Philippians

¹ Jesu Kri see`ae Paul te Timote nynh Filipi khua um`ae paw, Jesu Kri kya-e mithyaa`ae balyn, dooihtu`ae te kriccaw piccang`ae nae kalan kae beihlang oh. ² Ah Paaw Pachia te Bawipaw Jesu Kri kya-e thawccinaw te daenaw tuh nanning tungvaw kya la um sah. ³ Nanning liathuinaw takyh kya ka Pachia kalan lungtuabya ka ho. ⁴ Nanning balyn hanlan ka sawsangnaw takyh kya lungtuate ngiapyanaw kha pei ka rae. ⁵ Pawccecize, thehoypaw kya nanning na umbuanaw oh paw tuh masaty nin kyate atu cia, ⁶ nanning kya ahoypaw ryalaw phe a tho vae paw Pachia nynh Jesu Kri nin a thua cia kha-e kha a ccingsah cih cite hynh-e uccaw kong kya zynkunaw ka hoi. ⁷ Nanning balyn kong tua lanpaw tuh ka hanlan accanpaw nynh thua. Pawkeiccumacize thehoypaw kong thung ka ccawnaw`ae kya thuasah, thehoypaw elan ka thungkhawkunaw kya thuasah, thehoypaw ka tynsanaw kya thuasah nanning balyn tuh kamaw ry thawccinaw a neethungkuh bua`ae paw na thua oh keiccu nanning tuh ka thinlung kya na um oh. ⁸ Pawccecize Jesu Kri thawccinaw te nanning balyn kha pawcih babang nynh kae ngae oh cipaw Pachia tuh ka ccaekia nynh thua. ⁹ Te saw ka sang paw tuh nynaw kya te phiathyanaw balyn kya nanning sungsanaw tuh houhouh alungthung nawlan, ¹⁰ ahoy huaccepaw uccaw`ae kha nanning nynh nae nawccawkhae nawlan, nanning nynh thinlung thanccing na thua nawlan oh, te Kri nin kyacia ccaenaw um leipaw na thua nawlan oh, ¹¹ Pachia phu-e nawlan te thehoysah nawlan, Jesu Kri liate athua paw dingnaw kya-e athae`ae khate phe na bia nawlan oh saw ka sang. ¹² Thuasalama uteno`ae, ka tungvaw acyikuh paw uccaw`ae tuh thehoypaw houh apazaeku nawlan nynh acyiku cipaw kha nyh oh ci ka ry. ¹³ Ou tuhte Kri keiccu kae oun khiinaw`ae paw tuh siapharan inn ngawtu`ae khaleihte tuhlaepaw`ae kalan balyn a langkuh. ¹⁴ Te Bawipaw kya uteno`ae alunghua tuh, kamaw oun khiinaw`ae paw keiccu zynkunaw oun hoi`ae zah Pachia bya ho lan rawthungnaw houh hoi vae`ae. ¹⁵ Ccungccaw abang nynh eiungnaw te peku maekunaw lante Kri kong kha a ho ccaccing`ae. Abang nynh mah ahoypaw rynaw lante a ho`ae. ¹⁶ A hoty`ae paw nynh thinlung ccaccingte thua leite, eikurynaw te, kamaw oun khiinaw`ae kya vawsawnaw khyngchih khylan tuakute mimaw elan eenaw te Kri kong kha a ho`ae. ¹⁷ Thuasalama nyalang a ho`ae paw nynh kae tuh thehoypaw thungkhawnaw hanlan khang paw nynh thua cipaw nybiate sungsakunaw te nynh a ho`ae. ¹⁸ Tuhte lanze pawte? Pawpawte a ho`ae zemah, cyisakunaw te thua zemah, tukhyhze thanccingte thua zemah, Kri kong tuh ho athua. Te tuh-e kya kae ka lungtua. Ou, ka lung bua tua ung cih. ¹⁹ Pawccecize nanning sawsangnaw liate thuasah, Jesu Kri Muisaw bawngnaw liate thuasah, tuh-e`ae tuh kamaw ka lue nawlan yn tang cih cipaw ka ny. ²⁰ Kae nynh myaryasangkae ka ngaehoi paw ngaehoinaw thyhte pawpaw kya sanmah kae tuh ka maethah lan khyh. Thuasalama ka raw pei hoy hawte, rawhoynaw balyn ryte hiinnaw te tou, tukhyhze chinaw te tou, atu mah Kri tuh