Romans

¹ Locceihtu cite ko athua paw, Jesu Kri seepaw, Paul tuh Pachia thehoypaw hanlan thoh phia athua. ² Tuh-e thehoypaw tuh athyaapaw Ccathyaa`ae kya amaw profeh`ae liate langmawpi te bya phe la kinty vae`ae. ³ Tuh-e tuh pynsaw lante David ciihan lang rae athua paw, aening ah Bawipaw, Pachia Ccapaw Jesu Kri konglang nynh athua. ⁴ Te a chih`ae paw kyate thothuinaw liate, thyaanaw kya-e Muisaw lante, thungnaw ryte aning tuh Pachia Ccapaw cite phy athua. ⁵ Minphuin`ae balyn laku zynnaw kalan kawngaenaw hanlan te Jesu a min hanlan, amaw liate kaening tuh thawccinaw te locceihtuthuanaw kha kae mue. ⁶ Tuh-e`ae laku nanning mah Jesu Kri kya-e kopaw nynh na thuabua oh. ⁷ Pachia nynh sungsah`ae paw, mithyaa`ae cite ko na thua oh paw, Rom khuapi kya na um oh paw balyn kalan ah Paaw Pachia te Bawipaw Jesu Kri kyate thawccinaw te daenaw tuh nae kya la um vae sah. ⁸ Nanning nae zynnaw tuh laephipi khaleih po athaan keiccuze nanning balyn hanlan Jesu Kri liate ka Pachia kalan masaty lungtuabya ka ho. ⁹ Pawccecize ka sawsangnaw kya nanning kha apaekuh lei lante pei kae lia oh cipaw tuh a Ccapaw kya-e thehoypaw honaw kya ka muisaw te rya ka lawpyapaw Pachia tuh ka ccaekia nynh thua. ¹⁰ Atu eih aro maw Pachia rynaw liate yn ccangthya ze nanning kalan thua kho nawlan, khuaccungnaw ka hoi kho nawlan saw ka sangkuh. ¹¹ Pawccecize nanning nynh varyn na tyn nawlan oh, muisaw lasung abang kha nanning kae neethung ccaw oh cite nanning kha myarya kae muihry oh. ¹² Tuh-e tuh nanning kya-e zynnaw te kae ka kya-e zynnaw paryh liate nanning ryte pynkheihlan ka ngaengan bua ccaw cipaw nynh thua. ¹³ Uteno`ae, kae nynh ccangpaw Zenta`ae kyate athae abang ka mue hawte; nanning kyate mah athae abang ka mue ccaw cite nanning kalan ccia lan pei ka noukuh paw hynh nanning ny leite na um lan oh paw ka ry khyh, thuasalama atu cia yn khaw paw pei a um. ¹⁴ Kae tuh Greek`ae kalan te apuathopaw ccungccaw`ae kalan, ahawpaw kalan, te angaeepaw kalan paryh laeba umtu nynh ka thua. ¹⁵ Tukeiccu, kae ka kya a um thyhte, Rom khuapi kya na um oh paw nanning kalan mah thehoypaw hopya lan kae tuh paccynkute ka um. ¹⁶ Pawccecize kae tuh Kri kya-e thehoypaw hanlan ka maethah khyh; pawccecize hynh-e tuh Jew`ae hanlan masaty, te Greek`ae hanlan mah, a zyn paw ccungccaw miakaw hanlan khumnaw mue nawlan Pachia kya-e thungnaw nynh thua. ¹⁷ Pawccecize, “Adingpaw ccungccaw tuh zynnaw liate nynh a hiin cih,” cite azeiku hawte, tuh-e zynnaw kya nynh Pachia kya-e dingnaw tuh zynnaw kyate zynnaw kalan langsapya athua vae. ¹⁸ Pawccecize byaccing kha dingleinaw kya a ccyngkuh paw ccungccaw`ae kya-e dingleinaw te Pachia pawlangria leinaw balyn kha rawsete Pachia thinrianaw tuh vaawran kyate yn langkuh. ¹⁹ Pawkeiccumacize ny lan accanpaw Pachia konglang tuh minmin kyakhe phe langsah athua vae, pawccecize Pachia nynh kha-e kha minmin kalan phe a langsapya vae`ae. ²⁰ Pawccecize, a rae paw uccaw`ae liate Pachia kya-e zungzae thungnaw te Pachiathuanaw athua paw, muih kho leipaw Pachia uccaw`ae kha laephipi raenaw kyate tho zah ccaerarihlan muih thua vae zah thaethya phe athua vae, tukeiccuze minmin tuh ngaethya kho thua lan khyh`ae. ²¹ Pawkeiccumacize, minmin nynh Pachia phang nyh`ae pite, Pachia kha phu-esah lan accan thyhte phu-esah khyh`ae; Pachia kalan lungtuabya ho khyh`ae, thuasalama accakaepaw tuanaw kha hoi`ae zah angaeepaw mih thinlung tuh phe amoh. ²² Mimaw te mimaw kha hawsakuh`ae zah mingaee`ae lang nynh a tang`ae, ²³ te arohthya leipaw Pachia kya-e phu-enaw kha arohthyapaw ccungccaw muinsan lang, pavaw`ae te ccupali sae paw lorangsaw`ae te avawpaw lorangsaw`ae muinsan lang minmin nynh a rulae`ae. ²⁴ Tukeiccu Pachia nynh mah minmin kha mimaw te mimaw kya mih pyn kha thethyasah khylan mih thinlung kya-e duanaw thyhte athyaa leipaw kalan minmin kha phe a ah`ae. ²⁵ Minmin tuh Pachia kya-e byaccing kha hyngbya lang phe a rulae`ae paw te Raetu Pachia laeze rae paw uccaw kha a beik`ae paw nynh athua`ae. Tuh-e Raetu Bawipaw tuh zungzae thehoysah athua. Amen. ²⁶ Hynh-e keiccu Pachia nynh minmin kha maethyaziachi lan um paw ryduanaw kalan phe a ah`ae, pawccecize mih nopi`ae ccaccei nynh mah aphungpaw te arawsekuh lante aphung thua leite mih kya-e kha a mang`ae. ²⁷ Te tuhhawte pise`ae nynh mah nopi kya-e mang paw aphungpaw kha cciatawte, lukheit te lukheit kalan ryduanaw maee rua zah pise te pise nynh maethya lan ung paw rya kha a law`ae; te mimaw mih cciaseinaw thyhte seidetahnaw kha a mue`ae. ²⁸ Te minmin nynh Pachia maw kharyh a ny ry khyh`ae keiccu, angaekuh leipaw uccaw`ae cyi khylan Pachia nynh minmin kha duarynawpaw thinlung kalan a ah`ae thyhte; minmin tuh, ²⁹ dingleinaw, ohhuakunaw, hoyleinaw, karangkunaw, othyanaw, eiungnaw, ccungccaw chianaw, eikunaw, lingkunaw, ming`ae do ry leinaw, thethyahonaw tuh-e`ae balynte phe beih`ae zah, ³⁰ ccungccaw thanho`ae paw, Pachia a huatu`ae, ccungccaw pawlangria lei`ae paw, a tansakuh`ae paw, a pookuh`ae paw, ahoy leipaw uccaw raetu`ae, nungpaaw kawngae lei`ae, ³¹ thaethyanaw hoi lei`ae paw, kawbya rohtu`ae paw, aphungpaw thyhte sungsanaw hoi lei`ae paw, lung-umtungpah`ae paw, ngaethya-umsanaw hoi lei`ae paw nynh thua`ae. ³² Hynhtahawpaw uccaw`ae a cyih`ae paw tuh chi lan accan`ae cipaw Pachia byapianaw kha phang a nyh`ae pite khahtahawpaw kha a cyi`ae apiaze, khahtahawpaw a cyih`ae paw tungvaw kya mih lungrythua.

¹ Tukeiccu ming`ae byapiatupaw, pou ccungccapaw, nang tuh hung ccungccaw na thua zemah ngaethya kho na thua lan khyh; pawccecize nang nynh bya na pianua paw uccaw ccacceimaw kha namaw nynh bua na cyibua keiccu, ming`ae bya na pianaw`ae kya namaw te namaw sei na bekuhpaw nynh na thua. ² Thuasalama Pachia byapianaw tuh byaccing thyhte khahtahawpaw uccaw`ae a rae`ae paw te arawsekuh cipaw kaening nynh phe kae ny ccaccing. ³ Te khahtahawpaw uccaw`ae a cyih`ae paw kha bya na pia zah kha-e ccaccei bua a cyih bua paw, pou ccungccapaw, nang tuh Pachia byapianaw kyate ka lue cih cite tou na tuaku? ⁴ Tukhyhze Pachia a hoynawpaw nynh nang kha ngaesikunaw kalan ae cciakhae cipaw ny leite, a hoynawpaw te a ngaesangnaw, te a lungsaenaw`ae kha nang nynh pawlangria leite tou na ung? ⁵ Thuasalama na lungkhungnaw te ngaesiku ry leinaw thinlung keiccu, Pachia kya-e adingpaw byapianaw langsapyaku nin, thinrianaw nin kya namaw hanlan thinrianaw kha na ccyku. ⁶ Pachia nynh ccungccaw miakaw kha a cyisahnaw thyhte cyinaw mee kha a pya cih. ⁷ Ahoypaw ryalaw kha pei lah zah phu-enaw, sawtuanaw te chi kho leinaw a ccung`ae paw tuh zungzae hiinnaw kha a pya cih`ae. ⁸ Thuasalama eikumang`ae zah byaccing kawngae leite ding leinaw kawngae`ae paw tuh bungpawnaw te thinrianaw kha a tung cih`ae. ⁹ Masaty Jew`ae, ou tuhkoute Greek`ae mah hoyleinaw a cyih paw ccungccaw miakaw tungvaw kya tuh runaw te vawsaw riathaenaw kha a tung cih`ae. ¹⁰ Thuasalama masaty Jew`ae, ou tuhkoute Greek`ae mah ahoypaw ryalah paw ccungccaw miakaw kha phu-enaw, sawtuanaw te daenaw kha a pya cih`ae. ¹¹ Pawccecize Pachia kya ccungccaw laesahnaw cipaw um khyh. ¹² Pawccecize Kawbya leite a sei`ae paw miakaw tuh Kawbya leite a roh cih`ae; te Kawbya kya a sei`ae paw miakaw mah Kawbya liate byapia athua cih`ae. ¹³ Pawccecize Kawbya a thae`ae paw hynh Pachia malang a ding`ae paw thua khyh, thuasalama Kawbya a zui`ae paw kha nynh thyaaccousah athua cih`ae. ¹⁴ Pawccecize Kawbya hoi lei`ae paw Zenta`ae nynh Kawbya hoi lei`ae pite Kawbya kya um paw uccaw`ae kha aphung lante a zui`ae tuh kha-e kha mih hanlan kawbya lang oun tang. ¹⁵ Tuh-e nynh mih thinlung kya azeikuh paw Kawbya ryalawnaw kha a langsaku, mimaw nykunaw thinlung nynh mah ccaekiakhan zah mih tuanaw nynh mah lukheit te lukheit kha seibekuh`ae, tukhyhze athungkhawku`ae. ¹⁶ Kae nynh ka hopaw thehoypaw thyhte Pachia nynh Jesu Kri liate ccungccaw`ae kya-e aphiru cyisahnaw`ae kha bya yn pia cih nin kya tuhte byapia cih. ¹⁷ Dotua, nang tuh Jew paw cite ko na thua zah Kawbya kya na doliakuh paw te Pachia kya na pookuh paw nynh na thua. ¹⁸ Pachia rynaw kha na nyh zah Kawbya te thuihei na thua thyhte phe ahoytheih paw uccaw`ae kha na phiathya, ¹⁹ te nang tuh mitmoh`ae kha laanpi cciakhaetu, te mohnaw kya um`ae paw kha awnaw muihsatu nynh ka thua. ²⁰ Te mingaee`ae kha a thuiheitu, imua`ae kha a ccangpatu, Kawbya kya um paw byaccing te nynaw a hoi paw nynh ka thua cite na zynku lanze, ²¹ tukeiccu mingccang`ae a ccangpatupaw nang, pawccemou namaw te namaw na ccangpyaku khyh? Ccungccaw tuh ru lan ccan khyh cite phunghopaw nang, namaw so na ruh tou? ²² Ccungccaw tuh milae zu seikhae lan ccan khyh cite a ho paw nang, namaw so milae zu na seikhae tou? Zohtuh kha luathua-aeui lang a ria paw nang, namaw so zohtuh-tempal uccaw kha na luade tou? ²³ Kawbya liate a pookuh paw nang, kawbya ronaw liate Pachia tuh the na thyaasah tou? ²⁴ Pawccecize, “Nanning keiccuze Pachia min tuh Zenta`ae laku kya thethya ccousah athua,” cite a zeiku hawte nynh thua. ²⁵ Pawccecize, nang nynh Kawbya kha na zui lanze, vindung awkupaw tuh athane ccaccing; thuasalama nang tuh Kawbya a rohtu na thua ze, na vindung awkupaw tuh vindung awku leipaw lang nynh phe a tang. ²⁶ Tukeiccu vindung awkuh leipaw nynh Kawbya kya-e dingnaw kha a zui lanze, a vindung awku leipaw tuh vindung awkupaw lang riapya thua lan khyh tou? ²⁷ Te pynsaw lante vindung awkuh leipaw nynh aphung lante Kawbya kha a ccingsah lanze, azeikuh paw Kawbya te vindung awkupaw mang a hoi pite Kawbya kha a ccingsah leipaw nang kha bya ae pia lan khyh tou? ²⁸ Pawccecize atolang te kyalya Jew athua paw tuh Jew paw ccaccing thua khyh; ngesaw kya atolang te kyalya vindung awkupaw mah vindung awkupaw ccaccing thua khyh; ²⁹ thuasalama alungkhu langte Jew athua paw nynh Jew paw ccaccing athua, te vindung awkupaw mah kawbya kya thua khyh, Muisaw kya thinlung kyate vindung awkupaw nynh athua; tuh-e paw thehoysanaw tuh ccungccaw`ae kya-e thua khyh, thuasalama Pachia kya-e nynh athua.

