1 GYɔN

¹ A yɛlɛ na naŋ da yi a piiluu saŋ, te naŋ da woŋ, te naŋ da nyɛ kaa ne te nimie kyɛ tɔ ne te nuuri, waa la a nyɔvore Yelbiri. ² A nyɔvore da sãã la, kyɛ ka te nyɛ a di o danseɛ, a kanne ko yɛ a nyɔvore na naŋ kon bɔŋ baare naŋ da be a Saa zie kyɛ da meŋ sãã te zie. ³ Te kanne ko yɛ la a bon na te naŋ da nyɛ kyɛ woŋ, ka yɛ meŋ na tõɔ̃ taa lantaaloŋ ne te, kyɛ te lantaaloŋ be la a Saa zie ane O Bidɔɔ Yesu Kristo zie. ⁴ Te ŋmaa la ama zaa ko yɛ ka yɛ popeɛloŋ na tõɔ̃ paale. ⁵ Ŋaa la a kannoo te naŋ woŋ O zie a de kanne ko yɛ: Naaŋmen la a kyãã; O zie la ka lige zaa ba kyebe. ⁶ Ka tenee wa yeli ka te taa la lantaaloŋ ne O kyɛ kyene a lige poɔ, te ŋmaa la zirii kyɛ ba tuuro a yelmeŋɛ sobiri. ⁷ Kyɛ ka tenee wa kyene a kyãã poɔ, a na O naŋ be a kyãã poɔ, te taa la lantaaloŋ, kyɛ O Bidɔɔ Yesu Kristo zẽẽ pɛge te la a yi te yelbebe zaa poɔ. ⁸ Ka tenee wa yeli ka te ba taa yelbieri zaa, te bɛllɛ la temenne, ka a yelmeŋɛ meŋ ba kyebe a te zie. ⁹ Ka tenee sage ka te maale la yelbebe, O e la dɛlloo ne yeltori sobɔ naŋ na di te yelbebe suuri ko te kyɛ pɛge te a yi te yelbatori zaa poɔ. ¹⁰ Ka tenee wa yeli ka te ba maale yelbieri, te leɛ de la ka O waa la ziri-ŋmaara, kyɛ O yelbiri ba be te poɔ.

¹ N bibiiri, N ŋmaa la ama ko yɛ ka yɛ ta maale yelbieri zaa. Kyɛ ka neɛ wa maale yelbieri, te taa la neɛ naŋ are a Saa zie ko te— Yesu Kristo a Yeltori Sobɔ. ² Onɔ la a sobɔ na naŋ tõɔ̃ yɔɔ te yelbebe sanyɔɔre, kyɛ a ba e te yelbebe yoŋ la kyɛ a donɛɛ zaa yelbebe. ³ A ŋaa poɔ la ka te bɔŋ ka te bɔŋ O la, ka tenee na tuuro O nɔeteroo. ⁴ A neɛ na naŋ yele, “N bɔŋ O la,” kyɛ ba tu O noɔre, e la ziriŋmaara ka a yelmeŋɛ ba kyebe o zie. ⁵ Kyɛ ka neɛ zaa wa tuuro O noɔre, yelmeŋɛ, onɔ zie la ka 1 GYɔN 1:6 Naaŋmen nɔmmo ta o tao. A ŋaa poɔ la ka te bɔŋ ka te be la O eŋɛ: ⁶ A neɛ na naŋ yele ka o be la O eŋɛ, a seŋ la ka o kyene a na Yesu naŋ da kyene. ⁷ N yɔɔmine, N ba ŋmaara nɔpaala kaŋ korɔ yɛ, kyɛ nɔkora yɛ naŋ taa a yi a piiluu saŋ zaa la. A nɔkora la a yelbiri yɛ naŋ da woŋ a yi a piiluu saŋ. ⁸ A la leɛ, N ŋmaara la nɔpaala kaŋ korɔ yɛ naŋ waa yelmeŋɛ a Onɔ ane yɛnee zie, bonzuiŋ a lige tɔlɔ la kyɛ ka a yelmeŋɛ kyãã meŋ pãã kyaane. ⁹ A neɛ na naŋ yeli ka o be la a kyãã poɔ kyɛ kyiire o yɔɔ, be la lige poɔ te ta pampana ŋa. ¹⁰ A neɛ na naŋ nɔnɔ o yɔɔ, be la kyãã poɔ kyɛ bɛraa zaa ba kyebe o zie. ¹¹ Kyɛ a neɛ na naŋ kyiire o yɔɔ, be la lige poɔ, a kyene lige poɔ, a ba bɔŋ zie na zaa o naŋ gɛrɛ, bonzuiŋ a lige da e la ka o