Revelation

¹ Aro mawze yn cikuh hahe cih paw uccaw`ae kha a see`ae kalan langsapya khylan, Pachia nynh Jesu kalan a pya paw, Jesu Kri kya-e Byaphy. Te kha-e byaphy kha a vaaw ccungccapaw liate a seepaw Johan kalan Jesu nynh ky zah a nysah. ² Johan nynh Pachia bya te Jesu Kri kya-e ccaekia te a muih paw balyn kha ccaekiakhan. ³ Hynh-e profehbya`ae kha a ria paw, te a thae`ae paw, te kha-e kya azeikuh paw uccaw`ae kha a zui`ae paw tuh hythuaccou`ae paw nynh thua`ae; pawccecize accyh tuh anae vae. ⁴ Kae, Johan nynh Asia ram kya um paw kriccawbu busari kha kae beihlang oh. Atu lya a um paw, langmaw a la um vae paw te bua yn thua cih paw amaw kyate thuasah, a suitungkhung malang a um`ae paw Muisaw`ae ccangsari kyate thuasah, ⁵ te zyn lan um paw ccaekia a thua paw, a chih`ae paw kyate masaty saah paw te laephi siapharan`ae uktu bawi athua paw Jesu Kri kyate thuasah, thawccinaw te daenaw tuh nanning tungvaw la um sah. Aening kha yn sungsah zah amaw a chii kya aening seinaw`ae yn singpah paw, ⁶ te a Paaw te Pachia kalan aening kha siapharan`ae lang te ranpibawi`ae lang yn rae paw, amaw tungvaw phu-enaw te uknawkaw tuh zungzae te zungzae cia la um sah. Amen. ⁷ Dotua oh, Jesu tuh maeking`ae ryte nynh yn thua. Te mit miakaw nynh amaw kha a muih cih`ae, te amaw kha po a thuin`ae paw nynh hei amaw kha a muih cih`ae. Te laephi kya-e minphuin`ae balyn tuh amaw keiccuze a rah-a khui cih`ae. Ou tuhmawte nynh thua, Amen. ⁸ “Kae tuh Alfa te Omega, Athonaw te Athangnaw, atu lya a um paw, langmaw a la um vae paw te bua yn thua cih paw, Athung Huaccepaw nynh ka thua,” cite Bawipaw nynh a ci. ⁹ Jesu Kri kya-e vawsawrunaw kya, peenaw kya te ngaesangnaw kya nanning ry a mungkuh bua paw, nae upaw mah ka thua paw kae, Johan tuh Pachia bya keiccu te Jesu Kri kya-e ccaekia keiccuze Patmos cikuh paw tuikoih kyakhe ka um. ¹⁰ Bawipaw Nin kya kae tuh Muisaw kya ka um zah kamaw nuhlang khe mungkae roi hawte, myarya accaepaw roi kha ka thae. ¹¹ Tuh-e roi nynh, “Kae tuh Alfa te Omega, Masaty te Nyathyakou nynh ka thua,” te, “Nang nynh na muih cih paw kha ccauh kyakhe zei lah Asia ram kya a um paw kriccawbu busari kalan ky`ae, Efesa khua lang, Smyrna khua lang, Perkamos khua lang, Thiatira khua lang, Sardis khua lang, Filadefia khua lang te Laodisia khua langkhe ky`ae,” a ci. ¹² Te kamaw ryte bya ho paw roi kha muih khylan ka maeleihkuh. Te he ka maeleihkuh tuh, sui maeekhua awnawpaw ccangsari, ¹³ te maeekhua awnawpaw ccangsari angaelung khe Ccungccaw Ccapaw alopaw lukheit kha ka muih. Tuh-e paw tuh a ccu phe thua lang cia uccaw kha zingkuh zah a by kyakhe sui taeccia te a cciakuh. ¹⁴ A lu te a sang tuh tuuming hawte, vuiraw hawkhate araw. Te a mit tuh maeesoi hawte nynh thua. ¹⁵ Te a ccu tuh maeesopi kya phe a phung vae`ae paw accipaw sohin nynh alo. Te a roi tuh tuiphua patae roiccaepaw nynh alo. ¹⁶ Te a ranglang kuih kya awsi ccangsari a ccyng; te a khalang lungkhu te hawning te ahepaw thaloi a pou; te a maesue tuh amaw thawzung kya phaephae ahpaw khuanin hawte nynh thua. ¹⁷ Amaw kha he ka muih tuh, a ccu leihpaw khe achihpaw hawte ka khuliakuh. Te a ranglang kuih kha ka tungvaw khe khang zah kamaw kha, “Rih nan, kae tuh Masaty te Nyathyakou nynh ka thua. ¹⁸ Kae tuh ka la chih zah bua a hiinpaw nynh ka thua; te dotua, kae tuh zungzae cia po a hiinpaw nynh ka thua. Amen. Te Hades toh te Chinaw toh kha ka hoi. ¹⁹ Na muih vae paw uccaw`ae, atu lya a um paw uccaw`ae, te atu koute yn cyikuh vae cih paw uccaw`ae kha zei. ²⁰ Ka ranglang kuih kya na muih paw awsi ccangsari kya-e byakhupaw te sui maeekhua awnawpaw ccangsari tuh: awsi ccangsari`ae tuh kriccawbu busari kya-e vaaw ccungccaw`ae nynh thua; te na muih paw maeekhua awnawpaw ccangsari`ae tuh kriccawbu busari kha nynh thua.

¹ “Efesa kriccawbu kya-e vaaw ccungccapaw kalan hynhte zei, ‘A ranglang kuih kya awsi ccangsari a ccyngtupaw, sui maeekhua awnawpaw ccangsari angaelung kya a cceihtupaw nynh hynh-e`ae hynh a ho. ² “Na ryalaw`ae, thawte rya na law paw te na ngaesangnaw`ae, te ccungccahoy lei`ae kha na ngaesang kho khyh cipaw kha ka ny. Te locceihtu`ae nynh kae thua ci`ae zemah akaw-aleih bya na khia`ae zah athua lei`ae paw, mihyng`ae nynh thua`ae cipaw phe na muih paw kha thuasah; ³ taemya phang na sawkuh zah ngaesangnaw na hoi paw te ka min keiccuze thawte rya na lah zah na lungthawthang khyh paw kha thuasah ka ny. ⁴ Tuhzemah nang rawsete ho lanpaw ka hoi, pawkeiccumacize na kya-e masaty sungsanaw kha nang nynh phe na cciataw vae. ⁵ Tukeiccu paw kyate nynh ka khuliaku cipaw kha liathui lah ngaesikuh, te masaty-e ryalaw`ae kha lah. Tukhyh lanze na kalan arangte kae thua cih zah na ngaesikuh khyh ze, na maeekhua awnawpaw kha a umnaw kyate phe kae nuepah cih. ⁶ Thuasalama kae nynh mah ka hua paw, Nikolaitan`ae cyisahnaw`ae kha nang nynh na hua cite ho lanpaw na hoi. ⁷ Kriccawbu`ae kalan Muisaw nynh a ho paw kha nakaring a hoi paw ccungccaw tuh thae sah. A taetupaw kha Pachia kya-e Paradis angaelung kya um paw hiinnaw thingku thae ae lan kaw ka pya cih.” ’ ⁸ “Smyrna khua kya um paw kriccawbu kya-e vaaw ccungccapaw kalan hynhte zei, ‘Chih zah bua a hiinpaw, Masaty te Nyathyakou athua paw nynh hynhe` ae hynh a ho. ⁹ “Na ryalaw`ae, na vawsawnaw, te na ryachinaw kha ka ny. Thuasalama nang tuh a hoirungpaw nynh na thua. Te Jew`ae nynh kae thua cite ho`ae zah athua lei`ae paw, thuasalama Setan kya-e sinakok athua`ae paw nynh alue lante byaho`ae paw kha mah ka ny. ¹⁰ Na teing vae cih paw uccaw`ae ccangkheit sanmah rih nan. Dotua, nanning tuh syntawnaw teing khylan, diabolos nynh nanning kyaze abang kha thunginn lungkhu lang a sang cih`ae, te nin haw lungkhu vawsawnaw na tung cih oh. Chinaw kyacia nang tuh zyn lan um paw la thua, te hiinnaw suilukhung kha nang kae pya cih. ¹¹ Kriccawbu`ae kalan Muisaw nynh a ho paw kha nakaring a hoi paw ccungccaw tuh thae sah. A taetupaw tuh vaeningnaw chinaw kha teing vae lan khyh.” ’ ¹² “Te Perkamos khua kya um paw kriccawbu kya-e vaaw ccungccapaw kalan hynhte zei, ‘Voining te ahepaw thaloi a hoi paw nynh hynh-e`ae hynh a ho. ¹³ “Na ryalaw`ae te na umnaw kha ka ny, tuh-e kya nynh Setan suitungkhung tuh a um. Te kamaw min kha tynkaring lang na kynku cipaw, te Setan a umnaw, nanning laku kya chia athuapaw, zyn lan um paw kamaw martyr, Antipas nin ccyh lyakhe nang nynh kamaw zynnaw kha na ei khyh cipaw ka ny. ¹⁴ Thuasalama nang rawsete ho lanpaw ccapyh ka hoi. Pawkeiccumacize Israel ccungccaw`ae malang thykupawkunaw nungkhaw khylan, zohtuh`ae kalan silawnawpaw uccaw`ae ae khylan, te ohhuakunaw raesah khylan Balak a ccangpah paw Balaam ccangpyanaw a ccyngkuh`ae paw kha khe kya na hoi`ae, ¹⁵ tukeiccu kae nynh ka hua paw uccaw, Nikolaitan`ae ccangpyanaw a kyngkuh`ae paw kha mah na hoi`ae. ¹⁶ Ngaesikuh, tukhyh lanze na kalan arangte kae thua cih zah ka khalang kya-e thaloi khate minmin kha rhaw ka tuk cih`ae. ¹⁷ Kriccawbu`ae kalan Muisaw nynh a ho paw hynh nakaring a hoi paw ccungccaw tuh thae sah. A taetupaw kha thurupaw manna ae lan kaw ka pya cih, te amaw kha arawpaw lung ka pya cih. Te kha-e lung kya athawpaw min azeikuh, kha-e min kha kha-e lung a mue paw laelan hung nynh san nyh khyh.” ’ ¹⁸ “Te Thiatira khua kya um paw kriccawbu kya-e vaaw ccungccapaw kalan hynhte zei, ‘Maeesoi alopaw mit a hoitupaw, accipaw sohin alopaw ccu a hoitupaw, Pachia Ccapaw nynh hynh-e`ae hynh a ho. ¹⁹ “Na ryalaw`ae, na sungsanaw, na ryalawpyapaw, na zynnaw, te na ngaesangnaw, te na cyisahnaw`ae kha ka ny. Te nyathyakou e na cyisahnaw`ae tuh masaty e lae alung cipaw ka ny. ²⁰ Tuhzemah nang rawsete ho lanpaw ccapyh ka hoi. Pawccemacize ka rya yn lawpatu`ae kha ohhuakunaw raesah khylan, zohtuh`ae kalan silawnawpaw kha ae sah khylan, ccangpya lan te soih lan, amaw te amaw kha profehnung a cikuh nung, kha-e nopinung Jezebel kha nang nynh kaw na ua. ²¹ Te a ohhuakunaw konglang te ngaesiku khylan ccyh hohse ka pya zemah aning tuh ngaesikuh khyh. ²² Dotua, amaw kha ccinaw ikhung kalan dae ka vua cih, te amaw ryte a tuaseikuh`ae paw kha mih cyisahnaw`ae a ngaesiku khyh`ae lanze, alepipaw vawsawrunaw lungkhu lang ka vua cih`ae. ²³ Te a ccaaw`ae kha chinaw te ka theih cih`ae; te kae tuh tuanaw-thinlung te thinlung`ae a zaahtu nynh ka thua cipaw kha kriccawbu`ae balyn nynh oun nyh cih`ae; te nanning milu raveih kha nae ryalaw`ae thyhte kae pya cih oh. ²⁴ Thuasalama nanning kalan te Thiatira khua kya um paw tuhlaepaw`ae kalan kae hopya oh, minmin nynh a ho`ae hawte, Setan kya-e akhupaw uccaw kha a nyh lei`ae paw, hynh-e doctrine a hoi lei`ae paw ccungccaw patae, nae tungvaw ccangpaw phupaw ka khang vae lan khyh. ²⁵ Thuasalama na hoi oh paw kha kae kae thua cia varyn kyngkuh oh. ²⁶ Te a taetupaw te ka ryalaw`ae kha athangnaw cia a ccykekuh paw tuh minphuin`ae tungvaw kawhoinaw kha ka pya cih, ²⁷ ‘Aning nynh minmin kha sivaw tungbang khate a uk cih`ae; angvohtupaw kya-e ang`ae hawkhate minmin tuh palae tui lang a koi cih`ae.’ Kae nynh ka Paaw kyate ka mue hawte, kawhoinaw kha ka pya cih. ²⁸ Te amaw kha nizy-awsi ka pya cih. ²⁹ Kriccawbu`ae kalan Muisaw nynh a ho paw kha nakaring a hoi paw ccungccaw tuh thae sah.” ’

