2 TEMOTE
11 Pɔl, naŋ waa Kristo Yesu potuuro a Naaŋmen boɔbo poɔ, a seŋ a nyɔvore polloo naŋ be Kristo Yesu poɔ, 2 A ko Temote, n bie N naŋ nɔŋ: Nɔndeteroo, nyonono, ane `maaroŋ be fo zie a yi a Saa Naaŋmen ane a Kristo Yesu te Daŋna zie. 3 N puoro la Naaŋmen, N naŋ tonɔ korɔ ne poteɛro soŋ a na n saakommine naŋ da toŋ, bareka, ka N maŋ teɛre fo yɛlɛ a n puoruu poɔ tensoɔ ne ŋmenaa saŋ. 4 N naŋ teɛre fo ŋmenaa kõɔ̃, N sereŋ boɔrɔ la ka N nyɛ fo ka N na tõɔ̃ paale ne popeɛloŋ. 5 N meŋ teɛre la a sagdeu naŋ be fo zie, naŋ e sagdeu meŋɛ. A piiluŋ, a sagdeu ŋa da be la fo makoma Loes ane fo ma Eones zie, kyɛ N bɔŋ la velaa ka a meŋ be la fo zie. 6 A ŋaa zuiŋ la ka N teɛre fo ka fo iri a Naaŋmen kyɔgtaa naŋ be fo zie, a yi a n nuuri dɔgloo, na vũũ fo naŋ dɔm. 7 Bonso, Naaŋmen da ba ko te dambẽɛ̃ seɛ, kyɛ O da ko te la faŋa, nɔmmo, ne temenne taabo seɛ. 8 A lɛ poɔ, ta zoro vi a te Daŋna danse-diu bee maa naŋ waa O nempigraa zuiŋ. Kyɛ laŋ ne ma woore a yelnoore zuiŋ Naaŋmen faŋa eŋɛ. 9 Naaŋmen la faa te kyɛ boɔle te ne boɔloo soŋ—ka a da ba yi te tomɔ zuiŋ kyɛ a da yi la Omeŋɛ boɔbo ne a nɔndeteroo na O naŋ da de ko te Kristo Yesu eŋɛ kyɛ ka a saŋ na da bɔŋ piili. 10 Kyɛ pampana, O nɔndeteroo da sãã la a yi te Faara Yesu Kristo nyaabo poɔ, Onɔ naŋ da e ka kũũ ba la e bon zaa kyɛ taa nyɔvore ane vooroŋ naŋ kon bɔŋ baare, ka a be kyaane poɔ a yi a yelnoore zie. 11 A yelnoore ŋa zuiŋ la ka Naaŋmen da iri ma ka N waa kaŋkanna, ne potuuro, ne a Tendaa deme wuliwullo. 12 A ŋaa zuiŋ la ka N meŋ nyɛ a woore ama. Kyɛ N ba zoro vi, bonso N bɔŋ la a neɛ N naŋ sage ne. N meŋ leɛ de la ka O na tõɔ̃ kaara a bon na N naŋ de eŋ O nuuri poɔ kyɛ gu a bebiri na. 13 Nyɔge velaa a yelbisonne mannoo fo naŋ da woŋ n zie ne sagdeu ne nɔmmo naŋ be Kristo Yesu poɔ. 14 Kaara a bonvelaa na Naaŋmen naŋ da de eŋ fo nuuri poɔ, a yi a Sekyerete naŋ be te zie. 15 Fo bɔŋ la a ŋaa: ka balaŋ na zaa naŋ be Asia paaloŋ poɔ leɛ la ba puori ko ma. Fogyɛlɔs ne Hermɔgyɛnees poɔ la ba poɔ. 16 Ka a Daŋna de nyonono ko Onesefɔrɔs yideme, bonso o da maŋ soŋ ma la kyɛ da ba zoro n banzɔlɔ vi. 17 Kyɛ saŋ na o naŋ da be Rom teŋɛ poɔ, o da sereŋ bɔ ma la a te nyɛ ma. 18 Ka a Daŋna e ka o nyɛ nyonono a yi a Daŋna zie a bebiri na daare! Fo bɔŋ la velaa a ziiri yaga na o naŋ da soŋ ma Ɛfɛsos teŋɛ poɔ.
