GALATEA

GALATEA

¹ Pɔl, a potuuro kaŋ—ka o boɔloo ba yi nobɔ zie, bee nensaala zuiŋ, kyɛ ka a yi Yesu Kristo ane a Saa Naaŋmen naŋ seŋ O kuuni poɔ zie— ² ane a yɔɔmine zaa naŋ be n zie, A ko a puoru deme zaa naŋ be a Galatea paaloŋ poɔ. ³ Nɔndeteroo ane `maaroŋ be yɛ zie ka a yi a Saa Naaŋmen ane te Daŋna Yesu Kristo zie. <sup>4</sup> Yesu Kristo da de la Omeŋɛ ko te a te yelbebe zuiŋ, ka O na tõɔ̃ faa te a yi a pampana ŋa saŋ yelfaare, a seŋ lɛ Naaŋmen te Saa naŋ boɔrɔ. <sup>5</sup> O zie la ka eŋno be tegteglɛ. Amen. <sup>6</sup> N noɔre `maa la ne lɛ yɛ naŋ bare wiẽũ lɛ a neɛ naŋ boɔle yɛ a Kristo nɔndeteroo eŋɛ, kyɛ leɛ tu yelnoore yuo kaŋ, ⁷ naŋ ba e yelnoore togtogi. Kyɛ nobɔ mine dɔɔnɔ yɛ la kyɛ boɔrɔ ka ba leɛ a Kristo yelnoore. ⁸ Kyɛ ka tenee bee malke kaŋ naŋ yi tenvelaa gba wa kanne yelnoore yuo kaŋ zaa ko yɛ kyɛ ka o ba e lɛ te naŋ kanne ko yɛ, yɛ kare a sobɔ bare! ⁹ Lɛ te naŋ da yeli, N na leɛ yeli la pampana ŋa: Ka neɛ zaa kanna yelnoore yuo kaŋ zaa korɔ yɛ kyɛ ka o ba e a kaŋ na yɛ naŋ da sage ne, yɛ kare o bare! ¹⁰ Kyɛ pampana, N boɔrɔ la ka N mɔgle nensaala bee Naaŋmen? Bee, N boɔrɔ la ka N pɛle nensaaleba poore? Ka Maa da boɔrɔ ka N e ka nensaaleba poore pɛle, N da kon tõɔ̃ e a Kristo gbaŋgbaa. ¹¹ N boɔrɔ la ka yɛ bɔŋ, yɔɔmine, ka a yelnoore na N naŋ kanne ba yi nensaala zie. ¹² Bonso, N ba de o nensaala kaŋ zaa zie, ka neɛ zaa meŋ ba wuli ma; kyɛ, N de o la ka o yi Yesu Kristo sããbo zie. ¹³ Bonso, yɛ da woŋ la lɛ N naŋ da waa a Gyu deme puoruu eroŋ zaa poɔ, lɛ N naŋ da maŋ dɔgre Naaŋmen puoru deme zaa kyɛ maŋ boɔrɔ ka N saŋ ba bare. ¹⁴ N duoro la a Gyu deme puoruu zaa poɔ gaŋ n taaba yaga zie, a mmeŋɛ teŋɛ nobɔ poɔ, a N naŋ leɛ tu a n saamine e-ere zaa ne nimizeɛ yaga gaŋ ba. ¹⁵ Kyɛ Naaŋmen, naŋ iri ma yi a n ma vore poɔ kyɛ boɔle ma a O nɔndeteroo zuiŋ, ¹⁶ poɔ da pɛle la ka O e ka O Bidɔɔ sãã n zie ka N na tõɔ̃ kanne O yelnoore a Tendaa deme poɔ. A lɛ zuiŋ, N da ba soore yɛlɛ zaa nensaala zie, ¹⁷ ka N meŋ da ba do Gyɛrosalɛm ka N te nyɛ balaŋ naŋ de wẽɛ̃ Naaŋmen potuuribo poɔ, kyɛ N da gaa la Arabia wiẽũ lɛ a yi be leɛ gaa Damaskos. ¹⁸ A yuomo ata naŋ da tɔle, N da gaa la Gyɛrosalɛm te nyɛ Pita, kyɛ N da kpɛ la o zie beri pie ne anuu. ¹⁹ N da ba nyɛ potuuribo kaŋ zaa ka a Daŋna yɔɔ, Gyems naane. ²⁰ A bon na N naŋ ŋmaara korɔ yɛ pampana ŋa, kyɛllɛ, a Naaŋmen niŋe soɔ, a ba e zirii. ²¹ A lɛ puoriŋ, N da yi la be te gaa Siria ane Selesea paaloŋ. ²² A Gyudea paaloŋ puoru deme naŋ be Kristo poɔ, da ba bɔŋ ma. ²³ Kyɛ ba da woŋ la a toɔlɔ ŋa yoŋ, “A neɛ na naŋ daŋ dɔgre te, ka pampana ŋa, o leɛ kanna la a sagdeu yelnoore na o naŋ da boɔrɔ ka o saŋ bare.” ²⁴ Lɛ la ka ba pugi Naaŋmen a maa zuiŋ.

