ƐFƐSOS

¹ Pɔl, naŋ waa a Yesu Kristo potuuro a Naaŋmen boɔbo poɔ, A ko a Ŋmendeme naŋ be Ɛfɛsos poɔ, naŋ sage de Kristo Yesu: ² Nɔndeteroo ane `maaroŋ be yɛ zie ka a yi a te Saa Naaŋmen ane te Daŋna Yesu Kristo zie. ³ Pugibu be la Naaŋmen ane te Daŋna Yesu Kristo Saa naŋ maale te ne yelbisonne ane a seɛloŋ yelsonne zaa a sazu tenvelaa poɔ, a Kristo eŋɛ. ⁴ O daŋ iri te la Omeŋɛ eŋɛ, kyɛ ka a donɛɛ pare bɔŋ biŋ, ka te tõɔ̃ waa kyerete deme kyɛ ba taa yelsaŋnaa zaa O niŋe soɔ. A nɔmmo eŋɛ, ⁵ O daŋ nare biŋ la ka O eŋ te a Omeŋɛ bidɔɔloŋ poɔ a yi Yesu Kristo zie, ka a seŋ O popeɛloŋ boɔbo— ⁶ ka a na wa ne pugibu a O nɔndeteroo eŋno zie. A nɔndeteroo ŋa poɔ, te nyɛ la maaloo yaga, a Neɛ O naŋ nɔŋ eŋɛ. ⁷ O eŋɛ la ka te taa leɛyɔɔ- de faabo a yi a O zẽẽ poɔ, a yelbebe suuri diu, ka a seŋ a O nɔndeteroo bonveɛle zaa ⁸ O naŋ ko te ka a zuo, a yɛŋ ne bɔmmo zaa poɔ. ⁹ O da vɛŋ la ka te bɔŋ O boɔbo yelsɔglaa, a te seŋ na O popeɛloŋ boɔbo naŋ yi Omeŋɛ teɛroŋ poɔ, ¹⁰ ka a saŋ wa ta, O na tõɔ̃ kaara la ama zaa a tõɔ̃ laŋ boma zaa taa Kristo poɔ. Boma naŋ be tenvelaa poɔ ne boma naŋ be teŋɛ zu, na laŋ la taa a O poɔ. ¹¹ O eŋɛ la, ka te meŋ nyɛ gbannoŋ, a gbannoŋ O naŋ da iri biŋ ka te nyɛ, a seŋ O teɛroŋ O naŋ maale biŋ. Onɔ la a neɛ naŋ erɛ bon zaa a seŋ na Omeŋɛ poteɛroŋ boɔbo. ¹² O maale la ama zaa biŋ ka tenee naŋ da de wẽɛ̃ a sage de Kristo, na wa ne pugibu a O eŋno zuiŋ. ¹³ Yɛ meŋ da poɔ la Kristo poɔ a saŋ na yɛ naŋ da woŋ a yelmeŋɛ yelbiri, naŋ e a yɛ faabo yelnoore. Yɛ naŋ da sage baare, yɛ meŋ da nyɛ la a Sekyerete, Naaŋmen naŋ polle, `lego. ¹⁴ A Sekyerete e la te gbannoŋ sane dandaŋ sobɔ, kyɛ gu ka Naaŋmen wa leɛ yɔɔ de a bon na O naŋ daŋ da, ka O eŋno taa pugibu. ¹⁵ A lɛ zuiŋ, Maa meŋ, a N naŋ da woŋ lɛ yɛ naŋ sage de a Daŋna Yesu, ane lɛ yɛ naŋ taa nɔmmo a Ŋmendeme zaa zie, ¹⁶ N da ba bare ka N puori Naaŋmen bareka a yɛ zuiŋ kyɛ teɛre yɛ yɛlɛ n puoruu poɔ. ¹⁷ N maŋ puoro la ka a te Daŋna Yesu Kristo Naaŋmen, a Saa naŋ taa eŋno, ka O ko yɛ a seɛ naŋ taa yɛŋ ane sããbo a O bɔmmo poɔ. ¹⁸ N meŋ puoro la ka yɛ teɛroŋ nimie yuo, ka yɛ na tõɔ̃ bɔŋ a kyelloo na O boɔloo naŋ wa ne, ane O gbannoŋ eŋno bonveɛle na naŋ be a Ŋmendeme poɔ, ¹⁹ ane a O faŋ kponnuŋ na naŋ zuo a tenee naŋ sage de zie, ka a seŋ na a O kpẽã naŋ taa faŋ tomɔ. ²⁰ O toŋ la a tomɔ ŋa a Kristo eŋɛ, a saŋ na O naŋ da seŋ O kuuni poɔ, a zeele O, O nudoroŋ eŋɛ a sazu tenvelaa poɔ, ²¹ ka O zuo zikaareba zaa, ne faŋ zaa, ne kpeɛŋaa zaa, ne daŋneba zaa, ane yuori na zaa ba naŋ pore, ka a ba be a pampana saŋ ŋa yoŋ, kyɛ a meŋ be la a saŋ na naŋ na wa. ²² Naaŋmen meŋ da biŋ la boma zaa O gbɛɛ puliŋ, a de sori ko O ka O waa a zusobɔ bon zaa poɔ a puoru deme zie. ²³ A puoru deme naŋ waa O eŋgan, ta la ba tao a yi Onɔ naŋ paale bon zaa boma zaa poɔ.

