2 PITA

¹ Simon Pita, naŋ waa a Yesu Kristo gbaŋgbaa ne potuuro, A ko balaŋ naŋ nyɛ a sagdeu naŋ taa tɔnɔ yaga a na tenee, a yi a te Naaŋmen ne te Faara Yesu Kristo yeltoruŋ zie. ² Nɔndeteroo ane `maaroŋ be yɛ zie yaga lɛ a yi a Naaŋmen ne te Daŋna Yesu bɔmmo poɔ. ³ O Ŋmenoŋ faŋ da ko te la boma zaa naŋ seŋ nyɔvore ne Naaŋmen sobiri tuubu, a yi lɛ te naŋ bɔŋ a Onɔ naŋ boɔle te a O eŋno ne veɛloŋ eŋɛ. ⁴ Ama eŋɛ la ka O da ko te pollo kponni naŋ taa tɔnɔ yaga, ka yɛ na tõɔ̃ waa a Ŋmenoŋ waaloŋ pontaaba kyɛ yi a saŋnaa naŋ yi boɔbo faare poɔ, naŋ be a donɛɛ poɔ. ⁵ Kyɛ a ŋaa zuiŋ, yɛ e aneɛ a de eveɛle ka a poɔ yɛ sagdeu poɔ; a meŋ de bɔmmo ka o poɔ yɛ eveɛle poɔ; ⁶ a de yɛmenne taabo ka a poɔ yɛ bɔmmo poɔ; a meŋ de kannyiri ka a poɔ yɛmenne taabo poɔ; a de Naaŋmen sobiri tuubu ka a poɔ yɛ kannyiri poɔ; ⁷ a de yɔɔloŋ teɛroŋ ka a poɔ yɛ Naaŋmen sobiri tuubu poɔ; a meŋ de nɔmmo ka a poɔ yɛ yɔɔloŋ teɛroŋ poɔ. ⁸ Bonso, ka yɛnee wa taa ama zaa, ka a waa yaga lɛ, a kon tõɔ̃ vɛŋ ka yɛ waa nenweere naŋ ba nyɛ tɔnɔ zaa a te Daŋna Yesu Kristo bɔmmo poɔ. ⁹ Bonso, a neɛ naŋ ba taa ama waa la zɔŋ naŋ kon tõɔ̃ nyɛ tɔɔre, kyɛ o meŋ yinni la ka Naaŋmen da pɛge la a yelbebe o naŋ da maale, bare. ¹⁰ A lɛ poɔ, n yɔɔmine, yɛ sereŋ e aneɛ ka yɛ boɔloo ane yɛ iruŋ are gbeŋgbeŋ, bonso ka yɛnee wa erɛ ama, yɛ kon tõɔ̃ bɔŋ ŋmeɛrɛ gbɛɛ, ¹¹ kyɛ ba na tuori yɛ la vela vela a te Daŋna ne te Faara Yesu Kristo naaloŋ naŋ kon bɔŋ baare poɔ. ¹² A lɛ poɔ, N kon tõɔ̃ bare ka N maŋ teɛre yɛ a yɛlɛ ama, ne lɛ zaa yɛ naŋ bɔŋ a ama zaa a are kpẽã a yelmeŋɛ yɛ naŋ taa pampana ŋa poɔ. ¹³ N meŋ teɛre ka a tu la sori ka N seŋ yɛ ka yɛ leɛ teɛre, a saŋ na N naŋ kpeɛrɛ a eŋgan sɛge ŋa poɔ, ¹⁴ bonso, N bɔŋ la ka a kon kɔɔre kyɛ N na bare la n eŋgan sɛge ŋa, a seŋ na te Daŋna Yesu Kristo naŋ da wuli ma. ¹⁵ Kyɛ N meŋ na e la aneɛ ka yɛ na tõɔ̃ maŋ teɛre a yɛlɛ ama ka Maa wa kpi baare. ¹⁶ Kyɛ te da ba tuuro senselloŋ na ba naŋ da maale ne ba yɛŋ, a saŋ na te naŋ da wuli yɛ a te Daŋna Yesu Kristo faŋa ne waabo, kyɛ temenne nimie da nyɛ la O gandaaloŋ. ¹⁷ Bonso, O nyɛ la gyermɛ ane eŋno Naaŋmen a Saa zie, a saŋ na a kɔkɔre naŋ da yi a Gandaaloŋ Eŋno zie a yele, “Ŋa la N Bidɔɔ N naŋ nɔŋ; Onɔ la ka N poɔ pɛle ne.” ¹⁸ Te da woŋ la a kɔkɔre ŋa naŋ da yi a sazu a saŋ na te naŋ da be O zie a tankyerete zu. ¹⁹ Te meŋ taa la Ŋmen-noɔr deme daŋ-nyaabo yelbie naŋ are kpẽã. Yɛ erɛ la velaa ka yɛ taa nimizeɛ ne a daŋ-nyaabo kannoo ŋa, a na a e la kyãã naŋ nyegrɛ zilige poɔ, a gu ka a zivɛlmɛ te wa kyɛ a baguo ŋmarbiri wa iri a yɛ sukyie poore. ²⁰ Yɛ de wẽɛ̃ bɔŋ velaa ka a Ŋmen-noɔr deme daŋ-nyaabo yelbie kaŋ zaa naŋ be a Ŋmaabo poɔ ba yi a bamenne teɛroŋ poɔ. ²¹ Bonso, ba daŋ-nyaabo kanno piiluu da ba yi a nensaala boɔbo poɔ, kyɛ Naaŋmen nenkyerete da yeli la yɛlɛ a saŋ na a Sekyerete naŋ da tagra ba.