¹ Yuomo pie ne anaare naŋ da tɔle, N pãã da leɛ do la Gyɛrosalɛm ane Barnabas, kyɛ N da de la Titus meŋ ka o gaa ne te. ² N do la be a sããbo kaŋ zuiŋ a te manne ko ba a yelnoore na N naŋ kanne a Tendaa deme zie. N da manne la ko balaŋ naŋ taa yuori ba yoŋ, ka lɛ naane, sobiri kaŋ poɔ, N da naa zo la bee N daŋ zo weɛlɛ. ³ Kyɛ Titus gba, naŋ be n zie, da ba de ka a e feroo ka o ŋmaa o yoɔre, ne lɛ zaa o naŋ da e Grik neɛ. ⁴ Kyɛ ama zaa wa la, bonso, ziri yɔɔmine da sɔgle sare kpɛ la te zie te pigri kaa a weɛloŋ te naŋ taa Yesu Kristo eŋɛ, ka ba na tõɔ̃ e ka te leɛ kpɛ gbaŋgbaaloŋ. ⁵ Te da ba maale vuo ko ba togtogi, ka a yelnoore yelmeŋɛ na tõɔ̃ kyãã be a yɛ zie. ⁶ Kyɛ balaŋ naŋ teɛre ka ba e la bon kaŋ—bon na zaa ba naŋ e, a ba e bon zaa n zie; Naaŋmen ba sage de nensaala waaloŋ—balaŋ naŋ teɛre ka ba e la bon kaŋ, ba ba dɔgle bon zaa n zie. ⁷ A la leɛ, ba nyɛ la ka ba da de a yɔba- ŋmaara deme yelnoore eŋ n nuuri poɔ, a na ba naŋ da de a yɔŋmaara deme yelnoore a ko Pita. ⁸ A Onɔ sobɔ naŋ da tonɔ velaa Pita zie ka o waa potuuro ko a yɔ-ŋmaara deme, meŋ tonɔ la lɛ maa zie ka N waa a potuuro ko a Tendaa deme. ⁹ Ba naŋ wa bɔŋ a nɔndeteroo Naaŋmen naŋ ko ma, ka Gyems, Sefas, ane Gyɔn, balaŋ naŋ da waa na die lugo, da nyɔge maa ane Barnabas nudoroŋ ne lantaaloŋ a sage ka te gaa a Tendaa deme zie, kyɛ ka ba meŋ gaa a yɔ-ŋmaara deme zie. ¹⁰ Kyɛ ba da boɔrɔ la ka te maŋ teɛrɛ a naŋ deme. A lɛ meŋ la ka N da sereŋ boɔrɔ ka N e. ¹¹ Kyɛ ka Pita naŋ te wa Anteok la, ka N are kyaare ne o, bonzuiŋ, o da ŋmɛ la gbɛre. ¹² A saŋ na dɔbɔ mine naŋ da ba yi Gyems zie wa sɛre, o da maŋ di ne la a Tendaa deme. Kyɛ ba naŋ da ta la, ka o leɛ sɛrɛ yire a iri omeŋɛ a Tendaa deme zie, bonzuiŋ, o da zoro la a balaŋ naŋ be a yɔ-ŋmaabo poɔ dambẽɛ̃. ¹³ A Gyu deme mine meŋ da poɔ la a o melmeloo poɔ, ka ba da tage Barnabas gba, ka o meŋ kpɛ a ba melmeloo poɔ. ¹⁴ Kyɛ N naŋ da wa nyɛ ka ba eroŋ ba tori a seŋ a yelnoore yelmeŋɛ, N da are la ba zaa niŋe soɔ a yeli ko Pita, “Ka fõõ e Gyu neɛ kyɛ kpeɛrɛ a na a Tendaa deme naŋ maŋ kpeɛrɛ kyɛ bare a Gyu deme eroŋ, wolɔ la ka fo ferɛ a Tendaa deme ka ba kpeɛrɛ a na Gyu deme? ¹⁵ “Tenee naŋ e Gyu deme nendɔgre kyɛ ba e a Tendaa yelbebe deme, ¹⁶ bɔŋ la ka neɛ kon bɔŋ waa yeltori sobɔ a yi a nɔbinnaa tuubu poɔ, kyɛ a Yesu Kristo sagdeu