¹ Yɛnee dee, yɛ da kpi la gbɛrŋmeɛbo ne yelbebe poɔ. ² A poɔ la ka yɛ da kyene a donɛɛ ŋa sobiri zu, a seŋ a zikaara naŋ dire a samaluon naaloŋ, a seɛ na naŋ tonɔ tomɔ pampana ŋa a basagdeu bibiiri zie. ³ Te zaa meŋ da poɔ la ba poɔ saŋ kaŋ, a da tuuro te eŋgan boɔbo zaa, a erɛ te eŋgan ne te teɛroŋ boɔbo eroŋ. Te da waa la sutoloŋ bibiiri nendɔgre, a na nobɔ mine naŋ waa. ⁴ Kyɛ a O nɔmmo yaga O naŋ taa te zie zuiŋ, Naaŋmen, naŋ taa nyonono naŋ zuo, ⁵ maale te la ka te voorɔ ane Kristo, ne lɛ zaa te naŋ da kpi te gbɛr-ŋmeɛbo poɔ—a yi la a nɔndeteroo zie ka yɛ nyɛ faabo. ⁶ Naaŋmen meŋ da iri te la ane Kristo a zeele te ne O a sazu tenvelaa poɔ a Kristo Yesu eŋɛ, ⁷ ka a saŋ naŋ na wa, O na tõɔ̃ wuli O nɔndeteroo bonveɛle naŋ waa zuo, a O nimibaaloŋ O naŋ taa ko te poɔ, a Kristo Yesu eŋɛ. ⁸ Bonso, a nɔndeteroo zuiŋ la ka yɛ nyɛ faabo, ka a yi a sagdeu puoriŋ. Kyɛ a ba yi a yɛ zie, Naaŋmen kyɔgtaa la. ⁹ A ba yi tomɔ puoriŋ ka neɛ kaŋ zaa na fuuro. ¹⁰ Bonso, te waa la Naaŋmen bommaale O naŋ iri Kristo Yesu eŋɛ ka te na toŋ tonveɛle na Naaŋmen naŋ daŋ iri biŋ ka te toŋ. ¹¹ A lɛ poɔ, yɛ teɛre ka a da waa la ka yɛnee naŋ e Tendaa deme nendɔgre, balaŋ naŋ da ŋmaa ba yɔe (ne a eŋgan ŋmaabo ba naŋ e ne nu) maŋ da boɔle yɛ la ka yɔba- ŋmaara deme. ¹² Yɛ teɛre ka a lɛ saŋ yɛ da ba laŋ ne Kristo, a ba poɔ a Israel deme poɔ, kyɛ pãã e saama a nɔlaŋ polloo poɔ, a da ba taa kyelloo bee Naaŋmen a donɛɛ poɔ. ¹³ Kyɛ pampana ŋa, a Kristo Yesu eŋɛ, yɛnee naŋ da be tɔɔre saŋ kaŋ, peɛle la, a Kristo zẽẽ zuiŋ. ¹⁴ Bonso, Onɔ la te `maaroŋ. Onɔ la vɛŋ ka a bayi waa bonyena, a ŋmɛre a dankyen naŋ wɛle te ziiri ayi bare, ¹⁵ O naŋ e, a O eŋgan poɔ, ka a dɔŋ ba la e bon zaa laŋ ne a nɔe-teroo naŋ be a noɔre ba naŋ maale biŋ poɔ. O e la lɛ ka O de nobɔ bayi a maale nempaala yenaa Omeŋɛ poɔ, ka a lɛ pãã maale `maaroŋ, ¹⁶ ka O na tõɔ̃ maale, eŋgan yenaa poɔ, ba bayi ka ba leɛ laŋ taa ne Naaŋmen, a yi a dagara zie, a zie na O naŋ da ko a dɔŋ. ¹⁷ O da wa kanne la `maaroŋ kannoo ko yɛnee naŋ be tɔɔre ane balaŋ naŋ peɛle. ¹⁸ A O zuiŋ la ka te zaa bayi