Matthew

¹ Abraham Ccapaw, David Ccapaw Jesu Kri a thokeinaw ciihan ccauh. ² Abraham nynh Isaak a saah, te Isaak nynh Jakob a saah, te Jakob nynh Judah te a uno`ae a saah. ³ Te Judah nynh a zu Tamar kyate Farez te Zerah a saah, te Farez nynh Hezron a saah, Hezron nynh Ram a saah. ⁴ Te Ram nynh Amminadab a saah, te Amminadab nynh Nahshon a saah, te Nahshon nynh Salmon a saah. ⁵ Te Salmon nynh a zu Rahab kyate Boaz a saah, te Boaz nynh Ruth kyate Obed a saah, te Obed nynh Jessi a saah. ⁶ Te Jessi nynh siapharan David a saah, te siapharan David nynh Uriah zu lang phe a tang vae paw nopinung kyate Solomon a saah. ⁷ Te Solomon nynh Rehoboam a saah, te Rehoboam nynh Abija a saah, te Abija nynh Asa a saah. ⁸ Te Asa nynh Jehoshafat a saah, te Jehoshafat nynh Jehoram a saah, te Jehoram nynh Uzziah a saah. ⁹ Te Uzziah nynh Jotham a saah, te Jotham nynh Ahaz a saah, te Ahaz nynh Hezekiah a saah. ¹⁰ Te Hezekiah nynh Manasseh a saah, te Manasseh nynh Amon a saah, te Amon nynh Josiah a saah. ¹¹ Te Josiah nynh Jekoniah te a uno`ae kha a saah. Tuh ccyh loukaw khe nynh Jew`ae kha Babilon lang a cciakhae`ae. ¹² Te minmin kha Babilon lang a cciakhae`ae koute Jekoniah nynh Shealtiel a saah, Shealtiel nynh Zerubbabel a saah. ¹³ Te Zerubbabel nynh Abiud a saah, te Abiud nynh Eliakim a saah, te Eliakim nynh Azor a saah. ¹⁴ Te Azor nynh Zadok a saah, te Zadok nynh Akhim a saah, te Akhim nynh Eliud a saah. ¹⁵ Te Eliud nynh Eliazar a saah, te Eliazar nynh Matthan a saah, te Matthan nynh Jakob a saah. ¹⁶ Te Jakob nynh Meri a vawpaw Josef a saah, tuh-e nung kyate nynh Kri acikuh paw Jesu tuh a pui. ¹⁷ Tukeiccu Abraham kyate David kyacia she balyn tuh she haw laepali, te David kyate Babilon lang see lang cciakhaenaw kyacia she haw laepali, te Babilon lang see lang cciakhaenaw kyate Kri kyacia she haw laepali acih. ¹⁸ Atu Jesu Kri puinaw tuh hynhte nynh athua: A nung Meri tuh Josef zu lang hawpah`ae zah minmin pynkheihlan a umkheih`ae maw khe, aning tuh Thyaa Muisaw ccaaw a poi. ¹⁹ Te a vawpaw Josef tuh adingpaw ccungccaw athua thyhhawte kha-e nung kha zapi malang maethyasah lan ry khyh zah amaw kha aphi te zya mya lan a tuaku. ²⁰ Thuasalama hynh-e uccaw`ae kong a tua lyakhe, dotua, a maan kya Bawipaw vaaw ccungccapaw nynh a kya yn langkuh zah, “David ccapaw Josef, na zu Meri kha namaw kalan hoeiku lanpaw rih nan, pawccecize a kya a poi paw ccaaw kha Thyaa Muisaw kya-e nynh thua. ²¹ Te aning nynh Ccapaw lukheit yn saah cih zah Jesu cite a min na phu cih, pawccecize aning nynh a ccungccaw`ae kha mih seinaw`ae kyate a khum cih`ae,” a cipya. ²² Bawipaw nynh profeh kyate a hopaw accing nawlan nynh atu hynh-e balyn tuh acyikuh. Tuh-e a hopaw tuh: ²³ “Dotua, liaccady nynh ccaaw a poi cih zah Ccapaw a saah cih, te minmin nynh a min kha Immanuel cite a phu cih`ae,” tuh-e asuilan tuh, “Pachia kaening ryte a um,” cipaw nynh thua a ci. ²⁴ Oute Josef tuh inaw kyate tho zah Bawipaw kya-e vaaw ccungccapaw nynh a hopya hawte cyih zah a kalan a zu kha a hoeiku. ²⁵ Te a ccatawccaaw phe a pui cia kha-e nung kha ikhae khyh, te Josef nynh a min kha Jesu cite a phu.

¹ Atu Herod nynh siapharan lang a tang ccyh lya Judea pee Bethlehem khua kya Jesu he a pui tuh, dotua, nithua langte mihaw`ae nynh Jerusalem lang oun thua`ae zah, ² “A pui paw Jew`ae Siapharan tuh teisangmou a um? Pawccecize nithua langkhe amaw awsi kha phe kae muih zah amaw beik khylan nynh kae thua,” a ci`ae. ³ Hynh-e kong kha siapharan Herod nynh he a thae tuh a thinphang, te amaw ryte Jerusalem ccungccaw`ae balyn mih thinphang. ⁴ Te aning nynh alepaw ranpibawi`ae te ccungccaw`ae kyaze kawbya ccangpatu`ae balyn kha pynkheihlan a suelua`ae koute, Kri tuh teisangmou a pui cih cipaw kha a khia`ae. ⁵ Te minmin nynh amaw kha, “Judea pee Bethlehem kya nynh thua; pawccecize profeh kyate hynhte azeikuh: ⁶ ‘Judah ram kya Bethlehem nang tuh Judah uktu`ae lakuze adih huaccepaw na thua khyh, pawccecize nang na kyate ka ccungccaw Israel`ae a ring lanpaw ram Uktu yn pou cih,’ cite azeikuh,” a cipya`ae. ⁷ Oute Herod nynh mihaw`ae kha aphiru lante zya ko`ae zah paw ccyh kya mou awsi alangku cite minmin kha akaw-aleih a khia`ae. ⁸ Te minmin kha Bethlehem lang saw`ae zah, “La cceih oh lah imohpaw kha thawmawte oun ccung oh, te he nae muih oh te nae hopah bua cih oh, kae mah kae cceihbua cih zah ka beik bua ccaw,” a cipya`ae. ⁹ Siapharan bya he a thae`ae koute minmin tuh a pou`ae; te dotua, nithua lang-e a muih`ae paw awsi tuh mih malang khe a cceih. Imohpaw a umnaw luki kya a thua tuh a thadyn. ¹⁰ Minmin nynh awsi kha he a muih`ae tuh myaryasangkae mih lungtua. ¹¹ Te minmin nynh inn lungkhu he thua`ae tuh Imohpaw kha a nung Meri ryte a muih`ae, te bakhung`ae zah amaw kha a beik`ae; te minmin nynh mih sisua`ae kha hung`ae zah lasung`ae sui, frankinsens te mura kha amaw a pya`ae. ¹² Te minmin tuh Herod kalan a ki vae khyh nawlan`ae Pachia nynh mih maan kya raeringnaw a pya`ae thyhte, minmin tuh mimaw ram lang ccangpaw laanpi langte nynh a ki`ae. ¹³ Te minmin he a pou`ae te, dotua, maan kya Bawipaw kyae vaaw ccungccapaw tuh Josef kya yn langkuh zah, “Thokuh lah Imohpaw kha laah lah a nung ryte Izip ram lang ccuekhae`ae, te bya kae hopya makhia tuin kyakhe la um, pawccecize Herod nynh Imohpaw kha chia khylan yn ccung vae cih,” a cipya. ¹⁴ Josef tuh thokuh zah Imohpaw te a nung kha hoei`ae zah khuazi khe Izip ram lang a poukhae`ae. ¹⁵ Te Herod a chi mawlaezung aning tuh tuin kya nynh a um. Ou tuhte, “Izip ram kyate ka Ccapaw kha phe ka ko vae,” cite Bawipaw nynh profeh kyate a hopaw accing nawlan nynh thua. ¹⁶ Oute mihaw`ae nynh phe yn ling vae`ae cipaw kha Herod nynh he a nyh tuh myaryamaw a thinria, te ccungccaw saw zah mihaw`ae kha akaw-aleih a khiasah`ae paw accyh thyhhawte, Bethlehem kya te tuh-e area balyn kya um paw, kum ning te akaw lang-e pise imua`ae balyn kha marya a chiasah`ae. ¹⁷ Oute profeh Jeremiah nynh a hosyapaw bya tuh accing vae. A hopaw tuh: ¹⁸ “Ramah kya rawnaw te khuinaw te thinlung phe koi paw rawkhuinaw roi tuh thae athua, Rachel tuh a ccaaw`ae a um vae khyh keiccuze rah zah soihbiaku ry vae khyh,” a ci. ¹⁹ Thuasalama Herod he a chih tuh, dotua, Izip ram kyakhe Bawipaw kya-e vaaw ccungccapaw tuh maan kyate Josef kalan yn langkuh zah, ²⁰ “Thokuh lah Imohpaw te a nung kha laah`ae lah Israel ram lang cceih ccavae, pawccecize Imohpaw hiinnaw a ccung`ae paw tuh phe chih vae`ae,” a cipya. ²¹ Te Josef tuh thokuh zah Imohpaw te a nung kha cciakhae`ae zah Israel ram lungkhu lang a thua`ae. ²² Thuasalama Judea ram kya Arkhelaus nynh a paaw Herod hanpaw a uk cipaw kha Josef nynh he a thae tuh tuh-e kalan ccia lan phe a rih; tuhzemah maan kya Pachia nynh raeringnaw phe a pya vae thyhte, Galilee pee sang kheit lungkhu lang aning tuh a maeleihkuh. ²³ Te, “Aning tuh Nazarethpaw cite ko athua cih,” acikuh paw profeh`ae nynh a ho`ae paw accing nawlan aning tuh Nazareth acikuh paw khua kya thua zah tuin kyakhe a um vae.

¹ Ccyh khaw aro koute Baptisma pyatu Johan tuh yn thua zah Judea pee rangkaw khe phungho zah, ² “Nanning ngaesikuh oh, pawccecize vaawran peenaw tuh anae vae,” a ci. ³ Pawccecize e paw tuh profeh Isaiah nynh, “Rangkaw kya a sia paw roi nynh, ‘BAWIPAW a ccianaw kha paccynpah oh, A laanpi`ae kha lawbabinlan raepah oh,’ ” cite a honuathepaw kha nynh thua. ⁴ Te Johan tuh kalauk ming te rae paw uccaw kha lawkuh zah a tae kya saving taesung kha a sungku; te a aepaw tuh tungkhipaw`ae te rangkaw e khoitui nynh thua. ⁵ Oute Jerusalem e, Judea pee e te Jordan pepan e ccungccaw`ae balyn tuh Johan kalan oun thua`ae zah, ⁶ mih seinaw`ae kha phykute Jordan vaw khe amaw kya baptisma a in`ae. ⁷ Thuasalama Farasi`ae te Sadusi`ae patae nynh baptisma-in khylan oun thua`ae paw kha Johan nynh he a muih tuh minmin kha hynhte a cipya`ae, “Pou fuparepaw ciihan`ae, yn thua vae cih paw thinrianaw kyate ccue khylan hung nynh mou nanning kha raering ae pya oh? ⁸ Tukeiccu ngaesikunaw te angaekuhpaw athae`ae kha oun thuakhae oh, ⁹ te naemaw te naemaw kya, ‘Kaening tuh paaw lang Abraham kae hoi,’ cite ho lan tuakuh nan oh. Pawccecize Pachia tuh hynh-e lung`ae kyate Abraham a ccaaw`ae kha a pousah kho cipaw nanning kae hopya oh. ¹⁰ Te atu mah hae tuh thingku leihpaw kya nungde athua vae; tukeiccu ahoypaw athae thae leipaw thingku miakaw tuh nge thua zah maee lungkhu lang phung athua. ¹¹ Ngaesikunaw hanlan kae nynh tui kya baptisma kae insah ccaccing oh; thuasalama kamaw koute yn thua lanpaw aning tuh kae laeze alesaehua, tuh-e paw a ccukoh ccyngpya lan kae tuh ka ngaekuh khyh; aning nynh nanning kha Thyaa Muisaw kya te maee kya baptisma ae insah cih oh. ¹² A kuih kya ccankung ccyng zah a sarahmin kha thyaapaping lang a cciccae cih, te a chanvui kha byng lungkhu lang a ruin cih, thuasalama asipaw kha tuh a chih kho leipaw maee te a u cih,” a ci. ¹³ Oute Jesu tuh baptisma-in khylan Galilee kyate Jordan vaw lang Johan kalan yn thua. ¹⁴ Thuasalama Johan nynh, “Kae khaw nang na kya-e baptisma-in lan ka ccan, nang nynh tou kae ka kalan nae cceih?” ci zah amaw kha a khee. ¹⁵ Te Jesu nynh khung zah, “Atu ua, pawccecize dingnaw balyn marya accing nawlan ou tuhte aening hanlan accanpaw nynh thua,” a cipya. Oute Johan nynh amaw kha a ua. ¹⁶ Te baptisma-in koute Jesu tuh tui kyate taloi a pou. Te dotua, amaw hanlan vaawran tuh hungkuh zah Pachia Muisaw nynh vafu hawte yn rungbung zah Jesu tungvaw a ccu paw kha Johan nynh a muih. ¹⁷ Te vaekheihmawte vaawran kyate roi ccangkheit nynh, “E paw tuh ka sungsahpaw ka Ccapaw nynh thua, amaw kya ka lungrythua,” a ci.

¹ Oute diabolos nynh a tuh-ou ccaw cite rangkaw langkhe Muisaw nynh Jesu kha a cciakhae. ² Te Jesu tuh nin sungpali te zi sungpali looh-ae he a sung tuh a vuelaw vae. ³ Te tuh-outu amaw kalan yn thua zah, “Nang tuh Pachia Ccapaw na thua ze hynh-e lung`ae hynh sanlou lang tang lan kawpyatua,” a cipya. ⁴ Thuasalama Jesu nynh khung zah, “Ccathyaa kya, ‘Ccungccaw tuh sanlou kyalya te hiin lan khyh, thuasalama Pachia khalang kyate yn toikuh paw bya miakaw te nynh a hiin cih,’ cite azeikuh,” a cipya. ⁵ Oute diabolos nynh Jesu kha athyaapaw khuapi lungkhu lang cciakhae thung zah tempal ahang huaccenaw tungvaw khe a umsah. ⁶ Te amaw kha, “Nang tuh Pachia Ccapaw na thua ze namaw te namaw toikubung tua; pawccecize Ccathyaa kya, ‘Nang te asekuh lante Pachia nynh a vaaw ccungccaw`ae kha kaw yn pya cih`ae,’ te ‘Lung kya na ccu na thuhku khyh nawlan minmin nynh mih kuih kya ae dua cih`ae,’ cite azeikuh,” a cipya. ⁷ Jesu nynh, “Ccathyaa kya, ‘BAWIPAW na Pachia kha nang nynh na syntawtua lan khyh,’ cite bua azeikuh,” a cipya. ⁸ Diabolos nynh myarya ahangpaw mua langkhe bua cciakhae thung zah laephipi peenaw`ae te lesaenaw`ae balyn kha marya a muihsah. ⁹ Te amaw kha, “Na bakhung zah kamaw hynh nae beik lan thua ze hynh-e uccaw`ae balyn hynh marya kae pya cih,” a cipya. ¹⁰ Oute Jesu nynh, “Setan, la cceih! Pawccecize Ccathyaa kya, ‘BAWIPAW na Pachia kha na beik cih zah amaw kyalya kha rya na lawpah cih,’ cite azeikuh,” a cipya. ¹¹ Oute diabolos nynh amaw kha a poutaw; te dotua, vaaw ccungccaw`ae oun thua`ae zah amaw kha a dooih`ae. ¹² Johan kha thung a saw`ae cipaw Jesu nynh he a thae tuh Galilee pee lang a cceih. ¹³ Te Nazareth khua kha cciataw te rili phae pe Zebulun phin te Naftali phin ramri kya um paw Kapernaum khua kya thua zah tuin kyakhe a um. ¹⁴ Ou tuhte profeh Isaiah nynh a hopaw kha accing nawlan nynh thua. A hopaw tuh: ¹⁵ “Zebulun ram te Naftali ram, rili laanpi pe, Jordan vaw khuraw, Zenta`ae umnaw Galilee ram: ¹⁶ Mohnaw kya um paw ccungccaw`ae nynh alepaw awnaw kha a muih vae`ae. Te chinaw mynlyh te chinaw ram kya dahung`ae paw kya awnaw tuh yn langkuh vae,” a ci. ¹⁷ Tuh-e ccyh kyate Jesu nynh, “Ngaesikuh oh, pawccecize vaawran peenaw tuh anae vae,” cite phungho lan a thotakaw vae. ¹⁸ Te Jesu nynh Galilee Rili pe a ccia lya Piter cite a ko`ae paw Simon te a neitaw Andru, uno luning rili lungkhu mia vua`ae paw kha a muih; pawccecize minmin tuh ngasaw kyngtu`ae nynh thua. ¹⁹ Te minmin kha, “Kamaw oun zui oh lah nanning kha ccungccaw kyngtu`ae lang kae rae cih oh,” a cipya`ae. ²⁰ Te minmin nynh vaekheihmawte mih mia kha cciataw`ae zah amaw kha a zui`ae. ²¹ Te tuin kyate he cceih`ae tuh ccangpaw uno luning, Zebedi ccapaw`ae James te a neitaw Johan tuh kohlung kya mih paaw Zebedi ryte mih mia a thue`ae paw kha muih zah minmin kha a ko`ae. ²² Te minmin nynh vaekheihmawte kohlung te mih paaw kha cciataw`ae zah amaw kha a zui`ae. ²³ Te Jesu tuh Galilee pee balyn po khuaccung zah mih sinakok`ae kya ccangpah`ae zah peenaw thehoypaw kha a hopya`ae, te ccungccaw`ae laku ccinaw aphuinphuin te ccihawnaw aphuinphuin kha a dansah`ae. ²⁴ Te a thungpang tuh Siria pee balyn po pazaekuh; te raerangsaro bahkuh`ae paw, a dung`ae paw, te mih kuihccuchih`ae paw, ccihawnaw aphuinphuin te myarya a ccih`ae paw ccungccaw`ae balyn kha amaw kalan oun cciakhae`ae zah minmin kha marya a dansah`ae. ²⁵ Te Galilee pee kyate, Dekapolis pee kyate, Jerusalem kyate, te Judea pee kyate, te Jordan vaw khuraw langte oun thua`ae paw ccungccaw zapi pi nynh amaw kha a zui`ae.

¹ Te ccungccaw zapi kha he a muih tuh Jesu tuh mua muakheit kalan a kaethung; te he a dahung tuh a zuitu`ae amaw kalan oun thua`ae. ² Te a khalang aw zah minmin kha hynhte a ccangpya`ae: ³ “Muisaw kya ryachi`ae paw tuh hythuaccou`ae paw nynh thua; pawccecize vaawran peenaw tuh minmin kyae nynh thua. ⁴ A rah a khui`ae paw tuh hythuaccou`ae paw nynh thua; pawccecize minmin tuh soihbia athua cih`ae. ⁵ Lungne`ae paw tuh hythuaccou`ae paw nynh thua; pawccecize minmin tuh laephi rho a ccou cih`ae. ⁶ Dingnaw elan vuelaw`ae zah tuihaw`ae paw tuh hythuaccou`ae paw nynh thua; pawccecize minmin tuh bynsah athua cih`ae. ⁷ Ngaethya-umsanaw a hoi`ae paw tuh hythuaccou`ae paw nynh thua; pawccecize minmin tuh ngaethyaumsanaw a mue cih`ae. ⁸ Thinlung athyaa`ae paw tuh hythuaccou`ae paw nynh thua; pawccecize minmin tuh Pachia kha a muih cih`ae. ⁹ Daenaw raetu`ae tuh hythuaccou`ae paw nynh thua; pawccecize minmin tuh Pachia ccaaw`ae cite ko athua cih`ae. ¹⁰ Dingnaw keiccuze a tua a sah`ae paw tuh hythuaccou`ae paw nynh thua; pawccecize vaawran peenaw tuh minmin kya-e nynh thua. ¹¹ “Kamaw keiccuze nanning kha ae sarya oh, ae tua ae sah oh zah ahme lei lante ahoy leipaw aphuinphuin ae honua vae oh ze, nanning tuh hythuaccou`ae paw nynh na thua oh. ¹² Lungtua oh lah myaryamaw nae lungpaw sah, pawccecize vaawran kya nae ryalaw mee tuh ale; pawccecize nanning maw-e profeh`ae kha mah minmin nynh tuhte a tua a sah`ae. ¹³ “Nanning tuh laephi loi nynh na thua oh; thuasalama loi nynh a enawpaw kha a zosah lanze pawcihtemou esah kho thua ung cih? Pawpaw elan sanmah hoy vae lan khyh, thuasalama dae vua lan zah ccungccaw ccu kaw syde lan nynh accan vae cih. ¹⁴ “Nanning tuh laephipi awnaw nynh na thua oh. Mua vawlan sak paw khua tuh thuru kho um khyh. ¹⁵ Ccungccaw`ae nynh maeekhua aw`ae zah kee khung he khyh`ae, thuasalama maee awnawpaw vawlan nynh a nung`ae, te inn kya um`ae paw balyn kha awnaw a pya. ¹⁶ Ahoypaw nae ryalaw`ae kha ccungccaw`ae nynh muih`ae zah vaawran kya um paw nae Paaw kha phu-esah nawlan`ae ccungccaw`ae malang nae awnaw kha awsah oh. ¹⁷ “Kawbya tukhyhze Profeh`ae bya ro khylan nynh kae tuh kae thua cite tua nan oh; kae tuh ro khylan kae thua khyh, thuasalama ccingsah khylan nynh kae thua. ¹⁸ Pawccecize byaccaccing kae hopya oh, vaawran te laephi azo cia, Kawbya abalynte accing makhia Kawbya kyaze adih huapaw ccafang te dyhsuapaw kha pawpawte mah roh lan khyh. ¹⁹ Tukeiccu hunghung zemah hynh-e kawpyapaw`ae kyaze adih huapaw ccangkheit kha a lue lanze, ccungccaw`ae kha mah tuhte a ccangpya ze, aning tuh vaawran peenaw kya adih huapaw nynh athua cih; thuasalama hunghung zemah kha-e`ae kha zui zah ming`ae kha a ccangpya ze aning tuh vaawran peenaw kya alepaw athua cih. ²⁰ Pawccecize nanning kae hopya oh, nae dingnaw nynh kawbya ccangpatu`ae te Farasi`ae dingnaw kha alue khyh lanze pawpawte mah nanning tuh vaawran peenaw lungkhu lang na tee lan khyh oh. ²¹ “ ‘Ccungccaw na theih lan khyh, hunghung zemah a theih paw tuh byapianaw kha a tung cih,’ cite kawbya nynh langmaw lya a ho`ae paw kha phe na thae vae oh. ²² Thuasalama nanning kae hopya oh, hunghung zemah akonglang um leite a unopaw kha a thinrianuapaw tuh byapianaw kha a tung cih, te hunghung zemah a unopaw kha, ‘Raka!’ a cih paw tuh kungsi zung kya byapia athua cih, te hunghung zemah a unopaw kha, ‘Nang tuh mingaeepaw!’ a cih paw tuh kehenna maee kya-e runaw kha a mue cih. ²³ Tukeiccu silawhang kalan na lasung kha nae ccyng vae ze, te na unopaw nynh nang ae rawse lanpaw kha khe kya na nyku lanze; ²⁴ silawhang malang khe na lasung kha cciataw lah la cceih, masaty na unopaw kya ccawkunaw kha rae lah oute rang lah na lasung kha pya. ²⁵ “Nang ae rawsetupaw ryte laanpi kya na cciakheih lya oh khe, arangte ccawkuh oh, tukhyh lanze ae rawsetupaw nynh byapiatu kalan ae ah cih zah byapiatu nynh thung uktu kalan ae ah cih, te nang kha thung ae saw cih`ae. ²⁶ Byaccaccing kae hopya, na rung lanpaw kuadron phuapia phe ccing lang na rung mawlaezung thunginn kyate na pou lan khyh. ²⁷ “ ‘Milae zu milae vawpaw na seikhae lan khyh,’ cite langmaw lya a ho`ae paw kha phe na thae vae oh. ²⁸ Thuasalama nanning kae hopya oh, hunghung zemah nopinung kha seikhae rynaw te a do lanze a thinlung kya khae nung ryte seinaw phe a rae vae. ²⁹ Te na ranglang mit nynh ae seisah ze, poh khoi lah na kyate dae vua; pawccecize na pyn balynte hell lungkhu lang vua na thua lae tuh na pyn kya-e ccangkhakheit aro lanpaw kha na hanlan ahoyhua. ³⁰ Te na ranglang kuih nynh ae seisah ze thoh tya lah na kyate dae vua; pawccecize na pyn balynte hell lungkhu lang vua na thua lae tuh na pyn kya-e ccangkhakheit aro lanpaw kha na hanlan ahoyhua. ³¹ “ ‘Hunghung zemah a zu kha a mya lanze myakunawpaw ccaw kha kha-e nung kha pyasah,’ cite phe a ho vae`ae. ³² Thuasalama nanning kae hopya oh, hunghung zemah ohhuakunaw keiccu thua leite a zu kha a mya lanze kha-e nung kha milae vawpaw kya a seisahpaw nynh thua; te hunghung zemah a mya`ae paw nopinung kha zu lang a umkhaepaw tuh milae zu a seikhaepaw nynh thua. ³³ “Tuh-e koute, ‘Ahme leite bya na kinkuh lan khyh, thuasalama na byakinkupaw kha Bawipaw malang na tynsah hahe cih,’ cite langmaw lya a ho`ae paw kha mah phe na thae vae oh. ³⁴ Thuasalama nanning kae hopya oh, kharyh byakinkuh nan oh, vaawran phyate mah byakinkuh nan oh, pawccecize tuh-e tuh Pachia kya-e suitungkhung nynh thua; ³⁵ laephi phyate mah byakinkuh nan oh, pawccecize hynh-e tuh a ccusy nynh thua; Jerusalem phyate mah byakinkuh nan oh, pawccecize tuh-e tuh alesaepaw Siapharan kya-e khualipi nynh thua. ³⁶ Na lu phyate mah byakinkuh nan, pawccemacize na sang ccangkheit sanmah na rawsah kho khyh, na mangsah kho khyh. ³⁷ Thuasalama na ho paw tuh ‘athua’ ze ‘athua,’ ‘thua khyh’ ze ‘thua khyh,’ na ci cih; pawccecize pawpaw bya zemah hynh-e`ae laelan tuh ahoy leipaw kyate nynh yn thua. ³⁸ “ ‘Mit ccangkheit hanlan mit ccangkheit, te haw ccangkheit hanlan haw ccangkheit,’ cite a ho`ae paw kha phe na thae vae oh. ³⁹ Thuasalama nanning kae hopya oh, mihoy leipaw kha la khee nan oh, thuasalama hunghung nynh zemah na ranglang byaki kha ae bia ze, hawkheit lang kha mah la tuapakuh. ⁴⁰ Te lukhakheit nynh tazaeccoi ae ry zah na angki kha a lawku ze, na angkile kha mah va lawku bia sah. ⁴¹ Te hung nynh zemah me kheit ccia lan ae riase ze amaw ryte me ning la cceih oh. ⁴² Nang ae ngiakuh paw ccungccaw kha la pya, te na kya-e koi lan ae ry paw kyate la maeleihtawkuh nan. ⁴³ “ ‘Na innpaw kha na sungsah cih zah na rhawpaw kha na hua cih’ cite a ho`ae paw kha phe na thae vae oh. ⁴⁴ Thuasalama nanning kae hopya oh, nae rhaw`ae kha sungsah oh, nanning thya ae law oh paw kha hythuapya oh, nanning ae hua oh paw kha ahoypaw cyipah oh, te nanning kha ae sarya oh zah ae tua ae sah oh paw hanlan sawsangpah oh. ⁴⁵ Ou tuhte nanning tuh vaawran a um paw nae Paaw ccaaw`ae na thua ccaw oh; pawccecize ahoy leipaw te ahoypaw ccungccaw tungvaw a khuanin kha pawsah zah adingpaw te ading leipaw tungvaw khua a rawsah. ⁴⁶ Pawccecize nanning ae sungsah oh paw kyalya kha na sungsah oh ze amee pawmou na mue cih oh? Nguntokhoi`ae paw nynh hei tuhhawte cyih khyh`ae tou? ⁴⁷ Te na uno`ae kyalya kha na beih`ae ze ming`ae laeze pawmou na cyi hua? Nguntokhoi`ae paw nynh hei tuhte cyih khyh`ae tou? ⁴⁸ Tukeiccu vaawran kya um paw nae Paaw tuh accing hawte nanning mah la ccing oh.

