Mark

¹ Pachia Ccapaw Jesu Kri thehoypaw athotakawnaw. ² Profeh`ae ccauh kya, “Dotua, na ccianaw a paccyn cih paw ka zeccuetu kha na malang ka saw. ³ Rangkaw kya a sia paw lukheitpaw roi nynh, ‘BAWIPAW a ccianaw kha paccynpah oh, a laanpi kha lawbabinlan raepah oh,’ a ci,” cite azeiku hawte; ⁴ Johan nynh rangkaw khe baptisma insah`ae zah seinaw ngaethyanaw hanlan ngaesikunaw te asekuhpaw baptisma kong kha a ho. ⁵ Te Judah ram um`ae paw balyn te Jerusalem kya um`ae paw balyn tuh Johan kalan oun cceih`ae zah mih seinaw`ae phykute Jordan Vaw khe amaw kya marya baptisma in`ae. ⁶ Te Johan tuh kalauk ming te rae paw uccaw kha lawkuh zah a tae kyakhe saving taesung kha a sungkuh, te tungkhipaw`ae te rangkaw e khoitui kha nynh a ae. ⁷ Te aning nynh, “Kae laeze athung huapaw kamaw koute yn thua cih, tuh-e paw ccukoh rui kha bakhungnua lan zah phoupya lan san kae tuh ka ngaekuh khyh. ⁸ Kae nynh nanning kha tui kya baptisma kae insah ccaccing oh, thuasalama aning nynh tuh Thyaa Muisaw kya baptisma ae insah cih oh,” cite phung a ho. ⁹ Ou tuhte tuin nin`ae kyakhe Galilee pee Nazareth khua kyate Jesu yn thua zah Jordan vaw kyakhe Johan nynh baptisma a insah. ¹⁰ Te tui lungkhu te ccahe yn pou tuh vaawran ahungkuhpaw kha muih zah Muisaw nynh vafu hawte amaw tungvaw khe yn ccuh. ¹¹ Te vaawran kyate roi ccangkheit yn ccae zah, “Nang tuh na kya ka lungrythuapaw ka sungsahpaw ka Ccapaw nynh na thua,” a ci. ¹² Te vaekheihmawte Muisaw nynh Jesu kha rangkaw langkhe a cciakhae. ¹³ Te Jesu tuh rangkaw khe nin sungpali um zah Setan nynh a tuh-ou; te rangsaw`ae ryte umkheih`ae zah vaaw ccungccaw`ae nynh a dooih`ae. ¹⁴ Atu Johan kha thung a sah kou`ae te, Jesu tuh Pachia peenaw thehoypaw kha hote, Galilee pee lungkhu lang yn thua zah, ¹⁵ “Accyh phe accing vae, te Pachia peenaw tuh anae vae, nanning ngaesikuh oh lah thehoypaw hynh zyn oh,” a ci. ¹⁶ Te Galilee Rili pe Jesu po a cceih tuh, Simon te a neitaw Andru nynh rili lungkhu mia vua`ae paw kha a muih, pawccecize minmin tuh ngasaw kyngtu`ae nynh thua`ae. ¹⁷ Te Jesu nynh minmin kha, “Kamaw oun zui oh lah nanning kha ccungccaw kyngtu`ae lang kae rae cih oh,” a cipya`ae. ¹⁸ Te vaekheihmawte minmin nynh mih mia kha cciataw`ae zah amaw kha a zui`ae. ¹⁹ Te tuin kyate rakyh asawnaw lang he thua tuh, kohlung lungkhu mih mia a thue cciamang`ae paw, Zebedi ccapaw James te a neitaw Johan kha Jesu nynh a muih`ae. ²⁰ Te minmin kha palou a ko`ae; te minmin nynh a hoh`ae paw ryalawpatu`ae ryte mih paaw Zebedi kha kohlung kya cciataw`ae zah amaw kha a zui`ae. ²¹ Te minmin tuh Kapernaum khua lang cceih`ae zah Sabbath nin lya Jesu tuh sinakok lungkhu lang palou tee zah a ccangpya`ae. ²² Te a thae`ae paw tuh a ccangpyanaw kha mih ngaeangthua, pawccecize kawbya ccangpatu`ae hawte thua leite, kawhoinaw a hoi paw lukheit hawte minmin kha a ccangpya`ae keiccu nynh thua. ²³ Atu mih sinakok kya athyaa leipaw muisaw bahkuhpaw ccungccaw lukheit a um, te tuh-e paw nynh, ²⁴ “Kae makhaete kae um sah! Nazareth paw Jesu, nang te kaening pawmou kae sekuh? Kaening ro khylan tou nae thua? Nang tuh hung nynh na thua cipaw kae ny, Pachia kya-e Athyaapaw Lukheit nynh na thua!” cite a sia. ²⁵ Te Jesu nynh pe zah, “Yccae nan, kha-e paw lungkhu kyate toikuh,” a cipya. ²⁶ Te athyaa leipaw muisaw nynh kha-e paw kha karae ho lang he a reih koute raerae sia zah kha-e paw lungkhu kyate phe a toikuh. ²⁷ Te ccungccaw`ae balyn tuh mih ngaeangthua zah, “E hynh paw ang mou? E hynh paw athawpaw ccangpyanaw aa mou? Pawccecize kawhoinaw te athyaa leipaw muisaw`ae heize kawpya zah minmin nynh a kaw phe a ngae`ae ccarei,” cite mimaw te mimaw laku bya a khiakuh`ae. ²⁸ Te vaekheihmawte a thungpang tuh Galilee pepan balyn pung apazaekuh. ²⁹ Te sinakok kyate he oun pou`ae te James te Johan ryte Simon te Andru tuh inn lungkhu lang palou a tee`ae. ³⁰ Thuasalama Simon a zu nung tuh ngesawling te ccih zah a ih cipaw kha minmin nynh Jesu kalan palou a hopya`ae. ³¹ Te Jesu nynh cceih zah a kuih te kyng zah a tho, te a ngesawlingpaw vaekheihmawte phe dan zah aning nynh minmin elan ryalawpah vae`ae. ³² Te zete khuanin he ccah tuh, ccinaw hoi`ae paw balyn te raerangsaro bahkuh`ae paw kha amaw kalan oun cciakhae`ae. ³³ Te khuapi balynte thuakawzung khe oun sueluakuh`ae. ³⁴ Te ccinaw aphuinphuin te a ccih`ae paw patae kha dansah`ae zah raerangsaro patae a dee; te raerangsaro`ae kha bya ho lan kaw ua khyh`ae, pawkeiccumacize minmin nynh amaw kha a ny`ae. ³⁵ Te awkhua takaw khuadae maw Jesu tuh tho zah a pou, te ccungccaw um leinaw langkhe cceih zah tuin kya sawsang. ³⁶ Te Simon te amaw ryte um`ae paw nynh Jesu kha a ccung`ae. ³⁷ Te amaw kha he muih`ae tuh, “Ccungccaw balyn nynh nang kha ae ccung`ae,” cite amaw kha a hopya`ae. ³⁸ Te Jesu nynh minmin kha, “Anaenaw khua`ae kalan cceih oh sih, tuin kya phung ka ho ccaw, pawccecize tuh-e khylan nynh kae tuh kae thua,” a cipya`ae. ³⁹ Te Galilee pepan balyn mih sinakok`ae kya po phungho zah raerangsaro`ae kha a dee. ⁴⁰ Te vaethyakaepaw lukheit nynh a kalan yn thua zah a malang bakhungte, “Na ry lanze kae hynh nae thyaasah kho,” cite Jesu kha a ngiaku. ⁴¹ Te Jesu nynh ngaethya-umsah pawte a kuih kha dyng zah kha-e paw kha hae zah, “Kae nynh ka ry, nang thyaa ccavae,” a cipya. ⁴² Te tuhte he a ho kou tuh vaekheihmawte vaethyaccinaw tuh a kyate phe toikuh zah aning tuh phe athyaa vae. ⁴³ - ⁴⁴ Te Jesu nynh, “Hung ccungccaw sanmah bya kaw kheit san la hopah nan, thuasalama la cceih lah namaw kha ranpibawi`ae kalan la dosakuh`ae, te Mawsi nynh kawpya paw kha-e silawnaw kha minmin kalan ccaekia ccangkheit lang na thyaanaw elan la rae,” cite tyntetyn lang byatawsya zah kha-e paw kha palou a saw. ⁴⁵ Thuasalama tuh-e paw nynh cceih zah kha-e kha houh yn phy tuh kha-e thungpang kha pung pazaesaku, tukeiccu Jesu tuh khuapi lungkhu lang alangkuh lante tee kho vae khyh; thuasalama atolang rangkaw khe nynh a um vae, te mih umnaw raveih kyate ccungccaw`ae nynh amaw kalan oun thua`ae.

¹ Te nin sosoh aro koute Jesu tuh Kapernaum khua lungkhu lang bua yn tee zah aning tuh inn lungkhu a um cipaw kha a thae`ae. ² Te vaekheihmawte ccungccaw patae tuh pynkheihlan oun sueluakuh`ae, tukeiccu thuakaw kin cia umnaw um lei lan inn nynh ccung khyh`ae; te Jesu nynh minmin kha phung hopya`ae. ³ Te ccungccaw lupali nynh oun puih`ae paw a kuihccuchihpaw ngeccih lukheit kha amaw kalan oun cciakhae`ae. ⁴ Te ccungccaw zapi keiccuze amaw kalan naekuh kho khyh`ae zah a umnaw luki innccukaly kha a kia`ae; te poh a uasah`ae te ngeccihpaw kha a inawpaw iphae ryte a sawbung`ae. ⁵ Jesu nynh mih zynnaw kha he a muih tuh kuihccuchihpaw kha, “Ka ccapaw, na seinaw tuh ngaethya thua vae,” a cipya. ⁶ Thuasalama tuin kya a dahung`ae paw kawbya ccangpatu`ae abang nynh mih thinlung kya, ⁷ “E paw hynh pawccemou tuhte Pachia saryapaw bya`ae a ho? Pachia laelan hungmou seinaw a ngaethya kho?” cite a tuaku`ae. ⁸ Te Jesu nynh a thinlung kyate mih thinlung kya a tuaku`ae paw kha ccaheih he a nyh tuh minmin kha, “Pawccemou nae thinlung kya hynh-e kong tuhte na tuaku oh? ⁹ Kuihccuchihpaw ngeccihpaw kha, ‘Na seinaw tuh ngaethya athua vae,’ cipya paw tou azoihua, tukhyhze, ‘Thokuh lah na iphae kha lawkuh lah cceih ccavae,’ cipya paw tou azoihua? ¹⁰ Thuasalama nanning nynh Ccungccaw Ccapaw tuh laephi vawlan seinaw ngaethya lan kaw a hoi cipaw na ny nawlan oh,” ci zah, kuihccuchihpaw kha, ¹¹ Jesu nynh, “Nang kae hopya, thokuh lah na iphae kha lawkuh lah na inn lang cceih ccavae,” a cipya. ¹² Te vaekheihmawte aning tuh a thokuh, iphae kha lawkuh zah tuh-e`ae balyn malang khe a cceih vae, ou tuhte minmin balyn tuh mih ngaeangthua zah, “Atu e hawte kharyh kae muih boi khyh,” ci`ae zah Pachia kha phu-esah`ae. ¹³ Te Jesu tuh rili kin lang bua cceih zah ccungccaw zapi balyn tuh a kalan oun thua`ae, te minmin kha a ccangpya`ae. ¹⁴ Te he a cceih tuh ngunto khoinaw kya a dahung paw Alfeas ccapaw Levi kha muih zah, “Kamaw yn zui,” a cipya. Te aning nynh thokuh zah amaw kha a zui. ¹⁵ Ou tuhcihte Jesu tuh Levi inn zete looh-aenaw kya a dahung lya, ngunto khoitu`ae te misei`ae patae mah Jesu te a zuitu`ae ryte pynkheihlan a koihbua`ae, pawccecize tuin kya ccungccaw patae um`ae zah amaw kha a zui`ae. ¹⁶ Te kawbya ccangpatu`ae te Farasi`ae nynh ngunto khoitu`ae te misei`ae ryte a aekheih`ae paw kha he muih`ae tuh minmin nynh a zuitu`ae kha, “Pawcce aning nynh ngunto khoitu`ae te misei`ae ryte aekheih`ae zah a niakheih`ae?” cite a khia`ae. ¹⁷ Tuh-e bya kha Jesu nynh he thae tuh minmin kha, “Adan`ae paw nynh sibawi peki khyh`ae, thuasalama a ccih`ae paw nynh a peki`ae, kae tuh adingpaw ko khylan kae thua khyh, thuasalama misei`ae nynh a ngaesiku ccaw`ae cite nynh kae thua,” a cipya`ae. ¹⁸ Johan zuitu`ae te Farasi`ae zuitu`ae tuh looh-ae leih a sung`ae, te minmin nynh oun cceih`ae zah Jesu kha, “Pawccemou Johan zuitu`ae te Farasi`ae zuitu`ae tuh looh-ae kae sung, thuasalama nang na zuitu`ae ze sung khyh`ae rei?” a cipya`ae. ¹⁹ Jesu nynh minmin kha, “Zudy ccangvaepaw tuh poi oun too`ae paw a uno`ae ry phang a um lya zudy poi oun too`ae paw a uno`ae nynh looh-aesung ngaw`ae ta? Zudy ccangvaepaw minmin ryte a um lungkhu balyn tuh looh-aesung lan khyh`ae. ²⁰ Thuasalama zudy ccangvaepaw minmin kyate lawpya nin yn thua cih, oute tuin nin`ae kya minmin nynh looh-ae oun sung cih`ae. ²¹ “Hung ccungccaw nynh sanmah athawpaw uccaw khate arynpaw uccaw kha bianah boi khyh, a bianaw lanze kha-e athawpaw nynh arynpaw kha poh laah zah houh aseikuh paleih. ²² Te hung ccungccaw nynh sanmah athawpaw misutui kha arynpaw misu-saving bung lungkhu lang ruin boi khyh. A ruin lanze misutui athawpaw nynh misusaving bung kha phae pawsah zah misutui azu, te misu-saving bung tuh aroh; thuasalama athawpaw misutui tuh athawpaw misu-saving bung kya nynh ruin lan accan,” a cipya`ae. ²³ Ou tuhcihte Sabbath nin kya Jesu tuh loo kyakhe po he a cceih tuh, a cceih lalia`ae lante, a zuitu`ae nynh looh avui`ae kha a zuku`ae. ²⁴ Te Farasi`ae nynh Jesu kha, “Dotua, pawccemou Sabbath nin kya kawbya nynh cyi lan a ua leipaw minmin nynh a cyi`ae,” cite a khia`ae. ²⁵ Te Jesu nynh, “David nynh a vuelaw zah ahobou lya amaw ryte um`ae paw ryte paw nynh a cyi cipaw kharyh na ria boi khyh oh tou? ²⁶ Ranpibawi lupi Abiathar nin ccyh lyaze Pachia inn lungkhu lang tee zah ranpibawi laelan hung nynh sanmah ae lan kawbya nynh a ua leipaw, Pachia malang nungpyapaw sanlou kha ae zah amaw ryte um`ae paw kha mah a pyabua`ae paw kha pawcihte?” cite minmin kha a khung`ae. ²⁷ Te Jesu nynh, “Sabbath tuh ccungccaw hanlan nynh rae athua, te ccungccaw tuh Sabbath hanlan thua khyh. ²⁸ Tukeiccu Ccungccaw Ccapaw tuh Sabbath Bawipaw mah athua,” a cipya`ae.

