FILEMON
11 Pɔl, a Kristo Yesu nempigraa, ane te yɔɔ Temote, A ko Filemon, naŋ e te banɔnnaa ane te tonton tasobɔ, 2 a ko Apefea te naŋ nɔŋ, ane Arkeppos naŋ e te sogya tɔ, a kyɛ ko a puoru deme naŋ maŋ laŋ taa a fo yiri poɔ: 3 Nɔndeteroo ane `maaroŋ be yɛ zie ka a yi a te Saa Naaŋmen ane a Daŋna Yesu Kristo zie. 4 N puori la n Naaŋmen bareka kyɛ maŋ teɛre fo yɛlɛ a n puoruu zaa poɔ, 5 N naŋ woŋ a fo nɔmmo ane a sagdeu fo naŋ taa a Daŋna Yesu zie ane a Ŋmendeme zaa zie zuiŋ. 6 N puoro la ka a fo sagdeu pommu na taa la tɔnɔ, fo naŋ wa sereŋ bɔŋ velaa a bonvelaa na zaa naŋ be te zie a Kristo Yesu poɔ. 7 Te taa la popeɛloŋ yaga ane sukyidiibu a fo nɔmmo zuiŋ, bonso a Ŋmendeme nyɛ la pɛnnoo ba sukyiri poɔ a yi fõõ, te yɔɔ zie. 8 A lɛ pãã, ne lɛ zaa N naŋ taa sori a Kristo poɔ ka N na tõɔ̃ eŋ fo noɔre a yɛlɛ naŋ seŋ poɔ kperaa lɛ, 9 kyɛ N na sɔre fo la a nɔmmo zuiŋ. Pampana ŋa, Maa Pɔl, naŋ waa dɔɔnyaŋa, kyɛ meŋ waa a Yesu Kristo nempigraa, 10 sɔrɔ fo la, a n bie Onesemos zuiŋ, onɔ naŋ da waa n bie kyɛ ka N be banzɔlɔ poɔ. 11 A saŋ na naŋ tɔle, o da ba taa tɔnɔ fo zie, kyɛ pampana ŋa, o taa la tɔnɔ fõõ ne maa zie. 12 N leɛ toŋ o la fo zie. A lɛ zuiŋ, tuori de o—onɔ naŋ e a mmeŋɛ sukyiri. 13 N da boɔrɔ la ka N taa o n zie, kyɛ fo zie la ka o na tõɔ̃ toŋ tomɔ ko ma a n yelnoore banzɔlɔ poɔ. 14 Kyɛ N da ba boɔrɔ ka N e bon zaa ka fo da ba tere sori ko ma, ka a fo sommo ta yi feroo poɔ kyɛ fomeŋɛ boɔbo poɔ la. 15 Kaapɔge, a tɛgɛ o naŋ yi a fo zie fẽẽ lɛ, la ka fo na leɛ tuori o fo zie tegteglɛ— 16 ka a ba e na gbaŋgbaa, kyɛ a na neɛ naŋ zuo gbaŋgbaa kaŋ zaa, a na fo yɔɔ fo naŋ nɔŋ. O sereŋ seŋ la lɛ a n zie, kyɛ o seŋ la gaŋ lɛ a fo zie, bonzuiŋ o waa la fo yɔɔ a nensaaloŋ zie laŋ ne a Daŋna zie. 17 A lɛ pãã, ka fõõ wa de ma ka N e a fo bonzaa tasobɔ, tuori o velaa a na lɛ fo naŋ na tuori ma. 18 Ka onɔ wa saŋ fo bee di fo sane, vɛŋ ka fo eŋ a sane maa zie. 19 Maa Pɔl ŋmaa la a yelbie ama ne mmeŋɛ nu. N na leɛ yɔɔ la. Ne lɛ zaa N naŋ da ba yeli lɛ, fomeŋɛ waa la a sane n zie. 20 Oo, n yɔɔ, vɛŋ ka N tõɔ̃ woŋ noɔ a fo zie a Daŋna poɔ. E ka n sukyiri `maa a Daŋna poɔ. 21 N naŋ taa kyelloo a fo sigru milluu poɔ, lɛ la ka N ŋmaa a ŋaa ko fo, bonzuiŋ N bɔŋ la ka fo na erɛ la yaga gaŋ lɛ N naŋ yeli. 22 Kyɛ a lɛ meŋ puoriŋ, maale a saana die ko ma, bonso N teɛre la ka ba na bare ma la a fo puoruu zuiŋ, ka N na tõɔ̃ wa fo zie. 23 Epaferas, naŋ e a n nempigraa tasobɔ a Yesu Kristo poɔ, puoro fo la. 24 N tonton taaba, Mark, Arestarekos, Demas, ne Luk meŋ toɔle fo la ba puoruu. 25 Ka a te Daŋna Yesu Kristo nɔndeteroo be fo seɛ zie. Amen.