¹ “Ccungccaw`ae nynh muihku khylan minmin malang ryachi bawngnaw na pya khyh nawlan oh la raeringkuh oh; tukhyh lanze vaawran kya um paw nae Paaw kya-e amee na mue lan khyh oh. ² Tukeiccu ryachi bawngnaw he na pya vae ze cyihruh`ae nynh sinakok`ae kya te laanpi`ae kyakhe ccungccaw`ae kya-e phuesanaw ccou khylan a cyi`ae hawte na malang mungkae la tu nan. Byaccaccing kae hopya oh, minmin tuh mih ryalaw mee kha phe a mue vae`ae. ³ Thuasalama ryachi bawngnaw he na pya vae ze na ranglang kuih nynh paw nynh a cyi cipaw kha na voilang kuih la nysah nan. ⁴ Ou tuhte ryachi bawngnaw na pya paw kha hung nynh san a ny khyh ccaw; te aphirute cyipaw a muih paw na Paaw amaw ccaccei nynh raerae muih lante amee kha ae pya cih. ⁵ “Te saw he na sang vae ze cyihruh`ae hawte la cyih nan; pawccecize minmin tuh sinakok`ae kya, te laanpi`ae atungkunaw kya ccungccaw`ae nynh muihku khylan thadyn lante nynh sawsang a ry`ae. Byaccaccing kae hopya oh, minmin tuh mih ryalaw mee phe a mue vae`ae. ⁶ Thuasalama nang tuh saw he na sang vae ze na khaan lungkhu lang tee lah na thuakaw he na khaw te, muih leipaw kya um paw na Paaw kalan khe sawsang, te aphirute cyipaw a muih paw na Paaw nynh raerae muih lante amee kha ae pya cih. ⁷ Thuasalama saw he na sang vae oh ze lawki`ae nynh a cyi`ae hawte accakaepaw bya pei hothuipaw kha mang nan oh; pawccecize minmin nynh patae a ho`ae paw liate oun thaepah hua cih`ae cite a tuaku`ae. ⁸ Tukeiccu nanning tuh minmin hawte cyih bua nan oh; pawccecize nae Paaw nynh paw uccaw`ae nynh nanning elan aho cipaw amaw na ngia maw oh phe a ny vae. ⁹ Tukeiccu hynhcihte sawsang oh: Vaawran kya um paw kaening Paaw, na min sawtuanaw um sah. ¹⁰ Na peenaw thua ccavae sah. Vaawran kya na rynaw acyikuh hawte laephi vawlan cyikuh bua sah. ¹¹ Nin takyh kae ae paw looh atunin kaening oun pyabua. ¹² Te kae tungvaw a sei`ae paw kae ngaethya`ae hawte kae seinaw kha oun ngaethyabua. ¹³ Te tuh-ounaw lungkhu lang oun cciakhae nan, thuasalama ahoy leipaw kyate oun khumtua. Pawccecize peenaw, lesaenaw te phu-enaw tuh zungzae na kya-e nynh thua. Amen. ¹⁴ “Pawccecize nanning nynh ccungccaw`ae cyiseinaw kha na ngaethya oh ze vaawran um paw nae Paaw nynh mah nanning kha ae ngaethya cih oh. ¹⁵ Thuasalama nanning nynh ccungccaw`ae cyiseinaw kha na ngaethya khyh oh ze, nae Paaw nynh mah nanning cyiseinaw kha ae ngaethya lan khyh oh. ¹⁶ “Tuhlaeze looh-ae he na sung vae oh ze, cyihruh`ae hawte a ngaethahpaw maesue te la um nan oh; pawccecize minmin tuh ccungccaw`ae malang looh-ae a sung paw hawte langku khylan mih maesue kha a umsaku`ae. Byaccaccing kae hopya oh, minmin tuh mih ryalaw mee kha phe a mue vae`ae. ¹⁷ Thuasalama nang looh-ae he na sung vae ze na lu kha sathothuhkuh lah na mae la phikuh. ¹⁸ Ou tuhte ccungccaw`ae malang looh-aesung paw hawte na langku khyh ccaw, thuasalama muih leipaw kya a um paw na Paaw malang na langkuh cih; te aphirute cyipaw a muih paw na Paaw nynh raerae muih lante amee kha ae pya cih. ¹⁹ “Laehaw te chihhang nynh a ronaw te miruh`ae nynh kiabia`ae zah a runaw`ae laephi vawlan naemaw hanlan sisua`ae kha ccykuh nan oh. ²⁰ Thuasalama laehaw te chihhang nynh mah a ro leinaw, te miruh`ae nynh mah a kiabia leinaw`ae te a ru leinaw`ae vaawran kyakhe naemaw elan sisua`ae kha ccykuh oh. ²¹ Pawccecize nae sisua umnaw kya nae thinlung mah a umbua cih. ²² “Pyn kya-e awnaw tuh mit nynh thua; tukeiccu na mit tuh ahoy lanze na pyn balyn tuh awnaw te phe beih cih. ²³ Thuasalama na mit ahoy khyh ze na pyn balyn tuh mohnaw te phe beih cih. Tukeiccu nang na kya um paw awnaw tuh mohnaw athua ze tuh-e mohnaw tuh pawcih babang mou ale! ²⁴ “Hung ccungccaw nynh sanmah bawi luning ryalawpah kho khyh; pawccecize bawi lukheit kha a hua ze lukheit kha a sungsah cih; tukhyhze lukheitpaw kalan a pang ze lukheitpaw kha pawlangria leite a um cih. Nanning nynh Pachia te phuasui kha rya na lawpah kho khyh oh. ²⁵ “Tukeiccu nanning kae hopya oh, pawmou kae ae cih, tukhyhze pawmou kae nia ngaw cite nae hiinnaw hanlan nae lungriathae nan sah. Te pawmou kae lawkuh cih cite nae pyn hanlan nae lungriathae nan sah. Hiinnaw tuh aepaw laeze sunghua khyh tou? Te uccaw laeze pyn tuh sunghua khyh tou? ²⁶ Vaaw lang-e pavaw`ae khu dotua oh. Minmin tuh ccaciivua khyh`ae, looh mah rue khyh`ae, ccunginn lungkhu lang mah ruinkuh khyh`ae; tuhzemah vaawran um paw nae Paaw nynh minmin kha a dang`ae. Nanning tuh minmin laeze patae nae phutehua khyh tou? ²⁷ Nanning lakuze hungmou thinphangnaw liate amaw a hangnaw kha dung kheit a hangchih sakuh khopaw um? ²⁸ “Tukeiccu pawccemou uccaw hanlan nae lungvawsaw? Rangkaw e lilipaw`ae kha pawcihte nynh a lethung`ae cipaw tuatua oh; minmin tuh loopho khyh`ae, laaw mah sukuh khyh`ae. ²⁹ Tuhzemah nanning kae hopya oh, Solomon a phu-enaw balyn nynh heize lilipaw ccangkheit tuhte ccaankuh kho khyh. ³⁰ Tukeiccu, pou zynnaw azya`ae paw nanning, atunin um zah awkhualan tahkuamaee lungkhu lang phung athua paw rangkaw-e lonua hei kha Pachia nynh tuhte a ccaan lanze, nanning kha tuhlaeze houh ae ccaan lan khyh oh tou? ³¹ Tukeiccu, ‘Pawmou ah ae cih oh? Tukhyhze pawmou ah neih cih oh? Tukhyhze paw uccaw mou ah lawkuh cih oh?’ cite nae lungriathae nan sah. ³² Pawccecize hynh-e uccaw`ae balyn hynh Zenta`ae nynh a ccung`ae paw nynh thua; pawccecize vaawran um paw nae Paaw nynh hynh-e uccaw`ae balyn tuh nae hanlan aho cipaw phe a ny. ³³ Thuasalama Pachia peenaw te a dingnaw kha masaty ccung oh, te hynh-e uccaw`ae balyn kha pyachih na thua cih oh. ³⁴ Tukeiccu awkhualan hanlan nae lungriathae nan sah, pawccecize awkhualan nynh amaw elan a lungriathae cih. Nin kheit hanlan kha-e nin e lungriathaenaw tuh phe azaw.

¹ “Nanning tuh byapia na thua khyh nawlan oh ming`ae kha byapia nan oh. ² Pawccecize na pianaw oh paw byapianaw thyhte naemaw kha byapia na thua cih oh; te na tounaw oh paw tounawpaw te naemaw kha toupya ru na thua cih oh. ³ “Te namaw mit kya um paw thingpyng kha tuaku leite pawccemou na unopaw mit kya um paw athupaw taraw kha na dopya? ⁴ Tukhyhze, namaw mit kya thingpyng phang a um pite, pawtemou na unopaw kha, ‘Na mit kya-e athupaw kha kae khoipah,’ na ci kho? ⁵ Nang cyihruhpaw! Masaty namaw mit kya-e thingpyng kha khoikuh tou; oute nynh na unopaw mit kya-e athupaw kha khoipya lan ccaerarihlan na muih cih. ⁶ “Athyaapaw uccaw kha ui`ae pya nan oh; nae kya-e pale`ae kha mah voh`ae malang sawpah nan oh, tuhte na cyi oh ze, minmin nynh mih ccu kaw a syde cih`ae, te ae maeleihnuakuh cih oh zah naemaw kha phe ae phia cih oh. ⁷ “Ngia oh lah pya na thua cih oh; ccung oh lah na muih cih oh; khua oh lah thuakaw hungpya na thua cih oh. ⁸ Pawccecize a ngia paw miakaw tuh a mue; te a ccung paw tuh a muih; te thuakaw a khua paw tuh hungpya athua cih. ⁹ “ Nanning lakuze lukhakheit kha a ccapaw nynh sanlou a ngiaku ze, lung kha a pya cih tou? ¹⁰ Tukhyhze ngasaw kha a ngiaku ze, fuparepaw kha pya ngaw ta? ¹¹ Tuhte nanning na hoy lei oh pite nae ccaaw`ae kha ahoypaw lasung`ae pawtemou pya lan cipaw na ny oh lanze, vaawran kya um paw nae Paaw nynh amaw kalan a ngiakuh`ae paw kha ahoypaw uccaw`ae kha pawcihmou houh a pya cih`ae? ¹² “Tukeiccu ccungccaw`ae nynh nae tungvaw cyih`ae sah cite na ry oh paw balyn kha minmin tungvaw tuhhawte cyih bua oh; pawccecize hynh-e tuh Kawbya te Profeh`ae ccauh nynh a ho`ae paw nynh thua. ¹³ “Abypaw koikua kyate tee oh; pawccecize ronaw kalan a cciakhae paw koikua te laanpi tuh ako, te tuh-e kya a tee paw ccungccaw`ae tuh patae acih. ¹⁴ Pawccemacize hiinnaw kalan a cciakhae paw koikua tuh by zah laanpi tuh aru, te tuh-e a muihkuh paw tuh azya. ¹⁵ “Tuuphua bongkute nae kalan oun thua`ae paw ahme leipaw profeh`ae kha la raeringkuh oh; pawccecize minmin tuh alungkhu lante arepaw suizaw`ae nynh thua`ae. ¹⁶ Minmin kha mih thae`ae liate nae nyh cih oh. Ccungccaw`ae nynh misu thae kha tahty ku`ae kyate lo`ae ta? Tukhyhze thaeku thae kha hingpawku`ae kyate lo`ae ta? ¹⁷ Tuh-e hawte ahoypaw thingku miakaw nynh ahoypaw thingthae kha a thae, thuasalama ahoy leipaw thingku nynh tuh ahoy leipaw thingthae kha nynh a thae. ¹⁸ Ahoypaw thingku nynh ahoy leipaw thingthae thae kho khyh, ahoy leipaw thingku nynh mah ahoypaw thingthae thae kho khyh. ¹⁹ Ahoypaw thingthae a thae leipaw thingku miakaw tuh nge thua zah maee lungkhu lang phung athua. ²⁰ Tukeiccuze mih thae`ae liate kha-e ahme leipaw profeh`ae kha nae nyh cih oh. ²¹ “Kamaw kha, ‘Bawipaw, Bawipaw,’ cite yn ko paw miakaw nynh vaawran peenaw lungkhu lang tee lan khyh`ae, thuasalama vaawran kya um paw ka Paaw rynaw a cyih paw nynh a tee cih. ²² Tuh-e nin kya ccungccaw patae nynh kamaw kha, ‘Bawipaw, Bawipaw, na min te profehbya kae ho khyh tou? Na min te raerangsaro kae dee khyh tou? Na min te khuaruaru lan um paw ryalaw patae kae cyih khyh tou?’ oun ci cih`ae. ²³ Oute minmin kha, ‘Nanning kharyh kae nyh boi khyh oh, kawbya zui lei`ae paw nanning ka kyate pou oh,’ ka ci cih`ae. ²⁴ “Tukeiccu hunghung zemah hynh-e ka hopaw bya`ae hynh thae zah a zui paw ccungccaw tuh lungpi vawlan a inn sakkuh paw ahawpaw ccungccaw te nynh ka losakuh cih. ²⁵ Khua yn rah zah tui yn le, te khivae yn zaw zah tuh-e inn kha a mung; te kha-e inn tuh lungpi vawlan abingku keiccu pu khyh. ²⁶ Te hynh-e ka hopaw bya`ae kha thae zah a zui leipaw ccungccaw miakaw tuh laesia vawlan a inn sakkuh paw angaeepaw ccungccaw te nynh alokuh cih. ²⁷ Te khua yn rah zah tui yn le, te khivae yn zaw zah kha-e inn kha a mung, te kha-e inn tuh phe a pu. Te a pu paw tuh ale raria,” a ci. ²⁸ Ou tuhcihte Jesu nynh a hopaw kha he a thangsah tuh a ccangpyanaw kya ccungccaw`ae tuh mih ngaeangthua. ²⁹ Pawccecize aning nynh kawbya ccangpatu`ae hawte thua leite, kawhoinaw a hoi paw lukheit hawte minmin kha a ccangpya`ae keiccu nynh thua.

¹ Mua kyate Jesu he a rungbung tuh ccungccaw zapi nynh amaw kha a zui`ae. ² Te dotua, vaethyakaepaw lukheit yn thua zah amaw kha beik zah, “Bawipaw, na ry lanze kae hynh nae thyaasah kho,” a cipya. ³ Te Jesu nynh a kuih dyn zah kha-e paw kha hae zah, “Ka ry, nang thyaa ccavae,” a cipya. Te vaekheihmawte a vaethyaccinaw tuh phe athyaa. ⁴ Te Jesu nynh, “La raeringkuh, hung ccungccaw san la hopah nan; thuasalama la cceih lah ranpibawi kalan namaw kha la dosakuh; te ming`ae kalan ccaekia lang, Mawsi nynh kawpya thyhte silawkunaw kha la rae,” a cipya. ⁵ Te Kapernaum khua lungkhu lang Jesu he a tee tuh, rhawbawipaw lukheit amaw kalan yn thua zah, ⁶ “Bawipaw, ka rya yn lawpatupaw tuh kuihccuchite ccih zah inn kya phang a huekuh, myarya a ccih,” cite amaw kha a ngiaku. ⁷ Te Jesu nynh, “Kae cceih cih zah ka dansah cih,” a cipya. ⁸ Rhawbawipaw nynh khung zah, “Bawipaw, ka inn lungkhu lang nang tee lante kae tuh ka ngaekuh khyh; thuasalama bya kawkheit kyalya ho lah ka rya yn lawpatupaw tuh a dan cih. ⁹ Pawccecize kae mah kawhoinaw zakaw um paw ccungccaw lukheit nynh ka thua, kamaw kuihkaw rhawkaw`ae ka hoi; te lukheitpaw kha, ‘Cceih,’ ka ci ze a cceih; te ccangpaw kha, ‘Rang,’ ka ci ze yn thua; te ka rya yn lawpatu kha, ‘E hynh cyih,’ ka ci ze a cyih,” a cipya. ¹⁰ Jesu nynh tuh-e bya kha he a thae tuh a ngaeangthua zah amaw a zui`ae paw kha, “Byaccaccing kae hopya oh, hynhcih alepaw zynnaw tuh Israel`ae kya heize ka muih boi khyh! ¹¹ Te nanning kae hopya oh, ccungccaw patae tuh nithua langte niccaw langte oun thua cih`ae zah vaawran peenaw kya Abraham ry, Isaak ry, te Jakob ryte a dahung cih`ae. ¹² Thuasalama peenaw ccaaw`ae tuh atolang mohnaw lungkhu lang vua athua cih`ae, tuin kya tuh rawkhuinaw te hawzynaw a um cih,” a cipya`ae. ¹³ Te Jesu nynh rhawbawipaw kha, “La cceih ccavae; na zyn hawte na hanlan cyipya athua cih,” a cipya. Te a ryalawpatu tuh tuh-e ccyh ccaccei kya phe a dan. ¹⁴ Te Jesu nynh Piter inn lungkhu lang he a tee tuh, Piter a zu nung tuh a ngesawling te ccih zah a huekupaw kha a muih. ¹⁵ Te Jesu nynh a kuih kha hae zah ngesawlingpaw kha-e nung tuh phe dan; te aning tuh thokuh zah minmin elan ryalawpah vae`ae. ¹⁶ Zete he a thua tuh ccungccaw`ae nynh raerangsaro bahkuh`ae paw ccungccaw patae kha amaw kalan oun cciakhae`ae; te aning nynh bya te muisaw`ae kha dee zah ngeccih`ae balyn kha a dansah`ae. ¹⁷ Ou tuhte profeh Isaiah nynh, “Amaw nynh aening nyaanaw`ae kha laah zah aening ccinaw`ae kha a phu,” cite a hopaw bya accing nawlan nynh thua. ¹⁸ Te Jesu nynh a pepan e ccungccaw zapi kha he a muih tuh khuraw lang zua lan kaw a pya`ae. ¹⁹ Te kawbya ccangpatu lukheit yn thua zah amaw kha, “Ccangpatupaw, na ccianaw miakaw lang kae zui cih,” a cipya. ²⁰ Te Jesu nynh amaw kha, “Rang-ui`ae nynh laekarung hoi`ae zah vaaw lang-e pavaw`ae nynh bu a hoi`ae; thuasalama Ccungccaw Ccapaw tuh a lu nungnaw sanmah hoi khyh,” a cipya. ²¹ Te ccangpaw a zuitupaw nynh amaw kha, “Bawipaw, masaty ka la cceih sah lah ka paaw kha ka la uh hin sah,” a cipya. ²² Thuasalama Jesu nynh, “Kamaw yn zui, a chih`ae paw nynh mih michi`ae kha la uh`ae sah,” a cipya. ²³ Te Jesu kohlung lungkhu lang he a tee tuh a zuitu`ae nynh amaw kha a zui`ae. ²⁴ Te dotua, rili kya kohlung kha tuileih nynh pung vu lang ciate myarya arupaw khise yn tho, thuasalama Jesu tuh a itheih. ²⁵ Te a zuitu`ae nynh amaw kalan oun cceih`ae zah amaw kha tho`ae zah, “Bawipaw, kaening oun khumbua! Kae chih vae cih!” a cipya`ae. ²⁶ Te aning nynh minmin kha, “Pou zynnaw azya`ae paw nanning, pawccemou na ri oh?” a cipya`ae. Oute thokuh zah khise te rili kha a pe, tetuh daebabi vae. ²⁷ Te ccungccaw`ae tuh mih ngaeangthua zah, “E paw hynh pawtecihpaw ccungccaw pei, khise te rili nynh heize a kaw a ngae`ae?” a ci`ae. ²⁸ Te khuhlangraw Kadarene ram lungkhu lang Jesu he a thua tuh raerangsaro bahkuh`ae paw ccungccaw luning nynh shawku kyate oun pou`ae zah amaw te a tungkuh`ae; minmin tuh myarya rero`ae keiccu hung ccungccaw sanmah tuh-e laanpi langte cceihngan khyh`ae. ²⁹ Te minmin nynh, “Pachia Ccapaw Jesu, nang kha kaening nynh paw kae cyi mou? Accyh azaw maw kaening hynh vawsaw pya khylan tou hynhlang nae thua?” cite a sia`ae. ³⁰ Te minmin kyate hary asawnaw lang voh patae`ae phu kheit rangpaekuh`ae paw a um. ³¹ Tukeiccu raerangsaro`ae nynh, “Nang nynh kaening hynh nae dee lanze, voh`ae lungkhu lang tee lan oun ua,” cite amaw kha a ngiaku`ae. ³² Te aning nynh minmin kha, “Cceih oh,” a cipya`ae. Te minmin tuh pou`ae zah voh`ae lungkhu lang a tee`ae; te dotua, voh`ae tuh mih balynte apangnaw lang thawmawte ccuebung`ae zah rili lungkhu lang pung a phungkuh`ae, te tui kya pung a chih`ae. ³³ Te voh a laetu`ae tuh ccue`ae zah khua lungkhu lang a cceih`ae, te raerangsaro bahkuh`ae paw kya acyikuh paw balyn kha a hopya`ae. ³⁴ Te khuaccaw`ae balyn nynh Jesu te tungku khylan oun pou`ae zah amaw kha he a muih`ae tuh mih ram kyate a pou nawlan amaw kha a ngia`ae.

¹ Te Jesu tuh kohlung lungkhu lang tee zah khuraw po zua zah amaw a khua lang a thua. ² Te dotua, iphae vawlan phang i paw a kuihccuchihpaw kha amaw kalan oun cciakhae`ae. Te Jesu nynh mih zynnaw kha he muih tuh, a kuihccuchihpaw kha, “Ka ccapaw, na thawmuin sah, na seinaw tuh ngaethya athua vae,” a cipya. ³ Te kawbya ccangpatu`ae abang nynh, “E paw hynh Pachia saryate bya a ho!” cite mih thinlung kya a ci`ae. ⁴ Te Jesu nynh mih tuanaw`ae kha nyte, “Pawccemou nae thinlung kya ahoy leipaw na tua oh? ⁵ ‘Na seinaw tuh ngaethya athua vae,’ cipya paw tou azoihua? Tukhyhze, ‘Thokuh lah cceih ccavae,’ cipya paw tou azoihua? Paw hynh mou azoihua? ⁶ Thuasalama Ccungccaw Ccapaw tuh laephi vawlan seinaw ngaethya lan kawhoinaw a hoi cipaw na ny nawlan oh,” ci zah, kuihccuchihpaw kha, ‘Thokuh, na iphae kha lawkuh lah na inn lang cceih ccavae,” a cipya. ⁷ Te aning tuh thokuh zah a inn lang a cceih vae. ⁸ Thuasalama ccungccaw zapi nynh kha-e kha he a muih`ae tuh mih ngaeangthua zah khatahawpaw thungnaw ccungccaw`ae a pyatupaw Pachia kha thehoysah`ae. ⁹ Te tuin kyate Jesu po a pou tuh Matthai acikuh paw ccungccapaw lukheit ngunto khoinaw kya a dahung paw kha a muih. Te Jesu nynh, “Kamaw yn zui,” a cipya. Te aning nynh thokuh zah amaw kha a zui. ¹⁰ Ou tuhcihte inn kya Jesu tuh ae lan ccaboi kya he a dahung tuh, dotua, nguntokhoi`ae paw patae te misei`ae oun thua`ae zah Jesu te a zuitu`ae ryte a dahungkheih`ae. ¹¹ Te Farasi`ae nynh he a muih`ae tuh, a zuitu`ae kha, “Pawccemou nae ccangpatupaw hynh nguntokhoi`ae paw te misei`ae ryte a aekheih`ae?” a cipya`ae. ¹² Te Jesu nynh tuh-e bya kha he a thae tuh minmin kha, “A dan`ae paw nynh sibawi peki khyh`ae, thuasalama a ccih`ae paw nynh a peki`ae. ¹³ Thuasalama la cceih oh lah, ‘Kae tuh silawkunaw ka ry khyh, ngaethya-umsanaw nynh ka ry,’ acikuh paw kha na nythya nawlan oh la ccangkuh oh. Pawccecize kae tuh adingpaw ko khylan kae thua khyh, thuasalama misei`ae nynh a ngaesiku ccaw`ae cite nynh kae thua,” a cipya`ae. ¹⁴ Oute Johan zuitu`ae nynh amaw kalan oun thua`ae zah, “Pawccemou kaening te Farasi`ae tuh atu te atu looh-ae kae sung, thuasalama nang na zuitu`ae tuh looh-aesung khyh`ae rei?” a ci`ae. ¹⁵ Te Jesu nynh minmin kha, “Zudy ccangvaepaw tuh a uno`ae ryte a um lungkhu balyn tuh-e a uno`ae tuh mih ngaethah kho ngaw ta? Thuasalama zudy ccangvaepaw kha minmin kyate lawpya nin ccyh yn thua cih, oute minmin tuh looh-ae oun sung vae cih`ae. ¹⁶ Hung ccungccaw nynh sanmah arynpaw uccaw kha athawpaw boeibia te bia boi khyh, tuhte a bia lanze bianawpaw nynh arynpaw uccaw kha po laah zah houh aseikuh paleih vae. ¹⁷ Hung ccungccaw nynh sanmah athawpaw misutui kha arynpaw misu-saving bung lungkhu lang ruin boi khyh, tuhte a ruin lanze misu-saving bung tuh apaw cih zah misutui tuh azu cih, te misu-saving bung mah aroh cih; thuasalama athawpaw misutui tuh athawpaw misu-saving bung lungkhu lang nynh a ruin`ae, tuhte tuh paryh akhyn`ae,” a cipya`ae. ¹⁸ Hynh-e bya`ae kha minmin kya a hopya`ae cciamang lyakhe, dotua, uktupaw lukheit yn thua zah amaw kha beik zah, “Ka ccanung tuh atumaw khe nynh a chi, thuasalama rang lah a tungvaw na kuih khang lah aning tuh a hiin cih,” a cipya. ¹⁹ Te Jesu tuh thokuh zah kha-e paw kha a zui, te a zuitu`ae mah a zuikuh bua`ae. ²⁰ Te dotua, kum haw laening chii lua ccinaw a hoi paw nopinung lukheit amaw nuhlang yn thua zah a boei rae kha a hae. ²¹ Pawccecize a boei kha me ka hae ze, kae phe ka dan cih cite a thinlung kyate a tuaku. ²² Thuasalama Jesu nynh maeleihkuh zah kha-e nung kha he a muih tuh, “Ka ccanung, na thinphang nan sah, na zynnaw nynh phe ae dansah vae,” a cipya. Te nopinung tuh tuh-e suimilan ccyh kyate phe a dan vae. ²³ Te uktupaw inn lungkhu lang Jesu he a thua tuh tyngdaw khua`ae paw te a sia a rua`ae paw ccungccaw`ae kha muih zah, ²⁴ “Pou hin oh, pawccecize imohnung tuh chih khyh, thuasalama a ih,” cite minmin kha a hopya`ae. Te minmin nynh a nuinse`ae. ²⁵ Thuasalama ccungccaw`ae he a pou`ae te aning tuh tee zah kha-e nung kha a kuih te tho zah imohnung tuh po a tho vae. ²⁶ Te hynh-e thungpang tuh tuh-e ram lungkhu balyn po athaan. ²⁷ Te tuin kyate Jesu he a pou tuh, mitmoh`ae luning nynh zui`ae zah, “David Ccapaw, kaening hynh ngaethya beih oun um sah!” cite a sia`ae. ²⁸ Te inn lungkhu lang Jesu he a thua tuh mitmoh`ae tuh amaw kalan oun thua`ae; te Jesu nynh minmin kha, “E hynh cyi lan kae tuh a cyih kho cite na zyn oh tou?” cite a khia`ae. Minmin nynh, “Ou, kae zyn Bawipaw,” a ci`ae. ²⁹ Oute aning nynh mih mit kha hae zah, “Nae zynnaw thyhte nae tungvaw cyikuh sah,” a cipya`ae. ³⁰ Te mih mit`ae tuh oun aw vae; te Jesu nynh, “E hynh hung ccungccaw sanmah la nysah nan oh,” cite minmin kha tyntetyn lang byatawsya`ae. ³¹ Thuasalama minmin nynh he a pou`ae tuh amaw thungpang kha kha-e ram balyn kya pung pazaesaku`ae. ³² Minmin he a pou`ae tuh, dotua, raerangsaro bahkuhpaw bya ho kho leipaw ccungccaw lukheit kha Jesu kalan oun thuakhae`ae. ³³ Te raerangsaro kha deepya he athua tuh, bya ho kho leipaw tuh bya yn ho vae; te ccungccaw zapi tuh mih ngaeangthua zah, “E tahawpaw Israel kya muihkuh boi khyh!” a ci`ae. ³⁴ Thuasalama Farasi`ae nynh, “Raerangsaro`ae uktupaw liate nynh raerangsaro`ae kha aning nynh a dee,” a ci`ae. ³⁵ Te Jesu tuh khuapi`ae te khua taraw`ae balyn kalan po khuaccung zah mih sinakok`ae kyakhe a ccangpya`ae; te peenaw thehoypaw kha hopah`ae zah ccungccaw`ae mih ccinaw miakaw te ccihawnaw miakaw kha a dansah`ae. ³⁶ Thuasalama Jesu nynh ccungccaw zapi kha he a muih tuh minmin kha ngaethya-umsah`ae, pawccemacize minmin tuh mih thawbang zah tuuringtu a hoi leipaw tuu`ae hawte phiariphiarae pung um`ae keiccu nynh thua. ³⁷ Oute a zuitu`ae kha, “Loohrue lanpaw tuh alung ccaccing, thuasalama ryalahtu`ae tuh azya. ³⁸ Tukeiccu loohruenaw kya-e Bawipaw nynh a loohruenaw lungkhu lang ryalahtu`ae yn saw`ae ccaw nanning sawsang oh,” a cipya`ae.

