Матфейли

МАТФЕЙЛИЧИБАДСИ

ИНЖИЛ

(ГІяхІ хабар)

ГІиса МасихІла акІуди

¹ Даудла Урши сайси, Ибрагьимла Урши ГІиса МасихІла акІуди. ² Ибрагьимличивад ГІисакь акІуб, ГІисакьличивад Якьуб акІуб, Якьубличивад биалли Ягьуда ва илала узби акІуб. ³ Ягьудачибад Фаресра, Фамарилизирадси Зарара акІуб, Фаресличивад биалли Есром акІуб, Есромличивад Арам акІуб. ⁴ Арамличивад – Аминадав, Аминадавличивад – Наассон, Наасcонничивад – Салман. ⁵ Салманничивад – Рахавилизивадси Ваэз, Ваэзличивад – Руфилизивадси Явид, Явидличивад – Яссей. ⁶ Яссейличивад биалли, Дауд пача акІуб, Даудличивад ва гьалар Урияла хьунул рирурсилизивад Сулайбан акІуб. ⁷ Сулайбайчивад Раваам акІуб, Раваамличивад – Авия, Авиядличивад Асап акІуб. ⁸ Асапличивад – Ясапат, Ясапатличивад – Ярам, Ярамличивад ГІузия акІуб. ⁹ ГІузияличивад – Яапам, Яапамличивад – Ахаз, Ахазличивад Язекия акІуб. ¹⁰ Язекияличивад – Манассия, Манассияличивад – Амос, Амосличивад Ясия акІуб. ¹¹ Вавилоннизи жугьутІуни гужли гечбарес гьалаб Ясияличибад Ягьун ва илала узби акІуб.

¹² Вавилоннизи гечбиубхІели биалли, Ягьунничивад Салафаил акІуб. Салафаилличивад Зарабабел акІуб. ¹³ Зарабабелличивад Авиут акІуб, Авиутличивад – ЯлихІяким, ЯлихІякимличивад ГІязур акІуб. ¹⁴ ГІязурличивад Садокь акІуб, Садокьличивад – ГІяхІим, ГІяхІимличивад Ялиут акІуб. ¹⁵ Ялиутличивад Ялазар акІуб, Ялазарличивад – Матпан, Матпанличивад Якьуб акІуб. ¹⁶ Якьубличивад, сунес МасихІ бикІуси, ГІиса варкьибси Марияла мурул Юсуп акІуб.

¹⁷ Илкьяйда, Ибрагьимличирад Даудличи бикайчи лерилра наслуби вецІнуавра сари: Даудличирад Вавилоннизи гечбиайчира вецІнуавра наслу сари, Вавилоннизи гечбиубхІейчирад МасихІличи бикайчира вецІнуавра наслу сари.

ГІиса МасихІ дунъяличи вакІни

¹⁸ ГІиса МасихІ акІуб ишкьяйда: илала неш Мария Юсуплис ураркьибси замана, хъайчикариэс гьаларал, Дурхъати РухІлизирад дурхІялисраили уррухъун. ¹⁹ Илала мурул Юсупли биалли, сай гІябид виъни багьандан, Иличила багьахъес хІейрули, дигІянали ил раткаэс кьасбариб. ²⁰ Ил барес пикрибарибхІели, Аричила малаик муэрлизив иличи вакІили, иб: «Даудла урши Юсуп! Мария хьунулрарес урухмакІуд, илизиб акІубси Дурхъати РухІлизибадси сабину. ²¹ Илини Урши виркьу ва Илис хІуни ГІиса ибси у бирхьид. ИлиникІун Сунела халкь чула бунагьуназибад уцахъу. ²² Ил секІал бетаурси саби Аричини бурибси бетерхахъес багьандан. Аричини сунела идбагла гъайличибли бурибсири: ²³ „Иш Рурси дурхІялисриур ва Урши виркьу, сунесра Еммануил – Аллагь нушачил сай – ибси ура бедлуга“». ²⁴ ГьанкІлизивад чеваргъибси Юсупли Аричила малаикли бурибсиван бариб: ил рурси сунела хьунулли кьабулрариб. ²⁵ Урши варкьили, илис ГІиса ибси у бихьайчи, Мариячил варххІеркули калун.

¹ Иудеяла Вифлеемлизив Ирод пачали вируси замана, ГІиса акІубхІели, машрикьлизибад Ярусалимлизи пасихІкарти бакІили, бикІар: ² «Чинава акІубси жугьутІунала Пача? НушаникІун машрикьлизиб Илала зубари чебаира ва Илис икрамбарес дакІилра». ³ Иличила бакьили, Ирод пачара, иличил бархли лебилра Ярусалимра зигарбухъун. ⁴ Лебилра хала кашишунира, Низамла гІялимтира бучили, илдази суравбариб: «МасихІ чинав алкІуси?» ⁵ Илдани илизи иб: «Иудеяла Вифлеемлизив, сенкІун идбагла жузлизиб ишкьяйда белкІи саби: ⁶ „ХІура, Вифлеем, Иудала ванза, Иудала мер-мусаличиб сецадалра биштІали ахІенри, сенкІун хІезивад дакІуулхъан Гьавкьяна, Суненира Дила Израилла халкь уцахъуси“». ⁷ ИлхІели Иродли, дигІянали, пасихІкарти жибарили, ва, илдазибад зубари дакІубулхъуси заманаличила багьурли, ⁸ илди Вифлеемлизи гьунибатурли, иб: «Дукьеная, ВиштІасиличила дурусли багьирая ва, Ил ВаргибхІели, набзира багьахъирая, нура Илис икрамбарес укьес багьандан». ⁹ Илди, пачачи лехІахъили, арбякьун. Машрикьлизиб абулхъули чебаибси зубари, илдас гьалаб башули, ВиштІаси левси мерличи баили, ил мерла чедиб тІашбизур. ¹⁰ Зубари чебаили, илди хІекьли дебали разибиуб. ¹¹ Хъули абацІили, Марияличил ВиштІаси чеиб ва, кьукьмусбикили, Илис икрамбариб. ГІур, чула кьунби гьаргдарили, Илис савгьутуни кадихьиб: мургьи, тІемла секІли ва гІявадеш. ¹² Муэрлизиб саби Иродличи чархІебухъахъес лишан бакІили, илди цархІил гьуникад бикили, чула улкализи арбякьун.

Юсупра Мариямра Мисрилизи бебшни

¹³ Илди арбякьунхІели, Аричила малаик муэрлизив Юсупличи лявкьули сай ва викІули сай: «ВиштІасира, илала нешра касили, Мисрилизи вебши ва, нуни хІези бурайчи, илав уэн. СенкІун Ирод ВиштІасилигІив умцІес дигули сай – Ил вебкІахъес багьандан». ¹⁴ Ил айзурли, ВиштІасира, Илала нешра касили, дуги-дугели Мисрилизи арякьун ¹⁵ ва, Ирод вебкІайчи, илав калун – Аричини бурибси бетерхахъес багьандан, сайра идбагла гъайличил викІуси: «Мисрилизивад Нуни Дила Урши живарира».

БиштІати кабушни

¹⁶ ИлхІели Иродли, пасихІкарти сунечибад чебдукарбяхІни чебаили, хІекьли гІясииубли ва бургъанти бархьили, пасихІкартазибад багьурси замана акІубти кІел дусла ва илала удибти Вифлеемлизибти ва ил-алавла мер-мусаличибти дурхІни кабушахъиб. ¹⁷ ИлхІели Еремия идбагла гъайличил бурибси бетерхур, суненира ибси: ¹⁸ «ЦІакьти бисала ва чІярла тІама дакьибтири Рама шагьарлизир; Рахил, сунела дурхІнала черкад рисули, паргъатриэс рирули ахІен, сенкІун илди агарли».

Мисрилизибад чарбухъни

¹⁹ Ирод вебкІибхІели, Аричила малаик муэрлизив Мисрилизивси Юсупличи лявкьули сай. ²⁰ Ил викІули сай: «Айзину, ВиштІасира, Илала нешра касили, Израилла ванзаличи арукьен, сенкІун ВиштІаси кавшес умцІути бебкІили сабину». ²¹ Ил, айзурли, ВиштІасира, Илала нешра касили, Израилла ванзаличи вакІиб. ²² Иудеялизив сунела дудеш Иродла мерличив Архелай пача виъниличила бакьили, ила укьес урухиуб, амма, муэрлизиб багьахъурли кьяйда, Галилеялизи арякьун. ²³ Илаб, идбагуначибли бурибси – Илис Назорейлан бикІар ибси – бетерхахъес багьандан, Назарет бикІуси шагьарлизи мерлайуб.

Шиннизиб бизахъан ЯхІъяла вягІза

¹ Замана арбякьунхІели, шизиб бизахъан ЯхІъя лявкьули сай ва, Иудеяла чІянкІ авлахъличив вягІзуртаиркьули, викІули сай: ² «МукІурдакІирая, сенкІун Аллагьла ПачяхІдеш гъамбиубли сабину». ³ ЯхІъячилагу ГІисайя идбагли бурибси: «ЧІянкІ авлахъличив чІярикІусила тІама: „Аричис гьуни хІядурбарая, Илис гьундури дархьтили детаахъая“». ⁴ ЯхІъяла палтар валрила балализирадти сарри, кьякьяличиб кабцла ирира лебри, илала беркала цІурцІби ва дугІла варъа сарри. ⁵ ИтхІели Ярусалимлизибадра, лебилра Иудеялизибадра, Иорданна лебилра алавла мер-мусаличибадра иличи башутири. ⁶ Илди, чула бунагьуначи мукІурбикІули, Иорданнизиб бизахъутири. ⁷ Сунечи шизиб базахъес бакІибти бахъал фарисейтира, саддукейтира чебаили, илдази иб: «ЧІичІлумазирад кадикибти! Чили бурибсив хІушази челябкьуси Аллагьла гьимилизирад дебшахъес? ⁸ ХІуша мукІурдакІнила лайикьси даража чебаахъая. ⁹ УркІикад мадикІудая: „Нушала дудеш Ибрагьим сай“, сенкІун, хІушази викІулра: Аллагьли ишди къаркъубазибадра Ибрагьимлис дурхІни барес вирар. ¹⁰ Галгубала мякьла барда кабихьили саби: гІяхІна цІедеш хІелугуси гьарилра галга, бяхъили, цІаличи чебилкьа. ¹¹ Нуни кьалли, хІушала тавба кьабулбарили, хІуша шизир дизахъулра. Наб гІергъи Лявкьуси биалли, набчив цІакьси сай. Илала дабри гІергъидихесалра ну лайикьикибси ахІенра. Илини хІуша Дурхъати РухІлизир ва цІализир дизахъурая. ¹² Илала кура Сунела някълизиб саби. Илини Сунела дургІела умубиру, Сунела анкІи усилизидурцу, нег биалли хІебилшуси цІали игу».

ГІиса шиннизив вазахъни

¹³ ИлхІели Галилеялизивадли ГІисара Иорданничи вакІили сай, ЯхІъязи Сай шиннизив вазахъес. ¹⁴ ЯхІъяни ил тІашиусири ва викІусири: «Ну ХІуни вазахъес гІягІнисира, ХІу набчи лявкьусирив гьатІи?» ¹⁵ Амма ГІисани, илис жаваблибиахъубли, иб: «Илкьяйда биаб. Илкьяйда бетурхахъес гІягІнибирур нушаб Аллагьла амру». ИлхІели ЯхІъяни Ил ватур. ¹⁶ Вазибси ГІиса бусягІят шиннизивад дуравхъун ва, хІера, Илис зубри гьаргдиуб ва ЯхІъяни Аллагьла РухІ чедаиб, лагьаван гІяшдикІули, ГІисачи кадицІути. ¹⁷ ХІера, тІамара зубразибадли бикІуси: «Ил сай Дила дигуси Урши. Дила харидешра Иличи саби».

ГІиса илбисли хІярамсиличи хьулварни

¹ ГІурхІели РухІли ГІиса чІянкІ авлахъличи арукиб, Илбислизи хІярамсиличи хьулварахъес. ² Ил авцІали бархІи дубурцули калун ва, бегІла гІергъира, гушиуб. ³ Сай хІярамсиличи хьулирахъуси Илбис Иличи гъамбиуб ва иб: «Эгер ХІу Аллагьла Урши виадли, илди къаркъуби кьуцІри детаахъес бура». ⁴ Илини биалли жаваблис иб: «БелкІи саби: „Адам кьацІличивлицун ахІенну хІерируси, Аллагьличибадси гъайличивли сай“». ⁵ ГІур Илбисли Ил дурхъаси шагьарлизи арукиб ва Аллагьла хъалила хъалчла дубличи тІашатур. ⁶ Илбисли Илизи иб: «Эгер ХІу Аллагьла Урши виадли, уди тІяхІухъен, сенкІун белкІи саби: „Аллагьли Сунела малаикуначи ХІу хъарирури. Илдани ХІу някъбачив аркури ва ХІела кьяшалра къаркъализи чехІейгур“». ⁷ ГІисани илизи иб: «БелкІи саби: „ХІела Аричи Аллагьла хІялумцІесра валмалзад“». ⁸ ГІурра Илбисли Ил хІекьли ахъси дубурличи аркули сай ва дунъяла лерилра пачалихъунира, Илдала черяхІдешра чедиахъули сари, ⁹ ва бикІули саби: «Илди лерилра ХІед лугас, эгер, кьукьмусикили, наб икрамбарадли». ¹⁰ ИлхІели ГІиса илизи викІули сай: «Гьарахъбики Набчибад, илбис. БелкІи саби: „ХІела Аричи Аллагьлис икрамбирен, Илалацун хІурматра бирен“». ¹¹ ИлхІели илбисли Ил уввалтули сай, малаикуни гъамбиубли Илала хІурматбирули саби.

Галилеялизир ГІисала вягІза-насихІят

¹² ЯхІъя уцниличила бакьили, ГІиса Галилеялизи арякьун. ¹³ Назарет батурли, Завулонна ва Неффалимла мер-мусаличибси урхьу-дублабси Капернаумлизи хьурайуб ¹⁴ Илини илкьяйда бариб ГІисайя идбагли бурибси бетерхахъес багьандан. Ил идбаг викІули сай: ¹⁵ «Урхьула дубкадси Завулонна ванзали ва Неффалимла ванзали, Иорданна гІелабси жугьутІунала ахІенси Галилеяли, ¹⁶ цІябдешлизиб кабиибти халкьли чебяхІси шала чебаиб ва, бебкІала дяхІцІилиу кабиибтас, шала пархбухъун». ¹⁷ ИлхІейчивад ГІиса, вягІзуртаиркьули, гъайикІесвяхІиб: «МукІурдакІирая, сенкІун Аллагьла ПачяхІдеш гъамбиубли саби».

Симонра, Андрейра, Якьубра, Юнра жибарни

¹⁸ Галилеяла урхьу-дублавад шалгІевулхъули, ГІисани кІел узи чебаиб: Петр бикІуси Симонра, илала узи Андрейра. Бялихъчиби сабхІели, илдани урхьулизи тур лайбикІулри. ¹⁹ Илдази Илини иб: «Наб гІергъи даширая, ХІуша нуни адамти бурцантили детарахъурая». ²⁰ Туранира датурли, илди бусягІятал Илис гІелабад арбякьун. ²¹ Илад аркьули, Илини кІел цархІил узира чебаиб: Заведейла уршби Якьубра, ЯхІъяра. Чула дудешличил къаякъличирти турани далиути илдира Илини жибариб. ²² Илдира, бусягІятал къаякъра батурли, дудешра ватурли, Илис гІергъи арбякьун.

Галилеялизиб вягІза ва сагъбарни

²³ ГІиса лебилра Галилеякад вашулри: Аллагьла ПачяхІдешличила жугьутІунала киласабазив вягІзуртаиркьули, гІевугьули, ва, адамтазибси гьарилра изалара, хилипдешра сагъдирули. ²⁴ Иличила хабар лебилра Сириялизиб тІинтІбиуб. Лебилра хилиптира, декІар-декІарти излумани буцибтира, хІял чебашутира, жиндралабиубтира, бусули башутира Иличи бикулри. Илди лебилра Илини сагъбирутири. ²⁵ Галилеялизибадти, ВецІшагьарлизибадти, Ярусалимлизибадти, Иудеялизибадти ва Иордан хІеркІла гІелабадти бахъал халкь Илис гІергъи башулри.

НигІматуни: дубурличибси ГІисала вягІза

¹ Халкь чебаили, Ил дубурличи ацІиб: кайибхІели, Иличи мутагІялимти гъамбиуб. ² Илди руркъули, Ил викІусири:

³ «ИрхІилибти саби рухІлашал къарцинти, сенкІун илдала саби Аллагьла ПачяхІдеш.

⁴ ИрхІилибти саби бисути, сенкІун илди харибиру.

⁵ ИрхІилибти саби гІясили ахІенти, сенкІун илдани ванза букьурлибурцу.

⁶ ИрхІилибти саби бархьдешличи гъаргъти, сенкІун илди лукъан.

⁷ ИрхІилибти саби уркІецІичебти, сенкІун илди уркІецІили бургу.

⁸ ИрхІилибти саби уркІби умути, сенкІун илдани Аллагь чейу.

⁹ ИрхІилибти саби даршудешгІебти, сенкІун илдас Аллагьла дурхІни или, бикІар.

¹⁰ ИрхІилибти саби бархьдеш багьандан дугІаибти, сенкІун илдала саби Аллагьла ПачяхІдеш.

¹¹ ИрхІилиртирая хІуша, хІушаб биргухІели ва Ну багьандан вайта бугьухІели.

¹² Шаддиирая ва разидиирая, сенкІун халаси саби зубрачибси хІушала шабагъат: илкьяйда дугІиутири хІушаб гьалаб биубти идбагунира.

«ХІуша – ванзала зе»; «ХІуша – дунъяла шала»

¹³ ХІуша – ванзала зе сарра. Зела цІакь беткахъалли, селичил вирара илди зукьидиахъес? Илди селисалра манпагІятхІедирар, адамтази ганздарахъес лайдакІалли ахІенси.

¹⁴ ХІуша – дунъяла шала сарра. Дубурла бекІличибси шагьар дигІянбиэс хІебирар. ¹⁵ Шям, абалкахъи, тІалхІянала уди кахІебирхьуну, кьасиличи кабирхьу ва хъулибти лебтасалра ил шалабикІар. ¹⁶ Илкьяйда хІушала шалара адамтала гьалаб ухесбиаб, илдани хІушала гІяхІти баркьудлумира чедиэсли, хІушала Зубрала Дудешлис дезара бикІесли.

«Ну дуэс вакІибси ахІенрану, детерхахъес вакІибсира»

¹⁷ ХІуша пикримадикІудая, Ну Низам яра идбагуни буэс вакІибси сай или: буэс вакІибси ахІенрану, бетерхахъес вакІибсира Ну. ¹⁸ СенкІун хІекьли бурулра хІушази: зубри ва мусни лералли, Низамлизибси ца къелалра бетхІейхъур – гьар секІал детерхайчи. ¹⁹ ХІера, ишди кьяйдуртазибадли бегІлара камси буи, адамти илкьяйда бурсибаралли, Аллагьла ПачяхІдешлизив бегІлара виштІасилизи вейгІи вирар, сунени дузра дузахъули, бурсира барибси биалли Зубрала ПачяхІдешлизив бегІлара чевяхІсилизи вейгІи вирар. ²⁰ СенкІун, хІушази викІулра, эгер хІушала бунагьагардеш Низамла гІялимталайчирра, фарисейталайчирра чедихІедухъалли, хІуша Аллагьла ПачяхІдешлизи ахІедицІудая.

Гьимиличила ва каршниличила; «ХІела узичил даршукайи»

²¹ ХІушани бакьира гьалабла адамтази бурибси: „Камаршид, чи-биалра кавшибси судличи лайикьси сай“. ²² Ну викІулра хІушази: гьарилра дугІлашал cунела узичи гьимуркІусира судличи лайикьси сай, ахІедаибси викІуси судличи лайикьли сай. Абдал викІуси биалли, цІала жагьаннабличи лайикьли сай. ²³ Кьурбунти дируси мерличи кьурбан хибхІели, хІед гьанбикалли узила хІечил кьидадеш лерниличила, ²⁴ кьурбан илаб батурли, узичи укьенну даршукайи ва, гІур чарухъи, хІела кьурбан бара. ²⁵ ХІела къаршикарличил гьуйчив левалли, къалаба-къалабали даршукайрен – илизи хІу судлизи хІеведахъес багьанданра, суд барили, къараултази ведили, туснакълизира дебахІерахъес багьанданра. ²⁶ Марли викІулра хІези: хІу илавад дурахІелхъад – бегІла гІергъисигъуна гІяббасира балли хІебедили.

Гъаргъси хьулличилси хІер

²⁷ ХІушани бакьира гьалабла адамтази бурибси: „КъехІбадеш мадиридая“. ²⁸ Ну хІушази викІулра: хьунул адамличи гъаргъси хьулличил хІерикІуси гьарилра сунела уркІилизив иличил къехІбадеш дарибси сай. ²⁹ Эгер хІела балуй хІуй хІу бунагьличи хьулирахъули виадли, дурабитІенну ил лайбакІа, сенкІун хІела лебилра кьаркьала жагьаннаблизи бухІнабушахъесичиб, ца биркІан бебкІили хІед гІяхІил саби. ³⁰ Эгер хІела балуй някъли бунагьличи хьулирахъули виадли, чеббяхъяну, хІечибад гьарахъбара, сенкІун хІела лебилра чарх жагьаннаблизи лайбакІахъесичиб, ца биркІан бебкІили хІед гІяхІил саби.

Магьар кабуршниличила

³¹ Бурили саби: сунела хьунуйчил чи декІарикаллира, магьар кабушнила кагъар бедаб, или. ³² Ну викІулра хІушази: чи, хиянат агарли, сунела хьунуйчил декІариркаллира, илини илис къехІбадеш дирахъес сабабра лугули сай; декІаррикибсиличи чи хъайчикайалра, илинира къехІбадеш дирули сай.

Хъяличила

³³ ГІурра хІушани бакьибси саби гьалабла адамтази бурибси: хъялис къянамайруд, Аричила гьалар хІела хъями тамандирен. ³⁴ Ну биалли викІулра хІушази: хъямамаркьуд бекІлил: я закличира или, сенкІун ил Аллагьла тах саби; ³⁵ я ванзаличира или, сенкІун ил Илала кьяшмала удила саби, я Ярусалимличира или, сенкІун ил чевяхІси Пачала шагьар саби, ³⁶ я хІела бекІличира или, сенкІун цалра гъез я цІуба, я цІудара бетаахъес хІейрухІели. ³⁷ ХІушала девли биаб: бархьсилис – гІе; балкІсилис – юх; илала дурарадти – илди илбислизирадти сари.

«Вайсилис къаршидеш мадирид»

³⁸ ХІушани бакьирая бурибси: „ХІуйс хІули ва цулалис цула“. ³⁹ Ну биалли викІулра хІушази: вайдешлис къаршидеш мадиридая. ХІела балуй ляжилизи бяхъялли, иличи итилилра шурбара; ⁴⁰ хІела хІева кебасес дигули, чи судлизиахъалра, илис чедила палтарра деда. ⁴¹ Чили хІези гуждан сунечил ца ерс ахъахъалра, хІуни иличил кІел ахъа. ⁴² ХІези гаикІусилис беда, хІезибад чеблалис сасес дигусилизивадра гІелуммалзад.

«ХІушала душманти дигахъеная»

⁴³ ХІушани бакьира бурибси: „ХІела гъамси дигахъен ва хІела душмайчи гьимичевли вии“. ⁴⁴ Ну биалли викІулра хІушази: хІушала душманти дигахъеная; хІушаб уркъути, баркатлабиреная; хІушачи гьимикартас гІяхІбаркь биреная ва хІушаб децІигахъутасра, хІуша дугІиутасра дулгеная, ⁴⁵ хІушала Зубрала Дудешла дурхІни детаэс багьандан, сенкІун Илини саби Сунела берхІи гІясикартачира, малхІямтачира абухъахъес амру бируси ва бунагьагартачира, бунагькартачира заб-марка дурхьуси. ⁴⁶ СенкІун хІуша чус дигахъути хІушанира дигахъадалли, илаб хІушаб сегъуна шабагъат леба? Ил ахІену бируси хІекь бурчантанира? ⁴⁷ Эгер хІуша хІушала узбасцун саламдикІули диадалли, се хасси бирулрая? Ил бирули ахІену аллагьагартанира?

⁴⁸ ХІебиалли бегІлара ункътили диирая, хІушала Зубрала Дудеш ункъсили виубси кьяйдали.

Садакьала хІекьлизибси белчІуди

¹ Адамтази чебаахъес или садакьа мабиридая, сенкІун иличибли хІушаб хІушала Зубрала Дудешлизибад шабагъат хІебирар. ² ХІебиалли, садакьа бирухІели, киласабазибти ва кьакьурбазибти, чус адамти дезабикІахъес бузути, кІибяхІянтиван хІу вявмайкІуд. ХІекьли бурулра хІушази: илдани гьаннадал чула шабагъат касили саби. ³ ХІела биалли, садакьа бирухІели, балуй някъли бируси алгъай някъли мабагьаб, ⁴ садакьа дигІянали бетаахъес багьандан ва дигІянаси чебиуси хІела Дудешли хІед дакІули луга.

Балга-дугІяличила

⁵ УлгухІелира, киласабазиб ва кьакьурбала хІябкьяйтачиб тІашбизурли, адамтази саби булгули чебаахъес дигахъути, кІибяхІянтиван майруд хІу. ХІекьли викІулра хІушази: илдани гьаннадал чула шабагъат касили саби. ⁶ ХІу улгухІели, хІела хъули ацІи, унзара гІекІили, хІела Дудешлис балга бара ва дигІянатира чедиуси хІела Дудешли хІед дакІули луга. ⁷ ДулгухІели, аллагьагартаниван имцІати мадуридая, илди пикрибикІути саби дахъал дурниличибли чула гІяхІил бикьу, или. ⁸ Илдачи мешумадиркудая, сенкІун хІушала Дудешли хІушани тиладибарайчира хІушала агри селизиб сабил балуси сабину.

«Нушала Дудеш…»

⁹ Дулгеная ишкьяйда: „Зубрачивси нушала Дудеш! ХІела у дурхъабираб; ¹⁰ ХІела ПачяхІдешра бакІаб; Ванзаличибра, зубрачибра ХІела ари бетерхаб; ¹¹ ишбархІи хІялалси кьацІра биха нушаб; ¹² хасардати нушаб нушала чеблуми, нушаб чеблалиубтас нушани хасардалтуливан; ¹³ хІярамсиличи хьулмадирахъаба, илбислизирад дерцахъаба “.

¹⁴ СенкІун хІуша адамтала бунагьуначирад черкадурхадалли, хІушачивад хІушала Зубрала Дудешра чевкархар, ¹⁵ амма хІуша адамтала бунагьуначирад черкахІедурхадалли, хІушачивад хІушала Зубрала Дудешра чевкахІерхар.

Дубурцниличила

¹⁶ Илкьяйда хІуша дубдурцухІелира кІибяхІянтиван душкьубли камадилзадая, илдани дирар дамкьурти дяхІ кадурцути – дуббурцути саби или адамтас гьанбикахъес. ХІекьли викІулра хІушази: илдани чула шабагъат гьаннадал кайсули саби. ¹⁷ ХІу дубуцибхІели, бекІра гІявабакили, дяхІра дирцили кайи, ¹⁸ адамтала гьалав ахІи, дигІянси хІела Дудешла гьалав дакІуухъес багьандан; дигІянатира чедиути хІела Дудешли хІед дакІули луга.

Хазналичила

¹⁹ Ванзаличир хІушани хазнурби цаламадирхъидая, сарира имсли яра сигли заядирахъути, яра хъулкнани дигІянали дилгІути, ²⁰ амма зубразир хазнурби цаладирхъеная, илар илди я имсли, я сигли заяхІедиру, я хъулкнани дигІянали хІедилгІя, ²¹ сенкІун хІела хазна лебихІиб хІела уркІира бирар.

ХІули – чирагъ

²² ХІули – чархла чирагъ саби. ХІела хІули умули биалли, лебилра чархра шалали бирар; ²³ амма хІули вайтІа биалли, лебилра чархра цІябли бирар. ХІезибси шала цІябдеш биалли, цІябдеш сегъуна бирара гьатІи?

КІел хужаимлис къуллукъбирни

²⁴ Чилилра кІел хужаимлис къуллукъбарес хІейрар: ил цаличи гьимичевли вирар, цархІил – дигахъу; яра цаличила къайгъилизииркур, цархІилличила авараагаркайрар. Аллагьлис ва давлалис къуллукъбирес хІедирудая.

Къайгъначила

²⁵ Илбагьандан викІулра хІушази: се букусив, се бужусив яра се челгьусив или, хІушала жайчила къайгъилизимадиркудая. ХІушала жан беркайчир ва чархла палтарличир бекІти ахІену гьатІи? ²⁶ Зубрала арцантачи хІердизирая: илдани я делгІули ахІен, я иршули ахІен, я усурбази дурчули ахІен; хІушала Зубрала Дудешли илди далхули сай. ХІуша илдачир гьатІиралра гІяхІти ахІенрав гьатІи? ²⁷ Яра хІушазивадли къайгъилизиикибси цалинра вирару ца сягІяталра сунела гІямру гІеркъадиахъес? ²⁸ Палтар-кьяшличилара сен къайгъназиртирая? ХІеръая авлахъла вавначи – лилиябачи: я дузхІедузули, я душхІедушули секьяйда халадикІулил; ²⁹ викІулра хІушази: сай бегІлара чевяхІси манзиллизив Сулайбанра валли, илдазибадли цалраван вегІируси ахІенри; ³⁰ эгер ишбархІи лебси, амма жягІял печлизи лайбикІуси авлахъла кьар Аллагьли илкьяйда бегІбирули биалли, хІуша дегІдарес хІейрулив, камли дирханти?

³¹ ХІебиалли къайгъилизимадиркудая ва мадикІудая: нушани се букуси? яра се бужуси? яра се челгьуси? ³² Аллагьагартира илдагІиб умцІули саби. ХІушала Зубрала Дудешли балуси сабигу илдала шайчирти хІушала хІяжатуни лерти диъниличила.

³³ ХІуша гьаланачи умцІеная Аллагьла ПачяхІдешлигІир ва Илала бархьдешлигІир – гІурилти секІал хІушаб кадихьили дирар. ³⁴ ЖягІялла бархІиличила пикримадикІудая, сенкІун жягІялла сунечила саби къайгъилизибиркур: гьарил ца бархІилис сунела къайгънира даибти сари.

УцІала ва зехни

¹ Чилра гІяйиблизи марцид, хІура хІерцури, ² сенкІун, хІушани сегъунти гІяйибти дарадалра, илдигъунти хІушабра диру; сегъуна умцлаличил умцадалра, илгъуна умцлаличил хІушабра умцу. ³ Сен хІу хІела узила хІуйзибси уцІалаличи хІерикІулрив, хІела хІуйзибси зехни хІясибхІебирули? ⁴ Яра секьяйда бурида хІела узизи: „биха, хІела хІуйзибси уцІала дурайсис“, хІелайзиб зехни лебли биалли? ⁵ КІибяхІян! Гьаланачи хІела хІуйзибси зехни дураса, илхІели чебиид хІела узила хІуйзибси уцІала сен дурасес вирарал.

Цурмала гьалар жавгьар духури

⁶ Хурас хІялалсира малугадая, хІушачи ласдиубли хІуша гъярхІедердахъес, цурмала гьала жавгьар духурира маргьидая – илдази ганзхІедарахъес.

Аллагьла гІяхІти савгъатуначила балга-дугІя

⁷ Тиладибиреная, ва хІушаб луга; умцІеная, ва хІушани бургидая; кьутІдирхъеная, ва хІушаб гьаргдиру: ⁸ гьарил тиладиикІусини кайсуси саби, умцІусини бургуси саби ва кьутІикІусилис гьаргбируси саби.

⁹ ХІушала ургав адам леву, суненира уршили кьацІ тиладибарибхІели, къаркъа бедес вируси? ¹⁰ Яра, бялихъ тиладибарибхІели, чІичІала бедесси?

¹¹ ХІера, хІуша сецад вайти диадалра, хІушала дурхІнас гІяхІти дарес балулра, хІебиалли хІушала Зубрала Дудешлира Сунези тиладибарибтас гІяхІдешуни луга.

ХІед цархІилтани барили дигуси, хІуни цархІилтасра бирен

¹² Илкьяйда гьарил секІайзиб: адамти хІушачил секьяйда биубли дигулрал, илкьяйда адамтачил хІушара диреная, сенкІун Низамра идбагунира илкьяйда бикІули саби.

ГІямруличи аркути кьакьати къапу

¹³ Кьакьати къапулизирад адацІирая, дягІути къапулабад ва гьарзаси гьуйчибад аркьути бахъал биалра, улхниличи аркьути саби. ¹⁴ ГІямруличи викути кьакьати къапура, гъярцІа гьунира камтани сари дургути.

Къалпти идбагуни; «илди чула цІедеш хІясибли баладая хІушани»

¹⁵ Мазалагъуна куцличил хІушачи башути, амма бухІнабад буцІи сабти къалпти идбагуназирад мяхІкамдиирая. ¹⁶ Чула баркьудлумачибли баладая илди. Занзбачирад тІутІи яра хІякулличирад инжир дурчув? ¹⁷ Гьарилра гІяхІси галгали гІяхІти цІедеш луга, вайси галгали биалли вайти цІедеш луга. ¹⁸ ГІяхІси галгали вайти цІедеш гес хІебирар я вайси галгали гІяхІти цІедеш гес хІебирар. ¹⁹ ГІяхІти цІедеш хІелугуси гьарилра галга бяхъили, цІаличи чебилкьа. ²⁰ ХІера, чула цІедешличибли баладая илди.

«Аричи! Аричи! викІуси Набзи гьарил…»

²¹ Набзи „Аричи! Аричи!“ викІусицун, Аллагьла ПачяхІдешлизи ахІейцІур, амма Зубрачивси Дила Дудешла амру таманбируси айцІур. ²² ИтбархІи Набзи бахъалтани иру: „Аричи! Аричи! ХІела уличирли ахІенрив нуша идбагуниван гъайдикІути? ХІела уличирли ахІенрив жиндрира дугІиути? ХІела уличирли ахІенрив дахъалгъунти мугІжизатунира дирути?“ ²³ ИлхІели илдази бурисра: „Нуни хІуша бекІлил далути ахІенра; набчирад гьарахъдикирая, далхІедикибти диранти“.

ГІякьлукар ва гІякьлуагар юртани лушанти

²⁴ Гьарилра дила гъайличи лехІра ихъули, илди таманра дирути Нуни мешубурцисра шурла хьулчиличиб юрт белшунси духуси адамличил. ²⁵ ХІера, заб-марка дариб, хІуркІби чедидерхур, бурямти духъун ва лерилра ил юртличи чедухъун, амма юрт гъятІхІебиуб – шурличиб тІашбатни багьандан. ²⁶ Гьарилра дила гъайличи лехІихъуси, амма илди таманхІедируси, сунела юрт гъумличиб тІашбатурси, гІякьлуагар адамличи мешуиркур; ²⁷ ХІера, заб-марка дариб, хІуркІби чедидерхур, бурямти духъун ва лерилра ил юртличи чедухъун, ил юрт гъятІбиуб – илала гъятІбиънира халасири».

Ари лебсиливан ГІисани руркъули сай

²⁸ ГІисани илди гъай тамандарибхІели, халкь Илала белчІудиличи тамашабирутири, ²⁹ сенкІун Ил Низамла гІялимтираван, фарисейтираван ахІи, арила вегІ бучІахъан сайри.

Кьявгала изайзивси сагъварни

¹ Ил дубурличивад кацІибхІели, Илис гІергъи бахъал халкь арбякьун. ² ХІера, Иличи кьявгала изай уцибси адам гъамиуб ва, Илис икрамра бирули, иб: «Аричи! ХІед дигадли ну умуиахъес вируд». ³ ГІисани някъ гьабатурли, иличи гачикиб ва иб: «Дигулрану умуии». Ил адам бусягІятал изайзивад умуиуб. ⁴ Илизи ГІиса викІар: «Вари, чизилра мабурид, амма чеахъес кашишличи укьен ва, бикьридешлис, Мусани хъарбарибси, садакьара бара».

Даршла бекІла къараваш сагъварни

⁵ ГІиса Капернаумлизи вакІибхІели, Иличи даршла бекІ гъамиуб ва хьарбаиб: ⁶ «Аричи! Дила къараваш лев хъулив кайхьи, биркІанти дуцили ва кахли гІязабуркІули». ⁷ ГІиса илизи викІар: «Ну вакІили, ил сагъирис». ⁸ Даршла бекІли биалли, жаваблибиахъубли, иб: «Аричи! ХІу дила юртлизи ацІили, дила хІурматбарес ну лайикьлира хІергус. Амма ХІуни ца гъайадли – дила къараваш сагъкайрар. ⁹ СенкІун нура цархІилла арилиувси адам сайра, амма дила арилиубти бургъантира леб. Илдазивад цализи „Укьен“ или, бурасли, ил аркьян, цархІиллизи „Иша ваши“ или, бурасли, лявкьян. Къаравашлизира „Ит секІал бара“ или, хъарбарасли, илинира бирули сай». ¹⁰ Илди гъай дакьили, ГІиса тамашакайуб ва, Сунес гІелабадли лябкьути халкьличи дугьайзурли, иб: «Нуни хІушази бурулра: Набчи ишабсигъуна бирхауди Израиллизибра хІебаргира. ¹¹ ВикІулра хІушази: бахъал лябкьян магъриблизибад ва машрикьлизибад, ва Аллагьла ПачяхІдешлизиб Ибрагьимличил, ГІисакьличил, Якьубличил хъарбилхьан; ¹² Аллагьла ПачяхІдешлизи диэхІе бикІути биалли, дурала цІябдешлизи лайбакІили бирар: илар бисара, цулбала кьяржарра дирар». ¹³ ГІисани даршла бекІлизи иб: «Укьен, хІу вирхусиван хІед бетра бетарар». Илала къараваш илхІяйзив сагъкайуб.

Петрла хъубеш неш ва цархІилти сагъбарни

¹⁴ ГІиса Петрла юртлизи ацІиб ва илзамана, цІакьти дуцІари чедухъи карихьунси, илала хъубеш неш чераиб. ¹⁵ ГІиса илала някъличи гачикиб ва изала беткахъиб. Илмадан аризурли, ил илдас къуллукъбиресряхІиб.

¹⁶ БархІи ахъибхІели Иличи гьар журала излумани буцибти бахъал адамти киб, ва Илини, гъайличил жиндри дугІиули, лебилра сагъбариб. ¹⁷ ГІисайя идбагличибадли багьахъурси бетерхур. Ил викІусири: «Илини нушала гьунарагардеш ва излуми касиб ва духиб».

«БекІ хъарбихьес мер агара»; «БебкІибти бебкІибтази хІярибихьахъес бати»

¹⁸ Сай-алав бахъал халкь чебаили, ГІисани сунела мутагІялимтази къаякъличиб итилил дубличи арбукьяхъес хъарбариб. ¹⁹ ИлхІели ца Низамла гІялимли, Иличи гъамиубли, иб: «МугІяллим! ХІу чина укьядлира хІед гІергъи лявкьяс». ²⁰ ГІиса илизи викІар: «Гурднала пукьни лер, зубрала арцанталара лер, амма Инсаниятла Уршила агара, бекІ хъарбихьахъесалра мер агара». ²¹ Илала мутагІялимтазивад цархІилли Илизи иб: «Аричи! Ихтияр бара гьаланачи вякьи дила дудеш хІяриихьахъес». ²² Амма ГІисани илизи иб: «Наб гІергъи ваши, бебкІибти бебкІибтази хІярибихьахъес бати».

ГІисани бурям паргъатбиахъни

²³ Ил къаякъличи ацІибхІели, Илала мутагІялимтира Илис гІергъи гьайбиуб. ²⁴ ХІера, урхьуличиб хІекьли цІакьси бурям ахъбиуб ва къаякъ ругертани кІапІбирескабииб, амма Ил усулри. ²⁵ ИлхІели мутагІялимтани, Иличи гъамбиубли, чеваргъахъиб ва иб: «Аричи! Дерцахъаба, нуша улхулира». ²⁶ Илдази викІар: «Сен хІуша илцад урухкІутирав, камли дирханти?» ГІур, айзурли, бурямлис ва урхьулис къадагъабариб, ва хІекьли халаси лехІдеш чебихьун. ²⁷ Адамти биалли, тамашабирули, бикІутири: «Чи саяра Ил – сунечи бурямтира урхьнира лехІихъути?»

Гергесинна улкализиб жиндралабиубти кІел сагъбарни

²⁸ ЦархІил дубличи саили, Гадаринна улкализи вакІибхІели, Илис жиндрани буцибти, хІекьли кьяркьти ва алавти гьундурачиб чилра шулумухъахъес хІелтути кІел адам гьунибаиб. Илди адамти хІярибирхьути инкъурбазиб хІербирулри. ²⁹ ХІера, илди вявбикІесбииб: «ХІед нушазибад се хІяжатлив, ГІиса, Аллагьла Урши? ХІу иша заманалис гьалар нуша гІязабдеркІес вакІилри». ³⁰ Илдачибад гьарахъли цурмала халаси хІенкь гІяйбикІулри. ³¹ Жиндрани Илизи тиладибариб: «Нуша дугІаибхІели, цурмала хІенкьлизи дархьаба». ³² Илини илдази иб: «Дукьеная». Илди, дурадухъи, цурмала хІенкьлизи ардякьун. Жиндралабиубси цурмала хІенкь шурмачибад урхьулизи тІяхІкабухъун ва алхун. ³³ ХІенкьулаби шагьарлизи дуцІли бакІиб ва гьар секІайчила буриб, жиндралабиубтас бетаурсиличилара. ³⁴ ХІера, лебилра шагьарла халкь ГІисас гьалабакІиб ва, чула мер-муса датурли арукьяхъес Илизи тиладибухъун.

БиркІанти дуцибси сагъварни

¹ ИлхІели ГІиса, къаякъличи ацІили, гІелавяхІ Сунела шагьарлизи чарухъун. ² ХІера, Иличи, бурушличи кайхьили, биркІанти дуцибси хиб. Илдала бирхни чебаили, ГІисани зягІипсилизи иб: «ЧІумайкІен, дурхІя! ХІела бунагьуни хасардатурти сари». ³ ИлхІели цабехІти Низамла гІялимтани чузи чули иб: «Ил Аллагьличи къаршили сай». ⁴ ГІисани, илдала пикруми дагьурли, иб: «Сен хІушани хІушала уркІбазиб вайси пикрибирулрая? ⁵ Се гьамадлив гьатІи бурес: „ХІела бунагьуни хасардатурти сари“ или, яра „Айзину вашен“ или? ⁶ Амма хІушани багьирая: ванзаличир бунагьуни хасардалтес Инсаниятла Уршила ари лебси саби». ИлхІели зягІипсилизи викІар: «Айзину, бурушра касили, хІела хъули арукьен».

⁷ Ил, айзурли, сунела бурушра касили, хъули арякьун. ⁸ Халкьли биалли, ил чебаили, тамашара биубли, адамтас илгъуна ари бедибси Аллагьлис деза бариб.

Матфей живарни

⁹ Илад аркьули, ГІисани хІекь бурчуси мерличи кайибси Матфей бикІуси адам чеиб ва илизи викІар: «Наб гІергъи ваши». Ил, айзурли, Илис гІергъи арякьун. ¹⁰ ГІиса хъулив хъарихьунхІели, бакІили гІяхІцад хІекь бурчантира, бунагькартира Иличил ва Илала мутагІялимтачил барх хъарбихьун. ¹¹ Ил чебаили, Илала мутагІялимтази фарисейтани иб: «Сен хІушала мугІяллим хІекь бурчантачил ва бунагькартачил укра укули, ужра ужусив?» ¹² ГІисани ил бакьили, илдази иб: «Арати хІебирарну тухтурличи хІяжатбиркути, зягІипти бирар. ¹³ „Кьурбан ахІи, уркІецІи дигулра“ се ибсил, дякьи, багьирая. Ну гІябидуни жибарес вакІибси ахІенрану, бунагькарти пашманбиахъес вакІибсира».

Дубурцниличила

¹⁴ ИлхІели иличи ЯхІъяла мутагІялимти бакІиб ва бикІар: «Сен нушара, фарисейтира имцІали дубдурцухІели, хІела мутагІялимти дубхІебурцутив?» ¹⁵ Илдази ГІисани иб: «Мекъла хъулибти хумарбиэс бирару, эгер гелешмеш чучил виалли? Амма бурхІни ляркьян, чузивад гелешмеш къябируси – илхІели илди дубра бурцар.

¹⁶ Чилилра дуркьа палтарличи сагаси чІянкІила декІа кахІебалта, сенкІун сагали чебирбубси чебкавду ва тІярхъи гьатІира халабиур. ¹⁷ Чилилра сагати чягъирра дуркьа тІагьнази кахІертІу, сенкІун илдира тІярхъубаддирар, чягъирра дурааркьян. Сагати чягъир сагати тІагьнази картІу – кІидехІалра калахъес багьандан».