zɔŋ. ¹² N ŋmaara la korɔ yɛ, n bibiiri, bonzuiŋ O di la yɛ yelbebe suuri ko yɛ a O yuori zuiŋ. ¹³ N ŋmaara la korɔ yɛ, n saamine, bonzuiŋ yɛ da bɔŋ la Onɔ naŋ yi a piiluu saŋ zaa. N ŋmaara la korɔ yɛ, n pɔlbilii, bonzuiŋ yɛ tõɔ̃ la a potuo sobɔ. N ŋmaara la korɔ yɛ, n bibiiri, bonzuiŋ yɛ da bɔŋ la a Saa. ¹⁴ N ŋmaara la korɔ yɛ, n saamine, bonzuiŋ yɛ da bɔŋ la Onɔ naŋ yi a piiluu saŋ zaa. N ŋmaara la korɔ yɛ, n pɔlbilii, bonzuiŋ yɛ taa la kpẽã, kyɛ ka a Naaŋmen yelbiri be yɛ zie, kyɛ ka yɛ tõɔ̃ la a potuo sobɔ. ¹⁵ Yɛ ta nɔnɔ a donɛɛ bee a boma naŋ be a donɛɛ zu. Ka neɛ zaa wa nɔnɔ a donɛɛ, a Saa nɔmmo ba be o eŋɛ. ¹⁶ Bonso, a bon na zaa naŋ be a donɛɛ zu—a eŋganoŋ boɔbo, ne a nimie boɔbo, ane a teŋɛ zu fuuru—ba yi a Saa zie kyɛ a donɛɛ zie la. ¹⁷ A donɛɛ ane o boɔbo tɔlɔ la, kyɛ a neɛ na naŋ erɛ Naaŋmen boɔbo, na be la be tegteglɛ. ¹⁸ N bibiiri, a gogo baara ta la; a na lɛ yɛ naŋ da woŋ ka a neɛ naŋ na are kyaare ne Kristo waara la, kyɛ pampana ŋa meŋ, balaŋ naŋ are kyaare ne Kristo wa la yaga. Ŋaa la so ka te bɔŋ ka a gogo baara ta la. ¹⁹ Ba yi la te poɔ, kyɛ ba da ba poɔ a te poɔ, bonso ka ba naŋ da be te zie, ba da naa kyãã be la te zie. Kyɛ ba da yi la te poɔ ka a tõɔ̃ sãã ka ba kaŋ zaa da ba poɔ te poɔ. ²⁰ Kyɛ yɛ nyɛ la kãã soɔbo kaŋ naŋ yi a Kyerete Sobɔ zie, kyɛ yɛ meŋ bɔŋ la yɛlɛ zaa. ²¹ N ba ŋmaa ko yɛ, yɛ naŋ ba bɔŋ a yelmeŋɛ zuiŋ, kyɛ yɛ naŋ bɔŋ o zuiŋ la, kyɛ ka zirii zaa kyebe a yelmeŋɛ poɔ meŋ zuiŋ la. ²² Aŋ la a ziri-ŋmaara ka ana ba e a neɛ na naŋ kon sage de ka Yesu la a Kristo? Onɔ la a sobɔ na naŋ are kyaare ne Kristo kyɛ zagra a Saa ne a Bidɔɔ. ²³ Neɛ na zaa naŋ zagra a Bidɔɔ, a neɛ na sobɔ ba taa a Saa. ²⁴ Lɛ zuiŋ, yɛ vɛŋ ka a bon na yɛ naŋ da woŋ a yi a piiluu saŋ ka a kyãã be yɛ eŋɛ. Ka a bon na yɛ naŋ da woŋ a yi a piiluu saŋ maŋ be yɛ eŋɛ, yɛ meŋ na be la a Bidɔɔ ane a Saa eŋɛ. ²⁵ Aŋa a polloo O naŋ da polle ko te— nyɔvore naŋ kon bɔŋ baare. ²⁶ N ŋmaa la ama ko yɛ a kyaare ne balaŋ naŋ e ka yɛ bɔre yi a sori poɔ. ²⁷ Kyɛ a yɛnee zie, a kãã soɔbo yɛ naŋ da nyɛ a yi O zie kyãã be la be, kyɛ a ba fere ka neɛ zaa wuli yɛ. Kyɛ a na a kãã soɔbo naŋ wuli yɛ kyaare ne bon zaa, ka a e yelmeŋɛ kyɛ ba e zirii—na lɛ o naŋ wuli yɛ, yɛ na be la O eŋɛ. ²⁸ Kyɛ pampana ŋa, n bibiiri, yɛ kyãã be O eŋɛ, ka Onɔ wa te sãã, te na taa la sukyikpẽã kyɛ ta taa vi a O niŋe soɔ a O waabo saŋ. ²⁹ Ka yɛnee wa bɔŋ ka Onɔ la a yeltori sobɔ, yɛ bɔŋ ka neɛ na zaa naŋ maŋ erɛ yeltori eroŋ, nyɛ la ba dɔgebo O eŋɛ.