¹ Te Jesu nynh a zuitu`ae luhaw laening kha amaw kalan ko`ae zah minmin kha athyaa leipaw muisaw`ae tungvaw thungnaw te dee khonaw, te ccinaw aphuinphuin te ccihawnaw aphuinphuin balyn kha dansah khonaw kaw a pya`ae. ² Locceihtu`ae luhaw laening min`ae tuh: masaty, Piter cite a ko`ae paw Simon, te a neitaw Andru, Zebedi ccapaw James, te a neitaw Johan; ³ Filip te Bartholomew; Thomas te nguntokhoipaw Matthai; Alfeas ccapaw James, te Thadde cikuh paw Lebbe; ⁴ Kanaan khua paw Simon, te Jesu a pheetupaw Judas Iskaria nynh thua`ae. ⁵ E luhaw laening hynh Jesu nynh saw`ae zah hynhte kaw a pya`ae: “Zenta`ae ccianaw kalan na cceih lan khyh oh, te Samaria`ae khua lungkhu lang na tee lan khyh oh. ⁶ Thuasalama Israel minphuin kyaze azopaw tuu`ae kalan palia la cceih oh. ⁷ Te na ccia vae oh ze, ‘Vaawran peenaw tuh anae vae,’ cite na la hopah cih oh. ⁸ Ngeccih`ae kha la dansah oh, vaethyakae`ae paw kha la thyaasah oh, a chih`ae paw kha la thosah oh, raerangsaro`ae kha la dee oh. Nanning tuh alakaw te nynh na mue oh, te alakaw te la pya oh. ⁹ Nae phuabu`ae kya sui thuasah, ngunphua thuasah, daw phua thuasah la sangkuh nan oh. ¹⁰ Nae khuaccungnaw hanlan sohrae, angki zung ning, ccukoh`ae te hoitang`ae mah phukuh nan oh; pawccecize ryalahtupaw tuh loohdang lan accan. ¹¹ “Te pawtecihpaw khuapi, tukhyhze khua lungkhu lang nanning na tee vae oh ze, tuh-e kya hungmou angaekuh cipaw la khia oh lah tuin kyate na pou mawlaezung oh tuh-e paw inn kya la um oh. ¹² Te nanning nynh inn lungkhu lang he na tee vae oh ze, ‘Daenaw um sah cite,’ la beih oh. ¹³ Te inn tuh angaeku ze nae kya-e daenaw tuh tuhe innbyn tungvaw la thua sah; thuasalama angaeku khyh ze, nae kya-e daenaw tuh naemaw kalan la ki sah. ¹⁴ Te hunghung zemah nanning kha innccung ae doih oh zah, nae bya kha mah a ngae khyh ze, tuh-e inn, tukhyhze tuhe khuapi kyate he na pou vae oh ze, nae ccu kya-e laenoi kha la pheihkuhsya oh. ¹⁵ Byaccaccing kae hopya oh, byapia nin kya tuh-e khuapi hanlan laeze Sodom te Komorah ram hanlan ngaesang kho a um hua cih. ¹⁶ “Dotua oh, suizaw`ae laku tuu`ae saw hawte nanning kha kae saw oh, tukeiccu nanning tuh fupaw`ae hawte nae lunghaw sah lah vafu`ae hawte nae lungne sah. ¹⁷ Thuasalama ccungccaw`ae kha la raeringkuh oh, pawccecize minmin nynh kungsi`ae kalan ae ah cih oh zah mih sinakok`ae kya ae bua cih oh. ¹⁸ Te minmin kalan te Zenta`ae kalan ccaekia na thua nawlan oh kamaw keiccuze ram uktu`ae te siapharan`ae malang nanning kha ae thuakhae cih oh. ¹⁹ Thuasalama minmin nynh he ae thuakhae vae oh ze, pawmou ka ho cih, tukhyhze pawtemou ka ho cih cipaw nae lungvawsaw nan sah. Pawccecize tuh-e ccyh ccaccei kya na ho lan oh paw kha pya athua cih. ²⁰ Pawccecize a hotupaw tuh nanning thua khyh, thuasalama nae Paaw Pachia kya-e Muisaw nynh nanning kyate a ho. ²¹ “Te uno nynh a uno toulou kha chinaw kalan yn ah cih, te paaw nynh a ccaaw kha yn ah cih; te ccaaw`ae nynh nungpaaw`ae kha oun rawse cih`ae zah minmin kha oun chisah cih`ae. ²² Te kae ka min keiccuze ccungccaw balyn nynh nanning kha ae hua cih oh. Thuasalama athangnaw cia atynpaw ccungccaw tuh khum athua cih. ²³ Thuasalama khua khuakheit kya nanning kha he ae tua ae sah vae oh ze, ccangpaw khua kalan la ccue oh; pawccecize byaccaccing kae hopya oh, Ccungccaw Ccapaw yn thua maw nanning nynh Israel khua`ae kalan na cceih kou lan khyh oh. ²⁴ “Zuitu tuh a ccangpatu luki um khyh, see mah a bawipaw luki um khyh. ²⁵ Zuitu hanlan a ccangpatupaw hawte athua ze azaw vae, te see mah a bawipaw hawte athua ze azaw. Minmin nynh inn hoitu kha Beelzebub a ci`ae lanze a innbyn`ae kha pawcihmou houh a ci cih`ae! ²⁶ “Tukeiccu minmin kha la rih nan oh; pawccecize langsaku lei lante phang khung paw pawsang um khyh, te ny lei lante thurupaw mah um khyh. ²⁷ “Mohnaw kya kae hopya oh paw kha awnaw kya la ho oh, te nae nakaring kya na thae oh paw kha innccukaly langte la ho oh. ²⁸ “Te pyn kha theih kho zah hiinnaw-muisaw a theih kho lei`ae paw kha la rih nan oh; thuasalama hiinnaw-muisaw te pyn kha paryhte hell kya aroh khopaw raw kha la rih oh. ²⁹ Ccithya saning tuh daw phuapia piakheit lang zua thua khyh`ae ta? Te kha-e`ae sakheit sanmah nae Paaw kaw leite laekhu lang ccah lan khyh. ³⁰ Te nae lu kya-e nae sang`ae kha marya ria athua. ³¹ Tukeiccu rih nan oh, nanning tuh ccithya`ae patae laeze nae phutehua. ³² “Tukeiccu hunghung zemah ccungccaw`ae malang kamaw kha ccaekia yn khan ze, kha-e paw kha vaawran um paw ka Paaw malang kae nynh mah ccaekia ka khanru cih. ³³ Thuasalama hunghung zemah ccungccaw`ae malang kamaw kha yn vua paw tuh vaawran kya um paw ka Paaw malang kae nynh mah ka vuaru cih. ³⁴ “Laephi vawlan daenaw thuakhae khylan nynh kae tuh kae thua cite tua nan oh, daenaw thuakhae khylan kae thua khyh, thuasalama thaloi saw khylan nynh kae thua. ³⁵ “Ccungccapaw kha a paaw rawsesah khylan, te ccanung kha a nung rawsesah khylan, te monung kha a ninnung rawsesah khylan nynh kae tuh kae thua. ³⁶ Te ccungccapaw a rhaw`ae tuh amaw innbyn kya-e`ae nynh thua cih. ³⁷ “Kamaw laeze a paaw, tukhyhze a nung a sungsah huapaw ccungccaw tuh kamaw te ngaekuh khyh; te kamaw laeze ccapaw te ccanung a sungsah huapaw ccungccaw tuh kamaw te ngaekuh khyh. ³⁸ Te amaw a vaelantung puihku leite kamaw yn zui paw ccungccaw tuh kamaw te ngaekuh khyh. ³⁹ A hiinnaw a muihkuh paw ccungccaw tuh hiinnaw kha a shung cih, te kamaw keiccuze a hiinnaw a shung paw ccungccaw tuh hiinnaw kha bua a muihkuh cih. ⁴⁰ “Nanning kha ae thuasah oh paw tuh kamaw kha oun thuasah paw nynh thua, te kamaw oun thuasah paw tuh kamaw yn sawtupaw kha a thuasah paw nynh thua. ⁴¹ Profeh min te profeh lukheit kha a thuasah paw tuh profeh kya-e law mee kha a mue cih. Te adingpaw ccungccapaw min te adingpaw ccungccaw kha a thuasah paw tuh adingpaw ccungccapaw kya-e ryalaw mee kha a mue cih. ⁴² Te hunghung zemah zuitu lukheit min liate hynh-e imua`ae lukhakheit kha nia lanpaw tuikyaa banang nangkheit a pya lanze, byaccaccing kae hopya oh, tuh-e paw tuh a ryalaw mee kha pawpawte mah shung lan khyh,” a cipya`ae.

¹ Ou tuhcihte, Jesu nynh a zuitu`ae luhaw laening kha kawpya paw he a thangsah tuh, tuh-e area kya-e khua`ae kya ccangpya khylan te phungho khylan tuin kyate a pou vae. ² Te Johan nynh thunginn kyate Kri a ryalaw`ae kong kha he a thae tuh, a zuitu`ae luning kha saw`ae zah, ³ Jesu kha, “Nang hynh yn thua lanpaw tuh na thua ta? Tukhyhze mingccangpaw tou kae la ngaehoi ung cih?” cite bya a khiasah`ae. ⁴ Jesu nynh khung`ae zah minmin kha, “La cceih oh lah na muih oh paw te na thae oh paw uccaw`ae kha Johan la hopah oh. ⁵ Mitmoh`ae nynh ngawmuih`ae zah ccukhou`ae nynh a cceih vae`ae, vaethyakae`ae paw a dan`ae, te nawpang`ae nynh nawthae`ae zah michi`ae tuh thosah athua vae`ae, te ryachi`ae kalan thehoypaw tuh hopya athua vae. ⁶ Te kae ka keiccuze a lungthang leipaw tuh hythuaccoupaw nynh thua,” a cipya`ae. ⁷ Te minmin he a pou`ae te Jesu nynh Johan konglang ccungccaw zapi kalan a hopya`ae paw tuh: “Nanning nynh paw do khylan mou rangkaw langkhe na ccia oh? Khivae nynh a he paw phaeku do khylan tou? ⁸ Tukhyhze paw do khylan mou na ccia oh? Nebaleihpaw uccaw a lawkuh paw ccungccapaw do khylan tou? Dotua oh, nebaleihpaw uccaw a lawkuh`ae paw tuh siapharan inn kya nynh a um`ae. ⁹ Tukhyhze paw do khylan mou na ccia oh? Profehpaw do khylan tou? Athua, nanning kae hopya oh, profeh lukheit lae heize alesaehua paw nynh athua. ¹⁰ Pawccecize, ‘Dotua, na malang na ccianaw a paccyn cih paw ka zeccuetu kha na malang ka saw,’ cite azeikuh paw kha hynh-e paw kong nynh thua. ¹¹ “Byaccaccing kae hopya oh, nopi`ae kyate a pui`ae paw ccungccaw`ae laku Baptisma pyatu Johan laeze alesae huapaw lukheit san pou boi loh khyh; thuasalama vaawran peenaw kya adih huaccepaw ccungccaw tuh aning laeze alesaehua. ¹² Te Baptisma pyatu Johan ryalawnaw ccyh kyate tho zah atu rya cia vaawran peenaw tuh nangsenaw kha teing zah a nangse`ae paw nynh kha-e kha thawzung mangte a luade`ae. ¹³ Pawccecize kawbya te profeh`ae ccauh balyn tuh Johan ccyh kyacia nynh profehbya a ho`ae. ¹⁴ Te hynh-e ka bya hynh nanning nynh na lawku ry oh ze, aning tuh yn thua vae cih paw Elijah nynh thua. ¹⁵ Thae nawlan nakaring a hoi paw ccungccaw nynh tuh thae sah! ¹⁶ “Te hynh-e ccungccaw`ae hynh pawtemou ka touse cih`ae? E ciihan tuh kungkunaw hmin`ae kya dahung`ae zah mih ban`ae kha, ¹⁷ ‘Kaening nynh nanning kha phyly kae tupah oh zah na law khyh oh, nae kalan kae rah kae khui zah na rah na khui khyh oh rei,’ cite a hopah`ae paw imua`ae te nynh aloku`ae. ¹⁸ Pawccecize Johan tuh ae leite nia leite yn thua zah minmin nynh, ‘Aning tuh khozi bahkuhpaw nynh thua,’ a ci`ae. ¹⁹ Ccungccaw Ccapaw tuh aete niate yn thua zah minmin nynh, ‘Dotua oh, aemoh paw te misusanphing khu! Ngunto khoitu`ae te misei`ae banpaw khu!’ a ci`ae. Thuasalama hawnaw tuh amaw a ccaaw`ae kyate thyaaccousah athua,” a ci. ²⁰ Oute athungpaw ryalawnaw`ae alung huacce a langsakunaw kya-e khua`ae nynh a ngaesiku khyh`ae keiccuze Jesu nynh hynhte a pe`ae: ²¹ “Khorazin khua, nang tuh paw ngaethya lan na um babang! Bethsaida khua, nang tuh paw ngaethya lan na um babang! Pawccecize nanning kya acyikuh paw athungpaw ryalawnaw`ae kha Tai khuapi te Sidon khuapi kya a la cyiku lanze minmin tuh buri uccaw lawkuh cih`ae zah, buhaw kya toukute khawlya mawte phe a la ngaesikuh vae cih`ae. ²² Thuasalama nanning kae hopya oh, byapianaw nin kya nanning hanlan laeze Tai te Sidon hanlan ngaesang kho a um hua cih. ²³ Te Kapernaum khua, nang tuh vaawran kyacia hangthung na thua zemah Hades lang sawbung na thua cih; pawccecize nang na kya acyikuh paw athungpaw ryalawnaw`ae kha Sodom khuapi kya a la cyiku ze, kha-e tuh atunin rya cia atyn ung cih paw. ²⁴ Thuasalama nang kae hopya, byapianaw nin kya na hanlan laeze Sodom khuapi hanlan ngaesang kho a um hua cih,” a ci. ²⁵ Tuh-e ccyh kya Jesu nynh tho zah, “Vaawran te laephi Bawipaw, Pou Apang, na kalan lungtuabya ka ho; pawccemacize nang nynh hynh-e uccaw`ae hynh a haw`ae paw te a thya`ae paw kyate phe na thuru zah nosi`ae kyakhe na phypya`ae. ²⁶ Ou tuhmawte nynh athua Apang, pawccecize na mitmuihnaw kya tuh-e tuh ahoypaw nynh thua. ²⁷ “Ka Paaw nynh pawpaw balyn kha kamaw kalan marya yn ah vae; te Paaw holeite hung ccungccaw nynh san Ccapaw kha nyh khyh; Ccapaw te Ccapaw nynh a phypya ry paw ccungccaw holeite hung ccungccaw nynh sanmah Paaw kha nyh khyh. ²⁸ “Riathae`ae paw te phuri`ae paw balyn kamaw kalan rang oh lah hae-ungnaw kae pya cih oh. ²⁹ Ka taphu hynh nae tungvaw khangkuh oh lah kamaw hynh yn ccangkuh oh; pawccecize kae tuh a lungnepaw te thinlung kya zakawsangsakuhpaw nynh ka thua; oute nae hiinnaw-muisaw hanlan hae-ungnaw kha na mue cih oh. ³⁰ Pawccecize ka taphu tuh nawre um zah ka phupaw tuh azaw,” a ci.

¹ Tuh-e ccyh lya Jesu tuh Sabbath nin khe loo kya po a cceih; te a zuitu`ae tuh mih vuelaw zah looh avui kha zukuh`ae zah a ae`ae. ² Te Farasi`ae nynh he a muih`ae tuh amaw kha, “Dotua, Sabbath nin kya kawbya nynh cyi lan a ua leipaw kha na zuitu`ae nynh a cyi`ae,” a cipya`ae. ³ Thuasalama Jesu nynh minmin kha, “David nynh amaw ryte a um`ae paw ry mih vuelaw lya, a cyi paw kha na ria boi khyh oh tou? ⁴ Pachia inn lungkhu lang tee zah amaw hanlan te amaw ryte um`ae paw hanlan Kawbya nynh ae lan a ua leipaw, thuasalama ranpibawi`ae kyalya Kawbya nynh a ua paw, Pachia malang nungpyapaw sanlou kha phe a ae cipaw kha na ria boi khyh oh tou? ⁵ Tukhyhze, tempal kya ranpibawi`ae nynh Sabbath nin kya Sabbath a thusah`ae zemah seibe thua khyh`ae cipaw kha kawbya kya na ria boi khyh oh tou? ⁶ Tuhzemah nanning kae hopya oh, tempal laeze alesaehua paw tuh e kya a um. ⁷ Thuasalama, ‘Silawkunaw tuh ka ry khyh, ngaethya-umsanaw nynh ka ry,’ acikuh paw asuilan hynh phe na ny oh lanze, seibe lan accan leipaw hynh nanning nynh sei na be cih lei oh paw. ⁸ Pawccecize Ccungccaw Ccapaw tuh Sabbath Bawipaw ccaccei nynh thua,” a cipya`ae. ⁹ Te tuin kyate Jesu he a pou tuh mih sinakok lungkhu langkhe a tee. ¹⁰ Te dotua, tuin kya a kuih hawkheit lang achihpaw ccungccapaw lukheit a la um. Te minmin nynh Jesu kha a seinaw kae kyngpya ccaw cite, “Sabbath nin kya dansah lan kawbya nynh a ua tou?” cite a khia`ae. ¹¹ Te Jesu nynh minmin kha, “Nanning laku lukhakheit nynh tuu sakheit hoi zah kha-e tuh Sabbath nin kya hunghua lungkhu lang phe a ccaw lanze kha-e tuu kha kyng leite, thua leite a um paw na ung cih oh tou? ¹² Tuu laeze ccungccaw tuh pawcihmou houh aphutehua? Tukeiccu Sabbath nin kya ahoypaw cyi lan tuh accanpaw nynh thua,” a cipya`ae. ¹³ Oute Jesu nynh ccungccapaw kha, “Na kuih kha dyngtua,” a cipya. Te aning nynh a kuih kha dyng zah hawkheit lang-e hawte phe ahoy vae. ¹⁴ Oute Farasi`ae tuh pou`ae zah amaw kha rawsete pawtemou chia lan cipaw khuakhanku`ae. ¹⁵ Thuasalama Jesu nynh kha-e kha he a nyh tuh tuin kyate phe a toikuh. Te ccungccaw zapi nynh amaw kha zui`ae zah minmin balyn kha a dansah`ae. ¹⁶ Te amaw kha hung nynh thua cipaw na nysah lan khyh oh cite minmin kha bya a tawsya`ae. ¹⁷ Ou tuhte profeh Isaiah nynh a hosyapaw bya accing nawlan nynh thua. A hopaw tuh: ¹⁸ “Ka sungsahpaw, ka pokupaw ka rya oun lawpatu khu dotua oh! Amaw kya ka muisaw a lungrythua; amaw tungvaw ka Muisaw ka nung cih, te aning nynh Zenta`ae kha atazaenaw kong a hopah cih`ae. ¹⁹ “Aning tuh eikuh lan khyh, sia mah sia lan khyh, hung ccungccaw nynh sanmah laanpi kya a roi thae lan khyh. ²⁰ Atazaenaw kha taenaw kalan a thuakhae makhia aning nynh a vaemaw um paw phaeku kha khya lan khyh zah maeekhuhpaw liarui kha the lan khyh. ²¹ Te amaw min kha Zenta`ae nynh a doliakuh cih`ae,” a ci. ²² Oute raerangsaro nynh bahkuh zah a mitmohpaw, bya ho kho leipaw lukheitpaw kha amaw kalan oun thuakhae`ae; te kha-e paw kha a dansah. Oute mitmoh zah bya ho kho leipaw tuh bya ho zah ngaw a muih vae. ²³ Te ccungccaw`ae balyn tuh mih ngaeangthua zah, “E paw tuh David Ccapaw thua khyh ta?” a ci`ae. ²⁴ Thuasalama Farasi`ae nynh he a thae`ae tuh, “E paw nynh khozi`ae uktupaw Beelzebub leite tuh khozi`ae kha dee khyh,” a ci`ae. ²⁵ Te Jesu nynh mih tuanaw kha nyh zah minmin kha, “Amaw te amaw kha rawsekuh zah aphiakuhpaw peenaw miakaw tuh ronaw kalan nynh a thua cih; te amaw te amaw kha rawsekuh zah aphiakuhpaw khuapi, tukhyhze inn miakaw tuh tyn kho lan khyh. ²⁶ Te Setan nynh Setan kha a dee lanze, aning tuh amaw te amaw a rawsekuhpaw te a phiakuhpaw nynh thua; pawcihtemou a peenaw tuh atyn kho cih? ²⁷ Te kae nynh Beelzebub liate raerangsaro`ae kha ka dee lanze, nae ccaaw`ae nynh hung liate mou minmin kha a dee`ae? Tukeiccu nae ccaaw`ae tuh nanning byapiatu`ae athua cih`ae. ²⁸ Thuasalama Pachia Muisaw liate raerangsaro`ae kha kae nynh ka dee ze, Pachia peenaw tuh nanning kalan yn thua ccaccing vae. ²⁹ Tukhyhze ccungccaw lukheit nynh a thawsaepaw ccungccapaw kha masaty a khiide khyh lanze, a inn lungkhu langkhe pawcihtemou a tee kho cih zah a uccaw`ae kha a lua kho cih? A khiidety ze nynh a inn kha a lua kho cih. ³⁰ Kamaw ryte a um leipaw ccungccaw tuh kae yn rawsepaw nynh thua; te kamaw ryte a sueluakuh bua leipaw tuh phiariphiarae a um paw nynh thua. ³¹ “Tukeiccu nanning kae hopya oh, seinaw miakaw te Pachia saryapaw bya hanlan ccungccaw`ae tuh seingaethya athua cih`ae; thuasalama Thyaa Muisaw saryapaw bya a ho paw ccungccaw`ae tuh seingaethya thua lan khyh`ae. ³² Te Ccungccaw Ccapaw kha rawsete bya a ho paw ccungccaw miakaw tuh seingaethya athua cih, thuasalama Thyaa Muisaw kha rawsete bya a ho paw ccungccaw tuh, atu she kya mah, yn thua lanpaw she kya mah seingaethya thua lan khyh. ³³ “Thingku kha ahoy lang rae lah athae ahoy cih, tukhyhze ahoy lei lang rae lah athae hoy lan khyh, pawccecize thingku tuh athae liate ny athua. ³⁴ Pou fuparepaw ciihan`ae! Pawcihtemou nanning na hoy lei oh pite ahoypaw uccaw`ae kong kha na ho kho cih oh? Pawccecize thinlung kya phe beihpaw kha nynh khalang nynh a ho. ³⁵ Ahoypaw ccungccaw nynh thinlung kya-e ahoypaw sisua bung kyate ahoypaw uccaw`ae kha yn poukhae; te ahoy leipaw ccungccaw nynh ahoy leipaw sisua bung kyate ahoy leipaw uccaw`ae kha yn poukhae. ³⁶ Thuasalama nanning kae hopya oh, ccungccaw`ae nynh ccakaepaw bya a ho`ae paw miakaw hanlan byapianaw nin kya pawcihte nynh a ho cipaw kha a langsakuh cih. ³⁷ Pawccecize na bya`ae liate nang tuh thyaaccousah na thua cih zah na bya`ae liate nang tuh seibe na thua cih,” a cipya`ae. ³⁸ Oute kawbya ccangpatu`ae abang te Farasi`ae nynh khung`ae zah, “Ccangpatupaw, na kyate muihsanaw ccangkheit kae muihtua ry,” a ci`ae. ³⁹ Thuasalama Jesu nynh minmin kha, “Ahoy leipaw te a ohhuakuhpaw ciihan nynh tuh muihsanaw hynh a ccung, thuasalama profeh Jonah kya-e muihsanaw laelan ccangpaw muihsanaw kha pya thua vae lan khyh. ⁴⁰ Pawccecize Jonah tuh nin thung te zi thung ngapi vuebua kya a um hawte, Ccungccaw Ccapaw mah nin thung te zi thung laephi lungkhu a um cih. ⁴¹ Byapianaw kya Nineveh khua-e ccungccaw`ae tuh hynh-e she kya-e ccungccaw`ae ryte oun thokuh cih`ae zah hynh-e she kya-e ccungccaw`ae kha sei oun be cih`ae, pawccecize minmin tuh Jonah phunghonaw kya phe a ngaesikuh`ae, te dotua, Jonah laeze alesaehua paw tuh e kya nynh a um. ⁴² Byapianaw kya deilang e siapharannung tuh hynh-e she kya-e ccungccaw`ae ryte yn thokuh cih zah sei yn be cih`ae, pawccecize aning tuh laephi athangnaw langte Solomon hawnaw bya thae khylan yn thua; te dotua, Solomon laeze alesaehua paw tuh e kya a um. ⁴³ “Athyaa leipaw muisaw nynh ccungccapaw kyate he a pou tuh aroupaw ahmin`ae lang po a cceih, hae-ungnaw kha ccungkuh zah muihkuh khyh. ⁴⁴ Oute aning nynh, ‘Ka poutawnaw ka inn lang ka ki cih,’ a ci; te he a thua tuh kha-e inn tuh phe la phikuh zah a ccunghangpaw te paccaan athua paw kha a muih. ⁴⁵ Oute aning tuh cceih zah amaw laeze houh ahoy leipaw ccangpaw muisaw lusari`ae kha amaw ry a hoeibua`ae, te minmin tuh tee`ae zah kha-e paw kya a um`ae; te kha-e ccungccapaw kya-e nyalang acyihkuh paw tuh masaty a umtu laeze houh a seihua. Tuh-e hawte nynh hynh-e ahoy leipaw ciihan kya mah acyikuh bua cih,” a cipya`ae. ⁴⁶ Ccungccaw zapi kha bya a hopya cciamang lyakhe, dotua, a nung te a neitapaw`ae tuh atolang khe thadyn`ae zah amaw kha bya hopya lan a ry`ae. ⁴⁷ Oute ccungccaw lukheit nynh amaw kha, “Dotua, na nung te na neitapaw`ae, nang ryte byahoku ry`ae zah atolang nynh a thadyn`ae,” a cipya. ⁴⁸ Thuasalama Jesu nynh amaw kha-e bya a hopah paw kha, “Ka nung tuh hungmou? Te ka neitapaw`ae tuh hungmou?” cite a khung. ⁴⁹ Te a zuitu`ae kalan khe a kuih kha dyng zah, “Ka nung te ka neitapaw`ae hynh dotua oh! ⁵⁰ Pawccecize vaawran kya um paw ka Paaw rynaw a cyih paw, kha-e paw kha nynh ka neitapaw, ka ccia, te ka nung tuh athua,” a ci.