ХІякимла рурси мицІиррарни ва гачрикниличирли хьунул адам сагъриъни

¹⁸ Илдази илди дурухІели, Иличи ца хІяким гъамиуб ва, Илис икрамбирули, викІар: «Дила рурси рубкІули сари. ХІу вакІили, иличи някъ чебуцадли мицІирли кавлан». ¹⁹ Айзурли, ГІиса илис гІелавад арякьун, Иличил бархли Илала мутагІялимтира.

²⁰ ХІера, вецІнукІира дус хІи дашули зягІипси хьунул адам гІеларад гъамриубли, Илала чебуцалала дубличи гачрикиб, ²¹ сенкІун ил сунези сари рикІулри: «Илала палтарличи гачрикаслира ну арарирус». ²² ГІисани, шуряхъили, ил чераили, иб: «ЧІумарии, рурси! ХІела рирхнили хІу рерцахъири». ИлсягІятличирадал хьунул адам сагъкариуб.

²³ ХІякимла хъули вакІибхІели, ГІисани дяднучІабира, гъузгъалдибиубти адамтира чебаиб ²⁴ ва илдази иб: «Дурадухъеная ишад, рурси ребкІили ахІенну, русули сари». Илди лебилра Иличибад дукалкІутири. ²⁵ Адамти дураибхІели, Илини, ацІили, рурсила някъ буциб ва рурси мицІирриуб. ²⁶ Иличила хабар лебилра мусначи тІинтІбиуб.

ГІисани кІел сукъур сагъбарни

²⁷ Илавад аркьухІели кІел сукъур ГІисас гІелабадбикиб ва вявбикІесбииб: «Нушачи уркІецІи бара, ГІиса, Даудла урши!» ²⁸ Хъули ацІибхІели, сукъурти Иличи гъамбиуб. ГІиса илдази викІар: «ХІуша дирхулрав Нуни ил барес вирниличи?» Илди Илизи бикІар: «ГІе, Аричи!» ²⁹ ИлхІели Ил илдала хІулбачи гачикиб ва иб: «ХІуша дирхусиван бетааб хІушаб». ³⁰ Илдала хІулби гьаргдиуб. ГІисани кьяркьли буриб: «ХІердикІеная, чизилра мабалахъадая». ³¹ Илдани биалли, дурабухъи, лерилра мусначиб Иличила хабар тІинтІбиахъуб.

Жиндралаиубси тилхъавси сагъварни

³² Илди дурабухъунхІели, Иличи киб жиндралаиубси тилхъавси адам. ³³ Жинд дугІаибхІели, ил адам гъайикІесвяхІиб. Адамти, тамашабиубли, бикІулри: «Илгъуна анцІбукь гьалаб Израиллизиб биубси ахІенри». ³⁴ Фарисейти биалли бикІулри: «Илини жиндри дурайули сай жиндрала талхъа кумекличирли».

³⁵ ГІиса лерилра шагьурти-шимикад чедиверхур, киласабазиб адамти бучІахъули, Аллагьла ПачяхІдешличила гІяхІ хабар тІинтІбирули ва адамтазирти излумира, хъябшдешлумира сагъдирахъули.

«БекІнадли халкь чебиули, Илини илдачи уркІецІибариб…»

³⁶ ХІенкьулаагар мазаван тІутІути ва хІялагарбиубти адамтала бекІни чедиули, Илини илдачи уркІецІибариб. ³⁷ ИлхІели Сунела мутагІялимтази иб: «Арши дахъал сари, амма хІянчизарти камли саби». ³⁸ ХІебиалли аршила Хужаимлизи тиладидикІеная, хІянчизарти аршиличи дураахъес багьандан.

ВецІнукІира чеббикІни

¹ Сунела вецІнукІира мутагІялим жибарили, Илини жиндри дугІиахъес ва сегъуна-дигара изалара, хъябшдешра сагъдирахъес ари бедиб. ² ВецІнукІира мутагІялимла уми ишди сари: цаибил Симон, сунесра Петр бихьибси, илала узи Андрей, Заведейла Якьуб ва илала узи Югьан, ³ Филипп ва Варфоломей, Фома ва хІекь бурчан Матфей, Алфейла Якьуб ва Фаддей, ⁴ Ургъан Симон ва Кариотлан Ягьуда, суненира Ил уведибси.

ГІисани вецІнукІира руркъни

⁵ Илди вецІнукІира бархьили, ГІисани илдази хъарбариб: «Аллагьагартала мер-мусаличи армякьяда ва самаритянтала шагьарлизира духІнамайхъуда. ⁶ ИмцІали дукьеная Израилла хъулразибти чебкабалкІунти мукьрачи. ⁷ АрдякьунхІели Зубрала ПачяхІдеш гъамбиъниличила вягІзурти диреная. ⁸ ЗягІипти сагъбиреная, кьявгала изайзибти умубиреная, бебкІибти мицІирбиреная, жиндри дугІиэная, матъал касибси, матъал бедлугеная.

⁹ ХІушачил дархли кисназир я мургьи, я арц, я дубси камайсидая; ¹⁰ гьуйчи я тавра, я кІидехІ палтар, я дабри, я гІяйса камайсидая, сенкІун зяхІматчи беркайчи лайикьси сай. ¹¹ Чидил шагьарлизи яра шилизи дакІадалра, илав чи лайикьси левал ахтардибарили, илар тІашдилзеная – ардукьяйчи. ¹² Хъули адицІухІели, салам лугеная: „Иш хъайс даршудеш“ дикІули. ¹³ Эгер хъали иличи лайикьли биалли, хІушала даршудеш илизи лябкьян; эгер лайикьли хІебиалли, хІушала даршудеш хІушачи чарбулхъан». ¹⁴ Рахли чили-биалра хІуша кьабулхІедарадалли, яра хІушала гъайличи лехІхІехъалли, хъулирад яра шагьарлизирад аркьухІели, хІушала кьяшмачи илар чеакунти хясара далли пяхІдарая. ¹⁵ ХІекьли викІулра хІушази: кьиямала бархІи ил шагьарлисичиб Содомла ва Гоморрала ванзалис гьамадли бирар.

«Тяп буцІази мазаван»; «Дила у багьандан»

¹⁶ ХІера, Нуни хІуша дурхьулра буцІази мазаван: пасихІтили диирая, тяп чІичІлумиван ва умутили – тяп лагьниван. ¹⁷ Адамтазирад мяхІкамдиирая: илдани хІуша суданази дедлугара, чула киласабазир итра итура, ¹⁸ Ну багьандан хІуша бургачи ва пачначи аркура, илдала ва аллагьагартала гьалар бикьридеш дарахъес. ¹⁹ ХІуша удедлугухІели пикримадикІудая секьяйда ва се бурусил, сенкІун ил сягІятлизиб хІушани бурес гІягІниси багьахъурли бирар. ²⁰ ИлхІели хІуша хІедирудану гъайдикІути, хІушала Дудешла РухІ дирар хІушазир гъайдикІути. ²¹ Узини узи вебкІахъес уведлуга, дудешли – урши; дурхІни бегІтачи къаршили пунтбирар ва илди кабуршу. ²² Дила у багьандан лебтанилра хІейгидирурая, илди лерилра чекасибси верцили вирар. ²³ Ца шагьарлизирад хІуша дугІиухІели, цархІиллизи къалабадикІеная. ХІекьли бурулра: Инсаниятла Урши вакІайчи Израилла лерилра шагьурти чедидяхъесра бажардихІедиркудая. ²⁴ МутагІялим мугІяллимличив чевси ахІен, я лагъ сунела хужаимличив чевси ахІен. ²⁵ МутагІялимлис сунела мугІяллимгъуна виънира, лагълис сунела хужаимгъуна виънира баибси саби. Хъа вегІ Белзибуллизи вейгІи виалли, ил сецад чевлив илала хъулибтачив? ²⁶ Илбагьандан урухмакІудая илдазирад, сенкІун гьаргхІебиэси селра кІапІсира лебси ахІен, хІебагьурли калеси дигІянсира лебси ахІен. ²⁷ ХІушази цІябдешлизиб буруси, хІушани шалахІели буреная, лихІили бикьусира хъулчрачибад вягІзалис буреная.

«УрухмакІудая…»

²⁸ РухІ кадушес хІебирули, кьаркьала кабуршутазирад урухмакІудая; имцІали урухкІеная рухІра кьаркьалара жагьаннаблизир заядарес Вирусилизирад. ²⁹ КІел диштІати арцан къарапуллис ахІену дирцути? Илдазибад цалра ванзаличи кахІебиркур хІушала Дудешла ари агарли. ³⁰ ХІушала бургачирти гъезра далли лерилра дейгІунти сари. ³¹ УрухмакІудая: хІуша диштІати арцантачирра гІяхІти сарра.

ГІиса марварни ва Иличибад гІелумбиъни; РухІ мяхІкамдарни ва детахъахъни

³² Адамтала гьалав Ну чили марвараслира, Дила Зубрала Дудешла гьалав Нуни сайра маририс. ³³ Адамтала гьалав Ну чили мархІераслира, Дила Зубрала Дудешла гьалав Нуни сайра мархІейрис. ³⁴ Ну ванзаличи даршудеш хили вакІибсилизи халмайраба. Даршудеш хили вакІибси ахІенрану, тур хили вакІибсира. ³⁵ Ну вакІибсира адам сунела дудешличи, рурси нешличи, уршила хьунул хъубеш нешличи къаршили каэс. ³⁶ Адамлис душмантира – илала хъулибти саби. ³⁷ Чис дудеш яра неш Набчиб цІакьли дигахъалра, Набчи лайикьли ахІен. Чис урши яра рурси Набчиб цІакьли дигахъалра, Набчи лайикьли ахІен. ³⁸ Чи, сунени сай хъумкартурли, Наб гІергъи хІекІалра, ил Набчи лайикьли ахІен. ³⁹ Сунела рухІ мяхІкамдарибсини илди детихъахъу, Ну багьандан илди детахъахъибсини мяхІкамдиру.

«Ну кьабулирусини…»

⁴⁰ ХІуша кьабулдирусини Нура кьабулирулра, Ну кьабулирусини Ну Вархьибсира кьабулирули сай. ⁴¹ Идбаг виъни багьандан, идбаг кьабулирусини идбагла шабагъат кайсу, гІябид виъни багьандан, гІябид кьабулирусини, гІябидла шабагъат кайсу. ⁴² Ишди биштІалтазивад цалра, мутагІялим виъни багьандан или, дяргІиб шинна хъабализивад чили вахаллира, илинира сунела шабагъат бетхІейхъахъу».

«ХІу сайрив Ит, вакІес гІягІниси?..»

¹ Сунела вецІнукІира мутагІялимлис насихІятуни дедибхІели, руркъули ва вягІзурти дирули, ГІиса Галилеяла шагьуртикад арякьун. ² Туснакълизивси ЯхІъяни ГІисала баркьудлумачила бакьили, сунела мутагІялимтазибад кІел ГІисачи бархьиб ³ Илизи ишкьяйда бурахъес: «ВакІес гІягІниси Баягъи ХІу сайрив, яра нуша цархІил вакІахъес хІердикІес гІягІнилив?» ⁴ Илдас жаваблис ГІисани иб: «Дукьеная, хІушани ЯхІъязи чедаибтачилара, дакьибтачилара бурая: ⁵ сукъурти чебианбирулри, гІяргаби башанбирулри, кьявгала изайзибти умубирулри, гІянцІаби бикьанбирулри, бебкІибти мицІирбирулри, мискинтачи ГІяхІ Хабар биулри. ⁶ Набчи васвасхІейубси ирхІиливси сай».

ЯхІъячила ГІисала гъай

⁷ Илди арбякьунхІели, ГІиса халкьлизи ЯхІъячила гъайикІесвяхІиб: «ЧІянкІ авлахъличи хІуша селичи хІердикІес дякьунрая, дягІли лавшарбируси чигІяличив? ⁸ Гьу, селичи хІердикІес дякьунрая? КІантІити палтарла вегІ адам чейэхІе или гьанбикибу? Амма кІантІити палтар дихути пачнала тавхунтазиб саби бирути. ⁹ ХІуша чичи хІерэс дякьунрая? Идбагличи? ГІе, хІушази бурулра: ЯхІъя идбагличивра халал сай. ¹⁰ Иличила ишкьяйда белкІи саби: „ХІера, Нуни ХІечив гьалав Дила вакил урхьулра, илини ХІед гьалаб ХІела гьуни хІядурбиру“. ¹¹ Нуни хІекьли бурулра: хьунул адамтани баркьибтазивад шиннизиб бизахъан ЯхІъяличив чевяхІил ахІекІуб. Амма Аллагьла ПачяхІдешлизив виштІалра иличив чевяхІси сай». ¹² Шизиб бизахъан ЯхІъяла бурхІначибад гьанналичи бикайчи Зубрала ПачяхІдеш къайгъиличил сархули саби, къайгъи халаси бирутани бурцра бурцули саби. ¹³ Лебилра идбагунани ва Низамли ЯхІъячила гьалахили бурибсири. ¹⁴ Кьабулварес дигадалли, ил Илияс сай, вакІес гІягІниси. ¹⁵ Бакьес лихІби лертани бакьаб! ¹⁶ Амма гьаннала кьам Нуни чичил цугбуциша? Ил мешули саби кьакьализи кабиибти ва чула уртахъунази ишкьяйда ¹⁷ бикІути дурхІначи: „Нушани зирняв бяхъилихьалли, хІушани делхъ хІедарра, нушани марайти далуйти делчІихьалли, хІуша дисихІедиирая“. ¹⁸ ЯхІъя вакІиб, ил я укули ахІен, я ужули ахІен, амма хІуша иличила дикІулра: „Илизиб жинд леб!“. ¹⁹ Инсаниятла Урши вакІиб. Ил укра укули сай, ужра ужули сай – Иличила дикІулра: „ХІера, ил укес ва ужес дигахъуси адам – хІекь бурчантала ва бунагькартала вархкья“. Амма Аллагьла пасихІдеш лебилра илала дурхІнани марбирули саби».

Хоразиннис, Випсаидас ва Капернаумлис балагьуни

²⁰ ИлхІели, Ил Сай вякьи, бегІлара халати гьунарти чедаахъибти шагьурти далтІес вехІихьиб, илабти халкь мукІурхІебакІни багьандан. ²¹ «Балагьуни хІед, Хоразин! Балагьуни хІед, Випсаида! Нуни хІушазир чедаахъибтигъунти итди гІяламатла анцІбукьуни Тирлизирра, Сидоннизирра чедаахъибти диаллири, зибкьнира чекагьурли, палдара чекьурли, илди жявлил Аллагьлис мукІурбикІи. ²² Амма викІулра хІушази: кьиямала бархІи Тирлисра, Сидоннисра хІушаблисичиб къулайли бирар. ²³ ХІура, Капернаум, зубрачи ахъбиублира или, гьанбиркулив?

Юх, хІу жагьаннабла бухІна кабиудра, сенкІун хІезир дакІударибти итди гІяламатла анцІбукьуни Содомлизир дакІударибти диалри, ил гьанналичи бикайчи кавлусири. ²⁴ Амма викІулра хІушази: кьиямала бархІи Содомла ванзалис хІушаблисичиб къулайли бирар».

ПасихІкартас дигІянбарибси ва хІехартас гьаргбарибси

²⁵ Сунела гъай даимдирули, ГІисани иб: «ХІед деза бирулра, Дудеш, зубрала ва ванзала Аричи, сенкІун ХІуни ил секІал пасихІкартазибад ва духутазибад дигІянбарили, хІехартас гьаргбарири. ²⁶ ГІе, Дудеш! Илгъуна сабри ХІела гІяхІбаркьла кьас.

Дудеш ва Урши; «Набчи даширая…»

²⁷ Лерилра Набзи гибти Дила Дудешли сари, Урши чилилра валхІела – Сунела Дудешли ахІенси; Дудешра чилилра хІела, Уршили ахІенси, ва Уршили Сай чис гьаргварес дигулил – илини ахІенси. ²⁸ Лерилра къиянтазирти ва гІузруртазирти Набчи дакІирая, Нуни хІушаб паргъатдеш лугасра; ²⁹ Набчибси дукІ хІушаб касая ва Набзирадли бурсикадиирая, сенкІун Ну уркІилизив ряхІятси ва бушинси сайра – илхІели хІушала рухІлисра паргъатдеш бургидая. ³⁰ Дила дукІ гІяхІдеш саби, дила махра кункси саби».

Сут бархІи лугни авдни ва беръубси някъла вегІ сагъварни

¹ Илала гІергъи сут бархІи ГІиса анкІила хъу байбяхъили аркьухІели, Илала мутагІялимти гушкабиубли, дердили лугни, някъба суркдарили, дукулри. ² Фарисейтани илди чебаили, Илизи иб: «ХІела мутагІялимтани сут бархІи бирес асухІебируси бирулигу!» ³ ГІисани илдас жаваб бедиб: «ХІушани хІебелчІунраяв гьатІи, Даудли сайра, сунела адамтира гушбиубхІели се барибал? ⁴ Ил, Аллагьла юртлизи ацІили, кашишуна ахІи, цархІил адамли деркес асухІебирусилизи халдирути кьуцІри, суненира дерки, сунела адамтасра дедибал? ⁵ Яра хІебелчІунраяв сут бархІи Аллагьла хъулиб кашишунанира сут бархІила тяхІяр-кьяйда дулъниличила ва саби гІяйибагарли калниличила? ⁶ Амма хІушази викІулра: Аллагьла юртличивра халал ишав сай; ⁷ эгер хІушани балули диадалри „кьурбан ахІи, уркІецІи дигулра“ ибси, гІяйибагартачи гІяйибта хІедиркьада. ⁸ Инсаниятла Урши – сут бархІилара хужаим сай».

⁹ Илавад арякьи, Ил илдала киласализи ацІиб. ¹⁰ Илав сунела някъ беръубси ца адамра леври. ГІиса гІяйиблаварес багьандан, Илизи хьарбаиб: «Сут бархІи адамти сагъбирес асубирару?» ¹¹ Илини илдази иб: «ХІушазивад чили, сунела лебси ца маза сут бархІи курлизи кабикалли, дураадхІесили балтав? ¹² Адам сецад ункълив мазаличив! ХІебиалли сут бархІира гІяхІдеш бирес асубирули саби». ¹³ ИлхІели ГІиса ил чулахълизи викІар: «ХІела някъ гьабати, гьари». Илини някъ гьабатур, ил цархІил някъван сагъсили бетаур.

¹⁴ Фарисейти, дурабухъи, саби-ургаб гъайбухъун, Ил кавшес багьандан. Иличила багьурси ГІиса илавадли арякьун.

ГІисайя идбагли гьалахили бурибси бетерхни

¹⁵ Бахъал адамти Илис гІергъи арбякьун, илди лебилра Илини сагъбариб. ¹⁶ Сунечила бурахъес Илини къадагъабариб. ¹⁷ Илкьяйда ГІисайя идбагличибли бурибси бетерхур. ИлхІели викІусири: ¹⁸ «Иш Дила ДурхІя сай, Нуни чевикІибси сай, Наб дигахъуси сай, Дила РухІлис гІяхІилзуси сай. Дила РухІ иличи чедирхьис ва халкьанас Илини суд балахъа. ¹⁹ я жалхІелхъан, я чІярхІелхъан, я кьакьурбазиб Илала тІама чилилра хІебикьу. ²⁰ Бархьдеш чедибдешличи кайчи я кьячІаурси чІигІя хІябялча, я гавбикІуси къама хІебилша. ²¹ Илала уличи халкьанани умутбирхьу».

Белзибулла цІакьличил вяшикІнилизив фарисейтани ГІиса гІяйиблаварни

²² ИлхІели Иличи жиндра уцибси сукъурси ва тилхъавси адам киб. Илини ил сагъвариб – сукъурси ва тилхъавси чедианиуб ва гъайикІаниуб. ²³ Халкь, тамашабирули, бикІулри: «Ил МасихІ ахІенара, Даудла урши?» ²⁴ Фарисейтани биалли, иличила бакьили, иб: «Илини жиндри дугІиули сай Белзибулла – жиндрала талхъа – кумекличил».

ГІисани фарисейти пужбирули сай

²⁵ ГІисани илдала пикруми далули, илдази иб: «Гьарил саби-ургаб бутІибси пачалихъ бацІбулхъан, гьарил саби-ургаб бутІибси шагьар ва хъали кахІевлан. ²⁶ Илбисли илбис дугІиули биалли, ил саби-бухІнаб бутІили саби, секьяйда кавлана илала пачалихъ? ²⁷ Нуни илди Белзибулла цІакьличил дугІиули виасли, хІушала уршбани чила цІакьличил дугІиулив илди? Илбагьандан илдани хІушала балкІдеш кабилзахъа. ²⁸ Эгер Нуни Аллагьла кумекличил жиндри дугІиули виасли, гьайгьайра, Зубрала ПачяхІдеш хІушачи баили саби. ²⁹ Яра секьяйда вирара цІакьсила хъули ацІили, илала секІал дигІес, эгер хъа вегІ вигьхІейгьалли?

Дурхъаси РухІличи къаршиси хІулбуцІличила

³⁰ Набчил ахІенси, Набчи къаршиси сай; Набчил урчхІерчуси, ил пулкІуцІдируси сай. ³¹ Илбагьандан хІушази викІулра: адамтала гьарилра бунагьличибад ва хІулбуцІличибад чебкабурхар, амма Дурхъал РухІличи къаршиси адамтала хІулбуцІличибад чебкахІебурхар. ³² Инсаниятла Уршиличи къаршили чили гъай буралра, иличибад чебкабурхар, амма Дурхъал РухІличи къаршили бурибсиличибад я иш даршдуслизиб, я челябкьлализиб чебберхни хІебирар.

ГІяхІлис гІяхІличил ва вайлис вайличил черихъниличила

³³ Яра галгара илала цІедешра гІяхІти диъни марбарая, яра галгара илала цІедешра вайти диъни марбарая, сенкІун галга багьес вируси сай илала цІедеш хІясибли. ³⁴ ЧІичІлумазирад кадикибти! Секьяйда хІушани гІяхІси бурес дирутирая, вайти диубхІели? УркІила халадешли бирар мухІли гъайбикІахъуси. ³⁵ ГІяхІси адамли гІяхІсила хазнализибад гІяхІси кайсу, вайси адамли биалли, вайдешла хазнализибад вайдеш кайсу. ³⁶ ВикІулра хІушази: адамтани бурибси гьарилра дугІла гъайлис, кьиямала бархІи жаваб луга. ³⁷ ВегІла гъайличивли марра варили вирар, вегІла гъайличивли танбихІлара варили вирар».

