1 PITA

¹ Pita, naŋ waa Yesu Kristo potuuro, A ko a nɔɔre Naaŋmen naŋ iri, naŋ yaare a Pɔntos, Galatea, Kapadosea, Asia ane Betonea paaloŋ poɔ, ² balaŋ na te Saa Naaŋmen naŋ iri a seŋ na O naŋ daŋ bɔŋ, a yi a Seɛ iri-biŋnu zie, ka ba taa nɔ-eŋ ane Yesu Kristo zẽẽ meroo: Nɔndeteroo be yɛ zie ane `maaroŋ yaga lɛ. ³ Pugibu be la Naaŋmen ne te Daŋna Yesu Kristo Saa zie! A O nyonono kpoŋ zuiŋ la ka O leɛ dɔge te a kyello voora poɔ, a yi a Yesu Kristo kũũ leɛ-iruŋ zie, ⁴ ne a gbannoŋ naŋ kon bɔŋ baare poɔ, a gbannoŋ naŋ ba taa dɛgre zaa bee yi kyeɛ—ba naŋ gu ko yɛ a tenvelaa poɔ, ⁵ yɛ balaŋ Naaŋmen naŋ are gu ne O faŋa, a yi a sagdeu zie, a te ta a saŋ na a faabo naŋ e sere ka o wa sãã, a baara daare poɔ. ⁶ A ŋaa zuiŋ la ka yɛ dire noɔ yaga, ne lɛ zaa ka a da seŋ ka yɛ taa posaŋnaa fẽẽ gyenno parɛɛ yaga poɔ. ⁷ A gyennoo ama zaa la wa ka yɛ sagdeu—naŋ taa tɔnɔ yaga gaŋ salema naŋ maŋ wɛ, ne lɛ zaa ba naŋ leɛ maale o ne vũũ—ka o gyɛl-kaao na sãã ne pugibu, ne gyermɛ, ne eŋno a saŋ na Yesu Kristo naŋ na wa sãã. ⁸ Ne lɛ zaa yɛ naŋ da ba nyɛ O, yɛ nɔnɔ O la; ne lɛ zaa pampana ŋa yɛ naŋ kyãã ba nyɛ O, yɛ sagra dere O la a dire noɔ yaga ne popeɛloŋ naŋ ba taa mannoo kyɛ taa eŋno naŋ zuo, ⁹ yɛ naŋ nyɛrɛ a yɛ sagdeu baaro zie, naŋ e a yɛ seere faabo. ¹⁰ A Ŋmen-noɔr deme, balaŋ naŋ da kanne a nɔndeteroo naŋ na wa yɛ zie kannoo, da soore la kyɛ sereŋ boɔrɔ ka ba bɔŋ a faabo ŋa yɛlɛ zaa. ¹¹ Ba da boɔrɔ la ka ba bɔŋ a saŋ na ane a vuo na a Kristo Seɛ naŋ da be ba zie naŋ da wuli, a saŋ na O naŋ daŋ dire a Kristo woore ane a eŋno naŋ na tu O puoriŋ danseɛ. ¹² A wuluu da sãã la ba zie, ka ba da ba kanne a kannoo ŋa ko bamenne kyɛ kanne ko tenee. Kyɛ pampana ŋa, balaŋ naŋ da kanne a yelnoore kannoo ko yɛ ne a Sekyerete Naaŋmen naŋ toŋ ka O yi a tenvelaa a sigi wa, manne la a yɛlɛ ko yɛ, a yɛlɛ na a malkere naŋ sereŋ boɔrɔ ka ba pigri kaa. ¹³ A lɛ poɔ, yɛ vɛŋ ka yɛ yɛŋ teɛroŋ zaa e sere, a taa yɛmenne velaa, a de yɛ kyello teɛroŋ zaa eŋ a nɔndeteroo ba naŋ na wa ne a ko yɛ a saŋ na Yesu Kristo naŋ na wa te sãã. ¹⁴ A na bibiiri naŋ maŋ eŋnɛ nɔe, yɛ ta leɛ yɛmenne waaloŋ ka a seŋ a boɔbo faare naŋ da nyɔge yɛ a saŋ na yɛ naŋ da ba bɔŋ bon zaa. ¹⁵ Kyɛ a na Onɔ naŋ da boɔle yɛ naŋ waa kyerete, a seŋ ka yɛ meŋ waa kyerete