛ, n deme gaŋ la lɛ: 5 ba ŋmaa la n yoɔre a bebie anii daare; N yi la a Israel deme ne a Bɛn-gyamen bale poɔ; N e la Hibiru neɛ meŋɛ, kyɛ a nɔbinnaa yɛlɛ poɔ, N e la Farasi sobɔ; 6 n miinuu poɔ la, ka N da maŋ dɔgrɔ a puoru deme; a nɔbinnaa yeltoruŋ poɔ la ka N ba taa saŋnaa zaa. 7 Kyɛ boma na zaa naŋ da taa tɔnɔ ko ma, N de la ama zaa ka a e bonweere a Kristo zuiŋ. 8 A la leɛ, N de la boma zaa ka a e bonweere a Kristo Yesu, n Daŋna, bɔmmo naŋ zuo poɔ. O zuiŋ la ka n boma zaa da wɛ. Kyɛ N de la ama zaa ka a waa saga, ka N na tõɔ̃ taa Kristo, 9 ka N na tõɔ̃ nyɛ O eŋɛ kpeɛbo, ka N ba taa mmeŋɛ yeltoruŋ naŋ yi a nɔbinnaa poɔ, kyɛ taa a yeltoruŋ naŋ yi a Kristo sagdeu—a yeltoruŋ naŋ yi Naaŋmen zie a sagdeu zuiŋ, 10 ka N na tõɔ̃ bɔŋ O, ne O kũũ leɛ-iruŋ faŋa, ne O woore lantaaloŋ, a leɛ waa na Onɔ a O kũũ poɔ, 11 ka kaapɔge, a sobiri kaŋ poɔ, N na tõɔ̃ ta a kũũ leɛ-iruŋ zie. 12 A ba e na N daŋ nyɛ la ama zaa baare bee ka N faa ta baare, kyɛ N tuuro la ama zaa ka N na tõɔ̃ nyɔge a bon na Kristo Yesu meŋ naŋ da de nyɔge ma. 13 N yɔɔmine, N da ba sage de mmeŋɛ poɔ ka N nyɔge la bon zaa, kyɛ yelyenaa yoŋ la ka N da e: N yinni la a boma naŋ be n puoriŋ kyɛ ŋmore kyaare a boma naŋ be niŋe, 14 a lɛ tu la a sobiri naŋ kyaare a baaro zie ka N na tõɔ̃ nyɛ la a yɔɔre naŋ e Naaŋmen sazu boɔloo a Kristo Yesu poɔ. 15 A lɛ poɔ, yɛ vɛŋ ka te zaa naŋ ta a tao zie, taa a teɛroŋ ŋa tɔ. Ka yɛ taa teɛroŋ yuo a yɛlɛ kaŋ zaa poɔ, Naaŋmen na wuli yɛ la a yɛlɛ aŋa pare meŋ. 16 Ne lɛ zaa, a yɛlɛ na zaa poɔ te naŋ da nyɔge, vɛŋ ka te kyene a noɔre na tɔ sobiri poɔ kyɛ taa teɛroŋ yena. 17 N yɔɔmine, yɛ laŋ tuuro ma, kyɛ kaara a balaŋ naŋ kyene seŋ a mannewuluu te naŋ ko yɛ. 18 Bonso, N da maŋ manne ko yɛ la, kyɛ pampana ŋa N leɛ manne ko yɛ la ne ŋmenaa kõɔ̃, ka nobɔ yaga kyene la a na Kristo dagara dɔndɔnne na. 19 Ba baaro zie la saŋnaa, ba poore e la ba Naaŋmen, kyɛ ba eŋno la a ba vi. Ba teɛroŋ zaa maŋ be la a teŋɛ zu boma zie. 20 Kyɛ te teŋɛ neeloŋ be la tenvelaa poɔ. A meŋ yi a be la ka te gu ne kyelloo a Faara, a Daŋna Yesu Kristo, 21 Onɔ naŋ na leɛ te eŋgan, naŋ ba e bon zaa, ka o waa a na O eŋgan naŋ taa eŋno, a te seŋ a tomɔ O naŋ toŋ a na tõɔ̃ biŋ boma zaa O puliŋ.