Юн идбагла гІяламат

³⁸ ИлхІели цацабехІти Низамла гІялимтани ва фарисейтани иб: «МугІяллим! ХІезибадси гІяламат нушаб чебаэс дигахъахІери». ³⁹ Амма Илини илдази иб: «ГІямултарси ва пасадси кьамлис гІяламат гІягІнили саби. Илис Юн идбагла гІяламат ахІенси, цархІил сегъуналра гІяламат бирхІебирар. ⁴⁰ КІасла варглав хІябал бархІира, хІябал дугира Юн кали кьяйда, Инсаниятла Уршира ванзала уркІилизив хІябал бархІира, хІябал дугира кавлан. ⁴¹ Кьиямала бархІи Ниневияла халкьра, ишхІелла наслуличи къаршили бирар ва илди гІяйиблабиру. Юнни барибси вягІза бакьили, илди чула бунагьличи пашманбиуб. ХІушачил вархси Юнничив халал сай! ⁴² Югла шайчибтала пача хьунул Кьиямала бархІи ишхІелла наслуличи къаршили рирар ва илди гІяйиблабиру. Ил Сулайбанна пасихІти гъайличи лехІахъес дунъяла дубларад ракІибси сарри. ХІушачил вархси Сулайбанничив имцІали чевяхІси сай!

Илбис ва бушкибси хъали

⁴³ Адамлизибад жинд дурабухъунхІели, паргъатдеш баргес шинагар мер-мусаличи башар ва хІебургу. ⁴⁴ ИлхІели бикІар: «Ну сунезибад дурабухъунси дила хъули чарбулхъас». БакІибхІели ил чилилра хІебуцили, умубарили ва ибгили бургу. ⁴⁵ Илини, бякьи, верхІел гьатІира вайти жиндра кили, илаб хІеркабирар. Адамлис биалли илхІели гьалабричибра вайтІа бирар. Илкьяйда бирар иш вайси кьамличилра».

ГІисала «Неш ва узби»

⁴⁶ Ил халкьличил гъайикІухІели, Илала нешра, узбира, Иличил гъайбухъес дигули, хъа дураб тІашлири. ⁴⁷ Чилирил, вакІили, Илизи иб: «ХІела нешра, ХІела узбира, ХІечил гъайбухъес дигули, дураб тІашли саби». ⁴⁸ Илкьяйда викІусилизи Илини иб: «Дила неш чи сари? Чихъали саби Дила узби?» ⁴⁹ Сунела мутагІялимти някъли чебаахъили, иб: «ХІера, ихди Дила неш ва Дила узби. ⁵⁰ Чили таманбиралра Дила Зубрала Дудешла ари – ит Наб узира, рузира, нешра сай».

ВелгІусиличила бурала

¹ ИлбархІи дуравхъи, ГІиса урхьула дубла кайиб. ² Илаб хІекьли бахъал халкь цалабикиб. Ил къаякъличи ацІили, кайиб. Лебилра халкь урхьудублаб тІашбизур. ³ Илини илди руркъулри, дахъал буралабира дурули, ва викІули: «Гье дегІес хъубзар дуравхъун. ⁴ Илди делгІухІели цацадехІти гье гьунила дубла кадикиб ва, арцурли дакІили, арцанта дергун. ⁵ ЦархІилти гье – къаркъубарси ванзаличи кадикиб, гІянжи камси сабхІели, чедакІиб. ⁶ БархІи ахъбиубхІели илди сусделхун ва, хІячми агни багьандан, деръуб. ⁷ ЦархІилти занзубала урга кадикили, эркинни дерхъибти занзубани илди гІянддакІиб. ⁸ ЦархІилти биалли, тухъси ванзаличи кадикили, чедакІиб ва цадехІтани даршнали имцІаси, цархІилтани урегцІайнали, итилтани хІябцІайнали имцІаси сабухъ гиб. ⁹ Бакьес лихІби лерсини бакьаб!»

Сен Ил буралабачил гъайикІусири?

¹⁰ Гъамбиубти мутагІялимтани Илизи хьарбаиб: «Сен илдази буралабачил гъайикІулрив?» ¹¹ Илдас жаваблибиахъубли, Илини иб: «Аллагьла ПачяхІдешла дигІяндешуни дагьахъес хІушаб имкан гибси саби, амма илдас гибси ахІен, ¹² Лебсилис гили бирар, агарсила лебсира кебасили бирар. ¹³ Илдази буралабачил гъайикІулра, сенкІун илдани хІербикІули чехІебиули саби, лехІихъули хІебикьули ва иргъхІергъули саби. ¹⁴ Илдала черкадти ГІисайя идбагла гьалахили дурибтира детурхули сари: „ЛихІбани бикьидая – иргъхІергъидая, хІулбани хІердикІудая, амма чехІебиидая, ¹⁵ сенкІун уркІби чурхдиубли, лихІбанира къиянни бикьули саби, хІулбира чекадихьили сари. Илдани хІулбани чемабааб, лихІбани мабакьаб, уркІилира маргъаб, сагъбарахъес Набчира мабакІаб“. ¹⁶ ХІушала биалли, ирхІилирти сари хІулби, чунира чедиути, ирхІилирти сари лихІби, чулира дикьути. ¹⁷ ХІекьли викІулра хІушази: бахъал идбагуни ва гІябидуни хьулбикІутири хІушани дикьути дикьесра, хІушани чедиути чедиэсра, амма я хІедакьиб, я чехІедаиб.

ВелгІусиличила бурала баянбарни

¹⁸ ХІуша лехІдизирая хъубзарличила буралала мягІналичи: ¹⁹ Гьунила дубла кадикибти ибси – илди гъайла бакьибти адамти саби, амма, илбис бакІили, бакьибси гъай илдала уркІбазибад бигІи арбухибти адамти саби. ²⁰ Къаркъубар ванзаличи кадикибти ибси – бакьибси гъай чули разидешличил кьабулбирути, ²¹ амма чІумаси кабизалачебдеш агарти адамти саби, къияндешлизиб яра гъай багьандан саби хІебалтухІели илдани гьандуцес хІебирар ибси саби. ²² Занзбази кадикибти гье ибси – илди чузи бурибси гъай бакьибти адамти саби; амма чула къайгъназира, арцлизира, гІямрула лазатуназира ахъили – илдала лугнира дикьхІедикьурли кавлули сари ибси саби. ²³ Тухъси ванзаличи кадикибти ибси – бакьибси гъай чула хІялалси, умуси уркІилизиб бихІути, кабизалачебдешличибли цабехІтани даршнали имцІаси, цархІилтани урегцІайнали, итилтани хІябцІайнали имцІаси сабухъ бурчути адамти саби».

АнкІиличила ва хъалталичила бурала

²⁴ ЦархІил бурала гьалабихьиб илдас, викІули: «Зубрала ПачяхІдеш мешуси саби сунела хъучи гІяхІти гье дегІунси адамличи. ²⁵ Адамти бусаунхІели, илала душман вакІили, анкІила урга хъалта дегІун ва арякьун. ²⁶ Гье шинишли чедакІибхІели, хъалтара дурадухъун. ²⁷ Ила бакІибти хІянчизартани хъа вегІлизи иб: „Хужаим! ГІяхІти гье ахІенрив хІуни дегІунти? Илар хъалта чинарад дакІибти?“ ²⁸ Илини илдази иб: „Душман адамли барибси саби“. ХІянчизартани илизи иб: „Дигалли, нушани илди луцІехІе“. ²⁹ Амма илини иб: „Юх, хъалталичил дархли хІушани анкІира къябдиридая, ³⁰ кІидехІалра дакІахъес датирая, иршухІели нуни аршикьянабази бурисра гьаланачи хъалта дучахъес ва цІали дигахъес, гІур биалли анкІи усурбази дучахъес“».

Ризкьила кьякьличила

³¹ ЦархІил буралара буриб Илини, викІули: «Зубрала ПачяхІдеш мешули саби адамли касили сунела хъучи бегІунси гьела кьякьличи, ³² сабира гье хІясибли бегІлара биштІаси биалра, лерилра ризкьиличиб халаси – галгацад бухъала башуси, ва сунела кьялубачи закла арцанти кадируси».

БерхетІличила

³³ ЦархІилра бурала буриб Илини илдас: «Зубрала ПачяхІдеш мешули саби берхетІличи, сабира хьунул адамли касили, бетІу чебакІахъес или, декьла хІябал бархализи кабихьибси».

³⁴ Илди лерилра ГІисани буралабачил дуриб, бурала агарли селра хІебуриб. ³⁵ Илкьяйда идбагли гьалахили бурибси бетерхур. Ил викІусири: «Буралабачил Дила дубша гьаргбирисра, дунъя биубла дигІянаси бурисра».

³⁶ ИлхІели, ГІисани халкь баткаиб ва хъули ацІиб. Иличи мутагІялимти гъамбиуб ва иб: «Хъучирти хъалталичила бурала нушаб баянбара».

АнкІиличила ва хъалталичила бурала баянбарни

³⁷ Илини, жаваблибиахъубли, иб: «ГІяхІси гье белгІуси – ил Инсаниятла Урши сай, ³⁸ хъу – дунъя саби, гІяхІти гье – илди Аллагьла ПачяхІдешла дурхІни саби, хъалта – илбисла дурхІни саби. ³⁹ Илди дегІунси душман – илбис саби. Арши садаъни – дунъяла ахират саби, аршикьянаби биалли, малаикуни саби. ⁴⁰ Хъалта дучили цІали игули кьяйда, дунъяла ахиратлизибра илкьяйда бирар: ⁴¹ Инсаниятла Уршили Сунела малаикуни бурхьу ва Сунела ПачяхІдешлизибти лебилра Низам булъанти бурчу, ⁴² ва илди лебилра ухуси печлизи бухІнабуршу. Илар бисара, цулбала кьяржарра дирар. ⁴³ ИлхІели чула Дудешла ПачяхІдешлизиб гІябидуни берхІиван ухар. Бакьес лихІби лерсини бакьаб!

Хъучибси хазналичила ва дурхъаси жавгьар духуриличила

⁴⁴ ГьатІира Зубрала ПачяхІдеш мешуси саби авлахъличиб дигІянбарибси хазналичи, сабира адамли баргили, чизилра хІебурили, ва, иличибси разидешли, лерилра секІал дирцуси, ва баягъи хъу исуси.

⁴⁵ ГІурра Зубрала Аллагьла ПачяхІдеш мешуси саби жавгьар духури даргес умцІуси базригайчи, ⁴⁶ суненира илгъуна ца кьякь баргили, лебилра сунела лебдеш бицили, ил асибси.

Бетакьурси турличила

⁴⁷ ГІурра Зубрала ПачяхІдеш мешуси саби урхьнази лайбакІибси ва жура-журала бялихъуна бицІибси турличи, ⁴⁸ дурасили, кабиили, гІяхІти уркасили, вайти лайдакІибси. ⁴⁹ Илкьяйда бирар дунъяла ахиратлизибра: гІябидуназибад малаикунани вайти декІаркабиру, ⁵⁰ ва илди ухуси печлизи бухІнабуршу: илар бисара, цулбала кьяржарра дирар».

⁵¹ ГІисани илдази хьарбаиб: «Аргъирав хІушани илди лерилра?» Илди Илизи бикІар: «ГІе, Аричи!» ⁵² Илини биалли илдази иб: «Илбагьандан Зубрала ПачяхІдешличи вяркъурси гьарил Низамла гІялим мешули сай сунела хазнализирад дуркьабира сагатира дихуси хужаимличи».

«ВегІла ватІайзив ахІи, хІурмат агарси идбаг вирхІейрар».

⁵³ Илди буралабира дурили, ГІиса илавад арякьун. ⁵⁴ Сунела ватІайзи вакІили, Илини киласабазиб бучІахъухІели, лебилра тамашакабирутири ва бикІутири: «Чинарадтив Илала илдигъунти пасихІдеш ва цІакь? ⁵⁵ Кьисла устала урши ахІену Ил? Сунес Мария бикІуси – Илала неш ахІену? Якьубра, Юсийра, Симонра, Ягьудара – Илала узби ахІену? ⁵⁶ Лебилра илала рузбира нуша-ургабти ахІену? Чинарадти сарив илди лерилра Илала?» ⁵⁷ Илди Иличи бирххІебирханбирулри. ГІисани илдази иб: «Идбагла хІурмат бирар – вегІла ватІайзиб ва вегІла хъулиб ахІенси». ⁵⁸ Дахъал гІяламатуни илар Илини чехІедаахъиб – илди бирххІебирхни сабабли.

Шиннизиб бизахъан ЯхІъя кавшни

¹ Илзамана вилаятла халал бекІ Гьирадли ГІисачила хабурти дакьиб. ² Илини сунела къуллукъчибази иб: «Ил – шизиб бизахъан ЯхІъя сай, мицІиркайубси, илбагьандан сари илини гІяламатуни чедиахъути». ³ Илис гьалав Гьирадли, ЯхІъя уцили, вигьи, туснакълизи катур – сунела узи Филиппла хьунул Гьирадиада багьандан. ⁴ ЯхІъя викІулри Гьирадли ил кариэс асухІебирар или. ⁵ Гьирадлис ЯхІъя кавшес дигулри, амма, ил идбаглизи халирни багьандан, халкьлизивад урухкІулри. ⁶ Гьирадла акІубси бархІила байрам дурабуркІухІели, Гьирадиадала рурсили делхъ дариб, илди Гьирадлис гІяхІдизур, ⁷ илбагьандан илини хъяличил чесиб рурсилис дигуси бедес. ⁸ Рурсили биалли, нешли гьиррарни хІясибли, иб: «Наб ишаб кІабатІлизиб шизиб бизахъан ЯхІъяла бекІ биха». ⁹ Пача пашманиуб, амма сунечил кабиибтала гьалаб барибси хъя багьандан, ил рикІуси бедахъес хъарбариб ва ¹⁰ туснакълизивси ЯхІъяла бекІ чеббяхъяхъес бархьиб. ¹¹ Илала бекІ кІабатІлизиб хиб ва рурсилизи бедиб, илини биалли сунела нешличи арбухиб. ¹² ЯхІъяла мутагІялимтани кьаркьала арбухили, хІярибихьиб ва бетаурсиличила ГІисази багьахъур.

ГІисани шел азир белкъахъни

¹³ Ил хабар бакьили, ГІиса, къаякъличи айили, бацІси мерличи сайцун арякьун. Адамти биалли, иличила бакьили, шагьуртазибад хьурали Илис гІергъи бакІиб. ¹⁴ ДуравхъунхІели ГІисани хІекьли бахъал халкь чебаиб ва, илдачи ряхІмубарили, илдазибад зягІипти сагъбариб. ¹⁵ БархІи ахъибхІели, Иличи мутагІялимти гъамбиуб: «Ишди халкь чус хьурабиэси мерра, сегъуна-биалра беркалара баргахъес алавчарти шимази бархьагу. Иш адам хІерхІейруси мер сабину». ¹⁶ Амма ГІисани илдази иб: «Илдас чиналра букьес гІягІнили ахІен, хІушани бахеная». ¹⁷ Илдани Илизи иб: «Нушала лерти шел кьацІра, кІел бялихъра сари». ¹⁸ Илини иб: «Илди иша Набчи дихая». ¹⁹ ГІур халкьлизи кьарличи кабиахъес хъарбарили, шел кьацІра, кІел бялихъра касили, ГІисани, закибяхІ хІеръили, баркатладарили, бутІнаддариб ва илабти адамтас дутІахъес Сунела мутагІялимтази дедиб. ²⁰ Лебилра, букули, белкъун. Калунти бутІнани вецІнукІира чІап дицІахъиб. ²¹ Илаб букунти, хьунул адамтира, дурхІнира халхІебарили, шел азирцад адам лебри.

ГІиса шинничивад вашни

²² ГІисани, адамти баткаайчи, сунес гьалаб, мутагІялимти къаякъличи абацІахъиб ва итилил дубличи бархьиб. ²³ Халкь баткаили, хашли балга барес багьандан, Ил дубурличи ацІиб ва бархІехъ илав сайцун калун. ²⁴ Къаякъ биалли, шарала байлизи баилри ва ил ругертани бирхъулри, сенкІун жяргаси бурям ахъбиублири. ²⁵ Авъибил дуги ГІиса илдачи арякьун, шараличивад вашули. ²⁶ Шараличив вашуси ГІиса чеили, Илала мутагІялимти, гъузгъалдибиубли, бикІулри: «Ил къаралди саби», ва урехбиубли вявбикІесбииб. ²⁷ Амма ГІиса, илдачил гъайикІескайили, иб: «Ну сайра, урухмакІудая». ²⁸ Петрли жаваблис иб: «Аричи! Ил ХІу виадли, шинничивад ну ХІечи вакІахъес хъарбара». ²⁹ Илини иб: «Ваши». Къаякъличивад кацІили, Петр шинничивад ватихьиб, ГІисачи гъамиэс багьандан, ³⁰ амма, цІакьси дягІ чебаили, урухиуб ва, кяйгІули, вявикІесииб: «Аричи! Ну верцахъаба». ³¹ ГІисани някъ гьабатурли ил уциб ва викІар: «Камси бирхаудила вегІ! Сен хІу васвасухъунри?» ³² Илди къаякъличи абацІибхІели, дягІ багьлабиуб. ³³ Къаякъличибти иличи гъамбиуб ва, икрамбарили, иб: «ХІекьли ХІу Аллагьла Урши сайри».

Геннисаретлизиб адамти сагъбарни

³⁴ Бетахъбикили, илди Геннисаретла ванзаличи бакІиб. ³⁵ Илди мер-мусала адамтани, Ил вагьурли, лебилра мер-мусаличи бархьили, лебилра зягІипти Иличи кахъиб. ³⁶ Илди тиладибикІутири, Илала палтарла дубличи гачбикахъесалра батахъес, гачбикибти сагъкабирутири.

Бухънабала гІядат ва Аллагьла Дев

¹ Илаб ГІисачи Ярусалимла Низамла гІялимти ва фарисейти бакІиб ва бикІар: ² «Сен хІела мутагІялимтани, кьацІли букухІели някъби хІейцули, гьалабла адамтала гІядатуни дулъути?» ³ Илини жаваблибиахъубли иб: «Сен гьатІи хІушани Аллагьла вягІза булъулра, хІушала гІядат багьандан? ⁴ Аллагьли хъарбариб: „Дудешла ва нешла хІурматбара. Дудешлис ва нешлис виргуси, бебкІали сай вебкІаб“. ⁵ ХІуша биалли дикІулра: „Чили-биалра дудешлис яра нешлис буралли: нушазибад пайдаласи Аллагьлис савгъатбара, ⁶ илини сай дудешла яра нешла хІурматбирнилизивад азадвалтули сай“. Илкьяйда хІушани Аллагьла хъарбаркь хІушала гІядатличил барсбарилра. ⁷ КІибяхІянти! Ункъли хІушачила гьалахили буриб ГІисайя идбагли, викІули: ⁸ „Ишди адамтани Дила хІурмат мухІлили бирули саби, уркІи биалли набчибад гьарахъли саби. ⁹ ДугІла илдани Наб икрамбирули саби, инсантала белчІуди-насихІятличи адамти руркъули“». ¹⁰ Халкь жибарили, ГІисани иб: «ЛехІдизирая ва аргъая! ¹¹ Адам хІярамирахъуси мухІлилизи аркьусини ахІенну, мухІлилизибад дурабулхъусини сай». ¹² ИлхІели мутагІялимтани, гъамбиубли, Илизи иб: «ХІуни балулрив илди гъай дакьибхІели фарисейтас хІейгибизниличила?» ¹³ Илини жаваблис иб: «Дила Зубрала Дудешли ухІебатурси гьарилра бухъала къирбарили бирар. ¹⁴ Илди батирая: илди сукъуртала сукъурти гьабкьяби саби. Сукъурли сукъур викалли, кІелра курлизи кабиркур». ¹⁵ Петрли Илизи иб: «Баянбара ил бурала нушаб».

«УркІилизирад дурадулхъан…»

¹⁶ ГІисани иб: «Марлира, хІушани гьаннара хІергъилрав? ¹⁷ ХІушани хІебалулрав мухІлилизирад аркьути лерилра варглизи диъни ва дурааркьни? ¹⁸ МухІлилизибад дурабиркуси – уркІилизибадси саби ва илини сай адам жярга-хІярамирахъуси. ¹⁹ Кабуршнила, къехІбадешла, тамяхІкардешла, хъулкидешла, къалпти бикьридешла, хІулбуцІла пикруми алкІути уркІилизир сари. ²⁰ Илдани сай адам жяргаирахъуси, хІедирцибти някъбачил укнили ахІенну».

Хананейланна рурси сагърарни

²¹ Илавад арякьи, ГІиса Тирла ва Сидонна улкнази вакІиб. ²² ХІера, хананейлан хьунул адам иларад дурарухъи, Илизи вяврикІесрииб: «УркІецІи бара набчи, Аричи, Даудла урши, дила рурси цІакьли жиндралариубли сари». ²³ Амма Илини илизи дубалра хІехъиб. Гъамбиубли, мутагІялимти Илизи тиладибухъун: «Раткаа ил, сенкІун нушаб гІергъи вявкарикІули сари». ²⁴ Илини биалли, илдази иб: «Ну вархьибсира Израилла чердалкІунти мазаличи». ²⁵ Ил биалли, гъамриубли, Илис икрамрикІули, рикІулри: «Аричи! Кумекбара наб». ²⁶ Илини жаваблис буриб: «ДурхІназибад кебасили кьацІ хялис иргьни гІяхІси ахІен». ²⁷ Хьунул адамли иб: «Аричи! Чула хужаимтала кьумурларад кадикибти хъимихъули хуранира дугагу». ²⁸ ИлхІели жаваблис ГІисани иб: «Агь, хьунул адам! Халаси саби хІела рирхни, илбагьандан хІу хьулрикІусиван биаб». ИлхІяйзир илала рурси сагъкариуб.

Бахъал сагъбарни ва авал азир адам белкъахъни

²⁹ Илавад дуравхъи, ГІиса Галилеяла шараличи вакІиб ва, дубурличи ацІили, кайиб. ³⁰ Илаб Иличи бахъал халкь бакІиб, илдала ургаб балкІабира, сукъуртира, тилхъавтира, гІяргабира ва цархІилти зягІиптира лебри. Илди ГІисала кьяшмала гьала киб. ГІисани илди лебилра сагъбариб. ³¹ Илбагьандан халкь тамашакабирутири, тилхъавти гъайбикІули, гІяргаби ара-сагъли, сукъурти чебианбиубли, балкІаби бархьбиубли чебиухІели, Аллагьлис дезни дирулри.