¹ Tuhte lanze, Jewthuanaw nynh paw thanenaw mou a ung? Tukhyhze vindung awkupaw nynh pawmou accungkia? ² Ccungkianaw patae a um. Abapi lante Jew`ae kalan nynh Pachia kya-e bya`ae tuh pya athua. ³ Minmin abang nynh a zyn khyh`ae paw tuh pawte ho lan? Minmin a zyn leinaw`ae nynh Pachia kya-e zyn lan umnaw kha thanesah leite um ngaw ta? ⁴ Tuhte thua khyh. “Athua, na hopaw kya nang tuh na ding zah bya ae pia vae`ae ze nang tuh na tae,” cite azeiku hawte Pachia tuh ading, thuasalama ccungccaw miakaw tuh ahyngpaw nynh thua. ⁵ Thuasalama aening ah dingleinaw oh nynh Pachia kya-e dingnaw kha a langsaku lanze, pawte ah ho cih oh? Aening kha thin oun rianuapaw Pachia tuh ding khyh tou? (Hynhte ka hopaw tuh ccungccaw hawte nynh ka ho.) ⁶ Tuhte thua khyh. Tuhte athua lanze Pachia nynh laephi ccungccaw`ae hynh pawtemou byapia cih? ⁷ Pawccecize kae ka hyngnaw liate Pachia kya-e byaccing tuh a phu-enaw kalan houh a lungsathung ze, kae kha miseipaw hawte pawccemou bya oun pia`ae? ⁸ Te, “Ahoypaw a langku nawlan ahoy leipaw kha cyih oh sih,” cite ccungccaw abang nynh kaening kha thethya oun ccousahry`ae pawte, nanning nynh na ho oh oun ci`ae. Kae ho thyhte a ho cih`ae tou? Tuhte a ho`ae paw tuh seibe lan accan`ae. ⁹ Tuhte lanze pawcihte? Aening Jew`ae tuh minmin laeze ah hoyhua oh tou? Ccapyh sanmah ah hoyhua khyh oh; pawccecize Jew`ae te Greek`ae balyn tuh paryhte seinaw marya hoi`ae cite langmaw phe kae langsaku vae. ¹⁰ Hynhte azeiku hawte, “Adingpaw hung san um khyh, lukheit sanmah um khyh. ¹¹ A thaethya paw hung san um khyh, Pachia kha a ccung paw hung san um khyh. ¹² Ccungccaw`ae balyn tuh laanpi pung me vae`ae, mih balyn mawte ccungkia vae khyh`ae, ahoypaw a cyih paw hung san um khyh, lukheit sanmah um khyh. ¹³ Mih lotharue tuh ahungkuhpaw shawku nynh thua, mih lae te pheenaw a mang`ae, fuparepaw sy tuh mih mung lungkhu a um. ¹⁴ Mih khalang tuh thyalawnaw bya te byakhahpaw te nynh phe abia. ¹⁵ Mih ccu tuh chii luasah lan a khyrang; ¹⁶ mih ccianaw laanpi kya ronaw te runaw a um. ¹⁷ Te daenaw laanpi kha minmin nynh nyh khyh`ae. ¹⁸ Mih mitdae kya Pachia rawrinaw cipaw kharyh um khyh,” cite azeikuh. ¹⁹ Kawbya nynh a hopaw miakaw tuh Kawbya zakaw a um`ae paw hanlan nynh a ho cipaw ah ny oh, ou tuhte khalang miakaw nynh bya ho ngan lei lante laephi ccungccaw`ae balyn tuh Pachia malang seibe athua`ae. ²⁰ Tukeiccu Kawbya cyisahnaw liate hung ccungccaw sanmah Pachia malang thyaaccou kho lan khyh; pawccecize Kawbya liate nynh seinaw kha nyku athua. ²¹ Thuasalama atu Kawbya te Profeh`ae bya nynh ccaekiakhan`ae thyhhawte Kawbya te asekuh leipaw Pachia kya-e dingnaw tuh phe yn langkuh vae. ²² Tuh-e dingnaw tuh Jesu Kri kha zynnaw liate a zyn paw ccungccaw balyn hanlan te tuh-e`ae balyn tungvaw kya a um paw Pachia kya-e dingnaw ccaccei kha nynh athua; pawccecize laesakunaw cipaw kharyh um khyh. ²³ Pawccecize ccungccaw balyn nynh phe sei vae`ae zah Pachia phu-enaw kalan phah kho vae khyh`ae. ²⁴ Kri Jesu kya um paw sawkhawnaw liate Pachia thawccinaw keiccu nynh alakaw te thyaaccouku. ²⁵ - ²⁶ Pachia nynh a ngaesangnaw liate langmaw-e seinaw`ae ngaethyanaw hanlan, a dingnaw kha langsaku khylan, atu ccyh lya a dingnaw kha phy khylan, Jesu a zyn paw ccungccaw kha thyaaccousatupaw thua khylan te amaw tuh adingpaw athua nawlan, Jesu chii kha zynnaw liate kha-e Kri kha lungdaesapaw silawkunaw lang Pachia nynh phe a khang vae. ²⁷ Tuhte lanze pookunaw tuh pawkyamou? Pookunaw lanpaw umbua khyh. Paw kawbya te mou a nue? Cyisahnaw kawbya te tou? Thua khyh, thuasalama zynnaw kya-e kawbya liate nynh a nue. ²⁸ Tukeiccu ccungccaw tuh Kawbya cyisahnaw um leite zynnaw liate nynh thyaaccouku cite kae thangsah. ²⁹ Pachia tuh Jew`ae Pachia kyalya tou? Zenta`ae Pachia so thuabua khyh tou? Athua, Zenta`ae Pachia mah athuabua. ³⁰ Vindung awkupaw kha zynnaw liate, te vindung awku leipaw kha zynnaw liate thyaa a ccousah cih paw tuh Pachia ccangkheit nynh thua. ³¹ Tuhte lanze zynnaw liate aening nynh Kawbya tuh thanesah leite tou a ung oh? Tuhte thua khyh, Kawbya kha ah tynsah oh paw nynh thua.

¹ Tuhte lanze pawtemou ah ho cih oh? Aening ah minpaaw Abraham tuh pynsaw lante paw thanenaw mou a mue? ² Abraham tuh cyisahnaw liate thyaaccou athua ze, a pooku lanpaw a hoi, thuasalama Pachia malang hoi khyh. ³ Pawccecize Ccathyaa nynh pawtemou a ho? “Abraham nynh Pachia kha zyn zah a zynnaw kha a hanlan dingnaw lang riapya athua,” a ci. ⁴ Ryalah paw ccungccaw tuh thawccinaw liate cite riapakuh khyh, thuasalama atekuhpaw ryalaw mee nynh a ccou. ⁵ Thuasalama ryalah leipaw, Pachia nyh leipaw ccungccaw kha thyaaccousatupaw kha a zyn paw tuh, kha-e a zynnaw kha dingnaw lang riapya athua. ⁶ Tuhhawte cyisahnaw um leite Pachia nynh dingnaw a bebua paw ccungccapaw kya-e hythuanaw kong kha David nynh a ho paw tuh: ⁷ “A cyiseimenaw`ae ngaethya athua`ae paw te mih seinaw`ae khawpya athua`ae paw tuh lungtua`ae paw nynh thua`ae. ⁸ BAWIPAW nynh sei a be leipaw ccungccapaw tuh hythuaccoupaw nynh thua,” a ci. ⁹ Tuhte lanze, hynh-e hythuanaw tuh vindung awkuh`ae paw tungvaw kyalya tou a thua? Tukhyhze vindung awkuh lei`ae paw tungvaw so thuabua khyh tou? Pawccecize, Abraham hanlan a zynnaw kha a dingnaw lang riapya athua ah ci oh. ¹⁰ Tuhte lanze tuh-e tuh pawcihtemou riapya athua? Vindung a awku maw tou, tukhyhze vindung a awkuh koute tou? A awkuh koute riapya paw thua khyh, a awku maw riapya paw nynh thua. ¹¹ Vindung awkupaw syntawnaw leite a zyn paw ccungccaw`ae kha dingnaw lang riapya nawlan thuasah, Abraham tuh a zyn paw ccungccaw`ae balyn paawthuanaw lang thuasah, ¹² te vindung awkuh`ae paw paaw kyalya thua leite, ah minpaaw Abraham nynh vindung a awku mawze a hoi paw zynnaw ccusy a zui`ae paw, vindung awkuh lei`ae paw paaw mah athua nawlan thuasah, Abraham nynh vindung awku mawze a hoi paw zynnaw kya-e dingnaw tazeih athua paw vindung awkupaw kya-e syntawnaw kha a mue. ¹³ Pawccecize aning tuh laephipi rhoccoutu a thua cih cite byakinpyakupaw tuh Abraham kalan mah thuasah, a ciihan`ae kalan mah thuasah Kawbya liate thua khyh, thuasalama zynnaw kya-e dingnaw liate nynh athua. ¹⁴ Pawccecize Kawbya te asekuh`ae paw nynh rhoccoutu`ae athua ze, zynnaw tuh alakaw vae, byakinpyakupaw mah paw ccungkia vae khyh. ¹⁵ Pawkeiccumacize Kawbya nynh tuh thinrianaw kha a thuakhae; thuasalama Kawbya um leinaw tuh cyiseimenaw um khyh. ¹⁶ Tukeiccu byakinpyakupaw tuh Kawbya te asekuh`ae paw hanlan kyalya thua leite, aening balyn paaw athua paw Abraham kya-e zynnaw te asekuh`ae paw hanlan mah athuabua nawlan, Abraham ciihan`ae balyn kalan phe ria nawlan, thawccinaw liate nynh dingnaw tuh a ccouku cipaw aria nawlan zynnaw liate nynh a mueku. ¹⁷ “Nang kha minphuin pataepi paaw lang phe kae rae vae,” cite azeiku hawte; a chih`ae paw a thosatu te a um loh leipaw uccaw`ae kha a um vae paw hawte a ho paw Pachia, amaw nynh a zyn paw Pachia ccaccei malang Abraham tuh aening balyn paaw nynh athua. ¹⁸ “Na ciihan tuh tuhhawte nynh athua cih,” cite a hopya paw bya thyhhawte Abraham nynh kae tuh minphuin pataepi paaw lang ka tang cih cite ngaehoinaw hoi lan accan lei pite zyn zah a ngaehoi. ¹⁹ Te zynnaw kya thawzya leite, amaw kum tuh kum zakheit loukaw a ci vae zemah amaw pyn kha a chih vae paw hawte tuakuh khyh zah a zu Sarah vuebua mah phe a chih vae cite tua khyh. ²⁰ Zyn leinaw liate Pachia nynh byakinpyakupaw kha lunghiinnaw hoi khyh, thuasalama zynnaw kya thawsae zah Pachia kha phu-enaw a pya. ²¹ Pachia nynh bya yn kinpyakupaw tuh yn ccingsapya kho cite varyn a zyn. ²² Tukeiccu, “A zynnaw kha a hanlan dingnaw lang riapya athua.” ²³ Tuhte “A hanlan riapya athua” cite Abraham elan kyalya azeikuh paw thua khyh. ²⁴ Thuasalama aening hanlan mah azeikuh paw nynh thua. A chih`ae paw kyate ah Bawipaw Jesu a thosatupaw kha aening nynh ah zyn oh ze kha-e zynnaw kha aening dingnaw lang riapya athua cih. ²⁵ Bawipaw Jesu tuh aening seimenaw keiccuze ccungccaw`ae kalan a ah`ae, te aening thyaaccounaw hanlan bua thosathui athua.

