1 TƐSALONEKA

¹ Pɔl, ane Selas, ane Temote, A ko a Tɛsaloneka puoru deme, naŋ be a Saa Naaŋmen ane a Daŋna Yesu Kristo poɔ: Nɔndeteroo ane `maaroŋ be yɛ zie, ka a yi te Saa Naaŋmen ane a Daŋna Yesu Kristo zie. ² Te maŋ puori la Naaŋmen bareka ko yɛ zaa, kyɛ teɛre yɛ yɛlɛ te puoruu poɔ. ³ Te da ba bare ka te teɛre, a te Saa Naaŋmen niŋe soɔ, a yɛ tomɔ naŋ yi a sagdeu zie, ane yɛ toŋkpeɛne naŋ yi a nɔmmo zie, ane a yɛ kannyiri naŋ yi a kyelloo naŋ be a Yesu Kristo zie. ⁴ Te bɔŋ la, yɔɔmine Naaŋmen naŋ nɔŋ, ka O iri yɛ la, ⁵ bonso, a te yelnoore ba wa yɛ zie ne yelbie yoŋ, kyɛ a wa la ne faŋ, ne a Sekyerete, ane a teɛroŋ kpẽã zaa. Yɛ bɔŋ la lɛ te naŋ da kpeɛrɛ yɛ zie, a yɛ zuiŋ. ⁶ Yɛ da tɔglɔ te la ane a Daŋna, a yɛ naŋ da de a yelbiri a yelfere yaga poɔ ne a popeɛloŋ naŋ yi a Sekyerete zie. ⁷ A lɛ puoriŋ, yɛ da leɛ waa la mannewuluu ko balaŋ zaa naŋ sage de, naŋ be Masɛdonea ane Akaya poɔ. ⁸ Bonso, a yɛ zie la ka a Daŋna yelbiri tannoo yire, ka a ba e Masɛdonea ne Akaya yoŋ, kyɛ zie na zaa yɛ Naaŋmen sagdeu yɛlɛ naŋ yaare. Lɛ poɔ, a ba seŋ ka te leɛ yeli yɛlɛ zaa, ⁹ bonso, a nobɔ bamenne manne la ko te lɛ te naŋ da kpeɛre yɛ zie, ne lɛ yɛ pãã naŋ da bare a tebɛ puoruu kyɛ leɛ kyaare a Naaŋmen meŋɛ naŋ voorɔ, a tonɔ korɔ O ¹⁰ kyɛ kyɛllɛ a O Bidɔɔ, naŋ be a tenvelaa poɔ. Onɔ la Yesu, O naŋ da seŋ a kuuni poɔ, Onɔ naŋ faa te a yi a suuri naŋ na wa.

¹ Yɔɔmine, yɛ bɔŋ la lɛ te naŋ da kpeɛre yɛ zie, ka a da ba e ka a ba taa tɔnɔ. ² Yɛ bɔŋ la ka te naŋ daŋ nyɛ woore ane zomɔ a Felepe teŋɛ poɔ, Naaŋmen zuiŋ la ka te da kanne a Naaŋmen yelnoore yɛ zie kperaa lɛ, kyɛ te da e la lɛ ne dɔɔne yaga. ³ Bonso, te dɔreeŋ ba yi a yɛŋ na ba naŋ maŋ bɛllɛ ne nobɔ, bee yeldɛgre, bee bɛlloo ba naŋ maŋ nare biŋ poɔ. ⁴ Kyɛ lɛ na Naaŋmen naŋ da sage de a yelnoore eŋ te nuuri poɔ, lɛ ka te meŋ kanne. Te ba kanne ka te pɛle nensaaleba poore kyɛ Naaŋmen poɔ la, Onɔ naŋ gyɛle a te sukyie kaara. ⁵ Yɛ bɔŋ ka te da ba yeli ne nɔnoɔ yelbie bee sɔgle digbogbo zaa togtogi. Naaŋmen e la te danseɛ sobɔ. ⁶ Te da ba boɔrɔ eŋno nensaala zie, bee yɛnee zie, bee neɛ zaa zie. Te da taa la sori, a te naŋ waa