¹ Tuh-e nin kya Jesu tuh inn kyate pou zah rili kin khe a dahung. ² Te ccungccaw zapi pi tuh amaw kalan a sueluakuh`ae keiccu Jesu tuh kohlung lungkhu lang tee zah a dahung; te ccungccaw zapi khaleih tuh varan langkhe a thadyn`ae. ³ Te Jesu nynh minmin kha tousenaw phungpaw`ae te bya patae a hopya`ae. A hopaw tuh: “Dotua oh, ccaciivuatu lukheit nynh ccaciivua lan a cceih. ⁴ Te ccacii kha he a vua tuh, ccacii abang tuh laanpi pe khe ccah`ae zah pavaw`ae nynh oun thua`ae zah phe a tuh kou`ae. ⁵ Abang tuh laephi zya zah lung alungnaw kya a ccah; te laephi thawkalae lang a um khyh keiccuze taloi a po`ae. ⁶ Te khuanin he yn paw tuh minmin kha a rua vae`ae, te tharui a hoi khyh`ae keiccuze karae arou`ae. ⁷ Te abang tuh hingpaw`ae laku ccah zah hingpaw`ae nynh lethin`ae zah minmin kha phang reihde`ae. ⁸ Thuasalama ccangpaw ccacii`ae tuh ahoypaw lae kya ccah`ae zah abang tuh leih zakheit, abang tuh leih sungtaruh, abang tuh leih sungthung athae a thae`ae. ⁹ Thae nawlan nakaring a hoi paw ccungccaw tuh thaesah,” a ci. ¹⁰ Te zuitu`ae oun thua`ae zah amaw kha, “Pawccemou minmin kha tousenaw phungpaw`ae te na hopya`ae?” cite a khia`ae. ¹¹ Jesu nynh khung`ae zah, “Pawccemacize vaawran peenaw kya-e byakhupaw`ae kha ny lan nanning tuh pya na thua oh, thuasalama minmin tuh pya thua khyh`ae. ¹² Pawccecize hunghung zemah a hoi paw ccungccaw tuh pyachih athua cih zah pataepi houh a hoi cih; thuasalama hunghung zemah a hoi leipaw ccungccaw tuh a hoithypaw maw kha lawpya athua cih. ¹³ Tukeiccu nynh minmin kha tousenaw phungpaw`ae te ka hopya`ae; pawccemacize minmin tuh mang a muih`ae pite muih khyh`ae, te mang a thae`ae pite thae khyh`ae, thae mah thaethya khyh`ae. ¹⁴ “Te minmin kya Isaiah nynh a hopaw profehbya tuh accing vae; a hopaw tuh: ‘Thae paw tuh na thae cih oh zah na thaethya lan khyh oh, te muihpaw tuh na muih cih oh zah na nyh lan khyh oh. ¹⁵ Pawccecize hynh-e ccungccaw`ae mih thinlung tuh phe amoh, te mih nakaring`ae tuh karae arua, te mih mit`ae tuh phang masi`ae; tukhyh lanze ccyhkhakheit kya mih mit`ae khate phe a muih cih`ae paw, mih nakaring`ae te phe a thae cih`ae paw, mih thinlung te phe a thaethya cih`ae paw, te phe a paleihkuh cih`ae paw, te minmin kha phe ka dansah cih`ae paw,’ a ci. ¹⁶ “Thuasalama nanning nae mit`ae tuh ngawmuih`ae keiccu hythuaccou`ae paw nynh thua; te nae nakaring`ae tuh nawthae`ae keiccu hythuaccou`ae paw nynh thua. ¹⁷ Pawccecize byaccaccing kae hopya oh, profeh`ae patae te adingpaw ccungccaw`ae nynh na muih oh paw uccaw`ae hynh muih a ry`ae zemah muih bua khyh`ae, te na thae oh paw hynh thae a ry`ae zemah thaebua khyh`ae. ¹⁸ “Tukeiccu ccaciivuatupaw tousenaw phungpaw kong hynh nanning ngaetua oh. ¹⁹ Lukhakheit nynh peenaw kong hopaw bya kha he a thae tuh kha-e kha thaethya khyh, oute mihoy leipaw nynh yn thua zah a thinlung kya vua paw ccacii kha dae a lawpya. Tuh-e paw tuh laanpi zung kya vua paw ccacii a mue paw kha nynh thua. ²⁰ Te lung alungnaw kya vua paw ccacii kha a mue paw ccungccaw tuh bya kha thae zah vaekheihmawte lungtuate a lawkuh paw kha nynh thua. ²¹ Tuhzemah a kya atharui hoi khyh zah sosoh rou nynh atyn, te bya keiccuze vawsawrunaw, tukhyhze tuasakunaw he yn um tuh aro mawze aning tuh phe a maeleihkuh. ²² Hingpaw`ae laku vua paw ccacii kha a mue paw ccungccaw tuh bya athae paw kha nynh athuabua; te hynh-e laephipi uccaw elan thinphangnaw te lingthyapaw hoirungnaw nynh bya kha phang a reihde pya, te aning tuh athae kha thae kho vae khyh. ²³ Thuasalama ahoypaw lae kya vua paw ccacii kha a mue paw ccungccaw tuh bya kha thae zah kha-e kha a thaethya paw nynh thua; athae kha thae zah abang tuh leih zakheit, abang tuh leih sungtaruh, abang tuh leih sungthung a pousah paw ccungccaw kha nynh thua,” a ci. ²⁴ Jesu nynh ccangpaw tousenaw phungpaw a hopya`ae paw tuh: “Vaawran peenaw tuh a loo kya ahoypaw ccacii a vua paw ccungccaw te nynh aloku. ²⁵ Te ccungccaw`ae a i`ae lyakhe a rhawpaw nynh yn thua zah chanvui laku khe lonua mung`ae kha vua zah phe a cceih. ²⁶ Thuasalama chanvui tuh yn po zah avui he yn pou tuh lonua`ae mah oun langkuh bua vae`ae. ²⁷ Tukeiccu inn hoitu a see`ae nynh a kalan yn thua`ae zah, ‘Bawihaepaw, na loo kya ccacii ahoypaw kha na vua khyh ta? Paw kyate mou lonua`ae hynh oun pou`ae?’ cite a khia`ae. ²⁸ Kha-e paw nynh, ‘Rhaw lukheit nynh e hynh a cyih,’ a cipya`ae. See`ae nynh, ‘Tuhte lanze kaening nynh ccianua lan zah kha-e`ae kha marya phoh lan na ry ta?’ a ci`ae. ²⁹ Thuasalama aning nynh, ‘Tuhte thua khyh, lonua`ae he na khae lya oh, khae` ae ryte chanvui mah phe na khaebia sei cih oh. ³⁰ Loohrue ccyh azaw makhia pynkheihlan paryh le`ae sah; te loohrue ccyh kya loohruetu`ae kha, “Nanning lonua`ae kha masaty suelua oh lah maee te rua lan la tung oh, thuasalama chanvui kha ka byng lungkhu lang oun ruin oh,” ka cipah cih`ae,’ a ci,” cite a hopya`ae. ³¹ Jesu nynh ccangpaw tousenaw phungpaw a hopya`ae paw tuh: “Vaawran peenaw tuh ccungccapaw lukheit nynh lah zah a loo kya a vua paw mungngia cii te nynh aloku. ³² Mungngia cii tuh ccacii`ae balyn kyaze adih huaccepaw ccaccing nynh thua; thuasalama kha-e nynh he yn le vae tetuh enaw-ekan`ae lakuze ale huapaw lang te thingku lang phe atang; te vawlae-e pavaw`ae nynh oun zou`ae zah kha-e aran`ae kyakhe bu a luaku`ae,” a ci. ³³ Ccangpaw tousenaw phungpaw a hopya`ae paw tuh: “Vaawran peenaw tuh ransi te nynh aloku; nopi lukheit nynh kha-e kha laah zah vaepoi kee keethung kya a phing paw, tuh-e vaepoi phe a thosah paw ransi te nynh aloku a ci,” a ci. ³⁴ Hynh-e uccaw`ae balyn hynh Jesu nynh ccungccaw zapi kalan tousenaw phungpaw`ae te nynh a ho; te tousenaw phungpaw leite minmin kha bya hopah khyh`ae. ³⁵ Ou tuhte profeh nynh, “Ka khalang ka aw cih zah tousenaw phungpaw`ae kha ka ho cih, laephipi athonaw kyate athurukuh paw uccaw`ae kha ka ho cih,” cite a ho paw bya accing nawlan nynh thua. ³⁶ Oute Jesu nynh ccungccaw zapi kha cciasah`ae zah inn lungkhu lang a tee; te a zuitu`ae nynh amaw kalan oun thua`ae zah, “Loo kya-e lonua`ae tousenaw phungpaw kong kha kaening oun hopah,” a ci`ae. ³⁷ Aning nynh minmin kha khung`ae zah, “Ccacii ahoypaw a vuatupaw tuh Ccungccaw Ccapaw nynh thua. ³⁸ Loo tuh laephipi nynh thua; ccacii ahoypaw tuh peenaw ccaaw`ae nynh thua; thuasalama lonua`ae tuh mihoy leipaw ccaaw`ae nynh thua. ³⁹ Tuh-e lonua mung`ae a vua paw rhaw tuh diabolos nynh thua; loohrue ccyh tuh laephi she athangnaw nynh thua; te loohruetu`ae tuh vaaw ccungccaw`ae nynh thua. ⁴⁰ Tukeiccu lonua`ae tuh suelua`ae zah maee kya a rua`ae hawte laephi she athangnaw kya acyikuh bua cih. ⁴¹ Ccungccaw Ccapaw nynh a vaaw ccungccaw`ae kha yn saw cih`ae zah minmin nynh mingccang`ae a maeleihsakuh`ae paw te kawbya pawlangria lei`ae paw balyn kha a peenaw kyate oun suelua cih`ae. ⁴² Te minmin kha maeephupi lungkhu lang a phung cih`ae, tuin kya rawkhuinaw te hawzynaw a um cih. ⁴³ Oute adingpaw ccungccaw`ae tuh mih Paaw peenaw kya khuanin hawte a aw vae cih`ae. Thae nawlan nakaring a hoi paw ccungccaw tuh thaesah! ⁴⁴ “Te vaawran peenaw tuh lei kya thurupaw sisua te nynh aloku; kha-e kha ccungccapaw nynh he a muih tuh zya a thuru, te kha-e elan lungtuanaw te cceih zah a hoi paw balyn kha zua zah kha-e lei kha a re. ⁴⁵ “Te vaawran peenaw tuh myarya ahoypaw pale`ae a ccungkuh paw kungkupaw te nynh aloku. ⁴⁶ Tuh-e paw nynh myarya aphutepaw pale kha he a muih tuh cceih zah a hoi paw balyn kha zua zah kha-e pale kha a re. ⁴⁷ “Te vaawran peenaw tuh rili lungkhu lang vua`ae zah ngasaw aphuinphuin akhung paw mia te nynh aloku. ⁴⁸ Ngasaw te he abeih tuh mia kha ngasaw kyng`ae nynh varan langkhe a sue`ae, te dahung`ae zah ahoypaw ngasaw`ae kha sua lungkhu lang a sang`ae, thuasalama ahoy leipaw kha a vua`ae. ⁴⁹ Tuh-e hawte laephi she athangnaw kya athua cih; vaaw ccungccaw`ae nynh oun rung cih`ae zah mihoy lei`ae kha a ding`ae paw laku kyate thohphia cih`ae. ⁵⁰ Te minmin kha maee phupi lungkhu lang a vua cih`ae; tuin kya rawkhuinaw te hawzynaw a um cih,” a ci. ⁵¹ Jesu nynh, “E uccaw`ae balyn hynh na thaethya oh ta?” cite zuitu`ae kha a khia`ae. Minmin nynh, “Ou, Bawipaw,” a ci`ae. ⁵² Oute Jesu nynh, “Tukeiccu vaawran peenaw kong ccangpya athua vae paw kawbya ccangpatu`ae miakaw tuh amaw a sisua bung lungkhu te athawpaw te arynpaw uccaw`ae yn thuakhae paw inn hoitupaw te nynh aloku,” a cipya`ae. ⁵³ Ou tuhcihte Jesu nynh e tousenaw phungpaw`ae kha he a ho kou tuh tuin kyate phe a pou. ⁵⁴ Te amaw a khua lang he a thua tuh a khuaccaw`ae kha mih sinakok kyakhe a ccangpya`ae; minmin tuh myarya mih ngaeangthua zah, “Paw kyate mou e paw nynh hynh-e hawnaw te e athungpaw ryalaw`ae hynh a mue? ⁵⁵ E paw tuh lehccamapaw ccapaw thua khyh tou? A nung Meri ci`ae paw thua khyh tou? Te a neitaw`ae tuh James, Joses, Simon te Judas thua khyh`ae tou? ⁵⁶ Te a ccia`ae tuh mih balynte aening ryte a um`ae paw kha thua khyh tou? Tuhte lanze paw kyate mou E paw nynh e uccaw`ae balyn hynh a mue?” a ci`ae. ⁵⁷ Tuhte minmin tuh amaw kya mih lung athang. Thuasalama Jesu nynh minmin kha, “Profeh lukheit tuh amaw a ram, te amaw a innbyn kya holeite tuh sawtua leite um khyh`ae,” a cipya`ae. ⁵⁸ Te minmin nynh a zyn khyh`ae keiccuze athungpaw ryalawnaw`ae patae kha khe kya Jesu nynh cyih khyh.

¹ Tuh-e ccyh kya Herod tetrach nynh Jesu thungpang kha thae zah, ² a ryalawpatu`ae kha, “E paw tuh Baptisma pyatu Johan nynh thua, aning tuh chinaw kyate nynh a tho vae; tukeiccu nynh hynh-e thungnaw`ae hynh amaw kya alangku,” a cipya`ae. ³ Pawccecize Herod nynh a neitaw Filip zu Herodia keiccuze Johan kha kyng zah a khii, te thunginn kya a saw. ⁴ Pawccecize Johan nynh Herod kha, “Kha-e nung kha na hanlan na lawku lan ccan khyh,” a la cipya. ⁵ Te aning nynh Johan kha chia lan a ry zemah ccungccaw zapi raw kha a rih. Pawccemacize minmin nynh Johan kha profeh lukheit hawte a tua`ae paw nynh thua. ⁶ Thuasalama Herod a pui nin poi he a tua`ae tuh Herodia ccanung nynh mih malang khe he yn law tuh Herod kha a lungrythuasah. ⁷ Tukeiccu kha-e nopinung nynh a ngiakupaw miakaw kha pya lan Herod nynh ccaesakute byakinpyaku. ⁸ Te a nung nynh phe a hopyaty vae thyhte, kha-e nung nynh, “Hynhlang hin Baptisma pyatu Johan lu kha pakephepaw te yn pya,” a ci. ⁹ Te siapharan tuh a ngaethah; tuhzemah ccaesakupaw keiccu te amaw ryte loohdangkunaw kya a dahungkheih`ae paw keiccuze kha-e nung kha pya lan kaw a pya`ae. ¹⁰ Te ccungccaw saw zah thunginn kya Johan kha a lu paesah`ae. ¹¹ Te a lu kha pakephepaw kya oun ccyng`ae zah liaccanung taraw kha a pya`ae, te aning nynh kha-e kha a nung kalan a ccyng. ¹² Te Johan zuitu`ae oun thua`ae zah a rhua kha laah`ae zah a ccy`ae, te cceih`ae zah Jesu kha a hopya`ae. ¹³ Jesu nynh tuh-e kong he a thae tuh tuin kyate a makhaete rangkaw lang kohlung te phe a pou; te ccungccaw`ae nynh kha-e kha he a thae`ae tuh khua kyate mih ccu te amaw kha a zui`ae. ¹⁴ Te Jesu tuh yn pou zah ccungccaw zapi kha he a muih tuh minmin kha ngaethyaumsah` ae zah mih ngeccih`ae kha a dansah`ae. ¹⁵ Te zete he yn thua tuh a zuitu`ae nynh amaw kalan oun thua`ae zah, “E kya tuh rangkaw thua zah khuanin phe anae vae, tukeiccu ccungccaw zapi hynh saw`ae lah minmin nynh khua`ae kalan cceih`ae sah lah mimaw elan aepaw a reku ccaw`ae,” cite a hopya`ae. ¹⁶ Thuasalama Jesu nynh, “Minmin a pou`ae ho khyh, nanning nynh minmin kha ae lanpaw pya oh,” a cipya`ae. ¹⁷ Te minmin nynh amaw kha, “E kya sanlou phe pangaw te ngasaw zawning rou nynh kae hoi,” a cipya`ae. ¹⁸ Jesu nynh, “Kha-e`ae kha hynhlang kamaw kalan oun ccyng oh,” a ci. ¹⁹ Te ccungccaw zapi kha lonua vawlan dahung lan kaw a pya, te sanlou phe pangaw te ngasaw zawning kha laah zah vaawran lang dothung zah lungtuabya a ho, te eih zah sanlou`ae kha zuitu`ae a pya, te zuitu`ae nynh ccungccaw zapi kha a pya`ae. ²⁰ Te minmin balyn tuh ae`ae zah phe byn`ae; te alaepaw a eihpaw kha khuin`ae zah kee haw laening phe abeih. ²¹ Te tuh-e a ae`ae paw tuh nopi`ae te imua`ae holeite pise piccang thungpangaw loukaw acih`ae. ²² Te Jesu nynh ccungccaw zapi a saw lya`ae khe, amaw malang khuraw lang cciaty khylan a zuitu`ae kha vaekheihmawte kohlung lungkhu lang a kaesah`ae. ²³ Te ccungccaw zapi kha he a saw`ae koute a makhaete sawsang lan mua muakheit kalan a kaethung; te zete he a thua tuh tuin kya a makhaete a um. ²⁴ Thuasalama kohlung tuh atu rili ngaelung kya um zah khisang nynh arawsekuh lante a mung keiccu tuileih nynh a hesaku. ²⁵ Te khuazi santari ccyhpalinaw kya Jesu tuh rili vawlan khe zuitu`ae kalan a cceih. ²⁶ Te zuitu`ae nynh amaw rili vawlan yn ccia paw kha he a muih`ae tuh rih`ae zah, “Muihsaw nynh thua!” a ci`ae; te minmin tuh a ri`ae keiccuze thawte a sia`ae. ²⁷ Thuasalama Jesu nynh hopah kanmaw`ae zah minmin kha, “Nae thawmuin sah! Kamaw nynh ka thua, rih nan oh,” a cipya`ae. ²⁸ Te Piter nynh amaw kha khung zah, “Bawipaw, namaw na thua ze, tui vawlan te na kalan ccia lan kaw yn pya,” a ci. ²⁹ Te Jesu nynh, “Rang,” a ci. Te Piter tuh kohlung kyate sahkuh bung zah Jesu kalan ccia lan tui vawlan khe a cceih. ³⁰ Thuasalama khisang arupaw kha he a muih tuh a rih vae, te tui kya he yn ccah takaw tuh, “Bawipaw, yn khum!” cite a sia. ³¹ Te vaekheihmawte Jesu nynh a kuih kha dyng zah a kyng, te amaw kha, “Pou zynnaw azyapaw nang, pawccemou na lunghiin?” a cipya. ³² Te minmin nynh kohlung lungkhu lang he oun thua`ae tuh khisang phe adae. ³³ Oute kohlung kya a um`ae paw ccungccaw`ae nynh oun cceih`ae zah, “Nang tuh Pachia Ccapaw ccaccing nynh na thua,” ci`ae zah amaw kha a beik`ae. ³⁴ Te minmin khuraw he oun zua`ae tuh Kenesaret ram lungkhu lang oun thua`ae. ³⁵ Te tuh-e hmin kya-e ccungccaw`ae nynh amaw kha he a nyh`ae tuh tuh-e area pepan balyn kalan ccungccaw`ae kha saw`ae zah ngeccih`ae balyn kha amaw kalan oun cciakhae`ae. ³⁶ Te minmin nynh a boei dung sankaw hae lan amaw kha a ngiaku`ae; te a hae paw miakaw tuh marya a dan`ae.

¹ Oute Jerusalem khua e kawbya ccangpatu`ae te Farasi`ae tuh Jesu kalan oun thua`ae zah, ² “Pawccemou na zuitu`ae nynh langmaw-e piccang`ae phung kha a lue`ae? Pawccecize minmin nynh looh a ae`ae ze mih kuih singkuh khyh`ae,” a ci`ae. ³ Thuasalama aning nynh khung`ae zah, “Pawccemou nanning so nae phung keiccuze Pachia kawpyapaw kha na lue oh? ⁴ Pawccecize Pachia nynh, ‘Na paaw te na nung kha sawtua’; te, ‘A paaw khyhze a nung thyalah paw ccungccaw tuh chia thua sah,’ cite kaw a pya. ⁵ Thuasalama nanning nynh, ‘Hunghung zemah a paaw khyhze a nung kha, “Pawpaw zemah kamaw liate na mue lanpaw bawngnaw tuh lasung nynh thua,” a ci ze, ⁶ a paaw khyhze a nung kha sawtua ho vae khyh,’ na ci oh. Ou tuhte nae phung liate Pachia kawpyapaw kha pawlang um lei lan na rae oh. ⁷ Nanning thyaruhthyaphe` ae! Nanning konglang Isaiah nynh hmerarihlan a la hoty vae. A hopaw tuh: ⁸ ‘E ccungccaw`ae nynh mih khalang te kamaw kalan oun naekuh`ae zah mih mung te saw oun tua`ae; thuasalama mih thinlung tuh kamaw kyate asawkuh. ⁹ Te ccungccaw`ae kyae kawpyapaw kha doctrine lang ccangpyate accakaepaw kya kamaw kha oun beik`ae’ a ci,” a cipya`ae. ¹⁰ Te Jesu nynh ccungccaw zapi kha ko`ae zah minmin kha, “Ngae oh lah thaethya oh: ¹¹ Khalang lungkhu lang a tee paw nynh ccungccaw hynh nungsisakuh khyh; thuasalama khalang kyate yn pou paw nynh nynh ccungccaw kha a nungsisakuh,” a cipya`ae. ¹² Oute a zuitu`ae oun thua`ae zah amaw kha, “Hynh-e na hopaw a thae`ae koute Farasi`ae tuh mih lung phe thang cipaw hynh na nyh ta?” a cipya`ae. ¹³ Thuasalama Jesu nynh khung`ae zah, “Vaawran um paw ka Paaw nynh a ling leipaw aku miakaw tuh marya phoh athua cih. ¹⁴ Minmin tuh khamawte um`ae sah; minmin tuh mitmoh`ae a cciakhaetu`ae mitmoh`ae nynh thua`ae. Te mitmohpaw nynh mitmohpaw kha a cciakhae lanze paryhte hunghua lungkhu lang a ccah cih`ae,” a ci. ¹⁵ Oute Piter nynh khung zah amaw kha, “Hynh-e tousenaw phungpaw hynh kaening oun hopah,” a cipya. ¹⁶ Te Jesu nynh, “Nanning so thaethya leite tou na um ung oh? ¹⁷ Khalang lungkhu lang a tee paw miakaw tuh vue lungkhu lang ccah zah ia-inn lungkhu lang po a thua cipaw hynh nanning na thaethya la khyh oh tou? ¹⁸ Thuasalama khalang lungkhu te yn pou paw uccaw`ae tuh thinlung kyate yn pou paw nynh thua; te khae` ae nynh ccungccaw kha a nungsisakuh. ¹⁹ Pawccecize ahoy leipaw tuanaw`ae, ccungccaw chianaw, milae zu milae vawpaw seikhaenaw, ohhuakunaw, ahme leipaw ccaekiakhannaw, runaw, te milae thethyahonaw`ae tuh thinlung kyate nynh oun pou. ²⁰ E uccaw`ae hynh nynh ccungccaw a nungsisakuh; thuasalama kuih singku leite ae paw nynh tuh ccungccaw kha nungsisakuh khyh,” a ci. ²¹ Oute tuin kyate Jesu tuh cceih zah Tai te Sidon pee lungkhu lang a tee. ²² Te dotua, Kanaan nopinung lukheit kha-e ram kyate yn thua zah, “Pou Bawipaw, David Ccapaw, kae hynh ngaethya yn umsah; ka ccanung tuh raerangsaro nynh myarya accih lang a tua,” cite sia zah amaw kha a hopya. ²³ Thuasalama Jesu nynh bya kawkheit san khung khyh. Te a zuitu`ae nynh amaw kalan oun cceih`ae zah, “Hynh-e nung hynh cciasah, pawccecize aening nuhlang te pei a sia,” cite amaw kha a ngia`ae. ²⁴ Thuasalama Jesu nynh khung`ae zah, “Israel innbyn kyaze azopaw tuu`ae kalan laelan kae tuh saw ka thua khyh,” a ci. ²⁵ Oute tuh-e nung nynh yn cceih zah amaw kha beik zah, “Bawipaw, beih yn bawng!” a ci. ²⁶ Thuasalama Jesu nynh khung zah, “Ccaaw`ae looh kha law lan zah ui taraw`ae vuapya lan ccan khyh,” a cipya. ²⁷ Te tuh-e nung nynh, “Ahme nyng Bawipaw, tuhzemah ui taraw`ae nynh mih bawi`ae ccaboi kyate accah paw loohmoi`ae kha a ae`ae khaw ta,” a ci. ²⁸ Oute Jesu nynh khung zah, “Pou nopinung, na zynnaw tuh ale raria! Na ry hawte na kya cyikuh sah,” a cipya. Te a ccanung tuh tuh-e suimilan ccyh ccaccei kyate phe a dan. ²⁹ Te tuin kyate Jesu pou zah Galilee Rili pe lang a thua; te mua muakheit kalan kaethung zah tuin kyakhe a dahung. ³⁰ Te ccungccaw zapi nynh mitmohpaw, ccukhoupaw, bya ho kho leipaw, kuihccu khyn leipaw te ccangpaw ngeccih patae kha mimaw ryte amaw kalan oun thuakhae`ae zah Jesu ccu leihpaw khe a nung`ae, te Jesu nynh minmin kha a dansah`ae. ³¹ Ou tuhcihte bya ho kho leipaw nynh bya yn ho, kuihccu khyn leipaw nynh yn khyn, ccukhoupaw nynh laanpi cceih zah mitmohpaw nynh ngawmuih paw kha ccungccaw zapi nynh he a muih`ae tuh mih ngaeangthua; te minmin nynh Israel Pachia kha phu-esah`ae. ³² Oute Jesu nynh a zuitu`ae kha amaw kalan ko`ae zah, “Ccungccaw zapi hynh thaw ka ccih`ae, pawccemacize minmin tuh kamaw ryte nin thung po um vae`ae zah ae lanpaw hoi khyh`ae, te minmin hynh ae leite ka saw ry khyh`ae, tuhte saw lanze laanpi kya phe a bawsei cih`ae,” a cipya`ae. ³³ Te a zuitu`ae nynh amaw kha, “Hynhzeih ccungccaw zapi phe byn lan`ae rangkaw kyahin paw kyate mou sanlou tuh kae mue cih?” a cipya`ae. ³⁴ Te Jesu nynh minmin kha, “Sanlou hozeihmou na hoi oh?” cite khia`ae zah minmin nynh, “Phe sari, te ngasaw taraw ccapyh nynh kae hoi,” a ci`ae. ³⁵ Te aning nynh ccungccaw zapi kha lae vawlan dahung lan kawpya`ae. ³⁶ Te aning nynh sanlou phe sari te ngasaw`ae kha lah zah lungtuabya ho zah kha-e`ae kha a ia, te a zuitu`ae kha pya`ae zah zuitu`ae nynh ccungccaw zapi kalan a nee`ae. ³⁷ Te minmin balyn tuh ae`ae zah mih vueso; te minmin nynh a eihpaw alaepaw kha khuin`ae zah kee sari phe abeih. ³⁸ Te nopi`ae te imua`ae holeite a ae`ae paw ccungccaw`ae tuh thungpali acih. ³⁹ Te Jesu nynh ccungccaw zapi kha a saw`ae, te kohlung kha ccikuh zah Magdala pee lungkhu lang a thua.