¹ Kyɛllɛ, boŋ nɔmmo pãã la ka a Saa da de ko te, ka ba boɔlɔ te Naaŋmen bibiiri? A lɛ poɔ, a donɛɛ ba bɔŋ te, bonzuiŋ o da ba bɔŋ O. ² Yɛnee N naŋ nɔŋ, pampana ŋa te e la Naaŋmen bibiiri, kyɛ a ba sãã sɛre a lɛ te naŋ na waa, kyɛ te bɔŋ la ka Onɔ wa te sãã, te na waa la a na Onɔ, bonzuiŋ te na nyɛ O la a na lɛ O naŋ waa. ³ A neɛ na zaa naŋ taa a niŋe teɛroŋ kyelloo ŋa O eŋɛ, pɛge la omeŋɛ ka o yi parepare a na lɛ O naŋ yi parepare. ⁴ Neɛ na zaa naŋ maale yelbieri, meŋ erɛ la nɔkonde eroŋ, bonso, yelbieri e la nɔkondeu. ⁵ Kyɛ yɛ bɔŋ la ka O da sãã la ka O iri a te yelbebe bare. Kyɛ O eŋɛ, yelbieri kyebe. ⁶ Neɛ na zaa naŋ be O eŋɛ ba maŋ maale yelbieri. Neɛ na zaa naŋ maŋ maale yelbieri da ba daŋ nyɛ O bee bɔŋ O. ⁷ N bibiiri, yɛ ta vɛŋ ka neɛ zaa e ka yɛ bɔre yi a sori poɔ. A neɛ na naŋ maŋ e yeltori eroŋ, e la yeltori sobɔ, a na lɛ O naŋ e yeltori sobɔ. ⁸ A neɛ na naŋ maŋ maale yelbieri yi la a dɛvel zie, bonso a dɛvel maale la yelbebe a yi a piiluu saŋ zaa. Lɛ la so ka a Naaŋmen Bidɔɔ da sãã, ka O na tõɔ̃ wa saŋ a dɛvel tomɔ bare. ⁹ A neɛ na Naaŋmen naŋ dɔge ba maale yelbebe, bonso O bombiri kyãã be la o eŋɛ; kyɛ o kon tõɔ̃ maale yelbebe, bonzuiŋ Naaŋmen la dɔge o. ¹⁰ A ŋaa poɔ la ka a Naaŋmen bibiiri ane a dɛvel bibiiri meŋ na wa te sãã. Neɛ na zaa naŋ ba erɛ yeltori eroŋ ba yi Naaŋmen zie, ka a neɛ na naŋ ba nɔnɔ o yɔɔ meŋ ba yi O zie. ¹¹ Bonso, ŋa la a kannoo yɛ naŋ da woŋ a yi a piiluu saŋ, ka te nɔnɔ taa. ¹² Yɛ ta e a na Kaen, naŋ yi a potuo sobɔ zie a ko o yɔɔ. Kyɛ, boŋ la so ka o da ko o? Bonzuiŋ o tomɔ zaa da waa la faa, kyɛ ka o yɔɔ da toŋ yeltori tomɔ. ¹³ N yɔɔmine, ta vɛŋ ka yɛ nɔe `maa ka a donɛɛ wa kyiire yɛ. ¹⁴ Te bɔŋ ka te tɔle yi la kũũ poɔ kyɛ kpɛ nyɔvore poɔ, bonzuiŋ te nɔnɔ la a yɔɔmine. A neɛ na naŋ ba nɔnɔ o yɔɔ be la kũũ poɔ. ¹⁵ A neɛ na meŋ naŋ ba nɔnɔ o yɔɔ e la neŋkoora, kyɛ yɛ bɔŋ la ka neŋkoora