³² ГІисани биалли, Сунела мутагІялимти жибарили, иб: «ХІябал бархІи набчил барх лебти халкь Наб язихъбилзули саби, илдала беркеси агара, гушли бархьесра дигули ахІенра, гьуйчиб гьатІира усалбикес асубирарну». ³³ МутагІялимти Илизи бикІар: «Илдицад халкь бахес чІянкІ авлахъличир кьуцІри чинар кайсути нушани?» ³⁴ ГІиса илдази викІар: «Нушала чум кьацІ лера?» Илдани Илизи иб: «ВерхІел кьацІра, чумал бялихъра сари лерти». ³⁵ ИлхІели адамтази ванзаличи кабиахъес хъарбариб. ³⁶ Касили верхІел кьацІра, чумал бялихъра, ГІисани баркатладариб, бутІнаддариб ва илабти адамтас дутІахъес Сунела мутагІялимтази дедиб. ³⁷ Лебилра, букули, белкъун. Калунти бутІнани верхІел чІап дицІахъиб. ³⁸ Илаб букунти биалли, хьунул адамтира, дурхІнира халхІебарили, авал азир адам лебри.

³⁹ Халкьра баткаили, Ил къаякъличи айиб ва Магадан мер-мусаличи вакІиб.

Замунтала лишанти дални

¹ Фарисейтира, саддукейтира Иличи гъамбиубли, хІялумцІули, закибадси гІяламат чебаахъни тиладибариб. ² Илдас жаваблис Илини буриб: «БархІехъ, зак хІунтІенбиъни хІисаббарили, хІуша дикІулра: „ГІяхІси аргъ бирар“; ³ ва савлира, гъуршбиубси зак чебаили, дикІулра: „ИшбархІи вайси аргъ бирар“. КІибяхІянти! Закла дяхІ декІардирес балулра, амма заманала гІяламатуни декІардирес хІебалулра. ⁴ ГІямултар ва пасадси наслу гІяламатунагІиб умцІули саби, амма илис гІяламатуни дедхІелуга, Юнна гІяламатуни ахІенти». Илди батурли, ГІиса гьарахъикиб.

Фарисейтала берхетІ

⁵ Итилил дубличи бетахъбикили, Илала мутагІялимтани кьуцІри асес хъумартур. ⁶ ГІисани илдази иб: «ХІердикІеная, фарисейтала ва саддукейтала берхетІлизирад мяхІкамдиирая». ⁷ Илди биалли, саби-ургаб пикрикабикІулри: «КьуцІри кахІесира кьалли нушани». ⁸ Иличила багьурли, ГІисани иб: «Сен хІуша кьуцІри кахІесира или пикрикадикІулра, камли дирханти? ⁹ Яра хІергъирав, яра гьанхІебиркулив шел азир адамлис даибти шел кьацІличила ва сецад имцІалира калунал? ¹⁰ Авал азирлис даибти верхІел кьацІличилара, ва чум чІап имцІара духъунал гьанхІебиркулив? ¹¹ „Фарисейталара, саддукейталара берхетІлизирад мяхІкамдиирая!“ или, ибти дила гъай кьацІличила хІедиъни сен хІергъулра?» ¹² Саби мяхІкамбиэс гІягІниси бетІула берхетІ ахІи, фарисейталара, саддукейталара белчІуди биъни илхІели илдани аргъиб.

Аллагьла Урши ГІиса МасихІличи Петр вирхули сай

¹³ Филиппла Къайсариятлизи вакІибхІели, ГІисани мутагІялимтази хьарбаиб: «Инсаниятла Урши чи сай бикІулив адамти?» ¹⁴ Илдани иб: «ЦабехІти ЯхІъя сай, цархІилти Илияс, итилти Еремия яра ца цархІил идбаг сай бикІули саби». ¹⁵ Ил илдази викІар: «ХІуша чи сай дикІулра Наб?» ¹⁶ Симон Петрли, жаваб лугули, иб: «ХІу – МасихІ сайри, МицІирси Аллагьла Урши». ¹⁷ ИлхІели ГІисани илис жаваблис иб: «ИрхІилибси сайри хІу, Юнна урши Симон, сенкІун чархли яра хІили ахІен хІед ил гьаргбарибси – Дила Дудешли саби, зубрачивси. ¹⁸ Ну хІези викІулра: ХІу Петр сайри ва ил къаркъаличиб Нуни Дила уммат алкІахъас, жагьаннабла къапулира илис селра барес хІедирар. ¹⁹ Зубрала ПачяхІдешла умхьни хІези лугасра: ванзаличиб асухІебиахъубси зубрачибра асухІебирар, ванзаличиб асубиахъубси зубрачибра асубирар». ²⁰ ИлхІели Илини Сай ГІиса МасихІ виъниличила чизилра хІебурахъес Сунела мутагІялимтази хъарбариб.

²¹ Ил заманаличивад вехІихьили, ГІисани Сунела мутагІялимтази гъамли Сунес детарутачила балахъескайиб: Сай Ярусалимлизи аркьниличила, хала тямадабазирад, хала кашишуназирад ва Низамла гІялимтазирад дахъал къиян-жапа чекасес чевкъниличила, каршниличила ва хІябъибил бархІи мицІирирниличила. ²² Сунечи ГІиса витІакІахъили, Петр кьабулагарли гъайухъун: «Аллагьли ХІечи уркІецІибиру, Аричи! Илгъуна ХІечил хІебирар!» ²³ Петрличи дугьайзурли, Илини иб: «ГІелумии набчивад, Илбис! ХІуни Ну чевулкІахъулра, сенкІун хІу Аллагьлайчила пикриикІули ахІенрину, адамталайчила пикриикІулри».

Сунес гІелабад башниличила ва чебуркъибси дех бихниличила

²⁴ ИлхІели ГІисани Сунела мутагІялимтази буриб: «Наб гІергъи вакІес дигусини, сунела жайчивадра чевверхурли, ва, сунечи чебуркъибси дехра бихули, вакІаб. ²⁵ Сунела гІямру дерцахъес дигусини илди детихъахъу. Амма Ну багьандан сунела жайзивад ухъунсини биалли, илди уцахъу. ²⁶ Лебил дунъя сунела бетааллира, адамлис се гІяхІдеша, эгер сунела рухІлис заралбиралли? Яра се бедес вирара адамли сунела рухІ калахъес? ²⁷ Сунела Дудешла ва дурхъати малаикунала чебяхІдешла рурхІнилизив Инсаниятла Урши лявкьян ва илхІели гьарилра сунела баркьудлуми хІясибли кьиматлаиру. ²⁸ ХІекьдеш бурулра хІушази: ишаб тІаштазибад цацабехІли бебкІала хІял багьес гьалавал Сунела ПачяхІдешлизи лявкьуси Инсаниятла Урши чейу».

ГІиса варсиъни

¹ Урегал бархІи дикибхІели, Петрра, Якьубра, илала узи Югьанра касили, ГІиса ахъси дубурличи ацІиб. ² УлгухІели, илдала гьалав варсиуб: Илала дяхІ берхІиван ухесдииб, палтар шалаван цІубдиуб. ³ Илдани Иличил ихтилатбикІути Мусара Илиясра чебаиб. ⁴ ИлхІели Петрли Илизи иб: «Аричи, нушаб ишаб лебгІеб гІяхІил саби! Дигалли, ишар хІябал чятир дирехІе, ца ХІед, ца Мусас, Ца Илияслис». ⁵ Илини ил бурухІели, шаласи гъагул багьарбиубли, илди сунела дяхІцІили кІапІбариб ва гъагуллизибад тІама бакьиб: «Ил сай Дила дигуси Урши, Дила харидешра Иличи саби. Иличи лехІдилзеная!» ⁶ Ил бакьибмад, мутагІялимти бяхІудибикиб ва хІекьли урухбиуб. ⁷ Амма ГІиса, гъамиубли, илдачи гачикили, иб: «Адизирая ва урухмакІудая». ⁸ Илдани чула хІулби ахъдуцибхІели, ца ГІиса ахІенси чилра чехІеиб. ⁹ Дубурличибад кабицІухІели, ГІисани илдази хъарбариб: «Инсаниятла Урши вебкІили мицІириайчи, Ишаб хІушани чебаибсиличила чизилра мабуридая». ¹⁰ МутагІялимтани Илизи хьарбаиб: «Илияс гьалав вакІес гІягІниси сай или, сен бикІутив низамла гІялимти?» ¹¹ ГІисани илдас жаваблис иб: «Бархьси саби, Илияс, гьалав вакІили, гьар секІал цугдушес гІягІнити сари. ¹² Нуни бурулра хІушази: Илияс вакІиб, амма ил вагьхІегьур ва адамтани илис чус дигуси бариб. Илкьяйда илдазирад Инсаниятла Уршилира гІязабти чекайсу». ¹³ ИлхІели мутагІялимтани аргъиб Илини дурибти шизиб бизахъан ЯхІъячила диъни.

Жиндралаиубси сагъварни

¹⁴ Илди халкьличи бакІибхІели, Иличи ца адам гъамиуб ва, кьукьмусикили, ¹⁵ иб: «Аричи! Дила уршиличи уркІецІибара. Бац цІибухъунхІели, ил жиндралаирули сай, ва цІакьли инжитирули сай: гьачам цІализи, гьачам шиннизи тІяхІикІули сай. ¹⁶ Нуни ил ХІела мутагІялимтачи кира, амма илдани сагъварес хІебиуб». ¹⁷ Илис жаваблис ГІисани иб: «Агь, хІебирхуси ва пасадси кьам! Ну сецадхІи хІушачил варх виэс ва хІушани дирутачи Нуни гІурра сецадхІи сабурбарес вирусира? Гьари, ил урши иша кая!» ¹⁸ ГІисани жинд дугІаиб ва урши бусягІят сагъиуб. ¹⁹ ИлхІели мутагІялимтани ГІисази хьарбаиб: «Сен нушани ил дугІаэс хІедиубра?» ²⁰ ГІисани Илдази иб: «Камли дирхни багьандан. ВикІулрагу хІушази: эгер мучила кьякьцадалра хІушала дирхни биубли, иш дубурлизи бурадалли: „Ишадли ита арбукьен“, ил аркьян ва хІушани хІебареси селра хІебирар».

Сай убкІниличила ГІисани гьалахили бурни

²² Саби ГалилеялизибхІели, ГІисани илдази иб: «Инсаниятла Урши адамтала някъбази ведлуга, ²³ Ил каршу ва хІябъибил бархІи мицІирирар». Илди цІакьли пашманбиуб.

Аллагьла хъайс хІекь бедни

²⁴ Капернаумлизи бакІибхІели, Аллагьла хъайс кІи-кІел шагьи дурчанти гьачам Петрличи гъамбиуб ва иб: «ХІушала МугІяллимли кІел шагьи хІелугав?» ²⁵ Ил викІар: «ГІе». Ил хъули ацІибхІели, ГІиса гьалаикили, иб: «ХІед секьяйда гьанбиркулив, Симон, ванзала пачнани хІекьра, налогунира чизирад кайсув? Чула дурхІназирад яра урхІлизирад?» ²⁶ Петр Илизи викІар: «УрхІлизирад». ГІисани Илизи иб: «ХІебиалли, дурхІни азадли саби, ²⁷ амма илдас хІейгихІебизахъес, урхьуличи бялихъуни дуцес укьен ва, цаибил бялихъла мухІли абхьили, иларад авал шагьи касану, хІела ва Дила шайзирад деда».

«Тяп дурхІниван…»

¹ Ит замана мутагІялимти ГІисачи гъамбиуб ва иб: «Зубрала ПачяхІдешлизив чи халасив?» ² ГІисани, виштІаси дурхІя живарили, илдала урга катурли, ³ иб: «ХІекьли бурулра хІушази: эгер ласхІедухъадалли ва дурхІнигъунтили хІедиадалли, Зубрала ПачяхІдешлизи ахІедицІудая. ⁴ Иш дурхІяван сунени сай виштІаварибси Зубрала ПачяхІдешлизив халаси вирар. ⁵ Ну багьандан ца ишгъуна дурхІя кьабулварибсини, Нура кьабулирулра. ⁶ Амма илдазивад, Набчи бирхутазивад, цалра вирхнилизивад сунени гІелумаибсилис, хъябличи урхамра бигьи, урхьула лутІилизи тІяхІухъни бегІлара гІяхІсири.

⁷ Чараагарти бунагьуни дихуси дунъялисра балагь, амма цархІил вирхнилизивад улхъахъуси адамлисра балагь. ⁸ Эгер хІела някъли яра кьяшли чевулкІахъули виадли, чердяхъяну лайдакІа: гІямрулизи ацІес кьяш яра някъ агарли къулайли бирар, кІелра кьяшличил ва кІелра някъличил даимси цІализи лайвакІниличиб. ⁹ Эгер хІела хІуй чевулкІахъули виадли, дураабитІенну лайбакІа: гІямрулизи ацІес хІули агарли къулайли бирар, кІелра хІуйчил жагьаннабла цІализи лайвакІниличиб.

¹⁰ ХІердикІеная, ишди биштІатазибад цалра мучлаагармабиридая, сенкІун хІушази викІулра: зубрачибти илдала малаикунани Зубрачивси Дила Дудешла дяхІ мурталра чедиути сари .

ЧеббалкІунси маза

¹² ХІушаб секьяйда гьанбиркулив? Даршал маза лерси хІушазивадли цала, ца чебкабалкІи бетахъили саби. Ил сунела гІелар калунти урчІемцІанну урчІемра мазара датурли, илигІив умцІес архІякьяну, гьатІи? ¹³ БаргибхІели, хІекьли викІулра хІушази, калунти урчІемцІанну рчІемраличив имцІали разиирар. ¹⁴ Илкьяйда хІушала Зубрала Дудешла амру агара ишди биштІатазивад цалра алхахъес.

Бунагьуни дируси узи

¹⁵ Эгер хІечи къаршили хІела узини бунагь баралли, укьенну сунелара хІелара ургабцун пужбара. ЛехІахъалли хІечи, хІела узи варгири. ¹⁶ Эгер хІечи лехІхІехъалли, хІечил барх ца яра кІел адам каса, кІел яра хІябал бикьрили гьарил дев марбаресли. ¹⁷ Илдачи лехІхІехъалли, бирхантази бура. Бирхантачира лехІхІехъалли, хІед сай аллагьагарсиван яра хІекь бурчанван виаб. ¹⁸ ХІекьли бурулра хІушази: ванзаличиб асухІебиахъубси зубрачибра асухІебирар, ванзаличиб асубиахъубси зубрачибра асубирар.

«Дила у багьандан кІел яра хІябал учибикибхІели…»

¹⁹ ГІурра хІекьли бурулра хІушази: эгер хІушазибад кІел кьабулбикалли, ванзаличиб сегъуна-биалра секІайчила тиладибарес, се тиладибараллира Дила Зубрала Дудешли луга. ²⁰ Ну багьандан кІел яра хІябал учибикибихІив илдала ургав Нура вирусира.

10 азирла мургьила умцлала ва 100 динарла чебла хІялалбалтниличила

²¹ ИлхІели Петр Иличи гъамиуб ва иб: «Аричи! Чуйна чевурхусирав набчи къаршили бунагь барибси узичивад? ВерхІнара-сера?» ²² ГІиса викІар илизи: «ВерхІна викІули ахІенра хІези, верхІна верхІцІайна викІулра.

²³ Илбагьандан Зубрала ПачяхІдеш мешуси саби сунела лугърачил бетиркуси хІисаббарес вализурси пачачи. ²⁴ ХІисаббирес вехІихьибхІели, иличи ца пулан кибсири, сунелара арцла вецІал азир умцлала чебла лебси . ²⁵ Илала дедес арц агархІели, пачани буйрухъбариб сайра, илала хьунулра, дурхІнира, лерилра илала лертира дицахъили чебла чарбарахъес. ²⁶ ИлхІели лагъ кьукьмусикиб ва викІар: „Пача! Гьиматчевиубли, ну ватаба, хІела арц нуни чардирис“. ²⁷ Пачани, уркІецІибарили, чеблаличивад чевкерхур ва лагъ ваткаиб. ²⁸ Ил лагъ биалли, дуравхъи, сунела ца уртахъ варгиб, даршал динарла чеблалиувси ва, уцили, гІяндуршесвяхІиб: „Дила чебла чарбара“, – викІули. ²⁹ ИлхІели уртахъ илала кьяшмала гьала кьукьмусикиб ва бусравухъун: „Сабурбарили, ватаба, лерилра чардирис“. ³⁰ Амма ил хьулхІевхъун ва, вякьи, чебла чарбарайчи ил туснакълизи катур. ³¹ Бетаурси чебаили, уртахъуни хІекьли пашманбиуб ва, пачачи бакІили, лерилра детаурти дуриб. ³² Пачани ил живариб ва иб: „УвяхІси лагъ! ХІела лебилра чеблаличивад ну чевкерхурра, хІуни тиладибарибхІели. ³³ ХІура хІела уртахъличивад чевкерхес гІягІниси ахІенрив, ну чевкерхурси кьяйда?“ ³⁴ ГІясииубли, сунела лебилра чебла чарбарайчи, пачани ил къараултази ведиб. ³⁵ Дила Зубрала Дудешра хІушачил илкьяйда вирар, эгер хІушазивад гьарил уркІи-уркІилавад узила бунагьуначивад чевкахІерхалли».

Магьар кабуршуси сабаб

¹ ГІисани илди гъай тамандарибхІели, Галилеялизивад дуравхъи, Иордан хІеркІла итил шайчирти Иудеяла мер-мусаличи вакІиб. ² Илис гІергъи бахъал адамтира бакІиб, илди Илини илаб сагъбариб.

³ Иличи фарисейти гъамбиубли ва, Илала хІялумцІули, бикІулри: «Ихтияр лебсив адамлизиб гьарил сабабличивли сунела хьунуйчил декІаркаркес?» ⁴ Илдас жаваблис Илини иб: «ХІушани хІебелчІунраяв, гьаланачи мурул адам АкІахъубсини хьунул адамра акІахъниличила?» ⁵ Илини чебатур: «Илбагьандан адамли балта неш-дудеш ва сунела хьунуйчи цІапалкан, ва кІел цали бетарар. ⁶ Илбагьандан гьанна илди кІел ахІенну, ца чарх саби. Аллагьли бархбяхъибси адамли декІарбируси ахІен». ⁷ Илди Илизи бикІар: «Сен гьатІи Мусани магьар бушнила кагъарра бедили, декІариркахъес хъарбарибсив?» ⁸ Ил илдази викІар: «Мусани хІушала хьунразирад декІардиркахъес пурбанбарибсири, хІушала абздеш пикрилизи касили, амма гьаланачи илкьяйда бируси ахІенри. ⁹ Ну викІулра хІушази: хаинхІериубкъи хьунуйчил декІарикибси ва цархІилличи хъайчикайибси сайра хаинирули сай». ¹⁰ Илизи мутагІялимти бикІар: «Адамла чебла илгъуна биалли, бекІлил хьунул кахІериъни гІяхІси саби». ¹¹ Илини биалли илдази иб: «Иличил гьарил кьабуликес хІейрар, чедибад сунес ил бедибси ахІенси. ¹² Нешла канилабал илкьяйда акІубти бурхъаби леб, адамтани бурхъибтира леб, Зубрала ПачяхІдешлис чули саби бурхъаби барибтира леб. Кьабулбарес вирусини кьабулбараб».

ГІисани дурхІни баркатлабирули сай

¹³ ГІиса гачикахъес ва баркатлабарахъес, халкьли Иличи биштІати дурхІни киб. МутагІялимтани биалли къадагъабирулри. ¹⁴ ГІисани иб: «ДурхІни Набчи бакІахъес батирая ва илди Набчи башахъес диргаламадулхъадая, Зубрала ПачяхІдеш илдигъунтас саби кьадарси». ¹⁵ Илдачи някъбира гачдикахъили, илавад арякьун.

Даимти гІямру; давлачевси гІулухъа

¹⁶ ХІера, ца пулан Иличи гъамиубли, иб: «ГІяхІси мугІяллим, даимти гІямру диахъес се гІяхІбаркь баришал бурагу?» ¹⁷ ГІисани илизи иб: «ХІу Набзи „ГІяхІси“или сен викІусири? ХІуни багьи, цайли ца Аллагь ахІи, цархІил чилра „гІяхІси“ левси ахІен. Даимти гІямру сархес дигадли, Аллагьла амрурти тамандирен». ¹⁸ Ил викІар: «Сегъунти?» ГІисани биалли, иб: «Инсан камаршид, хаинмайруд, хъулкидеш мадирид, къянати бикьридеш мадирид; ¹⁹ хІела неш-дудешла хІурмат бирен ва гъамси хІед хІуван дигахъен». ²⁰ Жагьил адам Илизи викІар: «Нуни илди дурхІяхІейчирадал дузахъулра, гІур се камлив наб?» ²¹ ГІисани илизи иб: «Ахъси даражаличиикес дигадли, хІела лебилра лебсигъуна секІал бицану, мискинтас бутІа. ИлхІели зубрачибра хІела давла бирар. Илала гІергъи хІу Наб гІелавад вакІи». ²² Амма илди гъай дакьили, жагьил хумарли гІелумиуб, сенкІун ил халаси давлала вегІ адам сайри.

«Аллагьла ПачяхІдешлизи ацІес давлачевлис къиянни саби»

²³ ГІисани Сунела мутагІялимтази иб: «ХІекьли викІулра хІушази: къиянни саби давлала вегІлис ПачяхІдешлизи ацІес. ²⁴ ГІурра викІулра хІушази: давлачевсилис Зубрала ПачяхІдешлизи ацІесичиб, валрилис буребала тІярхъилабад бетацІес гьамадли саби». ²⁵ Ил бакьили, мутагІялимти хІекьли тамашабиуб ва иб: «Чи верцес вируси гьатІи?» ²⁶ ГІисани илдас жаваб бедиб: «Адамтас ахърихІебикІуси Аллагьли барес вирар».

²⁷ Петрли жаваблис Илизи иб: «ХІера, нушала лебсигъунара бархькабатурли, нуша ХІед гІеларадли дакІира, нушаб се бирара?» ²⁸ ГІисани илдази иб: «Нуни бархьли бурулра, наб гІергъи дакІибти, Инсаниятла Урши Сунела чебяхІдешла тахличи кайибхІели, вецІнукІира тахличи хІушара кадирудая ва Израилла вецІнукІира кьамлис суд бирида. ²⁹ Дила у багьандан сунени сай вегІси юрт, яра узби, яра бегІти, яра дурхІни бархьбатурси гьарилли даршнали имцІали кайсу ва даимти гІямрула букьурра ветарар. ³⁰ Бахъал цаибти бегІла гІергъитили бирар, бегІла гІергъитира цаибтили бирар.