¹ Te Farasi`ae te Sadusi`ae oun thua`ae zah Jesu kha syntaw khylan vaawran kyate muihsanaw kha minmin langsahpya lan amaw kha a ngia`ae. ² Aning nynh khung`ae zah, “Zete ccyh kya, nanning nynh, ‘Vaawlui ase keiccu khua ahoy cih,’ na ci oh. ³ Te awkhua ccyh kya, ‘Vaawlui se zah mae-ui keiccuze atunin tuh khua hoy lan khyh,’ na ci kho oh. Pou cyihruh`ae! Nanning nynh vaawlui mitmae kha na phiathya oh; thuasalama accyh`ae muihsanaw tuh na thaethya khyh oh. ⁴ Ahoy leipaw te a ohhuakuhpaw ciihan nynh tuh muihsanaw kha a ccung; te profeh Jonah kya-e muihsanaw laelan pawpaw muihsanaw sanmah kha-e ciihan kalan langsapya thua vae lan khyh,” a ci. Te minmin kha cciataw`ae zah phe a pou. ⁵ Te a zuitu`ae nynh khuraw lang he oun thua`ae tuh sanlou phuku lanpaw kha phe a ning`ae. ⁶ Oute Jesu nynh minmin kha, “Farasi`ae te Sadusi`ae ransi kha do oh lah la raeringkuh oh,” a cipya`ae. ⁷ Te minmin nynh, “Aening nynh sanlou ah phuku khyh oh keiccu nynh e bya hynh a ho,” cite mimaw te mimaw kya a hokuh`ae. ⁸ Jesu nynh he a nyh tuh minmin kha, “Pou zynnaw azya`ae paw nanning, nanning nynh sanlou nae phuku khyh oh keiccuze pawccemou naemaw te naemaw kya tuhte na hoku oh? ⁹ Na thaethya loh khyh oh tou? Sanlou phe pangaw kha ccungccaw thungpangaw nynh ae`ae zah kee hozeih nynh na khuin oh cipaw so na nyh vae khyh oh tou? ¹⁰ Sanlou phe sari kha ccungccaw thungpali nynh ae`ae zah kee lepaw te hozeih nynh na khuin oh cipaw so na nyh vae khyh oh tou? ¹¹ Farasi`ae te Sadusi`ae ransi kha nanning na raeringkuh cih oh cite kae hopya oh paw tuh sanlou kong lante thua khyh cipaw kha nanning nynh pawccemou e hynh na thaethya khyh oh?” a cipya`ae. ¹² Oute zuitu`ae nynh sanlou kya-e ransi kha raeringku lan oun hopya ry paw thua khyh, thuasalama Farasi`ae te Sadusi`ae ccangpyanaw kong nynh oun hopya ry paw athua cipaw kha minmin nynh oun thaethya vae`ae. ¹³ Jesu tuh Sisaria Filipi pee lungkhu lang he yn thua tuh a zuitu`ae kha, “Ccungccaw`ae nynh kae Ccungccaw Ccapaw hynh hung oun ci`ae mou?” cite a khia`ae. ¹⁴ Te minmin nynh, “Ccungccaw abang nynh nang tuh Baptisma pyatu Johan ae ci`ae; abang nynh Elijah ae ci`ae; te abang nynh Jeremiah khyhze profeh lukhakheit nynh thua, ae ci`ae,” cite a khung`ae. ¹⁵ Jesu nynh minmin kha, “Thuasalama nanning nynh so kae hynh hung nae ci oh mou?” cite a khia`ae. ¹⁶ Te Simon Piter nynh, “Nang tuh Kri, ahiinpaw Pachia Ccapaw nynh na thua,” a ci. ¹⁷ Te Jesu nynh khung zah, “Simon Bar-Jonah, nang tuh hythuaccoupaw nynh na thua, pawccecize chii te saw nynh e hynh na kalan ae phypah khyh, thuasalama vaawran um paw ka Paaw nynh ae phypah. ¹⁸ Te nang tuh Piter nynh na thua cipaw kha mah kae hopya; te e lungtung vawlan ka kriccawbu kha ka sak cih; te Hades kya-e koikua`ae nynh e hynh tae kho lan khyh. ¹⁹ Te vaawran peenaw toh`ae kha nang kae pya cih; te nang nynh laephi vawlan na khiidepaw miakaw tuh vaawran kya mah khiide athua cih; te laephi vawlan na supya paw miakaw tuh vaawran kya mah supya athua cih,” a cipya. ²⁰ Oute aning tuh Jesu Kri nynh thua cipaw kha hung ccungccaw sanmah a hopya khyh nawlan`ae a zuitu`ae kha kawpya`ae. ²¹ Tuh-e ccyh kyate Jesu nynh Jerusalem lang a ccia lanpaw, piccang`ae te alepaw ranpibawi`ae, te kawbya ccangpatu`ae kya-e patae a teing lanpaw, te a chia lan`ae paw, te nin thungnaw kya bua yn thothui lanpaw kong kha a zuitu`ae kalan a langsapyaku vae`ae. ²² Oute Piter nynh Jesu kha ccanglang cciakhae zah, “Tuh-e tuh na kyate sawkuh sah, Bawipaw; tuh-e tuh na tungvaw cyikuh nan sah!” cite amaw kha a pe. ²³ Thuasalama Jesu nynh Piter kalan maekuh zah, “Setan, ka nuhlang thungkuh! Nang tuh kae ka hanlan yn maeleihsakuhtupaw nynh na thua; pawccecize nang tuh Pachia uccaw`ae kha na peki khyh, thuasalama ccungccaw uccaw`ae kha nynh na peki,” a cipya. ²⁴ Oute Jesu nynh a zuitu`ae kha, “Lukhakheit nynh kamaw hynh yn zui ry lanze amaw te amaw kha vuakuh sah lah a vaelantung kha puihkuh sah, te kamaw kha yn zui sah. ²⁵ Pawccecize hunghung zemah a hiinnaw kha a khumkuh ry paw tuh a hiinnaw kha a shung cih; thuasalama hunghung zemah a hiinnaw kha kae ka keiccuze a shung paw tuh a hiinnaw kha bua a muihkuh cih. ²⁶ Pawccecize ccungccaw lukheit nynh laephipi hynh khaleih mue sah lah amaw a hiinnaw-muisaw kha a shung lanze, a hanlan pawmou athane? Tukhyhze a hiinnaw-muisaw hanlan paw uccaw te mou a rulae kho cih? ²⁷ Pawccecize Ccungccaw Ccapaw tuh a Paaw phu-enaw kya a vaaw ccungccaw`ae ryte oun thua vae cih; oute ccungccaw miakaw kha a ryalawnaw thyhte ryalaw mee yn pya cih`ae. ²⁸ “Byaccaccing kae hopya oh, Ccungccaw Ccapaw nynh a peenaw kya yn thua paw kha a muih`ae cia chinaw a tytua cih lei`ae paw abang e kya a um`ae,” a cipya`ae.

¹ Te nin taruh acih koute Jesu nynh Piter, James, te a neitaw Johan kha hoei`ae zah mih makhaete ahangpaw mua muakheit kalan a cciakhae`ae. ² Te minmin malang khe Jesu tuh a muinsan rulaekuh. A mae tuh khuanin hawte phaephae ah zah a uccaw tuh awnaw hawte araw. ³ Te dotua, tuin kya mih kalan Mawsi te Elijah oun langkuh`ae zah amaw ryte byahokuh`ae. ⁴ Oute Piter nynh Jesu kha, “Bawipaw, e kya um paw tuh ah hanlan ahoy, na ry ze e kya bu ccangthung kae sak sah, na hanlan ccangkheit, Mawsi hanlan ccangkheit, te Elijah hanlan ccangkheit,” a cipya. ⁵ Tuhte a ho cciamang lyakhe, dotua, a awpaw maeking nynh minmin kha pung a khung`ae; te dotua, maeking lungkhu te roi nynh, “E paw a kya ka lungry kou thua paw ka sungsahpaw ka Ccapaw nynh thua, amaw bya kha la ngae oh!” cite maeking kyate roi yn ccae. ⁶ Te zuitu`ae nynh kha-e kha he a thae`ae tuh bakhung`ae zah myarya a rih`ae. ⁷ Te Jesu nynh yn thua zah minmin kha tung`ae zah, “Thokuh oh lah rih nan oh,” a cipya`ae. ⁸ Te minmin nynh he oun dothung`ae tuh Jesu kyalya laelan hung sanmah muih vae khyh`ae. ⁹ Te minmin mua kyate he oun rungbung`ae tuh Jesu nynh, “Ccungccaw Ccapaw tuh a chih`ae paw kyate a thothui mawlaezung na muih oh paw vizin hynh hung sanmah la hopah nan oh,” cite zuitu`ae kha kawpya`ae. ¹⁰ Te a zuitu`ae nynh, “Pawccemou kawbya ccangpatu`ae nynh Elijah tuh masaty yn thua hahe cih a ci`ae?” cite amaw kha a khia`ae. ¹¹ Te Jesu nynh minmin kha, “Elijah tuh masaty yn thua ccaccing cih zah pawpaw balyn kha bua yn nungthui cih. ¹² Thuasalama nanning kae hopya oh, Elijah tuh phe thua vae, te ccungccaw`ae nynh amaw kha nyh khyh`ae, thuasalama minmin nynh a cyi ry`ae paw miakaw kha amaw kalan phe cyi vae`ae. Tuhhawte Ccungccaw Ccapaw mah minmin kuih kyakhe yn teing bua vae cih,” a cipya`ae. ¹³ Oute zuitu`ae nynh mih kalan Baptisma pyatu Johan kong kha nynh a ho cipaw a thaethya vae`ae. ¹⁴ Te ccungccaw zapi kalan minmin he a thua`ae tuh Jesu kalan ccungccaw lukheit yn thua zah amaw malang ccukharutung zah, ¹⁵ “Bawipaw, ka ccapaw tungvaw ngaethya beih umsah, pawccecize aning tuh dungpaw ccinaw hoi zah myarya a teing; te accyh ccyh vae ze maee lungkhu lang phungkuh zah accyh ccyh vae ze tui lungkhu lang a phungkuh. ¹⁶ Te kae nynh na zuitu`ae kalan ka cciakhae zah minmin nynh dansah kho khyh`ae,” a cipya. ¹⁷ Oute Jesu nynh khung zah, “Pou zyn lei`ae te a ccouseikuh`ae paw ciihan`ae, hohse cia mou nae kya ka um ung cih? Hohse cia mou kae ngaesangpah ung cih oh? Imohpaw kha kamaw kalan hynhlang oun cciakhae oh,” a ci. ¹⁸ Te Jesu nynh raerangsaro kha pe zah aning tuh kha-e paw lungkhu te a pou; te imohpaw tuh tuh-e suimilan ccaccei kyate phe a dan. ¹⁹ Oute zuitu`ae nynh mih makhaete Jesu kalan oun cceih`ae zah, “Pawccemou kaening nynh amaw kha kae dee kho khyh?” cite a khia`ae. ²⁰ Te Jesu nynh, “Na zyn khyh keiccu oh; pawccecize nanning byaccaccing kae hopya oh, mungngia mung mungkheit cia zynnaw na hoi oh ze, e mua hynh, ‘E kyate khuhlang khuin nuekuh,’ na ci oh ze a nuekuh cih; te nae hanlan athua kho leipaw pawsang um lan khyh. ²¹ Tuhzemah e tahawpaw raerangsaro tuh loohaesungnaw te sawsangnaw leite tuh pou khyh,” a cipya`ae. ²² Te Galilee kya minmin a um`ae lyakhe Jesu nynh zuitu`ae kha, “Ccungccaw Ccapaw tuh ccungccaw`ae kuih kalan oun ah vae cih`ae, ²³ te minmin nynh oun theih cih`ae zah nin thungnaw kya yn thothui cih,” a cipya`ae. Te minmin tuh myaryasangkae mih ngaethah. ²⁴ Te minmin Kapernaum khua kya he a thua`ae tuh tempal phuakhoi drakma a khoi`ae paw nynh Piter kalan oun thua`ae zah, “Nae Ccangpatupaw hynh tempal phuakhoi pya khyh ta?” a ci`ae. ²⁵ Piter nynh, “A pya,” a ci. Te Piter inn lungkhu lang he yn tee tuh, Jesu nynh cciadue zah, “Simon, pawte na tua? Laephi siapharan`ae nynh uccaw-phuakhoi, tukhyhze ccungccaw-phuakhoi kha hung`ae kya-e mou a lawku`ae? Mimaw mih ccaaw`ae kya-e tou? Tukhyhze milae`ae kya-e tou?” cite a khia. ²⁶ Piter nynh, “Milae`ae kya-e nynh a lawku`ae,” a ci. Jesu nynh, “Tuhte lanze ccaaw`ae tuh a lue`ae. ²⁷ Tuhzemah minmin tuh aening keiccuze a cyisei khyh ccaw`ae, nang rili kalan la cceih lah ngasabaw kha la sah, te masaty yn kae paw ngasaw kha la kyng; te a khalang he na kei te phua shekel ccangkheit na la muih cih, kha-e phua kha laah lah na hanlan te ka hanlan minmin kha la pya`ae,” a cipya.

¹ Tuh-e ccyh kya zuitu`ae Jesu kalan oun thua`ae zah, “Vaawran peenaw kya hungmou alesae huacce?” cite a khia`ae. ² Te Jesu nynh imua taraw lukheit kha a kalan ko zah, minmin ngaelung khe imohpaw kha nung zah, ³ “Byaccaccing kae hopya oh, nanning nynh na rulaeku khyh oh zah imua taraw hawte na thua khyh oh ze, vaawran peenaw lungkhu lang kharyh na tee lan khyh oh. ⁴ Tukeiccu hunghung zemah e imua taraw hawte amaw te amaw kha zakawsangsaku lanze tuh-e paw tuh nynh vaawran peenaw kya alesae huaccepaw athua. ⁵ Te hunghung zemah ka min liate e tahawpaw imua taraw lukheit kha a lehkhan ze kamaw kha yn lehkhan paw nynh thua. ⁶ “Thuasalama hunghung zemah kamaw yn zyn paw e imua taraw lukhakheit kha a maeleihsakuh paw tuh a nging kyakhe mianawpaw lung ccangkheit kha sae`ae sah lah rili akhunaw kya phung lanze a hanlan ahoyhua. ⁷ Maeleihsakunaw`ae keiccuze laephi ccungccaw`ae hanlan paw ngaethya lan um babang! Pawccecize maeleihsakunaw`ae yn thua hahe cih; thuasalama maeleihsakunaw a thuasatupaw tuh paw ngaethya lan um babang! ⁸ “Tukeiccu na kuih khyhze na ccu nynh nang kha ae seisah ze thoh tya lah na kyate dae vua; ccukhoute, tukhyhze kuihccu ccing leite hiinnaw lungkhu lang tee lanpaw tuh, kuih ccangning, ccu ccangning hoibiate zungzae aruapaw maee lungkhu lang vuaku lanpaw lae na hanlan ahoyhua. ⁹ Te na mit nynh nang ae seisah ze poh khoi lah na kyate dae vua; mit ccangning hoite kehenna maee lungkhu lang vuaku lanpaw lae tuh mit ccangkheit te hiinnaw lungkhu lang tee lanpaw kha na hanlan ahoyhua. ¹⁰ “E imua taraw`ae lukheit san pawlangria leite na um khyh nawlan oh raeringkuh oh; pawccecize nanning kae hopya oh, imua`ae kya-e vaaw ccungccaw`ae nynh vaawran kya um paw ka Paaw mitmae kha pei a muih`ae. ¹¹ “Pawccecize Ccungccaw Ccapaw tuh azo`ae paw kha khum khylan nynh yn thua. ¹² Pawtemou na tua oh? Ccungccaw lukheit nynh tuu zakheit hoi zah tuhe` ae kyaze sakheit tuh laanpi phe avae sei ze, sungtakua satakua kha cciataw zah kha-e laanpi phe avae paw kha ccung khylan mua`ae kalan cceih lan khyh tou? ¹³ Te kha-e tuu kha he a muih lan thua ze, byaccaccing kae hopya oh, laanpi vae lei`ae paw sungtakua satakua tungvaw laeze kha-e kya a lungtuahua. ¹⁴ Tuh-e hawte hynh-e imua taraw`ae kyaze lukheit sanmah aro lanpaw tuh vaawran kya um paw nae Paaw rynaw thua khyh. ¹⁵ “Tuhlaeze na uno nynh na tungvaw a cyisei ze cceih lah namaw te amaw makhae kya a cyiseinaw kha hopah; aning nynh nang kha ae ngaepya ze na uno kha phe na mue. ¹⁶ Thuasalama aning nynh ae ngaepya khyh ze, luning khyhze luthung ccaekia`ae khalang kya-e bya miakaw tuh atyn nawlan namaw ryte lukheit khyhze luning la hoeikuh`ae. ¹⁷ Te aning nynh minmin bya kha a ngae khyh lanze kriccawbu kalan hopah; thuasalama aning nynh kriccawbu bya kha bua a ngae vae khyh lanze amaw kha lawkipaw te nguntokhoipaw hawte la tua ccavae. ¹⁸ “Byaccaccing kae hopya oh, pawpaw zemah laephi vawlan na hee oh paw tuh vaawran kya hee athua cih, te pawpaw zemah laephi vawlan na supya oh paw tuh vaawran kya supya athua cih. ¹⁹ “Nanning bua kae hopya oh, nanning kyaze ccungccaw luning nynh lunglokute laephi vawlan uccaw ccangkhakheit kha oun ngiaku`ae ze kha-e kha minmin hanlan vaawran um paw ka Paaw nynh a cyipah cih`ae. ²⁰ Pawccecize luning khyh ze luthung nynh ka min liate pynkheihlan a sueluakunaw`ae kya, tuin kya minmin ngaelaku khe kae ka um,” a cipya`ae. ²¹ Oute amaw kalan Piter yn thua zah, “Bawipaw, ka uno nynh ka tungvaw vae hozeihmou sei ngaw zah amaw kha ka ngaethya cih? Vaesari cia tou?” cite a khia. ²² Jesu nynh, “Nang kha vaesari cia kae cipah khyh; thuasalama sungsari leih sari cia, kae cipya. ²³ Tukeiccu vaawran peenaw tuh a see`ae lae ccazing law a ry paw siapharanpaw lukheit te nynh aloku. ²⁴ Te ccazing he a laah tuh talent thung haw laeba um paw lukheit kha amaw kalan oun thuakhae`ae. ²⁵ Thuasalama pya lanpaw a hoi khyh keiccu a bawipaw nynh amaw ry, a zu te a ccaaw`ae ry, te a hoi paw balyn kha zua sah lah lae kha sang sah cite kaw a pya. ²⁶ “Tukeiccu kha-e see nynh bakhungte amaw kha beik zah, ‘Bawipaw, beih yn ngaethya hin lah marya kae pyaru cih,’ a ci. ²⁷ Oute tuh-e see a bawipaw nynh ngaethya-umsanaw hoi zah kha-e paw a laeba kha ngaethya zah phe a luesah. ²⁸ “Thuasalama tuh-e see tuh po pou zah amaw kya denari phua zakheit laeba um paw ryalahkheih`ae paw see lukheitpaw kha a muih; te kha-e paw kha kyng zah a lotharue meih zah, ‘Laeba nae um paw kha yn pya ccavae,’ a cipya. ²⁹ “Te a banpaw kha-e seepaw nynh a ccu leihpaw bakhung zah amaw kha, ‘Yn ngaethya hin lah marya kae sangru cih,’ cite a ngiaku. ³⁰ Te aning nynh ngaethya ry khyh, thuasalama cceih zah lae a sang makhia thunginn lungkhu a saw. ³¹ Tukeiccu amaw a ban`ae see`ae nynh a cyipaw kha he a muih`ae tuh myarya mih ngaethah, te cceih`ae zah acyikuh paw balyn kha mih bawipaw kalan pung a hopya`ae. ³² “Oute a bawipaw nynh kha-e see kha a ko koute amaw kha, ‘Pou see hoy leipaw, beih yn ngaethya lah cite nae ngiaku keiccuze na laeba balyn marya kae ngaethya. ³³ Kae nynh na tungvaw ngaethya kae umsah hawte na banpaw see tungvaw ngaethya na umsah lan ccan khyh ta?’ a cipya. ³⁴ Te a bawipaw tuh a thinria zah kha-e paw nynh a pya lanpaw balyn a pya makhia aning kha vawsaw pyatu`ae kalan a ah. ³⁵ “Tukeiccu tuhhawte vaawran um paw ka Paaw nynh mah nanning nae uno`ae mih cyiseinaw`ae kha nae thinlung kyate na ngaethya khyh oh ze nae tungvaw tuhhawte a cyih bua cih,” a cipya`ae.

¹ Ou tuhcihte Jesu nynh tuh-e a ccangpya`ae paw kha he a thangsah tuh Galilee kyate pou zah Judea pee Jordan vaw khuraw langkhe a thua. ² Te ccungccaw zapi pi nynh amaw kha a zui`ae, te tuin kya minmin kha a dansah`ae. ³ Farasi`ae mah amaw kalan oun thua`ae zah amaw kha syntaw khylan, “Ccangkhakheit konglang keiccuze pisepaw nynh a zu kha mya lan kawbya nynh ua tou?” cite a khia`ae. ⁴ Te Jesu nynh khung`ae zah, “Atakaw lya a raetu nynh minmin kha pise te nopi nynh a rae cipaw, ⁵ te, ‘Hynh-e keiccu pise nynh a paaw te a nung kha a cciataw cih zah a zu kalan a bekuh cih, te minmin luning tuh ngesaw pynkheit athua vae cih`ae,’ acikuh paw kha na ria boi khyh oh tou? ⁶ Tukeiccu minmin tuh luning thua vae khyh`ae, thuasalama pyn kheit nynh thua vae`ae. Tukeiccu Pachia nynh pynkheihlan a suelua vae paw kha ccungccaw nynh phia nan sah,” a ci. ⁷ Minmin nynh, “Tuhte lanze pawccemou Mawsi nynh zu te vaw myakunawpaw ccaw kha pya lan zah a zu kha mya lan kaw a pya?” cite a khung`ae. ⁸ Jesu nynh, “Nae thinlung akhung keiccu nynh Mawsi nynh nae zu`ae kha mya lan ae ua oh; thuasalama atakaw lya tuhte thua khyh. ⁹ Te nanning kae hopya oh, hunghung zemah ohhuakunaw keiccu thua leite a zu kha maah zah ccangpaw zu a hoi paw tuh milae zu a seikhaepaw nynh thua; te hunghung zemah a mya`ae paw nopi kha a zu lang a hoeikuh paw tuh milae zu a seikhaepaw nynh thua,” a cipya`ae. ¹⁰ A zuitu`ae nynh amaw kha, “Zu kong pise hanlan tuhte athua lanze zuhoi leipaw tuh san ahoyhua,” a cipya`ae. ¹¹ Thuasalama Jesu nynh, “Hynh-e bya hynh ccungccaw balyn nynh lawkuh kho khyh, mih hanlan pya athua`ae paw rou nynh a lawkuh kho`ae. ¹² Pawccecize abang tuh mih nung vue kya mawte tingreihkuh`ae paw a um`ae; te abang tuh ccungccaw`ae nynh tingria`ae paw tingreihkuh`ae paw a um`ae; te vaawran peenaw keiccuze mimaw te mimaw kha tingreihkuh`ae paw a um`ae. E bya hynh a lawkuh khopaw ccungccaw nynh lawkuh sah,” cite a hopya`ae. ¹³ Oute mih tungvaw Jesu nynh a kuih a khang ccaw cite, te sawsangpya ccaw`ae cite imua taraw`ae kha amaw kalan oun cciakhae`ae; thuasalama zuitu`ae nynh minmin kha a pe`ae. ¹⁴ Thuasalama Jesu nynh, “Imua taraw`ae kha ka kalan oun cceih`ae sah, kang nan oh; pawccecize vaawran peenaw tuh khatahaw`ae paw elan nynh thua,” a ci. ¹⁵ Te imua`ae tungvaw a kuih kha a khang, te tuin kyate a pou. ¹⁶ Te dotua, ccungccaw lukheit amaw kalan yn thua zah, “Ccangpatu hoypaw, zungzae hiinnaw ka hoi nawlan paw uccaw hoypaw mou ka cyih cih?” cite a khia. ¹⁷ Te Jesu nynh, “Pawccemou kamaw hynh ahoypaw cite nae ko? Pachia lukheit laelan ahoypaw hung sanmah um khyh; thuasalama hiinnaw lungkhu lang na tee ry lanze kawpyapaw`ae kha la zui,” a cipya. ¹⁸ Aning nynh, “Paw kha mou?” cite amaw kha a khia. Jesu nynh, “ ‘Ccungccaw na theih lan khyh,’ ‘Milae zu na seikhae lan khyh,’ ‘Na ruh lan khyh,’ ‘Ahme leipaw ccaekia lang tang nan,’ ¹⁹ ‘Na paaw te na nung kha sawtua,’ te, ‘Na innpaw kha namaw na sungsaku hawte na sungsah cih,’ cikuh paw kha,” a cipya. ²⁰ Ccangvaepaw nynh, “Tuhe` ae balyn tuh ka ngawphue lya mawte phe ka zui vae; pawmou ka bou ung?” a cipya. ²¹ Jesu nynh, “Nang nynh accingpaw na thua ry lanze, cceih lah na hoi paw kha la zua, te ryachi`ae kha la pya`ae, te vaawran kya sisua na hoi cih, oute rang lah kamaw hynh yn zui,” a cipya. ²² Thuasalama ccangvaepaw nynh tuh-e bya kha he a thae tuh ngaethyate phe a cceih, pawccecize aning tuh uccaw`ae patae a hoi keiccu nynh thua. ²³ Oute Jesu nynh a zuitu`ae kha, “Byaccaccing kae hopya oh, mihoipaw hanlan vaawran peenaw lungkhu lang tee lanpaw tuh kou aru. ²⁴ Te bua kae hopya oh, mihoipaw hanlan Pachia peenaw lungkhu lang tee lanpaw lae tuh kalauk nynh phynbang khu kya tee lan azoihua,” a cipya`ae. ²⁵ A zuitu`ae nynh kha-e bya kha he a thae`ae tuh myaryasangkae mih ngaeangthua zah, “Tuhte lanze hungmou khumnaw tuh a mue kho cih?” a ci`ae. ²⁶ Thuasalama Jesu nynh minmin kha do`ae zah, “Ccungccaw lante hynh-e tuh thua kho khyh, thuasalama Pachia lante pawpaw balyn tuh athua kho,” a ci. ²⁷ Oute Piter nynh khung zah, “Dotua, kaening tuh pawpaw balyn marya kae vuasya zah namaw kha kae zui, tukeiccu pawmou kae mue cih?” a ci. ²⁸ Te Jesu nynh, “Byaccaccing kae hopya oh, tynre balyn bua raethuinaw ccyh kya Ccungccaw Ccapaw nynh a phu-enaw suitungkhung kya he yn dahungte kamaw nae zui oh paw nanning mah suitungkhung haw laening vawlan nae dahungbua cih oh zah Israel phin haw laening kha bya nae pia cih oh. ²⁹ Te kamaw min keiccuze inn`ae, tukhyhze uno`ae, tukhyhze ccia`ae, tukhyhze paaw, tukhyhze nung, tukhyhze zu, tukhyhze ccaaw`ae, tukhyhze lorang kha a cciataw paw ccungccaw miakaw tuh leih zakheit a mueru cih zah zungzae hiinnaw rhoccou cih. ³⁰ Thuasalama masaty e ccungccaw patae tuh nyathyakou thua cih`ae zah nyathyakou e patae tuh masaty thua cih`ae.

