1 TEMOTE

¹ Pɔl, naŋ waa Yesu Kristo potuuro a Naaŋmen te Faara ane a Daŋna Yesu Kristo te kyelloo, nɔteroo zuiŋ, ² A ko Temote, n bie meŋɛ a sagdeu poɔ: Nɔndeteroo, nyonono ane `maaroŋ be fo zie a yi te Saa Naaŋmen ane Kristo Yesu te Daŋna zie. ³ Lɛ N naŋ da sɔre fo a saŋ na N naŋ da gaa Masɛdonea, kyãã be a Ɛfɛsos teŋɛ poɔ ka fo na tõɔ̃ tere noɔre ko ba mine ka ba ta wuli wulu yuo zaa ⁴ bee kyɛllɛ senselloŋ bee saakom yiiluŋ yɛlɛ naŋ ba taa baaro zie. Ama zaa maŋ wa ne la nɔkpeɛne kyɛ ba wa ne Naaŋmen mɛduoruu naŋ yi a sagdeu zie. ⁵ A noɔre tao zie la nɔmmo naŋ yi a sukyiwelwel ne poteɛro velaa, ne sagdeu yelmeŋɛ poɔ. ⁶ Ba mine ŋmaa la yi a yɛlɛ ama poɔ kyɛ leɛ kyaare a yelbie naŋ ba taa tɔnɔ. ⁷ Ba boɔrɔ la ka ba waa a nɔbinna wuliwullibo, ne lɛ zaa ba ba bɔŋ a yɛlɛ ba naŋ yeli bee a yɛlɛ ba naŋ maŋ sage de biŋ kpẽã tɛgɛ. ⁸ Kyɛ te bɔŋ la ka a nɔbinnaa waa la bonvelaa ka neɛ wa de o a tonɔ ne a nɔbinna sobiri poɔ. ⁹ Te bɔŋ la ka Naaŋmen ba biŋ O noɔre ko a yeltori sobɔ, kyɛ ko a nɔkonde deme ane a yelbaderebe ne a Ŋmen-ba-zo deme, ane yelbebe deme, ne nobɔ balaŋ yɛlɛ naŋ ba e kyerete, ne potuo deme, ane balaŋ naŋ ko ba saamine ne balaŋ naŋ ko ba mamine, ne neŋkooreba, ¹⁰ ne a pẽɛ̃pẽɛ̃ deme ne dɔbɔ naŋ maŋ erɛ peɛmo tonfaare taaba, ne gbaŋgbaa koɔreba, ane ziriŋmaaraba ne nobɔ naŋ ba tu a yelbie ba naŋ pɔ—ane yɛlɛ na zaa naŋ kyaare ne a wulu soŋ ¹¹ naŋ seŋ a Naaŋmen, naŋ taa maaloo yaga, yelnoore naŋ taa pugibu, a yelnoore na O naŋ da de eŋ n nuuri poɔ. ¹² N puori la Kristo Yesu te Daŋna bareka, Onɔ naŋ ko ma faŋ, O naŋ da de ma ka N waa sagdeu sobɔ a iri ma eŋ O tomɔ poɔ zuiŋ. ¹³ N daŋ waa la neɛ naŋ maŋ yeli yelbifaare kyaare ne Naaŋmen, a dɔgre nobɔ, a to ba zomɔ, kyɛ N da nyɛ la nyonono, bonzuiŋ N da ba bɔŋ bon na N naŋ erɛ a n basagdeu poɔ. ¹⁴ A te Daŋna nɔndeteroo da waara la n zie yaga zaa, ane a sagdeu ne nɔmmo naŋ be a Kristo Yesu poɔ. ¹⁵ A yelbie ama waa la yeldɛlle a seŋ sagdeu zaa: Kristo Yesu wa kpɛ la a donɛɛ poɔ ka O wa faa yelbebe deme—a ba poɔ, N waa la a zusobɔ. ¹⁶ A ŋaa zuiŋ la ka Maa naŋ waa a zusobɔ nyɛ nyonono, ka n zie la ka Yesu Kristo na tõɔ̃ wuli O kannyiri zaa, ka a na tõɔ̃ waa mannewuluu ko balaŋ naŋ pãã na sage de O a nyɛ nyɔvore naŋ kon bɔŋ baare. ¹⁷ Pampana ŋa, ka pugibu ne eŋno be a Naa, naŋ kon bɔŋ baare, kyɛ kon bɔŋ kpi, kyɛ neɛ zaa naŋ kon bɔŋ nyɛ, ane a Naaŋmen yoŋ naŋ taa yɛŋ, zie tegteglɛ. Amen. ¹⁸ N bie, Temote, N de la a noɔre ŋa eŋ fo nuuri poɔ, a kyaare a yɛlɛ a Ŋmen-noɔr deme naŋ da yeli fo eŋɛ, ka a yi a yɛlɛ ama zie la ka fo na tõɔ̃ zɔɔ a zɔɔre velaa, ¹⁹ a nyɔge sagdeu ne poteɛro velaa taa. Ba mine naŋ da zagre a yɛlɛ ama, saŋ la ba sagdeu, a na a gbori naŋ saŋ more a kõɔ̃ poɔ. ²⁰ A ba poɔ la ka Homɛneos ane Alɛksanda naŋ be. N da iri de ba la ko Setaana, ka ba na wa bɔŋ ka ba ta yeli yelbifaare kyaare ne Naaŋmen.

¹ A lɛ poɔ, a piiluŋ, N dɔre eŋ yɛ la ka yɛ puori Naaŋmen ne sɔroo, ne puoruu, ne sooroo, ne bareka puoruu a ko nobɔ zaa— ² a ko namine ane balaŋ zaa naŋ taa faŋ, ka te na tõɔ̃ kpeɛrɛ ne `maaroŋ ne baaloŋ a Naaŋmen sobiri tuubu ne yelmeŋɛ zaa poɔ. ³ Bonso, ŋaa la a bon na naŋ waa bonvelaa Naaŋmen niŋe soɔ, ne a bon na Naaŋmen te Faara naŋ sage ne. ⁴ Naaŋmen boɔrɔ la ka nobɔ zaa nyɛ faabo kyɛ wa taa a yelmeŋɛ bɔmmo. ⁵ Bonso, Naaŋmen yenaa la bebe, kyɛ a Naaŋmen ne nensaala kpakyaga, dikyeenɛ yenaa la bebe. Onɔ la a neɛ Kristo Yesu, ⁶ naŋ da de Omeŋɛ ka O waa a nobɔ zaa leɛyɔɔ- de yɔɔre—a yɛlɛ ama dansediu na wa la a saŋ na naŋ seŋ. ⁷ A yɛlɛ ama zuiŋ la ka Naaŋmen da iri ma biŋ ka N waa a kaŋkanna ne potuuro, ne a Tendaa deme wuliwullo a sagdeu ne yelmeŋe poɔ. N yele la a yelmeŋɛ a Kristo eŋɛ kyɛ ba ŋmaara zirii. ⁸ A lɛ poɔ, N boɔrɔ la ka dɔbɔ zaa, zie zaa, ka ba puori kyɛ zɛge ba nusonne, ka suuri bee nɔkpeɛne ta kyebe. ⁹ A lɛ meŋ la ka N boɔrɔ ka pɔgɔbɔ maŋ maale bamenne ne bonsusonne ne vi zoobu ne bamenne taabo, ka a ba e ne zukɔɔloŋ naŋ villi bee salema bee `leŋ lɛpɛle bee su kpare naŋ taa daaroŋ kpẽã, ¹⁰ kyɛ ka ba maale bamenne ne tonveɛle naŋ seŋ pɔgɔbɔ naŋ tuuro Naaŋmen sobiri. ¹¹ Vɛŋ ka pɔgɔ zanna kyɛ e gbili a o zannoo poɔ ne sigru milluu zaa. ¹² Kyɛ N ba sage ka pɔgɔ wuli bee taa faŋa gaŋ dɔɔ, kyɛ ka o e gbili. ¹³ Bonso, Naaŋmen daŋ de la wẽɛ̃ maale Adam kyɛ ka Hawa meŋ tu. ¹⁴ A da ba e Adam naŋ da kpɛ bɛlloo poɔ, kyɛ a pɔgɔ la da kpɛ bɛlloo poɔ a ŋmɛ gbɛre. ¹⁵ Kyɛ Naaŋmen na are gu la pɔgɔbɔ a ba bibiiri dɔgebo poɔ, ka ba kyãã tu a sagdeu ne nɔmmo ne kyereteluŋ sobiri poɔ ne bamenne taabo.