poɔ la. Lɛ ka tenee meŋ da sage de Kristo Yesu, ka te na tõɔ̃ waa yeltori deme, a yi a Kristo sagdeu poɔ ka a ba yi a nɔbinnaa tuubu poɔ, bonzuiŋ, a nɔbinnaa tuubu poɔ, nensaala zaa kon bɔŋ waa yeltori sobɔ. ¹⁷ “Ka tenee boɔrɔ ka te waa yeltori deme a yi Kristo zie, kyɛ temenne meŋ waa na yelbebe deme, a pãã wuli ka Kristo waa la yelbebe tontonɔ bee? A kon bɔŋ e lɛ zaa. ¹⁸ Bonso, ka Maa leɛ mɛ a boma N naŋ da saŋ biŋ, a wuli ka N e la nɔkonde sobɔ. ¹⁹ Bonso, a yi a nɔbinnaa puoriŋ la ka N kpi ko a nɔbinnaa, ka N na tõɔ̃ voorɔ korɔ Naaŋmen. ²⁰ Ba da kpa ma la a dagara zu ane Kristo, kyɛ a ba la e Maa la voorɔ, kyɛ Kristo voorɔ la n eŋɛ. Pampana, a vooroŋ N naŋ voorɔ a n eŋgan poɔ, N voorɔ la ne sagdeu a Naaŋmen Bidɔɔ eŋɛ, Onɔ naŋ nɔŋ ma a de Omeŋɛ ko ma. ²¹ N ba de ka Naaŋmen nɔndeteroo ba la e bon zaa, bonso, ka yeltoruŋ naŋ wa yi a nɔbinnaa zie, Kristo kũũ pãã ba la taa pare.”

¹ Yɛnee, Galatea dambolo bama! Aŋ la bɛlle yɛ, ka yɛ ta la eŋnɛ a yelmeŋɛ? A yɛmenne niŋe soɔ la ka ba da wuli kperaa lɛ ka ba da kpa la Yesu Kristo a dagara zu. ² N na zanne la yelyenaa yoŋ a yɛ zie: Yɛ de la a Seɛ a yi a nɔbinna sobiri tuubu poɔ, bee yɛ de O la yɛ naŋ sage de ne a bon na yɛ naŋ woŋ zuiŋ? ³ Yɛ bole la seŋ lɛ? Yɛ naŋ da piili ne a Seɛ, yɛ na ta la yɛ tao zie a yi a eŋgan zie pampana bee? ⁴ Yɛ nyɛ la dɔgɛɛ yaga ka a ba taa tɔnɔ zaa—ka a sereŋ ba taa tɔnɔ bee? ⁵ A lɛ poɔ, a Onɔ naŋ da ko yɛ a Seɛ a toŋ tonseɛle a yɛ poɔ, O da e la lɛ a yi a yɛ nɔbinna sobiri tuubu puoriŋ, bee yɛ naŋ da sage de ne a bon na yɛ naŋ da woŋ zuiŋ la? ⁶ A seŋ lɛ Abraham naŋ da sage ne Naaŋmen ka Naaŋmen leɛ de o a eŋ o ka o waa yeltori sobɔ, ⁷ yɛ bɔŋ velaa, lɛ la ka balaŋ naŋ sage de, meŋ waa Abraham bibiiri. ⁸ A Ŋmaabo naŋ daŋ wuli ka Naaŋmen na e la ka a Tendaa deme tõɔ̃ waa yeltori deme a yi ba sagdeu zie, a da kanne la a yelnoore ko Abraham, a yeli: “Tendaare zaa na nyɛ la maaloo a fo eŋɛ.” ⁹ A lɛ poɔ, balaŋ naŋ taa sagdeu na nyɛ la maaloo laŋ ne a yelmeŋɛ sobɔ, Abraham. ¹⁰ Bonso, balaŋ na zaa naŋ be a nɔbinnaa puliŋ, nyɛ la ŋmɛ-eŋ, bonzuiŋ, ba ŋmaa la biŋ: “Ŋmɛeŋ sobɔ la a neɛ na naŋ ba kyãã tuuro a sobiri zaa ba naŋ ŋmaa biŋ a Nɔbinna Gan poɔ.” ¹¹ A sãã la kperaa lɛ ka, Naaŋmen niŋe soɔ, neɛ zaa kon waa yeltori sobɔ a yi a nɔbinnaa zie, bonso, “A yeltori deme na