GYEMS

GYEMS

¹ Gyems, Naaŋmen ne a Daŋna Yesu Kristo gbaŋgbaa, A ko a bale pie ne ayi naŋ yaare a tendaa zaa: N puori yɛ la. ² N yɔɔmine, yɛ de ka a e popeɛloŋ zaa ka yɛnee wa le gyenno mine poɔ, ³ bonso, yɛ bɔŋ la ka a yɛ sagdeu gyɛl-kaao waara ne la kannyiri. ⁴ Kyɛ yɛ vɛŋ ka kannyiri toŋ o tomɔ baare, ka yɛ na tõɔ̃ ta yɛ tao zie yɛlɛ zaa poɔ kyɛ ba leɛ boɔrɔ bon zaa. ⁵ Ka yɛ kaŋ zaa ba taa yɛŋ, vɛŋ ka o sɔre Naaŋmen, Onɔ naŋ maŋ tere yaga ko nobɔ zaa kyɛ ba nyare ba zu, kyɛ O na ko o la yɛŋ. ⁶ Kyɛ ka onɔ wa sɔre, vɛŋ ka o taa sagdeu kyɛ ta bonnɔ, bonzuiŋ, neɛ na naŋ bonnɔ waa la na maŋkõɔ̃ sɛseɛ naŋ fuuro kyɛ daara. ⁷ Ta vɛŋ ka a neɛ na naŋ bonnɔ teɛre ka o na nyɛ la bon zaa a Daŋna zie. ⁸ Teɛroŋ boyi dɔɔ ba are kpẽã ne lɛ zaa o naŋ erɛ. ⁹ Vɛŋ ka a yɔɔ na naŋ e nembaala, fuuro ne lɛ o naŋ taa aroo zie naŋ do yaga. ¹⁰ Kyɛ neɛ na naŋ taa boma, vɛŋ ka o fuuro a o sigruu eŋɛ, bonzuiŋ, o na tɔle gaa la a na weɛ tepoore. ¹¹ Bonso, a ŋmenaa maŋ iri puri la ane toloŋ yaga a vɛŋ ka a moɔ gbeɛle kyɛ ka a mɔpoore suori le ka o veɛloŋ zaa bɔre wɛ. Lɛ la ka a tara sobɔ meŋ na yi kyeɛ a o eroŋ zaa poɔ. ¹² Maaloo be la a dɔɔ na zie naŋ tõɔ̃ are kpẽã gyennoo poɔ. Bonso, ka o naŋ wa nyɛ gyennoo baare, o na nyɛ la a nyɔvore wedere zupile na a Daŋna naŋ polle ko balaŋ naŋ nɔnɔ O. ¹³ Ta vɛŋ ka neɛ zaa yeli o gyennoo poɔ, “N nyɛ la gyennoo Naaŋmen zie.” Bonso, Naaŋmen kon tõɔ̃ nyɛ gyennoo a faaloŋ zie, kyɛ neɛ zaa meŋ kon tõɔ̃ nyɛ gyennoo Naaŋmen zie. ¹⁴ Kyɛ neɛ zaa maŋ kpɛ la gyennoo poɔ a saŋ na omeŋɛ boɔbo faare naŋ tage o yi ka o kpɛ bɛlloo poɔ. ¹⁵ Ka boɔbo faa pãã wa taa poɔ, GYEMS 1:16 o maŋ dɔge la yelbieri. Kyɛ ka yelbieri wa te baa baare, o maŋ dɔge la kũũ. ¹⁶ N yɔɔmine N naŋ nɔŋ, yɛ ta leɛ bɔre yi a sori poɔ. ¹⁷ Kyɔgtaa velaa ne kyɔgtaa soŋ zaa yi la sazu, a yi a kyãã zaa Saa zie sigre waara. O poɔ la ka leɛbo zaa bee leɛbo dasuoluŋ kaŋ zaa ba kyebe. ¹⁸ A Omeŋɛ boɔbo zuiŋ la ka O da dɔge te a yi a yelmeŋɛ yelbiri, ka te na tõɔ̃ waa na wɔmɔ danwẽɛ̃ deme a o bommaale zaa poɔ. ¹⁹ A lɛ pãã, n