¹ Te Jesu tuh sinakok lungkhu lang bua tee zah, tuin kya a kuih hawkheit lang achihpaw ccungccapaw lukheit a la um. ² Te minmin nynh seibe khylan, Sabbath nin kyakhe kha-e paw kha yn dansah ta, yn dansah khyh ta cite amaw kha a dokhaw`ae. ³ Te Jesu nynh a kuih achihpaw ccungccapaw kha, “Malang yn cceih,” a cipya. ⁴ Te Jesu nynh minmin kha, “Sabbath nin kya ahoypaw cyi lan kawbya nynh a ua tou? Tukhyhze ahoy leipaw cyi lan tou a ua? Hiinnaw kha so khum lan a ua tou? Tukhyhze chia lan tou a ua?” cite a khia`ae. Thuasalama minmin tuh daetedae lang zya um`ae. ⁵ Te thinria te minmin kha po lekuh lang he a do`ae tuh mih thinlung akhung paw elan a ngaethah zah kha-e paw kha, “Na kuih kha dyngtua,” a cipya. Te aning nynh a kuih kha dyng zah hawkheit lang hawte phe ahoy vae. ⁶ Te Farasi`ae tuh pou`ae zah Jesu kha rawsete pawtemou chia lan cipaw kha Herod ccungccaw`ae ryte vaekheihmawte khuakhanku`ae. ⁷ Thuasalama Jesu tuh a zuitu`ae ryte rili pe lang a nuekuh`ae, te Galilee pee kyate, Judah pee kyate, ⁸ Jerusalem kyate, Idumia kyate, te Jordan vaw khuraw lang kyate ccungccaw zapi nynh amaw kha a zui`ae; te Tai khua te Sidon khua pepan um`ae paw ccungccaw zapi nynh Jesu nynh a cyi paw alepipaw uccaw`ae kong kha he thae`ae tuh amaw kalan oun thua`ae. ⁹ Te ccungccaw zapi nynh amaw kha phang lungnuaku khyh nawlan`ae, kohlung ccangkheit a pe tyty nungpya lan Jesu nynh a zuitu`ae kha a hopya`ae. ¹⁰ Pawccecize ccungccaw patae a dansah`ae keiccuze ccinaw hoi paw ccungccaw miakaw nynh amaw kha tung khylan a kalan a tuh-eihkuh`ae. ¹¹ Te athyaa leipaw muisaw bahkuh`ae paw nynh amaw kha he muih`ae tuh a malang bakhung`ae zah, “Nang tuh Pachia Ccapaw nynh na thua,” cite raerae sia`ae. ¹² Te Jesu nynh amaw kong kha na nysah lan khyh oh cite minmin kha tyntetyn lang byatawsya`ae. ¹³ Te Jesu tuh mua vawlan kaethung zah a ry paw ccungccaw`ae kha amaw kalan khe ko`ae zah minmin tuh a kalan a thua`ae. ¹⁴ Te Jesu nynh luhaw laening kha amaw ryte um khylan te minmin kha phungho lan saw khylan, ¹⁵ ccinaw`ae dansah khylan te raerangsaro`ae a dee kho nawlan`ae kawhoinaw a mue ccaw`ae cite a khang`ae. ¹⁶ Tuh-e a khang`ae paw tuh: Piter cite min a phuthui paw Simon; ¹⁷ te Zebedi ccapaw James, te James neitaw Johan, te minmin kha Boaneke cite min a phuthui`ae, asuilan tuh, ‘Ria ccapaw`ae,’ cipaw nynh thua. ¹⁸ Te Andru, te Filip, Bartholomew, Matthai, Thomas, Alfeas ccapaw James, Thadde, te Kanaan khua paw Simon, ¹⁹ amaw pheetupaw Judas Iskaria nynh thua`ae; te minmin tuh inn lungkhu lang a tee`ae. ²⁰ Te ccungccaw zapi nynh pynkheihlan bua oun thua`ae keiccu minmin tuh aepaw ae thya vae khyh`ae. ²¹ Te, “Jesu tuh a lungkyh vae khyh,” a ci`ae paw kha a vaeccaw`ae nynh he thae`ae tuh amaw kha kyng lan a cceih`ae. ²² Te Jerusalem khuapi kyate oun cceihbung`ae paw kawbya ccangpatu`ae nynh, “Aning tuh Beelzebub a hoi, te khozi`ae uktupaw liate nynh khozi`ae kha a dee,” a ci`ae. ²³ Te aning nynh minmin kha amaw kalan khe ko`ae zah tousenaw phungpaw te a hopya`ae paw tuh: “Pawtemou Setan nynh Setan tuh a dee kho cih? ²⁴ Te peenaw ccangkheit nynh amaw te amaw kha rawsekute a phiaku lanze kha-e peenaw tuh tyn kho lan khyh. ²⁵ Te inn innkheit nynh amaw te amaw rawsekute a phiaku lanze kha-e inn tuh tyn kho lan khyh. ²⁶ Te Setan nynh amaw te amaw kha rawsekuh zah a phiaku lanze tyn kho lan khyh, thuasalama phe azo cih. ²⁷ Athawsaepaw ccungccapaw kha masaty khiity khyh lanze hung ccungccaw nynh sanmah a inn lungkhu lang tee kho lan khyh zah a uccaw`ae kha lua kho lan khyh, a khiity ze rou nynh a inn kha a ropah kho cih. ²⁸ Byaccaccing kae hopya oh, ccungccaw ccaaw`ae tungvaw e seinaw`ae balyn tuh ngaethya athua cih, te saryapaw bya`ae hopaw miakaw mah ngaethya athua cih. ²⁹ Thuasalama Thyaa Muisaw kha rawsete a saryapaw tuh seingaethyanaw mue boi lan khyh, thuasalama zungzae detahnaw accanpaw nynh thua,” a ci. ³⁰ Pawccemacize minmin nynh, “Aning tuh athyaa leipaw muisaw nynh a hoi,” a ci`ae keiccu nynh thua. ³¹ Oute a nung te a neitapaw`ae oun thua`ae zah atolang khe a thadyn`ae, te a kalan ccungccaw oun saw`ae zah a kosah`ae. ³² Te amaw pepan a dahung`ae paw ccungccaw zapi nynh amaw kha, “Dotua, na nung te na neitapaw`ae atolang khe nang kha ae ccung`ae,” a cipya`ae. ³³ Te Jesu nynh khung`ae zah, “Hungmou ka nung, tukhyhze hungmou ka neitapaw`ae tuh?” a ci. ³⁴ Te amaw pepan a dahung`ae paw kha po do`ae zah, “Dotua oh, ka nung te ka neitapaw`ae hynh! ³⁵ Pawccecize hunghung zemah Pachia rynaw a rae paw, ou tuh-e paw tuh nynh ka neitapaw, ka ccia, te ka nung athua,” a ci.

¹ Te Jesu nynh rili pe khe bua a ccangpya`ae. Te amaw kalan ccungccaw zapi oun sueluaku`ae keiccu rili vawlan um paw kohlung lungkhu lang tee zah a dahung, te ccungccaw zapi balyn tuh rili kalan hawite varan langkhe a um`ae. ² Te aning nynh tousenaw phungpaw`ae khate minmin kha patae a ccangpya`ae, te a ccangpyanaw kya minmin kha, ³ “Ngaetua oh! Dotua, ccaciivuatu lukheit nynh ccaciivua lan a cceih. ⁴ Ou tuhcihte he a vua tuh ccacii abang tuh laanpi pe a ccah, te vawlae-e pavaw`ae nynh oun thua`ae zah phe a tuh kou`ae. ⁵ Te abang tuh laephi azyanaw lung alungnaw lae kya a ccah; te laephi thawkalae lang a um khyh keiccuze taloi a po`ae. ⁶ Thuasalama khuanin he yn tang tuh oun naan vae`ae, te tharui a hoi khyh`ae keiccuze karae arou`ae. ⁷ Te abang tuh hingpaw`ae laku khe a ccah, te hingpaw`ae nynh lethin`ae zah kha-e kha varyn a reihde keiccuze athae thae kho khyh. ⁸ Te abang tuh laehoy kya ccah zah a po, a pungthung, te athae thae zah abang tuh leih sungthung, abang tuh leih sungtaruh, te abang tuh leih zakheit avoi,” a cipya`ae. ⁹ Te minmin kha, “Thae nawlan nakaring a hoi paw ccungccaw tuh thaesah,” cite a hopya`ae. ¹⁰ Te Jesu a makhaete a um lyakhe, zuitu luhaw laening ryte amaw pe a um`ae paw nynh tousenaw phungpaw kong kha a khia`ae. ¹¹ Te Jesu nynh, “Pachia peenaw kya-e byakhupaw ny lan nanning tuh pya na thua oh, thuasalama atolang um`ae paw tuh pawpaw balyn kha tousenaw phungpaw te nynh hopya athua; ¹² tuhte, ‘Minmin nynh muihpaw tuh mang muih`ae zemah nyhthya khyh`ae, te thae paw tuh mang thae`ae zemah thaethya khyh`ae, tukhyh lanze minmin tuh a paleihkuh cih`ae zah mih seinaw ngaethya thua cih`ae paw,’ aciku hawte,” cite minmin kha a hopya`ae. ¹³ Te Jesu nynh minmin kha, “E tousenaw phungpaw hynh na thaethya khyh oh tou? Tuhte lanze ccangpaw tousenaw phungpaw`ae balyn kha pawtemou na thaethya vae cih oh? ¹⁴ Ccaciivuatu nynh bya kha nynh a vua. ¹⁵ Te laanpi pe kya vua paw bya tuh hynh-e`ae hynh nynh thua: bya kha minmin nynh he a thae`ae tuh Setan nynh vaekheihmawte yn cceih zah mih thinlung kya a vua`ae paw bya kha phe a lawpya`ae. ¹⁶ Tuhhawte lung alungnaw kya vua paw bya tuh hynh-e`ae hynh nynh thua, bya kha he a thae`ae tuh lungtuate palou a lawku`ae; ¹⁷ te mimaw kya tharui a saw khyh keiccu sosoh rou nynh atyn. Tuhkoute bya keiccuze vawsawnaw te tuasakunaw he yn thua tuh vaekheihmawte minmin tuh phe a maeleihkuh`ae. ¹⁸ Te hingpaw`ae laku vua paw bya tuh hynh-e`ae hynh nynh thua, minmin nynh bya kha a thae`ae, ¹⁹ te hynh-e laephipi e lungriathaenaw, te hoirungnaw nynh lingnaw, te ccangpaw uccaw`ae duanaw yn tee zah bya kha varyn a reihde, tetuh athae thae kho vae khyh. ²⁰ Te laehoy kya vua paw bya tuh hynh-e`ae nynh thua: minmin nynh bya kha thae`ae zah a lawku`ae, te abang tuh leih sungthung, abang tuh leih sungtaruh, te abang tuh leih zakheit athae avoi,” a cipya`ae. ²¹ Te Jesu nynh, “Maeekhua tuh kee te khung khylan, tukhyhze ikhung kaw nung khylan tou oun ccyng`ae? Maee awnawpaw vawlan khang lan oun ccyng khyh`ae tou? ²² Pawccecize langsaku lei lante thurupaw pawsang um khyh, pawsang mah aphirute nung khopaw um khyh, thuasalama pung alangkuh cih. ²³ Thae nawlan nakaring a hoi paw ccungccaw tuh thae sah,” cite a hopya`ae. ²⁴ Te Jesu nynh, “Na thae oh paw kha raeringkuh oh, na tounaw oh paw khate nanning kha mah toupya ru athua cih, te na thae oh paw nanning kha houh lung pya athua cih. ²⁵ Pawccecize hunghung zemah a hoi paw ccungccaw tuh pyachih athua cih; thuasalama hunghung zemah a hoi leipaw ccungccaw tuh a hoithypaw maw kha lawpya athua cih,” a cipya`ae. ²⁶ - ²⁷ Te Jesu nynh, “Pachia peenaw tuh hynh hawte nynh thua. Ccungccapaw lukheit nynh lae kya ccacii a vua, te khuazi khe ih zah khuadae a tho. Ccacii tuh po zah a lethung, pawcihte cipaw amaw nynh a ny khyh hawkhate nynh athua. ²⁸ Pawccecize laephi nynh khamawte ccathae kha a pousah; masaty adung atoih, oute avui, tuhkoute avui kya aphaw yn um. ²⁹ Thuasalama aphaw he yn voi tuh aning nynh rungkou te taloi a nungde vae, pawccemacize loohrue ccyh phe azaw vae,” a ci. ³⁰ Te Jesu nynh, “Pachia peenaw hynh pawtemou ah losakuh cih oh? Tukhyhze pawtahawpaw tousenaw phungpaw te pei touse lan oh? ³¹ Mungngia cii te nynh aloku, kha-e kha laephi kya he vua vae ze laephi kya vua paw ccacii balyn laeze adihhua. ³² Thuasalama he vua vae tetuh lethung zah enaw-ekan`ae balyn laeze alehua, te aran alepaw toih zah vawlae-e pavaw`ae nynh a mynlyh kaw khe bu a luaku`ae,” a ci. ³³ Te minmin nynh a thaethya`ae thyhte tuhtahawpaw tousenaw phungpaw patae khate minmin kha bya a hopya`ae. ³⁴ Thuasalama tousenaw phungpaw leite minmin kha bya hopah khyh`ae, te mih makhaete um`ae lyakhe pawpaw balyn kha a zuitu`ae kha a ccaesapya`ae. ³⁵ Te tuh-e nin zete he a thua tuh Jesu nynh zuitu`ae kha, “Khuraw lang khuin zua oh sih,” a cipya`ae. ³⁶ Te minmin nynh ccungccaw zapi kha a cciataw`ae koute kohlung kya a umty vae paw Jesu kha a cciakhae`ae. Te ccangpaw kohlung taraw`ae mah amaw ryte a cceihbua`ae. ³⁷ Te myarya arupaw khise yn tho zah tuileih nynh kohlung lungkhu lang yn thekuh tuh kohlung kya tui phe abeih. ³⁸ Te Jesu tuh kohlung alu langsang, lungngya ngyate a ih, te minmin nynh tho`ae zah, “Ccangpatupaw, aening ah chih vae cih oh, pawlangria leite tou na ung cih?” a cipya`ae. ³⁹ Te Jesu nynh thokuh zah khisang kha a pe, te rili kha, “Dae, zyadae ccavae!” a cipya. Te khisang tuh dae zah kyaatekyaa vae. ⁴⁰ Te Jesu nynh minmin kha, “Pawccemou hynhcih balang na ri oh? Pawccemou zynnaw na hoi khyh oh?” a cipya`ae. ⁴¹ Te minmin tuh myaryamaw rih`ae zah, “E paw hynh pawtecihpaw ccungccaw mou? Khisang te rili nynh heize a kawngae`ae!” cite lukheit te lukheit a hokuh`ae.

¹ Te minmin tuh rili khuraw lang Kadarene ram lungkhu lang oun thua`ae. ² Te Jesu tuh kohlung lungkhu te he toikuh tuh athyaa leipaw muisaw bakuhpaw ccungccapaw nynh vaekheihmawte shawku kyate yn pou zah Jesu te a tungkuh`ae. ³ Tuh-e paw a umnaw tuh shawku`ae laku thua zah hung ccungccaw nynh sanmah sivarui te khii kho khyh`ae. ⁴ Pawccemacize aning tuh tunglua saw`ae zah sivarui te pei khii`ae zemah sivarui kha thoh pae zah tunglua kha palae tui lang leih a khya; hung ccungccaw nynh sanmah ngaesah kho khyh. ⁵ Te khuazi khuadae shawku kya te mua`ae kyakhe pei um zah raerae siate amaw te amaw kha lung`ae te leih a tyaku he. ⁶ Thuasalama asawpi te Jesu kha he a muih tuh a kalan ccue zah amaw kha a beik. ⁷ Te raerae sia zah, “Ahang Huaccepaw Pachia Ccapaw Jesu, nang kha paw kae cyi mou? Kae hynh vawsaw nae pya khyh nawlan Pachia min te bya yn kinpakuh,” a cipya. ⁸ Pawccecize Jesu nynh kha-e paw kha, “Nang athyaa leipaw muisaw, ccungccapaw kyate yn pou,” cite phe a cipya vae keiccu nynh thua. ⁹ Te Jesu nynh, “Na min hungmou?” cite a khia. Te aning nynh khung zah, “Ka min tuh Legion nynh thua, pawccecize kaening tuh patae kae cih,” a cipya. ¹⁰ Te tuh-e ram kyate asawnaw lang minmin kha a dee khyh`ae ccaw cite aning nynh Jesu kha thawte a ngia. ¹¹ Atu tuin pe mua vawlan rangpaekuh`ae paw, myarya alungpaw voh phu a um. ¹² Te raerangsaro`ae balyn nynh, “Voh`ae lungkhu lang kae tee ccaw minmin kalan oun saw,” cite Jesu kha a ngiaku`ae. ¹³ Te vaekheihmawte Jesu nynh minmin kha pounawkaw pya`ae. Te athyaa leipaw muisaw`ae tuh cceih`ae zah voh`ae lungkhu lang a tee`ae, te voh phu tuh rili kin apangnaw lang thawte ccuebung`ae zah rili kya pung phungkuh`ae; voh`ae tuh thungning loukaw acih`ae. ¹⁴ Te voh a laetu`ae tuh ccue`ae zah kha-e kong kha khuapi kya te khua taraw lang balyn a ho`ae. Te ccungccaw`ae tuh tuh-e acyikuh paw kha do khylan a cceih`ae. ¹⁵ Te Jesu kya he thua`ae tuh raerangsaro bahkuh zah legion a hoi paw ccungccapaw nynh uccaw lawkuh zah a lungkyh lante a dahung paw kha he muih`ae tuh a rih`ae. ¹⁶ Te kha-e a muih`ae paw nynh raerangsaro bahkuhpaw kya pawte nynh acyikuh cipaw te voh`ae kya acyikuh paw kha minmin a hopya`ae. ¹⁷ Te minmin nynh mih khua mih ram kyate a pou nawlan Jesu kha a ngia`ae. ¹⁸ Te Jesu nynh kohlung lungkhu lang he a tee tuh raerangsaro bahkuhpaw ccungccapaw nynh amaw kya umbua lan a ngiaku. ¹⁹ Tuhzemah Jesu nynh ua khyh, thuasalama amaw kha, “Na ban`ae kalan inn lang la cceih lah na hanlan Bawipaw nynh pawcih alepaw uccaw`ae nynh ae cyipya cipaw te na tungvaw ngaethya-umsanaw a hoi paw kha la hopah`ae,” a cipya. ²⁰ Te aning nynh cceih zah Jesu nynh pawcih alepaw uccaw`ae kha nynh a hanlan a cyipya cipaw kha Dekapolis ram kyakhe a ho vae, te ccungccaw`ae balyn tuh mih ngaeangthua. ²¹ Te Jesu tuh kohlung te ccangpaw khuraw lang bua zua zah rili pe a um lyakhe ccungccaw patae tuh amaw kalan oun sueluakuh`ae. ²² Te dotua, sinakok uktu`ae lakuze lukheit, a min Jairu cikuh paw nynh yn thua zah Jesu kha he a muih tuh a ccu leihpaw khe bakhung zah, ²³ “Ka ccanung taraw vyavya a chih, a dan ccaw, a hiin ccaw, rang lah a tungvaw na kuih beih yn khang,” cite thawte a ngia. ²⁴ Te Jesu tuh tuh-e paw ryte cceih`ae zah ccungccaw patae nynh zui`ae zah amaw kha phang lungnuaku`ae. ²⁵ Te kum haw laening cia chii lua ccinaw a hoi paw nopinung lukheit tuh, ²⁶ sibawi patae kyate pataepi teing zah a hoi paw balyn pung a thangku zemah kharyh hoyhua khyh, thuasalama houh acihhua. ²⁷ Kha-e nung nynh Jesu kong he a thae tuh ccungccazaw laku nuhlang te yn cceih zah Jesu boei kha a hae. ²⁸ Pawccecize aning nynh, “A boei kha ka hae lanze phe ka dan cih,” a ciku. ²⁹ Te vaekheihmawte a chii luapaw tuh phe akang, te a pyn kya tuh-e ccinaw kyate phe ka dan vae cipaw a nyku. ³⁰ Te Jesu nynh amaw kyate thungnaw a pou cipaw ccahe a nyh tuh ccungccaw zapi kalan maeleihkuh zah, “Hungmou ka boei a hae?” a ci. ³¹ Te a zuitu`ae nynh, “Ccungccaw zapi nynh phang ae lungnuaku`ae paw mang na muih pite, ‘Hungmou yn hae?’ na ci,” a cipya`ae. ³² Te kha-e a cyih paw kha muih khylan Jesu nynh a pepan khe a do. ³³ Thuasalama nopinung nynh a kya acyikuh paw kha nyte rih zah thyngkute Jesu kalan khe cceih zah a malang khe bakhung zah acyikuh paw balyn kha hmerarihlan a hopya. ³⁴ Te Jesu nynh, “Ka ccanung na zynnaw nynh phe ae dansah vae, daebabilan la cceih lah na ccinaw kyate dan ccavae,” a cipya. ³⁵ Tuhte a ho cciamang lyakhe, sinakok uktupaw inn kyate ccungccaw yn thua zah, “Na ccanung kha phe chih vae, pawccemou Ccangpatupaw hynh vawsaw na pya ry ung?” cite sinakok uktu kha a cipya. ³⁶ Tuh-e bya kha Jesu nynh ccahe a thae tuh sinakok uktupaw kha, “Rih nan, zyn kyalya zyn,” a cipya. ³⁷ Te Jesu nynh Piter, James te James neitaw Johan laelan hung ccungccaw sanmah amaw zuibua lan ua khyh`ae. ³⁸ Te sinakok uktupaw inn lang he a thua tuh siarisiarae um`ae paw, te thawte a rah`ae paw te a khui`ae paw kha a muih. ³⁹ Te a lungkhu lang tee zah minmin kha, “Pawccemou siarisiarae na um oh zah na raw oh? Imohnung tuh chih khyh, thuasalama a ih,” a cipya`ae. ⁴⁰ Te minmin nynh saryate a nuinse`ae. Thuasalama minmin balyn kha he a pousah`ae koute imohnung a paaw te a nung, te amaw ryte umkheih`ae paw ry imohnung a inaw langkhe a tee`ae. ⁴¹ Te imohnung kha a kuih te kyng zah, “Talitha, kumi,” cite a hopya; tuh-e asuilan tuh, “Imohnung taraw, thokuh kae cipya,” cipaw nynh thua. ⁴² Te vaekheihmawte imohnung tuh thokuh zah a cceih, pawccecize aning tuh kum haw laening acih vae paw nynh thua. Te minmin tuh myaryasangkae mih ngaeangthua. ⁴³ Te kha-e kong kha hung sanmah a nysah khyh nawlan`ae minmin kha tyntetyn lang byatawsya`ae; te kha-e nung a ae lan ccangkhakheit pya oh cite a hopya`ae.