voorɔ la a sagdeu zuiŋ.” ¹² A nɔbinnaa ba yi a sagdeu zie, kyɛ “A neɛ na naŋ maŋ erɛ ama taaba na voorɔ la a eŋɛ.” ¹³ Kristo da leɛ yɔɔ de te la a yi a ŋmɛ-eŋ naŋ be a nɔbinnaa poɔ, a O naŋ wa de ŋmɛ-eŋ Omeŋɛ a te zuiŋ. Bonso, a ŋmaa la biŋ: “Ŋmɛ-eŋ be la neɛ na naŋ yagle teɛ zu zie.” ¹⁴ O da leɛ yɔɔ de te la ka Abraham maaloo na tõɔ̃ wa la a Tendaa deme zie a Yesu Kristo zuiŋ, kyɛ ka tenee meŋ na tõɔ̃ nyɛ a Seɛ polloo a sagdeu zuiŋ. ¹⁵ Yɔɔmine, N yeli la a na nensaala naŋ maŋ yeli. Ka nobɔ taa nɔlaŋ ba naŋ maale biŋ, neɛ zaa kon tõɔ̃ de ka o ba e bonzaa, bee la eŋ bon zaa a o poɔ. ¹⁶ Naaŋmen da polle la ko Abraham ne o bie. O da ba yeli “a ko o bibiiri,” a wuli ka nobɔ yaga, kyɛ o da yeli la nembonyenaa yɛlɛ, “a ko fo bie,” naŋ e Kristo. ¹⁷ A ŋaa la ka N yeli: A nɔlaŋ na Naaŋmen naŋ da maale biŋ a Kristo eŋɛ, a nɔbinnaa naŋ da tu o puoriŋ a yuomo kɔɔr anaare ne lezɛr ne pie, kon tõɔ̃ iri a nɔlaŋ ŋa bare, ka o na e ka a polloo ba taa faŋa zaa. ¹⁸ Bonso, ka a gbandiruu wa yi a nɔbinnaa poɔ, o ba la yi a polloo poɔ; kyɛ Naaŋmen da de o la ko Abraham a yi a polloo poɔ. ¹⁹ A lɛ poɔ, a nɔbinnaa tɔnɔ la boŋ? A nɔkondeu zuiŋ la ka a wa poɔ a poɔ, a te ta ka a Bie na ba naŋ polle wa te wa. Malkere da tere la noɔre ka a nɔbinnaa wa dikyeenɛ nu poɔ. ²⁰ Kyɛ dikyeenɛ ba are nembonyena zie, kyɛ Naaŋmen e la bonyena. ²¹ A lɛ poɔ, a nɔbinnaa are kyaare ne la a Naaŋmen polloo bee? A kon bɔŋ e lɛ zaa. Bonso, ka ba naŋ da tere noɔre naŋ na tõɔ̃ tere nyɔvore, yeltoruŋ na sereŋ yi la a nɔbinnaa zie. ²² Kyɛ a Ŋmaabo pigi la nobɔ zaa eŋ a yelbebe puli poɔ, ka Naaŋmen na tõɔ̃ ko a balaŋ naŋ sage de a polloo naŋ yi a Yesu Kristo sagdeu poɔ. ²³ Kyɛ a sagdeu naŋ da ba wa sɛre, ba da gu te la a nɔbinnaa puliŋ, a pigi te a te ta a saŋ na a sagdeu naŋ sãã. ²⁴ A lɛ poɔ, a nɔbinnaa da waa la te kaakaara na naŋ taa te wa ne a Kristo zie, ka te tõɔ̃ waa yeltori deme a sagdeu zuiŋ. ²⁵ Kyɛ a sagdeu naŋ da wa, te ba la be a kaakaara puli poɔ. ²⁶ Bonso, yɛ zaa waa la Naaŋmen biiri a Yesu Kristo sagdeu zuiŋ. ²⁷ Yɛ balaŋ zaa naŋ de suobu a Kristo eŋɛ, da de la Kristo a su. ²⁸ Gyu bee Grik kyebe, gbaŋgbaa bee nenweɛlɛ kyebe, dɔɔ bee pɔgɔ meŋ kyebe, bonso, yɛ zaa waa la bonyena a Kristo Yesu eŋɛ. ²⁹ Kyɛ ka yɛnee be Kristo zie, yɛ waa la Abraham biiri, ane gbandirebe a seŋ a polloo.