¹ Tukeiccu zynnaw liate thyaaccou ah thua vae oh zah ah Bawipaw Jesu Kri liate aening tuh Pachia te ccawkunaw ah hoi oh. ² Aening ah thadynnaw oh kya hynh-e thawccinaw lungkhu lang amaw zynnaw liate nynh aening naeku khonaw ah hoi oh, te Pachia kya-e phu-enaw kha ngaehoinaw liate aening ah lungtua. ³ Te hynh-e kya kyalya thua khyh, vawsawrunaw kya mah aening ah lungtua; pawccecize vawsawrunaw nynh ngaesangnaw kha a thuakhae. ⁴ Te ngaesangnaw nynh tungpaw muihpaw kha thuakhae zah, tungpaw muihpaw nynh ngaehoinaw kha a thuakhae; ⁵ Ngaehoinaw nynh maethyanaw kha poukhae khyh, pawkeiccumacize aening kalan pya athua paw Thyaa Muisaw liate aening ah thinlung lungkhu lang Pachia sungsahnaw kha ccaenua phe athua vae. ⁶ Pawccecize aening tuh thawzung leite ah um ccyh lya oh, accyh he zaw lyakhe Kri tuh Pachia nyh lei`ae paw hanlan a chih. ⁷ Pawccecize adingpaw ccungccaw hanlan a chipah cih paw ccungccaw kou akhing cih, tuhzemah ccungccahoypaw hanlan a chih ngan paw poh um ccamah ny lei. ⁸ Thuasalama aening tuh misei`ae ah thua cciamang lya oh khe, Kri nynh aening hanlan a chi paw tuh Pachia nynh aening kha pawcih nynh oun sungsah cipaw oun langsapyaku. ⁹ Tuhlae lanze, atu amaw chii liate thyaaccoukuh vae zah amaw liate Pachia thinrianaw kyate aening tuh ah lue vae cih oh. ¹⁰ Pawccecize aening tuh rhaw`ae ah thua lya oh khe, a Ccapaw chinaw liate Pachia kalan ah ccawkuthui vae oh thua ze, tuhlae lanze phe ah ccawkuthui vae oh pawte amaw hiinnaw liate aening tuh khum ah thua vae cih oh. ¹¹ Te tuh-e kyalya thua leite, ah Bawipaw Jesu Kri liate aening tuh ccawkuthuinaw atu phe ah mue vae oh zah amaw liate Pachia kya lungtuanaw ah hoi oh. ¹² Pawccemacize ccungccapaw lukheit liate seinaw tuh laephipi lungkhu lang tee zah seinaw liate chinaw a tee thyhhawte, ccungccaw balyn tuh pung aseikuh vae keiccuze chinaw nynh marya pung yn thuanua vae. ¹³ Pawccecize Kawbya pya athua maw balyn laephipi kya seinaw tuh phe a um vae; thuasalama Kawbya a um maw e seinaw tuh riapya thua loh khyh. ¹⁴ Tuhzemah Adam kyate Mawsi kyacia chinaw nynh phe a uk vae; Adam nynh kawngae khyh hawte a sei bua lei`ae paw tungvaw mah phe a uk, tuh-e Adam tuh nyalang yn thua vae cih paw kya-e langsakupaw muinsan nynh athua. ¹⁵ Thuasalama cyiseimenaw te alakaw te mue paw lasung tuh lokuh khyh. Pawccecize ccungccaw lukheit cyiseimenaw keiccu ccungccaw patae tuh a chi`ae lanze, tuhlae lanze, Pachia kya-e thawccinaw te ccungccaw lukheit athua paw Jesu Kri liate thawccinaw lasung tuh ccungccaw patae hanlan houh alung. ¹⁶ Te a seipaw ccungccapaw lukheit liate yn thua paw te thawccinaw lasung tuh lokuh khyh, pawccecize ccungccapaw lukheit liate byapianaw nynh seibenaw kha a thuakhae, thuasalama thawccinaw lasung tuh cyiseimenaw pataepi mawte thyaaccousanaw nynh thua. ¹⁷ Pawccecize ccungccapaw lukheit seinaw keiccuze, tuh-e paw liate chinaw nynh a uk lanze, tuhlae lanze, thawccinaw phe beih lang a ccou`ae paw te dingnaw lasung a ccou`ae paw nynh tuh lukheitpaw Jesu Kri liate hiinnaw kya houh a uk cih`ae. ¹⁸ Tukeiccu lukheitpaw cyiseimenaw keiccu ccungccaw`ae balyn tuh seibyapianaw a tungkuh, tuhhawte lukheitpaw dingnaw liate ccungccaw`ae balyn tungvaw kya hiinnaw te asekuhpaw thyaaccounaw a muekuh. ¹⁹ Pawccecize ccungccapaw lukheit nynh kawngae leinaw liate ccungccaw patae tuh misei`ae lang tangsah athua`ae hawte lukheitpaw kawngaenaw liate ccungccaw patae tuh miding`ae lang tangsah athua cih`ae. ²⁰ Tuhlae lanze, cyiseimenaw houh alung nawlan nynh Kawbya tuh yn tee, thuasalama seinaw alungnaw kya thawccinaw houh alunghua; ²¹ tuh-e tuh, seinaw nynh chinaw kya a uk hawte ah Bawipaw Jesu Kri liate thawccinaw nynh dingnaw liate zungzae hiinnaw kya a uknaw lanpaw nynh thua.

¹ Tuhte lanze pawcihte ah ho cih oh? Thawccinaw houh alung ccaw cite seinaw tou banban pei ah rae cih oh? ² Tuhte thua khyh. Seinaw kalan a chih vae`ae paw aening tuh pawcihtemou tuh-e kyatuin ah hiin ung cih oh? ³ Kri Jesu lungkhu lang baptisma-in vae`ae paw aening balyn tuh a chinaw lungkhu lang baptisma- inkuh vae cipaw na nyh khyh oh tou? ⁴ Tukeiccu a chinaw lungkhu lang baptisma-inkunaw liate aening tuh amaw ryte ah uhkuh bua oh. Ou tuhte Kri tuh Paaw phu-enaw thungnaw liate a chih`ae paw kyate thosathui athua hawte, aening mah hiinnaw athawpaw kya ah cciabua nawlan oh nynh thua. ⁵ Pawccecize a chinaw kya alokuh lante aening tuh pynkheihlan ah bingkuh bua oh athua ze, a thothuinaw kya mah pynkheihlan phe lokuh lante ah bingkuh bua cih oh. ⁶ Aening ah ccungccaw rynpaw kha amaw ryte khiade athua paw tuh sei pyn hynh ro khylan nynh thua cipaw ah ny oh, ou tuhte aening nynh seinaw rya ah law vae khyh nawlan oh. ⁷ Pawccecize a chih vae paw ccungccaw tuh seinaw kyate phe a lue vae. ⁸ Atu aening tuh Kri ryte ah chi oh thua ze, amaw ryte ah hiin cih oh cite mah ah zyn oh. ⁹ Pawccecize, Kri tuh a chih`ae paw kyate thosah he athua te chih lae vae khyh, chinaw nynh a tungvaw kya uknaw kaw hoi kho vae khyh cipaw ah ny oh. ¹⁰ Pawccecize Kri nynh a chi paw tuh seinaw hanlan vaekheit rou nynh a chi, thuasalama a hiinpaw tuh Pachia hanlan nynh a hiin. ¹¹ Tuhhawte nanning mah seinaw kalan tuh phe kae chih ccaccing cite tuakuh oh, thuasalama Pachia kalan tuh ah Bawipaw Kri Jesu liate kae hiin cite naemaw te naemaw kha la tuakuh oh. ¹² Tukeiccu, nae pynsaw ryduanaw kawngaenaw khylan a chihthyapaw nae pyn kya seinaw nynh la uk nan vae sah. ¹³ Nae pyn kya-e`ae mah seinaw hanlan ding leinaw zunghe lante la pyakuh nan oh; thuasalama a chih`ae paw kyate bua a hiin`ae paw ccungccaw`ae hawte naemaw te naemaw kha Pachia kalan pyakuh oh lah nae pyn kya-e`ae kha mah dingnaw zunghe lante Pachia kalan pyakuh oh. ¹⁴ Pawccecize nanning tuh Kawbya zakaw na um vae khyh oh, thuasalama thawccinaw zakaw nynh na um oh; tukeiccu seinaw nynh nanning tungvaw kawhoinaw hoi vae lan khyh. ¹⁵ Tuhte lanze pawcihtemou? Aening tuh Kawbya zakaw ah um vae khyh oh, thuasalama thawccinaw zakaw ah um vae oh keiccu tuh ah sei cih oh tou te? Tuhte thua khyh. ¹⁶ Nanning nynh chinaw te asekuhpaw seinaw kalan na pyakuh oh zemah, tukhyhze dingnaw te asekuhpaw kawngaenaw kalan na pyakuh oh zemah, lukhakheit kalan naemaw te naemaw kha see`ae lang na pyaku oh lan thua ze, nanning tuh tuh-e paw a kaw na ngae oh paw see`ae nynh kae thua cipaw na nyhkuh khyh oh tou? ¹⁷ Thuasalama Pachia kalan lungtuabya ho lan accan. Pawccecize nanning tuh seinaw kya-e see`ae nynh na la thua oh paw, thuasalama atu tuh nae kalan phy athua paw doctrine kha nae thinlung kyate phe na lawku vae oh. ¹⁸ Seinaw kyate luesah phe na thua vae oh thyhte, nanning tuh dingnaw see`ae lang nynh na tang vae oh. ¹⁹ Nae pynsaw lante na ccing khyh oh keiccu nynh ccungccaw phung lante kae hopya oh; pawccecize nae pyn kya-e`ae kha seimenaw hanlan, athyaa leipaw kalan te seimenaw kalan see`ae lang na la pyakuh oh hawte atu mah nae pyn kya-e`ae kha thyaanaw hanlan, dingnaw kalan see`ae lang pyakuh oh. ²⁰ Pawccecize nanning tuh seinaw see`ae na la thua lya oh kha dingnaw kyate na la lue oh. ²¹ Tuhte lanze atu nanning nynh nae maethyakhaekupaw tuh-e uccaw`ae kya paw thanenaw mou na mue oh? Pawccecize tuh-e uccaw`ae athangnaw tuh chinaw nynh thua. ²² Thuasalama atu nanning tuh seinaw kyate luesah na thua oh zah Pachia see`ae lang na tang oh thyhte thyaanaw hanlan thanenaw kha na mue oh, te athangnaw lang zungzae hiinnaw kha na mue cih oh. ²³ Pawccecize seinaw mee tuh chinaw nynh thua; thuasalama Pachia kya-e lasung tuh ah Bawipaw Kri Jesu liate zungzae hiinnaw nynh thua.