¹ Te Jesu tuh tuin kyate cceih zah amaw a khua lang a thua, te a zuitu`ae nynh amaw kha a zui`ae. ² Te Sabbath nin he a thua tuh sinakok kya a ccangpya`ae, te a thae`ae paw ccungccaw patae tuh mih ngaeangthua zah, “E uccaw`ae hynh e paw nynh paw kyate mou a mue? Aning nynh a mue paw e hawnaw tuh pawtecihpaw hawnaw mou? Hynhcih athungpaw ryalaw`ae heize a kuih te a cyi kho rei! ³ E paw tuh Meri Ccapaw, lehccamapaw, James, Joses, Judah te Simon mih upaw kha thua khyh tou? Te a ccia`ae tuh aening ryte e kya a um`ae paw kha thua khyh tou?” cite a ho`ae. Te minmin tuh a kya mih lungroh. ⁴ Thuasalama Jesu nynh, “Profeh lukheit tuh amaw a ram kya, amaw vaeccaw`ae laku te amaw innbyn kya holeite tuh sawtua leite um khyh`ae,” a cipya`ae. ⁵ Te tuin kya ngeccih`ae abang tungvaw a kuih khang zah a dansah`ae paw laelan athungpaw ryalaw lah kho vae khyh. ⁶ Te a zyn leinaw`ae keiccu Jesu a ngaeangthua. Te tuin pepan e khua`ae kalan cceih zah a ccangpya`ae. ⁷ Te zuitu luhaw laening kha ko`ae zah luning luning ccite minmin kha a saw`ae; te athyaa leipaw muisaw`ae tungvaw thungnaw kha a pya`ae. ⁸ Te mih khuaccungnaw kya hoitang ccangkheit laelan pawpaw sanmah ccyngku lei lan; sohrae, sanlou phuku lei lan, phuabu kya phua sangku lei lan; ⁹ thuasalama phanah nawku lan, te angkiccua zung ning kiku lei lan kawpya`ae. ¹⁰ Te minmin kha, “Teitei hmin kya zemah inn innkheit lungkhu lang na tee vae oh ze, kha-e hmin kyate na pou makhia oh kha-e inn kyakhe la um oh. ¹¹ Te hunghung zemah nanning kha innccung ae doih oh zah nae bya a ngae khyh`ae ze, tuin kyate he na pou oh te, minmin rawsetu ccaekia lang nae ccu kaw-e vuiping kha la pheihkuh oh. Byaccaccing kae hopya oh, byapia nin kya tuh-e khuapi hanlan laeze Sodom te Komorah khua hanlan ngaesang kho a um hua cih!” a cipya`ae. ¹² Te minmin nynh cceih`ae zah ccungccaw`ae tuh ngaesiku lan accan cite phungho`ae. ¹³ Te minmin nynh raerangsaro patae dee`ae zah accihpaw patae kha chitui thuhpah`ae zah a dansah`ae. ¹⁴ Te Jesu tuh a min athaan keiccuze Herod Siapharan nynh amaw kong kha thae zah, “Baptisma pyatu Johan nynh a chih`ae paw kyate a thothui vae, tukeiccu nynh thungnaw`ae amaw kya alangku,” a ci. ¹⁵ Mingccang`ae nynh, “Elijah nynh thua,” a ci`ae. Te mingccang`ae nynh, “Profeh nynh thua, tukhyhze profeh lukheit hawte nynh thua,” a ci`ae. ¹⁶ Thuasalama Herod nynh he a thae tuh, “Aning tuh a lu ka paesah`ae paw Johan nynh thua, a chih`ae paw kyate phe a thothui vae,” a ci. ¹⁷ Pawccecize Herod nynh a neitapaw Filip zu, Herodia kha a zu lang phe a lawku keiccuze ccungccaw saw zah Johan kha kyngsahte khiisah`ae zah thung a sawsah`ae. ¹⁸ Pawccecize Johan nynh Herod kha, “Na neitapaw zu tuh na lawku lan ccan khyh,” cite phe a hopya vae. ¹⁹ Tukeiccu Herodia nynh Johan kha lung-umtungpah zah phe chia lan a ry; thuasalama theih kho khyh. ²⁰ Pawccecize Johan tuh adingpaw te athyaapaw ccungccaw nynh thua cipaw kha Herod nynh nyh zah a raw a rih; te amaw kha a pangkhaw. Te a bya kha he a ngae vae ze, uccaw patae a rae; te a bya kha lungtuate a ngae. ²¹ Te Herod nynh a puinin kya a ccungccaw bapihua`ae, rhawbawi`ae te Galilee pee-e a lesae`ae paw elan loohdangnaw kha he a rae tuh Herodia hanlan ccyhhoy yn thua vae. ²² Herodia ccanung nynh tee zah he yn law tuh Herod te amaw ryte a dahungkheih`ae paw kha mih lungrythuasah`ae zah Herod nynh liaccanung kha, “Na ry paw miakaw yn ngiakuh lah kae pya cih,” a cipya. ²³ Te, “Nae ngiakupaw miakaw kae pya cih, ka peenaw akhankuh cia heize kae pya cih,” cite kha-e nung kha byakinpyaku. ²⁴ Te kha-e nung nynh toikuh zah a nung kha, “Pawmou ka ngiakuh cih?” cite a khia. Te a nung nynh, “Baptisma pyatu Johan a lu kha ngiakuh,” a cipya. ²⁵ Te vaekheihmawte siapharan kalan rangsakute yn tee zah, “Baptisma pyatu Johan a lu kha pakephepaw te atumaw yn pya ci nynh ka ry,” cite a ngiaku. ²⁶ Te siapharan tuh myaryasangkae a ngaethah, tuhzemah a byakinkupaw keiccu te amaw ryte a dahungkheih`ae paw keiccuze kha-e nung kha ei ry vae khyh. ²⁷ Te siapharan nynh ccungccaw theihtu kha palou saw zah Johan lu thuakhae lan kaw a pya, te tuh-e paw nynh cceih zah thunginn kyakhe Johan lu kha a pae. ²⁸ Te a lu kha pakephepaw kya yn ccyng zah liaccanung kha a pya; te liaccanung nynh kha-e kha a nung kalan a pya. ²⁹ Te kha-e kong Johan zuitu`ae nynh he a thae`ae tuh oun cceih`ae zah a rhua kha laah`ae zah shaw kya a ccy`ae. ³⁰ Te locceihtu`ae nynh Jesu kalan oun sueluakuh`ae zah a cyi`ae paw te a ccangpya`ae paw balyn kha a hopya`ae. ³¹ Te Jesu nynh minmin kha, “Nae makhaete rangpakaw lang rang oh lah sosoh hae-ung oh,” a cipya`ae; pawccecize a tee paw te a pou paw ccungccaw myarya lung`ae zah minmin tuh aenaw ccyh san hoi khyh`ae. ³² Te minmin tuh mih makhaete rangpakaw lang kohlung te phe a pou`ae. ³³ Te ccungccaw`ae nynh minmin a pou`ae paw kha muih`ae zah amaw cipaw kha he nyh`ae tuh khua takyh kyate mih ccu te oun ccue`ae zah locceihtu`ae kha phe thoih`ae zah Jesu kalan pynkheihlan pung oun thua`ae. ³⁴ Te Jesu nynh he pou zah ccungccaw zapi kha a muih`ae tuh minmin kha ngaethya-umsah`ae, pawccecize minmin tuh tuuringtu a hoi leipaw tuu`ae hawte athua`ae keiccu nynh thua; te minmin kha patae a ccangpya`ae. ³⁵ Te khuazi lan he cih tuh, a zuitu`ae nynh a kalan oun cceih`ae zah, “E kya tuh rangkaw thua zah atu khua yn zi vae cih. ³⁶ E ccungccaw`ae nynh hynh loukaw khua taraw`ae te khua`ae kalan cceih`ae sah lah mimaw elan sanlou a reku ccaw`ae minmin hynh saw`ae, pawccecize minmin tuh ae lanpaw hoi khyh`ae,” cite a hopya`ae. ³⁷ Jesu nynh khung`ae zah, “Nanning nynh minmin kha ae lanpaw pya oh,” a ci. Te minmin nynh, “Kae cceih cih zah denari phuapia zaning mee sanlou kae re cih zah tetou minmin ae lan kae pya cih`ae?” cite a khung`ae. ³⁸ Jesu nynh, “Sanlou hozeihmou na hoi oh? Cceih oh lah dotua oh,” a ci. Te minmin nynh he a nyh`ae te, “Sanlou phe pangaw te ngasaw zawning,” a ci`ae. ³⁹ Te Jesu nynh ccungccaw`ae balyn kha lonua ahinpaw vawlan aphuphu te dahungsah lan minmin kha kaw a pya`ae. ⁴⁰ Te ccungccaw`ae tuh zakheit phu, sungpangaw phu, cite aphuphu te a dahung`ae. ⁴¹ Te Jesu nynh sanlou phe pangaw te ngasaw zawning kha laah zah vaawran lang dothung zah hythua a pya, te sanlou`ae kha eih zah ccungccaw`ae malang nyapya lan a zuitu`ae kha a pya`ae, te ngasaw zawning kha minmin balyn pung a nee`ae. ⁴² Te ccungccaw`ae balyn tuh ae`ae zah phe byn`ae. ⁴³ Te minmin nynh ngasaw te sanlou a eihpaw kha kee haw laening phe beih lang a khuin`ae. ⁴⁴ Te sanlou a ae`ae paw tuh pise thungpangaw loukaw acih`ae. ⁴⁵ Te Jesu nynh ccungccaw zapi a saw lya`ae khe, a zuitu`ae kha vaekheihte kohlung kya ccisakuh`ae zah khuraw lang-e Bethsaida khua lang amaw malang a cciasaty`ae. ⁴⁶ Te minmin kha he a saw`ae koute Jesu tuh sawsang lan mua langkhe a cceih. ⁴⁷ Te zete he a thua tuh kohlung tuh rili ngaelung kya um zah Jesu tuh a makhaete laerou kya nynh a um. ⁴⁸ Te khisang nynh arawsekuh lante azaw keiccu zuitu`ae nynh thawte kohlung a zaw`ae paw kha a muih; te khuazi santari ccyhpalinaw loukaw khe minmin pe po ccia lan cite mih kalan rili vawlan khe a cceih. ⁴⁹ Thuasalama minmin nynh rili vawlan a ccia paw kha he muih`ae tuh khozi nynh thua cite tua`ae zah raerae sia`ae. ⁵⁰ Pawccecize minmin balyn nynh amaw kha muih`ae zah a rih`ae. Te Jesu nynh bya hopah kanmaw`ae zah minmin kha, “Nae thinphang nan sah! Kamaw nynh ka thua, rih nan oh,” a cipya`ae. ⁵¹ Te kohlung lungkhu lang minmin kalan khe kaebua zah khisang tuh phe adae; te minmin tuh ho kho um lei lan mih ngaeangthua zah mih khuaruaru. ⁵² Pawccecize mih thinlung akhung keiccuze sanlou kya a langsakupaw kha minmin nynh thaethya khyh`ae. ⁵³ Te minmin tuh khuraw he zua`ae te, Kenesaret ram lungkhu lang thua`ae zah varan langkhe kohlung kha a thadynsah`ae. ⁵⁴ Te kohlung kyate he oun pou`ae tuh ccungccaw`ae nynh amaw kha taloi a ny`ae. ⁵⁵ Te tuin pepan ram balyn po ccue`ae zah Jesu a um cite a thaenaw`ae langkhe ngeccih`ae kha iphae te a puih`ae. ⁵⁶ Te Jesu a teenaw khua`ae, khuapi`ae te khua taraw lang ngeccih`ae kha kungkunaw hmin kya nung`ae zah minmin nynh a boei dung sankaw kha a hae ccaw`ae cite amaw kha a ngia`ae; te kha-e a hae paw miakaw tuh a dan`ae.