yɔɔmine N naŋ nɔŋ, yɛ vɛŋ ka nensaala zaa maŋ pɔgrɔ ka o kyɛllɛ, kyɛ ta maŋ yeli yɛlɛ bee nyɛ suuri wiẽũ lɛ, ²⁰ bonso, nensaala suuri ba waara ne a yeltoruŋ naŋ yi Naaŋmen zie. ²¹ A lɛ poɔ, yɛ bare yeldɛgre zaa ane efaare naŋ zuo, kyɛ de a yelbiri na ba naŋ da de kyogi eŋ yɛ, naŋ na tõɔ̃ faa yɛ seere, ne sebaaloŋ. ²² Yɛ waa a yelbiri erebɛ kyɛ ta waa kyɛlkyɛllebɛ yoŋ a leɛ bɛlle yɛmenne. ²³ Ka neɛ zaa wa kyɛllɛ a yelbiri kyɛ ba erɛ o eroŋ, o waa la na neɛ naŋ nyɛ omeŋɛ niŋe kyaala poɔ. ²⁴ Bonso, o maŋ nyɛrɛ la omeŋɛ kyɛ tage yi be a yinne lɛ o naŋ da waa daadaa lɛ. ²⁵ Kyɛ neɛ naŋ kaa a weɛloŋ nɔbinna soŋ poɔ kyɛ kyãã tuuro o, na nyɛ la maaloo o eroŋ zaa poɔ, O naŋ ba yinne lɛ o naŋ woŋ kyɛ de a tonɔ ne. ²⁶ Ka neɛ zaa be a yɛ poɔ naŋ de omeŋɛ ka o puoro la kyɛ ba maŋ taa o zele vela, o bɛllɛ la omeŋɛ kyɛ ka o puoruu meŋ ba taa tɔnɔ. ²⁷ Puoru welwel naŋ ba taa dɛgre zaa a Naaŋmen ne a Saa niŋe soɔ la aŋa: ka te kaara bikpeere ane pɔɔkɔbɔ a ba yelfere poɔ, kyɛ ta vɛŋ ka a donɛɛ yɛlɛ eŋ yelsaŋnaa zaa te zie.

¹ N yɔɔmine, a sagdeu yɛ naŋ taa a te Daŋna Yesu Kristo naŋ taa eŋno poɔ, yɛ ta taa bokpeɛbo. ² Bonso, ka dɔɔ kaŋ naŋ eŋ salema nuteraa kyɛ su bonveɛle wa kpɛ a yɛ lammo zie, kyɛ nembaala kaŋ naŋ su bonzagra meŋ wa kpɛ be, ³ kyɛ ka yɛnee pãã wa kaa a neɛ naŋ su a bonveɛle a yeli ko o, “Nyɛ dakog velaa,” kyɛ leɛ yeli ko a nembaala, “Are be” bee “Zeŋ tensoɔ n gbɛɛ eŋɛ,” ⁴ yɛ ba iri kaŋ bare a yɛmenne teɛroŋ poɔ bee? Yɛ pãã ba waa sɛrɛɛ direbe naŋ taa potuo teɛroŋ bee? ⁵ N yɔɔmine N naŋ nɔŋ, yɛ kyɛlle woŋ: Naaŋmen ba iri a donɛɛ nembaaleba ka ba waa a sagdeu bontareba ne a naaloŋ Naaŋmen naŋ polle ko balaŋ naŋ nɔŋ O, gbandirebe? ⁶ Kyɛ yɛ ba ko a nembaala gyermɛ zaa. Kyɛ a ba e a bontareba la nɛbrɛ yɛ? Bana maŋ tage yɛ kpeɛrɛ ne a sɛrɛɛ diu zie. ⁷ Bana naane maŋ yeli yelfaare kyaare ne a yuori soŋ na yɛ meŋ naŋ di? ⁸ Ka yɛnee wa tõɔ̃ maŋ tu a naaloŋ noɔre naŋ be a Naaŋmen gan poɔ, “Nɔnɔ fo laŋkpeɛrɛ seŋ fomeŋɛ,” yɛ erɛ la velaa. ⁹ Kyɛ ka yɛnee nɔnɔ bokpeɛbo, yɛ maale la yelbieri, kyɛ ka