taa sori, a Seɛ yenaa poɔ, ka te wa a Saa zie. ¹⁹ Lɛ la ka yɛ ba la e saama bee zitɔɔre deme, kyɛ yɛ e la teŋ bonyenaa deme ne a Ŋmendeme ne balaŋ naŋ poɔ Naaŋmen yideme poɔ. ²⁰ Ba mɛ yɛ la kyogi ne a potuuribo ane a Ŋmen-noɔr deme dankyen pare, ka Yesu Kristo Omeŋɛ e a goŋgonaa kuuri. ²¹ O eŋɛ la ka a meɛbo zaa nyɔge taa te do ka o waa Ŋmendikyerete a Daŋna poɔ. ²² O eŋɛ la ka yɛ meŋ mɛ nyɔge taa ka yɛ waa Naaŋmen kpeɛbo zie kaŋ a yi a Seɛ zie.

¹ A lɛ la ka Maa, Pɔl, e a Kristo Yesu nempigraa a yɛnee Tendaa deme zuiŋ. ² Yɛ woŋ la ka Naaŋmen da iri ma la ka N waa O nɔndeteroo kaara yɛ zie, ³ lɛ a naŋ da yi a sããbo zie ka O vɛŋ ka N bɔŋ a yelsɔglaa, a seŋ lɛ N naŋ da ŋmaa ko yɛ fẽẽ lɛ. ⁴ Ka yɛnee wa kanne n ŋmaabo, yɛ na tõɔ̃ bɔŋ la lɛ N naŋ da bɔŋ a Kristo yelsɔglaa tɛgɛ. ⁵ A saŋ na zaa naŋ tɔle, O da ba vɛŋ ka nensaala bidɔbɔ tõɔ̃ bɔŋ a ŋaa tɛgɛ, a na O naŋ vɛŋ pampana ŋa ka a tɛgɛ sãã a O potuuribo kyerete ane a O noɔr deme zie a Seɛ eŋɛ. ⁶ A yelsɔglaa ŋa la, ka a Tendaa deme na e la te gbanditaaba, a laŋ ne te eŋgan bonyenaa poɔ, a la e a O polloo, naŋ be Kristo poɔ, pontaaba a yi a yelnoore zie. ⁷ N da waa la a yelnoore ŋa tontonɔ, a seŋ na a Naaŋmen nɔndeteroo kyɔgtaa O naŋ ko ma ka a tuuro O faŋ tomɔ eŋɛ. ⁸ Ne a lɛ zaa N naŋ e bile a Ŋmendeme poɔ, O da de la a nɔndeteroo ŋa ko ma ka N kanne, a Tendaa deme poɔ, a Kristo bonveɛle na kaŋ zaa naŋ kon tõɔ̃ bɔ nyɛ. ⁹ O meŋ da de la a nɔndeteroo ŋa ko ma ka N wuli neɛ zaa a yelsɔglaa ŋa lantaaloŋ. A da yi la a piiluu saŋ kyɛ gɛrɛ, ka Naaŋmen, naŋ iri boma zaa a yi Yesu Kristo zie, da sɔgle a yelsɔglaa ŋa Omeŋɛ eŋɛ. ¹⁰ O e la lɛ ka, pampana ŋa, a zikaareba ne faŋa zaa naŋ be sazu poɔ, na tõɔ̃ bɔŋ a Naaŋmen yɛŋ pare zaa a yi a puoru deme zie, ¹¹ a seŋ lɛ O naŋ da nare biŋ koroŋ, a te Daŋna Yesu Kristo eŋɛ. ¹² Yesu Kristo poɔ la ka te taa sori ka te ta Naaŋmen zie kperaa lɛ ne kyelloo, a yi a sagdeu te naŋ taa O zie. ¹³ A lɛ poɔ, N sɔrɔ yɛ la ka yɛ ta bare kyelloo ne a woore N naŋ nyɛrɛ yɛ zuiŋ, a woore naŋ na wa ne yɛ eŋno. ¹⁴ A lɛ zuiŋ, N gbi la dumo a te Daŋna Yesu