¹ Kawbya a nyh`ae paw uno`ae, nae kalan kae hopya oh. Kawbya nynh ccungccaw lukheit tungvaw a hiin lungkhu balyn uknaw kaw a hoi cipaw kha nanning na nyh khyh oh tou? ² Pawccecize vawpaw a hoi vae paw nopinung tuh a vawpaw a chi makhia Kawbya liate a vawpaw kalan hede athua; thuasalama a vawpaw tuh a chi lanze a vawpaw te asekuhpaw kawbya kyate aning tuh a lue. ³ Tukeiccu tuh a vawpaw phang a hiin lyakhe, ccangpaw pise kha a umkhae lanze aning tuh vawpaw tungvaw ohhuakuhnung cite ko athua cih; thuasalama a vawpaw tuh a chi lanze, aning tuh kawbya kyate a lue, tukeiccu pise ccangpaw a umkhae zemah vawpaw tungvaw ohhuakuhnung thua vae khyh. ⁴ Ou tuhhawte ka uno`ae, nanning mah Kri pyn liate Kawbya kya chisah na thua oh, pawtecize a chih`ae paw kyate a thothuipaw, mingccangpaw Kri kalan zu lang na tang nawlan oh, te Pachia hanlan athae ah thae nawlan oh nynh thua. ⁵ Pawccecize aening tuh pynsaw kya ah um lya oh tuh seinaw te asekuhpaw ryduanaw`ae nynh Kawbya liate oun thokuh zah chinaw hanlan athae poukhae khylan aening ah pyn kya-e`ae kya rya a lah he. ⁶ Thuasalama atu tuh Kawbya kya-e arynpaw kya thua vae leite, Muisaw kya-e athawpaw kya aening nynh rya ah law nawlan oh aening tuh ah chih oh zah phang oun khiidepaw Kawbya kyate phe ah lue vae oh. ⁷ Tuhte lanze pawcihte ah ho cih oh? Kawbya tuh a sei tou? Tuhte thua khyh! Kawbya leite tuh seinaw hynh ka la nyh lan khyh, thuasalama Kawbya liate nynh ka ny. Pawccecize Kawbya nynh, “Na dua lan khyh,” cite a la ho khyh ze, kae tuh duanaw kong hynh ka la nyh lan khyh. ⁸ Thuasalama seinaw nynh kawpyapaw liate akhue mue zah duanaw aphuinphuin balyn kha kae ka kya a poukhae; pawccecize Kawbya leite seinaw tuh a chih. ⁹ Langmaw lya Kawbya leite nynh kae tuh ka la hiin, thuasalama kawpyapaw he yn thua tuh seinaw nynh a hiin vae, kae tuh ka chih. ¹⁰ Hiinnaw hanlan khang paw tuh-e kawpyapaw tuh chinaw a thuakhae paw kha ka muih. ¹¹ Pawccecize seinaw tuh kawbya liate akhue mue zah kae kha yn ling, te kha-e liate kae kha phe yn chia. ¹² Tukeiccuze Kawbya tuh athyaa, te kawpyapaw mah athyaa, ding zah ahoy. ¹³ Tuhte lanze tuh-e ahoypaw nynh kae ka hanlan chinaw tou yn raepya? Tuhte thua khyh! Thuasalama seinaw nynh seinaw kha a langsaku ccaw cite ahoypaw uccaw liate kae ka kya chinaw rya kha a law; tuh-e tuh seinaw hynh kawpyapaw liate tuh myarya a seipaw lang a tang nawlan nynh thua. ¹⁴ Pawccecize Kawbya tuh muisaw lante asekuhpaw nynh thua cipaw ah ny oh; thuasalama kae tuh pynsaw ccungccaw, seinaw see tang khylan zua paw nynh ka thua. ¹⁵ Pawccecize ka cyi paw kha ka thaethyapaw thua khyh. Ka cyi ry paw kha ka cyih khyh, thuasalama ka hua paw kha nynh ka cyi. ¹⁶ Tuhte ka ry leipaw kha ka cyi lan thua ze Kawbya tuh ahoy cite Kawbya kalan ka nawccah. ¹⁷ Tuhte lanze atu kha-e a cyih paw tuh kae ka thua vae khyh, thuasalama kae ka kya um paw seinaw nynh a cyih. ¹⁸ Pawccecize kae ka kya, ka pynsaw kya ahoypaw kharyh um khyh cipaw ka ny; pawccecize kae ka kya cyirynaw a um, thuasalama ahoypaw kha pawcihte nynh cyi lan cipaw ka muih khyh. ¹⁹ Pawccecize ka cyi ry paw ahoypaw kha ka cyih khyh, thuasalama ka cyi ry leipaw ahoy leipaw kha nynh ka cyi. ²⁰ Ka cyi ry leipaw kha atu ka cyi lan thua ze, kha-e a cyih paw tuh kae ka thua vae khyh, thuasalama ka kya um paw seinaw nynh a cyih. ²¹ Tuhte ahoypaw ka cyi ry lya ahoy leipaw yn cyisah paw ka kya a um cite kawbya ccangkheit ka muih. ²² Pawccecize kae tuh alungkhu lang-e ka ccungccaw lante Pachia Kawbya kya ka lungrythua. ²³ Thuasalama ka pyn kya-e`ae kya, ka thinlungtuanaw kya-e kawbya kha doute a rawsepaw te ka pyn kya-e`ae kya um paw seinaw kawbya kalan, seetangnaw lungkhu lang kae kha yn cciakhae paw ccangpaw kawbya kha ka muih. ²⁴ Pawcih ngaethya lan um paw babang mou kae hynh! Hynh-e chinaw pyn kyate hung nynh mou kae hynh yn luesah cih? ²⁵ Ah Bawipaw Jesu Kri liate yn luesatupaw Pachia kha ka thehoysah. Ou tuhte ka thinlung tetuh Pachia Kawbya rya kha ka lah, thuasalama ka pynsaw lante seinaw kawbya rya nynh ka law.

¹ Tukeiccu atu Kri Jesu kya a um`ae paw ccungccaw`ae tuh seibenaw um vae khyh, minmin tuh pynsaw rynaw thyhte hiin vae khyh`ae, thuasalama Muisaw rynaw thyhte nynh a hiin`ae. ² Pawccecize Kri Jesu kya um paw hiinnaw kya-e Muisaw kawbya nynh seinaw kawbya kyate thuasah, chinaw kawbya kyate thuasah kae kha phe yn luesah vae. ³ Pawccecize pynsaw liate Kawbya tuh thawzya zah a cyi kho leipaw kha Pachia nynh cyipya khylan, a seithyapaw pynsaw muinsan lante seinaw hanlan amaw a ccapaw kha yn saw zah pynsaw kyakhe seinaw kha sei a be. ⁴ Tuhte pynsawthuanaw thyhte a hiin lei`ae paw, thuasalama Muisaw rynaw thyhte a hiin`ae paw aening kya Kawbya kya-e dingnaw tuh accing nawlan nynh thua. ⁵ Pawccecize pynsawthuanaw thyhte a hiin`ae paw nynh tuh pynsaw te asekuhpaw uccaw`ae kha nynh a tua`ae; thuasalama Muisawthuanaw thyhte a hiin`ae paw nynh tuh Muisaw uccaw`ae kha nynh a tua`ae. ⁶ Pynsaw tuanaw tuh chinaw nynh thua, thuasalama muisaw tuanaw tuh hiinnaw te daenaw nynh thua. ⁷ Pawkeiccumacize pynsaw tuanaw tuh Pachia te arawsekuh, pawccecize pynsaw tuanaw tuh Pachia Kawbya kha zui khyh, zui mah zui kho khyh. ⁸ Tukeiccu pynsaw kya um`ae paw nynh tuh Pachia lung tung kho khyh`ae. ⁹ Thuasalama Pachia Muisaw tuh nanning kya a um lan thua ze, nanning tuh pynsaw kya na um khyh oh, Muisaw kya nynh na um vae oh. Atu lukhakheit nynh Kri kya-e Muisaw kha a hoi khyh lanze, aning tuh Kri te sekuh khyh. ¹⁰ Te Kri tuh nanning kya a um lanze, pyn tuh seinaw keiccuze a chih, thuasalama Muisaw tuh dingnaw keiccuze a hiin. ¹¹ Thuasalama Jesu kha a chih`ae paw kyate a thosatupaw, a Muisaw kha nanning kya a um lanze, Kri kha chinaw kyate a thosatupaw nynh nanning kya a um paw amaw Muisaw liate a chihthyapaw nae pyn kha ae hiinsah cih oh. ¹² Tukeiccu uteno`ae, aening tuh pynsawthuanaw thyhte hiin khylan pynsaw kalan lae um`ae paw ah thua vae khyh oh. ¹³ Pawccecize pynsaw thyhte na hiin oh athua ze na chih vae cih oh; thuasalama Muisaw liate pyn kya-e cyisahnaw kha na chisah oh ze na hiin cih oh. ¹⁴ Pawccecize Pachia kya-e Muisaw nynh a cciakhae`ae paw miakaw tuh Pachia ccaaw`ae nynh thua`ae. ¹⁵ Pawccecize nanning nynh a rihthya paw seetangnaw kya-e muisaw kha bua na mue khyh oh, thuasalama ccaawthuanaw Muisaw kha phe na mue vae oh, ou tuh-e te nynh, “Abba, Apang,” cite ah ko oh. ¹⁶ Aening tuh Pachia ccaaw`ae nynh ah thua oh cipaw Muisaw amaw ccaccei nynh aening muisaw ryte ccaekia a khan. ¹⁷ Te ccaaw`ae ah thua oh ze rhoccoutu`ae nynh ah thua vae oh, Pachia kya-e rhoccoutu`ae te Kri ryte rhoccoukheihtu`ae nynh ah thua oh; amaw ryte ah teingkheih oh ze, pynkheihlan phu-esah ah thuabua cih oh. ¹⁸ Pawccecize aening kya yn langkuh vae cih paw phu-enaw te atu lya e teingnaw`ae tuh khingkhia lan sanmah ngaekuh khyh cite nynh ka tua. ¹⁹ Pawccecize rae paw uccaw`ae nynh Pachia ccaaw`ae oun langku nawlan`ae paw kha myaryasangkae ngaehoinaw te phang a ngawdae`ae. ²⁰ Pawccecize rae paw uccaw`ae tuh accakaepaw lang nynh rae athua`ae. Tuhte raeku a ry`ae paw thua khyh; thuasalama a raetupaw nynh ngaehoinaw kya tuhcihte a rae keiccu nynh tuhte athua`ae. ²¹ Pawkeiccumacize rae paw uccaw`ae maw mah ronaw seetangnaw kyate Pachia ccaaw`ae kya-e aphu-epaw luenaw lungkhu lang poh thua athua cih`ae. ²² Pawccecize rae paw uccaw`ae balyn tuh atu cia pynkheihlan hawkhaekuh`ae zah neitangia teing`ae cipaw ah ny oh. ²³ Minmin kyalya thua leite, Muisaw thae`ae kya-e masaty a hoi`ae paw aening kha mah ccaawthuanaw athua paw ah pyn sawkhawnaw kha ngaehoibiate ahmaw lungkhu kya ah hawkhaekuh oh. ²⁴ Pawccecize aening tuh ngaehoinaw liate khum ah thua oh; thuasalama phe muih vae paw ngaehoinaw tuh ngaehoi paw thua vae khyh; pawccecize lukhakheit nynh phe a muih vae paw uccaw kha pawccemou a ngaehoi ung cih? ²⁵ Thuasalama aening nynh ah muih lei oh paw kha ah ngaehoi oh ze, kha-e kha aening nynh lungsaete ah ngaw oh. ²⁶ Tuhhawte aening ah ccing leinaw oh kya Muisaw nynh mah yn bawng; pawccecize sawsang lan ah ccang oh thyhte, pawcihte nynh sawsang lan cipaw ah nyh khyh oh; thuasalama aening sawsang lan bya te ho kho leipaw hawkhaekunaw khate Muisaw amaw ccaccei nynh aening hanlan yn ngiapya. ²⁷ Thinlung a ccungtupaw nynh tuh Muisaw tuanaw kha a ny; pawkeiccumacize Muisaw nynh mithyaa`ae hanlan Pachia rynaw thyhte a ngiapya`ae. ²⁸ Pachia kha a sungsah`ae paw, amaw a eenaw thyhte a ko paw ccungccaw`ae hanlan pawpaw balyn tuh pynkheihlan ahoy lante cci nynh acyiku cipaw aening nynh ah ny oh. ²⁹ Pawccecize Pachia nynh a Ccapaw kha uteno`ae pataepi lakuze ccatawccaaw lang atang ccaw cite Pachia nynh phe a nyty paw ccungccaw`ae kha a Ccapaw muinsan te aloku nawlan phe a syntawty`ae. ³⁰ Tuhte phe a syntawty paw minmin kha ko mah a ko`ae; te a ko`ae paw kha thyaaccousah`ae; te thyaaccousah`ae paw kha phu-e ccousah bua`ae. ³¹ Tuhte lanze hynh-e uccaw`ae kya pawcihte ah ho cih oh? Pachia tuh aening ryte a um ze hung nynh mou aening kha oun rawse kho ung cih? ³² Amaw a Ccapaw heize hang leite aening balyn hanlan oun pyatupaw Pachia nynh Ccapaw ryte pawpaw balyn kha alakaw te aening pya leite ung ngaw tou? ³³ Pachia nynh a po`ae paw kha hung nynh mou sei a be cih? Thyaaccousatupaw tuh Pachia nynh thua. ³⁴ Seibetupaw tuh hungmou? Chih zah a chi kyalya thua leite bua a thothuipaw, Pachia a ranglang ccaccei kya a um paw, aening hanlan oun ngiapatupaw tuh Kri ccaccei nynh thua. ³⁵ Kri kya-e sungsanaw kyate hung nynh mou aening kha oun phiasakuh cih? Vawsawrunaw nynh tou? Thinlungccinaw nynh tou? Tuasakunaw nynh tou? Ccakangnaw nynh tou? Ccakaete umnaw nynh tou? Ronaw nynh tou? Zunghe nynh tou oun phiasakuh cih? ³⁶ “Nang na keiccuze kaening tuh a nin ninlang oun chiabia`ae; chia lan a nungde`ae paw tuu`ae lang nynh kaening kha oun ria`ae,” cite a la zeiku hawte nynh thua. ³⁷ Oun phia kho lanpaw um khyh. Aening kha oun sungsahtupaw amaw liate, aening tuh hynh-e uccaw`ae balyn kya, taetu`ae pasing nynh ah thua oh. ³⁸ Pawccecize chinaw thuasah, hiinnaw thuasah, vaaw ccungccaw`ae thuasah, lupithuanaw thuasah, thungnaw thuasah, atu a um paw uccaw`ae thuasah, oun thua vae cih paw uccaw`ae thuasah; ³⁹ ahangnaw thuasah, akhunaw thuasah, ccangpaw rae paw uccaw thuasah, ah Bawipaw Kri Jesu kya um paw Pachia kya-e sungsakunaw kyate aening kha oun phia kho lan khyh cite kae ka lungtyn.