a nɔbinnaa nyare yɛ zu ka yɛ e la nɔkonde deme. ¹⁰ Bonso, neɛ na zaa naŋ na tu a nɔbinnaa zaa, kyɛ ŋmɛ gbɛre ziyenaa, saŋ la a nɔbinnaa zaa. ¹¹ Bonso, Onɔ naŋ da yeli, “Ta toŋ peɛmo tomɔ,” meŋ la yeli, “Ta ko neɛ.” Ka fo ba toŋ peɛmo tomɔ kyɛ ko neɛ, fo waa la nɔbinnaa saŋna. ¹² Yɛ yeli kyɛ erɛ a seŋ na balaŋ a weɛloŋ nɔbinnaa naŋ na di ba sɛrɛɛ. ¹³ Bonso, a neɛ na zaa naŋ da ba taa nyonono na nyɛ la sɛrɛɛ diu ka nyonono kyebe. Nyonono maŋ tõɔ̃ la a sɛrɛɛ diu. ¹⁴ N yɔɔmine, boŋ tɔnɔ la bebe ka neɛ wa yeli ka o taa la sagdeu kyɛ ba toŋ tomɔ zaa? A sagdeu na, na tõɔ̃ faa o? ¹⁵ Ka a naŋ waa ka fo yɔɔ bee fo yɔɔpuule kaŋ ba taa bonsuuri ane bebiri zaa bondirii, ¹⁶ kyɛ ka yɛ kaŋ yeli ko o, “Gɛrɛ ne eŋ`maaroŋ. Gaa te uoro fomeŋɛ kyɛ di tege,” kyɛ yɛ ba de ba eŋgama bomboɔre ko ba, boŋ tɔnɔ la aŋa? ¹⁷ A lɛ meŋ poɔ, sagdeu yoŋ naŋ ba laŋ taa ne tomɔ, kpi la. ¹⁸ Kyɛ neɛ kaŋ na yeli la, “Fo taa la sagdeu kyɛ N taa la tomɔ N naŋ toŋ.” Wuli ma a fo sagdeu naŋ ba laŋ ne a tomɔ fo naŋ toŋ, kyɛ N na wuli fo la n sagdeu a yi a tomɔ N naŋ toŋ zie. ¹⁹ Fo sage de la ka Naaŋmen bonyenaa yoŋ la bebe. Fo erɛ la velaa. A kɔntɔmɔ meŋ sage de la a lɛ a miine ne dambẽɛ̃. ²⁰ Kyɛ fõõ, nensaala naŋ ba taa tɔnɔ, fo boɔrɔ la wuluu ka fo bɔŋ ka sagdeu naŋ ba wa ne tomɔ kpi la bee? ²¹ A ba e ka te saa Abraham waa la yeltori sobɔ a yi a tomɔ o naŋ toŋ zie, a saŋ na o naŋ da de o bidɔɔ Isaak tere a biŋ a bɔɔr-maale altar zu? ²² Fo nyɛ la lɛ o sagdeu ne o tomɔ naŋ laŋ tonɔ, kyɛ a yi la a tomɔ zie ka sagdeu da ta o tao zie. ²³ A da tu la lɛ a Ŋmaabo naŋ yeli, “Abraham da sage de la Naaŋmen, kyɛ Naaŋmen da de a la ka a waa yeltoruŋ a eŋ o zie,” kyɛ ba meŋ da boɔle o la ka Naaŋmen ba. ²⁴ Yɛ pãã nyɛ la ka a yi a tomɔ neɛ naŋ toŋ zie la ka o waa yeltori sobɔ, kyɛ a ba yi o sagdeu zie yoŋ. ²⁵ A lɛ meŋ poɔ, a ba e ka a tuutuu, Rahab, da waa la yeltori sobɔ a yi a o tomɔ zie, a saŋ na o naŋ da tuori a toɔleba kyɛ pãã eŋ ba ka ba leɛ yi tu sobiyuo? ²⁶ A na a eŋgan naŋ ba taa seɛ naŋ kpi, lɛ ka a sagdeu naŋ ba toŋ tomɔ meŋ kpi.

