MARK

MARK

¹ Ŋaa la a Yesu Kristo, naŋ e Naaŋmen Bidɔɔ, yelnoore piiluŋ. ² A Ŋmen-noɔr deme da ŋmaa la biŋ: “Kyɛllɛ, N na toŋ la N tontonɔ ka o de Fo wẽɛ̃, a neɛ naŋ na de Fo wẽɛ̃ maale a Fo sori.” ³ “Neɛ kaŋ kɔkɔre boɔlɔ la a wɛgyaŋ poɔ, ‘Yɛ maale a Daŋna sori, maale O sobie ka a tori.’ ” ⁴ Gyɔn da tere la Naaŋmen kõɔ̃ suobu a wɛgyaŋ poɔ, a kanna a suobu naŋ yi a teɛroŋ leɛbo na naŋ na wa ne yelbebe suuri diu. ⁵ A Gyudea paaloŋ deme zaa ane balaŋ naŋ yi Gyɛrosalɛm da wa la o zie. Ba zaa da kyiiri la ba yelbebe a de suobu o zie a Gyordan mane poɔ. ⁶ Gyɔn da su la bontaŋ kɔɔloŋ bonsuuri kyɛ `leŋ gan bɛlɛnte a gyilli o seɛ. O da dire la sansobo ane seere. <sup>7</sup> O da kanne la kyɛ yeli, “Neɛ be la n puoriŋ naŋ e kpẽã yaga gaŋ ma. O nɔɔteɛ yaare, N ba seŋ ka N gbi a `lori a. ⁸ Maa so yɛ la ane kõɔ,̃ kyɛ O na so yɛ la ne a Sekyerete.” ⁹ A bebie na poɔ la ka Yesu da yi Nazarɛt teŋɛ naŋ be a Galili paaloŋ poɔ, a wa de O suobu Gyɔn zie, a Gyordan mane poɔ. ¹⁰ O naŋ da wa yire a kõɔ ̃ poɔ la, ka a pare na poɔ, O da nyɛ a tenvelaa ka o yuo, ka a Seɛ sigre waara a na ŋman a wa dɔme O zu. ¹¹ Ka kɔkɔre kaŋ da yi a tenvelaa a yeli, “Fõõ la N Bidɔɔ N naŋ nɔŋ; Fõõ la ka N poɔ pɛle ne.” ¹² A pare na poɔ ka a Seɛ tage O gaa ne a wɛgyaŋ poɔ. ¹³ Be la ka O kpɛ bebie lezaayi, ka Setaana da gyenne O. O da be la a wɛdonne poɔ, kyɛ ka malkere da kaara O. ¹⁴ Ba naŋ wa nyɔge Gyɔn eŋ pigu die poɔ baare la, ka Yesu da wa Galili poɔ a wa kanna a Naaŋmen naaloŋ yelnoore, ¹⁵ a yele, “A saŋ ta la. A Naaŋmen naaloŋ peɛlɛ la. Yɛ leɛ yɛ teɛroŋ, kyɛ sage de a yelnoore.” ¹⁶ Yesu naŋ da kyene lanna a Galili mane la, ka O nyɛ Simon ane o yɔɔ Andero. Ba da lɔɔrɔ la ba nɛte mane poɔ, bonso ba da e la zom-nyɔgrɔbɔ. ¹⁷ Ka Yesu yeli ko ba, “Yɛ wa tuuro Ma. N na e la ka yɛ waa nensaala nyɔgrɔbɔ.” ¹⁸ A pare na poɔ ka ba bare ba nɛtere kyɛ tu O gaa. ¹⁹ O naŋ wa gaa tɔɔre belaŋ la ka O nyɛ Gyems, a Zɛbɛde bidɔɔ ane o yɔɔ Gyɔn. Ba da be la gbori poɔ a maala ba nɛtere. ²⁰ A pare na poɔ la ka O boɔle ba, ka ba bare ba saa, Zɛbɛde, a gbori poɔ ane a tontoneba kyɛ tu O gaa. ²¹ Ba da gaa la Kaperneom. A Sabat bebiri naŋ ta, ka Yesu kpɛ a senagɔg poɔ a pãã da piili wullo ba. ²² Ba nɔe zaa da `maa la a O wuluu zuiŋ, bonso O da wuli ba la a na neɛ naŋ taa faŋ, kyɛ O ba wuli a na a nɔbinna kaakaareba. <sup>23</sup> A ba senagɔg poɔ la ka dɔɔ naŋ da taa sedɛgre kaŋ da be. O da ŋmɛ la kpɛlle, <sup>24</sup> a yele, “Bare te! Boŋ yɛlɛ la ka te taa ne Fo, Yesu naŋ yi Nazarɛt? Fo wa la ka Fo wa saŋ te bare bee? N bɔŋ Fo la! Fõõ la a Naaŋmen Kyerete Sobɔ!” <sup>25</sup> Ka Yesu da nyare o zu kyɛ yeli, “Bare gɔmɔ kyɛ wa yi o eŋɛ!” <sup>26</sup> A sedɛgre da e la ka a dɔɔ gyemɛ iri yaga, a ŋmɛ kpɛlle ne kɔkɔkpẽã, kyɛ yi a o poɔ. <sup>27</sup> A nobɔ zaa nɔe da `maa la, ka ba da soorɔ taaba: “Boŋ la aŋa? Boŋ wul-paala la aŋa? Bonso, ane faŋ O tere la noɔre ko sedɛgɛ meŋɛ, ka ba sage tu O noɔre.” ²⁸ Ka O yɛlɛ da yaare wiẽũ lɛ a Galili paaloŋ zaa poɔ. ²⁹ A pare na poɔ, ba naŋ wa yi a senagɔg poɔ, ba da kpɛ la Simon ane Andero yiri poɔ ane Gyems ne Gyɔn. ³⁰ Ka Simon pɔgɔ ma da gaŋ ka ɔɔre kpeɛrɛ o. Lɛ ka ba yeli o yɛlɛ ko Yesu wiẽũ lɛ. ³¹ Ka O da wa te nyɔge o nu, ka o iri. A pare na poɔ ka a ɔɔre bare o, kyɛ ka o pãã tonɔ korɔ ba. ³² A zimaane saŋ, a ŋmenaa naŋ da kpɛ, ba da taa la balaŋ zaa naŋ beɛrɛ ane balaŋ naŋ taa kɔntɔmɔ wa ne O zie. ³³ A teŋ deme zaa da wa gyilli la a dendɔre. ³⁴ Yesu pãã da saŋ la nobɔ yaga naŋ taa baaloŋ tɛɛtɛɛ, kyɛ digi kɔntɔmɔ yaga bare. Kyɛ O da ba vɛŋ ka a kɔntɔmɔ yeli yɛlɛ, bonso ba da bɔŋ O la. ³⁵ A baguo saŋ, a zie naŋ da ba veɛ sɛre, Yesu da iri yi la a yiri poɔ a gaa wɛgyaŋ zie kaŋ. Be la ka o da te puori. ³⁶ Simon ne o tutaaba da gaa la ka ba te bɔ O. ³⁷ Kyɛ ba naŋ wa te nyɛ O, ka ba yeli, “Nobɔ zaa boɔrɔ Fo la.” ³⁸ Ka Yesu leɛ yeli, “Yɛ vɛŋ ka te gaa kpɛ a tenne mine naŋ peɛle poɔ, ka N te kanne be meŋ, bonso a ama zuiŋ la ka N wa kyɛ.” ³⁹ Ka O da yɔ Galili paaloŋ zaa a kanna a ba senagɔgre poore kyɛ digre kɔntɔmɔ bara. ⁴⁰ Lɛ la ka dɔɔ kɔŋkɔŋ kaŋ da wa O zie a wa gbi dumo O niŋe soɔ a sɔre O kyɛ yeli, “Ka Fõõ wa sage, Fo na tõɔ̃ maal ma ka N waa soŋ.” ⁴¹ Lɛ la ka Yesu da taa nimibaaloŋ o zie a tẽɛ̃ O nu a tɔ ne o, kyɛ yeli ko o, “N sage la. Waa soŋ.” ⁴² O naŋ yeli a yɛlɛ wa baare, a pare na poɔ ka a kɔnnoŋ bare o, ka o waa soŋ. ⁴³ Yesu da kpãã o la yaga kyɛ bare o ka o gaa daadaa, ⁴⁴ kyɛ yeli ko o, “Kaara velaa ka fo ta yeli yɛlɛ zaa ko neɛ zaa. Gɛrɛ te wuli fomeŋɛ ko a puoru neŋkpoŋ kyɛ tere a boma na naŋ tu a noɔre Moses naŋ tere a fo sammo poɔ, ka a di danseɛ ko ba.” ⁴⁵ Kyɛ o naŋ wa bare be, o da yi la yoɔrɔ a manna a yɛlɛ ŋa ka a yɛlɛ yaare zie zaa. A lɛ zuiŋ, Yesu da kon leɛ tõɔ̃ kpɛ a teŋɛ poɔ kperaa lɛ. Kyɛ O da maŋ zeŋ la O yoŋ a wɛgyaŋ poɔ, kyɛ ka a nobɔ da maŋ yi ziiri zaa a wa O zie.

¹ Beri mine naŋ ta la ka Yesu da la kpɛ Kaperneom poɔ, ka ba da woŋ ka O be la a yiri poɔ. ² A pare na poɔ, nobɔ yaga da laŋ la taa a be, ka kpeɛbo zie zaa da la kyebe, ka a dendɔre meŋ da paale, kyɛ ka O da kanna a yelbie korɔ ba. ³ Dɔbɔ banaare da tuo la dɔɔ kaŋ endaa zaa naŋ da kpi a wa ne O zie. ⁴ Ba da kon tõɔ̃ taa o ta ne Yesu zie, bonzuiŋ a nobɔ da zuo la. Lɛ la ka ba ŋmaa puoŋ sulee a peɛ na zu a Yesu naŋ da be. Ba naŋ wa puoŋ a peɛ la ka ba sigri a bon-ganaa na poɔ a dɔɔ na endaa zaa naŋ kpi naŋ da gaŋ. ⁵ Yesu naŋ da nyɛ a ba sagdeu, O da yeli la ko a dɔɔ na endaa zaa naŋ kpi, “N bidɔɔ, fo nyɛ la fo yelbebe suuri diu.” ⁶ A nɔbinna kaakaareba mine da zeŋ la a be a teɛrɛ ba sukyie poɔ, ⁷ “Boŋ la so ka a neɛ ŋa sobɔ yele yelfaare kyaare ne Naaŋmen? Aŋ la na tõɔ̃ di yelbebe suuri ka Naaŋmen yoŋ naane?” ⁸ A pare na poɔ, Yesu da bɔŋ la O seɛ poɔ lɛ ba naŋ teɛre a bamenne poore, ka O yeli ko ba, “Boŋ la so ka yɛ teɛrɛ ama zaa yɛ sukyie poore? ⁹ Buo sobɔ la e mɔlɛ, ka N yeli ko a dɔɔ na endaa zaa naŋ da kpi, ‘Fo nyɛ la fo yelbebe suuri diu,’ bee ka N yeli, ‘Iri de a fo bon-ganaa a kyene ne’? ¹⁰ Kyɛ ka yɛ na tõɔ̃ bɔŋ ka a Nensaala Bidɔɔ taa la faŋ a teŋɛ zu, ka O di yelbebe suuri. . . .” Ka O yeli ko a dɔɔ na endaa zaa naŋ da kpi, ¹¹ “N yeli fo la, iri de a fo bon-ganaa kulo ne.” ¹² A pare na poɔ la ka o iri a de o bon-ganaa a kyene yi ne ba zaa niŋe soɔ. Lɛ la ka neɛ zaa noɔre da `maa, ka ba pugro Naaŋmen a yele, “Te daŋ ba nyɛ a eroŋ ŋa tɔ.” <sup>13</sup> Yesu da leɛ yi la a gaa a mannoɔre. Nobɔ yaga da wa la O zie, ka O wullo ba. <sup>14</sup> O naŋ da kyene tɔlɔ la, ka O nyɛ Lɛve, Alfeos bidɔɔ, ka o zeŋ a libidere tomɔ zie. Ka Yesu yeli ko o, “Tuuro Ma.” Ka Lɛve iri tuuro O. <sup>15</sup> A naŋ da waa ka Yesu da zeŋ a di bondirii Lɛve yiri poɔ la, ka libiderebe ane yelbebe deme yaga da wa laŋ di ne O ane O tutuuribo. Bonso, balaŋ naŋ da tu O, da waa la yaga. <sup>16</sup> A nɔbinna kaakaareba ane a Farasi deme naŋ nyɛ ka O dire ne a libiderebe ane a yelbebe deme la, ka ba soore O tutuuribo, “Boŋ la so ka O laŋ dire kyɛ nyuuro ne libiderebe ane yelbebe deme?” <sup>17</sup> Yesu naŋ woŋ a ŋaa la, ka O yeli ko ba, “Balaŋ naŋ waa kpeɛne ba boɔrɔ baalonsanne, kyɛ balaŋ naŋ maŋ beɛrɛ la. N ba wa ka N boɔle yeltori deme, kyɛ yelbebe deme la, ka ba leɛ ba teɛroŋ.” <sup>18</sup> Gyɔn tutuuribo ane a Farasi deme da `leŋ la noɔre. Nobɔ mine da wa la Yesu zie a soore O, “Boŋ la so ka a Gyɔn tutuuribo ane a Farasi deme maŋ `leŋ noɔre, kyɛ ka Fo tutuuribo ba maŋ `leŋ noɔre?” ¹⁹ Ka Yesu leɛ yeli ko ba, “A kultaa tigri deme na tõɔ̃ `leŋ la ba nɔe a saŋ na a serpaala naŋ kyãã be a ba poɔ? Saŋ na zaa a serpaala naŋ be ba zie, ba kon tõɔ̃ `leŋ ba nɔe. ²⁰ Kyɛ a bebie na ta la ka ba na iri a serpaala a yi ba zie. A bebie ana poɔ la ka ba pãã na `leŋ noɔre. ²¹ “Neɛ ba maŋ de pɛmpaala a liiri ne kparkora, bonso a liiru na tage yi la a boŋkora poɔ, ka a kparkyeɛroo waa faa gaŋ lɛ o naŋ da waa. ²² Kyɛ neɛ kon bɔŋ de tewɔmɔ dãã paala eŋ dãã woɔ kore poɔ. Ka onɔ wa e lɛ, a dãã paala na kyeɛ la a dãã woore, ka a tewɔmɔ dãã zaa kyiri baare, kyɛ ka a dãã woore zaa saŋ. Kyɛ a fere la ka ba de tewɔmɔ dãã paala eŋ dãã woore paala poɔ.” ²³ Sabat bebiri daare kaŋ, Yesu da kpɛ kyɔlɔ la bombie wɛre, kyɛ ba naŋ kyɔlɔ la ka O tutuuribo da piili ŋmaara a bombie zuri. ²⁴ Ka a Farasi deme da yeli ko O, “Kyɛllɛ, boŋ la so ka ba erɛ a Sabat bebiri a bon na naŋ ba tu a Nɔbinna sori?” ²⁵ Ka Yesu da leɛ yeli ko ba, “Yɛ daŋ ba kanne bɔŋ a bon na David naŋ e, a saŋ na kɔŋ naŋ da kpɛ o ne balaŋ zaa naŋ be o zie, ka ba boɔrɔ bondirii na di, ²⁶ lɛ o naŋ da kpɛ a Naaŋmen yiri a saŋ na Abiatar naŋ da la a puoru neŋkponni zusobɔ, te ɔɔ a puoru zie boroboro naŋ ba tu Nɔbinnaa ka neɛ zaa ɔɔ ka a puoru neŋkponni naane, kyɛ meŋ de ko o tutaaba ka ba di?” ²⁷ Ka O yeli ko ba, “Ba iri la a Sabat daare nensaala zuiŋ. Ba ba iri nensaala a Sabat daare zuiŋ. ²⁸ Lɛ pãã a Nensaala Bidɔɔ meŋ e la a Sabat daare Daŋna.”