¹ Kri kya byaccing nynh ka ho, ka hyng khyh. Kamaw nykunawpaw thinlung nynh mah Thyaa Muisaw ryte kamaw kalan te ccaekiakhan paw tuh: ² Kae tuh alepipaw lungriathaenaw ka hoi zah ka thinlung kya ngaethyanaw apaekuh lei lan ka hoi. ³ Pawccecize pynsaw lante ka puipaw vaeccaw`ae athua paw ka uno`ae hanlan kamaw te kamaw tuh Kri kyate thyalawnaw ccou lan cia heize ka ry. ⁴ Tuh-e`ae tuh Israel`ae nynh thua`ae. Te ccaawthuanaw, phu-enaw, byakin`ae, te Kawbya pyanaw, te Pachia ryalawnaw, te byakinpyakupaw`ae te asekuh`ae paw, ⁵ minpaaw`ae te asekuh`ae paw nynh thua`ae. Pynsaw lante Kri tuh minmin kyate nynh yn thua. Tuh-e Kri tuh tynre balyn kyaze kawhoitu thua zah zungzae hythuapyatu Pachia nynh thua. Amen. ⁶ Tuhzemah Pachia bya tuh atyn leipaw hawte ka hopaw thua khyh. Pawccecize Israel athua`ae paw balyn hynh Israel marya thua khyh`ae. ⁷ Abraham kyate a tho`ae paw balyn mah Abraham ccaaw`ae marya thua khyh`ae; thuasalama, “Na ciihan tuh Isaak kya rou nynh ko athua cih,” acihkuh. ⁸ Tuhte a hopaw tuh pynsaw ccaaw`ae tuh Pachia ccaaw`ae thua khyh cinawpaw nynh thua; thuasalama byakinpyakupaw kya-e ccaaw`ae kha nynh ciihan lan ria athua. ⁹ Byakinpyakupaw kya-e bya tuh hynhte acikuh: “Atu kae hopya ccyh yn thua te kae kae thua cih zah Sarah nynh ccapaw yn hoi cih,” a ci. ¹⁰ Tuh-e kyalya thua khyh, Rebeka nynh lukheitpaw, ah paaw Isaak liate ccaaw a poi lyakhe, ¹¹ ccaaw`ae a pui maw`ae, ahoypaw te athahpaw mah a rae maw`ae khe, Pachia paccynnaw tuh ryalawnaw liate thua khyh, thuasalama a kotupaw nynh a ponaw thyhte athua nawlan, ¹² Rebeka kalan khe, “Atawccapaw nynh asoipaw see lang yn tang cih,” cite a hopya. ¹³ Tuhhawte, “Jakob tuh ka sungsah, thuasalama Esau tuh ka hua,” cite azeikuh. ¹⁴ Tuhte lanze pawcihte ah ho cih oh? Pachia tuh taza khyh tou? Tuhte thua khyh. ¹⁵ Pawccecize Pachia nynh Mawsi kalan, “Ngaethya ka umsah ry paw kha ngaethya ka umsah cih zah thaw ka cciry paw kha thaw ka ccih cih,” cite a hopya. ¹⁶ Tukeiccu a ry paw ccungccaw kya-e thua khyh, a ccue paw ccungccaw kya-e mah thua khyh, thuasalama ngaethyaumsanaw a langsakutupaw Pachia kya-e nynh thua. ¹⁷ Pawccecize Ccathyaa nynh Faro kalan a ho paw tuh, “Ka thungnaw kha nang na kya langsaku khylan, te ka min hynh laephipi kya balyn po thaansah khylan, hynh-e paccynnaw elan nynh nang kha kae hangthung,” a cipya. ¹⁸ Tukeiccu Pachia nynh ngaethya-umsah ry paw kha ngaethya-umsah zah lungkhungsah ry paw kha a lungkhungsah. ¹⁹ Tuhte lanze, “Pawccemou Pachia nynh cyiseimenaw yn muihpya? Hung nynh mou a rynaw kha a khee boi?” cite nae cipah cih tou. ²⁰ Pachia kha rawsete a khung paw, pou ccungccapaw, nang tuh hungmou na thua? Rae paw uccaw nynh a raetupaw kha, “Pawccemou hynhcihte nae rae,” cite a hopah cih tou? ²¹ Ang raetupaw nynh anglae tungvaw kya kawhoi khyh tou? Anglae pumkheit mawkhate zung kheit kha ang hoypaw lang, te zung kheit kha anghoy leipaw lang raenaw kaw hoi khyh tou? ²² Pachia nynh amaw thinrianaw kha langsaku lan te a thungnaw kha nysah lan`ae mang a ry pite, ronaw hanlan a paccyn vae paw a thinrianua paw ang`ae kya lungsaenaw pipi te phang a ngaesang lanze pawmou ho lan ung? ²³ Te Pachia nynh phu-enaw hanlan a paccynty vae paw, ngaethyaumsanaw ccou`ae paw ang`ae tungvaw kya a phu-enaw kya-e hoirungnaw kha langsaku khylan a cyi paw nynh thua. ²⁴ Tuh-e ang`ae tuh Jew`ae kyate kyalya thua khyh, thuasalama Pachia nynh Zenta`ae kyate oun ko paw aening so ah thua khyh oh tou? ²⁵ Hosia kya mah Pachia nynh, “Ka ccungccaw`ae athua leipaw kha, ‘Ka ccungccaw`ae,’ cite ka ko cih`ae zah ka sungsah nung athua leipaw kha, ‘Ka sungsah,’ cite ka ko cih.” ²⁶ “Ou tuhcihte, ‘Nanning tuh ka ccungccaw`ae na thua khyh oh,’ cite a honaw`ae kyakhe, minmin tuh a hiinpaw Pachia ccaaw`ae cite ko athua cih`ae,” cite a ho. ²⁷ Israel`ae te asekuh lante Isaiah nynh mah, “Israel ccaaw`ae milu tuh rili kya-e laesia hawte athua zemah, alaepaw rou nynh khum athua cih`ae. ²⁸ Pawccecize ryalaw kha a thangsah cih; dingnaw kya adynsah cih; pawkeiccumacize BAWIPAW nynh adynpaw ryalaw kha laephi vawlan a rae cih,” cite a sia. ²⁹ Tuhhawte Isaiah nynh langmaw lya, “Sabaoth BAWIPAW nynh aening hanlan ccacii kha yn hangpya khyh lanze aening tuh Sodom khuapi hawte ah thua cih oh zah Komorah khuapi te phe ah lokuh vae cih oh,” cite a ho. ³⁰ Tuhte lanze pawcihte ah ho cih oh? Dingnaw kha a zui lei`ae paw Zenta`ae nynh dingnaw kha phe a phya vae`ae, tuh-e dingnaw tuh zynnaw kya-e nynh thua. ³¹ Thuasalama dingnaw kawbya a zui`ae paw Israel`ae nynh dingnaw kawbya kha phah khyh`ae. ³² Pawccemou? Pawkeiccumacize zynnaw liate zui khyh`ae, thuasalama Kawbya cyisahnaw liate a zui`ae keiccu nynh thua. Pawkeiccumacize kha-e thykupawkunawpaw lung kya phe thykuh`ae. ³³ “Dotua oh! Thykupawkunawpaw lung te seisanawpaw lung kha Zion mua kya ka nung, te hunghung zemah amaw kha a zyn paw tuh maethya ccou vae lan khyh,” cite azeikuh hawte nynh thua.

¹ Uteno`ae, Israel`ae hanlan ka thinlung kya-e ka rynaw te Pachia kalan ka sawsangnaw tuh minmin nynh khumnaw a ccoubua ccaw`ae ci nynh thua. ² Pawccecize minmin tuh Pachia kalan lungzuanaw a hoi`ae, thuasalama nythyanaw thyhte thua khyh cipaw minmin elan ccaekia ka khan. ³ Pawccecize minmin tuh Pachia kya-e dingnaw kha ny lei pite, mimaw kya-e dingnaw kha tynsah khylan a zuaku`ae keiccu Pachia kya-e dingnaw kalan mimaw te mimaw kha pyakuh vae khyh`ae. ⁴ Pawccecize a zyn paw ccungccaw miakaw hanlan Kri tuh dingnaw lang Kawbya accingnaw nynh thua. ⁵ Pawccecize Mawsi nynh, “Kha-e`ae a cyih paw ccungccaw tuh kha-e`ae liate nynh a hiin cih,” cite Kawbya te asekuhpaw dingnaw kong kha a zei. ⁶ Thuasalama zynnaw te asekuhpaw dingnaw kong tuh hynhte nynh a ho. “ ‘Hungmou vaawran lang a kaethung cih?’ cite na thinlung kya ho nan,” (Tuh-e tuh Kri kha sawbung khylan hungmou a kaethung cih cirypaw nynh thua) ⁷ tukhyhze, “ ‘Hungmou akhunaw lang a rungbung cih?’ cite mah na thinlung kya ho nan,” (Tuh-e tuh Kri kha a chih`ae paw kyate bua poukhae khylan hungmou a rungbung cih cirypaw nynh thua) a ci. ⁸ Thuasalama paw a ci mou? “Bya tuh nang te anaekuh, na khalang kya te na thinlung kya anaekuh,” a ci. (Tuh-e tuh kaening nynh kae hopaw, zynnaw bya hynh nynh thua.) ⁹ Pawtecize Bawipaw Jesu kha na khalang te ccaekia na khan zah amaw tuh a chih`ae paw kyate Pachia nynh phe a thosah vae cite na zyn lanze, nang tuh khum na thua cih. ¹⁰ Pawccecize dingnaw hanlan ccungccaw nynh thinlung kya a zyn, te khumnaw hanlan khalang te ccaekiakhannaw a rae. ¹¹ Pawccecize Ccathyaa nynh, “Hunghung zemah amaw a zyn paw balyn tuh maethya ccou vae lan khyh,” a ci. ¹² Pawccecize Jew te Greek phin laku laesanaw um vae khyh, pawccecize ccungccaw balyn luki Bawipaw lukheit rou nynh a um. Amaw kha a ko`ae paw balyn hanlan aning tuh myarya a hoirung. ¹³ Pawccecize, “Hunghung zemah BAWIPAW min a ko paw miakaw tuh khumnaw a mue cih.” ¹⁴ Tuhzemah minmin nynh a zyn lei`ae paw kha pawcihtemou a ko cih`ae? Te minmin nynh a konglang a thae lei`ae paw kha pawcihtemou a zyn cih`ae? Te phunghotu um leite pawcihtemou minmin nynh a thae cih`ae? ¹⁵ Te minmin kha a saw khyh`ae lanze minmin nynh pawcihtemou phungho cih`ae? Tuhhawte, “Daenaw kong thehoypaw phungho`ae paw te ahoypaw kong lungtua lan um paw thehoypaw oun phu`ae paw mih ccu tuh pawcih babang apuithya!” cite azeikuh. ¹⁶ Thuasalama minmin balyn nynh thehoypaw kha ngae khyh`ae. Pawccecize Isaiah nynh, “Bawipaw, kaening nynh kae ho paw kha hung nynh mou a zyn?” cite a ho. ¹⁷ Tukeiccu zynnaw tuh thaenaw kyate nynh yn thua, te thaenaw tuh Pachia bya kyate nynh thua. ¹⁸ Thuasalama, minmin tuh la thae loh khyh`ae tou? ka ci. Phe a thae ccaccing vae`ae. “Minmin mih roi tuh laephi balyn kyacia phe thua vae zah mih bya tuh laephipi athangnaw kyacia phe thua vae,” a ci. ¹⁹ Thuasalama kae nynh, “Israel`ae nynh nyh khyh`ae tou?” ka ci. Masaty Mawsi nynh, “Ria bua athua leipaw minphuin liate nanning kha eiungnaw kae hoisah cih oh zah angaeepaw minphuin liate nae thin kae riasah cih oh,” cite a la ho. ²⁰ Thuasalama Isaiah tuh myarya a rawhoy zah, “Kamaw kha oun ccung lei`ae paw nynh kae kha phe oun muih vae`ae; ka konglang oun khia lei`ae paw kalan kae phe ka langkuh vae,” cite a ho. ²¹ Thuasalama Israel`ae kalan Isaiah nynh, “Kawngae leipaw te a ei khopaw minphuin kalan khe ninlang ka kuih ka dyng,” cite a ho.