21 A lɛ pãã, fõõ naŋ e n bie, taa kpẽã a nɔndeteroo naŋ be Kristo Yesu poɔ. 2 Kyɛ a yɛlɛ na fo naŋ da woŋ ka N yeli a danseɛ deme yaga zie, de a yɛlɛ ama ko nobɔ fo naŋ na tõɔ̃ dɛlle ka ba meŋ na tõɔ̃ wuli nobɔ mine. 3 A lɛ pãã, nyɛ woore ne kannyiri a na Yesu Kristo sogya velaa. 4 Sogya zaa naŋ toŋ o sogya tomɔ ba de omeŋɛ eŋ a bebiri zaa yelkɛkɛ poɔ, ka o na tõɔ̃ pɛle a neɛ naŋ eŋ o a sogya tomɔ poɔ. 5 A lɛ meŋ, ka neɛ wa be zoobu poɔ, o kon tõɔ̃ nyɛ a wedere zupile, see ka o zo a lɛ ba naŋ da maale biŋ. 6 A koɔraa naŋ kɔ yaga da naa waa la a piilu sobɔ naŋ na nyɛ o toɔre a wɔmɔ pommu saŋ. 7 Teɛre a yɛlɛ N naŋ yeli, bonso, a Daŋna na e la ka fo bɔŋ a zaa tɛgɛ. 8 Leɛ teɛre Yesu Kristo naŋ yi David bibiiri poɔ, Onɔ Naaŋmen naŋ da iri yi kuuni poɔ—a lɛ N naŋ da yeli n yelnoore poɔ. 9 A yelnoore ŋa zuiŋ la ka N nyɛrɛ woore a te seŋ ka ba eŋ ma banzɔlɔ, a na yelfa-erɛ la ma. Kyɛ Naaŋmen yelbiri ba kpɛ banzɔlɔ. 10 A ŋaa la so ka N are kpẽã a yelfere zaa poɔ, a nobɔ na Naaŋmen naŋ da iri zuiŋ, ka ba meŋ na tõɔ̃ nyɛ a faabo naŋ be Kristo Yesu poɔ ane eŋno naŋ kon bɔŋ baare. 11 A yelbie ama waa la yeldɛlle: Ka tenee da kpi ne O, te meŋ na voorɔ ne O la; 12 ka tenee are kpẽã, te meŋ na di la naaloŋ ne O. Ka tenee kyiire O, Onɔ meŋ na kyiire te la; 13 ka tenee ba taa sagdeu, Onɔ na maŋ taa la sagdeu, bonso O kon tõɔ̃ kyiire Omeŋɛ. 14 Teɛre a nobɔ a yɛlɛ ama. Sereŋ yeli ko a nobɔ a Naaŋmen niŋe soɔ ka ba ta kpɛ nɔkpeɛne a yelbie zuiŋ. Ŋaa la a yellaama naŋ na wa ne saŋnaa ko balaŋ naŋ woŋ. 15 E aneɛ a de fomeŋɛ ko Naaŋmen a na neɛ O naŋ na tõɔ̃ sage ne. Waa na tontonɔ naŋ ba taa vi kyɛ na tõɔ̃ manne velaa a yelmeŋɛ yelbie tɛɛtɛɛ tɛgɛ. 16 Bare balaŋ naŋ yeli yelbidɛgre ane yelbizagla, bonso ba na duoro la yaga a Ŋmen-ba-zo yɛlɛ poɔ. 17 Ba yelbie na yaare la na gbantori naŋ kon bɔŋ baare. Homɛneos ne Filetos poɔ la ba poɔ. 18 Ba ŋmaa la yi a yelmeŋɛ sobiri poɔ, a yeli ka a kũũ leɛiruŋ saŋ faa tɔle la, a lɛ pãã dɔŋ ba mine a ba sagdeu poɔ. 19 Ane lɛ zaa, Naaŋmen pare biŋnu are la gbeŋgbeŋ, kyɛ taa a `lego ŋa: “A Daŋna bɔŋ la balaŋ O naŋ so,” kyɛ meŋ, “Vɛŋ ka neɛ na zaa naŋ boɔle a Daŋna yuori leɛ yi o yelbatori eroŋ poɔ.” 20 A yikpoŋ poɔ, tonton boma bebe la ba naŋ maale ne salema bee selva. Kyɛ a mine bebe la ba naŋ maale ne daare bee yagra. A mine taa la eŋno, kyɛ a mine meŋ ba taa eŋno zaa. 21 Ka neɛ zaa wa pɛge omeŋɛ yi a yɛlɛ ama poɔ, o na waa la na tonton bon naŋ taa eŋno ba naŋ iri biŋ, naŋ na tõɔ ̃ toŋ tomɔ ko a Daŋna kyɛ e sere a gu tonveɛle kaŋ zaa. 22 Zo yi pɔloo boɔbo faare, kyɛ zo tu yeltori, sagdeu, nɔmmo ne `maaroŋ ne balaŋ na zaa naŋ boɔlɔ a Daŋna ne sukyiwelwel. 23 Kyɛ zagre damboli ne babɔŋ soorbie, bonso fo bɔŋ la ka ama maŋ wa ne la nɔkpeɛne. 24 Kyɛ a fere la ka a Daŋna gbaŋgbaa ta ŋmɛ nɔkpeɛne, kyɛ maŋ taa nimibaaloŋ ko nobɔ zaa, ka o meŋ sereŋ bɔŋ a wuluu tomɔ kyɛ taa kannyiri ka kaŋ zaa wa erɛ faa korɔ o. 25 See ka o wuli ne sebaaloŋ balaŋ na zaa naŋ kyaare ne o. Kaapɔg, Naaŋmen na ko ba la teɛroŋ leɛbo ka ba na tõɔ̃ taa a yelmeŋɛ bɔmmo, 26 ka ba na leɛ ba teɛroŋ kyɛ leɛ yi a dɛvel bɛraa poɔ, onɔ naŋ nyɔge ba a o boɔbo zuiŋ.
