2 GYɔN

¹ A Neŋkpoŋ, A ko a pɔg-yuor ba naŋ iri ne o bibiiri N naŋ nɔŋ a yelmeŋɛ poɔ—ka a ba e Maa yoŋ, kyɛ ane a balaŋ na naŋ bɔŋ a yelmeŋɛ— ² a yelmeŋɛ naŋ be te eŋɛ kyɛ meŋ na be te zie tegteglɛ zuiŋ: ³ Nɔndeteroo, nyonono, ne `maaroŋ na be la te zie a yi a Saa Naaŋmen zie ane a Daŋna Yesu Kristo a Saa Bidɔɔ zie, a yelmeŋɛ ne nɔmmo poɔ. ⁴ N poɔ da pɛle la yaga ne lɛ N naŋ da nyɛ fo bibiiri mine ka ba kyene a yelmeŋɛ poɔ, a na lɛ te naŋ da de a noɔre a Saa naŋ tere ko te. ⁵ Kyɛ pampana ŋa, n pɔgyuor, N sɔre fo la—ka a ba e a na N ŋmaa la nɔpaala kaŋ ko fo, kyɛ a e la a kaŋ na te naŋ daŋ taa a piiluu saŋ la—ka te nɔnɔ taa. ⁶ Ŋa la nɔmmo: ka te kyene O nɔe zaa sobiri poɔ. Ŋa la a noɔre: ka a na lɛ yɛ naŋ da woŋ a piiluu saŋ, ka yɛ kyene nɔmmo poɔ. ⁷ Bonso, bɛlbɛllɛba yaga yi yoɔrɔ la a donɛɛ poɔ. Ba ba sage ka Yesu Kristo da wa la a eŋganoŋ poɔ. A neɛ ŋa tɔ e la a bɛlloo sobɔ ne a sobɔ na naŋ are kyaare ne Kristo. ⁸ Kaara yɛmenne, ka a boma na te naŋ da nyɛ a yi te tomɔ poɔ ta bɔre, kyɛ ka te na nyɛ yɔɔre naŋ ta. ⁹ Neɛ na zaa naŋ erɛ nɔkonde eroŋ, kyɛ ba be a Kristo wuluu poɔ, ba taa Naaŋmen. A neɛ na naŋ be a Kristo wuluu poɔ taa la a Saa laŋ ne a Bidɔɔ. ¹⁰ Ka neɛ kaŋ zaa wa wa yɛ zie kyɛ ba wa ne a wuluu ŋa, yɛ ta de o a yɛ yiri poɔ bee tuori o. ¹¹ Bonso, a neɛ na naŋ tuori o, laŋ ne o la a o potuo tomɔ poɔ. ¹² N taa la yɛlɛ yaga ka N tõɔ̃ ŋmaa ko yɛ, kyɛ N ba boɔrɔ ka N ŋmaa ne gan ane iŋk. Kyɛ N teɛre ka N na wa la yɛ zie a wa yeli yɛlɛ ko yɛ yɛ niŋe soɔ, ka te popeɛloŋ paale. ¹³ Fo yɔɔpuul-iraa bibiiri toɔle la ba puoruu. Amen.