¹ Aŋa la a yelbiri naŋ waa yeldɛlle: Ka neɛ zaa wa sereŋ boɔrɔ puoru kaara zie, o boɔrɔ la tonvelaa. ² A lɛ pãã, a fere la ka puoru kaara ta taa saŋnaa zaa, kyɛ ka o e serɛ ko pɔgɔ yenaa yoŋ, ka o nyɔge omeŋɛ velaa, a taa omeŋɛ velaa, a taa eŋno nobɔ niŋe soɔ, a tuori saama velaa, kyɛ tõɔ̃ wuli nobɔ. ³ O kon maŋ boɔrɔ dãã, bee nɔnɔ zɔɔre, bee maŋ miine ne libikɛkɛ, kyɛ O da naa erɛ baaloŋ, kyɛ ta boɔrɔ gɔmpɔge bee e libimiinu sobɔ. ⁴ A fere la ka O kaara omeŋɛ yideme velaa, kyɛ ka o bibiiri sigre bamenne korɔ o ne yelmeŋɛ zaa. ⁵ (Ka a neɛ ba bɔŋ lɛnɛɛ o naŋ na kaara omeŋɛ yideme, wolɔ la ka o na tõɔ̃ kaara a Naaŋmen puoru deme?) ⁶ A fere la ka o ta waa neɛ na naŋ ba kɔɔre a sagdeu poɔ, ka lɛ naane, o na fuuro la omeŋɛ a le kpɛ a Setaana saŋnaa poɔ. ⁷ A lɛ meŋ poɔ, a fere la ka o taa yuori a yeŋ deme poɔ, ka o ta le kpɛ zomɔ toobo ane a dɛvel bɛraa poɔ. ⁸ A puoru tontoneba meŋ zie, a fere la ka ba waa nobɔ naŋ taa yelmeŋɛ, kyɛ ta taa nɔe ayi. Ba meŋ kon maŋ boɔrɔ dãã, bee miine ne libikɛkɛ, ⁹ kyɛ ka ba taa a sagdeu yelsɔgla velaa ne poteɛroŋ parepare. ¹⁰ Vɛŋ ka yɛ de wẽɛ̃ gyɛle kaa ba, kyɛ pãã vɛŋ ka ba toŋ a puoru tontoneba tomɔ ka yelsaŋnaa zaa kyebe. ¹¹ A lɛ meŋ, a ferɛ la ka ba pɔgɔbɔ taa yelmeŋɛ, kyɛ ta ŋmaa zirii saŋ nobɔ yoe, a nyɔge bamenne velaa, kyɛ waa nobɔ naŋ seŋ sagdeu yɛlɛ zaa poɔ. ¹² Vɛŋ ka a puoru deme tontoneba waa serbɛ ko pɔgɔ yenaa yoŋ, kyɛ kaara a ba bibiiri ane bamenne yideme velaa. ¹³ Bonso, balaŋ naŋ da toŋ a puoru deme tontoneba tomɔ velaa nyɛ la tonvelaa ne pera kpoŋ a Kristo Yesu sagdeu poɔ. ¹⁴ N ŋmaa la a yelbie ama ko fo ane kyello teɛroŋ ka N na wa la fo zie wiẽũ lɛ. ¹⁵ Kyɛ ka Maa wa kɔɔre, n yelbie ama na vɛŋ la ka fo tõɔ̃ bɔŋ lɛ fo naŋ na kpeɛrɛ a Naaŋmen yiri poɔ, naŋ waa a Naaŋmen voora puoru deme ne a yelmeŋɛ lugo ane dankyen pare. ¹⁶ Neɛ zaa na sage de la ka Naaŋmen sobiri tuubu yelsɔglaa e la kpoŋ: Naaŋmen da sãã la a eŋgan eŋɛ, a waa yeltori sobɔ a Seɛ eŋɛ. Malkere da nyɛ O la; ba da kanne la O yɛlɛ a Tendaa deme poɔ; ba da sage de O la a donɛɛ poɔ; ba da de o la do ne a eŋno poɔ.

