Titus

¹ Pachia nynh a po`ae paw zynnaw thyhte, te Pachia lante ccia paw te accawkuhpaw byaccing nynaw thyhte, Pachia seepaw te Jesu Kri kya-e locceihtu athua paw, Paul nynh, ² zungzae hiinnaw ngaehoinaw kya a hyng kho leipaw Pachia nynh accyh atho mawze byakinpyaku vae paw, ³ thuasalama accyh he azawte phunghonaw liate a bya kha phe a langsaku vae, kha-e kha aening oun Khumtu Pachia kya-e kawpyapaw thyhte kamaw kya pya athua. ⁴ Ranzae zynnaw lante ka ccapaw ccaccing athua paw Titu: Paaw Pachia te aening oun Khumtu Bawipaw Jesu Kri kyate thawccinaw, ngaethya-umsanaw te daenaw tuh na kya la um vae sah. ⁵ Ahobou ung paw uccaw`ae kha nang nynh kou hoy lang na la law ccaw cite, nang kha kaw phe kae pya vae hawkhate, khua takyh kya kriccaw piccang`ae na khang ccaw cite nynh, nang kha Krete tuikoih kyakhe kae cciataw; ⁶ na khang lanpaw ccungccaw tuh ccaenaw um leipaw athua ze, zu lukheit vawpaw athua ze, a ccaaw`ae tuh zyn lan um`ae paw thua`ae zah, a ccouseikuh`ae paw cite, nawngae lei`ae paw cite a ccae lei`ae paw athua ze khang lanpaw nynh thua. ⁷ Pawccecize kriccawbu cciakhaetu tuh Pachia kya-e synriatu athua hawte ccaenaw um leipaw, amaw rynaw te um leipaw, a thindyn leipaw, misutui a rang leipaw, peku maeku a mang leipaw, phua elan a karangkuh leipaw, ⁸ tuhkoute mikhia dooihthya paw, ahoypaw a sungsah paw, a tuathya paw, hmerarihpaw, thyaararihpaw, a sungkuh khopaw; ⁹ ahmepaw ccangpyanaw khate ming`ae kha a hy kho nawlan`ae te kha-e ccangpyanaw a rawse`ae paw kha mih seinaw a muihsaku kho nawlan`ae, aning tuh ccangpya a thua vae thyhhawte zyn lan um paw bya kha varyn a kyngkuh paw athua hahe cih. ¹⁰ Pawccecize nawngae lei`ae, accakaepaw byahotu`ae te lingtu`ae patae a um`ae. Abapi lante vindung awkuh`ae paw nynh thua`ae. ¹¹ Tuh-e`ae mih khalang tuh phang fu athua hahe cih, minmin nynh ahme leipaw muenaw a ry`ae keiccuze, ccangpya lan accan leipaw kha ccangpah`ae zah innbyn mawte phe a buleih`ae. ¹² Mimaw kyaze minphuin kheit athua paw, mih profeh lukheit nynh, “Krete ccungccaw`ae tuh pei a hyng`ae paw, arepaw rangsaw`ae, thawnaw`ae paw aemoh`ae nynh thua`ae,” a ci. ¹³ Hynh-e bya hopaw tuh ahmepaw nynh thua. Tukeiccu minmin tuh zynnaw kya atyn nawlan`ae phe ccihtheih lang la pe`ae. ¹⁴ Byaccing kyate a paleihkuh paw ccungccaw kawpyapaw`ae te Jew`ae phungpaw huataw`ae kha pawlang a ria khyh nawlan`ae nynh thua. ¹⁵ Athyaapaw ccungccaw`ae hanlan tuh pawpaw balyn marya athyaa, thuasalama anungsikuhpaw te a zyn lei`ae paw hanlan tuh pawsang mah thyaa khyh. Thuasalama mih tuanaw-thinlung te mimaw nykunawpaw thinlung heize anungsikuh. ¹⁶ Minmin nynh Pachia kae nyh cite ho`ae salamah mih cyisahnaw kyate Pachia kha a vua`ae; pawccecize minmin tuh luathua-ae-ui lang um`ae paw, kawngae lei`ae paw, te ahoypaw ryalaw miakaw kya ccungkia lei`ae paw nynh thua.