¹ Pampana ŋa N yeli la ka a gbandire naŋ kyãã e bibile, o ba e tɛɛtɛɛ ne gbaŋgbaa, kyɛ ne lɛ zaa, o e la a yiri daŋna. ² O be la kaakaareba ane yikaareba puliŋ kyɛ gu a saŋ na o saa naŋ biŋ. ³ A lɛ poɔ meŋ, te naŋ da e bibiiri, te da e la gbaŋgbaare a donɛɛ yɛlɛ zaa poɔ. ⁴ Kyɛ a saŋ naŋ wa ta, Naaŋmen toŋ la O Bidɔɔ, pɔgɔ naŋ dɔge a nɔbinnaa puliŋ, ⁵ ka O leɛ yɔɔ de balaŋ naŋ be a nɔbinnaa puliŋ, ka te na tõɔ̃ kpɛ O bidɔɔloŋ poɔ. ⁶ A yɛnee naŋ e bidɔbɔ, Naaŋmen da tere la a O Bidɔɔ Seɛ ka O wa kpɛ a yɛ sukyie poore, ka O boɔle, “Abba, Saa.” ⁷ A lɛ poɔ, fo ba la e gbaŋgbaa, kyɛ bidɔɔ la fo. Kyɛ fo naŋ waa bidɔɔ, fo pãã waa la gbandire Naaŋmen zie, a Kristo zuiŋ. ⁸ Kyɛ a saŋ na yɛ naŋ da ba bɔŋ Naaŋmen, yɛ da toŋ la gbaŋgbaa tomɔ ko balaŋ naŋ ba e ŋmemɛ meŋɛ. ⁹ Kyɛ pampana ŋa, yɛ naŋ bɔŋ Naaŋmen, bee ka Naaŋmen naŋ bɔŋ yɛ, wolɔ la ka yɛ la leɛrɛ tuuro a naŋ yɛlɛ naŋ ba taa faŋ zaa? Yɛ boɔrɔ la ka yɛ leɛ kpɛ a gbaŋgbaaloŋ poɔ bee? ¹⁰ Yɛ maŋ tuuro la bebie, kyuuri, saŋ mine ane yuomo mine. ¹¹ N zoro la dambẽɛ̃ korɔ yɛ ka kaapɔge, a tomɔ N naŋ toŋ yɛ zie kon taa tɔnɔ. ¹² Yɔɔmine, N sɔrɔ yɛ la ka yɛ waa n waabo, bonzuiŋ, N meŋ waa la yɛ waabo. Yɛ da ba saŋ ma yɛlɛ zaa poɔ. ¹³ Kyɛ yɛ bɔŋ la ka eŋgan baaloŋ poɔ la ka N daŋ kanne a yelnoore a ko yɛ. ¹⁴ Yɛ meŋ da ba de ka N ba e bon zaa bee zagre ma bare a n eŋganoŋ gyennoo zuiŋ, kyɛ yɛ tuori ma la a seŋ Naaŋmen malke kaŋ, a na Kristo Yesu meŋɛ. ¹⁵ Boŋ pãã la a yɛ maaloo? Bonso, N di la danseɛ ko yɛ, ka yɛnee da naa tõɔ̃ e lɛ, yɛ da naa `loori la yɛmenne nimie a de ko ma. ¹⁶ N pãã leɛ waa la yɛ dɔndɔmɔ, ne N naŋ yeli yelmeŋɛ ko yɛ bee? ¹⁷ A nimizeɛ ba