a yɛ eroŋ zaa poɔ; ¹⁶ bonzuiŋ, ba ŋmaa la biŋ: “Waa kyerete, bonso N waa la kyerete.” ¹⁷ Ka yɛnee wa boɔle a Saa naŋ maŋ dire nobɔ zaa tomɔ sɛrɛɛ a seŋ lɛ kaŋ zaa naŋ toŋ kyɛ ba taa bokpeɛbo ko kaŋ zaa, yɛ tuuro yɛ sobiri a na saama kyɛ zoro dambẽɛ̃. ¹⁸ Yɛ bɔŋ la ka ba da ba de bonwɛre a na selva bee salema a leɛ yɔɔ de yɛ ka yɛ tõɔ̃ yi a yɛ eroŋ naŋ ba taa tɔnɔ poɔ, a eroŋ yɛ naŋ da de a yɛ saakommine zie. ¹⁹ Kyɛ ba da leɛ yɔɔ de yɛ la ne Kristo zẽẽ na daaro naŋ zuo, a na a pelee naŋ ba taa landɔgene zaa bee zisaŋnaa zaa zẽẽ. ²⁰ Ba daŋ bɔŋ O la kyɛ ka a donɛɛ pare pãã biŋ, kyɛ a baaro daare ama poɔ la ka O da sãã a yɛnee zuiŋ. ²¹ A yi O puoriŋ la ka yɛ sage de Naaŋmen, Onɔ naŋ iri Yesu kuuni poɔ a de eŋno ko O, ka yɛ sagdeu ane a yɛ kyello teɛroŋ na tõɔ̃ be Naaŋmen zie. ²² Yɛ naŋ da e ka yɛ seere yi parepare, yɛ naŋ da eŋnɛ a yelmeŋɛ a yi a Seɛ zie ka yɛ tõɔ̃ taa nɔmmo meŋɛ a yɛ yɔɔmine zie, yɛ nɔnɔ taaba ne nimizeɛ ne sukyiwelwel. ²³ Bonso, ba da leɛ dɔge yɛ la, ka a da ba yi a bombore na naŋ saŋ zie, kyɛ a bombore naŋ kon bɔŋ saŋ zie la, naŋ e a Naaŋmen yelbiri naŋ voorɔ kyɛ kon bɔŋ baare. ²⁴ Bonso, “Eŋganoŋ zaa waa la na moɔ, kyɛ nensaala eŋno zaa waa la na mɔpoore; a moɔ gbeɛle la ka o poore suori le, ²⁵ kyɛ a Daŋna yelbiri be la be tegteglɛ.” Aŋa la a yelbiri ba naŋ da kanne yɛ zie.

¹ A lɛ poɔ, yɛ iri faaloŋ zaa, ne bɛlloo zaa, ane melmeloo, ne nyuuri, ne yosaŋnaa zaa bare. ² A na bilɛɛ, yɛ miine ne yelbiri beroŋ meŋɛ eŋɛ ka yɛ na tõɔ̃ baa a yelbiri eŋɛ, ³ yɛ naŋ wa lɛnne nyɛ ka a Daŋna yɛlɛ veɛlɛ la. ⁴ A yɛ naŋ waara O zie, Onɔ naŋ waa na a kuvoora na nobɔ naŋ da zagre kyɛ Naaŋmen da iri ka O taa tɔnɔ yaga, ⁵ yɛ meŋ waa la a na kuvobɔ ba naŋ de meɛrɛ ne a seɛloŋ yiri, naŋ na e puoru neŋkponnuŋ kyerete, naŋ maŋ maale seɛloŋ bɔɔre na Naaŋmen naŋ boɔrɔ a yi Yesu Kristo puoriŋ. ⁶ A lɛ poɔ, a Ŋmaabo la yeli: “Kyɛllɛ, N biŋ la goŋgonaa kuuri Zion poɔ, a kuuri N naŋ iri naŋ taa tɔnɔ yaga, kyɛ onɔ naŋ sagra dere O kon bɔŋ nyɛ vi.” ⁷ A lɛ poɔ, a yɛnee naŋ sage ne O zie, O taa la tɔnɔ yaga, kyɛ a yelkonde deme zie, “A kuuri na a meɛmeɛrebɛ naŋ zagre, Onɔ la waa a goŋgonaa kuuri zusobɔ,” ⁸ kyɛ O meŋ leɛ e la, “A kuuri na naŋ maŋ vɛŋ ka nobɔ ŋmeɛrɛ gbɛɛ ane a kuuri na naŋ na e ka ba le.” Ba ŋmɛ la gbɛɛ a yelbir zie, ba naŋ ba sage de o, a na ba naŋ da maale biŋ ko ba. ⁹ Kyɛ yɛ e la nen-iri, naaloŋ puoru neŋkponnuŋ, tendaa kyerete, nobɔ naŋ e Naaŋmen soobo, ka yɛ na manne O gandaaloŋ, Onɔ naŋ da boɔle yɛ a yi a lige poɔ a eŋ yɛ O kyãã beɛ poɔ. ¹⁰ A saŋ na naŋ tɔle, yɛ da ba waa nobɔ, kyɛ pampana yɛ e la Naaŋmen nobɔ; yɛ da ba nyɛ nyonono, kyɛ pampana yɛ nyɛ la nyonono. ¹¹ N bamine N naŋ nɔŋ, N sɔrɔ yɛ la a na saama ne nɔɔre, ka yɛ bare eŋganoŋ boɔbo naŋ zɔɔrɔ ne yɛ seere. ¹² Vɛŋ ka yɛ eroŋ a tendaa deme poɔ waa soŋ, ne lɛ zaa ba naŋ yeli yelfaare kyaare ne yɛ a na yɛ e la efaare deme, ka ba na tõɔ̃ nyɛ yɛ tonveɛle kyɛ pugi Naaŋmen a daare na O naŋ na wa te zie. ¹³ Sigri yɛmenne a Daŋna zuiŋ ko noɔre zaa nobɔ naŋ maale biŋ: ka a yi a Naa naŋ zuo nobɔ zaa zie, ¹⁴ bee ka a yi a zikaareba zie, balaŋ ba naŋ toŋ ka ba dɔgre a efaa erebɛ, kyɛ meŋ pugi balaŋ naŋ erɛ velaa. ¹⁵ Bonso, Naaŋmen boɔbo la ka a yi yɛ eveɛle zie ka yɛ na tõɔ̃ pɔge a dambolo naŋ ba bɔŋ bon zaa nɔe. ¹⁶ Yɛ kpeɛrɛ a na nenweere, kyɛ yɛ ta de a yɛ weɛloŋ kpeɛbo ka a tõɔ̃ pɔge yɛ efaa eroŋ, kyɛ yɛ kpeɛrɛ seŋ a Naaŋmen gbaŋgbaare. ¹⁷ Eŋnɛ nobɔ zaa. Nɔnɔ a yɔɔmine. Zoro Naaŋmen. Eŋnɛ a Naa. ¹⁸ Gbaŋgbaare, yɛ sigri yɛmenne a yɛ daŋneba zie ane dambẽɛ̃ ka a ba e nenveɛle bee nembaaloŋ yoŋ zie kyɛ a balaŋ naŋ ba tori zie meŋ. ¹⁹ A ŋaa tõɔ̃ wa ne la bareka puoruu: ka a neɛ wa are kpẽã a woore o naŋ ba seŋ ne posaŋnaa poɔ, bonzuiŋ o taa la teɛroŋ naŋ kyaare Naaŋmen. ²⁰ Kyɛ pugibu buo la na wa ka yɛnee nyɛ ŋmeɛbo a yɛ yelbebe zuiŋ kyɛ are kpẽã? Kyɛ ka yɛnee nyɛ woore a yɛ eveɛle zuiŋ kyɛ are kpẽã, a ŋaa waa la soŋ Naaŋmen zie. ²¹ Ama eŋɛ la ka O boɔle yɛ, bonzuiŋ Kristo meŋ nyɛ la woore a te zuiŋ, a wuli yɛ manno kaŋ ka yɛ na tõɔ̃ tuuro O sobiri. ²² “O da ba maale yelbieri zaa, bɛlloo meŋ da kyebe O noɔre poɔ.” ²³ A saŋ na ba naŋ da toorɔ O, O da ba leɛ to ba; a saŋ na O naŋ da nyɛ woore, O da ba fugro ba. Kyɛ O da de la Omeŋɛ eŋ a neɛ na naŋ maŋ dire sɛrɛɛ ne yeltoruŋ nuuri poɔ. ²⁴ Onɔ, Omeŋɛ da de la te yelbebe Omeŋɛ eŋgan eŋɛ a teɛ zu, ka tenee naŋ da kpi ko yelbebe na tõɔ̃ voorɔ a yeltoruŋ eŋɛ; a O `mɔmɔ zuiŋ la ka yɛ nyɛ sammo. ²⁵ Bonso, yɛ da waa la a na peere naŋ bɔrɔ a sori, kyɛ pampana yɛ leɛ wa la a yɛ seere Kyeenɛ ne Kaara zie.