ka pyn kya langsaku athua cih. ²¹ Pawccecize kae ka hanlan ka hiin paw tuh Kri nynh thua, te chi lanpaw tuh amia. ²² Thuasalama pynsaw kya kae ka hiin ze, tuh-e tuh ka ryalaw kya-e athae nynh thua, tuhzemah kae nynh pawmou ka poku cih cipaw ka nyh khyh. ²³ Pawccecize kae tuh ccangning laku areihkunaw kya nynh ka um. Pou lan zah Kri ryte umkheih lan rynaw ka hoi, tuh-e tuh myarya ahoy huapaw nynh thua. ²⁴ Tuhzemah pynsaw kya kae ka hiin ung lanpaw tuh nanning hanlan houh ahopaw nynh thua. ²⁵ Te hynh-e zynkunaw hynh hoite, nanning lethungnaw hanlan te nae zynnaw kya-e lungtuanaw hanlan kae tuh ka um cih zah nanning balyn ryte ka um ung cih cipaw ka ny. ²⁶ Ou tuhte nanning kalan bua kae thuanaw liate, nae kya-e lungtuanaw tuh Jesu Kri kya houh alung nawlan. ²⁷ Pawpawte thua zemah nanning nae umtu ziazae tuh Kri kya-e thehoypaw te, angaekuh lante thuasah. Ou tuhte kae kae thua zah nanning kae muih oh ze thuasah, tukhyhze kae ka um khyh ze thuasah, nanning tuh thehoypaw te asekuhpaw zynnaw hanlan tuanaw pynkheihlan na zuakuh oh zah muisaw ccangkheit kya tynkaring lang na thadyn oh cipaw nanning kong kha kae nynh ka thae nawlan. ²⁸ Te pawpaw kya sanmah nae rhaw`ae raw kha rih nan oh. Tuh-e tuh minmin hanlan ronawpaw a langsakuh paw muihsanaw nynh thua, thuasalama nanning hanlan tuh khumnaw nynh thua, tuh-e tuh Pachia kya-e nynh thua. ²⁹ - ³⁰ Pawccecize kamaw kya na muih oh paw te atu na thae oh paw alokuhpaw rhawdounaw kha na hoi oh thyhte, amaw kha zyn lanpaw kyalya thua leite, thuasalama amaw hanlan teingbia lanpaw kha Kri ccelang nanning kalan pya athua.

¹ Tukeiccu Kri kya thawzungpyakunaw ccangkhakheit a um ze, sungsakunaw kya-e ngaengannaw ccangkhakheit a um ze, Muisaw kya-e vaeccawkunaw ccangkhakheit a um ze, te tuapyanaw thinlung te ngaethyaumsakunaw ccangkhakheit a um ze, ² nanning nae lunglokute alokuhpaw sungsakunaw hoibiate, nawccawkheihnaw te, te tuanawthinlung ccangkheit hoibiate, nanning nynh ka lungtuanaw kha oun ccingsah oh. ³ Peku maekurynaw te, tukhyhze accakaepaw pookunaw te pawsang mah cyih nan oh, thuasalama lu raveih nynh mingccang`ae kha amaw laeze ahoy huapaw lante zakawsangsakunaw thinlung te tua sah. ⁴ Ccungccaw miakaw nynh maw rya kyalya kha roihku leite mingccang`ae rya kha mah roihbia sah. ⁵ Kri Jesu kya a um paw hynh-e tuanaw-thinlung hynh nanning kya mah la um sah. ⁶ Kri tuh Pachia muinsan phang a ke pite, Pachia ryte nginku khylan kha-e kha luadeku lante tuakuh khyh. ⁷ Thuasalama amaw te amaw kha accakaepaw lang a raeku. Amaw tungvaw see muinsan kha lawkuh zah ccungccaw alo lante yn pui. ⁸ Ccungccaw muinsan kya muih athua, amaw te amaw kha zakawsangsakuh zah chinaw kyacia, vaelantung kya-e chinaw ccaccei kyacia kaw a ngae. ⁹ Tukeiccu Pachia nynh mah amaw kha kou hangthung zah min balyn laeze alesae huapaw min kha amaw a pya. ¹⁰ Ou tuhte vaawran um`ae paw, laephi vaw um`ae paw te lae kaw um`ae paw miakaw nynh Jesu min kya