¹ O da leɛ kpɛ la a senagɔg poɔ, ka dɔɔ kaŋ nu naŋ da kpi da be be. ² Ba da kaa O, ka O na saŋ la a dɔɔ a Sabat bebiri bee, ka ba na tõɔ̃ nyɛ vuo te nyare O zu. ³ Ka O yeli ko a dɔɔ na nu naŋ da kpi, “Iri, wa are te niŋe soɔ!” ⁴ Ka O pãã da soore ba, “A tu la a nɔbinna sori ka te e eveɛle bee efaare a Sabat daare, a faa nyɔvore, bee ko?” Kyɛ ba da ba yeli yɛlɛ zaa. ⁵ O da kaa ba la zaa ne suuri, ka O poɔ zaa da saŋ yaga a ba zukpeɛne zuiŋ, ka O da yeli ko a dɔɔ, “Tẽɛ ̃ fo nu!” Ka o tẽɛ ̃ o nu, ka o nu leɛ waa soŋ na a kaŋ. ⁶ A pare na poɔ la ka a Farasi deme yi a te nare biŋ ne a Hɛrod deme lɛ ne lɛ ba naŋ na tõɔ̃ e ka ba na saŋ O bare. ⁷ Yesu ne O tutuuribo da yi gaa la a mane zie, ka nobɔ yaga naŋ yi Galili ane Gyudea da tu O. ⁸ Nobɔ meŋ da yi la Gyɛrosalɛm, Idumea, ne a tenne zaa naŋ gaŋ a Gyordan, ane tenne zaa naŋ gyilli Taiya ne Sidon. Ba naŋ woŋ Yesu eroŋ zaa yɛlɛ, nobɔ yaga da wa la O zie. ⁹ A nobɔ naŋ e yaga zuiŋ la ka O da yeli ko O tutuuribo ka ba kyɔgre gu O ne a gborilee kaŋ. Ka lɛ naane, a nobɔ na ŋmore O la. ¹⁰ O naŋ da saŋ nobɔ yaga, balaŋ na zaa naŋ taa baaloŋ da ŋmore la O zie ka ba na tõɔ̃ tɔ O. ¹¹ Saŋ na zaa sedɛgɛ naŋ nyɛ O, a maŋ le la gaŋ a O niŋe a ŋmeɛrɛ kpɛlle, a yele, “Fõõ la a Naaŋmen Bidɔɔ!” ¹² Kyɛ O da maŋ kpãã a la kpẽã ka a ta e ka neɛ zaa bɔŋ O yɛlɛ. ¹³ Yesu da do la taŋ kaŋ zu a te boɔle balaŋ O naŋ boɔrɔ ka ba wa O zie, ka ba da wa O zie. ¹⁴ O da iri la pie ne bayi ka ba na be O zie, kyɛ ka O toŋ ba ka ba gaa te kanna. ¹⁵ O ko ba la faŋ ka ba na tõɔ̃ saŋ baaloŋ zaa kyɛ digi kɔntɔmɔ bare. ¹⁶ A bama pie ne bayi la bama: Simon (O naŋ da boɔlɔ ka Pita); ¹⁷ Gyems, Zɛbɛde bidɔɔ, ane o yɔɔ Gyɔn (O naŋ da boɔlɔ ka Boanɛrgyes, naŋ wuli ka Saatanne Bidɔbɔ); ¹⁸ Andero, Felep, Bartolomi, Matiu, Tomas, Gyems a Alfeos bidɔɔ, Tadeos, Simon naŋ e Kanaan neɛ kaŋ, ¹⁹ ane Gyudas Iskarioti, naŋ da koɔre Yesu. ²⁰ Ka nobɔ yaga da wa laŋ taa a be, ka Onɔ ne O tutuuribo da kon tõɔ ̃ nyɛ sori ka ba di. ²¹ Kyɛ Omeŋɛ nobɔ naŋ da woŋ a ŋaa, ba da gaa la te nyɔge O, bonso ba da yeli la, “O ba e omeŋɛ.” ²² Ka a nɔbinna kaakaareba naŋ sigi yi Gyɛrosalɛm poɔ, da yeli, “O taa la Beɛlzɛbob, kyɛ ka a yi a kɔntɔmɔ zikaara zie ka O digre kɔntɔmɔ bara.” ²³ Lɛ la ka O boɔle ba kyɛ yeli ne sokpaga ko ba, “Wolɔ ka Setaana na digi Setaana bare? ²⁴ Ka naaloŋ wa poŋ kyaare ne omeŋɛ, a naaloŋ na kon tõɔ̃ are. ²⁵ Ka yiri wa poŋ kyaare ne omeŋɛ, a yiri na kon tõɔ̃ are. ²⁶ Kyɛ ka Setaana wa iri kyaare ne omeŋɛ a poŋ ziiri ayi, o kon tõɔ̃ are, kyɛ ka o baaro la ta. ²⁷ Neɛ zaa kon tõɔ̃ kpɛ dɔɔkpẽã yiri a te tuo o boma yi ne ka o ba daŋ `leŋ a dɔɔkpẽã kyɛ pãã zu o boma. ²⁸ Yelmeŋɛ ka N yeli ko yɛ, ka nensaala biiri yelbebe zaa, ane ba yelbifaare naŋ kyaare ne neɛ kaŋ zaa, na nyɛ la suuri diteroo. ²⁹ Kyɛ neɛ na zaa naŋ yeli yelbifaare kyaare ne a Sekyerete kon bɔŋ nyɛ suuri diteroo togtogi, kyɛ o na seŋ la sɛrɛɛ diu saŋnaa naŋ kon bɔŋ baare.” ³⁰ O da yeli la lɛ, bonzuiŋ ba da yeli ka O taa la sedɛgre. ³¹ Yesu ma ane O yɔɔmine pãã da wa la, a wa are yeŋ poɔ kyɛ toŋ neɛ kaŋ ka o kpɛ te boɔle O. ³² Nobɔ yaga da zeŋ gyilli O la, kyɛ ba mine da yeli ko O, “Kyɛllɛ, Fo ma ane Fo yɔɔmine naŋ be yeŋ boɔrɔ Fo la.” ³³ Ka O da leɛ soore ba, “Aŋ la N ma, bee N yɔɔmine?” ³⁴ Lɛ la ka O kaa a nobɔ zaa naŋ ŋmaa gyilli O, kyɛ yeli, “Nyɛ N ma ane N yɔɔmine. ³⁵ Bonso, neɛ na zaa naŋ erɛ Naaŋmen boɔbo, onɔ la N yɔɔ, ne N yɔɔpuulee, ane N ma.”

¹ Saŋ kaŋ, Yesu da leɛ piili la wullo a mannoɔre zie. A nobɔ naŋ da gyilli O da waa la yaga lɛ, ka O da kpɛ gbori a zeŋ a mane poɔ, kyɛ ka a nobɔ da be a mannoɔre. ² Ka O pãã da wuli ba yɛlɛ yaga ane sokpaga, a yeli ko ba O wuluu poɔ, ³ “Yɛ kyɛllɛ! Bombiyaara la yi a te yaare o bombie. ⁴ O naŋ da yaara a bombie la ka a mine da le sori poɔ ka sazu nuulii wa de a di. ⁵ Kyɛ a mine meŋ le la kusiŋman zie naŋ ba taa tɛnɛ yaga, kyɛ a da buli la wiẽũ lɛ, bonso a tɛnɛ da ba sigi yaga a be. ⁶ Kyɛ a ŋmenaa naŋ da wa do la, ka a da gbeɛle kpi, bonzuiŋ a da ba taa nyaga. ⁷ Kyɛ a mine da le la goore poɔ, ka a goore baa milli pɔge a, ka a da ba tõɔ̃ wɔŋ bie zaa. ⁸ Kyɛ a mine da le la tɛnvelaa poɔ, a buli, a wɔŋ wɔmɔ a eŋ bie; ka a mine wɔŋ wɔmɔ lezɛre ne pie, ka a mine lezaata, ka a mine meŋ wɔŋ wɔmɔ kɔɔ.” ⁹ Ka O yeli ko ba, “Onɔ naŋ taa tobo a na woŋ, vɛŋ ka o woŋ.” ¹⁰ O naŋ pãã da e O yoŋ, balaŋ naŋ da be O zie laŋ ne a pie ne bayi, da soore O la a sokpare ŋa pare. ¹¹ Ka O yeli ko ba, “O ko la yɛnee ka yɛ bɔŋ a Naaŋmen naaloŋ yelsɔgle kyɛ balaŋ naŋ be yeŋ zie, a yɛlɛ ama maŋ wa ne sokpaga: ¹² “ ‘Ba na maŋ tõɔ̃ nyɛrɛ la, kyɛ kon bɔŋ a tɛgɛ, ba na maŋ tõɔ̃ wono la, kyɛ kon bɔŋ a pare; ka lɛ naane ba na leɛ bamenne, ka N di ba yelbebe suuri ko ba.’ ” ¹³ Ka Yesu yeli ko ba, “Yɛ ba bɔŋ a sokpare ŋa pare bee? Wolɔ la ka yɛ pãã na bɔŋ a sokpaga kaŋ zaa pare? ¹⁴ A bombiyaara yaare la a yelbiri. ¹⁵ Nobɔ mine waa la a na a bana naŋ be a sori poɔ, a zie na a yelbiri naŋ yaare. Ka ba naŋ wa woŋ a yelbiri, a pare na poɔ, Setaana maŋ wa la a wa de a yelbiri na ba naŋ yaare a ba sukyie poɔ yi ne. ¹⁶ Kyɛ ba mine meŋ waa la a na balaŋ naŋ be a kusiŋman zie. Balaŋ naŋ wa woŋ a yelbiri, ba de o la wiẽũ lɛ ane noɔ. ¹⁷ Kyɛ ba naŋ ba taa nyaga bamenne poore, lɛ la ka ba meŋ kon kɔɔre yaga. Ka yeltuo bee dɔŋ wa te wa a yelbiri zuiŋ, a pare na poɔ ba maŋ ŋmɛ la gbɛre. ¹⁸ Kyɛ nobɔ mine waa la a na balaŋ naŋ be a goore zie. Ba maŋ wɔŋ la a yelbiri, ¹⁹ kyɛ a teŋɛ zu teɛroŋ, ne a bontaro bɛlloo, ne a boma boɔbo, maŋ wa la a milli pɔge a yelbiri a e ka ba ba tõɔ̃ wɔŋ wɔmɔ zaa. ²⁰ Kyɛ ba mine waa la a na balaŋ naŋ be a tɛnvelaa poɔ. Ba woŋ la a yelbiri a de o, kyɛ wɔŋ wɔmɔ, ka kaŋ wɔŋ lezɛre ne pie, kaŋ lezaata, kyɛ kaŋ meŋ wɔŋ kɔɔ.” ²¹ Ka O yeli ko ba, “Ba maŋ de la kanea vũũ wa ne a de peɛ vɔgle pɔge bee de biŋ gado puliŋ? Ba ba maŋ de biŋ o aroo zie naŋ do? ²² A lɛ poɔ, yelsɔgle zaa kyebe naŋ kon bɔŋ sãã, kyɛ yɛlɛ na zaa ba naŋ pɔge meŋ kyebe naŋ kon bɔŋ kpɛ a kyaane poɔ. ²³ Ka neɛ zaa wa taa tobo na woŋ, vɛŋ ka o woŋ.” ²⁴ Ka O leɛ yeli ko ba, “Teɛre velaa bon na yɛ naŋ woŋ. A bommannaa na yɛ naŋ manne ne, lɛ la ka ba na manne a ko yɛ; kyɛ yɛnee naŋ woŋ zie, ba meŋ na ko yɛ la yaga. ²⁵ Neɛ na zaa naŋ taa, ba na leɛ ko o la yaga. Kyɛ neɛ na zaa naŋ ba taa, ba na de la bon na zaa o naŋ taa a yi ne o zie.” ²⁶ Ka O leɛ yeli, “A Naaŋmen naaloŋ waa la a na dɔɔ naŋ yaare o bombie a tɛnɛ zu. ²⁷ Ka o wa gbiri tensoɔ bee ka o iri a ŋmenaa saŋ, a bombie maŋ buli la a baa, kyɛ onɔ omeŋɛ ba bɔŋ lɛnɛɛ zaa a naŋ e. ²⁸ A tɛnɛ maŋ wɔŋ la wɔmɔ omeŋɛ. A piili ne a vaare, a eŋ a zu, a pãã de ne a zu dɔgebo. ²⁹ Kyɛ a saŋ na a bombie naŋ wa be, a dɔɔ maŋ eŋ la o soɔ, bonso a kyeɛbo saŋ ta la.” ³⁰ Yesu yeli la ko ba, “Boŋ la ka te na manne ne a Naaŋmen naaloŋ? Bee boŋ mannoo la ka te na de manne ne o? ³¹ O waa la a na sɛlmabiri ba naŋ bore a tɛnɛ poɔ, ka o e a bombile a teŋɛ zu bomborɔ zaa poɔ. ³² Kyɛ ka onɔ wa bore, o maŋ buli la baa te waa kpoŋ gaŋ a zɛvaare weɛ boma zaa, kyɛ taa ullii bɛrɛ ka a sazu nuulii na tõɔ̃ wuo kyogri a o `maaroŋ poɔ.” <sup>33</sup> Yesu da maŋ yeli la a yelbiri ko ba ne a sokpaga ama taaba a seŋ lɛ ba naŋ na tõɔ̃ woŋ. <sup>34</sup> Kyɛ O da ba yeli yɛlɛ zaa ko ba ka a ba e sokpare. Kyɛ O naŋ wa be O yoŋ ane O tutuuribo, O da maŋ manne la a sokpaga tɛgɛ zaa ko ba. <sup>35</sup> A daare na, a zie naŋ wa `maa, O da yeli la ko ba, “Yɛ vɛŋ ka te gaa a mane gaŋ loori.” ³⁶ Ba da bare la a nobɔ ba puoriŋ kyɛ kpɛ a gbori te gɛrɛ laŋ ne O. A gboe mine meŋ da be la be. ³⁷ Ka sɛseɛ kpẽã da iri, ka a kõɔ̃ ŋmeɛrɛ kpeɛrɛ a gbori, ka a da kyɛre fẽẽ ka a na e ka a gbori na paale ne kõɔ̃. ³⁸ Yesu da be la a gbori puoriŋ a gaŋ gbire kapuro zu. Lɛ la ka O tutuuribo da seŋ O a yeli O, “Wuliwullo, a kon kpɛ Fo ka tenee bɔre wɛ bee?” ³⁹ Ka O iri a kyaare a sɛseɛ kyɛ yeli ko a mane kõɔ̃, “Bare gɔmɔ! E gbili!” Lɛ la ka a sɛseɛ baare, ka a zie zaa da waa zomm lɛ. ⁴⁰ Ka O yeli ko a O tutuuribo, “Boŋ la so ka yɛ zoro dambẽɛ̃ lɛ? Wolɔ ka yɛ ba taa sagdeu?” ⁴¹ Ba da zoro la dambẽɛ̃ yaga, kyɛ soore taaba, “Aŋ pãã la a dɔɔ ŋa, ka sɛseɛ ane mane kõɔ̃ tuuro O noɔre?”

¹ Ba da gaŋ la a mane gaa Gadarene paaloŋ poɔ. ² A pare na poɔ, Yesu naŋ da yi a gbori poɔ la, ka dɔɔ kaŋ naŋ taa sedɛgre da yi a yabogri zie a tuori Yesu. ³ A dɔɔ ŋa da kpeɛrɛ la a yare zie, kyɛ neɛ zaa da kon tõɔ̃ `leŋ o, ka banzɔlɔ meŋ gba ba tõɔ̃ taa o. <sup>4</sup> Bonso, ba da maŋ eŋ o la bama ne banzɔlɔ, kyɛ o da maŋ ŋmaa la a banzɔlɔ bare kyɛ kare a bama bare. Neɛ na naŋ na tõɔ̃ pɔɔle o kyebe. <sup>5</sup> Tensoɔ ane ŋmenaa zaa, a yare zie ane a tanne zu, o da maŋ kono la kyɛ ŋmaara omeŋɛ ne kubo. <sup>6</sup> O naŋ da nyɛ Yesu naŋ be tɔɔre, ka o da zo gaa te le gbi dumo O niŋe, <sup>7</sup> kyɛ pãã da ŋmɛ kpɛlle a yeli ne kɔkɔkpoŋ, “Boŋ yɛlɛ la ka N taa ne Fo Yesu, a Naaŋmen Kpoŋ Zaa Bidɔɔ? N sɔrɔ Fo la Naaŋmen eŋɛ ka Fo ta dɔgre ma.” <sup>8</sup> Bonso Yesu da yeli ko o la, “Yi a dɔɔ zie, fõõ sedɛgre!” <sup>9</sup> Yesu da soore o la, “Fo yuori la boŋ?” Ka o leɛ yeli, “N yuori la Legyɛn, bonso te waa la yaga.” <sup>10</sup> Ka o leɛ sɔre Yesu yaga ka O ta e ka a yi a paaloŋ na poɔ. <sup>11</sup> A be da peɛlɛ la a taŋa seɛ ka dobaare yaga da dire bondirii a be. <sup>12</sup> Ka a kɔntɔmɔ zaa sɔre O a yeli, “Ko te sori ka te gaa a dobaare zie a te kpɛ a.” <sup>13</sup> A pare na poɔ, O da ko a la sori. Ka a sedɛgɛ da yi a dɔɔ a kpɛ a dobaare eŋne. A dobaare zaa da zo la yaga te sigi a taŋ bogi, a kpɛ a manzuluŋ poɔ a te nyu kõɔ̃ kpi. A dobaare da ta la turi ayi. <sup>14</sup> A balaŋ naŋ da guolo a dobaare da zo yi la a zie ŋa a te manne a yɛlɛ ko a nobɔ naŋ be a teŋɛ ne a paaloŋ zaa poɔ. Lɛ la ka a nobɔ yi wa ka ba te nyɛ bon na naŋ da e. <sup>15</sup> Ba naŋ ta Yesu zie la ka ba nyɛ a dɔɔ na a kɔntɔn naŋ da nyɔge, onɔ naŋ da taa a legyɛn, ka o zeŋ a be a su boma, ka o yɛŋ leɛ. Ka dambẽɛ̃ da kpɛ ba. <sup>16</sup> Balaŋ naŋ da nyɛ a, da manne la ko a nobɔ lɛ a naŋ da waa a dɔɔ na a kɔntɔmɔ naŋ da nyɔge zie ane a dobaare yɛlɛ. <sup>17</sup> Lɛ la ka ba da piili sɔrɔ Yesu ka O yi ba paaloŋ poɔ. <sup>18</sup> Yesu naŋ da kpɛ a gbori la, ka a dɔɔ na a kɔntɔmɔ naŋ da nyɔge sɔre O ka O vɛŋ ka o be O zie. <sup>19</sup> Ka Yesu da ba sage kyɛ yeli o, “Kuli fo yiri a te yeli ko fomeŋɛ yideme bon na zaa a Daŋna naŋ e ko fo ane lɛ O naŋ taa nyonono fo zie.” <sup>20</sup> Lɛ la ka a dɔɔ te gɛrɛ kyɛ piili yele a Dɛkapoles teŋɛ poɔ lɛnɛɛ zaa Yesu naŋ e ko o, ka a nobɔ zaa nɔe da `maa. ²¹ Yesu naŋ de a gbori leɛ gaa a mane gaŋ loori, nobɔ yaga da wa la O zie, a saŋ na O naŋ be a mannoɔre. ²² Ka a senagɔg neŋkpoŋ kaŋ naŋ di Gyaerɔs da wa O zie. O naŋ wa nyɛrɛ Yesu la, ka o le O gbɛɛ puliŋ, ²³ a sɔre O yaga kyɛ yeli, “N pɔɔyalee peɛlɛ la kũũ. Wa de Fo nuuri dɔgle o ka o na tõɔ̃ nyɛ sammo kyɛ nyɛ nyɔvore.” ²⁴ Lɛ la ka Yesu gaa ne o. Nobɔ yaga da tuuro O la a daara taa O eŋɛ. ²⁵ Kyɛ pɔgɔ kaŋ zẽẽ naŋ da kyire yuomo pie ne ayi da be la ba poɔ. ²⁶ O da nyɛ la woore yaga baalonsamma yaga nuuri poɔ, ka o da di o libie zaa baare. Kyɛ ama da ba soŋ o togtogi, kyɛ ka a o baaloŋ da la zuo lɛ. ²⁷ O naŋ da woŋ Yesu yɛlɛ, ka o tu O puoriŋ a nobɔ poɔ a te tɔ O kparo. ²⁸ Bonso, o da yeli la, “Ka Maa deɛ tɔ O bonsuuri yoŋ, N na nyɛ la sammo.” ²⁹ A pare na poɔ la, ka o zẽẽ kyiruu ŋmaa, kyɛ ka o da bɔŋ o eŋgan poɔ ka o nyɛ la sammo a o dɔgroŋ poɔ. ³⁰ A pare na poɔ meŋ, Yesu da bɔŋ la Omeŋɛ poɔ ka fanno kaŋ yi la O zie. Lɛ la ka O leɛ O puoriŋ a nobɔ poɔ kyɛ soore, “Aŋ la tɔ a N bonsuuri?” ³¹ Ka O tutuuribo leɛ yeli ko O, “Nyɛ, nobɔ yaga la daara taa Fo eŋɛ, kyɛ ka Fo soore, ‘Aŋ la tɔ Ma?’ ” ³² Kyɛ ka Yesu kaara a nobɔ poɔ na nyɛ a neɛ na naŋ tɔ O. ³³ A pɔgɔ naŋ bɔŋ bon na naŋ e o zie, da miine la ne dambẽɛ̃ a wa le O niŋe soɔ, kyɛ yeli a yelmeŋɛ zaa ko O. ³⁴ Ka Yesu yeli ko o, “N pɔɔyaa, a fo sagdeu saŋ fo la. Gɛrɛ ne `maaroŋ kyɛ nyɛ sammo a fo dɔgroŋ poɔ.” <sup>35</sup> Yesu naŋ da yele yɛlɛ la, ka dɔbɔ mine yi a senagɔg neŋkpoŋ yiri, a wa yeli, “A fo pɔɔyaa kpi la. Boŋ la so ka fo leɛ dɔɔnɔ a Wuliwullo?” <sup>36</sup> Yesu naŋ woŋ a yelbie ama, ka O yeli ko a senagɔg neŋkpoŋ daadaa, “Ta zoro dambẽɛ̃, kyɛ deɛ sage de.” <sup>37</sup> O da ba sage ka neɛ zaa tu O ka Pita, Gyems ane Gyɔn, Gyems yɔɔ, naane. <sup>38</sup> O naŋ wa ta a senagɔg neŋkpoŋ yiri la, ka Yesu nyɛ a dɔŋ ane nobɔ naŋ kono a ŋmeɛrɛ kpɛlle yaga. <sup>39</sup> Ka O kpɛ a te yeli ba, “Boŋ la so ka yɛ ŋmeɛrɛ kpɛlle lɛ a kono? A bie ba kpi. O gbire la.” <sup>40</sup> Kyɛ ba da la O la. O naŋ wa digi ba zaa ka ba yi la, ka O taa a bie saa ne a ma laŋ ne balaŋ naŋ be O zie, a kpɛ ne a die na poɔ a bie naŋ gaŋ. <sup>41</sup> O nyɔge la a pɔglee nu, kyɛ yeli, “Talita kumi!” (naŋ wuli ka, “Pɔglee, N yeli ko fo la, iri!”) <sup>42</sup> A pare na poɔ ka a pɔglee iri a kyeŋ. O da e la yuomo pie ne ayi. Ka ba nɔe da `maa yaga. ⁴³ Yesu da tere la noɔre kpẽã ka ba ta vɛŋ ka neɛ zaa woŋ a yɛlɛ ama. O pãã da yeli ba la ka ba ko a pɔglee bon kaŋ ka o di.