Kristo Saa niŋe. ¹⁵ O zie la ka a yideme zaa, a tenvelaa ane a teŋɛ zu, nyɛ ba yuori. ¹⁶ N puoro la ka O de faŋ ko yɛ ka yɛ taa kpẽã a yɛ poore poɔ, a yi O Seɛ zie, ka a seŋ O eŋno bontaroŋ, ¹⁷ ka Kristo na tõɔ̃ kpeɛrɛ yɛ sukyie poore a yi a sagdeu zie. N meŋ puoro la ka yɛnee, naŋ are gbeŋgbeŋ nɔmmo poɔ, ¹⁸ yɛnee ne a Ŋmendeme zaa, na tõɔ̃ nyɛ a nɔmmo yɛloŋ, wogruŋ, sigruŋ ane o duobu, ¹⁹ kyɛ bɔŋ a Kristo nɔmmo ŋa, naŋ zuo bɔmmo zaa, ka yɛ na tõɔ̃ paale yɛ zaa lɛ Naaŋmen naŋ paale. ²⁰ Pampana ŋa, a ko Onɔ naŋ tõɔ̃ toŋ gaŋ lɛ te naŋ na soore bee teɛre, a seŋ a faŋ na naŋ tonɔ te eŋɛ, ²¹ ka eŋno be O zie a puoru deme poɔ, a yi a Kristo Yesu zie, saŋ na zaa naŋ waara, tegteglɛ. Amen.

¹ N naŋ pãã e a Daŋna nempigraa, N sɔrɔ yɛ la ka yɛ kyene seŋ a boɔloo yɛ naŋ taa. ² Yɛ kyene ne yɛmenne sigruŋ ne sebaaloŋ, kyɛ taa kannyiri, a dire kannyiri korɔ taaba a nɔmmo eŋɛ. ³ Yɛ e aneɛ a gu a Seɛ teɛro yenaa ane a nyɔgtaaloŋ yɛ naŋ taa a `maaroŋ poɔ. ⁴ Eŋgan yenaa yoŋ la bebe, ane Seɛ yenaa—a na ba meŋ naŋ da boɔle yɛ a boɔlo kyello bonyenaa poɔ— ⁵ a Daŋna yenaa, sagdeu yenaa, suobu yenaa, ⁶ ane Naaŋmen yenaa naŋ e te zaa Saa naŋ zuo bon zaa. Bon zaa yi la O zie, ka O meŋ poɔ te zaa poɔ. ⁷ Kyɛ a te kaŋ zaa zie, O ko te la nɔndeteroo a seŋ a Kristo kyɔgtaa O naŋ poŋ ko te. ⁸ A ŋaa la so ka O yeli: “O naŋ da do a sazu, O da tagra la nempigri a O puoriŋ kyɛ terɛ nensaaleba kyɔgtaare.” ⁹ (Ka Onɔ do sazu, a tɛgɛ la boŋ? A ba wuli ka O meŋ da de la wẽɛ̃ sigi kpɛ a teŋɛ pare, bee? ¹⁰ A Onɔ naŋ sigi meŋ waa la a neɛ na sobɔ naŋ da do yaga gaŋ a sazu zaa, ka O na tõɔ̃ e ka bon zaa paale.) ¹¹ O tere la ba mine ka ba e potuuribo, ka ba mine e Ŋmennoɔr deme, ka ba mine e yelnoore kaŋkanneba, ka ba mine meŋ e kyeenɛbɛ ne wuliwullibo, ¹² ka ba e ka a Ŋmendeme na e sere ka ba na tõɔ̃ toŋ a tomɔ, ka a Kristo eŋgan na nyɛ mɛduoruu ¹³ a gu ka te zaa taa teɛro yenaa a sagdeu ane a Naaŋmen Bidɔɔ bɔmmo poɔ, kyɛ waa a na nobɔ naŋ baa baare, a ta lɛ Kristo naŋ ta, a paale lɛ Kristo meŋ naŋ paale. ¹⁴ A lɛ poɔ, te kon waa bibilii ka ba maŋ tõɔ̃ daara