zaa ba taa nyɔvore naŋ kon bɔŋ baare o eŋɛ. ¹⁶ A ŋaa poɔ la ka te bɔŋ nɔmmo, bonzuiŋ O de la O nyɔvore biŋ a te zuiŋ. A seŋ ka te meŋ de te nyɔvore biŋ ko te yɔɔmine. ¹⁷ Kyɛ ka neɛ zaa wa taa a donɛɛ boma a nyɛ ka o yɔɔ boɔrɔ bon kaŋ, kyɛ ka o ba taa nyonono ne o, wolɔ ka Naaŋmen nɔmmo na tõɔ̃ be o eŋɛ? ¹⁸ N bibiiri, yɛ ta vɛŋ ka te nɔnɔ taa ne yelbiri bee noɔre, kyɛ yɛ nɔnɔ taa ne tomɔ ne yelmeŋɛ. ¹⁹ A ŋaa poɔ la ka te bɔŋ ka te poɔ la a yelmeŋɛ poɔ, ane lɛ te naŋ na nyɛ sukyidiibu a O niŋe soɔ. ²⁰ Kyɛ ka te sukyie wa nyare te zu, Naaŋmen e la kpoŋ gaŋ te sukyie kyɛ bɔŋ yɛlɛ zaa. ²¹ Yɛnee N naŋ nɔŋ, ka te sukyie ba nyare te zu, te taa la sukyikpẽã Naaŋmen zie, ²² kyɛ a bon na zaa te naŋ sɔre, te maŋ nyɛ a la O zie, bonzuiŋ te maŋ tu la O nɔe-teroo kyɛ erɛ a bon na naŋ pɛle O poɔ. ²³ Ŋa la a noɔre O naŋ tere: ka te sage de O Bidɔɔ Yesu Kristo yuori kyɛ nɔnɔ taa a na lɛ O naŋ da tere a noɔre ko te. ²⁴ A neɛ na naŋ maŋ tu O nɔeteroo be la O eŋɛ, ka O meŋ be o eŋɛ. A ŋaa poɔ la ka te bɔŋ ka O be te eŋɛ: Te bɔmmo yi la a Seɛ O naŋ ko te zie.

¹ Yɛnee N naŋ nɔŋ, yɛ ta sage ne seɛ zaa, kyɛ gyɛle a seere kaa, ka a yi la Naaŋmen zie bee a ba yi O zie, bonzuiŋ Ŋmennoɔr ziri deme yaga yi yaare la a donɛɛ zu. ² A ŋaa poɔ la ka yɛ na tõɔ̃ bɔŋ a Naaŋmen Seɛ: Seɛ na zaa naŋ sage ka Yesu Kristo wa la a eŋganoŋ poɔ yi la Naaŋmen zie, ³ kyɛ seɛ na zaa naŋ ba sage ka Yesu Kristo da wa la a eŋganoŋ poɔ ba yi Naaŋmen zie. Ŋa la a seɛ naŋ e onɔ naŋ are kyaare ne Kristo soobo, a seɛ na naŋ waara, a na yɛ naŋ da woŋ, kyɛ pampana ŋa be a donɛɛ zu. ⁴ N bibilii, yɛ yi la Naaŋmen zie a tõɔ̃ ba, bonzuiŋ a neɛ naŋ be yɛ eŋɛ e la kpoŋ gaŋ a neɛ naŋ be a donɛɛ zu. ⁵ Ba yi la a donɛɛ poɔ. A lɛ zuiŋ, ba maŋ yeli la a donɛɛ yɛlɛ, ka a donɛɛ deme meŋ kyɛllɛ ba. ⁶ Te yi la Naaŋmen zie, ka a neɛ na naŋ bɔŋ Naaŋmen kyɛllɛ te yɛlɛ; kyɛ a neɛ na naŋ ba