2 TƐSALONEKA

¹ Pɔl, ane Selas ane Temote, A ko a Tɛsaloneka puoru deme, naŋ be a te Saa Naaŋmen ane a Daŋna Yesu Kristo eŋɛ: ² Nɔndeteroo ane `maaroŋ be yɛ zie ka a yi a te Saa Naaŋmen ane a Daŋna Yesu Kristo zie. ³ Yɔɔmine, a e la velaa ka te maŋ puori Naaŋmen bareka a yɛ zuiŋ, a na a naŋ seŋ, bonzuiŋ yɛ sagdeu duoro la zuo, kyɛ a nɔmmo yɛ kaŋ zaa naŋ taa ko o taaba yaare la yaga. ⁴ A lɛ poɔ, a Naaŋmen puoru deme zaa zie, tenee temenne maŋ fuuro ne la a yɛ kannyiri ne sagdeu yɛ naŋ taa a yɛ dɔgroŋ ne a yɛ yelfere zaa poɔ. ⁵ Ama zaa wuli la a Naaŋmen yeltoruŋ sɛrɛɛ diu. O na de yɛ la ka yɛ seŋ Naaŋmen naaloŋ, a naaloŋ ŋa zuiŋ la ka yɛ meŋ nyɛrɛ woore. ⁶ Naaŋmen e la yeltori sobɔ: O na leɛ yɔɔ la yelfere ko balaŋ naŋ ferɛ yɛ, ⁷ a ko yɛ balaŋ naŋ nyɛ yelfere, pɛnnoo laŋ ne te, a saŋ na a Daŋna Yesu naŋ wa te sãã tenvelaa poɔ ane O malkekpeɛne. ⁸ O na wa la ne vũũ zeɛlɛ a leɛ dɔgre balaŋ naŋ ba bɔŋ Naaŋmen kyɛ ba la eŋnɛ a te Daŋna Yesu Kristo yelnoore. ⁹ Ba na nyɛ la dɔgroŋ ane saŋnaa naŋ kon bɔŋ baare, kyɛ yi a Daŋna niŋe soɔ ane O faŋa eŋno zie, ¹⁰ a bebiri na O naŋ na wa te nyɛ eŋno a O nensonne eŋɛ, ka balaŋ na zaa naŋ sage de na kaa O ne noɔ. Yɛ meŋ na poɔ la ba poɔ, bonzuiŋ yɛ meŋ da sage de la te danseɛ mannoo. ¹¹ A lɛ zuiŋ, te maŋ puori ko yɛ la ka te Naaŋmen na de ka yɛ seŋ O boɔloo. Kyɛ O faŋa poɔ ka O vɛŋ ka O popeɛloŋ boɔbo zaa naŋ yi O veɛloŋ na tu baare, laŋ ne a yɛ sagdeu tomɔ zaa. ¹² Te meŋ puori la ka te Daŋna Yesu Kristo yuori na taa pugibu yɛ poɔ, ka yɛ meŋ taa a lɛ O eŋɛ, ka a seŋ a nɔndeteroo naŋ yi te Naaŋmen ane a Daŋna Yesu Kristo zie.

¹ Kyɛ, yɔɔmine, a kyaare ne a te Daŋna Yesu Kristo waabo ane lɛ te naŋ na laŋ taa a O zie, te sɔre yɛ la ² ka yɛ ta vɛŋ ka yɛ teɛroŋ yaare bee nyɛ dɔɔne, ka a yi a seɛ, bee yelbiri, bee gan kaŋ a na o yi la te zie, naŋ yeli ka a Kristo waabo bebiri faa ta la. ³ Ta vɛŋ ka neɛ zaa bɛlle yɛ vuo zaa poɔ, bonzuiŋ a bebiri kon wa kyɛ gu ka a zagroo de wẽɛ̃ wa, kyɛ ka a yelbebe dɔɔ sãã. Onɔ la a saŋbaroo bidɔɔ. ⁴ O na kyaare ne la kyɛ iri omeŋɛ ka o zuo boma zaa ba naŋ boɔle ka Naaŋmen bee ba naŋ puoro, ka o na tõɔ̃ zeŋ a na Naaŋmen a Ŋmendie poɔ, a wuli omeŋɛ ka o e la Naaŋmen. ⁵ Yɛ ba teɛre ka a saŋ na N naŋ da be yɛ zie, N da manne la ama zaa ko yɛ? ⁶ Kyɛ pampana, yɛ bɔŋ la bon na naŋ nyɔge o taa, ka o na tõɔ̃ wa sãã ka omeŋɛ saŋ wa ta. ⁷ Bonso, a nɔkondeu yelsɔglaa faa tonɔ la o tomɔ; kyɛ a onɔ naŋ nyɔge o taa pampana ŋa, na kyãã nyɔge o la taa kyɛ gu a saŋ na ba naŋ na de o yi ne a vuo poɔ. ⁸ Kyɛ a nɔkondeu sobɔ pãã na sãã la, onɔ a Daŋna naŋ na di ne O noɔre vooroŋ kyɛ saŋ bare ne O waabo sããbo. ⁹ A nɔkondeu sobɔ ŋa waabo na yi la a tomɔ Setaana naŋ tonɔ ne faŋ, ne mannoo, ne ziri tombeere zaa, ¹⁰ ane yelbatori bɛlloo zaa naŋ be balaŋ naŋ bɔrɔ weɛrɛ zie. Ba bɔrɔ weɛrɛ la, bonzuiŋ ba da ba de a yelmeŋɛ nɔmmo ka ba na tõɔ̃ nyɛ faabo. ¹¹ A ŋaa zuiŋ la, ka Naaŋmen na ko ba bɛlkpẽã ka ba na sage ne a zirii, ¹² ka balaŋ zaa meŋ, naŋ ba sage de a yelmeŋɛ kyɛ taa popeɛloŋ a yelbatoruŋ poɔ, na nyɛ la saŋbaroo. ¹³ Kyɛ a seŋ la ka te maŋ puori Naaŋmen bareka a yɛ zuiŋ, yɔɔmine a Daŋna naŋ nɔŋ, bonso, a yi a piiluu saŋ la, ka Naaŋmen da kaa iri yɛ ka yɛ nyɛ faabo naŋ yi a Seɛ iri-biŋnu ane a yelmeŋɛ sagdeu zie. ¹⁴ A ŋaa zuiŋ la, ka O da boɔle yɛ a yi a te yelnoore kannoo poɔ, ka yɛ na tõɔ̃ meŋ taa a te Daŋna Yesu Kristo eŋno. ¹⁵ Lɛ pãã yɔɔmine, yɛ are gbeŋgbeŋ a maŋ erɛ a eroŋ zaa te naŋ da wuli yɛ, ka a yi la te yelbiri poɔ bee a te gane ŋmaabo poɔ. ¹⁶ Ka te Daŋna Yesu Kristo, Omeŋɛ, ane Naaŋmen, naŋ e a te Saa naŋ nɔŋ te kyɛ ko te sukyidiibu naŋ kon bɔŋ baare ane kyello velaa naŋ yi nɔndeteroo zie, ¹⁷ dii yɛ sukyie, a e ka yɛ are gbeŋgbeŋ a yɛ yelbiveɛle ne tonveɛle zaa poɔ.