¹ N yɔɔmine, yɛ ta sage ka yɛ yaga zie waa wulwullibo, bonzuiŋ yɛ bɔŋ la ka te balaŋ naŋ wullo, te na nyɛ la sɛrɛɛ diu naŋ e kpẽã. ² Te zaa ŋmɛ la gbɛɛ sobie yaga poɔ. Ka kaŋ zaa ba ŋmɛ gbɛre a o yelbie poɔ, o waa la dɔɔ naŋ ta o tao zie, naŋ meŋ na tõɔ̃ nyɔge taa o eŋgan zaa velaa. ³ Teɛre nyɛ, lɛ te naŋ maŋ eŋ bɔmɔ a wie nɔe eŋɛ ka a sage lɛ te naŋ maŋ boɔrɔ, ka te pãã tõɔ̃ leɛ a wiri eŋgan zaa. ⁴ Teɛre nyɛ a mane gboe yɛlɛ meŋ. Ne lɛ zaa a naŋ e bombɛrɛ kyɛ ka sɛseɛ kpẽã meŋ maŋ daare a, ba maŋ mɔŋ a la ane vubilii lɛ, a maŋ gaa ne zie na zaa a gbori zusobɔ naŋ boɔrɔ. ⁵ A lɛ la ka a zele meŋ e bile lɛ a eŋgan poɔ kyɛ maŋ fuuro yaga lɛ. Teɛre nyɛ, lɛ vũũ belaŋ naŋ na tõɔ̃ nyɔge tuu kpoŋ dire. ⁶ A zele meŋ e la vũũ ane yelbatori paaloŋ kaŋ naŋ be te eŋgan ziiri zaa eŋɛ. O saŋ la a eŋgan zaa a mare vũũ eŋ a te nyɔvoe yɛlɛ zaa, kyɛ a yi la a tenfaa poɔ ka vũũ eŋ la o zie. ⁷ Wɛdonne boore zaa, bon-agre ne bonvuuri ane a kõɔ̃ poɔ boma zaa, e la bompɔglɔ nensaala naŋ da pɔgle. ⁸ Kyɛ a nensaala zele, neɛ na naŋ tõɔ̃ pɔgle o kyebe. O e la faaloŋ neɛ naŋ kon tõɔ̃ nyɔge taa, kyɛ meŋ paale ne tẽẽ faare naŋ na wa ne kũũ. ⁹ Ane a zele, te maŋ yeli la yelbisonne a kyaare te Saa Naaŋmen, kyɛ ne onɔ la ka te maŋ ŋmɛ eŋ nensaaleba, balaŋ Naaŋmen naŋ maale ka ba seŋ O waaloŋ. ¹⁰ A yi a noɔre bonyenaa poɔ la ka yelbisonne ane ŋmɛeŋ maŋ wa. N yɔɔmine, a ba seŋ ka ama taaba bebe. ¹¹ Kõɔ̃ noɔ ane kõɔ̃ tuo na tõɔ̃ bullo yire la ziyenaa bee? ¹² N yɔɔmine, kaŋkaŋ teɛ na tõɔ̃ wɔŋ la ɔleve wɔmɔ bee? Ora na tõɔ̃ wɔŋ la kaŋkama? Lɛ la ka bule kaŋ zaa kon tõɔ̃ bullo yire ne kõɔ̃ nyɛnnoo laŋ ne kõɔ̃ noɔ. ¹³ Aŋ la taa yɛŋ kyɛ e bɔŋnɔ a yɛ poɔ? Yɛ vɛŋ ka o wuli a lɛ a yi o eveɛle poɔ, a tomɔ o naŋ tonɔ ne sebaaloŋ naŋ yi yɛŋ poɔ. ¹⁴ Kyɛ ka yɛnee taa nyuuri ane pɔloo a yɛ sukyie poɔ, ta fuuro a ŋmaa zirii kyaare ne a yelmeŋɛ. ¹⁵ A yɛŋ ŋa ba yi sazu sigi wa, kyɛ o e la teŋɛ zu ne eŋganoŋ bon naŋ yi a kɔntɔmɔ zie. ¹⁶ Bonso, a zie na zaa nyuuri ne pɔloo naŋ be, be la ka buriburi ne tonfaare zaa meŋ be. ¹⁷ Kyɛ a yɛŋ naŋ yi sazu wa, yɛlɛ danwẽɛ̃ sobɔ la kyereteluŋ, kyɛ pãã waa `maaroŋ ne baaloŋ, a taa teɛroŋ ko nobɔ. O paale la ne nyonono ane wɔmveɛle kyɛ ba nɔnɔ boore bee taa melmelloo. <sup>18</sup> Kyɛ `maaroŋ maaleba naŋ bore yeltoruŋ laŋ ne `maaroŋ maŋ kyɛ la yeltoruŋ wɔmɔ.