¹ Oute Farasi`ae te Jerusalem kyate oun cceih`ae paw kawbya ccangpatu`ae abang tuh Jesu kalan pynkheihlan oun thua`ae. ² Jesu zuitu`ae abang nynh anungsikuhpaw athua paw, kuih singku leite sanlou a ae`ae paw kha he muih`ae tuh mih seinaw a muihpya`ae. ³ Pawccecize langmaw-e piccang`ae phung zuite Farasi`ae te Jew`ae balyn tuh mih kuih singku leite tuh ae khyh`ae. ⁴ Te kungkunaw hmin kyate oun ki`ae vae ze, a singku khyh`ae ze ae khyh`ae. Te banang`ae singpaw, ang`ae singpaw, sohin angphe`ae singpaw, te dahungnawpaw singpaw tahawpaw a zui`ae paw ccangpaw patae a um. ⁵ Oute Farasi`ae te kawbya ccangpatu`ae nynh, “Pawccemou na zuitu`ae nynh langmaw-e piccang`ae phung thyhte zui leite kuih singku leite sanlou a ae`ae?” cite Jesu kha a khia`ae. ⁶ Jesu nynh khung`ae zah, “Thyaruh`ae nanning konglang Isaiah nynh hmerarihlan a hosya vae; ‘E ccungccaw`ae nynh mih mung te kamaw kha saw oun tua`ae, thuasalama mih thinlung tuh kamaw kyate asawkuh. ⁷ Ccungccaw`ae kya-e kawpyapaw kha doctrine lang ccangpyate kamaw kha accakaepaw kya oun beik`ae,’ cite azeiku hawte nynh thua. ⁸ “Pawccecize nanning nynh Pachia kawpyapaw kha na vua oh zah ang`ae, banang`ae singpaw ccungccaw`ae phung kha na zui oh zah khahtahawpaw ccangpaw patae kha na cyi oh,” a cipya`ae. ⁹ Te Jesu nynh minmin kha, “Naemaw nae phung na zui nawlan oh, Pachia kawpyapaw kha phe na vua ccaccing oh. ¹⁰ Pawccecize Mawsi nynh, ‘Na paaw te na nung kha sawtua’; te, ‘Hunghung zemah paaw, tukhyhze nung thyalah paw tuh chia thua sah,’ a ci. ¹¹ Thuasalama nanning nynh, ‘Ccungccaw lukheit nynh a paaw, tukhyhze a nung kha, “Kamaw liate na mue lanpaw bawngnaw tuh Korban nynh thua,” a ci,’ lanze, (tuh-e tuh Pachia hanlan lasung cipaw nynh thua), ¹² kha-e paw kha a paaw hanlan, tukhyhze a nung hanlan pawsang mah na cyisah vae khyh oh. ¹³ Tuhcihte po na lawku oh paw nae phung liate Pachia bya kha pawlang um lei lan na rae oh; te nanning nynh khahtahawpaw patae na cyi oh,” a cipya`ae. ¹⁴ Te Jesu nynh ccungccaw`ae balyn kha a kalan ko`ae zah minmin kha, “Lu raveih nynh ka bya hynh ngae oh lah thaethya oh: ¹⁵ Ccungccaw a nungsisakuh khopaw atolang kyate ccungccaw lungkhu lang a tee paw pawsang um khyh; thuasalama ccungccaw lungkhu kyate a pou paw uccaw`ae nynh ccungccaw kha a nungsisaku kho. ¹⁶ Thae nawlan nakaring a hoi paw ccungccaw tuh thae sah,” a cipya`ae. ¹⁷ Te ccungccaw zapi kyate inn lungkhu lang he a tee tuh, a zuitu`ae nynh tousenaw phungpaw kong kha a khia`ae. ¹⁸ Te Jesu nynh, “Nanning so thaethya leite tou na umbua oh? Atolang kyate ccungccaw lungkhu lang a tee paw pawpaw uccaw nynh mah ccungccaw tuh thusah kho khyh cipaw na thaethya khyh oh tou? ¹⁹ Pawccemacize atolang e tuh a thinlung lungkhu lang tee khyh, thuasalama vue lungkhu lang nynh a tee; te aepaw balyn kha thyaasah zah ia-inn lungkhu lang po a cceih cipaw kha na nyh khyh oh tou?” cite a hopya`ae. ²⁰ Te Jesu nynh, “Ccungccaw lungkhu kyate a pou paw nynh ccungccaw tuh a nungsisaku. ²¹ Pawccecize ahoy leipaw tuanaw, milae zu seikhaenaw, ohhuakunaw, ccungccaw chianaw, ²² runaw, karangkunaw, hoyleinaw, lingnaw, nungsikunaw, seirynaw mitdae, thethyahonaw, tansakunaw, ngaeenaw`ae tuh ccungccaw thinlung lungkhu kyate nynh oun pou. ²³ E ahoy leipaw uccaw`ae balyn tuh lungkhu lante oun pou zah ccungccaw a nungsisaku,” a ci. ²⁴ Te Jesu tuh tuin kyate thokuh zah Tai te Sidon ram lang a cceih. Te inn innkheit lungkhu lang a tee paw kha hung ccungccaw san nysah ry khyh; thuasalama thurukuh kho khyh. ²⁵ Pawccecize athyaa leipaw muisaw a hoi paw liaccaw taraw a nung nynh Jesu kong thae zah a kalan oun cceih zah a ccu leihpaw khe a bakhung. ²⁶ Nopinung tuh Greek nung, Siria Finisia ram kya a pui nung nynh thua; te a ccanung kyate raerangsaro kha a deepya ccaw cite Jesu kha banban a ngia. ²⁷ Thuasalama Jesu nynh, “Ccaaw`ae masaty bynhin`ae sah; pawccecize ccaaw`ae looh kha law lan zah ui taraw`ae vuapya lan ccan khyh,” a cipya. ²⁸ Te nopinung nynh, “Athua, Bawipaw; tuhzemah ccaaw`ae nynh a hei`ae paw loohmoi kha ui`ae nynh ccaboi kaw te leih a ae`ae,” cite a ci. ²⁹ Te Jesu nynh, “E na hopaw na bya keiccu la cceih ccavae, na ccanung kyate raerangsaro phe a pou vae,” a cipya. ³⁰ Te tuh-e nung nynh a inn lang he a thua tuh, raerangsaro phe a pou paw te a ccanung tuh ikhung vawlan a i paw kha a muih. ³¹ Te Tai te Sidon ram kyate bua pou zah Jesu tuh Dekapolis ram kya po a cceih, te Galilee Rili lang a thua. ³² Te ccungccaw`ae nynh a nawpang zah bya a ho kho leipaw ccungccapaw kha a kalan oun cciakhae`ae zah a tungvaw khe a kuih khang lan a ngia`ae. ³³ Te Jesu nynh kha-e paw kha ccungccaw zapi kyate toikhaekuh zah a kuihdung kha a nakaring lungkhu lang a pu, te a tuinthoi zah a lae kha a tungpya. ³⁴ Te vaawran lang dothung zah a hy puin a saw; te kha-e paw kha, “Effatha,” a cipya. Asuilan tuh, “Ua ccavae sah,” cipaw nynh thua. ³⁵ Te vaekheihmawte a nakaring ua zah a laezan ne zah ccaepapeih lang bya a ho vae. ³⁶ Te Jesu nynh minmin kha kha-e kong hung ccungccaw san a hopya khyh nawlan`ae bya a tawsya`ae; thuasalama minmin kha ho lei lan bya houh taw`ae zemah minmin nynh houh a phy paleih`ae. ³⁷ Te ho kho um lei lan mih ngaeangthua zah, “Aning nynh pawpaw balyn kou hoy lang a rae; a nawpangpaw naw phe thaesah zah bya ho kho leipaw bya phe a hosah kho,” a ci`ae.

¹ Tuin nin`ae kya, ccungccaw tuh myarya lung`ae zah ae lanpaw pawsang hoi khyh`ae, Jesu nynh a zuitu`ae kha a kalan ko`ae zah minmin kha, ² “Ccungccaw zapi hynh ngaethya ka umsah`ae, pawccemacize minmin tuh kamaw ryte atu nin thung po um vae`ae zah, ae lanpaw hoi khyh`ae. ³ Te ae leite mimaw inn lang ka saw`ae ze laanpi kya phe baw cih`ae, pawccecize minmin lakuze abang tuh asawnaw langte oun thua`ae paw nynh thua,” a cipya`ae. ⁴ Te a zuitu`ae nynh amaw kha, “E rangkaw kyahin hynh-e ccungccaw`ae hynh pawtemou ccungccaw lukheit nynh sanlou phe byn lan`ae a dang kho cih?” cite a khung`ae. ⁵ Te Jesu nynh, “Sanlou phe hozeihmou na hoi oh?” cite khia`ae zah minmin nynh, “Phe sari,” a ci`ae. ⁶ Te ccungccaw zapi`ae kha lae vawlan dahung lan kaw a pya`ae; te sanlou phe sari kha laah zah lungtuabya a ho koute sanlou kha eih zah mih malang nyapya lan a zuitu`ae kha a pya`ae; te minmin nynh ccungccaw`ae malang a nyapya`ae. ⁷ Te minmin tuh ngasaw taraw mah ccapyh hoi`ae zah hythua a pya koute mih malang nyapya lan a hopya`ae. ⁸ Te minmin tuh ae`ae zah phe a byn`ae, te a eihpaw alaepaw kha khuin`ae zah alepaw kee kaw sari acih. ⁹ Te a ae`ae paw ccungccaw tuh thungpali loukaw acih; oute minmin kha a saw`ae. ¹⁰ Te vaekheihmawte a zuitu`ae ryte kohlung lungkhu lang tee`ae zah Dalmanutha ram lang a thua`ae. ¹¹ Te Farasi`ae tuh oun pou`ae zah Jesu ryte bya eikuh`ae zah amaw kha syntaw khylan vaawran kyate muihsanaw a ngia`ae. ¹² Te a muisaw kya a hy puin saw zah, “Pawccepei e ciihan nynh muihsanaw hynh a ccung? Byaccaccing kae hopya oh, e ciihan kalan pawpaw muihsanaw sanmah pya thua lan khyh,” a ci. ¹³ Te minmin kha cciataw`ae zah kohlung lungkhu lang bua tee zah ccanglang khuraw lang a pou. ¹⁴ Atu zuitu`ae nynh sanlou phuku lan phe ning`ae zah kohlung kya minmin nynh sanlou ccangkheit laelan hoi vae khyh`ae. ¹⁵ Te Jesu nynh minmin kha, “Farasi`ae ransi te Herod ransi kha do oh lah raeringkuh oh,” cite byatawsya`ae. ¹⁶ Te minmin nynh, “Aening sanlou ah hoi khyh oh keiccu nynh e hynh a ho,” cite mimaw te mimaw kya a hoku`ae. ¹⁷ Te Jesu nynh kha-e kha he a nyh tuh minmin kha, “Sanlou na hoi khyh oh keiccuze, pawccemou tuhte na hoku oh? Na muihthya loh khyh oh tou? Na thaethya loh khyh oh tou? Nae thinlung tuh phang akhung ung tou? ¹⁸ Mit phang na hoi oh pite na muih khyh oh tou? Te nakaring phang na hoi oh pite na thae khyh oh tou? Te na syntaw vae khyh oh tou? ¹⁹ Ccungccaw thungpangaw hanlan sanlou phe pangaw ka ia lyakha, a eihpaw kee hozeihmou phe beih lang na khuin oh?” cite a khia`ae. Minmin nynh, “Kee haw laening,” a ci`ae. ²⁰ “Te ccungccaw thungpali halan sanlou phe sari ka ia lyakha so, a eihpaw kha kee lepaw phe beih lante hozeihmou na khuin oh?” cite a khia`ae. Te minmin nynh, “Kee sari,” a ci`ae. ²¹ Te Jesu nynh, “Pawccemou e hynh na thaethya khyh oh?” a cipya`ae. ²² Te Jesu tuh Bethsaida lang a thua, te mitmohpaw kha a kalan oun cciakhae`ae zah khae paw kha a hae ccaw cite a ngia`ae. ²³ Te mitmohpaw kha a kuih te kyng zah khua kyate a toikhaekuh koute a mit kha thoi zah a tungvaw a kuih he a khang te, ngaw na muih vae ta cite a khia. ²⁴ Te aning nynh dothung zah, “Ccungccaw`ae thingku hawte a ccia`ae paw ka muih,” a ci. ²⁵ Tuhkoute a kuih kha a mit tungvaw bua khang zah ngaw a dosah. Te aning tuh amaw thathyh lang phe dan zah ccungccaw miakaw kha ccaerarihlan a muih vae. ²⁶ Te Jesu nynh, “Khua lungkhu lang la tee nan, e hynh khua lungkhu hung sanmah la hopah nan,” cite hopah zah a inn lang a saw. ²⁷ Te Jesu tuh a zuitu`ae ryte Sisaria Filipi khua`ae kalan cceih`ae zah laanpi kyakhe a zuitu`ae kha, “Ccungccaw`ae nynh kae hynh hung oun ci`ae mou?” cite a khia`ae. ²⁸ Te minmin nynh, “Abang nynh baptisma pyatu Johan ae ci`ae; abang nynh Elijah ae ci`ae; te mingccang`ae nynh profeh lukhakheit ae ci`ae,” cite a khung`ae. ²⁹ Te Jesu nynh minmin kha, “Thuasalama nanning nynh so kae hynh hung nae ci oh mou?” cite a khia`ae. Te Piter nynh, “Nang tuh Kri nynh na thua,” a ci. ³⁰ Te Jesu nynh amaw kong kha hung sanmah na hopah lan khyh oh cite minmin kha tyntetyn lang bya a taw`ae. ³¹ Te Ccungccaw Ccapaw tuh uccaw patae yn teing hahe cih zah piccang`ae te alepaw ranpibawi`ae te kawbya ccangpatu`ae nynh oun vua cih`ae zah chia athua cih, te nin thungnaw kya yn thothui cih cipaw zuitu`ae ccangpyapaw kha a tho vae. ³² Te kha-e bya kha ccaerarihlan a ho. Te Piter nynh amaw kha cciakhae zah a pe vae. ³³ Thuasalama Jesu nynh maeleihkuh zah a zuitu`ae kha dote, Piter kha, “Setan, ka nuhlang thungkuh! Pawccecize nang tuh Pachia uccaw`ae kha na peki khyh, thuasalama ccungccaw uccaw`ae kha nynh na peki,” ci zah a pe. ³⁴ Te a zuitu`ae ryte ccungccaw`ae kha ko`ae zah minmin kha, “Hunghung zemah kamaw yn zui ry lan thua ze, amaw te amaw kha yn vuakuh sah lah a vaelantung kha puihkuh sah, te kamaw yn zui sah. ³⁵ Pawccecize hunghung zemah a hiinnaw a khumkuh ry paw tuh a hiinnaw kha a shung cih; thuasalama hunghung zemah kamaw te thehoypaw keiccuze a hiinnaw a shung paw tuh a hiinnaw kha a khumkuh cih. ³⁶ Pawccecize ccungccaw lukheit nynh laephipi hynh khaleih a mue zeso a hiinnaw-muisaw a shung lanze a hanlan pawmou athane? ³⁷ Tukhyhze a hiinnawmuisaw te rulae nawlan ccungccaw nynh pawmou a pya cih? ³⁸ Tukeiccu ohhuakuh zah a seipaw hynh-e ciihan kya hunghung zemah kamaw te ka bya kha mae yn thyakhae paw tuh Ccungccaw Ccapaw nynh mah a Paaw phu-enaw kya athyaapaw vaaw ccungccaw`ae ryte he oun rung vae ze kha-e paw kha maethyakhae ru cih,” a cipya`ae.