¹ Tuhte lanze, Pachia nynh a ccungccaw`ae kha ccaring vua vae tou? ka ci. Tuhte thua khyh! Pawccecize kae mah Israel lukheit nynh ka thua, Abraham ciihan, Benjamin phin nynh ka thua. ² Pachia nynh phe a nyty vae paw a ccungccaw`ae kha ccaring vua khyh. Elijah konglang Ccathyaa nynh a hopaw kha na nyh khyh oh tou? Israel`ae te arawsekuh lante aning nynh Pachia kalan a ngiakupaw tuh pawtemacize, ³ “BAWIPAW, minmin nynh na profeh`ae kha phe theih`ae zah na silawhang`ae kha phya a ro vae`ae, te ka makhae nynh alaepaw ka um vae, te ka hiinnaw kha oun ccung`ae,” a ci. ⁴ Thuasalama Pachia nynh a kalan a khung paw tuh: “Baal pachia kalan ccukharutung lei`ae paw ccungccaw thungsari kha kamaw hanlan phang ka haangkuh bang ung,” a cipya. ⁵ Ou tuhhawte atu ccyh lya mah thawccinaw liate ponaw thyhte a po`ae paw alaepaw a um. ⁶ Te thawccinaw liate athua ze, ryalawnaw liate kharyh thua vae khyh; athua lanze thawccinaw tuh thawccinaw thua vae lan khyh. Thuasalama cyisahnaw liate athua lanze thawccinaw liate thua vae khyh; athua lanze cyisahnaw tuh cyisahnaw thua vae khyh. ⁷ Tuhte lanze pawcihtemou? Israel`ae nynh a ccung`ae paw kha mue khyh`ae, thuasalama po`ae paw nynh kha-e kha a mue`ae, te tuhlaepaw`ae tuh mih mit pung moh`ae. ⁸ Tuh-e tuh, “Mit`ae nynh ngawmuih khyh nawlan`ae, te nakaring`ae nynh nawthae khyh nawlan`ae Pachia nynh minmin kha ngawthuanawpaw muisaw kha a pya`ae, atunin cia,” cite azeiku hawte nynh thua. ⁹ Te David nynh, “Mih ccaboi tuh mih hanlan kaang lang te tahphung lang tang sah, thykupawku nawlan te ccaeliaru nawlan tang sah. ¹⁰ Mih mit tuh ngawmuih kho lei lan moh sah lah mih ke tuh pei ky sah,” a ci. ¹¹ Tuhte lanze Israel`ae tuh a khuliaku ccaw`ae cite phe thykuh`ae tou? ka ci. Tuhte thua khyh. Thuasalama minmin eiungnaw lang minmin cyiseimenaw liate khumnaw tuh Zenta`ae kalan yn thua vae. ¹² Atu Israel`ae cyiseimenaw tuh laephipi hoirungnaw lang yn tang zah minmin nyaabungnaw tuh Zenta`ae hoirungnaw lang a tang ze, minmin ccingnaw tuh pawcihmou houh alung cih! ¹³ Tuhzemah kae tuh Zenta`ae locceihtu ka thua thyhhawte, ka ryalawnaw kha ka hothung zah Zenta`ae nanning kae hopya oh. ¹⁴ Ccangkhakheit te ka vaeccaw`ae kha mih lungthonaw ka rae zah minmin abang kha khumnaw ka ccousah bua ccaw`ae ci nynh thua. ¹⁵ Pawccecize minmin kha ccaring vuanawpaw tuh laephi ccungccaw`ae ccawkuthuinaw lang a tang ze, minmin kha bua lehkhannaw tuh a chih`ae paw kyate hiinthuinaw lang thua lan khyh tou? ¹⁶ Te masaty ccathae tuh athyaa ze vaepoi balyn mah athyaa cih; te atharui tuh athyaa ze aran`ae mah athyaa bua cih. ¹⁷ Te aran`ae abang kha khya`ae zah rangkaw e oliv thingku athua paw, nang kha minmin kya ae piade`ae zah aran`ae ryte pynkheihlan oliv thingku kya-e atharui te athotui kha na ccoubua lanze, ¹⁸ a khya`ae paw aran`ae tungvaw la ponuakuh nan, thuasalama na pooku lan thua ze, nang nynh atharui kha na phu khyh, thuasalama atharui nynh nynh nang kha ae phu. ¹⁹ Tuhte lanze nang nynh, “Kae kha yn piade nawlan`ae nynh aran`ae kha a khya`ae,” na ci ngaw rei. ²⁰ Athua rou; zyn leinaw keiccuze minmin tuh khya`ae zah nang tuh zynnaw liate na thadyn. Tansakuh nan, rinaw palia kha hoi. ²¹ Pawccecize Pachia nynh a umty paw aran`ae hei kha a haang khyh lanze nang mah ae haanglae lan khyh. ²² Tukeiccu Pachia a hoynaw te phe ccihtheihpaw byapianaw kha dotua; a khuliakuh`ae paw tungvaw phe ccihtheihpaw byapianaw kha a thuasah, thuasalama nang tuh a hoynaw kya na tyn ze Pachia kya-e hoynaw kha na kalan a thuasah cih, tuhzemah a hoynaw kya na tyn khyh lanze nang mah thoh bae na thua cih. ²³ Te minmin mah zyn leinaw kya pei a tyn khyh`ae ze piade bua athua cih`ae; pawccecize minmin kha bua piade lan Pachia tuh a cyih kho. ²⁴ Pawccecize rangkaw amaw po lan popaw oliv thingku kyate nang kha thoh ae bae`ae zah ahoypaw oliv thingku kya athuanaw te accawkuh lei pite piade na thua lanze, a umtypaw aran`ae athua paw minmin kha mimaw oliv thingku kya houh piade thua lan khyh`ae tou? ²⁵ Pawccecize uteno`ae, naemaw na tuakunaw oh kya na hawsaku khyh nawlan oh, Zenta`ae kya-e ccingnaw a tee makhia Israel`ae abang kya mohnaw tuh a thua, tuh-e mohnaw athua paw, hynh-e byakhupaw hynh ny leite na um lan oh paw kha ka ry khyh. ²⁶ Tuhcihte azeiku hawte Israel`ae balyn tuh khumnaw mue cih`ae; “Zion mua kyate Luesatupaw yn thua cih zah aning nynh Pachia pawlangria leinaw kha Jakob ciihan`ae kyate a nuepah cih`ae. ²⁷ Te mih seinaw`ae kha he ka lawpah`ae te hynhe tuh minmin hanlan kamaw byakin nynh athua,” cite azeikuh. ²⁸ Thehoypaw te asekuh lante nanning keiccuze minmin tuh rhaw`ae nynh thua`ae, thuasalama Pachia ponaw te asekuh lante tuh minpaaw`ae keiccuze minmin tuh sungsah`ae paw nynh thua`ae. ²⁹ Pawccecize Pachia kya-e lasung`ae te Pachia konaw tuh rulae kho leipaw nynh thua. ³⁰ Pawccecize langmaw lya nanning tuh Pachia kawngae lei`ae na la thua oh salamah atu tuh minmin kawngae leinaw liate ngaethya-umsanaw kha na ccou oh hawte, ³¹ tuhhawte nanning na ccou oh paw ngaethyaumsanaw liate minmin mah ngaethya-umsanaw a ccoubua nawlan`ae nynh minmin mah atu kawngae khyh`ae. ³² Pawccecize Pachia nynh ccungccaw balyn tungvaw kya ngaethya-umsanaw kha a hoi nawlan minmin balyn kha kawngae leinaw kya pung a khung`ae. ³³ Pachia kya-e hawnaw te nynaw paryh tuh myarya khu zah eih ko kaesy ccarei! A byapianaw`ae tuh thaethya kho um khyh zah a ccianaw`ae tuh muih kho um khyh ccarei! ³⁴ “Pawccecize BAWIPAW a tuanaw-thinlung kha hung nynh mou phe a nyh? Tukhyhze hungmou amaw khuakhankhaetu lang a tang boi?” ³⁵ “Tukhyhze Pachia nynh bua a pyaru nawlan hung nynh mou amaw kha masaty a pya tou?” ³⁶ Pawccecize pawpaw tynre balyn tuh amaw kyate, amaw liate, amaw hanlan nynh thua. Amaw kya phu-enaw zungzae umsah. Amen.