ccukharu a tung cih`ae zah, ¹¹ Paaw Pachia phu-e nawlan khalang miakaw nynh Jesu Kri tuh Bawipaw nynh thua cite a ci cih`ae. ¹² Tukeiccu ka sungsah`ae paw, kamaw ka um lya kyalya thua leite, nanning nynh kaw pei na ngae oh hawte, atu kamaw ka um khyhnaw kya houh kawngae te, rinaw te thyngkunaw te naemaw khumnaw elan ryalah oh. ¹³ Pawccecize amaw lungrythuapaw ahoypaw kha ry lan te cyi lan nanning kya ryalah paw tuh Pachia nynh thua. ¹⁴ Ccohku leite, eiku leite pawpaw balyn kha cyih oh. ¹⁵ Ou tuhte a lungkou paw te a ccouseikuh paw minphuin`ae laku kya nanning tuh ccaenaw um leipaw, seibe lan um leipaw, thuihei aho leipaw, Pachia ccaaw`ae na thua nawlan oh, kha-e`ae laku laephipi kya nanning tuh awnaw`ae hawte na aw oh. ¹⁶ Hiinnaw bya kha varyn kyngkuh oh; ou tuhte kae tuh alakaw lang ka ccuehang khyh cipaw, alakaw lang rya ka lahhan khyh cipaw kha Kri nin kya ka lungtua nawlan nynh thua. ¹⁷ Athua, nae zynnaw ryalawnaw te silawnaw vawlan kae tuh nia lan pyapaw-uccaw ka thua heize, ka lungtua zah nanning balyn ryte ka lungtua cih. ¹⁸ Tuhhawte nanning mah lungtua oh, kamaw ryte lungtua oh. ¹⁹ Thuasalama aro mawze Timote kha nanning kalan saw lan Bawipaw Jesu kha ka doliakuh, ou tuhte nanning kong kha he ka nyh te kae mah ka ngaengan nawlan. ²⁰ Pawccecize aning nynh nanning thanenaw hanlan lungthyaa te dooih rynaw a hoi hawte alokuhpaw tuanaw a hoi paw ccungccaw hung san ka hoi khyh. ²¹ Pawccecize ccungccaw balyn nynh Jesu Kri kya-e uccaw`ae kha ccung khyh`ae, mimaw kya-e nynh a ccungku`ae. ²² Thuasalama ccapaw nynh paaw ryte rya a law hawte, Timote tuh thehoypaw ryalaw kya kamaw ryte ryalah paw nynh thua cipaw amaw kya-e ccaekia langsakupaw kha na ny oh. ²³ Tukeiccu kamaw kya pawte nynh acyiku cipaw ccahe ka nyh tuh, amaw kha nae kalan palou saw lan ka ngaehoi. ²⁴ Thuasalama kae kamaw mah aro mawze nae kalan kae thua cih cite Bawipaw kha ka doliakuh. ²⁵ Tuhzemah ryalaw kya kamaw te kae mungkuhpaw, kamaw kya a zuikuh bua paw, rhawkaw hawte athua paw, ka ho ka bounaw kya rya yn lawpatupaw, nanning nae zeccuetu athua paw ka neitaw Epafroditas kha nanning kalan saw lan aho cite ka tuaku. ²⁶ Pawccecize aning tuh kou accih cipaw kha nanning nynh phe na thae oh keiccu, aning nynh nanning balyn kha ae ngae oh zah a lungria kou thae. ²⁷ Pawccecize aning tuh vya chih lang a ccih ccaccing; thuasalama Pachia nynh amaw kha ngaethya a umsah. Amaw kyalya ngaethya a umsah paw thua leite, ngaethyanaw vawlan ngaethyanaw ka hoi khyh nawlan kamaw mah ngaethya yn umsah. ²⁸ Tukeiccu amaw kha he bua na muih oh te nae lungtua nawlan, te kae mah ka ngaethyapaw a zyahua nawlan nynh thawte zuakute amaw kha kae saw. ²⁹ Tukeiccu lungtuanaw balyn ryte Bawipaw kya amaw kha lehkhan oh; te khatahaw`ae paw kha sawtua-muintuanaw la pya oh. ³⁰ Pawccecize nanning nynh kamaw nae dooihnaw oh na bou oh paw kha ccingsapya khylan aning tuh a hiinnaw kha duaku leite, Kri ryalaw keiccuze vya a chibia.