¹ “Sardis khua kya um paw kriccawbu kya-e vaaw ccungccapaw kalan hynhte zei, ‘Pachia kya-e Muisaw`ae ccangsari te awsi ccangsari a hoitupaw nynh hynh-e`ae hynh a ho, “Na ryalaw`ae kha ka ny. Nang tuh na hiin cite min na hoi, zemah na chih cipaw ka ny. ² Ahoyte ngawdo. Te chi lan a cih vae paw, a um ung paw uccaw`ae kha thawzungpya`ae; pawccecize Pachia malang na ryalaw`ae tuh accing cite ka muih khyh. ³ Tukeiccu pawcihtemou na mue zah na thae cipaw kha liathui lah varyn kyngkuh, te ngaesikuh. Tukeiccu ngaw na do khyh lanze, miruh hawte na kalan kae thua cih zah hotuh ccyh nynh na kya kae thua cih cipaw na nyh lan khyh. ⁴ Sardis khua ccaccei kyakhe mih uccaw`ae a nungsisakuh lei`ae paw ccungccaw min ccapyh na hoi`ae. Minmin tuh angaekuhpaw athua`ae keiccuze, arawpaw uccaw lawkute kamaw ryte a cceihbua cih`ae. ⁵ A taetupaw tuh arawpaw uccaw kha lawsaku athua cih. Te hiinnaw ccauh kyate amaw min kha ka the vae lan khyh. Thuasalama ka Paaw malang te a vaaw ccungccaw`ae malang amaw min kha ccaekia ka khan cih. ⁶ Kriccawbu`ae kalan Muisaw nynh a ho paw kha nakaring a hoi paw ccungccaw tuh thae sah.” ’ ⁷ “Filadefia khua kya um paw kriccawbu kya-e vaaw ccungccapaw kalan hynhte zei, ‘Athyaapaw, ahmepaw, “David kya-e toh a hoitupaw, hung ccungccaw nynh san a khaw kho lei lan a hungtupaw, te hung ccungccaw nynh san hung kho lei lan a khawtupaw nynh hynh-e`ae hynh a ho.” ⁸ “Na ryalaw`ae kha ka ny. Dotua, hung ccungccaw nynh san a khaw kho leipaw, ahungkuhpaw thuakaw kha na malang phe ka nung vae. Pawccecize nang tuh thawzung ccapyh nynh na hoi, te ka bya kha na ccykekuh zah ka min kha na vua khyh. ⁹ Dotua, Jew`ae nynh kae thua ci`ae zah athua lei`ae paw, thuasalama a hyng`ae paw kha Setan kyae sinakok lang ka rae cih`ae. Dotua, na ccu malang beik sah khylan, te nang kha kae sungsah cipaw nysah khylan minmin kha na kalan kae thuasah cih`ae. ¹⁰ Ka kawpyapaw kha po tynsah lan nang nynh na ccykeku keiccuze, laephi vawlan a um`ae paw kha syntaw khylan, laephipi balyn kya yn thua vae cih paw tuhounaw suimilan ccyh kyate nang kha kae nynh mah kae khynsah cih. ¹¹ Dotua, arangte kae thua vae cih. Hung ccungccaw nynh san na suilukhung kha a lawku khyh nawlan, na hoi vae paw kha varyn kyngkuh. ¹² A taetupaw kha ka Pachia kya-e tempal kya rungpi lang ka rae cih. Te aning tuh atolang kharyh pou vae lan khyh. Te ka Pachia min te ka Pachia kya-e khuapi min kha amaw tungvaw khe ka zei cih; tuh-e khuapi tuh ka Pachia kyate vaawran langte yn rungbung paw, Jerusalem Thawpaw nynh thua; te athawpaw ka min kha mah amaw tungvaw khe ka zei cih. ¹³ Kriccawbu`ae kalan Muisaw nynh a hopaw kha nakaring a hoi paw ccungccaw tuh thae sah.” ’ ¹⁴ “Laodisia khua kya um paw kriccawbu kya-e vaaw ccungccapaw kalan hynhte zei, ‘Pachia kya-e raenaw Athonaw athuapaw, Zyn lan um paw te Ahmepaw Ccaekia, Amen nynh hynh-e`ae hynh a ho, ¹⁵ “Na ryalaw`ae kha ka ny. Nang tuh kyaa mah na kyaa khyh, so mah na so khyh cipaw ka ny. Nang tuh na kyaa ze kyaa, tukhyhze na so ze so ci ka ry. ¹⁶ Ou tuhte nang tuh kyaa mah kyaa lei, so mah so lei, lalungpaw na thua keiccuze ka khalang kyate nang kha kae thoi vae cih. ¹⁷ Nang nynh, ‘Kae tuh ka hoirung zah uccaw`ae ryte ka kaethung, te pawsang mah ka ho ka bou vae khyh,’ na ci keiccuze nang tuh myarya a riathaepaw, thawcci lan um paw, a ryachipaw, a mitmohpaw, te ccakaete a um paw na thua paw kha na nyku khyh keiccu; ¹⁸ nang kha hynhte tuanaw kae pya: nang tuh na hoirung ccaw, maee kya phe thyaasah vae paw sui kha kamaw kya-e rekuh, na ccakaete na um paw maethyanaw kha a langku khyh nawlan uccaw na lawku ccaw, arawpaw uccaw kha kamaw kya-e rekuh; te ngaw na muih nawlan na mit kha mitccisi na thuhku ccaw, kamaw kya-e rekuh. ¹⁹ Ka sungsahpaw miakaw kha ka pe`ae zah ka thuihei`ae. Tukeiccu na lungthosah lah ngaesikuh. ²⁰ Dotua, kae tuh thuakawzung khe ka thadyn zah ka khua. Ccungccaw lukhakheit nynh ka roi thae zah thuakaw yn hungpya ze, kha-e paw kalan ka tee cih zah amaw ryte ka ae cih, te aning mah kamaw ryte a ae cih. ²¹ Kae tuh ka tae zah ka Paaw suitungkhung vawlan ka Paaw ryte kae dahung hawte, a taetupaw kha ka suitungkhung vawlan kamaw ryte dahung lan kaw ka pya cih. ²² Kriccawbu`ae kalan Muisaw nynh a ho paw kha nakaring a hoi paw ccungccaw tuh thaesah,” ’ ” yn cipya.

¹ Hynh-e koute ka do zah vaawran kya thuakaw ahungkuhpaw kha ka muih. Te masaty roi ka thae paw tuh kamaw ryte bya ho paw mungkae roi hawkhate nynh thua; tuh-e roi nynh, “Hynhlang yn kaethung, lah hynh-e koute yn cyikuh hahe cih paw uccaw`ae kha nang kae muihsah cih,” yn cipya. ² Te vaekheihmawte kae tuh Muisaw kyakhe ka um. Te dotua, vaawran kya suitungkhung ccangkheit nung athua. Te suitungkhung vawlan a dahung paw a um. ³ Te tuinkya a dahung paw tuh do lanze jasper lung te sardias lung hawte nynh alangku. Te suitungkhung po voilu lang muihnaw kya emerald lung hawte athua paw sawdoihpaw a um. ⁴ Tuh-e suitungkhung po voilu lang ccangpaw suitungkhung`ae ccangkuin laepali a um. Tuh-e suitungkhung`ae vawlan piccang`ae lukuin laepali tuh arawpaw uccaw`ae kha lawkute a dahung`ae paw kha ka muih. Minmin tuh mih lu kya suilukhung`ae a khungkuh`ae. ⁵ Suitungkhung kyate khozawlaepaw, riakawpaw te roiccaepaw`ae a pou; te suitungkhung malang Pachia kya-e Muisaw`ae ccangsari athua paw, maeekhua ccangsari a awkuh paw a um. ⁶ Te suitungkhung malang khe lung-awmito te alokuhpaw muinsado rili a um. Te suitungkhung angaelung kya te suitungkhung a pepan kyakhe, a malang te a nuhlang mit`ae te phe beihpaw ahiinpaw rangsaw`ae sapali a um. ⁷ Te masaty a hiinpaw rangsaw tuh chindeih te nynh aloku. Ccanningnaw ahiinpaw rangsaw tuh vaetuataw te nynh aloku. Ccanthungnaw ahiinpaw rangsaw tuh ccungccaw hawte mitmae a hoi. Ccanpalinaw ahiinpaw rangsaw tuh azoupaw mosipi te nynh aloku. ⁸ Te tuh-e ahiinpaw rangsaw`ae sapali tuh sake ketaruh cci a hoi`ae. Atolang te alungkhu lang tuh mit te phe beih`ae. Te minmin nynh, “Langmaw a la um vae paw, te atu a um paw, te yn thua lanpaw, Athung Huaccepaw Bawipaw Pachia tuh athyaa, athyaa, athyaa!” cite khuazi khuadae hae-ung leite a ho`ae. ⁹ Te suitungkhung vawlan a dahung paw, zungzae te zungzae cia a hiinpaw kalan khe kha-e ahiinpaw rangsaw`ae nynh phu-enaw te sawtuanaw kha pya`ae zah lungtuabya he a ho`ae tuh, ¹⁰ suitungkhung vawlan a dahung paw malang khe piccang`ae lukuin laepali tuh bakhung`ae zah zungzae te zungzae cia a hiinpaw kha a beik`ae, te suitungkhung malang khe mih suilukhung`ae kha nungsya`ae zah, ¹¹ “Pou Bawipaw, phuenaw te sawtuanaw te thungnaw kha mue lan nang tuh na ngaekuh; pawccecize pawpaw balyn tuh nang nynh phe na rae vae, te na rynaw liate kha-e`ae tuh rae thua`ae zah a um`ae,” a ci`ae.

¹ Te alungkhu lang te anuhlang ccawzeikuh zah tazeih ccangsari te khia athuapaw ccaleih ccangkheit kha suitungkhung vawlan a dahung paw a ranglang kuih kyakhe ka muih. ² Te a thawsaepaw vaaw ccungccapaw nynh, “Kha-e ccaleih kia lan te tazeih`ae kha phou lan hungmou a ngaekuh?” cite thawte khua-o paw kha ka muih. ³ Te vaawran kya, laephi kya, laephi kaw kya kha-e ccaleih a kia kho lanpaw te kha-e a do kho lanpaw hung ccungccaw sanmah um khyh. ⁴ Te kha-e ccaleih kia lan, te ria lan, te kha-e do lan angaekuhpaw hung sanmah muih lan a um khyh keiccuze kae tuh thawte ka rah. ⁵ Te piccang`ae kyaze lukheitpaw nynh, “Rah nan, dotua Judah phin kya-e Chindeih, David Tharuipi nynh ccaleih kha kia lan te kha-e kya-e tazeih ccangsari phou lan phe a tae vae,” cite kamaw kha yn hopya. ⁶ Te kae nynh ka do zah suitungkhung te ahiinpaw rangsaw`ae sapali angaelung kya te piccang`ae angaelung kyakhe phe a chia vae`ae paw hawte athua paw, Tuutaw a thadyn paw kha ka muih. Tuh-e Tuutaw tuh laephi balyn kalan saw paw Pachia kya-e Muisaw ccangsari athua paw, ki kisari te mit ccangsari a hoi. ⁷ Te aning nynh yn thua zah suitungkhung vawlan a dahung paw a ranglang kuih kyate ccaleih kha a law. ⁸ Te aning nynh ccaleih kha he a laah tuh ahiinpaw rangsaw`ae sapali te piccang`ae kuin laepali nynh Tuutaw malang khe a bakhung`ae, minmin lu raveih tuh tintang te mithyaa`ae sawsangnaw athua paw mynkhuhpaw te phe beihpaw sui pakekhupaw`ae kha a hoi`ae. ⁹ Te minmin nynh, “Ccaleih kha law lan te kha-e kya-e tazeih`ae kha kia lan nang tuh na ngaekuh, pawccecize nang tuh chia na la thua zah phin miakaw, bya miakaw, ccungccaw miakaw, te minphuin miakaw kyate kaening hynh na chiise liate Pachia hanlan nae sawkhaw. ¹⁰ “Te kae Pachia hanlan kaening kha siapharan`ae lang te ranpibawi`ae lang phe nae rae vae zah kaening tuh laephi vawlan kae uk vae cih,” cite athawpaw law kha a sah`ae. ¹¹ Te ka do zah suitungkhung te ahiinpaw rangsaw`ae te piccang`ae pepan khe vaaw ccungccaw`ae patae roi kha ka thae. Tuh-e vaaw ccungccaw`ae milu tuh thung haw leih thung haw, te athung asang`ae kya-e athung asang`ae zeih acih`ae. ¹² Minmin nynh, “Chia athua vae paw Tuutaw tuh thungnaw, hoirungnaw, hawnaw, thawzung, sawtuanaw, phu-enaw te hythuanaw kha ccou lan a ngaekuh!” cite roi accae lante a ho`ae. ¹³ Te vaawran kya, laephi vawlan, laephi kaw um paw rae paw miakaw te rili kya um`ae paw te kha-e`ae kya um`ae paw balyn nynh, “Hythuanaw, te sawtuanaw te phuenaw te thungnaw tuh suitungkhung vawlan a dahung paw kya te Tuutaw kya zungzae te zungzae cia um sah!” a ci`ae paw kha ka thae. ¹⁴ Te ahiinpaw rangsaw`ae sapali nynh, “Amen!” a ci`ae. Te piccang`ae lukuin laepali nynh bakhung`ae zah zungzae te zungzae cia a hiinpaw kha a beik`ae.