31 Kyɛ bɔŋ a ŋaa: Yeltuo na wa la a baaro daare. 2 Bonso, a nobɔ na e la nobɔ naŋ maŋ nɔŋ bamenne, a meŋ nɔŋ libie. Ba na maŋ fuuro la kyɛ maŋ erɛ pɔloŋ, a yeli yelbifaare naŋ kyaare ne Naaŋmen. Ba kon de ba dɔgreba noɔre. Ba kon yeli bareka, kyɛ meŋ ba waa yelkyerete deme. 3 Ba ba taa nɔmmo meŋɛ kyɛ meŋ ba boɔrɔ yelmaalo. Ba na maŋ ŋmaa la zirii eŋ nobɔ kyɛ kon taa bamenne. Ba na nɔŋ la potuoluŋ kyɛ ba nɔŋ tonveɛle. 4 Ba na iri la ba taaba pare. Ba na maŋ kyerɛ la eŋgan kyɛ fuuro bamenne. Ba na nɔŋ la bonnoore kyɛ bare Naaŋmen. 5 Ba waaloŋ na sãã la na Naaŋmen waaloŋ, kyɛ ba na kyiire la a waaloŋ ŋa faŋ. Leɛ fo puori ko a bama taaba. 6 Ba taaba la maŋ vu kpɛ yie poɔ a nyɔge pɔɔdambolo naŋ tuo yelbebe naŋ e tegroŋ, balaŋ naŋ maŋ sage ka boɔbo faare kaŋ zaa tagra ba gɛrɛ ne. 7 A pɔgɔbɔ bama maŋ zanna la tegteglɛ kyɛ ba tõɔ̃ taa a yelmeŋɛ bɔmmo. 8 A na Gyannes ane Gyamberes naŋ da kyaare ne Moses, a lɛ ka a nobɔ bama meŋ maŋ kyaare ne a yelmeŋɛ. Ba waa la nobɔ naŋ taa teɛroŋ naŋ saŋ, a e nobɔ ba naŋ da zagre a sagdeu poɔ. 9 Kyɛ ba kon tõɔ̃ gaa tɔɔre, bonzuiŋ neɛ zaa na nyɛ la ba damboluŋ, a na ba meŋ naŋ da nyɛ a dɔbɔ bayi damboluŋ. 10 Kyɛ fo bɔŋ la velaa a n wuluu, ne lɛ N naŋ waa, ane n boɔbo, n sagdeu, n kannyiri, n nɔmmo, ne lɛ N naŋ da are kpẽã. 11 Fo meŋ bɔŋ la a dɔgroŋ ne a woore na N naŋ da nyɛ a Anteok, Ekoneom ane Lostera poɔ. N da be la a woore ama poɔ ne kannyiri, kyɛ a Daŋna da faa ma la yi a zaa poɔ. 12 Yelmeŋɛ, neɛ zaa naŋ boɔrɔ ka o tu a Naaŋmen sobiri a Kristo Yesu poɔ, na nyɛ la dɔgroŋ. 13 Kyɛ nenfaare ne balaŋ naŋ maŋ taa nɔkãã a bɛllɛ, na duoro la efaaloŋ poɔ, a bɛllɛ kyɛ nyɛ bɛlloo. 14 Kyɛ fõõ zie, kyãã tu a yɛlɛ fo naŋ da zanne kyɛ sage de, bonso fo bɔŋ la a neɛ na zie fo naŋ zanne, 15 ne lɛ a naŋ yi fo bile saŋ ka fo da bɔŋ a Ŋmasonne, naŋ ko fo yɛŋ ka fo bɔŋ a faabo yɛlɛ naŋ yi a sagdeu naŋ be Kristo Yesu poɔ. 16 Ŋmaabo zaa yi la Naaŋmen vooroŋ zie kyɛ taa tɔnɔ a wuluu, zu nyaroo, sobiri leɛ-maaloo, ne yeltori wuluu poɔ, 17 ka Naaŋmen neɛ na tõɔ̃ taa bon zaa naŋ seŋ tonveɛle zaa tomɔ.
