KOLASSA

¹ Pɔl, naŋ waa Yesu Kristo potuuro a Naaŋmen boɔbo poɔ, ane te yɔɔ Temote, ² A ko a Ŋmendeme ne a sagdeu yɔɔmine Kristo poɔ, naŋ be Kolassa poɔ: Nɔndeteroo ne `maaroŋ be yɛ zie ka a yi te Saa Naaŋmen ane a Daŋna Yesu Kristo zie. ³ Te de la bareka puoruu ko Naaŋmen ne te Daŋna Yesu Kristo Saa, kyɛ maŋ puoro korɔ yɛ, ⁴ te naŋ da woŋ lɛ yɛ naŋ sage de Kristo Yesu, ane lɛ yɛ naŋ taa nɔmmo a Ŋmendeme zaa zie— ⁵ ka a yi a kyelloo na naŋ biŋ gu yɛ a tenvelaa poɔ, a kyelloo ŋa yɛlɛ yɛ naŋ da woŋ a yelnoore yelmeŋɛ yelbiri poɔ. ⁶ A yelnoore yelbiri ŋa wa la yɛ zie na lɛ o naŋ da wa a donɛɛ gbuli poɔ. O wɔŋ la wɔmɔ a baa iri, na lɛ o meŋ naŋ wa yɛ zie, a yi a bebir na yɛ naŋ da woŋ o kyɛ bɔŋ a Naaŋmen nɔndeteroo a yelmeŋɛ poɔ. ⁷ Yɛ meŋ da zanne la aŋa Epaferas, te tonton tɔ te naŋ nɔŋ, zie. Yɛnee zie, o e la Kristo tontonɔ naŋ taa yelmeŋɛ, ⁸ kyɛ o meŋ yeli la ko te a nɔmmo yɛ naŋ taa a Seɛ poɔ. ⁹ A lɛ zuiŋ, a yi a bebiri na te naŋ da woŋ yɛ yɛlɛ, te ba ŋmaa ka te puoro korɔ yɛ a sɔrɔ Naaŋmen ka yɛ na tõɔ ̃ paale ne O boɔbo bɔmmo zaa, a yɛŋ ne seɛloŋ nyaan zaa poɔ. ¹⁰ Te puoro la ka yɛ na tõɔ ̃ kyene a seŋ a bon na naŋ na pɛle a Daŋna poɔ, ka yɛ wɔŋ wɔmɔ tonveɛle zaa poɔ, ka yɛ baara a Naaŋmen bɔmmo poɔ, ¹¹ ka yɛ na waa kpẽã ne faŋ zaa a seŋ O eŋno zaa kpeɛŋaa a na tõɔ ̃ taa yɛmenne ne kannyiri ane popeɛloŋ, ¹² kyɛ puoro a Saa bareka, Onɔ naŋ da maale te ka te seŋ Ŋmendeme gbannoŋ landirebe a kyãã poɔ. ¹³ Onɔ la faa te yi a lige faŋa poɔ kyɛ de te eŋ a O Bidɔɔ O naŋ nɔŋ naaloŋ poɔ. ¹⁴ O zẽẽ zuiŋ la ka te taa leɛ-yɔɔdeu ane yelbebe suuri diteroo. ¹⁵ O e la Naaŋmen na neɛ zaa naŋ kon bɔŋ nyɛ waaloŋ, a bon-iri zaa bidanwẽɛ̃. ¹⁶ Bonzuiŋ, a yi O zie la ka boma zaa iri: a tenvelaa boma ane teŋɛ zu boma zaa, boma neɛ naŋ na tõɔ̃ nyɛ a laŋ ne a boma neɛ naŋ kon tõɔ̃ nyɛ, ka a e naaloŋ, bee daŋneba, bee zikaareba, bee faŋ zaa; a yi O zie la ka boma zaa da iri, a e O soobo. ¹⁷ Boma zaa meŋ tu la O puoriŋ, kyɛ O poɔ la ka boma zaa nyɔge taa are. ¹⁸ Onɔ meŋ la a eŋgan naŋ e a puoru deme zusobɔ; Onɔ la a piilu sobɔ ne a bidanwẽɛ̃ naŋ yi a kuuni poɔ, ka yɛlɛ zaa poɔ, O na tõɔ̃ waa la a kpoŋ zaa sobɔ. ¹⁹ Bonso, Naŋmen poɔ da pɛle la ka Omeŋɛ waaloŋ zaa be Kristo eŋɛ, ²⁰ ka a meŋ yi O zie ka O na maale boma zaa ka a leɛ nyɔge taa ne O, boma naŋ be