¹ Yesu da yi la a be a wa kpɛ Omeŋɛ teŋɛ, ka O tutuuribo da tu O. ² A Sabat bebiri naŋ wa ta, O da piili la wullo a senagɔg poɔ. Be la ka nobɔ yaga da woŋ O yɛlɛ ka ba nɔe zaa da `maa. Ka ba yeli, “Yeŋ la ka a dɔɔ ŋa nyɛ ama zaa? Boŋ yɛŋ la ka ba ko O ka O nuuri tõɔ̃ toŋ toŋkpeɛne ama? <sup>3</sup> A dɔɔ ŋa naane a kapɛnta? Onɔ naane a Maria bidɔɔ kyɛ leɛ e a Gyems, Gyosɛf, Gyudas, ane Simon yɔɔ? Kyɛ O yɔɔpuulii, ba ba be te zie kyɛ?” Ka ba suuri da iri yaga ne O. <sup>4</sup> Kyɛ Yesu da yeli ko ba la, “A ba e ka Ŋmen-noɔr sobɔ ba taa eŋno, kyɛ o ba taa eŋno omeŋɛ teŋɛ ane omeŋɛ nobɔ ane omeŋɛ yiri poɔ.” <sup>5</sup> Ka Yesu da ba tõɔ̃ toŋ toŋkpeɛne zaa a be, see O naŋ da de O nu dɔgle baaleba mine zu a saŋ ba yoŋ naane. <sup>6</sup> O noɔre da `maa la a ba basagdeu zuiŋ. ⁷ O da boɔle la a pie ne bayi a piili toŋ ba bayi bayi kyɛ ko ba faŋ gaŋ a sedɛgɛ. ⁸ O da tere la noɔre ko ba ka ba ta de bon zaa tu ne a sori ka dateera naane. Ba ta de woɔ, bee boroboro, bee libie a ba libibɛlɛnte poɔ. ⁹ Ba na tõɔ̃ eŋ la nɔɔteɛ kyɛ ta su kpare ayi. ¹⁰ Kyɛ ka O yeli ko ba, “Ka yɛnee wa kpɛ yiri zaa poɔ, yɛ be a be kyɛ gu ka yɛ wa yi be gɛrɛ. ¹¹ Kyɛ ka neɛ ba wa tuori de yɛ bee kyɛllɛ yɛ yɛlɛ, a saŋ na yɛ naŋ wa yi a be kyɛ gɛrɛ, yɛ piŋ a uuruŋ bare yɛ gbɛɛ eŋɛ ka a di danseɛ kyaare ne ba. N yeli la yelmeŋɛ ko yɛ, a na waa la mɔlɛ ko Sodom ane Gomora a sɛrɛɛ diu daare, gaŋ a teŋɛ na.” ¹² Ba naŋ da yi gɛrɛ la, ka ba kanne ka nobɔ leɛ ba teɛroŋ. ¹³ Ba da digi la kɔntɔmɔ yaga bare kyɛ pore kãã eŋ baaleba yaga kyɛ saŋ ba. ¹⁴ Kyɛ a Naa Hɛrod da woŋ la O yɛlɛ, bonso Yesu yuori da yi la yaare zie zaa, ka o da yeli, “Gyɔn, a Kõɔ̃ Suobu Terɛ leɛ yi la a kuuni poɔ. Lɛ la so ka toŋkpeɛne ama tonɔ o zie.” ¹⁵ Ka ba mine yeli ka, “O e la Elaigya.” Kyɛ ka ba mine yeli ka, “O e la Ŋmen-noɔr sobɔ kaŋ, bee O waa la seŋ a Ŋmen-noɔr sobɔ kaŋ.” ¹⁶ Kyɛ a saŋ na Hɛrod naŋ da woŋ O yɛlɛ, ka o da yeli, “Gyɔn la, a dɔɔ na N naŋ da ŋmaa o zu bare. O leɛ yi la kuuni poɔ.” ¹⁷ Bonso, Hɛrod meŋɛ da tere la noɔre ka ba nyɔge Gyɔn, a `leŋ o a pigu die poɔ, Hɛrodias, a o yɔɔ Felep pɔgɔ zuiŋ, bonso o da kuli o la. <sup>18</sup> Bonzuiŋ Gyɔn da yeli la ko Hɛrod, “A ba tu a Nɔbinnaa ka fo de a fo yɔɔ pɔgɔ.” <sup>19</sup> Lɛ la ka Hɛrodias pãã da taa yɛlɛ ne Gyɔn kyɛ deɛ da boɔrɔ ka o ko o, kyɛ o da ba tõɔ̃, <sup>20</sup> bonzuiŋ, Hɛrod da zoro la Gyɔn a bɔŋ ka o waa la yeltori ne yelkyerete sobɔ, kyɛ pãã da kaara o. Hɛrod naŋ woŋ Gyɔn yɛlɛ, buriburi da nyɔge o la, kyɛ o da maŋ kyɛllɛ la woŋ o yɛlɛ ne popeɛloŋ. <sup>21</sup> Bebiri kaŋ naŋ ta la ka a seŋ ka Hɛrod da maale o dɔgebo bebiri tigri ko a teŋ daŋneba, a sogyare neŋkponni, ane a Galili nembɛrɛ. <sup>22</sup> A saŋ na Hɛrodias pɔɔyaa naŋ da wa kpɛ, o da seɛ la ka a pɛle Hɛrod poɔ a laŋ ne o bonditaaba. Ka a Naa yeli ko a pɔglee, “Sɔre bon na zaa fo naŋ boɔrɔ ka N de ko fo.” <sup>23</sup> Kyɛ ka o polle noɔre ko o, “Bon na zaa fo naŋ sɔre n zie, N na ko fo la, ka a naŋ e n naaloŋ poŋ sentaa gba.” <sup>24</sup> Ka a pɔglee yi te yeli ko o ma, “Boŋ la ka N na sɔre ka o ko ma?” Ka o ma leɛ yeli ko o, “Gyɔn, a Kõɔ̃ Suobu Terɛ zu la.” <sup>25</sup> A pare na poɔ ka a pɔglee zo kpɛ a naa zie wiẽũ lɛ a sɔre o, “N boɔrɔ la ka fo ko ma Gyɔn, a Kõɔ̃ Suobu Terɛ zu pampana ŋa, ka o eŋ a bondilaa poɔ.” <sup>26</sup> A naa poɔ da saŋ la yaga, kyɛ a noɔre o naŋ da faa polle ane o bonditaaba naŋ da be be zuiŋ la ka o da ba boɔrɔ ka o mɔŋ o. <sup>27</sup> A pare na poɔ la ka a naa toŋ a neŋkoora a tere noɔre ka o de o zu wa ne. Lɛ la ka a dɔɔ gaa te ŋmaa Gyɔn zu bare a pigu die poɔ. <sup>28</sup> O da taa la o zu wa ne bondilaa poɔ a de ko a pɔglee, ka a pɔglee meŋ de ko o ma. <sup>29</sup> Gyɔn tutuuribo naŋ da woŋ a ŋaa, ba da wa la wa de Gyɔn eŋgan a gaale o yabogi poɔ. <sup>30</sup> A potuuribo da laŋ la taa Yesu zie a manne ko O bon na zaa ba naŋ da e kyɛ wuli. <sup>31</sup> Ka O da yeli ko ba, “Yɛ wa, yɛ yoŋ, a gaa wɛgyaŋ poɔ a te pɛnne belaŋ a be.” O da yeli la lɛ bonzuiŋ nobɔ yaga da maŋ waara la kyɛ leɛ gɛrɛ ka ba da ba nyɛ pɛnnoo zaa naŋ seŋ ka ba na tõɔ̃ di. <sup>32</sup> Lɛ la ka ba kpɛ a gbori a te gaa wɛgyaŋ zie kaŋ, ba yoŋ. <sup>33</sup> A nobɔ da nyɛ ba la ka ba gɛrɛ, kyɛ ba yaga zie bɔŋ ka Onɔ la. Ba da yi la ba tenne zaa poore a de ba wẽɛ̃ zo ne gbɛɛ a te pɔge O a zie na O naŋ be. <sup>34</sup> Yesu naŋ wa yi a gbori poɔ a nyɛ nobɔ yaga, ka O da taa nimibaaloŋ ne ba, bonzuiŋ ba da waa la a na peere naŋ ba taa kyeenɛ, ka O pãã da piili wullo ba yɛlɛ yaga. <sup>35</sup> A bebiri naŋ da faa baare la, ka O tutuuribo da wa O zie a wa yeli O, “Wɛgyaŋ zie la aŋa, kyɛ a saŋ tɔle la. <sup>36</sup> Bare ba ka ba gaa te kpɛ a paaloŋ ane a tembilii poore a te da boroboro, bonso ba da ba taa bondirii zaa.” <sup>37</sup> Kyɛ ka Yesu leɛ yeli ko ba, “Yɛ ko ba bon kaŋ ka ba di.” Ka ba yeli ko O, “Te gaa te da boroboro naŋ seŋ denari kɔɔre ayi a de ko ba ka ba ɔɔ, bee?” <sup>38</sup> Ka O yeli ko ba, “Boroboro awolɔ ka yɛ taa? Yɛ gaa te nyɛ.” Ba naŋ gaa te nyɛ la ka ba yeli, “Anuu ane zomɔ ayi.” <sup>39</sup> Ka Yesu tere noɔre ko ba ka ba vɛŋ ka a nobɔ zeŋ ziiri ziiri a mɔ`maara zu. ⁴⁰ Lɛ la ka ba zeŋ ziiri kɔɔ-kɔɔ ane lezaayi ne pie-pie. ⁴¹ O naŋ de a boroboro anuu ane a zomɔ ayi la ka o gbole kaa sazu, a puori kyɛ ŋmaa a boroboro, a de ko O tutuuribo ka ba de poŋ ko a nobɔ. O meŋ da poŋ la a zomɔ ayi ko a nobɔ zaa. ⁴² Ba zaa da di la tege, ⁴³ kyɛ ka a tutuuribo da wuo a bondi-ŋmaara ane a zoŋ-ŋmaara a paale pɛbilii pie ne ayi. ⁴⁴ A dɔbɔ balaŋ naŋ da di a boroboro da waa la turi anuu. ⁴⁵ A pare na poɔ, Yesu da e la ka O tutuuribo kpɛ a gbori a de O wẽɛ̃ a gaŋ a mane te gaa Betsaida, kyɛ ka O pãã da bare a nobɔ ka ba yaare. ⁴⁶ O naŋ da bare ba la, ka O da yi te do taŋ zu ka O te puori a be. ⁴⁷ A zie naŋ wa `maa, a gbori da be la a mane senselensoɔ kyɛ ka O yoŋ da be a teŋɛ zu. <sup>48</sup> O da nyɛ la ka O tutuuribo moɔrɔ ne a gbori mɔnnoo, bonzuiŋ a sɛseɛ da kyaare ba la. A tensoɔ guuro anaare sobɔ saŋ la, ka O da waara ba zie a kyene a maŋkõɔ̃ zu, kyɛ a da kyɛre fẽẽ ka O na tɔle ba bare. <sup>49</sup> Kyɛ ba naŋ wa nyɛ O, ka O kyene a maŋkõɔ̃ zu, ba da teɛre ka O e la nyaakpẽẽ, kyɛ ŋmɛ kpɛlle. <sup>50</sup> Ba zaa da nyɛ O la ka ba sukyie dɔɔnɔ. A pare na poɔ la ka O da yeli ko ba, “Yɛ taa sukyiri. Maa la. Yɛ ta zoro dambẽɛ̃.” <sup>51</sup> O da do kpɛ la a gbori poɔ ne ba, ka a sɛseɛ ŋmaa daadaa lɛ, ka bamenne nɔe da `maa yaga a tonseɛle ŋa zuiŋ. ⁵² Bonso ba da ba bɔŋ a boroboro yɛlɛ tɛgɛ a ba zukpeɛne zuiŋ. ⁵³ Ba naŋ wa gaŋ a mane baare la, ka ba ta a Gɛnɛsarɛt paaloŋ mannoɔr. ⁵⁴ Ba naŋ wa yi a gbori poɔ baare, nobɔ da bɔŋ daadaa lɛ ka Yesu la. ⁵⁵ A lɛ la ka ba da zo kpɛ a paaloŋ na zaa poɔ a te tuo ba baaleba a ba gado boma zu wa ne, zie na zaa ba naŋ woŋ ka O be. ⁵⁶ Kyɛ zie na zaa O naŋ da gaa, a tembilii poɔ, bee a teŋkponni poɔ, bee a wɛre poɔ, ba da maŋ gaale la a baaleba a dare poɔ. Ba da sɔre O la ka O vɛŋ ka ba tɔ O kparo kpiiru yoŋ. Balaŋ zaa naŋ da tɔ O da nyɛ la sammo.