¹ A baaraa, yɔɔmine, yɛ puoro korɔ te, ka a Daŋna yelbiri tõɔ̃ yaare wiẽũ lɛ kyɛ nyɛ eŋno a na lɛ a naŋ da waa yɛ zie. ² Yɛ puoro ka Naaŋmen na faa te yi nenfaare ane potuo deme nuuri poɔ, bonzuiŋ nobɔ zaa naane taa sagdeu. ³ Kyɛ a Daŋna e la sobɔ na yɛ naŋ na tõɔ̃ sage ne, kyɛ O na e la ka yɛ are gbeŋgbeŋ a iri yɛ yi faaloŋ poɔ. ⁴ Te bɔŋ velaa a Daŋna poɔ a kyaare yɛ, ka yɛ na e la kyɛ na erɛ lɛ zaa te naŋ tere noɔre ko yɛ. ⁵ Ka a Daŋna e ka yɛ sukyie kpɛ a Naaŋmen nɔmmo ane a Kristo kannyiri poɔ. ⁶ Kyɛ te tere la noɔre ko yɛnee, yɔɔmine, a Daŋna Yesu Kristo yuori eŋɛ, ka yɛ tage yi yɔɔ kaŋ zaa zie naŋ ba tu sotori kyɛ ba tu a eroŋ te naŋ da wuli o. ⁷ Bonso, yɛmenne bɔŋ la lɛ a naŋ seŋ ka yɛ tɔglɔ te. Te da ba erɛ eroŋ zaa naŋ ba tori te naŋ da be yɛ poɔ. ⁸ Te meŋ da ba di neɛ zaa bondirii mɔlɛ lɛ kyɛ ba yɔɔ. Kyɛ te da tonɔ la toŋkpeɛne ne dɔgɛɛ zaa tensoɔ ne ŋmenaa, ka te ta taa eroŋ zaa yɛ kaŋ zaa zie. ⁹ A ba wuli ka te ba taa faŋa, kyɛ te da e la lɛ ka te de temenne a na mannewulu kaŋ ko yɛnee naŋ seŋ ka yɛ tɔglɔ. ¹⁰ Kyɛ te naŋ da be yɛ zie, te da tere la a noɔre ŋa ko yɛ: “Ka neɛ naŋ ba toŋ, a ba seŋ ka o di.” ¹¹ Bonso, te woŋ la ka ba mine ba tu sotori a yɛ poɔ. Ba ba maŋ toŋ tomɔ zaa kyɛ maŋ yɔ kpeɛrɛ nobɔ yɛlɛ poɔ. ¹² A ko bama taaba, te tere la noɔre a dɔre eŋ ba a Daŋna Yesu Kristo eŋɛ, ka ba tonɔ ba tomɔ gbili lɛ kyɛ di bamenne bondirii. ¹³ Kyɛ yɛnee, yɔɔmine, yɛ ta bale a yɛ eveɛle poɔ. ¹⁴ Kyɛ ka neɛ zaa ba wa de a te noɔre a gan ŋa poɔ, yɛ bɔŋ o velaa. Yɛ ta laŋ ne o ka vi kpɛ o. ¹⁵ Kyɛ yɛ ta de o ka o e yɛ dɔndɔmɔ, kyɛ yɛ tage o tobo a na yɛ yɔɔ la. ¹⁶ Pampana, ka a `maaroŋ Daŋna Omeŋɛ korɔ yɛ `maaroŋ tegteglɛ sori zaa poɔ. Ka a Daŋna be yɛ zaa zie. ¹⁷ Maa Pɔl la ŋmaa a puoruu ŋa ne mmeŋɛ nu. Lɛ la a `lego a gama na zaa N naŋ ŋmaa poɔ. Lɛ la ka N ŋmaa. ¹⁸ Ka a te Daŋna Yesu Kristo nɔndeteroo be yɛ zaa zie. Amen.