¹ Tazeih`ae kyaze ccangkheit kha Tuutaw nynh he a kia tuh kae nynh ka muih, te riakawpaw roi hawte ahiinpaw rangsaw`ae sapali kyaze sakheit nynh, “Rang lah yn do,” a cipaw roi kha ka thae. ² Te ka do zah marang arawpaw sakheit ka muih. Kha-e marang vawlan a ccikuh paw nynh li kha a ccyngku. Te amaw kha suilukhung a pya`ae. Te aning tuh rhaw tae laliate, te rhaw tae lan po a cceih. ³ Te aning nynh vaeningnaw tazeih kha he a kia tuh, vaeningnaw ahiinpaw rangsaw nynh, “Rang lah yn do,” a cipaw kha ka thae. ⁴ Te ccangpaw marang sekakingpaw po a pou. Te laephi kyate daenaw kha a law ccaw cite, ccungccaw`ae nynh lukheit te lukheit a chiaku ccaw`ae cite, kha-e vawlan a ccikuh paw kha kawpya athua; te alepipaw thaloi kha mah pya athua. ⁵ Te ccangthungnaw tazeih kha he a kia tuh ccangthungnaw ahiinpaw rangsaw nynh, “Rang lah yn do,” a cipaw kha ka thae. Ka do zah marang amanpaw sakheit ka muih. Te kha-e vawlan a ccikuh paw nynh a kuih kyakhe zawccu kha a ccyngku. ⁶ Te ahiinpaw rangsaw`ae sapali angaelung kyate, “Denari kiakheit mee lang chanvui khoinik kawkheit te denari kiakheit mee lang barli khoinik kawthung a muekuh, te chitui te misutui kha rosah nan,” a cipaw roi kha ka thae. ⁷ Te ccangpalinaw tazeih kha he a kia tuh ccangpalinaw ahiinpaw rangsaw nynh, “Rang lah yn do,” a cipaw roi kha ka thae. ⁸ Te ka do zah marang apuapaw sakheit ka muih. Kha-e a ccikuh paw a min tuh Chinaw cikuh zah Hades nynh amaw kha a zui. Te laephi pumpali pumkheit vawlan thaloi te chia khylan, vuelawnaw te chia khylan, chinaw te chia khylan, te laephi kya-e sarepaw`ae te chia khylan minmin kha kawhoinaw a pya`ae. ⁹ Ccangpangawnaw tazeih kha he a kia tuh Pachia bya keiccuze, te mimaw ccaekia keiccuze a chia`ae paw mih hiinnawmuisaw` ae kha silawhang kaw khe ka muih. ¹⁰ Te minmin nynh, “Thyaa zah ahmepaw, pou Bawipaw, laephi vawlan a um`ae paw tungvaw kaening chii mee lang hohse cia mou byapiapya leite, ccaeliarupya leite na um cih?” cite thawte a sia`ae. ¹¹ Minmin lu raveih tuh arawpaw angkiccua kha pya athua`ae. Mimaw hawte chia athuabua vae cih`ae paw, mimaw ryte ryalahkheih`ae paw te mih uno`ae milu tuh accing makhia, minmin tuh ccyh sosoh a haeung cih`ae cite minmin kha a hopya`ae. ¹² Ccangtaruhnaw tazeih kha he a kia tuh ka do zah alepipaw innruisuekuh paw a um. Te khuanin tuh saming te kua paw buri uccaw hawte phe amang, te sawpaw tuh chii hawte nynh thua. ¹³ Te thaeku ku tuh arupaw khisang nynh he a mung vae ze, accyh zaw leipaw thaeku`ae kha a khuaku hawte vaawran e awsi`ae tuh laephi kalan a ccah`ae. ¹⁴ Te ccaleih kha he kue vae ze a sungku hawte, vaawran tuh po a sungkuh. Mua miakaw te tuikoih miakaw tuh mimaw ungnaw kyate phe a nuekuh`ae. ¹⁵ Te laephi siapharan`ae, minthaanpaw ccungccaw`ae, a hoirungpaw ccungccaw`ae, rhawbawi`ae, alesaepaw ccungccaw`ae, te see miakaw, a luepaw ccungccaw miakaw tuh laekarung`ae kya te mua-e lung`ae kyakhe a rekuh`ae. ¹⁶ Te minmin nynh mua`ae te lung`ae kha, “Kaening tungvaw yn ccawthin oh lah suitungkhung vawlan a dahung paw mitmae kyate, te Tuutaw thinrianaw kyate kaening hynh yn khaw oh! ¹⁷ Pawccecize a thinrianaw kya-e alesaepaw nin tuh yn thua vae, te hungmou a thadyn khopaw a um cih?” a cipya`ae.

¹ Hynh-e uccaw`ae koute laephi ki kipali kya a thadyn`ae paw vaaw ccungccaw`ae lupali kha ka muih. Khisang nynh laephi vawlan, rili vawlan, te thingku kha a mung khyh nawlan laephi kya-e khisang`ae sangpali kha phang a kyng`ae. ² Te a hiinpaw Pachia kya-e tazeih a hoi paw, nithua langte yn kaethung paw, ccangpaw vaaw ccungccapaw kha ka muih. Te kha-e paw nynh laephi te rili kha vawsaw pya khylan kaw a mue`ae paw vaaw ccungccaw`ae lupali kalan khe thawte sia zah, ³ “Ah Pachia see`ae kha mih terui kya tazeih phe ah khia mawlaezung oh, laephi thuasah, rili thuasah, thingku`ae kha thuasah vawsaw pya nan oh,” a cipya`ae. ⁴ Tazeihkhia athua`ae paw mih milu kha ka thae. Israel ccungccaw`ae kyaze phin balyn kyate thung zakheit sungpali thungpali kha tazeihkhia athua`ae. ⁵ Judah phin kyate thung haw laening kha tazeihkhia`ae. Reuben phin kyate thung haw laening kha tazeihkhia`ae. Gad phin kyate thung haw laening kha tazeihkhia`ae. ⁶ Asher phin kyate thung haw laening kha tazeihkhia`ae. Naftali phin kyate thung haw laening kha tazeihkhia`ae. Manasseh phin kyate thung haw laening kha tazeihkhia`ae. ⁷ Simeon phin kyate thung haw laening kha tazeihkhia`ae. Levi phin kyate thung haw laening kha tazeihkhia`ae. Issachar phin kyate thung haw laening kha tazeihkhia`ae. ⁸ Zebulun phin kyate thung haw laening kha tazeihkhia`ae. Josef phin kyate thung haw laening kha tazeihkhia`ae. Benjamin phin kyate thung haw laening kha tazeihkhia`ae. ⁹ Hynh-e koute ka do zah minphuin`ae balyn kya-e phin`ae, ccungccaw`ae te bya`ae hung ccungccaw nynh sanmah a ria kho leipaw ccungccaw zapi pi tuh suitungkhung malang te Tuutaw malang khe a thadyn`ae. Minmin tuh arawpaw angkiccua kha lawkuh`ae zah mih kuih kya saruitah ange`ae kha ccyngbiate, ¹⁰ “Suitungkhung vawlan a dahung paw ah Pachia kya te Tuutaw kya nynh khumnaw tuh a um!” cite roi accae lante thawte a sia`ae. ¹¹ Te suitungkhung pepan, te piccang`ae te ahiinpaw rangsaw`ae sapali pepan khe vaaw ccungccaw`ae balyn tuh thadyn`ae zah suitungkhung malang khe bakhung`ae zah Pachia kha a beik`ae. ¹² Te, “Amen! Hythuanaw te phu-enaw, hawnaw te lungtuabya honaw, sawtuanaw te thungnaw, te thawsaenaw tuh ah Pachia kya zungzae te zungzae cia um sah. Amen,” a ci`ae. ¹³ Te piccang`ae kyaze lukheitpaw nynh tho zah, “Arawpaw angkiccuapaw a lawkuh`ae paw hynh-e`ae hynh hung`ae mou? Te teitemou minmin tuh oun thua`ae?” cite kamaw kha yn khia. ¹⁴ Te kae nynh, “Bawihaepaw, nang nynh na nyh,” ka cipya. Te aning nynh kamaw kha, “Hynhe` ae tuh alepipaw vawsawrunaw kyate oun pou`ae paw, te mih angkiccuapaw kha Tuutaw chii kya sukuh`ae zah kha-e kha a rawsah`ae paw nynh thua`ae. ¹⁵ Tukeiccu minmin tuh Pachia kya-e suitungkhung malang khe um`ae zah amaw kha a tempal kya khuazi khuadae ryalawpya`ae; te suitungkhung vawlan a dahung paw tuh minmin laku khe a um cih. ¹⁶ “Minmin tuh mih vuelaw boi vae lan khyh, mih tui mah haw boi vae lan khyh; khuanin nynh minmin kha u vae lan khyh`ae, maeeso nynh mah u vae lan khyh`ae. ¹⁷ “Pawccecize suitungkhung angaelung kya a um paw Tuutaw nynh minmin kha a dang cih`ae zah, te ahiinpaw tuivanaw kalan minmin kha a cciakhae vae cih`ae, te Pachia nynh mih mit kya-e mitphi balyn kha marya a fupah cih`ae,” yn cipya.

¹ Te ccangsarinaw tazeih kha he a kia tuh vaawran kya suimilan a khoi loukaw daetedae. ² Te Pachia malang a thadyn`ae paw vaaw ccungccaw`ae lusari kha ka muih, te minmin kha mungkae ccangsari a pya`ae. ³ Te ccangpaw vaaw ccungccapaw nynh yn thua zah sui pakephepaw kha ccyngkuh zah silawhang pe khe a thadyn. Te suitungkhung malang a um paw sui silawhang vawlan khe mithyaa`ae balyn kya-e sawsangnaw ryte thuakhae khylan maee te u paw mynkhuhpaw patae kha kha-e paw a pya`ae. ⁴ Te maee te u paw mynkhuhpaw a maeekhuh tuh mithyaa`ae kya-e sawsangnaw ryte vaaw ccungccapaw kuih kyate Pachia malang a kaethung. ⁵ Te vaaw ccungccapaw nynh pakephepaw kha laah zah kha-e kha silawhang kya-e maee khate phe a biasah, te laephi vawlan dae a vua; oute roi`ae, kholungthyhpaw, khozawlaekuhpaw, te innruisuekuhpaw a um. ⁶ Te mungkae ccangsari a hoi`ae paw vaaw ccungccaw`ae lusari tuh mungkae tu lan paccynkute a um vae`ae. ⁷ Masaty vaaw ccungccapaw nynh mungkae a tu, te hya te chii ryte apykuhpaw maee palu a um`ae, te kha-e`ae kha laephi vawlan a sawbung`ae; te thingku`ae pumthung pumkheit tuh phya a u, te lonua a hingpaw balyn kha marya a u. ⁸ Te vaeningnaw vaaw ccungccapaw nynh mungkae tu zah maee nynh a u paw mua alepipaw tuh rili lungkhu lang ccaring vua paw hawte nynh thua; te rili pumthung pumkheit tuh chii lang phe atang. ⁹ Te rili kya um paw rae paw a hysue`ae paw pumthung pumkheit tuh phe a chih`ae; te sanphalung`ae pumthung pumkheit tuh phya aroh. ¹⁰ Te vaethungnaw vaaw ccungccapaw nynh mungkae tu zah maeekhua hawte aruapaw alepipaw awsi tuh vaawran kyate a ccah, te kha-e tuh vawpi`ae pumthung pumkheit vawlan te tuivanaw`ae vawlan khe accah. ¹¹ Kha-e awsi min tuh ‘Eccangkary’ acikuh. Te tui`ae pumthung pumkheit tuh eccangkary lang phe atang; te tui tuh akhahpaw lang rae athua keiccu, tui keiccuze ccungccaw patae a chih`ae. ¹² Te vaepalinaw vaaw ccungccapaw nynh mungkae tu zah khuanin pumthung pumkheit, sawpaw pumthung pumkheit, te awsi`ae pumthung pumkheit tuh ziabua athua`ae, te kha-e`ae pumthung pumkheit tuh pung amoh; te khuadae pumthung pumkheit tuh aw khyh; khuazi mah tuhhawte nynh thua. ¹³ Te ka do zah vaawran angaelung kya po azoupaw vaaw ccungccapaw lukheit nynh, “Vaaw ccungccaw`ae luthung nynh oun tu vae cih`ae paw ccangpaw mungkae roi`ae keiccuze, laephi a too`ae paw hanlan paw ngaethya lan um babang, paw ngaethya lan um babang, paw ngaethya lan um babang!” cite thawte a sia paw roi kha ka thae.