a teŋɛ zu bee boma naŋ be tenvelaa poɔ, o naŋ da wa ne `maaroŋ a yi O dagara zẽẽ poɔ. ²¹ Kyɛ yɛnee, saŋ kaŋ ba da ŋmaa yɛ la bare ka yɛ da taa dɔŋ teɛroŋ a yɛ tonfaare poɔ. Kyɛ pampana ŋa, O maale yɛ la ka yɛ leɛ nyɔge taa ne O, ²² a Kristo eŋgan meŋɛ eŋɛ a yi O kũũ poɔ, ka O tõɔ̃ de yɛ ka yɛ waa nensonne, nobɔ naŋ ba taa zisaŋnaa bee yosaŋnaa zaa O niŋe soɔ— ²³ ka yɛnee wa sereŋ kyãã be a sagdeu poɔ kyɛ are kpẽã gbeŋgbeŋ kyɛ ba sɛre yi a yelnoore kyelloo zie. Ŋa la a yelnoore na yɛ naŋ da woŋ, a yelnoore na ba naŋ da kanne ko bon-iri zaa naŋ be a teŋɛ zu, kyɛ ka Maa Pɔl meŋ waa a yelnoore na tontonɔ. ²⁴ Pampana ŋa, N taa la popeɛloŋ ne a woore N naŋ nyɛ a yɛ zuiŋ, kyɛ paale n eŋgan ne dɔgroŋ ka a seŋ Kristo dɔgroŋ, a O eŋgan naŋ e a puoru deme zuiŋ. ²⁵ N da waa la a ba tontonɔ a seŋ a tonnoɔre na Naaŋmen naŋ ko ma a yɛ zuiŋ, a lɛ tu a Naaŋmen yelbiri— ²⁶ a yelsɔglaa naŋ da piŋ ko a koroŋ deme ne a nemboore zaa, kyɛ sãã ko a O Ŋmendeme pampana ŋa. ²⁷ Bana zie la ka Naaŋmen da sage ka O wuli a bon na naŋ e a eŋno bonveɛle a yelsɔglaa naŋ be a Tendaa deme poɔ. Onɔ la Kristo naŋ be yɛ eŋɛ, Onɔ meŋ naŋ waa a eŋno kyelloo. ²⁸ Te kanne la O yɛlɛ, kyɛ kpãã neɛ zaa a wuli ba ne yɛŋ zaa ka te na tõɔ̃ de neɛ zaa ka o ta o tao a Kristo Yesu poɔ. ²⁹ A lɛ zuiŋ N meŋ tonɔ la a moɔrɔ a seŋ a tomɔ O naŋ tonɔ, naŋ tonɔ toŋkpeɛne n zie.

¹ N boɔrɔ ka yɛ bɔŋ lɛ N naŋ zɔɔrɔ korɔ yɛ, ane balaŋ naŋ be Laodesea poɔ, ane balaŋ zaa naŋ da ba nyɛ mmeŋɛ niŋe. ² N boɔrɔ la ka ba taa sukyidiibu, kyɛ waa bonyen nɔmmo poɔ, a na taa naboma zaa naŋ be a yɛŋ faŋ poɔ, ka ba pãã na bɔŋ a yelsɔglaa naŋ be Naaŋmen ne a Saa ne a Kristo poɔ. ³ Kristo poɔ la ka a yɛŋ ne bɔmmo naboma zaa sɔgle. ⁴ N yele la a ŋaa ka neɛ ta tõɔ̃ bɛlle yɛ ne nɔnoɔ yelbie. ⁵ Ne lɛ zaa N ba kyebe ne n eŋgan, N be la yɛ zie ne n seɛ kyɛ taa popeɛloŋ N naŋ nyɛrɛ lɛ yɛ eroŋ naŋ tu sobivelaa, ane lɛ yɛ sagdeu naŋ are kpẽã Kristo poɔ. ⁶ A lɛ poɔ, lɛ yɛ naŋ da de Kristo Yesu a Daŋna, yɛ kyene O eŋɛ, ⁷ kyɛ are kpẽã a mɛ dɔgle a O eŋɛ, a e ka yɛ are velaa a sagdeu poɔ, a na ba naŋ da wuli yɛ, kyɛ kyellɛ yaga ne bareka puoruu a poɔ. ⁸ Yɛ gu ka neɛ zaa ta bɛlle yɛ ne yɛŋ zannoo ane bɛlloo zagla, naŋ yi a nensaala eroŋ ane a donɛɛ ŋa yɛlɛ zie kyɛ ba yi Kristo zie. ⁹ Bonzuiŋ, Kristo eŋgan poɔ la ka