Kristo potuuribo, ka te na tõɔ̃ taa eroŋ yɛ zie, ⁷ kyɛ te da taa la nimibaaloŋ yɛ zie, a seŋ na pɔgɔ naŋ guolo kyɛ kaara o biiri. ⁸ A lɛ poɔ, a nɔmmo teɛroŋ te naŋ taa yɛ zie zuiŋ la ka te da ba de a Naaŋmen yelnoore yoŋ ko yɛ, kyɛ temenne vooroŋ meŋ, bonzuiŋ yɛ da waa la nobɔ te naŋ nɔŋ. ⁹ A lɛ pãã, yɔɔmine, yɛnee la teɛre te toŋkpeɛne ne dɔgɛɛ zaa; tensoɔ ne ŋmenaa, te toŋ la tomɔ, bonzuiŋ te da ba boɔrɔ ka te taa eroŋ zaa yɛ kaŋ zaa zie, a saŋ na te naŋ da kanne a Naaŋmen yelnoore ko yɛ. ¹⁰ Yɛnee la danseɛ deme laŋ ne Naaŋmen, ne lɛ te naŋ kpeɛrɛ yɛnee naŋ sage de zie ne yelsonne ne yeltori, ka saŋnaa zaa meŋ kyebe. ¹¹ Yɛnee la bɔŋ ka te da dɔre eŋ yɛ la, a de sukyi`maaroŋ ko yɛ, kyɛ tage yɛ kaŋ zaa tobo a na saa naŋ maŋ e omeŋɛ biiri, ¹² ka yɛ kyenoo na tõɔ̃ seŋ a Naaŋmen sobiri kyenoo, Onɔ naŋ boɔlɔ yɛ ka yɛ wa kpɛ O naaloŋ ne O eŋno poɔ. ¹³ A ŋaa zuiŋ la ka te puoro Naaŋmen bareka tegteglɛ, bonzuiŋ a saŋ na yɛ naŋ da de a Naaŋmen yelbiri yɛ naŋ woŋ te zie, yɛ da ba de o na nensaala yelbiri, kyɛ Naaŋmen meŋɛ yelbiri naŋ tonɔ o tomɔ a yɛnee naŋ sage de zie la. ¹⁴ A lɛ zuiŋ, yɛnee yɔɔmine, yɛ da waa la nobɔ naŋ tɔglɔ a Naaŋmen puoru deme naŋ be a Kristo Yesu poɔ, naŋ be a Gyudea paaloŋ poɔ, bonso yɛ meŋ da nyɛ la woore a yi yɛmenne teŋɛ deme zie ka a seŋ a woore na ba naŋ da nyɛ a Gyu deme zie, ¹⁵ balaŋ naŋ da ko a Daŋna Yesu ane bamenne Ŋmen-noɔr deme kyɛ meŋ digi te bare. Ba da ba pɛle Naaŋmen poɔ, kyɛ kyaare ne nensaala zaa, ¹⁶ ba naŋ ba sage ka te yeli yɛlɛ zaa ko a Tendaa deme ka ba na tõɔ̃ nyɛ faabo. Lɛ ka ba maŋ erɛ ka ba yelbebe dɔgle taa, kyɛ a lɛ puoriŋ, Naaŋmen suuri wa la ba zie. ¹⁷ Kyɛ yɔɔmine, a yelfere naŋ tage te yi yɛ zie fẽẽ lɛ (ka a e te eŋgama poɔ, kyɛ a ba e lɛ a te sukyie poɔ), te da e la aneɛ yaga a sereŋ boɔrɔ ka te tõɔ̃ leɛ nyɛ taa niŋ-soore. ¹⁸ Te da maŋ boɔrɔ la ka te wa yɛ zie—yelmeŋɛ, Maa Pɔl da boɔrɔ la lɛ gbɛɛ awolɔ— kyɛ Setaana da ŋmaa te la bare. ¹⁹ Boŋ la te kyello teɛroŋ, bee te popeɛloŋ, bee te pugibu yɔɔre zupile? A ba e yɛnee a saŋ na yɛ naŋ na be te Daŋna Yesu niŋe soɔ a O waabo poɔ? ²⁰ Bonso, yɛnee la te eŋno ne te popeɛloŋ.