¹ Thuasalama nang tuh akyhpaw ccangpyanaw te angaekuhpaw bya kha la ho. ² Ou tuhte pawpi`ae tuh a lungkyhpaw, sawtua lan um paw, ngaesangnaw a hoi paw, zynnaw kya, sungsakunaw kya, lungsaenaw kya atynpaw athua nawlan`ae la ccangpah`ae. ³ Tuhhawte nungpi`ae kha mah umtu ziazae kya sawtua lan um paw athua nawlan`ae, milae thanthya a ho`ae paw athua khyh nawlan`ae, misutui eih a rang paw athua khyh nawlan`ae, ahoypaw uccaw`ae ccangpatu`ae athua nawlan`ae la ccangpah`ae. ⁴ Ou tuhte nungpi`ae nynh kum nohua`ae paw nopi`ae kha, mih vawpaw`ae sungsahpaw, mih ccaaw`ae sungsahpaw, ⁵ a tuathya paw, athyaapaw, innlo a dooihthya paw, ahoypaw, mih vawpaw`ae kawngae`ae paw athua nawlan`ae a thuihei ccaw`ae; ou tuhte Pachia bya tuh thethyaccousah athua khyh nawlan nynh thua. ⁶ Tuhhawte kum anopaw pise`ae kha a tuathya`ae paw thua nawlan la hy`ae. ⁷ Pawpaw balyn kya ahoypaw ryalaw`ae khate dosuinkupaw lang la langpakuh`ae. Ccangpyakunaw kya ccirarihnaw, lungzinaw, thanccing thuanaw te, ⁸ seibe kho a um leipaw accipaw byaho kha la mang. Ou tetuh ae rawsetupaw nynh na konglang athahpaw uccaw a ho lanpaw hoi vae leite maethya a bongkuh vae cih. ⁹ See`ae nynh pawpaw kya balyn mih bawi`ae kawngae nawlan`ae, mih lunghoysah nawlan`ae, bua a khungru khyh nawlan`ae, ¹⁰ a rupya khyh nawlan`ae, thuasalama pawpaw kya balyn aening oun Khumtu Pachia ccangpyanaw kha minmin nynh a paccaan nawlan`ae, ahoypaw zyn lan umnaw balyn kha a langsaku nawlan`ae la hy`ae. ¹¹ Pawccecize khumnaw yn thuakhae paw Pachia kya-e thawccinaw tuh ccungccaw`ae balyn kya phe a langkuh vae. ¹² Pachia pawlangria leipaw te laephi lante ryduanaw`ae kha vuate, aening tuh kyhrarih lante, dingrarih lante, Pachia lante zuakute hynh-e atu she kya ah hiin lan oh paw nynh thua cite tuh-e thawccinaw nynh yn ccangpya. ¹³ Lungtua lan um paw ngaehoinaw te alesaepaw Pachia athua paw, aening Khumtu Jesu Kri kya-e aphu-epaw langkunaw kha ah ngaehoi oh paw nynh thua. ¹⁴ Tuh-e Jesu Kri tuh cyiseimenaw balyn kyate aening kha sawkhaw khylan, te amaw elan ccungccaw`ae kha ccikan khylan, tuh-e a ccikan paw ccungccaw`ae nynh ahoypaw cyisahnaw kha mih lungzua nawlan amaw te amaw kha aening hanlan a pyaku. ¹⁵ Hynh-e uccaw`ae hynh kawhoinaw balyn khate la hopah`ae, la hy`ae lah la pe`ae. Hung ccungccaw nynh sanmah pawlangria leite ae la um nan`ae sah.

¹ Uktu`ae te kawhoitu`ae nynh oun uknaw`ae kha nawccaw lan, kawngae lan, te ahoypaw ryalaw miakaw kya paccynku khylan, ² hung ccungccaw kong sanmah thethyaho khyh nawlan, peku maeku khyh nawlan, nevyalyapaw thua nawlan, ccungccaw`ae balyn kya lungnenaw kha langsakute a um nawlan`ae minmin kha la nysathui`ae. ³ Pawccecize langmaw lya tuh aening mah mingaee`ae, kawngae lei`ae, ming`ae nynh a phee`ae paw, ryduanaw aphuinphuin te hoysanaw`ae see nynh ah la thua oh, ahoy leipaw te eiungnaw kya hiinte, ming`ae nynh a hua`ae paw te lukheit te lukheit a huakuh`ae paw nynh ah la thua oh. ⁴ Thuasalama aening oun Khumtu Pachia kya-e thawccithyanaw te sungsanaw tuh ccungccaw`ae kya he yn langkuh tuh, ⁵ aening nynh ah rae oh paw dingnaw cyisahnaw`ae liate thua leite, thuasalama amaw ngaethyaumsanaw thyhte bua saahthuinaw kya-e singpyanaw liate, te Thyaa Muisaw thawsathuinaw liate nynh aening kha yn khum. ⁶ Aening oun Khumtu Jesu Kri liate kha-e Muisaw kha aening tungvaw kya phe beih lang yn bu. ⁷ Ou tuhte a thawccinaw liate thyaaccousah ah thua oh koute, zungzae hiinnaw ngaehoinaw thyhte aening tuh rhoccoutu`ae ah thua nawlan oh nynh thua. ⁸ E tuh zyn lan um paw bya thua zah hynh-e uccaw`ae hynh nang nynh atu te atu la ho ci ka ry. Ou tuhte Pachia a zyn`ae paw nynh ahoypaw cyisahnaw kya tyn lan a raeringku nawlan`ae nynh thua. E uccaw`ae tuh ccungccaw`ae hanlan hoy zah athanepaw nynh thua. ⁹ Thuasalama ngaeepaw byakhiakunaw`ae, thokeinaw`ae kong, byaeikunaw`ae, kawbya kong peku maekunaw`ae kha la sibia. Pawccecize kha-e`ae tuh ccungkia khyh zah athane leipaw nynh thua. ¹⁰ Phiasakunaw a rae paw ccungccaw kha vaekheit, vaening thuiheinaw na pya koute tuh la dee ccavae. ¹¹ Khahtahawpaw ccungccaw tuh amaw te amaw seibekuhpaw, a lungzi leipaw te a seipaw nynh thua cipaw na ny oh. ¹² Artemas, khyh ze Tykhikas kha na kalan he kae saw te, Nikopolis khua cia ka kalan thua khonawte yn zuakuh. Pawccecize khoccihsaw lungkhu tuin kya um lante phe ka tuaku vae. ¹³ Kawbya a thya`ae paw Zenas te Apollos kha mih khuaccungnaw kya mih hanlan pawsang ahobou khyh nawlan zuapahkuh`ae lah la cciakhae`ae. ¹⁴ Te aening ah ccungccaw`ae mah athae thae leipaw athua khyh nawlan`ae, mih hanlan ahoboupaw kya mang lanpaw a hoi nawlan`ae, ahoypaw ryalaw pei law lan la ccangkuh`ae sah. ¹⁵ Ka kya a umbua`ae paw balyn nynh nang kha ae beihlang`ae. Zynnaw kya aening oun sungsah`ae paw kha la beih`ae. Thawccinaw tuh nae balyn kya la um vae sah. Amen.