¹ Boŋ la wa ne zɔɔre ane tanne taa a yɛ poɔ? A ba yi a yɛ eŋgan boɔbo naŋ zɔɔrɔ a yɛ eŋgama ziiri poɔ? ² Yɛ boɔrɔ la boma kyɛ ba nyɛ a. Yɛ ko la nobɔ a miine ne ba boma, kyɛ yɛ kon nyɛ a boma yɛ naŋ boɔrɔ. Yɛ tanne taa kyɛ zɔɔrɔ kyɛ yɛ kon nyɛ, bonzuiŋ yɛ ba sɔre. ³ Yɛ sɔre la, kyɛ yɛ ba nyɛ, bonzuiŋ yɛ sɔroo ba tu sori. Yɛ maŋ sɔre la ka yɛ na tõɔ̃ di a, a yɛ eŋgan boɔbo eŋɛ. ⁴ Yɛnee pɔɔpeɛmɛ ne dɔɔpeɛmɛ, yɛ ba bɔŋ ka a baaloŋ yɛ naŋ taa ne a donɛɛ waa la dɔŋ ko Naaŋmen? A lɛ poɔ, neɛ na zaa naŋ boɔrɔ ka o e a donɛɛ ba, waa la Naaŋmen dɔndɔmɔ. ⁵ Yɛ teɛre ka a Ŋmaabo yeli la zagla lɛ, ka a seɛ naŋ kpeɛrɛ te poɔ, miine la ne nyuuri? ⁶ Kyɛ O tere la nɔndeteroo gaŋ. Lɛ la so ka O yeli: “Naaŋmen are kyaare ne la a pɔloo deme kyɛ maŋ ko a sigru millu deme nɔndeteroo.” ⁷ A lɛ poɔ, yɛ sigri yɛmenne Naaŋmen zie. Yɛ are kyaare ne a dɛvel kyɛ o na zo yi la yɛ zie. ⁸ Yɛ sɛre ta Naaŋmen zie, kyɛ Naaŋmen meŋ na sɛre ta la yɛ zie. Yɛ pɛge yɛ nuuri, yɛnee yelbebe deme, kyɛ vɛŋ ka yɛ sukyie yi parepare, yɛnee teɛro boyi deme. ⁹ Yɛ taa enkyoɔr. Yɛ kono ne kpɛlle kyɛ kyire ŋmenaa kõɔ̃. Leɛ yɛ laare ka a e kon hiinuu kyɛ ka yɛ popeɛloŋ e posaŋnaa. ¹⁰ Yɛ sigri yɛmenne a Daŋna niŋe soɔ, kyɛ O na zɛge yɛ la ka yɛ do. ¹¹ Yɔɔmine, yɛ ta yeli yelfaare kyaare taaba. Onɔ naŋ yele kyaare ne o yɔɔ a dire o yɔɔ sɛrɛɛ, kyaare ne la a nɔbinnaa, a dire a nɔbinnaa sɛrɛɛ. Ka fõõ wa di a nɔbinnaa sɛrɛɛ, fo ba e a nɔbinna tutuuro kyɛ fo e la a nɔbinna sɛrɛɛ dire. ¹² Nɔbinna Terɛ bonyenaa yoŋ la bebe naŋ na tõɔ̃ faa kyɛ leɛ saŋ bare. Aŋ la fõõ na dire a fo tasobɔ sɛrɛɛ? ¹³ Pampana ŋa yɛ kyɛllɛ, yɛnee naŋ maŋ yeli, “Zenɛ bee bieo te na gaa la teŋɛ kaŋ a te di yuoni a be a daara boma a na nyɛ tɔnɔ.” ¹⁴ Kyɛ yɛ ba bɔŋ bon na naŋ na wa bieo. Boŋ la a yɛ nyɔvore? O e la na ul kaŋ naŋ maŋ sãã belaŋ lɛ kyɛ pãã bɔre. ¹⁵ A lɛ, yɛ da naa yeli la, “Ka a naŋ wa e a Daŋna boɔbo, te na voorɔ la kyɛ e a ŋaa bee a ŋaa.” ¹⁶ Kyɛ pampana ŋa yɛ fuuro la ne pɔloo. Fuuru ama taaba zaa e la faa. ¹⁷ A lɛ poɔ, a neɛ na naŋ bɔŋ a eveɛle naŋ seŋ ka o e, kyɛ ba e a lɛ, a waa la yelbieri o zie.