¹ Kyɛ Ŋmen-noɔr ziri deme meŋ da be la a nobɔ poɔ, a seŋ wulwul bɛlbɛllɛ meŋ na be a yɛ poɔ. Ba na sɔgle wa ne la wul tɛɛtɛɛ naŋ saŋ kyɛ meŋ zagra a Daŋna gba, Onɔ naŋ da da ba, kyɛ wa ne saŋnaa wiẽũ lɛ a ko bamenne. ² Ba yaga zie na tu la ba yelbe-eroŋ sobiri, a pãã e ka nobɔ yeli faaloŋ kyaare ne a yelmeŋɛ sobiri. ³ A yi ba taaba boma miinuu zie la ka ba na yeli yelbibɛlle a nyɛ tɔnɔ yɛ zie. Ba sɛrɛɛ diu saŋ kon kɔɔre, kyɛ ka ba saŋnaa ba gbire. ⁴ Bonso, ka Naaŋmen da ba bare a malkere naŋ da maale yelbieri kyɛ de ba lɔɔ eŋ a kuuni bog-zuluŋ poɔ, a eŋ ba banzɔlɔ a zilige poɔ kyɛ gu a sɛrɛɛ diu; ⁵ ka O da ba bare a donɛɛ kore, a saŋ na O naŋ da vɛŋ ka kõɔ̃ pɔge a donɛɛ ne a Ŋmen-ba-zo deme zaa, kyɛ faa Noa, a yeltoruŋ kaŋkanna naŋ poɔ nobɔ banii poɔ; ⁶ ka O da saŋ a tenne Sodom ne Gomora bare a vɛŋ ka a di leɛ tampɛloŋ ka a waa mannewuluu ko a Ŋmen-ba-zo deme naŋ na wa; ⁷ ka O da faa Lot, a yeltori sobɔ kaŋ naŋ nyɛ dɔŋ a nɔkonde deme ne ba tondɛgre zuiŋ ⁸ (bonso, a yeltori sobɔ ŋa naŋ da kpeɛrɛ ba poɔ, da maŋ nyɛrɛ la kyɛ wono ba nɔkonde tondɛgre bebiri zaa, ka a waa dɔgroŋ yaga a o yeltori nyɔvore poɔ)— ⁹ ka ama zaa naŋ da waa lɛ, a Daŋna meŋ bɔŋ la lɛ O naŋ na e te faa balaŋ naŋ zoro O a yi a ba gyennoo poɔ, kyɛ gu a yelbatori deme te ta a sɛrɛɛ diu daare ka ba nyɛ ba dɔgroŋ. ¹⁰ Ama sereŋ e la yelmeŋɛ ko balaŋ naŋ kyene a eŋganoŋ sobiri poɔ ne edɛgre boɔbo kyɛ meŋ de daŋnoŋ zaa gyagɔlɔ lɛ. Ba maŋ erɛ la bon zaa kperaa lɛ kyɛ taa zukuoni. Ba ba zoro dambẽɛ̃ ka ba yeli faaloŋ kyaare ne a eŋno deme. ¹¹ Ne lɛ zaa, ka a malkere taa kpẽã ne faŋ naŋ gaŋ bama zaa, ba ba nyare a eŋno deme zu ne yelbifaare a Daŋna niŋe soɔ. ¹² Kyɛ a nobɔ bama waa la a na wɛdonne naŋ taa eŋganoŋ teɛroŋ kyɛ ba taa