ТІутІила анхълизибти хІянчизартачила бурала

¹ Зубрала ПачяхІдеш тІутІила анхълизи хІянчизарти буцес савли жявли дуравхъунси хъа вегІличи мешуси саби. ² БархІилис ца динар бедлугесли хІянчизартачил вягІда барили, илди сунела анхълизи бархьиб. ³ СягІят хІябал диркухІели, дуравхъунси илини базарла майдайчиб тІашти цархІилтира чебаиб. ⁴ Илдазира анхълизи букьяхъес буриб, чус бетиркуси бедес чесили. ⁵ ГІурра урегличив ва урчІемличив дуравхъи, баягъи илкьяйда бариб. ⁶ Ахирра, сягІят вецІнуцара диркухІели, гІурра дуравхъун ва цархІилтира баргили, илдази викІар: „Сен абзур бархІи бируси агарли ишар тІаштира?“ ⁷ Илди бикІар Илизи: „Нуша чилилра жихІедарира“. Ил илдази викІар: „ХІушара дукьеная дила тІутІила анхълизи, хІушаб сабиркусира лугас“. ⁸ БархІи ахъибхІели, хъа вегІ сунела къуллукъчизи викІар: „ХІянчизарти жибарили, чус бетиркуси багьа беда, бегІла гІергъитачивад вехІихьили цаибтачи бикайчи“. ⁹ ВецІнуцара диркухІели бакІибтанира ца-ца динар касиб. ¹⁰ БегІгьалаб бакІибтас гьанбикиб чули имцІали кайсу или, амма илданира ца-ца динар касиб. ¹¹ Касили, илди хъа вегІличи жункъурбикІесбииб, ¹² ишкьяйда бикІули: „БегІла гІергъити ца сягІят сабри бузибти, илди хІуни нушачил цугбушири, нушаникІун бархІила къияндеш ва буцІардеш чекасира“. ¹³ Илини биалли, жаваблис, илдазивад цализи иб: „Гьалмагъ! Нуни хІед вайси бирули ахІенра. Ца динарлис ахІенрив гьатІи хІу набчил вягІдалаиубси? ¹⁴ ХІед сабиркуси касили, арукьен; наб биалли, бегІла гІергъисилисра хІедгъуна хІекь бедес дигулра. ¹⁵ Наб дигуси барес набзиб ихтияр агарав гьатІи? Яра хІела хІули кьясбиублив ну гІяхІверхурхІели?“ ¹⁶ Илбагьандан бегІла гІергъити цаибтили ва цаибти бегІла гІергъитили бирар».

ГІисани Сай убкІниличила гьалахили бурни

¹⁷ Ярусалимлизи аркьули, Сунела вецІнукІира мутагІялим ца шайчибяхІ букили, ГІисани илдази иб: ¹⁸ «ХІера, гьанна нуша Ярусалимлизи аркьулра. Инсаниятла Урши киласала халалтази ва Низамла гІялимтази ведлуга ва кавшес суд биру. ¹⁹ ГІур аллагьагартази ведили, илдани Иличир къугъни диру, витра витили, гІур каршу. ХІябэсил бархІи Ил мицІиркайрар».

Заведейла уршбала нешла тилади; «хІушазивад чидил халалли виэс дигаллира, хІушаб къаравашли виаб»

²⁰ ИлхІели сунела уршбачил Иличи Заведейхъала неш гъамриуб, се-сабил тиладибирули. ²¹ Илини илизи иб: «ХІед се дигулрив?» Ил Илизи рикІар: «ХІела ПачяхІдешлизиб дила уршби ХІела мякьла ца балуй шайчи, ца алгъай шайчи кабатахъес бура». ²² ГІисани жаваблис иб: «Се тиладибирулрал балули ахІенра. Нуни бужуси умегІ бержес дирудаяв?» Илди Илизи бикІар: «ДирехІе». ²³ Илдази викІар: «Дила умегІ бужидая, амма балуй ва алгъай шайчи кадиъни Набзибад дигахъуси ахІен. Дила Дудешли хІядурбарибтала сари илди мусни». ²⁴ Иличила бакьили, калунти вецІал мутагІялим кІелра узичи гІясибиуб. ²⁵ ГІисани, илди жибарили, иб: «ХІушани балулра цархІил халкьанала талхъунти адамтачи буюрбикІули биъни, хІякимтира буюрбикІули саби. ²⁶ Амма хІушала ургаб илкьяйда мабиаб: хІушала ургав халал ветаэс дигуси, хІушаб лагъли виаб. ²⁷ ХІушала ургав цаибил ветаэс дигусира, хІушаб лагъли виаб. ²⁸ Инсаниятла Урши сунес къуллукъбирахъес вакІибси ахІенну, сай къуллукъбарес ва бахъал берцахъни асес жан дедес вакІибси сай».

КІел сукъур сагъбарни

²⁹ Саби Ерихоннизибад дурабулхъухІели, илдас гІергъи бахъал халкь башулри. ³⁰ Гьунила дубла кабиибти кІел сукъурли, ГІиса лявкьниличила бакьили, вявбикІесбииб: «Аричи! Даудла урши, уркІецІибара нушачи!» ³¹ Халкьли илди лехІихъахъулри, амма илди гьатІира ахъли вявбикІесбииб: «Аричи! Даудла урши!» ³² ГІисани, тІашизурли, илди жибарили, иб: «ХІушаб се дигулрав Набзибад?» ³³ Илди Илизи бикІар: «Аричи! ХІулби гьаргдиубли дигулра!» ³⁴ ГІиса, уркІецІибарили, илдала хІулбачи гачикиб ва илхІяйзир илдала хІулби чедиандиуб. Илди кІелра ГІисас гІергъи арбякьун.

ГІиса Ярусалимлизи ухІнаахъни; халкь хІулбукІни

¹ Ярусалимличи гъамбиубли, Виффагиялизибси Елеон дубурличи бакІибхІели, ГІисани кІел мутагІялим бархьиб, ² илдази или: «Ит бяхІчиси шилизи дукьеная. Илаб хІушани гьаялизи бигьунси къарира, жагьил эмхІера чедиидая. Гьаялизирад арзили, илди иша кая. ³ Эгер чили-биалра хІушази хьарбаалли, „ишди Аричис гІягІнидикили сари“ или, бурая». ⁴ Ил секІал бетаурси саби Аричини бурибси бетерхахъес багьандан. Идбагла гъайличил бурибсири: ⁵ „Бурая Сионна рурсилизи: хІера, хІела Пача лявкьули, къариличив ва жагьил эмхІечив – дукІлиубсила дурхІяличив“». ⁶ Аричини бархьибти мутагІялимтани, арбякьи, гьар секІал Илини чучи хъарбарибси тяхІярли дариб. ⁷ Илдани къарира, жагьил эмхІера ГІисачи киб ва илдачи чула палтар чедушили, ГІиса мурдайахъиб. ⁸ Ил ватихьибхІели, цабехІли чула палтар, цархІилтани галгала кьялуби ГІиса аркьуси гьуйчи удуршутири. ⁹ Гьалаб башути халкь дезабикІескабииб: «Берцуди Даудла Уршилис! Аричила уличил Лявкьуси баракатла сай! Чихъ зубрас деза!» ¹⁰ Ил Ярусалимлизи ухІнаухъунхІели, лебилра шагьар жургъбикІескабииб, адамти бикІулри: «Чи сая Ил?» ¹¹ Халкь бикІулри: «Ил ГІиса сай, Галилеяла Назаретлизивадси идбаг».

Вачуртазиахъибти Аллагьла хъайзибад дугІаъни; сукъурти ва гІяргаби сагъбарни

¹² ГІиса Аллагьла хъули ацІиб ва илабти лебилра бирцути ва исути дугІаиб, арц дарсдирутала кьасурбира, лагьни дирцутала утнира гераиб ¹³ ва илдази иб: «БелкІи саби: „Дила хъали – балгала хъалили бирар“ или. ХІушани биалли ил къачагъунала къехІбаханаличи шурбатурлира». ¹⁴ Илаб Иличи сукъурти ва гІяргаби гъамбиуб, Илини илди сагъбариб. ¹⁵ Хала кашишунани ва Низамла гІялимтани Илини чедиахъути гІяламатунира чедиули, «Даудла Уршилис деза!» или, вявбикІути дурхІнира чебиули, гІясибиуб ¹⁶ ва Илизи иб: «Бикьулрив илди се бикІулил?» ГІиса илдази викІар: «ГІе! ХІушани гьачамалра „ХІехартала кІунтІбачил ХІуни деза тІашбатурри“ или, хІебелчІунраяв?» ¹⁷ Илди батурли, шагьарлизивад Вифаниялизи арякьун ва илаб дуги беркІиб.

Инжирла беръубси галга; вирхниличила

¹⁸ Савли, шагьарлизи чарулхъухІели, гушкайуб. ¹⁹ Гьунила дублаб инжирла ца галга чебаили, иличи гъамиуб, амма кІари ахІенси селра хІебаргили, илизи викІар: «ХІечибад гІурра муртлисалра цІедеш мадакІаб!» Инжир илхІяйзиб беръуб. ²⁰ МутагІялимтани ил чебаили, тамашабиуб ва иб: «Секьяйда инжир бусягІят берэс биубсив?» ²¹ ГІисани илдас жаваблис иб: «ХІекьли бурулра хІушази, эгер хІушала дирхни биалли, ва васвасхІедикІадалли, инжирличил барибсицун ахІи, их дубурлизи адалли: „Ахъбиину, урхьулизи кабики“ или, илра бетарар. ²² Дирхули, балгализиб се тиладибарадалра ил бетарар».

«Сегъуна ариличил ХІуни илди дирулрив?»

²³ Ил Аллагьла хъули вакІили, гІякьлума угьухІели, хала кашишунира, халкьла тямадабира бакІиб, ва иб: «ХІуни илди лерилра секІал чила ихтиярличил дирусири? ХІед илгъуна ихтияр чили гибси?» ²⁴ ГІисани илдас жаваблис иб: «Гьари, Нунира хІушази ца суал хьарбиисну, хІушани Набзира бурая, иличила хІушани бурадалли, Нунира бурисра сегъуна ихтиярличил илди дирулрал. ²⁵ ЯхІъяни шиннизиб бизахъни чинадсири? Зубразибадсирив яра адамтазибадсирив?» Илди чузиб-саби пикрибухъун: «Эгер нушани „зубразибадли“ или, бурахІелли, Илини нушази иру: „ХІуша иличи сен дирххІеуррая, гьатІи?“ ²⁶ Амма нушани „адамли“ или, бурахІелли, халкьлизирад урухкІулра, сенкІун лебтанилра ЯхІъя идбаглизи халирули сай». ²⁷ ГІур илдани ГІисас жаваб чарбатур: «Нушани хІебалехІе». Илдази Илини иб: «ХІебиалли, чила ариличи хъарахъили дирулрал хІушази Нунира хІебурис.

КІел уршиличила бурала

²⁸ ХІушаб се гьанбиркулив? Ца адамла кІел урши лебри: ил цаибилличи гъамиубли, иб: „Урши! ИшбархІи вякьи дила тІутІила анхълизиб хІянчи бара“. ²⁹ Амма илини иб: „Дигули ахІенра“. ГІур биалли, сунела пикри барсбарили, анхълизи арякьун. ³⁰ ЦархІилличира дудеш гъамиубли, илкьяйда буриб. Уршили жаваблис иб: „Аркьясра“, амма архІявкьун. ³¹ Илдазивад чидилли дудешла амру таманбариба?» Илизи бикІар: «Цаибилли». ГІиса илдази викІар: «ХІекьли викІулра хІушази: хІекь бурчантира, къехІбунира хІушаб гьалаб Аллагьла ПачяхІдешлизи аркьули саби, ³² сенкІун гІябиддешла гьуйчивад хІушачи ЯхІъя вакІиб, амма хІуша иличи дирххІеуррая; хІекь бурчантира, къехІбунира биалли бирхаур. ХІушани, ил чебаибкъи, гІурхІелира я пашманхІедиубра, я иличи дирххІеурра.

Вайти тІутІи дашахъантачила; «юрт лушантани мучлахІебарибси къаркъаличила»

³³ ЛехІдизирая цархІил буралаличи: ца адамли, тІутІира удатурли, анхълис хІярира дяхъили, тІутІидялчра барили, хІерудибарахъес анхъчибази бедили, сай вахъхІилис дура арякьун. ³⁴ ТІутІи дилкьуси замана сабаибхІели, илини анхъчибачи сунес биркуси сабухъ сасахъес къаравашуни бархьиб. ³⁵ Амма анхъчибани ца витиб, цархІил кавшиб. ³⁶ Илини гІурра цархІилти къаравашуни бархьиб. Илдасра ил бариб. ³⁷ Ахирра, илдачи сунела урши вархьиб: „Белики, илала хІурматбарес“, – викІули. ³⁸ Амма анхъчиба, ил чеили, цализи цали иб: „Даширая ит кавшили, илала масла букьурти детарехІе!“ ³⁹ Анхъчибани ил, анхъла дура арукили, кавшиб. ⁴⁰ ТІутІила анхъла вегІли илдас се бирув гьатІи?» ⁴¹ Илизи бикІар: «Анхъла вегІ чарухъунхІели, анхъчибира, гІязабберкІили, кабуршу, сунела заманаличир тІутІи дучили, сунес лугести, цархІилти анхъчибази анхъра бедлуга». ⁴² ГІиса илдази викІар: «Марлира, хІушани гьачамалра хІебелчІунсив Дурхъати жузази белкІунси: „Лац лушантани хІейгибарибси къаркъа музализиб бегІлара хІяжатсили бетаур“ или? Аричини барибхІели саби ил секІал нушала хІулбазиб тамаша бетаурси. ⁴³ Илбагьандан бурулра хІушази: Аллагьла ПачяхІдеш хІушазибад кебасили, цІедеш лугути халкьлис бедили бирар. ⁴⁴ Ил къаркъализи чегибсира, кайкили, тІутІуирар, ил къаркъа сунечи кабикибси адамра пІянчІкайу». ⁴⁵ Илала буралаби дакьили, хала кашишунанира, фарисейтанира аргъиб Ил чучила гъайикІули виъни. ⁴⁶ Илди къайгъилизибри Ил уцес, амма халкьлигІиб урухбиуб, сенкІун Ил идбаглизи халирулри.

Мекъла сяхІбатличила бурала

¹ ГІиса, буралабачил гъайикІес даимиубли, иб: ² «Зубрала ПачяхІдеш сунела уршилис мекъ барибси пачачи мешули саби. ³ ХІера, илини сунела лугъри бархьиб мекъла сяхІбатличи жибарахъес, амма жибарибти бакІес хьулхІебухъун. ⁴ ГІурра бархьиб цархІил лугъри, ишкьяйда или: „Жибарибтази бурая, хІерикун хІядурли саби, цІерхьдарибти бугъни делгьи сари, гьар секІал хІядурли сари, мекъла сяхІбатличи даширая“ или. ⁵ Амма илдани, ил жи мучлахІебарили, цабехІ чула хъумачи, цархІилти вачурта биркьес арбякьун, ⁶ цархІилтани илала лугъри батІун ва кабушиб. ⁷ Иличила бакьибси пача гьимукІиб ва, сунела гІяскурти дархьили, лугъри кабушибтира къирбариб, шагьарра цІали бигуб. ⁸ ИлхІели ил сунела лугърази викІар: „Мекъла сяхІбат хІядурли саби, амма жибарибти лайикьти ахІенри; ⁹ дукьеная хІябкьяйтачи ва чихъали къаршибикалра мекъла сяхІбатличи жибарая“. ¹⁰ Илди лугъри, гьундурачи дурабухъи, лебилра къаршибикибти жибариб – вайтира, гІяхІтира. Мекъла хъали жибарибтани бицІиб. ¹¹ Илдачи хІеризес ацІибси пачани мекъла палтар агарли кайибси ца адам чеиб ¹² ва илизи иб: „Юлдаш! ХІу сен ацІибсирив иша мекъла палтар агарли?“ Ил лехІкахъиб. ¹³ ИлхІели пачани къаравашунази иб: „Някъбира, кьяшмира дигьи, дурала цІябдешлизи лайвакІая, илар бисара, цулбала кьяржарра дирар. ¹⁴ Жибарибти бахъал саби, амма чеббикІибти камти саби“».

«Пачас – пачала, Аллагьлис – Аллагьла»

¹⁵ ИлхІели фарисейти, бякьи, вягІдалакабиуб Ил гъайлизив уцес багьандан. ¹⁶ Илдани Иличи чула мутагІялимтира, Ирод гІевурцантира бархьиб. Илди бакІили, бикІар: «МугІяллим! Нушани балулра бархьдеш бирахъес ва чисалра гІяхІулахІейрули, лебтазилра дакІу-гьаргли Аллагьла бархьси гьуникад башахъес ХІу гІевугьни, ¹⁷ бурагу, ХІед секьяйда билзулив, Римла пачас хІекь бедлугес нушачиб чебсив, яра ахІену?» ¹⁸ Илдала суалла вайси мягІналичи шакикили, ГІисани илдази иб: «Сен Дила хІялумцІулрая, кІибяхІянти? ¹⁹ Чебаахъая Набзи хІекьлис бедлугуси арц». Илдани илис динарий хиб. ²⁰ Илдази Ил викІар: «Чила сарив иличирти суратра, белкІра?» ²¹ Илизи бикІар: «Пачала». ИлхІели викІар илдази: «ХІебиалли, пачас пачала бедая, Аллагьлис – Аллагьла». ²² Ил бакьили, илди тамашабиуб ва, Ил ватурли, арбякьун.

МицІирирниличила

²³ Ил бархІи Иличи саддукейти гъамбиуб, сабира бебкІибти гІур мицІирбирниличи бирххІерути ва Илизи хьарбаиб: ²⁴ «МугІяллим, Мусани иб: „ДурхІни ахІекІубли, чи-биалра вебкІалли, илала хьунул цархІил узини сунес кариаб ва узис дурхІни абикьаб“. ²⁵ ХІера, лебри нушала верхІел узи: цаибил, хьунулра кариили, сунезивад дурхІя ахІекІубли вебкІиб. ²⁶ Илкьяйда кІиэсиллира, хІябэсиллира, хІятта верхІэсиллира кариили сари. ²⁷ Илди верхІелра узи бебкІили гІергъи ил хьунулра ребкІиб. ²⁸ Илди мицІирбиубхІели, ил чидил узила хьунулли риэсара? Ил верхІелра узичир хьунулли калунси риалли?!» ²⁹ ГІисани илдас жаваблис иб: «Дурхъати жузира, Аллагьла цІакьра хІебалули, чердулкІулрая. ³⁰ МицІирбиубхІели я хъайчикабирути ахІен, я шери башути ахІен, илди Аллагьла малаикунигъунтили бирар. ³¹ БебкІибти мицІирбирниличила Аллагьли хІушаб дурибтазирад хІебелчІунраяв: „Ну Ибрагьимлара, ГІисакьлара, Якьублара Аллагь сайра“. ³² Амма Аллагь – ил алхунтас ахІенну Аллагьли сайси, мицІиртас сай». ³³ Халкьли илди дикьули, Илала белчІуди-динничи дебали тамашабирутири.

Халасигъуна вягІза

³⁴ Илини саддукейти лехІкахъахъниличила бакьили, фарисейти цалабикиб. ³⁵ Илдазивад цали сайси Низамла гІялимли, Илала хІялумцІули, хьарбаиб: ³⁶ «МугІяллим! Низамлизиб бегІлара халаси амру чидил саби?»

³⁷ ГІисани илизи иб: «ХІела Аричи Аллагь лебилра уркІила цІакьличил, жайчил ва дагьриличил дигахъен: ³⁸ ил саби цаибил ва бегІлара халал амру. ³⁹ КІиибилра иличи мешуси саби: „ХІед хІу кьяйдали, хІела гъамсира дигахъен“. ⁴⁰ Илди кІелра амру Низамла ва идбагунала хьулчни сари».

Фарисейтази ГІисала суалти

⁴¹ Фарисейти цалабикибхІели ГІисани илдази хьарбаиб: ⁴² «ХІушаб МасихІ чи сай или гьанбиркулив? Ил чила урши сая?» Илизи бикІар: «Даудла урши сай». ⁴³ Илдази иб: «Сен гьатІи Дауд Илис Аричи викІулив, ишкьяйда бурухІели: ⁴⁴ „Аллагьли дила Аричизи иб: ‘Дила балуй шайчи кайъи, ХІела душманти ХІела кьяшмала удиб багьарбиахъайчи’“». ⁴⁵ Дауд Илис Аричи викІули виалли, секьяйда вирара Ил илис уршили виэс?» ⁴⁶ Чилилра жаваблис Илизи гъайэс хІебиуб, ил бархІила гІергъи чилилра хьарбаэсра хІебиуб.

Фарисейтачила ГІисала насихІятуни

¹ ИлхІели ГІиса халкьлизи ва Сунела мутагІялимтази гъайикІесиили, ² иб: «Мусала мер Низамла гІялимтанира, фарисейтанира буцили саби. ³ Илдани дирахъес хъардирути диреная, амма чули дирутиван мадиридая, сенкІун илдани дурули сари, амма дирули ахІен. ⁴ Адамтала хъуцІрумачи декІти ва дихесагарти мухри чедирхьули сари, амма кумек акІахъес тІулалра вяшбарес дигули ахІен. ⁵ Лерилра чула баркьудлуми адамтази чедаахъес дирули сари: андаличирти ва някъбачирти белкІаначилти хІябнира, палтарла сурмира дягІудирахъули сари. ⁶ СяхІбатуначир ва киласабазир цаибти мерани дигахъу ⁷ ва халкьла цахІнабикуначиб чузи саламбикІули дигахъу, илхІелира адамти чузи бикІули: „МугІяллим! МугІяллим!“ ⁸ ХІуша биалли, хІушаб мугІяллимти сарра или мадикІудая, сенкІун хІушала МугІяллим ца сай – МасихІ, хІуша лерилра узби сарра; ⁹ ванзаличир чисалра дудеш илира мадикІудая, сенкІун хІушала Дудеш ца сай, сайра зубрачивси. ¹⁰ НасихІятчи илира чисалра мадикІудая, сенкІун хІушала насихІятчира ца сай – МасихІ. ¹¹ ХІушазивад халал хІушаб къаравашли виаб: ¹² сунени сай чевяхІируси, увяхІварили вирар, сунени сай увяхІируси – чевяхІирар.

¹³ Балагь-кьадар хІушаб, кІибяхІянти Низамла гІялимти ва фарисейти! Зубрала ПачяхІдеш гІекІили, я хІуша духІна ахІедицІули, я абацІес дигути абацІахъес хІебалтантас. ¹⁴ Балагь-кьадар хІушаб, кІибяхІянти Низамла гІялимти ва фарисейти! Гамъабала мас букни багьандан ва кІибяхІяндешличил дахъхІи дулгни багьандан, ил шайчиб танбихІ имцІали кайсидая.