te puori bee niŋe, ka wuluu yelbir kaŋ zaa meŋ na da te gaa ne a na sɛseɛ naŋ maŋ da boma. A wuluu ŋa maŋ yi la a nensaala yɛŋ na ba naŋ maŋ bɛllɛ nobɔ ne, a seŋ lɛ ba naŋ nare biŋ. ¹⁵ Kyɛ te naŋ yele a yelmeŋɛ ne nɔmmo, te na tõɔ̃ baa do la yɛlɛ zaa poɔ a Kristo eŋɛ, Onɔ naŋ e a Zu. ¹⁶ A yi la O zie ka a eŋgan zaa, naŋ maŋ kyɔge taa zie kaŋ zaa ne a nyɔgtaaloŋ a gyiile naŋ maŋ wa ne, na tõɔ̃ baara a meɛrɛ duoro omeŋɛ nɔmmo poɔ, a seŋ lɛ a eŋgan zie kaŋ zaa naŋ tonɔ o tomɔ. ¹⁷ A ŋaa zuiŋ la ka N na yele kyɛ dire danseɛ a Daŋna poɔ, ka yɛ ta la kyene a na Tendaa deme mine ne ba teɛroŋ naŋ ba taa tɔnɔ. ¹⁸ Ba teɛroŋ be la lige poɔ. Ba ŋmaa ba la bare ka ba yi a Naaŋmen vooroŋ poɔ a ba babɔmmo ne a ba zukpeɛne zuiŋ. ¹⁹ Ba naŋ ba taa vi zaa, ba da de la bamenne ko yelbe-eroŋ ka ba toŋ gbogbo tondɛgre. ²⁰ Kyɛ yɛnee, a ŋaa naane ka yɛ da zanne a Kristo yɛlɛ. ²¹ Yɛ sereŋ woŋ la O yɛlɛ a nyɛ wuluu a O eŋɛ, a seŋ ne a yelmeŋɛ naŋ be Yesu poɔ. ²² Ba wuli yɛ la ne lɛ yɛ naŋ da waa, ka yɛ de a yɛ neŋkore, naŋ e bonsaŋnaa a seŋ na o bɛlloo boɔbo, a yaa bare; ²³ ka yɛ leɛ waa nempaala a yɛ poteɛroŋ poɔ; ²⁴ ka yɛ meŋ leɛ de a nempaala a su, a nempaala ba naŋ maale a na Naaŋmen, a yeltoruŋ ne yelkyerete meŋɛ poɔ. ²⁵ A lɛ poɔ, yɛ bare ziri-ŋmaa kyɛ vɛŋ ka neɛ kaŋ zaa maŋ yeli yelmeŋɛ ko o tasobɔ, bonso te zaa so la taaba. ²⁶ A yɛ suuri poɔ, ta e yelbieri. Ta vɛŋ ka a ŋmenaa kpɛ kyɛ ka yɛ naŋ taa suuri. ²⁷ Ta ko a dɛvel vuo zaa. ²⁸ Ta vɛŋ ka a neɛ naŋ da zuuro, ka o leɛ zu zaa, kyɛ vɛŋ ka o toŋ, a tonɔ tonvela kaŋ ane o nuuri ka o na tõɔ̃ nyɛ bon kaŋ a poŋ ne neɛ naŋ taa naŋ. ²⁹ Ta vɛŋ ka yelbipoɔne zaa yi yɛ noɔre poɔ, kyɛ yelbiveɛle yoŋ naŋ na tõɔ̃ wa ne mɛduoruu naŋ seŋ, ka a tõɔ̃ de nɔndeteroo a ko balaŋ naŋ woŋ. ³⁰ Kyɛ yɛ ta saŋ a Naaŋmen Sekyerete poɔ. A yi O zie ka yɛ nyɛ `lego kyɛ gu a leɛ-yɔɔ-deu daare. ³¹ Vɛŋ ka potuoluŋ ane sutoloŋ ne suuri ne gɔmpɔge ne yelbifaare zaa yi yɛ zie, laŋ ne faaloŋ zaa. ³² Yɛ taa nimibaaloŋ ko taaba, a maŋ zoro nembaaloŋ kyɛ dire suuri korɔ taaba a na Naaŋmen naŋ da di suuri ko yɛ a Kristo poɔ.