yɛŋ, ba naŋ maale a ba nyɔgebo ne ba saŋbaroo zuiŋ, kyɛ maŋ yeli faaloŋ kyaare ne boma na tɛgɛ ba naŋ ba bɔŋ. Ba na sereŋ bɔre wɛ la a bamenne saŋ-baroo poɔ. ¹³ Ba na nyɛ la a ba yelbatoruŋ yɔɔre, balaŋ naŋ maŋ de ka a e noɔ ka ba toŋ a ba eŋgan boɔbo tomɔ a ŋmenaa saŋ. Ba waa la a na landɔgene ane felpɛmpɛlɛ, a maŋ woŋ noɔ ne bamenne bɛlloo kyɛ pãã laŋ dire tigri ne yɛ. ¹⁴ Ba taa la dɔɔpeɛmɛ nimie kyɛ kon tõɔ̃ bare a yelbebe eroŋ; ba bɛlle la balaŋ naŋ ba tõɔ̃ are; ba sukyie zanne la a digbogbo tomɔ; ba waa la ŋmɛ-eŋ bibiiri. ¹⁵ Ba da bare la a sotoraa kyɛ bɔre, a tuuro kpeɛrɛ a Balaam, a Bosor bidɔɔ sobiri poɔ, onɔ naŋ da nɔŋ a yelbatoruŋ yɔɔre. ¹⁶ Kyɛ o nɔkonde eroŋ zuiŋ la ka a boŋ, naŋ kon tõɔ̃ yeli yɛlɛ, da nyare o zu a yeli ne nensaala kɔkɔre kyɛ pãã nyɔge a Ŋmennoɔr sobɔ a yi o damboluŋ poɔ. ¹⁷ A nobɔ bama waa la na bulii naŋ ba taa kõɔ̃ ane zanzuuri sɛseɛ kpẽã naŋ daa bare. Ba de la lige naŋ soɔ zuo a biŋ ka a bebe tegteglɛ kyɛ gu ba. ¹⁸ Bonso, ba naŋ wa yeli pɔloŋ yelbie naŋ ba taa tɔnɔ zaa, ba maŋ de la eŋganoŋ boɔbo ne edɛgre a bɛlle ne a balaŋ naŋ da sereŋ zo yi a balaŋ naŋ bɔre yi a sori poɔ. ¹⁹ Ane lɛ ba naŋ polle ba ka ba na waa bamenne soobo, bana maŋ waa la bonweere gbaŋgbaare. Bonso, neɛ maŋ waa la gbaŋgbaa ko a bon na zaa naŋ tõɔ̃ o. ²⁰ Ka bana wa zo yi a donɛɛ bondɛgɛ poɔ a yi a Daŋna ne Faara Yesu Kristo bɔmmo zie, kyɛ leɛ kpɛ ka a nyɔge ba a tõɔ̃ ba, ba baaro na e la faa gaŋ a ba piilu. ²¹ Bonso, a na waa la velaa ka ba naŋ da ba bɔŋ a yeltori sobiri, gaŋ ka ba bɔŋ o kyɛ leɛ ba puoriŋ ko a nɔsoŋ na Naaŋmen naŋ da tere ko ba. ²² Kyɛ a da waa la ba zie a na a lugi yelmeŋɛ naŋ yeli: “Baa maŋ leɛ di la omeŋɛ tiiri,” kyɛ, “Dobaa na ba naŋ da pɛge maŋ leɛ bille la mɛmɛrɛ poɔ.”