¹ Tukeiccu uteno`ae, nae pyn kha ahiinpaw, athyaapaw te Pachia kalan douccahpaw silawku nawlan na pyaku nawlan oh Pachia kya-e ngaethya-umsanaw liate nanning kha kae ngia oh; tuh-e pyakupaw rya tuh nanning nynh na cyi lan oh accanpaw rya nynh thua. ² Te nanning nynh hynh-e she kya-e muinsanke nan oh, thuasalama ahoypaw uccaw, ry lan um paw, accingpaw uccaw cihkuh`ae paw, Pachia rynaw tuh paw hynh nynh thua cipaw na langsaku thya nawlan oh, nae thinlung bua thawsanaw liate muinsan rulaekuh oh. ³ Pawccecize nanning laku ccungccaw miakaw nynh amaw te amaw kha a tuaku lan accannaw laelan la tuakuh nan sah, thuasalama Pachia nynh milu raveih kha zynnaw tounawpaw a pya thyhte amaw kha kou ngaekuh lante a tuaku nawlan, ka mue paw thawccinaw liate nanning kha kae hopya oh. ⁴ Pawccecize aening nynh pyn pynkheit kya pyn kyae` ae patae ah hoi oh zah pyn kya-e`ae balyn tuh alokuhpaw ryalaw cci a hoi khyh`ae hawte, ⁵ tuhhawte patae cih`ae paw aening mah Kri kya pyn kheit ah thua oh zah lu raveihte pyn kya-e`ae nynh ah thua oh. ⁶ Tuhte aening yn pyapaw thawccinaw thyhte alokuh leipaw lasung`ae kha ah mue oh zah profehbyahonaw a mue paw nynh zynnaw a hoi zeihte profehbya ho sah. ⁷ Beiknaw ryalawnaw a mue paw nynh ryalawnaw kya tyn sah, te a ccangpatu nynh ccangpyanaw kya tyn sah, ⁸ a hytupaw nynh hynaw rya kha lah sah, a pyatupaw nynh hysanaw te pya sah, a uktupaw nynh zuakunaw te uk sah, ngaethya-umsanaw a langsatupaw nynh lungtua thawmuinte langsah sah. ⁹ Sungsakunaw kya tuh cyiruhnaw um nan sah. Athahpaw kha luathua-ae-ui lang ria oh lah ahoypaw kha varyn bekuh oh. ¹⁰ Uteno`ae, u te neitaw sasaw hawte lukheit te lukheit kha thawccikute sungsakuh oh; sawtuakunaw kya lukheit te lukheit sawtuakuh hua oh; ¹¹ thawzung thuanaw kya thawnaw leite thinlung thanccingte Bawipaw rya kha lah oh; ¹² ngaehoinaw kya lungtua oh; vawsawrunaw kya lungsae oh; sawsangnaw kya pei tyn oh; ¹³ mithyaa`ae kha mih hobounaw kya la bawngbua oh; mikhia dooihnaw kha kou hoy lante la rae oh. ¹⁴ Nanning ae tua ae sah oh paw kha hythuapya oh, hythuapya oh lah thyalaw nan oh. ¹⁵ Lungtua`ae paw ryte lungtuabua oh lah a rah`ae paw ryte la rah bua oh. ¹⁶ Lukheit te lukheit lunglokute la um oh. Tuanaw-thinlung kya tansakuh nan oh, thuasalama a nyaa`ae paw ryte vaeccawtang oh. Naemaw tuakunaw kya hawsakuh nan oh. ¹⁷ Hunghung sanmah athahpaw hanlan athahpaw te ccaeliaru nan oh, ccungccaw balyn mitmuihnaw kya ahoypaw uccaw tuanaw hoi oh. ¹⁸ Athua kho lanze, naemaw kya ccawkunaw a um thyhhawte, ccungccaw`ae balyn ryte ccawkute la um oh. ¹⁹ Sungsah`ae paw, naemaw nynh naemaw hanlan ccaeliaru nan oh, thuasalama Pachia thinrianaw hanlan nungpah oh, pawccecize Bawipaw nynh, “Ccaeliarunaw tuh kamaw kya-e, kamaw nynh ka liaru cih,” a ci cite azeikuh. ²⁰ Tukeiccu, “Nang na rhawpaw kha a vuelaw ze looh la dang; a tuihaw ze nia lanpaw kha la pya; pawccecize tuhte na cyinaw kya nang nynh kha-e paw lu vawlan maee-e`ae kha na pungpah cih.” ²¹ Athahpaw khate la taesakuh nan, thuasalama athahpaw kha ahoypaw te la tae.

¹ Uknaw lante kawhoi`ae paw kalan ccungccaw miakaw nynh kawngae`ae sah. Pawccecize Pachia kyate laelan tuh kawhoinaw cipaw um khyh, kawhoinaw`ae tuh Pachia nynh khang paw nynh thua. ² Tukeiccu hunghung zemah kawhoinaw kha a rawsepaw tuh Pachia khangnaw kha a rawsepaw nynh thua, te tuhte a rawsepaw tuh mimaw tungvaw seibyapianaw a ing cih`ae. ³ Pawccecize uktu`ae tuh ahoypaw ryalah`ae paw hanlan ri lanpaw thua khyh, thuasalama ahoy leipaw ryalah`ae paw nynh a ri lan`ae paw nynh thua. Kawhoi`ae paw kha ri leite tou na um ry? Ahoypaw rya kha lah lah kawhoinaw kyate thehoysanaw kha na ccou cih. ⁴ Pawccecize aning tuh nang na hoynaw hanlan Pachia kya-e ryalahtu nynh thua. Thuasalama ahoy leipaw rya na law ze la rih; pawccecize aning tuh thaloi kha alakaw lang ccyng khyh; pawccecize ccungccaw tungvaw thinrianaw thuakhae zah ccaeliarutupaw Pachia kya-e ryalahtu nynh thua. ⁵ Tukeiccuze thinrianaw keiccu kyalya nanning nynh kaw na ngae lan oh paw thua khyh, thuasalama ahmaw te ahmaw nykunaw thinlung keiccu mah kaw na ngae lanpaw nynh thua. ⁶ Hynh keiccuze nanning mah ngunto pya oh, pawccecize uktu`ae tuh Pachia ryalahtu`ae thua`ae zah hynh-e mih ryalaw hanlan mimaw kha pei pyakuh`ae paw nynh thua. ⁷ Tukeiccu ccungccaw miakaw kha mue lan a ccan`ae thyhte la pya oh; ngunto accanpaw kha ngunto pya oh; ngunkhoi accanpaw kha ngunkhoi pya oh, rawri lan accanpaw kha rawrih oh; sawtua lan accanpaw kha sawtua oh. ⁸ Lukheit te lukheit sungsaku lanpaw laelan hung kalan sanmah laeba um nan oh; pawccecize mingccangpaw a sungsahpaw ccungccaw tuh Kawbya kha phe a ccingsah vae. ⁹ Pawccecize, “Milae zu la seikhae nan,” “Ccungccaw la theih nan,” “La ruh nan,” “Ahme leipaw ccaekia la khan nan,” “Milae uccaw la dua nan,” cikuh paw laelan ccangpaw kawpyapaw a um lan zemah, “Na innpaw kha namaw na sungsaku hawte la sungsah,” cikuh paw hynh-e kawpyapaw nynh marya a khung. ¹⁰ Sungsakunaw nynh tuh a innpaw kya ahoy leipaw rae boi khyh. Tukeiccu sungsakunaw tuh Kawbya ccingnaw nynh thua. ¹¹ Te, accyh kha nybiate, atu tuh inaw kyate tho ccyh phe zaw vae; pawccecize aening ah zyn lya oh laeze khumnaw tuh atu nynh aening kalan anaeku hua. ¹² Khuazi tuh vyavya thang zah khuadae thua lan cih vae, tukeiccu aening nynh mohnaw ryalaw`ae kha vua ccavae oh sih lah awnaw rhawuccaw kha lawkuh ccavae oh sih. ¹³ Zu-ae hoysanaw, ruinaw, ohhuakurynaw, ccouseikunaw, ziakubuakunaw, te eiungkunaw, hynh-e`ae kya um leite, ninthu ccyh hawte aening nynh kou ngaekuh lante hiin oh sih. ¹⁴ Thuasalama Bawipaw Jesu Kri khate ccaankuh oh lah pynsaw ryduanaw ccingsah khylan pynsaw hanlan uapah nan oh.

¹ Zynnaw kya thawzyapaw ccungccaw kha lehkhan oh, thuasalama lunghiin lan um paw eikunaw kha raekhae nan oh. ² Pawccecize aepaw miakaw tuh ae lan accan cite lukheit nynh a zyn, thuasalama thawzyapaw nynh tuh enaw-ekan rou kha a ae. ³ Marya a ae paw nynh a ae leipaw kha dothatheih nan sah, te a ae leipaw nynh a ae paw kha byapia nan sah, pawccecize Pachia nynh kha-e paw kha lehkhan vae paw nynh thua. ⁴ Ming`ae seepaw kha byapiatupaw nang tuh hungmou na thua? Aning tuh a thadyn zemah amaw a bawipaw hanlan, a khuliaku zemah amaw a bawipaw hanlan khaw. Athua, aning tuh thadynsah athua cih, pawccecize Pachia nynh aning kha a thadynsah kho. ⁵ Ccungccaw lukheit nynh nin kheit tuh ccangpaw nin laeze asunghua cite a tua, mingccangpaw nynh nin miakaw tuh phe lokuh lante a tua. Ccungccaw miakaw nynh amaw thinlung kya phe ccaesakuh sah. ⁶ Ninsaw kha a sung paw ccungccaw tuh Bawipaw maedote nynh a sung, ninsaw kha a sung leipaw ccungccaw mah Bawipaw maedote nynh a sung khyh; a ae paw ccungccaw mah Bawipaw maedote nynh a ae, pawccecize Pachia kalan lungtuabya a ho; te a ae leipaw ccungccaw mah Bawipaw maedote ae khyh zah Pachia kalan lungtuabya a ho. ⁷ Pawccecize aening kyaze hung sanmah amaw hanlan kyalya a hiinpaw um khyh, hung sanmah amaw hanlan chih khyh. ⁸ Pawccecize aening tuh ah hiin oh zemah Bawipaw hanlan nynh ah hiin oh; ah chi oh zemah Bawipaw hanlan nynh ah chi oh; tukeiccu ah hiin oh zemah, ah chi oh zemah aening tuh Bawipaw kya-e nynh ah thua oh. ⁹ Pawccecize Kri tuh a chihpaw te a hiinpaw paryh Bawipaw lang a tang ccaw cite chih zah a thothui, te a hiin. ¹⁰ Thuasalama pawccemou nang nynh na uno kha bya na pia? Pawccemou na uno kha pawlangria leite na um? Pawccecize aening balyn tuh Kri a byapianaw tungkhung malang pung ah thadyn cih oh paw nynh thua. ¹¹ Pawccecize, “BAWIPAW nynh ka hiin thyhhawte ka malang ccungccaw miakaw ccukharutung cih`ae zah mimaw mih lae te Pachia kalan ccaekiakhan cih`ae a ci,” cite azeikuh. ¹² Tukeiccu aening luraveih tuh ahmaw cyisahnaw ccazing thyhte Pachia kalan ah thuakhae cih oh. ¹³ Tukeiccu aening lukheit te lukheit kharyh byapiakuh nan vae oh sih, thuasalama hynhte palia bya la pae oh; hung nynh sanmah a uno ccianaw kya thykupawkunaw, tukhyhze khuliasakunaw kha nungkhaw nan sah. ¹⁴ Pawpaw aepaw sanmah huataw tetuh thu khyh cipaw kae nynh Bawipaw Jesu liate ka zynkuh zah ka ny; thuasalama ccangkhakheit kha thyaa khyh cite a tua paw ccungccaw hanlan tuh kha-e kha a hanlan athu. ¹⁵ Thuasalama na uno tuh na aepaw keiccu a thinlungcci lanze nang tuh sungsakunaw thyhte na hiin khyh. Kri nynh a hanlan a chipya paw kha nang nynh na aepaw te la roh nan. ¹⁶ Ou tuhte nae kya-e ahoypaw kha athahpaw hawte thethya la hosah nan`ae. ¹⁷ Pawccecize Pachia peenaw tuh aepaw te niapaw kya um khyh, thuasalama Thyaa Muisaw kya dingnaw, daenaw te lungpawnaw kya nynh a um. ¹⁸ Pawccecize hynhcihte Kri rya a lah paw ccungccaw tuh Pachia malang douccah zah ccungccaw`ae nynh nawccawkhae`ae paw nynh thua. ¹⁹ Tukeiccu daenaw a thuasah paw te lukheit te lukheit thawzung lang tangsah paw uccaw`ae kha aening nynh deesui oh sih. ²⁰ Pachia ryalaw kha aepaw keiccuze roh nan. Aepaw balyn tuh athyaa ccaccing; thuasalama ming`ae khuliasaku nawlan te a ae paw ccungccaw hanlan tuh ahoy leipaw nynh thua. ²¹ Na uno a khuliasakuhpaw, a maeleihsakuhpaw, te a thawzyasahpaw athua zetuh, saw ae paw te misutui nia paw mah ae khyh ze, nia khyh ze, pawpaw san cyi khyh ze nynh ahoy. ²² Zynnaw na hoi tou? Na hoi ze Pachia malang namaw hanlan hoi. Amaw nynh a cyi paw kya amaw te amaw kha seibekuh khyh zah lungccingkhaekuhpaw ccungccaw tuh lungtua paw nynh thua. ²³ Thuasalama lunghiinnaw a hoi paw ccungccaw tuh a ae lanze, zynnaw leite a ae keiccu seibe athua; pawccecize zynnaw leite cyipaw miakaw tuh seinaw nynh thua.