¹ A lɛ poɔ, yɛ tɔglɔ Naaŋmen a na binɔnnee ² kyɛ kyene nɔmmo poɔ, a na lɛ Kristo naŋ meŋ da nɔŋ te a de Omeŋɛ ka O waa kyeɛroo ne bɔɔre ko Naaŋmen a te zuiŋ, ka a waa na bon na naŋ nyu velaa. ³ Kyɛ a yɛ poɔ, a seŋ lɛ a Ŋmendeme naŋ waa, yɛ ta vɛŋ ka neɛ zaa tõɔ̃ yeli ka pẽɛ̃pẽɛ̃ tomɔ bee tondɛgre, bee digbogbo be la yɛ zie. ⁴ Ta meŋ vɛŋ ka vi eroŋ, bee damboli yɛlɛ, bee deɛnfaare, ana naŋ ba seŋ, be yɛ zie. Kyɛ yɛ maŋ tere bareka puoruu. ⁵ Bonso yɛ bɔŋ la a ŋaa, ka neɛ zaa naŋ toŋ peɛmo tomɔ, bee neɛ zaa naŋ toŋ tondɛgre, bee neɛ zaa naŋ e gbogbo sobɔ—a neɛ na tɔ na e la tebɛ sobɔ—ba kaŋ zaa ba taa gbannoŋ a Kristo ne Naaŋmen naaloŋ poɔ. ⁶ Ta vɛŋ ka neɛ bɛlle yɛ ne yelbizagla, bonso, a ama taaba zuiŋ la ka Naaŋmen suuri waara a basagdeu bibiiri zie. ⁷ A lɛ poɔ, yɛ ta laŋ ne ba. ⁸ Bonso, yɛ daŋ e la lige, kyɛ pampana yɛ e la kyãã a Daŋna zie. Yɛ kyene a na kyãã bibiiri ⁹ (bonso a Seɛ wɔmɔ be la yelveɛle, ne yeltori, ne yelmeŋɛ zaa poɔ) ¹⁰ a lɛ bɔ nyɛ bon na naŋ pɛle a Daŋna poɔ. ¹¹ Yɛ ta maŋ laŋ ne tonlige naŋ ba taa tɔnɔ, kyɛ yɛ maŋ nyare a zu. ¹² A e la vi gba ka te yuo noɔre yeli a bon na ba naŋ maŋ sɔgle erɛ. ¹³ Kyɛ bon na zaa zu yɛ naŋ nyare, sãã la kyãã poɔ, bonso kyãã maŋ vɛŋ la ka bon zaa sãã. ¹⁴ Lɛ zuiŋ, O yeli la: “Iri, fõõ naŋ gbire, a iri yi kuuni poɔ, kyɛ Kristo nyegre eŋ fo.” ¹⁵ A lɛ pãã, yɛ kaara ka yɛ kyene velaa, ka yɛ ta kyene na damboli deme kyɛ a na yɛŋ deme, ¹⁶ a leɛ erɛ soŋ a saŋ na naŋ seŋ, bonzuiŋ a bebie ama e la bebifaare. ¹⁷ A lɛ poɔ, ta waa na nobɔ naŋ ba taa yɛŋ, kyɛ bɔŋ a Daŋna boɔbo. ¹⁸ Ta nyu dãã bugi, a poɔ ka bonsaŋnaa yaga maŋ be, kyɛ vɛŋ ka a Seɛ paale yɛ. ¹⁹ Yɛ yele korɔ taaba ne pugibu yieluŋ, ne Ŋmendeme yieluŋ, ne seɛloŋ yieluŋ, a yiele pugibu yieluŋ ne yɛ sukyie a korɔ a Daŋna, ²⁰ a maŋ puoro bareka a korɔ a Saa Naaŋmen saŋ zaa ne boma zaa poɔ, a te Daŋna Yesu Kristo yuori eŋɛ. ²¹ Yɛ sigri yɛmenne korɔ taaba a Naaŋmen dambẽɛ̃ poɔ. ²² Pɔgɔbɔ, yɛ sigri