¹ “Pawccecize vaawran peenaw tuh a misu khokhu lungkhu lang ryalahtu`ae hoh lan cite awkhua takawte a cceih paw khokhu hoitupaw te nynh aloku. ² Te aning nynh nin kheit ze denari kia kheit pya lante ryalahtu`ae ryte nawccawnaw kha rae zah minmin kha a misu khokhu lungkhu lang a saw`ae. ³ “Te suimilan ccangthungnaw loukaw khe bua pou zah kungkunaw kya pawsang cyi leite a thadyn`ae paw mingccang`ae kha a muih. ⁴ Te minmin kha, ‘Nanning mah misu khokhu lungkhu lang la cceihbua oh lah accan thyhte kae pya cih oh,’ a cipya`ae. Te minmin mah a cceihbua`ae. ⁵ Suimilan ccangtaruhnaw te ccangtakuanaw loukaw khe bua cceih zah tuhhawte bua a cyi. ⁶ Te suimilan haw laekheitnaw loukaw khe bua cceih zah mingccang`ae pawsang cyi leite a thadyn`ae paw kha muih zah, ‘Nanning pawccemou e kya pawsang cyi leite nin balyn na thadyn oh?’ cite a khia`ae. ⁷ “Minmin nynh, ‘Hung ccungccaw nynh san oun hohku khyh`ae keiccu,’ a ci`ae. Aning nynh minmin kha, ‘Nanning mah misu khokhu lungkhu lang la cceih oh lah accan thyhte na mue cih oh,’ a cipya`ae. ⁸ “Te zete he yn thua tuh misu khokhu hoitupaw nynh a ryaccinkhanpaw kalan khe, ‘Ryalahtu`ae kha ko`ae lah nyathyakou a tee paw kyate tho lah masaty a tee paw kyacia mih ryalaw mee kha pya`ae,’ a cipya. ⁹ “Te suimilan haw laekheitnaw loukaw kya ryalaw a tee`ae paw tuh oun thua`ae zah ccungccaw miakaw nynh denari kia kheit cci a mue`ae. ¹⁰ Thuasalama masaty ryalaw a tee`ae paw he oun thua`ae tuh mimaw tuh alunghua kae mue cih cite a tuaku`ae; te minmin mah tuh-e hawte luraveih nynh denari kia kheit cci a mue`ae. ¹¹ Te khate he a mue`ae tuh minmin nynh khokhu hoitupaw kha ccohnuakuh`ae zah, ¹² ‘E`ae nyathyakou oun tee`ae paw tuh suimilan ccangkheit kyalya nynh ryalaw`ae, te minmin kha khuanin so teing`ae zah phupaw a phu`ae paw kaening ryte phe na nginsaku bua`ae,’ a cipya`ae. ¹³ “Thuasalama aning nynh minmin kyaze lukheitpaw kha, ‘Ka ban, na kya ka cyihsei khyh, denari kia kheit te ryalaw lan na naw phe ccah khyh tou? ¹⁴ Na ccan paw hynh lawkuh lah la cceih ccavae; hynh-e nyathyakou e paw hynh nang te phe anginkuh lan ka pya ry. ¹⁵ Kamaw uccaw tungvaw ka cyi ry paw cyi lan ka hanlan ccan khyh tou? Kae nynh ka hoy keiccuze nang tuh na eiung tou?’ a cipya. ¹⁶ “Tukeiccu nyathyakou e`ae tuh masaty thua cih`ae zah masaty e`ae tuh nyathyakou thua cih`ae; pawccecize ccungccaw patae tuh ko athua`ae, thuasalama ccapyh nynh po athua`ae,” a ci. ¹⁷ Te Jesu tuh Jerusalem lang a cciathung lya laanpi kya zuitu`ae luhaw laening kha mih makhaete cciakhae`ae zah minmin kha, ¹⁸ “Dotua oh, aening tuh Jerusalem lang ah cceihthung oh, te Ccungccaw Ccapaw tuh alepaw ranpibawi`ae te kawbya ccangpatu`ae kalan oun ah cih`ae zah minmin nynh amaw kha chia lan sei oun be cih`ae. ¹⁹ Te amaw kha sarya khylan, bua khylan, te khiade khylan Zenta`ae kalan oun ah cih`ae; te nin thungnaw kya bua yn thothui cih,” a cipya`ae. ²⁰ Oute Zebedi ccaaw`ae mih nung tuh a ccaaw`ae ryte Jesu kalan oun thua`ae, amaw kha beik zah a kya-e uccaw ccangkheit a ngiaku. ²¹ Te Jesu nynh, “Pawmou na ry?” cite a khia. Nopinung nynh, “Hynh-e ka ccaaw`ae luning nynh na peenaw kya lukheit na ranglang, te lukheit na voilang a dahungbua nawlan`ae oun pyabua,” a cipya. ²² Thuasalama Jesu nynh, “Nanning nynh paw nynh kae ngia cipaw na nyh khyh oh. Nanning nynh ka neih vae cih paw banang kha na neihbua kho cih oh tou? Te kae nynh baptisma ka in lanpaw kha na in bua kho cih oh tou?” cite a khia`ae. Minmin nynh, “Kae cyih kho cih,” a ci`ae. ²³ Te Jesu nynh minmin kha, “Nanning nynh ka banang kha na neih ccaccing cih oh zah baptisma ka in lanpaw kya na in bua cih oh; thuasalama ka ranglang te ka voilang dahung lan pya lanpaw tuh ka kya-e thua khyh, thuasalama ka Paaw nynh mih hanlan a paccynpya`ae paw rou nynh pya athua cih`ae,” a cipya`ae. ²⁴ Te zuitu luhaw nynh kha-e kha he a thae`ae tuh uno luning tungvaw myarya mih thinria. ²⁵ Thuasalama Jesu nynh minmin kha ko`ae zah, “Zenta`ae uktu`ae nynh tuh uknaw kaw khate a uk`ae, te a lesae`ae paw nynh kawhoinaw kha a mang`ae cipaw na ny oh. ²⁶ Tuhzemah nanning laku tuhte thua lan khyh, thuasalama nanning laku alesaepaw lang a tang ry paw tuh nae rya ae lawpatu oh paw lang tangsah. ²⁷ Te nanning laku hunghung zemah lupihua lang a tang ry paw tuh nae seepaw lang tangsah. ²⁸ Tuhhawte Ccungccaw Ccapaw nynh mah rya lawsaku khylan yn thua khyh, thuasalama ming`ae ryalawpya khylan, te ccungccaw patae sawkhawnaw hanlan a hiinnaw kha pyaku khylan nynh yn thua,” cite a hopya`ae. ²⁹ Te Jeriko kyate minmin he a pou`ae tuh ccungccaw zapi nynh amaw kha a zui`ae. ³⁰ Te dotua, laanpi zung a dahung`ae paw mitmoh`ae luning nynh Jesu po a cceih cipaw he a thae`ae tuh, “Pou Bawipaw, David Ccapaw, kaening hynh thaw beih oun ccih!” cite a sia`ae. ³¹ Te ccungccaw zapi nynh minmin kha daetedae lang a um ccaw`ae cite a sianua`ae; thuasalama minmin nynh, “Pou Bawipaw, David Ccapaw, kaening hynh thaw beih oun ccih!” cite houh a sia`ae. ³² Te Jesu tuh a thadyn, te minmin kha ko`ae zah, “Nae hanlan pawmou nae cyisah ry oh?” cite a khia`ae. ³³ Minmin nynh, “Bawipaw, kae mit ngawmuih lanpaw nynh kae ry,” a ci`ae. ³⁴ Tukeiccu Jesu nynh ngaethyaumsah` ae zah mih mit kha a hae, te vaekheihmawte mih mit tuh ngawmuih zah minmin nynh amaw kha a zui vae`ae.

¹ Te Jesu te a zuitu`ae nynh Jerusalem lang naekuh`ae zah Oliv Mua leihpaw Bethfake khua he a thua`ae tuh Jesu nynh zuitu luning kha saw`ae zah, ² “Nanning nae malang um paw khua kalan la cceih oh lah lann a khii`ae paw te lann taraw kha ccaheih na la muih cih oh; khae` ae kha oun supah oh lah kamaw kalan oun sue oh. ³ Te lukhakheit nynh ae khia oh ze, nanning nynh, ‘Bawipaw nynh a peki,’ nae cipah cih oh; te kha-e paw nynh palou ae sawpah cih oh,” a cipya`ae. ⁴ Profeh nynh a hosyapaw accing nawlan nynh hynh-e`ae balyn tuh marya acyikuh; a hosyapaw tuh: ⁵ “ ‘Dotua, na Siapharan tuh anopaw lann taraw kha yn ccikuh zah lungnenaw te na kalan yn cceih cciamang,’ cite Zion ccanung kha hopah oh,” acikuh. ⁶ Tukeiccu zuitu`ae tuh cceih`ae zah Jesu nynh kawpya`ae hawte a cyi`ae. ⁷ Te lann pinung te lann taraw kha oun thuakhae`ae zah lann`ae tungvaw khe mih uccaw`ae kha de`ae zah kha-e`ae vawlan Jesu kha a ccisaku`ae. ⁸ Te ccungccaw zapi pi nynh mih uccaw`ae kha laanpi kya a phaepya`ae; mingccang`ae nynh thingku kya-e thingran`ae kha loi`ae zah laanpi kya a phaepya`ae. ⁹ Oute malang cceih`ae paw te nuhlang te a zuikuh`ae paw ccungccaw zapi nynh, “David Ccapaw, Hosanna! BAWIPAW min te yn thua paw tuh hythuaccou sah! Ahang huanaw kya Hosanna thua sah!” cite a sia`ae. ¹⁰ Te Jesu Jerusalem lungkhu lang he a thua tuh, khualae balyn tuh ngaluin-ngaluin ccae`ae zah, “E paw tuh hungmou?” a ci`ae. ¹¹ Te ccungccaw zapi nynh, “E paw tuh Galilee pee e Nazareth paw profeh Jesu nynh thua,” a ci`ae. ¹² Te Jesu tuh Pachia tempal voidu lungkhu lang cceih zah tempal voidu kya a zua`ae paw te a re`ae paw balyn kha a dee`ae, te phuaru`ae paw mih ccaboi te vafu zua`ae paw tungkhung kha dae dawleihpah`ae zah, ¹³ minmin kha, “ ‘Ka inn tuh sawsangnaw inn ci athua cih,’ cite azeikuh. Thuasalama nanning nynh ‘miruh`ae karung’ lang phe na rae oh,” a cipya`ae. ¹⁴ Te mitmohpaw te ccukhoupaw amaw kalan tempal kya oun thua`ae zah minmin kha a dansah`ae. ¹⁵ Te Jesu nynh a cyipaw ngaeang lan um paw uccaw`ae te imua`ae nynh tempal kya, “David Ccapaw kya Hosanna thua sah!” cite a sia`ae paw kha, alepaw ranpibawi`ae te kawbya ccangpatu`ae nynh he muih`ae tuh mih thin phe khykuh zah, ¹⁶ amaw kha, “E imua`ae nynh a ho`ae paw tuh na thae tou?” a ci`ae. Te Jesu nynh, “Ou ka thae. ‘Imua`ae te mateizu`ae paw nosi`ae khalang lungkhu te phe accingpaw thehoysanaw kha na hoi,’ acikuh paw kha na ria boi khyh oh tou?” cite a khung`ae. ¹⁷ Te minmin kha cciataw`ae zah khualae te pou zah Bethani khua lang a cceih; te tuin kya a rya. ¹⁸ Awkhua khe khualae lang he a ki tuh a vuelaw vae. ¹⁹ Te laanpi pe thaeku ku kha he a muih tuh a ccianua, thuasalama kha-e kya a naw`ae kyalya laelan pawsang muih khyh; te kha-e kha, “Atu te zungzae cia na kya athae la thae nan vae sah,” a cipya. Te vaekheihmawte thaeku ku tuh karae arou. ²⁰ Te kha-e kha zuitu`ae nynh he a muih`ae tuh mih ngaeangthua zah, “Pawtepei thaeku ku karae arou kanmaw?” a ci`ae. ²¹ Jesu nynh minmin kha, “Byaccaccing kae hopya oh, lunghiinnaw hoi leite zynnaw na hoi oh ze, thaeku ku kya acyikuh paw kyalya thua leite, hynh-e mua hynh, ‘Nang nuekuh lah rili lungkhu lang phungkuh,’ na ci oh zemah ou tuhte acyikuh cih. ²² Te zynte, pawpaw balyn sawsangnaw te na ngia oh paw tuh na mue cih oh,” a cipya`ae. ²³ Te Jesu tempal lungkhu lang thua zah a ccangpya`ae lyakhe, alepaw ranpibawi`ae te ccungccaw piccang`ae nynh amaw kalan oun thua`ae zah, “Paw kawhoinaw te mou hynh-e uccaw`ae hynh na cyi? Te hung nynh mou e kawhoinaw hynh nang ae pya?” cite a khia`ae. ²⁴ Te Jesu nynh khung`ae zah, “Kae mah bya ccangkheit kae khia cih oh, tuh-e tuh nae hopya oh ze, kae mah e uccaw`ae hynh paw kawhoinaw te nynh ka cyi cipaw kae hopah ru cih oh: ²⁵ Johan kya-e baptisma hynh paw kyate mou yn thua? Vaawran kyate tou? Tukhyhze ccungccaw`ae kyate tou?” cite a khia`ae. Te minmin nynh mimaw te mimaw hokuh`ae zah, “ ‘Vaawran kyate,’ ah ci oh ze, aning nynh, ‘Tuhte lanze pawccemou amaw kha na zyn khyh oh,’ oun ci cih. ²⁶ Thuasalama, ‘Ccungccaw`ae kyate,’ ah ci oh ze, ccungccaw`ae rawri lan a um; pawccecize ccungccaw balyn nynh Johan tuh profeh lukheit hawte a tua`ae paw nynh thua,” a ciku`ae. ²⁷ Te minmin nynh Jesu kha, “Kae nyh khyh,” cite a khung`ae. Te aning nynh, “Kae mah paw kawhoinaw te nynh e uccaw`ae hynh ka cyi cipaw kae hopah lan khyh oh. ²⁸ “Thuasalama nanning pawte na tua oh? Ccungccapaw lukheit nynh ccaaw pise luning a hoi; aning nynh masaty e paw kalan cceih zah, ‘Ka ccapaw, atunin ka misu khokhu kya ryalaw lan va cceih vae lou,’ a cipya. ²⁹ “A ccapaw nynh, ‘Ka cceih lan khyh,’ a ci; thuasalama khuekheih acihte ngaesikuh zah phe a cceih. ³⁰ “Te luningnaw e paw kalan cceih zah, tuhhawte bua a hopya. Te aning nynh, ‘Ka la cceih vae sah, bawihaepaw,’ cipah zah cceih khyh. ³¹ “Tuh-e luning`ae lakuze hung tuh mou a paaw rynaw a cyipah?” cite a khia`ae. Minmin nynh, “Masaty e paw,” a ci`ae. Jesu nynh minmin kha, “Byaccaccing kae hopya oh, nguntokhoi`ae paw te ohhuanung`ae nynh nae malang khe Pachia peenaw lungkhu lang a tee`ae. ³² Pawccecize Johan tuh dingnaw laanpi kya zuite nanning kalan yn thua zah nanning nynh amaw kha na zyn khyh oh; thuasalama nguntokhoi`ae paw te ohhuanung`ae nynh amaw kha a zyn`ae; te nanning nynh kha-e kha na muih oh koute amaw kha na zyn nawlan oh na ngaesikuh khyh oh. ³³ “Ccangpaw tousenaw phungpaw hynh ngaetua oh: Inn hoitu lukheit nynh misu khokhu kha rae zah hohung po a koihlu, te misutui sunawkhu kha karyn zah buhang ccangkheit a sak, te khokhu kha misu ryalahtu`ae hohsakuh`ae zah asawnaw ram lang phe a cceih. ³⁴ Te misu thae lo ccyh he a thua tuh misu thae`ae kha mue khylan misu ryalahtu`ae kalan khe a ryalahtu`ae kha a saw`ae. ³⁵ “Te misu ryalahtu`ae nynh a ryalahtu`ae kha kyng`ae zah lukheitpaw kha a bua`ae, te lukheit kha a chia`ae, te lukheit kha lung te a deih`ae. ³⁶ Aning nynh masaty-e lae alungpaw ccangpaw a ryalahtu`ae kha bua a saw`ae; te minmin nynh khae` ae kha tuhhawte bua a cyi`ae. ³⁷ Thuasalama nyathyakou tuh, ‘Minmin nynh ka ccapaw tuh sawtua cih`ae,’ ci zah minmin kalan a ccapaw kha a saw. ³⁸ “Thuasalama misu ryalahtu`ae nynh a ccapaw kha he a muih`ae tuh, ‘E paw tuh rhoccoutu nynh thua, rang oh, amaw hynh theih oh sih lah a rho uccaw hynh lua oh sih,’ cite mimaw te mimaw laku a hokuh`ae. ³⁹ Te kha-e paw kha kyng`ae zah misu khokhu lungkhu te atolang dae vua`ae zah phe a chia`ae. ⁴⁰ “Tukeiccu misu khokhu hoitu he yn thua vae ze kha-e misu ryalahtu`ae kha pawtemou a cyih cih`ae?” cite a khia`ae. ⁴¹ Minmin nynh, “Kha-e athaharuhpaw ccungccaw`ae kha phe ccihtheih lante a roh cih`ae zah a misu khokhu kha athae ccyh kya athae a pya cih`ae paw ccangpaw misu ccoutu`ae kalan nynh a hohsakuh vae cih,” a ci`ae. ⁴² Jesu nynh minmin kha, “ ‘Lung-inn saktu`ae nynh a nue`ae paw lung tuh inn saknaw kya aki lang-e abapi huapaw lung lang yn tang, hynh-e tuh BAWIPAW nynh a cyi paw nynh thua, te aening muihnaw kya e tuh ngaeang lan um paw nynh thua,’ acikuh paw kha Ccathyaa kya na ria boi khyh oh tou? ⁴³ “Tukeiccu nanning kae hopya oh, Pachia peenaw tuh nanning kyate lawpya athua cih zah kha-e peenaw athae thae paw minphuin kalan khe pya athua cih. ⁴⁴ Te hunghung zemah hynh-e lung vawlan a ccah paw tuh phe akinkuh cih; thuasalama hunghung zemah e lung nynh a ccawthin paw tuh palae tui lang a mia cih,” a cipya`ae. ⁴⁵ Te alepaw ranpibawi`ae te Farasi`ae nynh tuh-e tousenaw phungpaw`ae kha he a thae`ae tuh minmin kong nynh oun honua cipaw a nyku`ae. ⁴⁶ Te minmin nynh amaw kha kyng lan cite he a ccung`ae tuh ccungccaw zapi raw kha a rih`ae; pawccemacize ccungccaw`ae nynh amaw tuh profeh cite a tua`ae paw nynh thua.

¹ Te Jesu nynh ccungccaw`ae kha tousenaw phungpaw`ae te bua a hopya`ae. A hopaw tuh: ² “Vaawran peenaw tuh a ccapaw hanlan zudy poi a tua paw siapharanpaw te nynh aloku. ³ Te zudy poi kalan thuabua lan a ko`ae paw kha kosah lan`ae a see`ae kha a saw`ae; thuasalama minmin tuh oun thua ry khyh`ae. ⁴ “Ccangpaw a see`ae kha bua saw`ae zah, ‘Ko athua vae`ae paw kha hynhte la hopah oh, “Dotua oh, ka loohdangkunaw tuh phe ka paccyn kou vae, ka tangnuapaw`ae te athopaw saring`ae kha phe ka chia vae, te pawpaw balyn tuh paccyn athua vae, zudy poi loohdangkunaw kalan rang ccavae oh,” ’ cite a hosapya`ae. ⁵ “Thuasalama minmin nynh kha-e kha pawlangria khyh`ae zah mih rynaw lang phe cceih`ae, lukheitpaw nynh a lei kalan cceih zah ccangpaw nynh a kungkunaw lang phe a cceih. ⁶ Te tuhlae`ae nynh kha-e see`ae kha kyng`ae zah sarisarya zuenah`ae zah phe a chia`ae. ⁷ Thuasalama siapharan nynh kha-e kong kha he a thae tuh myarya a thinria zah a rhawkaw`ae kha saw`ae zah kha-e ccungccatheih`ae kha phe a chiasah`ae, te mih khuapi kha maee te phe a rua`ae. ⁸ “Oute a see`ae kha, ‘Zudy poi tuh paccyn phe athua vae, thuasalama ko`ae paw tuh ngaekuh vae khyh`ae. ⁹ Tukeiccu nanning nynh laanpi lepaw`ae tungkunaw kalan la cceih oh lah na muih oh paw ccungccaw miakaw kha zudy poi kalan oun ko oh,’ cite a hopya`ae. ¹⁰ Tukeiccu tuh-e see`ae tuh laanpi lepaw`ae tungkunaw lang cceih`ae zah ahoypaw te ahoy leipaw ccungccaw`ae paryhte a muih`ae paw balyn kha pynkheihlan pung a suelua`ae; te zudy poi tuh mikhia`ae ryte phe abeih vae. ¹¹ “Te siapharanpaw nynh mikhia`ae do lan he yn tee tuh zudy poi uccaw a lawkuh leipaw ccungccaw lukheit kha a muih. ¹² Te kha-e paw kha, ‘Ka ban, pawtemou zudy poi uccaw lawku leite hynhlang nae ccia?’ a cipya. Te aning tuh yccae vae khyh. ¹³ “Oute siapharanpaw nynh a see`ae kha, ‘A kuih te a ccu kha hee oh lah cciakhae oh, te rawkhuinaw te hawzynaw a umnaw atolang mohnaw lungkhu langkhe dae vua oh,’ a cipya`ae. ¹⁴ “Pawccecize ko paw tuh alung, thuasalama popaw tuh azya,” a ci. ¹⁵ Oute Farasi`ae tuh cceih`ae zah Jesu nynh a hopaw kya pawtemou kaangsyakhaw lan cipaw khuakhankuh`ae. ¹⁶ Te minmin nynh Herod ccungccaw`ae ryte mimaw zuitu`ae kha Jesu kalan saw`ae zah, “Ccangpatupaw, nang tuh ahmepaw na thua zah Pachia laanpi kha hmerarihlan na ccangpya, te hung ccungccaw mah pawlang na ria khyh; pawccecize nang tuh ccungccaw`ae mae na do khyh cipaw kae ny. ¹⁷ Tukeiccu kaening oun hopya tua, pawtemou na tua? Sizar kalan ngunto pya lan accan tou, ccan khyh tou?” cite a khiasah`ae. ¹⁸ Thuasalama Jesu nynh mih thyaruhnaw kha phe nyh zah, “Cyihruh`ae, pawccemou kamaw hynh nae syntaw oh? ¹⁹ Phuakhoi phua kha yn dosah tua oh,” a ci. Te minmin nynh denari kia kheit kha oun ccyngpya`ae. ²⁰ Te Jesu nynh minmin kha, “Hynh-e hynh hung muinsan te hung ccawzeipyapaw mou?” cite a khia`ae. ²¹ Minmin nynh, “Sizar muinsan te a ccawzeikuh paw,” a ci`ae. Oute Jesu nynh, “Tukeiccu Sizar uccaw`ae kha Sizar kalan pya oh lah Pachia uccaw`ae kha Pachia kalan pya oh,” cite minmin kha a khung`ae. ²² Minmin nynh he a thae`ae tuh mih ngaeangthua; te amaw kha cciataw`ae zah phe a cceih`ae. ²³ Tuh-e nin kya thothuinaw um khyh a cih`ae paw Sadusi`ae tuh Jesu kalan oun thua`ae zah hynhte a khia`ae: ²⁴ “Ccangpatupaw, ‘Ccungccaw lukheit nynh ccaaw hoi leite a chi ze a zu kha a neitapaw nynh a umkhae cih, te a upaw hanlan ciihan a pousah ccaw,’ cite Mawsi nynh a hosya. ²⁵ Atu kaening laku kya uno lusari a umbua`ae; atawccapaw nynh zuhoi zah ccaaw hoi leite phe a chih, a zu kha a neitapaw a cciatawpyasya. ²⁶ Tuhhawte luningnaw nynh bua a hoi, te luthungnaw kyate lusarinaw kalan phe thua. ²⁷ Te tuh-e`ae balyn koute tuh-e nopinung mah phe a chih. ²⁸ Tukeiccu thothuinaw kya tuh-e nung tuh lusari`ae kyaze hung zu lang mou a tang cih? Pawccecize minmin balyn nynh phe a umkhae`ae,” a ci`ae. ²⁹ Jesu nynh minmin kha, “Nanning phe na me oh, Ccathyaa na nyh khyh oh, Pachia thungnaw mah na nyh khyh oh. ³⁰ Pawccecize thothuinaw kya tuh zuhoi vae khyh`ae, zudypyaku mah um vae khyh, thuasalama minmin tuh vaawran kya um paw Pachia vaaw ccungccaw`ae hawte nynh athua vae`ae. ³¹ Thuasalama a chih`ae paw thothuinaw konglang te Pachia nynh nanning kalan a hosyapaw kha na ria boi khyh oh tou? A hopaw tuh: ³² ‘Kae tuh Abraham Pachia, Isaak Pachia, te Jakob Pachia nynh ka thua,’ a ci. Pachia tuh a chih`ae paw Pachia thua khyh, thuasalama a hiin`ae paw Pachia nynh thua,” cite a hopya`ae. ³³ Te ccungccaw zapi nynh tuh-e bya he a thae`ae tuh a ccangpyanaw kya mih ngaeangthua. ³⁴ Thuasalama Sadusi`ae kha Jesu nynh zya a daesah`ae cipaw kha Farasi`ae nynh he a thae`ae tuh pynkheihlan a sueluakuh`ae. ³⁵ Te minmin kyaze kawbyathyapaw lukheit nynh Jesu kha syntaw khylan bya a khia. A khia paw tuh: ³⁶ “Ccangpatupaw, kawbya kya tei-e hynh mou abapi huapaw kawpyapaw athua?” a ci. ³⁷ Jesu nynh, “ ‘BAWIPAW na Pachia kha na thinlung balynte, na hiinnaw-muisaw balynte, te na tuanaw balynte na sungsah cih,’ acikuh. ³⁸ Hynh-e tuh masaty te ale huapaw kawpyapaw nynh thua. ³⁹ Te ccangningnaw tuh kha-e te alokuh. ‘Na innpaw kha namaw toulou hawte na sungsah cih,’ acikuh. ⁴⁰ Kawbya balyn te Profeh`ae balyn tuh hynh-e kawpyapaw`ae ccangning kyahin nynh marya a kyngku,” a cipya. ⁴¹ Farasi`ae pynkheihlan a sueluaku`ae lyakhe Jesu nynh, ⁴² “Kri hynh pawtemou na tua oh? Aning tuh hung Ccaaw mou athua?” cite a khia`ae. Minmin nynh, “David Ccapaw nynh thua,” a ci`ae. ⁴³ Jesu nynh, “Tuhte lanze pawccemou David nynh Muisaw liate amaw kha ‘Bawipaw’ a ci. David nynh a hopaw tuh: ⁴⁴ “ ‘BAWIPAW nynh ka Bawipaw kha, “Na rhaw`ae kha na ccusy lang kae raepya makhia, nang tuh ka ranglang khe dahung,” a cipya,’ a ci. ⁴⁵ “David nynh Kri kha ‘Bawipaw’ cite a ko lanze, pawtemou aning tuh a Ccapaw athua cih?” cite a khia`ae. ⁴⁶ Te bya kawkheit a khung khopaw hung sanmah um khyh; tuh-e nin kyate lukhakheit nynh san byakhia ngan vae khyh`ae.