¹ Vaepangawnaw vaaw ccungccapaw nynh mungkae tu zah awsi ccangkheit tuh vaawran kyate laephi kalan accaw paw kha ka muih. Alaethy um leipaw hunghua toh kha kha-e paw kha a pya`ae. ² Te aning nynh alaethy um leipaw hunghua kha he a hung tuh alepipaw maeephupi kya-e maeekhuh hawte hunghua lungkhu te maeekhuh a pouthung; te hunghua kya-e maeekhuh keiccuze khuanin te vawlae tuh pung amoh. ³ Te maeekhuh kyate laephi vawlan tungkhipaw`ae yn pou, te laephi kya-e zekang`ae nynh thungnaw a hoi`ae hawte minmin kha thungnaw pya athua`ae. ⁴ Te laephi kya-e lonua, ahinpaw uccaw ccangkhakheit sanmah, thingku ccangkhakheit sanmah vawsaw pya khyh nawlan`ae, thuasalama mih terui kya Pachia kya-e tazeih a hoi leipaw ccungccaw`ae kyalya kha vawsaw pya nawlan`ae minmin kha kawpya athua`ae. ⁵ Tazeih khia athua lei`ae paw kha minmin nynh chianaw kaw hoi khyh`ae, thuasalama sawpaw sapangaw cia minmin kha thawte a tua-a sah ccaw`ae cite kawpya athua`ae. Minmin tuasahnaw tuh zekang nynh ccungccaw a teih vae ze a tua a sahnaw, zekang`ae kya-e tuasahnaw te nynh aloku. ⁶ Tuh-e nin`ae ccyh kya ccungccaw`ae nynh chinaw kha a ccungkuh cih`ae zah muihkuh lan khyh`ae; te chi lan a ry`ae zemah chinaw nynh minmin kha a ccuetaw cih`ae. ⁷ Te tuh-e tungkhipaw`ae pungsan tuh rhawtuk lan paccyn`ae paw marang`ae te nynh aloku. Mih lu kya sui te rae paw suilukhung a khungkuh`ae paw hawte nynh thua. Mih mitmae tuh ccungccaw`ae mitmae te nynh aloku. ⁸ Te mih sang tuh nopi`ae sang hawte nynh thua, te mih haw tuh chindeih`ae haw hawte nynh thua. ⁹ Mih kya-e bykhawkunawpaw tuh sivaw bykhawkunawpaw hawte nynh thua. Te mih sake`ae a zaw`ae paw roi tuh rhawtuk lan a ccue`ae paw maranglee`ae patae roi te nynh aloku. ¹⁰ Zekang`ae hawte leihmae a hoi`ae. Mih leihmae kya khoizang`ae a um. Te sawpaw sapangaw cia ccungccaw`ae kha vawsaw pya lan thungnaw a hoi`ae. ¹¹ Te minmin nynh siapharan lukheit a hoi`ae, tuh-e paw tuh alaethy um leipaw hunghua kya-e vaaw ccungccapaw nynh thua. Hebru bya te a min tuh Abaddon cikuh zah Greek bya te a min tuh Apollyon acikuh. ¹² Ngaethya lan um paw ccangkheit tuh phe alia vae. Dotua, hynh-e koute ngaethya lan um paw ccangning yn thua ung cih. ¹³ Te vaetaruhnaw vaaw ccungccapaw nynh mungkae tu zah Pachia malang um paw sui silawhang kya-e ki kipali kyate roi roikheit ka thae. ¹⁴ Tuh-e roi nynh mungkae a hoitupaw vaetaruhnaw e, vaaw ccungccapaw kha, “Alepipaw Eufrates vawpi kya a khii`ae paw vaaw ccungccaw`ae lupali kha supah`ae,” a cipya. ¹⁵ Te ccungccaw`ae pumthung pumkheit kha chia khylan, tuh-e suimilan, tuh-e nin, tuh-e sawpaw, tuh-e kum hanlan a paccyn`ae paw vaaw ccungccaw`ae lupali kha a supya`ae. ¹⁶ Te marang ccikuh`ae paw rhawkaw phu milu tuh million zaning acih; te minmin milu ria paw kha ka thae. ¹⁷ Ou tuhte vizin kya marang`ae kha ka muih; tuh-e marang`ae tungvaw a ccikuh`ae paw tuh maee hawte asepaw, ke hawte amepaw, jacinth lung hawte ahinpaw bykhawnawpaw`ae kha a hoi`ae; te marang`ae lu tuh chindeih`ae lu te nynh aloku, te mih khalang lungkhu te maee te maeekhuh te kemaee a pou. ¹⁸ Mih khalang lungkhu te a pou paw maee, maeekhuh te kemaee, hynh-e phin thung keiccuze ccungccaw`ae pumthung pumkheit tuh phe a chih`ae. ¹⁹ Pawccecize mih thungnaw tuh mih khalang kya te mih leihmae kya nynh a um; pawccecize mih leihmae tuh fupaw`ae hawte lu a hoi`ae; kha-e leihmae khate minmin nynh vawsaw a pya`ae. ²⁰ Te hynh-e vawsawnawpi`ae khate chia athua lei`ae paw, alaepaw ccungccaw`ae tuh raerangsaro`ae a beik khyh nawlan`ae, te ngawmuih kho leipaw, nawthae kho leipaw te a cceih kho leipaw sui zohtuh`ae, ngun zohtuh`ae, sohin zohtuh`ae, lung zohtuh`ae, thingphe zohtuh`ae kha minmin nynh a beik khyh nawlan`ae, mih kuih ryalaw`ae kha ngaesikuh khyh`ae. ²¹ Te ccungccaw a chia`ae paw, ccungccaw a naw`ae paw, a ohhuakunaw`ae paw te a ru`ae paw kha minmin nynh ngaesikuh khyh`ae.

¹ Te a thawsaepaw ccangpaw vaaw ccungccapaw tuh maeking kha zingkute vaawran kyate yn cciabung paw kha ka muih; te a lu vawlan sawdoihpaw um zah a mitmae tuh khuanin hawte thua zah a ccu tuh maee tungpi`ae hawte nynh thua. ² A kiakuh paw ccaleih taraw kha a kuih kya a ccyng, te a ranglang ccu kha rili vawlan sy zah a voilang ccu kha laephi vawlan a sy. ³ Te chindeih nynh a sia hawte roiccae lante thawte a sia; he a sia koute kholungthyhpaw roi vaesari accae. ⁴ Te kholungthyhpaw roi vaesari accae koute, kae tuh ccawzei lan ka noukuh vae; te vaawran kyate roi nynh, “Kholungthyhpaw roi vaesari accae paw uccaw kha tazeihkhia lah kha-e`ae kha zei nan,” cite kamaw yn hopya paw kha ka thae. ⁵ Te rili vawlan te laephi vawlan a thadyn paw ka muih paw vaaw ccungccapaw nynh vaawran lang a kuih kha hangthung zah ⁶ vaawran te vaawran kya um paw uccaw`ae, laephi te laephi kya um paw uccaw`ae, rili te rili kya um paw uccaw`ae a raetupaw, zungzae te zungzae cia a hiinpaw liate ccaesakuh zah ccyh ro vae lan khyh, ⁷ thuasalama Pachia nynh a see`ae, profeh`ae kalan phe a hopya vae`ae hawte, vaesarinaw e vaaw ccungccapaw roi yn ccae cih nin ccyh kya, mungkae he yn tu tetuh Pachia byakhupaw tuh accing vae cih, a ci. ⁸ Te vaawran kyate ka thae paw roi nynh kamaw kha bua yn hopah zah, “Rili vawlan te laephi vawlan a thadyn paw vaaw ccungccapaw kuih kya a kiakuh paw ccaleih taraw khu cceih lah yn lah,” yn cipya. ⁹ Te vaaw ccungccapaw kalan khe ka cceih zah amaw kha, “Ccaleih taraw kha yn pya,” ka cipya. Te aning nynh, “Lawkuh lah ae, na vue kya akhah cih, thuasalama na khalang kya tuh khoitui hawte a e cih,” yn cipya. ¹⁰ Te vaaw ccungccapaw kuih kyate ccaleih taraw kha ka lawkuh zah phe ka ae; ka khalang kya tuh khoitui hawte e zah, ccahe ka ae kou tuh ka vue kya akhah. ¹¹ Te aning nynh, “Ccungccaw`ae patae, minphuin`ae, bya`ae te siapharan`ae kalan khe profehbya bua na ho hahe cih,” cite kamaw kha yn hopya.

¹ Te hoitang alopaw phaeku ccangkheit kha kamaw yn pya; te vaaw ccungccapaw nynh thadyn zah, “Thokuh lah Pachia kya-e tempal te silawhang te khe kya a beik`ae paw kha toutua. ² Thuasalama tempal atolang e voidu kha tuh cciataw lah tou nan; pawccecize kha-e tuh Zenta`ae kalan pya athua vae, te athyaapaw khualipi kha sawpaw sungpali saning cia minmin nynh ccu te a syde cih`ae. ³ Te ka ccaekia luning kha thungnaw ka pya cih`ae zah, te minmin nynh buri uccaw kha lawkute nin thungkheit zaning sungtaruh cia profehbya a ho cih`ae,” a ci. ⁴ Hynh-e`ae tuh laephi peetu Pachia malang a thadyn`ae paw maeekhua awnawpaw ccangning te oliv thingku kuning nynh thua`ae. ⁵ Ccungccaw lukhakheit nynh minmin kha vawsaw pya a ry`ae ze mih khalang lungkhu te maee pou zah mih rhaw`ae kha po a laang`ae. Te ccungccaw lukhakheit nynh minmin kha vawsaw pya a ry`ae ze, tuh-e paw tuh ou tuhcihte chia a thua hahe cih. ⁶ Tuh-e`ae tuh mih profehbyaho lya`ae nin ccyh kya khuaraw khyh nawlan vaawran thuakaw khaw khonaw kawhoinaw a hoi`ae; te tui`ae kha chii lang tangsah khonaw, a ry takyh vae`ae ze vawsawnawpi aphuinphuin te laephi kha vawsaw pya khonaw thungnaw a hoi`ae. ⁷ Te minmin nynh ccaekiakhan`ae paw kha he a thangsah`ae tetuh alaethy um leipaw hunghua lungkhu te yn kaethung paw sarepaw nynh minmin kha rhawtuk cih`ae zah phe a tae cih`ae, te minmin kha phe a theih cih`ae. ⁸ Te muisaw lante Sodom te Izip a ci`ae paw, alepipaw khuapi e laanpi kyakhe mih rhua`ae tuh a um cih; tuh-e kya nynh ah Bawipaw kha mah a khiade`ae. ⁹ Te ccungccaw`ae, phin`ae, bya`ae te minphuin`ae nynh mih rhua`ae kha nin thung khoi lungkhu a muih cih`ae, zah shaw kya u lan phe a kang cih`ae. ¹⁰ Te laephi vawlan a um`ae paw tuh mih lungtua cih zah mih lungpaw cih, te lukheit te lukheit lasung a kykuh cih`ae; pawccemacize langmaw khae profeh`ae luning nynh laephi vawlan a um`ae paw kha phe ccihtheih lang a tua`ae keiccu nynh thua. ¹¹ Te nin thung khoi acih koute Pachia kyate hiinnaw muisaw nynh minmin lungkhu langkhe tee zah minmin tuh mih ccu te a thadyn`ae, te minmin kha a muih`ae paw tuh myarya a rih`ae. ¹² Te vaawran kyate alepipaw roi nynh, “Hynhlang yn kaethung oh,” cite a hopya`ae paw kha minmin nynh a thae`ae. Te minmin tuh maeking te vaawran lang a kaethung`ae, te mih rhaw`ae nynh a muih`ae. ¹³ Te tuh-e suimilan ccyh kya thawte innruisuekuh zah khuapi pumhaw pumkheit tuh pung ating, te innruisuekunaw kya ccungccaw`ae thungsari a chih`ae, te alaepaw ccungccaw`ae tuh rih`ae zah vaawran-e Pachia kha phu-enaw a pya`ae. ¹⁴ Vaeningnaw ngaethya lan um paw tuh phe alia vae. Dotua, vaethungnaw ngaethya lan um paw tuh arangte yn thua vae cih. ¹⁵ Te vaesarinaw e vaaw ccungccapaw nynh mungkae tu; te vaawran kya thawte accaepaw roi`ae nynh, “Hynh-e laephipi peenaw`ae tuh ah Bawipaw kya-e peenaw lang te a Kri kya-e peenaw lang phe tang vae, te aning nynh zungzae te zungzae cia a uk vae cih!” cite a ho`ae. ¹⁶ Te Pachia malang mimaw suitungkhung vawlan a dahung`ae paw piccang`ae lukuin laepali nynh bakhung`ae zah Pachia kha beik`ae zah, ¹⁷ “Atu a um paw, langmaw a la um vae paw te yn thua lanpaw, Athung huaccepaw, pou Bawipaw Pachia, na kalan lungtuabya kae ho; pawccecize alesaepaw na thungnaw kha namaw kalan phe na lawkuh vae zah na uk vae. ¹⁸ “Minphuin`ae tuh mih thinria zah na bungpawnaw tuh yn thua vae; a chih`ae paw kha byapia khylan mih ccyh tuh yn thua vae. Te namaw rya ae lawpah`ae paw na profeh`ae, mithyaa`ae, te na min rawrih`ae paw ccungccaw adih ale`ae kha ryalaw mee na pya nawlan`ae, te laephi a roh`ae paw kha na ro nawlan`ae paw accyh tuh yn thua vae,” a ci`ae. ¹⁹ Te vaawran kya Pachia kya-e tempal tuh ahungkuh, te a tempal kyakhe amaw kya-e byakin kua kha muih athua. Te khozawlaekuhpaw, roi`ae, kholungthyhpaw, innruisuekuhpaw te alepipaw hya ccah paw a um`ae.

¹ Te vaawran kya alepipaw muihsanaw a langkuh: nopinung lukheit tuh khuanin khate ccaankuh zah a ccu kaw khe sawpaw a um, te a lu vawlan awsi haw laening a um paw suilukhung kha a khungku. ² Tuh-e nung tuh ccaawpoi, ccaawpui lan cih tuh neitangia accipawte thawte a siakhaekuh. ³ Te vaawran kya ccangpaw muihsanaw alangkuh. Dotua oh, lu lusari te ki kihaw, te a lu`ae vawlan suilukhung ccangsari a hoi paw, alepipaw sekakingpaw nakafupi a um. ⁴ Te a leihmae nynh vaawran e awsi`ae pumthung pumkheit kha sue zah kha-e`ae kha laephi kalan dae a vua; te ccaawpui lan a cih vae paw nopinung nynh a ccaaw kha ccahe yn pui vae ze, kha-e ccaaw kha po laang lan cite nakafupi tuh nopinung malang khe phang a thadyn. ⁵ Te nopinung nynh sivaw hoitang te minphuin`ae balyn kha a uk vae cih paw imua pise kha a saah; te a ccaaw tuh Pachia kalan te a suitungkhung kalan lawthung athua. ⁶ Te nin thungkheit zaning sungtaruh cia amaw kha loohdang athua ccaw cite Pachia nynh a paccynpya paw umnaw, rangkaw langkhe nopinung tuh phe a ccue. ⁷ Te vaawran kya rhawtukkunaw a um; Mikhael te a vaaw ccungccaw`ae nynh nakafupi kha rhawtuk`ae, te nakafupi te a vaaw ccungccaw`ae nynh rhawtuk`ae zah, ⁸ tae khyh`ae, te vaawran kya minmin hanlan umnaw kharyh muih lan um vae khyh. ⁹ Te laephipi khaleih a lingpaw, Diabolos te Setan a ci`ae paw, kha-e langmaw-e fupaw, alepipaw nakafupi tuh ccaring vua athua. Aning tuh laephi kalan ccaring vua thua zah amaw ryte a vaaw ccungccaw`ae kha vua athua`ae. ¹⁰ Oute vaawran kya roi accaepaw nynh, “Atu khumnaw, te thawzung, te ah Pachia kya-e peenaw te a Kri kya-e thungnaw tuh athua vae; pawccecize ah uno`ae seibetupaw, ah Pachia malang khuazi khuadae minmin seibetupaw tuh sawbung athua vae. ¹¹ Te Tuutaw a chii liate, te mih ccaekia bya liate minmin nynh amaw kha a tae`ae; te minmin tuh chinaw kyacia mimaw hiinnaw kha sungsakuh khyh`ae. ¹² Tukeiccu, pou vaawran`ae, te kha-e kya um`ae paw nanning lungtua oh! Laephi a too`ae paw te rili kya-e`ae elan paw ngaethya lan um babang! Pawccecize diabolos nynh amaw tuh ccyh sosoh rou nynh ka hoi vae cipaw kha a ny keiccuze, myarya thinria te, aning tuh nae kalan yn rungbung vae,” cite a ho paw kha ka thae. ¹³ Te nakafupi nynh laephi kalan amaw tuh vua athua paw kha he a muih tuh ccaaw pise a saah paw nopinung kha a tua a sah vae. ¹⁴ Te kha-e nopinung tuh fupaw mitmae kyate a lue nawlan, ccyh kheit, ccyh`ae te ccyh akhankuh cia amaw a dooihnaw`ae a umnaw, rangkaw langkhe a zou kho nawlan alepipaw mosipi sake kening kha pya athua. ¹⁵ Te kha-e nopinung kha tuileih nynh po a cciakhae ccaw cite, fupaw nynh a khalang lungkhu te tuileih tho paw hawte tui kha nopinung nuhlang te a pousah. ¹⁶ Te laephi nynh nopinung kha a bawng, te laephi nynh a khalang kha aw zah nakafupi nynh a khalang lungkhu te a pousah paw tuileih kha po a laang. ¹⁷ Te nakafupi tuh nopinung elan myarya a thinria zah Pachia kawpyapaw`ae a zui`ae paw te Jesu Kri kya-e ccaekia a hoi`ae paw, alaepaw nopinung ciihan kha rhawtuk khylan po a cceih.