¹ A Seɛ yeli la kperaa lɛ ka a puoriŋ, ba mine na ŋmaa yi la a sagdeu sobiri poɔ kyɛ tuuro se-zirii ane kɔntɔmɔ wuluu. ² Ba maŋ ŋmaara la zirii a ba melmelloo poɔ, kyɛ taa poteɛroŋ naŋ kɔɔ ne kuri ba naŋ eŋ vũũ poɔ. ³ Ba ba sage ka nobɔ kuli taa kyɛ yeli ka nobɔ ta di bondirii mine. Naaŋmen da maale la a bondirii ama ka balaŋ naŋ sage de kyɛ bɔŋ a yelmeŋɛ, na tõɔ̃ de a ne bareka puoruu. ⁴ Bonso, Naaŋmen bon-iraa zaa waa la bonvelaa, kyɛ bon zaa kyebe ka te na zagre, ka tenee wa de a ne bareka puoruu. ⁵ Bonso, bon zaa e la Naaŋmen soobo O naŋ iri biŋ, a yi O yelbir ne a te puoruu zie. ⁶ Ka fõõ teɛre a yɛlɛ ama a ko a yɔɔmine, fo na waa la Yesu Kristo tontonvelaa naŋ na baa do a sagdeu yelbie ane a wulu velaa na fo naŋ tu poɔ. ⁷ Zagre a sensellon dɛgɛ pɔɔnyanne naŋ maŋ yele, kyɛ zanne a Naaŋmen sobiri tuubu yɛlɛ. ⁸ Bonso, eŋgan faŋ zannoo taa la tɔnɔ fẽẽ, kyɛ Naaŋmen sobiri tuubu taa la tɔnɔ yɛlɛ zaa poɔ kyɛ taa polloo a pampana nyɔvore ane a nyɔvore naŋ be niŋe naŋ na wa poɔ. ⁹ A yelbie ama waa la yeldɛlle a seŋ sagdeu zaa ¹⁰ (a ŋaa la so ka te maŋ toŋ toŋkpeɛne a nyɛ zomɔ), ka te taa la te kyello teɛroŋ a Naaŋmen voora zie. Onɔ la a nensaala zaa faara, a gaŋ a zaa, balaŋ naŋ sage de. ¹¹ Tere noɔre a yɛlɛ ama poɔ, kyɛ wuli ama meŋ. ¹² Ta vɛŋ ka neɛ zaa de ka fo ba e bon zaa a fo bile zuiŋS, kyɛ vɛŋ ka fo waa mannewuluu ko a sagdeu deme, a yelbie, ne eroŋ, ne nɔmmo, ne seɛ, ne sagdeu ne yelperete poɔ. ¹³ Gu ka N wa te wa, a de fomeŋɛ ko a ŋmaabo kannoo, a dɔre-eŋ, ane a wuluu. ¹⁴ Ta de ka a kyɔgtaa na naŋ be fo zie ka o ba e bon zaa, a kyɔgtaa na fo naŋ da de a yi a Ŋmen-noɔr sobɔ toɔlɔ zie, a saŋ na a nembɛrɛ naŋ da dɔgle ba nuuri fo eŋɛ. ¹⁵ Kyãã teɛre a yɛlɛ ama, a de fomeŋɛ zaa ko a, ka neɛ zaa na tõɔ̃ nyɛ ka fo kyenoo zaa gɛrɛ la nimitɔɔre. ¹⁶ Teɛrɛ fomeŋɛ yɛlɛ ane a wulu velaa. Kyãã be a poɔ, bonzuiŋ ka fõõ wa erɛ a lɛ, fo na faa la fomeŋɛ ane balaŋ zaa naŋ kyɛllɛ a fo yeli.