naŋ taa yɛ zie ba e vela. Ba boɔrɔ la ka ba vare yɛ a te poɔ ka yɛ na tõɔ̃ taa nimizeɛ a ba zie. ¹⁸ A e la velaa ka yɛ taa nimizeɛ a yelvelaa poɔ, ka a ba e a saŋ na yoŋ N naŋ be a yɛ zie. ¹⁹ N bibilii, yɛnee eŋɛ la ka N nyɛ dɔgebo woore kyɛ gu ka yɛ waa na Kristo waaloŋ. ²⁰ N sereŋ boɔrɔ la ka N be a yɛ zie pampana ŋa kyɛ leɛ n kɔkɔre, bonzuiŋ, N bonnɔ la a yɛnee zuiŋ. ²¹ Yɛ yeli ko ma, a yɛ balaŋ naŋ boɔrɔ ka yɛ be a nɔbinnaa puliŋ, yɛ ba woŋ a nɔbinnaa bee? ²² Bonso, a ŋmaa la biŋ ka Abraham da taa la bidɔbɔ bayi, ka kaŋ waa pogle gbaŋgbaa bidɔɔ, kyɛ ka kaŋ meŋ waa pɔɔweɛlɛ bidɔɔ. ²³ Kyɛ a onɔ a pogle gbaŋgbaa naŋ dɔge, o da dɔge o la a eŋganoŋ eŋɛ, kyɛ a onɔ a pɔɔweɛlɛ naŋ dɔge, o dɔge o la a polloo eŋɛ. ²⁴ A yɛlɛ ama e la manno kaŋa, bonso, a pɔgɔbɔ bama e la nɔlaŋne ayi. Kaŋ yi la a Sinai taŋ zu a dɔgrɔ biiri gbaŋgbaaloŋ eŋɛ. Onɔ la Hagar. ²⁵ Bonso, Hagar la a Sinai taŋ a Arabia poɔ, kyɛ meŋ e a pampana ŋa saŋ Gyɛrosalɛm naŋ be gbaŋgbaaloŋ poɔ laŋ ne o bibiiri. ²⁶ Kyɛ a Gyɛrosalɛm naŋ be a sazu e la weɛlɛ, kyɛ la e te zaa ma. ²⁷ Bonso, a ŋmaa la biŋ: “Dire noɔ, pɔɔ-aan naŋ ba dɔgrɔ bie; vare iri kyɛ ŋmɛ kpɛlle, fõõ naŋ ba nyɛ dɔgebo woore; bonzuiŋ a pɔɔkoɔre bibiiri waa la yaga gaŋ kaŋ naŋ taa serɛ.” ²⁸ Kyɛ tenee, yɔɔmine, a na Isaak, e la a polloo bibiiri. ²⁹ A lɛ a onɔ ba naŋ dɔge a eŋganoŋ eŋɛ naŋ da dɔgre a onɔ ba naŋ dɔge a Seɛ eŋɛ, lɛ meŋ la ka a waa pampana ŋa. ³⁰ Kyɛ boŋ la ka a Ŋmaabo yeli? “Digi a pogle gbaŋgbaa ne o bie bare, bonso, a pogle gbaŋgbaa bidɔɔ kon bɔŋ di gbannoŋ ane a pɔɔweɛlɛ bidɔɔ.” ³¹ A lɛ poɔ, yɔɔmine, te ba e a pogle gbaŋgbaa bibiiri, kyɛ e a pɔɔweɛlɛ bibiiri.