yɛmenne a yɛmenne serbɛ zie, a seŋ lɛ yɛ naŋ na e ko a Daŋna. ²³ A serɛ la a pɔgɔ zusobɔ a seŋ na Kristo naŋ e a puoru deme, naŋ e O eŋgan, zusobɔ kyɛ e a eŋgan na Faara. ²⁴ Na lɛ a puoru deme naŋ sigri bamenne a Kristo zie, vɛŋ ka a pɔgɔbɔ meŋ sigri bamenne ko bamenne serbɛ boma zaa poɔ. ²⁵ Serbɛ, yɛ nɔnɔ yɛ pɔgɔbɔ a seŋ lɛ Kristo meŋ naŋ nɔŋ a puoru deme a de Omeŋɛ ko ba ²⁶ ka O na tõɔ̃ iri ba biŋ, a pɛge ba ne a kõɔ̃ naŋ yi a yelbiri zie, ²⁷ ka O na tõɔ̃ de ba ko Omeŋɛ ka ba waa la puoru deme naŋ taa eŋno, naŋ ba taa zidɛgre zaa, bee nyore, bee a mine kaŋ zaa, kyɛ ka ba waa la bonkyerete naŋ ba taa zisaŋnaa zaa. ²⁸ Lɛ meŋ la ka a seŋ ka dɔbɔ nɔŋ ba pɔgɔbɔ a na ba naŋ nɔŋ bamenne eŋgama. Onɔ naŋ nɔnɔ o pɔgɔ nɔnɔ la omeŋɛ. ²⁹ Bonso, neɛ kaŋ zaa kyebe naŋ daŋ ba nɔŋ omeŋɛ eŋgan, kyɛ o maŋ guolo la a kaara o, a seŋ lɛ a Daŋna naŋ erɛ korɔ a puoru deme. ³⁰ Bonso te poɔ la a O eŋgan, ne O eŋ-nɛne, ne O kɔbɔ poɔ. ³¹ “A ŋaa zuiŋ la ka dɔɔ na bare o saa ane o ma kyɛ mare o pɔgɔ, ka ba bayi na waa eŋgan bonyena.” ³² Aŋa la yelsɔgle kpoŋ kaŋ—kyɛ Maa yele la Kristo ane a puoru deme yɛlɛ. ³³ Ne lɛ zaa, vɛŋ ka dɔɔ kaŋ zaa meŋ nɔnɔ omeŋɛ pɔgɔ a seŋ lɛ o naŋ nɔnɔ omeŋɛ, kyɛ vɛŋ ka a pɔgɔ meŋ zoro o serɛ.

¹ Bibiiri, yɛ dere yɛ dɔgrebɔ nɔe a Daŋna poɔ, bonso, lɛ la a sobiri naŋ tu. ² “Eŋnɛ fo saa ne fo ma”—naŋ e a noɔre dandaŋ sobɔ naŋ taa polloo— ³ “ka a na tõɔ̃ waa velaa ko fo, ka fo nyɔvore meŋ na tõɔ̃ waa wogi a teŋɛ ŋa zu.” ⁴ Kyɛ saamine, yɛ ta ferɛ yɛ bibiiri ka ba suuri iri, kyɛ yɛ guolo ba ka ba baara a Daŋna wuluu ne kpããnoo poɔ. ⁵ Gbaŋgbaare, yɛ dere yɛ daŋneba a nensaaloŋ poɔ nɔe ane dambẽɛ̃ ne miinuu, a toŋ ne sebaaloŋ a na yɛ tonɔ korɔ la Kristo. ⁶ Ta tonɔ korɔ ba ka yɛ nyɛ yuori a ba nimie poɔ, kyɛ e na Kristo gbaŋgbaare naŋ erɛ Naaŋmen boɔbo ne yɛ sukyie zaa. ⁷ Yɛ tonɔ a gbaŋgbaare tomɔ ne nimibaaloŋ a na yɛ tonɔ la a Daŋna zie kyɛ ka a ba e a nensaala zie. ⁸ Bonso, yɛ bɔŋ la ka eveɛle kaŋ zaa