yi Naaŋmen zie, ba kyɛllɛ te yɛlɛ. A ŋaa poɔ la ka te maŋ tõɔ̃ bɔŋ a yelmeŋɛ seɛ ane a yeltulimo seɛ. ⁷ Yɛnee N naŋ nɔŋ, yɛ vɛŋ ka te nɔnɔ taa, bonso nɔmmo yi la Naaŋmen zie. Neɛ zaa naŋ taa nɔmmo e la Naaŋmen nendɔgraa, kyɛ o bɔŋ la Naaŋmen. ⁸ A neɛ na naŋ ba taa nɔmmo, ba bɔŋ Naaŋmen, bonzuiŋ Naaŋmen la nɔmmo. ⁹ Ŋaa la ka Naaŋmen e ka O nɔmmo sãã te poɔ: O toŋ la O Bidɔɔ yenaa yoŋ ka O wa kpɛ a donɛɛ zu ka te na tõɔ̃ voorɔ a yi O zie. ¹⁰ A ŋaa poɔ la ka nɔmmo waa: a ba e ka te nɔŋ la Naaŋmen, kyɛ ka Onɔ la nɔŋ te a toŋ O Bidɔɔ ka O wa yɔɔ a te yelbebe sanyɔɔre. ¹¹ Yɛnee N naŋ nɔŋ, ka Naaŋmen nɔŋ te a lɛ, a seŋ la ka te meŋ nɔnɔ taa. ¹² Neɛ zaa daŋ ba nyɛ Naaŋmen; kyɛ ka tenee nɔnɔ taaba, Naaŋmen be la te zie, ka O nɔmmo meŋ ta o tao zie a te eŋɛ. ¹³ A ŋaa poɔ la ka te bɔŋ ka te be la O eŋɛ, ka O meŋ be te eŋɛ, bonzuiŋ O ko te la ama a yi a O Seɛ zie. ¹⁴ Te meŋ da nyɛ la kyɛ di danseɛ ka a Saa toŋ la a Bidɔɔ ka O wa e a donɛɛ Faara. ¹⁵ Neɛ na zaa naŋ sage de ka Yesu la a Naaŋmen Bidɔɔ, Naaŋmen be la o eŋɛ, ka o meŋ be Naaŋmen eŋɛ. ¹⁶ Te meŋ bɔŋ la kyɛ sage ne a nɔmmo Naaŋmen naŋ taa te zie. Naaŋmen e la nɔmmo. A neɛ na naŋ maŋ be nɔmmo poɔ be la Naaŋmen eŋɛ, ka Naaŋmen meŋ be o eŋɛ. ¹⁷ A ŋaa poɔ la ka nɔmmo ta o tao zie a te poɔ ka te na tõɔ̃ taa sukyikpẽã a sɛrɛɛ diu daare, bonzuiŋ, lɛ Onɔ naŋ waa, te meŋ waa la a lɛ a donɛɛ ŋa zu. ¹⁸ Dambẽɛ̃ zaa ba kyebe nɔmmo poɔ. Kyɛ nɔmmo naŋ ta o tao zie, digi la dambẽɛ̃ bare, bonzuiŋ dambẽɛ̃ maŋ be la dɔgroŋ poɔ. A neɛ na naŋ zoro dambẽɛ̃ ba ta o tao zie a nɔmmo poɔ. ¹⁹ Te nɔnɔ O la, bonzuiŋ Onɔ la de wẽɛ̃ nɔŋ te. ²⁰ Ka neɛ zaa wa yeli, “N nɔŋ la Naaŋmen” kyɛ kyiire o yɔɔ, o e la ziriŋmaara. Bonso, a neɛ na naŋ ba nɔnɔ o yɔɔ o naŋ nyɛ, wolɔ ka o na tõɔ̃ nɔŋ Naaŋmen o naŋ ba nyɛ? ²¹ Te meŋ taa la a noɔre ŋa O naŋ tere: A fere la ka a neɛ na naŋ nɔnɔ Naaŋmen, ka o nɔnɔ o yɔɔ meŋ.

