3 GYɔN
11 A Neŋkpoŋ, A ko n banɔnnaa Gayɔs, N naŋ nɔŋ a yelmeŋɛ poɔ. 2 N puoro la ka fo yɛlɛ zaa na tõɔ̃ kyene velaa, kyɛ ka fo tõɔ̃ taa eŋ`maaroŋ meŋ, a seŋ lɛ a fo seɛ naŋ kyene velaa. 3 N poɔ da pɛle la yaga a saŋ na a yɔɔmine naŋ da wa di danseɛ a kyaare ne a yelmeŋɛ naŋ be a fo eŋɛ, ne lɛ a fo naŋ maŋ kyene a yelmeŋɛ poɔ. 4 N ba taa popeɛloŋ zaa naŋ gaŋ N naŋ woŋ ka n bibiiri kyene la yelmeŋɛ poɔ. 5 N banɔnnaa, fo taa la yelmeŋɛ milluu ne lɛ fo naŋ erɛ korɔ a yɔɔmine ne a saama. 6 Ba da di la fo nɔmmo danseɛ a puoru deme niŋe soɔ. Ka fo wa eŋ ba a ba sori poɔ, lɛ a naŋ seŋ Naaŋmen tuubu, fo na e la velaa, 7 bonzuiŋ ba da yi yoɔrɔ la O yuori zuiŋ a kyɛ da ba de bon zaa a Tendaa deme zie. 8 A lɛ poɔ, a seŋ la ka te tuori de bama taaba, ka te na tõɔ̃ waa tonton taaba a yelmeŋɛ tomɔ poɔ. 9 N ŋmaa ko la a puoru deme, kyɛ Deoterɛfes naŋ maŋ nɔŋ ka o e a wedere sobɔ a ba poɔ, ba tuori te. 10 A lɛ poɔ, ka Maa wa te wa, N na leɛ teɛre yɛ la a eroŋ na o naŋ da erɛ, ne lɛ o naŋ maŋ yeli yellaama ane potuo yelbie kyaare ne te. Kyɛ a ba e aŋa yoŋ la ka o poɔ pɛle ne. O meŋ ba tuori a yɔɔmine, kyɛ meŋ maŋ pigi a balaŋ naŋ boɔrɔ ka ba tuori a yɔɔmine sori kyɛ digre ba bara ka ba yi a puoru deme poɔ. 11 N banɔnnaa, ta tɔgle a bon na naŋ e faa, kyɛ tɔgle bonvelaa. A neɛ na naŋ erɛ velaa yi la Naaŋmen zie, kyɛ a neɛ naŋ erɛ faa ba daŋ nyɛ Naaŋmen. 12 Nobɔ zaa a laŋ ne a yelmeŋɛ meŋɛ di la danseɛ velaa Demeteros yɛlɛ poɔ. Te meŋ di la a danseɛ ŋa tɔ, kyɛ ka yɛ bɔŋ ka te danse-diu e la yelmeŋɛ. 13 N da taa la yɛlɛ yaga ka N ŋmaa ko fo, kyɛ N ba boɔrɔ ka N ŋmaa ko fo ne mag-dalee ne iŋk. 14 Kyɛ N poteɛro boɔbo la ka a kon kɔɔre kyɛ te na nyɛ la taa, a yeli yɛlɛ ko taaba. `Maaroŋ be fo zie. Te bamine toɔle la ba puoruu. Puori a bamine ne ba yoe.