¹ A lɛ poɔ, te naŋ da kon tõɔ̃ leɛ dire kannyiri, te da teɛre ka a na waa la velaa ka ba bare te yoŋ Atens poɔ. ² Te toŋ la te yɔɔ Temote, naŋ e Naaŋmen tontonɔ ne te tonton tasobɔ a Kristo yelnoore poɔ, ka o wa soŋ yɛ ka yɛ are velaa a e ka yɛ taa sukyidiibu a yɛ sagdeu poɔ, ³ ka neɛ zaa ta bɔre a yelfere ama zuiŋ. Yɛnee la bɔŋ ka ba iri biŋ la ka ama zaa na waa la lɛ te zie. ⁴ A saŋ na te naŋ da be yɛ zie gba, te daŋ yeli ka te na nyɛ la dɔgroŋ, kyɛ ka a sereŋ e lɛ, a na yɛ naŋ bɔŋ. ⁵ A ŋaa zuiŋ la, N naŋ da kon tõɔ̃ leɛ dire kannyiri, N da toŋ ka N bɔŋ yɛ sagdeu milluu. N da zoro la dambẽɛ̃ ka a bɛlbɛllɛ ta wa bɛlle yɛ, ka a te tomɔ ba la taa tɔnɔ. ⁶ Kyɛ pampana Temote yi la yɛ zie wa te zie ne yelnoore naŋ kyaare yɛ sagdeu ne nɔmmo. O yeli ko te la ka yɛ maŋ taa la teɛroŋ velaa te zie kyɛ leɛ boɔrɔ te nyaabo a na te meŋ naŋ boɔrɔ yɛ nyaabo. ⁷ A lɛ poɔ, yɔɔmine, a yɛ sagdeu zuiŋ la ka te taa sukyidiibu a te yelferaa ne yeltegroŋ poɔ. ⁸ A lɛ puoriŋ, te voorɔ la, yɛ naŋ are gbeŋgbeŋ a Daŋna poɔ. ⁹ Wolɔ ka te na leɛ puori Naaŋmen bareka ka a seŋ ne a popeɛloŋ te naŋ taa a te Naaŋmen niŋe soɔ a yɛnee zuiŋ? ¹⁰ Tensoɔ ane ŋmenaa zaa te maŋ puoro la yaga ka te na tõɔ̃ leɛ nyɛ yɛ, a soŋ yɛ ne a bon na naŋ ba kyebe a yɛ sagdeu poɔ ka a paale. ¹¹ Ka Naaŋmen ane te Saa meŋɛ ne te Daŋna Yesu Kristo maale a sori ko te ka te wa yɛ zie. ¹² Ka a Daŋna maale yɛ ka yɛ nɔmmo duoro kyɛ yaare yaga ko yɛ taaba ane neɛ zaa, a na te naŋ taa nɔmmo ko yɛ. ¹³ Ka O maale yɛ ka yɛ sukyie are, ka saŋnaa zaa kyebe a yelkyerete poɔ, a te Saa Naaŋmen niŋe soɔ, a saŋ na te Daŋna Yesu Kristo naŋ na wa laŋ ne O nensonne zaa.