Naaŋmen waaloŋ zaa be. ¹⁰ Kyɛ yɛ ta la yɛ tao zie O eŋɛ, Onɔ naŋ e a zikaara ane faŋ zaa zusobɔ. ¹¹ O eŋɛ la ka yɛ meŋ ŋmaa yɛ yɔe ne a ŋmaabo na ba naŋ ba e ne nuuri, yɛ naŋ iri a eŋganoŋ yelbebe eŋgan bare a yi a Kristo yɔ-ŋmaabo poɔ, ¹² ba naŋ da ũũ yɛ laŋ ne O a suobu poɔ, a be yɛ meŋ naŋ leɛ iri ne O, a yi a Naaŋmen toŋkpeɛne sagdeu, Onɔ naŋ da iri O yi a kuuni poɔ. ¹³ A saŋ na yɛ naŋ kpi a yɛ gbɛr-ŋmeɛbo poɔ ane yɛ eŋgan yɔ-ba-ŋmaabo poɔ, O leɛ ko yɛ la nyɔvore ne O. O da di la te gbɛr-ŋmeɛbo zaa suuri, ¹⁴ O naŋ da molle iri a nɔe-tero ŋmaabo, naŋ kyaare te a leɛ e te dɔndɔmɔ, bare; O da iri la aŋa bare a kpa o a dagara zu. ¹⁵ Kyɛ O naŋ da iri a zikaareba ane faŋ zaa bare, O vɛŋ la ka ba sãã kperaa lɛ nobɔ poɔ, O naŋ da tõɔ ̃ ba a de wẽɛ ̃ a zɔɔre diu poɔ a dagara eŋɛ. ¹⁶ A lɛ poɔ, ta vɛŋ ka neɛ zaa di yɛ sɛrɛɛ ne a yɛ diu bee bonnyuuri, bee a yɛ puoru tigri yɛlɛ, a kyũũ paala tigri bee a Sabat bebiri daare. ¹⁷ Ama la a boma naŋ na wa dasuoluŋ; kyɛ a eŋgan meŋɛ yi la Kristo. ¹⁸ Ta vɛŋ ka neɛ zaa nɛb yɛ a omeŋɛ sigruŋ ane o malkere puoruu poɔ, ka yɛ ba nyɛ yɛ yɔɔre. O maŋ kpɛ la yɛlɛ o naŋ da ba nyɛ poɔ, kyɛ taa pɔloo naŋ ba taa tɔnɔ, o eŋganoŋ teɛroŋ zuiŋ. ¹⁹ O ba la nyɔge a Zu. A yi a Zu zie la ka a eŋgan zaa na nyɛ sommo ne nyɔgtaaloŋ a kɔbɔ ne a gyiile poɔ, a baara ne Naaŋmen baabo. ²⁰ Ka yɛnee da kpi ne Kristo a yi a donɛɛ ŋa yɛlɛ poɔ, wolɔ ka yɛ kyãã e a na a donɛɛ ŋa nobɔ kyɛ be a nɔe ba naŋ maale biŋ puliŋ, naŋ yeli: ²¹ “Yɛ ta tɔ! Yɛ ta lɛnne! Yɛ ta nyɔge!”? ²² Ama zaa yɛ naŋ na tõɔ̃ de tonɔ ne, e la boma naŋ na bɔre wɛ. A nɔe ama taaba yi la a nensaala nɔe ne wuluu puoriŋ. ²³ A yɛlɛ ama sãã la a na yɛŋ, a nensaala puoruu na zaa ba naŋ boɔrɔ poɔ, ne bamenne sigruŋ ne ba eŋgama dɔgroŋ poɔ. Kyɛ a ba taa tɔnɔ zaa a eŋgan boɔbo zie. Kyeno Soŋ Sobiri

¹ Ka yɛnee pãã da iri do laŋ ne Kristo, yɛ bɔ a boma na naŋ be a sazu poɔ, a zie na Kristo naŋ be a zeŋ a Naaŋmen nudoroŋ eŋɛ. ² Yɛ vɛŋ ka yɛ teɛroŋ be a sazu boma poɔ, kyɛ ba be a teŋɛ zu boma poɔ. ³ Bonso, yɛ kpi la, kyɛ yɛ nyɔvore sɔgle la ne Kristo, Naaŋmen poɔ. ⁴ A saŋ na ka Kristo, naŋ e te nyɔvore, wa sãã, yɛ meŋ pãã na sãã ne O la a eŋno poɔ. ⁵ A lɛ poɔ, yɛ ko a yɛ teŋɛ zu eŋgan eroŋ zaa: pẽɛ̃pẽɛ̃ tomɔ, yeldɛgre, boɔbo naŋ fere, boɔbo faare, ne digbogbo naŋ e tebɛ puoruu. ⁶ Ama taaba zuiŋ la ka Naaŋmen suuri waara a basagdeu bibiiri zie. ⁷ Saŋ kaŋ yɛ meŋ da kyeŋ la a yɛlɛ ama sobiri poɔ, a saŋ na yɛ naŋ da voorɔ o poɔ. ⁸ Kyɛ pampana, yɛ meŋ iri ama zaa bare: suuri, sutoloŋ, yelfaare, yelbifaare naŋ kyaare ne Naaŋmen, ane yelbidɛgre naŋ yi a yɛ nɔe poɔ. ⁹ Yɛ ta ŋmaara zirii korɔ taa, yɛ naŋ faa yaa a neŋkore ne o eroŋ bare ¹⁰ a leɛ su a nempaala, naŋ leɛrɛ bɔmmo poɔ a seŋ ne a Neɛ na sobɔ naŋ maale o waaloŋ. ¹¹ Be la ka Grik neɛ bee Gyu neɛ, yɔ-ŋmaara sobɔ bee yɔ-ba-ŋmaara sobɔ, kɔkɔr yuo sobɔ, saana, gbaŋgbaa bee nenweɛlɛ kyebe, kyɛ Kristo la a zaa kyɛ meŋ be a zaa poɔ. ¹² A lɛ poɔ, yɛnee naŋ waa Naaŋmen nobɔ O naŋ iri, nensonne ane nobɔ O naŋ nɔŋ, yɛ su yɛmenne ne nyonono, sigru milluu a yɛ teɛroŋ poɔ, sebaaloŋ, ane kannyiri. ¹³ Yɛ dire kannyiri korɔ taaba kyɛ dire suuri korɔ taaba ka neɛ zaa wa taa nɔkpeɛne ne o tasobɔ zaa. A na lɛ Kristo naŋ di suuri ko yɛ, yɛ meŋ di suuri ko taaba. ¹⁴ Kyɛ a gaŋ a ama zaa, yɛ su nɔmmo, naŋ e a nobɔ naŋ ta ba tao zie nyɔgtaaloŋ. ¹⁵ Yɛ vɛŋ ka Naaŋmen `maaroŋ di naaloŋ a yɛ sukyie poɔ, ba naŋ meŋ da boɔle yɛ eŋgan yenaa eŋɛ, ka yɛ tu a `maaroŋ sobiri, kyɛ ka yɛ maŋ puori bareka puoruu. ¹⁶ Yɛ vɛŋ ka a Kristo yelbiri be yɛ eŋɛ yaga, a wullo kyɛ kpããna taaba ne yɛŋ zaa a pugibu yieluŋ, Ŋmendeme yieluŋ, ne seɛloŋ yieluŋ poɔ. Yɛ yiele ne nɔndeteroo a yɛ sukyie poore korɔ a Daŋna. ¹⁷ Kyɛ lɛ zaa yɛ naŋ erɛ a yɛ yelbiri bee yɛ eroŋ poɔ, yɛ e a zaa a Daŋna Yesu yuori eŋɛ, kyɛ puoro a Saa Naaŋmen bareka a yi O zie. ¹⁸ Pɔgɔbɔ, yɛ sigri yɛmenne a yɛmenne serbɛ zie, na lɛ a naŋ seŋ a Daŋna poɔ. ¹⁹ Serbɛ, yɛ nɔnɔ yɛ pɔgɔbɔ a ta maŋ taa suuri ne ba. ²⁰ Bibiiri, yɛ dere yɛ dɔgrebɔ nɔe, yɛlɛ zaa poɔ, bonso, ŋaa la pɛle a Daŋna poɔ yaga. ²¹ Saamine, yɛ ta ferɛ yɛ bibiiri ka ba suuri iri, ka lɛ naane, ba na taa la posaŋnaa yaga. ²² Gbaŋgbaare, yɛ dere yɛ daŋneba a nensaaloŋ poɔ nɔe, yɛlɛ zaa poɔ, ka a ta e ka yɛ tonɔ la yɛ tomɔ ba nimie soɔ a na pɛle ba poore, kyɛ yɛ toŋ ne sebaaloŋ a zoro Naaŋmen. ²³ Kyɛ lɛ zaa yɛ naŋ erɛ, yɛ erɛ ne yɛ sukyiri zaa, a na yɛ naŋ erɛ korɔ a Daŋna, ka a ba e nensaala. ²⁴ Yɛ bɔŋ ka a yi a Daŋna zie la ka yɛ na nyɛ a gbannoŋ tɔnɔ, bonso, a Daŋna Kristo la ka yɛ tonɔ korɔ. ²⁵ A neɛ na naŋ ŋmɛ gbɛre na nyɛ la o gbɛr-ŋmeɛbo tɔnɔ, ka bokpɛ zaa meŋ kyebe.