¹ Te Jesu nynh minmin kha, “Byaccaccing kae hopya oh, thungnaw ryte yn thua paw Pachia peenaw kha a muih`ae cia chinaw a tytua cih lei`ae paw, ccungccaw abang e kya a um`ae,” a cipya`ae. ² Te nin taruh acih koute Jesu nynh Piter, James te Johan kha hoei`ae zah ahangpaw mua lang mih makhaete a cciakhae`ae; te minmin malang Jesu tuh a muinsan rulaekuh. ³ Te a uccaw tuh phaephae ah zah vuiraw hawte myarya araw; tuh-e hawte laephi vawlan hung uccawsuh paw nynh sanmah rawsah kho lan khyh. ⁴ Te Elijah te Mawsi tuh minmin kya oun langkuh`ae zah Jesu ryte byahokuh`ae. ⁵ Te Piter nynh tho zah Jesu kha, “Rabbi, e kya um paw tuh kaening elan ahoy; te bu ccangthung kae sak; nang na hanlan ccangkheit, Mawsi hanlan ccangkheit, te Elijah hanlan ccangkheit,” a cipya. ⁶ Minmin tuh myarya a ri`ae keiccuze paw nynh ho lan cipaw Piter nynh a ny khyh keiccu nynh tuhte a ho. ⁷ Te maeking yn zi zah minmin kha pung a khung`ae, te, “E paw tuh ka sungsahpaw ka Ccapaw nynh thua, amaw bya kha la ngae oh,” cite maeking kyate roi yn ccae. ⁸ Te vaekheihmawte minmin nynh mih pepan he a do`ae tuh, mimaw ryte Jesu laelan hung sanmah muih vae khyh`ae. ⁹ Te minmin mua kyate he oun rungbung`ae tuh, Ccungccaw Ccapaw tuh a chih`ae paw kyate a thothui mawlaezung minmin nynh a muih`ae paw kha hung sanmah a hopya khyh nawlan`ae minmin kha kawpya`ae. ¹⁰ Te minmin nynh a chih`ae paw kyate thothuinaw cipaw tuh pawmou a hory cite mimaw te mimaw kha khiakuh`ae zah kha-e a hopaw bya kha mimaw kya a ccykeku`ae. ¹¹ Te minmin nynh, “Pawccemou kawbya ccangpatu`ae nynh Elijah tuh masaty yn thua cih a ci`ae?” cite amaw kha a khia`ae. ¹² Te Jesu nynh khung`ae zah, “Elijah tuh masaty yn thua ccaccing cih zah pawpaw balyn kha yn nungthui cih; te aning tuh patae a teing cih zah pawlangria lan khyh`ae cite Ccungccaw Ccapaw kong azeikuh paw hynh pawte athua? ¹³ Thuasalama nanning kae hopya oh, Elijah tuh phe a thua ccaccing vae; te amaw kong kha azeikuh thyhte ccungccaw`ae nynh a cyi ry`ae hawte a tungvaw phe a cyi vae`ae,” cite a hopya`ae. ¹⁴ Te zuitu`ae kalan he a thua tuh ccungccaw zapi pi nynh minmin kha phang a koih`ae paw te kawbya ccangpatu`ae ryte bya eiku`ae paw kha a muih. ¹⁵ Te ccungccaw`ae balyn nynh amaw kha ccahe a muih`ae tuh myarya mih ngaeangthua zah a kalan ccue`ae zah amaw kha bya a beih`ae. ¹⁶ Te Jesu nynh kawbya ccangpatu`ae kha, “Minmin ryte pawmou na eiku oh?” cite a khia`ae. ¹⁷ Te ccungccaw zapi lakuze lukheitpaw nynh khung zah, “Ccangpatu, bya ho leipaw muisaw abahkuhpaw ka ccapaw kha na kalan kae cciakhae. ¹⁸ Te a bahkunaw kya miakaw aning kha laephi kya zianah zah a khalang kyate a taraphue a pou, a hawzy zah karae aho; tuh-e muisaw a dee ccaw`ae cite na zuitu`ae ka hopah`ae zah dee kho khyh`ae,” cite a hopya. ¹⁹ Te Jesu nynh khung zah, “Pou zyn lei`ae ciihan, hohse cia mou nae kya ka um ung cih? Hohse cia mou kae ngaesangpah ung cih oh? Imohpaw kha ka kalan oun cciakhae oh,” a ci. ²⁰ Te minmin nynh imohpaw kha a kalan cciakhae`ae. Te tuh-e paw nynh amaw kha he a muih tuh vaekheihmawte muisaw nynh karaehosah zah laephi kalan a khuliakuh, te a taraphue thua lante laephi kya a toukuh. ²¹ Te Jesu nynh imohpaw a paaw kha, “Hynhte a cyi paw hohsemou saw vae?” cite a khia. Te aning nynh, “A imua lya mawte a cyih vae. ²² Imohpaw hynh ro khylan maee lungkhu lang te tui lungkhu lang pei a phungsaku. Thuasalama na cyi kho lanze kaening hynh thaw oun ccih lah oun bawng,” a ci. ²³ Jesu nynh, “Na zyn ngan lanze, a zyn paw ccungccaw hanlan pawpaw balyn tuh athua kho,” a cipya. ²⁴ Te imohpaw a paaw tuh vaekheihmawte sia zah mitphi ryte, “Bawipaw, ka zyn, ka zyn leinaw nang nynh yn bawng,” a cipya. ²⁵ Ccungccaw`ae nynh pynkheihlan oun ccue`ae paw kha Jesu nynh he a muih tuh, “Nawpang zah bya ho leipaw muisaw, imohpaw kyate pou lah bua tee nan vae, nang kha kaw kae pya!” cipah zah tuh-e ahoy leipaw muisaw kha a pe. ²⁶ Te muisaw tuh raerae sia zah imohpaw kha karaehosah zah a kyate phe a pou; imohpaw tuh achihpaw hawte thua zah ccungccaw patae nynh, “Phe chih vae,” a ci`ae. ²⁷ Thuasalama Jesu nynh a kuih te kyng zah a tho; te aning tuh po a tho. ²⁸ Te inn lungkhu lang he a tee tuh a zuitu`ae nynh, “Pawccemou kaening nynh amaw kha kae dee kho khyh,” cite mih makhaete a khia`ae. ²⁹ Te Jesu nynh, “Hynhtahawpaw tuh sawsangnaw te, looh-aesungnaw te rou nynh dee kho athua,” a cipya`ae. ³⁰ Te minmin tuh tuin kyate pou`ae zah Galilee pe po a ccia`ae paw kha Jesu nynh hung sanmah nysah ry khyh. ³¹ Pawccecize, “Ccungccaw Ccapaw tuh ccungccaw`ae kuih lungkhu lang oun ah cih`ae zah oun theih cih`ae; te a theih`ae koute nin thungnaw kya thothui cih,” cite a zuitu`ae kha ccangpah`ae zah a hopya`ae. ³² Tuh-e a hopaw kha minmin nynh a thaethya khyh`ae zemah amaw kha khia lan phe a rih`ae. ³³ Te Jesu tuh Kapernaum khua khe thua zah inn lungkhu a um lyakhe minmin kha, “Laanpi kya kha naemaw te naemaw pawmou na eiku oh?” cite a khia`ae. ³⁴ Thuasalama minmin tuh yccae khyh`ae; pawccecize minmin nynh laanpi khe mimaw lakuze hungmou alehua cih cipaw kha a eikuh`ae. ³⁵ Te Jesu tuh dahung zah luhaw laening kha ko`ae zah, “Lukhakheit nynh laanmasue lang athua ry ze, nyathyakou lang athua cih zah ccungccaw balyn ryalawpatu lang athua cih,” a cipya`ae. ³⁶ Te imua taraw kha laah zah minmin laku khe a nung; te a kuih kya dua zah minmin kha, ³⁷ “Hunghung zemah ka min liate hynhtahawpaw imua`ae lukheit kha a lehkhan paw tuh kamaw kha oun lehkhan paw nynh thua; te hunghung zemah kamaw oun lehkhan paw tuh kamaw kyalya oun lehkhan paw thua khyh, thuasalama kamaw yn sawtupaw kha mah lehkhan paw nynh thua,” cite a hopya`ae. ³⁸ Te Johan nynh, “Ccangpatu, kaening oun zui leipaw lukheitpaw nynh na min te raerangsaro`ae a dee paw kha kae muih; te kaening oun zui khyh keiccu amaw kha kae khee,” cite Jesu kha a hopya. ³⁹ Thuasalama Jesu nynh, “Tuh-e paw kha khee nan oh, pawccecize kamaw min liate athungpaw ryalaw a lah paw nynh tuh kamaw kha taloi thethya oun ho kho lanpaw hung san um khyh. ⁴⁰ Pawccecize aening oun rawse leipaw tuh aening kalan a pang paw nynh thua. ⁴¹ Pawccecize nanning tuh Kri kya-e na thua oh keiccuze, hunghung zemah ka min liate nia lanpaw tui banang nangkheit ae pya oh paw tuh, byaccaccing kae hopya oh, tuh-e paw tuh a ryalaw mee shung lan khyh. ⁴² “Te hunghung zemah kamaw oun zyn paw e imua taraw lukhakheit kha a maeleihsakuh paw ccungccaw tuh a nging kyakhe mianawpaw lung ccangkheit kha sae`ae sah lah rili lungkhu lang vua lanze a hanlan ahoyhua. ⁴³ Te na kuih nynh ae seisah ze, kha-e kha thoh tya. Kuih ccangning hoite achih kho leipaw hell maee lungkhu lang ccia lanpaw lae tuh kuihccung te hiinnaw lungkhu lang tee lanpaw kha na hanlan ahoyhua. ⁴⁴ “ ‘Tuin kya tuh zangpaw chih khyh zah maee mah chih khyh.’ ⁴⁵ “Te na ccu nynh ae seisah ze, kha-e kha thoh tya; ccu ccangning hoite achih kho leipaw hell maee lungkhu lang vuaku lanpaw lae tuh ccukhoute hiinnaw lungkhu lang tee lanpaw kha na hanlan ahoyhua. ⁴⁶ “ ‘Tuin kya tuh zangpaw chih khyh zah maee mah chih khyh.’ ⁴⁷ Te na mit nynh ae seisah ze, kha-e kha poh khoi; mit ccangning hoite hell maee lungkhu lang vuaku lanpaw lae tuh mit ccangkheit te Pachia peenaw lungkhu lang tee lanpaw kha na hanlan ahoyhua. ⁴⁸ Tuin kya tuh zangpaw chih khyh zah maee mah chih khyh. ⁴⁹ “Pawccecize ccungccaw miakaw kha maeeloi phing athua cih, te silawnawpaw miakaw kha loi phing athua cih. ⁵⁰ “Loi tuh ahoy, thuasalama loi nynh a e paw kha phe a zosah ze, pawtemou na esah kho ung cih oh? Naemaw kyakhe loi hoi oh, te lukheit te lukheit ccawkuh oh,” cite a hopya`ae.

¹ Te tuin kyate Jesu tuh thokuh zah Jordan vaw khuraw langkhe cceih zah Judah ram akin langkhe a thua; te ccungccaw`ae nynh a kalan bua oun sueluakuh`ae zah leih a cyimae hawte minmin kha bua a ccangpya`ae. ² Te Farasi`ae nynh a kalan oun thua`ae zah amaw kha syntaw khylan, “Pise lukheit nynh a zu kha mya lan kawbya nynh ua tou?” cite amaw kha a khia`ae. ³ Te Jesu nynh, “Mawsi nynh pawtemou kawbya ae pya oh?” cite a khung`ae. ⁴ Te minmin nynh, “Mawsi nynh myakunaw ccaw zei lan zah mya lan a ua,” cite a khung`ae. ⁵ Te Jesu nynh khung`ae zah, “Nae thinlung akhung keiccu nynh e kawpyapaw hynh a zei. ⁶ Thuasalama raenaw athotakaw lya tuh Pachia nynh minmin kha pise te nopi nynh a rae. ⁷ Hynh-e keiccuze pise nynh a paaw te a nung kha a cciataw cih zah a zu te a umkheih cih`ae; ⁸ te minmin luning tuh ngesaw pyn kheit lang tang cih`ae; tukeiccu minmin tuh luning thua vae khyh`ae, thuasalama ngesaw pyn kheit nynh thua vae`ae. ⁹ Tukeiccu Pachia nynh pynkheihlan a suelua vae paw kha hung ccungccaw nynh sanmah phia nan sah,” a ci. ¹⁰ Te inn lungkhu khe a zuitu`ae nynh kha-e kong kha bua a khia`ae. ¹¹ Te Jesu nynh minmin kha, “Hunghung zemah a zu maah zah ccangpaw zu a hoi paw tuh nopi ccangpaw kha a seikhaepaw nynh thua. ¹² Te nopinung nynh a vawpaw maah zah ccangpaw vawpaw a hoi ze pise ccangpaw kha a seikhaepaw nynh thua,” a cipya`ae. ¹³ Te Jesu nynh a kuih te a hae ccaw`ae cite imua`ae kha a kalan oun cciakhae`ae; te a zuitu`ae nynh oun cciakhaetu`ae kha a pe`ae. ¹⁴ Thuasalama Jesu nynh he a muih tuh a thinria zah minmin kha, “Imua taraw`ae kha ka kalan oun cceih`ae sah, kang nan oh; pawccecize Pachia peenaw tuh khatahaw`ae paw elan nynh thua. ¹⁵ Byaccaccing kae hopya oh, hunghung zemah Pachia peenaw kha imua taraw hawte a lawku khyh lanze, tuh-e peenaw lungkhu lang tee lan khyh,” a cipya`ae. ¹⁶ Te imua`ae kha a dua`ae, a kuih kha mih tungvaw khang zah hythua a pya`ae. ¹⁷ Te laanpi kya a ccia lya, lukheitpaw nynh a kalan yn ccue zah a malang ccukharutungte, “Ccangpatu hoypaw, zungzae hiinnaw rho ka ccou nawlan pawmou ka cyih cih?” cite amaw kha a khia. ¹⁸ Te Jesu nynh, “Pawccemou kamaw hynh ahoypaw cite nae ko? Pachia lukheit laelan ahoypaw hung sanmah um khyh. ¹⁹ Kawpyapaw`ae kha na ny: ‘Milae zu seikhae nan, ccungccaw theih nan, ruh nan, ahme leipaw ccaekia lang tang nan, ccungccaw hyngpah nan, na paaw te na nung sawtua,’ cipaw kha,” a cipya. ²⁰ Te aning nynh khung zah, “Ccangpatu, tuh-e`ae balyn tuh ka ngawphue lya mawte phe ka zui vae,” a cipya. ²¹ Oute Jesu nynh kha-e paw kha sungsah zah dobiate, “Nang tuh ccangkheit na bou ung; la cceih lah na hoi paw miakaw kha la zua lah ryachi`ae kha la pya`ae, te vaawran kya sisua na hoi cih; te rang lah vaelantung kha puihkuh lah kamaw yn zui,” a cipya. ²² Te aning tuh uccaw`ae patae a hoi paw athua keiccuze tuh-e bya kya a maesue hoy khyh zah ngaethyate po a cceih. ²³ Te Jesu nynh a pepan khe do zah, “A hoirung`ae paw nynh Pachia peenaw lungkhu lang tee lanpaw tuh pawcihmou aru ngaw!” cite a zuitu`ae kha a hopya`ae. ²⁴ Te a zuitu`ae tuh a bya kya mih ngaeangthua. Thuasalama Jesu nynh bua khung`ae zah minmin kha, “Ka ccaaw oh, hoirungnaw a doliakuh`ae paw hanlan Pachia peenaw lungkhu lang tee lanpaw tuh pawcihmou aru! ²⁵ Mihoipaw nynh Pachia peenaw lungkhu lang a tee lanpaw lae tuh Kalauk nynh phynbang khu kya tee lan azoihua,” a cipya`ae. ²⁶ Te minmin tuh myarya mih ngaeangthua zah mimaw te mimaw laku, “Tuhte lanze hungmou khumnaw a mue kho cih?” a ciku`ae. ²⁷ Te Jesu nynh minmin kha do`ae zah, “Ccungccaw hanlan tuh thua kho khyh, thuasalama Pachia hanlan athua kho leipaw um khyh; pawccecize Pachia hanlan pawpaw balyn tuh athua kho,” a ci. ²⁸ Oute Piter nynh tho zah amaw kha, “Dotua, kaening tuh pawpaw balyn phe kae cciataw zah namaw kae zui,” a cipya. ²⁹ Te Jesu nynh khung zah, “Byaccaccing kae hopya oh, kamaw keiccu te thehoypaw keiccuze inn, uteno`ae, ccia`ae, paaw, tukhyhze nung, zu, ccaaw`ae, lei`ae a cciataw paw tuh, ³⁰ atu hynh-e ccyh kya inn`ae, uteno`ae, ccia`ae, nung`ae, ccaaw`ae te lei`ae kha tuasakunaw ryte leih zakheit a mue cih; te bua yn thua lanpaw she kya zungzae hiinnaw kha a mue cih. ³¹ Thuasalama masaty e ccungccaw patae tuh nyathyakou e athua cih`ae zah nyathyakou e tuh masaty e athua cih`ae,” a ci. ³² Te minmin Jerusalem lang a cciathung lya`ae laanpi kyakhe, Jesu tuh mih malang a cceih; te minmin tuh mih ngaeangthua zah ribiate amaw kha a zui`ae. Te aning nynh luhaw laening kha bua cciakhae`ae zah amaw kya paw nynh yn cyikuh vae cih cipaw kha a hopya vae`ae: ³³ “Dotua oh, aening tuh Jerusalem lang nynh ah cciathung oh; te Ccungccaw Ccapaw tuh alepaw ranpibawi`ae te kawbya ccangpatu`ae kalan ah athua cih; te minmin nynh chia lan seibe cih`ae zah Zenta`ae kalan a ah cih`ae; ³⁴ te minmin nynh amaw kha a sarya cih`ae zah a bua cih`ae, te mih tuin te a thoi cih`ae zah a theih cih`ae; te nin thungnaw kya aning tuh bua a thothui cih,” a ci. ³⁵ Te Zebedi ccaaw`ae James te Johan nynh amaw kalan oun thua`ae zah, “Ccangpatu, kaening nynh kae ngiakupaw nae cyipya nawlan kae ry,” cite a hopya`ae. ³⁶ Te aning nynh, “Pawmou nae hanlan nae cyisah ry oh?” cite a khia`ae. ³⁷ Minmin nynh, “Na phu-enaw kya lukheit na ranglang, te lukheit na voilang kae dahungbua nawlan oun ua,” a ci`ae. ³⁸ Thuasalama Jesu nynh, “Nanning nynh paw nynh kae ngia cipaw na nyh khyh oh; ka nia paw banang kha na neih kho cih oh tou? Te baptisma ka in paw kha na in kho cih oh tou?” a cipya`ae. ³⁹ Te minmin nynh, “Kae cyih kho cih,” a ci`ae. Te Jesu nynh minmin kha, “Ka nia paw banang kha na neihbua ccaccing cih oh; te baptisma ka innaw kya na in bua cih oh. ⁴⁰ Thuasalama ka ranglang te ka voilang dahung lan pya lanpaw tuh ka kya-e thua khyh; thuasalama mih hanlan a paccynpya`ae paw rou nynh pya athua cih`ae,” a cipya`ae. ⁴¹ Te zuitu luhaw nynh kha-e kha he a thae`ae tuh James te Johan tungvaw myarya mih thinria. ⁴² Thuasalama Jesu nynh minmin kha ko`ae zah, “Zenta`ae tungvaw uktu`ae lang tua athua`ae paw nynh tuh mih bawithuanaw khate a uk`ae, te mih kya a lesae`ae paw nynh minmin tungvaw kawhoinaw a mang`ae cipaw na ny oh. ⁴³ Thuasalama nanning laku tuhte thua lan khyh; thuasalama hunghung zemah nanning laku lesae a ry paw tuh nanning ryalawpatu athua cih. ⁴⁴ Te nanning laku hunghung zemah lupihua lang a tang ry paw tuh ccungccaw balyn see lang a tang cih. ⁴⁵ Pawccecize Ccungccaw Ccapaw hei nynh ryalawsahpyaku khylan yn thua khyh, thuasalama ming`ae kha ryalawpya khylan nynh yn thua, te ccungccaw patae sawkhawnaw hanlan a hiinnaw kha pyaku khylan nynh yn thua,” cite a hopya`ae. ⁴⁶ Te minmin tuh Jeriko khua a thua`ae; te a zuitu`ae ry, ccungccaw pataepi ryte Jeriko kyate he a pou`ae tuh, Timae ccapaw mitmohpaw Bartimu tuh laanpi kin khe ccungccaw ngiakute a la dahung. ⁴⁷ Te Nazareth paw Jesu cipaw he a thae tuh, “David Ccapaw Jesu, kae hynh ngaethya yn umsah,” cite thawte a sia. ⁴⁸ Te ccungccaw patae nynh zya adae ccaw cite a raw`ae; thuasalama aning nynh, “David Ccapaw, kae hynh ngaethya yn umsah,” cite houh ccae lang a sia. ⁴⁹ Te Jesu tuh zya dahang zah kha-e paw kha a kosah`ae. Te mitmohpaw kha ko`ae zah, “Na thawmuin sah, thokuh, nang kha ae ko,” cite a hopya`ae. ⁵⁰ Te aning nynh a uccaw kha ccaring vuate, thokuh zah Jesu kya a thua. ⁵¹ Te Jesu nynh, “Na hanlan pawmou cyisah nae ry?” cite a khia. Mitmohpaw nynh, “Rabboni, ngawmuih nynh ka ry,” a cipya. ⁵² Te Jesu nynh, “La cceih ccavae, na zynnaw nynh phe ae dansah vae,” a cipya. Te vaekheihmawte ngawmuih zah laanpi kya Jesu kha a zui vae.

¹ Te Jesu te a zuitu`ae nynh Jerusalem lang naekuh`ae zah, Oliv Mua leihpaw e Bethfake khua te Bethani khua khe he a thua`ae tuh a zuitu`ae luning kha Jesu nynh saw`ae zah, ² “Nae malang um paw khua kalan la cceih oh lah kha-e lungkhu lang he na tee miakaw oh te, hung ccungccaw nynh san a cciku boi lei`ae paw lann taraw a khii`ae paw kha na la muih cih oh, kha-e kha oun supah oh lah oun cciakhae oh. ³ Te lukhakheit nynh, ‘Pawccemou khate na cyi oh?’ cite ae khia oh ze, ‘Bawipaw nynh a peki,’ cite la khung oh, te aning nynh kha-e kha hynhlang palou oun saw cih,” cite minmin kha a hopya`ae. ⁴ Te minmin tuh cceih`ae zah sakoih akhunglang laanpi atungkunaw kya a khii`ae paw lann taraw kha muih`ae zah a supya`ae. ⁵ Te tuin kya a thadyn`ae paw abang nynh minmin kha, “Pawccemou lann taraw kha na supya oh?” a ci`ae. ⁶ Te minmin nynh Jesu nynh kawpya`ae hawte a hopya`ae; te minmin nynh a cciasah`ae. ⁷ Te zuitu`ae nynh lann taraw kha Jesu kalan cciakhae`ae zah a tungvaw khe mih uccaw de`ae zah Jesu nynh a cciku. ⁸ Te ccungccaw patae nynh mih uccaw kha laanpi kya a phaepya`ae; te abang nynh anaw lungpaw thingnge`ae kha loi`ae zah laanpi kya a phaepya`ae. ⁹ Te malang cceih`ae paw te a zuikuh`ae paw nynh, “Hosanna! ‘BAWIPAW min te yn thua paw tuh hythuaccou sah!’ ¹⁰ Bawipaw min te yn thua paw, ah paaw David peenaw tuh hythuaccou sah! Ahang huaccenaw kya Hosanna thuasah!” cite a sia`ae. ¹¹ Te Jesu tuh Jerusalem lungkhu lang te tempal lungkhu lang a tee; te pawpaw balyn kha pung a do koute zete he athua tuh luhaw laening ryte Bethani khua lang a cceih`ae. ¹² Te awkhualan Bethani khua te he a ki`ae tuh Jesu tuh a vuelaw. ¹³ Te anaw a sae paw thaeku ku kha asawpi te muih zah khe kya ccangkhakheit ka muihkuh cih vosi cite a ccianua; te he a thuanua tuh anaw`ae laelan pawsang muih vae khyh; pawccecize thaeku a thae ccyh thua loh khyh. ¹⁴ Te Jesu nynh, “Atu koute zungzae cia hung ccungccaw nynh sanmah na thae la ae nan vae sah,” cite thaeku ku kha a cipya, kha-e kha a zuite`ae nynh phe a thae`ae. ¹⁵ Te minmin tuh Jerusalem a thua`ae; te Jesu tuh tempal voidu lungkhu lang tee zah khe kya a zua`ae paw te a re`ae paw kha a dee`ae, te phuaru`ae paw ccaboi te valaele zua`ae paw tungkhung kha phya dawleihpya`ae. ¹⁶ Te tempal voidu lungkhu lang uccaw`ae teekhae lan hung ccungccaw sanmah ua khyh. ¹⁷ Te ccangpah`ae zah, “ ‘Ka inn tuh minphuin`ae balyn sawsangnaw inn cite ko athua cih,’ cite zeikuh khyh tou? Thuasalama nanning nynh miruh`ae karung lang phe na rae oh,” cite minmin kha a hopya`ae. ¹⁸ Te kawbya ccangpatu`ae te alepaw ranpibawi`ae nynh he a thae`ae tuh amaw kha pawcihtemou chia lan cipaw a ccung`ae; pawccecize minmin nynh amaw raw a rih`ae, pawccemacize ccungccaw balyn nynh a ccangpyanaw kya mih ngaeangthua. ¹⁹ Te zete he a thua tuh khua kyate phe a pou. ²⁰ Te awkhua minmin nynh laanpi kya a ccia lya`ae, thaeku ku atharui kyate karae aroupaw kha a muih`ae. ²¹ Te Piter nynh liathui zah amaw kha, “Rabbi, dotua! Ccae na sah paw thaeku ku karae rou vae,” a cipya. ²² Te Jesu nynh khung zah, “Pachia kya zynnaw hoi oh. ²³ Pawccecize byaccaccing kae hopya oh, hunghung zemah e mua kha, ‘Nang nuekuh lah rili lungkhu lang phungkuh,’ cipah zah lunghiinnaw hoi leite, a hopaw tuh acyikuh cih cite a zyn lanze, a ho hawte acyikuh cih. ²⁴ Tukeiccu nanning kae hopya oh, na peki oh paw uccaw balyn kha sawsangnaw te he na ngia vae oh ze, kha-e kha kae mue vae cite zyn oh lah na mue cih oh. ²⁵ Te sawsang te he na thadyn vae oh ze, lukhakheit kha ccangkhakheit seibe lanpaw na hoi oh ze la ngaethya oh; ou khate vaawran um paw nae Paaw nynh mah nae seinaw kha ae ngaethya cih oh. ²⁶ Thuasalama na ngaethya khyh oh ze, vaawran um paw nae Paaw nynh mah nae seinaw kha ae ngaethya lan khyh oh,” cite a hopya`ae. ²⁷ Te minmin tuh Jerusalem bua oun thua`ae. Te aning tempal voidu kya a ccia lyakhe, amaw kalan alepaw ranpibawi`ae te kawbya ccangpatu`ae, te piccang`ae oun thua`ae zah, ²⁸ “Paw kawhoinaw te mou e uccaw`ae hynh na cyi? E uccaw`ae cyi lan hung nynh mou e kawhoinaw hynh nang ae pya?” cite a khia`ae. ²⁹ Te Jesu nynh khung`ae zah, “Kae mah bya ccangkheit kae khia cih oh zah nae hopah cih oh, oute e uccaw`ae hynh paw kawhoinaw te nynh ka cyi cipaw kae hopah ru cih oh: ³⁰ Johan kya-e baptisma hynh vaawran kyate tou yn thua? Tukhyhze ccungccaw`ae kyate tou? Yn hopya tua oh,” cite a khia`ae. ³¹ Te minmin tuh mimaw te mimaw hokuh`ae zah, “Aening nynh, ‘Vaawran kyate’ ah ci oh ze, aning nynh, ‘Tuhte lanze pawccemou amaw kha na zyn khyh oh’ yn ci cih. ³² Thuasalama ‘Ccungccaw`ae kyate’ ah ci oh ze-,” minmin nynh ccungccaw`ae raw kha a rih`ae; pawccecize ccungccaw balyn nynh Johan tuh profeh ccaccing cite a tua`ae paw nynh thua. ³³ Te minmin nynh Jesu kha, “Kae nyh khyh,” a cipya`ae. Te Jesu nynh, “Kae mah paw kawhoinaw te nynh e uccaw`ae hynh ka cyi cipaw kae hopah lan khyh oh,” a cipya`ae.

¹ Te Jesu nynh minmin kha tousenaw phungpaw te bya hopya`ae: “Ccungccapaw lukheit nynh misu khokhu a rae, te hohung po a sak lui, te misutui tuanawpaw nung nawlan akhu karyn zah buhang ccangkheit a sak, te misu khokhu kha misu ryalahtu`ae kalan hohsakuh`ae zah asawnaw ram lang phe a cceih. ² Te misu thae lo ccyh kya aning nynh khokhu kya-e misu athae kha ahohtu misu ryalahtu`ae kyate ka mue ccaw cite misu ahohtu`ae kalan ryalahtu lukheit a saw. ³ Te minmin nynh kha-e paw kha kyng`ae zah bua`ae zah a kuih ccakaete a kisah`ae. ⁴ Te aning nynh minmin kalan ccangpaw ryalahtu kha bua a saw; te minmin nynh lung te deih`ae zah a lu kya vaemaw muesah`ae zah maethya te a kisah`ae. ⁵ Te aning nynh ccangpaw bua a saw; te minmin nynh phe a chia`ae; te ccangpaw patae kha mah abang kha bua`ae zah abang kha a chia`ae. ⁶ “Tukeiccu a sungsahpaw ccapaw lukheit kyalya hoi ung zah, ‘Minmin nynh ka ccapaw tuh sawtua cih`ae,’ ci zah nyathyakou tuh a ccapaw kha minmin kalan a saw. ⁷ “Thuasalama misu ryalahtu`ae nynh, ‘E paw tuh rhoccoutu nynh thua, rang oh, theih oh sih lah a rho uccaw tuh ah kya-e lang a tang ccaw,’ cite mimaw te mimaw kha a hoku`ae. ⁸ Te minmin nynh amaw kha kyng`ae zah phe a chia`ae, te misu khokhu atolang khe dae a vua`ae. ⁹ “Tukeiccu misu khokhu hoitupaw nynh pawtemou a cyi cih? Aning nynh yn thua cih zah misu ryalahtu`ae kha marya a roh cih zah misu khokhu kha mingccang`ae kalan nynh a pya cih. ¹⁰ Te, ‘Lung-inn saktu`ae nynh a nue`ae paw lung tuh aki lang-e abapi huapaw lung lang yn tang. ¹¹ Hynh-e tuh BAWIPAW nynh a cyi paw thua zah e tuh aening mitmuihnaw kya ngaeang lan um paw nynh thua,’ cite azeikuh paw e Ccathyaa hynh na ria boi khyh oh tou?” a ci. ¹² Te minmin nynh tousenaw phungpaw hynh kaening nynh yn honua cipaw a nyku`ae keiccuze amaw kha kyng lan cite a ccung`ae; thuasalama ccungccaw zapi raw a ri`ae keiccuze amaw kha phe cciataw`ae. ¹³ Te minmin nynh amaw bya ho paw kha kyngpya khylan Farasi`ae te Herod ccungccaw`ae abang kha amaw kalan a saw`ae. ¹⁴ Te minmin he thua`ae tuh amaw kha, “Ccangpatu, nang tuh ahmepaw zah hung ccungccaw mah pawlang na ria khyh cipaw kae ny; pawccecize nang tuh ccungccaw`ae mae na do khyh, thuasalama Pachia laanpi kha hmerarih lang na ccangpya; Sizar kalan ngunto pya lan accan tou, ccan khyh tou? ¹⁵ Kaening kae pya cih tou, kae pya lan khyh tou?” cite a khia`ae. Thuasalama aning nynh mih thyaruhnaw kha nyh zah minmin kha, “Pawccemou nae syntawtua oh? Denari kiakheit kha ka dotua ccaw yn cciakhae oh,” a ci. ¹⁶ Te minmin nynh kha-e kha a cciakhae`ae. Te aning nynh minmin kha, “Hynh-e hynh hung muinsan te hung ccawzeipya paw mou?” cite a khia`ae. Te minmin nynh, “Sizar muinsan te a ccawzeipyapaw,” a ci`ae. ¹⁷ Te Jesu nynh khung`ae zah, “Sizar uccaw`ae kha Sizar kalan pya oh lah Pachia uccaw`ae kha Pachia kalan pya oh,” a cipya`ae. Te minmin tuh amaw kya mih ngaeangthua. ¹⁸ Oute thothuinaw um khyh a ci`ae paw Sadusi`ae tuh amaw kalan oun thua`ae zah amaw kha, ¹⁹ “Ccangpatu, ‘Ccungccapaw lukheit a upaw nynh ccaaw saah leite chih zah a zu kha a cciataw lanze kha-e a upaw ciihan azo khyh nawlan a zu kha a neitapaw nynh a umkhae cih,’ cite Mawsi nynh kaening kha oun zeipya. ²⁰ Atu uteno lusari acih`ae paw a um`ae. Te masaty e paw nynh zuhoi zah ccaaw leite phe a chih. ²¹ Te luningnaw e paw nynh kha-e nung kha umkhae zah ccaaw leite phe bua a chih; te luthungnaw e paw nynh tuhhawte a chitaw. ²² Te lusari mawte kha-e nung kha umkhae`ae zah ccaaw hoi khyh`ae; tuh-e`ae balyn koute tuh-e nopinung mah phe a chihbua. ²³ Tukeiccu thothuinaw kya, minmin he thothui`ae te nopinung tuh hung zu lang mou a tang cih? Pawccecize lusari mawte kha-e nung kha zu lang phe a umkhae`ae,” cite a khia`ae. ²⁴ Te Jesu nynh minmin kha, “Ccathyaa te Pachia thungnaw kha na ny khyh keiccu oh ze phe na me khyh oh tou? ²⁵ Pawccecize a chih`ae paw kyate he thothui`ae tetuh zu te vaw umkheih ci um vae lan khyh, zudyku ci mah um vae lan khyh; thuasalama vaawran kya um paw vaaw ccungccaw`ae hawte nynh athua vae`ae. ²⁶ Te a chih`ae paw thothuinaw kong lante Pachia nynh, ‘Kae tuh Abraham Pachia, te Isaak Pachia te Jakob Pachia nynh ka thua,’ cite Mawsi kalan thabu kyate a hopya paw kha Mawsi ccauh kya na ria boi khyh oh tou? ²⁷ Pachia tuh achih`ae paw Pachia thua khyh, thuasalama ahiin`ae paw Pachia nynh thua, tukeiccu nanning myarya na me oh,” a cipya`ae. ²⁸ Te kawbya ccangpatu lukheit yn thua zah minmin a eiku`ae paw kha thae zah Jesu nynh ahoyte a phipya`ae paw kha a nyh tuh, “Kawpyapaw balyn kyaze paw kawpyapaw hynh mou abapihua?” cite a khia. ²⁹ Te Jesu nynh, “Kawpyapaw balyn kyaze abapi huapaw kawpyapaw tuh: ‘Pou Israel paw, ngaetua, ah Pachia BAWIPAW tuh BAWIPAW ccangkheit kyalya nynh thua. ³⁰ “Te na Pachia BAWIPAW kha na thinlung balynte, na hiinnaw-muisaw balynte, na tuanaw-thinlung balynte, te na thawzung balynte na sungsah cih.’ E hynh nynh abapi huapaw kawpyapaw tuh thua. ³¹ Te ccangningnaw tuh: ‘Na innpaw kha namaw toulou hawte na sungsah cih.’ E`ae laeze abapi huapaw kawpyapaw ccangpaw um vae khyh,” a cipya. ³² Te kawbya ccangpatu nynh, “Ahoy, Ccangpatupaw, byaccing nynh na ho, pawccecize Pachia ccangkheit rou nynh um; te amaw laelan ccangpaw Pachia um lae vae khyh. ³³ Te amaw kha thinlung balynte, te nythyanaw balynte, te hiinnaw-muisaw balynte, te thawzung balynte sungsah lanpaw te innpaw kha amaw hawte sungsah lanpaw tuh apynpi te maee te u paw silawkunaw`ae te silawkunawpaw`ae balyn laeze abapi huapaw nynh thua,” cite amaw kha a hopya. ³⁴ Te aning nynh hawrarih lante a khung paw kha Jesu nynh he a muih tuh amaw kha, “Nang tuh Pachia peenaw kyate na sawkuh khyh,” a cipya. Te tuh-e koute hung nynh sanmah byakhia ngan vae khyh`ae. ³⁵ Te Jesu nynh tempal kya a ccangpya`ae lyakhe khung`ae zah, “Pawtemou kawbya ccangpatu`ae nynh Kri tuh David Ccapaw nynh thua a ci`ae? ³⁶ Pawccecize David amaw ccaccei nynh Thyaa Muisaw liate, ‘BAWIPAW nynh ka Bawipaw kha, “Na rhaw`ae kha na ccusy lang kae raepya makhia nang tuh ka ranglang khe dahung,” a cipya,’ a ci. ³⁷ Tukeiccu David amaw ccaccei nynh Kri kha ‘Bawipaw’ cite a ko lanze pawtemou aning tuh a Ccapaw athua cih?” a ci. Te ranzae ccungccaw`ae nynh lungtuate a bya kha a ngae`ae. ³⁸ Te a ccangpyanaw kya Jesu nynh, “Kawbya ccangpatu`ae kha la raeringkuh oh. Minmin tuh uccaw ccuabalaepaw lawkute innlaepaery`ae zah kungkunaw kya sawtuate byabeihku a ry`ae; ³⁹ te sinakok kya tungkhung ahoy huaccepaw ry`ae zah poi kya ahoy huaccenaw kyakhe a umry`ae; ⁴⁰ minmin tuh numae`ae inn kha luade`ae zah cyisakuthya nawlan saw kha asaepi a sang`ae; minmin tuh ale huapaw detahnaw kha a mue cih`ae,” a ci. ⁴¹ Te Jesu tuh sisua bung te ahawiliakuh lante dahung zah ccungccaw`ae nynh sisua bung lungkhu lang pawte nynh phua a sang`ae cipaw kha a do; te a hoirung`ae paw patae nynh patae te a sang`ae. ⁴² Te a ryachipaw numaenung lukheit yn thua zah kuadron ccangkheit aphupaw daw phuapia pianing kha a sang. ⁴³ Te a zuitu`ae kha ko`ae zah minmin kha, “Byaccaccing kae hopya oh, sisua bung lungkhu lang a sang`ae paw balyn laeze e a ryachipaw numaenung nynh alunghua a sang vae. ⁴⁴ Pawccecize minmin balyn tuh phe beih lang a hoi`ae paw kya-e nynh a sang`ae; thuasalama e nung tuh a ryachi pi mawte a vuekuaku nawlan a hoithypaw balyn marya a sang,” a cipya`ae.