¹ A lɛ pãã, yɔɔmine, te sɔrɔ yɛ la kyɛ dɔre eŋ yɛ a Daŋna poɔ, ka na lɛ yɛ naŋ da de te zie, ka yɛ kyene ka Naaŋmen poɔ pɛle, ka yɛ meŋ erɛ lɛ ka a zuo. ² Bonso, yɛ bɔŋ la a nɔe te naŋ tere ko yɛ ka a yi a Daŋna Yesu zie. ³ Bonso, Naaŋmen boɔbo la aŋa, naŋ e yɛ iri-biŋnu: ka yɛ bare pẽɛ̃pẽɛ̃ yɛlɛ; ⁴ ka yɛ kaŋ zaa bɔŋ lɛ o naŋ na tõɔ̃ taa o eŋgan, a o iri-biŋnu ane eŋno poɔ, ⁵ ka a ba e ne a boɔbo faare naŋ fere, a seŋ na a Tendaa deme naŋ ba bɔŋ Naaŋmen maŋ taa; ⁶ ka neɛ zaa ta zuo o yɔɔ a nɛbre o yɛlɛ kaŋ zaa poɔ, bonzuiŋ a Daŋna la a yelfaare ama zaa leɛ-yɔɔre sobɔ, a na te naŋ daŋ yeli kyɛ kpãã yɛ. ⁷ Bonso, Naaŋmen da ba boɔle te ka te waa tondɛgre deme, kyɛ yelkyerete deme la. ⁸ A lɛ poɔ, neɛ na naŋ zagre a yɛlɛ ŋa ba zagre nensaala kyɛ Naaŋmen la, Onɔ meŋ naŋ ko yɛ a O Sekyerete. ⁹ Kyɛ a yɔɔloŋ nɔmmo yɛlɛ poɔ, a ba fere ka N ŋmaa yɛ yelbiri kaŋ zaa, bonzuiŋ Naaŋmen la wuli yɛnee yɛmenne ka yɛ nɔnɔ taa. ¹⁰ Yelmeŋɛ, yɛ sereŋ e la lɛ ko a yɔɔmine zaa naŋ be Masɛdonea paaloŋ zaa poɔ. Kyɛ te sɔrɔ yɛ la, yɔɔmine, ka yɛ kyãã erɛ lɛ ka a zuo. ¹¹ Yɛ e aneɛ ka yɛ tu a sobiri naŋ waa bɔeŋ, kyɛ kaara yɛmenne yɛlɛ a toŋ yɛ tomɔ ne yɛmenne nuuri a na lɛ te naŋ da yeli ko yɛ, ¹² ka yɛ kyenoo na waa soŋ a yeŋ deme zie, ka yɛ ba la taa bomboɔre zaa. ¹³ Yɔɔmine, te ba boɔrɔ ka yɛ ta bɔŋ a balaŋ naŋ gaŋ gbire yɛlɛ, bee taa posaŋnaa a na balaŋ naŋ ba taa kyelloo zaa. ¹⁴ Ka tenee de ka Yesu kpi la kyɛ leɛ iri, te meŋ na de la ka Naaŋmen na taa la Yesu ane balaŋ meŋ naŋ be O poɔ kyɛ gbire, a wa ne. ¹⁵ Ne lɛ a Daŋna yelbiri naŋ yeli, te yele la ama korɔ yɛ, ka te balaŋ naŋ kyɛre, naŋ kyãã voorɔ te gu a Daŋna waabo saŋ, te kon tõɔ̃ de niŋe a balaŋ naŋ gbire zie. ¹⁶ Bonso, a Daŋna meŋɛ na yi la a tenvelaa sigi wa ne tannoo, ne a malkere zusobɔ kɔkɔre, ane a Naaŋmen eelɛ peɛloo, ka balaŋ naŋ kpi Kristo poɔ na de wẽɛ̃ iri. ¹⁷ Kyɛ tenee naŋ kyãã voorɔ a be puoriŋ, Naaŋmen na nyɔge te la do laŋ ne ba a zanzuuri poɔ a te pɔge a Daŋna a be. Lɛ ka te na be a Daŋna zie tegteglɛ. ¹⁸ A lɛ zuiŋ, yɛ de sukyidiibu ko taaba ne a yelbie ama.