neɛ kaŋ zaa naŋ wa e, a Daŋna meŋ na leɛ e la lɛ tɔ ko o, ka o waa la gbaŋgbaa bee omeŋɛ sobɔ. ⁹ Kyɛ yɛ daŋneba, yɛ meŋ erɛ a yɛ gbaŋgbaare a lɛ. Yɛ ta fugro ba, kyɛ bɔŋ ka yɛ meŋ taa la Daŋna a tenvelaa poɔ, ka bokpɛ zaa ba meŋ be O zie. ¹⁰ A baaroo, n yɔɔmine, yɛ are kpẽã a Daŋna ane O faŋkpẽã poɔ. ¹¹ Yɛ de a Naaŋmen zɔɔzɔɔ bonsuuri zaa su, ka yɛ na tõɔ̃ are kyaare a dɛvel bɛlloo. ¹² Bonzuiŋ, te moɔbo ba kyaare ne zẽẽ ane eŋganoŋ, kyɛ a kyaare ne la zikaareba, a kyaare ne faŋ zaa, a kyaare ne a pampana ŋa saŋ lige kpeɛŋaa zaa, a meŋ kyaare ne sefaare zaa a sazu. ¹³ A lɛ poɔ, yɛ de a Naaŋmen zɔɔzɔɔ bonsuuri zaa su, ka yɛ na tõɔ̃ are kyaare a faaloŋ bebir daare, kyɛ yɛ naŋ wa e bon zaa baare, ka yɛ are. ¹⁴ A lɛ poɔ, yɛ are kyɛ de yelmennoŋ a `leŋ gyilli yɛ seɛ, a su a yeltori zɔɔre kpartegro naŋ na pɔge yɛ nyaa, ¹⁵ kyɛ eŋ a eŋ`maaroŋ yelnoore kyɔgroo a yɛ gbɛɛ eŋɛ. ¹⁶ A ama zaa poɔ, yɛ meŋ de a yeldeu bon-guraa na yɛ naŋ na tõɔ̃ kpinni a faaloŋ sobɔ vũũ piime. ¹⁷ Yɛ de a faabo zɔɔre zupile ane a Seɛ zɔɔre soɔ naŋ e a Naaŋmen yelbiri. ¹⁸ Yɛ maŋ puoro ne puoruu ane sɔroo zaa a Seɛ poɔ saŋa zaa. A lɛ poɔ, yɛ gu kyɛ taa kannyiri a sɔroo na zaa yɛ naŋ sɔrɔ korɔ a Ŋmendeme zaa. ¹⁹ Puori ko ma meŋ, ka Naaŋmen na de a yelbie ko ma, ka N na tõɔ̃ yuo n noɔre kperaa lɛ a manne a yelnoore yelsɔglaa. ²⁰ A yelnoore ŋa zuiŋ la ka N waa dikyeenɛ kyɛ be a banzɔlɔ poɔ. Puori ka N na tõɔ̃ yeli a yɛlɛ kperaa lɛ ka a seŋ lɛ N naŋ da naa yeli. ²¹ Ka yɛ na tõɔ̃ meŋ bɔŋ n yɛlɛ zaa, Tokekɔs, n yɔɔ N naŋ nɔŋ ne a Daŋna tontonɔ naŋ taa dɛlloo, na yeli ko yɛ la a bon na naŋ da wa n zie ane bon na zaa N naŋ erɛ pampana. ²² N da toŋ o la yɛ zie a yɛlɛ ŋa zuiŋ, ka yɛ na tõɔ̃ bɔŋ lɛ te naŋ waa kyɛ ka o meŋ na tõɔ̃ dii yɛ sukyie. ²³ Ka eŋ`maaroŋ be a yɔɔmine zie, ane nɔmmo ne yeldeu naŋ yi a Saa Naaŋmen ane a Daŋna Yesu Kristo zie. ²⁴ Ka nɔndeteroo be balaŋ na zaa naŋ nɔnɔ a te Daŋna Yesu Kristo ne nɔmmo naŋ ba taa baaro. Amen.