¹ Nyathyakou lang ka horypaw tuh ka uteno`ae, Bawipaw kya lungtua oh. Phe alokuhpaw nanning kalan bua zei lanpaw tuh ka hanlan pawtua um khyh, thuasalama kha-e tuh nae hanlan khynnaw nynh athua. ² Ui`ae kha la raeringkuh oh, ahoy leipaw ryalahtu`ae kha la raeringkuh oh, mih ngesaw a awkuh`ae paw kha la raeringkuh oh. ³ Pawccecize aening tuh Muisaw kya Pachia beik`ae paw, Kri Jesu kya lungtua`ae paw, te pynsaw kya zynkunaw a hoi lei`ae paw, vindung awkuh`ae paw nynh ah thua oh. ⁴ Tuhzemah kae mah pynsaw kya zynkunaw ka hoi paw nynh ka thua. Mingccangpaw lukhakheit nynh pynsaw kya doliaku lanpaw ka hoi cite a tuaku lanze, kae tuh houh ka hoi; ⁵ nin taryanaw kya vindung awkuh paw, Israel minphuin, Benjamin ciihan, Hebru`ae kyaze Hebrupaw, Kawbya te asekuh lante Farasipaw; ⁶ eih rynaw thinlung te asekuh lante kriccawbu a tua a sah paw; Kawbya kya um paw dingnaw te asekuh lante ccaenaw um leipaw nynh ka thua. ⁷ Thuasalama ka hanlan athanepaw kha-e`ae kha Kri keiccuze shungnawpaw lang nynh ka tua vae. ⁸ Athua, ka Bawipaw Jesu Kri nynaw ahoy huaccepaw elan pawpaw balyn kha mah shungnawpaw lang ka tua, kae nynh Kri kha ka mue nawlan amaw hanlan pawpaw balyn kha marya ka shung zah kha-e`ae kha ia lang nynh ka ria, ⁹ te kae tuh amaw kya muih ka thua nawlan, Kawbya kya a um paw kamaw dingnaw kha ka hoi khyh, thuasalama Kri zynnaw liate a muekuh paw dingnaw, zynnaw liate athua paw Pachia kya-e dingnaw kha nynh ka hoi. ¹⁰ Ou tuhte kae nynh amaw kha thuasah, a thothuinaw kya-e thungnaw kha thuasah, a teingnaw neethungku buanaw kha thuasah ka ny nawlan, a chinaw kya amaw ka lobua nawlan, ¹¹ a chih`ae paw kyate thothuinaw kalan pawpawte zemah ka phyabua nawlan ka ry. ¹² Phe ka phahbua vae cipaw thua khyh; phe ka ccing vae cipaw mah ka thua khyh; thuasalama Kri Jesu nynh yn kyngnuathepaw hanlan kae nynh kha-e kha ka kyng nawlan ka deesui. ¹³ Uteno`ae phe ka kyng vae cite kamaw te kamaw ka tuakuh khyh, thuasalama ka cyi paw ccangkheit tuh nuhlang-e uccaw`ae kha ningte, malang um paw uccaw`ae kha phyate, ¹⁴ Kri Jesu kya luki lang-e Pachia konaw te asekuhpaw zuakunaw te mue paw lasung hanlan eenaw kuetung kalan ka ccuebua. ¹⁵ Tukeiccu piccang athua vae paw miakaw nynh khahtahawpaw tuanaw-thinlung kha hoi oh sih; te ccangkhakheit kya nanning nynh ccanglang te na tua oh ze, kha-e maw kha Pachia nynh nae kalan ae phypah cih oh. ¹⁶ Tuhzemah phe ah phya vae oh paw kalan khe, alokuhpaw phung thyhte cceih oh sih, alokuhpaw tuanawthinlung hoi oh sih. ¹⁷ Uteno`ae, kamaw thydokuh`ae paw thua oh, dosuinku lanpaw kaening hynh nae hoi vae oh thyhte, ou khate a hiin`ae paw kha la dokuh oh. ¹⁸ Pawccecize ccungccaw patae tuh Kri kya-e vaelantung rhaw`ae nynh thua`ae, tuhte a hiin`ae cipaw, minmin kong kha langmaw pei kae hopah vae oh zah atu mitphi te kae hopya ki oh. ¹⁹ Kha-e`ae athangnaw tuh ronaw nynh thua, mih pachia tuh mih vuebua nynh thua, mih phu-enaw tuh mih maethyanaw kya nynh thua, laephi uccaw`ae kha nynh mih thinlung kya a um. ²⁰ Thuasalama aening ram ccungccawthuanaw tuh vaawran kya nynh thua. Tuin kyate yn thua lanpaw Khumtu Bawipaw Jesu Kri kha aening nynh mah ah ngaw oh. ²¹ Pawpaw balyn kha amaw zakaw nung lan aning tuh a cyih kho, kha-e liate a ryalawnaw thyhte a nyaapaw aening pyn hynh aphu-epaw amaw pyn alo lante yn rulae cih.