¹ Kyɛ yɔɔmine, a ba fere ka N ŋmaa yelbie kaŋ zaa ko yɛ naŋ kyaare a saŋ bee a bebiri. ² Bonso, yɛnee yɛmenne bɔŋ la velaa ka a Daŋna bebiri na wa la a na tensoɔ nannyige. ³ A saŋ na nobɔ naŋ na yeli, “`Maaroŋ ne laafia bebe la,” saŋnaa na wa la ba zie daadaa a na pɔɔpoɔ poɔ naŋ maŋ ɔɔ o lɛ, kyɛ ba kon tõɔ̃ zo yi a saŋnaa zie. ⁴ Kyɛ yɛnee, yɔɔmine, yɛ ba be lige poɔ ka a bebiri ŋa na uri yɛ a na nannyige. ⁵ Yɛ zaa e la a kyãã bidɔbɔ ane a ŋmenaa saŋ bidɔbɔ. Te ba poɔ a tensoɔ bee lige poɔ. ⁶ A lɛ zuiŋ, yɛ ta vɛŋ ka te gbire a na ba mine naŋ erɛ, kyɛ vɛŋ ka te gu kyɛ nyɔge temenne velaa. ⁷ Bonso, a gõɔ̃gbire maŋ gbire la tensoɔ, ka dããkuoluu deme meŋ kuoli tensoɔ. ⁸ Kyɛ tenee naŋ be a ŋmenaa saŋ poɔ, vɛŋ ka te nyɔge temenne velaa a de sagdeu ane nɔmmo su a na zɔɔre kpartegro naŋ pɔge a nyaa, kyɛ meŋ de a faabo kyello teɛroŋ vɔgle a na zɔɔre zupile. ⁹ Bonso, Naaŋmen da ba nare biŋ ka te nyɛ O suuri, kyɛ ka te nyɛ faabo naŋ yi a te Daŋna Yesu Kristo puoriŋ. ¹⁰ Onɔ la kpi a te zuiŋ, ka tene wa gbire bee ka te ba gbire, te na tõɔ̃ laŋ voorɔ ne O. ¹¹ A lɛ poɔ, yɛ de sukyidiibu ne mɛduoruu ko taaba, a na yɛ meŋ naŋ erɛ. ¹² Te sɔrɔ yɛ la yɔɔmine, yɛ kyɛllɛ balaŋ naŋ tonɔ yɛ poɔ, balaŋ naŋ kaara yɛ a Daŋna poɔ a kpããna yɛ. ¹³ Yɛ de ba ne eŋno yaga nɔmmo poɔ a ba tomɔ zuiŋ. Kyɛ yɛ vɛŋ ka `maaroŋ be yɛ taaba zie. ¹⁴ A lɛ puoriŋ, te dɔre eŋ yɛ la, yɔɔmine, ka yɛ kpãã a barewonnu deme, kyɛ de sukyi`maaroŋ ko balaŋ naŋ ba taa kyelloo zaa, a soŋ a baaleba kyɛ meŋ di kannyiri neɛ zaa zie. ¹⁵ Yɛ e aneɛ ka kaŋ zaa ta leɛ yɔɔrɔ faaloŋ ane efaare korɔ kaŋ zaa, kyɛ yɛ maŋ tuuro a eveɛle sobiri a yɛ taaba zie ane nobɔ zaa zie. ¹⁶ Yɛ taa popeɛloŋ saŋ zaa; ¹⁷ yɛ puoro tegteglɛ; ¹⁸ yɛlɛ kaŋ zaa poɔ, yɛ puori Naaŋmen bareka, bonso, a ŋaa la a Naaŋmen boɔbo yɛ zie a Yesu Kristo poɔ. ¹⁹ Yɛ ta kpinni a Seɛ vũũ bare; ²⁰ yɛ ta de a Ŋmen-noɔr deme kannoo ka a ba e bon zaa. ²¹ Yɛ maŋ gyɛle iri bɔŋ boma zaa. Yɛ nyɔge taa a bon na naŋ veɛlɛ. ²² Yɛ bare eroŋ zaa naŋ sãã a na yelfaare. ²³ Ka a `maaroŋ Naaŋmen meŋɛ e ka yɛ waa O iri-biŋnu deme a yɛ zie zaa poɔ. Ka O gu a yɛ seɛ ne yɛ vooroŋ ane yɛ eŋgan zaa ka yelsaŋnaa kyebe, a te ta a Daŋna Yesu Kristo waabo. ²⁴ A Neɛ na naŋ boɔle yɛ e la a sobɔ na naŋ taa dɛlloo, kyɛ O na e la lɛ. ²⁵ Yɔɔmine, yɛ puoro korɔ te. ²⁶ Yɛ puori a yɔɔmine zaa ne mooro soŋ. ²⁷ A Daŋna zuiŋ la ka N tere noɔre ko yɛ ka yɛ kanne a gan ŋa ko a yɔɔmine soŋ zaa. ²⁸ Ka a te Daŋna Yesu Kristo nɔndeteroo be yɛ zie. Amen.