¹ Te Jesu tuh tempal kyate ccahe a pou tuh a zuitu`ae kyaze lukheitpaw nynh, “Ccangpatupaw, dotua, e lung`ae te inn`ae nynh ale babang hynh!” cite amaw kha a hopya. ² Te Jesu nynh khung zah, “E alepipaw lung-inn`ae hynh na muih khaw? Tingsah bung leite lung ccangkheit vawlan ccangkheit san a khangthykuh paw um lan khyh,” a cipya. ³ Te Oliv Mua vawlan, tempal te ahawiliakuh lante a dahung lya, Piter, James te Johan te Andru nynh mih makhaete, ⁴ “E uccaw`ae hynh hotuhmou oun cyikuh cih? Te e uccaw`ae balyn oun ccing lan vae ze paw muihsanaw mou yn langkuh vae cih? Oun hopah,” cite a khia`ae. ⁵ Te Jesu nynh minmin kha khung`ae zah, “Hung ccungccaw nynh san ae ling khyh nawlan oh la raeringkuh oh. ⁶ Pawccecize ccungccaw patae nynh ka min te oun thua cih`ae zah, ‘Kae tuh amaw nynh ka thua,’ oun ci cih`ae zah ccungccaw patae kha oun ling cih`ae. ⁷ Te nanning nynh rhawtukkunaw kong te rhawtukkunaw lanpaw kong kha he nae thae vae oh ze, nae vawsaw nan sah; pawccecize tuhtahawpaw oun cyikuh hahe cih, thuasalama athangnaw tuh thua la ngaw khyh. ⁸ Pawccecize minphuin phuinkheit te phuinkheit yn rawkuh cih`ae zah ram ramkheit te ramkheit yn rawkuh cih`ae. Te khyzawvawkaw kya innrui yn suekuh cih zah ccakangnaw te vawsawnaw`ae yn um cih. Hynh-e`ae tuh vawsaw teingnaw athotakawnaw nynh thua. ⁹ “Thuasalama naemaw te naemaw kha la raeringkuh oh; pawccecize minmin nynh nanning kha kungsi`ae kalan ae ah cih oh; te sinakok`ae kya ae bua cih oh. Kae ka keiccuze minmin a rawsepaw ccaekia lang uktu`ae te siapharan`ae malang ae thuakhae cih oh. ¹⁰ Te thehoypaw hynh minphuin`ae balyn kalan masaty hopya athua hahe cih. ¹¹ Thuasalama minmin nynh ae kyng oh zah he ae ah vae oh ze, paw nynh ka ho cih cipaw tuakuhty nan oh lah paccynkuhty nan oh; thuasalama kha-e ccyh kya ho lan na mue oh paw kha ho oh; pawccecize a ho paw tuh nanning thua khyh, thuasalama Thyaa Muisaw nynh thua. ¹² “Te uteno nynh a uteno toulou kha chinaw kalan yn ah cih zah paaw nynh a ccaaw kha yn ah cih; te ccaaw`ae nynh nungpaaw`ae kha oun rawse cih`ae zah oun chisah cih`ae. ¹³ Te kae ka min keiccuze ccungccaw balyn nynh nanning kha ae hua cih oh; thuasalama athangnaw cia a tyn paw tuh khum athua cih. ¹⁴ “Thuasalama profeh Denial nynh a ho hawte, ro a mang paw, luathua–ae-ui lang um paw uccaw nynh um lan accan leinaw kya a thadyn paw kha he na muih vae oh ze (Hynh-e ccaw a ria paw ccungccaw tuh thaethya sah), Judah ram kya um`ae paw nynh mua lang ccue`ae sah. ¹⁵ Te inn tungvaw um paw ccungccaw nynh a inn lungkhu-e ccangkhakheit law khylan inn lungkhu lang rung nan vae sah lah tee nan vae sah. ¹⁶ Te lei kya um paw ccungccaw nynh a boeining lawku khylan ki nan vae sah. ¹⁷ Thuasalama tuin nin`ae kya ccaawpoi`ae paw nopi`ae te mateizu paw nosi a hoi`ae paw nopi`ae hanlan paw ngaethya lan um babang! ¹⁸ Te nanning na ccuenaw oh ccyh tuh khoccih ccyh athua khyh nawlan sawsang oh. ¹⁹ Pawccecize Pachia nynh a rae paw raenaw athotakawnaw kyate atu ccyh cia a la um boi leipaw te nyalang mah a um boi vae cih leipaw vawsawrunaw tuh tuin nin`ae kya yn thua cih. ²⁰ Te Bawipaw nynh tuh-e nin`ae kha adynsah khyh lanze hung ccungccaw sanmah lue lan khyh`ae; thuasalama amaw nynh a po`ae paw ccungccaw`ae hanlan tuh-e nin`ae kha a dynsah cih. ²¹ Oute lukhakheit nynh, ‘Dotua, e kya nynh Kri tuh a um!’ Tukhyhze, ‘Dotua, khuin nynh a um!’ ae cipya oh ze la zyn nan oh. ²² Pawccecize ahme leipaw kri`ae te ahme leipaw profeh`ae oun langkuh cih`ae zah athua kho ze po`ae paw hei kha ling khylan muihsanaw`ae te ngaeangnaw`ae kha oun langsakuh cih`ae. ²³ Thuasalama la raeringkuh oh; dotua, kha-e`ae balyn kha marya kae hopyaty vae oh. ²⁴ “Thuasalama tuh-e vawsawrunaw koute, tuh-e nin`ae kya khuanin a moh cih zah sawpaw aw vae lan khyh. ²⁵ Vaawran e awsi`ae accah cih`ae zah vaawran kya um paw thungnaw`ae tuh oun hy cih. ²⁶ “Oute Ccungccaw Ccapaw tuh alepaw thungnaw te phuenaw ryte maeking`ae kya yn rung paw kha oun muih cih`ae. ²⁷ Oute aning nynh a vaaw ccungccaw`ae kha a saw cih`ae zah amaw nynh a po`ae paw ccungccaw`ae kha asaw huanaw laephi kyate asaw huanaw vaawran cia, laephi kipali kyate pynkheihlan oun suelua cih`ae. ²⁸ “Atu thaeku ku kyate hynh-e tousenaw phungpaw hynh ccangkuh oh: Thaeku ku nynh aran yn no zah anaw he yn toih vae ze hawning ccyh anae vae cipaw kha na ny oh. ²⁹ Tuh-e hawte nanning mah kha-e uccaw`ae yn cyikupaw kha he na muih vae oh ze Ccungccaw Ccapaw tuh thuakaw kin cia yn naekuh vae cipaw la nyh ccavae oh. ³⁰ Byaccaccing kae hopya oh, hynh-e uccaw`ae balyn acyiku kou makhia atu e ccungccaw`ae zo lan khyh`ae. ³¹ Vaawran te laephi tuh azo cih, thuasalama ka bya`ae tuh zo lan khyh. ³² “Thuasalama tuh-e nin te ccyh tuh hung nynh sanmah nyh khyh, vaawran um paw vaaw ccungccaw`ae te Ccapaw nynh mah nyh khyh`ae, thuasalama Paaw rou nynh a nyh. ³³ Raeringkuh oh, tuh-e ccyh tuh hotuh cipaw na ny khyh oh keiccuze raeringkute ngaw oh lah sawsang oh. ³⁴ Pawtemou aloku ci ze, asawnaw ram lang khuaccung lan a cih paw ccungccapaw nynh a inn kha cciataw zah a see`ae kha kawhoinaw a pya`ae, te luraveih kha ryalaw pya`ae zah thuakaw ngawtupaw kha thuakaw ngaw lan kawpya paw te nynh aloku. ³⁵ Tukeiccu, inn hoitupaw tuh zete ccyh tou, tukhyhze ziraccyng tou, tukhyhze awhykhua ccyh tou, tukhyhze khuadae takaw tou, hotuh ccyh nynh yn thua cih cipaw na ny khyh oh keiccuze, raeringkute la ngaw oh. ³⁶ Tukhyh lanze tua lei pite mang yn thua cih zah na i oh paw kha ae muih sei cih oh. ³⁷ Te nanning kae hopya oh paw hynh ccungccaw balyn kha mah ka hopya: Raeringkute ngaw oh!” a ci.

¹ Nin ning koute Kawtaw Poi te Ransi py leipaw Sanlou Poi a um. Te alepaw ranpibawi`ae te kawbya ccangpatu`ae nynh Jesu kha pawtemou kae phee cih zah chia lan kae kyng cih cite a ccung`ae. ² Thuasalama minmin nynh, “Poi lya tuh thua nan sah, tukhyh lanze ccungccaw`ae pung oun pookuh sei cih`ae,” a ci`ae. ³ Te Bethani khua kya, vaethyakaepaw Simon inn kya Jesu a um lya, ae lan ccaboi pe a dahung lyakhe, nopinung lukheit nynh myarya aphutepaw spaiknard satho bu alabasta lung tuihinbu bukheit kha oun ccyng zah kha-e tuihinbu kha koi zah Jesu lu kha a bu. ⁴ Te minmin laku ccungccaw abang tuh mih thinria zah, “Pawccemou e mynkhuhpaw satho hynh alakaw lang a tangsah hang? ⁵ Pawccecize denari phua zathung lae lang zua lan zah ryachi`ae pya lanze ahoypaw,” ci`ae zah kha-e nung kha a seisah`ae. ⁶ Te Jesu nynh, “Kha-e nung kha khamawte um sah, pawccemou vawsaw na pya oh? Ahoypaw ryalaw kha ka tungvaw phe a law vae. ⁷ Pawccecize nae kya ryachi`ae tuh pei a um`ae, te na ry takyh oh vae ze mih kya hoynaw na rae kho oh; thuasalama kae tuh nae kya pei ka um lan khyh. ⁸ Aning nynh a cyi khopaw kha phe a cyi vae; aning tuh ka rhua ccynaw hanlan ka pyn hynh sathothuh khylan yn thuaty vae. ⁹ Byaccaccing kae hopya oh, laephipi khaleih kya hynh-e thehoypaw honaw miakaw kya, hynh-e nopinung nynh a cyi paw hynh mah amaw liathui nawlan hobia athua cih,” a cipya`ae. ¹⁰ Te luhaw laening lakuze lukheit athua paw Judas Iskaria tuh mih kalan Jesu kha ah khylan alepaw ranpibawi`ae kalan khe a cceih. ¹¹ Te kha-e kha he a thae`ae tuh minmin tuh mih lungtua zah amaw kha phua pya lan byakinpyaku`ae. Te aning nynh accanthya lya amaw kha pawtepei ah lan cipaw kha a ccung vae. ¹² Te Ransi py leipaw Sanlou Poi masaty nin, Kawtaw Poi elan saw he theih`ae tuh, a zuitu`ae nynh Jesu kha, “Kawtaw Poi na ae nawlan, kaening nynh kae cceih cih zah teisangmou paccynsah nae ry?” cite a khia`ae. ¹³ Te Jesu nynh a zuitu`ae luning kha saw`ae zah, “Khuapi lungkhu lang la cceih oh lah dawre te tui yn the paw ccungccapaw kha na la tungkuh cih oh; amaw kha la zui oh. ¹⁴ Te aning nynh a teenaw lang la teebua oh lah inn hoitupaw kha, ‘Ccangpatu nynh, “Ka zuitu`ae ryte Kawtaw Poi kae ae ccaw teisangmou mikhia khaan tuh a um?” a ci,’ cite la hopah oh. ¹⁵ Te aning nynh phe paccynty vae paw, akopaw palung khaan kha ae la muihsah cih oh; tuin kyakhe aening hanlan la paccyn oh,” cite a hopya`ae. ¹⁶ Te a zuitu`ae tuh cceih`ae zah khuapi lungkhu a thua`ae, te Jesu nynh mih kya a hopya`ae hawte a muih`ae; te minmin nynh Kawtaw Poi dangkunaw kha a paccyn`ae. ¹⁷ Te zete ccyh khe aning tuh zuitu luhaw laening ryte oun thua`ae. ¹⁸ Te minmin tuh dahung`ae zah a ae`ae lyakhe Jesu nynh, “Byaccaccing kae hopya oh, kamaw ryte a aekheih paw nanning laku-e lukheit nynh kamaw hynh yn ah cih,” a ci. ¹⁹ Te zuitu`ae tuh mih ngaethah vae, te amaw kha, “Kae tou? Kae ka thua zaw?” cite lukheit koute lukheit nynh a khia`ae. ²⁰ Te aning nynh khung`ae zah, “Tuh-e paw tuh luhaw laening lakuze lukheit, kamaw ryte pake kya a pukheih paw nynh thua. ²¹ Amaw kong azeiku thyhhawte Ccungccaw Ccapaw tuh a cceih ccaccing cih; thuasalama Ccungccaw Ccapaw a pheetupaw ccungccapaw hanlan paw ngaethya lan um babang! Tuh-e paw hanlan a la pui khyh ze ahoy cih paw,” a cipya`ae. ²² Te a ae`ae lyakhe Jesu nynh sanlou kha laah zah lungtuabya a ho, te kha-e kha eih zah minmin kha pya`ae zah, “Lawkuh oh, ae oh; e tuh ka pyn nynh thua,” a cipya`ae. ²³ Te banang kha laah zah lungtuabya a ho koute minmin kha pya`ae zah mih balynte a neih`ae. ²⁴ Te aning nynh minmin kha, “E tuh ccungccaw patae hanlan luasah paw byakin thawpaw kya-e ka chiise nynh thua. ²⁵ Byaccaccing kae hopya oh, Pachia peenaw kya athawpaw misutui ka nia nin a thua makhia misu ku kya-e misutui kharyh ka neih boi vae lan khyh,” cite a hopya`ae. ²⁶ Te thehoysanaw law lakheit a sah kou`ae te minmin tuh Oliv Mua lang a cceih vae`ae. ²⁷ Te Jesu nynh minmin kha, “Atu khuazi kamaw keiccuze nanning balyn tuh ka kyate pung nae maeleihkuh cih oh; pawccecize, ‘Tuuringtu kha ka buatheih cih zah tuuphu`ae tuh pung a phiakuh cih`ae,’ cite azeikuh. ²⁸ “Thuasalama kae tuh ka thothui koute, nae malang Galilee lang ka la cceihty cih,” cite a hopya`ae. ²⁹ Thuasalama Piter nynh, “E`ae balyn tuh a maeleihku`ae zemah kae tuh na kyate ka maeleihkuh lan khyh,” a cipya. ³⁰ Te Jesu nynh Piter kha, “Byaccaccing kae hopya, atunin, atu khuazi ccaccei, awkhungpaw vaening a khua maw, kae hynh vaethung nae vua cih,” a cipya. ³¹ Thuasalama Piter nynh houh ccih lante, “Namaw ryte phe ka chibua lan zemah nang kha kae vua lan khyh,” a ci. Tuhhawte minmin balyn nynh a ci`ae. ³² Te Kethsemani acikuh paw ahmin kya oun thua`ae zah Jesu nynh a zuitu`ae kha, “Saw ka sang lya, nanning e kya la dahung oh,” a cipya`ae. ³³ Te amaw ryte Piter, James te Johan kha a hoeibua`ae; te a lungvawsaw zah myarya a lungriathae vae. ³⁴ Te minmin kha, “Ka hiinnaw-muisaw tuh chi lan ciate myaryasangkae a ngaethah; e kya la um oh lah la ngaw oh,” a cipya`ae. ³⁵ Te malang rakyh cceih zah laephi kya bakhung zah athua kho ze suimilan ccyh tuh amaw kyate alia ccaw cite saw a sang. ³⁶ Te, “Abba, Apang, pawpaw balyn tuh na hanlan athua kho; e banang hynh ka kyate yn lawpah; tuhzemah kae ka ry hawte thua nan sah, thuasalama na ry hawte thua sah,” a ci. ³⁷ Te yn thua zah minmin a ih`ae paw kha muih zah Piter kha, “Simon, na i tou? Suimilan ccangkheit san na ngaw kho khyh tou? ³⁸ Nanning nynh tuhounaw lungkhu lang na phungku sei khyh nawlan oh sawsang oh lah ngaw oh. Muisaw nynh tuh a ry ccaccing, thuasalama pynsaw tuh a thawzya,” a cipya. ³⁹ Te bua cceih ki zah a hoty paw bya`ae kha ho zah saw a sang. ⁴⁰ Te he a ki tuh minmin bua a ih`ae paw kha a muih, pawccecize mih mit tuh daekuh vae khyh; te amaw kha pawte nynh khung lan cipaw nyh khyh`ae. ⁴¹ Te vaethungnaw bua thua zah minmin kha, “Atu tetuh ih ccavae oh, hae-ung ccavae oh. Azaw vae, accyh a thua vae. Dotua oh, Ccungccaw Ccapaw tuh misei`ae kuih kalan ah athua vae. ⁴² Tho oh, cceih ccavae oh sih. Dotua oh, kamaw yn pheetupaw tuh yn thua vae,” a cipya`ae. ⁴³ Tuhte a ho cciamang lyakhe luhaw laening kyaze lukheit athua paw Judas tuh alepaw ranpibawi`ae, kawbya ccangpatu`ae te piccang`ae nynh oun saw`ae paw ccungccaw zapi ryte, thaloi`ae te tungbang`ae ccyngkute vaekheihmawte oun thua vae`ae. ⁴⁴ Te amaw a pheetupaw nynh, “Kae nynh kae myng paw kha tuh Jesu nynh thua; amaw kha kyng oh lah khyndadyhlan cciakhae oh,” cite hopah`ae zah minmin kha syntawnaw a pya`ae. ⁴⁵ Te aning nynh he yn thua miakaw te Jesu kalan palou cceih zah, “Rabbi, Rabbi,” ci zah amaw kha a myng. ⁴⁶ Oute minmin nynh a tungvaw kuihsaw`ae zah amaw kha a kyng`ae. ⁴⁷ Te a pe a thadyn paw ccungccapaw lukheit nynh thaloi kha thuakuh zah ranpibawi a seepaw kha a nakua thoh pae lang a bae. ⁴⁸ Te Jesu nynh, “Nanning nynh miruhpaw a kyng`ae hawte, kamaw hynh kyng lan thaloi te tungbang ryte tou nae ccianua oh? ⁴⁹ Kae tuh tempal kya ccangpyate nin takyh nanning ry ka um zah kamaw kha nae kyng khyh oh; Ccathyaa tuh accing hahe cih,” cite a hopya`ae. ⁵⁰ Oute zuitu`ae balyn nynh amaw kha cciataw`ae zah pung ccuetaw vae`ae. ⁵¹ Te boei zungkheit a zingkuh paw ccangvaepaw lukheit nynh amaw kha a zui; te ccangvae`ae nynh kha-e paw kha a kyng`ae; ⁵² te aning nynh boei kha phe ccuetaw zah minmin kyate a sasete po a ccue. ⁵³ Te minmin nynh Jesu kha ranpibawi lupi kalan a cciakhae`ae; te amaw ryte alepaw ranpibawi`ae balyn, piccang`ae te kawbya ccangpatu`ae tuh a la sueluakuh`ae. ⁵⁴ Te Piter nynh ranpibawi lupi umnaw maepaw kyacia Jesu kha asawpi te a zui; te aning tuh tempal ngawtu`ae kyakhe dahungbua zah maee a ekuh bua. ⁵⁵ Atu alepaw ranpibawi`ae te Sanhedrin kungsi`ae balyn nynh Jesu kha rawsete chia khylan ccaekia a ccungnua`ae; thuasalama kharyh muih khyh`ae. ⁵⁶ Pawccecize ccungccaw patae nynh amaw rawsete ahme leipaw ccaekia a khan`ae, thuasalama mih ccaekia`ae tuh lokuh khyh`ae. ⁵⁷ Te ccungccaw abang nynh tho`ae zah amaw rawsete ahme leipaw ccaekia kha hynhte a khan`ae: ⁵⁸ “E paw nynh, ‘Kuih te rae paw e tempal hynh ka roh cih zah kuih te rae leipaw ccangpaw tempal kha nin thung lungkhu ka sak cih,’ cite a ho paw kae thae,” a ci`ae. ⁵⁹ Thuasalama mih ccaekia mah lokuh khyh. ⁶⁰ Te ranpibawi lupi nynh angaelung khe thadyn zah Jesu kha, “Kawkheit san na khung khyh`ae rei? Nang ae rawsepaw e ccaekia`ae hynh pawte?” cite a khia. ⁶¹ Thuasalama aning nynh yccae khyh, kawkheit san khung khyh. Ranpibawi lupi nynh amaw kha, “Nang tuh Thehoysapaw Pachia Ccapaw, Kri na thua tou?” cite bua a khia. ⁶² Te Jesu nynh, “Ka thua; te nanning nynh Ccungccaw Ccapaw tuh Thungnaw ranglang kya a dahung paw te vaawran e maeking`ae ryte yn rung paw kha nae muih cih oh,” a ci. ⁶³ Oute ranpibawi lupi nynh a uccaw kha ccarae sei zah, “Tuh laelan paw ccaekia mou aening aho ung? ⁶⁴ Pachia saryate bya a ho paw phe na thae vae oh! Pawte na tua oh?” cite a khia`ae. Te minmin balyn nynh chi lan accan cite amaw kha seibe`ae. ⁶⁵ Te abang nynh amaw kha tuin te a thoi`ae, A mae kha phang bong`ae zah a thung vae`ae, te, “Profehbya hotua!” a ci`ae. Te tempal ngawtu`ae nynh mih kuihphe te amaw kha a bia`ae. ⁶⁶ Te Piter tuh akaw lang innvoidu kya a um lyakhe ranpibawi lupi a ryalawpatu nopinung lukheit yn thua zah, ⁶⁷ Piter nynh maee a ekupaw kha he a muih tuh, amaw kha rirido zah, “Nang mah Nazareth paw Jesu ryte a umbua paw nynh na thua,” a ci. ⁶⁸ Thuasalama Piter nynh ei zah, “Na hopaw tuh ka nyh khyh, thae mah ka thaethya khyh,” a ci. Te Piter tuh maepaw lang po a pou; te awkhungpaw a khua. ⁶⁹ Te ryalawpatu nopinung nynh Piter kha bua muih zah, tuin pe a thadyn`ae paw kha, “E paw hynh minmin kyaze lukheit nynh athuabua,” a cipya`ae. ⁷⁰ Thuasalama Piter nynh kha-e kha bua a ei. Te khuekheih cih koute, tuin a thadyn`ae paw nynh Piter kha, “Thanccingte nang tuh minmin kyaze lukheit nynh na thua; pawccecize nang tuh Galilee paw nynh na thua, te na byaho mah phe alokuh bua,” a ci`ae. ⁷¹ Thuasalama Piter nynh, “Na ho oh paw Ccungccapaw tuh ka nyh khyh,” cite thyalawkuh zah byakinku vae. ⁷² Te vaeningnaw awkhungpaw a khua. Te, “Awkhungpaw vaening a khua mawze, nang nynh vaethung nae vua cih,” cite Jesu nynh a hopya paw bya kha Piter nynh a liathui vae. Te kha-e kha he a tua tuh a rah vae.