¹ Pɔgɔbɔ, lɛ poɔ, yɛ sigre yɛmenne korɔ yɛmenne serbɛ ka ba kaŋ zaa ba wa sage a yelbiri, ne lɛ zaa a yelbiri kyebe, a ba pɔgɔbɔ eroŋ na tõɔ̃ mɔgle ba la, ² ba naŋ wa nyɛ yɛ eroŋ kyerete naŋ laŋ ne dambẽɛ̃. ³ Ta vɛŋ ka yɛ veɛloŋ yi yɛ eŋgama zie a na zukɔɔloŋ `leŋnu ane salema boma pɔgɔbɔ naŋ maŋ eŋ ba eŋgan eŋɛ, ane bonsuuri zaa. ⁴ Kyɛ yɛ vɛŋ ka yɛ veɛloŋ yi a yɛ sukyiteɛroŋ naŋ ba sãã zie, a be naŋ kon tõɔ̃ wɛ, ne a seɛ naŋ waa baaloŋ kyɛ ba dɔɔnɔ, kyɛ taa tɔnɔ yaga Naaŋmen niŋe soɔ. ⁵ Bonso, a lɛ meŋ la, a saŋ naŋ tɔle poɔ, ka a pɔɔsonne naŋ da taa kyello teɛroŋ Naaŋmen zie da maŋ maale bamenne veɛloŋ kyɛ sigri bamenne a ba serbɛ zie, ⁶ a na Sara, naŋ da de Abraham noɔre kyɛ boɔle o ka daŋna. Yɛ e la o pɔɔyaare ka yɛnee wa erɛ velaa kyɛ ba miine ne dambẽɛ̃. ⁷ Serbɛ, a lɛ poɔ, yɛ meŋ kpeɛre ne yɛ pɔgɔbɔ ne bɔmmo, a maŋ dere eŋno korɔ a pɔgɔ, a na a yɛ tasobɔ yɛ naŋ taa kpẽã gaŋ, kyɛ meŋ waa yɛ gbanditaaba a nyɔvore nɔndeteroo poɔ, ka a ta pigi a yɛ puoruu yɛ naŋ puoro sobiri. ⁸ A baara zaa, yɛ taa teɛro bonyenaa, a taa nyonono ko taaba, a nɔnɔ taaba a na yɔɔmine, kyɛ meŋ taa nembaaloŋ ne nimibaaloŋ. ⁹ Yɛ ta leɛ yɔɔ efaare ne faaloŋ bee leɛ yɔɔ yosaŋnaa ne yosaŋnaa, kyɛ leɛ yele yelbisonne a kyaare ne ba, yɛ naŋ bɔŋ ka ama eŋɛ la ka O boɔle yɛ, ka yɛ na tõɔ̃ wa nyɛ yoduoraa gbandiruu. ¹⁰ Bonso, “A neɛ na naŋ na nɔŋ nyɔvore kyɛ boɔrɔ ka o nyɛ bebiveɛle, vɛŋ ka o e ka o zele ta leɛ yeli yelfaare zaa, ka o noɔre meŋ ta la yeli bɛlloo yelbie. ¹¹ Vɛŋ ka o bare faaloŋ kyɛ erɛ eveɛle; vɛŋ ka o boɔrɔ `maaroŋ a tu o sobiri. ¹² Bonso, a Daŋna nimie be la a yeltori deme zie, ka