¹ Ta nyare neŋkpoŋ zaa zu yaga, kyɛ mɔgle o a na fo saa na, a mɔgle a pɔlɔ a na fo yɔɔmine na, ² a mɔgle pɔɔnyanne a na fo mamine, kyɛ mɔgle a pɔɔsare a na fo yɔɔpuulii ane yelperete zaa. ³ De gyermɛ ko pɔɔkɔbɔ naŋ sereŋ waa ba yoŋ. ⁴ Ka pɔɔkoɔre kaŋ zaa wa taa bibiiri bee yaŋ mine, vɛŋ ka ba de wẽɛ̃ zanne lɛ ba naŋ na tu a Naaŋmen sobiri a bamenne yideme poɔ a kyɛ pãã leɛ yɔɔrɔ ba dɔgreba, bonso, ama la ka Naaŋmen naŋ maŋ sage ne. ⁵ Ka pɔɔkoɔre na naŋ sereŋ waa pɔɔkoɔre wa bebe, kyɛ o meŋ ba taa neɛ zaa, o maŋ eŋnɛ la o kyello teɛroŋ zaa Naaŋmen zie kyɛ dere sɔroo ane puoruu korɔ Naaŋmen ŋmenaa ane tensoɔ saŋ. ⁶ Kyɛ a pɔɔkoɔre naŋ maŋ tu omeŋɛ noɔ boɔbo sobiri, kpi la ne lɛ o naŋ kyãã voorɔ. ⁷ Tere a nɔe ama ko a pɔɔkɔbɔ, ka kaŋ zaa ta taa saŋnaa zaa. ⁸ Ka neɛ zaa ba de boma ko omeŋɛ nobɔ, a gaŋ a zaa, balaŋ naŋ be omeŋɛ yiri poɔ, o zagre la a sagdeu kyɛ waa faa gaŋ basagdeu sobɔ. ⁹ Ta vɛŋ ka pɔɔkoɔre poɔ a pɔɔkɔbɔ poɔ ka onɔ ba ta yuomo lezaata, a da waa serɛ yenaa pɔgɔ, ¹⁰ kyɛ meŋ taa yuori o tonveɛle zuiŋ, a e pɔgɔ naŋ da kaara o bibiiri velaa, a tuori de saama velaa, ka o da pɛge a Ŋmendeme gbɛɛ, a meŋ de sommo ko balaŋ naŋ be yelferaa poɔ, kyɛ tuuro a tonsonne zaa sobiri. ¹¹ Kyɛ ta sage de a pɔɔkɔsare eŋ a pɔɔkɔbɔ poɔ, bonso ka ba boɔbo wa leɛ kpɛ dɔɔ boɔbo poɔ naŋ kyaare ne Kristo, ba maŋ boɔrɔ la ka ba kuli serbɛ. ¹² Lɛ la ka ba na nyɛ sɛrɛɛ diu, bonzuiŋ ba iri la a ba sagdeu danwẽɛ̃ sobɔ bare. ¹³ A yi a puoriŋ, ba maŋ kpɛ la entuo poɔ a yɔ yɔɔrɔ yie poɔ. A ba e a entuo yoŋ poɔ, kyɛ ba meŋ maŋ waa la gagaareba naŋ maŋ yoɔrɔ kpeɛrɛ ba taaba yɛlɛ poɔ. ¹⁴ Lɛ zuiŋ, N boɔrɔ la ka pɔɔkɔsare, ka ba kuli serbɛ a dɔge bibiiri, a kaara a ba yie velaa, kyɛ ka ba meŋ ta tere vuo zaa ko a sobɔ na naŋ kyaare ne ba ka o saŋ ba yoe. ¹⁵ Bonso, ba mine faa yi la a ama sobiri poɔ a leɛ tuuro Setaana. ¹⁶ Ka dɔɔ bee pɔgɔ kaŋ zaa naŋ sage de wa taa pɔɔkɔbɔ a o yideme poɔ, vɛŋ ka o soŋ ba kyɛ ta vɛŋ ka ba waa bontegroŋ ko a puoru deme, ka ba na tõɔ̃ soŋ balaŋ naŋ sereŋ waa pɔɔkɔbɔ. ¹⁷ A nembɛrɛ zie, balaŋ naŋ kaara yɛ a Naaŋmen sobiri poɔ, yɛ de ka ba