¹ Te awkhua khe alepaw ranpibawi`ae tuh piccang`ae ry, kawbya ccangpatu`ae te kungsi`ae balyn ryte arangte khuakhankuh`ae zah; Jesu kha a hee`ae, te cciakhae`ae zah Pilat kalan a ah`ae. ² Te Pilat nynh, “Nang hynh Jew`ae Siapharan na thua tou?” cite amaw kha a khia. Te aning nynh, “Na ho hawte nynh thua,” cite a khung. ³ Te alepaw ranpibawi`ae nynh amaw kha patae seibe`ae; thuasalama aning nynh kawkheit san khung khyh`ae. ⁴ Te Pilat nynh, “Kawkheit san na khung khyh`ae rei? Dotua, nang kha rawsete minmin nynh ccaekia hozeihmou a khan`ae!” cite amaw kha bua a khia. ⁵ Thuasalama Jesu nynh kawkheit san bua khung khyh, tukeiccuze Pilat tuh a ngaeangthua. ⁶ Te tuh-e Kawtaw Poi kya ccungccaw`ae nynh a ngiaku`ae paw thungccahpaw lukheit kha Pilat nynh leih a luesah he. ⁷ Te doukunaw kya ccungccaw theihtu Barabbas acikuh paw tuh amaw ryte doukunaw a raekheih`ae paw ryte thungccah`ae. ⁸ Te ccungccaw zapi nynh mimaw kalan leih a cyipya`ae hawte oun cyipya ccaw cite thawte sia`ae zah Pilat kha a ngia`ae. ⁹ Thuasalama Pilat nynh, “Jew`ae Siapharanpaw hynh nae kalan kae luesahpya oh ze na ry oh tou?” cite a khia`ae. ¹⁰ Pawccecize, alepaw ranpibawi`ae nynh mih eiung keiccu nynh Jesu kha a ah`ae cipaw Pilat nynh phe a ny. ¹¹ Thuasalama Pilat nynh Barabbas kha mih hanlan oun sawpya ccaw cite alepaw ranpibawi`ae nynh ccungccaw zapi kha phe a hy vae`ae. ¹² Te Pilat nynh bua khung`ae zah, “Tuhte lanze Jew`ae Siapharan na ci oh paw amaw hynh pawtemou nae cyisah ry oh?” cite bua a khia`ae. ¹³ Te minmin nynh, “Amaw kha khiade!” cite bua a sia`ae. ¹⁴ Oute Pilat nynh minmin kha, “Pawccemou? Paw ahoy leipaw mou aning nynh a cyi?” cite a khia`ae. Te minmin nynh, “Amaw kha khiade!” cite houh a sia`ae. ¹⁵ Te Pilat nynh ccungccaw zapi kha lunghoysah ry zah Barabbas kha mih kalan a sawpya`ae; te Jesu kha buasah`ae zah khiade khylan a ah vae. ¹⁶ Te Jesu kha rhawkaw`ae nynh Praetorium acikuh paw Byapianaw Khaan lungkhu lang a teekhae`ae; te minmin nynh rhawkawphu khaleih kha a kobua`ae. ¹⁷ Te minmin nynh sekakungpaw uccaw kha zingsah`ae zah hingpaw lukhung kha khepah`ae zah a lu kya a khungsah`ae. ¹⁸ Te, “Jew`ae Siapharanpaw salan kae pya!” cite amaw kha a beih`ae. ¹⁹ Te minmin nynh a lu kha phaekute a bua`ae, te mih tuin te a thoi`ae, te ccukharutungte amaw kha a beik`ae. ²⁰ Te minmin nynh Jesu kha a sarya kou`ae te sekakungpaw uccaw kha phae`ae zah amaw a uccaw kha bua a lawsaku`ae, te khiade lan a cciakhae vae`ae. ²¹ Te Alexanda te Rufas mih paaw, Sairin khua paw, Simon tuh khua taraw langte yn thua zah a cceih paw kha Jesu vaelantung puih lan minmin nynh a riase`ae. ²² Te minmin nynh Jesu kha Luru Hmin acikuh paw, Golgotha hmin kalan khe a cciakhae`ae. ²³ Te minmin nynh amaw kha mura te apykuhpaw misutui kha nia lan a pya`ae; thuasalama aning nynh neih khyh. ²⁴ Te minmin nynh amaw kha he a khiade`ae tuh milu raveih nynh ccungthy dungte a uccaw`ae kha a neeku`ae. ²⁵ Te awkhua suimilan ccangtakua ccyh khe minmin nynh amaw kha a khiade`ae. ²⁶ Te amaw seibenaw`ae paw a luki kya ccawtawpya paw tuh: “JEW`AE SIAPHARAN,” ci nynh thua. ²⁷ Te amaw ryte damiah`ae luning kha mah, lukheit a ranglang, te lukheit a voilang a khiade bua`ae. ²⁸ Ou tuhte, “Aning tuh kawbya ei`ae paw ryte ria athua,” acikuh paw Ccathyaa tuh accing vae. ²⁹ Te khe pe a cceih`ae paw nynh mih lu thuhpah`ae zah, “Ah nopang! Tempal kha roh zah nin thung te phe a sakthui paw nang, ³⁰ namaw te namaw kha khumkuh lah vaelantung kyate yn rungtua!” cite a sarya`ae. ³¹ Tuhhawte alepaw ranpibawi`ae te kawbya ccangpatu`ae nynh mah, “Aning nynh mingccang`ae kha tuh a khum`ae, amaw te amaw tuh khumkuh kho khyh. ³² Kaening nynh kae muih sah lah kae zyn ccaw Israel Siapharan, Kri tuh atu vaelantung kyate yn rungtua sah,” cite amaw kha saryate mimaw te mimaw laku a ho`ae. Te amaw ryte a khiade bua`ae paw nynh mah amaw kha a saryabua`ae. ³³ Te ninthu suimilan haw laening ccyh he thua te zete suimilan ccangthung ccyh cia ram balyn tuh pung amoh. ³⁴ Te zete suimilan ccangthung ccyh kya Jesu nynh, “Eloi, Eloi, lama sabach thani?” cite thawte a sia. Asuilan tuh, “Ka Pachia, ka Pachia, pawccemou kae hynh phe nae vuasya?” cipaw nynh thua. ³⁵ Te a pe thadyn`ae paw abang nynh he a thae`ae tuh, “Dotua oh, aning nynh Elijah nynh a koku,” a ci`ae. ³⁶ Te lukheitpaw nynh ccue zah phuesitung kha misutui ariapaw kya dung zah phaeku dung kya a hede koute nia lan pya zah, “Amaw khate um tua sah; Elijah nynh amaw law lan yn rungnuabung tah yn rungnuabung khyh tah dotua oh sih,” a ci. ³⁷ Te Jesu tuh thawte sia zah a hy athang vae. ³⁸ Te tempal lungkhu boei zokhawpaw tuh alu te alia cia ccangning lang ccarae seikuh. ³⁹ Te amaw malang a thadyn paw rhawbawipaw nynh thawte sia zah a hy athangpaw kha he a muih tuh, “Thanccingte e Ccungccapaw tuh Pachia Ccapaw nynh thua!” a ci. ⁴⁰ Asawpi langte a do`ae paw nopi`ae mah a um`ae; tuh-e`ae laku Meri Magdalin, te adih huapaw James te Joses mih nung Meri, te Salomi; ⁴¹ E`ae tuh Jesu Galilee ram kya a um lyaze amaw kha zui`ae zah ryalawpah`ae paw nynh thua`ae, te amaw ryte Jerusalem lang oun cceihkheih`ae paw ccangpaw nopi`ae patae a um`ae. ⁴² Te zete he a thua tuh, Paccynkunaw Nin athua keiccuze, tuh-e nin tuh, Sabbath nin thua maw nin nynh thua; ⁴³ sawtua lan um paw kungsi memba lukheit athua paw, Pachia peenaw kha a ngaehoibua paw, Arimathia khua paw Josef tuh yn thua zah rhawhoyte Pilat kalan tee zah Jesu rhua kha a ngia. ⁴⁴ Te Pilat nynh Jesu tuh phe chih kanmaw vae ngaw tang cite a ngaeangthua zah rhawbawipaw kha ko zah aning tuh phe chih ccaccing vae tou cite a khia. ⁴⁵ Te rhawbawipaw kyate he a nyh te, Pilat nynh Jesu rhua kha Josef a pya. ⁴⁶ Te Josef nynh nebaleihpaw boei kha re zah amaw kha vaelantung kyate sahbung zah boei nepaw khate a lung vae. Te lung kya a karyn`ae paw shaw lungkhu khe ccy zah shaw khu kha lungphepi tounua zah a fusung. ⁴⁷ Te Meri Magdalin te Joses a nung Meri nynh a rhua a ccynaw`ae kha a do`ae.

¹ Te Sabbath nin he alia te, Meri Magdalin te James a nung Meri, te Salomi nynh ccia lan zah amaw kha thuh khylan mynkhuhpaw satho kha a re`ae. ² Te lonaw nawkheit kyaze masaty nin awkhua takaw khuanin thua dyn khe minmin tuh shawku lang a cceih`ae. ³ Te mimaw te mimaw kya, “Shaw thufu kyate lung kha hung nynh mou aening oun nuepah cih?” cite a hokuh`ae. ⁴ Te minmin nynh he a do`ae tuh, lung tuh phe a nuekuh vae paw kha a muih`ae; tuh-e lung tuh myarya alepaw nynh thua. ⁵ Te shaw lungkhu lang tee`ae zah arawpaw uccaw ccuabalaepaw a kikuh paw ccangvaepaw lukheit ranglang te a dahung paw kha a muih`ae tuh a rih`ae. ⁶ Te aning nynh minmin kha, “Nae ngaeangthua nan sah, a khiade`ae paw Nazareth paw Jesu kha nanning nynh na ccung oh. Aning tuh phe a tho vae! E kya um vae khyh. Amaw a ccynaw`ae hmin kha dotua oh. ⁷ Thuasalama la cceih oh lah a zuitu`ae te Piter kha aning tuh nae malang Galilee lang nynh a ccia; nae kya a ho hawte tuin kya amaw kha na la muih cih oh cite la hopah oh,” a cipya`ae. ⁸ Te minmin tuh shawku kyate thokuh`ae zah arangte a cceih`ae; minmin tuh thyngkuh`ae zah mih ngaeangthua; a ri`ae keiccuze hung sanmah kharyh hopah khyh`ae. ⁹ Atu Jesu tuh lonaw kyaze masaty nin awkhua takaw khe he a thothui tuh, a kyate raerangsaro lusari a deepya paw Meri Magdalin kyakhe masaty a langkuh. ¹⁰ Te Meri nynh cceih zah Jesu ryte langmaw lya a umkheih`ae paw nynh khui`ae zah a raw`ae lyakhe, kha-e kong kha a hopya`ae. ¹¹ Te minmin nynh Jesu tuh a hiin vae cipaw te Meri nynh a muih cipaw he thae`ae tuh zyn khyh`ae. ¹² Tuh-e koute zuitu`ae luning nynh khua taraw lang a ccia lya`ae khe, Jesu tuh ccangpaw muinsan lante mih kalan a langkuh. ¹³ Te minmin nynh cceih`ae zah kha-e kha tuhlaepaw kyakhe a hopya`ae; thuasalama minmin nynh kha-e kha zyn lae khyh`ae. ¹⁴ Tuhkoute luhaw laekheit nynh aepaw a koih lya`ae khe Jesu mih kyakhe a langkuh, te a thothuipaw Jesu a muih`ae paw ccungccaw`ae bya kha a zyn khyh`ae keiccuze, mih zyn leinaw te mih lungkhungnaw elan minmin kha a pe`ae. ¹⁵ Te Jesu nynh, “Laephipi balyn lang nanning la cceih oh lah rae paw miakaw kyakhe thehoypaw la ho oh. ¹⁶ Zyn zah baptisma-in paw ccungccaw tuh khum athua cih; thuasalama a zyn leipaw ccungccaw tuh seibe athua cih. ¹⁷ Te a zyn`ae paw tuh e muihsanaw`ae nynh a zuiding cih`ae: Ka min liate minmin nynh raerangsaro`ae a dee cih`ae; minmin nynh bya thawpaw te a ho cih`ae; ¹⁸ minmin nynh fupaw`ae kha a kyng cih`ae; te a chisah khopaw asy kha a nia`ae zemah, pawtua um lan khyh`ae; ngeccih`ae tungvaw kuih khang cih`ae zah minmin kha a dansah cih`ae,” cite a hopya`ae. ¹⁹ Ou tuhte Bawipaw nynh minmin kha a hopah`ae koute amaw tuh vaawran lang lawthung thua zah Pachia a ranglang khe a dahung vae. ²⁰ Te minmin tuh cceih`ae zah ahmin takyh kya phungho`ae, Bawipaw nynh minmin ryte ryalah zah mih kya a zuikuh paw muihsanaw`ae liate bya kha a tynsah. Amen.