¹ A Farasi deme ane a nɔbinna kaakaareba mine naŋ yi Gyɛrosalɛm da laŋ la taa O zie. ² Ba naŋ da nyɛ ka O tutuuribo mine dire bondirii ne nuuri naŋ ba veɛlɛ, ka a lɛ wuli ka ba da ba pɛge ba nuuri, ka ba yeli ka a ba tu sori. ³ Bonso, a Farasi deme ane a Gyu deme zaa ba maŋ di see ka ba maŋ pɛge ba nuuri velaa a tuuro ba nembɛrɛ eroŋ. ⁴ Ka ba naŋ wa yi a daa poɔ wa, ba ba maŋ di see ka ba pɛge ba nuuri. Eroŋ yaga be la be ka a nembɛrɛ da de ko ba ka ba tuuro, a na kɔbilii, dogre, kudogre, ne tabolɛɛ pɛgebo. ⁵ A Farasi deme ane a nɔbinna kaakaareba pãã da soore la Yesu, “Boŋ la so ka Fo tutuuribo ba tuuro a nembɛrɛ eroŋ kyɛ maŋ di bondirii ne nuuri naŋ ba pɛge.” ⁶ Ka O leɛ yeli ko ba, “Isaiya kanne la yɛ yɛlɛ velaa, yɛnee melmelebɛ, a na o naŋ ŋmaa biŋ, “ ‘Nobɔ bama eŋnɛ Ma la ane ba nɔgbɛmɛ, kyɛ ba sukyie waa la tɔɔre ne Ma. ⁷ Ba puoro Ma la ne puoruu naŋ ba taa tɔnɔ; ba wuli la nensaala nɔteroo ka a sereŋ e la wuluu.’ ⁸ Bonso, yɛ bare la Naaŋmen nɔe kyɛ tuuro a nensaala eroŋ, na a dogre ne kɔbilii pɛgebo ane eroŋ ama taaba zaa yɛ naŋ maŋ erɛ.” ⁹ Kyɛ ka O da yeli ko ba, “Yɛ sereŋ bare la a Naaŋmen noɔre ka yɛ na tõɔ̃ tuuro yɛ nembɛrɛ eroŋ. ¹⁰ Bonso, Moses yeli la, ‘Eŋnɛ fo saa ne fo ma,’ ne, ‘Onɔ naŋ wa yeli yelfaare kyaare ne o saa bee o ma, vɛŋ ka ba ko o.’ ¹¹ Kyɛ yɛnee yeli ka, ka neɛ wa yeli o saa bee o ma, ‘Sommo zaa fo naŋ da naa nyɛ n zie e la Koreban,’ (a pare la, a e la kyɔgtaa ko Naaŋmen), ¹² yɛ maŋ vɛŋ la ka o ba toŋ tomɔ zaa ko o saa bee o ma. ¹³ Lɛ ka yɛ e ka Naaŋmen yelbiri ba taa faŋ, a yi yɛ nembɛrɛ eroŋ yɛ naŋ de ko nobɔ zie. A eroŋ ama taaba la ka yɛ maŋ erɛ.” ¹⁴ Yesu da boɔle la nobɔ yaga zaa O zie, a da yeli ko ba, “Yɛ kyɛllɛ Ma, yɛ kaŋ zaa, kyɛ bɔŋ a pare. ¹⁵ Bon zaa kyebe naŋ na yi yeŋ poɔ a wa kpeɛrɛ nensaala eŋɛ na tõɔ̃ e ka o waa dɛgre. Kyɛ bon na naŋ yire o poɔ, ana na e ka o waa nendɛgre. ¹⁶ Ka neɛ zaa wa taa tobo na woŋ, vɛŋ ka o woŋ.” ¹⁷ O naŋ wa bare a nobɔ kyɛ kpɛ a yiri poɔ, O tutuuribo da soore O la a sokpare pare. ¹⁸ Ka O soore ba, “A yɛnee meŋ ba bɔŋ a pare bee? Yɛ ba nyɛ ka bon na zaa naŋ yi yeŋ poɔ a wa kpeɛrɛ neɛ kon tõɔ̃ vɛŋ ka o waa dɛgre? ¹⁹ Bonso, a ba maŋ kpeɛrɛ o sukyiri poɔ, kyɛ o poɔ la ka a maŋ kpeɛrɛ, kyɛ pãã leɛ yi a o eŋgan kpɛ a bangyera laa poɔ, a lɛ vɛŋ la ka bondirii zaa waa soŋ.” ²⁰ Ka O leɛ yeli, “Bon na naŋ yire nensaala poɔ, ana na e ka o waa nendɛgre. ²¹ Bonso, nensaaleba poɔ, a ba sukyie poɔ la, ka teɛroŋ faare, pẽɛp̃ ẽɛ ̃ tomɔ, pẽɛp̃ ẽɛ ̃ efaare, neŋko, ²² nannyigruŋ, digbogbo, potuoluŋ, bɛlloo, edɛgre, nimifaare, yelbifaare, pɔɔloŋ, ane damboluŋ maŋ yi wa. ²³ A efaare ama zaa la maŋ yi a nensaala poɔ, a e ka o waa nendɛgre.” ²⁴ Yesu da iri la yi a be kyɛ gaa te kpɛ Taiya ne Sidon paaloŋ poɔ. O naŋ wa kpɛ yiri kaŋ poɔ, O da ba boɔrɔ ka neɛ zaa bɔŋ a zie na O naŋ be, kyɛ O kon tõɔ̃ vɛŋ ka a e yelsɔglaa. ²⁵ Ka pɔgɔ kaŋa, naŋ taa pɔɔyaa sedɛgre naŋ nyɔge, da woŋ O yɛlɛ a wa O zie a le O gbɛɛ eŋɛ. ²⁶ A pɔgɔ da e la Grik neɛ, kyɛ ka ba da dɔge o Siria Fonisia paaloŋ poɔ. O da sɔre la Yesu ka O digi a kɔntɔn bare o pɔɔyaa eŋɛ. ²⁷ Yesu da yeli la ko o, “Vɛŋ ka a bibiiri de wẽɛ̃ di tege, bonso, a ba veɛlɛ ka ba de a bibiiri boroboro lɔɔ eŋ balii.” ²⁸ Ka o leɛ yeli ko O, “Oo, Daŋna, kyɛ a balii naŋ be a tabol puliŋ maŋ di la a bibiiri bondiŋmaara naŋ le.” ²⁹ Lɛ la ka O yeli ko o, “A fo yelbie ama zuiŋ, fo na tõɔ̃ gɛrɛ. A kɔntɔn yi la a fo pɔɔyaa poɔ.” ³⁰ O naŋ da kuli, o da nyɛ la o pɔɔyaa ka o gaŋ a gado zu, ka a kɔntɔn yi o eŋɛ. ³¹ Lɛ la Yesu da yi Taiya ne Sidon paaloŋ poɔ a kyɛ sigi a Galili mane zie a te kpɛ a Dɛkapoles paaloŋ poɔ. ³² Ba da taa la dɔɔ kaŋa naŋ e woŋ kyɛ kon tõɔ̃ yeli yɛlɛ vela wa ne O zie. Ba da sɔre O la ka O de O nu dɔgle o. ³³ Kyɛ O naŋ wa tage O yi ne a nobɔ poɔ, Yesu da de la O nubie toŋ a dɔɔ tobo poɔ, kyɛ poore motaare tɔ ne a dɔɔ zele. ³⁴ O da leɛ gbole la kaa tenvelaa kyɛ hoone, a yeli ko o, “Ef-fata!” (naŋ wuli ka, “Yuo!”). ³⁵ A pare na poɔ ka a dɔɔ tobo yuo, ka o zele meŋ dɔle ka o piili yele yɛlɛ velaa. ³⁶ Yesu da ko ba la noɔre ka ba ta yeli ko neɛ zaa. Kyɛ O naŋ da wa leɛ tere noɔre ŋa ko ba, lɛ la ka ba meŋ leɛ yele O yɛlɛ yaga. ³⁷ A nobɔ nɔe zaa da `maa la zuo ka ba yele “O e la bon zaa velaa. O e la ka wonni wono kyɛ ka gbara meŋ yele yɛlɛ.”

¹ A bebie ana poɔ, nobɔ da laŋ la taa yaga, kyɛ ba da ba taa bon zaa na di, ka Yesu boɔle O tutuuribo a yeli ko ba, ² “Nimibaaloŋ erɛ Ma la a nobɔ bama eŋɛ, bonzuiŋ pampana ŋa, ba be la N zie beri ata kyɛ ba ba taa bondirii zaa. ³ Ka Maa bare ba ka ba kuli ne kɔŋ, ba na le la a sori poɔ, bonzuiŋ ba mine yi la zitɔɔre zaa wa.” ⁴ Ka a O tutuuribo leɛ yeli ko O, “Yeŋ la ka neɛ na tõɔ̃ nyɛ boroboro naŋ na seŋ a nobɔ bama a wɛgyaŋ ŋa poɔ?” ⁵ Ka Yesu soore ba, “Boroboro awolɔ ka yɛ taa?” Ka ba leɛ yeli, “Ayopõĩ.” ⁶ Ka O yeli a nobɔ ka ba zeŋ teŋɛ. Kyɛ O naŋ da de a boroboro ayopõĩ a puori bareka puoruu, O da ŋmaa la a boroboro a de ko O tutuuribo ka ba meŋ tõɔ̃ de ko a nobɔ. A lɛ la ka ba da de poŋ ko ba. ⁷ Ba meŋ da taa la zombilii belaŋ. O naŋ da puori bareka puoruu, O da yeli la ko a O tutuuribo ka ba meŋ de poŋ ko a nobɔ. ⁸ Ka ba da di tege. Ba da wuo la a boroboro ŋmaara naŋ kyɛre paale pɛkponni ayopõĩ. ⁹ A balaŋ naŋ da di da ta la turi anaare. O naŋ da bare ba ka ba yaare la, ¹⁰ a pare na poɔ, ka O kpɛ a gbori ane O tutuuribo a te gaa Dalmanuta paaloŋ poɔ. ¹¹ Ka a Farasi deme da wa O zie a wa piili ŋmeɛrɛ nɔkpeɛne ne O. Ba da boɔrɔ la ka O ko ba manno kaŋ naŋ yi tenvelaa, ka ba na tõɔ̃ gyenne O. ¹² Ka O hoone O seɛ poɔ kyɛ yeli, “Wolɔ la ka a boorɔ ŋa deme maŋ boɔrɔ ka ba nyɛ manno kaŋ? Yelmeŋɛ N yeli ko yɛ, manno kaŋ zaa kon wa a boorɔ ŋa deme zie.” ¹³ Lɛ la ka O pãã bare ba, kyɛ leɛ kpɛ a gbori poɔ a gaa a mane gaŋ loori. ¹⁴ O tutuuribo da yinni la ka ba de boroboro wa ne. Ba da ba taa boroboro zaa naŋ gaŋ bonyenaa yoŋ a gbori poɔ. ¹⁵ Ka Yesu ko ba noɔre kyɛ yeli, “Yɛ gu kyɛ kaara yɛmenne velaa a Farasi deme belɛ ane a Hɛrod belɛ eŋɛ.” ¹⁶ Lɛ la ka ba teɛre taa kyɛ pãã yeli, “Te naŋ ba taa boroboro wa ne zuiŋ la.” ¹⁷ Yesu naŋ bɔŋ a bon na ba naŋ yeli la, ka O yeli ko ba, “Boŋ la so ka yɛ yele yɛlɛ a yɛ poɔ ka yɛ ba de boroboro wa ne? Yɛ kyãã ba nyɛ bee bɔŋ a pare? Yɛ kyãã taa zukpeɛne? ¹⁸ Yɛ taa la nimie kyɛ kon tõɔ̃ nyɛ? Yɛ taa la tobo kyɛ kon tõɔ̃ woŋ? Yɛ ba teɛrɛ bee? ¹⁹ N naŋ da ŋmaa a boroboro anuu a ko a nobɔ turi anuu, boroboro ŋmaara pɛbilii awolɔ la ka yɛ da wuo paale?” Ka ba leɛ yeli, “Pie ne ayi.” ²⁰ “Kyɛ N naŋ da ŋmaa a boroboro ayopõĩ a ko a nobɔ turi anaare, pɛkponni awolɔ la ka yɛ da wuo a boroboro ŋmaara paale?” Ka ba leɛ yeli, “Ayopõĩ.” ²¹ Ka O yeli ko ba, “Wolɔ ka yɛ ba bɔŋ a pare?” ²² O da wa la Betsaida teŋɛ, ka ba da taa zɔŋ kaŋ wa ne O zie a sɔre O ka O tɔ o. ²³ Yesu da nyɔge la a zɔŋ nu a tage o yi ne a teŋɛ poɔ. O naŋ wa kyiri motaare eŋ a dɔɔ nimie eŋɛ kyɛ de O nu dɔgle o la, ka O soore o, “Fo nyɛ la bon kaŋ” ²⁴ Ka a dɔɔ gbole kaa kyɛ yeli, “N nyɛ la nensaaleba ka ba waa a na teere naŋ yɔ kyene viire.” ²⁵ Ka Yesu pãã leɛ de O nuuri dɔgle o nimie, kyɛ e ka o kaa sazu. Lɛ la ka o nimie leɛ waa soŋ, ka o pãã nyɛ neɛ zaa velaa. ²⁶ Yesu bare o la ka o kuli kyɛ ka O yeli, “Ta wa kpeɛrɛ a teŋɛ poɔ, bee yeli a yɛlɛ ŋa ko neɛ zaa a teŋɛ poɔ.” ²⁷ Yesu ne O tutuuribo da yi la gaa te kpɛ a tenne naŋ gyilli Sɛsarea Felepe. A sobiri poɔ, O da soore ba la, “Aŋ la ka a nobɔ yeli ka N waa?” ²⁸ Ka ba da leɛ yeli, “Gyɔn, a Kõɔ̃ Suobu Terɛ la, kyɛ ka ba mine yeli ka Elaigya, kyɛ ka ba mine meŋ yeli ka a Ŋmen-noɔr sobɔ kaŋ la.” ²⁹ Ka O da soore ba, “Kyɛ ka yɛnee meŋ yeli ka aŋ la Ma?” Ka Pita leɛ yeli O, “Fõõ la a Kristo.” ³⁰ Ka O da kpãã ba ka ba ta wa yeli O yɛlɛ ko neɛ kaŋ zaa. ³¹ Ka O pãã da piili wuli ba ka a fere ka a Nensaala Bidɔɔ nyɛ woore yɛlɛ yaga poɔ, ka a nembɛrɛ, ne a puoru neŋkponni ninderebe, ane a nɔbinna kaakaareba zagre O bare a ko O. Kyɛ ka beri ata wa baare, O na leɛ iri la. ³² O da yeli la a yɛlɛ ŋa kperaa lɛ, ka Pita tage O yi ne a piili te nyare O zu. ³³ Kyɛ Yesu naŋ wa leɛ kaa O tutuuribo, O nyare la Pita zu a yeli, “Yi gaa N puoriŋ, Setaana. Fo ba taa Naaŋmen yɛlɛ fo teɛroŋ poɔ, kyɛ nensaala yɛlɛ la ka fo taa.” ³⁴ Yesu naŋ da boɔle nobɔ yaga ane a tutuuribo, O da yeli la ko ba, “Ka neɛ zaa wa boɔrɔ ka o tu N puoriŋ, vɛŋ ka o kyiire omeŋɛ kyɛ tuo o dagara a tuuro Ma. ³⁵ Bonso, neɛ na zaa naŋ na faa o nyɔvore, na bɔre o la bare, kyɛ neɛ na zaa naŋ na bɔre o nyɔvore a Maa ane a yelnoore zuiŋ, a neɛ na sobɔ na faa la o nyɔvore. ³⁶ Bonso, boŋ tɔnɔ la ka neɛ na nyɛ ka onɔ wa nyɛ a donɛɛ zaa kyɛ bɔre omeŋɛ nyɔvore? ³⁷ Bee, boŋ la ka neɛ na de tɛge ne o nyɔvore? ³⁸ A lɛ poɔ, neɛ na zaa naŋ zoro vi a Maa ne N yelbie zuiŋ, a boorɔ ŋa pẽɛp̃ ẽɛ ̃ ne yelbebe deme zie, onɔ eŋɛ la ka a Nensaala Bidɔɔ meŋ na nyɛ vi, a saŋ na Onɔ ane a malkere kyerete naŋ na wa a O Saa eŋno poɔ.”