¹ Oute Jesu nynh ccungccaw zapi te a zuitu`ae kha bya a hopya`ae. ² A hopaw tuh: “Kawbya ccangpatu`ae te Farasi`ae nynh tuh Mawsi tungkhung kya nynh a dahung`ae. ³ Tukeiccu minmin nynh cyi lan ae hopya oh paw miakaw kha hoyte la tuase oh lah la cyih oh; thuasalama mih cyisahnaw`ae hawte la cyih bua nan oh, pawccecize minmin tuh ho`ae zah cyih khyh`ae. ⁴ Pawccecize minmin tuh ri zah phu lan arupaw phupaw kha tung`ae zah ccungccaw`ae mih raw vawlan a khang`ae, thuasalama mimaw tuh mih kuihdung ccangkheit te san nue ry khyh`ae. ⁵ “Thuasalama mih ryalaw`ae balyn kha tuh ccungccaw`ae nynh muih`ae sah cite nynh a law`ae. Mih terui kya te mih kuihbaw kya a khiideku`ae paw saving bung kha kosah`ae zah mih angkile`ae adung kha a ccuasaku`ae. ⁶ Te poi kya ahoy huaccepaw ahangnaw khaan kha ry`ae zah sinakok`ae kya ahoy huaccepaw dahungnaw`ae kha a ry`ae. ⁷ Te kungkunaw`ae kya beihkury`ae zah ccungccaw`ae nynh, ‘Rabbi, Rabbi,’ cite koku a ry`ae. ⁸ “Thuasalama nanning tuh ‘Rabbi’ cite la kokuh ry nan oh; pawccecize Kri athua paw, nanning Ccangpatu lukheit rou nynh a um; te nanning balyn tuh uteno`ae nynh na thua oh. ⁹ Te laephi vawlan hung sanmah ‘Apang’ cite ko nan oh; pawccecize vaawran kya a um paw nae Paaw lukheit rou nynh a um. ¹⁰ ‘Ccangpatu’ cite mah la kokuh ry nan oh; pawccecize Kri athua paw, nanning Ccangpatu lukheit rou nynh a um. ¹¹ Thuasalama nanning laku ale huaccepaw tuh nanning ryalawpatu athua cih. ¹² Te hunghung zemah amaw te amaw a hangthungkuh paw tuh sawbung athua cih; te amaw te amaw zakawsangsakuhpaw tuh hangthung athua cih. ¹³ “Thuasalama kawbya ccangpatu`ae te Farasi`ae, cyihruh`ae, nanning paw ngaethya lan na um oh babang! Pawccecize vaawran peenaw kha ccungccaw`ae elan phe na khaw oh, te naemaw mah na tee khyh oh zah a tee ry`ae paw mah na uapah khyh oh. ¹⁴ Kawbya ccangpatu`ae te Farasi`ae, cyihruh`ae, nanning paw ngaethya lan na um oh babang! Pawccecize numae`ae inn kha na luade oh zah cyisakuthya nawlan saw kha asaepi na sang oh; tukeiccu ale huapaw detahnaw kha na mue cih oh. ¹⁵ “Kawbya ccangpatu`ae te Farasi`ae, cyihruh`ae, nanning paw ngaethya lan na um oh babang! Pawccecize ccungccaw lukheit a beiknaw rulae khylan rili te laephi kya khua na ccung oh, te he yn rulaekuh tuh kha-e paw kha naemaw laeze leih ning kehenna ccapaw lang na rae oh. ¹⁶ “Cciakhaetu`ae mitmoh`ae, paw ngaethya lan na um oh babang! Nanning nynh ‘Hunghung zemah tempal liate ccaesaku ze, tuh-e tuh pawtua um khyh; thuasalama hunghung zemah tempal kya-e sui liate ccaesakuh paw tuh a tynsah aho,’ na ci oh. ¹⁷ Nanning mingaee`ae te mitmoh`ae! Sui tou abapihua, tukhyhze sui a thyaasah paw tempal tou abapihua? Paw hynh mou abapihua? ¹⁸ Te ‘Hunghung zemah silawhang liate ccaesaku ze, tuh-e tuh pawtua um khyh, thuasalama hunghung zemah kha-e vawlan a um paw silawkunawpaw phyate ccaesakuh paw tuh a tynsah aho,’ na ci oh. ¹⁹ Nanning mingaee`ae te mitmoh`ae! Silawkunawpaw tou abapihua, tukhyhze silawkunawpaw a thyaasahpaw silawhang tou abapihua? Paw hynh mou abapihua? ²⁰ Tukeiccu silawhang phyate ccaesakuh paw tuh silawhang te kha-e kya um paw uccaw`ae balyn phyate ccaesakuh paw nynh thua. ²¹ Te tempal phyate ccaesakuh paw tuh tempal te kha-e kya um paw amaw phyate ccaesakuh paw nynh thua. ²² Te vaawran phyate ccaesakuh paw tuh Pachia suitungkhung phyate ccaesakuh paw thua zah kha-e vawlan a dahung paw amaw phyate ccaesakuh paw nynh thua. ²³ “Kawbya ccangpatu`ae te Farasi`ae, cyihruh`ae, nanning paw ngaethya lan na um oh babang! Pawccecize nanning nynh hangmae, pucinan, te khanmuin kha pumhaw pumkheit na pya oh zah Kawbya kyaze akhingcci huapaw atazaenaw, ngaethyaumsanaw te zyn lan umnaw tuh phe na kawtaw oh; hynh-e`ae hynh na cyi lan oh accanpaw nynh thua, te ccangpaw mah cyi leite na um lan oh paw thua khyh. ²⁴ Cciakhaetu`ae mitmoh`ae, masihvaekan kha na ryhbia oh zah kalauk kha po na laang oh! ²⁵ “Kawbya ccangpatu`ae te Farasi`ae, cyihruh`ae, nanning paw ngaethya lan na um oh babang! Pawccecize nanning tuh banang te pake kha avawlan kyalya nynh na sing oh, thuasalama a lungkhu tuh luadenaw te alue lante cyipaw nynh phe abeih. ²⁶ Mitmohpaw Farasipaw, pakekhupaw te banang alungkhu kha masaty singty, ou tuhte ze nynh kha-e`ae avawlan kha mah athyaabua cih. ²⁷ “Kawbya ccangpatu`ae te Farasi`ae, cyihruh`ae, nanning paw ngaethya lan na um oh babang! Pawccecize nanning tuh avaw langte phe apuithya sasaw lante langkuh salamah alungkhu tuh michi`ae ru te athu-anangpaw`ae balynte phe beihpaw arawpaw thuhkuhpaw shawku te nynh na loku oh. ²⁸ Ou kha-e hawte nanning mah avaw langte tuh ccungccaw`ae malang adingpaw hawte nynh na langku oh, thuasalama nae lungkhu tuh cyiruhnaw te kawbya einaw te nynh phe abia. ²⁹ “Kawbya ccangpatu`ae te Farasi`ae, cyihruh`ae, nanning paw ngaethya lan na um oh babang! Pawccecize profeh`ae shawku kha na raepah oh zah miding`ae shaw lungbing kha na paccaan oh. ³⁰ Te ‘Kae minpaaw`ae she lyakhe kae la umbua ze, profeh`ae chii luasanaw kya minmin ryte kae umbua lan khyh,’ na ci oh. ³¹ Tukeiccu nanning tuh profeh`ae a theih`ae paw minmin mih ccaaw`ae nynh kae thua cite naemaw te naemaw hanlan ccaekia`ae nynh na thua oh. ³² Ou tuhte nae minpaaw`ae cyisahnaw tounawpaw kha na biachih oh. ³³ “Nanning fupaw`ae, fuparepaw ciihan`ae! Pawtemou kehenna kya-e detahnaw kyate na lue kho cih oh? ³⁴ Tukeiccu, dotua oh, profeh`ae te ahawpaw ccungccaw`ae te kawbya ccangpatu`ae kha nae kalan kae saw`ae; te minmin lakuze abang kha na theih cih oh zah na khiade cih oh; te abang kha nae sinakok`ae kya na bua cih oh zah khua khuakheit kyate khuakheit kyacia na tua na sah cih oh. ³⁵ Ou tuhte adingpaw Abel chii kyate, tempal te silawhang laku na chia oh paw Barachiah ccapaw Zakharia chii kyacia laephi vawlan alua paw adingpaw ccungccaw`ae chii balyn tuh nanning tungvaw a thua nawlan. ³⁶ Byaccaccing kae hopya oh, hynh-e uccaw`ae balyn tuh hynh-e ccungccaw`ae kyahin oun cyikuh cih. ³⁷ “Profeh`ae a theih paw, na kalan oun saw`ae paw ccungccaw`ae kha lung te a deih paw, pou Jerusalem, Jerusalem, awpinung nynh a taw`ae kha a sake kawlan a suelua`ae hawte na ccaaw`ae kha pynkheihlan suelua lan pei ka ry, thuasalama nang nynh na ry khyh! ³⁸ Dotua oh! Nae inn tuh nanning umnaw kho lei lante a um han. ³⁹ Pawccecize nanning kae hopya oh, ‘BAWIPAW min liate yn thua paw Ccungccaw tuh hythuaccoupaw nynh thua,’ cite na ho oh makhia atu kyate nanning nynh kamaw hynh nae muih vae lan khyh oh,” a ci.

¹ Te Jesu tuh cceih zah tempal kyate a pou; te a zuitu`ae nynh tempal kya-e innsakkuhpaw`ae kha muihsah khylan amaw kalan oun thua`ae. ² Te Jesu nynh minmin kha, “E uccaw`ae balyn hynh na muih khyh oh tou? Byaccaccing kae hopya oh, tingsah bung leite lung ccangkheit vawlan ccangkheit san a khangthykuh paw e kya um lan khyh,” a cipya`ae. ³ Te Oliv Mua vawlan a dahung lyakhe zuitu`ae nynh mih makhaete amaw kalan oun thua`ae zah, “E uccaw`ae hynh hotuhmou yn cyikuh cih? Te nae thuanaw lanpaw te laephi she athangnaw lanpaw paw muihsanaw mou yn langkuh cih? Kaening hynh oun hopah bua,” a ci`ae. ⁴ Te Jesu nynh khung`ae zah, “Hung ccungccaw nynh san ae ling khyh nawlan oh la raeringkuh oh. ⁵ Pawccecize ccungccaw patae nynh ka min te oun thua cih`ae zah, ‘Kae tuh Kri nynh ka thua,’ oun ci cih`ae zah ccungccaw patae kha oun ling cih`ae. ⁶ Te nanning nynh rhawtukkunaw kong te rhawtukkunaw lanpaw kong kha nae thae vae cih oh; tuhzemah nae thinphang nan sah; pawccecize hynh-e uccaw`ae balyn tuh oun cyikuh hahe cih, thuasalama athangnaw tuh thua loh khyh. ⁷ Pawccecize minphuin phuinkheit te phuinkheit, ram ramkheit te ramkheit oun rhawkuh cih`ae; te ccakangnaw yn thua cih, ccinaw yn thua cih, te khyzawvawkaw kya innrui yn suekuh cih. ⁸ Hynh-e`ae balyn tuh vawsaw teingnaw athotakawnaw nynh thua. ⁹ “Oute ccungccaw`ae nynh nanning kha vawrivawsaw nung khylan ae ah cih oh zah ae theih cih oh; te kamaw min keiccuze minphuin`ae balyn nynh ae hua cih oh. ¹⁰ Oute ccungccaw patae tuh oun maeleihkuh vae cih`ae, lukheit te lukheit yn pheekuh cih`ae zah lukheit te lukheit yn huakuh cih`ae. ¹¹ Te ahme leipaw profeh`ae patae oun langkuh cih`ae zah ccungccaw patae kha oun ling cih`ae. ¹² Te kawngae leinaw alung keiccuze ccungccaw patae kya-e sungsakunaw tuh yn zya bung vae cih. ¹³ Thuasalama athangnaw cia atynpaw tuh khum athua cih. ¹⁴ Te hynh-e peenaw thehoypaw hynh minphuin`ae balyn kalan ccaekia lang laephipi balyn kya ho athua cih; oute athangnaw tuh yn thua vae cih. ¹⁵ “Tukeiccu profeh Denial nynh a ho hawte, luathua-ae-ui lang um paw a rohtupaw nynh athyaapaw hmin kya a thadyn paw kha nanning nynh he nae muih vae oh ze, (Ccathyaa a ria paw ccungccaw miakaw tuh thaethya sah); ¹⁶ Judah ram kya um`ae paw nynh mua lang ccue`ae sah. ¹⁷ Inn tungvaw a um paw nynh a inn lungkhu e ccangkhakheit lawku khylan rungbung nan vae sah. ¹⁸ Lei kya um paw ccungccaw nynh mah a boeining lawku khylan ki nan vae sah. ¹⁹ Te tuh-e nin`ae kya ccaawpoipaw nopi`ae te mateizupaw nosi a hoi paw nopi`ae hanlan paw ngaethya lan um babang! ²⁰ Te nanning na ccuenaw oh ccyh tuh khoccih ccyh athua khyh nawlan te Sabbath nin kya athua khyh nawlan saw la sang oh. ²¹ Pawccecize laephipi atho takawte atu cia a la um boi leipaw, te a um boi vae cih leipaw alepipaw vawsawrunawpi tuh yn thua cih. ²² Te tuh-e nin`ae kha dynsah khyh lanze hung sanmah lue lan khyh, thuasalama popaw ccungccaw`ae hanlan kha-e nin`ae kha dynsah athua cih. ²³ “Oute lukhakheit nynh, ‘Dotua, e kya nynh Kri tuh a um!’ tukhyhze khuin nynh a um!’ ae cipya oh ze la zyn nan oh. ²⁴ Pawccecize ahme leipaw kri`ae te ahme leipaw profeh`ae oun langkuh cih`ae zah athua kho ze alepaw muihsanaw te ngaeangnaw kha oun langsakuh cih`ae; ou khate popaw ccungccaw`ae hei kha oun ling cih`ae. ²⁵ Dotua oh, nanning kha phe kae hopyaty vae oh. ²⁶ “Tukeiccu minmin nynh, ‘Dotua, Kri tuh rangkaw nynh a um!’ ae cipya oh ze la cceih nan oh. ‘Dotua, aning tuh akhaan lungkhu nynh a um!’ ae cipya oh ze la zyn nan oh. ²⁷ Pawccecize khozawlaekuhpaw tuh nithua langte yn laekuh zah niccaw langcia a aw hawte nynh Ccungccaw Ccapaw yn thuanaw lanpaw mah athua cih. ²⁸ Pawccecize michihrua a umnaw`ae miakaw kya langtaw`ae mah pynkheihlan a sueluakuh bua cih`ae. ²⁹ “Tuh-e nin`ae kya-e vawsawrunaw koute vaekheihmawte khuanin amoh vae cih zah sawpaw aw vae lan khyh, te awsi`ae tuh vaawlui kyate accah cih`ae zah vaawran kya-e thungnaw`ae tuh oun hy vae cih. ³⁰ “Oute vaawran kya Ccungccaw Ccapaw muihsanaw yn langkuh cih; oute laephi kya-e minphuin`ae balyn tuh oun rah oun khui cih`ae, te Ccungccaw Ccapaw nynh thungnaw te alepaw phu-enaw ryte vaaw lang-e maeking`ae kya yn rung paw kha oun muih vae cih`ae. ³¹ Te myarya accaepaw mungkae roi ryte a vaaw ccungccaw`ae kha yn saw cih`ae zah amaw nynh a po`ae paw kha minmin nynh laephi kipali kyate, vaawran athangnaw sang kheit kyate sang kheit kyacia pynkheihlan oun suelua cih`ae. ³² “Thaeku ku tousenaw phungpaw hynh atu ccangku tua oh; aran ano lya anaw`ae he yn toih tuh hawning ccyh anae vae cipaw na ny oh. ³³ Tuh-e hawte nanning nynh hynh-e uccaw`ae balyn hynh he nae muih vae oh ze Ccungccaw Ccapaw yn thuanaw lanpaw tuh anae vae, thuakaw kin cia yn naekuh vae cipaw la nyh ccavae oh. ³⁴ Byaccaccing kae hopya oh, hynh-e uccaw`ae balyn acyiku kou makhia atu-e ccungccaw`ae zo lan khyh`ae. ³⁵ Vaawran te laephi tuh azo cih, thuasalama ka bya`ae tuh zo lan khyh. ³⁶ “Thuasalama tuh-e nin te ccyh tuh hung nynh sanmah nyh khyh, vaawran um paw vaaw ccungccaw`ae nynh mah nyh khyh`ae, thuasalama ka Paaw kyalya nynh a nyh. ³⁷ Te Noah ccyh lya hawte nynh Ccungccaw Ccapaw yn thuanaw lanpaw mah yn cyikuh cih. ³⁸ Pawccecize tuipayn a thua maw nin`ae kya, Noah nynh sanphalung lungkhu lang a tee nin cia, minmin tuh aete, niate, zudykute, zudypyakute nynh a um`ae. ³⁹ Te tuipayn thua zah minmin balyn pung a cciakhae`ae cia raeringku lanpaw kha nyh khyh`ae; tuh-e hawte Ccungccaw Ccapaw yn thua lanpaw kya acyikuh bua cih. ⁴⁰ Oute tuh-e ccyh lya lei kya a um paw ccungccaw luning laku lukheit kha law athua cih zah lukheit tuh cciataw athua cih. ⁴¹ Sungmia a mia paw luning laku lukheit kha law athua cih zah lukheit tuh cciataw athua cih. ⁴² “Tukeiccu paw suimilan ccyh kya nynh nae Bawipaw tuh yn thua cih cipaw na ny khyh oh keiccuze paccynkute la ngaw oh. ⁴³ Thuasalama e hynh nyh oh; inn hoitu nynh paw ccyh kya nynh miruhpaw yn thua cih cipaw kha phe a ny lanze a inn kha a kiabia khyh nawlan phe a ngaw cih cipaw na ny oh. ⁴⁴ Tukeiccu nanning mah raeringkuh oh, pawccecize na ngaehoi khyh oh ccyh lyakhe Ccungccaw Ccapaw tuh yn thua cih. ⁴⁵ “Te a bawipaw nynh a inn kya-e ccungccaw`ae kha accyh azaw vae ze ae lanpaw a neetu lang, a inn lungkhu a uktu lang a khang paw zyn lan um paw te ahawpaw see tuh hungmou athua? ⁴⁶ Tuhte rya a law paw kha a bawipaw nynh yn thua zah a muihpya paw see tuh hythuaccoupaw nynh thua. ⁴⁷ Byaccaccing kae hopya oh, kha-e see kha a uccaw balyn tungvaw uktu lang a tangsah cih. ⁴⁸ Thuasalama see hoy leipaw nynh a thinlung kya, ‘Ka bawipaw yn thua lanpaw tuh aro ung cih,’ ci zah, ⁴⁹ a ban`ae see`ae kha a bua vae`ae, te a neih`ae paw ryte aete niate a um vae. ⁵⁰ Kha-e see nynh a ngaw khyh nin te a ny khyh ccyh lyakhe a bawipaw tuh mang yn thua lanze, ⁵¹ kha-e see kha ccangning lang thoh bae cih zah a hanpaw tuh cyihruh`ae nynh a ccou`ae paw kha a ccoubua cih; tuin kya rawkhuinaw te hawzynaw a um cih.

¹ “Te vaawran peenaw tuh zudy ccangvaepaw kha cciadue lan mih maeekhua`ae kha ccyngkuh`ae zah a cceih`ae paw liaccady luhaw te nynh aloku. ² Te minmin kyaze lu pangaw tuh haw`ae zah lu pangaw tuh angaee`ae. ³ Angaee`ae paw tuh mih maeekhua`ae ccyngkuh`ae zah maeetui ccyngkuh bia khyh`ae. ⁴ Thuasalama ahaw`ae paw tuh mih maeekhua ryte a bawng kya maeetui kha a ccyngku bia`ae. ⁵ Zudy ccangvaepaw khaw yn ro tuh minmin balyn tuh ngawphukuh`ae zah phe a itheih`ae. ⁶ “Te ziraccyng khe, ‘Dotua oh, zudy ccangvaepaw yn thua vae; amaw te tungku lan nanning oun toikuh ccavae oh!’ cite roi accae. ⁷ “Oute tuh-e liaccady`ae balyn tuh tho`ae zah mih maeekhua`ae kha a paccynku`ae. ⁸ Te angaee`ae paw nynh ahaw`ae paw kha, ‘Nae maeetui abang kha oun pyabua oh, pawccecize kae maeekhua`ae a tui phe athang,’ a cipya`ae. ⁹ “Thuasalama ahaw`ae paw nynh, ‘Tuhte thua khyh, kaemaw hanlan te nanning hanlan zaw lan khyh, a zua`ae paw kalan cceih oh lah naemaw hanlan oun rekuh oh,’ a cipya`ae. ¹⁰ “Te minmin nynh maeetui reku lan a ccia`ae lyakhe, zudy ccangvaepaw tuh yn thua vae; te paccynkute um`ae paw tuh amaw ryte zudy poi kalan a tee`ae; te thuakaw kha phe a khaw vae`ae. ¹¹ “Tuhkoute ccangpaw liaccady`ae tuh mah oun thua`ae zah, ‘Bawipaw, Bawipaw, kaening mah oun hungpah bua!’ a ci`ae. ¹² Thuasalama aning nynh, ‘Byaccaccing kae hopya oh, nanning kae nyh khyh oh,’ cite a khung`ae. ¹³ “Tukeiccu nanning nynh Ccungccaw Ccapaw yn thuanaw lanpaw nin te ccyh kha na ny khyh oh keiccu tuh phang la ngaw oh. ¹⁴ “Pawccecize vaawran peenaw tuh ccungccaw lukheit nynh asawnaw ram lang khuaccung lan noukuh zah a see`ae kha ko`ae zah a uccaw`ae kha minmin kalan a ahpaw hawte nynh athua. ¹⁵ Te luraveih kha amaw a cyi khonaw thyhte, lukheit kha talent ccangpangaw a pya, lukheit kha kaw ning a pya, te lukheit kha ccangkheit a pya; oute palou khuaccungtaw`ae. ¹⁶ Oute talent kaw pangaw a ccou paw nynh cceih zah kha-e te kung a ku, te ccangpaw talent kaw pangaw a mue. ¹⁷ Te tuh-e hawte talent ccangning a ccou paw nynh mah ccangpaw talent ccangning a mue. ¹⁸ Thuasalama talent ccangkheit a ccou paw tuh cceih zah laephi kha thae zah a bawipaw phua kha zya a thuru. ¹⁹ “Ccyhsaepi aro koute tuh-e see`ae mih bawipaw tuh yn thua zah minmin ryte ccazing a tua`ae. ²⁰ Te phua talent kaw pangaw a ccou paw nynh yn thua zah ccangpaw talent kaw pangaw kha yn ccyngbia zah, ‘Bawipaw, nang nynh kae kha talent kaw pangaw nae ah; dotua, kha-e laelan talent kaw pangaw bua ka mue,’ a cipya. ²¹ “A bawipaw nynh kha-e paw kha, ‘Ahoy, zyn lan um paw see hoypaw, uccaw ccapyhpaw kya nang tuh zyn lan na um, uccaw patae tungvaw uktu lang kae rae cih, na bawipaw kya-e lungtuanaw lungkhu lang teebua,’ a cipya. ²² “Talent kaw ning a ccou paw mah yn thua zah, ‘Bawipaw, nang nynh kae kha talent kaw ning nae ah; dotua, kha-e laelan ccangpaw talent kaw ning ka mue,’ a cipya. ²³ “A bawipaw nynh, ‘Ahoy, zyn lan um paw see hoypaw, uccaw ccapyhpaw kya nang tuh zyn lan na um, uccaw patae tungvaw uktu lang kae rae cih; na bawipaw kya-e lungtuanaw lungkhu lang teebua,’ a cipya. ²⁴ “Oute talent ccangkheit a ccou paw nynh yn thua zah, ‘Bawipaw, nang tuh myarya a reipaw ccungccaw, na ccouku leinaw kya a ruekuh paw te na vuaku leinaw kya a sueluakuh paw nynh na thua cipaw kha ka ny. ²⁵ Tukeiccu ka rih, te ka cceih zah na phua talent kha laephi kya ka thuru; dotua na uccaw tuh e kya phang a um,’ a cipya. ²⁶ “A bawipaw nynh khung zah, ‘Seethya-seeruh paw te thawnawpaw, ka ccouku leinaw kya ka ruekupaw te ka vuaku leinaw kya ka sueluakupaw kha na ny. ²⁷ Tukeiccu nang nynh ka phua kha phuarutu`ae kalan na nung lan accan, ou tuhte he kae thua te ka phua tuh amia ryte ka mue vae cih. ²⁸ “Tukeiccu a talent phua kha a kyate laah oh lah talent kaw haw a hoi paw kha pya oh. ²⁹ Pawccecize a hoi paw ccungccaw miakaw kha pyachih athua cih zah pataepi a hoi cih; thuasalama a hoi leipaw ccungccaw kyate a hoithypaw kha heize lawpya athua cih. ³⁰ Te nanning nynh ccungkia leipaw see kha rawnaw te hawzynaw a umnaw atolang mohnaw lungkhu langkhe dae vua oh,’ a cipya`ae. ³¹ “Ccungccaw Ccapaw nynh a phu-enaw te, athyaapaw vaaw ccungccaw`ae balyn ryte he yn rung te, a phu-enaw suitungkhung vawlan yn dahung vae cih. ³² Te amaw malang minphuin`ae balyn tuh oun sueluakuh cih`ae; te tuuringtu nynh a tuu`ae kha mia`ae kyate a phia hawte aning nynh minmin kha lukheit kyate lukheit yn phia cih`ae. ³³ Te tuu`ae kha a ranglang yn nung cih`ae, thuasalama mia`ae kha a voilang khe a nung cih`ae. ³⁴ “Oute Siapharan nynh a ranglang um`ae paw kha, ‘Ka Paaw kya-e hythuaccou`ae paw nanning rang oh, laephipi athonaw kyate nae hanlan paccynpaw peenaw hynh rhoccou oh. ³⁵ Pawccecize kae ka vuelaw lya aepaw nae pya oh, ka tuihaw lya nia lanpaw nae pya oh, kae mikhiapaw ka thua lya innccung nae ua oh; ³⁶ ka sasete ka um lya uccaw nae lawsaku oh, ka ccih zah nae dooih oh, thunginn kya ka um zah nae via oh,’ oun cipah cih`ae. ³⁷ “Oute a ding`ae paw nynh, ‘Bawipaw, hotuh lya mou na vuelawpaw kae muih zah aepaw kae dang? Tukhyhze na tuihaw zah nia lanpaw kae pya? ³⁸ Hotuh lya mou mikhiapaw lang na tang paw kha kae muih zah nang kha kae thua sah? Tukhyhze na sasete na um zah uccaw kae lawsaku? ³⁹ Tukhyhze hotuh lya mou na cci paw te thunginn kya na um paw kha kae muih zah kae paebua?’ cite oun khung cih`ae. ⁴⁰ “Te Siapharan nynh a khung cih`ae zah minmin kha, ‘Byaccaccing kae hopya oh, hynh-e ka uno`ae lakuze adih huapaw lukheit tungvaw na cyi oh paw miakaw kha kamaw kya na cyi oh paw nynh thua,’ a cipah cih`ae. ⁴¹ “Oute a voilang um`ae paw kha mah, ‘Nanning thyalaw`ae paw, diabolos te a vaaw ccungccaw`ae hanlan paccynpya paw zungzae tynpaw maee lungkhu langkhe, kamaw kyate pou oh. ⁴² Pawccecize kae tuh ka vuelaw zah looh nae pya khyh oh, ka tuihaw zah nia lanpaw nae pya khyh oh. ⁴³ Kae tuh mikhiapaw lang ka tang zah nae thuasah khyh oh; sasete ka um zah uccaw nae lawsakuh khyh oh; ka ccih, te thunginn kya ka um zah nae paebua khyh oh,’ cite oun cipah cih`ae. ⁴⁴ “Oute minmin nynh mah, ‘Bawipaw, hotuh lya mou na vuelawpaw kae muih, tukhyhze na tuihaw paw, mikhiapaw lang na tang paw, sasete na um paw, na cci paw, thunginn kya na um paw kha kae muih zah na hanlan ryalawpya leite kae um?’ cite oun khung cih`ae. ⁴⁵ “Oute aning nynh minmin kha, ‘Byaccaccing kae hopya oh, hynh-e`ae lakuze adih huaccepaw lukheit tungvaw na cyi khyh oh paw miakaw kha kamaw tungvaw na cyi khyh oh paw nynh thua,’ cite yn khung cih`ae. ⁴⁶ “Te hynh-e`ae tuh zungzae detahnaw lungkhu lang nynh a cceih cih`ae, thuasalama a ding`ae paw tuh zungzae hiinnaw lungkhu lang nynh a cceih cih`ae,” a ci.