¹ A lɛ poɔ, yɛ are gbeŋgbeŋ a weɛloŋ na poɔ yɛ naŋ da nyɛ Kristo zie, kyɛ ta la vɛŋ ka gbaŋgbaa dakyara kpɛ yɛ kɔkɔe eŋɛ. ² Kyɛllɛ. Maa Pɔl yeli ko yɛ la, ka yɛnee wa ŋmaa yɛ yɔe, Kristo kon taa tɔnɔ yɛ zie togtogi. ³ Kyɛ N leɛ di la danseɛ ko nensaala kaŋ zaa naŋ ŋmaa o yoɔre, ka a fere la ka o tuuro a nɔbinna sobiri zaa. ⁴ Kristo ba taa tɔnɔ ko yɛnee naŋ waa yeltori deme a nɔbinna sobiri eŋɛ; yɛ le la yi a nɔndetero sobiri poɔ. ⁵ Bonso, a yi a Seɛ zie la ka te kyɛllɛ a gu a yeltoruŋ ne kyelloo a sagdeu zuiŋ. ⁶ Bonso, a Yesu Kristo poɔ la, ka yɔ-ŋmaa ane yɔ-ba-ŋmaa zaa ayi ba taa faŋ, kyɛ sagdeu naŋ tonɔ nɔmmo zuiŋ la. ⁷ Yɛ da zoro la zoobu velaa. Aŋ la ŋmaa yɛ sobiri ka yɛ ba eŋnɛ a yelmeŋɛ? ⁸ A mɔgloo ŋa ba yi a neɛ na naŋ boɔle yɛ zie. ⁹ “Belɛ belaŋ maŋ yɛre paale la a boroboro kare zaa poɔ.” ¹⁰ A yi a Daŋna zie la ka N taa sagebo ka yɛ kon leɛ de teɛroŋ yuo zaa. A neɛ na naŋ dɔɔnɔ yɛ na nyɛ la o sɛrɛɛ diu ka onɔ waa lɛnɛɛ zaa. ¹¹ Kyɛ yɔɔmine, ka Maa kyãã kanna a yɔ-ŋmaa kannoo, boŋ la so ka N kyãã nyɛrɛ dɔgroŋ? Ka lɛ la, a bɛraa a dagara naŋ taa ba la erɛ bon zaa. ¹² N da naa boɔrɔ la ka balaŋ naŋ dɔɔnɔ yɛ, ka ba vare bamenne. ¹³ Bonso, yɔɔmine, ba da boɔle yɛ la ka yɛ kpɛ weɛloŋ. Kyɛ yɛ ta de a yɛ weɛloŋ ka a waa vuo ka yɛ tu a eŋganoŋ sobiri, kyɛ yɛ soŋnɔ taaba ne nɔmmo. ¹⁴ Bonso, a nɔbinnaa zaa laŋ la taa yelbiyenaa poɔ: “Nɔnɔ fo laŋkpeɛrɛ seŋ fomeŋɛ.” ¹⁵ Kyɛ ka yɛnee donɔ taa, bee nyɔgra taa vɔlɔ, yɛ kaara velaa ka yɛ ta saŋna taaba. ¹⁶ A lɛ ka N pãã yeli: Yɛ tuuro a Seɛ sobiri poɔ, kyɛ yɛ kon bɔŋ la tu a eŋgan boɔbo sobiri. ¹⁷ A te eŋgan boɔbo kyaare ne la a Seɛ, kyɛ ka a Seɛ kyaare ne a eŋgan. A ama maŋ kyaare la taa ka yɛ kon tõɔ̃ e lɛ zaa yɛ naŋ boɔrɔ. ¹⁸ Kyɛ ka a Seɛ wa tage yɛ wa ne, yɛ ba be a nɔbinnaa puliŋ. ¹⁹ Kyɛ a eŋganoŋ tomɔ sãã la. Ama la peɛmo tomɔ, pẽɛ̃pẽɛ̃ tonfaare, tondɛgre, ne potuoluŋ, ²⁰ tebɛ puoruu, soɔloŋ, dɔŋ, nɔkpeɛne, nyuuri, sutoloŋ, wɛloo, zɔɔre, teɛroŋ dendemɛ, ²¹ kyiiru, neŋko, dããkuoluu, gɔmpɔge ane a yɛlɛ ama taaba naŋ bebe. N yeli ko yɛ la lɛ N naŋ da yeli, ka balaŋ naŋ erɛ a ama taaba kon di a Naaŋmen naaloŋ gbannoŋ. ²² Kyɛ a Seɛ wɔmɔ la nɔmmo, popeɛloŋ, `maaroŋ, kannyiri, nimibaaloŋ, eveɛle, sagdeu, ²³ sebaaloŋ, ne fomeŋɛ taabo. Nɔbinnaa zaa kyebe naŋ kyaare ne a ama taaba. ²⁴ Balaŋ naŋ e a Kristo soobo kpa la a eŋganoŋ a dagara zu laŋ ne o poteɛroŋ ne o boɔbo faare. ²⁵ Ka tenee wa voorɔ a Seɛ eŋɛ, vɛŋ ka te meŋ tuuro a Seɛ sobiri. ²⁶ Yɛ ta vɛŋ ka te maŋ boɔrɔ eŋno zagla, ka yɛ erɛ suuri ne nyuuri korɔ taaba.