¹ Oute thawsae`ae paw aening nynh thawzya`ae paw kya-e thawzyanaw kha ah ngaesang oh aho, ahmaw te ahmaw lungrythuasaku lanpaw thua khyh. ² Aening luraveih nynh ah innpawpaw hoynaw hanlan, tynsathung nawlan aning kha lungrythuasah oh sih. ³ Pawccecize Kri nynh heize amaw lungrythuasakuh khyh. Thuasalama, “Nang ae sarya`ae paw kya-e saryanaw bya`ae tuh kae ka tungvaw kya nynh accaw,” cite azeiku hawte nynh athua. ⁴ Pawccecize Ccathyaa kya a um paw ngaesangnaw te ngaengannaw liate aening nynh ngaehoinaw ah hoi nawlan oh langmaw lya-e azeikuh paw miakaw tuh aening thuiheinaw hanlan nynh zei athua. ⁵ Ngaesangnaw te ngaengansahnaw Pachia nynh Kri Jesu rynaw thyhte lukheit te lukheit lunglokunaw ae pya vae oh sah. ⁶ Ou tuhte nanning nynh ah Bawipaw Jesu Kri a Paaw athua paw Pachia ccaccei kha lunglokute pynkheihlan roisaw te phu na esah nawlan oh nynh thua. ⁷ Tukeiccu Kri nynh mah Pachia kya-e phu-enaw kalan aening kha leh oun khan hawte nanning mah lukheit te lukheit lehkhankuh oh. ⁸ Atu Jesu Kri tuh Pachia kya-e byaccing liate minpaaw`ae kalan pyapaw byakinpyakupaw`ae kha ccingsah khylan, vindung awkuh`ae paw kya-e ryalahtu nynh thua cite ka ho. ⁹ Te Zenta`ae nynh Pachia ngaethya-umsanaw hanlan Pachia kha phu-esah nawlan`ae nynh thua; tuh thyhhawte, “Hynh-e keiccu Zenta`ae laku nang kha kae thehoysah cih zah na min kya law ka sah cih,” cite azeiku hawte. ¹⁰ Te, “Zenta`ae nanning, amaw ccungccaw`ae ryte lungtua oh,” cite bua a ho. ¹¹ Te, “Zenta`ae, nanning balyn BAWIPAW kha thehoysah oh, nanning ccungccaw`ae balyn amaw kha thehoysah oh,” bua a cikuh. ¹² Te Isaiah nynh, “Jessi kya-e atharui yn pou cih zah Zenta`ae kha uk khylan yn langkuh cih paw, amaw kha Zenta`ae nynh a ngaehoikuh cih`ae,” bua a ci. ¹³ Atu nanning nynh Thyaa Muisaw thungnaw liate, ngaehoinaw kya phe na bia nawlan oh, ngaehoinaw Pachia nynh lungtuanaw te phe ae biasah oh sah lah zynnaw kya daenaw te ae la biasah oh sah. ¹⁴ Te ka uno`ae, nanning tuh hoynaw te phe na beih oh, nynaw balynte phe na beih oh zah lukheit te lukheit na thuiheikuh kho oh cipaw nanning konglang kae mah phe ka nyh ccaccing. ¹⁵ Tuhzemah uteno`ae Pachia nynh kae yn pya paw thawccinaw liate nanning kha tuasah thui khylan houh rawhoy te nae kalan ccaw kae zei paw tuh, ¹⁶ Thyaa Muisaw liate thyaasah athua paw, Zenta`ae kya-e silawkunaw tuh douccaw nawlan, kae tuh Pachia thehoypaw rya kha lawbiate, Zenta`ae hanlan Jesu Kri ryalahtu ka thua nawlan nynh thua. ¹⁷ Tukeiccu Pachia kalan te asekuhpaw uccaw`ae kya Kri Jesu liate kae ka pookunaw lanpaw a um. ¹⁸ Pawccecize Zenta`ae nynh bya te thuasah, cyisahnaw te thuasah kawngae nawlan`ae, Kri nynh muihsanaw te khuaruarunaw`ae kha kae ka kyate a cyi paw laelan, pawsang mah ka ho ngan khyh. ¹⁹ Pachia Muisaw thungnaw liate nynh kae tuh Jerusalem kyate tho zah Ilyrikam ram pepan kyacia Kri thehoypaw kha phe ccing lang ka ho. ²⁰ Ccangpaw ccungccaw nynh bing zah a thonaw tungvaw kae nynh ka sak khyh nawlan, Kri min a phy boi leinaw`ae hmin kya thehoypaw bya ho lan thawte ka zuakuh. ²¹ Thuasalama, “Amaw konglang a hopya lei`ae paw ccungccaw`ae nynh a muih cih`ae zah a thae lei`ae paw nynh a thaethya cih`ae,” cite azeiku hawte nynh thua. ²² Hynh keiccu nanning kalan ccia lanpaw yn khaw paw patae a um. ²³ Thuasalama atu tuh hynh-e hmin`ae kya ryalawnaw kaw ka hoi vae khyh zah nanning kalan ccia lan kou ka ry paw mah kum patae aro vae hawte, ²⁴ Spain ram lang khua he kae ccung vae ze nanning kalan kae cceih cih; pawccecize ka khuaccungnaw kya nanning kha kae muih cih oh. Te nanning ryte sosoh ah umkheih oh koute, nanning nynh tuh-e kalan bua nae saw cih oh cite ka ngaehoi. ²⁵ Thuasalama atu tuh mithyaa`ae ryalawpya khylan Jerusalem lang ka la cceih cih. ²⁶ Pawccecize Mesidonia ram e ccungccaw`ae te Akhai ram e ccungccaw`ae tuh Jerusalem kya um`ae paw mithyaa`ae laku ryachi`ae paw hanlan neethungbuanaw kha rae`ae zah mih lungrythuakhaekuh. ²⁷ Minmin tuh tuhte a cyi`ae paw kya mih lungrythua ccaccing, te minmin tuh Jew`ae kalan lae um`ae paw nynh thua`ae. Pawccecize Zenta`ae nynh Jew`ae kya-e muisaw uccaw`ae kha a ccoubua`ae ze pynsaw uccaw`ae kya mah Jew`ae hanlan a cyipya`ae aho. ²⁸ Tukeiccu hynh-e rya hynh he ka thangsah zah a hlu`ae paw kha he ka ccysya koute, nanning kalan te Spain ram lang kae cceih cih. ²⁹ Te nanning kalan he kae thua vae ze, Kri thehoypaw te asekuhpaw hythuanaw phe beihpaw ryte nynh kae thua cih cipaw ka ny. ³⁰ Atu uteno`ae ah Bawipaw Jesu Kri liate, Muisaw sungsanaw liate nanning nynh kamaw ryte pynkheihlan sawsangnaw kya na zuakuh oh zah kamaw hanlan Pachia kalan saw na sang nawlan oh kae ngia oh; ³¹ ou tuhte Judah pee kya-e kawngae lei`ae paw kyate kae ka lue nawlan, te Jerusalem khuapi hanlan ka hoi paw ka ryalaw kha mithyaa`ae nynh oun lawpyaku nawlan`ae nynh thua; ³² Pachia rynaw thyhte lungtuanaw ryte nanning kalan kae thua nawlan, te nanning ryte bua ka lungpaw nawlan sawsang oh. ³³ Daenaw Pachia tuh nanning balyn ryte atu la um sah. Amen.

¹ Kenkhrea khua kya a um paw kriccawbu kya-e ryalawpatu nung athua paw, kaening ccianung Fibi kha nanning kalan kae nynh kae sawpya oh. ² Pawtecize mithyaa`ae nynh cyi lan angaekuh hawte nanning nynh amaw kha Bawipaw kya leh la khan oh lah bawngnaw ahobounaw miakaw kya nanning kyate la bawng oh, pawccecize aning tuh ccungccaw patae bawngtu te kamaw mah yn bawngtu nynh thua. ³ Kri Jesu kya kamaw yn bawngtu`ae Prisilla te Akuila kha la beihlang oh. ⁴ Minmin tuh kamaw hiinnaw hanlan mimaw mih nging kha a pyakuh`ae paw nynh thua; minmin kalan kae kyalya nynh lungtuabya ka ho khyh, Zenta kriccawbu`ae balyn nynh mah lungtuabya ho`ae. ⁵ Mih inn kya um paw kriccawbu kha mah la beihlang oh. Akhai ram kyate Kri kalan masaty athae athua paw ka sungsahpaw Epainetan kha la beihlang oh. ⁶ Kaening tungvaw ryalaw myarya oun lawpah paw Meri kha la beihlang oh. ⁷ Kamaw ryte thungccah`ae paw kamaw vaeccaw`ae athua paw Andronikan te Junia kha la beihlang oh. Minmin tuh locceihtu`ae laku minthaan`ae paw nynh thua`ae, kamaw laeze Kri kya umty paw mah athua`ae. ⁸ Bawipaw kya ka sungsahpaw Ampliatan kha la beihlang oh. ⁹ Kaening ry Kri kya ryalahtu, Urbanan te ka sungsahpaw Stakhung kha la beihlang oh. ¹⁰ Kri kya nawccawkhaepaw Apelen kha la beihlang oh. Aristobulo innbyn`ae kha la beihlang oh. ¹¹ Ka vaeccaw athua paw Herodia kha la beihlang oh. Bawipaw kya um`ae paw Narkissu innbyn`ae kha la beihlang oh. ¹² Bawipaw kya a ryalah`ae paw Trufaena te Trufosa kha la beihlang oh. Bawipaw kya thawte ryalah paw, sungsahpaw Persida kha la beihlang oh. ¹³ Bawipaw kya popaw Rufas te a nung athua paw ka nung kha la beihlang oh. ¹⁴ Asukrito, Flegon, Herme, Patroba, Herme, te minmin ryte um`ae paw uteno`ae kha la beihlang oh. ¹⁵ Filoloko te Julia, Neria te a ccianung, te Olumpa te minmin ryte um`ae paw mithyaa`ae balyn kha la beihlang oh. ¹⁶ Athyaapaw myngkunaw te lukheit te lukheit la beihkuh oh. Kri kya-e kriccawbu`ae balyn nynh nanning kha ae beihlang oh. ¹⁷ Uteno`ae nanning nynh na ccangku vae oh paw doctrine te arawsekuh lante, bu phianaw te seimenaw a thuasah paw ccungccaw`ae kha na syntaw nawlan oh atu kae ngia oh; te minmin kha la sibia oh. ¹⁸ Pawccecize khahtahawpaw ccungccaw`ae tuh ah Bawipaw Jesu Kri rya kha lah khyh`ae, thuasalama mimaw vuebua hanlan nynh a law`ae; ahoypaw bya`ae te anepaw bya`ae khate ccungccahoy`ae thinlung kha a ling he`ae. ¹⁹ Pawccecize nae kawngaenaw tuh ccungccaw balyn kalan po athaan. Tukeiccu nanning hanlan ka lungtua, thuasalama nanning nynh ahoypaw kya nae lunghaw nawlan te ahoy leipaw kya seinaw hoi lei`ae paw na thua nawlan oh ka ry. ²⁰ Te daenaw Pachia nynh aro maw Setan kha nae ccu kaw yn miade cih. Ah Bawipaw Jesu Kri kya-e thawccinaw tuh nanning kya la um sah. Amen. ²¹ Kamaw ry rya kae lahkheihpaw Timote, te Lukia, te Jason te Sawsipater te ka vaeccaw`ae nynh nanning kha ae beihlang oh. ²² Hynh-e ccaky a zeitupaw kae, Terti nynh Bawipaw kya nanning kha kae beihlang oh. ²³ Kamaw thuasah, kriccawbu khaleih thuasah mikhia dooihtu Kaias nynh nanning kha ae beihlang oh. Khuapi suaccytu Erastas te nae uno Kuartas nynh ae beihlang oh. ²⁴ Ah Bawipaw Jesu Kri kya-e thawccinaw tuh nanning balyn kya la um sah. Amen. ²⁵ - ²⁶ Laephipi thotakaw te thuru athua paw, thuasalama atu langsaku athua vae paw, akhupaw kya-e byaphy thyhte, zungzae tynpaw Pachia kya-e kawpyapaw thyhte, profeh`ae kya-e Ccathyaa`ae liate, zynnaw te asekuhpaw kawngaenaw hanlan minphuin`ae balyn kha phe nysah athua vae thyhte Jesu Kri kong phunghonaw te kamaw nynh ka hopaw thehoypaw thyhte nanning kha ae tynsah kho oh paw, ²⁷ amaw makhae kyalya ahawpaw Pachia tuh Jesu Kri liate zungzae cia phu-esah. Amen.