41 A lɛ poɔ, n yɔɔmine N naŋ nɔŋ kyɛ maŋ sereŋ boɔrɔ yɛ nyaabo, yɛnee naŋ e n popeɛloŋ ne n yɔɔre zupile, lɛ ka yɛ meŋ na are kpẽã a Daŋna poɔ, yɛnee naŋ e n banɔnnee! 2 N dɔre la eŋ Eodea, kyɛ N meŋ dɔre la eŋ Sontoke, ka ba taa teɛroŋ bonyena a Daŋna poɔ. 3 Kyɛ N tonton tasobɔ soŋ, N sɔre fo la meŋ, ka fo soŋ a pɔgɔbɔ balaŋ naŋ toŋ ne ma a yelnoore tomɔ poɔ, laŋ ne Klɛmɛnt meŋ, ane n tonton taaba mine, balaŋ yoe naŋ be a nyɔvore gan poɔ. 4 Yɛ taa popeɛloŋ a Daŋna poɔ saŋa zaa. N na leɛ yeli la: Taa popeɛloŋ! 5 Vɛŋ ka yɛ ebaaloŋ yaare ka neɛ zaa zie zaa tõɔ̃ wa bɔŋ a yɛlɛ. A Daŋna peɛlɛ la. 6 Ta miine ne bon zaa, kyɛ yɛlɛ zaa poɔ, a yɛ puoruu, sɔroo, ne bareka puoruu poɔ, vɛŋ ka Naaŋmen bɔŋ a bon na zaa yɛ naŋ boɔrɔ. 7 Kyɛ a Naaŋmen `maaroŋ naŋ zuo bɔmmo zaa, na kaara la a yɛ sukyie ne yɛ teɛroŋ zaa a Yesu Kristo poɔ. 8 A baaraa, n yɔɔmine, bon zaa naŋ taa yelmeŋɛ, bon zaa naŋ seŋ eŋno, bon zaa naŋ tori, bon zaa naŋ ba taa dɛgre zaa, bon zaa naŋ veɛlɛ, bon zaa naŋ taa yuori— ka bon zaa wa e bonsoŋ bee seŋ pugibu—yɛ maŋ teɛrɛ a yɛlɛ ama. 9 Bon na zaa yɛ naŋ da zanne, bee de, bee woŋ, bee nyɛ n zie, yɛ de a lɛ tonɔ ne, kyɛ a `maaroŋ Naaŋmen na be la yɛ zie. 10 Kyɛ N poɔ pɛle la yaga a Daŋna poɔ, yɛ naŋ leɛ taa n teɛroŋ pampana. Yɛ da taa la n teɛroŋ kyɛ yɛ da ba nyɛ sori ka yɛ na tõɔ̃ soŋ ma. 11 N ba yeli a ŋaa a n boɔbo zuiŋ, bonso, N zanne la ka Maa wa be yɛlɛ kaŋ zaa poɔ, a seŋ ka N poɔ pɛle ne a. 12 N bɔŋ la naŋ yɛlɛ, a leɛ bɔŋ taroo yɛlɛ. N zanne la a zie zaa ne yɛlɛ zaa poɔ, lɛ N naŋ na tõɔ̃ sage ka N tegɛ bee ka kɔŋ kpɛ ma la, ka N kpɛ la bontaroŋ poɔ, bee ka N waa naŋ sobɔ. 13 N na tõɔ̃ e la bon zaa, a yi Kristo naŋ korɔ ma faŋ zie. 14 Ne lɛ zaa, yɛ da e la velaa ka yɛ waa n sonsontaaba a n yelfere zaa poɔ. 15 A lɛ puoriŋ, yɛnee Felepe deme, yɛ meŋ bɔŋ la ka a yelnoore kanno piiluu saŋ, N naŋ da yi Masɛdonea, ka puoru deme zaa da ba waa n sonsontaaba a teroo bee deu poɔ, ka yɛ yoŋ naane. 16 A saŋ na N naŋ da be Tɛsaloneka poɔ gba, yɛ da tere la n bomboɔre boyi. 17 A ba e ka N boɔrɔ la kyɔgtaa, kyɛ N boɔrɔ la ka N eŋ tɔnɔ naŋ na tõɔ̃ duoro yɛ zie. 18 N nyɛ la boma zaa, ka a meŋ zuo. N paale ne la boma, bonzuiŋ, N de la a boma yɛ naŋ da toɔle ne Epaferɔdetos. Yɛ toɔlɔ ŋa e la a na bonnyu velaa naŋ seŋ a bɔɔre na Naaŋmen naŋ sage ne kyɛ meŋ pɛle O poɔ. 19 Kyɛ n Naaŋmen na ko yɛ la yɛ bomboɔre zaa te seŋ a O eŋno bonveɛle a Yesu Kristo eŋɛ. 20 Ka eŋno be a te Saa Naaŋmen zie tegteglɛ. Amen. 21 Yɛ puori Ŋmendeme kaŋ zaa a Yesu Kristo eŋɛ. A yɔɔmine naŋ be n zie puori yɛ la. 22 A Ŋmendeme zaa toɔle la ba puoruu. A puoruu yaga yi la a balaŋ naŋ be Siiza yiri poɔ. 23 Ka a Daŋna Yesu Kristo nɔndeteroo be yɛ zaa zie. Amen.