¹ Ou tuhcihte hynh-e a hopaw balyn hynh Jesu nynh he a thangsah tuh a zuitu`ae kha, ² “Nin ning koute Kawtaw Poi a um cipaw kha nanning nynh na ny oh, te Ccungccaw Ccapaw tuh khiade khylan ah athua cih,” a cipya`ae. ³ Oute alepaw ranpibawi`ae te kawbya ccangpatu`ae te ccungccaw piccang`ae tuh Kaiafas acikuh paw ranpibawi lupi inn maepaw langkhe oun sueluakuh`ae zah, ⁴ te minmin nynh Jesu kha lingte kae kyngsah lah kae chia ccaw cite khuakhanku`ae. ⁵ Thuasalama, “Ccungccaw`ae oun pookuh sei cih`ae, poi nin tuh thua nan sah,” a ci`ae. ⁶ Te Bethani khua kya vaethyakaepaw Simon inn kya Jesu a um lyakhe, ⁷ nopinung lukheit nynh myarya aphutepaw mynkhuhpaw satho alabasta lung tuihinbu bukheit kha amaw kalan ccyng zah ae lan cite a dahung lyakhe kha-e kha a lu kya a bu. ⁸ Thuasalama a zuitu`ae nynh kha-e kha he a muih`ae tuh myarya mih thinria zah, “Pawccemou e hynh alakaw lang a tangsah han? ⁹ Pawccecize hynh-e mynkhuhpaw satho hynh phua patae lang zuate ryachi`ae kha pya lanpaw,” a ci`ae. ¹⁰ Kha-e kha Jesu nynh he a nyh tuh minmin kha, “Pawccemou nopinung kha vawsaw na pya oh? Pawccecize aning nynh ka tungvaw ahoypaw rya kha phe a law vae. ¹¹ Pawccecize ryachi`ae tuh nanning kya pei a um`ae, thuasalama kae tuh nae kya pei ka um khyh. ¹² Pawccecize hynh-e mynkhuhpaw satho ka pyn vawlan a bu paw kya aning nynh e hynh ka rhua ccynaw hanlan a paccynpaw nynh thua. ¹³ Byaccaccing kae hopya oh, lae vawlan balyn kya hynh-e thehoypaw honaw miakaw kya, hynh-e nopinung nynh a cyipaw hynh mah amaw liathui nawlan hobia athua cih,” a cipya`ae. ¹⁴ Oute luhaw laening kyaze lukheit athua paw, Judas Iskaria acikuh paw tuh alepaw ranpibawi`ae kalan cceih zah, ¹⁵ “Aning kha nae kalan kae ah ze pawmou nae pya cih oh?” a ci. Te minmin nynh ngunphua phuaccang sungthung kha a riapya`ae. ¹⁶ Te tuh-e ccyh kyate Judas nynh amaw kha phee khylan ccyhhoy kha a ccungku vae. ¹⁷ Te Ransi py leipaw Sanlou Poi masaty nin kyakhe zuitu`ae nynh Jesu kalan oun thua`ae zah, “Kawtaw Poi na ae nawlan pawkyamou na hanlan nae paccynsah ry?” cite a khia`ae. ¹⁸ Te Jesu nynh, “Khua lungkhu lang la cceih oh lah ccungccapaw lukheit kha, ‘Ccangpatu nynh, “Ka ccyh anae vae, na inn kyakhe ka zuitu`ae ryte Kawtaw Poi kae mang cih,” a ci,’ cite la hopah oh,” a cipya`ae. ¹⁹ Te zuitu`ae nynh Jesu nynh a hopya`ae hawte a cyi`ae; te minmin nynh Kawtaw Poi dangkunaw kha a paccyn`ae. ²⁰ Te zete he a thua tuh aning tuh luhaw laening ryte ae lan a dahung`ae. ²¹ Te he a ae`ae tuh Jesu nynh, “Byaccaccing kae hopya oh, nanning laku-e lukhakheit nynh kamaw hynh yn ah cih,” a ci. ²² Te minmin tuh myaryasangkae mih ngaethah zah, “Bawipaw, tuh-e paw tuh kae ka thua zaw?” cite luraveih nynh amaw kha a khia`ae. ²³ Te aning nynh khung`ae zah, “Kamaw ryte pake kya a kuih a pubua paw ccungccapaw nynh kamaw hynh yn phee cih. ²⁴ Amaw konglang azeikuh thyhhawte Ccungccaw Ccapaw tuh a cceih ccaccing cih; thuasalama Ccungccaw Ccapaw a pheetupaw ccungccapaw hanlan paw ngaethya lan um babang! Tuh-e paw hanlan a la pui khyh ze ahoyhua cih paw,” a cipya`ae. ²⁵ Oute amaw a pheetu Judas nynh tho zah, “Rabbi, tuh-e paw tuh kae tou?” a ci. Jesu nynh, “Na ho paw tuh athua,” a ci. ²⁶ Te he a ae`ae tuh Jesu nynh sanlou kha laah zah lungtuabya a ho, te kha-e kha eih zah a zuitu`ae kha pya`ae zah, “Lawkuh oh, ae oh, e tuh ka pyn nynh thua,” a cipya`ae. ²⁷ Te banang kha laah zah lungtuabya a ho koute minmin kha a pya`ae; te, “Nanning balyn e hynh neih oh. ²⁸ Pawccecize e tuh ccungccaw patae seinaw ngaethyanaw hanlan luasah paw byakin thawpaw kya-e ka chiise nynh thua. ²⁹ Thuasalama nanning kae hopya oh, ka Paaw peenaw kya nanning ryte athawpaw misutui ka nia nin a thua makhia, atu koute hynhtahawpaw misutui hynh ka neih boi vae lan khyh,” a ci. ³⁰ Te thehoysanaw law ccangkheit kha a sah kou`ae te minmin tuh Oliv Mua lang a cceih vae`ae. ³¹ Oute Jesu nynh minmin kha, “Atu khuazi kamaw keiccuze nanning balyn tuh nae lung oun thang cih; pawccecize, ‘Tuuringtu kha ka bua cih zah tuuphu`ae tuh pung a phiakuh cih`ae,’ cite azeikuh. ³² “Thuasalama kae tuh ka thothui koute nae malang Galilee lang ka la cceihty cih,” a cipya`ae. ³³ Piter nynh tho zah, “Nang na keiccuze hynh-e`ae balyn tuh a maeleihku`ae zemah kae tuh kharyh ka maeleihkuh lan khyh,” a ci. ³⁴ Jesu nynh Piter kha, “Byaccaccing kae hopya, atu khuazi awkhungpaw a khua maw, kamaw hynh vaethung nae vua cih,” a cipya. ³⁵ Piter nynh, “Namaw ryte phe ka chibua lan zemah nang kha kae vua lan khyh,” a ci. Tuhe hawte zuitu`ae balyn nynh mah a ci`ae. ³⁶ Oute Jesu tuh minmin ryte Kethsemane a ci`ae paw ahmin kya oun thua zah zuitu`ae kha, “Khuhlang khuin ka la cceih cih zah saw ka sang loukaw nanning e kya la dahung hin oh,” a cipya`ae. ³⁷ Te Piter te Zebedi ccaaw`ae luning kha a hoeibua`ae; te a ngaethah vae zah myarya a lungvawsaw vae. ³⁸ Oute minmin kha, “Ka hiinnaw-muisaw tuh chi lan ciate myaryasangkae a ngaethah; nanning e kya um oh lah kamaw ryte ngaw oh,” a cipya`ae. ³⁹ Te ccapyh asawnaw malang rakyh cceih zah bakhung zah, “Pou ka Paaw, athua kho ze e banang nynh kae hynh yn kawtaw sah; tuhzemah kae ka ry hawte thua nan sah, thuasalama na ry hawte thua sah,” cite sawsang. ⁴⁰ Te zuitu`ae kalan thua zah a i`ae paw kha a muih, te Piter kha, “Pawte! Kamaw kha suimilan ccangkheit san nae ngaw kho khyh oh tou? ⁴¹ Tuh-ounaw lungkhu lang na phungku khyh nawlan oh ngaw oh lah sawsang oh; muisaw nynh tuh a ry ccaccing, thuasalama pynsaw tuh a thawzya,” a cipya. ⁴² Vaeningnaw, bua cceih zah, “Pou ka Paaw, hynh-e banang hynh kae nynh nia leite athua kho khyh ze kamaw hynh yn kawtaw khyh nawlan na rynaw thyhte thua sah,” cite saw bua a sang. ⁴³ Te yn thua zah zuitu`ae bua a i`ae paw kha a muih; pawccecize mih mit tuh daekuh vae khyh. ⁴⁴ Te minmin kha cciataw`ae zah bua a cceih, te bya phe alokuh lante vaethungnaw bua saw a sang. ⁴⁵ Oute a zuitu`ae kalan yn thua zah minmin kha, “Na i ung oh zah na hae-ung ung oh tou? Dotua oh, Ccungccaw Ccapaw tuh misei`ae kuih kalan ah ccyh yn thua vae. ⁴⁶ Tho ccavae oh, cceih ccavae oh sih; dotua oh, kamaw yn pheetupaw tuh yn thua vae,” a cipya`ae. ⁴⁷ Te a ho cciamang lya, dotua oh, luhaw laening kyaze lukheitpaw Judas tuh alepaw ranpibawi`ae te ccungccaw piccang`ae nynh yn saw`ae paw ccungccaw zapi ry thaloi te tungbang pung ccyngkute oun thua vae`ae. ⁴⁸ Te amaw a pheetupaw nynh, “Kae nynh kae myng paw ccungccapaw kha tuh Jesu nynh thua, amaw kha kyng oh,” cite minmin kha syntawnaw pya`ae zah a hopya`ae. ⁴⁹ Te Jesu kalan palou yn cceih zah, “Rabbi, na dan khaw!” cite beih zah amaw kha a myng. ⁵⁰ Te Jesu nynh, “Ka ban, paw khylan mou nae thua?” a ci. Oute minmin nynh oun thua`ae zah Jesu kha kyng`ae zah a cciakhae`ae. ⁵¹ Te Jesu ryte a um`ae paw lukheitpaw nynh a kuih thua zah a thaloi kha dungkuh zah ranpibawi lupi seepaw lukheit kha a nakua thoh pae lang a bae. ⁵² Oute Jesu nynh kha-e paw kha, “Na thaloi kha a umnaw kyakhe bua nung; pawccecize thaloi a lawkuh`ae paw balyn tuh thaloi te nynh a chih cih`ae. ⁵³ Ka Paaw nynh vaaw ccungccaw`ae kha atumaw legion haw laening lae alung yn pya nawlan ka Paaw kalan atu sawsangkuh kho lan khyh cite tou na tua? ⁵⁴ Tuhte lanze ‘Hynhte acyikuh cih,’ acikuh paw Ccathyaa tuh pawtemou accing vae cih?” a cipya. ⁵⁵ Tuh-e suimilan ccyh kya Jesu nynh ccungccaw zapi kha, “Miruhpaw a kyng`ae hawte kamaw hynh kyng lan thaloi ry, tungbang ryte tou nae ccianua oh? Tempal kya ccangpyate kae tuh nanning ryte nin takyh ka dahung, te nae kyng khyh oh. ⁵⁶ Thuasalama profeh`ae kya-e Ccathyaa accing nawlan nynh hynh-e balyn tuh acyikuh,” a cipya`ae. Oute zuitu`ae balyn nynh amaw kha vua`ae zah pung ccuetaw vae`ae. ⁵⁷ Te Jesu a kyng`ae paw ccungccaw`ae nynh amaw kha kawbya ccangpatu`ae te piccang`ae a sueluakunaw`ae ranpibawi lupi Kaiafas kalan a cciakhae`ae. ⁵⁸ Thuasalama Piter nynh ranpibawi lupi maepaw kyacia amaw kha asawpi te a zui. Tuh-e maepaw kalan teebua zah athangnaw kha muih khylan tempal ngawtu`ae kyakhe a dahungbua. ⁵⁹ Atu alepaw ranpibawi`ae te piccang`ae, te Sanhedrin kungsi`ae balyn nynh Jesu kha rawsete chia khylan ahme leipaw ccaekia a ccungpya`ae. ⁶⁰ Thuasalama muih khyh`ae; athua, ahme leipaw ccaekia`ae patae athua`ae zemah a seinaw kha muih khyh`ae. Nyathyakou ahme leipaw ccaekia luning oun thua`ae zah, ⁶¹ “Hynh-e paw nynh, ‘Pachia tempal hynh ka roh kho zah nin thung lungkhu ka sakthui kho,’ a ci,” a ci`ae. ⁶² Te ranpibawi lupi nynh thokuh zah Jesu kha, “Kaw kheit san na khung khyh`ae rei? Nang ae rawse`ae paw e ccaekia`ae hynh pawte?” a ci. ⁶³ Thuasalama Jesu tuh daetedae lang nynh a um. Te ranpibawi lupi nynh tho zah, “Nang tuh Pachia Ccapaw Kri na thua lanze yn hopya tua, a hiinpaw Pachia liate nang kha ccae kae sahsaku,” a cipya. ⁶⁴ Jesu nynh, “Nang nynh mang na ho latu. Tuhzemah nanning kae hopya oh, atu koute nanning nynh Ccungccaw Ccapaw tuh thungnaw ranglang kya a dahung paw te vaawran e maeking`ae kya yn rung paw kha nae muih cih oh,” a cipya. ⁶⁵ Oute ranpibawi lupi nynh a uccaw kha ccarae sei zah, “Pachia saryapaw bya kha phe a ho vae, tuh laelan paw ccaekia mou aening aho ung? Dotua oh, atu Pachia a saryapaw bya kha phe na thae vae oh. ⁶⁶ Pawte na tua oh?” a ci. Minmin nynh khung`ae zah, “Aning tuh chi lan accan,” a ci`ae. ⁶⁷ Oute a mae kya mih tuin te thoi`ae zah a thung`ae, te ccungccaw abang nynh mih kuihphe te bia`ae zah, ⁶⁸ “Nang Kri, nang ae bia paw hynh hungmou? Profeh hawte oun hopya tua?” a ci`ae. ⁶⁹ Tuhlya Piter tuh atolang maepaw kyakhe a dahung; te ryalawpatu nung taraw lukheit nynh a kalan yn thua zah, “Nang mah Galilee paw Jesu ryte a umbua paw nynh na thua,” a ci. ⁷⁰ Thuasalama Piter nynh minmin balyn malang pheikuh zah, “Paw nynh na ho cipaw ka nyh khyh,” a ci. ⁷¹ Te Piter tuh maepaw khunglang he a pou te ccangpaw ryalawpatunung nynh muih zah tuin kya a um`ae paw ccungccaw`ae kha, “E paw mah Nazareth paw Jesu ryte a umbua paw nynh thua,” cite a hopya`ae. ⁷² Thuasalama Piter nynh ccaesaku biate, “Tuh-e paw tuh ka nyh khyh,” cite bua a pheiku. ⁷³ Te khuekheih aro koute tuin kya a thadyn`ae paw nynh Piter kalan oun thua`ae zah, “Thanccingte nang mah minmin kyaze lukheit nynh na thuabua, pawccecize na byaho nynh namaw kha phe ae langsaku,” a ci`ae. ⁷⁴ Oute Piter nynh, “Tuh-e Ccungccapaw tuh ka nyh khyh,” cite thyalawkuh zah byakinku vae. Te awkhungpaw palou a khua vae. ⁷⁵ Te, “Awkhungpaw a khua mawze nang nynh vaethung nae vua cih,” cite Jesu nynh a hopya paw bya kha Piter nynh a liathui vae. Te atolang pou zah thawmawte a rah.

¹ Awkhua he a thua tuh alepaw ranpibawi`ae te ccungccaw piccang`ae balyn nynh Jesu kha rawsete chia lante khuakhan`ae. ² Te minmin nynh Jesu kha a hee kou`ae te, cciakhae`ae zah ram uktu Pontias Pilat kalan a ah`ae. ³ Oute Jesu a pheetu Judas nynh Jesu kha chia lante seibe`ae paw kha he a muih tuh ngaesikuh zah ngunphua phuaccang sungthung kha alepaw ranpibawi`ae te piccang`ae kalan bua ccyng zah, ⁴ “Seinaw a hoi leipaw chii ka phee paw tuh phe ka sei vae,” a cipya`ae. Te minmin nynh, “Tuh-e tuh kaening te pawmou asekuh? Tuh-e tuh namaw la do,” a ci`ae. ⁵ Te aning nynh ngunphua phuaccang`ae kha tempal kya dae vua zah phe a pou; te cceih zah amaw te amaw a nging phe a oku. ⁶ Te alepaw ranpibawi`ae nynh ngunphua phuaccang`ae kha khuin`ae zah, “E`ae tuh chii mee athua keiccuze tempal sisua bung lungkhu lang nung lan ccan khyh,” a ci`ae. ⁷ Te minmin nynh khuakhan`ae zah mikhia`ae u nawlan cite lae-ang raetupaw laekua kha tuh-e phua`ae khate a re`ae. ⁸ Tukeiccu tuh-e laekua kha, ‘Chii Laekua’ cite atunin cia ko athua. ⁹ Ou tuhte profeh Jeremiah nynh, “Israel ccungccaw`ae nynh amee a khya`ae paw amaw mee ngunphua phuaccang sungthung kha minmin nynh laah`ae zah, ¹⁰ BAWIPAW nynh kamaw yn hopyasya thyhhawte, kha-e phua`ae kha lae-ang raetupaw laekua mee lang a pya`ae,” cite a hopaw bya tuh yn ccing vae. ¹¹ Te Jesu tuh ram uktu malang thadyn zah ram uktu nynh, “Nang hynh Jew`ae Siapharan na thua tou?” cite a khia. Te Jesu nynh, “Nang nynh mang na ho latu,” a cipya. ¹² Te alepaw ranpibawi`ae te piccang`ae nynh amaw kha seibe`ae zah kawkheit san khung khyh`ae. ¹³ Oute Pilat nynh amaw kha, “Nang kha rawsete minmin nynh ccaekia hozeih nynh a khan`ae cipaw hynh na thae khyh tou?” a cipya. ¹⁴ Te Jesu nynh bya kawkheit san khung khyh, tukeiccuze ram uktu tuh myarya a ngaeangthua. ¹⁵ Te Kawtaw Poi kya ccungccaw zapi nynh a ry`ae paw thungccahpaw lukheit kha ccungccaw`ae kalan ram uktu nynh leih a sawpya`ae. ¹⁶ Ou tuhlya Barabbas acikuh paw a minthaanpaw thungccahpaw lukheit a la um. ¹⁷ Tukeiccu ccungccaw`ae pynkheihlan he oun sueluakuh`ae te Pilat nynh minmin kha, “Nanning nae kalan hungmou nae sawsah ry oh? Barabbas tou? Tukhyhze Kri acikuh paw Jesu tou?” cite a khia`ae. ¹⁸ Pawccecize alepaw ranpibawi`ae nynh mih eiung keiccu nynh Jesu kha a ah`ae cipaw Pilat nynh phe a ny. ¹⁹ Te byapianaw tungkhung vawlan Pilat he a dahung tuh, a zu nynh a kalan ccungccaw yn saw zah, “Kha-e adingpaw Ccungccapaw kha pawsang mah la cyih nan; pawccecize amaw keiccuze atunin ka maan kya myarya ka teing,” cite a hopya. ²⁰ Thuasalama alepaw ranpibawi`ae te piccang`ae nynh Barabbas kha ngiaku lan zah Jesu kha chiasah lan cite ccungccaw zapi kha a hy`ae. ²¹ Ram uktu nynh, “Hynh-e luning`ae kyaze hung hynh mou nae kalan nae sawsah ry oh?” cite minmin kha a khia`ae. Minmin nynh, “Barabbas,” a ci`ae. ²² Pilat nynh, “Tuhte lanze Kri acikuh paw Jesu hynh pawtemou ka cyih cih,” cite a khia`ae. Minmin balyn nynh, “Amaw tuh khiade thuasah,” a ci`ae. ²³ Te ram uktu nynh, “Pawccemou, paw hoyleinaw mou a cyi?” cite a khia`ae. Thuasalama minmin nynh, “Amaw tuh khiade thuasah,” cite houh a sia`ae. ²⁴ Pilat nynh pawpawte mah ka tae kho vae lan khyh`ae, thuasalama keisukeilae houh yn um vae cih`ae cipaw kha he a muih tuh tui kha lawkuh zah ccungccaw zapi malang a kuih kha singkuh zah, “Hynh-e adingpaw Ccungccapaw chiise kyate kae tuh ka lue, e tuh nanning la do ccavae oh,” a ci. ²⁵ Oute ccungccaw balyn nynh khung`ae zah, “Amaw chiise tuh kaening tungvaw te kae ccaaw`ae tungvaw thua vae sah,” a ci`ae. ²⁶ Oute Pilat nynh Barabbas kha mih kalan a sawpya`ae. Te Jesu kha buasah`ae zah khiade khylan a ah vae. ²⁷ Oute ram uktu a rhawkaw`ae nynh Jesu kha Byapianaw Khaan lungkhu lang cciakhae`ae zah rhawkawphu phukheit khaleihte Jesu kalan a sueluakuh`ae. ²⁸ Te minmin nynh a uccaw kha phae`ae zah asepaw boeikhua kha a zingsah`ae. ²⁹ Te hingpaw lukhung kha a khepah`ae koute a lu vawlan a khungsah`ae, te a ranglang kuih kya phaeku kha a ccyngsah`ae; te a malang ccukharutung`ae zah, “Jew`ae Siapharanpaw salan kae pya!” cite amaw kha a sarya`ae. ³⁰ Oute amaw kha mih tuin te a thoi`ae, te phaeku kha lawkuh`ae zah a lu kha a bua`ae. ³¹ Te he a sarya kou`ae te minmin nynh boeikhua kha phae`ae zah amaw a uccaw kha bua a lawsaku`ae, te khiade lan a poukhae vae`ae. ³² Te oun ccia lya`ae, minmin nynh Sairenia khua paw Simon acikuh paw ccungccapaw kha he muih`ae tuh Jesu vaelantung kha puih lan a riase`ae. ³³ Te Luru Hmin a ci`ae paw Golgotha cikuh paw hmin kya he a thua`ae tuh, ³⁴ akhahpaw ryte apykuhpaw misuriapaw kha nia lan Jesu kha a pya`ae; te he a tangtua tuh neih ry vae khyh. ³⁵ Te minmin nynh Jesu kha khiade`ae zah amaw a uccaw kha ccungthy dungte a neeku`ae; ou tuhte, “Minmin nynh ka uccaw`ae kha a neeku`ae, te ka uccaw kya minmin nynh ccungthy a dung`ae,” cite profeh nynh a hopaw bya accing nawlan nynh thua. ³⁶ Te dahungte minmin nynh khe kya Jesu kha phang a ngaw`ae. ³⁷ Te, “E PAW TUH JEW`AE SIAPHARAN JESU NYNH THUA,” cite azeikuh paw, amaw seibenawpaw ccaw kha a lu luki khe a tawpya`ae. ³⁸ Tuh-e ccyh kya damiah`ae luning kha, a ranglang lukheit, te a voilang lukheit amaw ryte a khiade bua`ae. ³⁹ Te laanpi cceih`ae paw ccungccaw`ae nynh amaw kha a sarya`ae, mih lu thuhpah`ae zah, ⁴⁰ “Tempal kha roh zah nin thung lungkhu phe a sakthui paw nang, namaw te namaw kha khumku tua! Pachia Ccapaw na thua lanze vaelantung kyate yn rungtua,” a ci`ae. ⁴¹ Tuh-e hawte kawbya ccangpatu`ae ryte piccang`ae te alepaw ranpibawi`ae nynh mah sarya`ae zah, ⁴² “Aning nynh ming`ae kha a khum`ae, amaw te amaw tuh khumkuh kho khyh. Aning tuh Israel Siapharan athua lanze atumaw vaelantung kyate yn rungtua sah lah amaw kha kae zyn cih. ⁴³ Aning tuh Pachia kha a doliakuh, Pachia nynh a ry lanze atumaw amaw kha luesah tua sah; pawccecize, ‘Kae tuh Pachia Ccapaw nynh ka thua,’ a ciku,” a ci`ae. ⁴⁴ Amaw ryte a khiade bua`ae paw damiah`ae nynh mah tuhhawte a saryabua`ae. ⁴⁵ Suimilan ccangtaruhnaw te ccangtakuanaw cia tuh-e ram balyn tuh pung amoh. ⁴⁶ Te zete suimilan ccangthung loukaw khe Jesu nynh, “Eli, Eli, lama sabach thani,” cite thawte a sia. Asuilan tuh, “Ka Pachia, ka Pachia, pawccemou kae hynh phe nae vuasya?” cipaw nynh thua. ⁴⁷ Tuin kya a thadyn`ae paw ccungccaw abang nynh tuh-e kha he a thae`ae tuh, “E paw hynh Elijah nynh a koku,” a ci`ae. ⁴⁸ Te minmin lakuze lukheit nynh vaekheihmawte ccue zah phuesi tungkheit kha laah zah misuriapaw kyakhe a dung, te phaeku kya hede zah nia lan a pya. ⁴⁹ Tuhlae`ae nynh, “Amaw khate umtua sah, Elijah tuh e paw khum khylan yn thua ta, yn thua khyh ta dotua oh sih,” a ci`ae. ⁵⁰ Jesu nynh thawte bua a sia koute, a muisaw kha a ah vae. ⁵¹ Te dotua, tempal kya-e boei zokhawpaw tuh alu te alia cia ccangning lang ccarae seikuh, te innruisuekuh zah lung`ae akoi. ⁵² Te shaw`ae hungkuh zah a ih`ae paw mithyaa`ae pyn patae tuh tho`ae zah, ⁵³ amaw thothuinaw koute, shaw`ae kyate oun toikuh`ae; athyaapaw khuapi lungkhu lang cceih`ae zah ccungccaw patae kalan a langkuh`ae. ⁵⁴ Tuhlya rhawbawipaw te amaw ryte a um`ae paw nynh Jesu kha phang ngaw`ae zah innruisuekuh paw te tuh-e acyikuh paw uccaw`ae kha he a muih`ae tuh myarya rih`ae zah, “Thanccingte e paw tuh Pachia Ccapaw nynh thua!” a ci`ae. ⁵⁵ Te Galilee ram kyate Jesu kha ryalawpah`ae zah a zui`ae paw nopi`ae patae mah asawpi langte do`ae zah tuin kya a um`ae. ⁵⁶ Tuh-e`ae laku Magdala khua nung Meri, te James te Joses mih nung Meri, te Zebedi ccaaw`ae mih nung a umbua`ae. ⁵⁷ Zete he yn thua tuh Arimathia khua paw Josef acikuh paw mihoipaw tuh tuhlang yn thua, amaw tuh Jesu zuitu mah a thua. ⁵⁸ Tuh-e paw nynh Pilat kalan cceih zah Jesu rhua kha a ngiaku. Oute Pilat nynh Jesu rhua kha pya lan kaw a pya`ae. ⁵⁹ Te Josef nynh a rhua kha he a lawkuh koute athyaapaw boeirawpaw khate a lung. ⁶⁰ Te lung kya a karyn paw athawpaw amaw shaw kyakhe kha-e kha a ccy; te alepipaw lung kha shaw khu mohrae kalan tounua zah phe a cceih. ⁶¹ Te Magdala khua nung Meri te ccangpaw Meri tuh shaw te ahawiliakuh lante dahung`ae zah tuin kya a um`ae. ⁶² Paccynkunaw Nin koute, awkhualan nin kya alepaw ranpibawi`ae te Farasi`ae tuh pynkheihlan Pilat kalan oun sueluakuh`ae zah, ⁶³ “Bawihaepaw, kha-e ccungccaw lingtupaw nynh a hiin lyaze, ‘Nin thung koute bua ka thothui cih,’ cite a hopaw kha kae syntaw. ⁶⁴ Tukeiccu nin thungnaw abia makhia shaw kha varyn ring lan kawpya`ae, tukhyh lanze a zuitu`ae nynh khuazi khe oun cceih cih`ae zah phe oun ruh cih`ae, te ccungccaw`ae kha, ‘Aning tuh chinaw kyate phe tho vae,’ oun cipah cih`ae; tukeiccu nyathyakou e hyngbya tuh masaty-e laeze houh aseihua vae cih,” cite a hopya`ae. ⁶⁵ Pilat nynh, “Nanning a ngawtu phang na hoi oh, la cceih oh, na cyi khonaw oh thyhte akhyn lan la ngawsah oh,” a cipya`ae. ⁶⁶ Tukeiccu minmin tuh cceih`ae zah lung kha tazeih khiate, te a ngawtu kha nungte shaw kha akhyn lan a rae`ae.

¹ Sabbath nin thang zah lonaw nawkheit kyaze masaty nin khuadae takaw lang he yn cih tuh Magdala khua nung Meri te ccangpaw Meri tuh shaw do lan oun thua`ae. ² Te dotua, myarya arupaw innruisuekuh; pawccecize Bawipaw kya-e vaaw ccungccapaw nynh vaawran kyate yn rung zah yn thua, te shaw thufu kyate lung kha tou zah kha-e lung vawlan khe a dahung. ³ A mitmae tuh khozaw hawte thua zah a uccaw tuh vuiraw hawte araw. ⁴ Te amaw rawri`ae keiccuze shaw a ngawtu`ae tuh thyngkuh`ae zah ccungccaw achihpaw hawte nynh thua`ae. ⁵ Te vaaw ccungccapaw nynh nopi`ae kha, “Nanning rih nan oh, pawccecize nanning nynh a khiade`ae paw Jesu kha na ccung oh cipaw ka ny. ⁶ Aning tuh e kya um vae khyh, pawccecize a ho hawte phe a tho vae. Rang oh, Bawipaw a ccynaw`ae hmin hynh oun dotua oh. ⁷ Te arangte la cceih oh lah a zuitu`ae kha aning tuh chinaw kyate phe a tho vae cite la hopah oh; te dotua oh, Galilee lang nae malang a cceih cih, tuin kya amaw kha na la muih cih oh; nanning kha kae hopya vae oh,” a cipya`ae. ⁸ Te nopi`ae tuh ribiate, lungtuanaw alepi te shaw kyate arangte cceih`ae zah a zuitu`ae kha tuh-e thungpang hopya khylan a ccue`ae. ⁹ Te a zuitu`ae kha hopya khylan a ccia`ae lyakhe, dotua, Jesu nynh minmin kha cciadue`ae zah, “Nae lungtua sah!” a ci. Te minmin nynh amaw kalan thua`ae zah a ccu kha pum`ae zah amaw kha a beik`ae. ¹⁰ Oute Jesu nynh minmin kha, “Rih nan oh; cceih oh lah ka neitapaw`ae kha Galilee lang a ccia ccaw`ae la hopah oh, tuin kya minmin nynh kamaw kha oun muih cih`ae,” cite a hopya`ae. ¹¹ Atu tuh-e nopi`ae a ccia`ae lyakhe, dotua, shaw ngawtu`ae abang nynh khuapi lungkhu lang oun thua`ae zah acyihkuh paw uccaw balyn kha alepaw ranpibawi`ae kalan a hopya`ae. ¹² Te alepaw ranpibawi`ae tuh piccang`ae ryte sueluakuh`ae zah khuakhan`ae koute rhawkaw`ae kha phua patae pya`ae zah, ¹³ “Nanning nynh, ‘Kae itheih lya khuazi khe a zuitu`ae nynh oun thua`ae zah a rhua kha phe a ru`ae,’ nae ci cih oh. ¹⁴ Te hynh-e kong ram uktu nynh yn thae ze amaw kha kae soihbia cih zah nanning kha kae khynsah cih oh,” cite a hopya`ae. ¹⁵ Tukeiccu minmin nynh phua kha lawkuh`ae zah a ccangpya`ae thyhte a cyi`ae; te hynh-e bya tuh Jew`ae laku atunin cia po pazaekuh lan a ho ung`ae. ¹⁶ Oute zuitu luhaw laekheit tuh Galilee ram lang Jesu nynh a tawsya`ae paw mua muakheit kalan a cceih`ae. ¹⁷ Te amaw kha he a muih`ae tuh minmin nynh amaw kha a beik`ae; thuasalama abang tuh mih lunghiin. ¹⁸ Te Jesu nynh yn thua zah, “Vaawran kya te laephi vawlan kawhoinaw balyn tuh kamaw hynh pya athua vae. ¹⁹ Tukeiccu nanning la cceih oh lah minphuin`ae balyn kha zuitu`ae lang la rae oh, minmin kha Paaw, Ccapaw te Thyaa Muisaw min kya baptisma-insah oh. ²⁰ Nanning kaw kae pyasya oh paw balyn kha a zui nawlan`ae la ccangpah oh; te dotua oh, laephi she athangnaw cia kae tuh nae kya tyty ka um,” cite a zuitu`ae kha a hopya`ae. Amen.