¹ Neɛ na zaa naŋ sage de ka Yesu e la a Kristo waa la Naaŋmen nendɔgraa, kyɛ a neɛ na naŋ nɔnɔ a Neɛ naŋ dɔge o, meŋ nɔnɔ la a neɛ O naŋ da dɔge meŋ. ² A ŋaa poɔ la ka te bɔŋ ka te nɔŋ la a Naaŋmen bibiiri: Te nɔŋ la Naaŋmen kyɛ meŋ tu O nɔe-teroo. ³ Aŋa la a Naaŋmen nɔmmo: Te tu la O nɔe-teroo. Kyɛ O nɔe-teroo ba e bontegroŋ, ⁴ bonso, bon na zaa Naaŋmen naŋ dɔge tõɔ̃ la a donɛɛ. Aŋa la a toɔmo naŋ tõɔ̃ a donɛɛ: te sagdeu. ⁵ Aŋ la a neɛ na naŋ tõɔ̃ a donɛɛ ka a ba e a neɛ na naŋ sage de ka Yesu e la a Naaŋmen Bidɔɔ? ⁶ Aŋa la a neɛ na naŋ wa a yi kõɔ̃ ane zẽẽ puoriŋ—Yesu Kristo. A ba e kõɔ̃ yoŋ, kyɛ kõɔ̃ ne zẽẽ la. Kyɛ a Seɛ la a sobɔ na naŋ dire danseɛ, bonzuiŋ a Seɛ e la yelmeŋɛ. ⁷ Bonso, ata la bebe naŋ di danseɛ: ⁸ a Seɛ, a kõɔ̃, ane a zẽẽ; kyɛ ka a ata ama laŋ la noɔre. ⁹ Te maŋ sage de la a nensaala danse-diu, kyɛ a Naaŋmen danseɛ diu e la kpoŋ gaŋ, bonso ŋaa la a Naaŋmen danseɛ O naŋ da di kyaare ne O Bidɔɔ. ¹⁰ A neɛ na naŋ sagra ne a Naaŋmen Bidɔɔ taa la a dansediu omeŋɛ eŋɛ. A neɛ na naŋ ba sagra Naaŋmen, da de ka O e la ziri-ŋmaara, bonzuiŋ o da ba sagra ne a danseɛ Naaŋmen naŋ da di kyaare ne O Bidɔɔ. ¹¹ Aŋa la a danse-diu: Naaŋmen da ko te la nyɔvore naŋ kon bɔŋ baare, kyɛ a nyɔvore ŋa be la O Bidɔɔ eŋɛ. ¹² A neɛ na naŋ taa a Bidɔɔ taa la nyɔvore; a neɛ na naŋ ba taa a Naaŋmen Bidɔɔ ba taa nyɔvore. ¹³ N ŋmaa la a yɛlɛ ama ko yɛ balaŋ naŋ sage ne a Naaŋmen Bidɔɔ yuori, ka yɛ na tõɔ̃ bɔŋ ka yɛ taa la nyɔvore naŋ kon bɔŋ baare, kyɛ ka yɛ meŋ na tõɔ̃ sage ne la a Naaŋmen Bidɔɔ yuori. ¹⁴ Ŋa la a sukyikpẽã te naŋ taa O zie: ka tenee wa sɔre bon zaa a seŋ O boɔbo, ka O woŋ la te sɔroo. ¹⁵ Kyɛ ka tenee wa bɔŋ ka O wono te la a bon na zaa te naŋ sɔre poɔ, te bɔŋ ka te nyɛ la a sɔroo zaa te naŋ sɔre O zie. ¹⁶ Ka neɛ wa nyɛ o yɔɔ ka o maale yelbieri naŋ ba wa ne kũũ, a seŋ ka o sɔre Naaŋmen, kyɛ O na de la nyɔvore ko onɔ naŋ poɔ a balaŋ naŋ maale yelbieri naŋ ba wa ne kũũ poɔ. Yelbieri be la be naŋ wa ne kũũ. N ba yeli ka o da naa puori la kyaare ne a lɛ. ¹⁷ Yelbatoruŋ zaa e la yelbieri, kyɛ yelbieri be la be naŋ ba wa ne kũũ. ¹⁸ Te bɔŋ la ka Naaŋmen nendɔgraa zaa ba maŋ maale yelbieri; kyɛ a neɛ na Naaŋmen naŋ dɔge maŋ are gu la omeŋɛ kyɛ a potuo sobɔ meŋ ba toɔrɔ o. ¹⁹ Te bɔŋ la ka te yi la Naaŋmen zie kyɛ ka a donɛɛ zaa gaŋ la potuoluŋ poɔ. ²⁰ Kyɛ te meŋ bɔŋ ka a Naaŋmen Bidɔɔ da wa la a wa ko te yɛŋ teɛroŋ ka te tõɔ̃ bɔŋ Onɔ naŋ e yelmeŋɛ. Kyɛ te be la a neɛ naŋ e yelmeŋɛ eŋɛ—a O Bidɔɔ Yesu Kristo eŋɛ. A neɛ ŋa la a Naaŋmen yelmeŋɛ ne a nyɔvore naŋ kon bɔŋ baare. ²¹ N bibiiri, yɛ gu yɛmenne ka yɛ ta peɛle tebɛ. Amen.