¹ N bamine N naŋ nɔŋ, pampana ŋa N ŋmaa la n gan ayi sobɔ a ko yɛ. N ŋmaa la a zaa ayi ka N seŋ yɛ ka yɛ leɛ teɛre, a yɛ teɛro soŋ poɔ, ² ka yɛ na tõɔ̃ maŋ teɛre la a yelbie na a Ŋmen-noɔr kyerete deme naŋ daŋ yeli, laŋ ne a nɔteroo na tenee, a Daŋna ne a Faara potuuribo, naŋ da tere. ³ Yɛ de wẽɛ̃ bɔŋ velaa ka a baaroo bebie poɔ, elaabo deme naŋ maŋ kyene bamenne boɔbo sobiri poɔ, na wa la. ⁴ Ba na yeli la, “Yeŋ pãã la ka O waabo O naŋ polle be? A yi a saŋ na te saakommine naŋ gbire, yɛlɛ zaa kyãã waa la lɛ a naŋ da waa a yi a boma zaa iruu piilu saŋ.” ⁵ Kyɛ ba ba boɔrɔ ka ba bɔŋ ka a yi la a Naaŋmen yelbiri ka a sazu ziiri bebe ka a kɔɔre, kyɛ ka a teŋɛ meŋ biŋ kõɔ̃ zie ka o are a kõɔ̃ eŋɛ. ⁶ A meŋ yi la a kõɔ̃ zie ka a koroŋ saŋ donɛɛ da more o zaa kyɛ bɔre wɛ. ⁷ Kyɛ a meŋ yi a yelbiri ŋa zie la ka O biŋ a pampana saŋ sazu ziiri ne a teŋɛ a gu a vũũ ne a sɛrɛɛ diu ane a Ŋmen-ba-zo deme saŋ-baro daare. ⁸ Kyɛ n bamine N naŋ nɔŋ, yɛ ta yinni a yelyenaa ŋa, ka a Daŋna zie, bebiyenaa waa la a na yuomo turi, kyɛ yuomo turi meŋ waa la a na bebiyenaa. ⁹ A Daŋna ba `maa a O polloo poɔ a na nobɔ mine naŋ de ka ba bɔŋ a `maaroŋ pare. Kyɛ O di la kannyiri ne te kyɛ ba boɔrɔ ka kaŋ zaa bɔre wɛ, kyɛ ka neɛ zaa da naa leɛ ba teɛroŋ. ¹⁰ Kyɛ a Daŋna bebiri na wa la a na nannyige naŋ wa a tensoɔ saŋ. A bebiri na poɔ, a sazu ziiri na tɔle la gaa ane gɔmɔ yaga. Toloŋ kpoŋ na e la ka boma zaa nyele saŋ kyɛ ka a teŋɛ zu ne o tomɔ zaa di. ¹¹ Ka a boma ama zaa wa te saŋ bare, wolɔ pãã la ka yɛ da naa waa, a ekyerete ane a Naaŋmen sobiri tuubu poɔ? ¹² A seŋ la ka yɛ kyɛllɛ a Naaŋmen bebiri a boɔrɔ ka o wa wiẽũ. A bebiri ŋa poɔ la, ka a sazu ziiri na nyege ne vũũ a saŋ bare, kyɛ ka a boma nyele a toloŋ kpoŋ poɔ. ¹³ Ne lɛ zaa, a seŋ O polloo, te teɛrɛ la gu a sazu zipaala ane a teŋ paala, a be na yeltoruŋ naŋ kpeɛrɛ. ¹⁴ A lɛ zuiŋ, n bamine N naŋ nɔŋ, yɛ naŋ pãã gu a boma ama, yɛ e aneɛ ka yɛ be O poɔ ne eŋ`maaroŋ, ka dɛgre bee nyaroo ta kyebe yɛ zie. ¹⁵ Yɛ de ka a te Daŋna kannyiri waa faabo. Lɛ la ka Pɔl, a te yɔɔ te naŋ nɔŋ, meŋ ŋmaa ko yɛ, a seŋ a yɛŋ Naaŋmen naŋ ko o. ¹⁶ O meŋ da yeli la a yɛlɛ ama a o gama zaa poɔ. O gama taa la yɛlɛ mine naŋ waa yelkpẽã a tɛgɛ bɔmmo poɔ. Lɛ la ka balaŋ na ba naŋ ba wuli kyɛ naŋ waa nemboora maŋ leɛ a yɛlɛ o naŋ ŋmaa, a na ba meŋ naŋ e ne a Ŋmaabo mine, ka a wa ne saŋnaa ko bamenne. ¹⁷ Kyɛ yɛnee, n bamine N naŋ nɔŋ, yɛ naŋ faa bɔŋ a ŋaa, yɛ gu yɛmenne ka a nɔkonde deme yeltulimo ta tage yɛ gaa ne ka yɛ le a yɛ aro kpẽã zie poɔ. ¹⁸ Kyɛ yɛ baa do a te Daŋna ne Faara Yesu Kristo nɔndeteroo ne bɔmmo poɔ. Ka eŋno be O zie pampana ŋa ane tegteglɛ. Amen.