O tobo meŋ maŋ kyɛllɛ a ba puoruu, kyɛ a Daŋna niŋe kyaare ne la a balaŋ naŋ erɛ efaare.” ¹³ Aŋ la na eŋ yɛ baaloŋ, ka yɛnee tuuro a eveɛle sobiri. ¹⁴ Kyɛ ka yɛnee wa nyɛ woore a yeltoruŋ zuiŋ, maaloo be la yɛ zie. Ta zoro ba miinuu dambẽɛ̃ bee vɛŋ ka yɛ sukyie dɔɔnɔ. ¹⁵ Kyɛ a yɛ sukyie poore, yɛ iri a Daŋna Naaŋmen biŋ. Yɛ maŋ gu ka yɛ tõɔ̃ tere a noɔre ko neɛ zaa naŋ soore yɛ ka yɛ tere a kyello teɛroŋ yɛ naŋ taa pare. Kyɛ yɛ erɛ lɛ ne sebaaloŋ ne dambẽɛ̃, ¹⁶ kyɛ taa poteɛro velaa, ka ba naŋ wa yeli yelfaare kyaare yɛ, a na yɛ e la efaare deme, a na eŋ ba la vi, ba naŋ wa nyare yɛ zu ne ziri-ŋmaa, a yɛ Kristo sobiri kyeno velaa poɔ. ¹⁷ A waa la velaa, ka a naŋ wa e Naaŋmen boɔbo, ka yɛ nyɛ woore a yɛ eveɛle zuiŋ gaŋ a yɛ efaare. ¹⁸ Bonso, Kristo meŋ da nyɛ la woore a yelbebe zuiŋ dayenaa yoŋ. A yeltori sobɔ da kpi la ko a yelbatori deme ka O na tõɔ̃ de te a wa ne Naaŋmen zie. Ba da ko O la a O eŋgan poɔ, kyɛ a Seɛ da e la ka O leɛ voorɔ. ¹⁹ A meŋ da yi a Seɛ puoriŋ la ka O gaa te kanne kannoo ko a seere naŋ be a pigu die poɔ, ²⁰ balaŋ naŋ da ba de noɔre koroŋ zaa, a saŋ na Naaŋmen naŋ da kyɛllɛ ba ne kannyiri a Noa bebie poɔ, a saŋ na ba naŋ da maale a gbori. A gbori na poɔ la ka nobɔ belaŋ lɛ, naŋ da ta nobɔ banii, da nyɛ faabo a yi kõɔ̃ poɔ. ²¹ A kõɔ̃ ŋa la manne wuli a suobu naŋ faara te pampana. A ba e ka a iri a te eŋganoŋ dɛgre bare, kyɛ a e la poteɛro velaa nɔe te naŋ leɛ tere ko Naaŋmen. A faabo ŋa yi la a Yesu Kristo kũũ leɛ-iruŋ zie, ²² Onɔ naŋ gaa te kpɛ a tenvelaa poɔ kyɛ be a Naaŋmen nudoroŋ eŋɛ—ka malkere, ne kaareba, ne fannoo zaa meŋ be O puliŋ.