¹ Te rili kin laesia vawlan khe ka thadyn. Te sarepaw sakheit rili lungkhu te yn pouthung paw kha ka muih. Tuh-e sarepaw tuh lu lusari te ki kihaw a hoi; te a ki vawlan suilukhung ccanghaw, te a lu`ae vawlan Pachia thethyasah paw min a um. ² Te ka muih paw sarepaw tuh kaesing te nynh aloku. A ccu tuh vong ccu te lokuh zah a khalang tuh chindeih khalang te nynh aloku. Te nakafupi nynh amaw thungnaw te a suitungkhung te alepaw kawhoinaw kha sarepaw kalan a pya. ³ Te a lu lukheit tuh chikhaeku khopaw vaemaw a mue paw hawkhate nynh thua; te chikhaeku khopaw a vaemaw tuh dansah athua. Te laephi ccungccaw`ae balyn tuh mih ngaeangthua zah sarepaw nuhlang khe a zuikuh`ae. ⁴ Te minmin nynh sarepaw kha kawhoinaw a pyatupaw nakafupi kha a beik`ae; te sarepaw kha mah beik`ae zah, “Sarepaw alopaw hungmou a um? Hungmou amaw kha rhawtuk kho cih?” a ci`ae. ⁵ Te alesaepaw uccaw kong bya ho paw khalang te Pachia thethyasah paw bya ho paw khalang kha sarepaw kalan pya athua, te sawpaw sungpali saning po piakuh lang kawhoinaw kha mah pya athua. ⁶ Te Pachia kha rawsete thethyasahnaw kya, Pachia a min, a bu, te vaawran kya a um`ae paw kha thethyasah khylan a khalang kha a aw vae. ⁷ Te mithyaa`ae kha rhawtuk khylan, te minmin kha tae nawlan kaw a mue; te phin`ae balyn te bya`ae balyn minphuin`ae balyn tungvaw kawhoinaw kha amaw kya pya athua. ⁸ Te laephipi athotakaw te chia athua vae paw Tuutaw kya-e Hiinnaw Ccauh kya mih min zei athua leipaw, laephi vawlan a um`ae paw balyn nynh sarepaw kha oun beik cih`ae. ⁹ Nakaring a hoi paw ccungccaw tuh thae sah. ¹⁰ Seetangnaw kalan ming`ae a cciakhae paw ccungccaw tuh amaw mah seetangnaw kalan a cceih cih; te thaloi te ccungccaw a theih paw tuh thaloi te amaw mah chia athua hahe cih. Hynhe kyahin mithyaa`ae zynnaw te lungsaenaw tuh a um. ¹¹ Te ccangpaw sarepaw laephi lungkhu te yn pou paw kha ka muih; te aning tuh tuutaw hawte ki kining hoi zah nakafupi hawte nynh bya a ho. ¹² Te tuh- e sarepaw nynh masaty sarepaw kya-e thungnaw balyn kha amaw phang a umnaw malang khe phya a mang; te aning nynh laephi te laephi kya um`ae paw kha chikhaeku khopaw vaemaw dansah athua vae paw masaty sarepaw kha a beiksah`ae. ¹³ Te aning nynh alepipaw muihsanaw kha a langsaku; te ccungccaw`ae muihnaw kya vaawran kyate laephi vawlan maee kha a ccawsah bung. ¹⁴ Te masaty e sarepaw malang langsaku lan, amaw pya athua paw muihsanaw`ae liate laephi vawlan a um`ae paw kha aning nynh a ling`ae. Thaloi te vaemaw mue zah a hiin ung paw sarepaw zohtuh kha raeku lan laephi vawlan a um`ae paw kha a hopya`ae. ¹⁵ Te sarepaw zohtuh nynh bya a ho kho nawlan thuasah, sarepaw zohtuh a beik leipaw miakaw tuh chia athua nawlan thuasah, sarepaw zohtuh kha hiinnaw pya khonaw thungnaw kha aning tuh pya athua. ¹⁶ Te aning nynh ccungccaw balyn kha, adihpaw mah alepaw mah, a hoirungpaw mah a ryachipaw mah, a luepaw mah see mah, mih ranglang kuih kya khyh ze mih terui kya syntawnaw a hoisah`ae. ¹⁷ Ou tuhte syntawnaw a hoi paw khyh ze sarepaw min a hoi paw khyh ze a min namba a hoi paw laelan hung ccungccaw nynh san a re khyh nawlan, tukhyhze a zua khyh nawlan nynh thua. ¹⁸ E kya hawnaw a um. Thaethyanaw a hoi paw ccungccaw nynh sarepaw namba kha ria sah; pawccecize e tuh ccungccaw namba nynh thua; te a namba tuh 666 nynh thua.

¹ Te kae nynh ka do zah dotua, Tuutaw tuh Zion Mua vawlan khe a thadyn. Te mih terui kya a Paaw min azeikuh paw thung zakheit sungpali thungpali tuh amaw ryte a um`ae. ² Te tuiphua atoikuh paw patae roi hawte, te myarya accaepaw kholungthyhpaw roi hawte vaawran kyate roi kha ka thae. Te tintang khua`ae paw nynh mih tintang a khua`ae paw roiccaepaw kha mah ka thae. ³ Suitungkhung malang, ahiinpaw rangsaw sapali te piccang`ae malang khe minmin nynh athawpaw law, hawkhate, law a sah`ae. Te kha-e law kha laephi kyate re athua`ae paw thung zakheit sungpali thungpali laelan hung ccungccaw nynh sanmah ccangkuh kho khyh`ae. ⁴ Hynh-e`ae tuh ccangvaedy`ae athua`ae keiccu nopi`ae ryte anungsikuh lei`ae paw nynh thua. Minmin tuh Tuutaw a ccianaw lang miakaw a zui`ae paw nynh thua. Minmin tuh ccungccaw`ae laku kyate re thua`ae zah Pachia hanlan te Tuutaw hanlan masaty athae`ae nynh thua. ⁵ Mih khalang kya hyngbya um khyh, pawccecize minmin tuh Pachia suitungkhung malang seimenaw hoi khyh`ae. ⁶ Te laephi vawlan um`ae paw minphuin miakaw te phin miakaw, te bya te ccungccaw`ae kalan hopya lanpaw zungzae atynpaw thehoypaw a hoi paw, vaawran angaelung kya azoupaw ccangpaw vaaw ccungccapaw nynh, ⁷ “Pachia kha rawrih oh lah amaw kha phu-enaw pya oh; pawccecize a byapianaw ccyh tuh yn thua vae; te vaawran, laephi, rili te tuivanaw`ae a raetupaw kha beik oh,” cite roi accae lante a ho paw kha ka muih. ⁸ Te ccangpaw vaaw ccungccapaw nynh, “Kha-e alesaepaw khualipi Babilon tuh phe a pu vae, phe a pu vae, pawkeiccumacize amaw ohhuakunaw kya-e thinrianaw misutui kha minphuin`ae balyn pung a niasah`ae keiccu nynh thua,” cite zuikuh zah a ho. ⁹ Te vaethungnaw e vaaw ccungccapaw nynh minmin kha zui`ae zah, “Ccungccaw lukhakheit nynh sarepaw te kha-e sarepaw zohtuh kha a beik lan thua ze, te kha-e sarepaw kya-e syntawnaw kha a terui kya khyh ze a kuih kya a hoi lan thua ze, ¹⁰ tuh-e paw tuh Pachia thinrianaw banang lungkhu lang pyde leite a ccae`ae paw Pachia thinrianaw athua paw misutui kha a neih cih; te tuh-e paw tuh athyaapaw vaaw ccungccaw`ae malang te Tuutaw malang khe maee te kemaee te thawte a tua a sah cih`ae. ¹¹ Te minmin tuasanawpaw maeekhuh tuh zungzae te zungzae cia a kaethung; te sarepaw te amaw zohtuh kha a beik`ae paw te amaw min syntawnaw a mue`ae paw tuh khuazi khuadae hae-ung khyh`ae,” cite roi accae lante a ho. ¹² Hynh-e kya mithyaa`ae lungsaenaw a um; e`ae tuh Pachia kawpyapaw`ae te Jesu zynnaw kha a ccykekuh`ae paw nynh thua`ae. ¹³ Te vaawran kyate, “ ‘Atu kyate Bawipaw kya a chih`ae paw tuh hythuaccou`ae paw nynh thua,’ cite zei,” cite kamaw yn hopah paw roi kha ka thae. Muisaw nynh, “Athua, minmin tuh mih ryalaw`ae kyate a hae-ung ccaw vae`ae cite mih ryalaw`ae nynh mimaw kha a zuiding`ae paw nynh thua,” a ci. ¹⁴ Te kae nynh ka do tuh, dotua, arawpaw maeking a um. Te Ccungccaw Ccapaw alopaw nynh a lu vawlan suilukhung kha khungkuh zah a kuih kya ahepaw rungkou kha ccyngkute kha-e maeking vawlan khe a dahung. ¹⁵ Te ccangpaw vaaw ccungccapaw nynh tempal lungkhu te yn pou zah, “Na rungkou kha moh sua lah loohrue ccavae, pawccecize laephi kya-e loohrue lanpaw phe avoi vae,” cite thawte sia zah maeking vawlan a dahung paw kha a hopya. ¹⁶ Te maeking vawlan a dahung paw nynh a rungkou kha laephi vawlan moh sua zah laephi tuh loohrue athua vae. ¹⁷ Te ccangpaw vaaw ccungccapaw tuh vaawran kya a um paw tempal lungkhu te yn pou zah aning mah ahepaw rungkou a hoibua. ¹⁸ Te maee tungvaw thungnaw a hoi paw, ccangpaw vaaw ccungccapaw tuh silawhang kyate yn pou. Te aning nynh ahepaw rungkou a ccyngkuh paw kalan khe, thawte sia zah, “Ahepaw na rungkou kha moh sua lah laephi kya-e misu thae ange`ae kha suelua, pawccecize misu thae`ae tuh phe avoi vae,” cite a hopya. ¹⁹ Te vaaw ccungccapaw nynh a rungkou kha laephi vawlan khe moh sua zah laephi kya-e misu ku kha a suelua, te kha-e kha Pachia thinrianaw athua paw alepipaw misu mianawpaw lungkhu langkhe moh a phang. ²⁰ Te misu mianawpaw tuh khualipi atolang khe miade athua, te chii tuh marang khawbaw phe phah lang farlong thungkheit zataruh asaw lang misu mianawpaw kyate a pou.

¹ Te alesaepaw te ngaeang lan um paw ccangpaw muihsanaw kha vaawran kya ka muih. Tuh-e tuh nyathyakou e vawsawnawpi ccangsari a hoi`ae paw vaaw ccungccaw`ae lusari nynh thua; pawccecize kha-e`ae kya Pachia thinrianaw tuh phe accing. ² Te maee te apykuhpaw thawlang rili alopaw kha ka muih. Te sarepaw tungvaw, sarepaw zohtuh tungvaw te amaw kya-e syntawnaw tungvaw te a min namba tungvaw taenaw a hoi`ae paw nynh Pachia kya-e tintang`ae kha ccyngkute thawlang rili vawlan a thadyn`ae paw kha ka muih. ³ Minmin nynh Pachia seepaw Mawsi law te Tuutaw law kha sah`ae zah, “Athung Huaccepaw Bawipaw Pachia, na ryalaw`ae tuh lesae zah ngaeang lan um paw nynh thua; mithyaa`ae Siapharan, nang na ccianaw laanpi`ae tuh ding zah ahme. ⁴ Pou Bawipaw na raw kha ri leite, na min kha phuesah leite hungmou a um cih? Pawccecize nang rou nynh athyaapaw na thua; na byapianaw`ae tuh phe a langku vae keiccuze, minphuin`ae balyn nynh yn thua cih`ae zah na malang khe ae beik cih`ae,” a ci`ae. ⁵ Te tuh-e koute he ka do tuh, dotua, vaawran kya ccaekiakhankunaw bu kya um paw tempal tuh ahungkuh. ⁶ Te vawsawnawpi ccangsari a hoi`ae paw vaaw ccungccaw`ae lusari tuh tempal lungkhu te oun pou`ae. Minmin tuh accipaw te arawpaw uccaw kha lawkuh`ae zah mih by kya sui taeccia khate a cciakuh`ae. ⁷ Te ahiinpaw rangsaw`ae sapali kyaze sakheit nynh zungzae te zungzae cia a hiinpaw Pachia a thinrianaw te phe beihpaw sui pakekhupaw ccangsari kha vaaw ccungccaw`ae lusari kalan khe a pya`ae. ⁸ Te tempal tuh Pachia a phu-enaw te a thungnaw kya-e maeekhuh te phe abeih; te vaaw ccungccaw`ae lusari kya-e vawsawnawpi ccangsari accing makhia hung ccungccaw sanmah tempal lungkhu lang tee kho khyh.