¹ Ka O yeli ko ba, “N yeli la yelmeŋɛ ko yɛ, ka ba mine naŋ are kyɛ kon nyɛ kũũ kyɛ gu ka ba wa te nyɛ a Naaŋmen naaloŋ ka o wa ne faŋa.” ² Bebie ayoɔbo naŋ wa tɔle, Yesu da de la Pita, Gyems ane Gyɔn a taa ba do ne taŋkpoŋ kaŋ zu, ka ba yoŋ da be a be. Be la ka O waaloŋ da leɛ a ba niŋe soɔ. ³ O bonsuuri da nyegrɛ la a pɛle gaŋ sakubo zaa, a gaŋ lɛ teŋɛ zu bompɛgre zaa naŋ na tõɔ̃ pɛge ka a yi furu tutu. ⁴ A be la ka Elaigya ane Moses wa sãã ba zie a wa yele yɛlɛ ane Yesu. ⁵ Ka Pita yeli ko Yesu, “Rabai, a waa la velaa ka te be a kyɛ. Vɛŋ ka te maale sɛgre ata, Fõõ so kaŋ, Moses meŋ kaŋ, ka Elaigya meŋ so kaŋ.” ⁶ Pita da ba bɔŋ bon na o naŋ na yeli, bonso ba da zoro la dambẽɛ ̃ yaga. ⁷ Kyɛ ka zanzugo kaŋ da wa a ligi pɔge ba, ka kɔkɔre kaŋ yi a zanzugo poɔ a yeli, “Aŋa la N Bidɔɔ N naŋ nɔŋ. Yɛ kyɛllɛ O.” ⁸ Tentɔba na, ba naŋ da leɛ kaa gyilli bamenne, ba da ba leɛ nyɛ neɛ zaa ka Yesu ne ba yoŋ naane. ⁹ Ba naŋ da wa sigre a taŋ la, ka Yesu ko ba noɔre ka ba ta wa yele korɔ neɛ zaa bon na ba naŋ da nyɛ, kyɛ gu ka a Nensaala Bidɔɔ wa iri yi a kuuni poɔ baare. ¹⁰ Ba da de la a yɛlɛ ŋa biŋ ba yoŋ zie, a maŋ soorɔ taaba a boɔrɔ a kuuni leɛ-iruŋ pare. ¹¹ Lɛ la ka ba soore O, “Boŋ la so ka a nɔbinna kaakaareba maŋ yeli ka a fere la ka Elaigya de wẽɛ̃ wa?” ¹² Ka Yesu leɛ yeli ko ba, “Elaigya sereŋ de la wẽɛ̃ wa, a leɛ maale boma zaa. A na ba naŋ da ŋmaa biŋ, a fere la ka a Nensaala Bidɔɔ nyɛ woore yaga kyɛ ka ba meŋ zagre O. ¹³ Kyɛ Maa yeli la ko yɛ, Elaigya wa la. Ba meŋ e la lɛnɛɛ zaa ba naŋ boɔrɔ ka ba e ko o, a na ba naŋ da ŋmaa a o yɛlɛ biŋ.” ¹⁴ O naŋ wa a tutuuribo zie, O da nyɛ la nobɔ yaga ka ba ŋmaa gyilli ba kyɛ meŋ nyɛ a nɔbinna kaakaareba ka ba ŋmeɛrɛ nɔkpeɛne ne ba. ¹⁵ A pare na poɔ, a nobɔ yaga na zaa naŋ da wa te nyɛrɛ Yesu, ba nɔe da `maa la yaga, ka ba da zo gaa a te puori O. <sup>16</sup> Ka O soore a nɔbinna kaakaareba, “Boŋ yɛlɛ eŋɛ la ka yɛ ŋmeɛre nɔkpeɛne ne ba?” <sup>17</sup> Ka dɔɔ kaŋ naŋ be a nobɔ poɔ leɛ yeli, “Wuliwullo, N taa la n bidɔɔ wa ne Fo zie sedɛgre kaŋ naŋ nyɔge, ka o kon tõɔ̃ yeli yɛlɛ. <sup>18</sup> Zie na zaa o naŋ be ka onɔ wa nyɔge o, o maŋ lɔɔ o la tensoɔ. Ka o fuuro motaare o noɔre eŋɛ a ɔɔrɔ o nyemɛ, kyɛ ka o leɛ bale o zaa. N yeli la a Fo tutuuribo ka ba digi a sedɛgre ŋa bare, kyɛ ba da ba tõɔ̃.” <sup>19</sup> Ka Yesu leɛ yeli, “Yɛnee basagdeu boorɔ deme. N na kɔɔre la yɛ zie a seŋ wolɔ? A na kɔɔre seŋ wolɔ ka N na di kannyiri yɛ zie? Taa o wa ne N zie.” <sup>20</sup> Ka ba da taa o gaa ne O zie. A sedɛgre naŋ wa nyɛ Yesu, ka a pare na poɔ, o ŋmɛ a bie lɔɔ a e ka o gyemɛ iri. Ka a bie le a tensoɔ, a bille, a fuuro motaare o noɔre eŋɛ. <sup>21</sup> Ka Yesu soore a bie saa, “A kɔɔre la seŋ wolɔ a naŋ maŋ erɛ o a ŋaa?” Ka o yeli, “A o bile saŋ zaa la. <sup>22</sup> A maŋ ta sobɔ lɔɔ o eŋ vũũ poɔ bee kõɔ̃ poɔ a na ko o. Kyɛ ka Fõõ na tõɔ̃ e bon zaa, taa nyonono ne te kyɛ soŋ te.” <sup>23</sup> Ka Yesu yeli, “Ka fo na tõɔ̃ sage de, bon zaa na tõɔ̃ e ko onɔ naŋ sage de.” <sup>24</sup> Daadaa lɛ, ka a bie saa koŋ ne ŋmenaa kõɔ̃ kyɛ yeli, “Daŋna, N sage de la. Soŋ ma a n basagdeu poɔ.” <sup>25</sup> Yesu naŋ nyɛ ka nobɔ yaga zoro waara ba zie la, ka O nyare a sedɛgre zu kyɛ yeli, “Fõõ sewoŋ ane segbara, N ko fo la noɔre. Wa yi a o eŋɛ kyɛ ta wa la kpɛ o zaa!” <sup>26</sup> Ka a seɛ ŋmɛ kpɛlle, a e ka a bie gyemɛ iri yaga kyɛ pãã wa yi. Ka a bie waa a na kũũ ka ba yaga zie yeli, “O kpi la.” <sup>27</sup> Kyɛ ka Yesu nyɔge o nu eŋɛ a zɛle o ka o iri are. <sup>28</sup> Yesu naŋ wa kpɛ a yiri poɔ la ka a O tutuuribo soore O yoŋ zie, “Boŋ la so ka tenee kon tõɔ̃ digi o bare?” <sup>29</sup> Ka O yeli ko ba, “Ama taaba ba maŋ yire, ka puoruu ne nɔ`leŋ naane.” ³⁰ Ba bare la a be kyɛ tu Galili paaloŋ, kyɛ Yesu da ba boɔrɔ ka neɛ bɔŋ be zaa ba naŋ be. ³¹ O wuli la O tutuuribo a yeli ko ba, “Ba na nyɔge la a Nensaala Bidɔɔ a eŋ O a nensaala nuuri poɔ. Ba na ko O la, kyɛ ka Onɔ wa kpi baare, a beri ata daare O na leɛ iri la.” ³² Kyɛ ba da ba bɔŋ a yɛlɛ ama pare, kyɛ da zoro dambẽɛ ̃ ka ba soore O. ³³ O da ta la Kaperneom teŋɛ. O naŋ da be a yiri poɔ la ka O soore ba, “Boŋ la so ka yɛ da ŋmeɛrɛ nɔkpeɛne a sori zu?” ³⁴ Ka ba da e gbili, bonso, a sori zu ba da yeli la ka aŋ la na e ba zaa kpoŋ sobɔ. ³⁵ O da zeŋ la kyɛ boɔle a pie ne bayi a yeli ko ba, “Ka neɛ kaŋ zaa wa boɔrɔ ka o de wẽɛ̃, o na be la ba zaa puoriŋ kyɛ leɛ e tontonɔ ko ba zaa.” ³⁶ O da de la bibile kaŋ a vɛŋ ka o are a ba senselensoɔ. O naŋ da de a bie eŋ O nuuri poɔ la ka O yeli ko ba, ³⁷ “Neɛ na zaa naŋ tuori de a bibilii bama kaŋ zaa a N yuori eŋɛ, meŋ tuori de Ma la. Kyɛ neɛ na zaa naŋ tuori de Ma ba tuori de Maa, kyɛ o tuori de la a Sobɔ na naŋ toŋ Ma.” ³⁸ Ka Gyɔn leɛ yeli ko O, “Wuliwullo, te nyɛ la neɛ kaŋ ka o digre kɔntɔmɔ bara a Fo yuori eŋɛ, kyɛ O ba tuuro te. Ka te yeli o ka o ta e a lɛ, bonzuiŋ o ba e te kaŋ.” ³⁹ Ka Yesu yeli, “Yɛ ta pigi o sori. Bonso, neɛ kaŋ zaa kon tõɔ̃ toŋ toŋkpeɛne a N yuori eŋɛ kyɛ la leɛ puoriŋ a yeli faaloŋ zaa kyaare Ma. ⁴⁰ Bonso, neɛ na naŋ ba kyaare te, e la te kaŋ. ⁴¹ Ka neɛ kaŋ zaa wa ko yɛ kõɔ ̃ ne kɔp ka yɛ nyu N yuori eŋɛ, yɛ naŋ e Kristo soobo, N yeli la yelmeŋɛ ko yɛ, a o yɔɔre kon bɔŋ bɔre. ⁴² “Kyɛ ka neɛ wa vɛŋ ka a bibilii bama kaŋ zaa naŋ sage de Ma wa ŋmɛ gbɛre, a da naa waa la velaa yaga ka ba `leŋ neɛre yagle o kɔkɔre eŋɛ a de o lɔɔ eŋ mane poɔ. <sup>43</sup> Ka fo nu wa e ka fo ŋmɛ gbɛre, ŋmaa o bare. A waa la velaa ka fo kpeɛrɛ a teŋɛ zu ne nuyenaa, gaŋ fo naŋ taa nuuri ayi kpɛ ne a tenfaa ne a vũũ naŋ kon bɔŋ kpinni poɔ. <sup>44</sup> Be la ka ba dandulo ba kpiire, kyɛ ka a vũũ meŋ ba kpinne. <sup>45</sup> Ka fo gbɛre wa vɛŋ ka fo ŋmɛ gbɛre, ŋmaa o bare. A na waa la velaa ka fo kpeɛrɛ a teŋɛ zu ne gbɛyenaa gaŋ fo naŋ taa gbɛɛ ayi kyɛ ka ba de fo lɔɔ eŋ tenfaa ne a vũũ naŋ kon bɔŋ kpinni poɔ. <sup>46</sup> Be la ka ba dandulo ba kpiire, kyɛ ka a vũũ meŋ ba kpinne. <sup>47</sup> Kyɛ ka fo nimiri meŋ wa vɛŋ ka fo ŋmɛ gbɛre, `loori iri bare. A na waa la velaa ka fo kpɛ a Naaŋmen naaloŋ ne nimiyenaa gaŋ fo naŋ taa nimie ayi kyɛ ka ba de fo lɔɔ eŋ tenfaa vũũ poɔ. ⁴⁸ Be la ka “ ‘ba dandulo ba kpiire, kyɛ ka a vũũ meŋ ba kpinne’. ⁴⁹ Ba na vieli la neɛ zaa ne vũũ, kyɛ ba na maŋ meele la bɔɔre zaa ne nyɛnnoo. ⁵⁰ “Nyɛnnoo waa la bonvelaa, kyɛ ka nyɛnnoo tuo wa yi, wolɔ ka yɛ na tõɔ̃ e ka a leɛ taa a tuo? Yɛ taa nyɛnnoo yɛmenne poɔ, kyɛ taa `maaroŋ ane yɛ taaba.”

¹ Ka Yesu pãã bare a be kyɛ te kpɛ a Gyudea paaloŋ poɔ a Gyordan gaŋne. A be meŋ, nobɔ yaga da leɛ wa la O zie. Kyɛ a naŋ da waa O eroŋ, O da leɛ wuli ba la. ² A Farasi deme da wa la O zie a pãã da soore O, “A taa la sori ka dɔɔ bare o pɔgɔ?” Lɛ la ka ba da gyenne O. ³ Ka O leɛ yeli ko ba, “Boŋ noɔre la ka Moses tere ko yɛ?” ⁴ Ka ba yeli, “Moses da vɛŋ la ka neɛ maŋ ŋmaa pɔgɔ baro gane biŋ kyɛ pãã bare o pɔgɔ.” ⁵ Ka Yesu leɛ yeli ko ba, “A yɛ zukpeɛne zuiŋ la ka o ŋmaa a noɔre ŋa biŋ. ⁶ Kyɛ a yi a boma zaa iruu piilu saŋ, Naaŋmen da maale la bondaa ane bompɔgɔ. ⁷ A ŋaa la so ka dɔɔ na bare o saa ne o ma kyɛ mare taa ne o pɔgɔ ⁸ ka a ba bayi na leɛ eŋgan bonyenaa. A lɛ zuiŋ, ba ba leɛ waa nobɔ bayi, kyɛ eŋgan bonyenaa la. ⁹ A lɛ poɔ, bon na Naaŋmen naŋ maale ka a laŋ taa, ta vɛŋ ka neɛ wɛle a bare.” ¹⁰ Ba naŋ da leɛ wa be a yiri poɔ, a O tutuuribo da leɛ soore O la a ama yɛlɛ. ¹¹ Ka O leɛ yeli ko ba, “Neɛ na zaa naŋ bare o pɔgɔ kyɛ leɛ de pɔgɔ, maale la peɛmo yelbieri a kyaare ne o. ¹² Kyɛ ka pɔgɔ meŋ wa bare o serɛ, kyɛ leɛ kuli serɛ, o meŋ maale la peɛmo yelbieri.” ¹³ Ka ba da taa bibiiri wa ne Yesu zie ka O tɔ ba. Kyɛ ka a tutuuribo da nyare a balaŋ naŋ taa ba wa ne zu. ¹⁴ Yesu naŋ wa nyɛ a ŋaa, O poɔ da ba pɛle, ka O yeli ko ba, “Yɛ vɛŋ ka a bibiiri wa N zie kyɛ ta pigi ba sori. Bonso, a bibiiri bama taaba la so a Naaŋmen naaloŋ. ¹⁵ N yeli la yelmeŋɛ ko yɛ, neɛ na zaa naŋ ba wa de a Naaŋmen naaloŋ na bibile, kon bɔŋ kpɛ o poɔ.” ¹⁶ Kyɛ ka O da de a bibiiri eŋ O nuuri poɔ, a de O nuuri dɔgle ba kyɛ maale ba ne yelbisonne. ¹⁷ Yesu naŋ da tu O sori gɛrɛ la ka neɛ kaŋ da zo gaa O zie a te le gbi dumo O niŋe kyɛ soore O, “Wuliwullo velaa, boŋ la ka N na e a tõɔ̃ di a nyɔvore naŋ kon baare gbannoŋ?” ¹⁸ Ka Yesu yeli ko o, “Boŋ la vɛŋ ka fo boɔle Ma nenvelaa? Neɛ zaa ba e nenvela ka bonyenaa yoŋ naane. Onɔ la Naaŋmen. ¹⁹ Fo bɔŋ la a Naaŋmen nɔe, ‘Ta toŋ peɛmo tomɔ. Ta ko neɛ. Ta zuuro. Ta di danse-zirii. Ta bɛlle faa neɛ. Eŋnɛ fo saa ne fo ma.’ ” ²⁰ Ka o leɛ yeli, “Wuliwullo, ama zaa ka N tuuro a yi n pɔlo saŋ zaa.” ²¹ Ka Yesu kaa o a nɔŋ o, kyɛ yeli ko o, “Yelyenaa yoŋ la kyɛre. Gaa te koɔre a boma na zaa fo naŋ taa, a de ko naŋ deme, kyɛ fo na taa la naboma tenvelaa poɔ. E a lɛ kyɛ wa de a dagara a tuuro Ma.” ²² Ka a dɔɔ poɔ da ba pɛle ne a bon na Yesu naŋ da yeli, ka o da taa posaŋnaa yaga a gɛrɛ ne, bonso o da taa la boma yaga. ²³ Ka Yesu kaa viiri a zie zaa kyɛ yeli ko O tutuuribo, “A sereŋ e la tuo ko balaŋ naŋ taa boma yaga ka ba kpɛ a Naaŋmen naaloŋ poɔ!” ²⁴ Ka a tutuuribo nɔe zaa da `maa a O yelbie zuiŋ. Kyɛ ka Yesu leɛ yeli ko ba, “Bibiiri, a sereŋ e la tuo ko balaŋ naŋ dɛlle a boma ba naŋ taa ka ba kpɛ a Naaŋmen naaloŋ poɔ. <sup>25</sup> A waa la mɔlɛ ka bontaŋ kpɛ sumini vuori a gaŋ tara sobɔ naŋ na kpɛ a Naaŋmen naaloŋ poɔ.” <sup>26</sup> Ka ba nɔe zaa da `maa yaga, ka ba soore taa, “Aŋ la pãã na tõɔ̃ nyɛ faabo?” ²⁷ Ka Yesu kaa ba kyɛ yeli, “A kon tõɔ̃ e nensaala zie, kyɛ Naaŋmen zie, a ba waa lɛ, bonso bon zaa na tõɔ̃ e la Naaŋmen zie.” ²⁸ Ka Pita da pãã piili yeli ko O, “Kyɛllɛ, te bare la te boma zaa kyɛ tuuro Fo.” ²⁹ Ka Yesu leɛ yeli, “N yeli la yelmeŋɛ ko yɛ, neɛ kyebe naŋ bare o yiri, bee yɔɔmine, bee yɔɔpuulii, bee ma, bee saa, bee pɔgɔ, bee bibiiri, bee wɛre, Maa bee a yelnoore zuiŋ, ³⁰ naŋ kon leɛ nyɛ ziiri kɔɔ tɔnɔ a pampana ŋa saŋ (yie, yɔɔmine, yɔɔpuulii, mamine, bibiiri ane wɛre—a laŋ ne dɔgroŋ). Kyɛ a saŋ na naŋ na wa poɔ, o meŋ na nyɛ la nyɔvore naŋ kon bɔŋ baare. ³¹ Kyɛ ba yaga zie naŋ e danwẽɛ̃ deme na waa la pare baara deme, kyɛ a pare baara deme meŋ na waa la a danwẽɛ̃ deme.” ³² Ba da be la a sobiri poɔ a duoro Gyɛrosalɛm, ka Yesu da de ba wẽɛ̃. Ba nɔe da `maa la, kyɛ ka ba da zoro dambẽɛ ̃ a saŋ na ba naŋ da tuuro O. O da leɛ de la a pie ne bayi yi ne a te yeli ko ba bon na naŋ na e O zie. ³³ Ka O yeli, “Yɛ kyɛllɛ, te duoro la Gyɛrosalɛm, kyɛ ba na iri de la a Nensaala Bidɔɔ ko a puoru neŋkponni ninderebe ane a nɔbinna kaakaareba. Ba na di la O sɛrɛɛ a sage ka a seŋ la ka O kpi. Kyɛ ba na leɛ iri de O la ko a Tendaa deme, ³⁴ ka ba e O la, kyɛ kyiri motaare eŋ O, a fɔbe O, a ko O. A beri ata daare, O na leɛ iri la.” ³⁵ Ka Gyems ne Gyɔn, a Zɛbɛde bidɔbɔ, da wa O zie, a yeli, “Wuliwullo, te boɔrɔ la ka Fo e ko te lɛ te naŋ na sɔre ka Fo e.” ³⁶ Ka O yeli ko ba, “Boŋ la ka yɛ boɔrɔ ka N e ko yɛ?” ³⁷ Ka ba yeli ko O, “Tere noɔre ka te na zeŋ Fo eŋno poɔ, ka kaŋ na zeŋ Fo nudoroŋ eŋɛ, ka kaŋ meŋ zeŋ Fo nugɔɔ eŋɛ.” ³⁸ Ka Yesu yeli ko ba, “Yɛ ba bɔŋ bon na yɛ naŋ sɔrɔ. Yɛ na tõɔ̃ nyu ne la a kɔp na N naŋ nyu ne, kyɛ tõɔ̃ de a suobu na N naŋ da de?” ³⁹ Ka ba yeli ko O, “Te na tõɔ̃ la.” Ka Yesu yeli ko ba, “Yɛ na sereŋ nyu ne la a kɔp na N naŋ nyu ne, kyɛ de a suobu na N naŋ da de. ⁴⁰ Kyɛ ka yɛ kaŋ zaa na zeŋ a N nudoroŋ bee nugɔɔ zie, N ba taa sori ka N de ko yɛ. Kyɛ ba na de la a ziiri ama ko balaŋ na ba naŋ maale biŋ ka ba wa zeŋ.” ⁴¹ A tutuuribo pie naŋ wa te woŋ a ŋaa, ba poore da saŋ la yaga ne Gyems ane Gyɔn. ⁴² Ka Yesu boɔle ba a yeli ko ba, “Yɛ bɔŋ la ka balaŋ ba naŋ de eŋ ka ba e a Tendaa deme zikaareba, maŋ dire la naaloŋ ba zu, ka a ba neŋkponni meŋ dire faŋ ba zu. ⁴³ Kyɛ a kon e lɛ a yɛ zie. Yɛ kaŋ zaa naŋ boɔrɔ ka o e neŋkpoŋ yɛ poɔ, na e la yɛ tontonɔ. ⁴⁴ Kyɛ ka yɛ kaŋ zaa naŋ boɔrɔ ka o de yɛ wẽɛ̃, na e la gbaŋgbaa a yɛ zaa zie. ⁴⁵ Lɛ la ka a Nensaala Bidɔɔ meŋ ba wa ka ba tonɔ korɔ O, kyɛ O wa la ka O wa tonɔ korɔ nobɔ kyɛ de O nyɔvore a leɛ yɔɔ de ne nensaaleba yaga.” ⁴⁶ Kyɛ ka ba pãã da ta Gyɛreko. Yesu ne O tutuuribo ane nobɔ yaga naŋ da wa yire Gyɛreko la, ka dɔɔ zɔŋ kaŋ naŋ di Bartimeus, Timeus bidɔɔ, da zeŋ a sobiri noɔre a sɔrɔ. ⁴⁷ O naŋ wa woŋ ka Yesu naŋ yi Nazarɛt la, ka o da piili ŋmeɛrɛ kpɛlle a yele, “Yesu, David Bidɔɔ, taa nyonono ne ma!” ⁴⁸ Ka nobɔ yaga nyare o zu kyɛ yeli o ka o bare gɔmɔ. Kyɛ lɛ la ka o pãã da leɛ ŋmeɛrɛ kpɛlle yaga: “David Bidɔɔ, taa nyonono ne ma!” ⁴⁹ Ka Yesu tage are, kyɛ tere noɔre ka ba boɔle o. Lɛ la ka ba boɔle a zɔŋ kyɛ yeli ko o, “Kyellɛ! Iri! O boɔlɔ fo la.” ⁵⁰ Ka o lɔɔ o kparo bare, kyɛ vare iri a wa Yesu zie. ⁵¹ Ka Yesu leɛ soore o, “Boŋ la ka fo boɔrɔ ka N e ko fo?” Ka a zɔŋ yeli ko O, “Rabai, N boɔrɔ la ka N leɛ nyɛrɛ.” ⁵² Ka Yesu yeli ko o, “Gɛrɛ. Fo sagdeu saŋ fo la.” A pare na poɔ, ka o leɛ nyɛrɛ a tuuro Yesu a sori poɔ.