ВерхІкаси «балагь хІушаб»

¹⁵ Балагь-кьадар хІушаб, кІибяхІянти Низамла гІялимти ва фарисейти! ХІушани ца адамалра динничи шурухъахъес урхьнира, дегъра къунздирулра, амма ил бетаурхІели, хІушачивра вайси жагьаннабла уршили ветарахъулрая. ¹⁶ Балагь-кьадар хІушаб, сукъурти хала тямадаби: „Аллагьла хъайчи чили хъя баралра, селра ахІен, амма Аллагьла хъа мургьиличи баралли, гІяйибла вегІ сай“ или, дикІулра. ¹⁷ Абдулти ва сукъурти! Се халалив: мургьив, яра илди мургьи дурхъадируси Аллагьла хъалив? ¹⁸ ГІурра: „Кьурбанханаличи чили хъя баралра селра ахІен, амма илизибси савгъатличи хъя барибси гІяйибла вегІ сай“ дикІулра. ¹⁹ Абдулти ва сукъурти! Се халалив: савгъату, яра ил савгъат дурхъабирахъуси кьурбанханав? ²⁰ Илбагьандан кьурбанханаличи хъя бирусини, иларти лерилра секІайчира хъя бирули сай. ²¹ Илкьяйда Аллагьла хъайчи хъя бирусини илизив ХІерирусиличира хъя бирули сай. ²² Зубрачи хъя бирусинира, Аллагьла Тахличира, иличи Кайибсиличира хъя бирули сай. ²³ Балагь-кьадар хІушаб, кІибяхІянти Низамла гІялимти ва фарисейти! Шумерилара, хъалталара, гьар журала духълумалара вецІал бутІала ца бутІа закатлис лугули, Низамлизирти бегІлара мягІничерти: судра, ряхІмура, дирхнира датнилис. ХІушани ца бирухІели, итилра хъумхІертес чебсири. ²⁴ Сукъурти тямадаби, жибин кьяраэс мяхІкамдикІути, амма валри кьяриути! ²⁵ Балагь-кьадар хІушаб, кІибяхІянти Низамла гІялимти ва фарисейти! ХІушани кьямла чедила ицулра, бухІнала биалли хъям-кьацІлира, къалплира бицІили саби. ²⁶ Сукъур фарисей! Гьаланачи кьямла бухІнала умубара, чедилара умули баахъес. ²⁷ Балагь-кьадар хІушаб, кІибяхІянти Низамла гІялимти ва фарисейти! ХІуша мешудиркулра хІябла дерхьурти тІакьначи, чедила куц хІясибли илди жагадизести сари, амма духІнала бебкІибтала лигубани ва нясдешунани дицІили сари. ²⁸ Илкьяйда хІушара чедирадли адамтас хІялалтили кадилзулрая, амма духІнарадли кІибяхІяндешли ва ламусагардешли дицІилрая. ²⁹ Балагь-кьадар хІушаб, кІибяхІянти Низамла гІялимти ва фарисейти! ХІушани идбагунас хІябри дирулрая ва гІябидунала цІелдуби жагадирулрая, ³⁰ ва дикІулрая: „Эгер нушала дудешунала замана нуша диубти диахІелри, идбагунала хІи картІнилизир нуша илдала дархкьябили детхІерехІери“. ³¹ Илкьяйда хІушани хІушачи къаршили бикьридеш дирулрая ва хІуша идбагуни кабушибтала дурхІни диъни марбирулрая. ³² ХІушала дудешунала умцла чебирцІахъидая. ³³ ЧІичІлумазирад кадикибти чІичІлуми! Илала гІергъи секьяйда хІуша уцутирая жагьаннабла танбихІлизирад?

Идбагуни хІебалтниличила

³⁴ Аллагьли бурили саби: „Илбагьандан Нуни хІушачи идбагунира, пасихІтира, гІялимтира бурхьулра. ХІушани цабехІ кабуршидая ва хІябтІерхьаличи бетирхъидая, цархІилти киласабазиб итидая ва шагьуртазибад шагьуртази дугІиидая. ³⁵ Илбагьандан иш дунъя акІубхІейчирадли, Гьабилла хІиличирад дехІдихьили, Аллагьла хъалила дурхъаси мерлара кьурбанханалара ургав кавшибси Варахинна урши Закарияличи бикайчи, кертІибти лебилра идбагунала хІила жавабкардешра хІушачир дирар“. ³⁶ Нуни хІушази хІекьли бурулра: илди лерилра иш гьаннала кьамличи чевкъар.

Ярусалимличи гІяйибти

³⁷ Ярусалим, Ярусалим, идбагунира кабуршуси, хІечи бархьибтира къаркъуба итули кабуркІуси! ГІяргІянира сунела жибхІни дуклумау дурчуливан, хІела дурхІни бучес Нуни чуйнара кьасбарили хьалли, хІу кьабулхІебикири! ³⁸ ХІера, гьанна хІушала юрт бацІкабухъи саби! ³⁹ Нуни хІушази бурулра: „‘Аричи багьандан Лявкьуси Аллагьли мубаракварибси сай!’“ или, дикІуси замана сабаайчи, хІушани Ну чехІейура!»

Аллагьла хъали гъятІбирниличила, дявти дирниличила ва гІелабадкабиркниличила ГІисани гьалахили бурули сай

¹ Дуравхъи, Аллагьла хъуливад аркьухІели, Иличи мутагІялимти гъамбиуб Аллагьла хъа юрт Илизи чебаахъес или. ² ГІисани биалли, илдази иб: «Илди лерилра чедиулрав? ХІекьли бурулра хІушази: ишаб къаркъаличиб къаркъа кахІевлан, лерилра гъятІаили дирар».

³ Ил Елеон дубурличив кайибхІели, Иличи сабицун мутагІялимти музабухъун ва хьарбаиб: «Бура нушази мурт ил бетарара? Сегъуна лишан бирара ХІу лявкьнила ва ахират гъамбирнила?» ⁴ ГІисани илдас жаваблис иб: «Сахъли диирая хІуша чизи-биалра диргІяхІедиргахъес. ⁵ Бахъал лябкьян Дила уличил ва бикІар: „Ну МасихІ сайра“. Илдани бахъал чеббулкІахъа. ⁶ Дургъбачила бикьидая, дургъбачила хабурти дирар. ИлхІели хІуша кахмадирудая, сенкІун илди детаэс гІягІнити сари, амма ил гьачамлис ахир ахІен. ⁷ Халкь халкьличи пунтбирар, ца пачяхІдеш – итилличи; мер-мерличир гашира дирар, мерсра далкьан. ⁸ Илди лерилра – виштІаси виркьуси хьунул адамла гІязабтачи мешули сари. ⁹ ИлхІели хІуша гІязабтази диркахъурая, ва кадуршурая, Дила у багьандан лебилра халкьанани хІуша хІейгидирура. ¹⁰ Илбагьандан бахъал чеббулкІан ва цали ца убедлуга, ва цаличи цали гьимидулхъахъа. ¹¹ Бахъал къалпти идбагуни дакІубухъи, бахъал чеббулкІахъа. ¹² Ламусагардеш имцІабикІни багьандан, бахъла диги камдирар. ¹³ Лерилра чекасес виубси верцили вирар. ¹⁴ Низам-зегъала дунъяла иш Инжил лебилра гІяламлис, лебилра халкьанас бикьридешлис багьахъурли бирар. ИлхІели ахирра лябкьян. ¹⁵ ХІера, Даниял идбагличибад багьахъурси бетаурли, дурхъаси мерличиб жяргабиънила нажасдеш чебаибхІели, белчІес вирусини багьаб, ¹⁶ илхІели Иудеялизибти дубуртази бебшаб; ¹⁷ хъалчличивсира, се-биалра касес или, хъули камацІаб; ¹⁸ авлахъличивсира, палтар касес или, хъули чармайаб. ¹⁹ Балагь саби илди бурхІназиб дурхІялис баибтас ва михъиртачиб дурхІни бухъахъутас! ²⁰ Дулгеная янилизиб яра сут бархІи ил хІебиахъес. ²¹ ИлхІели дунъя биубхІейчибад хІебиубси ва гІур хІебируси бахъ халаси балагь бирар. ²² Илди бурхІни къантІхІедарибти диалри, цалра мицІирси жан берцес хІебириб, амма чеббикІибти багьандан илди бурхІни къантІдарили дирар.

Инсаниятла Урши лявкьни: ил бархІиличила чилилра балуси ахІен; «мадусадая»

²³ ИлхІели хІушази буралли: „Иш ишав МасихІ“, яра „Ит итав“ – дирхмарудая. ²⁴ СенкІун къалпти масихІуни ва идбагуни дакІубулхъан. Илдани, хІушара, имканбакІалли чеббикІибтира чердалкІахъес или, халати гІяламатуни ва мугІжизатуни чедиахъу. ²⁵ ХІера, Нуни хІушази гьалахили дурира. ²⁶ Эгер хІушази буралли: „ХІера, Ит чІянкІ авлахъличив“ или, дурамадулхъадая; эгер буралли: „ХІера, Ит духІнарти хъулразив“ или, дирхмарудая. ²⁷ Машрикьлизиб багьарбиубси лямцІ магъриблизиб чебиули кьяйда, Инсаниятла Уршила вакІнира илгъунали бирар. ²⁸ Жаназа лебси мерличи чІакни цаладиркур. ²⁹ Илди бурхІнала балагь-кьадарлис гІергъи хапли берхІи билшан, бацлира сунела шала хІелуга, зубартира зубрачирад кадиркур, зубрира гардардулхъан. ³⁰ ИлхІели заклизиб Инсаниятла Уршила гІяламат дакІубирар; дунъяла лебилра халкьани бисибирар ва зубрала гъагултачи айили лявкьуси, чебяхІси цІакьличилси ва чевяхІдешличилси Инсаниятла Урши чейу. ³¹ Дунъя бучІахъуси дядличил Сунела малаикуни бурхъу ва, закла ца дубличибад итил дубличи бикайчи, Сунела чеббикІибти бурчу. ³² Инжирла галгализибад гІякьлу касая: илала кьялуби кІантІидиубли, кІинчІбазирад кІари дуралкьес дехІдихьибхІели, дуцІрум гъамли диъни баладая. ³³ Илкьяйда хІушани илди лерилра секІал чедаибхІели, унзаличи гъамли ахир бакІили биъни багьирая. ³⁴ ХІекьли бурулра хІушази, иш кьам бетхІехъили лебалли илди лерилра детарар. ³⁵ Закра ванзара детихъур, амма Дила дугьби детхІейхъур. ³⁶ Ил бархІиличила ва сягІятличила чилилра балуси ахІен, я малаикунани, я Уршили, чІянкІли Дила Дудешли ахІенси. ³⁷ Инсаниятла Урши лявкьути бурхІназиб НухІ идбагла замана биубси кьяйда бетарар. ³⁸ Шин чедидерхес гьалабра букутири, бужутири, хъайчикабирутири ва шери башутири – НухІ идбаг гамиличи ацІайчи, ³⁹ ва илдани балуси ахІенри тІурпан бакІили, лебилра гъаркькабарайчи. Илгъуна бирар Инсаниятла Урши вакІнира. ⁴⁰ ИлхІели кІел бирар авлахъличиб: ца арку, цархІил валта. ⁴¹ КІел бирар шинкьайзиб лукьути: ца арку, цархІил ралта; ⁴² Илбагьандан дусмадусадая, сенахІенну се замана хІушала Аричи лявкьянал балхІебаладая. ⁴³ ХІушаб гІячихъси саби, эгер хъа вегІли балуси биалри се замана хъулки лявкьянал, усхІевси, ва хъа удибад уббуркъахъес хІебалти. ⁴⁴ Илбагьандан хІушара хІядурли диирая, сенкІун чидил сягІятлизив Инсаниятла Урши лявкьусил хІебаладая. ⁴⁵ Сунела лебилра къаравашуначи хІеруди бирахъес ва заманаличиб илди берк-бержличил гІеббурцахъес юртла вегІли катурси халал буюрчи сегъуна вирара? ⁴⁶ ЧариубхІели хужаимли хІянчилизиахъили варгибси къаравашра талихІчевси сай. ⁴⁷ ХІушази бархьли бурулра: хужаимли илгъуна къаравашличи сунела лебил давла-хазналичи хІерудибарахъесра хъарбиру. ⁴⁸ Эгер ил къараваш сунези сай: „Дила хужаим жявли-декІар чархІейрар“ викІули, ⁴⁹ цархІилти къаравашуни итес вехІихьалли, ва, держлукьуначил укра укули, ужра ужалли, ⁵⁰ гьаналра агарси замана ил къаравашла хужаим лявкьян, ⁵¹ ил иту ва кІибяхІянтиван танбихІлаиру. Илар биалли бисара, цулбала кьяржарра дирар».

ВецІал рурсиличила бурала

¹ «ИлхІели Зубрала ПачяхІдеш мешули бирар, чиргъмира касили, гелешмешлис гьунибаэс дурабухъунти вецІал рурсиличи. ² Илдазибад шел кабизалачебтири, шел биалли ахІенри. ³ Кабизалачебтани чиргъми касили, илдази картІуси гІявадеш кахІесиб. ⁴ Кабизалачебтани чула чиргъмачил бархли тІалхІянабазиб гІявадешра касиб. ⁵ Гелешмеш кьаниубхІели, илди лебилра бускаун. ⁶ Бай дуги тІама-гьама ахъдиуб: „ХІера, гелешмеш лявкьули, илис гьала дурадухъеная“. ⁷ ИлхІели лебилра рурсби ахъбиуб ва чула чиргъми далаиб. ⁸ ЧебетхІебаибтани кабизалачебтази иб: „Нушала чиргъми дилшули сарину, хІушала гІявадеш нушаб бихая“. ⁹ Кабизалачебтани илдази жаваб бедиб: „ХІушалаван нушалара камхІебиахъес багьандан, гІявадеш бирцутачи дякьи, асая“. ¹⁰ Илди асес арбякьунхІели, гелешмеш вакІиб ва хІядурти иличил барх мекъла сяхІбатличи абацІиб, илхІели къапура гІекІиб. ¹¹ Илала гІергъи, цархІилти рурсбира бакІили, бикІар: „Хужаим, хужаим! Нушаб унза абхьа“. ¹² Илини биалли, илдас жаваблис иб: „ХІушази бархьли бурулра: хІуша чихъалирал далути ахІенра“. ¹³ Илбагьандан дусмадусадая, сенахІенну Инсаниятла Урши лявкьуси я бархІи, я сягІят балути ахІенра.

Ашрапуначила

¹⁴ Илини дурала улкализи аркьуси адамливан биру. Ил адамли, сунела лугъри жибарили, лебдеш хъарбариб: ¹⁵ цализи илини шел ашрапи дедиб, итиллизи – кІел, цархІиллизи – ца, гьариллис ахъри хІясибли дутІили, арякьун. ¹⁶ Шел ашрапи касибси арякьи, илди дузахъули, шел гьатІи ашрапи дикахъиб. ¹⁷ Тяп илкьяйда кІел ашрапи касибсинира кІел гьатІи дикахъиб. ¹⁸ Ца ашрапи касибсини, бухили ванзализи укабатурли, дигІянбариб. ¹⁹ ГІяхІцад заманала гІергъи илди лугърала хужаим чарухъун ва лугъразибад лебдеш тІалаббариб. ²⁰ Шел ашрапиличилси иличи гъамиубли иб: „Хужаим! ХІуни набзи шел ашрапи гири, илдазирад ихди шел гьатІи нуни дикахъира“. ²¹ Хужаимли илизи иб: „ГІяхІна, гІяхІси ва марси лагъ! БиштІасилизив хІу наб марли кални багьандан, халасиличи калтари; хІела хужаимла шаддеш хІунира бутІа“. ²² КІел ашрапи касибсира гъамиуб ва иб: „Хужаим! ХІуни набзи кІел ашрапи гири, илдазирад ихди кІел гьатІи нуни дикахъира“. ²³ Хужаимли илизи иб: „ГІяхІна, гІяхІси ва марси лагъ! БиштІасилизив хІу наб марли кални багьандан, халасиличи калтари; хІела хужаимла шаддеш хІунира бутІа“. ²⁴ Ца ашрапи касибсира гъамиуб ва иб: „Хужаим! хІу хІебегІунси иршуси ва бурчуси кьяркьси адам виъни нуни валусири. ²⁵ Илбагьандан урухиубли, хІела ашрапи ванзализи дигІянбарира. ХІед хІела чарбирулра“. ²⁶ Хужаимли биалли, илис жаваблис иб: „Вайси ва азгъин лагъ! ХІуни балулри нуни хІебегІунси иршни ва бурчни. ²⁷ ХІебиалли нуни хІези гибси ашрапи вачрукьянабази бедили, бузахъес гІягІнисири, нуни чарухъунхІели ил хайриличил кайсира”. ²⁸ Илизибси ашрапи кебасили, вецІал лерсилизи бедая. ²⁹ Лебсилис бедили бирар ва имцІабирар, агарсила лебсира кебасили бирар. ³⁰ ХІяжар лагъ дурала цІябдешлизи лайвакІая: илар бисара, цулбала кьяржарра дирар“ .

Халкьанала чебкадси суд; «Наб бариб»

³¹ Сунела чебяхІдешлизив ва лебилра малаикуначил Инсаниятла Урши вакІибхІели, Сунела чевяхІдешла тахличи кайрар. ³² Илала гьала лебилра халкь цалабиркур. Илини букІунни кьяцназирад маза декІардирули кьяйда, цабехІти цархІилтазибад декІарбиру: ³³ маза балуй шайчи тІашдалта, кьяцни биалли – алгъай шайчи. ³⁴ ИлхІели Пачани балуй шайчибтази буру: „Дукьеная, Дила Дудешли баркатладарибти, дунъяла бехІбихьудличибадал хІушаб хІядурбарибси ПачяхІдешла букьуртили детаирая, ³⁵ сенкІун Ну гушлири – хІушани Наб беркесил гира, Ну милиглири – хІушани Ну шинни вахунра, Ну дуравадси сайри – хІушани кьабулварира, ³⁶ чІянкІулири – хІушани Ну вегІварира, зягІиплири – хІуша Набчи музадухъунра, туснакълаври – хІуша Набчи дакІира“. ³⁷ ИлхІели гІябидунани жаваблис Илизи иру: „Аричи! Мурт нушани ХІу гушли чеили, кьацІли вахунсирив? Яра милигхІели, шинни вахунсирив? ³⁸ Мурт нушани ХІу дугІли чеили, кьабулварибсирив? Яра чІянкІухІели вегІварибсирив? ³⁹ Мурт нушани ХІу зягІипли яра туснакълав чеили, ХІечи дакІибтирив?“ ⁴⁰ Пачани жаваблис иру: „ХІекьли бурулра хІушази: Дила бегІлара биштІатигъунти узбазивад цалис илгъуна барибси, Наб барибсира саби“. ⁴¹ ИлхІели алгъай шайчибтазира буру: „Дашеная Набчирадли, нажасуни, илбислис ва илала малаикунас хІядурбарибси даимси цІализи, ⁴² сенкІун Ну гушлири – хІушани Наб беркесил хІегира; Ну милиглири – хІушани Ну шинни хІехунра; ⁴³ Ну дуравадси сайри – хІушани кьабулхІерира; чІянкІулири – хІушани Ну вегІхІерира; зягІиплири ва туснакълаври – хІуша Набчи хІедакІира“. ⁴⁴ ИхІели илдани жаваблис Илизи иру: „Аричи! Мурт нушани ХІу гушли, милигли, дугІли, чІянкІули, зягІипли яра туснакълав чеили, ХІед къуллукъхІебарибсив?“ ⁴⁵ ИлхІели илдази жаваблис иру: „ХІекьли бурулра хІушази, Дила бегІлара биштІатигъунти узбазивад цалис илгъуна хІебарибси, Набра хІебарибси саби“. ⁴⁶ Илкьяйда аркьян илди даимти гІязабтази, гІябидуни биалли – даимти гІямрулизи».

Сай убкІниличила ГІисани гьалахили бурни; кашишуни ва тямадаби ГІисачи къаршили бархбершни

¹ ГІисани илди лерилра гъай тамандарибхІели, Сунела мутагІялимтази буриб: ² «ХІушани балулра кІел бархІила гІергъи Пасхала байрам биъни ва Инсаниятла Урши хІябтІерхьаличи ветирхъни».

³ ИлхІели Кайаф бикІуси хала кашишла азбарлизиб хала кашишунира, Низамла гІялимтира, халкьла тямадабира цалабикили, ⁴ гІямултачил уцили, ГІиса кавшес пикрибариб. ⁵ Амма байрамла ахІенси замана – халкь пунтхІебиахъес багьандан.

Вифаниялизив ГІиса вакни

⁶ ГІиса Вифаниялизив кьявгала изайзивад сагъиубси Симонничив сайхІели, ⁷ гачІла тІалхІянализиб дурхъаси гІявадешличилси хьунул адам гъамриубли, Илала бекІ бакиб. ⁸ Ил чебаили, Илала мутагІялимти гІясибиубли, бикІутири: «Се дирутив илди харжани? ⁹ Ил гІявадеш дурхъали бицили, арц мискинтас дедес вири». ¹⁰ Ил багьурси ГІисани илдази иб: «Сен хьунул адам урузрирахъулрав? Илини Наб гІяхІдеш бариб. ¹¹ Мискинти мурталра хІушачил саби, Ну биалли, мурталра хІейрус. ¹² Дила чарх гІявадешли бакили, Ну илини хІяриихьахъес хІядурварира. ¹³ ХІекьли викІулра хІушази: чинаб Инжил багьахъалра, лебилра дунъяличиб ишини барибсира багьахъурли бирар».

Ягьудани ГІиса уведни

¹⁴ ИлхІели вецІнукІирализивад ца, сунесра Кариотлан Ягьуда бикІуси, хала кашишуначи вякьун ¹⁵ ва иб: «ХІушани наб се лугадая, нуни Ил уведасли?» Илдани илис хІябцІали гІяббаси гьаладихьиб. ¹⁶ Илала гІергъи ГІиса уведес или, ил гІяхІси замана бикахъес хІерликайиб.

Пасхаличи хІядурбиъни

¹⁷ Анзути бехІцІурала цаибил бархІи мутагІялимти ГІисачи гъамбиуб ва Илизи иб: «ХІед Пасхала беркала чинаб барахъес хъарбирулрив?» ¹⁸ Илини иб: «Шагьарлизи пулан адамличи дукьеная ва илизи бурая: „МугІяллим викІули сай: ‘Дила замана гъамбиубли саби, Дила мутагІялимтачил хІечиб Пасха дурабуркІисра’“». ¹⁹ МутагІялимтани ГІиса викІуси кьяйда бариб ва байрамла беркала хІядурбариб.

ГІисала дугадука; кьацІ ва кьям

²⁰ БархІехъ Ил вецІнукІиралра мутагІялимличил илав хъарихьун. ²¹ Илди букес бехІбихьибхІели, иб: «ХІекьли викІулра хІушази: хІушазивад цали Ну уведлугара». ²² Илди хІекьли пашманбиуб, ва илдазивад гьарил Илизи викІескайиб: «Ну ахІенрагу, Аричи?» ²³ Илини жаваблис иб: «Набчил барх кьумурла някъ бухибсини Ну уведлугара. ²⁴ Инсаниятла Урши кьалли, Сунес белкІунсиван, аркьули сай, амма балагь Инсаниятла Урши сунечивли уведлугуси адамлис, илис бекІлил ахІекІубли гІяхІил бириб». ²⁵ ИлхІели Ил уведлугуси Ягьуданира иб: «Ну кьалли ахІенра, Рабби?» ГІисани илизи иб: «ХІуни бурири».