¹ Te tempal lungkhu te myarya accaepaw roi nynh, “La cceih oh lah Pachia kya-e thinrianaw athua paw pakekhupaw`ae kha laephi vawlan ccae oh,” cite vaaw ccungccaw`ae lusari kalan a hopya`ae paw kha ka thae. ² Te masaty e paw nynh cceih zah a pakekhupaw kha laephi vawlan khe a ccae; te sarepaw kya-e syntawnaw a hoi`ae paw te amaw azuh a beik`ae paw tungvaw kya myarya dothah zah luathua-ae-ui lang um paw balyh nynh a thuanua`ae. ³ Te luningnaw e vaaw ccungccapaw nynh a pakekhupaw kha rili vawlan khe a ccae; te rili tuh ccungccaw achihpaw chii hawte chii lang phe atang. Te rili kya um paw a hysuepaw miakaw marya a chih`ae. ⁴ Te luthungnaw e vaaw ccungccapaw nynh a pakekhupaw kha vapi`ae te tuivanaw`ae vawlan khe a ccae; te kha-e`ae tuh chii lang phe atang. ⁵ Te tui`ae kya-e vaaw ccungccapaw nynh, “Atu a um paw, langmaw a la um vae paw, te yn thua lanpaw, pou Bawipaw, nang tuh na ding, pawccemacize hynh-e`ae kha nang nynh bya na pia. ⁶ Pawccecize minmin nynh mithyaa`ae chii te profeh`ae chii kha a luasah`ae, te nang nynh minmin kha nia lan chii na pya`ae. Pawccecize minmin tuh a accan`ae paw nynh thua,” cite a ho paw kha ka thae. ⁷ Te ccangpaw vaaw ccungccapaw nynh silawhang lungkhu te, “Athung Huaccepaw Bawipaw Pachia, na byapianaw`ae tuh ou tuhmawte kyh zah adingpaw nynh thua,” cite a ho paw kha ka thae. ⁸ Te lupalinaw e vaaw ccungccapaw nynh a pakekhupaw kha khuanin vawlan khe a ccae; te maee te ccungccaw`ae kha u lan amaw kha thungnaw pya athua. ⁹ Te myarya asopaw maeeso khate ccungccaw`ae tuh u thua`ae zah hynh-e vawsawnawpi tungvaw thungnaw kaw a hoitupaw Pachia min kha thethyasah`ae; te amaw kha phu-e pya lan ngaesikuh khyh`ae. ¹⁰ Te lupangawnaw e vaaw ccungccapaw nynh a pakekhupaw kha sarepaw suitungkhung vawlan khe a ccae; te a peenaw tuh mohnaw te phe beih vae; te eih cci keiccuze minmin tuh mih lae kha a teikuh`ae. ¹¹ Mih kya-e a ccih paw`ae te mih balyh`ae keiccuze vaawran e Pachia kha thethyasah`ae zah mih cyisahnaw`ae kha ngaesikuh khyh`ae. ¹² Te lutaruhnaw e vaaw ccungccapaw nynh a pakekhupaw kha alepipaw vawpi, Eufrates, vawlan khe a ccae; te nithua lang-e siapharan`ae ccianaw kha paccynpya khylan, kha-e kya-e tui tuh phe akang. ¹³ Te nakafupi khalang lungkhu te, sarepaw khalang lungkhu te, ahme leipaw profeh khalang lungkhu te buhphaw`ae hawte athyaa leipaw muisaw`ae ccangthung yn pou paw kha ka muih. ¹⁴ Pawccecize minmin tuh muihsanaw`ae a langsakuh paw raerangsaro`ae kya-e muisaw`ae nynh thua. Athung Huaccepaw Pachia kya-e kha-e alesaepaw nin kya rhawtukkunaw kalan minmin kha suelua khylan minmin tuh laephi te laephipi khaleih kya um paw siapharan`ae kalan khe a cceih`ae. ¹⁵ “Dotua, kae tuh miruh hawte nynh kae thua. Ccakaete a ccia khyh nawlan te a maethyanaw muihpya athua khyh nawlan, ngawdokuh paw te a uccaw a ccykuh paw tuh hythuaccoupaw nynh thua,” a ci. ¹⁶ Te Hebru bya te Armekeddon acikuh paw ahmin kyakhe nynh a suelua`ae. ¹⁷ Te lusarinaw e vaaw ccungccapaw nynh a pakekhupaw kha khivae kyakhe a ccae, te vaawran e tempal kya um paw suitungkhung kyate myarya accaepaw roi yn pou zah, “Phe athang vae!” a ci. ¹⁸ Te roiccaepaw, kholungthyhpaw, te khozawlaepaw a um; te thawte innruisuekuh paw a um, laephi vawlan ccungccaw`ae um takawte tuhcih arupaw te tuhcih alepaw innruisuekuh paw tuh um boi khyh. ¹⁹ Te alepipaw khualipi tuh santhung lang phia thua zah minphuin`ae kya-e khuapi`ae tuh phe ating. Te Pachia thin phe riatheihnaw athua paw misutui banang kha niasah khylan alepipaw Babilon khualipi kha Pachia nynh a liathui vae. ²⁰ Te tuikoih miakaw tuh pung a ccue kou`ae, te mua`ae tuh muih lan um vae khyh. ²¹ Te talent ccangkheit loukaw aripaw alepipaw hya tuh ccungccaw`ae tungvaw khe vaawran kyate a ccah. Te vawsawnawpi tuh myaryamaw ale keiccuze, tuh-e hya kya-e vawsawnawpi keiccuze ccungccaw`ae nynh Pachia kha thethyasah`ae.

¹ Te pakekhupaw ccangsari a hoi paw vaaw ccungccaw`ae lusari kyaze lukheitpaw nynh yn thua zah kamaw kha bya yn hopya. Yn hopya paw tuh, “Hynhlang rang, tui`ae patae vawlan a dahung paw ohhuanung pi tungvaw byapianaw kha kae muihsah cih; ² laephi siapharan`ae nynh ohhuakunaw kha amaw ryte a rae`ae; te laephi a too`ae paw tuh amawnung kya-e ohhuakunaw misutui khate pung a rui vae`ae,” yn cipya. ³ Tuhte kamaw kha Muisaw kya rangkaw langkhe yn cciakhae. Te lu lusari te ki kihaw a hoi paw, Pachia thethyasahnaw min`ae te phe beihpaw, sekakungpaw sarepaw vawlan a dahung paw nopinung kha ka muih. ⁴ Te nopinung tuh asepaw te sekakungpaw uccaw kha lawkuh zah sui, aphutepaw lung`ae te pale`ae khate a ccaankuh; a ohhuakunaw kya-e luathua-aeui lang um paw te nungsikunaw te phe beihpaw sui banang kha a kuih kyakhe a ccyngbia. ⁵ Te a terui kyakhe, “BYAKHUPAW, ALESAEPAW BABILON, OHHUA`AE NUNG TE LAEPHI KYA-E LUATHUA-AE-UI LANG UM PAW NUNG,” cite min azeikuh. ⁶ Te nopinung tuh mithyaa`ae chii khate, te Jesu keiccu a chia`ae paw martyr`ae chii khate phe a rui paw kha ka muih. Te kha-e nung kha he ka muih tuh kae tuh myarya ka ngaeangthua. ⁷ Te vaaw ccungccapaw nynh, “Pawccemou na ngaeangthua? Kha-e nopinung kya-e byakhupaw, te kha-e nung a cciakhae paw lu lusari te ki kihaw a hoi paw sarepaw kya-e byakhupaw kha nang kae hopah ung cih. ⁸ Na muih paw sarepaw tuh langmaw la um zah atu um khyh, te alaethy um leipaw hunghua lungkhu te yn kaethung vae cih zah ronaw lungkhu lang a cceih cih. Te laephi vawlan a um`ae paw, laephipi athotakaw te Hiinnaw Ccauh kya mih min zei athua lei`ae paw nynh langmaw la um zah atu a um leipaw, te bua yn langkuh cih paw sarepaw kha he yn muih`ae tuh mih ngaeangthua vae cih. ⁹ “Te e kya hawnaw a hoi paw tuanaw-thinlung a um. Lu lusari tuh nopinung nynh a dahungnawpaw mua mua sari nynh thua. ¹⁰ Te siapharan`ae lusari mah a um`ae; lu pangaw tuh phe ccahbung vae`ae, te lukheit a um ung; te ccangpaw tuh yn thua loh khyh; he yn thua vae ze, aning tuh ccyh dyntari rou nynh atyn cih. ¹¹ Te langmaw la um zah atu a um leipaw sarepaw tuh lutarya naw e siapharan ccaccei nynh thua, te lusarinaw e mah athua, te aning tuh ronaw lungkhu lang nynh a cceih cih. ¹² “Te na muih paw ki kihaw tuh peenaw a mue loh leipaw siapharan luhaw nynh thua; thuasalama siapharan`ae hawte kawhoinaw kha sarepaw ryte suimilan ccangkheit lungkhu a muekheih`ae. ¹³ Tuh-e`ae tuh tuanaw-thinlung ccangkheit hoi`ae paw thua zah mih thungnaw te mih kawhoinaw kha sarepaw kalan a pya cih`ae. ¹⁴ “Tuh-e`ae nynh Tuutaw kha rhawtuk cih`ae zah Tuutaw nynh minmin kha phe a tae cih`ae. Pawccecize Tuutaw tuh bawi`ae Bawipaw te siapharan`ae Siapharan nynh thua. Te amaw ryte a umkheih`ae paw tuh ko athua`ae paw, po athua`ae paw te zyn lan um`ae paw nynh thua`ae,” yn cipya. ¹⁵ Te vaaw ccungccapaw nynh, “Ohhuanung nynh a dahungnaw, na muih paw tui`ae tuh ccungccaw`ae te ccungccaw zapi te minphuin`ae te bya`ae nynh thua. ¹⁶ Te sarepaw vawlan um paw na muih paw ki kihaw`ae nynh ohhuanung kha a hua cih`ae zah a makhaete a nung cih`ae, te ccakaete a nung cih`ae; te a ngesaw kha a ae cih`ae zah amaw kha maee te a u cih`ae. ¹⁷ Pawccecize Pachia bya`ae accing mawlaezung, amaw rynaw kha ccingsah khylan, mih lungloku nawlan, te mih peenaw kha sarepaw kalan pya khylan, Pachia nynh mih thinlung kya phe a sang vae. ¹⁸ Te na muih paw nopinung tuh laephi siapharan`ae tungvaw a uk paw kha-e alepipaw khualipi kha nynh thua,” cite kamaw kha yn hopya.