seŋ gyermɛ boyi zie, a gaŋ a zaa, balaŋ naŋ toŋ yaga a yelbir ne wuluu poɔ. ¹⁸ Bonso, a Ŋmaabo yele la, “Ta `leŋ a naab noɔre a saŋ na o naŋ nɛbrɛ a kyi bie ka a yi,” kyɛ “A tontonɔ seŋ la o yɔɔre.” ¹⁹ Ta kyɛllɛ yɛlɛ zaa naŋ kyaare ne a nembɛrɛ kaŋ zaa zie, ka a ba e ka nobɔ bayi bee bata di la danseɛ. ²⁰ Nyare balaŋ naŋ maŋ maale yelbieri zu a nobɔ zaa niŋe soɔ, ka balaŋ naŋ kyɛre na zoro dambẽɛ̃. ²¹ N yele fo la ne danse-diu, a Naaŋmen, ne a Daŋna Yesu Kristo, ne a malkere Naŋmen naŋ iri niŋe soɔ, ka fo maŋ tuuro a nɔe ama kyɛ ta de nobɔ mine kyɛ ba sage ba mine, ka nɔmboore meŋ ta kyebe. ²² Ta dɔgle fo nuuri neɛ kaŋ zu wiẽũ lɛ, bee kpɛ nobɔ mine yelbebe poɔ. Kaara fomeŋɛ ka fo e neɛ naŋ ba taa saŋnaa zaa. ²³ Ta kyãã nyuuro kõɔ̃ yoŋ, kyɛ nyu dãã belaŋ a fo poɔ ane a fo baaloŋ bilibili zuiŋ. ²⁴ Nobɔ mine yelbebe sereŋ sãã la a de ba wẽɛ̃ a sɛrɛɛ diu zie. Nobɔ mine yelbebe tuuro la ba puoriŋ. ²⁵ A lɛ meŋ poɔ, ba mine tonveɛle sereŋ sãã la, kyɛ ka a tonveɛle naŋ ba sãã kon leɛ tõɔ̃ sɔgle.

¹ Vɛŋ ka balaŋ zaa naŋ be a gbaŋgbaa dakyara poɔ, de ba neŋkponni ka ba seŋ gyermɛ zaa, ka kaŋ zaa kon tõɔ̃ yeli yelbifaare kyaare ne Naaŋmen yuori bee a O wuluu. ² Balaŋ naŋ taa neŋkponni naŋ sage de zie, vɛŋ ka ba ta de ba neŋkponni ka ba ba e bon zaa, bonzuiŋ ba e la ba yɔɔmine. Kyɛ vɛŋ ka ba toŋ gbaŋgbaa tomɔ ko ba, bonzuiŋ balaŋ naŋ poŋ ba tomɔ tɔnɔ e la nobɔ ba naŋ tõɔ ̃ dɛlle ane balaŋ ba naŋ nɔŋ. Ama la ka fo na wuli a dɔre eŋ ba ka ba e. ³ Kyɛ ka neɛ zaa wa wuli yelyuo kyɛ ba sage ne a yelbisonne naŋ yi te Daŋna Yesu Kristo zie, bee a wuluu naŋ seŋ Naaŋmen sobiri tuubu, ⁴ o fuuro la omeŋɛ kyɛ ba bɔŋ bon zaa. O maŋ eŋ la o boɔbo faare a soorbie ane nɔkpeɛne yelbie zie. Ama maŋ wa ne la nyuuri, ne zɔɔre, ne yelfaare yeli ko taaba, ne teɛro faare, ⁵ ne tagetaa naŋ maŋ be nobɔ naŋ taa teɛroŋ naŋ saŋ zie, balaŋ ba naŋ da bɛlle ka ba ta leɛ taa yelmeŋɛ zaa kyɛ teɛre ka Naaŋmen sobiri tuubu maŋ wa ne la libie tɔnɔ. Sɛre yi ba zie. ⁶ Kyɛ Naaŋmen sobiri tuubu laŋ ne popeɛloŋ taa la tɔnɔ kpoŋ. ⁷ Bonso, te da ba taa bonzaa kpɛ ne a donɛɛ poɔ, kyɛ a e la yelmeŋɛ ka te kon tõɔ̃ leɛ de bonzaa a yi ne. ⁸ Kyɛ ka tenee wa taa bondirii ne bonsuuri, te poɔ na pɛle ne la lɛ. ⁹ Balaŋ naŋ maŋ boɔrɔ naboma le kpɛ la gyennoo ne bɛraa poɔ. Ba meŋ kpɛ la damboluŋ ne boɔbo faare naŋ na tõɔ̃ eŋ ba baaloŋ poɔ. Ŋaa la maŋ de nobɔ faa kpɛ ne a saŋnaa ne saŋ-baro zie. ¹⁰ Bonso, libie nɔmmo la a yelfaa eroŋ yaga piilu zie. Nobɔ mine naŋ sereŋ boɔrɔ libie taroo, bɔre la a sagdeu sobiri kyɛ kyɔge bamenne ne teɛro saŋnaa yaga. ¹¹ Kyɛ fõõ, naŋ e a Naaŋmen neɛ, zo yi a ama poɔ. Zo tu yeltori, ne Naaŋmen sobiri tuubu, ne sagdeu, ne nɔmmo, ne kannyiri, ane sebaaloŋ. ¹² Zɔɔ a sagdeu zɔɔvelaa. Nyɔge taa a nyɔvore naŋ kon bɔŋ baare, a be na Naaŋmen naŋ boɔle fo poɔ, a lɛ fo naŋ da sage a sagebo velaa ne a fo noɔre a danseɛ deme yaga zie. ¹³ N eŋ fo la noɔre a Naaŋmen niŋe soɔ, Onɔ naŋ ko boma zaa vooroŋ ane Kristo Yesu niŋe soɔ, Onɔ naŋ da di a O danseɛ velaa a Ponteas Pailat zie, ¹⁴ ka fo taa a nɔteroo ŋa velaa ka yeldɛgre bee yelsaŋnaa kyebe kyɛ gu a te Daŋna Yesu Kristo waabo daare, ¹⁵ a waabo Naaŋmen naŋ na wuli a Omeŋɛ saŋ—Naaŋmen, a Faŋ Zaa Sobɔ yoŋ naŋ taa maaloo, a namine zaa Naa, ane a daŋneba zaa Daŋna, ¹⁶ Onɔ yoŋ naŋ kon bɔŋ kpi, naŋ kpeɛre a kyãã na poɔ neɛ naŋ kon bɔŋ kpɛ, ne a Sobɔ na neɛ zaa naŋ da ba nyɛ bee kon tõɔ̃ bɔŋ nyɛ. O zie la ka pugibu ne kpẽã naŋ kon bɔŋ baare na be. Amen. ¹⁷ Eŋ noɔre ko balaŋ naŋ waa bontareba a pampana saŋ ka ba ta teɛre ka ba gaŋ la nensaala zaa bee eŋ ba kyello teɛroŋ a naboma na naŋ baara poɔ, kyɛ ka ba eŋ ba kyello teɛroŋ a Naaŋmen voora zie, Onɔ naŋ maŋ dere bonnoore yaga zaa korɔ te. ¹⁸ Eŋ noɔre ko ba ka ba erɛ velaa, ka ba bontaroŋ be tonveɛle poɔ, ka ba maŋ taa nuyuo kyɛ maŋ sage ka ba poŋ ba boma. ¹⁹ A sobiri ŋa poɔ la ka ba na biŋ a parvelaa ko bamenne kyɛ gu a saŋ naŋ na wa, ka ba na tõɔ̃ nyɔge taa a nyɔvore naŋ kon bɔŋ baare. ²⁰ Temote, gu velaa a yɛlɛ ama ba naŋ de eŋ fo nuuri poɔ. Leɛ yi yelbidɛgre ne yelbizagla zaa ane a nɔkpeɛne teɛroŋ ba naŋ maŋ ŋmaa zirii boɔle ka bɔmmo, ²¹ a yɛlɛ na ba mine naŋ tuuro a leɛ bɔre yi a sagdeu sobiri poɔ. Nɔndeteroo be fo zie. Amen.