¹ A lɛ poɔ, a na Kristo naŋ da nyɛ woore te zuiŋ a O eŋgan eŋɛ, yɛ meŋ de zɔɔre boma gu yɛmenne ane a teɛroŋ ŋa tɔ, bonzuiŋ a neɛ naŋ da nyɛ woore o eŋgan eŋɛ, bare la yelbebe, ² ka o ta leɛ voorɔ te ta o baaro saŋ a eŋganoŋ eŋɛ a boɔrɔ a nensaala boɔbo faare, kyɛ Naaŋmen boɔbo la. ³ Bonso, a bebie naŋ tɔle poɔ, a da seŋ la ka yɛ da toŋ a tendaa deme boɔbo tomɔ, a tu a edɛgre, boɔbo faare, dãã naŋ zuo, gɔmpɔge, dããkuolibo gɔmɔ, ne tebɛ puoruu yeldɛgre sobiri. ⁴ A lɛ puoriŋ, ba teɛre la ka a e la yelsaana ka yɛ ba maŋ kyãã zo tu a nɔkonde sobiri ne ba, ka ba pãã yeli yelbifaare kyaare yɛ. ⁵ Kyɛ bana la na manne ba yɛlɛ ko a Neɛ na naŋ gu ka O di a vobɔ ane a kuuni sɛrɛɛ. ⁶ Bonso, a ŋaa zuiŋ la ka ba da kanne a yelnoore kannoo ko a kuuni meŋ, ka ba na tõɔ̃ nyɛ la sɛrɛɛ diu a na nensaala naŋ be eŋganoŋ eŋɛ, a kyɛ voorɔ a na Naaŋmen a seɛ poɔ. ⁷ Kyɛ a boma zaa baaro zie peɛle la. A lɛ poɔ, yɛ taa yɛmenne velaa kyɛ gu yɛmenne a yɛ puoruu poɔ. ⁸ A zuo ama zaa, yɛ taa nɔmmo ko taaba tegteglɛ, bonzuiŋ nɔmmo na yaare pɔge la yelbebe yaga. ⁹ Yɛ dere taa saama velaa kyɛ ta boolɔ yɛlɛ. ¹⁰ A na neɛ zaa naŋ da nyɛ kyɔgtaa, lɛ meŋ la ka yɛ na de a tonɔ korɔ yɛ taaba, a na Naaŋmen nɔndeteroo pare zaa tontonveɛle. ¹¹ Ka kaŋ zaa wa kanna, vɛŋ ka o yeli Naaŋmen yelbie. Ka kaŋ zaa wa tonɔ tomɔ, vɛŋ ka o tonɔ ne a kpẽã na Naaŋmen naŋ ko o, ka a yɛlɛ ama poɔ ka Naaŋmen na tõɔ̃ nyɛ eŋno a Yesu Kristo eŋɛ. Ka eŋno ne kpẽã be O zie tegteglɛ. Amen. ¹² N bamine N naŋ nɔŋ, yɛ ta vɛŋ ka yɛ nɔe `maa ane lɛ a gyentoloŋ ŋa naŋ gyenne yɛ, a na yelsaana kaŋ la erɛ yɛ. ¹³ Kyɛ yɛ taa popeɛloŋ, yɛ naŋ kpeɛrɛ a Kristo woore lantaaloŋ poɔ, ka a saŋ na O eŋno naŋ na sãã, yɛ poɔ meŋ na tõɔ̃ pɛle la ne noɔ yaga. ¹⁴ Ka yɛnee wa nyɛ zomɔ a Kristo yuori zuiŋ, maaloo be la yɛ zie, bonzuiŋ a eŋno Seɛ ane a Naaŋmen Seɛ be la yɛ zie. A ba zie, ba yeli O la yelfaare, kyɛ yɛnee zie, O nyɛ la eŋno. ¹⁵ Kyɛ ta vɛŋ ka yɛ kaŋ zaa nyɛ woore o naŋ waa neŋkoora, bee nannyige, bee efaare e-erɛ, bee a sobɔ na naŋ maŋ kpeɛrɛ kaara nobɔ yɛlɛ poɔ, zuiŋ. ¹⁶ Kyɛ ka yɛ kaŋ zaa wa nyɛ woore a o naŋ e Kristo bie zuiŋ, ta vɛŋ ka o zoro vi, kyɛ vɛŋ ka o pugro Naaŋmen a yɛlɛ ŋa zuiŋ. ¹⁷ Bonso, a saŋ ta la ka sɛrɛɛ diu na piili a Naaŋmen yideme zie. Kyɛ ka ana wa piili te zie, wolɔ ka a baaro zie na waa ko balaŋ naŋ ba sage ne a Naaŋmen yelnoore? ¹⁸ Kyɛ, “Ka a naŋ wa e tuo ka a yeltori sobɔ tõɔ ̃nyɛ faabo, yeŋ la ka a Ŋmen-ba-zo sobɔ ne a yelbebe sobɔ na be?” ¹⁹ A lɛ poɔ, vɛŋ ka balaŋ naŋ nyɛ woore a Naaŋmen boɔbo eŋɛ, de ba seere ko Onɔ naŋ da maale ba, ba naŋ na tõɔ̃ dɛlle ne, a ba eveɛle zaa poɔ.