¹ Te hynh-e uccaw`ae koute alepipaw thungnaw a hoi paw ccangpaw vaaw ccungccapaw vaawran kyate yn rungbung paw kha ka muih. Te amaw phu-enaw khate laephi tuh phaephae a aw. ² Te aning nynh roi accae lante thawte sia zah, “Alepipaw Babilon tuh phe a pu vae, phe a pu vae, te raerangsaro`ae umnaw lang nynh phe a tang vae, te anungsikuhpaw muisaw miakaw elan thunginn lang, te athyaa leipaw te hua lan um paw pavaw miakaw elan rekunaw lang nynh a tang vae. ³ Pawccecize minphuin`ae balyn tuh amaw ohhuakunaw kya-e thinrianaw athua paw misutui kha phe a nia vae`ae, te laephi siapharan`ae tuh amaw ryte pung ohhuakuh vae`ae, te laephi kungku`ae tuh amaw kya-e phe beihpaw hoirungnaw liate houh a hoirung vae`ae,” a ci. ⁴ Te vaawran langte ccangpaw roi kha ka thae, tuh-e roi nynh, “Ka ccungccaw`ae, nanning tuh kha-e nung kya-e seinaw`ae a neethungkuh bua`ae paw na thua khyh nawlan oh, te a vawsawnawpi`ae na muebua khyh nawlan oh, amaw lungkhu te oun pou oh. ⁵ Pawccecize a seinaw`ae tuh vaawran kalan phe thua vae zah a tazae leinaw`ae kha Pachia nynh phe a liathui vae. ⁶ Aning nynh nanning kha ae liaru oh hawte amaw kha liaru oh; a cyisahnaw`ae thyhte leih ning liaru oh; aning nynh a pyde paw banang kyakhe leih ning pydepah oh. ⁷ Aning nynh amaw te amaw kha myarya phu-esahkuh zah eih hoysah kaesy lang a um hawkhate, tuasahnaw te ngaethyanaw kha amaw pya oh; pawccecize aning nynh a thinlung kyakhe, ‘Kae tuh siapharan nung hawte nynh ka um, numae ka thua khyh, ngaethyanaw tuh ka tung lan khyh,’ a ciku. ⁸ Tukeiccu amaw a vawsawnawpi`ae, chinaw, rawkhuinaw te ccakangnaw nynh ninkheit kya a thuanua cih zah aning tuh maee nynh pung a u cih; pawccecize amaw kha byapiatupaw Bawipaw Pachia tuh a thawsaepaw nynh thua. ⁹ “Te amaw ryte ohhuakuh`ae zah eih hoysah kaesy lang amaw ry a umkheih`ae paw laephi siapharan`ae nynh amaw a rhua unaw`ae paw maeekhuh kha he a muih`ae tuh amaw elan a rah a khui vae cih`ae. ¹⁰ Amaw tuasahnaw rawri keiccuze asawpi langkhe thadyn`ae zah, ‘Ezou, ezou, khu-e alepipaw Babilon khualipi khulou! Khu-e athungpaw khualipi khulou! Suimilan ccangkheit kya na byapianaw tuh yn thua vae rei!’ a ci cih`ae. ¹¹ “Te laephi kungku`ae tuh amaw elan yn rah yn khui vae cih`ae; pawccecize mih kungkunaw kya-e kha hung ccungccaw nynh sanmah kharyh re vae lan khyh`ae. ¹² Mih kungkunaw uccaw`ae sui, ngun, aphutepaw lung`ae, pale`ae, uccaw nebaleihpaw, kadipa uccaw, po-uccaw, sekakungpaw uccaw, thyine thingphe aphuinphuin, saepawnua te rae paw uccaw aphuinphuin, amynkhuhpaw thing te rae paw uccaw aphuinphuin, sohin uccaw, sivaw uccaw te lungrawpaw uccaw, ¹³ cinnamon te mynkhuhpaw u paw, zimuin te frankinsens, misutui te oliv satho, chanvui akhuipaw, te chanvui, tuanaw-saring`ae te, tuu`ae, marang`ae te maranglee`ae, pyn`ae te ccungccaw muisaw`ae kha hung nynh san re vae lan khyh`ae. ¹⁴ “Te na hiinnaw-muisaw nynh kou a dua paw thingthae`ae tuh na kyate phe a pou vae`ae, te kou na hoysah paw uccaw te phaephae ahpaw uccaw`ae balyn tuh na kyate phe a pou vae`ae, te kha-e`ae kha kharyh na muih vae lan khyh. ¹⁵ Kha-e khuapi liate a hoirung`ae paw, kha-e uccaw`ae khate kungku`ae paw tuh amaw tuasahnaw rawrinaw keiccuze, asawpi langkhe a thadyn cih`ae zah rawte, khuite, ¹⁶ ‘Ezou, ezou, nebaleihpaw uccaw, kadipa uccaw te sekakungpaw uccaw lawkuh zah sui te aphutepaw lung`ae te, pale`ae te accaankuh paw khu-e alepipaw khualipi khulou! ¹⁷ Khacih alungpaw hoirungnaw`ae tuh suimilan ccangkheit kya ccakaepaw lang phe a tang vae rei,’ yn ci cih`ae. Te sanphalung uktu`ae miakaw, sanphalung kya a cceihbua`ae paw balyn, sanphalung mung`ae paw, rili kya kungku`ae paw balyn nynh asawpi langkhe thadyn`ae zah, ¹⁸ amaw a ruanaw`ae paw maeekhuh kha he a muih`ae tuh, ‘Khu-e alepipaw khualipi te tei-e khuapi mou alokuhpaw a um?’ cite a sia`ae. ¹⁹ “Te minmin nynh laenoi kha mih lu vawlan phingkuh`ae zah, ‘Ezou, ezou, rili kya a cceih paw sanphalung`ae a hoi`ae paw balyn kha amaw hoirungnaw liate a hoirungsah bua paw khu-e khualipi khulou! Suimilan ccangkheit kyamaw phe aroh vae rei,’ cite rawte khuite a sia`ae. ²⁰ “Pou vaawran, te athyaapaw locceihtu`ae te profeh`ae, amaw tungvaw lungtua oh! Pawccecize Pachia nynh nanning hanlan amaw kha ccae phe a liaru vae!” a cipaw kha ka thae. ²¹ Te a thawsaepaw vaaw ccungccapaw nynh alepipaw sungmia-lung alopaw lung ccangkheit kha lawkuh zah rili lungkhu langkhe vua zah, “Hynh hawte Babilon khualipi tuh myarya ccih lang dae vuabung athua cih zah kharyh muih thua vae lan khyh. ²² Tintang a khua`ae paw roi, tyngdaw khua`ae paw roi, phyly tu`ae paw roi, mungkae tu`ae paw roi kha na kya kharyh thae um vae lan khyh; te kuih ryalawthya`ae paw ccungccaw lukheit san na kya muih lan um vae lan khyh; te sungmia-lung roi mah na kya kharyh thae um vae lan khyh. ²³ Maeekhua a awnaw mah na kya kharyh aw vae lan khyh; te zudy ccangvaepaw te akaepaw liaccanung roi mah na kya kharyh thae um vae lan khyh; pawccecize na kungku`ae tuh laephi kya alesaepaw ccungccaw`ae nynh thua`ae; pawccecize minphuin`ae balyn tuh na nawthyanaw liate ling athua`ae. ²⁴ Te profeh`ae chii, mithyaa`ae chii, te laephi vawlan chia athua`ae paw balyn chii tuh khae khuapi kyakhe muih athua`ae,” a ci.

¹ Hynh-e koute vaawran kya ccungccaw zapi pi kyate thawte accaepaw roi nynh, “Halleluia! Khumnaw, phu-enaw, sawtuanaw te thungnaw tuh, Bawipaw ah Pachia kya-e nynh thua. ² “Pawccecize a byapianaw`ae tuh kyh zah ading; pawccecize a ohhuakunaw liate laephi a rosah paw ohhuanung pi kha bya phe pia vae; te kha-e nung kuih liate luasah athua paw amaw see`ae chii hanlan a tungvaw phe ccaeliaru vae,” a cipaw kha ka thae. ³ Te minmin nynh, “Halleluia! A maeekhuh tuh zungzae te zungzae cia a kaethung,” bua a ci`ae. ⁴ Te piccang`ae lukuin laepali te ahiinpaw rangsaw`ae sapali nynh bakhung`ae zah suitungkhung vawlan a dahung paw Pachia kha beik`ae zah, “Amen! Halleluia!” a ci`ae. ⁵ Te suitungkhung kyate roi yn thua zah, “Nanning Pachia see`ae balynte amaw rawrih`ae paw, adihpaw te alepaw balyn nynh paryhte ah Pachia kha thehoysah oh,” a ci. ⁶ Te ccungccaw zapi pi roi hawte, tuiphua`ae pataepi roi accaepaw hawte, te myarya athungpaw riakawpaw roi hawkhate ka thae. Tuh-e roiccaepaw nynh, “Halleluia! Pawccecize Tynre Cyih Khotu Bawipaw Pachia nynh a uk. ⁷ Lungtua oh sih lah ah lungpaw sah, te amaw kha phu-enaw pya oh sih; pawccecize Tuutaw zudy poi tuh yn thua vae, te a zu tuh amaw te amaw paccynkute a um vae,” a ci. ⁸ Te tuh-e nung tuh nebaleihpaw uccaw, athyaapaw te arawpaw uccaw te ccaanku lan kaw a mue; pawccecize nebaleihpaw uccaw tuh mithyaa`ae kya-e adingpaw cyisahnaw nynh thua. ⁹ Te vaaw ccungccapaw nynh, “ ‘Tuutaw zudy poi kalan kobua athua`ae paw tuh hythuaccou`ae paw nynh thua,’ cite zei,” cite kamaw kha yn hopya. Te aning nynh, “Hynh-e bya`ae tuh Pachia nynh a hopaw ccaccing nynh thua,” yn cipya. ¹⁰ Te kae tuh amaw kha beik khylan a ccu leihpaw khe ka bakhung. Te aning nynh kamaw kha, “Dotua, khahte cyih nan; kae tuh nang ryte ryalahkheihtu nynh ka thua, Jesu kya-e ccaekia a hoi`ae paw na uno`ae ryte ryalahkheihtu nynh ka thua, Pachia kha beik! Pawccecize Jesu kya-e ccaekia tuh profehbyaho paw kya-e muisaw nynh thua,” yn cipya. ¹¹ Te vaawran ahungkuhpaw kha ka muih. Te dotua, arawpaw marang a um. Te kha-e marang vawlan a ccikuh paw tuh Zyn lan um paw cite, Ahmepaw cite ko athua, te aning nynh dingnaw kya byapia zah rhaw a tuk. ¹² A mit tuh maeesoi hawte nynh thua. A lu vawlan suilukhung`ae a khungkuh. Te amaw laelan hung ccungccaw nynh san a ny leipaw min azeikuh paw a hoi. ¹³ Te chii kya moh dung paw bania-angki kha a kiku. Te a min tuh “Pachia Bya” a cikuh. ¹⁴ Te vaawran e rhawkaw`ae nynh arawpaw marang`ae ccikute, raw zah athyaapaw nebaleihpaw uccaw`ae kha lawkute amaw kha a zui`ae. ¹⁵ Te minphuin`ae kha ziabua nawlan ahepaw thaloi tuh a khalang lungkhu te a pou. Aning nynh minmin kha sivaw hoitang te a uk cih`ae. Athung Huaccepaw Pachia thinrianaw te renaw athua paw misu mianawpaw kha aning nynh a syde cih. ¹⁶ Te a bania vawlan te a phae vawlan khe, “SIAPHARAN`AE SIAPHARAN, TE BAWI`AE BAWIPAW,” cite azeikuh paw min kha a hoi. ¹⁷ Te vaaw ccungccapaw lukheit nynh khuanin kya a thadyn paw kha ka muih. Aning nynh vawlae angaelung kya a zou`ae paw pavaw`ae balyn kha roi thawte accae lante ko`ae zah, “Rang oh lah alesaepaw Pachia kya-e loohdangkunaw kalan naemaw te naemaw oun sueluakuh oh; ¹⁸ ou tuhte siapharan`ae ngesaw, rhawbawi`ae ngesaw, a thawsaepaw ccungccaw`ae ngesaw, marang`ae ngesaw te marangccikuh`ae paw ngesaw, a luepaw te see, adihpaw te alepaw paryh, ccungccaw balyn ngesaw kha na ae ccaw oh oun sueluakuh oh,” cite a sia. ¹⁹ Te sarepaw, te laephi siapharan`ae te mih rhawkaw`ae nynh marang tungvaw a ccikuh paw te a rhawkaw`ae kha rhawtuk khylan pynkheihlan oun sueluaku`ae paw kha ka muih. ²⁰ Te sarepaw kha phe a kyng`ae. Te sarepaw kyae syntawnaw a hoi`ae paw te sarepaw azuh a beik`ae paw kha ling`ae zah sarepaw malang muihsanaw a langsakuh paw ahme leipaw profeh kha mah amaw ryte a kynbua`ae. Hynh-e luning`ae hynh paryhte a hiin`ae pite, kemaee te aruanaw maee tuili lungkhu lang a vua`ae. ²¹ Tuhlaepaw kha marang tungvaw a ccikuh paw a khalang lungkhu te yn pou paw thaloi khate chia athua`ae; te pavaw`ae balyn nynh minmin ngesaw kha phe byn lan a ae`ae.

¹ Te a kuih kya, alaethy um leipaw hunghua toh te alepipaw sivarui a ccyng paw vaaw ccungccapaw lukheit vaawran kyate yn rungbung paw kha ka muih. ² Te aning nynh langmaw-e fupaw, diabolos te Setan athuapaw nakafupi kha kyng zah kum thungkheit lungkhu phang a khii. ³ Te kum thungkheit phe accing cia minphuin`ae kha kharyh a ling vae khyh ccaw cite amaw kha alaethy um leipaw hunghua lungkhu lang vua zah phang khawsung zah avawlan tazeih phe a khia. Kum thungkheit accing koute aning tuh ccyh sosoh supya athua cih. ⁴ Te suitungkhung`ae te kha-e vawlan a dahung`ae paw kha ka muih. Minmin tuh byapianaw kaw a mue`ae. Te sarepaw te amaw azuh kha a beik lei`ae paw, mih terui kya khyh ze mih kuih kya sarepaw syntawnaw a hoi lei`ae paw, te Jesu ccaekiakhannaw keiccu te Pachia bya keiccuze mih lupae`ae paw mih muisaw`ae kha ka muih; te minmin tuh hiin`ae zah Kri ryte kum thungkheit a uk`ae. ⁵ Thuasalama tuhlaepaw a chih`ae paw tuh kum thungkheit athang makhia bua hiin khyh`ae. Hynh-e thothuinaw tuh masaty thothuinaw nynh thua. ⁶ Masaty thothuinaw kya a ungbua paw tuh hythuaccoupaw te athyaapaw nynh thua. Tuhtahawpaw ccungccaw tungvaw kya vaeningnaw chinaw nynh kaw hoi vae khyh; thuasalama minmin tuh Pachia ranpibawi`ae te Kri ranpibawi`ae athua vae cih`ae zah Kri ryte kum thungkheit a uk vae cih`ae. ⁷ Te kum thungkheit he athang te Setan tuh thung a ccawnaw kyate supya athua cih zah, ⁸ Gog te Magog acikuh paw, laephi kipali kya a um`ae paw minphuin`ae kha ling khylan, te rhawtuk lan minmin kha suelua khylan po a cceih cih, minmin namba tuh ria lanze rili laesia hawte nynh thua. ⁹ Te minmin tuh laephi akonaw vawlan cceihthung`ae zah mithyaa`ae umnaw hmin te sungsahpaw khuapi kha po a voilu`ae. Te vaawran lungkhu te Pachia kyate maee ccahbung zah minmin kha marya a ro`ae. ¹⁰ Te sarepaw te ahme leipaw profeh a umnaw`ae athua paw, kemaee te maee tuili lungkhu langkhe minmin a ling`ae paw diabolos tuh ccaring vua athua, te minmin tuh khuazi khuadae zungzae te zungzae cia vawsawnaw pya athua vae cih`ae. ¹¹ Te alepipaw arawpaw suitungkhung te kha-e vawlan a dahung paw kha ka muih, khae paw mitmae kyate laephi te vaawran tuh ccue`ae zah mih hanlan umnaw muih lan um vae khyh. ¹² Te a chih`ae paw, adihpaw te alepaw nynh Pachia malang a thadyn`ae paw kha ka muih; te ccauh`ae kha a kia`ae. Te Hiinnaw Ccauh athua paw ccangpaw ccauh kha mah kia athua. A chih`ae paw tuh mimaw mih ryalaw`ae thyhte, ccauh`ae kya azeikuh paw uccaw`ae thyhte byapia athua`ae. ¹³ Te rili nynh a kya um paw a chih`ae paw kha a poukhae, te Chinaw te Michikhua nynh mih kya um paw a chih`ae paw kha a poukhae`ae. Te ccungccaw miakaw tuh mih ryalaw`ae thyhte byapia athua`ae. ¹⁴ Te Chinaw te Michikhua tuh maee tuili lungkhu lang vua athua`ae. Hynh-e chinaw tuh vaeningnaw chinaw nynh thua. ¹⁵ Te Hiinnaw Ccauh kya a min azeikuh paw muih athua leipaw miakaw tuh maee tuili lungkhu lang vua athua`ae.