¹ Ba naŋ wa gɛrɛ Gyɛrosalɛm, kyɛ ta Bɛtfagye ane Bɛtane, a Ɔleve Taŋa zu la, ka Yesu toŋ O tutuuribo bayi, ² a yeli ko ba, “Yɛ gaa te kpɛ a tembile na naŋ be yɛ nimitɔɔre eŋɛ. Ka yɛnee wa kpeɛrɛ a be, yɛ na nyɛ la boŋlee ka o `leŋ, o zu neɛ zaa daŋ ba zɔme. `Lori o wa ne. ³ Kyɛ ka neɛ zaa wa soore yɛ, ‘Boŋ la so ka yɛ erɛ a ŋaa?’ yɛ yeli o, ‘A Daŋna la boɔrɔ o, kyɛ O na tere o la kyɛ daadaa.’ ” ⁴ Ka ba da gaa te nyɛ a boŋlee ka o are a yeŋ a `leŋ dendɔre noɔre eŋɛ, a teŋɛ sokyara kaŋ zie, ka ba `lori o. ⁵ Ka nobɔ mine naŋ are a be soore ba, “Boŋ la ka yɛ erɛ, a `loro a boŋlee?” <sup>6</sup> Ka ba leɛ yeli ko ba a na a lɛ Yesu naŋ tere a noɔre, ka a nobɔ bare ba ka ba gaa. <sup>7</sup> Ka ba da taa a boŋlee wa ne Yesu zie, a wa de ba bonsuuri lɔɔ pɔge a boŋlee, ka O do zɔme o. <sup>8</sup> Nobɔ yaga da yɛre la ba bonsuuri a pɔge a sobiri zaa, kyɛ ka ba mine meŋ da kyɛ teɛ ullii a yɛre pɔge a sobiri. <sup>9</sup> Ka a balaŋ naŋ de wẽɛ̃ ane a balaŋ naŋ be a puoriŋ da ŋmɛ kpɛlle a yele, “Hosanna!” “Maaloo be la Onɔ naŋ waara a Daŋna yuori eŋɛ!” <sup>10</sup> “Maaloo be la a te Saa David naaloŋ zie naŋ waara a Daŋna yuori eŋɛ!” “Ka Hosanna do a duobu zaa poɔ!” <sup>11</sup> Yesu da kpɛ la Gyɛrosalɛm a te gaa a Ŋmen yiri. O da pigri la a boma zaa a be, kyɛ a saŋ naŋ da faa tɔle, O da yi la gaa Bɛtane ane a pie ne bayi. <sup>12</sup> A bieo daare ba naŋ da yi Bɛtane, kɔŋ da kpɛ O la. <sup>13</sup> O naŋ nyɛ kaŋkaŋ teɛ naŋ taa vaare a are tɔɔre la, ka O tage ta ka O nyɛ ka, kaapɔge, a ta wa wɔŋ. O naŋ da ta, O da ba nyɛ bon zaa ka vaare yoŋ naane, bonzuiŋ a kaŋkaŋ wɔmɔ saŋ ba ta sɛre. <sup>14</sup> Ka O leɛ yeli ko a teɛ, “A yi pampana ŋa kyɛ gɛrɛ, neɛ zaa kon ɔɔ fo wɔmɔ zaa togtogi.” O tutuuribo da woŋ la lɛ O naŋ da yeli. <sup>15</sup> Ba naŋ tara Gyɛrosalɛm la, ka Yesu kpɛ a Ŋmen yiri davoro poɔ a piili digre a balaŋ naŋ koɔrɔ kyɛ daara bara. O da nyɔge la ba libitɛgreba tabolɛɛ zaa ane a ŋman koɔreba dakogri a leɛ bare. <sup>16</sup> O da ba sage ka neɛ zaa tuo laare zaa tu kpɛ bee yi ne a Ŋmen yiri davoro poɔ. <sup>17</sup> Ka O da wuli ba a yeli, “Ba ba ŋmaa biŋ: “ ‘Ba na boɔlɔ la N yiri ka puoru yiri a Tendaa zaa deme zie’? Kyɛ yɛnee maale o la ‘nannyigri die.’ ” <sup>18</sup> Ka a nɔbinna kaakaareba ane a puoru neŋkponni ninderebe da woŋ a ŋaa, a piili boɔrɔ vuo a na saŋ O bare. Kyɛ ba da zoro la O dambẽɛ̃, bonzuiŋ a nobɔ zaa nɔe da `maa la ne a O wuluu. ¹⁹ A zie naŋ da wa `maa, O da yi la a teŋɛ poɔ. ²⁰ A beguo saŋ, ba naŋ da wa tɔle gɛrɛ la, ka ba nyɛ a kaŋkaŋ teɛ ka o suori vaare a yi a nyaga eŋɛ. ²¹ Ka Pita teɛre kyɛ yeli ko Yesu, “Rabai, nyɛ. A kaŋkaŋ teɛ na Fo naŋ pɔ eŋ, suori la vaare.” ²² Ka Yesu leɛ yeli ko ba, “Taa sagdeu ne Naaŋmen. ²³ N yeli la yelmeŋɛ ko yɛ, ka neɛ na zaa naŋ na yeli ko a taŋ ŋa, ‘Sɛre yi kyɛ te lɔɔ fomeŋɛ eŋ a mane poɔ,’ kyɛ ba bonnɔ o sukyiri poɔ, kyɛ sage ka a bon na o naŋ yeli na e la, a na e la lɛ o naŋ yeli. ²⁴ A lɛ poɔ, N yeli ko yɛ la, bon na zaa yɛ naŋ sɔre yɛ puoruu poɔ, yɛ sage ka yɛ na nyɛ a la, kyɛ yɛ na nyɛ la. ²⁵ Kyɛ ka yɛnee wa are a puoro, ka yɛnee wa taa yɛlɛ zaa ne neɛ, yɛ di suuri ko o, ka yɛ Saa naŋ be tenvelaa poɔ meŋ na di suuri ko yɛ, ka yɛnee wa ŋmɛ gbɛre. ²⁶ Kyɛ ka yɛnee kon di suuri ko o, yɛ Saa naŋ be tenvelaa poɔ meŋ kon di suuri ko yɛ ka yɛnee wa ŋmɛ gbɛre.” ²⁷ Ka ba leɛ wa ta Gyɛrosalɛm. Yesu naŋ da kyene a Ŋmen yiri poɔ la, ka a puoru neŋkponni ninderebe ane a nɔbinna kaakaareba, ane a nembɛrɛ da wa O zie ²⁸ a soore O, “Boŋ faŋ la ka Fo de a tonɔ ne a yɛlɛ ama? Aŋ la ko Fo a faŋ ŋa ka Fo de tonɔ ne a yɛlɛ ama?” ²⁹ Ka Yesu leɛ yeli ko ba, “N meŋ na soore yɛ la yelbiyenaa. Iri a noɔre ko Ma, kyɛ N na yeli ko yɛ la a zie na N naŋ nyɛ a faŋa a de tonɔ ne a yɛlɛ ama. ³⁰ A kõɔ̃ suobu na Gyɔn naŋ tere, a yi la tenvelaa poɔ bee nensaala zie? Yɛ yeli ko Ma.” ³¹ Ka ba laŋ teɛre ko bamenne kyɛ pãã yeli, “Ka tenee yeli, ‘Tenvelaa la,’ O na yeli ko te, ‘Wolɔ pãã la ka yɛ ba sage ne o?’ ³² Kyɛ ka tenee yeli, ‘Nensaala zie la’. . . .” (Ba da zoro la a nobɔ dambẽɛ̃, bonso ba zaa da de la Gyɔn ka o sereŋ e Ŋmen-noɔr sobɔ.) ³³ Lɛ la ka ba leɛ yeli ko Yesu, “Te ba bɔŋ.” Ka Yesu leɛ yeli ko ba, “N meŋ kon yeli ko yɛ a zie na N naŋ nyɛ a faŋa N naŋ de tonɔ ne a yɛlɛ ama.”

¹ Ka O da piili lɔɔrɔ sokpaga korɔ ba, “Dɔɔ kaŋ la da sɛle o tewɔmɔ weɛ, a mɛ dankyen a gyilli o zaa. O tugi la tewɔmɔ dãã maalo zie o poɔ kyɛ leɛ mɛ kyoglokolo o poɔ. O pãã de la a weɛ ko kɔkoɔreba mine kyɛ tu sowogi. ² A wɔmɔ pɔroo saŋ naŋ wa tara, o da toŋ la o tontonɔ kaŋ a kɔkoɔreba zie ka o tõɔ̃ de a weɛ wɔmɔ mine a yi a kɔkoɔreba zie wa ne. ³ Kyɛ ba da nyɔge o la a ŋmɛ o yaga kyɛ bare o ka o gaa ne nuzagla. ⁴ Ka o leɛ toŋ tontonɔ kaŋ ba zie, ka ba za o ane kubo a eŋ o baaloŋ o zu eŋɛ, a eŋ o vi kyɛ bare o ka o leɛ gaa. ⁵ Ka o leɛ toŋ a kaŋ, ka ba da ko o. Ka o la leɛ toŋ ba mine yaga, ka ba ŋmɛ ba mine kyɛ ko ba mine. ⁶ “A pãã da kyɛre la nen-yenaa yoŋ ka o na toŋ. Onɔ la o bidɔɔ o naŋ nɔŋ. Ka o pãã toŋ o a pare baara kyɛ yeli, ‘Ba na ko la n bidɔɔ gyermɛ.’ ⁷ “Kyɛ a kɔkoɔreba bana da yeli la ko taaba, ‘A gbandire la aŋa. Yɛ wa ka te ko o, ka a gbannoŋ boma na waa te soobo.’ ⁸ Ka ba da nyɔge o a ko, a de o lɔɔ bare a weɛ puoriŋ. ⁹ “A lɛ poɔ, boŋ la ka a weɛ daŋna na e? O na wa la a wa saŋ a kɔkoɔreba bare kyɛ de a weɛ ko nen-yobo. ¹⁰ Yɛ da ba kanne a Ŋmaabo poɔ: “ ‘A kuuri na a meɛmeɛrebɛ naŋ zagre, waa la a goŋgonaa zu kuuri; ¹¹ a Daŋna eroŋ la aŋa, ka a waa tombeɛ a te nimie poɔ’?” ¹² Ka ba da bɔ vuo a na nyɔge O, kyɛ ba da zoro la a nobɔ dambẽɛ̃, bonzuiŋ ba da bɔŋ la ka O lɔɔ la a sokpare kyaare ne ba. Ka ba da bare O kyɛ gaa. ¹³ A puoriŋ, ba da toŋ la a Farasi deme mine ane a Hɛrod deme Yesu zie ka ba tõɔ̃ bɛre nyɔge O a O yelbie poɔ. ¹⁴ Ba naŋ da wa O zie la, ka ba da yeli, “Wuliwullo, te bɔŋ la ka Fo e la yelmeŋɛ sobɔ kyɛ ba dire nɔmboore korɔ neɛ zaa, bonso Fo ba kaara nensaaleba waaloŋ kyɛ wullo a Naaŋmen sobiri ne yelmeŋɛ. A tu la a nɔbinnaa ka te yɔɔ zuyɔɔre ko Siiza bee a ba tu? ¹⁵ Te tere bee te ta tere?” Kyɛ Yesu da bɔŋ la a ba melmeloo kyɛ yeli ko ba, “Boŋ la so ka yɛ gyenne Ma? Yɛ taa a denari kaŋ wa ko Ma ka N nyɛ.” ¹⁶ Ka ba taa a denari kaŋ wa ne. Ka O yeli ko ba, “Aŋ foto ne ŋmaabo la aŋa?” Ka ba leɛ yeli ko O, “Siiza la.” ¹⁷ Ka Yesu leɛ yeli ko ba, “Yɛ ko Siiza a boma naŋ e Siiza soobo, kyɛ ko Naaŋmen a boma naŋ e Naaŋmen soobo.” Ba nɔe zaa da `maa la ne O yɛlɛ. ¹⁸ Ka a Sadusi deme da pãã wa O zie, balaŋ naŋ yeli ka kuuni leɛ-iruŋ kyebe. Ba da soore O la soorbir kaŋ a yeli, ¹⁹ “Wuliwullo, Moses ŋmaa ko te la ka neɛ yɔɔ wa kpi kyɛ bare o pɔgɔ, kyɛ ka o ba taa bie zaa, a seŋ la ka o yɔɔ de a pɔgɔ dɔge bibiiri ko o yɔɔ. ²⁰ A daŋ waa la ka yɔɔmine bayopõĩ la da bebe. Ka a danwẽɛ̃ sobɔ de pɔgɔ, ka ba ba dɔge bie zaa kyɛ ka o kpi. ²¹ Ka a ayi sobɔ de a pɔgɔ a meŋ kpi kyɛ ba dɔge bie zaa ne a pɔgɔ. Kyɛ ka a la leɛ e a lɛ ko a ata sobɔ. ²² A bayopõĩ zaa da de la a pɔgɔ, kyɛ ba kaŋ zaa ba dɔge bie ne o. A pare baara zaa ka a pɔgɔ meŋ kpi. ²³ A lɛ poɔ, a kuuni leɛ-iruŋ poɔ, ka balaŋ wa iri, aŋ pɔgɔ pãã na la a bama poɔ, a bayopõĩ zaa naŋ da kuli o?” ²⁴ Ka Yesu leɛ yeli ko ba, “Yɛ ba tuli a yɛlɛ ama poɔ, yɛ naŋ ba bɔŋ a Ŋmaabo bee a Naaŋmen faŋa? ²⁵ A saŋ na ba naŋ na leɛ iri yi a kuuni poɔ, ba ba dere pɔgɔbɔ bee kuli serbɛ, kyɛ ba na waa la a na malkere naŋ be a tenvelaa poɔ. ²⁶ Kyɛ a kuuni naŋ na iri yɛlɛ poɔ, yɛ ba kanne a Moses gane poɔ lɛ Naaŋmen naŋ da yeli yɛlɛ a yi a teɛ naŋ dire poɔ ko o, a yele, ‘Maa la Abraham Naaŋmen, ane Isaak Naaŋmen, ane Gyakob Naaŋmen’? ²⁷ O ba e a kuuni Naaŋmen, kyɛ a voobɔ Naaŋmen la. A lɛ poɔ, yɛ tuli la yaga.” ²⁸ A nɔbinna kaakaareba kaŋ da wa la wa woŋ ka ba ŋmeɛrɛ nɔkpeɛne. O naŋ wa nyɛ ka Yesu ko ba noɔre velaa la, ka o soore O, “A nɔe zaa poɔ, buo la gaŋ?” ²⁹ Ka Yesu leɛ yeli ko o, “A onɔ naŋ gaŋ a nɔe zaa la aŋa: ‘Woŋ, Oo Israel, a Daŋna yɛ Naaŋmen e la Daŋna bonyena. ³⁰ Nɔnɔ a Daŋna fo Naaŋmen ne fo sukyiri zaa ne fo vooroŋ zaa, ne fo teɛroŋ zaa, ane fo kpeɛŋaa zaa.’ A noɔre ŋa la gaŋ a zaa. ³¹ A ayi sobɔ peɛle o la: ‘Nɔnɔ fo laŋkpeɛrɛ seŋ fomeŋɛ.’ A noɔre kaŋ zaa kyebe naŋ zuo a ama.” ³² Ka a nɔbinna kaakaara yeli ko O, “Yelmeŋɛ, Wuliwullo, Fo yeli la yelmeŋɛ ne Fo naŋ yeli ka Naaŋmen e la bonyena, ka Naaŋmen kaŋ zaa kyebe ka Onɔ naane. ³³ Kyɛ ka fo nɔnɔ O ne fo sukyiri zaa, ne fo teɛroŋ zaa, ne fo vooroŋ zaa, ane fo kpeɛŋaa zaa kyɛ nɔnɔ fo laŋkpeɛrɛ seŋ fomeŋɛ, ama la zuo bɔɔre maaloo ane kyɔgtaa zaa teroo.” ³⁴ Yesu naŋ nyɛ ka o tere a noɔre velaa la, ka O yeli ko o, “Fo ba be tɔɔre ne a Naaŋmen naaloŋ.” A yi a lɛ puoriŋ, neɛ zaa da ba taa pera ka o soore O sooroo zaa. ³⁵ Yesu naŋ da wullo a Ŋmen yiri poɔ la, ka O da leɛ soore, “Wolɔ la ka a nɔbinna kaakaareba tõɔ̃ yeli ka a Kristo e la David bidɔɔ? ³⁶ Bonso, David meŋɛ, a Sekyerete poɔ da yeli la, “ ‘A Daŋna yeli la ko n Daŋna, “Zeŋ N nudoroŋ zie kyɛ gu a saŋ na N naŋ na e ka Fo dɔndɔnne leɛ Fo gbɛɛ dakogo.” ’ ³⁷ A lɛ poɔ, ka David meŋɛ da maŋ boɔlɔ O ka Daŋna, wolɔ pãã la ka O e o bidɔɔ?” Nobɔ yaga zie da kyɛllɛ la O yɛlɛ ane popeɛloŋ. ³⁸ A O wuluu poɔ la ka O da yeli ko ba, “Yɛ gu a nɔbinna kaakaareba naŋ nɔnɔ ka ba su kparwogri a kyene ne, kyɛ nɔnɔ ka ba puoro taa daa poore. ³⁹ Ba meŋ maŋ boɔrɔ la a dakogri naŋ do a senagɔgre poore ane a eŋno ziiri a tigri zie ⁴⁰ kyɛ maŋ faara pɔɔkɔbɔ yie. Ba maŋ puori puoru wogri ka ba wuli bamenne. A nobɔ bama na nyɛ la saŋnaa ka a zuo lɛ.” ⁴¹ Yesu da zeŋ la kyaare a libiteroo zie, a kaa nyɛ lɛ a nobɔ naŋ lɔɔrɔ ba libie eŋnɛ a libitero daga poɔ, ka a bontareba yaga maŋ lɔɔ libie yaga eŋ. ⁴² Ka pɔɔkoɔre naŋ sobɔ kaŋ da wa lɔɔ libibilii ayi a libitero daga poɔ ka a seŋ kobo. ⁴³ Yesu naŋ boɔle O tutuuribo la, ka O yeli ko ba, “N yeli la yelmeŋɛ ko yɛ, a pɔɔkoɔre naŋ sobɔ ŋa la tere gaŋ a balaŋ zaa naŋ da lɔɔ ba libie eŋ a libitero daga poɔ. ⁴⁴ Bonso, ba zaa tere la a yi ba libi-yaga poɔ, kyɛ a pɔgɔ ŋa zie, a yi a o naŋno poɔ la ka o de o nyɔvore boma zaa tere.”