¹ Yɔɔmine, ka neɛ wa faa le a gbɛr-ŋmeɛbo zuiŋ, yɛnee naŋ taa seɛloŋ yɛŋ, yɛ maale a neɛ ŋa tɔ ne sebaaloŋ ka o leɛ are. Kyɛ yɛ kaara yɛmenne velaa, ka lɛ naane, yɛ meŋ na kpɛ la gyennoo poɔ. ² Yɛ soŋ tuo tuori ko taaba; lɛ la ka yɛ na tu a Kristo nɔbinna sobiri zaa. ³ Bonso ka neɛ kaŋ zaa wa teɛre ka o e la bon kaŋ, kyɛ ka o ba e bon zaa, o bɛllɛ la omeŋɛ. ⁴ Kyɛ yɛ vɛŋ ka neɛ zaa gyɛle omeŋɛ tomɔ. Lɛ ka o na tõɔ̃ pãã fuuro omeŋɛ yoŋ zie, ka a ba e nen-yuo zie, ⁵ bonso, a seŋ ka neɛ kaŋ zaa tuo omeŋɛ tuori. ⁶ Yɛ vɛŋ ka neɛ na zaa naŋ dere wuluu a yelbiri poɔ, ka o poŋ bonveɛle zaa ane o wuliwullo. ⁷ Ta vɛŋ ka bɛlloo kpɛ yɛ. Naaŋmen ba e bonlaara. Bonso, a bon na neɛ naŋ bore, onɔ la ka o meŋ na kyɛ. ⁸ Onɔ naŋ bore o eŋgan zie, na kyɛ la saŋnaa a eŋganoŋ zie. Kyɛ onɔ naŋ bore a Seɛ zie, na kyɛ la nyɔvore naŋ kon bɔŋ baare a Seɛ zie. ⁹ Yɛ ta vɛŋ ka te bale a te eveɛle eroŋ poɔ, bonso, a saŋ kaŋ naŋ seŋ, te na kyɛ la a te bombore ka tenee ba bale. ¹⁰ A lɛ poɔ, lɛ te naŋ taa vuo, vɛŋ ka te e eveɛle ko nobɔ zaa, a sereŋ seŋ na a balaŋ naŋ poɔ a sagdeu yideme poɔ. ¹¹ Yɛ nyɛ a yelbir bibɛrɛ N naŋ ŋmaa ko yɛ ne mmeŋɛ nu! ¹² Balaŋ naŋ boɔrɔ ka ba wuli bamenne a eŋganoŋ poɔ, ba maŋ fere yɛ la ka yɛ ŋmaa yɛ yɔe. Ba e la lɛ bonzuiŋ ba ba boɔrɔ ka ba nyɛ dɔgroŋ a Kristo dagara zuiŋ. ¹³ Bonso, balaŋ naŋ ŋmaa ba yɔe, bamenne ba eŋnɛ a nɔbinnaa, kyɛ ba boɔrɔ ka yɛ ŋmaa yɛ yɔe ka ba na tõɔ̃ fuuro a yɛ eŋganoŋ eŋɛ. ¹⁴ Kyɛ maa zie, a kon bɔŋ e ka N fuuro, ka a te Daŋna Yesu Kristo dagara eŋɛ naane. O eŋɛ la ka N kpa a donɛɛ a dagara zu, kyɛ ka N meŋ kpa mmeŋɛ a dagara zu ka N kpi ko a donɛɛ. ¹⁵ Bonso, a ba e yɔ-ŋmaabo bee yɔ-ba-ŋmaabo naŋ taa faŋ Kristo Yesu poɔ, kyɛ a bon-ira paala la. ¹⁶ Ka `maaroŋ ane nyonono be balaŋ na zaa naŋ tuuro a noɔre ŋa zie ne a Israel naŋ e Naaŋmen soobo. <sup>17</sup> A baaraa, ta vɛŋ ka neɛ kaŋ zaa wa dɔgre ma, bonzuiŋ, N taa la a Daŋna Yesu `lego a n eŋgan eŋɛ. ¹⁸ Yɔɔmine, ka a te Daŋna Yesu Kristo nɔndeteroo be a yɛ seere zie. Amen.