¹ N dɔre la eŋ a nembɛrɛ naŋ be yɛ zie, a na ba tasobɔ, ane Kristo woore danseɛ sobɔ kaŋ, ane neɛ naŋ na nyɛ eŋno naŋ na wa te sãã laŋ ne ba: ² Yɛ kaara a Ŋmendeme naŋ be yɛ zie a na pekyeenɛbɛ, a meŋ tonɔ a na kaakaareba, ka a ba e feroo kyɛ yɛmenne boɔbo la. Ta toŋ yɛ tomɔ a libidɛgɛ zuiŋ, kyɛ a yɛ boɔbo kyelloo zuiŋ la. ³ A lɛ meŋ, yɛ ta dire naaloŋ gaŋ a peere na Naaŋmen naŋ da de eŋ yɛ nuuri eŋɛ, kyɛ waa mannewuluu ko ba. ⁴ Kyɛ a saŋ na a Pekyeen Zusobɔ wa te sãã, yɛ na nyɛ la a eŋno zupile naŋ kon bɔŋ yi kyeɛ. ⁵ Pɔlɔ, a lɛ meŋ, yɛ sigri yɛmenne ko balaŋ naŋ kore yɛ. Kyɛ yɛnee zaa, yɛ sigri yɛmenne ko taaba, kyɛ maŋ de sigru milluu su, bonzuiŋ, “Naaŋmen are kyaare ne la a pɔlo deme kyɛ maŋ ko a sigru millu deme nɔndeteroo.” ⁶ A lɛ poɔ, yɛ sigri yɛmenne a Naaŋmen nukpẽã puli poɔ, ka O na tõɔ̃ leɛ zɛle yɛ ka yɛ do a saŋ na naŋ na seŋ poɔ. ⁷ Yɛ de yɛ yelfere teɛroŋ zaa dɔgle O zu, bonzuiŋ, Onɔ la taa yɛ teɛroŋ. ⁸ Yɛ nyɔge yɛmenne velaa kyɛ meŋ kyɔgre gu, bonzuiŋ a yɛ dɔndɔmɔ a dɛvel yoɔrɔ la a na gbeŋ naŋ hoonɔ boɔrɔ a neɛ na o naŋ na tõɔ̃ nyɔge ɔɔ. ⁹ Yɛ are kyaare ne o a are kpẽã yɛ sagdeu poɔ, yɛ naŋ bɔŋ ka yɛ yɔɔmine a donɛɛ zaa poɔ meŋ nyɛrɛ la a woore ama taaba. ¹⁰ Kyɛ ka a nɔndeteroo zaa Naaŋmen, naŋ da boɔle yɛ ka yɛ kpɛ O eŋno naŋ kon bɔŋ baare poɔ, a Yesu Kristo eŋɛ, ka yɛnee wa te nyɛ woore fẽẽ, ka O leɛ maale yɛ, a e ka yɛ are gbeŋgbeŋ, a ko yɛ kpẽã, kyɛ maale yɛ ka yɛ zeŋ velaa. ¹¹ Ka eŋno ne kpẽã zaa be O zie tegteglɛ. Amen. ¹² Selvanos la soŋ ma, a yɔɔ yɛ naŋ dɛlle, ka N ŋmaa a yelbie ama fẽẽ lɛ, a dii yɛ sukyie, kyɛ dire danseɛ ka ŋaa la a Naaŋmen nɔndeteroo meŋɛ, a nɔndeteroo poɔ la ka yɛ are. ¹³ Onɔ naŋ be Babelon poɔ, Naaŋmen naŋ iri laŋ ne yɛ, toɔle la o puoruu. N bidɔɔ Mark meŋ puoro yɛ la. ¹⁴ Yɛ puori taa ne nɔmmo mooro. `Maaroŋ be yɛ zaa naŋ be Kristo Yesu eŋɛ zie. Amen.