¹ Daŋneba, yɛ ko yɛ gbaŋgbaare bon naŋ seŋ kyɛ tori, kyɛ bɔŋ velaa ka yɛ meŋ taa la Daŋna naŋ be tenvelaa poɔ. ² Yɛ de yɛmenne ko puoruu, kyɛ maŋ gu yɛmenne velaa a be poɔ ne bareka puoruu. ³ A lɛ puoriŋ, yɛ meŋ puoro korɔ te, ka Naaŋmen na yuo a kanno dendɔre ko te ka te tõɔ̃ kanne a Kristo yelsɔglaa. A yelsɔglaa ŋa zuiŋ la ka N meŋ kpɛ banzɔlɔ poɔ. ⁴ Yɛ puoro ka N na tõɔ̃ yeli O yɛlɛ ka a sãã velaa, a seŋ lɛ N naŋ da naa yeli. ⁵ Yɛ taa yɛŋ a kyene ne a balaŋ naŋ ba poɔ yɛ poɔ, kyɛ leɛ erɛ soŋ a saŋ na. ⁶ Yɛ vɛŋ ka yɛ yelbie zaa maŋ wa ne nɔndeteroo, a seŋ yɛ naŋ eŋ nyɛnnoo, ka yɛ na tõɔ̃ bɔŋ lɛ yɛ naŋ na maŋ leɛ iri a noɔre ko neɛ zaa. ⁷ Tokekɔs na manne la n yɛlɛ zaa ko yɛ. O e la a yɔɔ kaŋ N naŋ nɔŋ, tontonɔ naŋ taa dɛlloo, ane n gbaŋgbaa tasobɔ a Daŋna poɔ. ⁸ N toŋ o la yɛ zie a yɛlɛ ŋa zuiŋ, ka o na tõɔ̃ wa bɔŋ yɛ yɛlɛ kyɛ meŋ dii yɛ sukyie. ⁹ N toŋ o la laŋ ne Onesemos, yɔɔ kaŋ naŋ taa dɛlloo te naŋ nɔŋ, kyɛ meŋ e a yɛ kaŋ. Ba na manne la ko yɛ bon na zaa naŋ erɛ a zie ŋa. ¹⁰ A n nempigri tɔ Arestarekos, ne Mark naŋ e Barnabas arebile, puoro yɛ la. (Yɛ da de la a noɔre yɛlɛ kyaare Mark; ka onɔ wa wa yɛ zie, yɛ tuori o velaa.) ¹¹ Yesu, ba naŋ boɔlɔ Gyostos, meŋ puoro yɛ la. Bama yoŋ, naŋ be a yɔ-ŋmaabo deme poɔ, la e n tonton taaba a Naaŋmen naaloŋ tomɔ poɔ, kyɛ ba meŋ da de la sukyidiibu ko ma. ¹² Epaferas, naŋ e yɛ kaŋ, kyɛ la e Kristo gbaŋgbaa, toɔle yɛ la o puoruu. O maŋ moɔrɔ la o puoruu poɔ korɔ yɛ, ka yɛ are kpẽã kyɛ waa nobɔ naŋ ta ba tao zie Naaŋmen boɔbo zaa poɔ. ¹³ N e la o danseɛ sobɔ ka o taa la miinuu yɛ zie, ane balaŋ naŋ be Laodesea ane Heɛrapɔles poɔ. ¹⁴ Luk, a baalonsanne te naŋ nɔŋ, ane Demas puoro yɛ la. ¹⁵ Yɛ puori te yɔɔmine naŋ be Laodesea poɔ, ane Nomfa ne a puoru deme naŋ be o yiri poɔ. ¹⁶ Ka ba naŋ wa kanne a gan ŋa yɛ zie, yɛ vɛŋ ka ba la kanne o a Laodesea puoru deme zie, kyɛ vɛŋ ka yɛ meŋ kanne a gan naŋ yi Laodesea. ¹⁷ Yeli ko Arkeppos: “Kaara velaa a tomɔ fo naŋ de a Daŋna zie, ka fo toŋ baare.” ¹⁸ Maa Pɔl la ŋmaa a puoruu ŋa ne mmeŋɛ nu. Yɛ teɛrɛ a n banzɔlɔ. Ka nɔndeteroo be yɛ zie. Amen.