¹ Tukeiccu ka lungtuanaw te ka suilukhung na thua oh paw, kou ka sungsah`ae zah kou ka ngae`ae paw, ka uno`ae, Bawipaw kya tynkaring lang thadyn oh, kou ka sungsah`ae paw. ² Bawipaw kya tuanawthinlung aloku nawlan`ae Euodia kha thawte ka ngia zah Syntykhe kha mah thawte ka ngia. ³ Te ahmepaw ryalahkheihtu nang kha mah kae ngia; kamaw ry, Klement ry, te hiinnaw ccauh kya mih min um`ae paw tuhlaepaw kamaw ry ryalahkheihtu`ae ryte, thehoypaw ryalawnaw kya ryalahbua`ae paw nopi`ae kha la bawng`ae. ⁴ Bawipaw kya pei lungtua oh. Bua kae ho hin, lungtua oh! ⁵ Nae lungnenaw kha ccungccaw`ae balyn nynh nyh`ae sah. Bawipaw tuh nae pe a um. ⁶ Pawpaw elan sanmah nae thinphang nan sah; thuasalama pawpaw balyn kya lungtuabya hote, sawsangnaw te ngianaw liate na ngiaku ry oh paw kha Pachia kalan nysah oh. ⁷ Te thaethyanaw balyn nynh a phya kho leipaw Pachia kya-e daenaw nynh Jesu Kri liate nae thinlung`ae te nae tuanaw`ae kha ae khynsah cih oh. ⁸ Nyathyakou lang uteno`ae, ahmepaw, sawtua lan um paw, adingpaw, athyaa-accipaw, ry lan um paw, thehoyccousah lan um paw; ccangkhakheit tuh aphute lanze, thehoysah lan angaeku lanze, kha-e`ae kha nae thinlung kya la tua oh. ⁹ Te nanning nynh kamaw kya phe na ccangkuh vae oh zah phe na lawku vae oh paw, phe na thae vae oh zah na muih vae oh paw, kha-e`ae kha la cyih oh, te daenaw Pachia tuh nanning kya a um cih. ¹⁰ Thuasalama atu nyathya kya kamaw nae dooihnaw oh paw tuh paepae bua alui pawte kae tuh Bawipaw kya myarya ka lungtua; nae la dooih oh zemah ccyhhoypaw na la mue khyh oh. ¹¹ Ka ho ka bou keiccuze ka hopaw thua khyh, pawccecize kae tuh pawtahawpaw kya ka um zemah lungccingkhaeku lan phe ka ccangku vae. ¹² Nyaasaku zia ka thya zah hoirung zia ka thya; vueso lan thuasah, vuelaw lan thuasah, hoirung lan te ryachi teing lan, teitei balyn kya te pawpaw balyn kya kae tuh ccangpya ka thua vae. ¹³ Kamaw thawzung yn pyatupaw Kri liate pawpaw balyn kha ka cyi kho. ¹⁴ Tuhzemah ka vawsawnaw na neethungku bua oh paw tuh kou hoy lang phe na cyi vae oh. ¹⁵ Thehoypaw hopaw athotakaw lya, Mesidonia ram kyate he ka pou lyakha, pyanaw te muenaw kya nanning holeite teitei-e kriccawbu nynh sanmah kamaw ryte neethungkuh bua khyh cipaw kha nanning Filipi`ae nynh mah na ny oh. ¹⁶ Pawccecize Thesalonika khua ka um lya heize, ka hanlan ahoboupaw kha vaekheit kyalya thua leite, bua nae ky oh. ¹⁷ Lasung kha ka ccungkupaw thua khyh, thuasalama na ccykunaw oh kya paepae aluipaw amia kha nynh kae ccungpya oh. ¹⁸ Thuasalama kae tuh pawpaw balyn ka hoi zah ka hoirung. Amynkhuhpaw, Pachia lungrythuasahpaw, douccahpaw silawkunaw athua paw, nanning nynh nae ky oh paw uccaw`ae kha Epafroditas kyate ka mue zah phe beih lang ka hoi. ¹⁹ Thuasalama ka Pachia nynh a phu-enaw kya a hoirungnaw thyhte nanning kya-e ahoboupaw balyn kha Kri Jesu liate ae pya cih oh. ²⁰ Atu ah Paaw Pachia tuh zungzae te zungzae cia phu-esah. Amen. ²¹ Kri Jesu kya um paw mithyaa`ae balyn kha la beihlang oh. Kamaw ryte a um`ae paw uteno`ae nynh nanning kha ae beihlang oh. ²² Mithyaa`ae balyn nynh ae beihlang oh, abapi lante Sizar inn kya um`ae paw nynh ae beihlang oh. ²³ Ah Bawipaw Jesu Kri kya-e thawccinaw tuh nae balyn kya la um sah. Amen.