¹ Pampana ŋa, yɛ kyɛllɛ, yɛnee bontareba, yɛ kono kyɛ ŋmeɛre kpɛlle, a woore naŋ na wa a yɛ zie zuiŋ. ² A yɛ bonveɛle põɔ̃ la, kyɛ ka mɔɔre meŋ mɔɔ yɛ bonsuuri. ³ Yɛ salema ne selva soɔ la. A soɔloŋ ŋa na waa la danse-diu kyaare ne yɛ kyɛ na di yɛ eŋgama a na vũũ. Yɛ maŋ biŋ la naboma dɔgle taa kyɛ gu a bebibaara saŋ. ⁴ Kyɛllɛ! A sanyɔɔre yɛ naŋ ba yɔɔ ko a tontoneba naŋ da kyeɛre a boma a yɛ wɛre poɔ, ŋmeɛrɛ la kpɛlle. A bonkyeɛreba kpɛlle ŋmeɛbo ta la a tenvela sogyare Daŋna tobo. ⁵ Yɛ da kpeɛrɛ la a teŋɛ zu ne bonveɛle yaga a tu a noɔ sobiri zaa poɔ. Yɛ sukyie da kpɛ la bɛrɛ a na ba naŋ maŋ e a donne koobo daare. ⁶ Yɛ da de la ka balaŋ naŋ ba saŋ ka ba seŋ la saŋnaa a ko ba, kyɛ ba da ba are kyaare ne yɛ. ⁷ A lɛ poɔ, yɔɔmine, yɛ di kannyiri kyɛ gu a Daŋna waabo. Nyɛ lɛ koɔraa naŋ maŋ kyɛllɛ a tɛnɛ wɔmɔ naŋ taa tɔnɔ yaga, ne lɛ o naŋ maŋ di kannyiri gu a saa piilu saŋ ne a saa baaro saŋ. ⁸ Yɛnee meŋ, yɛ taa kannyiri kyɛ are gbeŋgbeŋ a yɛ sukyie poore, bonso a Daŋna waabo tara la. ⁹ Yɔɔmine, yɛ ta boolɔ taa, ka lɛ naane yɛ na kpɛ la sɛrɛɛ diu poɔ. Kyɛllɛ! A sɛrɛɛ dire are la a dendɔre eŋɛ! ¹⁰ N yɔɔmine, yɛ de a Ŋmennoɔr deme naŋ da yeli yɛlɛ a Daŋna yuori poɔ, ka ba waa wuluu ko yɛ, ba naŋ da di kannyiri a woore poɔ. ¹¹ Kyɛllɛ! Te de la ka maaloo be la balaŋ naŋ are kpẽã zie. Yɛ da woŋ la ka Gyob da are la kpẽã ne kannyiri, kyɛ yɛ meŋ nyɛ la a baaroo a Daŋna naŋ da ko o; a Daŋna taa la nembaaloŋ yaga ne nyonono zaa. ¹² N yɔɔmine, a zuo ama zaa, yɛ ta pɔ togtogi. Ta pɔ ne tenvelaa, bee a teŋɛ zu, bee ne poɔbo kaŋ zaa. Yɛ vɛŋ ka yɛ “Oo” waa oo, kyɛ ka yɛ “ `M`m” meŋ waa `m`m. Ka lɛ naane, yɛ na kpɛ la melmelloo poɔ. ¹³ Yɛ kaŋ zaa nyɛ la woore bee? Vɛŋ ka o puori. Yɛ kaŋ zaa poɔ pɛle la bee? Vɛŋ ka o yieli pugibu yieluŋ. ¹⁴ Yɛ kaŋ zaa beɛrɛ la bee? Vɛŋ ka o boɔle a puoru deme nembɛrɛ ka ba wa o zie wa puori ko o a sɔ o kãã a Daŋna yuori eŋɛ. ¹⁵ Kyɛ a puoruu naŋ taa sagdeu na saŋ la a baaloŋ sobɔ; a Daŋna na iri o la do. Ka onɔ daŋ maale yelbieri, o na nyɛ la o yelbieri suuri diu. ¹⁶ A lɛ poɔ, yɛ yeli ne yɛ nɔe ko taaba ka yɛ maale la yelbieri, kyɛ puori ko taaba ka yɛ na tõɔ̃ nyɛ sammo. A yeltori sobɔ sɔro kpẽã taa la tɔnɔ yaga. ¹⁷ Elaigya da e la nensaala a na temenne. O da sereŋ puori la ka saa ta mi, ka a saa da ba mi a teŋɛ zu yuomo ata ne kyɛlle. ¹⁸ Kyɛ o da leɛ puori la Naaŋmen, ka a sazu tere a saa, ka a tɛnɛ meŋ buli ne o wɔmɔ. ¹⁹ Yɔɔmine, ka yɛ kaŋ wa leɛ bɔre yi a yelmeŋɛ sobiri poɔ, kyɛ neɛ kaŋ wa e ka o leɛ o, ²⁰ vɛŋ ka o bɔŋ, ka a neɛ na naŋ leɛrɛ a yelbebe sobɔ naŋ bɔre a yelmeŋɛ sobiri poɔ, na faa o la a yi ne kuuni poɔ kyɛ yaare pɔge yelbebe yaga.