41 A lɛ poɔ, N eŋ fo la noɔre a Naaŋmen ne a Daŋna Yesu Kristo niŋe soɔ, Onɔ naŋ na di vobɔ ane kuuni sɛrɛɛ a O nyaabo ne O naaloŋ saŋ: 2 Kanne a yelbiri. Kyɔgre gu, ka a saŋ seŋ la bee a saŋ ba seŋ. Nyare ba zu, eŋ nobɔ sobiri, kyɛ dɔre eŋ ba ane kannyiri yaga ne wuluu. 3 Bonso, a saŋ na ta la ka ba kon leɛ kyɛllɛ yelmeŋɛ wuluu. Kyɛ a seŋ bamenne boɔbo, ba na kpare la taa wuliwullibo yaga naŋ na yeli a bon na a ba tobo naŋ zaŋna naŋ boɔrɔ. 4 Ba na leɛ la ba tobo bare a yelmeŋɛ zie kyɛ kyaare senselloŋ. 5 Kyɛ fõõ, gu fomeŋɛ yɛlɛ zaa poɔ, nyɛ woore ne kannyiri, toŋ a yelnoore kaŋkanna tomɔ, kyɛ toŋ a tontoneba tomɔ baare. 6 Pampana, Naaŋmen kyiri ma la bare a na kõɔ̃, kyɛ a saŋ ta la ka N gaa. 7 N da zɔɔ la zɔɔvelaa. N da baare la a zoobu. N da taa la a sagdeu velaa. 8 Pampana ba biŋ la a yeltoruŋ yɔɔre zupile ko ma, a zupile na a Daŋna, naŋ e a yeltori sɛrɛɛ dire, naŋ na ko ma a bebiri na—kyɛ a ba e Maa yoŋ, kyɛ balaŋ zaa meŋ naŋ sereŋ boɔrɔ O nyaabo. 9 E aneɛ a wa n zie wiẽũ, 10 bonso, Demas da bare ma la, o naŋ nɔŋ a pampana saŋ zuiŋ kyɛ gaa Tɛsaloneka. Kreskes da gaa la Galatea, kyɛ Titus da gaa la Dalmatea. 11 Luk yoŋ la be n zie. Taa Mark wa ne, bonso o taa la tɔnɔ ko ma a tontoneba tomɔ poɔ. 12 N meŋ toŋ la Tokekɔs ka o gaa Ɛfɛsos. 13 A kpare kpoŋ N naŋ da bare Karpos zie Troas poɔ, a saŋ na fo naŋ na wa, de o wa ne a laŋ ne a gama, a gaŋ a zaa, a ganvaare. 14 Alɛksanda, a saakpeɛrɛ e ma la faaloŋ yaga. Ka a Daŋna leɛ yɔɔ o ka a seŋ o tomɔ. 15 Kyɛ meŋ gu fomeŋɛ o zie, bonzuiŋ o da zagra la a te yelbie yaga lɛ. 16 A n mannewulu piilaa, neɛ zaa da ba are ne ma, kyɛ ba zaa da bare ma la. N puoro la korɔ Naaŋmen ka O ta de ba ka ba saŋ. 17 Kyɛ a Daŋna da are ne ma la, a ko ma faŋ ka a kannoo naŋ yi n zie na tõɔ̃ ta o tao zie zaa, kyɛ ka a Tendaa deme zaa na tõɔ̃ woŋ. O meŋ da faa ma la a yi a gbeŋ noɔre poɔ. 18 A Daŋna na faa ma la yi tonfaaloŋ zaa poɔ, kyɛ O na taa ma la velaa wa ne O sazu naaloŋ poɔ. Ka pugibu be O zie tegteglɛ. Amen. 19 Puori Presella ane Akola ne Onesefɔrɔs yideme. 20 Ɛrastos kyãã be la Kɔrent poɔ. N da bare la Terɔfemɔs naŋ faa beɛrɛ Meletɔs poɔ. 21 E aneɛ a wa kyɛ ka a uoni bɔŋ ta. Eobolɔs puoro fo la. Pudens, Lenɔs, Klaodea, ane a yɔɔmine zaa toɔle la ba puoruu. 22 Ka a Daŋna Yesu Kristo be fo seɛ zie. Nɔndeteroo be yɛ zie. Amen.