¹ Te athawpaw vaawran te athawpaw laephi kha ka muih; pawccecize masaty vaawran te masaty laephi tuh phe azo vae, te rili mah um vae khyh. ² Te kae, Johan nynh athyaapaw khualipi athua paw, Athawpaw Jerusalem tuh a vawpaw hanlan a ccaankuh paw akaepaw liaccanung hawte paccynkute, vaawran lungkhu te Pachia kyate yn rungbung paw kha ka muih. ³ Te vaawran kyate roi accaepaw nynh, “Dotua oh, Pachia kya-e beikbuu tuh ccungccaw`ae ryte nynh a um vae, te Pachia tuh minmin ryte a um vae cih, te minmin tuh a ccungccaw`ae athua vae cih`ae. Te Pachia amaw tuh minmin ryte a um cih zah mih Pachia athua vae cih. ⁴ Te Pachia nynh mih mit kyate mitphi balyn kha a fupah cih`ae. Chinaw um vae lan khyh. Ngaethyanaw, rawnaw, accihpaw cipaw um vae lan khyh; pawccecize langmaw-e uccaw`ae tuh pung azo vae`ae,” cite a ho paw kha ka thae. ⁵ Te suitungkhung vawlan a dahung paw nynh, “Dotua oh, pawpaw balyn kha athawpaw lang ka rae vae,” a ci. Te aning nynh kamaw kha, “Zei, pawccecize hynh-e bya`ae tuh akyhpaw te zyn lan um paw nynh thua,” yn cipya. ⁶ Te aning nynh kamaw kha, “Phe athang vae. Kae tuh Alfa te Omega, Athonaw te Athangnaw nynh ka thua. A tuihawpaw ccungccaw kha hiinnaw tuivanaw kya-e tui kha alakaw te ka pya cih. ⁷ A taetupaw tuh pawpaw balyn rhoccou cih, te kae tuh a Pachia ka thua cih zah aning tuh ka ccapaw athua cih. ⁸ Thuasalama mih rawthah`ae paw, a zyn lei`ae paw, luathua-ae-ui lang um`ae paw, ccungccatheih`ae paw, a ohhuakuh`ae paw, nawthya`ae paw, zohtuhbeik`ae paw, a hyng`ae paw balyn tuh kemaee te maee ryte aruapaw maee tuili kyakhe nynh mih hanpaw a hoi cih`ae, tuh-e tuh vaeningnaw chinaw nynh thua,” yn cipya. ⁹ Te nyathyakou e vawsawnawpi ccangsari te phe beihpaw pakekhupaw ccangsari a ccyng`ae paw vaaw ccungccaw`ae lusari kyaze lukheit tuh kamaw kalan yn thua. Te kamaw kha bya yn beih zah, “Hynhlang rang, Tuutaw zu, akaepaw liaccanung kha kae muihsah cih,” yn cipya. ¹⁰ Te aning nynh alepipaw te ahangpaw mua kalan khe kamaw kha Muisaw kya yn cciakhae zah alepipaw khualipi, athyaapaw Jerusalem tuh vaawran lungkhu te Pachia kyate yn rungbung paw kha yn muihsah. ¹¹ Tuh-e khualipi tuh Pachia kya-e phuenaw a hoi. A awnaw tuh lungawmito hawte accipaw jasper lung hawkhate, aphute huapaw lung te nynh aloku. ¹² Te koikua haw laening um paw alepipaw te ahangpaw khua lungrua a hoi, tuh-e koikua`ae kya vaaw ccungccaw`ae haw laening a um, te kha-e koikua`ae kya Israel ccaaw`ae phin haw laening min kha zei athua. ¹³ Nithua lang koikua ccangthung, palung lang koikua ccangthung, deilang koikua ccangthung, te niccaw lang koikua ccangthung a um. ¹⁴ Te khuapi kya-e khua lungrua tuh athonaw lungbing haw laening a um, tuh-e`ae kya Tuutaw kya-e locceihtu`ae luhaw laening min a um. ¹⁵ Te kamaw ryte bya a ho paw tuh-e paw tuh khualipi, kha-e kya-e koikua`ae te kha-e khua lungrua kha tou nawlan sui phaeku ccangkheit a hoi. ¹⁶ Te khualipi tuh kipali te phe anginkuh. Asaepaw tuh akopaw cih ale. Te aning nynh khualipi kha phaeku te tou zah me thungkheit zapangaw acih. Kha-e kya-e asaepaw, akopaw te ahangpaw tuh phe nginkuh`ae. ¹⁷ Te kha-e khua lungrua kha tou zah vaaw ccungccapaw kya-e tounawpaw thyhte ccungccaw dung te, dung zakheit sungpali dung pali acih. ¹⁸ Kha-e khua lungrua saknawpaw tuh jasper lung nynh thua. Te khualipi tuh ccirarihpaw thawlang te alokuhpaw sui ccipaw nynh thua. ¹⁹ Te khuapi kya-e khua lungrua athonaw`ae tuh aphutepaw lung`ae aphuinphuin te nynh a ccaan`ae. Masaty athonaw tuh jasper lung, ccangningnaw tuh nila lung, ccangthungnaw tuh chalcedony lung, ccangpalinaw tuh emerald lung; ²⁰ ccangpangawnaw tuh sardonyx lung, ccangtaruhnaw tuh sardias lung, ccangsarinaw tuh khrysolite lung, ccangtaryanaw tuh beryl lung, ccangtakuanaw tuh topaz lung, ccanghawnaw tuh chrysoprasus lung, haw laekheitnaw tuh jacinth lung, haw laeningnaw tuh amethyst lung nynh thua. ²¹ Te koikua haw laening`ae tuh pale haw laening nynh thua; koikua ccangkheit cci tuh pale ccangkheit cci nynh thua; te khualipi kya-e laanpi tuh awrarihpaw thawlang hawte sui ccipaw nynh thua. ²² Te kha-e khualipi kya tempal ka muih khyh; pawccecize Athung Huaccepaw Bawipaw Pachia te Tuutaw tuh kha-e khualipi kya-e tempal nynh thua. ²³ Te kha-e khualipi kya a aw nawlan khuanin ho vae khyh, sawpaw mah ho vae khyh; pawccecize Pachia phuenaw nynh kha-e kha a awsah, te Tuutaw tuh kha-e kya-e awnaw nynh thua. ²⁴ Te khumnaw a mue`ae paw minphuin`ae nynh kha-e khualipi a awnaw kyakhe a pae cih`ae; te laephi siapharan`ae nynh mih phu-enaw te sawtuanaw kha kha-e lungkhu lang a thuakhae cih`ae. ²⁵ Te kha-e kya-e koikua kha khuadae ccyh kya kharyh khaw thua vae lan khyh; pawccecize tuin kya khuazi mazi um vae lan khyh. ²⁶ Minphuin`ae kya-e phu-enaw te sawtuanaw kha minmin nynh kha-e lungkhu lang oun thuakhae cih`ae. ²⁷ Kha-e lungkhu lang anungsikuhpaw uccaw teekhae thua lan khyh, luathua-ae-ui lang um paw ryalah paw, tukhyhze ahyngpaw tuh kha-e lungkhu lang kharyh tee lan khyh, thuasalama Tuutaw kya-e Hiinnaw Ccauh kya min zei athua`ae paw rou nynh a tee cih`ae.

¹ Te Pachia suitungkhung te Tuutaw suitungkhung lungkhu te yn pou paw, lungawmito hawte accipaw, hiinnaw tui kya-e ccirarihpaw vaw kha vaaw ccungccapaw nynh kamaw kha yn muihsah. ² Kha-e khuapi-e laanpi ngaelung te kha-e vawpi hawlang hawlang khe thingthae phin haw laening athae paw hiinnaw thingku a um. Tuh-e thingku tuh sawpaw takyhte a thae a pousah. Te tuh-e thingku anaw tuh minphuin`ae dansanaw hanlan nynh thua. ³ Thyalawnaw kharyh um vae lan khyh, thuasalama tuh-e khuapi kya Pachia kya-e te Tuutaw kya-e suitungkhung a um cih zah Pachia ryalawpatu`ae nynh amaw kha ryalawpah vae cih`ae. ⁴ Minmin nynh amaw mitmae kha a muih cih`ae zah amaw min tuh mih terui kya zei athua vae cih. ⁵ Tuin kya khuazi um vae lan khyh. Minmin tuh maeekhua ho vae lan khyh, khuanin kya-e awnaw mah ho vae lan khyh. Pawccecize Bawipaw Pachia nynh minmin kha awnaw a pya `ae, te minmin tuh zungzae te zungzae cia a uk vae cih`ae. ⁶ Te vaaw ccungccapaw nynh kamaw kha, “Hynh-e bya`ae tuh zyn lan um paw te ahmepaw nynh thua,” yn cipya. Athyaapaw profeh`ae mih Bawipaw Pachia nynh aro mawze yn cyikuh hahe cih paw uccaw`ae kha a ryalawpatu`ae kalan langsapya khylan a vaaw ccungccapaw kha yn saw vae. ⁷ “ Dotua oh, kae tuh arangte kae thua vae cih. Hynh-e ccauh kya-e phytypaw bya`ae kha a ccykekuh paw ccungccaw tuh hythuaccoupaw nynh thua,” a ci. ⁸ Te kae, Johan nynh hynh-e uccaw`ae kha ka muih zah ka thae. Te he ka thae zah he ka muih tuh hynh-e uccaw`ae kamaw yn muihsah paw vaaw ccungccapaw ccu leihpaw khe beik lan cite ka bakhung. ⁹ Oute aning nynh kamaw kha, “Dotua, hynhte cyih nan, pawccecize kae tuh namaw ryte ryalahkheihtu nynh ka thua, te na uno`ae profeh`ae te hynh-e ccauh kya-e bya a ccykekuh`ae paw ryte ryalahkheihtu nynh ka thua. Pachia palia kha beik,” yn cipya. ¹⁰ Te aning nynh kamaw kha, “Hynh-e ccauh kya-e phytypaw bya`ae kha tazeihkhia nan; pawccecize accyh tuh anae vae. ¹¹ Atazae leipaw ccungccaw tuh tazae leite um ccaleih hin sah, a nungsikuh paw tuh nungsikuh ccaleih hin sah, adingpaw tuh ding ccaleih hin sah, athyaapaw tuh thyaa ccaleih hin sah,” yn cipya. ¹² “Dotua oh, kae tuh arangte kae thua vae cih. Te ccungccaw miakaw kha a ryalaw thyhte pya khylan kamaw kya-e ryalaw mee kha kae ccyngbia. ¹³ Kae tuh Alfa te Omega, Athonaw te Athangnaw, Masaty te Nyathyakou nynh ka thua,” a ci. ¹⁴ Hiinnaw thingku kya kaw a hoibua nawlan`ae te khualipi lungkhu lang koikua`ae kyate a teebua nawlan`ae, a kawpyapaw`ae a zui`ae paw tuh hythuaccou`ae paw nynh thua`ae. ¹⁵ Tuhzemah atolang tuh ui`ae, nawthya`ae paw, a ohhuakuh`ae paw, ccungccaw theihtu`ae, zohtuhbeik`ae paw, te hyngbya kha sungsah zah a ho paw miakaw nynh a um`ae. ¹⁶ “Kae, Jesu nynh kriccawbu`ae kya hynh-e uccaw`ae hynh nanning kalan ccaekiakhan sah khylan ka vaaw ccungccapaw kha kae saw. Kae tuh David Atharui te a Ciihan nynh ka thua, Phaephae ahpaw te Nizy Awsi nynh ka thua,” a ci. ¹⁷ Te Muisaw te akaepaw liaccanung nynh, “Rang!” a ci`ae. Te a thae paw ccungccaw nynh, “Rang!” ci sah. Te a tuihawpaw ccungccaw tuh rang sah. Te hunghung zemah a ry paw ccungccaw tuh hiinnaw tui kha alakaw te lawkuh sah. ¹⁸ Pawccecize hynh-e ccauh kya-e hotypaw bya`ae a thae paw ccungccaw miakaw kalan kae nynh ccaekia ka khan paw tuh: lukhakheit nynh hynh-e uccaw`ae hynh a biachih lanze, hynh-e ccauh kya azeikuh paw vawsawnawpi`ae kha Pachia nynh kha-e paw tungvaw a biachih cih. ¹⁹ Te lukhakheit nynh hynh-e phytypaw ccauh kyae bya`ae kha a lawbang lanze, Hiinnaw Ccauh kyate thuasah, athyaapaw khualipi lungkhu te thuasah, hynh-e ccauh kya zei athua paw uccaw`ae kyate thuasah, a hanpaw kha Pachia nynh phe a lawpah ru cih. ²⁰ Hynh-e uccaw`ae kong ccaekiakhantupaw nynh, “Thanccingte, kae tuh arangte kae thua vae cih,” a ci. Amen. Tuhmawte Bawipaw Jesu yn thua ccavae. ²¹ Ah Bawipaw Jesu Kri kya-e thawccinaw tuh nae balyn kya la um sah. Amen.