GYUD
11 Gyud, a Yesu Kristo gbaŋgbaa, naŋ e Gyems yɔɔ, A ko balaŋ a Saa Naaŋmen naŋ iri biŋ, balaŋ O naŋ are gu a Yesu Kristo poɔ kyɛ boɔle: 2 Nyonono,`maaroŋ, ne nɔmmo be yɛ zie yaga lɛ. 3 N bamine N naŋ nɔŋ, ne lɛ a naŋ da e nimizeɛ ko ma ka N ŋmaa ko yɛ a faabo te naŋ laŋ yɛlɛ, a da ferɛ ma la a n teɛroŋ poɔ ka N ŋmaa a dɔre eŋ yɛ ka yɛ moɔrɔ a sagdeu zuiŋ, a sagdeu na Naaŋmen naŋ da iri de dayenaa a ko a Ŋmendeme. 4 Bonso, nensaala mine da sɔgle sare kpɛ la yɛ poɔ, balaŋ ba naŋ da ŋmaa biŋ ko saŋnaa a yi a koroŋ saŋ. Ba e la nobɔ naŋ ba zoro Naaŋmen, naŋ maŋ de a te Naaŋmen nɔndeteroo a e ka o leɛ waa edɛgre, kyɛ zagra a Kpoŋ Zaa Sobɔ Naaŋmen yoŋ ane te Daŋna Yesu Kristo. 5 Ane lɛ yɛ naŋ bɔŋ ama zaa, N boɔrɔ la ka N teɛre yɛ ka, a Daŋna naŋ da faa a nobɔ a yi Egyept poɔ puoriŋ la, ka O da saŋ balaŋ naŋ ba sage ne O bare. 6 Kyɛ a malkere naŋ da ba are ba aroo zie kyɛ bare bamenne kpeɛbo zie, O are gu ba la a eŋ ba a banzɔlɔ naŋ kon bɔŋ ŋmaa poɔ, ka ba meŋ be zilige poɔ a te gu a bebikpoŋ sɛrɛɛ diu. 7 A lɛ meŋ poɔ, Sodom ne Gomora deme, ane ba tenne taaba naŋ peɛle ba, da de la bamenne ko pẽɛ̃pẽɛ̃ tomɔ ane eŋgan boɔbo faare. Ba waa la mannewuluu ne lɛ balaŋ taaba naŋ nyɛrɛ faaloŋ leɛ-yɔɔre a vũũ naŋ ba taa baaro poɔ. 8 A lɛ poɔ, a zanzanneba bama meŋ dɛge la ba eŋgama, kyɛ ba eŋnɛ daŋneba zaa, a yeli yelbifaare kyaare ne balaŋ naŋ taa eŋno. 9 Kyɛ Mekael, a malke kpoŋ, o naŋ da ŋmeɛrɛ nɔkpeɛne ne a dɛvel a Moses eŋgan eŋɛ, da ba taa pera ka o di o sɛrɛɛ ne yelbifaare kyɛ yeli, “Ka a Daŋna nyare fo zu!” 10 Kyɛ a nobɔ bama maŋ yeli yelfaare kyaare ne a bon na zaa pare ba naŋ ba bɔŋ; kyɛ a bon na ba naŋ bɔŋ naŋ yi a bamenne eŋganoŋ poɔ, a na wɛdonne naŋ ba bɔŋ yeŋ—a boma ana poɔ la, ka ba saŋ bamenne. 11 Yɛlɛ nyɔge ba la! Bonso, ba da kyene la a Kaen sobiri poɔ, a zo tu a Balaam yeltulimo puoriŋ a yɔɔre zuiŋ. Ba meŋ bɔre wɛ la a Kora barewonnuŋ poɔ. 12 A nobɔ bama e la zisaŋnaa a yɛ nɔmmo tigri zaa zie, a saŋ na ba naŋ maŋ dire ne yɛ kyɛ kaara bamenne boɔbo yoŋ ka dambẽɛ̃ kyebe. Ba waa la na zanzuuri naŋ ba taa saa ka sɛseɛ daara yoɔrɔ ne; a na a seɛ saŋ teere naŋ ba taa wɔmɔ, naŋ kpi boyi kyɛ ka a nyaga voɔ iri. 13 Ba waa la na maŋkõɔ̃ naŋ dɔɔnɔ, a fuuro ne bamenne vi; ba waa la na ŋmarbie naŋ maŋ yoɔrɔ. Bana zie la ka ba biŋ a zilige tegteglɛ. 14 Ɛnok, a ayopõĩ sobɔ a yi Adam puoriŋ, meŋ da kanne la a nobɔ bama daŋ-nyaabo kannoo kyɛ yeli: “Kyɛllɛ, a Daŋna waara la ne O nensonne turtur, 15 ka O di nobɔ zaa sɛrɛɛ kyɛ di sɛrɛɛ saŋnaa ko balaŋ na zaa naŋ be ba poɔ naŋ ba zoro Naaŋmen. A ba Ŋmen-ba-zo eroŋ zaa ba naŋ da e a ba Ŋmen-ba-zoobu poɔ, ane a ba zukuoni yelbie a Ŋmen-bazo yelbebe deme bama naŋ da yeli kyaare ne O zuiŋ la ka ba na nyɛ sɛrɛɛ diu saŋnaa.” 16 A nobɔ bama waa la boolɔ yɛlɛ deme ne zunyaro deme, naŋ maŋ kyene a bamenne boɔbo faare sobiri poɔ; ba maŋ yeli la pɔloo yelbie, kyɛ meŋ taa nɔkãã nobɔ zie ka ba tõɔ̃ nyɛ tɔnɔ ba zie. 17 Kyɛ yɛnee, n bamine N naŋ nɔŋ, yɛ leɛ teɛre a yelbie a te Daŋna Yesu Kristo potuuribo naŋ daŋ yeli, 18 ne lɛ ba naŋ da yeli ko yɛ, “A baaroo saŋ, elaareba na be la be naŋ na maŋ kyene seŋ ba Ŋmen-ba-zo boɔbo faare.” 19 Bama la a balaŋ naŋ maŋ wa ne wɛloo a yɛ poɔ a maŋ tu a eŋganoŋ yɛlɛ kyɛ ba taa a Seɛ. 20 Kyɛ yɛnee, n bamine N naŋ nɔŋ, yɛ meɛrɛ yɛmenne duoro a yɛ sagdeu kyerete zaa eŋɛ, a puoro a Sekyerete poɔ. 21 Yɛ taa yɛmenne velaa a Naaŋmen nɔmmo poɔ a kaara kyɛ gu a te Daŋna Yesu Kristo nyonono naŋ na wa ne nyɔvore naŋ kon bɔŋ baare. 22 Yɛ taa nyonono ko ba mine naŋ bonnɔ; 23 kyɛ ba mine, yɛ faa ba ne dambẽɛ̃ a tagra ba ka ba yi a vũũ poɔ—a pãã sereŋ kyiiri a bonsuuraa zaa naŋ dɛge ne a eŋganoŋ. 24 A ko a Neɛ na naŋ tõɔ̃ e ka yɛ ba ŋmɛ gbɛɛ le kyɛ tõɔ̃ eŋ yɛ a O eŋno zie niŋe soɔ, ka saŋnaa zaa meŋ kyebe, ne popeɛloŋ yaga— 25 a ko te Faara Naaŋmen yoŋ naŋ taa yɛŋ, O zie la ka eŋno, ne gandaaloŋ, ne kpẽã zaa, ne faŋa be pampana ŋa ane tegteglɛ! Amen.