¹ O naŋ wa yire a Ŋmen yiri poɔ la ka O tutuuribo kaŋ yeli ko O, “Wuliwullo! Nyɛ a kusiveɛle ama, ane a meɛbo zaa naŋ be a kyɛ!” ² Ka Yesu yeli ko o, “Fo nyɛ la a meɛbo ama zaa? Kusiri kaŋ zaa kon bɔŋ dɔgle o tasobɔ zu, ka ba kon de a lɔɔ bare.” ³ Yesu naŋ da do zeŋ a Ɔleve Taŋa zu a kyaare a Ŋmen yiri, Pita, Gyems, Gyɔn ane Andero da soore O la O yoŋ zie, ⁴ “Yeli ko te, dabori la ka a yɛlɛ ama na e? Boŋ mannoo meŋ la na wuli a saŋa na a yɛlɛ ama zaa naŋ na wa e baare?” ⁵ Ka Yesu leɛ yeli ko ba: “Yɛ kaara velaa ka neɛ ta bɛlle yɛ. ⁶ Bonso, nobɔ yaga na wa la N yuori eŋɛ, a yeli, ‘Maa la a Kristo,’ kyɛ pãã bɛlle nobɔ yaga. ⁷ Ka yɛnee wa woŋ zɔɔre yɛlɛ kyɛ leɛ woŋ zɔɔre mannoo, yɛ ta vɛŋ ka a dɔɔnɔ yɛ, bonso a fere la ka ama zaa wa, kyɛ a baaroo saŋ kon wa sɛre. ⁸ Teŋ na iri zɔɔ ne la o teŋ tasobɔ, ka naaloŋ meŋ na iri zɔɔ ne o naaloŋ tasobɔ. Teŋŋmɛroo na wa la ziiri yaga. Kɔŋ na le la, ka dɔŋ meŋ wa. Ama la a dɔgebo ɔɔbo piilu. ⁹ “Yɛ gu yɛmenne velaa, bonso ba na iri de yɛ la do ne a Sanhederen kɔɔto ziiri, kyɛ fɔbe yɛ a senagɔgre poore. A Maa zuiŋ, yɛ na are la a zikaareba ane namine niŋe, ka yɛ waa danseɛ deme ko ba. ¹⁰ Kyɛ a fere la ka ba daŋ kanne a yelnoore ko a tendaa deme zaa. ¹¹ Ka ba naŋ wa taa yɛ do ne a kɔɔto ziiri, yɛ ta taa teɛroŋ zaa ne a bon na yɛ naŋ na yeli. Yeli lɛnɛɛ zaa O naŋ ko yɛ a gogo na poɔ, bonso a ba e yɛnee la yele, kyɛ a Sekyerete la yele. ¹² “Yɔɔ na iri de la o yɔɔ ko ba ka ba ko o, ka saa meŋ e lɛ ko o bie. A bibiiri na are kyaare ne la ba dɔgrebɔ a e ka ba ko ba. ¹³ Nobɔ zaa na kyiire yɛ la, a Maa yuori zuiŋ. Kyɛ a neɛ na naŋ na are kpẽã te ta a baaroo saŋ na nyɛ la faabo. ¹⁴ “Lɛ ka yɛnee wa nyɛ ‘a bompoɔrɔ naŋ wa ne saŋnaa’ ka o are a zie na naŋ ba seŋ ka o are, a na lɛ a Ŋmen-noɔre sobɔ Daniel naŋ yeli—vɛŋ ka a kaŋkanna bɔŋ a pare—yɛ vɛŋ ka a balaŋ naŋ be Gyudea poɔ, zo yi te do a tanne zu. ¹⁵ Ta vɛŋ ka neɛ zaa sigi o peɛ zu te de bon zaa o die poɔ. ¹⁶ Ta vɛŋ ka a neɛ na naŋ be o weɛ poɔ, leɛ te de o kparo. ¹⁷ Kyɛ yɛlɛ nyɔge la balaŋ naŋ taa poɔ, ane balaŋ naŋ ɛnnɛ bibilii a bebie na poore. ¹⁸ Kyɛ yɛ puoro ka yɛ zoobu ta wa a sɛseɛ saŋ. ¹⁹ Bonso, a bebie ana na wa ne la yelferaa naŋ da ba waa lɛ a yi a teŋɛ piiluu Naaŋmen naŋ iri, a te ta a pampana saŋ, kyɛ meŋ kon bɔŋ e zaa. ²⁰ Ka a Daŋna da ba ŋmaa a bebie ana, eŋgan zaa da kon nyɛ faabo. Kyɛ a nen-iri na O naŋ iri zuiŋ, O da ŋmaa la a bebie. ²¹ A lɛ saŋ, ka neɛ wa yeli ko yɛ, ‘Nyɛ, Kristo be la kyɛ!’ bee, ‘Nyɛ, O be la a zie ŋa!’ ta sage de. ²² Bonso, ziri Kristori ane ziri Ŋmen-noɔre deme na iri la a wuli manno kponni kyɛ toŋ tombeere a te bɛlle a nen-iri meŋɛ, ka ana na tõɔ̃. ²³ Kyɛ yɛ kaara velaa. Kyɛllɛ, N daŋ yeli la a yɛlɛ ama zaa ko yɛ. ²⁴ “Kyɛ a bebie ama yelferaa wa te baare, “ ‘A ŋmenaa na ligi la, ka a kyũũ kon leɛ tere o kyãã; ²⁵ a ŋmarbie na yi la a sazu a le, kyɛ ka a sazu faŋ zaa miine.’ ²⁶ “Ba pãã na nyɛ la a Nensaala Bidɔɔ ka O waara a zanzuuri poɔ ne faŋ yaga ne eŋno. ²⁷ O pãã na toŋ la O malkere ka ba boɔle O nen-iri zaa yi a sɛseɛ ziiri anaare zaa poɔ ane a teŋɛ zu baaro zie a te ta a sazu zaa baaro zie ka ba laŋ taa. ²⁸ “Pampana ŋa, yɛ zanne a sokpare naŋ yi a kaŋkaŋ teɛ zie. A saŋ na o ullii naŋ wa teɛrɛ yire a bɔre vaare, yɛ maŋ bɔŋ ka sẽɛ̃ kpeɛrɛ la. ²⁹ Lɛ meŋ la, ka yɛnee wa nyɛ a ama zaa ka a erɛ, yɛ bɔŋ ka a tara la a dendɔe eŋɛ. ³⁰ N yele la yelmeŋɛ korɔ yɛ, a boorɔ ŋa deme kon bɔŋ tɔle kyɛ gu ka a yɛlɛ ama zaa wa te e baare. ³¹ A sazu ne a teŋɛ zu na tɔle la, kyɛ N yelbie kon bɔŋ tɔle. ³² “Neɛ zaa ba bɔŋ a bebiri na bee a gogo na. A malkere naŋ be tenvelaa poɔ ba bɔŋ, ka a Bidɔɔ meŋ ba bɔŋ, kyɛ a Saa yoŋ la bɔŋ. ³³ Yɛ kaara velaa. Yɛ ta gbire, kyɛ yɛ puoro. Bonso, yɛ ba bɔŋ a saŋ na. ³⁴ A na waa la na dɔɔ kaŋ naŋ yi o yiri kyɛ tu sori. O da bare la o yiri ko o gbaŋgbaare, ka kaŋ zaa taa o tonnoɔre, kyɛ ka o yeli ko a dendɔre guuro ka o gu a yiri. ³⁵ “A lɛ poɔ, yɛ gu velaa, bonso yɛ ba bɔŋ a saŋ na a yidandɔɔ naŋ na leɛ wa, ka zimaane, bee ka zipoŋ sentaa saŋ, bee ka nɔdaa wa te kono, bee a beguo saŋ. ³⁶ Ka lɛ naane, o naŋ wa uri wa, o na nyɛ yɛ la ka yɛ gbire. ³⁷ Bon na N naŋ yeli ko yɛ, N yeli ko la yɛ zaa: ‘Yɛ gu!’ ”

¹ Bebie ayi da kyɛre la kyɛ ka a Gaŋ Baro ne a Boroboro Naŋ Ba Taa Belɛ Tigri pãã ta. Ka a puoru neŋkponni ninderebe ane a nɔbinna kaakaareba pãã da boɔrɔ bɛlloo sobiri kaŋ ka ba nyɔge Yesu a ko O. ² Ka ba yeli, “A kon tõɔ̃ e a tigri daare bee kaapɔge, dɔŋkpoŋ na iri la a nobɔ zie.” ³ O naŋ da be Bɛtane a zeŋ a diu zie, Simon naŋ da e kɔŋkɔŋ yiri poɔ la, ka pɔgɔ kaŋ da wa O zie ane nard-kããnyuu soŋ daaro naŋ zuo, a alabasta koleba poɔ. O da ŋmɛre la a koleba a de pore eŋ a O zu eŋɛ. ⁴ Ba mine naŋ da be a be nyɛ la suuri a yeli ko taaba, “Boŋ la so ka o saŋ a kããnyuu ŋa bare? ⁵ Bonso, a da naa tõɔ̃ koɔre la a gaŋ denari kɔɔrata, ka ba de ko nembaaleba.” Ba da hoonɔ kyɛ nyare la a pɔgɔ zu. ⁶ Kyɛ ka Yesu yeli, “Yɛ bare o! Boŋ la so ka yɛ dɔɔnɔ a pɔgɔ? O toŋ la tonvelaa ko Ma. ⁷ Bonso, yɛ maŋ taa la a nembaaleba a yɛ poɔ, ka yɛ na tõɔ̃ soŋ ba saŋ na zaa yɛ naŋ boɔrɔ. Kyɛ Maa, N kon maŋ be a yɛ poɔ. ⁸ O e la bon na o naŋ na tõɔ̃. O daŋ wa la ka o kyiri kããnyuu waare Ma a kyɔgre N eŋgan gu a N ũũbu. ⁹ N yeli la yelmeŋɛ ko yɛ, zie na zaa ba naŋ kanne a yelnoore ŋa a teŋɛ zu zaa poɔ, ba na yeli la a bon na a pɔgɔ ŋa naŋ da e, a taa o teɛroŋ.” ¹⁰ Lɛ la ka Gyudas Iskarioti, a pie ne bayi na kaŋ, da gaa a puoru neŋkponni ninderebe zie ka o iri de Yesu ko ba. ¹¹ Ba naŋ da woŋ a yɛlɛ ama, ba poore da pɛle la yaga, ka ba da polle ka ba na yɔɔ o la libie. Lɛ la ka o da bɔ vuo lɛ o naŋ na tõɔ̃ iri de O ko ba. ¹² A Boroboro Naŋ Ba Taa Belɛ Tigri piilu daare, a saŋ na ba naŋ maŋ ko a Gaŋ Baro Tigri pelee la, ka Yesu tutuuribo soore O, “Yeŋ la ka Fo boɔrɔ ka te gaa te kyɔgre ka Fo wa di a Gaŋ Baro Tigri?” ¹³ Yesu da toŋ la O tutuuribo bayi a yeli ko ba, “Yɛ gaa te kpɛ a teŋɛ poɔ. Dɔɔ kaŋ naŋ tuo kõɔ̃ yuori na tuori yɛ la. Yɛ tuuro o. ¹⁴ Yɛ yeli ko a yiri na poɔ o naŋ kpɛ yidandɔɔ, ‘A Wuliwullo yeli la: Yeŋ la ka a saama die be ka N na di a Gaŋ Baro Tigri ne N tutuuribo?’ ¹⁵ O na wuli yɛ la dikpoŋ naŋ be a peɛ zu, ka boma zaa maale biŋ. A be la ka yɛ na kyɔgre gu te.” ¹⁶ Ka O tutuuribo gaa te kpɛ a teŋɛ poɔ, a te nyɛ ka a waa seŋ lɛ O naŋ da yeli ko ba. Lɛ la ka ba kyɔgre gu a Gaŋ Baro Tigri. ¹⁷ A zie naŋ wa `maa la ka Yesu wa kpɛ ne a pie ne bayi. <sup>18</sup> Ba naŋ da zeŋ a dire la ka O yeli, “N yeli la yelmeŋɛ ko yɛ, a yɛ kaŋ naŋ dire ne Ma na iri de Ma la ko ba.” <sup>19</sup> Ka ba poore da saŋ, ka ba kaŋ zaa maŋ soore O, “Maa la bee?” Ka kaŋ meŋ soore, “Maa la?” <sup>20</sup> Ka O leɛ yeli ko ba, “O sobɔ e la a pie ne bayi na kaŋ naŋ laŋ toŋ nu ne Ma a laa poɔ. <sup>21</sup> A Nensaala Bidɔɔ na sereŋ gaa la a seŋ lɛ ba naŋ ŋmaa O yɛlɛ biŋ. Kyɛ yɛlɛ nyɔge la a neɛ na naŋ na iri de a Nensaala Bidɔɔ ko ba. A da naa waa la velaa ko a neɛ na ka ba naŋ da ba dɔge o.” <sup>22</sup> Ba naŋ da dire la ka Yesu de boroboro a puori bareka puoruu, kyɛ ŋmaa a de ko ba a yeli, “Yɛ de ɔɔ. N eŋgan la aŋa.” <sup>23</sup> Kyɛ ka O leɛ de a kɔp, a puori bareka puoruu, kyɛ de ko ba ka ba zaa nyu a o poɔ. <sup>24</sup> Ka O leɛ yeli ko ba, “A N zẽẽ la aŋa, naŋ yi a nɔlaŋ paala poɔ, N naŋ kyiri ko nobɔ yaga. <sup>25</sup> N yeli la yelmeŋɛ ko yɛ, N kon leɛ nyu a tewɔmɔ kõɔ̃ kyɛ gu a daare na N naŋ na leɛ nyu a, a Naaŋmen naaloŋ poɔ.” <sup>26</sup> Ba naŋ wa yieli Ŋmendeme yieluŋ kaŋ baare, ba da yi do la a Ɔleve Taŋa zu. <sup>27</sup> Ka Yesu yeli ko ba, “Tensoɔ ŋa, yɛ zaa na ŋmɛ la gbɛr a Maa zuiŋ, bonso ba ŋmaa la biŋ: “ ‘N na ŋmɛ la a pekyeenɛ, kyɛ ka a peere zo yaare.’ <sup>28</sup> Kyɛ ka Maa wa leɛ iri, N na de la yɛ wẽɛ ̃ gaa te kpɛ Galili poɔ.” <sup>29</sup> Ka Pita yeli ko O, “Ka ba zaa wa ŋmɛ gbɛre gba, Maa kon bɔŋ ŋmɛ gbɛre.” <sup>30</sup> Ka Yesu yeli ko o, “N yeli la yelmeŋɛ ko fo, a zenɛ, a tensoɔ ŋa gba, fo na zagre Ma la bota, kyɛ ka a nɔdaa bɔŋ koŋ boyi.” <sup>31</sup> Kyɛ ka Pita kyãã are kpẽã ne lɛ o naŋ da yeli, “Ka Maa na wa laŋ kpi ne Fo, kyɛ N kon bɔŋ zagre Fo bare.” Lɛ la ka ba zaa meŋ yeli. <sup>32</sup> Ka ba da gaa zie kaŋ naŋ di Gɛtsɛmane, ka Yesu yeli ko O tutuuribo, “Yɛ zeŋ kyɛ, kyɛ ka N puori.” <sup>33</sup> O da taa la Pita, Gyems, ane Gyɔn gaa ne kyɛ pãã da piili taa dɔɔne ko Omeŋɛ ka O teɛroŋ da ba zeŋ soŋ. <sup>34</sup> Ka O yeli ko ba, “N poɔ saŋ la yaga ka a seŋ ka N kpi. Yɛ be kyɛ a guuro.” <sup>35</sup> Ka O da gaa tɔɔre fẽẽ lɛ kyɛ le tensoɔ a puori ka, ka a naŋ na tõɔ,̃ ka a gogo ŋa tɔle O zie. <sup>36</sup> Ka O yeli, “Abba, N Saa, Fo taa la bon zaa faŋ. De a kɔp ŋa N zie. Ane a lɛ zaa ka a ba e bon na N naŋ boɔrɔ, kyɛ bon na Fõõ naŋ boɔrɔ.” <sup>37</sup> Ka O da leɛ gaa O tutuuribo zie a te nyɛ ba ka ba gbire. Ka O yeli ko Pita, “Simon, fo gbire la? Fo kon tõɔ̃ zeŋ gu gogo yenaa gba bee? <sup>38</sup> Yɛ gu kyɛ puoro, ka lɛ naane, yɛ na kpɛ la gyennoo poɔ. A seɛ sereŋ boɔrɔ la, kyɛ a eŋgan bale la.” <sup>39</sup> Ka O la leɛ gaa a la te puori a lɛ. <sup>40</sup> O naŋ da leɛ wa, O da nyɛ la ka ba la leɛ gbire, bonzuiŋ ba nimie da paale la ne goɔŋ. Ba da ba bɔŋ lɛ ba naŋ na yeli ko O. <sup>41</sup> O naŋ leɛ wa a bota saŋ la ka O yeli ko ba, “Yɛ kyãã gbire kyɛ pɛnnɛ. A seŋ la. A gogo ta la. Kyɛllɛ, ba iri de la a Nensaala Bidɔɔ eŋ a yelbebe deme nuuri poɔ. <sup>42</sup> Iri. Yɛ vɛŋ ka te gaa. Kyɛllɛ, a neɛ na naŋ iri de Ma ko ba tara la.” <sup>43</sup> A pare na poɔ, O naŋ da kyãã yele yɛlɛ la, ka Gyudas, a pie ne bayi kaŋ, da wa ta a wa ne nobɔ yaga naŋ da taa sɔre ane dagolo. A puoru neŋkponni ninderebe ne a nɔbinna kaakaareba, ane a nobɔ nembɛrɛ la da toŋ ba. <sup>44</sup> A neɛ na naŋ na iri de O ko ba da `legre ba la a yeli, “A kaŋ na N naŋ na moore la a dɔɔ. Yɛ nyɔge O, a taa O velaa gaa ne.” ⁴⁵ O naŋ da wa ta la, ka o da gaa Yesu zie daadaa a te yeli, “Rabai! Rabai!” kyɛ pãã da moore O. ⁴⁶ Lɛ la ka a nobɔ nyɔge Yesu ne ba nuuri. ⁴⁷ Ka a ba kaŋ sobɔ na naŋ are peɛle a be, voɔ o soɔ a kyɛ ne a puoru neŋkponni zusobɔ tontonɔ kaŋ toori ŋmaa bare. ⁴⁸ Ka Yesu leɛ yeli ko ba, “Yɛ yi wa la a na yɛ naŋ gu nannyige ne zɔɔzɔɔ sɔre ane dagolo ka yɛ nyɔge Ma? ⁴⁹ Bebiri zaa N da maŋ be la yɛ zie a Ŋmen yiri poɔ a wullo, kyɛ yɛ da ba nyɔge Ma. Kyɛ ama zaa waa la ka a Ŋmaabo na tõɔ̃ tu lɛ ba naŋ ŋmaa biŋ.” ⁵⁰ Ba zaa pãã da bare O la kyɛ zo. ⁵¹ Pɔlbile kaŋ naŋ da ba su bon zaa ka pɛmpela naane la da tuuro Yesu. Ka a nobɔ pɔlbilii da boɔrɔ ka ba nyɔge a pɔlbile, ⁵² kyɛ o da zo la ne eŋkpoli a bare a o bonsuuri puoriŋ. ⁵³ Ka ba da de Yesu gaa ne a puoru neŋkponni zusobɔ zie. Be la ka a puoru neŋkponni ninderebe, a nembɛrɛ, ane a nɔbinna kaakaareba zaa da wa laŋ taa. ⁵⁴ Kyɛ Pita da be la tɔɔre fẽẽ a tuuro O puoriŋ, a te kpɛ a puoru neŋkponni zusobɔ davoro poɔ, a te laŋ zeŋ ne a ziguuribo a uoro vũũ. ⁵⁵ A puoru neŋkponni ninderebe ane a Sanhederen deme zaa da boɔrɔ la nobɔ naŋ na tõɔ̃ di danseɛ kyaare ne Yesu ka ba nyɔge O ko, kyɛ ba da ba nyɛ kaŋ zaa. ⁵⁶ Nobɔ yaga da wa di la danse-zirii eŋ O, kyɛ a ba danseɛ diu da ba tu taa vela. ⁵⁷ Ka ba mine iri are a di dansezirii eŋ O, a yeli, ⁵⁸ “Te woŋ la ka O yeli, ‘N na ŋmɛre la a Ŋmendie ŋa nensaala nuuri naŋ mɛ, kyɛ beri ata poɔ, N na leɛ mɛ la kaŋ nensaala nuuri naŋ ba mɛ.’ ” ⁵⁹ Ane a lɛ zaa ba danseɛ diu da ba tu taa vela. ⁶⁰ Lɛ la ka a puoru neŋkponni zusobɔ iri are a ba poɔ kyɛ soore Yesu a yeli, “Fo kon tõɔ̃ iri a noɔre bee? Boŋ danseɛ yɛlɛ la ka a dɔbɔ bama dire kyaare ne Fo?” ⁶¹ Ka Yesu da e gbili lɛ kyɛ ba iri noɔre zaa. Ka a puoru neŋkponni zusobɔ leɛ soore O, “Fõõ la a Kristo, a Sobɔ na naŋ seŋ pugibu Bidɔɔ?” ⁶² Ka Yesu yeli, “Maa la. Kyɛ yɛ na nyɛ la a Nensaala Bidɔɔ ka O zeŋ a Fannoo Sobɔ nudoroŋ kyɛ waara a sazu zanzuuri poɔ.” ⁶³ Lɛ la ka a puoru neŋkponni zusobɔ tage o kpare kyeɛrɛ kyɛ yeli, “Wolɔ ka te leɛ boɔrɔ danseɛ deme? ⁶⁴ Yɛ woŋ la a yelfaare O naŋ yeli kyaare ne Naaŋmen. Boŋ la ka yɛ teɛre?” Ka ba zaa de ka O saŋnaa seŋ la kũũ. ⁶⁵ Ka ba mine da piili kyiri motaare eŋnɛ O a `leŋ O nimie pɔge, kyɛ gbuli nu ŋmɛ O, a yeli ko O, “Kanne daŋ-nyaabo kannoo!” Kyɛ ka a ziguuribo meŋ da fale O. ⁶⁶ Kyɛ a saŋa na Pita naŋ da be a yiri pare davoro poɔ, a puoru neŋkponni zusobɔ tonton pɔglee kaŋ da wa la. ⁶⁷ O naŋ wa nyɛ Pita ka o uoro vũũ, ka o kaa o lɛɛŋ kyɛ yeli, “Fo meŋ da be la a Yesu naŋ yi Nazarɛt zie.” ⁶⁸ Kyɛ o da kyiiri la kyɛ yeli, “N ba bɔŋ bon na fo naŋ yeli tɛgɛ.” O da iri yi la te kpɛ a davoro noɔre kyɛ ka nɔdaa da koŋ. ⁶⁹ A pɔglee naŋ leɛ nyɛ o a be, ka o da piili yele korɔ balaŋ naŋ are a be, “Aŋa e la ba kaŋ.” ⁷⁰ Kyɛ ka Pita leɛ kyiire. A ba kɔɔre kyɛ ka a balaŋ naŋ are a be meŋ yeli ko Pita, “Yelmeŋɛ, fo e la ba kaŋ, bonso fo e la Galili neɛ kyɛ fo yelyeli meŋ wuli la lɛ.” ⁷¹ Ka o da piili ŋmeɛrɛ eŋnɛ omeŋɛ kyɛ poɔrɔ a yele, “N ba bɔŋ a dɔɔ ŋa yɛ naŋ yele.” ⁷² Ka a nɔdaa koŋ a boyi saŋ. Lɛ la ka Pita pãã leɛ teɛre a yelbiri na Yesu naŋ da yeli ko o: “Fo na zagre Ma la bota, kyɛ ka nɔdaa bɔŋ koŋ boyi.” O naŋ da teɛre a ŋaa, o da koŋ la.