²⁶ Илди букухІели, ГІисани кьацІ касиб ва, баркатлабарили, кабердили ва, мутагІялимтас буртІули, иб: «Касая, беркеная – ил саби Дила Кьаркьала». ²⁷ Илкьяйда кьямра касили, баркатлабарили, илдази бедиб ва иб: «Илизирад лерилра дуженая, ²⁸ сенкІун илди, бунагьуни хасардатахъес багьандан бахъал гьанни картІути, Сагаси ВягІзала Дила хІи сари. ²⁹ ВикІулрагу хІушази: гьаннала гІергъи гІур хІушачил тІутІила бухъайзирадти хІедужисра, Дила Дудешла ПачяхІдешлизир сагати чягъир хІушачил держайчи».

³⁰ Дезара белчІи, Елеон дубурличи арбякьун.

Петр бирхаудилизивад улхъни гьалахили бурни

³¹ ИлхІели ГІиса илдази викІар: «Ил дугилизир лерилра хІушани Набчи дирхни детихъахъидая. БелкІи саби: „БукІун каршисра ва дурзамла маза тІутІукадирар“; ³² Ну мицІиркайубхІели, хІушаб гьалав Галилеялизи аркьясра». ³³ Петрли Илис жаваблис иб: «Лебтанилра бирхни бетахъахъалра, нуни бетхІейхъахъис». ³⁴ ГІисани илизи иб: «ХІекьли викІулра хІези: ил дуги, дагъа бучІесбиайчи, хІуни Ну хІяйна уввалтара». ³⁵ Петр илизи викІар: «ХІечил вархли вебкІес чебуркъаллира, ну хІечивад гІелумхІейрус». Илкьяйда бикІи лебилра мутагІялимти.

Гефсиманиялизиб

³⁶ ГІур ГІиса илдачил Гефсимания бикІуси мерличи вакІиб ва мутагІялимтази викІар: «Ишар кадиили каленая, Ну вякьи балга бирис». ³⁷ Сунечил варх Петрра, Заведейла кІелра уршира касили, ил децІикІескайиб. ³⁸ ИлхІели илдази ГІиса викІар: «Дила РухІ дебкІесливан децІдикІули сари, ишар Набчил хІедусули каленая». ³⁹ Цакамси гІелумиубли, улгесвяхІиб: «Дила Дудеш! Имкан биалли, ил гІузрула кьям Набчибад гьарахъли калаб, амма Наб дигусиван ахІи, ХІед дигусиван биаб». ⁴⁰ МутагІялимтачи чарухъунхІели, илди бусули баргили, Петрлизи викІар: «Илкьяйда ца сягІяталра хІуша Набчил хІедусули дуэс хІедиубраяв? ⁴¹ Мадусудая ва дулгеная, черхІедалкІес багьандан: рухІ жигарти сари, кьаркьала биалли гьунарагар». ⁴² ГІурра гІелумиубли, улгиб, викІули: «Дила Дудеш! Ил гІузрула кьям Набчибад чебхІебиркалли, ва чекасес чебуркъалли, ХІела ари биаб!» ⁴³ ГІур вакІибхІелира илди гІурра бусули баргиб, сенкІун илдала хІулби декІкадиублири.

⁴⁴ Илди батурли, гІурра гІелумиуб ва хІяйнайсра илгъуна балга бариб. ⁴⁵ ИлхІели, вакІили Сунела мутагІялимтачи, илдази викІар: «ХІуша гьаннара дусулраяв ва бамсриихъулраяв? ХІера, Инсаниятла Урши бунагькартала някъбази ведлугуси сягІят гъамбиубли саби. ⁴⁶ Айзирая, аркьехІе; ну уведлугуси гъамирули сай».

ГІиса уведили сай ва уцили сай

⁴⁷ Ил илкьяйда викІули левли, вецІнукІирализивад ца сайси, Ягьудара ва иличил барх турмачилти бахъал адамтира бакІиб. Илдала ургаб хала кашишунира, халкьла тямадабира лебри. ⁴⁸ Уведлугусини илдази лишан буриб: «Ну Сунечи байикунси Ил сай, Ил уцая». ⁴⁹ БусягІят ГІисачи гъамиубли, иб: «Салам, Рабби!» ва Иличи байикун. ⁵⁰ ГІисани илизи иб: «Гьалмагъ, селичи вакІирив хІу?» ИлхІели бакІили, ГІисачи някъби чедихьиб ва Ил уциб. ⁵¹ ГІисачилтазивадси цали тур касили, хала кашишунала лагълис бяхъиб ва лихІи чеббикахъиб. ⁵² ИлхІели ГІисани илизи иб: «ХІела тур сунела мерличи кабихьа, сенкІун лебилра тур касибти турлизибадли бубкІар, ⁵³ яра хІед гьанбиркулив Нуни Дила Дудешлизи тиладибарасли, малаикунала вецІнукІира азирла гІяскар хІелуга или? ⁵⁴ Дурхъати жузази делкІунти секьяйда детурхара, или хІебиалли?» ⁵⁵ ИлхІяйзиб ГІисани халкьлизира иб: «Къачагъ уцес кьяйда турмачил ва къярдубачил дурадухъира хІуша Ну уцес. Ну биалли, гьарил бархІи хІушачил варх вирира, Аллагьла хъулир хІуша руркъули, илхІели хІушани Ну хІевцира. ⁵⁶ Иш кабикибси саби идбагунала делкІунти детерхахъес багьандан». ИлхІели, Ил ватурли, лебилра мутагІялимти бебшиб.

Чихъси судличиб

⁵⁷ ГІиса уцибтани Ил хала кашиш Кайафла азбарлизи киб. Илаб хала кашишунира, Низамла гІялимтира, халкьла тямадабира цалабикиб. ⁵⁸ Петр гьарахъ-гьарахъли, Илис гІергъи вашули, хала кашишла азбарлизи ваиб ва, ухІна ацІили, къуллукъчибачил вархли кайиб, ахир чебаэс багьандан. ⁵⁹ Хала кашишунира, халкьла тямадабира, лебилра чебяхІси судра ГІисачи къаршити къалпти бикьридешлигІиб умцІулри, Ил кавшес багьандан, ⁶⁰ амма баргес бирули ахІенри, гІяхІцад къалпти бикьруми башули биаллира. Ахирра кІел къалпти бикьруми бакІиб ⁶¹ ва иб: «Ил викІи Аллагьла хъали бехъес ва хІябал бархІила бухІнаб тІашбатес вирусра» или. ⁶² Хала кашиш айзурли, Илизи иб: «Сен селра хІебурулрив? Илдани хІечи къаршили бикьридеш дирули сари». ⁶³ ГІиса лехІкахъилри. Хала кашишли Илизи иб: «МицІирси Аллагьла у ахъили тиладибирулра, бура нушази, ХІу сайрив МасихІ, Аллагьла Урши?» ⁶⁴ ГІисани илизи иб: «ХІуни бурири. Амма бурулра хІушази: гьаннала гІергъи гъагъултачив лявкьули, Кьудратла ВегІла балуй шайчи кайибси Инсаниятла Урши чейидая». ⁶⁵ ИлхІели хала кашишли сунела палтар гъярдердиб ва иб: «Ил Аллагьлис вайта угьули сай! ГІур нушаб бикьруми селис хІяжатлив? Илала гъай хІушани дакьира! ⁶⁶ ХІушаб секьяйда гьанбиркулив?» Илдани жаваблис иб: «БебкІаличи лайикьли сай». ⁶⁷ ИлхІели Илала дяхІличи тубикІесбииб, дяхъиб; цархІилти ляжубази бирхъулри ⁶⁸ ва бикІулри: «Бура, МасихІ, ХІед бяхъибси чи саял?»

Петрли ГІиса чеввяхъни

⁶⁹ Петр дурав, азбарлизив кайилри. Иличи ца къуллукъчи гъамриуб ва иб: «Галилеялан ГІисачил хІура леври». ⁷⁰ Амма лебталалра гьалав илини ГІиса чеввяхъиб, или: «ХІу се рикІулрил балули ахІенра».

⁷¹ Къапулизивад дураулхъухІели, ил цархІилли чеиб ва илабтази иб: «Илра леври Назорейлан ГІисачил». ⁷² Илини гІурра чеввяхъиб, „Илгъуна Адам хІелас“ или. ⁷³ Камси замана дикибхІели, илаб тІашти гъамбиуб ва Петрлизи иб: «Дурусли, хІура илдазивадси сайри, сенкІун хІела декІарти гъайли хІу уведлугулри». ⁷⁴ ИлхІели ил хъямаиркьескайиб, „Илгъуна Адам хІелас“ или. Хапли дагъа бучІесбииб.

⁷⁵ ИлхІели Петрлис ГІисани бурибси гьанбикиб: «Дагъа бучІесбиайчи ХІуни ну хІяйна чевирхъура». Илавадли дуравхъи, кьутІкьули висиииб.

Пилатла суд; Ягьудала ахир

¹ Савли дикибхІели, лебилра хала кашишунала ва халкьла тямадабала мажлис биуб, Ил кавшес багьандан. ² Илдани вигьи, Ил улкала бекІ Понтий Пилатличи арукиб.

³ ИлхІели Ил уведибси Ягьудани, Ил судлаварни чебаили, пашманиуб ва хала кашишунасра, халкьла тямадабасра хІябцІали гІяббаси чардариб, ⁴ ва иб: «ГІяйибагарти хІи удедили, нуни бунагь барира». Илдани биалли, илизи иб: «Нушаб илала се авара? ХІед дигуси бара». ⁵ Аллагьла хъулир арцра лайдакІили, ил дуравхъи арякьун ва гІяндикиб. ⁶ Хала кашишунани арц касили иб: «Ишди киласала хазнаханализи кадихьес асухІебирар, сенкІун хІила багьа саби». ⁷ ГІур вягІдалабиубли, илди арцлис тІалхІянала устала ванза асиб, дурабадти хІярибирхьес багьандан. ⁸ Илбагьандан ил ванзалис «хІила ванза» или, бикІули саби. ⁹ ИлхІели Еремия идбагличибад багьахъурси бетерхур. Илини ибсири: «Израилла дурхІнани Багьалаварибсила хІябцІали гІяббаси касиб, ¹⁰ ва, набзи Аллагьли бурибси кьяйдали, тІалхІянала устала ванзалис дедиб».

¹¹ ГІиса биалли, Римли катурси улкала бекІла гьала тІашизур. Улкала бекІли Илизи хьарбаиб: «ХІу жугьутІунала Пача сайрив?» ГІисани илизи иб: «ХІу викІулри». ¹² Хала кашишунанира, халкьла тямадабанира Сай гІяйиблаварибхІели, Илини жаваблис селра хІеиб. ¹³ ИлхІели Илизи Пилат викІар: «ХІуни хІебикьулрив сецад лебал ХІечи къаршили бикьридеш дирути?» ¹⁴ Илис жаваблис цалра дев хІебуриб, илбагьандан улкала бекІ хІекьли тамашаиуб. ¹⁵ Улкала бекІли БехІцІурала байрамлис бузахъуси гІядат лебсири, халкьла тилади хІясибли ца туснакъчи ваткайуси. ¹⁶ Илзамана туснакълизив Варавва бикІуси хабардерхурси туснакъчира леври. ¹⁷ Илкьяйда халкь цалабикибхІели, Пилатли илдази иб: «Чи азадватурли дигулрав хІушаб: Варавва, яра МасихІ бикІуси ГІиса?» ¹⁸ Илини балулри ГІиса кьясдешличивли уведибси виъни. ¹⁹ Илзамана, суд бируси мерличи ил кайибхІели, илала хьунуй пулан вархьиб ва бурахъиб: «Селра мабирид Ил Бунагьагарлис, сенахІенну муэрлизир нуни Ил багьандан дахъал чекасира». ²⁰ Амма хала кашишунани ва халкьла тямадабани халкь бирхаахъур ва ГІиса кавшахъес багьандан, ВараввагІеббикахъиб. ²¹ ИлхІели улкала бекІли илдази хьарбаиб: «КІилизивад Нуни чи ваткаили дигулрая?» Илдани иб: «Варавва». ²² Пилат илдази викІар: «МасихІ бикІуси ГІисас нуни се бируси?» Лебилра бикІар: «ХІябтІерхьаличи чеветяхъя». ²³ Улкала бекІли иб: «Сегъуна вайдеш барилив гьатІи Илини?» Амма илди гьатІира ахъли вявбикІулри: «ХІябтІерхьаличи чеветяхъя». ²⁴ Селилра кумекхІебирни ва халкьла гъузгъалдидеш имцІадикІни чебаили, Пилатли, шин касили, халкьла гьалар някъби дирцили, иб: «Иш Бунагьагарла хІилизив ну гІяйибла вегІ ахІенра. ХІердикІеная хІуша». ²⁵ Жаваблис лебилра халкьли иб: «Илала хІи нушачир ва нушала дурхІначир дирар». ²⁶ ИлхІели илдас Варавва ваткаиб, ГІиса биалли, витили, хІябтІерхьаличи чеветяхъяхъес ведиб.

ХІи хІунтІена гІяба ва занзбала таж; хІябтІерхьаличи чеветяхъни

²⁷ Улкала бекІла бургъантани, ГІиса касили, Ил алав лебилра хІуреба бучиб, ²⁸ ва, чІянкІуварили, Иличи хІунтІена бухъяна халатра чегьур. ²⁹ Занзбала таж барили, бекІличи чебииб ва балуй някълизи гІяйсара бедиб. Илала гьала кьукьубачи кабизурли дукалкІулри: «Разиии, жугьутІунала Пача!», – бикІули. ³⁰ Иличи тубикІулри ва, гІяйса кебасили, Илала бекІлизи бирхъулри. ³¹ Иличибад чебдукарбяхІибхІели, халат убкасили, Сунела палтар чегьур ва хІябтІерхьаличи чеветяхъес арукиб. ³² ДурабулхъухІели, илдас Симон бикІуси киринейлан къаршиикиб. ГІиса чеветирхъуси хІябтІерхьала къанч илизи бихахъес бедиб. ³³ Голгофа бикІуси мерличи баибхІели, ³⁴ Илизи держахъес гьими гъудурбарибти чягъир дедиб, амма Илини халдарили, держес хьулхІевхъун. ³⁵ Чеветяхъибтани биалли, чІалабушили, Илала палтар дуртІулри, ³⁶ ва, кабиили, Илис къараулбирулри. ³⁷ Илала бекІла чеди, гІяйиб иргъахъуси белкІра баршиб: «Иш ГІиса сай – жугьутІунала пача».

ГІисачибад чебдукарбирхІни

³⁸ Иличил бархли, ца балуй ва итил алгъай шайчи кІел къачагъра чебетяхъиб. ³⁹ ШалгІеббулхъути, бурга гьакІбикІули, хІулбуцІуна бугьулри ⁴⁰ ва бикІулри: «Аллагьла хъали гъятІаили, хІябал бархІили тІашбалтуси! ХІуни ХІу верцахъи! Эгер ХІу Аллагьла Урши виадли, къанчличивад кацІи». ⁴¹ ИлтяхІярли хала кашишунира, Низамла гІялимтира, халкьла тямадабира Иличибад дукарбирхІули, бикІулри: ⁴² «Сунени цархІилти уцахъули вири, гьанна Сунени Сай верцахъес вирули ахІен, эгер Сай Израилла Пача виалли, къанчличивад кацІаб, илхІели нушара Иличи дирхарехІе. ⁴³ Аллагьличи игьдибарбихьилри, гьанна Илис гІягІнили виалли верцахъаб. СенкІун Илини иб: „Ну Аллагьла Уршира“». ⁴⁴ Илкьяйда Иличил бархли чебетяхъибти къачагъунира Илис биргулри.

«Сен ХІуни Ну ватурра?»

⁴⁵ СягІят вецІнукІираличибад хІябличи бикайчи лебилра ванзаличи цІябдеш чебихьун, ⁴⁶ сягІят урчІемал диркухІели, ГІиса ахъли вявикІесвяхІиб: «Эли, эли, лема савахтани? Дила Аллагь, Дила Аллагь! Сен ХІуни Ну ватурра?» ⁴⁷ Илди дакьили, илаб тІаштазибад цабехІти бикІулри: «Илияслизи жиикІули сай Ил». ⁴⁸ ИлхІели илдазивад цали, шинижан чягъирлизи кагили, тІерхьаличи баршили, Илизи бержахъес бедиб. ⁴⁹ ЦархІилти бикІулри: «ТІашдизирая, хІердикІехІе ил верцахъес Илияс лявкьянал». ⁵⁰ Ахъли вяврабяхъили, ГІисани жан дедиб. ⁵¹ ИлхІели Аллагьла хъулибси пардав гъярбердили, кІибайбикиб; ванза зерзербухъун ва къаркъа пІякьдикиб; ⁵² хІябрира мягІдиуб ва дурхъати адамти мицІирбиубли, дурхъаси шагьарлизи бакІиб ва бахълис гьалабизур. ⁵⁴ ГІисас къараулбирути даршла бекІли ва иличил бархтани илди чедаили, дебали кахбиуб ва иб: «ХІекьдешличира, Ил Аллагьла Урши сайри». ⁵⁵ Илаб, галилеялан ГІисас гІергъи бакІибти ва Илис къуллукъбирути, гьарахълабад хІербикІули хьунул адамтира лебри. ⁵⁶ Илдала ургаб лебри Мария Магдалинара, Якьубла ва Юсияла неш Марияра, Заведейла уршбала нешра.

ХІяриихьни

⁵⁷ БархІи ахъибхІели, Аримафеялизивадси, ГІисачив учІули калунси, сунес Юсуп бикІуси давлачев адам вакІиб. ⁵⁸ Юсуп, Пилатличи вякьи, ГІисала жаназа арбухахъес ихтияр га или тиладиухъун. Пилатли жаназа бедахъес хъарбариб. ⁵⁹ Илини жаназа убяхІасили, капайзи бергур ⁶⁰ ва, шурмазиб биркъубси, сунези гьалав чилра кахІейхьибси хІябла ухІна кайхьили, халаси къаркъара гьабихьили, арякьун. ⁶¹ Илаб Мария Магдалинара, цархІил Марияра лебри, хІябличи бяхІчили кабиибти.

ХІябла гьалаб къараул

⁶² ЖумягІ бархІила гІергъиси бархІи хала кашишунира, фарисейтира Пилатличи бакІиб ⁶³ ва иб: «Хужаим! Нушаб гьанбикиб, Ит къянбарли мицІирли левалхІелил иб: „ХІябал бархІила гІергъи мицІиркайрус“ или. ⁶⁴ Илбагьандан хІябал бархІи дикайчи хІяблис къараулбарахъес хъарбара, сенкІун Илала мутагІялимти дугели бакІили жаназа арбухалли, ил гІергъиси къяна цаибилличиб вайси бетарар». ⁶⁵ Пилатли илдази иб: «Къараулти касая, хІушаб дигусиван къараулбарая». ⁶⁶ Илди бякьи, хІябла гьала къараулти кабатур ва къаркъаличи мугьурдяхъиб.

ГІиса мицІириъниличила малаикли багьахъни

¹ Сут бархІи шалгІеббухъи гІергъи, цархІил жумягІла бехІбихьудла цаибил бархІи савли Мария Магдалинара, цархІил Марияра хІяб чебаэс бакІиб. ² ИлхІели цІакьли мерсдакьун, сенкІун зубразивад кацІибси Аллагьла малаик, хІябла унзаличибад къаркъа убкасили, иличи кайилри. ³ Илала куц лямцІлагъунари, иличирти палтарра дяхІиван цІублири. ⁴ Илизибад урухбиубли, къараулбирути руржесбииб ва бебкІибтигъунбиуб.

⁵ Малаикли, хьунул адамтачи дугьайзурли, иб: «УрухмакІудая. Балулра хІуша къанчличи чеветяхъибси ГІисагІир умцІули диъни. ⁶ Ил ишав агара – Ил, бурибси кьяйдали, мицІиркайуб. Гъамдиубли хІердизирая Аричи кайхьунси мерличи ⁷ ва, къалабали дякьи, Илала мутагІялимтази бурая, Сай вебкІибихІивад мицІириубли, хІушаб гьалав Галилеялизи аркьули сай ва илав чейида, или. ХІера, хІушази нуни бурира».

ГІисас хьунул адамти къаршибикиб

⁸ Къалабали хІяблизибад дурабухъи, Илала мутагІялимтази багьахъес халаси урехиличил ва разидешличил дуцІбухъун.

⁹ Илала мутагІялимтази багьахъес илди аркьухІели, илдас ГІиса цугикиб ва иб: «Разидиирая!» Илди, гъамбиубли, Илала кьяшми дуциб ва Илис икрамбариб. ¹⁰ ИлхІели илдази ГІисани иб: «УрухмакІудая, дякьи, Дила узбази бурая Галилеялизи букьяхъес, Илав Ну илдани чейура».

Хала кашишунани къараулти асни

¹¹ Илди аркьухІели, цацабехІти къараултани, шагьарлизи бухІнабухъи, хала кашишунази бетаурсиличила буриб. ¹² Хала кашишуни халкьла тямадабачил гьунибаили, мажлис барили, бургъантас дахъал арц дедиб ва иб: ¹³ «Бурая, нуша дусухІели, Илала мутагІялимти бакІили, дугели Ил вигІун или. ¹⁴ Эгер ил хабар улкала бекІличи баалли, хІушаб селра хІебарахъес нушани къайгъибирехІе». ¹⁵ Илдани, арц касили, чузи бурибсиван бариб. Ил хабар гьанналичи бикайчи жугьутІунала ургаб тІинтІбиубли саби.

ВецІнуцара мутагІялимлис гьалаизни; «Дукьеная, лебилра халкьани бяркъяя…»

¹⁶ ВецІнуцара мутагІялим биалли, ГІисани букьяхъес хъарбарибси, Галилеялизибси дубурличи арбякьун. ¹⁷ Илав Ил чеили, икрамбариб, амма цацабехІти васвасбухъун. ¹⁸ Гъамиубли, ГІисани илдази иб: «Ванзалара заклара ари Набзи гибси саби. ¹⁹ Илбагьандан, ардякьи, лебилра халкьани бурсибарая, Дудешла, Уршила ва Дурхъати РухІла у багьандан бизахъули, ²⁰ Нуни хІушачи хъарбарибсиван гьар секІал дузахъес руркъули. Ну хІушачил вирусра лерилра замунтазив, ахирличи бикайчи. Амин».