Philemon

¹ Jesu Kri keiccu thung a ccah paw Paul te kae unopaw Timote nynh kou sungsahpaw te rya kae lahkheihpaw Filemon kalan, ² te kae sungsahpaw Apphia te rhawkaw kae thuakheih paw Archippus kalan te na innbyn kya um paw kriccawbu kalan ccaw kae ky oh. ³ Ah Paaw Pachia te Bawipaw Jesu Kri kyate thawccinaw te daenaw tuh nae kya la um sah. ⁴ Ka sawsangnaw kya nang kha pei sangpya biate ka Pachia kalan lungtuabya ka ho. ⁵ Pawccecize nang nynh Bawipaw Jesu kalan te mithyaa`ae balyn kalan na hoi paw na kya-e sungsakunaw te zynnaw kha ka thae pawte, ⁶ Kri Jesu liate na kya um paw ahoypaw uccaw miakaw nynaw liate na zynnaw kya-e hoiccaw tangnaw tuh ccungkia thanepaw lang a tang nawlan saw kae sangpya. ⁷ Pawccecize na sungsanaw kya ngaengansanaw te lungtuanaw alepi kaening kae hoi. Pawkeiccumacize ka unopaw, nang na liate mithyaa`ae thinlung tuh bua lungpawsah athua. ⁸ Tukeiccu nang kawpya lan accanpaw kha Kri liate kae tuh kou ka zynku zemah, ⁹ a kum tang vae paw lukheit athua paw, te atu mah Jesu Kri keiccu thungccahpaw Paul nynh sungsakunaw keiccuze kae ngia paleih. ¹⁰ Thung yn sawnaw`ae kya ka saah paw, ka ccapaw Onesimas hanlan nang kha kae ngia. ¹¹ Langmaw lya aning tuh na hanlan ccungkia khyh, thuasalama atu tuh na hanlan te ka hanlan ccungkia vae. ¹² Amaw kha na kalan bua kae saw. Tukeiccu nang nynh amaw kha leh la khan, tuh-e tuh kamaw ka thinlung kya-e nynh thua. ¹³ Thehoypaw keiccuze thung ka ccaw lungkhu aning nynh nang na ccelang kae kha rya yn lawpya nawlan amaw kha ka kya ka umsah ry paw nynh thua. ¹⁴ Thuasalama na hoynawpaw tuh nangsepaw keiccu hawte thua leite, lungthote athua nawlan na nawccaw leite pawsang ka cyihry khyh. ¹⁵ Pawccecize aning nynh na kyate sosoh taraw a la toikupaw tuh amaw kha nang nynh zungzae na hoi nawlan athua kho ci lante nynh a um. ¹⁶ Atu tuh see lukheit hawte thua vae leite, see laeze ahang lante la ccou ccavae. Abapi lante kamaw hanlan sungsahpaw uno nynh athua vae, te pynsaw lante thuasah, Bawipaw kya thuasah na hanlan pawcihmou houh sungsahpaw thua lan accan. ¹⁷ Tukeiccu nang nynh kamaw hynh ah mungkuhpaw lukheit lante nae tua ze amaw kha kamaw hawte la ccou. ¹⁸ Na tungvaw phe a cyisei ze, tukhyhze ccangkhakheit lae ae um ze, kha-e kha kae nynh laeba ka um paw lang la tua. ¹⁹ E hynh kae, Paul nynh kamaw ka kuih te ka zei paw nynh thua, kha-e kha kae pyaru cih. Tuhzemah nang nynh kamaw kya namaw te namaw heize laeba nae um cipaw kha kae hopah khyh. ²⁰ Athua, ka unopaw, na kyate lungpawnaw kha Bawipaw kya yn muesahbua, Bawipaw min te nang nynh ka thinlung kha bua lungpawsah. ²¹ Nang nynh kaw na la ngae cih cite zynkunaw ka hoi pawte e ccaw hynh na kalan kae zei. Ka hopaw laehei nang nynh na la cyih cih cipaw ka ny. ²² Te ka thuanaw lanpaw kha mah yn la paccynpah; pawccecize nae sawsangnaw liate nae kalan bua thuasah ka thua cih cite ka ngaehoi. ²³ Kri Jesu kya kamaw ryte thung kae ccahkheih paw Epafras nynh nang kha ae beihlang. ²⁴ Te kamaw ry rya kae lahkheihtu`ae Marka, Aristarkhas, Demas te Luka nynh ae beihlang`ae. ²⁵ Ah Bawipaw Jesu Kri kya-e thawccinaw tuh nae muisaw kya la um vae sah. Amen.