¹ A zie naŋ da vɛle, a puoru neŋkponni ninderebe ane a nembɛrɛ ane a nɔbinna kaakaareba ane a Sanhederen deme zaa da laŋ la taa a nare lɛ ne lɛ ba naŋ na e. Ba da `leŋ la Yesu a taa O gaa ne te iri de O ko Pailat. <sup>2</sup> Ka Pailat soore O, “Fõõ la a Gyu deme Naa?” Ka O leɛ yeli ko o, “A waa la lɛ fo naŋ yeli.” <sup>3</sup> Ka a puoru neŋkponni ninderebe nyare O zu yɛlɛ yaga poɔ, kyɛ O da ba yeli yɛlɛ zaa. <sup>4</sup> Lɛ la ka Pailat da leɛ soore O a yeli, “Fo kon tõɔ̃ yeli yɛlɛ zaa bee? Nyɛ a danseɛ yaga ba naŋ dire kyaare ne Fo.” <sup>5</sup> Kyɛ Yesu da ba leɛ yeli yɛlɛ zaa, ka Pailat noɔre da `maa. ⁶ A naŋ da waa a Tigri saŋ, ka o da maŋ bare nempigra kaŋ ko ba, a neɛ na zaa ba naŋ boɔrɔ. ⁷ Ba da `leŋ la dɔɔ kaŋ naŋ di Barabas ne o zɔɔzɔɔ taaba naŋ da ko nobɔ mine a eŋ ba a pigu die poɔ. <sup>8</sup> Ka a nobɔ zaa da yeli gboligboli a piili sɔre o ka o e lɛ o naŋ maŋ e ko ba. <sup>9</sup> Ka Pailat soore ba, “Yɛ boɔrɔ la ka N bare a Gyu deme Naa ko yɛ bee?” <sup>10</sup> Bonso, o da bɔŋ ka nyuuri zuiŋ la ka a puoru neŋkponni ninderebe da iri de Yesu ko ba. <sup>11</sup> Kyɛ ka a puoru neŋkponni ninderebe da dɔrɔ eŋnɛ a nobɔ, ka ba na e ka Pailat bare Barabas ko ba. <sup>12</sup> Ka Pailat leɛ soore ba, “Kyɛ boŋ la ka yɛ boɔrɔ ka N e ne a neɛ na yɛ naŋ boɔlɔ a Gyu deme Naa?” <sup>13</sup> Ka ba leɛ yeli gboligboli, “Kpa O!” <sup>14</sup> Ka Pailat soore ba, “Wolɔ? Boŋ saŋnaa la ka O saŋ?” Kyɛ ka ba da duori ba kɔkɔe a yeli, “Kpa O!” <sup>15</sup> Pailat naŋ da boɔrɔ ka o pɛle a nobɔ poore la, ka o da bare Barabas ko ba, kyɛ vɛŋ ka ba fɔbe Yesu kyɛ de O tere ka ba na te kpa O a dagara zu. <sup>16</sup> Ka a sogyare taa O kpɛ ne a naa yiri davoro ba naŋ maŋ boɔle ka Pratorium, a te boɔle ba sogyare taaba zaa laŋ taa. <sup>17</sup> Ka ba da de kpare vaelɔt su O, kyɛ wuo goore zupile a de vɔgle O zu eŋɛ. <sup>18</sup> Kyɛ ka ba da piili puoro O, “Te puori Fo la, a Gyu deme Naa!” <sup>19</sup> Ba ŋmɛ la O zu eŋɛ ne tambir, kyɛ pore motaare eŋ O, kyɛ gbi dumo a puori O. <sup>20</sup> Ba naŋ e O la wa te baare, ba yaa la a kpare vaelɔt kyɛ de Omeŋɛ boma su O. Ba pãã da taa O la gaa ne a na te kpa O. <sup>21</sup> Ka dɔɔ kaŋ naŋ yi Sairin, ka o yuori di Simon, Alɛksanda ane Rufus saa, da yi a weɛ poɔ waara ka ba fere o ka o tuo a dagara. <sup>22</sup> Ka ba taa Yesu wa ne zie kaŋ ba naŋ boɔlɔ Gɔlgɔta (a pare la ka a zuŋmama zie). <sup>23</sup> Ka ba da de tewɔmɔ dãã naŋ puuli ne more a ko O, kyɛ O da ba nyu. <sup>24</sup> Ba naŋ da kpa O a dagara zu, ba da de la O boma a molle poŋ, ka ba nyɛ bon na ba kaŋ na zaa naŋ na nyɛ. <sup>25</sup> A gogori ata saŋ la ka ba da kpa O a dagara zu. <sup>26</sup> A ŋmaabo ba naŋ da ŋmaa naŋ wuli a yɛlɛ na ba naŋ kyaare ne O da la: A GYU DEME NAA. <sup>27</sup> Ba da kpa la nannyigri bayi ane O, ka kaŋ be O doroŋ ka kaŋ meŋ be O gɔbaa eŋɛ. <sup>28</sup> A da waa la lɛ ka a tu a ŋmaabo ba naŋ da ŋmaa biŋ naŋ yeli, “Ba de O la ka O poɔ a yelbebe deme poɔ.” <sup>29</sup> Balaŋ naŋ da tɔlɔ a be da yeli la yelfaare kyaare ne O, a gɔɔrɔ ba zuri kyɛ yele, “Fõõ naŋ na ŋmɛre a Ŋmendie kyɛ leɛ mɛ o berata poɔ, <sup>30</sup> faa fomeŋɛ a sigi a dagara zu.” <sup>31</sup> A lɛ meŋ la ka a puoru neŋkponni ninderebe ane a nɔbinna kaakaareba da maŋ e O la, a yeli ko taaba, “O faa la ba mine, kyɛ O kon tõɔ̃ faa Omeŋɛ. <sup>32</sup> Vɛŋ ka Kristo, a Israel deme Naa, pãã sigi a dagara zu ka te pãã tõɔ̃ nyɛ kyɛ sage de.” Ka balaŋ ba naŋ kpa ne O meŋ da toorɔ O. <sup>33</sup> A gogori ayoɔbo saŋ naŋ wa ta la ka lige da pɔge a teŋɛ zaa kyɛ gu a gogori awae saŋ. <sup>34</sup> A gogori awae saŋ, Yesu da duori la O kɔkɔre a ŋmɛ kpɛlle a yeli, “Ɛloe, Ɛloe, lama sabaktane?”— naŋ wuli, “N Naaŋmen, N Naaŋmen, wolɔ ka Fo bare Ma?” <sup>35</sup> A nobɔ mine naŋ da are a be naŋ wa te woŋ a ŋaa, ba da yeli la, “Kyɛllɛ. O boɔlɔ la Elaigya.” <sup>36</sup> Ka ba kaŋ zo a te de sɔpɔ a buri ne dãã miiruŋ, a eŋ tambir wogi eŋɛ a turi Yesu ka O nyu kyɛ yeli, “Bare O! Vɛŋ ka te nyɛ ka Elaigya na wa nyɔge O la ka O sigi.” <sup>37</sup> Ka Yesu da duori O kɔkɔre a ŋmɛ kpɛlle, kyɛ voore O vooroŋ pare baara. <sup>38</sup> Ka a Ŋmendie pɛn-gyeraa da kyeɛre ziiri ayi, a yi a zusoɔ te ta a pare. <sup>39</sup> A sogyare kɔɔ zusobɔ na naŋ da are a Yesu niŋe naŋ da nyɛ lɛ O naŋ da ŋmɛ kpɛlle a voore O vooroŋ pare baara la, ka o yeli, “Yelmeŋɛ, a dɔɔ ŋa da e la a Naaŋmen Bidɔɔ.” <sup>40</sup> Pɔgɔbɔ mine meŋ da be la zitɔɔre kyɛ kaara a yɛlɛ ama. Maria Magdalena, ane Maria naŋ e Gyems a Bile Sobɔ ane Gyosɛf ma, ane Salome da poɔ la ba poɔ. <sup>41</sup> A pɔgɔbɔ bama da tu O la a saŋ na O naŋ da be Galili poɔ, kyɛ soŋ O. Pɔgɔbɔ yaga meŋ naŋ da wa ne O a Gyɛrosalɛm poɔ, meŋ da be la be. <sup>42</sup> A zie naŋ waa te `maa, kyɛ a kyɔgroo bebiri da la (naŋ na di kyɛ a Sabat bebiri meŋ ta), ⁴³ ka Gyosɛf naŋ yi Arematea, a Sanhederen dɔɔ kaŋ naŋ taa yuori kyɛ meŋ da kyɛllɛ gu a Naaŋmen naaloŋ waabo, da taa pera kyɛ gaa Pailat zie a te sɔre ka ba ko o Yesu eŋgan. ⁴⁴ Pailat noɔre da `maa la ne o naŋ woŋ ka O kpi la. O da boɔle la a sogyare kɔɔ zusobɔ a soore o ka Yesu naŋ kpi, ka a kɔɔre la bee. ⁴⁵ O naŋ da woŋ a sogyare kɔɔ zusobɔ zie ka lɛ la, ka o da de a eŋgan ko Gyosɛf. ⁴⁶ A lɛ la ka Gyosɛf da da pɛmpeɛle veɛle, a de Yesu eŋgan sigi ne, a de a pɛmpeɛle a villi pɔge. O da de O la eŋ yabogi ba naŋ da tugi a piiri eŋɛ, kyɛ billi kuuri kpoŋ te pɔge a yabogi noɔre. ⁴⁷ Maria Magdalena ane Maria, Gyosɛf ma, da nyɛ la be ba naŋ da eŋ O.

¹ A Sabat bebiri naŋ wa tɔle baare, Maria Magdalena, Maria naŋ e Gyems ma, ane Salome da da la kããnyuuri ka ba tõɔ̃ wa te sɔ O. ² A koseɛra piilu daare baguo pipi saŋ, ba da wa la a yabogi zie, a saŋ na a zie naŋ da vɛle. ³ Ka ba da soore taaba, “Aŋ la na billi a yabogi noɔre kuuri bare ko te?” ⁴ Kyɛ ba naŋ te kaa, ba da nyɛ la ka ba da vu a kuuri bare. A kuuri da waa la kukpoŋ. ⁵ Ba naŋ da kpeɛrɛ a yabogi poɔ, ba da nyɛ la pɔlbile kaŋ ka o su kpare pelwogo a zeŋ a nudoroŋ zie, ka ba nɔe da `maa yaga. <sup>6</sup> Ka o yeli ko ba, “Yɛ ta taa nɔ`maa. Yɛ boɔrɔ la Yesu naŋ yi Nazarɛt, ba naŋ da kpa a dagara zu. O leɛ iri la. O ba kyebe kyɛ. Nyɛ a zie na ba naŋ da gaale O. ⁷ Kyɛ, yɛ gaa te yeli ko a O tutuuribo ane Pita, ka O na de la wẽɛ̃ yɛ eŋɛ a gɛrɛ Galili. Be la ka yɛ na nyɛ O, a na O naŋ da yeli ko yɛ.” ⁸ Ka ba da miine ane nɔ`maa, kyɛ yi a yabogi zie zo. Ba meŋ da ba yeli yɛlɛ zaa ko neɛ zaa, bonso ba da zoro la dambẽɛ̃. ⁹ Yesu naŋ da leɛ iri a ziveɛlmɛ saŋ a koseɛra piilu daare poɔ, O daŋ sãã la Maria Magdalena zie. A o eŋɛ la ka Yesu da digi kɔntɔmɔ ayopõĩ bare. ¹⁰ O da gaa te yeli ko la a balaŋ naŋ da maŋ be O zie, a saŋ na ba naŋ da kyãã kono kyire ŋmenaa kõɔ̃. ¹¹ Ba naŋ da woŋ ka Yesu voorɔ la, kyɛ ka o da nyɛ O la, ba da ba sage de ne a lɛ. ¹² A ama zaa naŋ wa baare la, ka Yesu leɛ sãã waaloŋ yuo poɔ a tutuuribo bayi zie a saŋ na ba naŋ da kyene a sori poɔ. ¹³ A bama da leɛ la gaa a te manne ko a balaŋ naŋ kyɛre. Kyɛ ba meŋ da ba sage de ne a lɛ ba naŋ yeli. ¹⁴ A puoriŋ la, ka Yesu da sãã a pie ne yena zie a saŋ na ba naŋ da dire bondirii. O da nyare la ba zu a ba basagdeu ane ba zukpeɛne zuiŋ, ne lɛ ba naŋ da ba sage de balaŋ naŋ da nyɛ O a O kũũ leɛ-iruŋ puoriŋ. ¹⁵ Ka O da yeli ko ba, “Yɛ gaa te kpɛ a tendaa zaa poɔ a kanne a yelnoore kannoo ko bon-iraa zaa. ¹⁶ Onɔ naŋ sage kyɛ de suobu na nyɛ la faabo, kyɛ onɔ naŋ ba sage de na nyɛ la saŋnaa. ¹⁷ A manno eroŋ ama zaa na tuuro la balaŋ naŋ sage de. A N yuori eŋɛ, ba na digi la kɔntɔmɔ bare, kyɛ ba na yeli la yɛlɛ ane kɔkɔpaale. ¹⁸ Ba na nyɔge la weere ane ba nuuri; kyɛ ka ba naŋ wa nyu tẽẽ faare, bon zaa kon e ba. Ba na de la ba nuuri dɔgle baaleba zu, ka ba nyɛ laafia.” ¹⁹ A Daŋna naŋ wa yeli yɛlɛ ko ba baare, ba da tuori de O la a tenvelaa poɔ, ka O pãã da zeŋ Naaŋmen nudoroŋ eŋɛ. ²⁰ Ka a tutuuribo da yi a te kanne zie zaa, ka a Daŋna da laŋ tonɔ ne ba a e ka a yelbiri are a yi a tonseɛle mannoo naŋ da be ba zie. Amen.